Science

من حكون بيوم دكتور بمجالي حسوي المستحيل لاخلي طلابي يتعلمون بمستوى اي طالب بهلعالم.

حتى لو ما كان عندي كتات ومتوفرت الامكانيات حلكي بدائل مثل مداسوي هسه.

قبل فتره جنت داريد ازرع بكتريا ومجان عندي اي مواد وبقيت ادور ولكيت بدائل استخدمت الجلي كبديل للاكار واستخدمت الماجي كبديل للميت اكستركت وبعد كم محاولة طلعت بنتيجه زينه.

داستخدم السيموليشنز كمختبرات افتراضية.


التعليم شي ممتع فوك متصور وخصوصا من تلكي طالب شغوف يشاركك هلرحلة. احب الاسئلة الي ماعرف اجابتها لان تخليني اعرف شنو هي الفجوات الي بمعرفتي عن موضوع معين.

ماكو سؤال غبي كل سؤال ممكن يبدو انه غبي لكن بعدين حيفتح عينك على شي مجنت تعرفه.


اذكر هلسنة جنت داشرح عن ال cell respiration فجان طالبة تسألني شغلة كلتلي استاذ انت تكول انو الدهون تنطي طاقة اعلى من الكاربوهيدرات ( الدهون 9 kcal/g بينما الكاربوهيدرات 4 kcal/g).

لعد ليش الحياة على الارض متستخدم الدهون كمصدر اساسي للطاقة وليس الكاربوهيدرات؟

شكراً جزيلاً ووجودك يسعدني

كلش شكراً الكم هم لان كل مسج ديجيني ديخليني احس انو فعلا داسوي شي وانو اكو ناس دتستمتع وياي.

واحب ارد عليكم واحد واحد رغم احيانا مالحك بس لانكم جزء من رحلة مستمرة من 8-9 سنوات


اتمنالكم ليلة ممتعة ويوم جديد لطيف.

هالمقالة تحجي عن فكرة دائما جنت افكر بيها بيني وبين نفسي، خصوصاً لما اشوف طلاب الدراسات العليا ومشرفيهم، اللي اغلبهم مقتنعين انه لازم يحصلون على نتائج ايجابية تأكد فرضيتهم. وما يتقبلون فكرة انه ممكن ما يحصلون اي نتيجة، او حتى يحصلون على نتائج تنفي الفرضية. بالحقيقة هذا بحد ذاته انجاز، لانك حتكون استبعدت فرضية خاطئة وهاي تعتبر نتيجة.

اعتقد هاي المشكلة ترجع لطريقة تعليم العلوم اللي من الاساس بيها خلل. لازم تعرف ان مو شرط كل تجربة تنطيك نتيجة ايجابية، واذا حصلت على نتيجة سلبية، هاي تعتبر نتيجة مهمة مو شي لازم تهرب منه أو ترفضه.

وترا عملية الحصول على النتائج مو شي سهل ابد. انت ما راح تحصلها من أول محاولة.حتجرب، وتخطأ، وتعيد وبعدين تخطأ مرة ثانية وتعيد. وهالشي يستمر الى ان توصل للنتيجة الصحيحة.


على كولت جينيفر " Research is messy and full of failed attempts. Trying to protect students from that reality does them a disservice."

https://youtu.be/d-z7sIgycuo?si=hPuSORPP6fx8yZ3l

عجز عقلي يفهم شنو افكارهم بعد النيرفانا لان ماكو شي واضح غير انها هي مرحلة تكون بيها بحالة سلام، متحرر من كل رغباتك والارتباطات الدنيوي والمادية ماكو موت ولا حياة.

"تنشأ المعاناة من الرغبة، والسبيل الوحيد للتحرر التام من المعاناة هو التحرر من الرغبة"

عجلة الحياة او الوجود السامسارا Samsara


على عكس كل الديانات اللخ، الفسلفة البوذية ما تؤمن بوجود جنة ابدية، الجنة هي مرحلة مؤقته حيمر بيها الشخص اثناء دورة الحياة والموت (السامسارا) حسب الكارما مالته الي جمعها خلال حياته.

الكارما هو مفهوم عند البوذيين  يشير الى افعال الشخص سواء كانت أفعال زينة او سيئة  وشلون هلافعال حيكون الها أثر مستقبلي على هلشخص.

انت خلال حياتك حتسوي هواي اشياء بعضها زين (كارما ايجابية) وبعضها موزين (كارما سلبية) هلكارما حتجمعلك وبعد موتك حسب الكارما مالتك حيحدد مصير ولادتك القادمة (بواحد من العوالم الـ6 الجوه شرحتهم).

وحتبقه تمر بهلدورة، دورة السامسارا الى ان توصل لمرتبة التنوير او النيرفانا وهي مرحلة التحرر من كل رغباتك، بعد اتباع الطرق الثماني والحقائق النبيلة والتخلص من السموم الثلاثة (الشهوة، الجهل، الكراهية).


مراحل السامسارا :

1- الدائرة الي بالوسط : تحتوي على تلث حيوانات وهي الخنزير الي يرمز للجهل والديك للشهوة او الرغبة والافعى للكراهية.

2- الدائرة الثانية : تظهر اشخاص بعضهم يرتقي الى اماكن اعلى (الجنة) بسبب اعماله الزينه بالحياة، وبعضهم يوكع الى عوالم ادنى بسبب اعماله السيئة (الكارما).


3- الدائرة الثالثة (العوالم السته) :

تمثل 6 عوالم للوجود وهي :

- عالم الآلهة : المكان الي يعيش  بيه الكائنات بسعادة مؤقته.

- عالم انصاف الآلهة : مليء بالصراعات والغيرة والحسد

- عالم البشر : المكان المناسب للتحرر من السامسارا

- عالم الحيوانات : حيث حياة الجهل والخوف

- عالم الارواح الجائعة : عالم مليء بالجوع والرغبة الي متشبع

- عالم الجحيم : عالم المعاناة والعذاب


4- الدائرة الي بالحافة الخارجية :
هلدائرة بيها الارتباطات الـ 12 الي تمثل افعالنه الي تخلينا مستمرين بدورة السامسارا .


