BnSamy

وزارة الاسكان غيرت تعريف (محدود الدخل) ليصبح الذي لا يتجاوز دخله 15 ألف جنية للأسرة أو 12 ألف للفرد.

*️⃣ كمان عدلت تعريف (متوسط الدخل) ليصبح اللي دخل الأسرة من 15 الي 25 ألف جنية؛ ولو فرد يبقي 20 ألف شهري.

ملحوظة بس التعريفات دي عشان التقديم على الشقق؛ لكن الدولة لا تعترف بالارقام دي... وطبقاً لآخر تعديل ضريبي فالاعفاء هو ل 60 ألف دخل سنوي (يعني 5 الاف شهري) يعني اللي دخله تحت 5 الاف مش بيدفع ضرايب واللي دخله فوق 5 الاف بيدفع علي اللي فوق ال 5 دول ضرايب ومعفي أول 5 الاف.. يعني الدولة شايفه ان فوق 5 الاف خلاص انتا بقيت برنس ومرتبك حلو ناخد منه ضرايب 😂😂

مجرد رغي سريع عشان نفهم فكرة البنزين والسولار وليه بنسمع إنه عالميا بينزل ومحلياً بيزيد.

*️⃣ في البداية مفيش رقم رسمي دقيق معلن عن سعر البنزين المستهدف؛ والمبرر طبعا ان التكلفة متغيرة مع إن الموضوع سهل وهو نقول مثلا بنستهدف سعر 20 جنية عند سعر برميل 4000 جنية... وهنا مثلا اكن البرميل ب 80 والدولار ب 50؛ يروح البرميل طالع ل 85 والدولار ينزل 45 نضربهم في بعض نلاقي البرميل 3825 جنية يبقي كده رخص رغم ان سعر البرميل زاد لكن انخفاض الدولار شال الزيادة بزيادة...

*️⃣ في تصريح من المتحدث باسم وزارة البترول قال ان لسه مصر يتدعم البنزين ب 62 مليون جنية يومياً والسولار ب 265 مليون جنية يومياً ودا معناه دعم سنوي 120 مليار جنية ... طيب البنزين انهي مدعوم بكام واستهلاكنا منه كام مقالوش؛ طيب الارقام دي شاملة الضريبة ولا مش شاملة محدش عارف؛ طيب احدث ارقام الاستهلاك لمصر كام؟

*️⃣ حسب آخر ما أعلن مصر كانت بتستهلك يومي 25 مليون لتر بنزين و 40 مليون لتر سولار... يعني تقريباً نقدر نقول كده ان المسئول يقصد ان السعر الغير مدعوم هو 18 جنية لل 92 و 20 جنية للبنزين 95 وبرضك 20 جنية السولار وهنا سعر السولار زيادة شوية لكن ماشي نفترض صحة الكلام ودا كله حسب تصريحه وسعر البرميل برنت لحظة كتابة الاسطر دي ب 3555 جنية (برنت 73 والدولار 48.7).

*️⃣ طيب هنا ييجي سؤال بعض الناس وهو مش مصر يا بن سامي عندها بترول؟ مالنا ومال السعر العالمي بقي؟

*️⃣ رقم انتاج مصر غير معلن بشكل رسمي دقيق وهو رقم متغير وتراجع بشكل واضح مؤخراً؛ لكن الارقام بتدور حول 550-600 ألف برميل يومياً... الاستهلاك بقي متوسط 800 ألف برميل يومياً يعني مصر دولة مستهلكة وليس منتجة.

*️⃣ طيب هل معنى كده إن 75% من استهلاكنا مملوك لينا و 25% مستورد؟ الاجابة برضك لا لإن انتاجك نصه تقريبا بيكون للشريك الاجنبي اما حصته او استرداد تكاليف وغيره... يعني ال 600 اللي طالعين من عندنا منهم 300 مش بتوعنا. ومصر بتاخد ال 300 بتوع الشريك الاجنبي دول ونديله فلوسه بالسعر العالمي في النوتة وليك وهتاخد وعليا وهديك إن شاء الله.

*️⃣ يعني كده بتستهلك يوميا 800 الف منهم 500 الف بالسعر العالمي و 300 الف مملوكين للدولة والارقام بالتقريب للتسهيل... وهنا نروح بقي للنقطة الثانية؛ دا البرميل عاوزين نحوله بنزين.

*️⃣ مصر من قديم السنين وهي معندهاش قدرة تكرير تكفي كل الاستهلاك فكنا بنكرر شوية ونصدر الباقي خام ونرجع نستورده بنزين؛ وكان علي رأس الاستيراد بنزين 95.. في حاجة زي بنزين 80 دا انتاج محلي؛ غالباً عشان لو دوروا عليه بره مش هيلاقوه 😂😂...

*️⃣ المهم بقي مصر فضلت تصدر لغاية ما ما قطر افتتحت مركز تكرير مسطرد العملاق وقالوا وقتها انه مع نهاية توسعاته هيبقي ليه قدرة تكرير كامل انتاج مصر وكمان نستورد بترول خام ونكرره بحيث تبقي التكلفة أقل.

*️⃣ المهم يعني ممكن نقول ثلث البترول او اكثر بسيط بس بتاعنا والباقي مستورد وبعدين بتوديهم محطات التكرير وفي بعضهم لينا شريك أجنبي بياخد مننا رسوم تكرير.

*️⃣ المهم الخلاصة إحنا لسه عندنا البترول مدعوم للأسباب السابق ذكرها؛ والنهاردة رئيس الوزراء قال لو فضل البترول في معدلاته الحالية ال 73 دولار دي فدا هيخلي الدولة ترفع البنزين بوتيره أهدى من المخطط لها (يعني ويأكأننا هنستهدف 20 مش 22-24 كده 😁).

*️⃣ لكننا حتى الآن تسعيرنا كإن البترول ب 60 دولار مثلاً... فالناس تلاقي اخبار البترول نزل من 80 ل 73 ليه منزلش في مصر... حضرتك احنا محاسبينا انه ب 60 يعني 73 و 80 و 70 وكل الكلام دا فوق تكلفتنا.

*️⃣ هتقولي بس مرتباتنا؛ أيوا يعني وهما بيسعروا سعر خام برنت مثلا بيشوفوا مرتبات المصريين كام ويسعروا علي أساسها؟ لا خالص هما بيسعروا واللي ليه في الكحل يتكحل واللي معهوش ميلزموش... واحنا خلاص بقي معناش 😭😭.

قاعد إمبارح بتعشى مع أصدقاء فبقولهم استشهاد السنوار دا ممكن يشيل 2 جنية في البنزين؛ واتريقنا عالحوار وروحنا بالليل ونمنا؛ صحينا لقينا زيادة البنزين 😭

*️⃣ المهم دلوقتي زيادة البنزين 92 بالظبط 1.5 جنية زي ما قولت لكم وال 95 زاد 2 جنية؛ للاسف للأسف دي ممكن تكون اخر زيادة 1.5 جنية 😔

*️⃣ يعني ممكن من يناير يزيد بنزين 92 من 15.25 الحالية ل 17 جنية؛ ثم في أبريل ل 19 جنية ثم يوليو 21 جنية ثم أكتوبر يبقي لتر 92 ب 23 جنية ولتر ال 95 ب 25 جنية 😔😔... وكل ما سبق بفرض ان البترول ميعديش 80 والدولار ميعديش 50... كسرهم هنكمل طريقنا للتر ب 30 جنية 😔😔.

*️⃣ بس للأمانة الحكومة ضحكت عليا؛ لما كنت بقابل أي حد بقوله زيادة البنزين استناها من بعد يوم 20 أكتوبر ؛ عملوها يوم 18 أكتوبر 😭😭.

