Lovedface የተወደደ መልክ

🟠 በትምህርት ቤት የሂሳብ ትምህርት ላይ ቁልፍ መያዝ ያለብን ነገር ፎርሙላ ነበር። አንድ ሰው ፎርሙላ ካለው ጥያቄዎችን (Problem) መመለስ ይችላል። በፎርሙላው ውስጥ ቁጥሮቹ ይሞሉና መልሱ ይገኛል። መፅሀፍ ቅዱስ አባቶች የሄዱበት ውድቀት የሌለበት መንገድ እንዳለ ይናገራል። ይሄ መንገድ ሁሌ ይሰራል። ፎርሙላ ነው። በትክክል ከተጠቀምንበት የማይሰራበት አጋጣሚ የለም። በእርግጥ የእግዚአብሔር መንገድ ውስጥ ግምት የለም። ድንገት ሊሰራ ይችላል ብለን የምናደርገው ነገር የለም። ምክንያቱም ፃድቅ በእምነቱ በሕይወት ይኖራል ተብሎ ተፅፏል።
 
🟠 ይህ ውድቀት የሌለበት መንገድ ፀሎት ይባላል። ጌታ በፍፁም ለፀሎት ምላሽ ላይሰጥ አይችልም። ስለፀሎት እንዲሀት ተብሎ የተፃፈውን አስታውሱ… “እግዚአብሔር እንኪያስ ቀንና ሌሊት ወደ እርሱ ለሚጮኹ ለሚታገሣቸውም ምርጦቹ አይፈርድላቸውምን? እላችኋለሁ፥ ፈጥኖ ይፈርድላቸዋል።” (ሉቃ 18፡7)። ፎርሙላውን እየነገረን ነው በዚህ ስፍራ። እግዚአብሔር ከፀለያችሁ ፈጥኜ ምላሽ እሰጣለሁ እያለ ነው። ሃሌሉያ! እግዚአብሔር የሚገኘው በግምት አለመሆኑ ደስ ይላል። አባቶቻችን በዚህ መንገድ በድፍረት ነበር የሚሄዱት። አንድ ጊዜ ንጉስ ናቡከደነፆር ህልምን አልሞ ህልሙን ከነፍቺው የሚነግረውን አጥብቆ ፈለገ። ማንም ሊነግረው ባለመቻሉ ጠቢባን ሁሉ ይገደሉ ዘንድ ትዕዛዝ ወጣ። ዳንኤል ግን ቀን እንዲሰጠው ለመነና ያን ውድቀት የሌለበት መንገድ ተጓዘ… “የዚያን ጊዜም ዳንኤል ወደ ቤቱ ሄደ። ዳንኤልም ባልንጀሮቹም ከቀሩት ከባቢሎን ጠቢባን ጋር እንዳይሞቱ ስለዚህ ምሥጢር ምሕረትን ከሰማይ አምላክ ይለምኑ ዘንድ ነገሩን ለባልንጀሮቹ ለአናንያና ለሚሳኤል ለአዛርያ አስታወቃቸው። የዚያን ጊዜም ምሥጢሩ በሌሊት ራእይ ለዳንኤል ተገለጠለት ዳንኤልም የሰማይን አምላክ አመሰገነ።” (ዳን 2፡17-19)። ሃሌሉያ! መልስ ላይቀበሉ አይችሉም። ምክንያቱም ወደ ወደ እግዚአብሔር መፀለይ የግድ መልስን ያስገኛል።
 
🟠 በሐዋርያት ዘመን ሄሮድስ ያዕቆብን ሲገድል ሕዝቡ ደስ ስለተሰኘ ጴጥሮስን ጨምሮ ያዘው። ያዕቆብን እንደገደለ ጴጥሮስንም ለመግደል ነበር የያዘው። ነገር ግን መፅሀፍ ቅዱስ “ጴጥሮስም በወኅኒ ይጠበቅ ነበር፤ ነገር ግን በቤተ ክርስቲያን ስለ እርሱ ወደ እግዚአብሔር ጸሎት አጥብቆ ይደረግ ነበር” ይላል (ሐዋ 12፡5)። ሃሌሉያ! ከዚያም ጌታ መልዓክ ልኮ ከወህኒ አወጣው። ምክንያቱም ፀሎት አጥብቆ ይደረግ ነበር። ወዳጆቼ ከመፀለይ አታቋርጡ። “የጻድቅ ሰው ጸሎት በሥራዋ እጅግ ኃይል ታደርጋለች” (ያዕ 5፡16)። ፀሎት የግድ ሃይልን ያደርጋል። የግድ ውጤትን ያመጣል። ፎርሙላው ይህ ነው። የጌታ ስም ይባረክ!

📱 የአምላኬ ቃል አፕሊኬሽንን በማውረድ የየእለት ዲቮሽኛል ታገኛላችሁ @Lovedface

እኔ ግን አንተን አምናለሁ - ቃልኪዳን ጥላሁን (ሊሊ)

🟠 ወዳጆቼ የእግዚአብሔርን ክብር ማየት ሁሉን ነገር ያስረሳል። እርሱን ብቻ ያስናፍቃል። ማለዳ ይናፍቃችኋል፥ በቀትር ስሌላ ማሰብ ይሳናችኋል፥ በምሽት ልባችሁን ይወስደዋል። ኢሳይያስ ጥሩ ማሳያ ነው እላለሁ። (ኢሳ 6፡1) “ንጉሡ ዖዝያን በሞተበት ዓመት እግዚአብሔርን በረጅምና ከፍ ባለ ዙፋን ላይ ተቀምጦ አየሁት፥ የልብሱም ዘርፍ መቅደሱን ሞልቶት ነበር” እንዴት ያለ ቃል ነው? ሰው እንዴት እግዚአብሔርን ያያል? ወዳጆቼ እግዚአብሔር ይታያል። ክብሩ ይታያል። አይታይም ብለው አያታልሏችሁ። የምናገረው መንፈሳዊ ቋንቋ ነው። እግዚአብሔር በተለያየ መንገድ ይታያል። “ሙሴም አሮንም ናዳብም አብዩድም ከእስራኤልም ሰባ ሽማግሌዎች ወጡ የእስራኤልንም አምላክ አዩ ከእግሩም በታች እንደ ሰማይ መልክ የሚያበራ እንደ ብሩህ ሰንፔር ድንጋይ የሚመስል ወለል ነበረ። እጁንም በእስራኤል አዛውንቶች ላይ አልዘረጋም እነርሱም እግዚአብሔርን አዩ፥ በሉም ጠጡም” (ዘፀ 24፡9-11)። እግዚአብሔር የሚታይ፥ ራሱንም በግላችን የሚገልጥ አምላክ ነው። ይሄን እመኑ። ኢሳይያስ እግዚአብሔርን ካየ በኋላ የመለሰው ምላሽ ምን ነበር? “እኔም። ከንፈሮቼ የረከሱብኝ ሰው በመሆኔ፥ ከንፈሮቻቸውም በረከሱባቸው ሕዝብ መካከል በመቀመጤ ዓይኖቼ የሠራዊትን ጌታ ንጉሡን እግዚአብሔርን ስለ አዩ ጠፍቻለሁና ወዮልኝ! አልሁ” (ኢሳ 6፡5)። ይህ ነገር ካትሪን ኩልማንንና ቤኒ ሂንን ያስታውሰኛል።
 
🟠 ካትሪን መንፈስ ቅዱስን የተሞላችው ስለመንፈስ ቅዱስ አሰራር ብዙም በማይታወቅበት የሜቶዲስት ቤተ-ክርስቲያን ነበር። የአስራ አራት አመት ልጅ ሆና በአንድ እሁድ በሜቶዲስት ቤተ-ክርስቲያን ፕሮግራም እየተካፈለች የሚዘምሩበትን ደብተር ይዛ ቆማ ነበር። ድንገት መንቀጥቀጥ ጀመረች፤ የመዝሙሩን ደብተር ወንበሩ ላይ አስቀመጠች። ማልቀስ ጀመረች፤ ምክንያቱም ከፍተኛ የሆነ ሀጢያተኝነት ተሰማት። ከመንፈስ ቅዱስ ጋር የነበራት የመጀመሪያ ግንኙነት ያ ነበር። ከዚያም ተለወጠች ዳግመኛ ተወለደች። ቤኒ ሂንም ጌታን ካመነ በኋላ የካትሪን ኩልማንን ፕሮግራም ለመካፈል እርሷ ወዳለችበት ከተማ ከጓደኛው ጋር ሄዶ ነበር። እናም ለመግባት በር ላይ ከመሰለፉ ጀምሮ በእግዚአብሔር ሃይል ይንቀጠቀጥ ነበር። ወደ ውስጥ ከገቡም በኋላ ያ የመንፈስ ቅዱስ ህልውና ነበር። እና ካትሪን ኩልማን ማገልገል ስትጀምር ሀጢያቱ፥ ስህተቱና ድካሙ ድንገት እጅግ ጎልቶ ታየው። በመንፈስ ሆኖ እንዲህ ማለት ጀመረ “ውድ ኢየሱስ እባክህ ምህረትህ በእኔ ላይ ይሁን”፤ ደግሞ ደጋግሞ ይሄን አለ። ጌታ ለስለስ ባለ ድምፅ “ምህረቴ በአንተ ላይ ብዙ ነው” አለው። ያኔ ለመጀመሪያ ጊዜ ከእግዚአብሔር ጋር ህብረት ጀመረ። ኢሳይያስም እንደዛ ነበር የሆነው። ነገር ግን ጌታ በክብሩ ስለነበር የመጣው አፉን በእሳት ቀደሰለት። ቀጥሎ የሆነው ምንድነው? “የጌታንም ድምፅ። ማንን እልካለሁ? ማንስ ይሄድልናል? ሲል ሰማሁ። እኔም። እነሆኝ፥ እኔን ላከኝ አልሁ” ኦ ሃሌሉያ! ጌታን እነሆኝ አለው። “Here am I, send me” ኧረ ሃሌሉያ! ሃሌሉያ! ይኸውናኝ ጌታ ሆይ አለ። ውሰደኝ አለው። በጌታ ፍቅር ተያዘ። በካትሪንና በቤኒሂንም የሆነው ይህ ነው። ወዳጆቼ የጌታ ፍቅር ከያዛችሁ ምን ማድረግ ትችላላችሁ? ከእርሱ ውጪ አልታይ ይላችኋል። የጌታን ልብ ለማስደሰት ብቻ ትኖራላችሁ። አይኖቻችሁ ሌላ ማየት አይችሉም። ጆሮቻችሁ ሌላ መስማት አይችሉም። ለአንድ ብቻ መኖር ትጀምራላችሁ። እርሱ ብቻ ደስታችሁ ይሆናል።
 
🟠 ክብሩን ማየት ይቻላል እያልኳችሁ ነው። ጌታን ማየት ይቻላል እያልኳችሁ ነው። እኛ የተፈጠርነው እሱን ፈልገን ለማግኘት ነው። “ምናልባትም እየመረመሩ ያገኙት እንደ ሆነ፥ እግዚአብሔርን ይፈልጉ ዘንድ በምድር ሁሉ ላይ እንዲኖሩ የሰውን ወገኖች ሁሉ ከአንድ ፈጠረ” (ሐዋ 17፡26)። አንድ ቃል ሁሌ ያስደንቀኛል። በእግዚአብሔር ቃል ውስጥ እግዚአብሔርን ስለመፈለግና ፈልጎ ስለማግኘት ብዙ ቦታ ይናገራል። ነገር ግን በቃ በጣም ልቤን የሚነካው አንድ ቃል አለ፤ እንዲህ ይላል… “በከንቱ ፈልጉኝ አላልሁም” (ኢሳ 45፡19)። ኦ ሃሌሉያ! ወዳጆቼ ይህ ቃል አይደንቅም? ጌታ በከንቱ ፈልጉኝ አላልኩም እያለን ነው። ማለትም ሊገኝልን ነው ፈልጉኝ ያለው። ራሱን ሊገልጥልን ነው ፈልጉኝ ያለው። እግዚአብሔርን ምን ያክል ነው የምትፈልጉት? እግዚአብሔር ምን ያክል ነው የሚያስፈልጋችሁ? ያለ ጌታ እንዴት ነው ሰው መውጣትና መግባት የሚችለው? ያለ ጌታ ሰው እንዴት ነው ኑሮ ተመችቶት የሚኖረው? ጌታ ሆይ ታስፈልገናለህ! አቤቱ ታስፈልገናል። አቤቱ አንተ ምግባችን ነህ ጉልበት የምትሰጠን፥ እርካታችን ነህ የምንጠጣህ፥ ሕይወታችን ነህ የምንኖረህ፥ ትርጉም ነህ ለእያንዳንዱ ቀናችን። ጌታ ሆይ፥ ኢየሱስ ሆይ! “ወደ እግዚአብሔር የሚደርስ እግዚአብሔር እንዳለ ለሚፈልጉትም ዋጋ እንዲሰጥ ያምን ዘንድ ያስፈልገዋልና” (ዕብ 11፡6)። እግዚአብሔርን ለሚፈልግ ው እግዚአብሔር የሚሰጠው ዋጋ ምንድነው? መልሱን የምታገኙት በዘፍጥረት 15፡1 ላይ ነው። “ከዚህም በኋላ፥ የእግዚአብሔር (ያህዌ) ቃል እንዲህ ሲል በራእይ ወደ አብራም መጣ፤ ‘አብራም ሆይ፤ አትፍራ፤ እኔ ለአንተ ጋሻህ ነኝ፤ ታላቅ ዋጋህም እኔው ነኝ’” (አ.መ.ት)። ሃሌሉያ! ሃሌሉያ! ዋጋህ እኔው ነኝ አለ ጌታ! ስሙ ለዘላለም ይባረክ። ዋጋችሁ እሱው ነው። እግዚአብሔርን ለሚፈልግ ሰው ዋጋውና የሚያገኘው ራሱ እግዚአብሔርን ነው!
 
🎧 የሊሊን እኔ ግን አንተን አምናለሁ የሚለውን መዝሙር በቴሌግራም ቻናላችን አስቀምጬላችኋለሁ።

📱 የአምላኬ ቃል አፕሊኬሽንን በማውረድ የየእለት ዲቮሽኛል ታገኛላችሁ @Lovedface

🟠 ጌታ ሆይ ብላችሁ መጮህ መጀመር አለባችሁ። የግድ ኢየሱስ ያስፈልጋችኋል። የክርስትና ህይወታችሁን ደካማ (beggarly) ከሚያደርጉት ነገሮች አንዱና ዋንኛው የፀሎት ሕይወታችሁ መድከም ነው። እውነቴን ነው ምላችሁ በደካማ የፀሎት ሕይወት ከእንግዲህ መቀጠል አትችሉም። የፀሎትን ምጥ ማወቅ አለባችሁ። ከላይ ከላይ መፀለይ አትችሉም። ጴጥሮስ አንዳች ሰው ሄዶበት የማያውቀውን መንገድ ከኢየሱስ አይቶ ጀምሮ በውሃ ላይ ሲሄድ ሳላ ነፋሱና ማዕበሉን አይቶ ፈራ (ማቴ 14፡28-31)። ከዚያም ወደ ውሃው ውስጥ መስጠም እንደጀመረ መፅሀፍ ቅዱስ ይናገራል። ነገር ግን ምንድነው ያደረገው? ምን ነበረ ከጌታ ዘንድ ምላሽን ያስገኘለት? “ጌታ ሆይ አድነኝ ብሎ ጮኸ”። ኧረ ሃሌሉያ! ኧረ ሃሌሉያ! “ወዲያውም ኢየሱስ እጁን ዘርግቶ ያዘው” ኦኦኦኦኦኦኦ!!!!! ሃሌሉ……ያ! ሃሌሉያ! መጮህ አለብን! በጣም መጮህ አለብን! ጌታ ሆይ! ጌታ ሆይ! ኢየሱስ ሆይ! ኢየሱስ ሆይ! ጌታ ሆይ! ኢየሱስ ሆይ! ኧረ ወዳንተ እጮሃለሁ! እጮሃለሁ! እጮሃለሁ!!!!!!

🟠 ጌታ ኤርሚያስ ታስሮ በግዞት ቤት በነበረበት ጊዜ ተገልጦለት በቅድሚያ እንዲህ ብሎ ራሱን አስተዋወቀው…. (ኤር 33፡1-3) “ስሙ እግዚአብሔር የሆነ፥ ያደረገው እግዚአብሔር፥ ያጸናውም ዘንድ የሠራው እግዚአብሔር እንዲህ ይላል…” ይኸውላችሁ ራሱን ሲያስተዋውቀው ያለውን አስተውሉ። ራሱን አምላክ ነኝ እኔ እያለ እያስታወሰው ነው። ፈጣሪ የሆንኩ አምላክ ነኝ እያለው ነው። ከዚያ ምን እንዳለው ታውቃላችሁ? “ወደ እኔ ጩኽ፥ እኔም እመልስልሃለሁ አንተም የማታውቀውን ታላቅና ኃይለኛ ነገርን አሳይሃለሁ”። ወዳጆቼ “ወደ እኔ ጩኽ” የአምላክ ጥሪ ነው። አምላክ አላችሁ? ጌታ አላችሁ? ኢየሱስ ጌታችሁ ነው? በቃ ጌታ ሆይ ብላችሁ ጩኹ! ሳታቋርጡ ጩኹ! ኧረ ሃሌሉያ! ሃሌሉያ! እንዲህ ነው መጮህ ያለባችሁ። እነዛ እውሮች ወደ ጌታ ምን ብለው ጮኹ? (ማቴ 20፡29-34) “ጌታ ሆይ የዳዊት ልጅ ማረን ብለው ጮኹ” ሕዝቡ ዝም እንዲሉ ሲነግሯቸው “ጌታ ሆይ የዳዊት ልጅ ማረን እያሉ አብዝተው ጮኹ” ሃሌሉያ! ከዚያ የሆነው ምንድነው? “ኢየሱስም ቆሞ ጠራቸው…” ይላል መፅሀፍ ቅዱስ። ሃሌሉያ! አይናቸውን ከፈተ። ዝም እንዳትሉ እባካችሁ! ጌታ ሆይ፥ ኢየሱስ ሆይ እያላችሁ አብዝታችሁ ጩኹ! ሃሌሉያ! ጨኹ እንደዛች ሱናማዊት ሴት (ማቴ 15፡21-28) “ጌታ ሆይ የዳዊት ልጅ ማረኝ ልጄን ጋኔን ክፉኛ ይዞአታል ብላ ጮኸች” ጌታ ዝም ብሏት ሲሄድ ደግማ “ጌታ ሆይ” ብላ ጠራችው… “ጌታ ሆይ እርዳኝ እያለች ሰገደችለት”… በሁለተኛው ጌታ ሆይ ስትለው ማናገር ጀመረ። ወዳጆቼ ጌታ መልስ ሳይሰጠን ሊቀር አይችልም። እኛ ነን ጌታ ሆይ፥ ኢየሱስ ሆይ እያልን መጮህ ያለብን። ይህችን ከነናዊት ሴት ጌታ በሁለተኛው “የልጆችን እንጀራ ይዞ ለቡችሎች መጣል አይገባም” አላት። እሷ ግን ለሶስተኛ ጊዜ ደግማ ጌታ ሆይ ብላ ጮኸች! ኦ ሃሌሉያ! “አዎን ጌታ ሆይ ቡችሎችም እኮ ከጌቶቻቸው ማዕድ የወደቀውን ፍርፋሪ ይበላሉ አለች”። ጌታ ከዚያ በላይ ያለመልስ ሊተዋት አልቻለም። “አንቺ ሴት እምነትሽ ታላቅ ነው፤ እንደ ወደድሽ ይሁንልሽ አላት”። አምላካችን ጩኸትን የሚሰማ፤ ፀሎትን የሚመልስ ነው።

🟠 ለመሆኑ የእግዚአብሔር ልጅ ስንሆን ምን አይነት መንፈስ ነው የሆነልን? “አባ አባት ብለን የምንጮኽበትን የልጅነትን መንፈስ ተቀበላችሁ” አይደል የሚለው? (ሮሜ 8፡15)። ወደ አባታችን የምንጮህበት መንፈስ ነው እኮ! እኛ አባት አለን። ወደ እርሱ የምንጮህበት አምላክ አለን። ከመጮህ አታቋርጡ። የማታውቁት ታላቅና ሃይለኛ ነገር ሊሆን ነው። አትጠራጠሩ! ሊሆን ነው! ታላቅና ሃይለኛ ነገር ሊሆን ነው። እግዚአብሔር ራሱን ይገልጥላችኋል! አሜን!

