🚩 ਚੜ੍ਹਦੀ ਕਲਾ 🚩

ਅਜਮੇਰ ਸਿੰਘ ਔਲਖ ਦੇ ਨਾਟਕ 'ਇਸ਼ਕ ਬਾਝ ਨਮਾਜ਼ ਦਾ ਹੱਜ ਨਾਹੀ' ਨੂੰ ਪੜ੍ਹਦਿਆਂ...

"ਤੁਸੀਂ ਅੰਮ੍ਰਿਤ ਛਕਿਐ ਉਹਨਾਂ ਸੰਤਾਂ ਤੋਂ ਜਿਨ੍ਹਾਂ ਨੇ ਅੰਮ੍ਰਿਤ ਛਕਣ ਨੂੰ ਸਿਰਫ਼ ਦਾਰੂ ਬੀੜੀ ਦੇ ਨਸ਼ੇ ਛੱਡਣ ਤੱਕ ਸੀਮਤ ਕਰ ਛੱਡਿਐ। ਤੁਸੀਂ ਅੰਮ੍ਰਿਤ ਛਕਿਐ ੳਹਨਾਂ ਚਿਟ-ਕੱਪੜੀਏ ਬਗਲੇ ਭਗਤਾਂ ਤੋਂ ਜੋ ਬਾਣੀ ਨੂੰ ਤੋਤੇ ਵਾਂਗ ਰੱਟੇ ਲਾਉਣੇ ਸਿਖਾਉਂਦੇ ਨੇ। ਤੁਸੀਂ ਅੰਮ੍ਰਿਤ ਛਕਿਐ ਉਹਨਾਂ ਮਹੰਤਾਂ ਤੋਂ ਜੋ ਭੋਲੇ-ਭਾਲੇ ਲੋਕਾਂ ਨੂੰ ਅੰਨ੍ਹੇ ਸ਼ਰਧਾਲੂ ਬਣਾ ਕੇ ਆਪਣੀਆਂ ਧਾਰਮਿਕ ਗੱਦੀਆਂ ਕਾਇਮ ਰੱਖਣਾ ਚਾਹੁੰਦੇ ਨੇ। ਅੰਮ੍ਰਿਤ ਛਕਣੇ ਇੰਨੇ ਸੁਖਾਲੇ ਨੀ। ਤਲਵਾਰ ਦੀ ਧਾਰ ਉੱਤੇ ਤੁਰਨਾ ਪੈਂਦਾ ਅੰਮ੍ਰਿਤ ਛਕ ਕੇ। ਆਰਥਿਕ ਤੇ ਸਮਾਜਿਕ ਨਾਬਰਾਬਰੀ ਦੂਰ ਕਰਨ ਲਈ ਤਲੀ 'ਤੇ ਸੀਸ ਧਰਨਾ ਪੈਂਦੈ ਅੰਮ੍ਰਿਤ ਛਕ ਕੇ! ਅੰਮ੍ਰਿਤ ਛਕਾਉਣ ਲਈ ਦੁਕਾਨਦਾਰ ਸੰਤਾਂ ਦੀ ਨਹੀਂ, ਗੁਰੂ ਗੋਬਿੰਦ ਸਿੰਘ ਵਰਗੇ ਇਨਕਲਾਬੀ ਯੋਧੇ ਦੀ ਲੋੜ ਹੁੰਦੀ ਐ।"