*️⃣ جهاز تنظيم الاتصالات يهدي شوية ويأخر الأسعار الجديدة لأول الشهر بقي مش عاوزين خبطة تانية في نفس الأسبوع 😔 وإن كان البنك المركزي قال في توقعاته إن التضخم هيقل بداية 2025؛ فممكن يكون هناك اتفاق غير معلن إن الحكومك تاخد قرارات زيادة كلها في 2024 فبووووم تاخد الخبطة مرة واحدة وفي 2025 يقل... ممكن والله أعلم.

⬅️⬅️ تحديث علي جنب:

*️⃣ وأنا بكتب البوست حالاً صديقي اللي كنت بتعشى معاه إمبارح اتصل بيا قالي البنزين زاد وتوقعاتك بتحصل بس ما تجرب مرة تتوقع لنا توقعات ايجابية 😂 خلي جواك طاقة إيجابية وقول أنا متوقع البنزين هيزيد بس هنقدر نشتريه؛ توقع إن هييجي لنا فلوس 😂😂 مش كله سلبي كده 😂.

⬅️⬅️⬅️ لجنة التسعير للوقود قررت إن اجتماعها القادم هيكون بعد 6 شهور يعني مفروض كده مفيش زيادة في يناير؛ خبر حلو اهووو. اهووووووو عشان متقولوش عليا بقول أخبار وحشة...

ان حدثت فالله يرحمه؛ وزعل علي انفسنا مش عليهم 😔😔

صباح الخير

*️⃣ النهاردة البنك المركزي عنده اجتماع السياسة النقدية اللي هيحسم فيه قرار الفايدة لـ 6 أسابيع قادمة. التوقعات مؤخراً بدأت تميل ناحية التثبيت، وإن كنت في بوست سابق في 5 سبتمبر هتلاقوه في اللينك دا:

https://t.me/BnSamyPosts/1280

*️⃣ كنت بقول إنه متوقع تثبيت الفايدة في 5 سبتمبر، ثم الفيدرالي يخفض 0.25% فنتشجع ونخفض 1% في 17 أكتوبر... لكن الفيدرالي اتشجع وخفض 0.5%، فبالتالي نقول إن مصر ممكن تنزل 2% النهاردة في الفايدة.

*️⃣ لكن مؤخراً التضخم مش في أفضل حالاته؛ التضخم العام بيزيد وإن كان الأساسي انخفض لـ 25%. فهل هنخفض الفايدة والتضخم عند 25%؟ 🤔 بصراحة في نقاط بتوحي بالتخفيض.

*️⃣ بنك CIB خفض إمبارح الفايدة على الشهادات بتاعته 2%، ومعروف مدى قوة الروابط بين هشام عز العرب وحسن عبد الله وتفكيرهم المتقارب، فهل بنك CIB هيعزف لوحده؟ 🤔

*️⃣ الحكومة بتقترض أسبوعياً 100-120 مليار جنيه؛ وفي الأسابيع الأخيرة بقى المركزي مش بيقبل أذون 9 و 12 شهر بفايدة عالية وبيقبل فقط أذون 3 و 6 شهور... دا معناه إنه مش عاوز يلزم نفسه فترة طويلة بفايدة عالية. تخفيض 1% في الفايدة يفرق عشرات المليارات مع الدولة في خدمة الدين.

*️⃣ يوم الثلاثاء من كل أسبوع، بيقبل المركزي إيداعات البنوك بما يُعرف بـ(عمليات السوق المفتوح). دي فلوس زيادة عند البنوك بيحطوها في المركزي لمدة أسبوع وبيحاسبهم بالفايدة بتاعته 27.75%. المتوسط إن في ترليون جنيه البنوك بتحطها وتيجي الأسبوع اللي بعده تجددها (هتلاقي أسبوع يقولك 850 مليار، واللي بعده 1.1 أو 1.2 ترليون... فالمتوسط ترليون وكسر؛ الفكة دي مليارات مش عاوزينها 😂😂). فكده في ترليون مسحوب دائماً؛ المركزي بيدفع فايدة أسبوعية على الفلوس دي 5.4 مليار جنيه. لو خفض الفايدة 2% فكده تكلفة الفلوس دي قلت عليه وفايدتها الأسبوعية 0.38 مليار، يعني كل 1% تخفيض فايدة يوفر للمركزي 10 مليار جنيه سنوياً (192 مليون جنيه أسبوعياً).

*️⃣ من الناحية الثانية، تيار تأييد عدم التخفيض بيقول إن المركزي بالعافية بيبيع أذونه الـ 3 شهور وبفايدة 29.6% (سنوي)، ولو خفض الفايدة فدا هيقلل جاذبية أدوات الدين الحكومية للهوت ماني؛ وهنا ييجي السؤال: هل هو لسه عاوز هوت ماني؟

*️⃣ لو هو لسه عاوز هوت ماني بنفس الكثافة يبقى ميلعبش في الفايدة ويجيبهم يعملوا سبوبة القرن علينا... ولو اكتفينا بالـ 40 مليار دولار اللي عندنا هوت ماني بخلاف 24 مليار رأس الحكمة... وقولنا الاتفاقية مع السعودية هتضخ 15 مليار دولار؛ وكمان أمريكا بتخفض الفايدة فنقدر نقترض بالدولار مباشرة أرخص فمش عاوزين هوت ماني. فهنا نتوقع تخفيض الفايدة.

*️⃣ طبعاً أنا مع تيار التخفيض؛ أنا دايماً مع تيار التخفيض سواء المرة دي أو لأسباب شخصية أو حتى بيزنس؛ الفايدة العالية بتعمل بديل قوي في السوق لأي بيزنس. الناس تشتغل ليه والبنوك بتديها 30%؟ 🤔 عشان حرام؟ مش كل الناس شايفة كده وهتحط فلوسها.

*️⃣ لكن لو البنك المركزي خفض الفايدة ويطلع الأهلي ومصر يلغوا شهادات 30-25-20% بتاعتهم وشهادة 27% برضه ويخلوا أعلى شهادة 25% أو أقل... وبعد شوية يلغوها وينزلوا لـ 20% ثم 15%، ثم نعود لنهاية عصر مبارك والفايدة تحت 10% (ياااه على الأحلام وانت نايم مش متغطي 😂😂). فالناس هتلاقي البنوك مش جايبة همها فتنزل الفلوس للسوق وتشغل الشركات والاقتصاد... والمستريحين برضه اللي هيقولوا لهم 100% 😂😂.

*️⃣ مش هطول أكثر؛ النهاردة عالمغرب هنعرف الفايدة، ولو مخفضناش النهاردة يبقى بنسبة 99% هنخفض في 21 نوفمبر... المهم يكون هناك تخطيط بين الحكومة والمركزي؛ مينفعش المركزي يقلل الفايدة النهاردة والحكومة الأسبوع الجاي تزود 1.5 جنيه في البنزين فتزود له التضخم. ممكن نخفض الفايدة ونأخر زيادة البنزين، وكده كده حظنا حلو البترول محسوب بالموازنة على 82 دولار، بينما احنا حالياً عند 75 دولار، فممكن دا يشيل زيادة من الـ 5 زيادات المتفق عليهم مع الصندوق قبل نهاية 2025.

⬅️ توقعاتكم إيه بقى؛ هنتشجع ونخفض ولا خلينا عشان الهوت ماني؟؟

طيب ايه يا شباب مفيش 6 من ال 518 اللي راحوا سجلوا في كارت RedotPay يفعلوا الكارت 😂 عاوز اطلع ب سبوبة كده 😁😁؛ مش عارفين نطلع بمصلحة من المتابعين 😂😂😂

*️⃣ اعمل اكل وابقي فود بلوجر؛ أنا وزني 150+ 😋 يعني أنفع ولايق معايا الأكل مش ناس مسلوعة بتعمل فود بلوجز 😁😁

*️⃣ دا لينك الاحالة بتاع الكارت يمكن نلاقي حد من ال 6 اللي عاوزهم دول 😂

https://url.hk/i/en/a00r7

*️⃣ ولو مش عارف بتكلم عن ايه دا لينك البوست اللي بشرح فيه الكارت

https://t.me/BnSamyPosts/1316

*️⃣ نسلفكم ثمن شرا الكارت بقي 😂 (أنا معنديش حاجة ببلاش هتدفع يعني هتدفع) بس بجد لو فعلا في حد مش عارف اصلا ازاي يفعله يسأل وهسعي اني ارد عليه 😁.

