الطلاب المئة الأوائل_ Top 100

"كيف حالك؟ وكيف شعورك هسي؟"
كان دا أول سؤال سألناه ليكم في الفورم الفات..

في الصورة المرفقة بتشوفوا جزء من إجابات سنايركم..
وديل هم الناس الأدرى بحالكم.. لأنهم عاشوه أو يمكن عاشوا الأسوأ، هم نفسهم الكانوا مقلقين وخايفين -زيّكم حاليًا-.. هسي مبسوطين وحامدين ربنا على ذلك

هل لسّه عندك شك أنو الزمن ح يكفي؟؟
ولسه عندك شك أن هذا الوقت سيمضي! ستمضي كل لحظات التعب والخوف واليأس.. ح تقول لي نفسك يعني خلاص تالت انتهت؟ بس كدا؟ دا الكنت خايف منو طول الفترة الفاتت دي!
حتشوف كيف ربنا سهلها عليك وهوّن ليك صِعابها..

•استعينوا بالصبر واحتسبوا الأجر واسألوا الله قوة الظهر..
قعدة القراية مملة، والظروف قاسية، والنفسيات ما أحسن حاجة، لكن ما تخلي حاجة من ديل توقِّفك عن سعيك.. فلذة الوصول تكمن في قوة السعي، من لا يبذل لا يصل..
•توكَّلوا على الله حق توكله، من يتوكل على الله فهو حسبه، ولا تبرحوا باب الدعاء.

•رتِّبوا أولوياتكم، ونظموا وقتكم، وراقبوا تقدُّمكم باستمرار..
•ثبّتوا قرايتكم بحل امتحانات السنوات السابقة، واتعلموا منها طريقة الأسئلة البتجي وخلوا قرايتكم مركزة على متطلبات امتحانات الشهادة..

عندكم الوقت عشان تنجزوا، وعندكم الامكانيات، فما تخلي الإحباط والأفكار السلبية يلقوا طريق يدخلوا بيه..

#كلنا_أوائل

السلام عليكم ورحمة الله وبركاته
الأعزاء من 024 و025 أبدًا ما نسيناكم 🍃
نادوا لينا شباب 023 وتعالوا معانا دقايق بس 🤌🏻

امتحانات الشهادة السودانية الأخيرة كانت سابقة استثنائية، حاولنا فيها تلبية البعض من احتياجات الطلاب خلال المرحلة ديك..
وعشان نواصل بصورة أفضل -إلى حين تسليم الراية لأبطال 023- محتاجين نسمع منكم ومنهم

أدناه ح تلقوا رابط Google form ، لو ممكن تدخلوه وتجاوبوا لينا، فإذا انت:
-طالب من الدفعة الح تمتحن في الفترة الجاية: ورينا شنو احتياجاتك خلال الفترة دي كطالب، ونفسك نقدّم ليك شنو؟

-طالب من الدفعة الـ امتحنت: ورينا شنو الحاجات الساعدتك عشان تعدّي المرحلة دي، وشنو كان نفسك يتقدّم ليك، عشان نساعد أخوانكم الجايين بعدكم

-لا دا ولا داك: شاركنا برضو بالحاجات الاستفدت منها لمن كنت ممتحن، وأي رأي أو فكرة حابّي تقدمها لينا

رابط الفورم:
https://docs.google.com/forms/d/e/1FAIpQLScmXqpgy9Xa9D-s95PfgsjmniHxUvIqZaVq62JLfuCp9LIWFA/viewform?usp=header

#كلنا_أوائل

رضختتت اخيييرررااا 🥳🥳🥳
طبول طبووول طبووول

بعد السلام عليكم ورحمة الله وبركاته..
اللييلة ما يومم عاديي والليلة ما يوم فرحكم برااكم...
اللييلة يوووم مهم لكل سودانيي بجد والليلة يوم الخلاص زي ما بتقولو 😂🥳🤍

كل الأضواء تتوجه نحوك الليلة يا بطل التحدّي انت..

عايزين نقول ليكم سر قد يكون واضح اساسا
بس تالله نحن ح نتعلم منكم دروس ودروس، وبقدر ما كنا بنكتب عشان تستفيدوا بقدر ما نحن اللي استفدنا منكم ومن فهمكم ومن ثباتكم ومن تجاربكم..

مبسوطين بيكم شديد لدرجة ما بتتخيلوها! ❤️
لانكم خليتو السودان كلو على قلب رجل واحد... من حديث السوق اللي كلو عنكم لحدي عمو الما عندو زول ممتحن وفارش مصلايتو وبدعي ليكم ومرورا بالجامع اللي بعد كل صلاة بذكروكم عشان ترفعوا راسنا وقد كان!!

يعني اييه العظمة دي ايه الجمال دا انتو ايه بالضبط !!؟؟ 😂

انتو ما دفعة عاديّة..
انتو قصّة ح نتعلم منها الكثير والكثير فااا ليك الحق وليكي الحق انو تفخروا بالحاجة دي ❤️

اليووم خلو راسكم مرفوع وقولو لكل زول "نحن من دفعة التحدّي" وخلي عندك يقين بربنا زي ما نجّاك من السنة دي فابشروا بنتيجة وعوض يخليكم تطيروا تطيروا من الفرح بإذن الله تعالى..

حمدًا لله على السلامة وشكرًا ليك يا بطلنا لثباتك حتى الآن ♡

متحمسيت نسمع منكم ومتحمسين نتعرف عليكم ومتحمسين نشوفكم وانتو مبسوطين بدرجاتكم وتفوّقكم وتذكروا قول الله تعالى :
﴿وَلَسَوفَ يُعطيكَ رَبُّكَ فَتَرضى﴾

وكنصيحة صغيرة أخيرة ليكم
=تانييي في نصائح كمان بعد خلصنا؟؟ 😂

لالا خلاص خلاص ارتاحوا وافرحوا وما تفارقوا الدعااااء نهااائي ❤️

سائلين المولى أن تشمل الفرحة اخوانكم الما قدروا يمتحنوا معاكم وينير دربهم ويوفقهم لمثل هذه اللحظة وعقبال ٠٢٤ و ٠٢٥ من وراكم.

إن بدر منّا تقصير وخطأ فمن أنفسنا ولكم العتبى وإن افدناكم فذلك الفضل من الله..

#دفعة_التحدي_تُسطّر_ التاريخ
#top100students

رسالة من أهلكم لكل طلاب الشهادة السودانية..
By: مبادرة نحن معاك

بسم الله والحمد لله ولا إله إلا الله والله أكبر
ولا حول ولا قوة إلا بالله.

اللهمَّ لا سهلَ إلَّا ما جعلتَه سَهلًا، وأنتَ تجعلُ الحَزْنَ إذا شِئت سَهلًا، اللهمَّ يا مفهِّم سليمان فهِّمني، ويا معلّم داود علّمني.

ربِّ زِدْني علمًا، ربِّ زِدْني علمًا، ربِّ زِدْني علمًا..
"سَنُقْرِئُكَ فَلا تَنْسَى إِلا مَا شَاءَ اللَّهُ إِنَّهُ يَعْلَمُ ٱلْجَهْرَ وَمَا يَخْفَىٰ".

ربِّ اشرح لي صَدْري ويَسٍّر لي أمري واحْلُل عقدةً من لساني يفْقَهوا قَولي.

"وَمَا تَوْفِيقِي إِلَّا بِاللَّهِ ۚ عَلَيْهِ تَوَكَّلْتُ وَإِلَيْهِ أُنِيبُ"

-أوائلنا القادمين.. حامِلي الراية وأبطال دفعة التحدِّي..
نسألُ اللهَ العلّي العظيم لكم التوفيق والسداد، أعانكم الله ويسّر أمركم وسدد خطاكم.
نسألُه لكم بركةً في الوقت والعلم والجهد..
نسألُه بأن ينير بصيرتكم ويلهمكم الصواب
ويبلِّغكم المقاصد ♡.

وصلِّ اللهم بِجلالِك على أعظم مخلوقاتك، سيدنا وحبيبنا محمدٍ وعلى آله وصحبه وسلِّم.

⚡️اعمل شنو الليلة وبكرة امتحان الشهادة؟

اول حاجة خلينا نتفق على كم نقطة
الليلة وبكرة الامتحان ما حتقدر تقرا الكتاب كلو سطر سطر وما لازم اصلا تعمل كدا الفكرة انك تمر على الحاجات الاساسية في كل مادة + تشتغل امتحانات او على الاقل تمر على جزء مقدر منهم "اذا انت حاليهم قبل كدا" وتحت حافصل في الموضوع دا..

📌اولا:
في حاجات مفترض الزول يمر عليها ويعمل ريفريش على السريع زي:
-التعاريف.
-القوانين (خاصة في الرياضيات والكيمياء والفيزياء)
-المفاهيم الاساسية للدروس:
مثلا القاعدة العامة او تفرعات لاشياء معينة او عدة قواعد والحاجة دي بتخليك تستعيد تفاصيل الدروس حتى لو ما مريت عليها.
-الرسومات (الاحياء).
-معاني الكلمات.
-سورة النور.
-القصائد+ الشاعر.
-المقالات (التاريخ- وما بالضرورة تمر عليهم كلهم ممكن تشوف المهمين ككل وتاني الباقيين تعرف النقاط الاساسية وعناصر المقال).
-الخرائط(الجغرافيا).
-رسومات الهندسية.

🌟لمن تعمل الحاجة دي اول شي حتكون مطمئن وثاني شي بيشغل ذاكرتك وينعشها وممكن كمان من خلالها تتذكر معلومات الدرس التانية ال ما مريت عليها لانو بتكون مرتبطة كلها مع بعض زي ما قلت فوق.

📌 ثانيا:
عندك جزئية معينة مشتتة بين الدروس (يعني مثلا شايفها صعبة او بتتنسي ليك كتير جيب قلم واعمل جمبها نجمة "قبل يوم الامتحان" بعد تخلص مراجعة التعاريف والقوانين والحاجات الذكرتها فوق تبدأ تفتش نجومك :) وتمر عليها برضو.

📌ثالثا:

تجيب امتحانات الشهادة السابقة وتبدأ من السنين القريبة وتمشي لورا يفضل 5 او 6 وغالبا حتكون مريت عليهم قبل كدا فبتمشي فيهم سريع دا غير انو في اسئلة كتيير بتكون مكررة وهنا بيجي نفع حل الامتحانات ... لو في حاجة وقفت ليك ارجع ليها في الكتاب وممكن تدي نظرة سريعة للدرس لو حاسي انك ناسيه.
بعديها تجيب امتحاناتك حقت المدرسة وتبدأ تشوف اي سؤال فيه علامة خطأ وتصححوا بالاجابة الصحيحة..
اخيرا لو عندك باقي زمن ممكن تشوف ورق العمل او تحديدا ورق معين منه حاجات كانت غلبتك وهكذا.