@ShabadShala ਵੱਲੋਂ ਐਪਾਂ, ਸਾਫ਼ਟਵੇਅਰ, ਕਿਤਾਬਾਂ ਵਗੈਰਾ ਬਣਾਉਣ ਦੇ ਮਕਸਦ ਨਾਲ ਹਰ ਤਰ੍ਹਾਂ ਦੀ ਪੰਜਾਬੀ ਸ਼ਬਦਾਵਲੀ ਸਾਂਭਣ ਦੇ ਕਾਰਜ ਤਹਿਤ ਨਾਮ ਇਕੱਠੇ ਕਰਨ ਲਈ 'ਸਿੰਘ-ਕੌਰ' ਐਪ ਦਾ ਲਿੰਕ:
👇🏿
https://shabadshala.github.io/Main/
👆🏿
ਇਸ ਰਾਹੀਂ ਤੁਸੀਂ ਕੋਈ ਵੀ ਪੰਜਾਬੀ ਨਾਮ ਚੈੱਕ ਜਾਂ ਸ਼ਾਮਲ ਕਰ ਸਕਦੇ ਹੋ। ਜਿੰਨਾ ਹੋ ਸਕੇ ਯੋਗਦਾਨ ਪਾਓ ਤੇ ਲਿੰਕ ਨੂੰ ਅਗਾਂਹ ਫੈਲਾਓ। (ਮੋਬਾਈਲ ਉੱਤੇ ਇਹ ਐਪ Chrome 'ਚ ਵਧੀਆ ਖੁੱਲ੍ਹਦੀ ਹੈ)

ਜੂਝਦੇ ਉਹ ਉਰੇ ਜਾਂ ਪਰੇ ਹੋਣਗੇ,
ਮੁਖ 'ਤੇ ਲਾਲੀ ਹੋਊ ਫੱਟ ਹਰੇ ਹੋਣਗੇ।
ਹੈ ਯਕੀਂ ਕਿ ਉਹ ਸਹਿਮੇ ਨਹੀਂ ਹੋਣਗੇ
ਲੜ ਰਹੇ ਹੋਣਗੇ ਜਾਂ ਮਰੇ ਹੋਣਗੇ।

ਇਹ ਵਿਚਾਰਾਂ ਦੀ ਜੰਗ ਹੈ, ਸਵੈਮਾਣ ਦੀ,
ਨਾ ਤਖ਼ਤ ਪਾਉਣ ਦੀ, ਨਾ ਕਿਲੇ ਢਾਣ ਦੀ,
ਇਸ ਜੰਗ ਨੂੰ ਬਗਾਵਤ ਬਣਾਉਣਾ ਕਿਵੇਂ,
ਡਾਢਿਆਂ ਦੇ ਘਰੀਂ ਮਸ਼ਵਰੇ ਹੋਣਗੇ।

ਨਾਅਰੇ ਲਾਉਂਦੇ ਰਹੇ, ਮੌਨ ਧਾਰੇ ਨਹੀਂ,
ਹਾਰੀ ਤਲਵਾਰ ਸੀ ਪਰ ਉਹ ਹਾਰੇ ਨਹੀਂ,
ਉੱਠ ਤੁਰੇ ਨੇ ਤਦੇ ਰਣ ਦੇ ਵੱਲ ਸੂਰਮੇ,
ਜ਼ਖ਼ਮ ਪਹਿਲੇ ਜ਼ਰਾ ਆਠਰੇ ਹੋਣਗੇ।

ਚਰਖੜੀ, ਆਰੇ, ਨੇਜ਼ੇ ਜਾਂ ਤੱਤੀ ਤਵੀ,
ਸਾਡੇ ਚੇਤੇ 'ਚ ਚਮਕੌਰ, ਸਰਹੰਦ ਵੀ,
ਦੇ ਦੇ ਬੇਝਿਜਕ ਭਾਵੇਂ ਮੇਰੀ ਅੱਖ ਨੂੰ,
ਐਸੇ ਮੰਜ਼ਰ ਨਹੀਂ ਓਪਰੇ ਹੋਣਗੇ।

ਪੈ ਗਈ ਆਦਤ ਜਿਨ੍ਹਾਂ ਨੂੰ ਲਹੂ ਪੀਣ ਦੀ,
ਦੇਣਗੇ ਨਾ ਇਜਾਜ਼ਤ ਕਦੇ ਜੀਣ ਦੀ,
ਕਰਨ ਸੌਦਾ ਜ਼ਮੀਰਾਂ ਤੇ ਅਣਖਾਂ ਦਾ ਉਹ,
ਏਸ ਮੰਡੀ ਚ ਵੀ ਉੱਤਰੇ ਹੋਣਗੇ।

(ਕੁਲਵਿੰਦਰ ਕੁੱਲਾ)

ਉਹਦੀ ਰਜ਼ਾ ਤਾਂ...