📱 የአምላኬ ቃል አፕሊኬሽንን በማውረድ የየእለት ዲቮሽኛል ታገኛላችሁ @Lovedface

🟠 ጌታ ሆይ ከእንቅልፌ ስነቃ አስብሃለሁ፥ በእያንዳንዱ የቀን ጊዜዬ ከአንተ ጋር እቆራኛለሁ። ጌታ ሆይ አንተ የነፍሴ እስትንፋሰ ነህ። በእርግጥ ይሄን የምለው ለማለት ብዬ አይደለም። ያለአንተ ምንም ላደርግ እንደማልችል የነገርከኝ ቃል እውነት መሆኑን ስላረጋገጥኩኝ ነው። “ያለ እኔ ምንም ልታደርጉ አትችሉምና…” (ዮሐ 15፡5)።ኦ ሃሌሉያ! ጌታ ሆይ አንድን ነገር ለማድረግ ሳስብ የማስብህ ያለአንተ ምንም አደርግ ዘንድ ስለማይቻለኝ ነው። አንድ ጊዜ ሙሴ የተናገረው ትዝ ይለኛል “አንተ ከእኛ ጋር ካልወጣህስ፥ ከዚህ አታውጣን።” ጌታ ሆይ አንተን ሳልይዝ ወዴት ነው የምወጣው? አንተን ሳልይዝ ምንድነው የምናገረው? ሲጀመር እኮ የምሄድበት ቦታ ለመሄዴ ምክንያቱ አንተ ነህ። የምናገረውንም ለመናገሬ ምክንያቴ አንተ ነህ። ታዲያ አንተ ከሌለህበት ምን እሰራለሁ? ለምን እናገራለሁ? አቤቱ የተቤዥከኝ ጌታ ሆይ አንተ ሕይወቴን በዋጋ አልገዛሃትምን? “ተቤዥቼሃለሁና አትፍራ፤ በስምህም ጠርቼሃለሁ አንተ የእኔ ነህ” (ኢሳ 43፡1)። እኔ የአንተ ነኝ። የትኛው የራሴ ፍላጎትና የትኛው የራሴ መሻት ሲኖረኝ? ጌታዬ እኮ ነህ። ሕይወቴ ነህ አባት ሆይ! ሕይወቴ ነህ፤ የምኖርህ ነህ።

🟠 “በመኝታዬም አስብሃለሁ፥ በማለዳም እናገርልሃለሁ፤ ረዳቴ ሆነኸኛልና፥ በክንፎችህም ጥላ ደስ ይለኛልና። ነፍሴ በኋላህ ተከታተለች፥ እኔንም ቀኝህ ተቀበለችኝ” (መዝ 63፡6-7)። እግዚአብሔር እኔን የተቀበለ ወዳጄ ነው። የእርሱ ፍቅር ያስተማምነኛል። በአብሮነቱ ምክንያት ደህንነት ይሰማኛል። እጅግ በጣም የሚወደኝ አምላክ ነው ያለኝ። በክንፎቹ ጋርዶ ሚስጥራዊ በሆነ ስፍራ ያነጋግረኛል። ነፍሴ ታውቀዋለች። በእርሱ ትደገፋለኝ። በፍቅሩ ትጓደዳለች። እግዚአብሔር ይወደኛል። እግዚአብሔር ያናግረኛል። እግዚአብሔር ወዳጄ ነው። ሃሌሉያ! “ጠማማ ሁሉ በእግዚአብሔር ፊት ርኩስ ነው፤ ወዳጅነቱ ግን ከቅኖች ጋር ነው” (ምሳ 3፡32)። አቤት! እንዴት ድንቅ ነው። እግዚአብሔር ወዳጁ የሆነለት ሰው ምን አይነት ሰው ነው? ጓደኛህ ማን ነው ተብሎ ሲጠየቅ እግዚአብሔር ነው ብሎ መመለስ የሚችል ማነው? ኧረ እግዚአብሔር የእኔ ወዳጅ ነው! ጌታ ኢየሱስ የቅርብ ወዳጄ ነው። “ከእንግዲህ ወዲህ ባሮች አልላችሁም፤ ባርያ ጌታው የሚደርገውን አያውቅምና፤ ወዳጆች ግን ብያችኋለሁ፥ ከአባቴ የሰማሁትን ሁሉ ለእናንተ አስታውቄአችኋለሁና” (ዮሐ 15፡15)። ኧረ ሃሌሉያ! ሃሌሉያ! ሃሌሉያ! ሃሌሉያ!

📱 የአምላኬ ቃል አፕሊኬሽንን በማውረድ የየእለት ዲቮሽኛል ታገኛላችሁ

🟠 ለክርስቶስ መምጣት የምንዘጋጅበት ሁለተኛው መንገድ በልሳንና በአእምሮ መፀለይ ነው። ይሁዳ 1፡20-21 “እናንተ ግን፥ ወዳጆች ሆይ፥ ከሁሉ ይልቅ በተቀደሰ ሃይማኖታችሁ ራሳችሁን ለማነጽ እየተጋችሁ በመንፈስ ቅዱስም እየጸለያችሁ፥ ወደ ዘላለም ሕይወት የሚወስደውን የጌታችንን የኢየሱስ ክርስቶስን ምሕረት ስትጠባበቁ በእግዚአብሔር ፍቅር ራሳችሁን ጠብቁ።” ይህ ስፍራ የሚናገረው ኢየሱስ ዳግመኛ መጥቶ በአካል ወደ ዘላለም መንግስት የምንገባበትን ጊዜ ነው እንጂ “የዘላለም ሕይወት እንዳላችሁ ታውቁ ዘንድ በእግዚአብሔር ልጅ ስም ለምታምኑ ይህን ጽፌላችኋለሁ” (1ኛ ዮሐንስ 5፡13) ብሎ ሐዋርያ ዮሐንስ የዘላለም ሕይወት ባመንን ጊዜ የተቀበልነው ሕይወት እንጂ ወደፊት የምንጠብቀው እንዳልሆነ ነግሮናል። ስለዚህ የጌታን መምጣት ስንጠባበቅ ከየትኛውም ጊዜ በላይ በልሳን እንፀልይ ዘንድ ያስፈልገናል። ልሳን መናገር ከመንፈስ ቅዱስ ህብረት እያደረግን ምሪትና ድምፁን መለየት አንድንችል ያደርገናል።

🟠 ጌታ ኢየሱስ ስለዳግም መምጣቱ ምልክቶች በሉቃስ ወንጌል 21 ላይ ዘርዝሮ ከተናገረ በኋላ እንዲህ አለ… “ነገር ግን ልባችሁ በመጠጥ ብዛትና በስካር ስለ ትዳርም በማሰብ እንዳይከብድ፥ ያ ቀንም በድንገት እንዳይመጣባችሁ ለራሳችሁ ተጠንቀቁ፤ በምድር ሁሉ ላይ በሚቀመጡ ሁሉ እንደ ወጥመድ ይደርስባቸዋልና። እንግዲህ ሊመጣ ካለው ከዚህ ሁሉ ለማምለጥ፥ በሰው ልጅም ፊት ለመቆም እንድትችሉ ስትጸልዩ ሁል ጊዜ ትጉ” (ሉቃ 21፡34-36)። ወዳጆቼ በዚህ ጊዜ ፀሎት ላይ እጅግ በጣም ትኩረት ልታደርጉ ይገባል። “ጊዜው መቼ እንዲሆን አታውቁምና ተጠንቀቁ፤ ትጉ፤ ጸልዩም። ቤቱን ትቶ ወደ ሌላ አገር እንደ ሄደ ሰው ነው፥ ለባሮቹም ሥልጣን ለእያንዳንዱም ሥራውን ሰጥቶ በረኛውን እንዲተጋ አዘዘ። እንግዲህ በማታ ቢሆን ወይም በእኩለ ሌሊት ወይም ዶሮ ሲጮኽ ወይም በማለዳ ቢሆን ባለቤቱ መቼ እንዲመጣ አታውቁምና ድንገት መጥቶ ተኝታችሁ እንዳያገኛችሁ ስለዚህ ትጉ። ለእናንተም የምነግራችሁ ለሁሉ እላለሁ፤ ትጉ።”

🙏 አሜን ጌታ ሆይ፤ ማራናታ!

📱 የአምላኬ ቃል አፕሊኬሽንን በማውረድ የየእለት ዲቮሽኛል ታገኛላችሁ

🟠 ወዳጆቼ የክርስቶስ ዳግም መምጣት በእርግጥም ዝግጅት ይፈልጋል። ወንጌላዊ ሬንሃርድ ቦንኬ በምድር ሳሉ አንድ ራዕይ አይተው ነበር። በራዕዩ እሳቸው በአንድ የሩጫ መስመር እየሮጡ ነበር። እናም ከሰማይ እንደ ደመና የከበቡን ምስክሮች ወይም ፃድቃን መናፍስት “ፍጥነት ጨምር፥ ፍጥነት ጨምር” ይሏቸዋል። እሳቸውም “ለምን?” የሚል ጥያቄን ሲያቀርቡ የምስክሮቹ ምላሽ “ምክንያቱም ይህ የመጨረሻው ዙር ነው” የሚል ነበር። ስለዚህ ያለንበትን ጊዜ አውቀን እንደጊዜው መዘጋጀትና መንቃት እጅግ ያስፈልገናል። የክርስቶስ መምጣት ምንም ዝግጅት ባይፈልግ ኢየሱስ ለምን የመምጣቱን ምልክት ይነግረናል? ሐዋርያት የዘመኑን ምልክቶች መፃፍ ለምን አስፈለጋቸው? “ሰነፎችንም ቸልተኛ መሆን ያጠፋቸዋል” ይላል ጌታ (ምሳ 1፡32)። የምንናፍቀው ጌታ በቅርቡ ይመጣል። በእግሮቹ ስር እየሰገድን እናመልከዋለን። ያን ጌታ እንዴት ነቅተን መጠበቅ እንደምንችልና እንዴት መዘጋጀት እንደምንችል እነግራችኋለሁ። በእውነት የጌታን ምክር ከሰማን ሁላችንም ያለሀፍረት ሆነን በፊቱ እንቆማለን። እንዴት ድንቅ ነው! ለጌታ መምጣት መዘጋጀት እንደሚቻል ማወቃችን በራሱ ለእኔ ድንቅ ነው። ለዚህ ብቸኛ ለሆነ ከየትኛውም ነገር በላይ ለሆነ ጌታና ቀን መዘጋጀት ይቻላል። ሃሌሉያ! ከእኛ ከሰው ልጆች መካከል ከዚህ ተስፋ የራቀ ወይም መዘጋጀት የማይችል የለም።

🟠 በጌታ የመጀመሪያ መምጣት ጊዜ እግዚአብሔር መጥምቁ ዮሐንስን ልኮ ነበር። ሉቃስ 7፡29-30 ላይ የተፃፈ አስደናቂ ቃል ላሳያችሁ “የሰሙትም ሕዝብ ሁሉ ቀራጮች እንኳ ሳይቀሩ በዮሐንስ ጥምቀት ተጠምቀው እግዚአብሔርን አጸደቁ፤ ፈሪሳውያንና ሕግ አዋቂዎች ግን በእርሱ ስለ አልተጠመቁ የእግዚአብሔርን ምክር ከራሳቸው ጣሉ።” አስተውሉ የእግዚእብሔርን ምክር ከናቁት በስተቀር ለኢየሱስ የመጀመሪያ መምጣት መዘጋጀት የማይችል ሰው አልነበረም። ቀራጭ የነበረው በዮሐንስ የንስሐ ጥምቀት ለኢየሱስ የመጀመሪያ መምጣት ተዘጋጀ። መዘጋጅት አያስፈልገንም ያሉት ግብዝ ፈሪሳውያንና ሕግ አዋቂዎች ግን የክርስቶስ ገዳዮች ሆነው ተገኙ። ወዳጆቼ እንደ ጳውሎስ “ሩጫዬን ጨርሻለሁ፤ ወደፊት የፅድቅ አክሊል ይጠብቀኛል” ማለት አትፈልጉም? እኔ አንድ ህልም አለኝ። ጌታዬን ፊትለፊት ባገኘሁት በዚያች እለት እጆቹን በትከሻዬ ላይ አድርጎ “አንተ በጎ፥ ታማኝ ባሪያ” አንዲለኝ እፈልጋለሁ። ሃሌሉያ! ካትሪን ኩልማን አንድ ጊዜ እንዲህ ብላ ተናገረች… “ኢየሱስን ፊት ለፊት በማገኘው ቀን፤ በእርግጥ ፃድቅና ነውር አልባ አድርጎ በፊቱ እንደሚያቆመኝ አውቃለሁ። በዚያን ቀን እወድሃለሁ ብዬ አልነግረውም። ምክንያቱም እንደምወደው ያውቃል። ያኔ መንገር አይጠበቅብኝም ምክንያቱም አሁንም ቢሆን ያውቀዋል። ነገር ግን ዓይኖቹን በዓይኖቼ እያየሁ አንዲህ እለዋለሁ ‘ሞክርያለሁ (I tried)’።” ኦ ሃሌሉያ! ለዚያ ቀን የሚያስፈልገውን ሁሉ በሙሉ መሰጠት አድርጋና ተዘጋጅታ የቻልኩትን ሁሉ ሞክርያለሁ ለማለት ነበር ፍላጎቷ።

🟠 የመጀመሪያው ዝግጅት ንስሃና የሀጢያት ስርየት ነው። ሁለቱ የተለያዩ ነገሮች ናቸው። ንስሃ መንገድን መቀየር፥ ሲሄዱ ከነበሩበት ስህተትና ሀጢያት መመለስ ሲሆን የሀጢያት ስርየት ደግሞ የተሰራ ሀጢያት በእግዚአብሔር ፊት እንዳይቆጠር (not Impute) የሚያደርግልን ነው። የሀጢያት ስርየት ከሀጢያት ቅጣትና ፍርድ ያድናል። ነገር ግን የሀጢያት ስርየት ያለንስሃ መሰበክ የለበትም እላለሁ። የሀጢያት ስርየትን ብቻ የሚሰብኩ ሰዎች አሉ። መፅሀፍ ቅዱስ ግን በሮሜ 2 ላይ እንዲህ ነው የሚለው “የጌታ ቸርነት ወደ ንስሃ እንዲመራህ…”። ጌታ ኢየሱስ በአንደበቱ የተናገረውን ቃል ተመለክቱ “ክርስቶስ መከራ ይቀበላል በሦስተኛውም ቀን ከሙታን ይነሳል፥ በስሙም ንስሐና የኃጢአት ስርየት ከኢየሩሳሌም ጀምሮ በአሕዛብ ሁሉ ይሰበካል” (ሉቃ 24፡47)። ትክክለኛ የፀጋ ሰባኪ ሁለቱን አብሮ ሊሰብክ ይገባል። ሐዋርያ ዮሐንስም እንዲሁ በሀጢያታችን ብንናዘዝ ሀጢያታችንን ይቅር ሊለን ከዓመፃም ሁሉ ሊያነፃን የታመነና ፃዲቅ እንደሆነ ይነግረናል (1ዮሐ 1፡9)። የሚለማው ሀጢያቱን የሚናዘዝና የሚተዋት ነው። ኦ አስደናቂ ነው! የትኛውም ሀጢያት ከክርስቶስ ኢየሱስ ደም በላይ አይደለም። ይሄ የእኔ ግምት አይደለም። “የልጁም የኢየሱስ ክርስቶስ ደም ከኃጢአት ሁሉ ያነጻናል” (1ዮሐ 1፡7)። የኢየሱስ ደም ያለፈ፥ የአሁንና የወደፊትን (Past, Present and Future) ሃጢያት ማንፃት ይችላል። ይህን ማስተዋል አለባችሁ። ይህን ካላመናችሁ በጣም ትልቅ ስህተት ውስጥ ናችሁ። (ሃሳቡንም በትክክለኛው መንገድ መረዳት ያስፈልጋል)። በመሰረቱ ኢየሱስ የሞተውና ደሙን ያፈሰሰው ከእኔና ከእናንተ መወለድ በፊት መሆኑ ብቻ እንኳን የኢየሱስ ደም የወደፊትን ሀጢያት እንደሚያነፃ ያሳያል። ከእግዚአብሔር ጋር ህብረት እያደረገ በብርሃን የሚመላለስ አንድ አማኝ ሃጢያትን ቢያደርግ እጅግ አስተማማኝ የሆነ የኢየሱስ ደም ስላለ በዚያ ይነፃል። ኦ ሃሌሉያ! በኢየሱስ ደም ውስጥ ሃይል አለ።