⬅️⬅️⬅️ اقصد هنا 6 يعملوا الكارت يعني يدفعوا ال 10 دولار وياخدوا الكارت ورصيده 5 دولار؛ مش تسجيل بيانات بس 😁؛ عندي 525 سجلوا بيانات 😄... وممكن تصطاد عرض من ابو 5 دولار وتاخد 5 دولار رصيد يبقي خلاص كده اخدت كارت ببلاش 😁😁

⬅️⬅️⬅️ الناس اللي عاوزة تلحق عرض ال 5 دولار دا؛ انتا اجهز له هو سهل جدا تجيبه بس لازم تبقي جاهز؛ اشحن رصيدك وخش ضيف العنوان (هو كارت افتراضي بس لازم تكتب عنوان)؛ بحيث لما تصطاد العرض تشتري مباشرة متتعطلش في كتابة العنوان

تعرفوا إن في حاجة اسمها خط الفقر المصري أو خط الفقر القومي؛ هدف أي دولة المعلن والرسمي هو تحسين مستوى معيشة شعبها؛ ومن هنا بييجي مفهوم اسمه خط الفقر ودا فكرته إن الخبراء بيقعدوا يحسبوا ويحددوا حد أدنى لمستوي المعيشة ويحطوا رقم معين يومي لو دخلك أقل منه تبقي فقير.

*️⃣ فعليا مفيش خط واحد بل خطوط لكن في شبه تعارف عالمي علي خطوط البنك الدولي والمسماه خط الفقر المدقع وخط الفقر المعتدل وخط الفقر الأعلى ودي درجات من الفقر تبدأ بالمدقع ودا بيكون الشخص غير قادر علي توفير احتياجاته الأساسية ك إنسان علي قيد الحياة يعني صعوبة في شراء الأكل مثلاً؛ وتتحسن شوية في الخط الثاني المعتدل وهنا يقدر يشتري الأساسيات لكن لو واجه مصاريف زي الصحة أو التعليم هيكون في أزمة؛ وخط الفقر الاعلي دا بقى بيوفر الاكل والصحة والتعليم بس معندوش قدرة الادخار ولو فقد الوظيفة هيكون في مشكلة ضخمة وممكن ينهار للخطوط اللي قبله.

*️⃣ البنك الدولي حط أرقام 2.15$ و 3.65$ و 6.85$ ودا انفاق الفرد في اليوم؛ ولو حبينا نقلبها بالمصري ونقول عيلة 4 أفراد وسعر صرف اليوم للدولار 48.65 يبقي كالتالي

⬅️ خط الفقر المدقع العالمي لأسرة 4 أفراد لو دخلهم (دخل ال 4 أفراد معا) أقل من 12550 جنية (258 دولار أي 947 درهم أو 968 ريال)

⬅️ خط الفقر المعتدل العالمي لأسرة 4 أفراد هو لو دخلهم أقل من 21300 جنية (438 دولار)

⬅️ خط الفقر الأعلى العالمي لأسرة 4 أفراد هو لو دخلهم أقل من 40 ألف جنية (822 دولار)

*️⃣ طبعاً الأرقام دي مرعبة ولو طبقتها مع بحث الدخل والانفاق الصادر من الجهاز المركزي فخط الفقر الأعلى دا هيشمل أكثر من 90% من المصريين.

*️⃣ وتفادياً لهذه النسبة المهولة فمصر عملت حاجة خاصة بينا اسمها خط الفقر القومي أو خط الفقر المصري حيث تعتبر فقر لو دخل الفرد السنوي 10279 جنية أي 28 جنية يومياً او 0.56 دولار (ربع خط الفقر العالمي العالمي) وللأمانه رقم 10279 لم يحدث منذ 2021 ولم تصدر مصر تحديث لأعداد الفقراء.

*️⃣ وكده يعتبر خط الفقر القومي المصري لأسرة من 4 أفراد هي لو دخلها الشهري 3426 جنية. اي 70 دولار شهري للأسرة

*️⃣ وفي خط فقر تاني هو خط الفقر المدقع المصري وهو يساوي 550 جنية شهرياً للفرد أي أسرة 4 افراد تساوي 2200 جنية أي 45 دولار شهري للأسرة.

*️⃣ الأرقام دي الرسمية للدولة وهي لم تحدث من 2021 بشكل رسمي ووقتها كانت نسبة المصريين تحت خط الفقر 29.7%... لكن كان في تصريحات غير رسمية إن مصر هترفع خط الفقر ليصبح 1478 جنية وخط الفقر المدقع هو 1069 جنية.

*️⃣ ولو صدقت الأرقام دي فالعيلة 4 أفراد تعتبر فقيرة لو دخلها تحت 5912 جنية (121 دولار شهري للأسرة) ولو نزل تحت 4276 جنية ( 88 دولات شهري للأسرة) تبقي فقر مدقع.

*️⃣ عارف الأرقام صادمة ومش هتصدقوها بس الدولة إمبارح أكدت دا فمثلاً قالت إن المصريين استوردوا عطور ب 400 مليون دولار فدا معناه المواطن بيستهلك عطور ومزيلات عرق ووو مستوردة ب 4 دولار سنوي يعني بسعر الصرف اليوم بيستهلك سنوياً عطور ب 195 جنية سنوي...

*️⃣ وقالوا برضك بنستورد مساحيق تجميل ب 500 مليون دولار؛ لو فرضنا إن بيستخدمهم 40 مليون ست فقط من ال 53 مليون (13 مليون طفلة تحت ال 20) فدا معناه الست المصرية بتستهلك مساحيق تجميل مستوردة بمتوسط 12.5 دولار سنوياً.

*️⃣ فإحنا فقرا جداً؛ تخيلوا متوسط الاستهلاك الشهري لراجل ومراته من مساحيق التجميل ومزيلات العرق والعطور (المستوردة وفي جزء محلي) يساوي 1.7 دولار شهري ل 2 فرد راجل ومراته. فدا متناسب مع نسب الفقر المصرية. ان بند التجميل والعطور لزوجين تحت 100 جنية شهري قول في شوية محلي نفترض زيهم يبقي 200 جنية شهري (ودا كثير)

*️⃣ نكتفي بهذا القدر؛ وان شاء الله الاوضاع تتحسن بإن أكبر قدر ممكن من المصريين يهاجر ويحسن دخله ودخل أسرته في مصر ويحسن اقتصاد الدولة بتحويلات المصريين في الخارج؛ دا الأمل الوحيد للجميع.

تعرفوا إن الصين هي أكبر مصدر في العالم لكنها برضك ثاني أكبر مستورد في العالم يعني الصين بتستورد أكثر من اللي بتستورده ألمانيا واليابان مع بعض (دول رقم 3 و 4 في الاستيراد بالمناسبة) لكن برضك الصين بتصدر أكثر ما المانيا واليابان مع بعض (دول رقم 3 و 4 برضك في التصدير).

*️⃣ طيب الصين عملت دا إزاي؟ حاجات كثير أهمها البحث العلمي؛ احنا بنقول الصين بتصدر أكثر من ألمانيا واليابان صح؟ تفتكروا في البحث العلمي مثلا بتصرف أكثر منهم؟ طبعا صح بتصرف اكثر من المانيا واليابان وكوريا الجنوبية مجتمعين (3 و 4 و 5 في الانفاق بالبحث العلمي).

