فَكِّرْ

هذا اني
اذا جنت سعيد وياك راح أحسسك شكد مهم عندي، واذا جنت ضايج ومكسور خاطري منك راح أحسسك شكد وجودك ماله داعي بحياتي،
هذا اني
اذا أفتهمتني زين راح تكسبني طول العمر، وإذا ما فتهمتني راح تعاني بكل دقيقة وياي
هذا اني
الكلمة مني صعبة تطلع، بس اذا طلعت تكون حقيقية مية بالمية وعهد على ذمتي دائمًا.
اذا شفتني أحبك وأقدرك وما شفتك أحترمت هالشي، راح تشوف مني وجه ثاني ثنينه ننصدم بي
وإذا قدرتني أردها الك بألف إبتسامة
ممكن تحس يمي أنّك أهم بشر بحياتي، وبعد ثانيه اخرى تحس أنك لاشيء، افعالك تحدد مكانتك عندي

هذا اني
ما طلبت شي من أحد، وأحب الزوار خفيفي الظل مهما كانوا قريبين مني
ولدت وحيد بهدوء وأغادر وحيد بهدوء
وما أحتاج أحد.

وكلكم عيوني.

برأيي - أن المُثقف الحقيقي - الذي أشعر بأنَهُ وصلَ ما وصلَ إليهِ من الفَلسفة الحياتية والدينية والروحيّة وتغلغل في أزقة العلمِ والمعرفة - هو الشخص الذي قَرأ بتمّعن جميع ما كتبوه أحفاد نبيّ الله محمد صلّ الله عليهِ وآلهِ وسَّلم، وهم الأئمة الأثنا عشر عليهم السلام، يترأسهم في المقدمة إمام البلاغة ومنشأها، عليّ بن ابي طالب عليهِ السَلام، فإنهم لَم يتركوا كبيرةً وصغيرةً في شتى علوم الحياة إلا واستبقوا العلماء في كتابتها، فعلمهم الواسع وفلسفتهم العميقة بالدين والحياة لم تأتِ بمحضِ صدفة، بل هيّ طيفٌ مستمرٌ من أطياف مدينةُ العلمِ حبيب الله ابا القاسم محمد صلّ الله عليهِ وآلهِ وسَّلم.
وبرأيي - أن الجاهل الحقيقي - هو مَن لم يقرأ لهُمُ.

أحمَد قاسم.

مرات الإنسان يحتاج يبتعد مسافة حتى يعرف حقيقة الأمر، القرب الشديد من أي شيء يخفي عنّك هواي حقائق، تخيل تكون لازك بصف حايط ورافع راسك وتباوع عليه، حتشوفه جبير لكن ما راح تشوفه كله، اكو جزء منهار من عنده، اكو فطر بالجهة اليمنه، اكو نباتات دتطلع من جواه، وحتى تلكه بي رسمة مثل الباب راسمها شاب حاول يهرب من الحياة، ولو تباوع اكثر حتلكى مكتوب لا ترمي الأوصاخ هنا.

من ترجع كم خطوة حتتضحلك حقيقة هذا الحايط، مميزاته وعيوبه، واحتمال أسرارة هم،
اعرف صعبة من يبتعد الإنسان عن ذاته حتى يعرف نفسه، وكلش صعبة من الإنسان يبقى ما يعرف نفسه.
لكن هذا اللازم يصير بوقت مفصلي بحياتك، بوقت نسميه احنه التغيير، نسميه بداية جديدة
يحتاج ترجع كم خطوة حتى تعرف انتَ وين؟
شسويت بهاي حياتك، شنو هدفك ؟ على شنو عايش انتَ ؟ حتى تكرر نسختك المعتادة كل يوم ؟ أكل وشرب ونوم وطلعه وونسة،
اكو نشاز موجود باللحن، اكو صوت داخلي دائمًا تسمعه انتَ، صوت يكلك يله ، يله عاد ، الفرصة ما راح تجيك حتى تتغير ، الفرصة أنتَ تصنعها ، أنتَ المسؤول عن تغير نسختك السابقة المكررة
بأفكار جديدة بعادات وبناس جدد، بروح جديدة، أنت المسؤول عن شحن طاقتك من جديد، من إعادة ضبط أحلامك وخططك من جديد، حتى الكون الجبير هذا يتخلص من فضلاته الزايدة، أنتَ شنو ناقصك حتى تتخلص من كل هالسلبية الشامرها على نفسك ؟

والأهم برحلة التغيير، مبدأ صغير يخليك تعيش مرتاح وبالك صافي
"فانية ، فكن إنسان".

