مَـﮪْنٱز مُحَـمّد.

الإيرانيّين كُل سنة بذكرى استشهاد القادة
يعبّرون عن حزنهم بإستشهاد الحاج قاسم عن طريق مجلس وعزاء ابي الفضل العبّاس "ع"،
لانّه فاقد الكفّين وعزيزهُم سقط كفّه ع ارض بغداد،
السنة احد الشعراء التفت لزاوية اُخرى من كربلاء
وكتب للسيد الخامنئي الّي السنة فاقد رئيسي ونصر الله:
اى يار خُراسانى يارانت كُجان
راستى دست سليمانى كُجاست

ايُّها الرفيق الخُراساني اينَ رفاقك!
كذلك اينَ يد سُليمانيّك!

اذا احنا غُربة هالسيّد من نسل علي ما گادرين نتحمّله،
السيدة زينَب شلون تحمّلت تشوف سيّد شباب اهل الجنّة بين جثث اخوانه وانصاره وحيد في كربلاء!

هيچ اوقات يتهمونا اننا نشبّه مصاب الانسان العادي بالمعصوم،
بالواقع احنا نحاول نفهم كربلاء من خلالهن.

إنّا لله وإنّا إليهِ راجعون.

يا مُقلّب القلوب والأبصار،
يا محوّل الحَول والأحوال،
حوّل حالنا إلى أحسن الحال.🩵

نختم السنة بهيچ لطافة مثلًا:🩵✨

صديقتي دزّتلي انو احد القنوات سائلين شنو القنوات الي فادتكم بهذه السنة،
وگالتلي دخلي ع الكومنتس،
دخلت لگيت من بين كل هالقنوات الچبيرة والي صارلهم سنين ع التلي،
اكو بنات لطيفات ذاكرات قناتي واسمي.
متصدگون هالشيء شگد فرّحني،
ابد ما تصوّرت انو الكلمات العفوية الي اكتبها ممكن تترك أثر بحياة أحد.

شُكرًا الكم هواية،
للرسائل اللطيفة الي تدزوها الي ع طول،
لدعواتكم لذكركم الي بالاماكن المقدّسة،
لوجودكم الي كلش حنون ودافي.
اتمنى ترجعلكم هالمحبّة اضعاف مضاعفة بحياتكم.🩵

١-الله يحبنا بطريقة عقلنا ما مؤهّل انو يدرك هالمحبّة،
بعطائه، بحرمانه،بكل شيءءءء،
يرتّبلك حياتك بهندسة لو تخلص ٦٠٠ سنة متگدر ترتبها بهيچ احترافية وابداع.
يبچّي عبده احيانًا بس بعدها بفترة قصيرة او طويلة تسجدله شكر كونّه بچّاك بقراره وتقديره.

٢-من يوم يومي اگول اهلي اولوية وبعدهم باقي البشر،
هسة لأ،
اهلي اولوية وبعدهم فد گاپ كلششش چبير ويلا يبدي ترتيب باقي البشر،
اول نعم رب العالمين ع البشر انو رزقنا ناس من دمنا ولحمنا يحبّونا ويسندونا بمختلف مراحلنا العمرية وغلطاتنا وصحنا وكلشيء..


٣ـبالابتدائية چنت احب المدرسة لان العشرة بالاملاء يساوي هدايا من بابا وماما وعمو وكل الدنيا،
بالثانوية نافست فلانة وعلانة لمن مليت،
اما هسة لأ،
ماكو املاء بي هدايا،
وزميلات الثانوية الي راحت هندسة وتخرجت والي ما ادري وين صارت ولا عندي اخبارها،
هسة ادرس لانّ تقصيري يعني حياة انسان ممكن تنتهي،
ممكن اكون سبب بحزن عائلة ما ينسون خطئي للابد.
ماعندي احد اسعى ابهره ولا اعرف منو الي وياي بالرحلة حتى انافسه،
انافس نسختي القديمة،
انافس نجاحاتي ، اخفاقاتي ، خسائري وانتصاراتي،
عيني وتركيزي كله ع مهناز،
اوصلها لمكان بسيط يرضيها هاهية كافي.


٤-ما اعرف اذا رح اكون أم بيوم من الايام لولا محد يگدر يحزر المستقبل،
بس ما انكر انّي لمست معنى الامومة بـ ٢٠١٩ مرّة وبـ ٢٠٢٤ مرّة،
وشُكرً لجوري وابا الفضل الّي ثبتولي انو الخالة أُم وانّي امووووت عليهم.


٥-مو دوم ايديك رح تگدر تنقذ ناسك الي تحبهم،
مرّات تخذلهم الحياة وتشوف كسرتهُم بعينك،
وامانةً حقارة الدنيا تتجلّى بهل فقرة،
تضرب سهامها ع ناسك وتخليك مثل العاجز تنظر فقط.
لكنّ،
ربهم يحبهم اكثر منّي واله حكمة بكل شيء.

٦-وعكة صحية وحدة،
حادث واحد ع طريق جامعتك،
كافيات حتى يشرحولك الدنيا شگد زائلة وهوبزتنا هذه من جهلنا لا اكثر.
والا الي يفهم صدگ مثل امير المؤمنين ميشتري دنيانا بفلس.


