بيرهـوف

المحتوى الهابط يرتبط بالاساءة الشخصية او الاساءة للغير، مثلاً همسة ماجد تسيء لنفسها كأمرأة عراقية وتسيء للغير من تهدده او تغلط علّي، مع هذا اتمنى الها تحذير وغرامة مالية لا السجن اله اذا هي وغيرها متورطين بغير قضايا بعيده عن محتواهم، علي الشريفي وغيره

الوحيد الي اشوفه ما يستحق صدور بحقه القاء قبض ومحاكمة هو عبود سكيبة، دائماً بالمنطقة وبشارعكم اكو واحد مثل عبود سكيبة، مرح وحشاش، هذا الشخص مو مستحدث على مجتمعنا امثاله كثيرين من وعيت لحد هذا اليوم
ماشفته بمقطع يغلط او يسيء لأحد بالعكس اني اشوفه موهوب ومن انجح الشخصيات الساخرة اذا استثمروا المخرجين والكتّاب لبرامج او حتى مسلسل او فلم بسيط

قرار محاكمته قرار عشوائي، المفروض اكو لجنة تفرز المحتوى وتشوف اي محتوى يسيء للمجتمع ويمثل تهديد للغير وغيرها من الفيديوات الي ما تستحق عليها اثارة جدل.

قبل فترة جنت اتعشى بمحل، بقى من الاكل فاتتلي طفلة سورية، انطيتها فلوس وبقت تباوع عالاكل شلته وانطيته الها، وره دقيقتين طلعت بره شفتها هي وامها واختها كاعدين ياكلون من نفس الاكل، وصيتلهم اكل وكعدتهم بالمحل اكلوا براحتهم وراحوا، شي بسيط عيشني يوم مرتاح البال والضمير، مرات اطلع بأماكن اصرف هوايه فلوس ارجع ضايج بدون سبب

نصيحة استثمروا سعادتكم وراحتكم بمساعدة الفقراء خصوصاً السوريين، ذوله اكثر ناس شافوا معاناة مثل العراقيين ويمكن اكثر، الرزق ينعاد والفلوس تروح وتجي الالف والخمسة ماتسوي شي وتحسبها شي جبير
خصص مبلغ كل شهر لو شهرين وساعد بي النازحين والمتضررين خصوصاً اطفالهم، كل شي تنطي راح تعوضه وكل انسان تشبعه وتجبر بخاطره تعكس حقيقتك كأنسان خليت أثر طيب بحياتك يوم من الايام

ب ۲۰۱۷ صار زلزال بالمكسيك، اول مرة بشغل اصیر مدیر، ویانه واحد متشدد دينياً وبأعتباري شخص ما اصلي الأخ اخذ على عاتقه يخليني اصلي واتوب لله من طلعت اخبار الزلزال والعالم الراحت بي انتهز الفرصة للوعظ اجه يكلي شوف استاذ هذا الزلزال عقاب من الله لأن بعدوا عنه، كتله بس مامعقول الله يكتل ويشرد ناس ابرياء حتى يخلينا نرجعله كلي منو كال ذوله ابرياء، انت شايف الفساد بالمكسيك؟ هذا الصارلهم عقاب الهي، كتله شلون كلهم يستحقون الموت؟ بيهم اطفال صغار ورضع اخذ صفنة كلي ذوله لو كبرانين جان صاروا خطاة كتله والله ليش يخلقهم اذا يدري هم راح يصيرون خطاة من يكبرون وطالما خلقهم خل يعوفهم خطاة حالهم حال العالم المذنبة وبالاخرة يحاسبهم، كلي الله خلقهم حتى يخليهم عبرة لباقي البشر، كتله انت مقتنع الله يهد عمارة على طفل ويخلي ايام متعذب من الجوع والخوف لحد ما يلفظ انفاسه الاخيرة حتى يعلمه هو درس؟ كلي اي