*️⃣ فالموضوع ببساطة انتا بتصرف كام؟ هتحط كام ويرجع لك كام؟ هتدعم الصناعة بكام مليار دولار وهتصرف كام مليار دولار بحث علمي وهتصرف كام مليار دولار في التعليم الصناعي والمهني ووو....

*️⃣ عشان تحصد لازم تجهز الحقل وتحط البذور وترعى الأرض وبعدين تلاقي المحصول... معادلة سهلة وبسيطة؛ محدش بيحصد من غير ما يزرع.

لإني اتسألت كتير إيه هو كارت RedotPay، فباختصار كده في الوقت الحالي لو عاوز تدفع أي معاملة دولية حتي لو ب 1 دولار، فعندك 3 خيارات وده سعر الصرف بتاعهم:

1️⃣ تعمل كارت دولار في البنك بتاعك وتروح تودع دولار وتشتري بيه. البنوك زي الأهلي، ومصر، وQNB، وCIB بياخدوا عمولة 1.5% لو المعاملة مش بالدولار (يعني ريال، درهم، دينار، يورو). فلو قولنا إن الدولار امبارح في البنك الأهلي كان 48.61 جنيه، يبقى هيحاسبك فعليًا 49.39 جنيه للدولار... طبعًا لو التسوية للعملية تأخرت فالرقم يختلف... في بنوك زي AUB، إسكندرية، وEG مش بتاخد رسوم تغيير عملة على الكارت الدولاري... ولو في بنك غير أي بند ممكن توضحوا لي في التعليقات وهبقى أعدل البوست.

⬅️ الخيار ده رغم إنه متاح للجميع نظريًا، بس يظل: هيجيبوا الدولار منين؟ وفي ناس مش بتحب التعامل مع البنوك المصرية بسبب أزمة الثقة بينهم وبين البنك... وطبعًا لو حبيت تحط مبلغ كبير شوية، البنك هيقولك جبتهم منين وممكن يكون مصدرك مش قانوني 😉😉.

2️⃣ الخيار التاني هو كريديت كارد قديمة يعني شغالة دولي، وده بياخد منك 5% رسوم، يعني الدولار اللي بـ48.61 هيبقى تكلفته عليك 51.05 جنيه...

⬅️ خيار الكريديت كارد مش متاح بسهولة، لإنك لو عملته النهارده، هيشتغل دولي معاك بعد 3-6 شهور... لكن للأسف في مواقع وخدمات بترفض الدفع إلا بالكريديت كارد. مثلًا في دول كتير، عشان تدفع تأمين تأجير السيارة لازم تدفعه بكريديت كارد وهكذا.

3️⃣ كارت زي RedotPay وأي كارت من العيلة دي، بس كمصريين جوا مصر تقريبًا مفيش خيارات غيره، وبرضه لو حد يعرف خيار أفضل يقوله... فكرة الكروت دي هي إنها بتستخدم USDT وغيرها من العملات الرقمية للدفع. وسعر الدولار الرقمي حاليًا 49.05 تقريبًا... لو دفعت بغير الدولار بتكون الرسوم 2% يعني 50 جنيه، يعني أرخص بجنيه لكل دولار تدفعه مقارنة بالكريديت كارد.

*️⃣الشحن بيكون إزاي بقى؟ في منصات كتير وأشهرها باينانس، بس في دعاوى لمقاطعتها لإنها بتقفل حسابات بعض الفلسطينيين بدعوى غسيل أموال... تخيل حد بيغسل فلوس في غزة! حجة مضحكة، والسبب الحقيقي مفهوم، وهو إن الحسابات دي بتجمع تبرعات... المهم يعني باينانس أصلًا سخيف لإنه بيعملك منع تصرف في أي شيء لمدة 24 ساعة... في منصات بديلة زي OKX وBybit تقدر تشتري منهم عادي وتحول على حسابك في RedotPay.

*️⃣بتحول إزاي؟ عادي، بتروح للكارت بتاعك وتعمل إيداع ويقولك إيه نوع العملة، بتختارها وتختار اسم الشبكة وهي طبعًا TRC20 (متفكرش كتير، هي هتظهر لك كده وميفرقش معاك هي إيه)، وفي النهاية هيديك رقم حسابك، تروح المنصة اللي عندك فيها USDT سواء باينانس أو OKX وتقوله سحب مبلغ كذا على شبكة TRC20 وبس يا سيدي، دقايق وتوصلك... في رسوم تحويل 1 دولار على أي عملية سواء كانت بـ10 دولار أو 10 آلاف دولار، ده رسم ثابت.

*️⃣ بتنزل الأول البرنامج وتشتري من الرابط دا الخاص بي عشان اطلع ب مصلحة 😂

https://url.hk/i/en/a00r7

*️⃣ بعدين بتعمل أكونت وخد بالك الحسابات البنكية يعني في ورق بجد؛ هتصور الباسبور وهتأكد رقم التليفون وهتأمن حسابك ببرنامج زي Google Authenticator وبعدها تروح تشتري كارت افتراضي بقيمة 10 دولار (في عروض يومية ب 5 دولار) وبعد ما بتشتريه بيديك هو رصيد 5 دولار.

*️⃣ هتجيب منين دولار تدفع بيه ال 10 دولار ؛ والله عارف 😁 هتجيبه برضك OKX وغيره؛ مهو مش منطقي تدفع بكارت بنكي مهو لو معاك تعمل الكارت ليه وتقرف نفسك. بس يا سيدي وبقي معاك الكارت.

*️⃣ لو معاك اي فون غير الدولة للامارات هتقدر تضيفه في Apple Pay ولو اندرويد تقدر تنزل Wallet او تعمل حساب دفع غير مصري وهيظهر لك برنامج Wallet... ميزة إنك تحط الكارت فيهم دول انك تقدر بواسطة موبايلك مباشرة في أي مكان في العالم بما فيهم مصر عادي (معرفش ليه تدفع بكارت دولي في مصر بس إنتا حر ومصر هتحبك عشان جبت لها دولار)...

*️⃣ طبعاً برضك تقدر تسحب فلوس من باي بال عليه لو معندكش خيار بنكي لكن الرسوم اعلي حسب ما الناس وضحت.

*️⃣ الكارت مشهور وفي فيديوهات كثير لشرح كل حاجة فاللي فعلاً عنده مشكلة وبيدور علي حل ليها هيدور؛ دا اللي مقتنع بيه لكن اللي هيسأل علي حاجات اجابتها اول نتيجة بحث في جوجل فبكون عارف انه بيتسلى مش أكثر

رابط الكارت
https://url.hk/i/en/a00r7

رابط OKX

https://okx.com/join/79909790

في حاجة مشهورة بالانترنت اسمها مزارع المحتوى أو Content farm ودي هدفها وفكرتها باختصار إننا نعمل مواقع تجيب زوار كثير ويكون عندنا اعلانات جوجل وغيره فنكسب من الزيارات. والمزارع دي منتشرة في الكوكب كله مش مصر بس عشان منظلمش حد

*️⃣ مزارع المحتوى دي بقي بتنفذ فكرتها بطرق مختلفة؛ في منها بيعتمد علي بوت Bot يقعد ينسخ مقالات من مواقع مختلفة ويحطها عنده؛ المشكلة جوجل بخوازمياتها وعم باندا بتاعها خلاص بقت تقفش دا وتعرف المحتوى الأصلي من المنسوخ؛ فمن هنا راحوا للطريقة القديمة وهي طريقة جريدة النبأ في الاتوبيسات (من 20 سنة لو حد كان وقتها بيركب باص هيفتكرها).