والي شايل العجلة هو الشيطان الي يعرف بالـ demon of impermanence الي يرمز للتغير المستمر، ماكو شي بالحياة دائم لا السعادة ولا الالم ولا العلاقات ولاشي.

مخالبه واسنانه ترمز الى انو كلشي هو تحت سيطرة الزمن والتغير وماكو هروب من هلدورة الا بالتحرر الروحي والوصول للنيرفانا.

وهم يبرز عندك بالصورة فوك بوذا خارج دورة السامسارا بعد ان وصل لمرحلة النيرفانا.

#الحقائق_الاربعة_النبيلة

كل المدارس البوذية تشترك بيها ويا تغيرات بسيطة كلش :

1- كل الحياة معاناة : فالموت معاناة والمرض معاناة والفقر معاناة ..الخ.

والمعاناه ممكن هم تجي من الاشياء الي نحبها لان ماكو شي دائم، فكلشي ينطينا السعاده حيجي يوم وينتهي ويروح. وكل الملذات مؤقته وكل ما استمتعت وتعلقت بيها، كل ما راح تفتقدها وتعاني من تنتهي.

فبوذا يكول "ماكو شي يدوم للابد".

2- سبب المعاناة هو الرغبة

فالمعاناة تجي من الرغبة او "العطش"او "الجشع" رغباتنا دائماً حتخلينا نجاوز ثرواتنا ومواردنا المتوفره وتخلينا نحس بتعاسه وشعور عدم رضا. كل المعاناة تنبع من الرغبة، لكن مو كل رغبة تولد المعاناة، الرغبة الانانية بس هي الي تسبب المعاناة لان رغبه موجها لصالح الفرد نفسه بدل من مصلحة الكل.

3- وقف الرغبة تسبب بانتهاء المعاناة :

فملازم نتعلق بشي لان كل ما زاد تعلقنا بشي فهلشي حيخلينا نعاني بمرحلة ما. فكرة الحقيقة الثالثة هي عدم التعلق بشي والقبول بالتغيرات لان ماكو شي ثابت وكلشي بالحياة يتغير بما فيها احنا البشر بعد كم سنة حنكبر ونموت وينتهي كلشي.

4- اتباع "الطريق النبيل الثماني" يؤدي الى نهاية المعاناة "

علم بوذا اتباعه ان اتباعهم هل طرق الـ8 يخلصهم من المعاناة وهاي الطرق هي :

الكلام السليم  والعمل السليم والجهد السليم والتركيز السليم والنية السليمة والكلمة السليمة والنظر السليم والذهن السليم.


ومثل ما علم بوذا اتباعه شلون يتخلصون من المعاناه علمهم الحكمه والصبر والكرم وفضائل لخ وتعرف هلتعاليم بأسم " الدارما".

كل البوذيين يعيشون حسب 5 قوانين اخلاقية والي تحظر هلقوانين :

1- قتل الاشياء الحية.
2- اخذ شي بدون ان ينطيكيا احد.
3- سوء السلوك الجنسي.
4- الكذب
5- شرب المخدرات والكحول

سبب لاخ للابتسام هذا اليوم
شكرا لانكم جزء من ساينز.

اكو ناس مخرفه مالين الانترنت يعتقدون انو الانوناكي هما كائنات فضائية اجتي من كوكب نيبيرو او يسموه كوكب اكس زارت الارض واستعبدت البشر وسخروهم لاستخراج الذهب ومدري شنو وشكو شي غامض يربطوه بيهم.

يمكن تكون ثورة الايجيجي هي اول ثورة بتاريخ الحضارة.

منو هما الانوناكي؟

الانوناكي Anunnaki هما مجموعة من الآلهة ظهر ذكرهم لاول مره بالميثولوجيا السومرية وبوقت لاحق تم دمجمهم بالميثولوجيا الاكدية والبابلية والآشورية.

كلمة انوناكي تترجم الى "اؤلئك الذين اتو من السماء" او الى "ابناء الآلهة".

يقال ان الانوناكي جانوا ابناء الإله آنو (إله السماء وزعيم الآلهة) واخته كي (آلهة الارض الي بعدين اندمجت ويا شخصية ننخرساج).
آنو وكي كانو ابناء انشار وكيشار (المحور السماوي والارضي) الي بدورهم ابناء لخمو ولخامو والي بدورهم يكونون ابناء تيامات وابزو (الالهة الاولى).

زواج كي من اخوها الإله آنو ادى إلى ولادة الانوناكي اولهم الإله انليل (إله الهواء) الي فصل السماء عن الارض، قبل انليل جانت السماء والارض مينفصلون عن بعض لكن انليل من ولد ابعد ابوه آنو الى السماء وامه كي الى الارض.

الانوناكي هما مجموعة من 7 إلهة، واسمهم مشتق من اسم الاله آنو :

إيا / انكي إله الحكمة
إنليل / إله الهواء والرياح
نينخرساج / إلهة الارض
سين إله القمر
اوتو إله الشمس
عشتار/ إنانا إلهة الجنس والخصوبة والحب
آنو إله السماء.



ظهر ذكر الانوناكي باسطورة الخلق البابلية بعد ان خلق الإلهه مردوخ البشر وزع الانوناكي بين السماء والارض 300 بالسماء و300 على الارض.

كان دور الانوناكي هو ادارة العالم وتنظيمه وعدهم مساعدين اسمهم الايجيجي igigi، وبالحقيقة العلاقة بين الانوناكي والايجيجي مو كلش واضحه يعني احيانا يظهر الايجيجي انهم إلهة اقل مرتبه من الانوناكي واحيانا يتساون وياهم.

كان وظيفة الايجيجي هو خدمة الانوناكي باعتبارهم الآلهة الاصغر، فكانوا مكلفين بالعناية بلارض وحفر قنوات المي وكل الاعمال الشاقة.

لكن بمرحلة ما طفح الكيل بيهم وقرروا يثورون على الانوناكي لذلك تركو شغلهم وراحو احتجو يم الإله انليل وطلبو منه ان يلكي الهم حل، وبعد اجتماع الإله انليل ويا بقية الآلهة من الانوناكي قرروا يخلقون البشر ليقوم بهلوظيفة.