الغريب بالموضوع وره شهر من هاي المحادثة اضطريت اطرد هالشخص بسبب مشكلة بالأمانة ولزمناه لزم يد من رجعنا الكامرات، الله سوه الزلازل بوكتها حتى المفروض يخلي يتعظ وهم ما اتعظ سبحان الله

كل ما يقل غموضك تنمل، لازم تخلي جزء من شخصيتك غامض مو من البداية كلشي يبين بيك، خاصتناً بعلاقات الوقت الحاضر وعلاقات السوشل ميديا بشكل خاص مجرد ما تتعرف على احد وتثق بي كلشي تحجيله والشغف راح ينتهي بالبداية وبقية علاقتكم يصير بيها نوع من الملل، ف كل ما زاد غموضك تنحب اكثر.

باليومين الراحن جنت كاعد ويه صديق، اكثر صورّة الينشرهن بهجة وفرح وونسة وسفر، من شفت الصور كلت هيج انسان بعد ماعنده شي ثاني يفكر بي،

المفاجأة من يحجيلي كلي ذيج الايام جنت افكر بالانتحار،
عنده مشاكل شخصية ماالها حل، وكل هالونسة العايشها محاولة يشوش على تفكيرة،

قبل جنت مااصدك بهالقصص، واحد متوفرله كل شي بالحياة شلون مايعيش سعيد ومستقر !

وراها عرفت كل شي بالحياة نسبي من ضمنها السعادة،
اكثر البشر يفكر بالناقصة هسه مو بالعنده، هذا مينفي اكو ناس اغبياء وعقلهم صغير ميعرفون قيمة العدهم،

اذا فكرت راح تشوف اَي شي تملكه راح تخاف علّي بالبداية
وره فتره تمل منه ويصير حاله اَي قميص مشتري وشامره
بس الشي الناقصك راح تبقى طول عمرك تتخيله هو مصدر السعادة

الهالسبب الله سبحانه وتعالى خلق بنفوسنا
( مفهوم الرضا )

احس فئة كبيرة من المجتمع تفكيرهم تجاري يتعامل بمبدأ المادة حسب سلوكياته، ابو التكسي الصاعد بي راد يدعم ابو تكتك ماانطاه مجال بينما انتظر ابو تاهو خلاه يستدار براحته،

النساء المهتمات بشكلهن بصورة مبالغ بيها نظرها عالسيارات اكثر من واجهة المحلات،

حتى بالمول واحد رشلي عطر والورايه لابس تراكسود لبسه،

المجتمع اصبح سوق كبير للمظاهر،
الانسان اصبح سلعة لمن يدفع اكثر
اما اصحاب المبادئ والقسمة ونصيب
نصيحتي تبقون ببيوتكم تاكلون دبس وراشي

بالتسعينات رايح للسوك وَيَا المرحومة والدتي زاد عدها مصرف من المخضر اشترتلي لفة فلافل، من صعدنا الكوستر راجعين للبيت زعلت مدري على شنو، شمرت اللفة من الشباج،

هالموضوع بقيت سنين اتذكره، صار مثل العقدة، من اتذكره سابقاً اكول حرامات مااكلت اللفة ماجنت احس بذنب شمرتها وحرام هذا الشي بكد ماجنت مقهور لأن مااكلتها، الاماني العشتها والردتها قبل تتلخص بالحرمان والشبع الي اتمناه يصير،

نفس الموضوع انعاد وره سنتين على بنطرون كابوي ، اشترالياه الوالد المرحوم ، وبسبب خوفي على البنطرون وكعت مرة وأنشك ، ظليت فترة مقهور وبرغم والدي كلي لاتهتم بس ماكدرت، لحد هذا اليوم اذا قميص او بلوز يتوسخ ابدله بسرعة بس اذا البنطرون اتدمر مااهتم حتى لو ماخذه من زارا

دافع الرغبة والامنيات كلها اختفن من داخلي، مرات انرزق لو اشتري شي ولا احس بقيمة او رد فعل تجاههن

اليوم صحت شاب صغير يبيع جاي، بيتهم بالنهروان وجاي يشتغل بزيونة، بقينا نسولف كتله الجو بارد امنيتي اسافر لتركيا واكضيها بس نوم هناك

كتله انت شتتمنى هسه؟ كلي ترمز مال جاي ستيل شفته بالربيعي الحلو بي مو ثكيل
باجر من يجيني افاجئه بالترمز واتمنى اشوفه بعد ٣٠ سنة اذا باقية بداخله رغبات.