وكلكم عيوني.

جازفتُ بالذهابِ إليك،
في وقتٍ لم أعد أقطع فيه حتى الطرق المضمونة.

مرة اخرى

كل الحب للأشخاص التقره جرايدي الطويلة 😆

لمن چنه زغار، جانت وحدة من العابنا هي نطير طيارات ورقية، وجانت نوعين، نوع نسميها طيارة ورقية صغيرة، والنوع الاخرة چبيرة بالبالون، والأخيرة مداها ابعد، ولمن تطير الطيارة فوگ وتنجم تصير ثگيلة، وتحتاج خيط قوي، وحتى نقوي الخيط بعد لغرض المكاصيص وية البالونات الأخرى، نسويله شيشة، والشيشة هي گزاز مال شمعة نيون نطحنها بالهاون وعجين مال تمن، ونخبطهن سوه، ونمشيه عالخيط حتى يصير مسلح. الطيارة أو البالون نسويها غالباً من ورق الجرايد، ومو أي واحد يكدر يسويها وإنما الماهرين بس حتى متكون بيها ميلة أو جفّة، ونسويلها ميزانية مضبوطة ونشد الخيط بالشباك مال بيتونة السطح حتى تبقى الطياره سبوع واكثر بالسمه.
چنه نركز على تقوية الخيط ومتانته من نطيّر طيارة البالون ام المدى البعيد حتى نضمن انها مراح تنگطع ابد

هاي الطريقة لحد الآن استخدمها بكل محطات حياتي، بكل حلم اريد احققه وبكل رغبة اريد اسويها، إذا جان البالي بعيد المنال ( مداه بعيد) انطيه كل جهدي وتركيزي وأرسم اله كل الخطط القوية الي تمثّل الخيط القوي بالطيارة، ابدًا ماستخدمت خيط بسيط لأي حلم اطلقه بالسماء،
اني مؤمن بأن كل خطوة تتحقق هيّ بتدبير وعناية إلاهية لو مهما جان الخيط قوي.
بس التدابير الشخصية أمر حتمي، حتى ما تسبب لنفسك خيبة أمل وتهدم ثقتك،
نتيجة أحلامك بعيدة المدى، الي تستخدملها خيط رفيع!

وكلكم عيوني.

أفضل خدمة ممكن تقدمها لأعصابك هاي الأيام أنك تبتعد عن الترند العراقي
وتحاول تتفرج بدون ما تنطي رأيك، مو أنانية لكن الرأي المخالف والمختلف وسط هاي المعمعة ما إله شراية، لذلك جر نفس ودرب نفسك على عدم استخدام الكيبورد، طبعاً هاي المعمعة ما تقتصر على السياسة بس، بل في كل المجالات: السياسة، المجتمع، الدين، الثقافة، ودائماً الرأي المخالف يُقمَع وينتهي في سلة المهملات خصوصاً من قبل المثقفين. لا، بل صار من الطبيعي جدًا أنك تشوف شخص يفترض أنه مثقف حاط ملاحظة بآخر المنشور: “رجاء اللي عنده رأي مخالف لا يعلق.” أبو الشباب يريد بس تصفيق

وكلكم عيوني.

هواي سامع هاي العباره قبل
( لتختار شريك حياتك على أساس الحب)
ويجون يطرحون نظريات وهميّة ويگولون اذا حبيت شخص ما راح تشوف سلبياته وراح تفقد عقلك ومتختار صح بإعتبار أن حبك راح يطغي على عقلك ومن هالسوالف الي مالها صحّة.

