محمد | Purple

السلام عليكم ورحمة الله وبركاته 🙄🤍
رد السلام واجب 🙄🤍

بسولف معكم كني ممداي معطيكم ١٦ وصفة حصرية مُتتاليه وانا ادري بكم م تاخذون بخاطركم بس احب اواسيكم وادللكم فجبت لكم مكس خورافي 🙄🤍


شايفين وصفه الوافل هذي ؟ حطيت عليها صوص المعصوب وطلع لي طعم خورافي من الآخر


وصفة الوافل هي :

٤٠ جرام شوفان مطحون + ملعقة صغيرة بيكنج باودر + نفسها نشأ + بيضة + قطرات فانيليا + ٤٠ جرام زبادي يوناني زيزو فات + ٣ ملي زيت زيتون + سُكر ستافيا + ١٥ ملي حليب لو فات

كلهم اخلطوهم ع بعضهم بعدها حطوهم في آلة الوافل مع بخة زيت وخلوها لين م تستوي، و ع بال م تجهز حضروا صوص المعصوب وهو

٣٠ جرام بروتين فانيلا + ٢٠ جرام جبن كريمي + ٤٠ جرام زبادي يوناني لو فات + قطرات فانيلا وبسس


الاضافات نص موزة + حبه سمراء + ١٠ جرام كاجو + ١٠ جرام انتم يعني عسل وكذا 🍯

وراح تطلع لكم القيمة الغذائية اللي تشوفونها ان شاء الله اما الطعم والله ي اخوكم محد يشكك بذوقي الحمدلله واكبر دليل هذا انتم جالسين تاكلون ماشاءالله وانا غاطس لي دهرين ونص يمكن 😹♥️ ..

أهلين ي حلوين ادري والله اني من زمان عنكم للظروف ولا ودي بهالبُعد الله حق ، فعشان نصير أقرب ونشوف احوالنا ان شاء الله هذاي فتحت حساب ع الانستقرام

حياكم الله معاي اذا مهتمين تشوفون حوستي و اذا م تبون خلوكم بهاه تعضلون بصمت وأمان إن شاء الله 😹🤍 ..

https://www.instagram.com/imu7aaa/profilecard/?igsh=a25zb2I4OWlmZWk=

وصفة الكيجن تشكن

صدور دجاج ٣٠٠ جرام قطعتهم وتبلتهم بـ بهارات الكاجون ( ألذ بهارات عندي بالفتره الاخيره )

بعدها حمستهم مع شوي زيت زيتون وبعد م استوت طلعتها ع جنب وبنفس الطاوة حطيت معجون طماطم و ثوم و بصل وفلفل رومي من انحمسوا مع بعضهم اضفت ٥٠ ملي كريمه طبخ لايت ورجعت الدجاج اللي عملته قبل ، وحمستها ع نار هاديه بالحيل واضفت برضو شوي من بهارات الكاجون وطلع لي الذ دجاج كيجن بالكون 🤍 ..

قبل لا انهي كما جرت العادة حنا ناس تفهم بالقيمة الغذائية فـ لو عملناها مع مكرونة ولا رز او حتى خُبز كلو يجي دامنا نفهم انه فيه مصادر متنوعه من الكاربوهيدرات 🙂‍↕️🤍

اوما عاد ليش محد قال اني م نزلت لكم وصفة المعصوب ؟ وش بكم بسم الله عليكم ؟

دوكم دوكم

نحمّص شريحتين توست بر بعدها نحطهم بمحضرة الطعام مع ثلاث أرباع الموزه لان الربع الاخير نبيه شكل ع الوجه عقب م يجهز الطبق

بعد م ينهرسون مع بعض نضيف عليهم الخليط:

٦٠ ج زبادي يوناني زيرو فات + سكوب بروتين فانيلا + ٢٠ ج جبن كريمي + اخر شي قطرات فانيلا عشان النكهه تصير توب التوب ✔️

