هاجر اللي بتحاول

@hajertry

هاجر بتحاول وعارفه انك أنتَ كمان بتحاول،
براڤو علينا كلنا♥️.
قناتي الثانية: @hajernazem6

هاجر اللي بتحاول (Arabic)

هاجر اللي بتحاول قناة تلغرامية مميزة تهدف إلى تحفيز وتلهي المشتركين من خلال محتوى ملهم وإيجابي. تديرها هاجر، التي تعرف أن الجميع يسعى لتحسين نفسهم والوصول إلى أهدافهم. فإذا كنت تبحث عن دفعة إضافية من التحفيز والإيجابية، فهذه القناة هي المكان المناسب لك. يمكنك متابعة المزيد من محتوى هاجر على قناتها الثانية: @hajernazem6. انضم إلينا اليوم وكن جزءًا من مجتمع الإيجابية والتحفيز. هاجر بتحاول وعارفه أنك أنتَ كمان بتحاول، براڤو علينا كلنا ♥️.

هاجر اللي بتحاول

15 Jan, 20:01

علمود كل المسافة اللي مشيتها لحد هسه
علمود كل مرة گعدت تتخيل نفسك محقق حلمك
علمود كل اللي گلولك ماتگدر
وعلمود كل الدعوات اللي طلعت من گلبك للسما
علمود كل البدايات الحلوة اللي منتظرتك تعيشها
وعلمود الطفل الصغير بداخلك اللي وعدته انك راح تاخذه لمكان أحسن من اللي موجود بي هسه بأصرارك وجهدك
علمود كل هذا واكثر ، انت راح تكمل♥️.

15,205

هاجر اللي بتحاول

11 Jan, 19:42

تستاهل تكون بعلاقة ماتلحگ تطلب بيها شي من المقابل لان كل اللي نفسك بي جاي يتقدملك من عنده بدون ما تطلب
العلاقة اللي ما تلحگ توصل بيها لشدة الاحتياج لأي شي لان الطرف الثاني عيونه عليك دائمًا ومحاوطك بكل اللي تحتاجه من حُب واهتمام ودعم.

23,068

هاجر اللي بتحاول

09 Jan, 20:45

ربنا ما ناسي حسرة گلبك وانت تگله " لا تنساني" .. اتطمن .

24,415

هاجر اللي بتحاول

09 Jan, 18:05

التعب ، والزعل ، والركض اللي الإنسان يدخل بي بكل يوم جديد
كلهن اشياء يخلن الواحد ينسى هو ليش جاي يركض
و لوين يريد يروح اصلًا؟ وليش؟ ليش يريد يوصل لهذاك المكان؟

مرات تكون جاي تسوي شي
وتوگف تحس ان اللي جاي تسوي ما اله اي معنى
نحتاج نذكر نفسنا دائمًا
كل مانفقد هذا المعنى
نحتاج نكتبه من جديد لنفسنا
يمكن انت ماتحتاج معجزة حتى تگوم على حيلك من جديد
يمكن كل اللي تحتاجه هو ان تتذكر هذا المعنى البسيط اللي اني متأكدة انه ماراح يتجاوز السطر ♥️

26,112

هاجر اللي بتحاول

03 Jan, 21:23

هذا التعب اللي تحس بي بنهاية كل يوم اول ما تخلي نفسك على فراشك
هو اللي راح يوصلك لليلة اللي ماراح تگدر تنام بيها من گد الفرح وانت شايف اخيرًا نتائج سعيك ومُحاولاتك.

29,507

هاجر اللي بتحاول

31 Dec, 21:09

ماراح اطلب تكون سنة حلوة يارب
ولا راح اطلب منك تحققلي اشياء بأيامها ، خليها بس سنة تكون انت موجود وياي بيها .