🟠 ወዳጆቼ መቼም ሰው በሀጢያት የሚኖርበት የተመቻቸ መንገድ ውስጥ ገብቶ ድኛለሁ ብሎ ንስሃ ሳይገባ ጌታ ተመልሶ ቢመጣ ምንም ችግር የለውም ብሎ ማሰብ ሀሰት ነው፤ መጽሐፍ ቅዱስ አንደዛ አያስተምርም። ከተፃፈውም አትለፉ። በሁለት የአዲስ ኪዳን ቃሎችና በአንድ የብሉይ ኪዳን ቃል ላሳያችሁ። ፀጋን በተሳሳተ መንገድ እንዳትረዱትና በቸልተኝነት እንዳትኖሩ። አንደኛው በማቴዎስ 24፡45-51 ላይ አገልጋይ ለሆነ ሰው የተፃፈ ቃል ነው… “እንኪያስ ምግባቸውን በጊዜው ይሰጣቸው ዘንድ ጌታው በቤተ ሰዎች ላይ የሾመው ታማኝና ልባም ባሪያ ማን ነው?ጌታው መጥቶ እንዲህ ሲያደርግ የሚያገኘው ያ ባሪያ ብፁዕ ነው፤ እውነት እላችኋለሁ፥ ባለው ሁሉ ላይ ይሾመዋል። ያ ክፉ ባሪያ ግን። ጌታዬ እስኪመጣ ይዘገያል ብሎ በልቡ ቢያስብ፥ ባልንጀሮቹን ባሮች ሊመታ ቢጀምር ከሰካሮችም ጋር ቢበላና ቢጠጣ፥ የዚያ ባሪያ ጌታ ባልጠበቃት ቀን ባላወቃትም ሰዓት ይመጣል፥ ከሁለትም ይሰነጥቀዋል፥ እድሉንም ከግብዞች ጋር ያደርግበታል፤ በዚያ ልቅሶና ጥርስ ማፋጨት ይሆናል።” ኦ! ይሄን ቃል እንዴት ትተረጉሙታላችሁ? ግልፅ ነው አይደል? ሁለተኛው ሐዋርያ ጳውሎስ ለገላትያ ሰዎች የፃፈው በምዕራፍ 5፡21 ላይ የስጋ ስራዎችን ከዘረዘረ በኋላ የተናገረው ነው… “አስቀድሜም አንዳልሁ እንደዚህ ያሉትን የሚያደርጉ (ግሪክ ቃል: Prasso-ፕራሶ) የእግዚአብሔርን መንግሥት አይወርሱም።” Prasso (ፕራሶ) ማለት ልምድ አድርጎ መኖር። በስህተት ሳይሆን በቀጣይነት በሀጢያቱ መጠመድን ያመለክታል። ሌላው በሕዝቅኤል 18፡21-24 ላይ ያለው ነው “ኃጢአተኛውም ካደረጋት ኃጢአት ሁሉ ቢመለስ ትእዛዜንም ሁሉ ቢጠብቅ ፍርድንና ቅን ነገርንም ቢያደርግ ፈጽሞ በሕይወት ይኖራል እንጂ አይሞትም። የበደለው በደል ሁሉ አይታሰብበትም በሠራው ጽድቅ በሕይወት ይኖራል። በውኑ ኃጢአተኛ ይሞት ዘንድ እፈቅዳለሁን? ይላል ጌታ እግዚአብሔር ከመንገዱስ ይመለስና በሕይወት ይኖር ዘንድ አይደለምን? ጻድቁ ግን ከጽድቁ ቢመለስ ኃጢአትንም ቢሠራ ኃጢአተኛውም እንደሚያደርገው ርኵሰት ሁሉ ቢያደርግ፥ በሕይወት ይኖራልን? የሠራት ጽድቅ ሁሉ አትታሰብለትም ባደረገው ዓመፅና በሠራት ኃጢአት በዚያች ይሞታል።” እኛ ያለስራ በፀጋ እንደዳንን ግልፅ ነው። ነገር ግን ሰው በክርስቶስ ከፀደቀ በኋላ እንደ አሕዛብ ወይም ጌታን እንደማያውቅ ሰው ሀጢያትን መኖሪያው አድርጎ ቢኖር

ጌታ ምን እንደሚገጥመው ይናገራል። ይሞታል ይላል። ይህ ጥቅስ የሚያወራው ስለስጋዊ ሞት ሊሆን አይችልም ምክንያቱም ሁሉም ሰው ስጋዊ ሞት ስለሚሞት።

🟠 ስለዚህ ምንድነው ማድረግ ያለብን? “ራሳችንን ብንመረምር ግን ባልተፈረደብን” እንዳለ ጳውሎስ (1ቆሮ 1131) ራስን መመርመርና ንስሃና በኢየሱስ ክርስቶስ ደም መንፃት ያስፈልገናል። ከዚህ በፊት ጌታ ኢየሱስን እንደግል አዳኛችሁ አድርጋችሁ ያልተቀበላችሁ ሰዎች ጌታ ኢየሱስን ተቀበሉ። በዚያ ጊዜ ንስሃና የሀጢያት ስርየትን ታገኛላችሁ። በጌታ የሆናችሁት ደግሞ ራሳችሁን መርምራችሁ በፈሰሰው የኢየሱስ ደም ራሳችሁን አንፁ፤ ንስሃም ግቡ። አስታውሱ ሁላችንም በጌታ ኢየሱስ ዳግም መምጣት በድፍረት መቆምና ከእርሱ ጋር ለዘላለም አብረን እንደምንሆን ማረጋገጥ እንችላለን። ለዳንኤል ስለመጨረሻው ዘመን በተብራራለት ጊዜ የተነገረውን ቃል አስቡ (ዳን 12፡10) “ብዙ ሰዎች ሰውነታቸውን ያጠራሉ ያነጡማል ይነጥሩማል ክፉዎች ግን ክፋትን ያደርጋሉ ክፉዎችም ሁሉ አያስተውሉም፥ ጥበበኞች ግን ያስተውላሉ።” አስተውሉ! ጌታ ባለው ቃል የዚህን ክፍል አንድ ትምህርት ልጨርስ (ሕዝ 18፡30-32) “የእስራኤል ቤት ሆይ፥ ስለዚህ እንደ መንገዱ በየሰዉ ሁሉ እፈርድባችኋለሁ፥ ይላል ጌታ እግዚአብሔር ንስሐ ግቡ ኃጢአትም ዕንቅፋት እንዳይሆንባችሁ ከኃጢአታችሁ ሁሉ ተመለሱ። የበደላችሁትን በደል ሁሉ ከእናንተ ጣሉ አዲስ ልብና አዲስ መንፈስም ለእናንተ አድርጉ የእስራኤል ቤት ሆይ፥ ስለ ምን ትሞታላችሁ? የምዋቹን ሞት አልፈቅድምና፥ ይላል ጌታ እግዚአብሔር ስለዚህ ተመለሱና በሕይወት ኑሩ።” አቤት! የምናመልከው ጌታ እንዴት ድንቅ ነው! ክፍል ሁለትን ነገ አቀርብላችኋለሁ።

📱 የአምላኬ ቃል አፕሊኬሽንን በማውረድ የየእለት ዲቮሽኛል ታገኛላችሁ

መልካም የኢየሱስ ክርስቶስ ልደት በዓል!

1ጢሞ 1:15 "ኃጢአተኞችን ሊያድን ክርስቶስ ኢየሱስ ወደ ዓለም መጣ የሚለው ቃል የታመነና ሁሉ እንዲቀበሉት የተገባ ነው፤ ከኃጢአተኞችም ዋና እኔ ነኝ"

ኢየሱስ ሊያድነን ወደ አለም መጣልን! ደግሞ በቅርብ ተመልሶ ይመጣል። ከእርሱም ጋር ለዘላለም እንሆናለን! አሜን!

በክርስቶስ ፍቅር እወዳችኋለሁ፤ አከብራችኋለሁ!

🟠 ኢየሱስ ክርስቶስ የሚለበስ እንደሆነ ታውቃላችሁ? መፅሀፍ ቅዱስ በገላትያ 3፡27 ላይ "ከክርስቶስ ጋር አንድ ትሆኑ ዘንድ የተጠመቃችሁ ሁሉ ክርስቶስን ለብሳችኋልና" ይላል። ኦ! ይህ ምን ማለት ሊሆን ይችላል? ክርስቶስስ ማን እንደሆነ ታውቃላችሁ? እርሱን መልበስ ማለት ምን ማለት እንደሆነ ታውቃላችሁ? በመጀመሪያ አንድ ነገር ልምከራችሁ። የእግዚአብሔር ቃል እውነት መሆኑን አረጋግጡ። አንድ ሰው በግሉ ያለው አስተሳሰብ የእግዚአብሔር ቃል በሕይወቱ ላይ እንዳይሰራ ወይም እንዲሰራ ማድረግ ስለሚችል ማለት ነው። የእግዚአብሔር ቃል ምንም ያህል ሃይል ቢኖረው እንኳን አንድ ሰው ግን በሕይወቱ ላይ እንዳይሰራ ማድረግ ይችላል። ይሄን የሚያስረዳ ቃል ላሳያችሁ። "ባስተላለፋችሁትም ወግ የእግዚአብሔርን ቃል ትሽራላችሁ Making the word of God of none effect through your tradition" (ማር 7፡13)። መሻር ወይ none effect እንዲሆን ማድረግ ማለት እንዳይሰራ፥ ህያው ሆኖ እንዳይገለጥ ማድረግ ማለት ነው። ነገር ግን ለሚቀበለው ሰው "የእግዚአብሔር ቃል ሕያው ነውና የሚሰራም" (ዕብ 4፡12)። ኦ ሃሌሉያ!! እኔ የእግዚአብሔርን ቃል ከሚቀበሉት ነኝ። እናንተስ?

🟠 ክርስቶስ ማን ነው? ከላይ ለብሳችሁታል የተባለው ክርስቶስ ማን ነው? መልበስስ ምን ማለት ነው? ከመጨረሻው ብጀምር ልብስ የተገለጠውና የሚታየው ክፍል ማለት ነው። ለምሳሌ መፅሀፍ ቅዱስ ትህትናን እንደ ልብስ ልበሱ ሲል መገለጣችሁ እና መታወቂያችሁ ትህትና ይሁን ማለቱ ነው። እግዚአብሔር ክርስቶስን ለብሳችሁታል ሲል አሁን የምንታየው እኛ ሳንሆን ክርስቶስ ነው ማለቱ ነው። ኦ! ጳውሎስ የተናገረው ክርስቲያኖች የሆንን ብዙ ጊዜ በውስጣችን የምናሰላስለው "እኔ አልኖርም ክርስቶስ ግን በእኔ በሕይወት ይኖራል" የሚል በገላትያ 2፡20 ላይ የተፃፈ ቃል አለ። አሁን ስትመላለሱ እናንተ አይደለም እየታያችሁ ያላችሁት፥ ክርስቶስ ነው እየታየ ያለው። ምክንያቱም ለብሳችሁታል። የክርስቶስን ባሕሪ ለብሳችሁታል፥ የክርስቶስን ሃይል ለብሳችሁታል። ጌታ ሃይሉ ምን ያህል ነው? የእርሱን ሃይል ለብሳችሁ እየተመላለሳችሁ ነው። ይሄ አስተሳሰብ (Consciousness) ይኑራችሁ። ለዚህ ነው ክርስቶስን በጥልቀት ማጥናት ያለብን። ማንነቱን፥ ባሕሪውንና ክብሩን እያወቅን ለመግለጥ። ጳውሎስ "እርሱንና የትንሳኤውን ሃይል እንዳውቅ" ብሎ የተናገረው ለዚህ ነው። ስለክርስቶስ "ስልጣን በሰማይና በምድር ተሰጠኝ" ስላለ በስፍራ ሁሉ ስትሄዱ ያንን ስልጣን የተሰጠውን ክርስቶስ ለብሳችሁት ነው የምትሄዱት። ስለዚህ በስሙ አጋንንትን ለማውጣት ስልጣን አለን፥ በሽተኞችን ለመፈወስ ስልጣን አለን። ይሄ እውነት ነው። ሃሌሉያ!

🟠 ጌታ የዋህና በልቡ ትሁት ነው። በባሕሪው ፍፁም የእግዚአብሔር ምሳሌ ነው። ክርስቶስን ለብሳችሁ ስትመላለሱ ትሁትና የዋህ ነው ምትሆኑት። ማንነታችሁ ክፋትን የሚፀየፍ ስለሆነ ያ ማንነታችሁ ክርስቶስን በማወቅ ይገለጣል። በመጨረሻ ሮሜ 13፤14 ላይ ያለውን ቃል ላሳያችሁ... "ጌታን ክርስቶስን ልበሱት ምኞቱንም እንዲፈፅም ለስጋ አታስቡ"። ሃሳባችሁ በክርስቶስ የተያዘ ሲሆን ስለእርሱ ስታሰላስሉ እርሱ ይገለጣል፥ ምኞትና ሃጢያት እድል ወይም በር አያገኝም። ክርስቶስ ማን እንደሆነ ትኩረት አድርጋችሁ አጥኑ። እርሱ ሕያው ሆኖ በሕይወታችሁ ላይ ሲገለጥ ትመለከታላችሁ።

የፈቀደውን አድርጓል - ምህረት ኢተፋ

🙏 በፅሁፉ እኔ የሚለው ቃልና ሃሳብ የሚወክለው አንባቢውን ነው።
 
🙏 ከሸክምና ከጭንቀት ነፃ የሆነ ሕይወት
 
🟠 ሸክም በዝቶብኝ የነበርኩ ሰው መሆኔን አልክድም። የተጨነኩኝ ነበርኩ እላለሁ። በእውነት የሚያሳርፍ ኢየሱስ ነው። ኢየሱስ አሳርፋለሁ ብሎ የተናገረው ቃል ለእኔ ነው። "እናንተ ደካሞች ሸክማችሁ የከበደ ሁሉ ወደ እኔ ኑ እኔም አሳርፋችኋለሁ" (ማቴ 11፡28)። እንዴት ድንቅ የሆነ ቃል ነው! ማነው እንደዚህ ብሎ መናገር የሚችለው? የትኛውም ሰው ሊል የሚችለው ሸክም የከበዳችሁ ካላችሁ አማክራችኋለሁ ወይም የአቅሜን እረዳችኋለሁ ነው። ከዚህ የዘለለ ማንም ሊያደርግ አይችልም። ደግሞስ የነፍስ እረፍት መስጠት የሚችል ማን አለ? እኔ እኮ ለዚህ ነው ኢየሱስ የስጋዬ ብቻ ሳይሆን የነፍሴ ጌታ ነው የምለው። እርሱ ነፍስን ያሳርፋል። አቤቱ ጌታ ሆይ ስምህ ለዘላለም ይባረክ!
 
🟠መፅሀፍ ቅዱስ እንዴት እረፍቴን አስጠብቄ መኖር እንደምችል ነግሮኛል።

1. እግዚአብሔር ከእኔ ጋር ነው። ኦ ሃሌሉያ! "እግዚአብሔር በመካከልዋ ነው አትናወጥም እግዚአብሔርም ፈጥኖ ይረዳታል" (መዝ 46፡5)። እስኪ እግዚአብሔር ከእኔ ጋር ሆኖ ምን ክፉ ነገር ነው ሊፈጠር የሚችለው? በቃ አልናወጥም። ምድር ብትነዋወጥ ምድርን የፈጠረው እግዚአብሔር እኮ ከእኔ ጋር ነው። የኢየሱስ የምድር ላይ የመጨረሻ ቃል በልቤ ይመላለሳል "እነሆ እስከ ዓለም ፍፃሜ ድረስ ሁልጊዜ ከእናንተ ጋር ነኝ" (ማቴ 28፡20)። በመሃል ጌታ እኔን የሚተውበት ጊዜ የለም። ከዚህ የተሳ እረፍት እየተሰማኝ ነው።

2. ልቤ እንዲታወክ አልፈቅድለትም። የተለያዩ ሁኔታዎች በኑሮ ሊገጥሙኝ ይችላሉ፤ ነገር ግን ልቤ እንዲጨነቅ አልፈቅድም። በእርግጥ ብዙ ሰው የሚሰማውን ስሜት መቆጣጠር እንደሚችልና የመቆጣጠርም ሃላፊነት እንዳለበት አያውቅም። እኔ እንደ እግዚአብሔር ልጅ በአእምሮዬ ላይና በስሜቴ ላይ ስልጣን አለኝ፤ ማዘዝም እችላለሁ። ስለዚህ ጌታ በዮሐንስ 14፡27 ላይ በኪንግ ጀምስ ትርጉም እንዲህ ይላል "ልባችሁ እንዲታወክና እንዲፈራ አትፍቀዱ"። ይህ ማለት አንዳንድ ሰዎች የልባቸውን መታወክ ይፈቅዳሉ ማለት ነው። ነገር ግን አለመፍቀድ የተነሳውንም መታወክ ዝም በል ፀጥ በል ብለን ማዘዝ እንችላለን። ይህ አስደናቂ እውነት ነው።

3. በፍፁም ሸክምና ትካዜን አልሸከምም። መጨነቅና መተከዜ የሃላፊነት ስሜት መስሎኝ በብዙ ነገር እጨነቅ ነበር። ጌታ ማርታን የገሰፃት ተግሳፅ እንዲህ የሚል ነበር "ኢየሱስም መልሶ፦ ማርታ ማርታ በብዙ ነገር ትጨነቂአለሽ ትታወኪማለሽ የሚያስፈልገው ግን ጥቂት ወይም አንድ ነገር ነው፤ ማርያምም መልካም ዕድልን መርጣለች ከእርስዋም አይወሰድባትም አላት"። ይሄ የኢየሱስ ተግሳፅ ለእኔም ጭምር ነበር። እስኪ አስቡት እግዚአብሔርን የሚያክል አምላክ የሆነ እንዲህ ሲለኝ "ትካዜህን በእግዚአብሔር ላይ ጣል፥ እርሱም ይደግፍሃል፤ ለፃድቁም ለዘላለም ሁከትን አይሰጠውም" ኧረ ሃሌሉያ! ሃሌሉያ! ተናጋሪው እኮ እግዚአብሔር ነው። እደግፍሃለሁ ያለው፥ ለዘላለም የእኔን መታወክ የማይፈቅደው እግዚአብሔር እራሱ ነው። በአዲሱ መደበኛ ትርጉም እንዲህ ይላል "የከበደህን ነገር በእግዚአብሔር ላይ ጣል፤ እርሱ ደግፎ ይይዝሃል፤ የፃድቁንም መናወጥ ከቶ አይፈቅድም።" ታዲያ ጌታ እንዲህ ካለኝ ከዚህ በላይ ምን እፈልጋለሁ?