ਹਾਸੇ ਵੰਡਦਾ ਮੁੱਠੀ-ਮੁੱਠੀ,
ਹੰਝੂ ਭਰ ਪਰਾਤਾਂ,
ਵਾਹ ਸੱਜਣ ਦੀਆਂ ਕਿਆ ਬਾਤਾਂ।

ਉਹਦੀ ਕਚਹਿਰੀ ਉਹੀਓ ਮੁਨਸਿਫ਼,
ਉਹਦੀਆਂ ਕਲਮ ਦਵਾਤਾਂ,
ਵਾਹ ਸੱਜਣ ਦੀਆਂ ਕਿਆ ਬਾਤਾਂ।

ਖੁਸ਼ਬੂ ਬਣ ਫੁੱਲਾਂ ਵਿੱਚ ਮਹਿਕੇ,
ਸੂਰਜ, ਵਿੱਚ ਪ੍ਰਭਾਤਾਂ,
ਵਾਹ ਸੱਜਣ ਦੀਆਂ ਕਿਆ ਬਾਤਾਂ।

ਹਰ ਇੱਕ ਦੇ ਉਹ ਦਿਲ ਵਿੱਚ ਬਹਿ ਕੇ,
ਬਾਹਰ ਮਾਰੇ ਝਾਤਾਂ,
ਵਾਹ ਸੱਜਣ ਦੀਆਂ ਕਿਆ ਬਾਤਾਂ।

ਇੱਕੋ ਜਿਹੇ ਨੇ ਬੁੱਤ ਬਣਾਏ,
ਵੱਖੋ-ਵੱਖ ਨੇ ਜਾਤਾਂ,
ਵਾਹ ਸੱਜਣ ਦੀਆਂ ਕਿਆ ਬਾਤਾਂ।

ਸਾੜ ਕੇ ਮਾਰੂਥਲ ਵਿੱਚ ਦੇਵੇ ,
ਅੱਖੀਆਂ 'ਚੋਂ ਬਰਸਾਤਾਂ,
ਵਾਹ ਸੱਜਣ ਦੀਆਂ ਕਿਆ ਬਾਤਾਂ

ਕਿਸੇ ਨੂੰ ਮੁੱਲ ਦੇ ਖ਼ਾਬ ਨਾ ਦੇਵੇ,
ਵੰਡੇ ਕਿਤੇ ਸੁਗਾਤਾਂ ,
ਵਾਹ ਸੱਜਣ ਦੀਆਂ ਕਿਆ ਬਾਤਾਂ।

ਉਹਦੀ ਰਜ਼ਾ ਤਾਂ ਨੱਚਣ ਵਿਹੜੇ,
ਚੁੱਲ੍ਹੇ ਸਣੇ ਸਬਾਤਾਂ ,
ਵਾਹ ਸੱਜਣ ਦੀਆਂ ਕਿਆ ਬਾਤਾਂ।

ਸਤਿੰਦਰਜੀਤ

ਜੀਣ ਦਾ ਸਿਖਾਦੋ ਮੈਨੂੰ ਦਾਤਾ ਢੰਗ ਜੀ
ਤੇਰੇ ਅੱਗੇ ਮੇਰੀ ਬੱਸ ਇੱਕੋ ਮੰਗ ਜੀ
ਜੀਵਨ ਸੰਘਰਸ਼ਾਂ ‘ਚੋਂ ਕਰੋ ਪਾਸ ਜੀ
ਤੇਰੇ ਅੱਗੇ ਦਾਤਾ ਮੇਰੀ ਅਰਦਾਸ ਜੀ।