34,353

هاجر اللي بتحاول

30 Dec, 22:55

تگعد من النوم وانت متوقع انك راح تعيش يوم عادي
وبنهاية هذا اليوم ترجع لفراشك وانت لاگي صديق يشبه روحك
او لاگي شريك عمرك اللي يهون عليك سنينك
او خلصان من مشكلة چانت ثگل على چتافك لمدة سنوات

وتطول القائمة .. وتطول الاحتمالات
لا تفقدون الأمل ♥️

28,254

هاجر اللي بتحاول

28 Dec, 17:49

حلمك مو سهل ، بس على الاقل مو مستحيل .. لا تبطل مُحاولة.

41,275

هاجر اللي بتحاول

27 Dec, 18:09

الخوف يگلك انك وحدك وجهدك قليل وماراح يكفي
بس الحقيقة ؟
فوگ جهدك اكو رحمة ربنا بيك وتوفيقة الك.

38,591

هاجر اللي بتحاول

25 Dec, 19:23

الواحد يسعى بس حتى يوصل لليوم
اللي يگدر يحضن نفسه بي ويگلها تره وصلنا وكل هذاك التعب التعبناه چان يستاهل بالأخير.

49,452

هاجر اللي بتحاول

23 Dec, 18:30

وانت تشوف الناس يحچون بأنجازاتهم لهاي السنة
و قبل لا تبدي تقنع روحك انها ماسوت شي چبير وحلو مثلهم
تذكر كم مرة حضنت صديق خلال هذا العام؟
وكم مرة گلت لنفسك ميخالف بالوقت اللي چان صعب عليك انك تگولها
تذكر كم مرة واسيت احد زعلان
وكم مرة ابتسمت لشخص غريب بالطريق ؟

والأهم تذكر انك وصلت لنهاية هذه السنة
وانت محافظ على حنية ورحمة گلبك♥️.

52,569

هاجر اللي بتحاول

17 Dec, 21:05

نظرتك على السگف هسه بعيون متروسه دموع كل ظنك ان حدها سگف هاي الغرفة ؟
تلگاها واصله سابع سما و ربنا شايفها.

51,413

هاجر اللي بتحاول

17 Dec, 20:48

أحس دائمًا ان الليل يحضن الوحدة.. بالليل انت وحيد بس مو لوحدك، انت وحيد وسط عدد چبير من الناس الوحيدين
ومعرفتك بهذا الشي يخلي الوحدة اقل حدة على گلبك الصغير ..
انت مو لوحدك.

44,775

هاجر اللي بتحاول

16 Dec, 10:17

شكل من اشكال حُب النفس انك تتعلم توفر طاقتك وجهدك لحروب تستاهل انك تدخل بيها ♥️

38,554

هاجر اللي بتحاول

16 Dec, 10:15

صدگني مو كل الاشياء المزعجة تستاهل جهدك وانتباهك
اكو اشياء كلش كافي عليها انك تباوعلها بطرف عينك وتدير وجهك عنها
ومرات حتى هاي النظرة تكون هواي عليها

31,883

هاجر اللي بتحاول

15 Dec, 19:05

من توصل مرحلة تعجز انك تلگه كلمات تدعي ربنا بيها
بوقتها تأكد ان حتى صمتك هذا سامعه وفاهمه.

43,801

هاجر اللي بتحاول

13 Dec, 19:30

مرات تنام مو لأنك نعسان ، تنام لان تريد يومك يخلص من گد ماچان سيء ،تنام حتى يجي باچر على امل انه يكون يوم أحسن.

47,740

هاجر اللي بتحاول

12 Dec, 03:34

صباح الخير لكل شخص قرر انه يگوم يبدي يوم جديد وهو مالحگ يرتاح من تعب البارحة.

49,126

هاجر اللي بتحاول

07 Dec, 19:36

"آمين" بگد ما نگالت هالكلمة بكل هاي الدنيا♥️

45,351

هاجر اللي بتحاول

07 Dec, 19:33

اجبر بخاطر كل روح تتعب وماتبين يارب ، اللي مهما نوجعت تضم وتبقى تتعامل وي الناس بشكل حنين ، اللي تعرف تطبطب بنص ماهي مجروحه، و اللي تبچي بدون صوت، الروح اللي محتاجتلك وما الها احد غيرك

40,328

هاجر اللي بتحاول

06 Dec, 16:46

مش اشطر كتكوت لكن بيحاول

36,656

هاجر اللي بتحاول

05 Dec, 20:25

حتى الدمعة اللي توگع على مخدتك بليل من گد خوفك على احلامك ومستقبلك
هاي لوحدها سعي ،و الله حاسبها الك.