*️⃣ الفكرة بتكون نشوف محتوي شاهد قبل الحذف ونعمل عنوان كده؛ نألف خبر وفاة ممثل مغني سياسي مشهور؛ أي هري في رغيف ونحط عنوان جذاب عليه والناس تقولك مش ممكن ازاي حصل؛ فالفضول ياخدها فتفتح الخبر؛ تقراه وممكن عادي متصدقش وممكن تقول كاتب عبيط؛ مش مهم تصدق متصدقش متفرقش؛ دورك تم و mission accomplished دورك خلص ودخلت واتحسبت زيارة واخدنا فلوس اعلانات عليك فتصديقك ونفيك مش هتفرق كثير. ملح ملح يعني (طز بس بقلش وبقولها بالمعني لان طز يعني ملح 😂).

*️⃣ مثلاً أنا اتبعت لي او مينشن خبر زيادة اسعار الانترنت الأرضي بتاع 6 مرات وشوفته في التايم لاين عشرات المرات؛ طبعاً عارف انه هري محض بس الفضول اخدني وشغلت Adguard عشان اشيل الاعلانات ودخلت المواقع دي عشان الفضول بس هنا فضولي مش في المعلومة لكن يهمني الصياغة؛ بهتم انا وبتعلم من طريقة الناس في جذب القراء (عشان نعملها فيكم 😜). وهنا كانت الصدمة.

*️⃣ الأسعار مكتوبة زيادة باقة 140 جيجا (دي الأساسية لغالبية المصريين) لتصبح 140 جنية بدلاً من 120 جنية.. الصدمة كانت إن مش المزرعة اللي تاعبه نفسها بتنشر؛ لا إن الناس صدقت الخبر وبتشيره؛ طب ازاي يا جدعان؟

*️⃣ يوم 2 يناير 2024 الحكومة طلعت قرار زيادة باقات الانترنت الارضي والباقة الأساسية ال 140 جيجا بقت 160 جنية بدلا من 120 جنية... يعني كلنا بندفع في الباقة دي شهريا 160 جنية (188 جنية بالضريبة) فإزاي شخص بيدفع كل شهر 160 جنية يصدق وينشر خبر إن الباقة بقت 140 جنية بدلاً من 120 جنية... تخيل معايا حد بيمون العربية ب 15 جنية اللتر ويقولك شوفت الخبر خلوا اللتر ب 10 جنية بدلا من 5 جنية ضاعفوا السعر منهم لله... طب ازاي بس.

*️⃣ طبعاً بعض الناس بره مصر فالخبر يخدعهم طبيعي لكن تبقي جوا مصر وبتدفع اشتراك انترنت ومش عارف بتدفع كام وتنقله 🤔🤔.

⬅️ طيب نعمل ايه في مزارع المحتوي؟ الرد بسيط وهو لا تقلق الخازوق هتعرفه.

*️⃣ هو لو حصل إن في دولة عملت تفجير نووي الخبر دا مش هينشروه الصحف الكبرى وهيكون بس منشور علي منتدي دلعيني يا ماما أوام يا ماما؟ لو الحكومة زودت سعر البنزين الخبر دا هينزل بس في مزرعة المحتوي (الدستور) ومش هينزل باليوم الساقع مثلا 🤔... نتيجة انتخابات امريكا يوم 5 نوفمبر هتلاقيها في صفحة المصريين المتحدين ومش في CNN و BBC ؟

*️⃣ فانتا الخبر ال Woooow وال بووووووم دا مش هيعرفوه في جريدة تيكا أنص قبل رويترز وبلومبيرج على فكرة... فانتا بص مصدر الخبر دا موقع ايه؛ هل دا موقع ليه أي مصداقية؟ ومش بقول توجه سياسي لكن انتا تعرفه؟ أنا تعمدت هنا بس اكتب اسم مزرعة محتوي الدستور لانها يعتبر الصحيفة الوحيدة الشهيرة اللي غيرت شغلها من كتابة صحفية الي المزارع فقولت اكتب اسمها عشان اعرف الناس انها مبقتش الدستور عهد مبارك لا دي عادي زي اي مزرعة.

*️⃣ يا جدعان دا الوضع وصل إن جريدة اسمها العقارية نشرت مانشيت (رغم إعلان الشركات.. المصرية للاتصالات: لم تصدر موافقة حتى الآن على زيادة أسعار الإنترنت المنزلي) انتم متخيلين الضحك؛ دول نقلوا الهبدة ومصدقينها لدرجة انهم لما جالهم نفي من جهاز تنظيم الاتصالات بيكذبوه وبيقولوا رغم اعلان الشركات 😂😂 انتم متخيلين الوضع الصحفي في مصر وصل لإيه. مسخرة.

⬅️⬅️⬅️ الخلاصة خدوا بالكم من أكاذيب مزارع المحتوى وخاصة الفترة القادمة لإنهم هيلعبوا علي مشاعر الناس اللي متحفزه تصدق أي هبد ومش هتعديه علي فلتر في مخها يراجعه؛ خدوا بالكم ومتخافوش كده كده الخبر الحقيقي هيوصلك هيوصلك؛ عيييب عليك هو الخازوق مش عارف طريقه مثلاً ليك ومحتاج انك تدور عليه 🤔🤔 دي اهانة للخازوق حضرتك

البوست الثالث في يوم واحد 😔

ايه الفارق بين التضخم العام والتضخم الاساسي

*️⃣ التضخم العام دا بيعلن عنه الجهاز المركزي للتعبئة والإحصاء ودا بيقيس مختلف المنتجات والخدمات والزيادة في أسعارها.

*️⃣ بعد ما بيعلن الجهاز المركزي عن التضخم بتاعه بيروح البنك المركزي واخد الداتا دي ويشيل منها السلع المسعرة إدارياً ويطلع تضخم يسمى الأساسي؛ يعني أي سلعة او خدمة بيطلع قرار بسعرها فمش بتتحسب لإن هدف البنك المركزي حساب التغير في السوق بناء على العرض والطلب؛ السلع المسعرة إدارياً دي زادت أو رخصت بقرار دولة مش باختيار السوق.

*️⃣ النهاردة الجهاز المركزي اعلنت ارتفاع التضخم بتاعه (العام) من 26.2% الي 26.4% لكن البنك المركزي أعلن انخفاض التضخم بتاعه (الأساسي) ليصبح 25% بدلاً من 25.1%

⬅️⬅️ دعواتكم أفوق من إللي أنا فيه وهصور فيديو التضخم ودا واحد من 4 فيديوهات بحضر لهم.

البوست دا يهم فقط اللي عنده شركة وشغال مع مواقع خارج مصر (فيسبوك جوجل الخ الخ).

*️⃣ مصلحة الضرايب أعلنت إنه اعتباراً من يوم 1 نوفمبر هتبدأ المواقع في عمل فحص الرقم الضريبي المسجل عندها للشركات وهيكون مطلوب منك (رقم تعريفي مميز)... ولو مش فاهم تعالى أحكي لك القصة.

*️⃣ يونيو 2023 مصلحة الضرايب المصرية ألزمت الشركات الموجودة خارج مصر والتي تقدم خدمات للمصريين بالتسجيل في منظومة خاصة وفرض ضريبة 14% على خدماتها.

*️⃣ بالفعل المواقع بدأت في التسجيل وفرضت مايكروسوفت وأمازون وجوجل وفيسبوك وزووم ووو الضريبة علي فواتيرها؛ بدأت تطلع للمستخدمين رسالة بتقوله لو انتا شركة ضيف رقمك الضريبي...

*️⃣ الأفراد بقي معندهمش رقم ضريبي فكانوا بيحصلوا منهم 14% أما لو شركة وكتبت رقمك الضريبي فكان مبيتمش خصم ال 14% لإن انتا مفروض مطالب بتوريدهم بنظام (التكليف العكسي).