🌟صباح الامتحان تصحى بنفس رايق وممكن تاني تشوف الناقص شنو او عايز تراجع شنو او حتى تشوف تمارين وتداريب من الكتاب او امتحان... المهم تكون حاجة خفيفة شديد عشان ما توتر نفسك وتحتفظ بطاقتك وتركيزك للامتحان.
🌟السهر وعدم النوم مافي صالحك أبداً.. صدقني مهما دخلت كَم كبير من المعلومات وما أخدت راحتك وعقلك وجسمك ما ارتاحوا ما حتقدر تركز كويس وتسترجع المعلومات دي؛ عشان كدا افضل قدر القريته دا -والأكيد انه ما هين- وتتوكل على الله؛ ثم اساسا المعلومة بتكون مرت عليك وذاكرتها مرة واتنين واكتر.. فبإذن الله استرجاعها قد يكون سهل في الامتحان.
🌟أعرف انت عايز تعمل شنو بالضبط في اليوم دا واخد بريك بعد تجي من الامتحان القبليه زي ساعة أو ساعة ونص؛ صلاة .. اكل.. وغيره.. وبعدين اتوكل وأبدأ مادة اليوم الجديد.

⚡️يوم الجلوس لامتحان الشهادة

-التوتر حاجة طبيعية وصحية جداً؛ بس أقرنه بالتوكل على الله عشان ما يتجاوز حده ويبقى معيق ليك..
اتذكر انو اولاً دا ما امتحان آخرة "فلا بُشرتم بالنار ولا حُرمتم الجنة"؛ وأن ما يكتبه الله يكن.
-زي ما قلنا في الرسالة الفاتت؛ السهر لا لا للسهر اوعى من السهر... نوموا كويس.
-اتأكدوا إنكم مجهزين أدواتكم وملابسكم من قبل يوم الامتحان بدهية صاح:)؛ عشان ما تتجاروا صباح الامتحان.
-صباح الامتحان☀️:
ابدوا يومكم بأذكار الصباح والورد حقكم ومهم جداً سورة يس بنية التوفيق والتسهيل؛ لو الزول لقا طريقة كمان يقرأ سورة البقرة.
-في القاعة قبل يجيبوا الورقة؛ أبدأ قول اي أذكار و ايات من القرآن؛ ادعي استغفر حوقل اي حاجة.. لمن تستلم ورقتك مهم شديد تقول الأدعية المأثورة زي مثلا : (اللهم لا سهل إلا ما جعلته سهلا وانت تجعل الحزَن ان شئت سهلا)؛ (ربِ اشرح لي صدري ويسر لي أمري واحلل عقدة من لساني يفقهو قولي).. بعد التسمية والتوكل على الله (بسم الله توكلت على الله لا حول ولا قوة الا بالله)؛ بعدها تباشر تكتب اسمك و تقرأ السؤال براحة(بعد التعليمات ديك- اقراها بس كفعل واجب✋🏼 واتأكد من عدد الصفحات مطبوعة كلها ولا لا).. مرة تانية اقراه لمن تفهم هم عايزين شنو بالضبط عرفت ليه حِلو طوالي ما عرفت ليه وحاسي حتاخد وقت عشان تتذكر تعمل علامة واضحة إلى حدِ ما جمب السؤال بقلم الرصاص.. العلامة دي بتخليك تتجنب انك تفط سؤال لانو بيحصل كتير انو في اسئلة بتكون في النص وبتتنسي بين السطور. أما الما متأكد منه ١٠٠% ممكن تحلوا بقلم الرصاص وبعدين ترجع ليه مع الأسئلة الما حليتها وتفكر فيها.
استرجاع السؤال حاجة ممكنة جداً حاول جيب المعلومات الاساسية في الدرس المعين واتذكر تاني التفاصيل كانت شنو؛ وممكن برضو تستبعد الخيارات(في ضع دائرة مثلا او حتى لو عندك كم خيار في راسك) لقايت ما تصل لجواب محدد.. ما عرفت ليه خالص اكتب أقرب حاجة؛ ما تخلي سؤال فاضي سؤال فاضي ما تخليه.
بعد تخلص تبدأ تراجع وتخت يدك وتمشيها على الجمل جملة جملة سؤال سؤال عشان تتأكد من مضمون السؤال كان شنو وما يضيع منك واحد ما شفته قبيل؛ وأهم شي فوق دا كله انك تكون متابع الوقت.
-بالنسبة لزمن امتحان الشهادة فهو ممكن يخليك تحل (٣ - ٢) امتحانات قدروا عديل؛ الزمن كافي لكن خلي يكون عندك ساعة تشوف بيها الزمن عشان تشوف معدل مراجعتك حيكون كيف وشنو الحاجات الأولى بالمراجعة (دا لو خلاص الزمن ضايقك) والتحبير والأشياء دي.
-نحن مطالبين بالسعي وليس بالنتيجة؛ اياً يكن شكل الامتحان (والذي سيكون ساهل بإذن الله دي حاجة اطمنوا ناحيتها) ما تتوتروا منه ولا الدنيا تقفل في وشكم؛ جربوا أقصى شي تقدروا عليه وخلي في بالك "أنا عملت العلي والباقي على الله".
-بعد الإمتحان يخلص؛ ارميه وراك.. بالمعنى الحرفي؛ هدفك وتركيزك كله يكون على الجاي...
لانو ممكن المراجعة تأثر على نفسيتك أو في ناس عادي معاهم ما عارفة :) لكن عموما خلي في بالك "ما كان كان".

^^بتذكر في امتحان شهادة الأساس في امتحان العلوم في سؤال كدا أولته بحاجة بعيدة شديد وبتذكر الوحيد الكنت شاكة فيه؛ بالصدفة عرفت من صحبتي انو اجابتي دي غلط :(؛ بتذكر زعلت شديد لكن الحمدلله كانت بنص بس والنص اتجبر في النتيجة واتذعت عادي؛ بتذكر استاذي-استاذ محمد مختار- ربنا يطراه بالخير يا رب ويجزيه كل خير؛ بعد النتيجة ظهرت قال لي : "لو ما كان غلطتي في العلم في حياتنا ما كان حرصتي شديد على باقي الامتحانات وقفلتيها"
ودي حاجة مهمة!
طريقة تعاملنا مع الأحداث حتفرق جداً جداً..
استغل أي ضعف أو وقوع بطريقة صح!!
ماف زول بيقفل النسبة بالمناسبة يعني وعادي حتى اوائل السودان بيطلعوا من القاعة وعندهم اخطاء؛ take it easy^^.

-لمن ترجع البيت حاول أخد بريك من ساعة ل ساعة ونص ارتاح وصلي وأكل فيها؛ ممكن تعمل timer أو منبه.. بعديها سمي الله وشوف المادة البعديها بوين.

الطلاب المئة الأوائل_ Top 100 pinned «﷽ رسالة مرجعية لجزء من المحتوى المقدّم بواسطة الطلاب المئة الأوائل.. ●| بوستات •| صف لي عوض الله •| كيف أرجع أقرا •| الشغف •| الأسئلة الشائعة •| نصائح •| مصدر للكتب والامتحانات •| يوم الجلوس لامتحان الشهادة #سلسلة_المواد •| التربية الإسلامية •| اللغة…»

● قائمة لقاءات الطلاب الأوائل

• قائمة لقاءات الأوائل مع قناة تجمع طلاب صناع المستقبل

• لقاءات الأوائل مع منصة قمم:
• اسأل قمم: أسامة أحمد المصباح
• اسأل قمم: ريان هشام
• اسأل قمم: عزة عبدالباقي
• البرامج التوجيهية: رهف عصام
• البرامج التوجيهية: محمد مأمون
• مادة الرياضيات
• مادة اللغة العربية
• مادة اللغة الانجليزية
• مادة الفيزياء
• مادة الكيمياء
• مادة الأحياء
• مادة الهندسية
• مادتي الجغرافيا والتاريخ

• لقاءات الأوائل مع منصة ملهمون:
• أحمد صهيب
• دعاء كمال
• براءة عبدالباري
• أمنية محمد موسى
• حمدون صلاح
• براءة إسماعيل
• عبدالكريم عبدالقادر
• أوليفار صلاح

• عزة عبدالباقي - قناة دفعة التحدي
• ورشة التجربة - قناة جرعة أمل
• أسامة أحمد المصباح - قناة جرعة أمل
• محمد عاصم و عزة عبدالباقي - قناة غياث
• أسامة أحمد المصباح - قناة غياث
• أحمد صهيب > اللغة الانجليزية - قناة النضال

﷽

رسالة مرجعية لجزء من المحتوى المقدّم بواسطة الطلاب المئة الأوائل..

●| بوستات
•| صف لي عوض الله
•| كيف أرجع أقرا
•| الشغف
•| الأسئلة الشائعة
•| نصائح
•| مصدر للكتب والامتحانات
•| يوم الجلوس لامتحان الشهادة

#سلسلة_المواد
•| التربية الإسلامية
•| اللغة العربية
•| الرياضيات
•| اللغة الانجليزية
•| الكيمياء
•| التاريخ
•| الهندسية

●| لايفات
•| سباق مع الزمن: الإنجاز في نهاية العام
•| نصائح آخر شهر
•| كيف نرجع نقرا
•| إدارة الوقت وقياس التقدم
•| فن الملخصات وحل الامتحانات
•| الخوف وكيفية التعامل مع المشاكل
•| كيفية التعامل مع ورقة الامتحان
•| كيف أتفوق في امتحان الشهادة
•| ونسة أوائل

●| لقاءات الأوائل
•| قائمة لقاءات الطلاب الأوائل

●| بوستات قصص الطلاب الأوائل
#لن_نبرح_حتى_نبلغ

●| بوستات الحملة التحفيزية
#الحملة_التحفيزية

●| #ونسة_مع_طلاب_الشهادة_السودانية
سلسلة من البوستات على الفيسبوك تحوي كل النصائح المهمة لطلاب الشهادة السودانية.
للوصول للمنشور الأول اضغط هنا

- يمكنك الوصول للمحتوى الذي تريده بالضغط على الجملة ☝🏻
- سيتم تحديث الرسالة باستمرار مع كل محتوى جديد بإذن الله تعالى

السلام عليكم ورحمة الله وبركاته

إلى أعزائنا الطلاب الممتحَنين، المستبعِدين مادة اللغة الانجليزية من جدولهم الدراسي، والناسين أنها زيها زي باقي المواد بـ 100 درجة في الامتحان..
والمتسائلين "كيف نتعامل مع الانجليزي" .. مواصلين معاكم في #سلسلة_المواد وضيفتنا المرة دي هي مادة اللغة الانجليزية🍃

طيييب في البوست دا ح نتناول أسئلة امتحان الانجليزي سؤال سؤال ونعرف محتاجين نسوي شنو عشان نضمن أكبر قدر من الدرجات فيه
جهّز كباية شاي عشان البوست حيكون طويل شوية كدا 🤣☕

•سؤال قواعد اللغة - Grammer
طيب يا عزيزي الطالب انت عارف أنو في عدد من القواعد انت مطالب تعرفها، وأهميتها ما بتقتصر على السؤال دا بس وإنما بتحتاجها في أسئلة تانية كمان زي الـcomposition والـsummary ..
اتأكد أنك ملم بالقواعد دي بشكل كويس، وعارف العلامات البتلقاها في الجملة (الـ adverbs ) واللي على أساسها بتصرّف الفعل بالشكل المطلوب، تكون فاهمهم وحافظهم..
وكمان ما تنسى تتأكد أنك عارف التغييرات التي تطرأ على الفعل لمن نصرّفه، زي مثلا متين بنحول الـy إلى i ، ومتين بندبِّل الحرف الأخير ومتين بنضيف es بدل s ساي وهكذا..
وأهم حاجة بعد اكتسابك للمعرفة دي أنك تطبقها على الامتحانات خصوصا امتحانات الشهادة القديمة، وحاول أنك تشتغل أسئلة بتاعة قواعد مختلفة في وقت واحد، بدل تقرا كل قاعدة وتشتغل عليها براها لأنك هنا حتكون عارف أنك ح تشتغل على أساس القاعدة دي، فما بتضمن أنك قادر تميّز بين القواعد المختلفة.