36,405

هاجر اللي بتحاول

05 Dec, 11:41

صارلي من شهر التاسع باديه بالمتجر وبعت اكثر من 100 طلبية مالتي على الرغم ناسيه انو احول شي من قناة المتجر هنا

حبيت اشاركها وياكم
كل الرسمات الحلوة هنا اللي تحبوها متوفرة ستيكرات وبروشات وحسب الطلب
موجود بوت بالقناة للطلب ♥️ ..

27,815

هاجر اللي بتحاول

02 Dec, 20:15

يارب هاي الأمنية

25,295

هاجر اللي بتحاول

02 Dec, 20:14

هي أمنية وحدة من گد ماتريدها تحس ان حتى من تنام گلبك يبقى يتمناها بمكانك.

22,546

هاجر اللي بتحاول

02 Dec, 19:14

أنت مو إنسان متطلب، أنت مو جائع عاطفيًا، أنت مو مزعج، أنت مو دراما
‏اللي يخليك تشعر بهذه الأحاسيس لأنك تطلب (حقوقك) الطبيعية بالعلاقة ما يستاهلك.

27,798

هاجر اللي بتحاول

02 Dec, 18:23

لا بأس يالقلب الشجاع

6,567

هاجر اللي بتحاول

30 Nov, 20:34

يجي يوم يكون انجازك الوحيد بي هو انك گدرت تكمله للنهاية بدون ماتنهار وتبقيلك طاقة تكمل بيها باچر .. وهذا الانجاز محسوب
ويستاهل تكون فخور بنفسك ولو شوي علموده قبل لا تنام♥️.

13,160

هاجر اللي بتحاول

28 Nov, 19:51

راح يجي وقت ترجع تضحك بي من كل گلبك مثل قبل ، وعيونك هذن الطافيات من گد الزعل والتعب راح يرجعن يلمعن بنفس الطريقة من گد السعادة و الحُب، ويومك يعدي بهدوء مو بثگل ، وقت النوم يكون راحة مو صراع وي الافكار ، وگلبك يرجع متطمن وخفيف
راح يجي يوم تشوف ان كل هذا ماچان مستحيل او بعيد عنك مثل ماتتوقع هسه.

17,622

هاجر اللي بتحاول

26 Nov, 21:03

مهما چان يومك سيء
بس بعدها الحياة تستاهل تنطيها فرصة ثانية باچر
تستاهل تقدم مُحاولة صغيرة بيها مهما چنت جاي تشوف هسه ان الموضوع مايستاهل وما اله معنى

لا تفقد الامل
ازعل وابچي وضم نفسك واختل عند اول حضن يلاگيك
بس لا تفقد الامل
لا تفقد الامل بأن اكو شي يستاهل تگوم تحاول من جديد علموده باچر♥️.

23,522

هاجر اللي بتحاول

25 Nov, 18:58

انام كل يوم واني اردد
"ربنا راح يراضيني ، هو يعرف شگد اني صبرت ".

25,237

هاجر اللي بتحاول

17 Nov, 20:51

اكيد ربنا راح يعوضك عن الدموع اللي محد شافها غيره.

36,585

هاجر اللي بتحاول

15 Nov, 19:55

مرات يكون السعي هو الوقت اللي تجي توگف وتستسلم بي وتضم روحك عند اقرب ظلمة
بس يطلع صوت بداخلك يگلك "ان لا ، صدگ نوگف هسه؟ و كل هاي المسافة اللي مشيناها مو حرامات ؟ "
فتگوم على حيلك وتكمل.