*️⃣ هنا تيجي الفهلوة بتاعتنا؛ الأفراد بقوا يكتبوا أرقام بتاعة أي شركة أو حتى رقم وهمي؛ ويتشال من على اعلاناتهم ال 14% وزي الفل ومش هنقر بحاجة. فبقوا يحطوا رقم أي شركة يشوفوها ولو حتى في اعلانات التليفزيون. لإن اي رقم تسجيل ضريبي يتحط يخلي الفيسبوك مثلا ميحصلش 14%

*️⃣ طبعاً الضرايب أخدت بالها فمن هنا هتبدأ من 1 نوفمبر نظام اسمه الرقم التعريفي المميز؛ الرقم دا أشبه ب OTP يعني محدش يقدر يوصله غير الشركة نفسها وصالح لمدة سنة.

*️⃣ المواقع هتطلب من المعلنين مش بس يحط الرقم الضريبي لا وهيحط معاه رقم التعريف المميز دا؛ هنقدر عادي نجيبه من موقع الضرايب العادي (بوابة الممول)... وبكده الأفراد مش هيعرفوا يجيبوه فكده يتفرض عليهم 14% اللي استنصحوا وهربوا منها.

*️⃣ طبعاً باقي الأمور كما هي؛ الضرايب وضحت إن الشركات مش معفاه ولو شركة عملت اعلانات ب 100 الف جنية مفروض تروح في اقرارها الضريبي تقر وتدفع 14 ألف جنية قيمة مضافة عن الاعلان دا (التكليف العكسي).

*️⃣ بس يا سيدي ودا الجديد؛ فلو انتا بتعلن في أي جهة خش هات رقم التعريفي بتاعك وخد بالك بيظهر مرة واحدة بس فخده سكرين شوت بقى

بس دا كان الجديد النهاردة واللي اتقال في ندوة الضرايب اليوم؛ طبعاً أنا مش محاسب ضريبي فمحدش يتوقع إني هعرف أرد ع الأسئلة والاعتراضات؛ مش تبعي

الجهاز المركزي أعلن إن التضخم زاد في سبتمبر إلى 26.4% مقارنة مع 26.2% في أغسطس... الغريب يا أخي لقيت مانشيت التضخم يخالف التوقعات ويرتفع؛ يا راجل 🤔🤔.

*️⃣ حضرتك هو إنتا تزود سعر انبوبة البوتجاز اللي سمعت في سلع أساسية زي المخبوزات والأفران ومحلات الفول والطعمية والأكل... والسلع بتنقص في السوق بسبب خنق الاستيراد فالطلب أعلي من العرض... وعاوز التضخم يقل إزاي 🤔🤔 دا تضخم ام ترتر دا لو قل

*️⃣ ولسه هيزود 1.5 جنية في البنزين والسولار ومع زيادات الاتصالات فالتضخم يزيد في أكتوبر؛ وفي نوفمبر تكون السلع خلصت من السوق فالتضخم يزيد في نوفمبر؛ وبعدين ديسمبر منسيبوش قاعد لوحده زعلان نشوف أي قرار فيه زي قائمة السلع المعفاة من القية المضافة او مخفضة الضريبة 5% مثلا نغير فيها فتسمع معانا في تضخم ديسمبر... وفي يناير ننفذ فكرة زيادة الكهرباء مرتين سنوي يناير ويوليو... وآخر يناير ندينا 2 جنية بنزين كمان. وطبعا يتخلل الشهور دي زيادة في 500-1000 دواء كمان عشان نطمن إن التضخم هيزيد؛ أحسن البنزين ووو ميعرفوش يزودوه. وطبعا الإيجارات والسكن بيزيد بشكل خزعبلي.

*️⃣ وبكده حققنا المستهدف بتخفيض التضخم؛ مهو لازم نطلعه فووووق عشان لما يقع رقبته تتكسر ويموت 😂😂😂 أوماااال أنتا فاكر ايه دي خطة لو فهمتوها تبقوا عمد 😂.

*️⃣ ابقي قابلني لو نزلت الفايدة بقى بارتفاع التضخم دا... وطبعاً التضخم بيزيد في مصر؛ وفي نفس الوقت التضخم بيقل في أمريكا؛ بس الدولار ثابت في مصر؛ اقتصاد دا ولا مش اقتصاد يا متعلمين يا بتوع المدارس 😂؛ شيل لي يا ابني فارق الفايدة دا علي جنب وهرجع له بعد كام سنة اخده منك لوكشة واحدة.

هانت

النهاردة يوم تاريخي؛ طبعاً يا فيسبوك مقصدش خالص أي أحداث حصلت 😉😉 فاهمني طبعاً؛ بس يوم تاريخي غير الحسابات وكشف حاجات كثير وعرفنا أوزان كنا فاكرينا ثقيلة وطلعت هفأ؛ وعرفنا إن في حاجات بتشتريها بالفلوس عادي

طبعاً مقصدش حاجة دا عشان النهاردة فودافون وأورانج واتصالات هيوقعوا عقود 5G مع الحكومة... فدا هيعرفنا إن في سرعات تشترى بالفلوس... وإننا كنا عايشين في أوهام طول السنين الماضية وإنها كانت سرعات فنكوش؛ والحقيقة هتتعرف بسبب 7 أكتوبر

سرعة 5G يا جدعان واخدين بالكم... وريني بقي ذكاءك الصناعي هيفهم إزاي 😁؛ ويا خوفي يا بدران الناس تفتكرني بتكلم عن ال 5G وإننا كنا عايشين في وهم شعارات ال 4G الكذابه ومديين شركات الاتصالات أكبر من حجمهم الحقيقي وهما في الحقيقة فنكوش 😁😉😉 شركات الاتصالات واخد بالك انتا يا حسين

⬅️⬅️ دا بوست للفيسبوك عن فلسطين بس قولت انشره كما هو هنا برضك

النهاردة فعلت توقيع عقود 5G لكن طبعا هنفضل فاكرين التاريخ دا عشان اللي حصل العام الماضي؛ عاشت فلسطين

⬅️⬅️ تحديث

يا شباب ChatGPT بيستخدم موارد ومحركات كبيرة لتحليل الكلام؛ عشان كده قدراته المجانية مقيدة والمدفوعة بفلوس؛ عكس الفيسبوك في مليارات البوستات يوميا وميقدرش يستخدم الموارد الضخمة دي لتحليل كل بوست؛ دا مكلف جدا... فهو بيستخدم تقنيات بدائية غبية للذكاء الصناعي؛ كده وضحت

بخصوص الموضوع دا عشان اتسألت عليه عشروميت مرة... وناس تعمل تخيلات وناس تقولك في تعويم قريب وناس تحسب وووو

*️⃣ يا جدعان الخبر دا من 2022؛ ايوا بقالنا سنتين كل السلع دي تحت رقابة المركزي وشبه مقفول استيرادها الا بضوابط معينة...

*️⃣ الشروق نشرت الخبر تاني ليه؟ متعرفش بقي عاوزة ترافيك جديد ولا البنوك بدأت تدبر للسلع دي فالمركزي عمل لهم تذكير بالقرار فالشروق افتكرته قرار جديد

⬅️⬅️ لو حد فتح أصلاً الخبر هيلاقي الشروق نفسها قايله القائمة منذ مارس 2022 ؛ فهي مجرد تذكير للبنوك عشان متستهبلش وتدبر لهم...

فلا جديد يذكر

*️⃣ اااه صحيح ما انتم فاكرين ان العربيات والموبايلات والاجهزة المنزلية غالية بشكل مبالغ فيه بمصر عشان جشع تجار مش عشان استيرادها مقفول بقالنا سنتين فالعرض ناقص جدا والطلب اضعافه فعرض وطلب السعر يزيد 😂😂 يا جدعان السلع دي مقفول التدبير ليها؛ لو عندك يا مستورد مصدر دولاري رسمي يلا هاتها معندكش مفيش استيراد ليها.