•سؤال البادئة واللاحقة - Suffixes and prefixes
زي ما عارفين إضافة بادئة أو لاحقة على الكلمة بيغيّر معناها، بالتالي نحن محتاجين نعرف طبيعة التغيير البحصل في المعنى مع كل بادئة أو لاحقة، بالتالي لمن نقرا الجملة الموجودة في السؤال ح نفهم طبيعة الكلمة المفروض نختها في الفراغ..
يعني مثلا، تكون عارف أنو (un/im/ir/in) معناهم بيشير للنفي، و (pre قبل) و(post بعد) وهكذا مع الباقيات
وأنو في لاحقات بخلّوا معنى الكلمة يكون اسم(ment/ age/ ship/...) ، ووحدات بخلوها فعل (ify/ ize/ en/...)، ووحدات بخلوها صفة ووحدات بخلوها Adverb وهكذا
-يلا مافي قاعدة محددة كدا بتحكم ليك الموضوع دا، عشان كدا بتحتاج تمارس السؤال دا في الامتحانات وكدا بتتعرف على الكلمات البتتكرر، وتعرف مع كل حالة ح تستخدم شنو.
-سياق الجملة مهم شديد عشان تحدد الإجابة الصحيحة.
-في حالة الـ Suffixes محتاج تعرف التغييرات البتحصل لحروف الكلمة الأصلية، إذا كان الموضوع بحتاج إضافة أو حذف أو تغيير حرف.
-في الامتحان بيديك خيارات، فلو في واحدة ما عرفتها حل الباقيات وتعال شوف شنو فضل ليك.

•الأدب الروائي - literature
قصة ممتعة، درجاتها كبيرة بس ممكن الزول يضمنها بسهولة..
أقراها المرة الأولى بحيث تفهم الأحداث وتعرف معاني الكلمات الموجودة، وتعال أقراها مرة تانية ومع كل فقرة تقراها فكّر كيف ممكن يسألوك عنها، وخت خط تحت المعلومات المهمة..
مارس عليها أسئلة امتحانات الشهادة، وفي كل مرة تراجعها أو تحل عليها ح تلقى روحك قاعد تتذكر وتعرف المعلومات المطلوبة بشكل أحسن.
ويعني 24 درجة في الجييييب

•التعبير - Composition
مبدئيا عشان التعبير بتاعك يكون مقبول ففي سمات عامة كدا مفروض تتوفر فيه، وفي حاجات بتخلي هيكل الجمل متماسك وصحيح، فانت محتاج تعرف شنو هي الحاجات دي
يعني مثلا وجود فقرات، طول التعبير يكون في المدى المعيّن، أحدد شنو نوع الـ tenses المفروض أستخدمهم، هل ح أحكي قصة حصلت في الماضي؟ ولا ح أتكلم عن حقائق بالتالي ح استخدم Present .. وهكذا
وتعرف كيف تستخدم أدوات الربط، زي الأدوات البتُستخدم للإضافة (and/ in addition/also/...)، والأدوات البتَستخدمها لمن تكون عايز تتكلم عن معنى مخالف للسابق (although/ on the other hand/...) وغيرهم.
عمومًا في المواضيع الإنشائية دي كل ما كتبت أكتر يدّك بتسلك، شوف المواضيع الجات في الامتحانات قبل كدا وأكتب عنها، وأدي زول يصحح ليك (لو كان أستاذ يكون أفضل) ويوريك شنو الأخطاء اللغوية والإملائية وشنو التعابير الكان ممكن تستخدمها بحيث يكون المعنى سليم ومناسب، وانت تشيل الملاحظات دي كلها وتخليها في بالك لمن تجي تكتب الـcomposition البعده وهكذا، لو ما لقيت زول ممكن تستغل أدوات الذكاء الاصطناعي في الموضوع دا

•الملخص - summary
طبعا لا يخفى عليك أنو في السؤال دا مطلوب منك تقرا فقرة قصيرة وتستخرج منها إجابة للسؤال المطلوب في مدى معيّن لعدد الكلمات، بالتالي أول حاجة ح تعملها بعد تقرا وتفهم الفقرة هي أنك تحدد إجابة السؤال وين وتخت تحتها خط
وهنا بتجي عملية الاختصار، بتحتاج عشانها معرفة بكيفية ربط الجمل، وكل ما كنت قادر تستخدم كلماتك الخاصة، وتلقى تعبير بكلمات أقل بيوصّل لنفس المعنى بيكون دا أفضل..
زيو زي القبلو محتاج معرفة بالخطوات المطلوبة وبعداك أهم شي الممارسة والتصحيح المستمر.

•الفهم المقروء - reading comprehension
بنسبة كبيرة شديد قطع القراءة في الامتحان بتجي من واحد من كتب السباين التلاتة (بتاعات أولى وتانية وتالتة)
ففي الوضع المثالي، لو كنت قادر تقرا القطع الموجودة في الكتب وخصوصا كتاب تالت بحيث تكون فاهمهم بالقدر الكافي البخليك تجاوب أسئلتهم في الامتحان فدا حيكون شي كويس شديد
-شوف شنو القطع الجات قبل كدا في الامتحانات السابقة، وطبيعة الأسئلة البتجي
-درجات السؤال دا كبيرة وبتستاهل المجهود المبذول فيها
-الفائدة من قرايتك للقطع ما مقتصرة على السؤال دا براه، لأنك كدا بتكتسب ذخيرة لغوية تساعدك في الـcomposition والـsummary ، وكذلك بتقدر تنتبه على القواعد اللغوية المستخدمة في القطعة والـ Suffixes and prefixes الملازمة للكلمات الموجودة فيها

•أخيرًا، حتكون لاحظت من خلال البوست قدر شنو اتكرر موضوع حل الامتحانات القديمة، وفعلًا الممارسة حاجة مهمة شديد في كل المواد.. راجع غلطاتك وأعرف الصاح شنو و ليه
-حاول تستعين بالمصادر المتاحة ليك عشان تطوّر المهارات البتحتاج ليها لحل أسئلة الانجليزي، زي أدوات الذكاء الاصطناعي وحصص اليوتيوب

إن أصبت فمن الله وإن أخطأت فمن نفسي..
وفّقكم الله وأعانكم وسدد خطاكم
والسلام عليكم ورحمة الله وبركاته

#سلسلة_المواد

السلام عليكم ورحمة الله وبركاته، أسعد الله أوقاتكم بكل خير.
مواصلين معاكم في #سلسلة_المواد والليلة حنتكلم عن الهندسية.

مبدئياً كدا الهندسية مادة سهلة شديد وبترفع درجتك بس محتاجة شوية تركيز.

امتحان الهندسية نمطه واحد تقريباً وما بتغير شديد ومعظم مسائلو مكررة فلو مريت على كم امتحان حتعرف الأفكار كلها وكيف بتجي.

الهندسية مادة تطبيق وحل وتفكير ف لاااازم تتمرن على تمارين الكتاب وتمر على الأمثلة، وبرضو مر على امتحانات الشهادة قدر الإمكان، وحاول اتمرن على حل مسائل كثيرة، وأهم حاجة في المسائل الهدوء، نزل المعطيات وحدة وحدة -لو في تحويل وحدات حول-، شوف المطلوب شنو، اكتب القانون، لو المعطيات كافية عوض لو ما كافية شوف الحاجة الناقصة جيبها بالمعطيات العندك وبعدين عوض وما تنسى التمييز.

و ما تنسى تراجع السؤال تاني لأنو مرات كتييرة بكون في أكتر من حاجة في السؤال فتأكد إنك كتبت كل المطلوب.

خطوات الحل دي كلها عليها درجات ف ما تكسل تسويها لأنها درجات في المتناول.

بالنسبة للرسم الهندسي :
التمرين في البيت أهم حاجة عشان تثبت الخطوات خطوة خطوة، وبرضو مع التمرين يدَّك بتخف وبتشتغل أسرع... أما التجميع فهو محتاج شوية خيال ورؤية مختلفة للشكل حاول افهم المساقط قبل تبدا وافهم وضعية الشكل(ممكن تتخيلو في عقلك وممكن ترسمو بشكل صغير كدا في طرف الورقة وبعدين تمسحو)... مع الممارسة والرسم الكتير والأشكال المختلفة ح تقدر تحل اي شكل ممكن يجي في الامتحان...وعموماً الأشكال البتجي ما صعبة شديد لكن برضو استعد لأي حاجة.

بالنسبة للجزء النظري أدرسو من الكتاب، صح الكتاب ما ساهل شديد وفيو حاجات معقدة بس المعلومات الفيو مهمة وكلها ممكن تجي، ولو قدرت تفهم الكلام الفيو أو لقيت زول يشرحو ليك بكون أحسن.

أخيراً الامتحان بكون ٤ أسئلة كلو باب في سؤال براو ففي كل سؤال استحضر الحاجات بتاعت الباب، مثلاً في الميكانيكا اتذكر انو زمن القطع بكون بالدقيقة وفي الكهربية الزمن دايماً بالثانية وهكذا.

#سلسلة_المواد

بسم الله الرحمن الرحيم

السلام عليكم ورحمة الله وبركاته
والصلاة والسلام على رسول الله محمد وعلى آله وصحبه أجمعين.
أما بعد أخواني وأخواتي الممتحنين، لقد صبرتم على هذه العام الدراسي الطويل، ورغم الظروف الصعبة التي قد تؤدي إلى خور العزائم قابلتموها بالاجتهاد والمثابرة والعزم على تحقيق التفوق، وها هي ذي الامتحانات تدق أجراسها وتفتح أبوابها بحمد الله ومنته، أسأل الله العظيم أن يوفقكم وييسر عليكم الامتحانات ويدخل السرور على قلوبكم بنتائج مبشرة.
أخواتي وإخواني في الميثاق الأدبي أريد أن أوجه إليكم نصائح بسيطة تتعلق بمادة التاريخ.