احب الحياة الهادئة، ما احب الصراعات والمنافسات حتى لو صرت العنصر المتفوق، ما احب السياسة ولا الأنخراط بشؤون عامة، ما احب المناصب ولا القيادة وما اسعى الها، احب الهدوء والتسكع بشوارع بغداد، الأهتمام بفكرة قصة او مشهد من مشاهد الحياة اليومية،

احب اشوف العراقيين شباب وشياب كاعدين بالگهاوي، التلاميذ بطريقهم للمدرسة، النساء المسرعات للعمل المهملات للجانب الانثوي بيهن، عامل النظافة يكنس الشارع واسلم علّي، اليبيع اكلات شعبية بكشك وهو يغرف الفلافل حتى يمشّي العالم،

احب المشاهد المسائية اكثر من الصباحية، اغنيات فاضل عواد والياس خضر وهي تسيطر على كل مقاهي ودكاكين المدينة، احب حوارات الناس العادية الغارقة بالانانية وحب النفس

احب الحياة واستشعار البؤس والضعف الانساني والتعاطف معه ومحاولة الكتابه عنه
اكره كوني بالعراق بهذا الزمن،

زمن الاضطرابات والاسئلة، الزمن اليجبرني على اتخاذ موقف اخلاقي تجاه المجتمع، ان انحاز ، مااريد انحاز لأي شي ولأي هدف،
اريد ان يتركني الجميع لأتخيل واوهم نفسي كم هو جميل هذا العراق

شتستفاد من تكسر انسان كبالك وتجرد ضحكتة الساتر بيها ضعفة؟

ليش متعوفون التزوجت واطلكت بدون ما تقترحون عليها جان تگدر تتحمل وجهالها يحتاجون اب وهيج راح يتأذون،
هي تدري بهذه الكلام بس ماكدرت تكمل بعد

ليش متخلون الكبرت ومتزوجت بحالها،
بدون ماتذكروها عبرت ال30 سنة،
ما كاعدة ببيتك وشايلها على راسك،
هي تدري الوضع تعبان واكو مئات البنات مثلها وعايشين نفس وضعها،

ليش ما تخلون الما خلف طفل بحالة بدون ما تقترحون علّي يروح للدكتور الفلاني لأن اكيد هو حاول وراح المليون دكتور غيرة ممنتظر اقتراحكم العبقري،

ليش متعوفون الما عنده شغل والخلفت بس بنات والزوجها يخونها وباقية وياه والميحب شخص وباقي وياه واليضحك من دنيتة والزوجها مات ولبست ملون،

عوفوهم بحالهم مايحتاج تأذوهم
عوفوا الناس بحالها، لحد يكسر الثاني، ممجبورين نخلي واحد ضام دموعة يبجي كبالنا،

كل واحد بينا يعرف اليريدة
ويعرف الرافضة ويعرف الناقصة
اذا متعرف تصير قوة وسند لأنسان
لتصير سبب بضعفة وكسرتة.

احنه فترة بحياة كل واحد للثاني،
حاول تصير ذكرى حلوة والناس تتذكرك بالخير
العشرة الأصيلة تدل على أصل طيب
وفراك الناس بالمعروف يخليهم يبجون على عشرتك اكثر،

حتى لو واحد غلط وياك اطلع من حياته بهدوء ويبقى بينكم خير تتذكروه بأحترام وسلام كل ماتصير عينك بعينه

النهايات اهم من البدايات
البداية اهتمام وشغف
والنهاية تبين منو المعدنه اصيل.