4. ጌታ የሰጠኝን የፀሎት መንገድ እጠቀማለሁ። ፊል 4፡6-7 "ጌታ ቅርብ ነው። በነገር ሁሉ በፀሎትና በምልጃ ከምስጋና ጋር በእግዚአብሔር ዘንድ ልመናችሁን አስታውቁ እንጂ በአንዳች አትጨነቁ። አእምሮንም የሚያልፍ የእግዚአብሔር ሰላም ልባችሁንና አሳባችሁን በክርስቶስ ኢየሱስ ይጠብቃል"። እኔ ማድረግ የሚጠበቅብኝ እጅግ ለሚቀርበኝና በውስጤ እየኖረ ላለው ጌታ ሃሳቤን በፀሎት መንገር ነው። ያ ማለት ጉዳዩን እግዚአብሔር እጅ ላይ ማስቀመጥ ማለት ነው። እና ከዚያ በኋላ እንዴት ልጨነቅ እችላለሁ??? ይሄ ከቶ የማይሆን ነው።
 
🟠 ከላይ ያሉት እውነቶች መርሳት የሌለብኝ ናቸው። ምክንያቱም የሚያስጨንቅ ዘመን እንደሚመጣ ጌታ በትንቢት ሲናገር (2ጢሙ 3፡1) በዚያ የሚያስጨንቅ ዘመን ውስጥ ግን እኔ በፍፁም ልጨነቅ የማልችልበትን የተደላደለ መሰረት አስቀምጦልኝ ነው። ይሄ ጌታ እንዴት ድንቅ ነው! ሃሌሉያ!
 
🎧 በቴሌግራም ቻናላችን የምህረት ኢተፋን "ማረፍ ባንተ" የሚል ሃሳብ ያለበትን መዝሙር አስቀምጬላችኋለሁ። @Lovedface

🙏 እረኛ አላችሁ?
 
🟠 ሕይወት ከእኛ በላይ የሆነ አቅምና ጥበብን የምትጠይቅ አይመስላችሁም? እውነት ነው የሚመራን፥ የሚረዳን፥ የሚያስተምረን፥ በሕይወት መንገድ የሚጠብቀን ያስፈልገናል አይደል? በገዛ ራሱ ብቻ የሚመላለስ ሰው እንዴት ምስኪን ነው! በራሱ ይጥራል፥ በራሱ ይሞክራል፥ በራሱ ውጤት ላይ ለመድረስ ይለፋል። ነገር ግን በፍፃሜው ይወድቃል እንደገና ደግሞ ለመነሳት ይሞክራል። ወዳጆቼ እኔና እናንተ እንደዚህ አይደለንም። እንደዚህ ነበርን... እንዲህ ተብሎ እንደ ተፃፈ "እኛ ሁላችን እንደ በጎች ተቅበዝብዘን ጠፋን፤ ከእኛ እያንዳንዱ ወደ ገዛ መንገዱ አዘነበለ፤ እግዚአብሔርም የሁላችንን በደል በእርሱ ላይ አኖረ" (ኢሳ 53፡7)። በገዛ መንገዳችን ሄደን ነበርን። ክርስቲያን በመሆናችን ግን ይሄ ታሪክ ተቀይሯል። ጴጥሮስ ከላይ ያስቀመጥኩትን በትንቢተ ኢሳይያስ መፅሀፍ ላይ የተፃፈውን ጠቅሶ ምን እንዳለ ታውቃላችሁ... (1ጴጥ 2፡25) "እንደ በጎች ትቅበዘበዙ ነበርና፥ አሁን ግን ወደ ነፍሳችሁ እረኛና ጠባቂ ተመልሳችኋል"። ኦ ሃሌሉያ! ጌታ እራሱ ነው ወደ እረኛችሁ ተመልሳችኋል ያለን። ወዳጆቼ እኛ ጌታ ኢየሱስን የተቀበልን ሰዎች እረኛ አለን። እናንተ እረኛ አላችሁ! እረኛ ምንድነው? ጌታ እግዚአብሔር ራሱ የተናገረውን ቃል ላካፍላችሁ።
 
🟠 (ሕዝ 34፡11፥15-16) "ጌታ እግዚአብሔር እንዲህ ይላልና፦ እነሆ እኔ ራሴ በጎቼን እሻለሁ፤ እፈልግማለሁ... እኔ ራሴ ቦጎቼን እሰማራለሁ አስመስጋቸውማለሁ ይላል ጌታ እግዚአብሔር። የጠፋውንም እፈልጋለሁ፤ የባዘነውንም እመልሳለሁ፤ የተሰበረውንም እጠግናለሁ፤ የደከመውንም አፀናለሁ፥ የወፈረውናና የበረታውንም አጠፋለሁ፤ በፍርድም እጠብቃቸዋለሁ።" ኦ ጌታ እግዚአብሔር ይመስገን። ጠፍታችኋል? ጌታ እኮ የጠፋውን የሚፈልግ እረኛ ነው። እየባዘናችሁ ነው? ኧረ እረኛችን የባዘነውን የሚመልስ ነው። ወይስ ደክማችኋል? ጌታ የደከመውን አይጥልም ይልቁን ሀይልን ሞልቶ ያፀናል። በትዳር ተከድታችሁ፥ ወይም አንዳች ውድቀት ደርሶባችሁ ልባችሁ ተሰብሯል? "እግዚአብሔር ልባቸው ለተሰበረ ቅርብ ነው፥ መንፈሳቸው የተሰበረውንም ያድናቸዋል" (መዝ 34፡18)።
 
🟠 በአዲስ ኪዳን ወልድ (ጌታ ኢየሱስ) ራሱን ካስተዋወቀባቸው ስሞች አንዱ "እረኛ" የሚል ነው። እንዲያውም "መልካም እረኛ እኔ ነኝ" ብሏል ጌታ (ዮሐ 10፡11)። ከላይ የተጠቀሱትንና ሌሎችም መዝሙር 23 ላይ የተጠቀሱትን የእረኛ ባህሪዎች ጨምሮ ለምን እንደሚተገብር ታውቃላችሁ? ኢየሱስ ከአባቱ የተሰጠው አደራ አለ። እኔ ያንን አደራ አስቤ እረፍት ተሰምቶኛል። ለእናንተም ልንገራችሁ። "አብ የሚሰጠኝ ሁሉ ወደ እኔ ይመጣል፥ ወደ እኔም የሚመጣውን ከቶ ወደ ውጭ አላወጣውም። ፈቃዴን ለማድረግ አይደለም እንጂ የላከኝን ፈቃድ ለማድረግ ከሰማይ ወርጃለሁና። ከሰጠኝም ሁሉ አንድን ስንኳ እንዳላጠፋ በመጨረሻውም ቀን እንዳስነሳው እንጂ የላከኝ የአብ ፈቃድ ይህ ነው" (ዮሐ 6፡36-39)። ኧረ እግዚአብሔር ፍቅር ነው። ቃሉን አያችሁት? የሰው አይምሮ ልጠፋ እችላለሁ የሚል ስጋት ስላለበት፤ የምጠፋው እኔ እሆንን የሚል አስተሳሰብ ስላለው ጌታ እርግጠኛ ለማድረግ፥ አንዳችን እንኳን ሳንቀር ሁላችንንም ለማሳረፍ ብሎ "እንድን ስንኳ እንዳላጠፋ" የሚል ቃል ተጠቀመ፤ "ከቶ" የሚል ቃል ተጠቀመ። ሃሌሉያ! ሃሌሉያ! አቤቱ ጌታ እግዚአብሔር ሆይ አከብርሃለሁ።
 
🟠 ታዲያ እረኛችን ኢየሱስ አባቱ የሰጠውን አደራ የሚወጣው ይመስላችኋል? አደራውን በመፈፀምስ የሚሳካለት ይመስላችኋል? እኔ በኢየሱስ ለማመን ወስኛለሁ። እረኛ አለኝ ብያለሁ። እናንተስ? አዎ እንዳመናችሁ አውቃለሁ። ይሄን ጮክ ብላችሁ በሉት... "እግዚአብሔር እረኛዬ ነው፥ የሚያሳጣኝም የለም። በለመለመ መስክ ያሳድረኛል በዕረፍት ውኃ ዘንድ ይመራኛል። ነፍሴን መለሳት፥ ስለ ስሙም በጽድቅ መንገድ መራኝ። በሞት ጥላ መካከል እንኳ ብሄድ አንተ ከእኔ ጋር ነህና ክፉን አልፈራም በትርህና ምርኵዝህ እነርሱ ያጸናኑኛል። በፊቴ ገበታን አዘጋጀህልኝ በጠላቶቼ ፊት ለፊት ራሴን በዘይት ቀባህ፥ ጽዋዬም የተረፈ ነው። ቸርነትህና ምሕረትህ በሕይወቴ ዘመን ሁሉ ይከተሉኛል፥ በእግዚአብሔርም ቤት ለዘላለም እኖራለሁ" (መዝ 23)። ክብር ለእግዚአብሔር ይሁን!!! ጌታ ለዘላለም ይባረክ! እረኛ አላችሁ! አሜን።
 
🎧 በቴሌግራም ቻናላችን የሐዋርያ ዮሐንስን እረኛዬ የሚለውን መዝሙር አስቀምጬላችኋለሁ።

እረኛዬ - ሐዋርያ ዮሐንስ ግርማ

🙏 እግዚአብሔር ምን ያህል ታማኝ ነው?

🟠 ሰው በአንደበቱ የተናገረውን ሲጠብቅ ታማኝ እንለዋለን። መቼም የሰው መታመን ገደብ ያለበት መሆኑን ሁላችንም እንረዳለን። የተለያዩ ፓስተሮች በተለያየ አጋጣሚ ሲያስተምሩት የተካፈልኩትን ልንገራችሁ። እግዚአብሔር በዘፍጥረት 15 ላይ ከእግዚአብሔር ጋር ቃል-ኪዳን ሊያደርግ መጣ። ቃል-ኪዳን በሁለት አካሎች መካከል የሚደረግ ነው። አብርሃምም መስዋዕቱን በሁለት ክፍል አዘጋጀና ከእግዚአብሔር ጋር ቃል-ኪዳን ለማድረግ መጠበቅ ጀመረ። እግዚአብሔር ግን ቃል-ኪዳኑ በሚደረግ ጊዜ በአብርሃም ላይ ከባድ እንቅልፍ አመጣበት። እግዚአብሔርም ለአንተና ለዘርህ እነዚህን ምድሮች እሰጣለሁ ብሎ በመስዋዕቱ መካከል በማለፍ ብቻውን ለአብርሃም ቃል-ኪዳን ገባለት። እግዚአብሔር አብርሃምን ለምን በእንቅልፍ ጣለው? ምክንያቱም በቃል-ኪዳኑ ታማኝ ለመሆን ብቁ መሆን የሚችለው እግዚአብሔር ራሱ ብቻ ስለሆነ ነው። አብርሃም ለእግዚአብሔር ቃል-ኪዳን የሚያዋጣው ነገር ባለመኖሩ ነው። ስለዚህ እግዚአብሔር ብቻውን ቃል-ኪዳኑን አደረገ። እግዚአብሔር የሚታመነው ራሱን ነው። ኦ ሃሌሉያ! ታዲያ አብርሃም በሕይወት በሌለበት ጊዜ እግዚአብሔር እንደ ቃል-ኪዳኑ እንደተናገረው ከአራት ትውልድ በኁዋላ የአብርሃምን ዘር እስራኤላውያንን ከግብዕ ምድር አውጥቶ ወደ ተስፋ ምድር አገባቸው። አዎ እግዚአብሔር ታማኝ ነው።

🟠 እግዚአብሔር ታማኝነት ባህሪው ነው። ሊለወጥ አይችልም። እግዚአብሔር በቃሉ የተናገረው ሁሉ እውነት ነው። "ቃልህ እውነት ነው" (ዮሐ 17፡17) ይላል። እግዚአብሔር እኮ እናንተን የጠራችሁ የጌታችንን የኢየሱስ ክርስቶስን ክብር ለማግኘት ነው። "የጌታችንን የኢየሱስ ክርስቶስን ክብር ለማግኘት በወንጌላችን ጠራችሁ" (2ተሰ 2፡14)። እኔ እና እናንተ የተጠራነው በጌታችን በኢየሱስ ክርስቶስ ማንነትና ክብር ለመመላለስ ነው። በእርግጥ ግን እግዚአብሔር ይሄን ለማድረግ ታማኝ ነው? የጌታ ቃል "የሚጠራችሁ የታመነ ነው፤ እርሱም ደግሞ ያደርገዋል" ይላል (1ተሰ 5፡24)። አቤት እግዚአብሔር! ስለእግዚአብሔር በአንድ ስፍራ እንዲህ ይላል "እርሱ አምላክ ነው፥ ስራውም ፍፁም ነው፤ መንገዱም ሁሉ የቀና ነው፤ የታመነ አምላክ ክፋትም የሌለበት፥ እርሱ እውነተኛና ቅን ነው" (ዘዳ 32፡4)። ኧረ ሃሌሉያ! ኧረ ሃሌሉያ! እሱ ምናልባት ከቃሉ ፈቀቅ ብሎ ይሆን ወይ ተብሎ አይሰጋበትም። በቃሉ ላይ ፍፁም ፈቀቅ አይልም። እግዚአብሔርን በቃሉ ውስጥ አናግሩት። በቃሉ ውስጥ እመኑት። እግዚአብሔር የሚያኮራ አምላክ ነው።

🟠 በእናንተ ላይ ጠላት ሆነው የተነሱ ነገሮች ሊኖሩ ይችላሉ። በሽታ ነው? ማጣት ነው? በቤተሰብ ውስጥ ያለ ሰላም ማጣት ነው? ድካም ነው? ፈተና ነው? ስራ ማጣት ነው? እግዚአብሔር ምን እንደሚላችሁ ታውቃላችሁ? "ጠላቶችህ ይገዙልሃል፥ አንተም ከፍታቸውን ትረግጣለህ" (ዘዳ 33፡29)። ኧረ ሃሌሉያ! ኧረ ሃሌሉያ! አቤት እግዚአብሔር እንዴት ድንቅ ነህ!! ይሄን የተናገረው ራሱ እግዚአብሔር ነው። የጠላቶቻችሁ ከፍታ የእናንተ እግር በታች ነው። የማዕበሉና የንፋሱ ብርታት የእግራችሁ መረገጫ ነው። የሰይጣን ውሸትና ትዕቢት ከእግራችሁ በታች ነው። ጠላቶቻችሁ ተራ ናቸው። እኔና እናንተ ረግጠናቸዋል። ኧረ ሃሌሉያ! በድል ነው እየተመላለስን ያለነው። ምክንያቱም እግዚአብሔር ታማኝ አምላክ ነው!! ኦ ሃሌሉያ! ሁልጊዜ ይሄን አስታውሱ!

🙏 በፅሁፉ እኔ የሚለው ሃሳብና ቃል የሚወክለው አንባቢውን ነው።

🟠 ክርስቲያን የመሆኔ ተስፋና እድል ፈንታዬ ምንድነው? እግዚአብሔር እንደሚሰጠኝ የነገረኝስ ምንድነው? የእምነታችን አባት የሆነው አብርሃም የወንድሙን ልጅ ሎጥንና ምርኮውን ከጠላቶች እጅ አስጥሎ ከተመለሰ በኋላ ጠላቶቹ ተመልሰው ሊመጡና ሊዋጉት በሚችሉበት ሁኔታ ውስጥ ነበር። ከዚያ እግዚአብሔር ወደ እርሱ በራዕይ መጣና "አብራም ሆይ አትፍራ፤ እኔ ለአንተ ጋሻህ ነኝ፤ ታላቅ ዋጋህም እኔው ነኝ" (ዘፍ 15፡1)። አቤት እግዚአብሔር! በቃ የእኔ ዋጋ አንተ ነህ። ታላቅ ዋጋዬ ነህ። አንተን አለኸኝ እላለሁ። እግዚአብሔር አምላክ አለኝ እላለሁ። መጽሐፍ ቅዱስ በዕብራውያን 11፡6 ላይ "ወደ እግዚአብሔር የሚደርስ እግዚአብሔር እንዳለ፥ ለሚፈልጉትም ዋጋ እንዲሰጥ ያምን ዘንድ ያስፈልገዋልና" ይላል። እግዚአብሔርን ስፈልገው እድልፈንታዬ ሆነልኝ። ርስቴ ሆነልኝ። እኔም ለዘላለም ወርሼዋለሁ እላለሁ። ኦ ሃሌሉያ!
 
🟠 እና ከዚህ የተነሳ በእግዚአብሔር ቃል ላይ የተነገረኝ ተስፋ አለ። "አይኖችህ ንጉስን በውበቱ ያዩታል" (ኢሳ 33፡17)። እግዚአብሔር ለእርሱ የሆነለት ሰው እግዚአብሔርን ዘወትር ይመለከተዋል። "ሁልጊዜ እግዚአብሔርን በፊቴ አየዋለሁ፤ በቀኜ ነውና አልታወክም" (መዝ 16፡8)። አቤቱ አምላኬና ንጉሴ ሆይ! አይኖቼ አንተን ያያሉ። ጌታ ሆይ አንተን ይመለከቱሃል! ይህ መንፈሳዊ ነገር ነው። ለአንዳንዶች ማብራራት አይቻል ይሆናል። ነገር ግን እኔ ሳመልክ ጌታን በመንፈሴ አየዋለሁ። በቃሉ ውስጥ ጌታን አየዋለሁ። በሕይወቴ በብዙ መንገዶች ጌታን አየዋለሁ። መንፈሳዊ አይኖች አሉኝ። የልቦናዬ አይኖች እሱን እየተመለከቱት ነው። የጌታን ውበት አውቀዋለሁ። የጌታዬን ክብር አውቀዋለሁ።  ኧረ ሃሌሉያ! እና አሁን አንድ ሚስጥር አለ። ሕይወቴ እንዲህ ያማረ የሆነበት ምክንያት ጌታን ዘወትር መመልከት መቻሌ ነው።
 
🟠 (2ቆሮ 3፡18 CJB) "So all of us, with faces unveiled, see as in a mirror the glory of the Lord; and we are being changed into his very image, from one degree of glory to the next, by ADONAI the Spirit ስለዚህ እኛ ሁላችን በመጋረጃ በማይከደን ፊት፤ አንድን ነገር በመስታወት እንደሚመለከቱት አይነት መንገድ የጌታን ክብር እየተመለከትን፤ ጌታ በሆነው መንፈስ ያን ራሱን መልክ እንመስል ዘንድ ከአንድ ክብር ደረጃ ወደ ሚቀጥለው የክብር ደረጃ እየተለወጥን ነው" ኦ ሃሌሉያ! ኢየሱስን እየመሰልኩ የመጣሁት አይኖቼ ንጉሱን በውበቱ ስለሚመለከቱት ነው። ሕይወቴን ስመለከተው የኢየሱስን እየመሰለ እያደገ ነው። ባህሪዬን ስመለከተው የኢየሱስን እየመሰለ እያደገ ነው። ጌታ ኢየሱስ በተመላለሰበት ክብርና ብርሃን እየተመላለስኩ ነው። እርሱ እንዳለ እንዲሁ እኔ በዚህ ዓለም ነኝ (1ዮሐ 4፡17)። ሃሌሉያ!