١. "المقالات" هذه الكلمة تمثل تخوّفًا كبيرًا لدى الطلاب وتكون محور اهتمامهم وتركيزهم، وقد يطرحون الكثير من الأسئلة ( ماهي المقلات المرشحة ، ومقالة كذا ستأتي ... ألخ )
أود أن أعطيكم قاعدة عظيمة بارك الله في معلمتي التي أرشدتني لهذه القاعدة التي أصبحت داعمة لي في مسيرتي العلمية ، ألا وهي ( كل عنوان في الكتاب مقالة ) . اظن أنها واضحة المعالم ، فإذا درستم المادة بإخلاص وبفهم وليس بحفظ محض، إذا سُئلتم عن أي مقالة ستكتبونها بكل سهولة ويسر. فالشأن كل الشأن في الفهم وحب المادة وليس في الحفظ المحض، فإذا طلبوا منكم مقالة تذكروا أولًا ماهي الموضوعات التي درستها في الكتاب وتتعلق بعنوان المقالة ورتبها ترتيبا جيدا ، وأحب أن أبشركم أن لجنة التصحيح لا تود منكم الحرفية وذكر النصوص كما هي في الكتاب فأهم شىء أن تذكروا النقاط الأساسية وتصيغوها بلغتكم الخاصة.

٢. السؤال المهم كيف أتمكن من حفظ المادة دون أن أنساها ؟؟؟؟؟
أولا أحب أن أقول لكم هذه الحقيقة الصادمة فالتاريخ هو فهم ثم حفظ وليس التاريخ أو الميثاق الأدبي هو ميثاق الحفظ المحض كما يوصف دائما،
فنحن لسنا بحواسيب لكي نقوم بنسخ ولصق النصوص، فالأولى بنا أن نتبع عدة خطوات :-
١. أقرأ الموضوع الذي تريد أن تذاكره قراءة جردية أولا، وهي أن تقرأ كل الموضوع الذي تريد دراسته قراءة سريعة تعلم منها المفهوم العام للموضوع.

٢. أن تقوم بتخيل هذه الأحداث، وأن تدخل في عمق القصة وأن تسردها كأنك في فيلم تاريخي.

٣. أن تقوم بالنشر وذلك من خلال سرد هذه القصة على أخوتك مثلًا، أن تناقش القضايا العظمى كالقضية الفلسطينية والدولة العثمانية مع والدك أو أمك أو حتى يمكنك أن تتخيل أنك مدرس وتقوم بشرح هذا الموضع لتلاميذك الافتراضيين.

٤. إمعان النظر، وهذه القراءة مهمة جدا وهي قراءة تعتمد على مجرد النظر (دون التكلم وتكرار الكلام باللسان )، فهذه القراءة سريعة ويمكنك أن تكرر النصوص عشرات المرات دون أن تحس بالتعب أو العطش.

٥. وأخيرًا أن تختبر نفسك بكتابة المقالات أو العناوين والموضوعات
ثم قراءتها ومقرانتها بالنص داخل الكتاب، فلا تطلب من نفسك سرد النص كما هو فالهدف من المقارنة هو تحديد ما اذا كانت هنالك نقطة رئيسية نسيتها، فسيساعدك هذا الاختبار لمعرفة الخلل في حفظك وفهمك.

أعتذر على إطالتي عليكم، وأرجوا أن تستفيدوا من هذه النصائح.

فإن أخطأت فمن نفسي والشيطان
والسلام عليكم ورحمة الله

#سلسلة_المواد

السلام عليكم ورحمة الله وبركاته
كيف حالكم يا أوائلنا؟ .. إن شاء الله بخير وصحة وعافية، لا فاقدين ولا مفقودين ♡
ما يخفى على واحد منكم الظروف المارين بيها حاليًّا، فوصيتنا الأولى رفقًا بأنفسكم، قبل ما ندخل في تفاصيل المواد..
أدّي قيمة للبتعمله ولو كان شي صغيير، انتو حقيقة شغالين في ظروف استثنائية، وبإذن الله ح تلقوا نتيجة سعيكم "وأن ليس للإنسان إلا ما سعى"

طيييب يلا بسم الله ندخل في العميق 🤣🔥 ونواصل في #سلسلة_المواد

الرياضيات.. مادة ح تبقى ليك ممتعة جدًا جدًا لو كسرت حاجز خوفك منها، وعرفت كيف تتعامل معاها بشكل صحيح

مبدئيًّا كدا.. الرياضيات عندنا هي مجموعة قواعد وقوانين انت محتاج تفهمها أولًا ثم تطبقها خلال حل المسائل
-المحتوى النظري في الرياضيات هو شوية تعريفات ونصوص ما بتشكل مشكلة كبيرة بالنسبة لحفظها-

•ح نركز في البوست دا على موضوع الممارسة وحل المسائل بالنسبة للرياضيات
فتابعوا معانا النقاط الجاية..

1- كلنا عارفين الممارسة والتكرار، وحل الامتحانات الكتير ليهم أثر سحري عديل، وبالذات في الرياضيات
بس قبل ما تمسك قلمك وتقع في المسائل دي استكين شويية🤣🤌🏻
الممارسة مهمة بس كمان يا شباب لازم تكون ممارسة بِفهم، وللأسف كتير من المذكرات ما مراعية للنقطة دي
-انت قصدك شنو يعني؟؟
=بي بساطة شديييدة ما تحل مسائل عندها نفس الفكرة بس بي أرقام مختلفة مية مرة.
طيب عشان تفهم الفكرة أكتر، لو مثلًا حليت في المرة الأولى (جد نها جا٣س/٢س عندما س تؤول للصفر) وبعدها جيت حليت (جد نها ٧س/٨س عندما س تؤول للصفر) كدا انت ما عملت فرق،
حاول تخلي التنوّع بتاع المسائل يكون في فكرة المسألة، ما في الأرقام بس
خُذ زهرة من كل بستان 🤣🌹

2- معرفة الحل الصاح هو صاح ليه دي حاجة مهمة جدّا جدّا، ما تمشي بي مبدأ والله زبطت معاي بس🤣
وكذلك معرفة الغلط غلط ليه، والغلط دا وقع في ياتو جزئية من الحل
الحاجة دي مهمة مهمة شديييد ❗
فلو كنت بتحل امتحانات طوالي وكل مرة بتلقى مستواك ثابت بدون تطوّر (أهم شي بدون تطوّر) فهنا حيكون في مشكلة ومن السذاجة تجاهلها، واصل حلّك وانت مدرك لإنك ضروري تعرف السبب البخلي حلّك صحيح أو غلط شنو..
شوف الحل الصحيح، والخطوات بتاعتو، وإذا الحل دا كان بيتطلب مهارة من المهارات الأساسية عشان تراعي ليها في حلولك الجاية
تلقائيا بتتكون عندك الأفكار بتاعة (أنا لمن ألاقي مسألة بالشكل الفلاني ح أتعامل معاها بالشكل الفلاني)
-من الحاجات الساعدتني أني كنت بقرا مع صاحبي، ففي الغالب نقاط الضعف حقتنا بتكون مختلفة، فهو بشرح لي الصاح البكون أنا حليتو غلط والعكس-
والحاجة دي ممكن تعملها مع نفسك، راقب تقدُّمك.

3- استهدف نقاط ضعفك
-كيف الكلام دا؟
=طيب أنا والله من خلال كم امتحان عرفت إنو عندي مشكلة في الباب الفلاني تحديدًا في الحتة الفلانية، بالتالي ح أمشي أفهم الحتة دي تاني وأزبطها كوييس وأمشي للامتحان الجاي، ح أشوف الجزئية العندي معاها مشكلة وآخد الموضوع معاها بشكل شخصي عديييل
وأواصل الحل وأنا خاتي في الاعتبار النقاط اللي اتكلمنا عنها في البوست👆🏻، وبعدها أمشي لباقي نقاط ضعفي وأواصل بنفس الطريقة.

وأخيرًا ربنا يسدد خطاكم وينير بصيرتكم ويعينكم
ونسمع عنّكم كل خير
حفِظ الله البلاد والعباد♡..
والسلام عليكم ورحمة الله وبركاته

#سلسلة_المواد

السلام عليكم الممتحَنون الكِرام، أسعد الله أوقاتكم ووفقكم لكل خيرٍ.
في المنشور دا حأذكر بعض النقاط المهمة في دراسة مادة الكيمياء -خاصة وقد يستفاد منها في باقي المواد عمومًا - فبعون الله أقول:
- مراجعة دليل الامتحانات عشان الطالب يكوّن فكرة عن شكل الامتحان والحاجات البركّزوا عليها.
- ممكن نقول في أي مادة الطالب براعي الحاجات المتعلقة بقرايته ذاتها، والحاجات المتعلقة بالامتحان (بحب أمثل ليها، أنه المتعلقة بالقراية بتشبه الذخيرة، والمتعلقة بالامتحان بتشبه السلاح والقدرة على استعماله).
- في الحاجات بتاعت القراية، الخلاصة أنه هنا الطالب يحفظ حفظ كويس بصورة يقدر يسترجعها في أي وقت (= والمقصود هنا الحد الأدنى الي هو أسماء المركبات في العضوية والكيفي والقوانين الفي باقي الوحدات)، ومن الحاجات المعينة في دا -وكنت بستخدمها بشدة- المذاكرة بالكتابة ومنها الخرائط الذهنية والتشجيرات وكدا.
- المتعلق بالامتحان إما نقول من حيث الأسئلة، وهنا الطالب يحاول يكتب معادلات ويحل مسائل بقدر ما يستطيع عشان يدك تسلك، والفكرة بتاعت (بجيها راجع) ما يقفل عليها شديد (امتحانّا بتاع ٢٠٢٢ أغلبه كان مسائل فالرجعة كانت صعبة لكتير من الناس)، من جهة تانية جوّ الامتحان ذاته، بأنه الطالب يحل امتحان كيمياء بطريقة بتحاكي حق الشهادة، لأنه امتحان الكيمياء الحاجات الصعبة فيه ما كتيرة، لكن عشان هو كتير عامل الزمن فيه مهم شديد.
ختامًا: بالنسبة لأكثركم الكلام السابق يمكن من قبيل البديهيات، فهنا برجع للعامل النفسي للطالب والاستعانة بالله على المطلوب دا، والله بكل جميل كفيل وهو حسبنا ونعم الوكيل.

#سلسلة_المواد

في طريقنا نحو تمهيد الطريق ليكم أنكم تكونو دعامات المستقبل 😋

عارفين إنكم في حالة نزوح وإضطراب وقلل🌚

ح اقرأ من وين وأنا كل كتبي خليتها في الخرطوم ....