٧-شهدت ع قصّة حُب ناجحة هالسنة،
وشفت لمعة عيون المُحب وهو يسولف عن محبوبه،
طريقة اعلانه لهل حب گدام كل الدنيا بدون اي خوف او تردد او لحظة تفكير،
خلاني اتيّقن انو الي چنت اقراهن بالروايات قبل من تضحيات وشهامة وموقف موجودات ع ارض الواقع،
بشرط: البنية تعرف استحقاقها
وتكون الطرف الذي يُسعى اليه لا الساعي.
بصراحة؛
هالقصّة بالذات مُمتنّة الها،
لانها راوتني تعريف الحب قبل لا اخوضه اني او تكون الي تجربة شخصية بهذا المجال،
اليشوف النسخة الاصل بيد غيره،
يعرف بالمستقبل يشخّص النسخة الي بيده حقيقية لو فيك!


٨-عيش مثل ما تحبّ،
ما دام مو حرام،
ما ضارلك بشر،
اهلك راضين عنك،
عيششش مثل ما تحبّ.
كل الناس بحياتك محطّات،
وبعمر السبعين رح تتذكّر رحلتك ونستك مراح تتذكّر جارك شنو چان رأيه بيك بعمر العشرينات،
او خالة بنت عمّة فلانة شنو گالت عنك،
مراح تتذكّرهم صدّگني،
يادوبك تسمع خبر وفاتهم وتقرالهم الفاتحة.

٩-اخذلك من الكوكب عائلتك وشكم شخص مقرّب اثره لطيف بحياتك ورحلتك ويساعدوك ع تحديات الدنيا.
وباقي الـ ٧ مليار الله يسعدهم ويبعدهم.


١٠-صديقاتي اللطيفات،
عددكم مو چبير،
لكن اثركم بحياتي كلش چبيييير،
شكرًا لكونكم متحملين مزاجي الجوزائي
والايام الي اعتكف بيها وما أسأل عن احد،
وجودكم بالليالي الصعبة،
فرحتكم الي بالايام الحلوة.
وجودكم بحياتي احد النعم الي اشكر ربي عليها.

٢٠٢٤ علّمتني:

٢٠٢٤م مرّت وخلصت وبعد بعمرنا مراح نگدر نرجعلها،
لكنها ما تركتنا بدون دروس واضافات،
علّمت كل واحد بينا اشياء مستقبلًا رح تتسمّى وعي ، تجارب ،سنوات شبابك الي تعلمت منها.

كُلّ سنة بيها الحلو والمو حلو،
بيها أيّام ضحكنا بيها من كل گلبنا،
بيها لحظات التقينا بيها بالناس الي نحبهم وعشنا وياهم ايام واشهر من العمر،
وبيها ايام ضجنا بيها،
بچينا بيها،
تمرّضنا،
شهدنا ع كسرة گلوب ناس نحبهم،
شهدنا ع مرض والم ناس نحبهم،

لكنّ الرب الرحمن الرحيم
اعظم من انو اصيرله عبد كثير الشكوى،
وبنهاية السنة اگعد اعددله الاحزان،

تعلّمت اخذ من الايام احسنها واحلاها
واشكر ربي عليها،
وايام الحزن هو يعرفها ويعرفنا صبرنا بيها ومتأكدة رح يجازينا عليها.


شُكرًا ٢٠٢٤م.🩵

2024.🩵

2024.🩵

🩵

وحدك اعوفك يا حيدر.💔

الانسان يتصوّر ان مصائب الفاطمية فقط بكسر الضلع،،
بس بالواقع المرحلة الّي بعدها تخوّف وتحزن اكثر.
فكرة الـ:
مجبورة امضي لقبري،
وحدك اعوفك يـ حيدر
وحدك اعوفك.

حيل صعبة،
حيدر الكرّار وحده مع ايتامه بنّص هالأحقاد البدرية والحنينية والخيبرية،
منتظره رحلة من الاذى،
منتظرهم سيف بن ملجم،
السموم،
كربلاء،
السبي،

مصيبة الفاطمية انها البداية..💔

(إِنَّ الَّذِينَ يُؤْذُونَ اللَّهَ وَ رَسُولَهُ لَعَنَهُمُ اللَّهُ فِي الدُّنْيا وَ الْآخِرَةِ وَ أَعَدَّ لَهُمْ عَذاباً مُهِيناً)

نَزَلَتْ فِيمَنْ غَصَبَ أَمِيرَ الْمُؤْمِنِينَ حَقَّهُ وَ أَخَذَ حَقَّ فَاطِمَةَ وَ آذَاهَا، وَقَدْ قَالَ النَّبِيُّ ﷺ: مَنْ آذَاهَا فِي حَيَاتِي كَمَنْ آذَاهَا بَعْدَ مَوْتِي وَ مَنْ آذَاهَا بَعْدَ مَوْتِي كَمَنْ آذَاهَا فِي حَيَاتِي وَ مَنْ آذَاهَا فَقَدْ آذَانِي وَ مَنْ آذَانِي فَقَدْ آذَى اللَّهَ وَ هُوَ قَوْلُ اللَّهِ إِنَّ الَّذِينَ يُؤْذُونَ اللَّهَ وَ رَسُولَهُ الْآيَةَ.


الله لا يجعلنا بيوم من الّي يشملهُم هالوصف،
عسى لا يجي اليوم الّي نكون بي سبب بأذى السيدة الزهراء عليها السلام بدون ما نحس،
يارب ما نأذّي خطها واحنا بالعلن ننتمي اله.

💔

‏"إنّنا لا ننتهي أبدًا من صنع أنفسنا، أشعر هذه الأيام بأنني أواجه نفسي مثل نحَّات يقف أمام صخرة يجب أن يحذف منها كل ما هو غير جوهري."