كُل عام وانتم بخير ♥️

من الامور المهمة بكتاب موجز التحليل النفسي لـ "فرويد" من راد يخلي هدف ونهاية للعلاج النفسي اليمارسه للناس

او بمعنى ثاني من راد يحط جواب اخير، العلاج انتهى والمريض صار زين والحمد لله خله هدف واضح للمريض ينتقل من مرحلة البؤس والامراض العصابية ( القلق والاكتئاب ) الى حالة التعاسة العادية اليشاركه بيها كل البشر

الرجال عرف امكانيتة وحدود وظيفتة بمنطق يكلك اني عادي أساعدك تتحول من حالة اكتئاب مُضاعفة الى حالة اكتئاب عادية ( الضوجة )

دوري وياكم كأخ وصديق اوكف وياكم حتى ننهي المعاني السلبية بالحب والتفاهم والتواجد، بس اضافة معنى ايجابي الحياتك هذه شي مستحيل، النجاح والرغبة والفرح امور محد يكدر يقدملكياها حتى اهلك
شغلة لازم تصنعها بنفسك، قرار لازم تاخذه،

خطوة بيها مسؤولية جبيرة لازم تعرف نفسك كادر عليها وتحققها، انت مو واحد غيرك.

اكو كاتب أمريكي اسمة ( ستيفن كوفي ) عنده آخر كتاب اسمة " العادة الثامنة " دار النشر طبعت ووزعت اكثر من 200 مليون نسخة الهذا الكتاب وغيره من مؤلفاتة من كتب مختلفة ب6 لغات عالعالم،
المذيعة أوبرا وينفري بعام 2011 سألتة ببرنامجها عن سر هذه النجاح المذهل، صفن وابتسم بوجهها، كلتلة شنو سر عبقريتك؟
كلها: آني اشتغل وساكت، وساد أذني عن حجي العالم
أوبرا سألتة بس؟ كلها ماكو عبقرية اكثر من هيج شي بنظري

4/5 من نصائح البشر وآرائهم نابعة من الحسد والغيرة، لتدوخ راسك وتدور عالأسباب، لازم تعرف ماكو واحد يريدك تصير احسن منه، راح تلكه واحد لو اثنين نيته صافية وياك،

خليك مثل القطار، القطار ماعنده مرايات يشوف واحد وراه ويرجع ليوره، مركّز بطريقة ومايوكف بس بالمحطة الرايدها هو
اترك اَي حوار يشدك وركز بهدفك،

خليك قطار، وخليهم محطات ينتظروك بيها.

علي بيرهوف

كل انسان تشوف سلوكه متغير، تصرفاته اختلفت عن تصرفات شخصيته القديمة، غير منضبط من يسولف و ردة فعله مُبالغ بيها، تعرفه او حتى اذا ماتعرفه ويحمل هالصفات، اذا ترجع لشريط حياته راح تلكه عنده اسباب الهذا السلوك والهالنتيجة،

اول شي لازم تسوي ما تنفر منه وتتعاطف وياه
حاول تتصور هذا الشخص الكدامك هو نتيجة لتاريخ حافل من الصدمات والخيبات التعرضلها يجوز لو صايره بيك جان صرت مثله، وفضل من الله ورحمته حياتك بقت اكثر استقرار مادياً ونفسياً وخلتك انسان متوازن،

فكر وَيَا كل عراقي تشوفه هوَ من صنع الظروف احترمه اكراماً لصبره ومعاناته، لاتحس انت منفرد وتفرح بخصال حسنك واخلاقك ووضعك الحالي

العمر ماخلص، وجهك وتصرفاتك وحياتك مو هذا شكلهن النهائي، بيده هو مغير القلوب والأبصار.