اذا م عندكم بروتين باودر يصير تحطون خبز بروتين حق الحطب عشان ترفعون القيمة الغذائية و اخر شي حبه سودا و كاجو و ١٠ ج عسل ي وشو ؟

ي عسل آلبي انتم 🍯

والله م ادري شلون أفاتحكم بالموضوع بس ان شاء الله برجر رضوى يتوسط بيننا ونرد حبايب مثل كل مره🤝🏻

فعشان الواسطه تكمل كل اللي عليكم انكم تحطون البرقر ع الصاج ولا الشوايه وتقلبونه ع الوجهين لين م يستوي معاكم ولا تنسون بخاخ الزيت ✔️

الاضافات خس 🥬 + جبن لايت + بصل ابيض 🧅 و مخلل خيار وحطيت بهار اضافي وهو الكاجون عشان معجبني طعمه تقدرون تحطونه او اي صوص تفضلونه

حاجه اخيره البوكس عليه عرض اللحين بـ ١٠ ريال وفيه ٤ حبات وكل حبه فيها القيمة الغذائية اللي قبالكم

وعليكم بالف عافيه ي أجمل معضلين بالدُنيا ♥️ ..

اهلين ي حلوين ، اسمعوا حنا هنا م نتشره ع مدة السحبات بس نشوف الوصفات ونطبّق ونعضل وندعي لبعض بالصحة والعافية 🙂‍↕️♥️

شايفين الوصفة هذي ؟ نفسها بالتمام اللهم اني بدلت المكرونة باللي تشوفونها قبالكم

هذي اسباغتي لو كارب غنية بالبروتين 🍝
القيمة الغذائية للـ ١٠٠ جرام فيها :

‏كارب ٣٢ ج
‏دهون ٢ ج
‏بروتين ٢٦ ج


مُناسبه للي يبي مكرونة الكارب فيها قليل ✔️
‏ماله نفس يضيف مصادر بروتين ✔️
حتى لو انك مقلل سُعرات يصير يمديك تضيف سناك خفيف باخر اليوم بالراحه ان شاء الله ✔️


عشان اخليها ٧٠ ج بروتين بس اضفت عليها ١٥٠ ج دجاج وطلعت بالقيمه الغذائية المناسبه لي ✅

يصير انتم تشوفون الاوضاع المناسبه لأحتياجكم ي بعد كلّي وملي انتم ♥️ ..

محمد | Purple pinned «فيه سالفه تقرقع بقلبي ولا مره تكلمت عن شي زي كذا بس حسيت لازم أعلمكم تواصل معاي كذا تطبيق مُختص بالوصفات عشان اعلن لهم وانا رفضت ، والرفض مهو بسبب العائد المادي ، الحمدلله الخير واجد والله يغنينا من فضله جميعاً رفضت عشاني مُستحيل أسوّق كيف ان الناس تدخل…»

أهلين ي حلوين تعالوا نغذي عضلاتنا بوصفه فيها ٨٠ جرام بروتين و سهل حيل بالتحضير وطعمها خيال 😻

نفس طريقة التحضير بالتمام بس انا استخدمت ٣٠٠ جرام دجاج والبهارات اللي عليه كانت :

ملح وفلفل اسود وبابريكا وبودرة ثوم واذا عندكم بهارات مخلوطه عادي تنضاف عليها ✔️

الصوص بعد م تبشرون الخيار بالكميه اللي تبغونها تضيفون له التالي 🥒:

٥٠ جرام زبادي يوناني زيرو فات +٢٠ جرام طحينه
+ رشّة ملح 🧂

ندخل ع موضوع الكارب 🥖🍞🥯 ، نوعية الخبز كانت صامولي نخاله من الدانوب وانتم ع مزاجكم تختارون اللي تبونه واللي يناسب سُعراتكم وتطمنوا الطعم جداً رهيب مع اي نوع كان وهني وعافية ع عضلاتكم المفتولة 🙂‍↕️🤍