بدون شك الحبّ وحده غير كافي لنجاح أي علاقة عاطفية تنتهي بالزواج بما يرضي الله،
وآني شخصيًا ناشر أكثر من 15 بوست عن التفاهُم بين العلاقات ومأكد على ضرورته وأهميته المطلقة، ومُصّر لحد الآن على انهُ الشرط المهم لنجاح أي علاقة ، لكنَهُ ليسَ الأهم ، لأن الإنسان نفسيًا ما يكدر يتفاهم ويّ شخص ما يحبه، مراح يكدر يوصل وياه لنقطة حل دام هوَ ما عنده مشاعر المودَة والرحمة المذكورة بالقرآن والمتمثلة بالحب اتجاهة.

بدون الحب مراح تكدر تتقبل شي، لا أخطاء الشخص المقابل ولا عذرك إله،
المودة والرحمة الممزوجة بالتفاهم والمُغلفة بمصطلح الحب هيّ نقطة السر الي تخلي زواجك ناجح وتحت العناية الإلهية،

وأتذكر
الحب مراح يفقدك عقلك.

وكلكم عيوني.

اني من زمان ضد حفلات الصور والسكراب والهرج والمرج اليصير بيها، ورأيي طارحه سابقًا قبل سنين
واشوفها شي زايد وماله داعي خاصة بزمن الترند السخيف الي خله الناس تركض وره الشهرة المزيفه.
ومن حقج ك بنيه ملتزمه بعبايتها وحجابها انُ تنزلين من الستيج بكل هدوء بوقت تشغيل الأغاني ، لا غبار على هاي الخطوة ابدًا.

بس الدكة الناقصة من تصورين نفسج انتِ وتنزلين من الستيج وتقللين قيمة زميلاتج الباقيات وتهينيهن بهاي الطريقة الي غايتها الوحيدة الترند وزيادة عدد متابعينج وحتى تسمعين كم عفيه من كم ملطلط.

صديقاتج ذني جنتي 4 او 5 سنوات وياهن، صنعتوا موافق وذكريات تعتبر الأهم بمسيرة حياتج كشابه.
صدكيني الدين مو هيج، وبعمر الدين ما راح يكون سلعة ترويجية تحصلين بيها اكسبلور، لأنُ بمجرد نشرج لهذني الريلزات فتحوّل الموضوع الى رياء وليس إلتزام حقيقي إسلامي.

وكلكم عيوني.

كل إنسان عنده لونين،
أبيض وأسود، مرات الإنسان ينرفض بسبب مميزاته مو بسبب عيوبه، مرات محبتك تصير چبيره على فلان او عطائك يصير اكبر من قيمته، او تلگاه ما مصادف گلب نظيف مثلك وما متعوّد على صدق المشاعر، اباله الناس كلهم خاينة وكلهم مو خوش اوادم، العاش عمره متعگل بناس غلط ما يفهم قيمة الناس من يقابلهم، مثل ما تلكه بشر يرفضون النعمة راح تلكه بشر ترفض الناس الصح.

وكلكم عيوني.

مرة اشتريت قميص ماركة جان بوكته، جنت قليل البس قمصان ، اكثر لبسي بالصيف تشيرتات وبالشته بلوز ، هذا القميص الغالي كلما البسه أتقيد وماارتاح بي ، ارجع انزعه والبس بلوزي ابو العشرتالاف المرتاحله ، مرات تشوف واحد غني صاعد سيارة عادية ، هو يكدر يشتري اَي سيارة تعجبه بس تشوفه صاعد سيارة هوندا صغيرة
الموضوع مو فلوس بس هو مرتاحلها

وجنت اعرف ابو شركة موبايلة ايفون فايف قديم برغم ماجان توه نازل ال7plus سألته ليش ماتغير موبايلك كلي هذا تعودت علّي بعد وحتى لو ردت أغيره اشتري فايف نفسه

الموضوع ماله علاقة بالشكل والجمال والسعر
الموضوع اقتناع وثقة وتجربة وموضوع مهم يوصلك للحقيقة
لاتستغرب انت كشاب حلو ومرتب وسيارتك اخر موديل المعجب بيها تحب واحد حالته ميسورة لأن شافت جزء منه يكملها ، ولاتتعجبين انتي وحده حلوه واغلب العالم تباوع عليج واحد يختار غيرج انسانة بسيطة لأن ارتاحلها وفهمها .