-خوان خوسيه مياس.

4/Dec/24

أعرف فكرة نشر صور السفر والمطار او ڤيديوهات الخطوبة والمشية والزواج صارت من بديهيات عصرنا،
وصار الي ما ينشرهن وما يشاركهن يُعتبَر محتواه مُمّل وتفكيره قديم.
لكنّ؛
تبقى نظرية اهلنا وايمانهُم التامّ بقول امير المؤمنين "ع" بأن نقضي حوائجنا بالكتمان هو الصح.
سواء اقتنعنا هسة او لأ،
يبقى الصحّ.

ياما وياما زواجات تكنسلت بعد ڤيديوهات الخطوبة الي جابت كومة مشاهدات ولايكات،
وياما وياما اشخاص سافروا وسفرتهم عبارة عن تعب ومرض وهمّ من ورا ستوري نشره ببداية سفرته.

مو دوم تصير صحّ،
بس ممكن تصير؟ إيّ.

لذا:
سافر دون ان تُخبر احد،
عش قصة حُب دون ان تُخبر احد،
والحاجة الي تريدها تتمّ وتدوم
استعين بقضائها والحفاظ عليها بالكتمان.

مو ضروري الناس يشوفون فراشات گلبك،
بگد ما مهم هالفراشات تدوم للأبد.

هالـ ٣ ايام الي بدينا بيهن روتة الطوارئ
واللود والسترس الموجود بمكان اسمه طوارئ
خلّوني اتيّقن من حقيقة انّو كلش ضروري الاشخاص الي بحياتي يكونون صح،
وعلاقاتي كلها تكون صحية وهادئة وآمنة.

اتخيل لو بعد دوام متعب وتراكمات وقلق ومسؤولية حياتي،
اجي الگى رسائل عتب او لوم او سوالف نرجسية وقيل وقال بدل هالرسالة الحلوة الي كاتبتها الي صديقتي تُقى،
بعد ما شاركتها قلقي انو ممكن يكون تأخري بالرد وانشغالنا اثنينا سبب بأن تبرد هالصداقة الي اني هواي احبها..

فـ اي،
رفيق الرحلة هواااااي يأثّر ع كيفية ادائك بالرحلة.🩵

اسمت رو لبامه بى اراده
چشماى تو از سَرَم زياده

از قسمت ديدن تو شادم
از بخت خوشم دل به تو دادم

من نزلنا لمحافظتنا بعطلة التعداد،
چان ع طول الطريق بابا كل شوية يتصل،
كثرن عدد اتصالاته فالسايق باوعلنا اني وصديقتي شوية وگال عندي سؤال
هسة انتن من تتخرجن وتتعيّنن شلون تجازن تعب آبائچن وامهاتچن،
بالاخص انتِ "ويأشر عليه" هسة اني من يمي حسيت بتعبه وهو هلگد يتصل ومنتظرچ،
شلون تجازيه بله؟
عمي والله هيچ ابّ ينحط ع الراس.

بدون اي تفكير شفت نفسي اجاوبه:
وعمو يضل قليل بحقه،
اخلّيه ع راسي وبعيوني وهمّ قليل بحقّه.


ما ادري يا عمّو اذا اگدر اجازي هالأب الرائع الي انتَ ماشفت من تعبه بس المكالمات،
وهالأم العظيمة الي انتَ ماممكن تتخيل شگد تعبت وضحّت علمودي.


كلّ الي اعرفه انّي عايشه يومي من بدايته لنهايته حتى ارضيهم،
حتى أسمع منهم هالـ عفية بنتي الي تطيرلي گلبي.
كلّ الي اعرفه اني اخطي كل خطوة صح علمودهم،
وابتعد عن كلشيء غلط لخاطرهم.


واتمنّى هالدنيا تسمحلي وتنطيني فرصة اجازيهم.🩵
كلشششش اتمنّى،
او بالاحرى ماعندي اُمنية اهمّ من هذه.

نوڤمبر 24.🩵

اينو براى كسانى مينويسم كه فارسى زبان مادريشونه،
روز آخر نوڤامبر يادتون نره خودتونو به يه فيلم باحال وعالى مثل"۵۰کیلو آلبالو"
دعوت كنيد،
وقدم بزنيد وبا صداى چاووشى ساعت ها لذّت ببريد،
باور كن پشيمون نميشى به قول حامد بهداد زندگى كردم حتى به غلط ، پشيمونى يعنى چى!


يادتون نره كـ
از ته دل دوستتون دارم.🩵

لا تقبلون تكونون وي شخص وتشاركوه رحلة سعيه وتعبه الّا وانتو مطمئنّين انّو الكم مكان بنتائج هالسعي وبخططه المستقبلية.
كلش انقهر من أشوف بنات يقضون سنواااات من عمرهم ينطون عاطفتهم ووقتهم لشخص هو ممعترف بيها أمام المجتمع والقانون والدين انّو يريدها.
يعني ماكو أي ضمان بأنها گاعد تصرف وقتها وعاطفتها ع الشخص الصح.
بعدين من يتركها وتجي بنية ثانية ع الجاهز تحصله بعد ما صار إنسان ناضج وناجح ومحقق أحلامه رح تنقهر وتلوم الحياة والقدر والحظ،
لا حبيبتي هنا اللوم الوحيد هو لنفسچ.
انتِ الي دخّلتي نفسچ بمشروع ما معروف نسبة نجاحه شگد.