ح اقرأ من وين وأنا كطالب في الولايات الآمنة جايط وما فاهم وحولي ناس كتير وتشتت أكثر 😫

علا عبد الله سليمان كانت أمل لغيرها وساعدت الحوليها بقدر قدرتها وأكتر

ونحنا كمان قررنا نعمل كده 🥹

اها وأنتو لسه ما قررتو 😉

عموما عندنا ورشة تحت عنوان كن أملاً لغيرك
ح تقدمها من كانت الإضاءة والنور لغيرها
إذا حابين تستفيدو وتفهمو وتكون نور وأمل 😌☝🏼


احضرو الورشة يوم 31 أكتوبر الساعة 8 مساء بتوقيت سوداننا الحبيب❤️ على قناة جرعة أمل على التليجرام
https://t.me/Gor3atAmal


منتظرنكم عشان كلنا نكون أملاً للآخرين😉

المحفزات خارجية ام داخلية ؟! 😩

هل المحفزات دائمة ولا لا 😔

أحفز نفسي كيف واعمل شنو 😩☝🏼


وعشان كده عملنا ورشة تحفيز الذات🥳

وما بس كده معاها معلومات عن كيف تحدد أهدافك الشخصية وإدارة الوقت بفعالية 😉


ح تقدم لينا الورشة دي د.لجين أبو القاسم 🫴🏻
• طالبة طب جامعة الخرطوم
• مقدمة بودكاست ومدرب تطوير
• أول وأصغر باحثة سودانية بمجلة AAIC العالمية
• حائزة على جائزة قمم للمتميزين والمؤثرين والمبتكرين من رواد المجالات الطبية بالسودان للعام 2024.
وحاجات تانية كتير اللهم بارك 🔥🔥

ف إنتظرونا يوم 30 اكتوبر الساعة 8 مساء بتوقيت سوداننا الحبيب على قناة مبادرة جرعة أمل على التليجرام
https://t.me/Gor3atAmal

اشعلو الدنيا حماس وانتظرونا 🔥🔥☝🏼

بداية صباح آخر، أمل جديد، رحلة جديدة.. ❤️

استشعر نعمة التيسير، امتلاء روحك وقلبك ببركة الصباح، الراحة والطمأنينة، قدرتك على الإستمرار وتطوير نفسك..

واثقين انو في صباح من الصباحات القادمة - بإذن الله تعالى - ح تشرق عليك شمس اليوم اللي ح تقول فيه يارب انا رضيت حتى امتلأت بالرضا، يارب لك الحمد والشكر على هذا الجبر والحب، هذا العطاء واللّطف الخفي، حمدًا لله اني ما وقفت وقتها..

لحدي ما يجي صباحك المنشود..
ها هو يومٌ جديد وانت مُحاط بالحُب وغارق في النعم.. رايك شنو نملاه إنجازات عظيمة ونجدد العزم تاني؟ ♡

#top100students

اللايف اتأجل
حيكون بكرة 29 أكتوبر على نفس المواعيد

هل بقدرها اجيبها من أول مرة 🌚

ولا إلا أعيد🤔

طيب هل ممكن من المرة الأولى تكون نسبتي عالية ولالا 🧐

عشان كل الاسئلة دي واكتر عملنا ليكم الورشة المناسبة ليها 😉

تعالو لينا الساعة 7:30مساء يوم 28 اكتوبر على قناة جرعة أمل على التليجرام
https://t.me/Gor3atAmal


عشان أسامة احمد مصباح
أول الشهادة السودانية 2021
يورينا هو عمل شنو وكيف قدر يجيب 97.1% من أول مرة 😌☝🏼

ع فكرة أسامة حالياً بقرأ الجميلة المستحيلة 🤯

فأنتظرونا لأننا محضّرين ليكم رهاااابة 🥁🥁🥁🔥🔥

السلام عليكم ورحمة الله وبركاته

مواصلين معاكم يا شباب في #سلسلة_المواد والمرة دي البوست ح يكون عن مادة اللغة العربية🍃

عموماً اللغة العربية من المواد السهل جداً إنك تجيب فيها درجة عالية لأنه امتحانها معظم أجزاءه مباشرة و ما فيها صعوبة. نبدأ نتكلم عن الفروع فرع فرع:

المطالعة و الأدب:
الأدب هو البرفع درجتك في العربي، بعتمد على إنك تحفظ قصائد الحفظ لأنه درجات الحفظ ٨ درجات ما مفروض تفقد منها ولا ربع درجة.
قصائد الشرح مهمة جداً جداً و عندها النصيب الأكبر من درجات الأدب، تمسك القصيدة بيت بيت تشوف كل بيت الأسئلة الفيه شنو و معاني الكلمات و برضو ضروري تعرف الألوان البلاغية الفيه كلها لأنه بتتسأل منها.
برضو القراءة الصامتة تركز إنك ما تفقد فيها ولا ربع درجة، غالباً بكون في سؤال أجب عن الآتي باختصار و ده بعتمد على إنك تقرأ القطعة و تفهمها كويس، برضو بيسألوا من معاني بعض الكلمات، و عندهم سؤال مشهور جداً إنه بسألوا من الموقع الإعرابي لجملة معينة.

القواعد:
القواعد سلسة جداً و ممتعة، بتعتمد على إنك تفهم القاعدة كويس جداً و تشوف الأمثلة و التدريبات عشان تعرف تتعامل مع مختلف الحالات.

البلاغة و التعبير:
البلاغة جميلة جداً والله، أنا بشوفها بتعتمد على حاجتين أساسيتين: أولاً إنك تتذوق المعاني يعني لما تجي تحل ما تستعجل لازم تفهم البيت أول حتى لو هو غريب عليك حاول تشوف الكلمات الانت عارف معناها في البيت بعدها المعنى بوضح لك.
ثانياً في حاجة أنا بسميها إستراتيجية الحل فهمها إنه أنا ما عارفة كل الإجابات بس الإجابات الما عارفاها بقدر أجيبها، مثال أوضح به: مرة في إمتحان من إمتحانات المدرسة بتذكر جابوا لينا ٤ أبيات صعبة جداً حتى قرايتها كانت صعبة بالنسبة لينا، قالوا نطلع منها ألوان البيان الأربعة فأنا عملت الآتي: التشبيه أوضح الألوان أفتش عليه و فعلاً لقيت بيت فيه كاف التشبيه، الإستعارة و المجاز المرسل الإتنين تعريفهم إنهم لفظ لفظ بس بختلفوا في العلاقة فالخط حيكون تحت كلمة واحدة و فعلاً لقيت كلمتين كل واحدة تحتها خط و قدرت أشوف علاقة المشابهة وين فدي استعارة و التانية مجاز مرسل، الأخيرة براها طلعت كناية.
التعبير لازم تركز إنك بالكتير تنقص درجة أو درجتين، محتاج إنك تخلي خطك واضح و نظيف و تختار الموضوع البتقدر تتكلم فيه كويس و لازم ما يكون موضوع قصير و الأفكار تكون مترابطة و الفقرات مقسمة بطريقة حلوة و تهتم بعلامات الترقيم كده انت ما قصرت.

✍🏻: مأوى بشرى
#سلسلة_المواد

Live stream finished (2 hours)

00:00 ما يخص حل الامتحانات مع فاطمة كرار
16:15 كيف أعرف روحي ماشي صاح؟ كيف أقيّم قرايتي؟ مع إسراء فضل السيد
35:28 هل في جدول محدد؟
43:01 النسبة الكبيرة سببها الاجتهاد الشخصي ولا العوامل الخارجية زي المدرسة؟
50:45 القراية أونلاين وموضوع التلفون

00:00 المقدمة
06:25 هل في زمن؟ تجربة تبيان أحمد مع الإنجاز في الفترة الأخيرة من السنة
24:06 كيف نحدد الأولويات في المواد مع مأوى
31:03 النوم
34:32 مصادر للقراية مع أمنية محمد موسى

Live stream started

Live stream finished (1 hour)

Live stream started

Live stream scheduled for Oct 26 at 18:00

صندوق الأسئلة والتعليقات:

3 دقائق 🔥

ما تنسوا موعدنا الليلة الساعة 8 مساءً بتوقيت السودان 🔥
كلموا أصحابكم الممتحنين معاكم عشان ما يفوتهم اللايف

صباح المسرّات والبركات ❤️

ما زال الحلم في قلبك موجود.. عارف كيف ؟؟
لأنك بتحاول تسعى وتسعى، لأنك بتفكّر كيف تصل في زمن كُثرت فيه موانع الوصول، وببساطة لأنك لسه بتتنفس، لسه واثقين فيك ما دمتَ تحاول..

الكتب والمريحات القاعدة قدامك ومنتظراك.. بكرة ح تصنع منها فرحة والله لن تنساها طول الدّهر، لذا تذكّر واستحضر في قلبك قول الله تعالى " فَإِنَّكَ بِأَعيُنِنا " وكمّل..
كمّل إلى أن نراك قد بلغت قصدك ولا تقنع بما دون النجوم ..

#top100students

السلام عليكم ورحمة الله وبركاته

كيفكم يا أبطال عساكم طيبين والدراسة ماشة معاكم كوييس❤️
جيناكم باللايف المنتظر🔥

أقلّ ما يقال عن الفترة الحالية دي أنها "سباق مع الزمن"
وبناءً على ذلك كان دا عنوان لايفنا المرة دي

باقي شهرين!! هل الزمن ح يكفي؟
هل في طريقة تضغط فيها نفسك شوية وتجيب نسبة عالية؟
كيف استغل الفترة دي؟ كيف استعد للامتحانات؟
وغيرها من الأسئلة الكتيرة المتبادرة لذهنكم حاليًّا

ح تلقى إجابات ليهم كلهم ومن ناس مرّوا بالتجربة دي شخصيًّا ✨
بالإضافة لكمية من النصائح والإلهام للثبات ولتهدأ نفوسكم🍃

يعني حيكون لايف في مستوى تاني خاالص
عارفين لييه؟
لأنو المتحدثين فيه هم أكتر ناس فاهمين وضعكم، ناس قرروا يستثمروا الفترة الأخيرة من السنة بالشكل الصحيح وكانت النتيجة بأنهم كانوا من الأوائل للعام 2022

معاانا ومعاكم 🥁
أمنية محمد
تبيان أحمد
فاطمة كرار
مأوى بشرى
إسراء فضل السيد

جهّزوا ليهم أسئلتكم وما تخلّوا اللايف يفوتكم🔥

📍نلتقيكم في قناة الطلاب المئة الأوائل على التليجرام
https://t.me/top100students

📅 يوم السبت الموافق 26/أكتوبر

⏰ الثامنة مساءً بتوقيت السودان

الضغط النفسي مع الحرب كان عظيم صح 👀

لا وكمان حالياً ضغط نفسي حق حرب وضغط نفسي حق الشهادة السودانية 😫

عتبة الوصول بين حياتين منفصلات تماماً ومتشابهات جداً 🌚

نحل الموضوع ده كيف 🤔

عملنا ليكم ورشة هدفها التقليل من الأثر النفسي للحرب 😇

ح يقدمها لينا الأستاذ المبدع
أ. المقداد بشير بابكر🔥

- مدرّس ومشرف عام بمدارس التأصيل والقبس
- ماجستير علوم الأحياء - جامعة الخرطوم
- عضو الهيئة الإستشارية لمبادرة طلاب المجالات الطبية
- باحث في مجال علم النفس وتطوير السلوك البشري
- مدير مكتب هندسة النفس سابقاً وعضو شرفي بـMSI


اللقاء حيكون بعنوان 🥁
نصائح وتوجيهات لطلاب الشهادة السودانية


اتذكروا إنكم جيل المستقبل مستلم الراية ومطور البلاد بعد إنتهاء الحرب 😌☝🏼

نحنا معتمدين عليكم وأنتو اعتمدو علينا وخلونا نقلل ليكم من الأثر النفسي الأنتو فيهو 🫴🏻

الورشة ح تكون يوم الخميس الموافق 24 اكتوبر الساعة 8 مساء بتوقيت السودان على قناة جرعة أمل على التليجرام
https://t.me/Gor3atAmal


منتظرنكم تكونوا معانا ونكون معاكم ونمهد الطريق لمستقبل انتو اساسو😌🔥

آل قمم الرائعين ✨

😂طبعًا زي ما وعدناكم إنو الفترة الجاية دي حتكون مليئة بالمفاجآت الظابطة.