جمع الإله انليل الطين من ضفاف نهر الفرات واضاف اله دم الإله "كينغو" واحد من الإله المتمرده وخلق منه اول البشر ليكونون عبيد للإلهة وليسون بمكانهم المهام الشاقة.

سبب موت البشر حسب اساطير بلاد الرافدين

اسطورة آدابا وطعام الحياة


كان آدابا واحد من الحكماء السبعة الي حكمو الارض (الابكالو) قبل الطوفان وكان ملك مدينة اريدو.

بيوم من الايام كان ديصيد بالخليج العربي وهبت رياح قوية كلبت القارب مالته بالمي.

هلشي خله آدابا يصير عصبي ويلعن الرياح، وبسبب هلشي الرياح توقفت لمدة 7 ايام.

من سمع إله السماء آنو بالموضوع طلب آنو يجيبوله آدابا ليشرحله السبب ليش سوه هيج.

وقبل ان يلتقي آدابا الاله آنو إله السماء، نصحه الإله إيا (انكي) إله الحكمة الي خلق آدابا وانطاه الحكمة نصحه شلون لازم يصرف كدام آنو.

كله اذا قدملك آنو اي اكل وشرب لاتاكله ولا تشرب لان هذا طعام الموت وشراب الموت. ولكون آدابا يثق بإيا سمع كلامه.

وفعلاً بعد ان حضر آدابا كدام انو قدمله الاكل والشرب ولكنه رفض، لكن بسبب فعلته هاي رجع آدابا ليعيش على ارض كانسان فاني لانه رفض اكل وشرب الحياة.

نهاية الاسطورة تكول الاله آنو عاقب الاله إيا لكن ليش وشنو سبب؟ هلشي مواضح البعض يكول لان الاله إيا قشمر آدابا.

والبعض يكول لان فعلاً كان الاكل والشرب الي قدمه آنو لآدابا هو طعام وشراب الموت لذلك آنو عاقب إيا لان حذر آدابا.


زين ليش إيا سوه هيج؟

يمكن لان كان إيا يعتقد انو الفرق بينه وبين آدابا هو فقط كون آدابا بشر فاني وايا إله خالد ،لذلك منعه من ان يوصل للخلود هو وذريته.

هلقصة نفسها نفس قصة يهوا الي نزل ادام وحواء للارض بعد ان اكلوا من شجرة المعرفة وليمنعهم من التقرب من شجرة الحياة الي لو تقربولها حيكونون نفسهم نفس الاله بدون اي فرق.

يكول يهوا " هوذا الانسان قد صار كواحدٍ منا عارفا الخير والشر والان لعلهُ يمدُ يده وياخذ من شجرة الحياة ايضا وياكل ويحيا الى الابد"

بقت اخر قصة واروح انام اعتبروها داسولفلكم قصص قبل النوم.

بازوزو هو آله شيطاني بابلي/آشوري ينتمي للعالم الاسفل (المكان الي يعيش بيه الشياطين) يتحكم بالرياح الغربية والجنوب غربية الي تسبب المجاعة بموسم الجفاف وبموسم الامطار العواصف والجراد.
ولكونه كان هو المسبب للرياح والدمار فكانوا البابليين والاشوريين القدماء يعتقدون بانه عنده نفس القدرة بحمايتهم منها هم لذلك كانوا يصلون اله حتى يحولون ميوله للخير.
مصطلح شيطان "demon" بايامنا هاي دائما يرتبط بالشر لكن بالحقيقة قبل الموضوع ما كان هيج ابداً، فكلمة شيطان الانكليزية demon هي جاية من كلمة اغريقية قديمة الي هي daimon والي تعني روح spirit وهاي الروح ممكن تكون صالحة او شريرة حسب.لذلك النظرة القديمة للشياطين كانت هي انهم مو اشرار دائما، بعضهم كان يسوي اعمال صالحة.فمثلا عندك بازوزو كانوا يستدعوه للحماية من الشر وبشكل خاص بحماية النساء الحوامل والاطفال من الالهة الشيطانة لامشتو الي كانت تاخذ الاطفال الي ما ولدوا والاطفال الي يرضعون من امهاتهم.
بحضارات بلاد الرافدين القديمة والحضارات اللخ مثل المصرية غالبا ما كانت الالهة هم تدز الشياطين كعقاب على الخطيئة او لتذكير شخص بواجبه اتجاه الالهة او الاشخاص الاخرين بالمجتمع.

#مثيولوجي

حروح انام واني مبتسم شكراً

اتمنالكم يوم لطيف نلتقي بوقت لاخ

تحب العلم وخليتنا نحب العلم وياك ممتنين لوجودك

من الشي المُمتن بيه بنفسي اني شخص عنده حب يتعلم هواي شغلات فغالبا كل فتره تلكيني حاط تركيزي على شي وابقه اتعلم عنه فتره ووراها انتقل لشي جديد.

يمكن هلشي واضح هنا تشوفني فتره ابقه مركز على شي موضوع ووره فتره احول اهتمامي لموضوع لاخ.

واحسها هاي ميزه الي تخليني ما اتشتت بهواي اشياء بوقت واحد.

محاضرة لخ عظيمة لهارفارد شكراً يا هارفارد لان دتنشرون هلمحاضرات العظيمة مجاناً.

بالفديو الفوك جان ديحجي عن الاسباب المختلفه الي ممكن تخلي الشخص يصاب بلاكتئاب.

تعددت الاسباب والداء واحد

انواع الاكتئاب

الفرق بين مستويات النشاط بمناطق الدماغ بين الشخص العادي والمكتئب

بعض تأثيرات الاكتئاب على مناطق الدماغ


الاكتئاب هو اضطراب مزاجي ياثر على طريقة التفكير والشعور والتصرف.
ويسبب مشاعر الحزن واليأس الي ممكن تستمر من ايام الى سنوات.

وهلشي طبعا يختلف عن الانزعاج او خيبة الامل الانتكاسات البسيطة الي يتعامل وياها اغلب الناس بحياتهم اليومية.
فالمكتئب هو شخص يعاني فعلاً من مشكلة حقيقية.
بعض الناس ممكن يعاني من اكتئاب خفيف بينما البعض ممكن يتعرض لنوبات حادة على مدار حياتهم، وهذا النوع يكون اكثر خطورة ويستمر لوقت طويل ويكون قوي اسمه الاضطراب الاكتئابي الشديد MDD.