علي بيرهوف

اتمنى اي واحد زعلته هالسنة
لا يتعامل وياية السنة الجاية حتى لا يزعل بعد

مشكلة جبيرة من تقنع روحك راح تجيك مكافأة على الشفته بحياتك ، وكفتك على حيلك بعد كل وكعة، على كل معاناة عانيتها على كل اعتذار انتظرته وماصار، على حجاية اتحملتها على وضع انحطيت بي واضطريت تكمله لأن ماكو حل ثاني غيره

تحس الك حق جبير من مايجي بوكته راح يتضاعف، وتغالط بروحك تنتظر عدالة السماء،

ببساطة الحياة مو عادلة او بمعنى اهم احنه شايفين العدالة على كد نظرتنا القاصرة
الأمور العشتها ماجانت ثمن دفعته وتنتظر مكافئتها، الشي الراح درس مهم ومجموعة تجارب القصد منها تبقى الشخص الي هو حالياً نفسك انت.. بكل قوتك وصمودك

اذا اكو مكافأة انتظرتها فأنت استلمتها، اذا رايد تشوفها باوع على نفسك بالمرايه
تفقد هواي من گلبك تكمل بيها جزء من عقلك
هذي معادلة الحياة.

علي بيرهوف

من تروح للسوك ويه زوجتك لتخليها تدفع، حتى لو عندك بس 100 دولار او 25 الف صرفها وادفعلها،
من تطلع للشغل وعايفها بالبيت أتأكد عدها فلوس تكفيها،
ومن تنطي مصرف للبيت زود عليها حتى لو شي قليل وكلها اشتري بيها شي الروحج،
واذا تكدر سويلها مصروف يومي بعيد عن ميزانية البيت،

من تمشي وياها بالشارع الزم ايديها وصير من جهة السيارات واذا ترجع للبيت اشتريلها كلاص موطة لو نستلة،

وكل ماتشوفها صافنة خلي ايدك على ظهرها وبوس ايديها وراسها، وكلها شكراً لأن انتي بحياتي، واذا تصلي خل تسمعك تكول ( يارب اجمعني بيها بالجنة )

احلى رزق الله ينطيكياه، انسانة فاضلة
تحفظك وتصونك، مودة ورحمة بيها

علي بيرهوف

مرات تسأل روحك، هو شلون كدر يتغير ويتجاهلك وميدخل على حسابك ولا يتابع اخبارك ولا راح تلكالك مكان بحياته من قريب لو بعيد، بعد ماجنتوا روح وحدة بجسمين!

تتذكر الانسان الحبيته قبله وفقدت شغفك بي لأي سبب كان، وشلون گلبك جمد من ناحيته فجأة! وصارت شوفته متفرق وياك ومتثير بيك اَي شي، ولامهتم شراح يصيرله بباقي الأيام،

هذه الحالي تجاوز شغفه بيك مثل متجاوزت شغفك بالقبله، بس انت متحس بالظلم اله من يصير عليك.

علي بيرهوف

اعتبر التفاهم اليجي ورة الزواج اكبر خدعة اخترعها البشر لمجرد استقرارة وبس، لمجرد ربما خيبة سابقة انتهت بالفشل

التفاهم ورة الزواج هو اقناع نفسك ان تتقبل شريك حياتك ومتتقبلة
الانسان اذا انفرض علّي شي غير اختيارة مايتقبل حتى اذا جان المختار ملاك نازل من السماء

اختيار قرار عقل بدون گلب راح يختار مصلحتة
اختيار گلب بدون عقل راح يختار عاطفتة
اتركوا اولادكم يختارون بعقلهم وگلبهم،
لتخلوهم يعيشون دور الخاين والمظلوم
لتخلوهم يصيرون ضحية وجلاد بأآن واحد

الاستقرار مو بس زفة وعرس وبيوت
الاستقرار تفاهم أسمة احبك انت وماريد غيرك
اسمة اباوع عليك وابتسم تعرف عيوني شتريد

علي بيرهوف

الأمان مو كاعد ببيتك وساد بابك وساكت، الأمان انت مرتاح يم شخص تحس وَيَا انت قوي، شخص تشوفه سند اذا تنام واذا تبقى صاحي تباوع بوجهه هوَ ونايم،

الأمان من تختار شخص اذا توكع يسندك اول واحد، من تضعف تحس واحد لازم ايدك قوي، ناس تتحملك بوكت انت نفسك ماتكدر تتحملها،

وجود هالناس ضروري بحياتك وغيابهم عليك يتعبك ويسببلك اكتئاب، هيج شخص من تلكاه حافظ علّي،

مفتاح الباب من يضيع تكدر تسوي غيرة، بس مفتاح سعادتك اذا ضاع تبقى طول عمرك تشوف نفسك سجن.