- حبّينا نبدأ برنامجنا الأوّل من سلسلة البرامج التوجيهية «اسأل قمم»
وهو مبادرة مقدّمة من المئة الأوائل على مستوى السودان
أول سيشن حيكون مع أوّل الشهادة السودانية للعام 2021
أسامة أحمد المصباح

- أسامة حيكون معانا عشان يجاوب على كلّ أسئلتكم ويديكم نصائح مفيدة تعينكم بإذن الله في الفترة المتبقّية دي.

😂ما محتاجين نوصف ليكم حجم الفائدة الممكن نطلع بيها من السيشن دا؛ اضبطوا منبّهاتكم وجهّزوا أسئلتكم وكلّموا أصحابكم وخلّيكم قراب.

يلّا عايزين حماس، حضّروا أسئلتكم وأكتبوها في التعليقات وأسامة حيجاوب عليها كلها بإذن الله.🔥🔥


📎📱https://t.me/gimam22

السلام عليكم ورحمة الله وبركاته..
كيفكم يا أوائلنا عساكم بخير وعافية 🤍

طوّلنا منكم شويية، بس دا عشان جهّزنا ليكم #سلسلة_المواد
بحيث نديكم نصائح تساعدكم في قراية كل مادة، فما تخلوها تفوتكم 💯

ونبدأ بمادة التربية الإسلامية، صراحةً كلنا عارفين أنها من المواد الممكن تتقفّل ومن المواد البترفع نسبتك، بجانب أنها ما محتاجة مجهود وتركيز عالي غير اهتمام وعناية كويسة بس..

كذلك فيها مواضيع منوّعة وجميلة بدايةً بالتجويد وسورة النور والآيات المختارة وفيها علم الميراث مرورًا بالأحكام الفقهية ثم التوحيد..

عمومًا كدا كل جزء من ديل الكتاب غطّاه بشكللل حلوو عدييل ويعني كتاب الإسلامية لوحده يُعتبر كنز فحاول تركّز عليه أكتر وأكتر..
طيب كيف أقدر أستفيد من الكتاب استفادة قصوى؟ ؟
ببساطة لما تجي تذاكر درس جديد جرّب أنك تدخل المذاكرة بعقلية واضع امتحان😂
يعني مر على الدرس بشكل كامل كدا عالسريع عشان تفهم محتواه والمرة التانية حاول أنك تعمل خطوط على النقاط المهمة وهناا بيجي الفارق.. أيي معلومة بتحس أنها ممكن تنفع كسؤال اعمل تحتها خط أو اكتبها في ورقة بشكل السؤال المعيّن..

يعني اتونس مع نفسك وقول اوكيي دي ممكن تجي في أكمل ودي ممكن تجي في علل - غالبا بكون في كلمة بسبب أو لأن وهكذا - وقس على ذلك في كل الأسئلة المعروفة وح تلقى أنو الدرس بقى أسهل..
وبعدين لما تجي تراجع الدرس ارجع للأسئلة الطلعتها أول ودي ح تفيدك شديدد في موضوع المراجعة السريعة لانو انت بحاجة للوقت سواء حاليا أو في الأيام قبيل الامتحان 😂🤍..

طبعاا كتابي كان كلووو شخبطة وخطوط بالرصاص ويعني مبالغة عديل🤣

بالنسبة للجانب الأول حاول أنك تركّز في ال16 مقطع من سورة النور على الضبط بالشكل لأنو مرات بتجي في ضع دائرة وانت تختار الضبط الصحيح للكلمات وكذلك ركّز على أواخر الآيات لأنو في كلمات كتيرة بتتشابه، ويعنيي مرات كتيرة بيتكرر سؤال أنو سورة النور فيها كم آية وهكذا.. ويعني هنا الموضوع أشبه بدرجات مجانية ما تفوّتها
بالنسبة لشرح كل مقطع ركّز على أسباب النزول والأسماء المذكورة في كل مقطع وفي الكتاب عموما وحاول اكتب الأسماء دي في ورقة منفصلة وراجعها كل فترة لأنو ح تساعدك في سؤال من القائل أو فيمن نزلت الآية أو في القائمة وبإذن الله ما ح تمرق من الاسماء الطلعتها..🤍
في باقي شرح المقاطع في نقاط كثيرة وأسئلة كثيرة ممكن تطلعها بس ركّز وح تقدر تتعوّد على الطريقة بإذن الله..


بالنسبة للآيات المختارة وجانب المواريث الأمر لا يختلف كثيرًا، يعني بل وربّما أسهل بكتير كمان ونفس طريقة التلخيص والحفظ ممكن تتكرر هنا.. بالنسبة للميراث ببساطة حاول احفظ نصيب كل جهة وفرد من الكتاب أو ملخص المدرسة وبعد تتأكد من إتقان النقطة دي ببساطة حل مسائل مواريث كتيرة ونوّع في الأسئلة وهنا واحدة من النقاط الممكن تفيدك أنك تجيب امتحانات سواء ولائية أو امتحانات شهادة وتركّز على جانب المواريث في كل امتحان وتجاوب كل الأسئلة المذكورة فيه وكدا بتكون غطيت جزء كبير من درجات الإمتحان بإذن الله..

التربية الإسلامية فيها معلومات كتيرة متشابهة ومترابطة مع بعض ويعني لو تركتها لفترة وما راجعتها ربّما تسبب ليك مشكلة لا قدّر الله فحاول أديها وقتها ولو نص ساعة أو ساعة يوميا...كذلك حاول استفيد من ساعات الصباح في مراجعة المادة وما تنسى وانت بتصلي اقرا بسورة النور عشان تثبّت الحفظ وتتقن الكلمات.. 🤍
امتحان الشهادة بيجي كالعادة ساهل بإذن الله بس بيحتاج تركيز وحتى لو جا سؤال خارجي وصعب كدا بكون درجة أو درجتين فاا ممكن تجازفو وانت بداخل الجلسة يعني الموضوع في السليم 😂🤍
وبإذن الله الامتحان أحلى مما تتوقّع يا عزيزي.. توكّل على الله وسل الله التوفيق والسداد وقم اكسب المية الدرجة..

#سلسلة_المواد

هل أنت بتفكر في ح يحصل شنو لو ما نجحت👀

طيب هل كل العادو أحرزو النجاح المطلوب 🤔
هل الإعادة دي فرصة تانية ولا لا 😫

هل ممكن تفادي الإعادة ولا دي ضرورة وإلا من جل منها هو الما بعيد 😤

طيب الحل شنو 🧐☝🏼

جبنا ليكم تالية إبراهيم خليفة🔥

بطلة تحدي القراءة العربي الموسم السادس
طالبة طب تحدت الإعادة وصنعت المجد ☝🏼
ح تتكلم ليكم في الورشة دي عن تجربتها وكل التفاصيل الممكن تتساءلو عنها😋✨

إنتظرونا يوم 22 أكتوبر الساعة 8 مساء على قناتنا على التليجرام :
https://t.me/Gor3atAmal

وورونا اسئلتكم في التعليقات وتساؤلاتكم ونحنا ح نرد عليها فى الورشة ✍🏻

هل أنت مضغوط نفسياً 🤔

هل بتسأل نفسك دائماً الحل شنو وأعمل شنو وعايش في حالة من القلق المستمر المتواصل 🤔

دكتورة معارج عبد العاطف🔥

إخصائية في العلاج النفسي 😋 وحاصلة على شهادة في البرمجة اللغوية العصبية 🤩
والأهم حاصلة على شهادة في مهارات
الدعم النفسي والإجتماعي 😌

ح تكون معانا في ورشة التعامل مع الضغط النفسي👀


منتظركم في يوم 20 أكتوبر الساعة 8 م واشعلو الحماس 🔥🔥🔥على قناة جرعة أمل لطلاب الشهادة بالتليجرام

https://t.me/Gor3atAmal

نجي لآخر خطوتين 👀
عارفة كترتها ليك لكن عشان بحب ليك الخير وفاهمة الجوطة الإنت ماري بيها (باختصار لأني مُمتَحَنة معاك🙆‍♀)
7⃣   استخير، قبل ما تعمل أي خطوة تجاه جدولك، حصصك، التدريبات الجماعية، عشان إنت بنسبة كبيرة في اللحظات دي بيسوقك انفعال "يلا ننجز" وقد تاخد قرارات خاطئة وما وقتها، مهما كنت قوي عاطفياً وفكرياً صدقني إنت ما أقوى من القوي القادر فإنت في حاجة ماسّه للاستخارة وربنا بحب العبد اللحوح♡، في عز بُعدك عن ختم المنهج جهلك لمعلومات كتيرة و وجَلَك وخوفك ادعُ ربك يلهمك الأجوبة ويوفقك ويكتب ليك التسعينات "لو شاء بكتبها ليك على فكرة ربك كريييم ♡"
  ( أَمَّنْ يُجِيبُ الْـمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ أَءِلَهٌ مَعَ اللهِ قَلِيلًا مَا تَذَكَّرُونَ)، إنت خليفة على الأرض يا بني آدم ربنا حيُعجزه يكتب ليك مُعدل سمح؟! إنت ادعُ وسيبها عليه ♡

      8⃣ ابدأ وما تعاين ورا تاني، خليك حاسم ده مستقبلك أجِّل الفارغ والممكن يتأجل كلو، خليك متذكر كويس آيات سورة النجم:
• ( وَأَنْ لَيْسَ لِلْإِنْسَانِ إِلَّا مَا سَعَى) جهدك هو الحيحدد إنت حتكون وين اتلحلح وحاول أوعاك تيأس وإنت قربت للنهاية العبرة بالخواتيم، ناس كتيرة بدت متأخر لكن قدرت تصنع المستحيل!.
•(وَأَنَّ سَعْيَهُ سَوْفَ يُرَى) حتشوف نجاحك "أو فشلك" حيشوفوه أهلك وأصحابك ومعارفك ومعلميك والأهم ربك القادر على كل شيء والملائكة الكُنت بتدعي لنفسك ولأخوانك الممتحنين وهم سامعينك وبرددوا وراك آمين في ساعات الإستجابة وإلحاحك وانكسارك لله، نفسك التعبت وعانت من بداية السنة دي ما نفسك تخليها تفرح وتخفف تعبها؟!
•( ثُمَّ يُجْزَاهُ الْجَزَاءَ الْأَوْفَى) الله!!♡ ما جزاء ساي لأ،.. جزاء أوفى يعني مافي بعده جزاء♡♡♡
حاجة في المنتهى من الجزاء♡، بالله ما نفسك في آخر أيام تجتهد وتُجزى الجزاء الأوفى؟! ♡

☆ وفي ختام المقال
يا طالب، الحياة زي ما شفتها في الحرب، ما بتستحمل جهل أو استسلام أو تضييع فُرص، نحن محتاجين لكل معلومة بتنقذنا، وبترفعنا وبتغيِّر  حالنا، نجاحك في يدك وإنت أدرى بحالك، لو عايز تكون في مكان أفضل، شد حيلك وحاول عشانك لآخر مرة، قد تكون دي المرة الفاصلة!، صدقني قد تكون دي المرحلة الفيها معجزة السنة الأجمل في حياتك واللي ربنا كاتب ليك بنجاحك فيها أيام مليانة عوض لكل المريت بيه من معاناة ♡.
بتمنى ليك صحة نفسية أحسن وأيام تصبح فيها أفضل وأقرب لربك ومُطمئِن سليم القلب وراسيَ النفس ♡، نتلاقى في الجبر العظيم♡.