اكو 3 اجزاء بالدماغ ياثر عليها الاكتئاب وهي الحصين hippocampus و اللوزة amygdala والقشرة الامام جبهية prefrontal cortex

الحصين مكانه قريب من مركز الدماغ، يخزن الذكريات وينظم انتاج هرمون الكورتيزول cortisol.
يفرز الجسم الكورتيزول باوقات التعب والاجهاد البدني والعقلي واوقات الاكتئاب هم.
لكن المشكلة هو من يتم انتاج وارسال كميات كبيرة من الكورتيزول الى الدماغ بسبب شي حدث مرهق بدنيا او عقليا او بسبب خلل كيميائي بالجسم.
بدماغ الشخص السليم يتم انتاج خلايا الدماغ او الخلايا العصبية طول حياة الشخص البالغ بجزء من الحصين اسمه dentate gyrus.
لكن الاشخاص الي يعانون من الاضطراب الاكتئابي الشديد وبسبب زيادة مستوى الكورتيزول عدهم يسبب هلشي ابطاء انتاح الخلايا العصبية الجديدة وبالتالي تقلص الخلايا العصبية بالحصين وهلشي ممكن يسبب مشاكل بالذاكرة.

قشرة الامام جبهية مكانها هو بمقدمة الدماغ وهلمنطقة مسؤولة عن تنظيم المشاعر واتخاذ القرارات وتكوين الذكريات.
من يتم انتاج كميات كبيرة من الكورتيزول cortisol القشرة الجبهية تتقلص هم.

اللوزة هي جزء من الدماغ مسؤول عن الاستجابات العاطفية مثل الشعور باللذة والخوف.
الاشخاص الي يعانون من MDD تكون عدهم اللوزة الدماغية متضخمة واكثر نشاط نتيجة التعرض لمستويات عالية من الكورتيزول.
وتضخم اللوزة وفرط نشاطها والنشاط غير طبيعي للاجزاء اللخ بالدماغ يتسبب باضطرابات بالنوم والنشاط للشخص المكتئب.
وهلشي ممكن يتسبب بافراز الجسم هم لكميات غير منتظمة من الهرمونات والمواد الكيميائية اللخ والي تسبب مضاعفات اكبر.
مستويات الكورتيزول المرتفعة هي الي تلعب الدور الاكبر بتغير البنية الفيزيائية والانشطة الكميائية للدماغ وهلشي هو الي يتسبب بلاضطراب الاكتئابي الشديد.

بالعادة عند الاشخاص الطبيعي تكون مستويات الكورتيزل الصبح كبيرة وتنخفض بليل، اما عند المكتئبين تكون مرتفعة دائما حتى بليل.

اعذر اخاك النعسان مو بيده الموضوع.

تخيل ان سبب اكتئابك وامراضك وبؤسك بالحياة انك مدتنام بشكل كافي.

هلمحاضرة مقصرت بشرح تأثير قلة النوم على جهازنا المناعي والسمنة ومودنا وقدراتنه المعرفية والذاكرة والاصابة ببعض الامراض العصبية.

داسويلكم واهس تطبون تشوفوها وياي لان اني داتعشه وداباع ومستمتع.

فيلم الليلة الممتع كلش

https://youtu.be/jwZpVpV71Fg?si=ZlAsPHszy53yCRYn

..

مره لخ

داتخيل زوجتك بالمستقبل تكولك : اوكي محنتعارك هسه لان دنيا ليل وانت هسه بنص دماغ باجر الصبح نتفاهم.

فرحت
حتى نتساوى حتى بهاي 😈

الدورة الهرمونية اليومية للرجل وتقلص الدماغ

خلال اليوم الهرمونات السترويدية steroid hormones (التستوستيرون testosterone والكورتيزول cortisol و الاسترادايول estradiol)  تتغير مستوياتها بين النهار والليل بجسم الرجل وهلشي حسب البحث الجديد ممكن يرتبط بتغير  او تقلص حجم الدماغ خلال اليوم.

الدراسة تمت على دماغ بعمر 26 سنة تم تصويره بال MRI على مدى 30 يوم باوقات مختلفه من اليوم عند ال 7 صباحا و 8 مساءا.

خلال النهار والليل تنخفض الهرمونات السترويدية بنسة 70% بالجسم، لاحظ الباحثين انو اثناء انخفاض هلرمونات بالجسم كان الدماغ يتقلص حجمه ويقل تثخن طبقة القشرة cortex الطبقة الخارجية للدماغ (وتحديدا المنطقتين occipital و parietal cortices). وهم لاحظو انخفاض بحجم المادة الرمادية  gray matter بنسبة 0.6% والي تحتوي على اجسام الخلايا العصبية والتشجرات وبعض المحاور والها وظيفة جدا مهمة بمعالجة المعلومات والذاكرة والتعلم والحركة.

وهم عانت مناطق لخ بالدماغ من هلتقلص مثل المخيخ cerebellum وجذع الدماغ brainstem والحصين  hippocampus وهي مناطق متخخصة بتنسيق الحركي وتوصيل المعلومات بين الدماغ والجسم والذاكرة.

 
الدراسة حسب قول الباحثين لسه ما اكدت اذا كان هلتاثير بُبنية الدماغ هو تأثير مباشر لتغير الهرمونات ام اكو سبب لاخ.

الموضوع يحتاج ابحاث اكثر لتسليط الضوء على هلشي وهلامر متروك للمستقبل.

بعد سنتين
كل عام وانت بالف خير

البحث مالت جامعة نيويورك عن الذاكرة بالكبد واستخدمته بفد essay 👈🏻👉🏻

اف كل ما اتذكر تضحية الخلايا اتذكر شكد اني شخصية مهمة

انتظر الايام اللي عدنا بيها محاضرات احياء لان بكل مرة اعرف مراح نلتزم بالمنهج وراح تسولف لنا ع اشياء ممتعة، تحسسك مو وحدك تفكر بيها واكو ناس تفكر بيها وياك Mental pleasure to learn, not just to memorize رغم ضيق الوقت

وهم تذكر انك مو وحيد بهلعالم اكو تريليونات الخلايا دتشتغل لاجلك، دتجاهد لتبقيك على قيد الحياة.