علي بيرهوف

"مروة" موظفة حكومية متزوجة وعدها طفلين ، عمرها 30 سنة
دوامها يومية ست ساعات من 8 لـ 2 ، تحضر اكل باجر بالليل ، ترجع تحط الاكل الزوجها وجهالها وتنام ساعتين ، تكعد تروح لأختها تشوف طلباتها ، اختها مريضة تكعد وياها 3 ساعات ، ترجع البيتها ساعة 9 بالليل تقري جهالها وتكعد وياهم ، تشوف طلبات زوجها وترجع تحضر اكل الثاني يوم ، وهيج مكضيتها بين بيتها وبيت اختها ،
صديقتها كلتلها زوجج ابن حلال زين من عنده ماضاج ، ردت عليها : هاي اختي دمي ولحمي وآخر ريحة باقية من امي وابوية
لو مابيه خير بيها مايبقى خير بية بزوجي وجهالي ،

ديل كارينجي صاحب أفضل مؤلفات كتب التنمية البشرية ( عندما يعمل الأخوة معاً تتحول الجبال الى مناجم ذهب )

"مها" عمرها 43 سنة عدها محل ملابس ،أتوفى والدها وراها بفترة ماتت والدتها ، عافوا مها شابة وأخوتها 3 صغار ،
تخيل فكرة بنية شابة تصير مسؤولة على تربية 3 اطفال. ماانطت فرصة تشوف حياتها ولو يوم ، مثل البزونة الباقية يم جهالها تحميهم ، محد يسأل عليهم لامعارف ولاكرايب ، حالهم حال المكطوع من شجرة حرفياً ،
مها عافت المدرسة ، اشتغلت واتبهذلت ، وكفت بوجه الناس وقلة أدبهم ،
اشترت قطع ملابس اطفال وظلت تبيع ببيتها ، الفلوس جابت فلوس اجرت محل واخوانها كبروا ، ربتهم احسن تربية وزوجتهم كلهم ، والثمن ؟ مها مكدرت تتزوج بعد ، سعادتها ارتبطت بأخوانها كل هالسنين ،
سألتها صديقتها افتقدتي احساس تتمنين تصيرين ام لو بعدج ؟
كلتلها ، صرت أم واخت لأخواني وهذه اجمل مكسب تعيشة وحدة مثلي ،
بالمناسبة اخوتها كلهم اتزوجوا ، وكل واحد صارت عندة بنية سماها مها ، وبقت بالعائلة 4 مها ،

جبران خليل بكتابة رمل وزبد ( إنك محسن حقا حين تتزكى ، وعندما تتزكى أدر وجهك عمن يتقبل عطاءك حتى لا تبصر حياءه عارياً )

محد يكدر ينكر اكو اصحاب تلكاه بمثابة الأخ ويمكن اكثر ،
الصديق اختيارك ،
تصور اختيار الله من يختار انسان يصير اخوك ،
محد بينا يكدر يختار امه وابوه ، هذه اختيار من فوك سبع سماوات ، واختيار ربك دائماً صح ، حتى لو يصير سلبي بحياتك راح يصيرلك تجربة مهمة تتعامل بيها ويه باقي البشر

تفرقكم بلدان وكل واحد تصير عندة حياتة الخاصة ،بس هم واحد يحن للثاني ، هاي الحنية من ريحة امكم وأبوكم ،

تلكه اخوان ماكلين حقوق وبايعين العشرة ،
بس الأغلب لا ، اكو اخوة يصيرون بمثابة الأب والأم ، اخوك هو السند وأختك هي الستر ،

اكو مثل فرنسي يكول ( ليس هناك اجمل من صديق ممزوج بنكهة اخ )

علي بيرهوف