በዚህ ፅሁፍ ውስጥ እኔ የሚለው ሃሳብና ቃል የሚወክለው አንባቢውን ነው።

🟠 ጌታ ኢየሱስ በመስቀል ላይ ተሰቅሎ በነበረበት ጊዜ በቀኝና በግራ ሁለት ወንበዴ ሰዎች ተሰቅለው ነበር። ዘመናቸው ያለቀው በክፋትና በሃጢያት ነበር። ከሁለቱ ግን አንዱ ሀጢያተኛ እንደሆነና ምህረት እንደሚያስፈልገው አመነ። ጌታን "ጌታ ሆይ በመንግስትህ በመጣህ ጊዜ አስበኝ" አለው (ሉቃ 23፡42-43)። ያለምንም አይነት ቅድመ ሁኔታ ኢየሱስ "እውነት እልሃለሁ ዛሬ ከእኔ ጋር በገነት ትሆናለህ" አለው። እንዴት አይነት ድንቅ ፍቅር ነው? "እግዚአብሔር በክርስቶስ ሆኖ ዓለሙን ከራሱ ጋር ያስታርቅ ነበርና በደላቸውን አይቆጥርባቸውም ነበር"። ኦ ሃሌሉያ! ፍቅር እኮ ነው በደልን የማይቆጥረው! ፍቅር ነው ይቅር የሚለው! ፍቅር ነው ምህረትን የሚያደርገው! "ፍቅር ይታገሳል፥ ቸርነትንም ያደርጋል፥ ፍቅር አይቀናም፥ ፍቅር አይመካም፥ ፍቅር አይታበይም፥ የማይገባውን አያደርግም፥ የራሱንም አይፈልግም፥ አይበሳጭም፥ በደልን አይቆጥርም" (1ቆሮ 13፡4-5)። እኔ የአምላኬን ምህረት አውቀዋለሁ! እኔ የአምላኬን ፍቅር አውቀዋለሁ! እርሱ ፍቅር ነው። እግዚአብሔር ፍቅር ነው።

🟠 ኢየሱስ በምድር ላይ ሳለ ተከታዮች ነበሩት። ማለትም ከእርሱ ጋር ግንኙነት ማድረግ የጀመሩ የሚከተሉት ነበሩት። እና ስለእነርሱ ጌታ በልቡ ያሰበው ምን እንደነበረ በመፅሀፍ ቅዱስ ላይ መፃፉ እንዴት መልካም ነው! "ኢየሱስም ከፋሲካ በዓል በፊት ከዚህ ዓለም ወደ አብ የሚሄድበት ሰዓት እንደ ደረሰ አውቆ በዚህ ዓለም ያሉትን ወገኖቹን የወደዳቸውን እስከ መጨረሻው ወደዳቸው" (ዮሐ 13፡1)። ኦ ሃሌሉያ! እስከመጨረሻው አስተማማኝ በሆነ ፍቅር ተወደድኩ! አቤቱ ጌታ ሆይ እንግዲህ ምን እላለሁ!! እባክህ ይሄን ፍቅር የበለጠ ግለጥልኝ!

🟠 "በዚህ ሁሉ ግን በወደደን በእርሱ ከአሸናፊዎች እንበልጣለን። ሞት ቢሆን፥ ሕይወት ቢሆን፥ መላእክትም ቢሆኑ፥ ግዛትም ቢሆን፥ ያለውም ቢሆን፥ የሚመጣውም ቢሆን፥ ሃይላትም ቢሆኑ፥ ከፍታም ቢሆን፥ ዝቅታም ቢሆን፥ ልዩ ፍጥረትም ቢሆን በክርስቶስ ኢየሱስ በጌታችን ካለ ከእግዚአብሔር ፍቅር ሊለየን እንዳይችል ተረድቼአለሁ" (ሮሜ 8፡37-39)። ይሄ ፍቅር እኮ ነው የሚያስተማምነኝ! ይሄ ፍቅር እኮ ነው ዛሬም እንድደፍር የሚያደርገኝ! ለዘወትር የማይወድቅ ፍቅር ነው። አይለወጥም! እስከመጨረሻው ነው! ደስታን የሚሰጠኝ ነው። እረፍት የሚሰጠኝ ነው። በሕይወት መንገዴ ስሳሳት ምህረትን እንደማገኝ እርግጠኛ ነኝ። ዮሐንስ ወንጌል ምዕራፍ 13፡1 ላይ ኢየሱስ እስከመጨረሻው የወደዳቸው ደቀ-መዛሙርት ምዕራፍ 16፡32 ላይ ትተውት እንደሚሄዱ ነግሯቸው ነበር። እንዳለውም ኢየሱስ ወደ መከራ ሲሄድ ሁሉም ትተውት ሲሄዱ፥ ጴጥሮስም ሲክደው፥ ቀለዮጳና ሌላ ደቀ-መዝሙርም  ተስፋ ቆርጠው ወደ ኤማሁስ እየጠወለጉ ሲሄዱ እንመለከታለን። ኢየሱስ ግን ፍቅሩ እስከመጨረሻ ነው። ሁሉን ወደ መንገዳቸው ሲመልስ፥ ሁሉን አብሮ ሰራተኛ ሲያደርጋቸው፥ ሁሉን ሲባርካቸው አይቻለሁ። ኢየሱስ ፍቅሩ እስከመጨረሻ ነው! የእርሱ አጋፔ የሆነ ፍቅር ነው። የራሱ ደረጃ ያለው ፍቅር ነው። ምክንያት አልባ ፍቅር ነው! ለነገሩ እኔን ለመውደዱ ምንስ ምክንያት ፈልጌ ላገኝ እችላለሁ? ማይልስ ሙኔሮ አንድ ጊዜ እንዲህ አለ... "መፅሀፍ ቅዱስ ውስጥ ፈልጋችሁ የማታገኙት ነገር እግዚአብሔር ለምን እንደሚወዳችሁ ነው"። የእስራኤል ልጆች በምን ወደድከን ሲሉት ምክንያት አልባ ስለነበር በቃ "ያዕቆብን ወደደኩ" የሚል ነበር ምላሹ (ሚል 1፡2)።

🟠 እሱ ፍቅሩ ዘላለማዊ ነው! እስኪ ይሄን ቃል ላስበው "እግዚአብሔር ከሩቅ ተገለጠልኝ እንዲህም አለኝ፤ በዘላለም ፍቅር ወድጄሻለሁ፤ ስለዚህ በቸርነት ሳብሁሽ" (ኤር 31፡3)። ኦ ሃሌሉያ! ልወድቅ ይሆን የሚል ሃሳብ ሲመጣብኝ እግዚአብሔር እስራኤል ከእርሱ አጠብቅው ሊሸሹ በፈለጉ ጊዜ የተናገረውን ቃል አስታውሳለሁ "ኤፍሬም ሆይ እንዴት እጥልሃለሁ? እስራኤል ሆይ እንዴትስ አሳልፌ እሰጥሃለሁ? እንዴትስ እንደ አዳማ እጥልሃለሁ? እንዴትስ እንደ ሲባዮ አደርግሃለሁ? ልቤ በውስጤ ተናውጣለች፥ ምህረቴም ተነስታለች። እኔ አምላክ ነኝ እንጂ ሰው አይደለሁምና፥ በመካከልህም ቅዱሱ ነኝና የቁጣዬን መቅሰፍት አላደርግም፥ ኤፍሬምንም አጠፋ ዘንድ አልመለስም በመዓትም አልመጣም" (ሆሴ11፡8-9)። አዎ እኔ ጌታዬ አምላክ እንጂ ሰው አይደለም። በምክንያት ሳይሆን ያለ ምክንያት ይወደኛል። በምክንያት ሳይሆን ያለምክንያት ይምረኛል። በምክንያት ሳይሆን ያለምክንያት ይረዳኛል። በምክንያት ሳይሆን ያለምክንያት ከእኔ ጋር አለ! እኔ በሕይወት መካከል ነኝ፤ የኢየሱስ ፍቅር ግን እስከ መጨረሻው ነው። ኦ ሃሌሉያ! ሃሌሉያ! ሃሌሉያ!

አምላኬ ሆይ በአንተ እጅግ ደስ ይለኛል!

https://youtu.be/9yPSyEH9SIw

እግዚአብሔር እጅግ ሊያከብረን ወሰነ። ከነዚህ ህፃናት ጋር እናመልከው ዘንድ ፈቅዶ እድል ሲሰጠን በፊቱ ወድቆ ከማንባት በስተቀር እንግዲህ ምን ይባላል! አቤቱ ጌታ ሆይ አንተስ ድንቅ ነህ! ሌላ ምን እንላለን?!

በዚህ ፅሁፍ እኔ የሚለው ሃሳብና ቃል የሚወክለው አንባቢውን ነው።

🟠 አቤቱ ጌታ እግዚአብሔር ሆይ አንተ ተስፋው የህንክለት ሰው ምስጉን ነው። አንተስ ተስፋዬ ባትሆን ሕይወትን እንዴት እኖረው ነበር? በእውነት ጌታ ሆይ አንተ አምላኩ የሆንክለት ሰው ምስጉን ነው። መዝ 33:12 "እግዚአብሔር አምላኩ የሚሆንለት ሕዝብ ምስጉን ነው፥ እርሱ ለርስቱ የመረጠው ሕዝብ።" እንዴት ያለ አስደናቂ ቃል ነው? እግዚአብሔር ለእኔ አምላክ ለመሆን መወሰኑ፤ እኔን ተስፋ ለሌለው ሕይወት አሳልፎ አለመስጠቱ፤ ድቅድቅ ጨለማ በሆነው አለም ውስጥ ለእኔ ተስፋ ለመሆን መወሰኑ እኔ ያስደንቀኛል። ማን ነኝ እኔ እርሱ ይህን ያህል ተስፋ ሊሰጠኝ? የትኛውስ ታሪኬ በፊቱ ያቆመኛል? አቤቱ ጌታ ሆይ! አቤቱ አንተ ግን አምላክ ሆንከኝ። አቤቱ አንተ ተስፋ ሆንከኝ... ተስፋን ሰጠኸኝ።

🟠 ደግሜም እደነቃለሁ። ራእይ 21:3-5 "ታላቅም ድምፅ ከሰማይ። እነሆ፥ የእግዚአብሔር ድንኳን በሰዎች መካከል ነው ከእነርሱም ጋር ያድራል፥ እነርሱም ሕዝቡ ይሆናሉ እግዚአብሔርም እርሱ ራሱ ከእነርሱ ጋር ሆኖ አምላካቸው ይሆናል፤ እንባዎችንም ሁሉ ከዓይኖቻቸው ያብሳል፥ ሞትም ከእንግዲህ ወዲህ አይሆንም፥ ኀዘንም ቢሆን ወይም ጩኸት ወይም ሥቃይ ከእንግዲህ ወዲህ አይሆንም፥ የቀደመው ሥርዓት አልፎአልና ብሎ ሲናገር ሰማሁ። በዙፋንም የተቀመጠው። እነሆ፥ ሁሉን አዲስ አደርጋለሁ አለ። ለእኔም። እነዚህ ቃሎች የታመኑና እውነተኛዎች ናቸውና ጻፍ አለኝ።" አቤቱ ጌታ እግዚአብሔር ሆይ! ስምህ ለዘላለም ይባረክ! ማን ነው እንዲህ ያለ ተስፋን መስጠት የሚችለው? ማን ነው ይህን መናገርና መፈፀም የሚችል? ጌታ ሆይ እንባ ሁሉ እንዴት ይታበሳል? ሀዘን የሌለበትስ ሕይወት አለ? ስቃያችንም የሚያበቃበት ደግሞም የማይመለስበት ጊዜ ይመጣል? አንተም ራስህ ከእኛ ጋር ንጉሳችን ሆነህ የምትኖርበት ጊዜ ይመጣል? አቤቱ ጌታ እግዚአብሔር ሆይ አንተ ካልሆንክ በስተቀር ይህ እንዴት ሊሆን ይችላል? ንጉስ ሆይ ስምህን እባርከዋለሁ። ስምህን ከፍ አደርገዋለሁ ጌታ ሆይ! በእርግጥም ተስፋዬ ነህ። አንተ አምላኬ ነህ! መዝ 100:3 "እግዚአብሔር እርሱ አምላክ እንደ ሆነ እወቁ፤ እርሱ ሠራን እኛም አይደለንም፤ እኛስ ሕዝቡ የማሰማርያውም በጎች ነን።" አቤቱ ንጉስ ሆይ አንተ አምላካችን እኛም ሕዝብህ ነን። ስምህ ለዘላለም ይባረክ!!

🟠 አንድ ጊዜ ሊሊ ጥላሁን ባደረገችው ቃለ መጠይቅ ላይ ጠያቂው "ጌታ ባይኖርሽ ኖሮ ምን አይነት ሰው ትሆኚ ነበረ?" ብሎ ጠየቃት። እጅግ አስፈላጊ ጥያቄ ነው። ምን ብላ እንደመለሰች ታውቃላችሁ? (ቃል በቃል) "እህህህህህ... አይ ዶን ኖው (አላውቅም)። ምን እንደምል አላቅም። ሁልጊዜ ሚያስደንቀኝ ነገር ነው። ሕይወቴን በሙሉ ያቆመው ነገር ነው። ኤቭሪ ሲንግል ሚኒት (በእያንዳንዱ ደቂቃ) እግዚአብሔር ባይኖረኝ ኖሮ ምን ይሆን ነበር የሚለው ጥያቄ አለ በቃ። እ... ብዙ ሰዎች ሲናገሩ ሰው ካለምንም ነገር መ... እ.. ካለ ውሃ መኖር ይችላል... ካለ ምግብ መኖር ይችላል... ለተወሰነ ጊዜ... ካለ ተስፋ ግን መኖር አይቻልም። ተስፋ የሌለኝ ሰው ነበርኩኝ። እና እ... ምናልባት ይሄን ያህልም ጊዜ በሕይወት ላልኖር እችል ነበረ። እና ሁሌ ሕይወቴን እንደዚህ በኤክሳይትመንት (በሐሴት) የተሞላ የሚያደርገው ያቺን ነገር ስለማስብ ነው። ኢየሱስ ባይኖረኝ ኖሮ.. ማን ሕይወት ይሆነኝ ነበር? ማ ጓደኛ ይሆነኝ ነበረ? ከሁሉ በላይ ደግሞ እኔ ሚያስደንቀኝና ሚያስደስተኝ ነገር... እግዚአብሔርን.. እኔ ኢየሱስን ማወቄ ሳይሆን.. እሱም ያስደስታል ከዛም በላይም ባልለው እንደዛው በዛው መጠን ልክ ኢየሱስ እኔን ማወቁ ያስደስተኛል። ማን ነበር እኔን ሚያቀኝ? ራሱ ስለራስህ.. እ.. ስታስረዳ መኖር... እኔኮ እንደዚህ ነው... እኔ ይሄንን የተናገርኩት እኮ እውነቴን ነው... እኔኮ እንዲህ አይነት ሰው ነኝ እያልኩኝ ሳልናገር መኖር መቻሌ... ምክንያቱም አምላካችን ልብንና ኩላሊትን ሚመረምር አምላክ ስለሆነ... ስለሚያቅህ.. ምን.. ካለምንም ማስረጃ መግለጫ ካለመስጠት ከሱ ጋራ መኖር... ስት.. መቻሌ.. ሳስበውና እሱ ባይኖረኝ ማነው እረኛዬ? ማነው ሕይወቴ? ማነው ደስታዬ? ማነው እርካታዬ? እንዴት እኖር ነበር የሚለው ጥያቄ ራሱ ለኔ.. እህም.. አስደናቂ ጥያቄ ነው።"

@Lovedface

🔶 አባቴ እንዴት ይሆን እንደነበር ስለማውቅ እናንተም እንዴት እንደሆናችሁ እረዳለሁ። ትክክል እንደሆናችሁ ታስባላችሁ ነገር ግን ሕይወታችሁ ትክክል አለመሆናችሁን ፍንትው አድርጎ ያሳያል። የሀጢያት፣ የሰይጣንና የሀይማኖት እስራት ውስጥ ናችሁ። እኔም ከእናንተ ያልተሻልኩ እጅግ ሀጢያተኛ ነበርኩኝ። ነገር ግን የኢየሱስ ክርስቶስ ደም ከሀጢያት ሁሉ ያነፃል። ከሀጢያት ሃይልም ያድናል። እርሱ የሚሰጠው ፅድቅና ሰላም እንጂ የራሳችን ፅድቅ አይረባንም። እባካችሁ ይሄን ኢየሱስ ወደ ልባችሁ አስገቡትና ወደ ጌታ ኢየሱስ የዘላለም ደስታ ግቡ።

🙏 ከእግዚአብሔር ጋር ጥልቅ ፍቅር ዲቮሽናል
የአምላኬ ቃል አፕሊኬሽንን በቴሌግራም ቻናል ታገኛላችሁ @Lovedface
አማኑኤል ከበደ
ጥር 10 2016 ዓ.ም