تعرف باليوم كم خلية تموت بس حتى لا تأذيك؟ لو كم خلية تشتغل 24/7 لتدافع عنك ضد كائنات دتحاول تأذيك و لتوفرلك احتياجاتك من البروتينات والهرمونات والانزيمات وال ATP وغيرهم

انت 30 تريليون خلية واعية لذاتها ! وهذا ممكن يكون اعظم شي انوجد بتاريخ الكون

https://t.me/science9897/7236
نفسها
المنشور دافئ كلش
اتذكر وقتها شاركته وي كل الي اعرفهم

احب فقرة لما تشرح شي طويل
اخلي وياها lofi sounds مطر وادرس 😭

اذكر هلسؤال مره سالته هنا هم يمكن وحجينا عنه.

استااااذ مره سألتنا سؤال عن اذا نيزك سقط على المريخ هل راح يصير صوت لو لا؟ و شرحتنا عن الصوت و الترددات و جنت مستمتعه بالسؤال و تقريباً سألته لكل الي اعرفهم و لازك براسي و احبه مادري ليش

BTW شفتك اليوم واني راجعه من الدوام استاذ فرحتتتت كفختني الذكريات

https://t.me/science9897/7236



احب هذا المنشور كلش هواي

شنو ممكن يكون افضل بوست او شي قريته بساينز لهلسنة متكدر تنساه؟

@Ashraf989798bot

قائمة البكتريا الي تشكل خطر بمقاومتها المتزايدة للمضادات الحيوية

داحجي واني نصف نايم باجر اكمل.

سموها ببكتريا العراق لان جانت تصيب الجنود الامريكان خلال الحرب العراقية من يتعرضون للجروح.

مساء الخير شباب هاي الحالة وصلتني على بوت القناة.

ححاول اساعد بالي اكدر عليه والي يكدر يساعدها خلي يساعد.

السلام عليكم ربي يحفظ الجميع وتكونين بخير وصحة وسلامة
اني طالبة وعندي ابني مصاب ب سرطان عظم الساق واني المعيلة الوحيدة اله والدة اتوفى قبل 6 سنوات وعلاجاته كلش غالية ومدا اكدر اشتري العلاجات واني طالبة والله حتى تلفوني سماعته مكسورة استحي من يتصلون صديقاتي بيه وما اكدر ارد عليهم  الله يشهد بعت اكثر من غرض ابيتنه حتى اوفرله العلاج واشوفة ما يعاني
حالته كلش تعبانه ودا انتهي من اشوفه هيج وما اكدر اشتري العلاج 💔💔
علاجه يكلف 220 الف كل شهر
اني خياطة ماهرة واحب اشتغل ب التطريز والخياطة بس مكينه ما عندي الي يكدر يساعدني حتى اشتري مكينه واشتغل حتى اكدر اجيب العلاج المكينه مال خياطة سعرها 400 الف
تقاريره كلهن موجودات عندي
الي يحب يتبرع سويت زين كاش او ماستر او عن طريق الرصيد واكون ممنونه للي يتبرع ولو بالف دينار
والله يجعلها في ميزان حسناتكم يارب العالمين
هذا معرفي للي يحب يستفسر اكثر @Mary_11m11

الباحثين والعلماء بعلم النفس لازم يدرسون ظاهرة الاكتئاب المعرفي مثل ما احب اسميها ليش الواحد من يتعلم هواي شغلات يضوج لان يحس نفسه مديتعلم بشكل كافي وهواي اكو شغلات محيلحك يعرفها قبل لا يموت.

وتصبحون على الف خير نلتقي بوقت ما.
واكيد قبل نهاية هلسنة.

لاتنسون شديصير هسه، ولو اني فعليا هسه صدك ميت برد لان مصيف.

فلكياً اليوم اول ايام الشتا.

الميكانزم بشكل بسيط :

ميكانزم نقل الليبوبروتينات من السايتوبلازم الى الغشاء الخارجي outer membrane

اول بداية يتعرف المعقد LolCDE على الليبوبروتينات LP وينقلهن للمنطقة الي موجوده بين الغشاء البلازمي والغشاء الخارجي او periplasmic space وهاي العلمية تحتاج الى طاقة تتحصل من تحليل ال ATP.

بعدين يجي الشابيرون Lol A ( بروتين مرافق وظيفته يساعد البروتين باخذ الشكل الثلاثي الابعاد 3D structure و ) يرتبط بال ليبوبروتينات ويوديها لل LolB الي موجود بالغشاء الخارجي.

ال LolB  دوره هو حشر الليبوبروتينات بالمكان الصحيح بالغشاء الخارجي والتأكد من قيامها بوظيفتها proper localization and function.

ال lolamicin يداخل ويا شغل المعقد LolCDE ويمنعه من نقل الليبوبروتينات.

تخيل امنيتي بالحياة بيوم اسمي ينزل ببحث ب Nature او Science !

وداشتغل على نفسي هواي لاحقق هلامنية.

تأثير ال lolamicin

الفرق بين جدار البكتريا السالبة والموجبة لصبغة غرام

مضاد حيوي جديد ممكن ان يميز بين الاصدقاء والاعداء

مو كل البكتريا ممكن تسببلنا الامراض اكو بامعائنه تعيش اكثر من 35000 نوع من انواع البكتريا المفيدة والطبيعية (نورمل فلورا ) normal flora والي مهمة كلش لصحتنه والها ادوار بغاية الاهمية.

لكن كان لوقت طويلة اكو مشكلة هو انو المضادات الحيوية antibiotics  الي ناخذها كعلاجات من ننصاب بوحده من البكتريا المرضية  هي ادوية غبية ما تكدر تميز وتقتل البكتريا المرضية فقط وانما تقتل حتى البكتريا المفيدة هم وهلشي طبعاً اله تبعات وتأثيرات على صحتنه وممكن يخلينا اكثر عرضة لالتهابات الجهاز الهضمي gastrointestinal infections.