لذا الوقاية خيرٌ من العلاج،
من البداية كوني صريحة وي نفسچ ووي الطرف المقابل
يحبچ؟
يجي يتقدملچ.
ظروفكم ما تسمح بهذا الوقت؟
عادي ابقي بعيدة عنه ومن ظروفه تسمح يجي يتقدم.
اتس ايزي والله بس انتِ مصرّة تكونين الشخص الموذكي بهذه الصفقة.

الخطوة المُعتادة بعد كل فاينل روتة:🩵

ثالث روتة بالمرحلة الخامسة:
روتة جراحة الكسور والمفاصل:
تمّ بفضل الله ورحمته.✅

چانت اصعب روتة بدون اي مُنافس،
وبنفس الوقت أحلى روتة،
وأرررررررقى دكاترة،
حرفيًاااا أرقى دكاترة.
الصداقة والاحترام الي بينهم كزملاء بعمري ما شفتها بأي مكان آخر.
برانچ رائععععع ويخبّل وممتع ويعني لو ما صعوبته ع الفيميلز وكثرة الاختلاط الي بي چان رح يكون اوپشن خيالي لاسيما ماديًا هم الانكم مالته لطيف؛)

فـ اي كامل والكمال لله.❤️‍🔥


الكسور خلّتني اشوف معجزات رب العالمين بعيوني انو العظم الي انكسر وخلّى المريض نايم بالفراش،
نفسه بعد فترة ينجبر ويرجع المريض لحياته الطبيعية،
فـ فهمت شنو يعني من نخاطب الاله العظيم بنداء:
يا جابر العظم الكسير.
والأهم من هذا صرت أعرف بالتفاصيل شنو يعني من امرأة حامل تتعرض لكسر الضلع وشنو الالم والمضاعفات الي تعيشها،
وهالشيء يخليني افهم مظلومية ومكانة السيدة الزهراء اكثر.


فـ إي،
بكل صعوبات الرحلة نبقى نطلع منها بأشياء مفيدة،
الحمد لله حمدًا كثيرًا.❤️‍🔥

بعد سشن مطوّل ومُتعِب بطابق الكسور
وكومة كيسات وصوت بچي هذا الطفل الما سكت دقيقة،
چنّا نتمشّى بالمستشفى اني وزميلتي ونتناقش انو هالكمّ الهائل من المعلومات شلون رح نگدر نجاوب عليها بالفاينل الخميس؟
تعب ع سترس ع لود،
فجأة قاطعتنا حجية چبيرة بالعمر انطتنا ورقتين بيها نتائج تحاليل (حسيته اختبار لمعلوماتي بالباطنية واني صارلي شهرين ادرس جراحة.🤣)
بس الحمد لله عرفنا نقرا التحاليل صح،
وشرحناهن للخالة وگلنالها لازم ترجع ع المقيم الاقدم بالاستشارية حتى يكتبلها علاجات.
الموقف كله ع بعضه ما اخذ منا 5 د،
بس الخالة ٣ مرات گالت رحم الله والديكم،
الله يوفقچن،
الله يحفظچن.

استغربت هالخدمة البسيطة جدًا أجرها هلگد چبير!
فـ تذكّرت حديث الرسول الاعظم "ص":
(مَن نَفَّسَ عن مُؤْمِنٍ كُرْبَةً مِن كُرَبِ الدُّنْيَا، نَفَّسَ اللَّهُ عنْه كُرْبَةً مِن كُرَبِ يَومِ القِيَامَةِ، وَمَن يَسَّرَ علَى مُعْسِرٍ، يَسَّرَ اللَّهُ عليه في الدُّنْيَا وَالآخِرَةِ، وَمَن سَتَرَ مُسْلِمًا، سَتَرَهُ اللَّهُ في الدُّنْيَا وَالآخِرَةِ، وَاللَّهُ في عَوْنِ العَبْدِ ما كانَ العَبْدُ في عَوْنِ أَخِيهِ).


فـ اي،
بمقاييس ربّ العالمين حتى الافعال البسيطة الها مكانتها واجرها.
بالاخصّ اذا كانت خدمة لعبد من عباده،
هالشيء كلش عظيم عند الخالق والشكر عليه مُضاعَف.

الله يوفقنا ويأهّلنا أن نقدّم خدمة حقيقيّة.🩵

قبل كم يوم شفت فلم موضوعه انّو بنية بعمر الطعشات تلتقي بنسختها بعمر الثلاثينات،
وتضلّ تنصحها وتوجّهها وتمنعها من هواي افعال.
فـ ضلت البنية كلما تريد تقدم ع فعل معيّن تراسل نسختها الاكبر وتسألها هل هذا التصرف صح لو غلط؟


رغم الفلم خيالي ولا يمت للواقع بصلة،
لكنّ من يوم ما شفته واحسّ اكو نسخة چبيرة مني ربما بالاربعينات او الخمسينات
گاعد تراقبني وتنتظر مني افعال صحّ وقرارات مدروسة وانجاز اكثر وصحة افضل وصداقات تضيفلنا وعلاقات تفيدنا
وكلشيء يسهّل ويريّح سنواتنا الاخيرة بهذه الدنيا.

تصبحون ع خير.❤️‍🔥

هاي احلى.🩵

يارب ننام و نگعد نلگه ربنا حل كلشي.

ونگعد الصبح نتظاهر انو الحياة سعيدة.