-النص والأجزاء السابقة بقلم :
#علا_عبدالله.
أحد طلّاب دفعة التحدّي العالقة..

تعالوا نكمل في الجد 👀 🔎:

5⃣ نضع جدول مُريح "لأنك لو ما قريت بجدول يناسب طاقة مخك و إستيعابك حتهلك" وكل زول بيقدر يقدِّر 'مريح' بالنسبة ليو يعني كم ساعة في اليوم وكم يوم في الأسبوع، والأهم نضع الجدول بحساب نص ل ٣ أرباع قدام امتحان الشهادة، يعني لو الإمتحان إتحدد بعد شهر إنت تحدد جدولك يخلص قبل إسبوع لِ إسبوعين قبل الموعد، ده ما عشان إنت بالجد تخلص قبل الموعد لا عشان ده الواقع ودي الحياة، خت زمن إحتياط ولو خلصت في الموعد يبقى جميل عندك وقت زيادة تنجز فيه أكتر ولو كمان زدت برضو كويس ما ضايقت نفسك وكنت شغال بوتيرة إنجاز ♡ وكلها أقدار في الآخر نحن بس بننفذها، وما تنسى تستشير في الجدول شخص بتثق في رأيه ونظرته وزول فاهمك وفاهم قُدرتك في الإنجاز، وفي النهاية إنت بعون الله قادر على العجب ♡.
    6⃣ عارفاك حتقول لي في زول بخلص منهج في أسبوعين!! وزول ما قاري زاتو !! في دي حقوليك خلي دراستك زكية، ما تقعد تقرأ كأنك بتقرأ لأول مرة، ركز على الملخصات، الحل الكتير ومعرفة الأجوبة النموذجية، والما فهمته بعد كده تكون محدد ليو زمن ترجع تقراه قراية خاصة عشان تستوعبه استيعاب كامل، انصحك تحضر فيديو القوانين ال٦ للإنجاز قناة دروس اونلاين YouTube ولمحتوى مبادرة كيان فيسبوك أو حتى تشوف ناس قوم امشي إقرأ بيلموا المنهج كيف قبل الإمتحان وطبق البناسبك من نصائحهم، بس اتذكر كويس، إنو | الفترة دي فترة جودة ما فترة لَمْ منهج وخلاص، كل ما قريت بتركيز وفهمت الحاصل وحليت كلما المعلومة ثبتت وقعدت مدة أطول وريحتك من التكرار ♡|.

⭕
تعلن وزارة التربية والتعليم عن تحديد موعد إمتحان الشهادة السودانية للدفع العالقة ٢٠٢٣ ..

_ يا ترى ردة فعلك لما تسمع الخبر ده حتكون شنو ؟! " شايفاك يا القلت حعمل حفلة شايفاااك👀😆"

تعال أعرض ليك شوية نصائح تفيدك جداً في الثبات وخطوات الجاهزية بعد وصول الخبر الجميل الإنت مستنيه من زمان ده :)♡ 
أهم حاجة هدوئك وتفكيرك السليم عشان ردة الفعل في اللحظة دي بتحدد حاجات كتير ♡:
           ١.  نحمد الله على إنو المستور إنكشف أخيراًننننننن:)♡
          ٢. نترك الفي يدنا ونأدي أسلوب شكر "سجدة شكر، ركعتين، تكبير" وإطمئنان بعدها " سورة الشرح، آية الكرسي وأدعي ربنا بالتيسير وانو يتمها على خير ويسدد خطاك في ما تبقى من أيام"، إتذكر إنها ما نهاية الدنيا بس دي نهاية مرحلة دراسية مُعلقة طال إنتظار نهايتها فخلي النهاية ثبات يا جبل💪
        | ركز إنو الإمتحان ورقة وأسئلة حتحل وتطلع ما تهول الموضوع لنفسك، ده امتحان وحيعدي إطمن♡، خلي كل الحوليك يشوفوا ثباتك رد على أسئلتهم "بالحمدلله" أبعد من الصُحبة الجِنها نقة وشكية عشان ده ما وقته خالص، لو عندك إنسان بتضعف قدامه " زي الوالدة أو أخوك" أظهر ضعفك ما مشكلة لكن شيل من الزول ده دفعة تواصل بيها بقوة ♡|.

      ٣. (نجي للعمل بالأسباب🔎)
في ورقة نقسمها النص نكتب في الجزء الأول الجزئيات الما درسناها ولا فاهمينها ولا حلينا عليها، وفي الجزء التاني "وبعد نخلص من كتابة الجزء الأول تماماً" نكتب الجزئيات الدرسناها ونطمن نفسنا بيها حتى لو كانت بسيطة على الأقل ما فاضي وحالنا أفضل من غيرنا ولوماعجبنا ♡

       ٤. نرتب المواد، وأبوابها، في ورقة تانية على حسب درجاتها في الإمتحان (الأبواب الدرجتها أكبر نبدأ بيها عشان نضمن استيعابنا الكامل والدرجات القصوى في الإمتحان، ونكون أقرب للنجاح بإذن الله) ومن ثم الأبواب الدرجتها أقل وبترتيب تنازلي من الغير مدروس الى المدروس (الأبواب الما حصل راجعتها أو حليت عليها لها الأولوية).
   
_ كلام مريح وحلو جداً يا عُلا ♡، لكن بس كده؟!!

= لأ طبعاً دي البداية بس الموضوع مهم شديد فكفكف كُم قميصك وفتح لي عيونك فنجانين 👁
يُتبع...

🎇 بوت جرعة أمل🎇
المكتبة الإلكترونية الأولى لطلاب الشهادة السودانية!

سلام من الله يغشاكم جميعا أينما كنتم 🤍.
أما بعد....

انت طالب شهادة سودانية وبسبب الحرب خليت كل الكتب والمذكرات وأوراق العمل وبقى ماعندك مرجع تقدر تقرأ وتتحصل على المعلومات منو ..؟!
أو انت طالب بتعاني من عدم استيعاب المقرر والصعوبة في إيجاد الملخصات والكتيبات البتسهل عليك..؟!

عشان انتو بتهمونا وعشان الأمل اصل العمل والإبداع 🍃
بنسعى دائما في جرعة أمل لتذليل الصعوبات، حلحلة المشاكل وتقديم الأفضل ليكم للتحقيق اهدافكم والوصول لأعلى المراتب...👌
بنعلن عن فتح بوت جرعة أمل الاشبه بالمكتبه الإلكترونية 🎉📢

⬜ البوت فيه كل الملفات الممكن تحتاجوها على شكل pdf للمساقين (العلمي والأدبي)سواء كانت كتب،مذكرات،امتحانات شهادة او امتحانات تجريبية.
⬜ ايضا يُسهم في مساعدة الطلاب على استيعاب المقررات الدراسية بصورة مبتكرة ومنظمة بطريقة سلسة لتسهيل الوصول والعثور عليها في اي وقت مع إمكانية التحميل.
⬜ بيحتوي على أكثر من ٧٠٠ ملف قابل للزيادة والتحديث في فترات مختلفة.

🔷 رابط البوت :-
[ https://t.me/Gorat_Amal_bot ]

#نهضة_طلاب_الشهادة_السودانية
#جرعة_أمل_من_MSI

السلام عليكم.. ❤️

عارف اكتر شخص كلماتو ممكن تأثّر عليك وتضيء فيك الشعلة من جديد!!؟
بالتأكيد هو شخص معاك في نفس الرحلة. ❤️
نصائحكم ومساعدتكم لبعض كافية إنها تسعد قلوبنا كلنا، وكافية انها تعينكم وتسهّل عليكم الرحلة كلها، لذا واصلوا مع بعض وجاوبوا اسئلة بعض .. فمَن مِنّا لا يَحتاج إلى مُعين!؟


احكوا لينا قصص جميلة ليكم مع اصحابكم خلونا نستعيد الذكريات شوية ❤️

#top100students

يووو أصدقائنا الأعزاء .. اشتقتوا لينا صاح؟🤣❤️
طيب متذكرين كلامنا الفات عن المُفاجأة ؟!
Are u ready now??? here we go 🎊🎊
- طيب على الأقل فهمونا الحاصل شنو؟
الحاصل يا شباب انو الطلاب المئة الأوائل عملوا إتفاق مع مبادرة ممتازة عشان تفيدكم وعشان نطلعكم من جو القلق دا بإنو تكسبوا زمنكم و تتعلموا حاجات تفيدكم في مستقبلكم إن شاء الله. 🙂‍↕
- طيب المبادرة دي شنو ؟
المبادرة دي يا عزيزي الطالب إسمها
Sudanese Students Educational Empowerment ( SSEE ).
والعربي البسيط التمكين التعليمي للطلاب السودانيين
ومن إسمها وضحت الغاية الأساسية ليها وهي مساعدة الطلاب السودانيين - يعني أنتوا - في تعليمهم .🥳
والناس الشغالين في المبادرة دي عندهم أهداف وخطط كتيرة عشان يحققوا هذه الغاية ..وفي المرحلة دي هدفهم يورونا كل المعلومات والتوجيهات ال ح نحتاجها عشان نصنع لينا فرص للحصول على تعليم أفضل في *مؤسسات التعليم العالي الأمريكية*😳
أيوا زي م سمعت كدا الأمريكية
ف ناس المبادرة هدفهم يورونا كل الخطوات و المعلومات للتقديم في مؤسسات التعليم العالي الأمريكية للمرحلة الجامعية.
- بس نحن أصلاً م أمتحنا؟!😟
أيوا عارفين وعشان كدا هدفهم برضو يعززوا المهارات غير الأكاديمية بين الطلاب ف إذا عرفت من هسي يا عزيزي الطالب متطلبات التقديم و بديت تشتغل عليها بدل تقعد ساي و تكون بتفكر ح تلقى إنك اختصرت على نفسك كتير و قطعت شووط جبار في الرحلة الطويلة دي .🤭🔥
- طيب ممتاز شديد لكن ح يساعدونا عن طريقكم ولا عندهم قناة ولا كيف نقدر نصل ليهم؟!🤔
كالعادة سؤالك ممتاز جداً ، أبطال مبادرتنا الحلوين عندهم قناة في اليوتيوب يقدروا يوصلوا لينا عن طريقها كل المعلومات المحتاجين ليها ح يعملوا سلسلة من خلالها ح نعرف كل تفاصيل التقديم للجامعات الأمريكية ح يبدوا معانا من التعريف بنظام أمريكا وكل أنواع الجامعات وفروقاتها ولحدي خطوات القبول و كل المتطلبات الأكاديمية والغير أكاديمية وما كدا بس و كمان ح يساعدونا بالنسبة لامتحانات اللغة والقدرات و كتابة المقالات و الأسئلة القصيرة و أهم حاجة الدعم المادي و سُبله .
في أحسن من كدا يا شباب؟😉❤️
وما تخافوا لأنهم ح يعاينوا للموضوع ويتفاعلوا معاكم بعدسة الطالب السوداني يعني دائماً ح يفهمونا الحاجات الم حصل سمعنا بيها قبل كدا و ح يحاولوا يسدوا أي ثغرة ما بين نظام التعليم بتاعنا والمعلومات ال ح نحتاج ليها في الرحلة دي .. 🤭❤️❤️
- طيب أتحمسنا شديد وح نبدأ متين؟🥳
سؤال ختامي ممتاز ح نبدأ الليلة وح ننزل ليكم لينك الفيديو التعريفي الأول بالمبادرة عشان تتعرفوا عليها من المسؤولين عنها شخصياً مش بقولوا " حلو الكلام من خشم سيده "؟🫣
لينك الفيديو: https://youtu.be/1H6PsdDvzJ4?si=21dSYH--V6aAolLD