التفاهم هذا اهم موضوع بهذا الكوكب، الراحة النفسية التلكاها بناس يشبهوك، بمطعم ترتاح لكعدته، بتشيرت ماخذ راحتك بي، بأغنية تسمعها، الراحة التلكاها ويه الهادئين امثالك لو ويه التافهين الي على نيتهم اليشبهوك
الموضوع مابي مغامرة، مادام انت اختاريت راحتك النفسية ومارايد شي غصب عنك وتبقى تشوفه غلطة مستديمة تعيش بيها الباقي من حياتك.

عيش حياتك برغبتك، لا غصبًا عليك.

وكلكم عيوني

قبل فترة من كملت شغلي اتمشيت لمرطبات ساندرا بالربيعي كعدت هناك نص ساعة ، كبالي عائلة كاعدة مكوّنه من اب وام و3 أطفال ، طفل منهم سوه حركة لا إراديه الاب ضربة كفخة قوية،
استغربت ما بچه بيها الطفل، من كاموا نفس الطفل عثر
الاب رجع ضربة بس هالمرة ما تحمل الطفل وبچه ، وبنظرة من الاب رجع سكت

اني ما متزوج وما عندي أطفال، بس اعرف كلش زين أن الضرب ما يجيب نتيجة وماكو انسان عاقل يضربك لأن يحبك
المدرس يضربك حتى تلتزم، وابوك يضربك لأن يشوف مصلحتك بالضرب، والمجتمع يبارك بضربك ويسميه تربية وتأديب،
بس الواقع الضرب الممنهج هو تقصير حاد بالتواصل، اعلان عجزك عن ضعف تربيتك بالكلام والأفكار وعلامة واضحة لفشل اي نظام اجتماعي لايستوي الا بالتعنيف،
بس الخطير من كل هذا، انت من تضرب طفل وتكله اني اضربك لأن احبك، الطفل من يكبر راح يتعلم ان الضرب والتعنيف هو افضل طريقة للتعليم، وان الخوف والأذى شكل من اشكال الحب!

ربوهم، لا تضربوهم.

وكلكم عيوني.

🤎

اكو نسخة سيئة بيك تتعامل بيها ويه شخص محدد
ونسخة حلوة لكيت نفسك تتعامل بيها ويه شخص ثاني، بالحالتين انت نفس الشخص
لا عندك ازدواج بالشخصية ولا إضطراب بالمشاعر

بس بالحالة الأولى انت تعاملت ويه شخص صعب، اناني وما يقدرك،
ضغط عليك، وقلل منك لحد ما نسختك السيئة طغت عليك وصارت إنعكاس لسلوكه وياك.

وبالحالة الثانية تعاملت ويه شخص طيب، يقدر أخطاءك وماضيك،
عاملك بإحترام ورفع مكانتك لحد ما نسختك الحلوة اتحكمت بيك وصارت انعكاس لمعاملته الك.

الموضوع ببساطة ..
انعكاس صورتك ما تصير واضحة ونظيفة
الا اذا المراية الكدامك نظيفة وتلمع.
وكلكم عيوني.