امشوا خل ننام احسن.

محد جاي يرتكب جريمة بحق نفسه غيرنا.🤣🤣🤣🤣🤣🤣🤣🤣🤣

اني هم هيچ اگول.

مو بله؟

عندچ علم انتِ تخبلين ؟🩵🩵🩵🩵

سيريسلي؟

نصائح؟
بـ 2 بالليل؟
وي موجة الارق وتأنيب الضمير الي عايشتها اني حاليًا؟

زهراء.

عليكم السلام.

سلام عليكم مهناز
عادي تنطينه نصائح احنه طلاب المرحله الاولى عن الحياة الجامعيه

خلأگلب بالانستا بعد،
خلأشوف بعد منو ارتكب جريمة بحق نفسه؟

هفففف.

اني چنت مخليه منبه بـ ٣ ونص.

الحياة بحد ذاتها رحلة مليانة تحديّات،
الواحد من يگعد الصبح لحد ماينام يقاوم ويصارع ويحاول بدون ما يجي يگولك شيء عن تعب هالصراعات والمحاولات.

فـ حاول شگد ما تگدر وجودك لايكون حِمل اضافي ع الناس الي بدائرتك.
ضجت منه؟
بطريقة مختصرة وسريعة اشرحله ضوجتك.
دزلك مسج؟
احترم هالمسج وردّ عليه اول ماتلزم موبايلك.
بينكم سوء فهم؟
اطلب وقت تگعدون تتناقشون بي وتتفاهمون.

لأن المواقف البسيطة اذا تراكمت
رح تتحوّل الى شيء يخوّف.
شيء ممكن يقطع او ينهي علاقتكم بدون ما تحسّ.

فـ اي،
لا تتركون البشر لأفكارهم.
لان الافكار تودّي وتجيب.
حاولوا ع طول تكونون بقمّة الوضوح.
احس حتى عند رب العالمين النا اجر بهذا الفعل،
كونك ما زدت اللود ع عباده وما صار وجودك هَمّ ونكد.

(يَا أَيُّهَا الَّذِينَ آمَنُوا اجْتَنِبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ وَلَا تَجَسَّسُوا وَلَا يَغْتَبْ بَعْضُكُمْ بَعْضًا أَيُحِبُّ أَحَدُكُمْ أَنْ يَأْكُلَ لَحْمَ أَخِيهِ مَيْتًا فَكَرِهْتُمُوهُ..)،

بالجديد ما صرت أنظر للآية نظرة أمر ونهي،
حلال وحرام وجنّة ونار،
لأ..
صرت أشوفهن توصيات لحياة راقية تليق بمكانة الإنسان "خليفة الخالق في الأرض".
أنّي ما أسيء الظنّ،
وما اتجسّس ع حياة غيري،
وما أغتاب،
يعني انّي انسان عندي انشغالاتي،
أحترم وقتي وما اضيعه ع توافه،
عندي مبادئ وقوانين بحياتي،
بإختصار كلهن تصرفات يترجمن انّي وصلت بالرُقي درجة تخلّيني اترفّع عن أفعال ما تليق بيّه..


من بديت انظر للآية بهذه النظرة،
تطبيقها صار أسهل.

🩵

القارئ المُفضّل لأخوي.🩵

الإمام علي "ع" يگول:
(خَوَافِي الْأَخْلَاقِ تَكْشِفُهَا الْمُعَاشَرَةُ.)

يعني انتَ ما تگدر تحكُم على انسان حكم كامل وتامّ من لقاء واحد،
او حوار واحد،
ولا حتّى من اراءه واقواله على السوشل ميديا.
ماكو انسان يجي يگولك:
مرحبا اني مو زين.
او مرحبا اني صفاتي السلبية كذا وكذا.
اكيد يخبّيهن تحت الف غطاء،
ويتظاهر بألف مظهر زين.

لذلك:
تعلّم تتعامل مع الناس بشويّة حذر،
انطي للزمن فرصة بأن يظهرلك معدنه.


وهذه نضيفها ضمن أقوال اهل البيت "ع"
الّي هدفها ترتّبلنا حياتنا،
وتعلّمنا شلون نكون اذكياء بعلاقاتنا الاجتماعية.

الله ينصرهُم ويثبّت أقدامهم بحق محمد وآل محمد.

يبدو أن الأوضاع الان قاسية في الجبهات واخواننا يخوضون قتالات ضارية

لا تنسوهم من دعائكم احبائي فنحن أبناء الدعاء الذي تتبعه الاسباب وللدعاء تأثير عظيم لا ندري متى يقلب الموازين أو يعجل بالنصر الموعود

الحمد لله.🩵

💔💔

اُسامة مروة يوتيوبر ضمن گروب من يوتيوبرز دُبي،
چنت متابعتهم قبل من ايام الاعدادية.
گروب اصدقائه كلهُم عبر السنوات عاشوا قصص حب وعلاقات مختلفة،
كل فترة يرتبطون بوحدة مشهورة يصعدون نسب مشاهداتهم براسها وبعدين يتركوها،
الا هوَ،
صارله ٣ سنين يحب شيرين وكلها شاكّه انهم بعلاقة،
وبرُغم كل هالاضواء الي عليهم بقى محافظ ع سريّة هالعلاقة وخصوصيتها،
وما بيوم طلع وياها ببث او ڤيديو ولا حتى صورة
حافظ عليها من انظار وكلام ملايين الناس الي يتابعوهم،
والاحلى من هذا انّه تقدملها بالطريقة العربية الي نعرفها،
وعقدوا عقد شرعي بالطريقة الاسلامية الصحيحة،
وبعدها فاجأها بهذا الپروپوزل بإيطاليا.