36,738

هاجر اللي بتحاول

13 Nov, 20:08

تحس ان اكو زعل بداخلك ماتعرف سببه بس تحس بي موجود و انو ماكو شي بكل هاي الدنيا يگدر يراضي ..
بس حتى هذا الزعل ربنا يدري عنه وحيراضيك لحد ماتنسى انك بيوم من الأيام حسيت بي♥️.

39,806

هاجر اللي بتحاول

12 Nov, 19:37

الموعد اليومي للتذكير المهم جدًا: الافكار السيئة اللي عقلك يفكر بيها هسه ، راح تبقى بعقلك وان صار شي سيء بالواقع ماراح يكون بنفس السوء اللي عقلك جاي يصورلك ياه.

38,379

هاجر اللي بتحاول

12 Nov, 18:07

نستاهل المحبة اللي لمن يقدمها الشخص النا من گد ماهي هواي يخلينا نسأل نفسنا "معقولة اكو احد يحب احد هيچ؟" .

36,123

هاجر اللي بتحاول

10 Nov, 18:48

يارب ننام و نگعد نلگه ربنا حل كلشي.

56,707

هاجر اللي بتحاول

05 Nov, 18:37

أحلامك اللي حلمتها بليالي بعيدة، ممكن تتحقق وتعيشها ومن گد ما هي چانت بعيدة تكون ما مصدگ وحاسس نفسك بعدك تحلم.

43,136

هاجر اللي بتحاول

05 Nov, 17:12

قبل كم يوم چنت احچي وي زميلي بالشغل
دزيتله منتج وسألته " هذا اكو متجر عراقي مسوي منه؟"
گلي " اي موجودين"
گتله "حرامات عبالي نسبقهم بي"
جاوبني " مو مهم نسبق أحد، المهم نسبق نفسنا"

وهاي شغله بديهية عندي وهواي گلتها بحياتي لنفسي وللناس
بس بالوقت اللي چنت داسعى واركض حتى اطور شغلي نسيت هذا الشي البديهي والبسيط واللي موجود ببالي من زمان

و عادي
كلش عادي ننسى اشياء نعرفها
كلش عادي اذا يجي وقت تحتاج تتذكر اشياء انت اصلًا تعرفها
عادي انك ترجع تحتاج تسمع كلمة "الميخالف" اللي سمعتها طول عمرك
وكلشي راح يكون بخير اذا هسه محتاج احد يذكرك بهاي همين.

44,223

هاجر اللي بتحاول

03 Nov, 14:00

عن فكرة انك تعيش عادي و انت ما تدري شگد الله مسخرلك ناس وعالم علمود تكون باللي انت بي هسه وان الشي الصغير اللي ضايقك اليوم چان اكو مقابلة عشرات اذا مو مئات النعم اللي تستحق سعادتك♥️

32,628

هاجر اللي بتحاول

26 Oct, 16:40

راح يجي يوم تكون ناجح وسعيد ومتعافي بي لدرجة ان محد راح يتخيل شكم محاولة فاشلة مريت بيها حتى تكون الشخص الناجح اللي جاي يشوفوا ، محد راح يصدگ كمية الدموع اللي نزلت من عيونك و الألم اللي عشته وعديته وحدك حتى تضحك هاي الضحكة الحلوة بالأخير.

49,374

هاجر اللي بتحاول

22 Oct, 17:58

احلامك و امنياتك بداخل عقلك تشوفهم اشياء مستحيلة
وتلگاهم عند ربنا مكتوبات الك من قبل لا تتمناهم حتى.

35,910

هاجر اللي بتحاول

22 Oct, 04:09

صير إنسان أفضل مو علمود تشوفهم، ولا علمود يتندمون أنهم مو بحياتك، ولا علمود تحسسهم بأي شعور من الغيرة/الغيضة/الدونية... صير إنسان أفضل لأن هذا اللي يلوگلك ، لأنك تستحق تكون ناجح وسعيد ومرتاح.

42,492

هاجر اللي بتحاول

18 Oct, 21:30

يارب امنياتنا واحلامنا اللي محد يعرف بوجودها غيرك خليها بيوم من الأيام تصير انتصاراتنا و نفتخر بتحقيقها گدام الناس.

