Ассаламу lалайкум.
👤2895-гla Хаттар: Сан цlинда цхьа шина шарчохь хийцавелла, сиха девне вуьйлуш, чlогlа оьгlазло совъюьйлуш ву. Суна а, берашна а дукха къа дехна цо. Хlинца дукха хан йоцуш элира цо, ас шега вай дlайсакъастахь бераш лелор дац хьуна аьлча, дlаяло делахь, и бераш кхузахь lадда а дитий. Оцу дешнашца цо со йитина хеташ яра со, иза ша иштта аьлла дац а ца элира цо соьга. Юха ша иштта аьлла дац элира цо, юха массийта сахьт даьлча юьтуш аьлла дара бохуш. Со сан доьзалца цlахь ю хlинца, цу юккъе бутт хан яьлла. Цо ша иштта аьлла дацара боху, суна цуьнан ойла хийцаелла дела аьлла хета. Со дlаяхийта аьлла цо и. Амма цо аьлла долчуьнца со муьлхачу хьолехь ю-те? Цуьнан ният хилар билгалдаьлла ца хуьлу цигахь? Сан бакъо юй юхаяха, я иза тхо долче цlа ван?
Ваlалайкум ассалам варахьматуллахӀи ва баракатухl!
✔Жоп: Элчано (саллаллахlу lалайхlи ва саллам) аьлла: «Кхо хlума ду, боккъалла а аьлча а, забар еш аьлча а кхочушхуьлуш: зуда ялор, зуда йитар, зуда юхаялор».
(Абу Давуд: 2194)
➖Зуда ялор, масала, цхьамма аьлла ша шен йоl йоуьйтур ю хьоьга, вукхо ша къобалдо и аьлча, иза кхочушхилла. Зуда йитар баккъалла а, забар еш а шен хlусамнене йитина хьо аьллехь, йитина лору.
➖Зуда юхаялор, масала, стага шен хlусамнана йитина, цо олу-кх телпо а тоьхна, со тlаьхьавогlуш ву хьо дlайига, я цlа йола, иза дола яьлла лору.
Йитина аьллехь хlусамден, хlусамненан юкъметтиге хьоьжур вац, ламаз дисна, я ца дисна хьоьжур вац, йитина аьллехь йитина лорур ю.
Йитар шина кепара ду: нияте хьажа везаш а, нияте хьажа ца оьшуш а.
1️⃣Хьалхарниг: йитина ю хьо ца олуш, масех маьlна хила йиш йолуш дешнаш ду, царах ду хьайн цlа гlо, араяла, яхийтта, хьоьца lийр вац, иштта кхидlа а, и дешнаш я царах тера дешнаш аьллачун нияте хьажа веза, йита ниятца элира ахь, я кхин маьlна дара аьлла, нагахь санна и дешнаш йита ният а доцуш аьллехь йитина лорур яц, амма йита ният а долуш аьллехь, тlаккха йитина лорур ю.
2️⃣Шолгlа дерг: нийсса лелош долу дош ду, иза йитина хьо бохург ду, и дош аьллехь нияте ца хьоьжуш йитина лору.
➖Цхьана меттехь кхузза йитина ю аьллехь, цкъа бен йитина ца лору, масала: ас кхузза йитина ю хьо, я ас йитина ю хьо, ас йитина ю хьо, ас йитина ю хьо, оцу хьолехь цкъа бен йитина ца лору. Нагахь санна йитина, юха дола яьккхина, юха а йитина дола яьккхина, кхоалгlа а йитинехь, тlаккха и зуда хьарам ю цунна, кхечанхьа марехь а хилла цlа яллалц.
➖Цкъа я шозза йитина елахь 3 бутт балале юхаялийчхьана ваьлла, юхаялор муьлхха а ишарца хила мега, масала: схьайола, со тlаьхьавогlуш ву, иштта кхидlа а.
➖Йитина чул тlаьхьа 3 бутт баьллехь керла там-мах а, урдо а луш юхаяло еза. Цкъа я шозза йитина елахь чуьра ара а ца йоккхуш шен хlусамехь йитар дика ду, хlунда аьлча, дlа а ца йохуьйтуш шен хlусамехь lаш хилча марзо юхайогlу, дов а дlадолу. Ткъа кхузза йитина елахь, тlаккха бакъо яц цуьнан шен хилла хlусамден хlусамехь lан, шен цlа яха еза, хlунда аьлча, иза цунна нехан зуда санна хьарам ю.
➖Хlусамда кхелхина йисина йолу зудчуьнан маре яха бакъо яц 4 бутт 10 де даллалц, иштта кечъяла йиш яц, захало тlелаца а йиш яц.
➖Ткъа йитина йолу зуда 3 хьайд дlадаллалц, я 3 бутт баллалц маре яха йиш яц. Нагахь санна доьзалхочух йолуш йитина елахь, и доьзалхо ва ма-винна яха мега, 3 бутт я 3 хьайд дӀадаллалц lен ца еза.
➖Бахьана а доцуш зудчо ша йита аьллехь ялсаманин хьожа а кхетар яц аьлла Элчано (саллаллахlу Iалайхlи ва саллам).
(Абу Давуд: 2226)
#ЗУДАЙИТАР
https://t.me/Yijariyn_hattarsh