رُغم اختلافي الفكري والعقائدي مع اُسامة،
لكن دوره بقصّة الحُب هذه تخليني هواي احترمه.


واييي،
من زماااااان ما شفنا لمعة عيون حقيقيّة مثل الي بالڤيديو.✨

💘💘

آب از سَــرش گُـذشتِـه،
علی «ع» راٰ خبَر کنید

بكُلّ ما في الحياة من قسوة لكنّ تبقى جُملة:
"على هذهِ الأرض ما يستحقّ الحياة"
حقيقيّة.

أكو أهل وبيت دافي منتظريك ترجعلهُم بنهاية اليوم،
أكو صديق يعرف يمد ايده من نهاية الدنيا ويطبطب عليك،
أكو مكالمة جماعية تسولف وتستمتع بيها لدرجة تنسى انّو مرّت ساعات ع بدئها،
أكو إمام يدعوك لزيارته بين فترة وفترة،
أكو قصيدة تردّدها وي القارئ وتحس بكل كلماتها،
أكو كوب مشروب دافي تلزمه بإيديك اثنينهن ولسّاك مثل طفل صغير تحب اثر بخاره ع عدسات مناظرك.
أكو غيمة قرّرت تطلع اليوم بس لحتى تشوفها عيونك،
أكو فراشة اختارت تجي قريب منك حتى تبتسم من تشوفها،
أكو أحد ساعدته ونسيته وهو لساه يتذكرك ويگول رحم الله والديه،
أكو طفل حَبّ الرسم ورا ما مدحتله رسماته وقرر يصير فنّان بسببك،
أكو طبخات ماما اللذيذة الي منتظرتك ترجع للبيت،
أكو مدينة تجنّن تحبّك وتشتاقلك وتفتقدك من تغيب عنها،

والمهمّ الأهمّ:
أكو إمام حَيّ موجود يمكن بالقرب منك
ويمكن بمكان بعيد
يعرفك ويحبّك ويدعيلك
وناطي وعد انّه بطريقة مستمرّة غير منقطعة ما هامل رعايتك ابد.


لذا عيش بأحسن طريقة
واستمتع واستلّذ بهلـ رحلة،
قدّم احسن ما عندك،
ولتضيّع ثانية من وقتك بالنكد،
لأنّو:
على هذه الأرض ما يستحقّ الحياة.❤️‍🔥

بنهاية اللعبة وحدة من صديقاتي گالت حرامات ضيّعنا وقتنا وخسرنا،
جاوبتها صديقتي الثانية:
بس صنعنا ذكريات تجنّن،
بعد عشرات السنين تبقين تتذكريها.


واحسّ فعلًا،
بعد عشر سنين من اتذكّر انّي قضيت ساعات ارتّب مكان الگعدة ووي ٢٠ شخص من مختلف المحافظات والمذاهب شجّعت بلدي وضحكت واحتفلت بأبسط الفرص.
رح ابتسم.

وهذا الي يحتاجه الانسان:
انّو يكون عنده مخزون ذكريات تخليه يبتسم.🩵

صديقتي نزلت وعافتني يباووووو.🥲

يلا ارجع لبؤسي.

من لم يزرنا والديار مخيفة
لا مرحبًا به والديار امان

عروضكم عظيمة لكن التوقيت غلط،
رح تخلص الامتحانات.🤣🤣🤣

لو گايله يبطلني بيها مجال.

خوب اروح للزيارة وي اهلي،
وامي تجيبلي ورد،

والله يا فاطم مسخته هواي هالمهناز.🤣🤣🤣🤣🤣🤣🤣

ييجيج رَجل مرتب و ياخذج زيارات و يهديج بوكيه ورد بالشال الكشميري
تسوى الف ملزمة شتگولين ؟🙈🙈

أنتِ مهناز يصعب عليچ هذا الامتحان!
روحي ادرسي عليّ وياچ عليّ

لا عدا الشقة گايز ادعولي صدگ.

انسب توقيت.

تفكير منطقي،
خليها لفاينل الجلدية.

گلت راح تتنازل وتگول بالزواج لأن مزنوقة حاليًا

الاولى چان المفروض تدعيها بليلة الجلدية مو هسة.

النجاح طبعًا.

بشنو إدعيلچ بالزواج لو النجاح ؟

اعوضكم ان شاء الله من اصير دكتورة شاطرة وبزنس وومن.🌝🧸

اذا بيوم من الايّام قرّرت أفتح باب گلبي لأحد وأخلّيه يصير اول وآخر شخص ينفتحله هالباب،
مراح احچي عنّه هواي لأهلي وصديقاتي،
ولا راح اخلّي يوزره بپروفايلي،
ولا بلّمات البنات والنسوان اقاطع شكاويهنّ بمديحي اله وانّو هو يختلف عن ازواجهنّ،
ولا راح اسويله تاگات ومنشنز هواي وبكل الريلزات الّي تظهر لمتابعينا،
ذنّي افعال للناس اكثر ما النا اني وهوَ..