Instagram account: @sseeinitiative

وأكيد دعمنا للمبادرة دي يعكس ليكم مدى الإستفادة ال ممكن تتحصلوا عليها عن طريقها لأنو يا عزيزي الطالب تهمنا مصلحتك في المقام الأول 👑❤️
وترقبونا إلى حين لقاء آخر قريب إن شاء الله والسلام عليكم ورحمة الله 🫡🫶🏼

يا عزيزي الطالب ممتحن الشهادة السودانية ...مالك متضايق كدا؟😔..

🎓📚: والله ياخ بفكر في كلمة " عالق " البقولوها لي دي ...أنا بقرأ وبجتهد حالياً لكن فكرة أنو مستقبلي واقف وما قادر أعمل فيه حاجة دي مؤلمة ياخ و عاملة لي إحباط كبير 😔💔

دقيقة دقيقة منو قال ما ممكن تعمل في مستقبلك حاجة لو ما أمتحنت الشهادة؟؟ أنت مش كان قلت لي عندك رغبة تقرأ برا؟؟وعلى وجه التحديد في أمريكا ؟؟

🎓📚: أي والله التعليم في أمريكا على مستوى متقدم و مدعوم في مختلف المجالات ...لكن الكلام دا لسه بعيد كدي نمتحن و نمسك شهادتي أول🥲

هو أي بعيد لكن مفروض تجهز ليه من بدري... يا زول هو اللوتري بتاع الحظ والحظوظ الناس بتجهز ليه من شهر وشهرين لمن التقديم للقراية عديل...وبعدين أنت لو فاكر أنو تجيب نسبة كبيرة في امتحان الشهادة دا أهم شيء عشان يقبلوك...تكون غلطان شديد على فكرة ...محتاج تعرف المناهج ومتطلبات الجامعات المختلفة و طرق التقديم و دي كلها حاجات ممكن تجهز ليها من هسي و تخليك تقلل شوية من تركيزك و توترك من موضوع الإمتحانات اللسه ما معروف مصيرها بتين ...

🎓📚: والله كلامك دا كلو صاح.... ياخ أنا عدت المقرر ٣ مرات عديل و عاوز حاجة تشغلني شوية من الإحباط الجواي و أعمل حاجات تفيدني في مستقبلي و تحررني من فكرة " عالق "دي ...لكن كمان بيني وبينك الموضوع دا كبير ياخ ...هسي زاتو هو أنا بتعليمي ومنهجي المتواضع ...البساهر عشانه الليالي 🙃 عندي طريقة أتنافس و أقرأ بعدين مع أولاد الأمريكان ديل؟؟!🥲

أيوة معاك حق هم أتوفرت ليهم بيئة كويسة وتعليم بمستوى عالي كمان.... لكن الموضوع ما بعتمد على الحاجات دي على قدر ما بعتمد على عزيمتك و اجتهادك الشخصي و بعدين عندنا طلاب كتار أتقبلوا و حققوا نجاح مبهر زي بتنا و دكتورتنا مروة بابكر...

🎓📚: سمعت بيها كانت طالبة عادية هنا في السودان لكن سافرت أمريكا و جات الأولى على الدفعة 🔥

اها طيب دا مثال كبير نحنّا السودانيين محل نمشي بنتألق و ننافس ناس البلد زاتهم✋️

🎓📚: والله صحي 👏 طيب خلاص أنا أقتنعت داير أستفيد من زمني و أعرف أكتر عن موضوع التقديم لأمريكا دا عسى و لعل لمن الزمن داك يجي أكون جاهز و عارف أعمل شنو 🔥🔥...لكن هسي أبدأ من وين ؟؟

أيوااا وهنا يا عزيزي الطالب حابي أقول ليك إنّنا مجهزين ليك مفاجأة كبيرة بالخصوص دا 🤩🤩 كل العليك تعمل لايك وشير لزملائك و أي زول عنده إهتمام بموضوع التقديم للدراسة في أمريكا حتى لو كان طالب جامعي ...وأنتظروا مفاجأتنا بحماس في البوست الجاي 🔥🔥
دمتم في أمان الله 🩵

#GetReadyToStudyInUSA

محبط عشان الامتحانات لسه ما محددة؟
شايف مستقبلك واقف وما في حاجة تعملها حالياً عشان تزيد فرصة أنه يكون ناجح و مزدهر؟
إمتحانات الشهادة بالنسبة ليك هي الحاجة الوحيدة البتحدد نوعية حياتك الجامعية و التخصص ؟؟

لو أنت كدا عندنا ليك كلام حيغير رأيك ويبسطك شديد و يخلصك من الإحباط دا

أنتظروا البوست الجاي خلال اليوم دا🔥🔥🔥
و ياريت تكتروا الشير عشان الموضوع الجاي دا فيه فرصة لأي طالب سوداني ثانوي أو حتى جامعي عشان يغير مستقبله الدراسي📚🎓

السلام عليكم ورحمة الله وبركاته.

حبايبنا أبطال دفعة التحدّي عساكم بخير وعافية 🍃

تخيّل عزيزي القارئ انك في يوم راايق مع جو خريفي وقاعد في الحوش وسط ريحة الدعاش وماسك كتابك بتراجع بروااقة وبتشرب في كباية شاي ويعني قمممة الروقان..

فجأة يجيك إشعار من صفحة المئة الأوائل انو عندهم مفاجأه ليك 😂🤍

عشان الشاي ما يبرد جيناكم بفكرة بوستات جديدة والتي نأمل وبإذن الله أن يُنتفع بها ألا وهي :
بوستات " سألنا التوب" وهنا ح نسأل المية سؤال واحد ونعرض ليكم اجوبتهم سواء في بوست واحد أو أكثر واعتبروها نصائح من اخوانكم البحبوكم شديد.
والفكرة التانية نتحفّظ عليها في مكان بارد هسه بس أيام وتظهر بإذن الله 🤭🤍

مع الجو الرايق دا رايكم شنو نبدا بأول سؤال سألناه للتوب!!
وقد كان " النصيحة أو المعلومة الممكن تقدمها للطلاب الممتحنين في الوضع الحالي ح تكون شنو؟"
إليكم بعض الأجوبة لانها كتيرة صراحة ♡ :


○إستعن بالله ولاتعجز، واتذكر ان كل شيء بيحصل هو ابتلاء من ربنا. حاول إنك تتأقلم وما تقيف في محلك، واتذكر ان كل شيء حيبقى ذكريات بإذن الله تعالى، وأهم أهم أهم حاجة انك تدعو ربنا كتييييييييييير وتُخلِص وتتضرّع في الدعاء، ولازم تُحسن الظن في ربنا لأنو كل شيء مقدّر ومكتوب وانت ماعليك إلا السعي، فشد حيلك وادعو ربنا وانطلق وفقك الله.

○دايمًا خت ثقتك في ربنا أكبر من ثقتك في نفسك و قدراتك.
ما تعمل العليك أعمل الفوق طاقتك إذا أمكن، و خليك متيقّن انو ربنا ما بضيع تعب زول واثق في قدرة ربنا. ما تربط تجربتك و نجاحك بزول لانو كل واحد فينا ظروفو و تفكيرو وقدرتو وطموحو وأحلامو مختلفة، اخد النصايح وشيل منها الحاجات البتنفع معاك، وشكّل خطتك الخاصة بيك المصممة عشانك انت بس، وخليك دايمًا راضي انو الحاجة الح تحصل في نهاية الطريق هي المقسوم ليك فيها الخير.

○ركّزوا على هدفكم و ما تشغلوا نفسكم إلا بالحاجة المفيدة، ما تنسوا الجانب الديني قراءة ورد القرآن الكريم حتى و لو آية، وممكن تقروا سورة يس قبل ما تبدوا دراسة وتقروها بي نيّة التوفيق أو الحاجة الإنتو عايزنها.
أهم حاجة تجتهدوا و تتركوا التسويف، واتذكروا انو ربنا سبحانه وتعالى ما حيضيّع تعبكم.

○أتعاونوا، شجّعوا بعض، أبعدوا من الناس السلبية وما عندها رغبة تنجز وتحقق أهدافها... قللوا من التواصل الاجتماعي في الواقع والمواقع؛ لأنو الفترة دي الفارغة كتيرة في المكانين، أستمتعوا و أنتوا بتتحدوا المستحيلات دي وكلكم يقين أنو ربنا معاكم و شايفكم و ما حيضيّع جهودكم.

○الإستمرارية.. ما تقطعوا الدراسه تمامًا، خلو كل يوم عندكم ساعات أو حتى جزئيات من ماده مقرره عليكم دراستها، وخلوا الأولويّة للمواد اللي محتاجه منكم قراءه اكتر ... وما تظلموا ماده على حساب التانيه ... ما تقللوا ثقتكم بربنا أولا ثم ثقتكم بنفسكم ... أعملوا كل اللي بتقدروا عليه و ربنا حيجازيكم على كل تعبكم.

○إيّاكم والإحباط إيّاكم والإحباط إيّاكم والإحباط🤭

شكلوا كدا الأجوبة ح تحتاج جزء ثاني..

ما تنسوا تكتبوا لينا الأسئلة العايزين نسألها للمية في التعليقات وترقّبونا يا حبايبنا وربنا يوفقكم ويسهّل أمركم ويحفظ البلاد والعباد 🤍🍃

في أمان الله وحفظه.

تسجيل اللايف الثالث ❤️

نأسف شديد لو ساهرنا بيكم 😂❤️
ونتمنى انو النقاط تكون وضحت وقدرنا نوصّل الأفكار بوضوح وشاكرين لوجودكم وتعليقاتكم يا أبطال التحدّي...

لو في سؤال ما تم ذكره في البث ممكن ترسلوا في التعليقات أو في الخاص في كل القنوات..
أعانَكم الله ووفّقكم وأصلح حال البلاد والعباد يارب..
ترقبوناا في لايفات وأفكار في الأيام القرييبة الجاية بإذن الله تعالى❤️


#top100students