دجاج بصوص الباربكيو 🤤

نفس المقطع بالتمام ولو حابين تحمسون الدجاج بعد م تقطعونها شرائح برضو يجي وبخصوص البهارات فهي :

فلفل اسود و ملح + بابريكا + بودرة ثوم + كيجن واذا م هو عندكم عادي حطوا بداله ريحان و كمون

الدجاج انا حطيت ٢٥٠ ج وانتم ع احتياجكم ي حلوين
شريحتين جُبن لايت
٣ ملي زيت زيتون ع الطاوه عشان حمس الدجاج
الخُبز هو صامولي النخاله من الدانوب
الباربكيو صوص استخدمت حق أميركان جاردن ١٠ ج

قايز السُعرات للساندويشتين يعني الوحده بـ ٣١٠ سُعره ✔️

وغوصوا بالوصفه اللذيذه هذي 🏊‍♂️🤍

بسم الله الرحمن الرحيم

السلام عليكم 👀🤍
معي وصفه 👀🤍
الرجاء عدم التشره👀🤍

طريقة تحضير برجر الدجاج اول شي التتبيله:

‏[ بودرة ثوم+فلفل اسود و ملح+ريحان+كمون ]
‏مع ملعقة صغيرة زيت زيتون ، خلوها تتبل نص ساعة ع الاقل⏳

‏ع نار هاديه بالحيل تطهون الدجاج ٤ د لكل وجه ⏰

تحميص الخُبز ع نفس الطاوه بعد م تشيلون الدجاج

‏الصوص مايونيز وفلفل اسود وبودرة ثوم ولا تنسون باقي الاضافات 🥬🧅 🍅 🧀

بخصوص الكميات اللي طلّعت لي الماكروز هذي :

صدور الدجاج قبل الطبخ ٢٠٠ ج
خبز برقر البطاطس قطعتين
١٠ ج مايو السعودية
شريحتين جبن لايت


وبالف عافية ع عضلاتكم وشسمه اي مس يو آوول 🤍'

الحلوين حقيني 🤍

شُوفان مخبوز مليان بروتين،نفس طريقة التحضير بالتمام حتى بعد نفس درجة الحرارة بالقلاية الهوائية، اللهم انها هالمره مليانه مشاعر حلوه لان من زمان عنها 😹♥️ ..

مسخن الدجاج 😻

١٥٠ ج دجاج [ وعادي تزودون ع احتياجكم ] مسلوق بماء و بهارات عدله بعدها تفتتونه

ع الطاوه نقطة زيت وعليه بصل 🧅 مقطع شرايح نحمسه مع فلفل اسود و سماق لين م يقرب للذبول شوي

نضيف الدجاج المسلوق بعد م نفتته ونحمسه بعدها ١٠ ملي دبس رمان وبس

الصوص :
زبادي يوناني زيرو فات + طحينة + دبس رمان و 🍋

اللي أعجبني بالوصفه سهولتها يعني دجاج مسلوق وعقبين باقي الاضافات فـ ي سسسلامم ✨♥️

اثاري لي أسبوع حالب بهالوصفه ولا حطيتها لكم 🙀

حقكم علي و تعالوا نأكل تشيزكيك مليان بروتين ♥️

نفس طريقة التحضير وهذي هي المقادير:

٤٠ ج شوفان و طحنته مع سكوب بروتين باودر فانيلا + ٥٠ ملي حليب 🥛 + ٥٠ ج زبادي يوناني زيرو فات + ٤٠ ج جبن فيلادلفيا لايت

كل م تطول بالثلاجة كل م تصير اطعم وهي متماسكة ،و بعد م بردت اضفت عليها بسكوت لوتس وعادي تحطون اي نوع بسكوت يعجبكم و مُربى 🍓 ي فرولات آلبي ✨