اريد ينشاف وجوده بحياتي بدون ما اشير اله،
بلمعة عيوني،
بصحتي،
بنجاحي،
بتحسّني،
بتطوّري،
بضحكتي،
براحة بالي،
بطمأنينتي،
بنصوصي،
بإبداعي،
بأحلامي الي وياه تحقيقهن صار اسهل،


مثل مصدر النور الّي مهما تغطّيه وتضمّه يبقى يشعّ.
هيچ اريد اضمّه بگلبي ونور وجوده ينعكس بملامحي وحياتي.🩵

هنيال الأحلام الّي الواحد يرفع ايديه تحت المطر خاطر يطلبها من ربنا.🩵

جوري بنت أختي هالسنة تداوم روضة تمهيدي،
فـ يوميًا ويّ كل حرف ورقم ورسمة جديدات تتعلّمهن،
امها تصوّرها ڤيديو وتدزّه بگروب العائلة ونگعد واحد واحد ندزلها ڤويزات نصفّگلها ونمدحها ونشجّعها،
واذا احد بينا تأخّر بالرد او ما بالغ بالمديح تضوج وتعبّر عن ضوجتها.
يعني كلش عادي بنّص دواماتنا وامتحاناتنا اختي تتصل علينا ليش مامدحتوا جوري ترا خطية كومة تعبت اليوم وهيَ تكتب حرف الراء...😂🩵


تخيَّل لو الحياة مستمرّة تعاملنا مثل اطفال الروضة!!❤️‍🔥

متحمّس هالنوڤمبر والله.🌞

صباح الخير وجُمعة مُباركة يارَبّ،
لتنسون تتمشّون بالجوّ الحلو وتتأمّلون هالغيوم اللطيفة،
وتسمعون هالدعاء وتسلمون على امام هالزمان وهالعصر وهالدنيا كلها.🩵


وتدعولنا.✨

🩵؛

يارَبّ يكون نوڤمبر لطيف.🩵

بس هوَ فعلًا الحياة مو دوم تنطيك جائزة.
حقيقة مُتّفَق عليها.

الصبح واني طالعه من محاضرة الاخلاقيات گلت لصديقتي ليش ماخذوا حضور،
اني عايفه تراكمات الامتحان وجايه بس علمود درجة الحضور،
گالت:
ترا الحياة مو دوم تنطينا جوائز.
لازم نتعوّد نسوّي اشياء بدون ما نحصّل جائزة،
گلت الها ماعليه اريد ارگع رجليه بالگاع مثل الاطفال واصيح اريد جائزة.
گالت مفيش اوپشن زي دا،

كملت سشن رحت للاستشارية،
طلعوا البنات من وقت وبقوا طلاب اثنين واني،
الطالب گاله للدكتور هي الكسور مو للبنات،
صعبة عليهن وكذا،
فالدكتور گاله لا بس عندكم مهناز شاطرة.
ومن ردت اطلع انطاني مجموعة اشعّة زايدات عندهم گال ذني هدية الچ اقري عليهن.

طول الطريق احس بفرحة اطفال الابتدائية من يحصلون الشريط الاحمر مال الشطّار.


فـ إيّ،
الله سمع حتى طلبي البسيط الي چنت اسولفه بشقة.
وقرّر يدزلي جائزة.🩵



م/ الأشعّة بالنسبة للي عنده مد وروتة كسور،
تعادل ستمية بوكيه ورد.💅

بعيدًا عن الحلال والحرام والجنّة والنار،
منطقيًا كدا بالعقل،
منظر البنيّة الّي بكل خطوة من حياتها مخليه اهلها بين عيونها وتفكّر بجهدهُم وسمعتهُم ومكانتهُم بين الناس،
وماتسوّي اي فعل بدون علمهُم.
وحياتها عبارة عن سعي واستمتاع واحلام وانجازات وطموحات،
هواي ارقى وانزَك وألطَف من منظَر البنيّة الّي تغيّر ستايلها بس تبتعد عن اهلها،
وبحجّة الدراسة تطلع من الصبح لليل وي شخص اهلها ميعرفوه،
وبدل متگعد وي نفسها واهلها وصديقاتها وتتونس وتستمتع بوقتها وياهم،
تلگاها بالساعات تراسل وتتصل بشخص ما الها اي مكان بمخططاته المستقبلية،
وبدل متنام بالليل وترتاح وتگعد تلاحق احلامها وتسعى الهن،
تشوفها للصبح حايره تتصل وتفتح كاميرا وتسعى ان ترضي شخص ما يشوفها سوى ونسة مؤقتة لا اكثر.

حتى من نتجرّد من الدين وتعاليمه
وننظر للبنتين ونتأمل حياتهن
لاإراديًا تشوفنا نحترم ونقدّر الاولى اكثر.
لانها ببساطة محترمة نفسها،
والي يحترم نفسه يفرض احترامه ع المجتمع.🩵

صباحُ الخير،
أمّا بعد:
﴿اللَّهُ نُورُ السَّمَاوَاتِ وَالْأَرْضِ﴾.
يعني كلّ هالنور الي تشوفه من تفتح عينك لحد ماتغمضها هو نور الخالق العظيم الي قادر على كل احلامك وامنياتك.

اليوم بنهاية محاضرة الكسور الدكتور طلب منّا نغمّض عيوننا ونفكّر شنو تعلّمنا من المحاضرتين الي شرحهُم هوَ النا،
ونكتبله الاشياء الباقية ببالنا ايًا كانت.

وگال اريدكُم تتعلّمون من هالتجربة،
انكُم تصفنون وي نفسكُم وعلى افعالكم واقوالكم ومشاكلكم وعلاقاتكم وصداقاتكم ودراستكم حتى تلگون الها الحلّ المُناسب.