#بحث_جديد

بورقة بحثية جديده منشور على مجلة Nature يكول الباحثين انو كدروا يتعرفون على على مركب جديد يكدر يميز بشكل انتقائي ويقتل البكتريا المرضية عن البكتريا المعوية الطبيعية، وهلشي ممكن يفتح الباب لتطوير مضادات اكثر انتقائية بالمستقبل تستهدف البكتريا المرضية فقط.

تصنف البكتريا حسب تركيب جدارها الخلوي cell wall structure  الى بكتريا موجبة غرام Gram-positive وهاي عدها طبقة سميكة من الببتيدوكلايكان وبكتريا سالبة غرام Gram-negative وهاي عدها طبقة ارق من الببتيدوكلايكان لكن عدها غشاء خارجي هم مكون من الليبوبوليسكرايد lipopolysaccharide.

البكتريا سالبة غرام عدها طبقات حماية اكثر من موجبة غرام لذلك جان استهدافها عملية صعبة، اغلب المضادات تشتغل على الموجبة غرام وبعضهم يشتغل على الاثنين broad-spectrum antibiotica لكن قليل من المضادات الي يكدر يستهدف السالبة غرام فقط.


#نقطة_الضعف

الليبوبروتينات lipoproteins او البروتينات الدهنية هي مركبات موجوده بالغشاء الخارجي للبكتريا السالبة غرام وتعتبر مكونات جداً مهمة للخلية البكتريا والها ادوار مختلفة فهي تحافظ على هيكلية الخلية وتساهم بنقل المواد والها دور بامراضيتها وتفادي الجهاز المناعي والتصاق الخلية البكتريا على الاسطح وحمايتها من تأثير المضادات الحيوية.

ببحوث سابقه كدر الباحثين ان يعرفون ان نظام نقل الليبوبروتينات من سايتوبلازم الخلية البكتريا (مكان تصنيعها) الى الغشاء الخارجي outer membrane موجود بشكل حصري عند البكتريا السالبة غرام، ولكه الباحثين ان جان اكو اختلافات جينية بين البكتريا المرضية والطبيعية وكل وحده منهم جان يحمل شوي بروتينات مختلفه عن بعضها.

لذلك فكر الباحثين ممكن يكون نظام Lol system هدف علاجي محتمل لاستهداف فقط النظام الي عند البكتريا السالبة غرام المرضية وليست الطبيعية.

وبعد اختبار عدة مركبات لكو مركبين ممكن تكون مرشحه لتثبيط هلنظام وهي pyridinepyrazole and pyridineimidazole وبعد تعديلها عن طريق اضافة مجموعة أمين amine groups كدروا يتوصلون لصيغة كيميائية اثبتت قدرة على تثبيط النشاط البكتيري سمو المركب باسم لولاميسين lolamicin.


وبعدها اختبر الباحثين اللولاميسين بالمختبر على بعض السلالات البكتريا السالبة غرام المرضية والي تظهر مقاومة متعددة للمضادات multidrug-resistant strains مثل Escherichia coli و Klebsiella pneumoniaeو  Enterobacter cloacae اظهر العلاج فعالية ضدها وبشكل انتقائي مقارنة بالبكتريا الطبيعية السالبة والموجبة.

بعدها انقلو للتجارب السريرية  in vivo على الفئران اصابوها ببكتريا متعددة المقاومة للمضادات وقسموهن الى مجموعتين مجموعة حقنوها بال lolamicin ومجموعة وما حقنوها لكو بعد 3 ايام ان المجموعة الي اخذت ال lolamicin كدرت تنجو على عكس المجموعة الي ما تم حقنها والي ماتت.


يدرك الباحثين اصحاب هلبحث انو المقاومة لهلعلاج حتكون شي حتمي ولا مفر منه، لكنهم يتأملون باستخدامه الصح وبامكانية تعديله ممكن التقليل من هلشي.

ويتأملون انو هلبحث يفتح الباب كدام بحوث مستقبلية لتطوير واستشكاف مضادات انتقائية ضد البكتريا المرضية.

العلاج حينقل للتجارب السريرية وكدامه وقت قبل ان يكون متوفر.

هاي شنو معقولة اني اخر مره كاتب عن شي جديد بهلمجال من 2022 وواني عبالي مصارلي اشهر.

صدك السنوات دتركض ركض.

عموما خبر جديد...

تذكرت هلمقال جنت داقراه قبل اسبوع عن الذاكرة المكانية للخلايا وبوكتها حسيت نفسي فهمت الموضوع. والبارحه انصدمت بشي جديد👆، نبقى دائما نكول :

" كلما عرفت عرفت إنني لا اعرف"

#الاستجابة_المشروطة Conditioned Response


الاستجابة المشروطة هي استجابة الكائن لمحفز معين بعد تكرار ارتباطه بمحفز اخر.

مثل الاطفال الصغار دائما يسمعون صوت الباب وهو ينفتح من يرجع ابوهم من الشغل، فيتكون عندهم ارتباط بين صوت فتح الباب ورجوع الاب، لذلك يصيرون كل ميسمعون الباب وهو ينفتح يتوقعون ان ابوهم اجه.
وبالحقيقة احنا بحياتنه عدنا استجابات مشروطة لهواي محفزات تحيط بينه.


الاستجابه المشروطة هي جزء من نظرية التكييف الكلاسيكي الي اكتشفها "Ivan Pavlov" اثناء دراسته استجابة لعاب الكلاب، لاحظ ان على الرغم من الكلاب يسيل لعابها بشكل طبيعي من يكون الاكل بحلكها، كان لعباها هم يسل من تشوف الاكل قبل لا تاكله.

ولكه ان بعض الكلاب طورو استجابة انو لعابهم يسل لمجرد سماعهم صوت رجل "قدم" الشخص الي يقدملهم الاكل.

لذلك استنتج ان استجابة اللعاب الي كانت طبيعية صارت استجابة مشروطة لحافز كان محايد سابقا (صوت مشية الشخص الي يقدم الاكل).