46,702

هاجر اللي بتحاول

17 Oct, 19:42

قبل من چنت بعمر اصغر
چنت اشوف البديهيات اللي المفروض ان يسويها الإنسان بحياته شي سهل وعادي مثل انه يخلص دراسه او يلگه شغل او يتزوج والخ ..
بس حاليًا صرت اشوف الموضوع كلش صعب
كلش صعب ان تسويلك مكان بهذا العالم على الرغم انه چبير وعلى الرغم انك صغير بداخله بس صعب انك تلگه مكان يخصك ويناسبك
صعب انك تثبت وجودك بهذا العالم وتگول تره اني موجود وهذا مكاني ..

سواء جاي تدرس بظروف صعبة
او سواء جاي تدور شغل ومجاي تلگه
او انك جاي تنتظر الشخص المُناسب حتى يكون شريك لباقي عمرك والمدة طولت عليك والخيبات كثرت
او بس انك تحاول تبقى إنسان گلبه بي رحمة بعد ما تأذيت وانخذلت وانجرحت ..

كل هاي اشياء مو عادية ولا سهلة
وتستاهل تقدير منك لنفسك عليها لان محد راح يحس بصعوبتهم غيرك ♥️ .

49,121

هاجر اللي بتحاول

17 Oct, 14:06

استاهل انحب هذا الحُب اللي لمن احد يلمحه رأسًا يسأل نفسه "صدگ اكو احد يحب احد هيچ؟".

27,953

هاجر اللي بتحاول

15 Oct, 17:08

حاول لحد ما ربنا يريد.

42,399

هاجر اللي بتحاول

14 Oct, 17:28

اريد انشره بكل مكان من گد ما أحسني سعيدة بشغلي و فخورة بهاجر وفخورة بمُحاولاتها حتى تخلي العالم اقل قسوة
فخورة انها جاي تذكر الناس باللي چانت هي محتاجه احد يذكرها بي♥️

34,506

هاجر اللي بتحاول

14 Oct, 17:28

https://www.instagram.com/reel/DBHH_87qYC4/?igsh=bHVlanIyaDRpNWR5

34,894

هاجر اللي بتحاول

13 Oct, 19:04

يفتحلك بيبان انت ما طلبتها ، فما بالك باللي تتمناه ؟

34,455

هاجر اللي بتحاول

10 Oct, 17:50

"مع نهاية الأسبوع، اريد ناخذ وقفة بسيطة تقديرية لكل شخص يشتغل، يشتغل هواي ويتعب على نفسه علمود يرفع من جودة حياته ويأمن مستقبل اله ولأطفاله اللي يموت عليهم وهو بعده ما شافهم ولا قابلهم"

46,862

هاجر اللي بتحاول

08 Oct, 19:25

شكرًا يارب على كلشي چنت متوقعه انه مايعدي وخليته يعدي رأفةً بيه
على كل ليلة حسيت بيها انها نهايتي وبعدها طلعت الشمس وانطيتني بداية جديدة
على كل مرة رحمتك حاوطتني لمن كلشي حواليا چان قاسي
و حتى بالمرات اللي اني نسبت بيها كل هذا لشجاعتي ونجاحي الشخصي بقيت ويايه
شكرًا انك امين رغم قلة امانتي
شكرًا يارب .

49,799

هاجر اللي بتحاول

06 Oct, 22:02

الأحلى من انو أنحب هو ان أحب
انو گلبي يصير يريد يعيش ويدگ هواي بس حتى يخليني اصنع ذكريات هواي وي هذا الشخص
انو اتحول فراشة اذا باوع عليه بعيونه
و انو احس جاي اسمع اسمي لأول مرة بس لأن سمعته بصوته
انو انطي واكون سعيدة بعطائي اكثر من ما اكون سعيدة بالعطاء اللي يتقدملي ♥️.