هالفكرة مبدئ عظيم من مبادئ علم النفس والعلم الحديث هواااي يستخدمها،
تلث ارباع اجتماعات الشركات العالمية مبنية ع هالمبدئ انهُم يجتمعون ويناقشون نجاحاتهم واخفاقاتهم،
الپوينت انّو هالمبدئ مذكور بأحاديث اهل البيت عليهم السلام قبل ١٤٠٠ سنة.

"يا أبا ذر! حاسب نفسك قبل أن تحاسب، فإنه أهون لحسابك غدا، وزن نفسك قبل أن توزن، وتجهز للعرض الأكبر يوم تعرض لا يخفى على الله خافية"
ـرسول الله "ص".

"ما أحق الإنسان أن تكون له ساعة لا يشغله شاغل، يحاسب فيها نفسه، فينظر فيما اكتسب لها وعليها في ليلها ونهارها"
-امير المؤمنين "ع".

"ليس منا من لم يحاسب نفسه في كل يوم، فإن عمل خيرا استزاد الله منه وحمد الله عليه، وإن عمل شيئا شرا استغفر الله وتاب إليه".
-الإمام الكاظم "ع".


فـ إيّ،
هَم حاسِب نفسك،
وهَم انبهر بروعة هالدين والمذهب الّي تتّبعه.

أمير المؤمنين عليه السلام،
هو الشخص الوحيد الي ارجع اقرا كلامه مرتين تلاثه وافكر بي عشرين الى تلاثين مرة.

صَباح الخير،
أمّا بعد،
يگولون انّو حنيّة الدنيا كلها لا شيء يمّ حنيّة الأُم،
وبإعتقادي حنيّة أُمّهات الدنيا كلها لا شيء يم حنيّة السيدة الزهراء عليها السلام.
لذا:
كُلّ ما حسّيت انّك تحتاج سند تتكّئ عليه وتظهرله ضعفك،
شخص ثقة تسولفله أسرارك،
حضن دافي وآمِن ترجعله بعد يوم مُتعِب،
تذكّر انّو ابواب هالأُم الحنون دائمًا وابدًا مفتوحة گدّامك.
فهي بنت الّي ارسله ربنا رحمةً للعالمين.

يا زهراء مَدد.🩵

الحمدُ للّه حمد الشاكرين.🩵

🩵

أريد أعلّق ع موضوع بس ما اعرف يُعتبَر تدّخل بشؤون الآخرين لولا!
ان شاء الله ينشاف نصيحة ومحبّة لا اكثر.

فكرة انّچ تعرضين علاقتچ العاطفيّة بريلز وستوريز فكرة مش منطقية،
هدف وجود هالشخص بحياتچ هو لإسعادچ ولمشاركتچ باقي سنين عمركم،
اطلاقًا مو هدفه تظهريه للناس حتى ينشاف الحُب بينكم والهدايا والسفر والوناسة واللحظات الحلوة.
اولًا: امير المؤمنين عليه السلام ينصحنا بأن نستعين في قضاء حوائجنا بالكتمان
فـ يعني انّو مادامچ ببداية العلاقة انطي وقت لجذور هالعلاقة تتثبّت وتصير قويّة ومستقرّة يلا سولفي عنها لغير المقرّبين.
ثانيًا: الحسد مذكور بالقرآن الكريم وبأحاديث ائمّتنا "ع"،
فـ يعني لتجين بعد سنة تستغربين من المشاكل الي بينكُم،
ثالثًا: ليش لحتى زميلتچ بالدوام وبنت عمچ وبنت خالتچ يعرفون انتو ليا مطعم طلعتوا ووين سهرتوا ويا فستان لبستي ومن يا محل مجوهرات اشترالچ خاتم هدية،
ذني تفاصيل سبشل بينكم وحدكم،
تفقد مكانتها لما تتشارك مع الغرباء.
رابعًا: صنعي انجاز يصيرلچ محتوى،
عوفي زوجچ واطفالچ ذولي اسمهم عائلة،اسرة،فاملي،
بس مو محتوى للاكسبلور والنوت والستوريز والترندات.
خامسًا: بصفتنا متابعين الچ،
شعور كلش محرج واحنا نعرف هلگد تفاصيل عنكم ونحس نفسنا عايشين وياكم،
اكو جزء من هيبتكم احسها تقل من نعرف عنكم اشياء خاصّة ونشوفكم بلبس البيت وع الاكل وبالغرفة والمزح والضحك وكلشيء.

سادسًا: صدگي الي مينشرون شيء عن علاقتهم العاطفية وشهر العسل والهدايا والمراسلات والحب الي بينهم،
عايشين عشر اضعاف السعادة الي انتِ عايشتها.
والدليل:
سعداء لدرجة ما محتاجين يثبتون هالسعادة لأحد،
ويحتفظون بالصور والذكريات بألبوم،
مو بسوشل ميديا امام عشرات الناس.

يمكن الحياة بخلت عليك بهلـ رسالة،
حاول انتَ تكون كريم ويّ نفسك،
و بنهاية اليوم تگول الها:
شُكرًا لأنچ قاومتي يوم اضافي بهذا الكوكب.
وشُكرًا لأنچ ملتهية بينا بسّ،
بأحلامنا،
صحّتنا،
مستقبلنا،

أحبّچ هواي.🩵
وأحتاجچ تبقين وياي باچر هَم.