أغلبية البشر ينضج حسب ظروف الحياة
بس أكثر شخص ينضج من تقسو عليّ الحياة هو الشخص الطيب،
يتحول تدريجيًا من شخص يغفر ويسامح لشخص يتقبل الاعتذار بس ماينطيك بعد فرص جديدة.
شخص تتحول أولوياته لكسب راحته النفسية بعد ما سابقًا بقى يدافع بأستماته عن أحبابه وأفكاره، يتحول لشخص يشوف الخذلان بالمقابل عطف تجاهه بس تقل قيمته للأبد، يصير عنده الناس فترات وتنتهي ويا الوقت، لايعاتب أحد ولا ينتظر احد
ويحفظ أسراره لنفسه،

الشخص الطيب ما يتحول لشخص مؤذي بس يتجاهل
يتجاهل ويعيش بصمت.

وكلكم عيوني.

كعدت ويه واحد عجبك لبسه وشكله وحسيت براحة من اتناقشت وياه، هذا الشي اسمه قبول
شفت مميزاته وعيوبه وتفاصيله الخاصة وشفت جوانب حياته واتقبلتها ، هذا اسمه توافق
تزوجتوا وصرتوا واحد يقره الثاني، هذا اسمه تفاهم
عشتوا بسعادة بعد كل ذني الأمور، هذا اسمه حب

الحب نتيجة نهائية ، مو أول خطوة.

وكلكم عيوني.

حينَ اكتشفتُكِ
لم يكُن قصدي اكتشافُكِ
فأَنا الذي ما كُنتُ ضد الحُبَ يوماً أو معه
انا مؤمنٌ ان الفصول الأَربعة
ستَظل دوماً أَربعة.

وبأَنَّ شمسًا واحِدة،
وبأنَّ بدراً واحِداً،
فتنَ الوجودَ إلى السَماءِ السابعة

لكنني حينَ اكتشفتُكِ
كُل الامور تَغيرت
فأَضفتُ بدرًا ثانيًا
واضفتُ شَمسًا ثانية،
واضفتُ فَصلاً خامِسًا

ما اروعَـه!

الى حيثُ أنتمي ..

شباب محتاج كُتّاب محتوى ( إعداد)
عدد 10

للعمل بشركة تسويق وإعلانات وصناعة محتوى
بزيونة بالربيعي

الي يكدر يراسلني
@sen_3

مو مهم الإنسان يحب بكد ما مهم يرتاح،
الحاجة التريحك بمرور الوكت تلگه نفسك تتعلق بيها وتحبها، عكس الحاجة التحبها وما مرتاح وياها، تشوف نفسك من الضغط وقلة الراحة تفقد مشاعر الحب بداخلك اتجاهها.

الراحة دائمًا يجي وراها حب
بس قلة الراحة يجي وراها معاناة وخيبة أمل.

وكلكم عيوني.