🔶 ኦርቶዶክስ በነበርኩበት የሕፃንነቴ አመታት የሃይማኖት ልዩነት ምን እንደሆነ አይገባኝም ነበር። ይህም እስከ ዘጠኝና አስር አመቴ አካባቢ ማለት ነው። እናትና አባቴ ኦርቶዶክስ ነበሩ። በተለይም አባቴ እጅግ አክራሪና ዙሪያው ባሉ ሰዎች የተመሰከረለት ኦርቶዶክሳዊ ነበር። በየጊዜው ምፅዋት ሲያደርግ፣ ቤተ-ክርስቲያንን ሲደግፍ፣ ቄሶችንና አስተማሪዎችን ወደቤት እየጋበዘ እንድንማር ሲያደርግ፣ ባዘጋጀው የቅዱሳን ስዕሎች በሞሉበት የፀሎት ክፍል ውስጥ ዳዊት ይዞ ሲፀልይ ነው የማውቀው። እኔና እህቶቼም ቤተ-ክርስቲያን ዕሮብና እሁድ እንሄለን። ትምህርቶች እንማራለን፣ እናስቀድሳለን፣ እንጠመቃለን። አባቴ ለሃይማኖታችን ትኩረት እንድናደርግ ስለሚፈልግ ቅዱስ ራጉኤል ትምህርት ቤት ሲከፈት እዛ አስገባን። ከዚህ ጋር ተደምሮ እኔም በሰባትና በስምንት አመቴ አካባቢ ወይም አንደኛና ሁለተኛ ክፍል እያለሁ ለእግዚአብሔርና ለሃይማኖቴ ከፍተኛ ትኩረትና ፍቅር ነበረኝ። ሁሉንም የትምህርት አይነቶች በአግባቡ ብከታተልም የምወደው ትምህርት ግን ስነ-ምግባር የተባለውን ስለመጽሐፍ ቅዱስ የምንማርበትን ነበር። የአስተማሪያችን ስም አእምሮ ይባል ነበር። የሚነግረንን ታሪኮች እየሰማሁ ወደቤት እመጣና መጽሐፍ ቅዱስ ውስጥ ፈልጌ ታሪኩን አነብ ነበር። እንዲህ ነው ብዬ መግለፅ ባልችልም ለእግዚአብሔር ያለኝ ፍላጎት እጅግ እየጨመረ መጣ። በዚያን ጊዜ ፋሲካን ያለምግብና ያለውሃ አከፍል እንደነበር ትዝ ይለኛል።

🔶 በዚህ መሃል ታላቅ ወንድሜ ጌታ ኢየሱስን የግል አዳኙ አድርጎ ተቀበለ። አንዳንድ የፕሮቴስታንት መዝሙሮች በድብቅ እቤት ውስጥ ይከፈቱ እንደነበር አስታውሳለሁ። ለኔ እነዚያን መዝሙሮች መስማት ችግር አልነበረውም ምክንያቱም ስለኢየሱስና ስለእግዚአብሔር የሚናገሩ ስለነበሩ ውስጤን ገዝተውታል። ከኦርቶዶክስም ጋር ምን ሊያጋጨው እንደሚችል ትኩረት ሰጥቼ አስቤው አላውቅም። የኦርቶዶክስም ሆነ የፕሮቴስታንት መዝሙሮችንና ትምህርቶችን በካሴት እሰማ ነበር። መጽሐፍ ቅዱሴን አነባለሁ፣ አስቀድሳለሁ፣ እጠመቃለሁ፣ ትምህርት ቤቴ ቤተ-ክርስቲያን ውስጥ ስለነበር ቤተ-ክርሰቲያን በእረፍትና በምሳ ሰዓት እሄዳለሁ። ብቻ ከእግዚአብሔር ጋር ያለኝን ግንኙነት እጅግ ወድጄዋለሁ። እንዳልኳችሁ የሃይማኖቶቹ ልዩነት አይታየኝም ነበር። አሁን ዞር ብዬ ሳስበው ፍላጎቴ ከእግዚአብሔር ጋር መገናኘትና እሱን ማስደሰት ብቻ እንጂ ሃይማኖቱ አልነበረም። እግዚአብሔር ሕፃናትንና አዋቂዎችን ሳይለይ ወደ እርሱ የሚመጡትን እንደ ደረጃቸው መቀበሉን ሳስብ ይደንቀኛል።

🔶 ታላቅ ወንድሜ ጌታን መቀበሉ ሲሰማ አባቴ ጎረቤትና ቄስ ሰብስቦ እንዲመለስ ይጠይቀዋል። ወንድሜም ጌታ ኢየሱስን መረጠ። በዚህ ባለመስማማታቸው ጭንቅላቱን ይዞ ከቤት ሲወጣ ማየቴ ትዝ ይለኛል። ጌታን በመምረጡ ከአባቴ ጋር ተቆራረጠ፣ ከስራም ተባረረ። ያን ጊዜ ይመስለኛል በተወሰነ ደረጃ የፕሮቴስታንትና የኦርቶዶክስ ልዩነት የገባኝ። ቢሆንም ለእኔ ሁለቱም ያን ያህል ልዩነት የለውም ነበር። የፕሮቴስታንት መዝሙር የምሰማው አባቴ እንዳያውቅ በድብቅ ነበር። እነዚያ መዝሙሮች ልቤን ይነኩት ስለነበር ካሴቶቹን እሰበስብ ነበር። ትንሽ ወክማን የምትባል ካሴት የምትቀበል መዝሙር ማጫወቻ ሰው ሰጥቶኝ ስለነበር በሱ መዝሙሮች እየከፈትኩ እሰማለሁ። መጽሐፍ ቅዱስንም አነባለሁ። በዚህ መሃል ታላቅ እህቴ ጌታን በማግኘቷ እሷ በድብቅ የፕሮቴስታንት ቤተ-ክርስቲያን ትሄድ ነበር። በዚያን ጊዜ እኔም ኢየሱስ ክርስቶስ በራልኝ። ልቤን በፍቅር ሲይዘው እሱን ፈለኩት። ኢየሱስ ክርሰቶስን በትክክለኛ ማንነቱ የተቀበሉት ፕሮቴስታንቶች መሆናቸው ታየኝ። ምክንያቱም መዝሙሩም ስብከቱም ኢየሱስና እግዚአብሔር ብቻ ነው። ከኦርቶዶክስ ጋር ያለውን ልዩነት ላጣራ ብዬ አልዘገየሁም ምክንያቱም ኢየሱስ እውነት መሆኑን ለማረጋገጥ ሌሎች ውሸት መሆናቸውን ማጣራት ስለማያስፈልግ ነው። የበራልኝ ኢየሱስ ብቻ ነበር። የተከተልኩትም እሱን ብቻ ነው። ስለሌላው ላስብ አልችልም። ለእኔ ቁም ነገሩ ሃይማኖት አልነበረም። ነገር ግን ኢየሱስን በሙላት ያገኘሁት ወንድሜና እህቴ በተከተሉት ፕሮቴስታንት ሃይማኖት ውስጥ ነበር። እህቴ አንድ ቀን መጽሐፍ ቅዱስ ወደሚያስተምራት ሰው ወሰደችኝና ተንበርክኬ ጌታ ኢየሱስን የግል አዳኜ አድርጌ ተቀበልኩኝ። አስር ወይም አስራ አንድ አመቴ አካባቢ ነበር። መጽሐፍ ቅዱስም መማርና በኦርቶዶክስና በፕሮቴስታንት መካከል ያለውን ልዩነት መረዳት ጀመርኩኝ። ያም ሆኖ ኢየሱስን ይዤ የኦርቶዶክስ ቤተ-ክርሰቲያን መሄድን እንደ ክፉ ነገር አላየውም ነበር። ነገር ግን አመታት ባለፉ ቁጥር ኦርቶዶክስ ያለችበት ጨለማ ይበልጥ ፍንትው እያለ ታየኝ። እነዚያ ኢየሱስ የሌለባቸው የድንጋይ ቤተ-መቅደሶች ባዶ መሆናቸውን ውስጤ እየተረዳ መጣ። ወደ ፕሮቴስታንት ቤተ-ክርሰቲያን ስሄድ መጽሐፍ ቅዱስና ኢየሱስ ብቻ የሚሰበኩ በመሆናቸው በዚያ ውስጥ ሕይወቴ ትርጉም እያገኘ፣ ደስታዬም እየበዛ ሄደ።

🔶 ይህ ሁሉ ሲገባኝ ለአባቴ መፀለይ ጀመርኩኝ። ከታላቅ ወንደሜና እህቴ እንዲሁም ከሌሎች ጋር በመሆን ለረጅም ጊዜ ለአባቴ እንፀልይለት ነበር። ታዲያ በመጨረሻ ያን ያህል አክራሪ የነበረው አባቴም ወደ ጌታ መጣ። አሳዳጅ የነበረው በተራው ተሳዳጅ ሆነ። ያኔ በልጁና በሌሎች ላይ ያደረሰው ስደት በራሱ ላይ ደረሰበት። ጓደኞቹ ራቁት። ነገር ግን ውስጡ የነበረው ደስታ እጅግ ብዙ ነበር። ይህ ሁሉ የሆነው ስለስሜ የተጠላችሁ ትሆናላችሁ ተብሎ ስለተፃፈ ነው። ጥቂት ቆይቶ ወደተቀበለው ጌታ ሄደ። በሞቱ ላይም ጌታ ኢየሱስ ተሰበከ። አሁን በሰማይ በዘላለም ደስታ ውስጥ እየኖረ ነው። እኔም በቅርቡ ከእርሱ ጋር መቀላቀሌና ወደ ዘላለም ደስታ መሄዴ አይቀርም። በእውነት በክርስቶስ ኢየሱስ ያመኑት ሁሉ ይህን ደስታ ይቀላቀላሉ። ኢየሱስ በቅርቡ ተመልሶ ይመጣል። እናንተም ኦርቶዶክሳውያን ወንድሞቼና እህቶቼ በኢየሱስ ክርስቶስ ብቻ አምናችሁ ወደዚህ የዘላለም ደስታ አትቀላቀሉንም? ከተያዛችሁበት የሀጢያት እስራት ሊፈታችሁ የሚችለው ኢየሱስ ክርስቶስ ብቻ አይደለም? አዳኙ ኢየሱስ ብቻ አይደለም? በፍርድ ቀን በዚያ በእግዚአብሔር ፊት ስትቆሙ ምን ትላላችሁ? እግዚአብሔር ለምን ስለእናንተ አሳልፌ የሰጠሁትንና የሞተላችሁን ኢየሱስን አልተቀበላችሁም ሲላችሁ ምን ትመልሳላችሁ? እኔ የቀደመችው ሃይማኖት ተከታይ ነኝ ትሉታላችሁ? ኢየሱስንም እኮ ከሌሎቹ ጋር ጨምሬ አምኜው ነበር ትሉታላችሁ? ኢየሱስን አንዳንዴ እጠራው ነበር ትሉታላችሁ? የኦርቶዶክስ ሃይማኖት ተከታይ ነበርኩ ትሉታላችሁ? የሃይማኖት አባቶች ያሉኝን ሰምቼ ነው ትሉታላችሁ?

🔶 “በጠበበው ደጅ ግቡ፤ ወደ ጥፋት የሚወስደው ደጅ ሰፊ፣ መንገዱም ትልቅ ነውና ወደ እርሱ የሚገቡ ብዙዎች ናቸው፤ ወደ ሕይወት የሚወስደው ደጅ የጠበበ መንገዱም የቀጠነ ነውና የሚያገኙአትም ጥቂቶች ናቸው” (የማቴዎስ ወንጌል 7፡13-14)። ጠባቡ ደጅ ኢየሱስ ነው። የቀጠነውም መንገድ ኢየሱስ ነው። ምክንያቱም ኢየሱስ ራሱ “እኔ መንገድና እውነት ሕይወትም ነኝ” ብሏል (የዮሐንስ ወንጌል 14፡6)። ነገር ግን ይህን መንገድ የሚያገኙት ጥቂቶች ናቸው። ስለምን ከኢየሱስ ሌላ ሌላውን ፈለጋችሁ? ዛሬስ በጠባቡ መንገድ አትገቡም? በቀጠነውስ መንገድ አትጓዙም? ስለኢየሱስ መጠላትን ፈርታችሁ ነው? መወገዝን ፈርታችሁ ነው? ሀጢያታችሁ ይዟችሁ ነው? ጓኞቼን አጣለሁ ብላችሁ ነው? በራሳችሁ መልካም ስራ ታምናችሁ ነው? ወይስ ከኢየሱስ ይልቅ ሃይማኖቴ ይሻለኛል ብላችሁ?

🔶 በመካከለኛው ክፍለ ዘመን በታህሳስ 14 (ዲሴምበር 24) የሚከበር የአዳምና ሔዋን ቀን የሚባል በዓል ነበር። በዚህ በዓል የፍጥረት፣ የሀጢያት፣ የፍርድና የእግዚአብሔር ምህረት ታሪክ ይወሳና ይነገር ነበር። የገነት ጨዋታ የሚባል በአውሮፓ ታዋቂ የሆነ ጨዋታም ነበረበት። ከዚህ ጨዋታ የተነሳ የገነት ዛፍ የሚል ነገር በ14ኛው ክፍለ ዘመን ተጀመረ። ሰዎች እነዚህን ዛፎች በየቤታቸው ውስጥ ማድረግ ጀመሩ። ሉተር በመጣ ጊዜ ይህን ጨዋታ ተጠቅሞ የአዳምና ሔዋንን ታሪክን ይናገር ነበር። ጉዳዩን ወደ ኢየሱስ ክርስቶስ ውልደትም ያመጣው ነበር። ይህ ነው አሁን በዓለም ዙሪያ ሁሉ የገና ዛፍ ሆኖ ወደ እኛ የተሸጋገረው። በታህሳስ 14 (ዲሴምበር 24) የነበረው የገነት ዛፍ አሁን የገና ዛፍ ሆነ። ይህን የገና ዛፍ አጠቃቀም በአውሮፓ ሀገሮች ከ1510 ዓ.ም ጀምሮ በታሪክ ተመዝግቦ እናገኘዋለን። በፈረንሳይ ደግሞ ይህን የገና ዛፍ በፓምና በኦቾሎኒ እንዲሁም በሌሎች ነገሮች ማስጌጥ ተጀመረ። የገና ዛፍ አላማ በጠረጴዛ ላይ ይቀመጥና ትንንሽ ስጦታዎች ከስሩ ለማስቀመጥ ነበር። የስጦታዎቹ መጠንና ብዛት እያደገ ሲመጣ የዛፉም መጠን እያደገ መጣና ራሱን ችሎ መሬት ላይ የሚቀመጥ ሆነ። ይህ የገና ዛፍና ስጦታ ሰዎች ቢያደርጉት ምንም አይነት ክፋትና አጋንንታዊ ነገር የሌለው መነሻውም መጽሐፍ ቅዱሳዊ ታሪክ መሆኑ ግልፅ ነው።

🔶 ነገር ግን ከገና ጋር የተያያዙ አንዳንድ ክፉ ነገሮች መወገድ አለባቸው። ለምሳሌ አንዱ ሚስልቶ (Mistletoe) የተባለው ነው። ሚስልቶ ተክል የገና ማስጌጫ ሆኖ ይጠቀሙበት ነበር። ከሚስልቶ ተክል በታች የወንድና የሴት መሳሳም የሚለው ባህል የመጣው ሳተርኔሌያ ከተባለው የአሕዛብ በዓል ነው። የማይተዋወቁ ወንድና ሴት በዚያ ተክል በታች ይሳሳማሉ። የተሳሳሙት አንድ ቀን በትዳር ይገናኛሉ የሚል ሃሳብ የነበረው ነው። ይህ ከኢየሱስ ውልደት ጋር ምንም ግንኙነት የሌለው አጋንንታዊ ነገር ስለሆነ ከገና ጋር ሊያያዝ አይገባም።

🔶 የምናከብረው ቀኑን ሳይሆን በቀኑ የተወለደውን ጌታ መሆኑን ማስታወስ ያስፈልጋል። ቀን ከቀን አይበልጥም፤ አይለይም (ገላትያ 4፡10)። ስለዚህ ይህን ቀን ኢየሱስን በዓለም ዙሪያ ሁሉ ለማክበርና ወንጌሉን ለመናገር ብንጠቀምበት መልካም ነው እላለሁ። የኢየሱስ ስም በአንድ ልሳን በዓለም ሁሉ የሚጠራበትን ይህን በዓል ማራከስና እንዲሻር ማሰብ ሞኝነት እንጂ ጥበብ አይደለምና ይህን የምታስቡ ተመለሱ። የምታከብሩት ደግሞ ቀኑና በዓሉ መጽሐፍ ቅዱስ ውስጥ ባይፃፍም ነገር ግን መጽሐፍ ቅዱሳዊ መሆኑን ማለትም እግዚአብሔር ለቤተ-ክርስቲያን በሰጣት ስልጣን መሰረት የተወሰነ መሆኑን ተረድታችሁ በእምነትና በድፍረት አክብሩት እላለሁ። በበዓሉ መሰባሰቡ፣ የገና ዛፍ፣ ጌጦችና ስጦታዎችም ምንም አይነት ክፋት የላቸውም። ይልቁን የእግዚአብሔርን፣ የመጽሐፍ ቅዱስንና የክርስትናን እውነትና ታሪክ የሚያሳዩ ናቸው እላለሁ።

ቴሌግራም፡ @Lovedface
አማኑኤል ከበደ
🙏 ከእግዚአብሔር ጋር ጥልቅ ፍቅር ዲቮሽናል
የአምላኬ ቃል አፕሊኬሽንን በቴሌግራም ቻናል ታገኛላችሁ
ታህሳስ 27 2016 ዓ.ም

ነበር የሚራመዱት። አጋንንትን ከሰዎች ብቻ ሳይሆን ከነዚህም የጣኦት መቅደሶች ያስወጡና ቤተ-ክርስቲያን ያደርጓቸው ነበር። ይህ ቢሆንም ግን የገና በዓል ቀን የተወሰነበት ምክንያት ከአሕዛብ በዓልና አምልኮ ጋር ምንም አይነት ግንኙነት እንደሌለው መረዳት ይገባል።