⬅️⬅️⬅️ نصحية أخوية؛ ممكن لما تشوف خبر تفتح الخبر تقراه عشان هما عارفين ان الناس مش بتقرأ غير عناوين فبيضحكوا عالمتابعين؛ اقرأوا من فضلكم

امبارح نزلت صورة عالفيسبوك ل V Cola دايت وقولت انه ظريف لإني أول مرة أشوفه وأجربه إمبارح... تعليقات كثير جداً كانت بتعلق على شركة V إنها جشعه تسعيرها مش سليم وبتستغل المقاطعة لتحقيق أرباح ضخمة ووو... فتعالوا بقي نرغي شوية في الصناعة والمقاطعة وهل المنتجات المصرية مفروض تبقي أرخص من اللي قاطعناه... فإحنا هنتكلم كلام عام بس للتوضيح هنضرب مثال ب V مع بيبسي و كولا... أنا مش شريك فيهم عشان الناس مريضة الشخصنة.

1️⃣حجم الإنتاج: في البداية لازم نبقي عارفين كثافة الانتاج بتختلف؛ لو انتا بتنتج مليون زجاجة في اليوم غير اللي بينتج 100 ألف... متقوليش لو هروح أصنع منتج في مصر هيبقي أرخص تكلفة من مصانع الصين وفيتنام... انسى... بالمناسبة العامل الصيني بياخد اضعاف اضعاف راتب العامل المصري؛ دي مجرد ملحوظة لتكون فاكر العمالة الصينية رخيصة... فشركة V ذرة قصاد بيبسي وكوكا كولا.

2️⃣ تكلفة التوسع : تخيل معايا شركة كوكاكولا عاوزة تتوسع وشركة V عاوزة تتوسع وشركة محلية ثالثة أصغر عاوزة تتوسع... بالنسبة ل كوكاكولا فهي اسمها كوكاكولا يعني تقول لأي حد هاتلي قرض... مثلا كولاكولا مصر وقعت شهر يوليو قرض ب 123.8 مليون يورو مع البنك الأورربي للتنمية... فايدة القرض مش معلنه بس غالبا 3% مثلا او 4%...

*️⃣ لو روحنا ل V كولا فهي هتروح تاخد قرض بفايدة كام؟ غالباً 30% متناقصة... واخد بالك من فارق الحجم... طبعاً شركة محلية غير مشهورة ممكن أصلاً متعرفش تاخد قرض كبير... فهنا عندنا شركة كوكاكولا عندهم أعباء قرض 4% وشركة V عندها عبئ قرض 30% واخد بالك من فارق التكلفة دا 🤔 وخد بالك ممكن عادي كوكاكولا تاخد قرض علي 10+ سنة؛ ولو وقعت ومعرفتش تسدد فالشركة الأم هي الضامن...

*️⃣في حين الشركة المحلية V واخدة قرض فايدة 30% واخره 5 او 7 سنين... فبالتالي المحلي محتاج هامش ضخم عشان التكلفة بتاعة المال Cost Of Money.

3️⃣ شبكات التوزيع : الشركات العملاقة عندها قدرة ضخمة علي عمل شبكات كاملة مملوكة ليها... يعني مثلا في العالم عندك تنين Walmart دي شركة عدد موظفيها فوق 2 مليون موظف (تحديداً 2.1 مليون منهم 1.6 مليون في أمريكا)... الشركة دي عندها شركات شحن وسفن وشركات توظيف وشركات حراسة وكل مجال عندها فيه شركة عشان تخدم عليها... تخيل واحد يقولك هفتح محل وانتشر واهزمهم 😂😂... دول ملهمش حد ينافسهم غير أمازون... السمك الصغير دا يتاكل بس مينافسش حد.

*️⃣لما نشوف هنا مثالنا فشركات عتيقة زي كولا وبيبسي عندهم سيستم عمره عشرات السنين؛ موزعين متعاقدين معاهم في كل شارع في الجمهورية.. لو دخلت كشك في قرية صغيرة في الصعيد هتلاقي عنده بيبسي وكوكاكولا... وطبعا مياة ديساني وأكوافينا بتوعهم... لكن المنافسين ملهمش القدرة دي؛ معندهمش شبكة خزعبلية من الموزعين دي واسطول عربيات بيلف كل محافظات مصر طول 24 ساعة في عربيات عندهم بتوزع... طيب المنافس المحلي بيعمل ايه 🤔.

*️⃣بيبدأ يشوف مناطق ويحددها ويوزع فيها؛ وبعدين يشوف مناطق تانية ويتعاقد مع موزعين محليين فيها؛ هما اصلا موزعين منتجات كثير تانية فخدنا معاك... والموزع دا بيوزع علي ناس اصغر منه ووو... الشبكة دي بتتعامل قطاعي يعي هتكلفه فلوس عكس شبكة بيبسي وكوكاكولا اللي معظمها الشركة بتديره؛ او عالاقل متعاقد معاهم من أيام الملك فاروق 😁 فلو بياخد عمولة فلا تقارن بالتكلفة بتاعة الشبكة الثانية المستأجرة.

4️⃣الدعاية للقطعة... طيب تعالي للنقطة الكبيرة؛ الدعاية... تخيل معايا شركة بسبسي هتعمل حملة اعلانيه ل 4 شهور في الصيف بتكلفة 100 مليون جنية... وشركة V هتعمل برضك عملة اعلانية لنفسها بس صغيرة نقول 5 مليون... هنا تكلفة صريحة اهي ل بيبسي أكبر صح... الاجابة غلط. التكلفة بتتحسب للقطعة.... شركة بيبسي هتصرف 100 مليون دعاية وهتبيع 200 مليون زجاجة في نفس الفترة مثلا فالتكلفة 50 قرش لكل زجاجة... بينما شركة V هتعمل حملة ب 5 مليون وهتبيع 5 مليون فالتكافة 1 جنية لكل زجاجة... كده تبقي حملة بيبسي ام 100 مليون اقل تكلفة من حملة V ام 5 مليون... وضح كده نقطة الدعاية الضخمة.


5️⃣ الحصة السوقية : الشركات العملاقة أمازون نون بيبسي كوكاكولا جوجل ماكدونالدز كنتاكي الخ الخ مجالات مختلفة خالص لكن مش دائماً بيكون هدفهم الوحيد الربحية... طبعاً كله عاوز يكسب بس ساعات الشركات بتكون عاوزة تعمل حصة سوقية؛ شركة حصتها السوقية 20% وخطتها ان الحصة تبقي 30% فممكن تشتغل وتصرف وتخسر حتي عادي مش فارق معاها (بيفرق بس مش دا الهدف).. عكس الشركة المحلية متقدرش تستحمل خسارة سنتين ثلاثة بهدف الانتشار... حضرتك بقولك قروض بفوايد 30% تخسر ايه بس 3 سنين.. الشركة العالمية تقدر عادي تخسر سنين وعندنا شركة أم بره تشيلنا..

⬅️ مش هطول في البوست لكني حبيبت بس أوضح مفهوم غلط خالص الناس فاكرة إن البديل المحلي هيكون أرخص وتكلفته أقل.. الكلام دا نادراً ما بيطلع صح خاصة لو المنتج العالمي لتصنيع محلي.