ਕੰਗਲਾ ਤੇ ਭੁੱਖਾ ਕੋਈ ਦੁਖੀ ਹੋਵੇ ਨਾ
ਮਿਲਜੇ ਇਲਾਜ ਕੋਈ ਰੋਗੀ ਰੋਵੇ ਨਾ
ਜ਼ਿੰਦਗੀ ਤੋਂ ਕੋਈ ਹੋਵੇ ਨਾ ਨਿਰਾਸ਼ ਜੀ
ਤੇਰੇ ਅੱਗੇ ਦਾਤਾ ਮੇਰੀ ਅਰਦਾਸ ਜੀ।

ਖੁਸ਼ੀਆਂ ਤੇ ਖੇੜੇ ਬਖਸ਼ੋ ਜਹਾਨ ਨੂੰ
ਭਟਕਣ ਦੇਵੋ ਮੇਰੇ ਨਾ ਧਿਆਨ ਨੂੰ
ਗਲ ਵਿੱਚ ਪੱਲੂ ਪਾ ਕੇ ਖੜ੍ਹਾ ਦਾਸ ਜੀ
ਤੇਰੇ ਅੱਗੇ ਦਾਤਾ ਮੇਰੀ ਅਰਦਾਸ ਜੀ।

ਕਵਿਤਾ ਮੈਂ ਰਚਾਂ ਬਖਸ਼ੋ ਸੁਮੱਤ ਜੀ
ਮਨ ਰਹੇ ਨੀਵਾਂ ਉੱਚੀ ਕਰੋ ਮੱਤ ਜੀ
ਤੇਰੇ ਵਿੱਚ ਮੇਰਾ ਪੂਰਾ ਵਿਸ਼ਵਾਸ਼ ਜੀ
ਤੇਰੇ ਅੱਗੇ ਦਾਤਾ ਮੇਰੀ ਅਰਦਾਸ ਜੀ।

ਲੰਘਦੀਆਂ ਉਮਰਾਂ ਨੂੰ ਵਰ ਦਿਉ ਜੀ
ਦਿਲ ਵਾਲੀ ਰੀਝ ਪੂਰੀ ਕਰ ਦਿਉ ਜੀ
ਦੁਨੀਆਂ 'ਤੇ ਕੋਈ ਰਹੇ ਨਾ ਉਦਾਸ ਜੀ
ਤੇਰੇ ਅੱਗੇ ਦਾਤਾ ਮੇਰੀ ਅਰਦਾਸ ਜੀ।

ਬਾਪੂ ਸਾਹਵੇਂ ਕਦੇ ਕੋਈ ਪੁੱਤ ਮਰੇ ਨਾ
ਕੋਈ ਪਿਤਾ ਅਰਥੀ ਨੂੰ ਮੋਢੇ ਧਰੇ ਨਾ
ਬੁੱਢੇ ਵੇਲ਼ੇ ਪੁੱਤਰਾਂ 'ਤੇ ਹੁੰਦੀ ਆਸ ਜੀ
ਤੇਰੇ ਅੱਗੇ ਦਾਤਾ ਮੇਰੀ ਅਰਦਾਸ ਜੀ।

ਦੁਖੀਆਂ ਦੇ ਦਾਤਾ ਤੁਸੀਂ ਹਰੋ ਦੁੱਖ ਜੀ
ਤੇਰੇ ਨਾਮ ਵਾਲੀ ਸਦਾ ਰਹੇ ਭੁੱਖ ਜੀ
ਪੂਰੀ ਕਰੋ ਇੱਛਾ ਬੇਨਤੀ ਹੈ ਖਾਸ ਜੀ
ਤੇਰੇ ਅੱਗੇ ਦਾਤਾ ਮੇਰੀ ਅਰਦਾਸ ਜੀ।

ਛੰਦ ਕਵਿਤਾ ਦੀ ਫੁਲਵਾੜੀ ਖਿਲ ਜੇ
ਰਹਿਮਤ ਕਰੋ ਜੀ ਸਕੂਨ ਮਿਲ ਜੇ
ਨਿਮਰਤਾ ਕਰੇ ‘ਬੂਟੇ’ ਮਨ ਵਾਸ ਜੀ
ਤੇਰੇ ਅੱਗੇ ਦਾਤਾ ਮੇਰੀ ਅਰਦਾਸ ਜੀ।