🔶 በነገራችን ላይ በመጀመሪያዎች የቤተ-ክርስቲያን ሶስት ክፍለ ዘመኖች ክርስቶስ በስጋ አልመጣም የሚል ዶሰቲስም (Docetism) የሚባል ወደ ቤተ-ክርስቲያን ሾልኮ የገባ የኑፋቄ ትምህርት ነበር። ሐዋርያ ዮሐንስም በ1ኛ ዮሐንስ መልዕክት 4፡2-3 ላይ “ኢየሱስ ክርስቶስ በስጋ እንደመጣ የሚታመን መንፈስ ሁሉ ከእግዚአብሔር ነው። ኢየሱስ ክርስቶስም በስጋ እንደ መጣ የማይታመን መንፈስ ሁሉ ከእግዚአብሔር አይደለም፤ ይህም የክርስቶስ ተቃዋሚው መንፈስ ነው” ሲል ተቃውሞታል። ምናልባትም ይህ የኑፋቄ ትምህርት የሞተው በገና በዓል ምክንያት ሊሆን ይችላል። ምክንያቱም ገና ቤተ-ክርስቲያን በየዓመቱ የምታከብረው ኢየሱስ ከድንግል ተወልዶ በስጋ እንደመጣ የሚያሳይ ክብረ በዓል ነው። ይህም ኑፋቄውን ለመጣል ጉልበት አለው።

🔶 በመቀጠል በሪፎርሜሽኑ ጊዜ ስለገና ወይም የኢየሱስ ልደት በዓል የተፈጠረው ነገር ምን እንደሆነ እንመልከት። በጥንት የሮም ካቶሊክ ቤተ-ክርስቲያን ገና የሚከበረው ለአንድ ቀን አልነበረም። ለአራት ሳምንታት የሚቆይ ፆም ከተደረገ በኋላ ለአስራ ሁለት ቀኖች በተከታታይ በድግስ ያከብራሉ። በታህሳስ 27 (ጃንዋሪ 6) ጥምቀትን በማክበር ያጠናቅቃሉ። በሪፎርሜሽኑ ጊዜ በሉተር ተከታዮችና በሮም ካቶሊክ ቤተ-ክርስቲያን ልዩነት ተፈጠረ። ቢሆንም ማርቲን ሉተር የክርስቶስን ልደት እንዳናከብር የሚከለክል ምንም አይነት ነገር እንደሌለ በመረዳቱና በካቶሊክ ውስጥ ችግር ያለባቸውንና ችግር የሌለባቸውን ነገሮች ለያይቶ በመመልከቱ ጠቢብ ሆኖ የገናን በዓል በቤተ-ክርስቲያን ከማክበርና ሻማዎችንና መዝሙሮችን ከማድረግ አልተቆጠበም።

🔶 ሳንታ ክላውስ፣ የገና ዛፍና ስጦታ መሰጣጠቱ ከየት መጣ? አንዳንድ ክርስቲያኖች ገና የአሕዛብ ባህል እንደሆነ እንዲያስቡ ያደረጓቸው እነዚህ ነገሮች ናቸው። የአሕዛብ አምልኮ ውስጥ እንድንሳተፍ ያደርግና ለአጋንንት በር ይሆናል የሚል ስጋት አላቸው። በቅድሚያ ስለ ሳንታ ክላውስ እንመልከት። ታሪኩ የሚጀምረው በ4ኛው ክፍለ ዘመን ነው። በዚያን ጊዜ ኒኮላስ የሚባል ሊቀ ጳጳስ ነበር። የተወለደው አሁን ቱርክ ተብላ በምትጠራው ፓቴራ (Patara) ከተማ አካባቢ ነበር። በ325 በተካሄደው የኒቂያ ጉባኤ ላይ ተካፋይ ነበር። ነገር ግን እዚህ ግባ የሚባል ሚና አልነበረውም። ነገር ግን በደግነቱና በቸርነቱ ይታወቅ ነበር። ከሱ በኋላ አምስት ጳጳሳት በስሙ ተሰይመዋል። የኒኮላስ ቤተሰቦች ሲሞቱ ያወረሱት ትልቅ ውርስ ነበር። ያን ገንዘብም ለሚያስፈልጋቸው ሰዎች ይሰጥ ነበር። ኒኮላስ በሚኖርበት ዘመን ሶስት ሴቶች ልጆች የነበሩት ድሃ ሰው ነበር። ይህ ሰው ጥሎሽ (Dowry) ተብሎ የሚጠራው ከሙሽሪት ለሙሽራ የሚሰጥ ሀብት የለውም ነበር። የጋብቻ ስርዓታቸው ሙሽሪት ለሙሽራ ጥሎሽን ወይም ስጦታ መስጠትን ያስገድዳል። በዚያ ዘመን ደግሞ ሴቶች ካላገቡ ለባርነትና ለጥቃት የተጋለጡ ስለሚሆኑ አባት ለልጆቹ ያንን ጥሎሽ ወይም ሀብት ማዘጋጀት አለበት። ስለዚህ አንድ ቀን ምሽት ሁሉም በተኛበት ኒኮላስ ለዚህ ሰውዬ የወርቅ ሳንቲሞችን በመስኮት ወረወረለት። ይህም ከሶስቱ ሴት ልጆች ለታላቋ ሴት ጥሎሽ ሆነ። ቀጥሎም ኒኮላስ ለሁለተኛዋ ሴት እንዲሁ አደረገ። በዚህ ጊዜ ገንዘቡ ከየት እንደመጣ ማንም አያውቅም ነበር። ሶስተኛዋ ልትዳር ስትል ያ የሴቶቹ አባት ሌሉቱን ሁሉ ቁጭ ብሎ መጠበቅ ጀመረ። ያን ቀን ኒኮላስ ገንዘቡን ሲሰጥ ማንነቱ ታወቀ። ስለዚህ በአጠቃላይ በታሪኩ ኒኮላስ ቸርና ደግ ሰው መሆኑን ይታወቃል። በ343 ዓ.ም ከዚህ ዓለም በሞት ተለየ። ብዙ ተአምራትን እንዳደረገ ይነገር ስለነበር በካቶሊክ ቤተ-ክርስቲያን ሴንት ኒኮላስ ወይም ሴንት ኒክ በመባል ተጠራ። የሞተው ህዳር 26 (ዲሴምበር 6) በመሆኑ በአውሮፓ ቤተ-ክርስቲያን መታሰቢያው በዚያ ቀን ሆነ። ህፃናት በዋዜማው ቀን ጫማቸውን ውጪ ያሳድሩና ጠዋት ከረሜላ ተቀምጦላቸው ያገኙ ነበር። ስለዚህ የፕሮቴስታንት እንቅስቃሴ አውሮፓን ሲቆጣጠር ይህ ሴንት ኒኮላስ የካቶሊክ በመሆኑ በሌላ መተካት ተጀመረ። ስጦታ ይሰጣል የተባለው ሳንታ ክላውስ በእንግሊዝ የገና አባት (Father Christmas) ሆነ። በኔዘርላንድ ሲንተርክላስ ወይም ሳንታ ክላውስ እንደተባለ ቀረ። አሁን ያለው ሳንታ ክላውስ ስያሜውን የወሰደው ከዚሁ ነው። ማርቲን ሉተር የሰዎችን ትኩረት ከካቶሊክ ቅዱሳን ወደ ኢየሱስ ለማዞር ሲል ህዳር 25 (ዲሴምበር 5) ምሽት የነበረውን የስጦታ ቀን ወደ ገና ዋዜማ ወይም ታህሳስ 14 (ዲሴምበር 24) አዞረው፤ ሴንት ኒክን ደግሞ ክርስቶስ ህፃኑ ወይም በጀመርንኛ Christkindl በሚል ተካው።

🔶 በመጀመሪያዎቹ ጊዜዎች ሳንታ ክላውስ የሚለብሰው ልብስ ቡኒ ቢሆንም በጊዜ ሂደት ቀይ ሆነ። በ1831 የኮካ ኮላ ካምፓኒ የክረምት ሽያጩን ለማሻሻል ሳንታ ክላውስን እንደ ማስታወቂያ መጠቀም ጀመረ። በዚያ ወቅት ጥቁር ቡትስ ጫማና ጥቁር ቀበቶ ማድረግ ተጀመረ። እንዲህ እያለ በሂደትና ትርክት ቅብብሎሽ ሳንታ ክላውስ ባለነጭ ፂም ከመሆን ጀምሮ ቀይ ልብስ እስከመልበስና ባለስምንት ዋላዎች ጋሪ የሚነዳ ሆነ። ሌሎችም ክፉ ነገሮች ከሳንታ ክላውስ ጋር በተያያዘ ተጨምረዋል። እንዲህ ያለው ታሪክ ክርስቶስን የሚሸፍንና ሕፃናትን በተሳሳተ እምነት የሚቀርፅ አካሄድ መሆኑ ግልፅ ነው። ሳንታ ክላውስ ከክርስቶስ ልደት ወይም ከገና ጋር የሚያገናኘው ምንም ነገር የለም። ስለዚህ በገና ጊዜ የገና አባት ወይም ሳንታ ክላውስ ሊነሳ አይገባውም።

🔶 ስለገና ዛፍ እንመልከት። በጥንት የሮም ኢምፓየርና ሌሎች አለም ክፍሎች በነበሩ በዓሎች የነበረውን አረንጓዴ ዛፎች የመጠቀም ልምድ ተመልክተናል። እነዚህ ሀገሮች ዛፎች መጠቀም የጀመሩት ተኮራርጀው ሳይሆን ዛፎችን ለክረምት በዓሎች መጠቀም የተለመደና ከወቅቱ አንፃር አስፈላጊ ስለነበር ነው። ቤተ-ክርስቲያን በ4ኛው ክፍለ ዘመንና ከዚያም በኋላ ለአመታት ገናን ስታከብር ዛፎችን መጠቀም የጀመረችው ከሳተርኔሊያ የአሕዛብ በዓል ተመልክታ ሊሆን ይችላል። ነገር ግን ዛፍ መጠቀምን ወስደው ክርስትናዊ የሆኑ ነገሮች ጨምረውበታል። ለምሳሌ የፓም ወይም አፕል ፍሬ ያደርጉበት ነበር። ይህም የኤደን ገነትን ለማሰብ ነበር። በሳተርኔሊያ በዓል እንደ አዲስ ሕይወት ምሳሌ ይጠቀሙበት የነበረውን ሆሊ (Holly) የተባለ ዛፍ ወስደው የእሾህ አክሊል እንዲወክል አድርገውታል። ስለዚህ የዛፍ አጠቃቀሙን በተወሰነ መልኩ ከአሕዛብ ሲወስዱ ክርስቲያናዊ መልክ ሰጥተው ተክተውታል። ይህ እንዳለ ሆኖ ግን እኛ ዛሬ የገና ዛፍን ከምንጠቀምበት ምክንያትና ሁኔታ ጋር በጭራሽ አይገናኝም። ስለዚህ እኛ ዛሬ የገናን ዛፍ የምንጠቀምበት ምክንያትና አካሄድ በጥንት ከነበሩት የአሕዛብ አምልኮትም ሆነ ቤተ-ክርስቲያን ያን ለመቀየር ካደረገችው ጥረት ጋር በጭራሽ አይገናኝም። የዚህ ዘመን የገና ዛፍ አጠቃቀማችን የራሱ የሆነ አመጣጥ፣ ትርጉምና መልክ አለው እንጂ ከአምልኮት ጋርም ሆነ ከጥንት ቤተ-ክርስቲያን የገና በዓል አከባበር ጋር አይገናኝም። ታዲያ ዛሬ የምንጠቀምበት የገና ዛፍ ከየት መጣ?

🔶 አሁን እኛ በገና በዓል የገናን ዛፍ ስለምንጠቀም፤ ዛፍን የተጠቀምንበት ምክንያት ከነዚያ የአሕዛብ እና አጋንንታዊ በዓሎች ጋር ይያያዛል ወይ? የሚለውን ልንመልስ ይገባል። ቀኑስ እነዚህ የአሕዛብ በዓሎች ከሚደረጉበት ቀን ጋር ለምን ተመሳሳይ ሆነ? እነዚህ ሁሉ የአሕዛብ በዓሎች የገና በዓል ከመጀመሩ አስቀድሞ የነበሩ በዓሎች ናቸው። ስለዚህ የገና በዓል ከየት እንደመጣ፣ ለምን ቀኑ ታህሳስ 15 (ዲሴምበር 25) እንደሆነና ዛሬ የምናከብረውን በዓል መልክ እንዴት ሊይዝ እንደቻለ እንመልከት።

🔶 እስከ 4ኛው ክፍለ ዘመን ድረስ በነበሩት የመጀመሪያዎቹ የቤተ-ክርስቲያን ዘመናት የክርስቶስ ልደት አይከበርም ነበር። ምክንያቱ ደግሞ ልደትን ማክበር እንደመልካም ነገር ስለማይቆጠር ነበር። ያም የሆነው በወቅቱ የነበሩ አንዳንድ የመጽሐፍ ቅዱስ አጥኚዎች መጽሐፍ ቅዱስ ልደትን ማክበር መልካም እንዳልሆነ እንደሚጠቁምና የአሕዛብ ነገር እንደሆነ ስለሚያስተምሩ ነበር። ለምሳሌ በመጽሐፍ ቅዱስ ልደትን ያከበሩት አሕዛብና ክፉ የሆኑት ፈርኦንና ሄሮድስ መሆናቸው፤ እንዲሁም መጥምቁ ዮሐንስ በሄሮድስ ልደት ላይ መገደሉ ከሚያነሷቸው ምክንያቶች ውስጥ ነበሩ። ታዲያ የዚህ አስተሳሰብ ለውጥ የመጣው በ312 ዓ.ም ንጉስ ቁስጥንጢኖስ ክርስቲያን ሲሆን ነበር። እርሱ ወደ ክርስትና ሲመጣ በክርስቲያኖች ላይ የሚደረገውን ስደትና ስቃይ አስቆመ። በዚያን ጊዜ ቤተ-ክርስቲያን በስውር የምትንቀሳቀስ ነበረች። ከቁስጥንጢኖስ ክርስትና በኋላ ግን በሙሉ ተቋም አሰራር ለመስራት ማደግ ጀመረች። ከዚያ በኋላ ነው ገና የሚባለው በዓል የቤተ-ክርስቲያን ልማድ የሆነው። ይህም የሆነው በአንድ በኩል በየሃገራቱ ጠንካራ ባህል ሆነው የተሰነቀሩትን የአሕዛብ በዓሎች እግዚአብሔርን በሚያከብሩ ክርስቲያናዊ በዓሎች ለመተካት ነበር። ገና በራሱ የአሕዛብ በዓል አይደለም። ነገር ግን ሌሎች የአሕዛብ በዓሎችን ሁሉ ተክቶና አሸንፎ ፀንቶ ቆሟል። ገና ባይኖር ኖሮ አሁን በዓለም የሚከበረው ሳተርኔሊያ/Saturnalia ወይም ሶል ኢንቪክተስ/Sol Invictus ወይም ሌላ የአሕዛብና አጋንንታዊ በዓል ሊሆን ይችል ነበር። ነገር ግን የገና በዓል ምክንያትና ታሪክ ከሌሎቹ በዓሎች በአሳማኝነቱና በዋጋው እጅግ ስለላቀ ሌሎችን ጥሎ እሱ አይሎ ወጣ።

🔶 እነዚህ ሁሉ ገናን ለማክበር መልካም ምክንያቶች ቢሆኑም ለምን በታህሳስ 15 (ዲሴምበር 25) መከበር እንደ ጀመረ እንመልከት። ይህ ቀን ኢየሱስ የተወለደበት ቀን ላይሆን ይችላል። ምንም እንኳን ኢየሱስ የተወለደበትን ወቅት የሚጠቁሙ አንዳንድ መረጃዎች በመጽሀፍ ቅዱስ ውስጥ ቢኖሩም ግን መጽሐፍ ቅዱስ ኢየሱስ የተወለደበትን ቀን በግልፅ አይናገርም። ኢየሱስ በመክተቻ በዓል (Feast of Harvest – Feast of SUKKOT) ማለትም መስከረምና ጥቅምት (ሴፕቴምበርና ኦክቶበር) አካባቢ እንደተወለደ የሚያሳይ አሳማኝ መከራከርያ ቢኖርም ዋናው ነጥብ እሱ አይደለም። ዋናው ነገር ቤተ-ክርስቲያን ለምን በታህሳስ 15 (ዲሴምበር 25) ለማክበር እንደወሰነች ማወቁ ነው።