قبل سبوع راجعت صديقي عبدلله دكتور أورام بالحارثية، جنت اعاني من وجع خفيف بالراس، كمل الفحوصات وره ساعة دخلتني السكرتيرة وشفت وجهة اصفر، كلي احمد ماعرف شنو القصة خل اعيد الفحوصات، وره ما عادها گلي فطرت كلبي، بيك مرض خطير وحضني وكام يبجي.
ماكتله شنو هو المرض، كتله عندي وكت اعيش ؟
گلي على الأكثر لشهر الـ12 ، وآخر شهر ماراح تكدر تكوم من الفراش، الك شهر واحد تعيش كأنسان طبيعي
رحت زرت كبر ابوية، صارلي سنة ما زايره، رحت مستحي، گمت اسولف وياه وأول مرة بحياتي انطق كلمة بابا لأن أول مرة بحياتي اكون خايف، الفرحة الوحيدة بزيارتي اله جان اكو مكان فارغ بصف قبره حجزته الي،
عاتبت هواية صديق مجهول برغم متعاوفين صار فترة ، أتمنيتله الخير وطفيت النت حتى لا توصلني رسالة منَه واقراها.
رجعت لبغداد اتمشيت بالشوارع الجنت اضيع بيها سابقًا، مشيت فوك السياج مال جسر الصرافية اني ومغمض، حسيت نفسي حر لأول مرة
رحت لأماكن احبها، يم المسرح الوطني ابو المطعم صديقي اجيته قبل 9 سنين على شغل ورفض لأن مايعرفني زين، بقينا نسولف وكلي بالضحك مكانك موجود اذا تحب تشتغل، رحت كعدت يم مكاني الخاص بالصدامية على دجلة، دخنت جكاير وشربت ببسي ابو الگزاز هذا القديم، يبيعهن رجال محتفظ بيهن عنده دكان بالشورجة، خابرت اصدقائي وطلعنه للبيروتي نستذكر أيامنا وطبتنه ومواقفنا المحرجة والذكريات التخبل. من التقينا ما سولفتلهم عن وضعي حتى الكعدة تبقى حلوة،
حجيت ويه اخويه الوحيد وكتله كل اسراري، بكل معلومة احجيها اله يگلي وين رايح؟ بالأخير حضنته ومشيت، صعبة من مرة وحده بحياتك تحضن اخوك، وهيّ المرة الأخيرة.
رحت للشعب يم الأسواق المركزية من جنت انتظر صاحبي هناك يرجع من الشغل حتى ارجع وياه للبيت، بس تذكرت صاحبي عافني وراح،
رحت لسوك شلال اتذكرت اول ملابس جديدة اشتريتها للعيد وشكد جان ذوقي يضحّك بالأختيار ، بهل اثناء سيارة مال شايب وهو وعائلته عطلت، رحت صحت كم واحد من الشارع ودفعناها
وشربت عصير رخيص من ابو الكشك لأن مشغل اغنية حلوة تذكرني ببنية صعب تكون الي بيوم من الايام، رجعت فتحت نت همزين ماواصل مسج من احد.
لغيت كل بلوك سويته واعتذرت حتى للمتجاوز بحقي ومن ردت استوعب نهاية ايامي حتى اكتب هذا البوست ، رجعت لديالى يم أهلي حتى اكون مستعد لمصيري.

خابرني الدكتور وحجيتله على السويته فوك. كلي هذا الردته منك من زمان
روح ارتاح مابيك شي،
عفته ماحجيت وياه رحتله الصبح للبيت حتى ارزله طلع اخوه گلي احمد شبيك!
صديقك عبدلله استشهد ب2016 كدام عينك.
لا تهذري.

وكلكم عيوني.

حبايبي
بس لا ما متابعين حسابي مال أسنان؟

المهم اني حرجع للشغل بالعيادات من الأسبوع القادم

أي مشاكل عدكم دزولي على الحساب
والعلاج أسعاره رمزية جدًا

هنا : https://www.instagram.com/s1954_2?igsh=MTJzNHU5Z2h3bWlnMA==

اذا شفت بنيه عجبتك، بس انت بعدك ما مستعد للدخول بعلاقة حقيقية تتميز بالصدق والوعي والتفهُم وتنتهي بالزواج.
أعجب بيها من بعيد وكمّل طريقك

وها
شكرًا لأن ما خربّت حياتها.

وكلكم عيوني

من جملة إن شاء الله
الى جملة الحمدلله يا رب

اكو رحلة شاقّة مليانه تعب وصبر وحزن وفرح ويأس وأمل، مليانه ضغوطات نفسية وأمور محد يدري بيها بس الخالق وأنتَ.
تسألني اذا الرحلة تستحق؟ كلش تستحق اذا وراها حلم ينتظرك تحققه، إذا وراها چف البنيه التحبها وهو ينتظرك تلزمه بالحلال، اذا وراها رضى الله وأهلك عليك.

من إن شاء الله الى الحمدلله
هذا ما أتمناه الكم أصدقائي

وكلكم عيوني.