42,716

هاجر اللي بتحاول

05 Oct, 18:39

من اسوء المراحل اللي يوصلها الإنسان هو لمن يفقد الامل بالمشاعر الحلوة
مو يفقد الامل بوجودها
لا بس يفقد الامل ان مُمكن توصل اله
يعني يكون يعرف ان الحب والسعادة والامان والراحة موجودات بس يحس انه ما اله نصيب بيهن

وهذا بس تذكير
انهن موجودات والك نصيب بيهم مهما چان هالشي مستحيل وبعيد ببالك .

41,143

هاجر اللي بتحاول

02 Oct, 11:24

"الميخالف" وحدة احن من الثانية ،متوفرات بمتجري♥️

32,566

هاجر اللي بتحاول

02 Oct, 11:24

https://www.instagram.com/p/DAnpXDhsUk9/?igsh=ejh2M2tyeDYxZTV5

32,084

هاجر اللي بتحاول

30 Sep, 20:17

اللي ربنا راح يسمح بي ،راح ينطيني القدرة علي.

35,446

هاجر اللي بتحاول

26 Sep, 22:23

بودك لو تخلي راسك بحضن احد وتعوف كلشي وتنام ..

36,380

هاجر اللي بتحاول

25 Sep, 21:41

مرات حتى كلمة " يارب" من گد التعب والعجز تحس انك مو گادر تنطقها بصوت مسموع
وتبقى ترددها بگلبك ..
و اي حتى هاي الله سامعها ويعرف بيها.

48,959

هاجر اللي بتحاول

20 Sep, 00:50

ما راح اگلك لا تخليني اضيع .. بس لمن اضيع دليني من جديد
ما اگلك لا تسد الطريق اللي أريد اكمل بي .. بس لمن تسده اخلقلي طريق ثاني امشي بي
و ما اگلك لا تخلي گلبي ينكسر ، بس لمن ينكسر انطيني القدرة حتى ارجع المه مرة ثانية ..
كل اللي ادعي بي أنك ماتعوفني يارب.

53,917

هاجر اللي بتحاول

19 Sep, 14:24

بالأيام اللي راحت واجهتني مشاكل بشغلي ..
خلتني افكر بشي جديد
قبل چان ببالي عقلنا يكبر بس المشاكل ويضخمها
بس بعد اليومين اللي راحوا اكتشفت ان عقلنا يخلينا نكبر الحل هم مو بس المشكلة !
يخلينا نتوقع ان هاي المشكلة يحتاجلها حل چبير

صارتلي مشكلة بالطابعة صرت افكر ان الحل هو لازم اشتري طابعة جديدة
لحد ما بين ان الحل هو بس تغيير اعداد موجود بالحاسبة ! يعني مجرد ضغطة زر صغيرة ..

و بالواقع هيچ هم اكو مشاكل حلها اشياء بديهية مو اكثر
مثل انك تتوقع الموضوع يحتاج معجزة ويطلع الحل هو انك تدعي من گلبك بشكل حقيقي لمرة وحدة
مثل انك تتوقع ان مشكلتك اكبر منك وماتگدر عليها ويطلع الحل هو انك تحچي وتطلب المُساعدة
ومثل لمن تتوقع ان طريقك يحتاجله مليون خطوة حتى توصل ويطلع الحل هو خطوة وحدة بس تساوي مليون خطوة ..

خلينا اني وانت نسهلها على نفسنا هالمرة ونجرب الحلول الصغيرة اللي موجودة بيدنا♥️

44,280

هاجر اللي بتحاول

16 Sep, 17:22

أحب كلش فكرة ان دائمًا ربنا شايف ..
‏شخص غلط بشي .. ربنا شايف ويتصرف
‏شخص محتاج ... ربنا شايف و يدبر
شخص سوه فعل حلو ... ربنا شايف و راح يبارك
شخص بذل مجهود وما حصل ثمرة تعبه بالدنيا .. ربنا شايف وحافظها اله
‏شخص ما عنده المقدرة انه يسوي شي ... ربنا شايف و راح يساعد

‏شكراُ يارب انك دائمًا شايفنا.

32,978