🔶 በቅድሚያ ሴክስተስ ጁሊየስ አፍሪካነስ የተባለ ክርስቲያንና ታሪክ አጥኚ ታህሳስ 15 (ዲሴምበር 25) ኢየሱስ የተወለደበት ቀን እንደሆነ ጠቆመ። ከዚህ ቀደም በቤተ-ክርስቲያን ኢየሱስ ተወለደ ተብሎ የሚታመነው በጁሊያን ካሌንደር መሰረት በመጋቢት 16 (ማርች 25) ነበር። የዚህም ምክንያት ፍጥረት የተፈጠረው በመጋቢት 16 (ማርች 25) ነበር ተብሎ ስለሚታመን ነበር። ኢየሱስም ሊወለድ የሚችለው እግዚአብሔር ብርሃን ይሁን ባለበት በዚሁ ቀን ነው በሚል አሳማኝ ምክንያት ኢየሱስ የተወለደው በመጋቢት 16 (ማርች 25) እንደሆነ ታመነ። ከዚያም ሴክስተስ ጁሊየስ አፍሪካነስ መጣና መጋቢት 16 (ማርች 25) ኢየሱስ የተፀነሰበት እንጂ የተወለደበት ቀን አይደለም በማለት በዚያ ቀን ላይ ዘጠኝ ወር በመጨመር ኢየሱስ የተወለደው በታህሳስ 15 (ዲሴምበር 25 ነው) አለ። ይህ ቀን ደግሞ በጁሊያን ካሌንደር መሰረት (Winter Solstice) ሙሉ የፀሐይ ብርሃን የሚመጣበት ቀን ስለሆነ ሰዎች ብርሃን ጨለማን ድል እንደነሳ የሚያከብሩበት ቀን ነው። የአሕዛብ በዓሎችም በዚህ ቀን ይከበሩ ነበር። ነገር ግን ከላይ እንደምትመለከቱት የኢየሱስ ልደት በታህሳስ 15 (ዲሴምበር 25) እንዲሆን ከመወሰኑ ጋር ምንም የሚያገናኘው ነገር የለም። አፍሪካነስ ታህሳስ 15ን (ዲሴምበር 25) የኢየሱስ ልደት ቀን እንደሆነ ከጠቆመ በኋላ ቤተ-ክርስቲያን በ336ዓ.ም እስክትቀበለው ድረስ አንድ ክፍለ ዘመን አለፈ። ይህም ቁስጥንጢኖስ ከመሞቱ አንድ አመት ቀደም ብሎ ማለት ነው። ታዲያ ቤተ-ክርስቲያን ቀኑን እንደ ኢየሱስ ልደት ቀን ተቀበለች እንጂ የልደት በዓሉ ይከበር እንደነበር የሚገልፅ ነገር ባይኖርም ቤተ-ክርስቲያን ኢየሱስ የተወለደበትን ቀን ከተቀበለችና ከተስማማች ላታከብር የምትችልበት ሁኔታ አይኖርም በሚል ብዙ የታሪክ ፀሀፊዎች ቀኑ መከበር የጀመረው በዛው ጊዜ እንደሆነ አስበው ፅፈዋል። የቀኑን አወሳሰን እንዲህ ካስተዋልን ቤተ-ክርስቲያን በታህሳስ 15 (ዲሴምበር 25) ዕለት የኢየሱስን ልደት ለማክበር የወሰነችው ከአሕዛብ ጋር ለመፎካከር ብላ ነው የሚለው ሃሳብ ውሃ አይቋጥርም፤ ምንም አይነት ማስረጃም የለውም። ነገር ግን የኢየሱስ ልደት በዓል እያየለ መምጣቱን ሁሉም የታሪክ ፀሀፊዎች ይስማማሉ። በዚህ ጊዜ በአሕዛብ በዓሎች የነበሩት ዛፍ፣ ሻማና የመሳሰሉት በኢየሱስ ልደት በዓል ውስጥ እየተካተቱ መጡ። ይህም ከምንም ዓይነት ጣኦት አምልኮ ጋር ግንኙነት የለውም። ይልቁን በዓሉ ከሚከበርበት ወቅት (ክረምት ከመሆኑና የአዲስ አመት መንደርደሪያ ከመሆኑ) ጋር በተያያዘ ከላይ እንዳብራራሁት እነዚህን ነገሮች መጠቀም የለተመደ ስለነበር ነው። እግዚአብሔር ፍጥረትን የፈጠረው ለእኛ ጥቅም እንጂ ለአጋንንት ነው ብለን እንድንተወው አይደለም። ስለዚህ ለጌጥም ሆነ ለሙቀትና ብርሃን ዛፍን፣ ሻማንና የመሳሰሉትን መጠቀም ምንም አይነት ከመጽሐፍ ቅዱስ ጋር የሚጋጭና አጋንንታዊ የሆነ ነገር የለውም። ምድርና ሞላዋ የእግዚአብሔር እንጂ የአጋንንት አይደለም።

🔶 የኢየሱስ ልደት በዓልና የአሕዛብ በዓሎች የሚከበሩበት ቀን ተመሳሳይ መሆኑ የኢየሱስ ልደት ቀን ከአሕዛብ በዓል እንደመጣ የሚያሳይ አይደለም። በኢየሱስ ልደት በዓልና በአሕዛብ በዓሎች መካከል የሚመሳሰሉ ነገሮች መኖራቸው የኢየሱስ ልደት በዓል የአሕዛብ በዓል እንደሆነ የሚያሳይ አይደለም። ይህን ማስተዋል ይገባል። ቤተ-ክርስቲያን በዲሴምበር 25 የምታከብረው የአሕዛብ በዓል ነው በማለት ይህን ስህተት እንዳንፈፅም እንጠንቀቅ። የገና በዓል ከሌሎቹ የአሕዛብ በዓሎች በመላቁና በዓለም ዙሪያ ሁሉ እየተከበረ ስለክርስቶስ መነገሩ ደስ ሊለን ሲገባ አንዳንድ ሰዎች ተነስተው ታሪኩን በትክክል ሳያጠኑ በዓሉ ይቅር የሚልን ሃሳብ ይናገራሉ። የሆነው ነገር እነዚያን የጨለማ በዓሎች የብርሃን በዓል ድል ነሳቸው። የክፋት ነገሮች ተጠርገው በእግዚአብሔራዊ ነገር ተተኩ። የቀድሞዋ ቤተ-ክርስቲያን የአሕዛብ ነገሮችን እግዚአብሔራዊ በሆኑ ነገሮች የመተካት ልምዷ በሌሎችም ነገሮች ሰፊ ነበር። ለምሳሌ ለሮምና ለግሪክ አማልክት የተሰሩ የጣኦት ቤቶችን ክርስትና ወደ አካባቢው ሲመጣ እነዚያኑ የጣኦት ቤተ-መቅደሶች ወደ ቤተ-ክርስቲያንነት ይለውጧቸው ነበር። እነዚያን የጣኦት ቤቶች ከማቃጠል ይልቅ ጣኦቶቹን ከመቅደሱ በማውጣትና በክርስቲያናዊ ነገሮች በመተካት በዚህ አይነት አስተሳሰብ

🔶 በአማርኛ ገና ወይም የክርስቶስ ኢየሱስ ልደት መታሰቢያ በዓል በእንግሊዝኛ Christmas ብለን የምንጠራው በዓል መቼና ለምን መከበር እንደጀመረና ከክርስቶስ ቤተ-ክርስቲያን ጋር ያለውን ታሪክ እንመለከታለን። ገና የአሕዛብ በዓል ነው ወይ? የገና ዛፍና የሳንታ ክላውስ አመጣጥ እንዴት ነው? ክርስቲያኖችስ ገናን ሊያከብሩት ይገባል ወይ? የሚሉትንና የክርስቶስ ልደት መታሰቢያ በዓል እንዳይከበር የሚቃወሙ ሰዎችን ሃሳቦች በዚህ ፅሁፍ በስፋት እንመለከታለን።

🔶 ከስያሜው ስንጀምር በአማርኛ ገና የሚለው ቃል የመጣው ክሪስቶገና (Christougenna) ከሚለው የግሪክ ቃል ሲሆን ትርጉሙም የክርስቶስ ልደት ማለት ነው። እንዲሁም በእንግሊዝኛ ክሪስማስ (Christmas - Christ’s mass) ማለት የክርስቶስ ማህበር ማለት ነው። በቤተ-ክርስቲያን ተሰብስበው የክርስቶስን ልደት ሲያከብሩ የክርስቶስ ማህበር ተብለው ስለተጠሩ ስሙ Christmas ሆነ።

🔶 አንዳንድ ሰዎች ከሚሉት በተቃራኒ የገና በዓል በጭራሽ የአሕዛብ በዓል ሆኖ አያውቅም። የተጀመረውም ከክርስቶስ ልደት በፊት አይደለም። ከጅማሬው የታሰበው በበዓሉ የኢየሱስ ክርስቶስን ልደት ለማክበር ነው። ይህ በታሪክ የተረጋገጠ እውነታ ነው። እስከ 4ኛው ክፍለ ዘመን ድረስ የገና በዓል የሚባለው ነገር አይታወቅም ነበር። የገና በዓል መከበር ከጀመረበት ጊዜ አስቀድሞ በተመሳሳይ ወቅት ታህሳስ ወይም ዲሴምበር አካባቢ የሚከበሩ ሌሎች ብዙ በዓሎች ነበሩ። በዓለም ዙሪያ ሰዎች ታህሳስ (ዲሴምበር) አካባቢ ያለውን የጊዜ ወቅት በዓል ለማክበር የሚጠቀሙበት የተለያዩ ምክንያቶች አሉ። አንዱም ምክንያት ለብዙ ሀገሮች ወቅቱ የክረምትና የጨለማ በመሆኑና ያን ወቅት ለመሻገር በቤተሰባዊ መሰባሰብ፣ በመብላትና በመጠጣት ለማሳለፍ ነው። ሌላው ምክንያት ደግሞ በዚህ ፀሀይ ብዙም በማትወጣበት ጊዜ አንዳንድ ሰዎች የሚያካሂዷቸው አጋንንታዊ ስርዓቶች መኖራቸው ሌሎች ደግሞ አጋንንታዊ ያልሆኑ ባህላዊ ስርዓቶችን የሚያደርጉባቸው ጊዜ በመሆኑ ነው። 

🔶 በሮም ኢምፓየር በ4ኛው ክፍለ ዘመን በክረምት ወቅት (ታህሳስ/ዲሴምበርና ጥር/ጃንዋሪ መጀመሪያ አካባቢ) የሚደረጉ የተለያዩ በዓሎች ነበሩ። ከእነዚህ ውስጥ ስለገና ለማውራት መነሻ የሚሆኑንን አራት በዓሎች እንመልከት።

1. ሳተርኔሊያ/Saturnalia፡ ይህ ከታህሳስ 7 እስከ 13 (ዲሴምበር 17-23) የሚደረግ ለአንድ ሳምንት የሚቆይ በዓል ነበር። ይህም ሳተርን ለተባለው የእርሻና የጊዜ አምላክ በሚደረግ መስዋዕት ይጀመራል። ከዚያም በሮም በከፍተኛ ደረጃ በተታታይ ዝግጅቶችና የመንገድ ላይ ትዕይንቶች ይከበራል። እጅግ ጋጠወጥ በሆኑ ድርጊቶች የተሞላ በዓል ነበር። ይህ ደግሞ በቀደመው ዘመን ቤተ-ክርስቲያን ገና ወይም የክርስቶስ ልደት ብላ ከምታከብረው በዓል ምክንያትና አካሄድ ጋር ምንም አይነት ቅርርብ የሌለው በመሆኑ ገና ከዚህ በዓል ጋር እንማይገናኝ ማስተዋል ይገባል። ነገር ግን አንዳንድ የሚያመሳስላቸው ነገሮች ነበሩ። ይህም አረንጓዴ ዛፍና ሻማዎችን መጠቀማቸው ነው።

2. ሶል ኢንቪክተስ/Sol Invictus፡ ይህ በዓል የማይበገረው የፀሐይ አምላክ በሚል የሚከበር ነው። በድሮ ጊዜ በዓለም ዙሪያ ሁሉ ለእያንዳንዱ የወቅት መቀየር ትልቅ ቦታ ነበራቸው። ምክንያቱም የቀኑና የምሽቱ ርዝማኔና ማጠር፤ እንዲሁም የዝናብና የፀሐይ ወቅቶች ከሚያመርቱት ነገሮችና ከሚኖሩት ሕይወት ጋር ከፍተኛ ቁርኝት ስለነበራቸው ነው። ስለዚህ በድሮ ጊዜ ክረምት በሚሆንበት ወቅት በሁሉም የዓለም ክፍሎች የሆነ አይነት በዓል ይኖራል። በሮም ኤምፓየር ደግሞ ሶል ኢንቪክተስ ይከበር ነበር። ምድር በፀሐይ ዙሪያ በምህዋርዋ ላይ ከምታደርገው ዙረት የተነሳ በተወሰኑ ጊዜዎች ውስጥ ፀሐይ በሰሜኑ የዓለም ክፍል አካባቢ የምታበራው ከሃያ አራቱ ሰዓት ለአጭር ሰዓት በመሆኑ የቀኑ ርዝማኔ አጭር ሆኖ የምሽቱ ርዝማኔ ይጨምራል። በሌሎች ጊዜዎች ደግሞ በተቃራኒው ፀሐይ ሙሉ በሙሉ እየወጣች የቀኑ ርዝማኔ ይጨምራል። በሰሜን የዓለም ክፍል የቀኑ ርዝማኔ የሚጨምርበትና ፀሐይ በሙላት ማብራት የምትጀምርበት ጊዜ በግሪጎሪያውያን ካሌንደር ታህሳስ 11 (ዲሴምበር 21) አካባቢ ነው። ይህ ቀን ሮማውያን በወቅቱ በሚጠቀሙበት ጁሊያን ካሌንደር መሰረት ታህሳስ 15 (ዲሴምበር 25) ነበር። ነገር ግን በዚህ ዘመን የገና በዓልን የምናከብርበት ቀን ታህሳስ 15 (ዲሴምበር 25) የመሆኑ ምክንያት የሮም ኢምፓየር በዚህ ቀን ያከብር ከነበረው ሶል ኢንቪክተስ/Sol Invictus በዓል ጋር በምንም አይገናኝም። ምክንያቱን ቀጥሎ የማስረዳ ይሆናል።

3. የሚትራስ ውልደት/birth of mithras፡ ሚትራስ የብርሃን፣ የፍትህና የመሃላ አምላክ ነበር። ይህም እንደዚሁ በታህሳስ 15 (ዲሴምበር 25) የሚከበር በዓል ነበር። በዚህ ቀን የሚትራስ ልደት ይከበራል። ነገር ግን ይህም በዓል ልክ እንደ ሶል ኢንቪክተስ/Sol Invictus ሁሉ ገና በታህሳስ 15 (ዲሴምበር 25) እንዲሆን ከተወሰነበት ምክንያት ጋር ምንም ዓይነት ግንኙነት የለውም።

4. ካሌንድስ/Calends፡ ይህ ለቀናት የሚቆይ የጥንት ሮማውያን የአዲስ አመት ክብረ በዓል ነበር። የሳተርኔሊያ/Saturnalia በዓል ካለቀ አንድ ሳምንት በኋላ አካባቢ አዲስ አመት ሲጀመር በትዕይንቶችና በመጠጦች የሚከበር በዓል ነበር።

🔶 በአጠቃላይ ከታህሳስ 7 እስከ ታህሳስ 26 (ዲሴምበር 17 - ጃንዋሪ 5) በሮም እነዚህንና ሌሎችን ጨምሮ ብዙ በዓሎች ይደረጉ ነበር። ይህ ወቅት በዓሎችን ለማድረግ ምቹና ተመራጭ ነበር። ምክንያቱ ደግሞ ወቅቱ የብርድና የጨለማ በመሆኑ ሰዎች ያንን በምግብ፣ በመጠጥ፣ እሳት እያነደዱ በመሞቅና ከሌሎች ጋር በአብሮነት ለማሳለፍ በዓሎችን ይጠቀሙ ስለነበር ነው። አንዳንዶችም ለአምላኮቻቸው መስዋዕትን ያቀርቡ ነበር። በእነዚህ በዓሎች የተለመደው ማስጌጫ አረንጓዴ ዛፎች በተለይም አመቱን ሙሉ የማይረግፉና አረንጓዴ እንደሆኑ የሚቆዩ ዛፎች ነበሩ። ተመራጭ ያደረጋቸው ምክንያት ደግሞ ሌሎች ነገሮች በክረምት ሲጠፉና ሲዳከሙ እነዚህ ዛፎች ክረምቱንም ሳይቀር አረንጓዴ ሆነው መቆየታቸው ነው። በተጨማሪ በእነዚህ በዓሎች ለክረምቱ ጨለማ ሻማዎችን ይጠቀሙ ነበር። ይህን ማየት ያስፈለገው ለምን የገና በዓል ከሌሎች አሕዛብ በዓሎች ጋር አንዳንድ የሚያመሳስሉ ነገሮች እንደኖሩት ለመረዳት ስለሚጠቅም ነው።

🔶 ሌላው ደግሞ አሁን ጀርመን፣ የስካንዲኔቪያ አገሮችና ታላቋ ብሪቴን ብለን በምንጠራቸው አካባቢዎች ይከበር የነበረ ጥንታዊ በዓል ነው። ይህም ክርስትና ወደዚያ አካባቢ ከመድረሱ አስቀድሞ የነበረ ዩል/Yule የተባለ በዓል ነው። በታህሳስ (ዲሴምበር) መጨረሻ ይከበር ነበር። አባትና ልጅ ወደ ጫካ በመሄድ መሸከም የሚችሉትን ያህል ትልቅ እንጨት ወደ ቤት በማምጣት ያነድዱት ነበር። አንዳንድ ጊዜ ይህ እንጨት ከትልቀቱ የተነሳ እየነደደ ለቀናት ሊቆይ ይችላል። የእንስሳ መስዋዕት ደግሞ ለአምላኮቻቸው ያቀርቡ ነበር። የመስዋዕት ስጋውን በዚህ በዓል ወቅት ይመገቡ ነበር። በእሳቱ ዙሪያም ተቀምጠው አስፈሪ ታሪኮችን ያወራሉ።

የእምነት አዋጆች ለጤንነትና ለፈውስ
ፓስተር ክሪስ ኦያኪሎሜ
ትርጉም: አማኑኤል ከበደ @Lovedface የተወደደ መልክ

🔶 በጤንነትና በፈውስ እግዚአብሔር በክርስቶስ ኢየሱስ ያዘጋጀላችሁን ሕይወት በተጨባጭ እንድትኖሩ የሚረዳችሁን መጽሐፍ በአማርኛ ተርጉሜ አቅርቤላችኋለሁ።

🔶የእምነት አዋጆች ለጤንነትና ለፈውስ
ፓስተር ክሪስ ኦያኪሎሜ
ትርጉም: አማኑኤል ከበደ @Lovedface የተወደደ መልክ

👇👇👇

እጅግ የተባረኩበት ዝማሬ ስለሆነ በኢየሱስ ፊልም ቪዲዮ ሰርቼ ለእናንተ ላካፍላችሁ ወደድኩ።

ማላወራው - ዘማሪ ዲያቆን ሐዋዝ ተገኝ

https://youtu.be/X_mEad6jb-0?si=iJPEWLgVZV__iqbY

የተወደደ መልክ Lovedface:
Youtube: @emanuelKebede
Facebook: @Lovedface
Telegram: @Lovedface
Tiktok: @Lovedface
የአምላኬ ቃል እንዲሁም ጥልቅ ጥናትና ሌሎች አፕሊኬሽኖችን በቴሌግራም ቻናል ያገኛሉ።

አማኑኤል ከበደ

የኢየሱስ ሕይወት ፊልም በአማርኛ 4K UHD በከፍተኛ ጥራት The Life of Jesus Film (Amharic)

https://youtu.be/OuZqyzvgv1g?si=XjNnj3idUBCvfuoW

በLovedface የተወደደ መልክ የተዘጋጀ

Youtube: @emanuelKebede
Facebook: @Lovedface
Telegram: @Lovedface
Tiktok: @Lovedface
የአምላኬ ቃል እንዲሁም ጥልቅ ጥናትና ሌሎች አፕሊኬሽኖችን በቴሌግራም ቻናል ያገኛሉ።

አማኑኤል ከበደ

https://youtu.be/QjZxDqWRQjI?si=bJoKGsn9a1yCSGtY

የአጋፔቶስ ንጉስ || ልታዩት የሚገባ አስደናቂ ታሪክ tiktok.com/@Lovedface

Tiktok.com/@Lovedface