بغداد لا اهوى سواكِ مدينَةً
ومالي عَن أم العراقِ بديلُ 🇮🇶❤️

بردًا وسلامة على لبنان
اللهم احفظ أهلها وشُدَ عزم مقاتليها الأبطال
اللهم أنصر حزب الله نصرًا واسعًا كذلك النصر الذي نصرتَ بهِ عليًا في خيبر
اللهم فأنهم أتباع ذلك الفارس الشجاع الذي أرعب اليهود وقلَع بابهم بيديهِ المباركة
اللهم فأنصرهم نصرًا واسعًا لا يعلمُ بهِ إلا انتَ
وادخل شهداءهم الفردوس الأعلى يا ربّ العالمين

لا حول ولا قوة إلا بالله العليّ العظيم
وإنا للهِ وإنا اليهِ راجعون

هنيئًا لكم يا شيعة عليّ بن ابي طالب عليهِ السلام
هذا الفداء وهذهِ التضحية في سبيل الحقّ وفي سبيل القدس وفي سبيل الكرامة والمجّد.

ألا لعنة اللهِ على الظالمين.

اذا جان اكو شي مضوجك او قاهرك او مخليك حزين وقلق، ضوج وإنقهر واحزن
، انتَ بشر وعندك مشاعر ومن حقك تتأثر
بس الفكرة ان لا تطوّل بالحزن والقلق والضوجة ، لا تطول بالمشاعر السلبية التقدمها لروحك، لأن لو تصفنلها محد متأذي بس روحك الحلوه الما تستحق كل هذا
لا تطبك ويا الناس والظروف وتقسي انت هم على روحك
دللها وأهتم بيها وكون الها المتنفس الوحيد
كون لهل روح مثل النافذة الترتاح بيها من ضغط الدنيا.
ماكو شي يبقة ثابت بالقمة، لا الفرح ولا الحزن، لذلك خليها على الله.

وكلكم عيوني.

برأيي الشخصي
اكثر صفة المفروض الرجل يتصّف بيها هيّ الغيرة.
صراحة لو ننظر لكل المشاكل والمظاهر المجتمعية والتشوّه الشكلي الدنشوفه بالشوارع من لبس فاضح ومن أخلاق مترديّة، هو بسبب فقدان الغيرة للرجل على عرضه، سواء زوجته او بنته او اخته او أمه.
ولا اكدر اعترف برجل يحب زوجته شكليًا وهو مخليها متبرجة وتفاصيلها يشوفها القاصي والداني، ولا اكدر اتقبل فكرة كونَهُ زلمة وهو مخليها تطلع شعرها او جسمها ولو سانتيم،

دائمًا اشوف بالأنترنيت الضحك والونسه والحب والهدايا (والشو) الإعلامي الي يقدمه هذا المعتبر نفسه رجل الى مرته، لكن غالبًا منشوف أن جزء كبير منهم علاقتهم تنتهي بالفشل، سواء خيانة او يصير برود وتلقائيًا العلاقة تنتهي بالطلاق ( اذا جانوا مزوجين يعني) وتبدي البثوث واحد يغرد للآخر.

لكل إنسان متزوج أتمنى تعيد النظر بهالفكرة الأساسية والجوهرية بحياتك، انتَ مو أفهم من الدين، لذلك لتحاول تهيّن نفسك وتقلل من قدرك وتمحي رجولتك علمود شي يلعب النفس وتخلي كل الداير مدايرك ياخذون عليك نظرة اكدر اختصرها بمصطلح اسمه (ستيل) .
ولكل إنسان راح يتزوّج ، لتخلي نفسك بموقف محرج كدام الله ونبيّه وأئمته وكدام الناس وتاخذلك وحدة تريد بالكوه تنزع، بنية لا تعترف بالأخلاقيات العامة ولا تعترف بالله وبالدين.
واذا صار فـ راح تعيش ، لكن تعيش مذلول طول عمرك.
الإنسان الماعنده غيره على عرضه، إنسان مطرود من رحمة الله
لأن الله غيور ، يغار على خلقَه من الفواحش، ما ظَهَرَ منها وما بَطَن.
قال تعالى (بِئْسَمَا اشْتَرَوْا بِهِ أَنفُسَهُمْ أَن يَكْفُرُوا بِمَا أَنزَلَ اللَّهُ )

والعاقل يفتهم.
وكلكم عيوني.

لكل شخص يقره البوست كله حتى الكلايش الطويلة

احبكم