وسوه تجربه لخ جاب بيها كلب وكان يشغل ضوه وبعدين ينطي الكلب اكل ورها بثواني، وبقه يكرر بهلعملية الى ان صار الكلب يربط بين الضوه والاكل، لذلك طور الكلب استجابة مشروطه للضوه، واكنت استجابته نفسها حتى عند عدم تقديم الاكل اله.


تدري ان الاستجابة المشروطة شائعة بحياتنا اليومية، مثلا شخص متخرج لكن كل ميشوف كتب او ملازم يجي شعور بالقلق والخوف لان يتذكر ايام الامتحانات او شخص ركض وراه كلب وعضه بطفولته وهلشخص طور استجابة مشروطة وصار يخاف بكل مره يسمع او يشوف بيها كلب حتى وان ما هاجمه.

#الفوبيا_ والاستجابة_المشروطة

هواي من انواع الفوبيا او الرهاب الي نعاني منها ممكن تكون هي ردود مشروطة لمحفزات معينة، والشي الحلو هو انو ممكن نستخدم هلردود المشروطة للتخلص من بعض انواع الفوبيا.

فمن خلال التكيف الكلاسيكي ممكن للشخص ان يتخلص من مخاوفه بشكل تدريجي ومنهجي.

على سبيل المثال لو ان اكو شخص خايف من المرتفعات، فحتى يتخلص من هلخوف يبدا يصعد ارتفاعات صغيره وشوي شوي يدرج الى ان يوصل لارتفاعات عاليه ويكون تخلص من خوفه.

#التخلص_من الاستجابة المشروطة

الفرق بين الاستجابة المشروطة وغير المشروطة، هو ان الغير مشروطة تصير بشكل تلقائي بدون تعلم ورد فعل طبيعي.

اما المشروطة فهي يتم تعلمها واكتسابها من خلال الربط بين حافز غير مشروط ومحفز.

الاستجابة المشروطة ممكن تختفي، فمثلا لاحظ "Pavlov" ان الكلب بعد ان طور رد مشروط على الضوه.

لكه ان بعد ان يشغل الضوه عدة مرارت وبشكل متكرر وما اطه للكلب اي اكل، فالكلب حيبدي يتخلص من الرد المشروط بشكل تدريجي الى ان يتوقف وحتى لعابه بعد ميسيل.

وهلشي ممكن يصير واقعيا هم، فتخيل الشخص الي كلنه عليه تعرض لعضه من كلب وطور رد مشروط، وصاير يخاف كل ميشوف الكلب.

لو ان هلشخص بعدها تعرض لعدة مواقف ايجابية ويا الكلاب فمن الممكن هلشخص حيبدا يتخلص من الرد المشروط ويرجع طبيعي.

اليوم  11/11 هو يوم العزاب العالمي لان مكون من بس رقم 1 الي يرمز للفرد الواحد.
#happy_singles_day

شكرا جزيلا شباب كلامكم كلش يعنيلي شكرا كلش وممتن على هلكلام.
وبودي ارد عليكم واحد واحد بس اليوم جنت ملود من ٩ الصبح لل٦ ونص العصر.

كلش شكرا من كل قلبي.

كل عام وانت بالف خير ساينز ويارب كل التوفيق والسداد بحياتك العلميه والاجتماعي انسان صاحب علميه مبهره وبهذه القناة هواي اتعلمت منكم ويارب كل التوفيق

اني جنت بيها من ٢٠١٧ تجنن والقناة الوحيدة اللي دخلتلها من حذفت حسابي

قناتك كلش مفيدة جعلها الله في ميزان حسناتك

الله شكد احس هاي القناة قريبة عليه وفد شي كلش نادر وحلو ولازم نحافظ عليه
ميلاد سعيد ساينز ان شاء الله تضل ويانا هالقناة طول العمر
جنت دائما حاطة ببالي انو هالقناة قدوة الي وبالمستقبل اريد اسوي فد شي مشابه الها بتخصصي ، شكرا اشرف 💗

ميلاد سعيد
قناة تعرفت عليها جديد
لكن واضح كم المجهود الي بيها
شاركت هواي منه ويه أصدقائي

أوف اني يمكن اقدم متابعة من ٢٠١٦ شهر ال١٢ ☠️
كلش جنت اريد أصير أدمن بالقناة لان اشرف انت نميت الشغف العلمي بيه بعد ماجنت تايهه ب بحر 🌊 الحياة العادية والمالها قيمة

☠️❤️HAppy birthday 🎁 for this great channel

متابعك من عمري ١٦ سنة وحاليا ٢٢ بصراحة يعني وجودك للأمانة كان اله فارق بحياتي عرفت هواي اشياء عن العلوم خاصة ايام البوستات بالفيسبوك وايام العراقي العلمي وكذلك الانستا ومن بعدها القناة صرت احب العلوم واتطلع دائما واتخصصت علوم كيمياء بغداد جدا ممتن الك يا اشرف

القناة الوحيدة الما يوم فكرت احذفهه وبقت وياي كل مايصير عندي وقت اتصفحهه قناة هادفة ومحتواهه لطيف واستاذ اشرف كلش helpful وانسان مُزكي لعلمه يارب يكون علمك متجدد ونافع ويجعله بميزان حسناتك 💙💙

ميلاد سعيد ساينز
ويارب كل الي تقدمه بميزان حسناتك لان كلش دا نستفاد اني متابعك من 2019 متخرج من الاعدادية و بوقتها مظاهرات والنت ينقطع ف ارجع اقرا بالقناة شروحات
وحاليا اني مدير قسم بأكبر شركة بالعراق

جنت ما احب الاحياء
ومن انضميت للقناة شفت بيها كومة معلومات وطلع الاحياء حلو 🥹 يومية قبل لا انام اكعد اتصفح بالقناة هواي معلومات تبهرني شكلي يكون هيج عليها 🤩

هواي قريت كتب بسببك وجنت ملهمي وايام التقديم على الكلية حصلت دفعة كلش قوية منك ومن حبك للقناة وكملت بتخصصي بالفيزياء ولحد الان أني على خطى نصائحك

مدري ليش محتفظة بهذه السكرينات، ولو هي من الانستا مو من قناة ساينز

شي اخر كلش احبه بهالقناة انو كل ما اسأل ترد
وكل ما اعلق تاخذ من وقتك حتى تجاوبني وهالشي كلش اقدره
تعلمت منك احب العلم ومشاركته