استمتعوا بالخناقة

صديقي أحمد أبو زيد بيقول فات سنتين علي الحلقة القديمة تعالى نعمل حلقة جديدة نجاوب فيها علي أسئلة الناس

تحبوا لو عملنا الحلقة ايه النقاط اللي نتكلم فيها والأسئلة اللي نجاوب عليها

بما إن الحوار الوطني بدأ مناقشة التحول للدعم النقدي؛ ومستقبل وطن دعا الدولة للتحول ليه؛ وأعضاء مجلس شعب تحدثوا عنه فتعالوا نعرف ايه فكرة الدعم النقدي. وخاصة مع الأخبار اليوم إن بعثة الصندوق أجلت زيارتها لمصر إلى نوفمبر لغاية ما تشوف مصر هتعمل ايه.. فتعالوا نرغي شوية في الدعم.

*️⃣ في البداية كده نأخذ كام معلومة عن الدعم من واقع الموازنة الحالية... إجمالي إنفاق الحكومة "الاستخدامات" هي 5541 مليار جنية وأكبر 3 بنود هي فوائد الديون 1843 مليار ثم أصل الدين 1606 مليار ثم الدعم 635 مليار والدعم دا مقسم كالتالي:

1️⃣ مبلغ 298 مليار جنية دعم سلعي يعني بنزين وكهرباء ومايه وتموين وأدوية و تموين.

2️⃣ مبلغ 232 مليار دعم اجتماعي أي مساهمة في صناديق المعاشات وتكافل وكرامة واعانات اجتماعية ومنح ومساعدات وتخفيض اشتراكات مواصلات للطلبة وغيره.

3️⃣ مبلغ 47 مليار في دعم الصناعة والتصدير وتوصيل الغاز للمنازل والإنتاج الحربي وغيرهم من الأنشطة الاقتصادية.

والباقي نثريات 😁

*️⃣ دعم التموين ورغيف العيش هما اللي بيدرسوا التحول للدعم النقدي فيهم... المواطن بيحصل علي 5 أرغفة عيش يوميا مقابل 1 جنية بدلا من 6.75 جنية للتكلفة أي دعم رغيف يومي 5.75 جنية أي 173 جنية شهرياً (أنا شلت القروش والكسور للتسهيل) وبيحصل تموين 50 جنية...

*️⃣ أي المواطن بياخد 170 جنية دعم شهرياَ هي دي تكلفة الدعم اللي الحكومة دائما بتتكلم عليها؛ فالدولة دلوقتي بتدرس بدل ما بتوفر غير مدعم وتوفر تموين يبقي تدي المواطن 175 جنية بدل رغيف العيش المدعم وممكن تتوسع وتخليهم 225 جنية وتلغي التموين نفسه. يعني لو فرضنا أسرة من 5 افراد فهتحصل علي 875 جنية بدل رغيف عيش و 250 جنية بدل سلع تموين.

*️⃣ حاليا عدد المسجلين مستحقين للتموين في مصر هو 70 مليون يعني شهرياً الدولة هتديهم 12.25 مليار جنية رغيف عيش و 3.5 مليار جنية بدل سلع تموينية.

⬅️⬅️⬅️ ايه مزايا الدعم النقدي ؟

*️⃣ الدعم النقدي ليه بعض المزايا بداية من القضاء علي سلسلة فساد ضخمة بتستفيد من وجود الدعم؛ ففي شركات بتورد للتموين سلع بالفساد (تبع ناس حبايب ناس دافعين الخ الخ) ودا بيخلي سبوبة مستمرة؛ تخيل شهريا في سلع بتباع ب مليار الدولة بتشتريها وتبيعها للمواطن؛ فالفساد حلاوة... كمان في بأفران العيش برضك تهريب الدقيق المدعم وربع ملايين منه؛ 12.25 مليار جنية شهريا دقيق مدعم بينزل السوق نظرياً فدا طبعاً منجم ذهب للفساد.

*️⃣ حرية ومرونة أكثر للمواطن بحيث يقدر يقسم أولوياته؛ يعني النهاردة مش عاوز عيش الشهر دا لسبب ما مسافر ولا معزوم عند حد فمش محتاج فمعاه فلوس (الحكومة كانت بتعمل نظام نقاط خبز تستبدلها ب سلع تموين).

⬅️⬅️⬅️ ايه عيوب الدعم النقدي؟

*️⃣ عيوب الدعم هي ببساطة إن الدولة مش هتراعي التضخم؛ يعني المواطن سابقاً بيحصل علي رغيف عيش ب 5 قروش ولاحقا 20 قرش... كلف الدولة 70 قرش كلفها 100 كلفها 120 قرش كلفها 200 قرش كده كده هياخد الرغيف بتاعه... لكن لما نديله 175 جنية وبعدين الدقيق يغلي في السوق ولا الكهرباء ولا الغاز المخبز يغلي رغيف العيش فالدولة مش هتروح مزوده المبلغ لحظي زي ما سعر الرغيف هيغلي لحظي.

*️⃣ بمعني (اخر اسبوع) الشهر الحالي هيزيد البنزين والسولار ووو... نفس اليوم هتلاقي الكل زود كل شيء؛ يا تري نفس اليوم المواطن هيلاقي الدولة زودت ال 175 جنية خلتهم 200 جنية؟ الاجابة مستحيل ومش هيحصل... فالنتيجة هتكون إنك هتاخد رقم ممكن في البداية يكفي بديل بس مع الوقت والتضخم هيتآكل.

*️⃣ نقطة كمان وهى إن فعلياً رقابة الدولة عالأرض شبه صفر... الحكومة تدعي إن أفران العيش الغير مدعمه بتبيع ال 5 أرغفة ب 6.75 جنية فهي هتديك 5.75 جنية وانتا كنت بتدفع جنية... فعلياً مش هتشوف المخابز دي... ولو حصل لبعض الناس في بعض المناطق فمش متوفرين للجميع؛ ضيف على دا مثلاً إن الحكومة بتدي المواطن رغيف 90 جرام وبتقول تكلفته 135 قرش أنتا بتدفع 20 والدولة 115 فهنديك 115 روح السوق اشتريه بقى... في حين نفس الوقت التسعير الحكومي للعيش هو 150 قرش لوزن 80 جرام... فين الرغيف 90 جرام أبو 135 قرش اللي المواطن هيشتريه؟

*️⃣ طبعاً التموين برضك نفس الفكرة المواطن هياخد 50 جنية ويروح السوبر ماركت يتعامل.. يشوف هيشتري ايه بقى.

*️⃣ الخلاصة لعدم الإطالة فالدعم النقدي كويس وهيقضي عالفساد وهيقضي على إن منتجات سيئة يحصل عليها المواطن إكمنها "مدعمه" وفكرة "اديله أي حاجة دا دعم" سواء عيش أو مكرونة ودقيق وووو... بس الناحية الثانية محتاج مجهود ضخم من الدولة من رقابة عالأسواق وكمان تحديث مستمر للمبلغ المصروف للمواطن.

*️⃣ فالدولة مفروض تدقق في المستحقين للدعم بحيث تضمن وصوله لهم فعلاً وفي نفس الوقت تفضل كل شهر تزود لهم المبلغ بحيث يقدروا يحصلوا على نفس الخدمات. لو دا حصل هيكون الدعم النقدي خيار جميل وإصلاح اقتصادي حقيقي... لكن لو محصلش فهيكون لعنة على 70 مليون إنسان بيحصلوا عليه.

بما إن الأخبار النهاردة إن الصندوق أجل زيارته لمصر والمراجعة إلى شهر نوفمبر ... والكلام حولين إقرار تعديلات ضريبية والدعم النقدي وشوية رفايع كده.

*️⃣ ففي بوست انا كنت اشتغلت فيه بشرح الدعم النقدي وفي ال Draft عندي... هبقى اكمله وانشره اليوم بإذن الله وأشرح فيه فكرة الدعم النقدي وليه بيتم الترويج ليها بديل للدعم العيني وايه مزاياها... وبرضك ايه عيوب تنفيذها وشوية تفاصيل كده...

*️⃣ إن شاء الله أخلصه وهنشره اليوم 🫡