كل عام وهالقناة اعظم واجمل قناة صارلي ٦ سنوات بيها هواي تعلمت وهوايه اكتشفت.. وطبعا اشرف اعظم عراقي موجود بالبلد كله 🤎🤎🤎🤎🤎🤎الله يديمك

مادري صارلي شكد بهل قناة بس هواي دا استفاد منها و اتعلم معلومات جديده اشاركها وي اهلي و أصدقائي...إن شاء تستمر بأفادة اكبر عدد ممكن من الناس I'm proud that I was taught by you one day🤍🙏

HAPPY SCIENCE DAY 🖤🖤

اتذكر اول ما تابعت القناة
جنت خامس
مجان عندي موبايل
ف جنت داخلة القناة من موبايل والدي
وجنت كل ليل من يرجع اقرا
واخذ معلومات
والحمدالله هسه متخرجة علوم فيزياء
ومعدلي سادس جان 97.83
جان جزء من هالسبب
ف شكرًا

I admire this channel 😭💘💘💘
Happiest birthdayyyyyy to science

مونو، لازم مونو
لأنها هي الوحيدة اللي تجري بدمه you know...

بالمناسبة الخلية الي بالصورة هي المونوسايت monocytes

التجسيد الحقيقي لبيت عنترة :

يا عَبلَ حبُّكِ في عِظامي مَعَ دَمي
لمَّا جرت روحي بجسمي قدْ جرَى

شكرا

الفرق بعمر mRNA البدائيات والحقيقيات

"The good teacher is the one that gives you the tools to ask the right questions"

#Frances_Arnold

احفظ

#لغة_الحياة
#الجزء_الاول

بالنسبة لجزيء ال RNA العالم مكان خطر ومليء بلاحداث على عكس ال DNA الي ممكن يبقى لسنوات طويلة بصورة ثابته وبدون ان يتأثر، الوضع مختلف لل RNA عمره يكون كلش قصير يعيش فقط لدقائق (بحالة اذا ما كان مرتبط بجزيء اكبر منه) داخل الخلايا الي تصنعه اما خارج الخلية فهو عرضه للتحلل بواسطة الانزيمات الي تفرزها كل اشكال الحياة كوسيلة دفاعية ضد الفيروسات الي تستخدم ال RNA كمادة وراثية.


لكن اكو طريقة وحده فقط ممكن تخلي ال RNA يعيش خارج الخلية بدون ان يتأثر وهي عن طريق وجوده داخل الحويصلات الخارج خلوية extracellular vesicles (EVs) الي هي عبارة عن فقاعات تحتوي داخلها على RNA متحلل وبروتينات وبعض الجزيئات، على مدى عقود لاحظ الباحثين ان الخلايا تطلق هلفقاعات بشكل مستمر لكن جانت النظره الها هي انها مجرد اكياس قمامة تحتوي على جزيئات متحللة تتخلص منها الخلايا اثناء عمليات التنظيف الروتينية الي تسويها.


لكن كلشي تغير ويا بداية الالفينات قاد عالم الاحياء الجزيئي Hadi Valadi تجارب اثبتت ان بعض ال RNA داخل هلحويصلات بالحقيقة هو مو مجرد نفايات لا وانما يحتوي على تسلسلات sequences جانت تختلف عن الي موجوده بالخلية الي اطلقته وكان فعال وظيفيا واثبت فريقه هلشي عن طريق تعرض خلية بشرية لحويصلة اطلقتها خلايا الفئران تحتوي على RNA.

لكو ان الخلية البشرية اخذت ال RNA داخل الحويصلة وبدت تقراه وتصنع منه بروتين جديد ما معروف عند البشر ابداً!

وهلشي خله فالادي يستنتج ان الخلايا كانت تحط هل RNA داخل الحويصلات لتتواصل مع بعضها البعض ، ممكن تكون ستراتيجية تستخدمها لتحذر بعضها مثلاً الخلية تحذر جيرانها من التعرض لعامل ممرض او مواد كيميائية خطرة.

ومن وكتها وبفضل التطورات بمجال تكنولوجيا التسلسلات الي انطت قدرات للباحثين على فك تسلسلات الجزيئات الصغيرة من ال RNA ظهرت هواي ادلة تدعم هلنظرية الي خلاها فالادي.

بعض الباحثين يعتقدون انو ممكن يكون الRNA هو لغة مشتركة جزيئية تتجاوز الحدود التصنيفية بين الكائنات الحية، لغة مشفره تفهمها جميع الخلايا بغض النظر عن موقعها على شجرة الحياة.

#التسليم_بالوقت_المناسب

الدكتورة سوزان Susanne Erdmann من معهد ماكس بلانك جانت مهتمة بدراسة الاصابات الفيروسية لكائن وحيد الخلية يعرف بال Haloferax volcanii هلكائن يعيش بالبيئات الي تكون شديدة الملوحة مثل البحر الميت والبحيرات الملحية، هلكائن يرجع الى الفرع التطوري الثالث من شجرة الحياة اسمه الاركيا (حقيقيات النواة والبدائيات والاركيا).

اكتشف فريق سوزان اثناء دراستها انو ال H.volcanii كان ينتج حويصلات تحتوي على non-coding RNA مجان يشفر لاي شي داخل خلايا الاركيا وجان هلشي غريب لان الابحاث السابقة جانت تشير الى ان هلحويصلات حتحتوي على DNA.

الشي الاغرب انو سوزان لكت انو الاركيا جان عدها بروتين متخصص لتكوين هلحويصلات وادخال ال RNA داخلها وهلشي اثبتلها انو هلشي مو صدفة وانو الاركيا دتسوي هلشي لتتواصل ويا بعض والا فليش تستهلك طاقة لتصنع هلحويصلات؟

لكن ليش تستخدم ال RNA على عكس البقية الي تستخدم ال DNA؟

الي يميز ال RNA كجزيء لتوصيل الرسائل هو انو جزيء غير مستقر يستجاب بسرعة للتغيرات الديناميكية داخل الخلية وخارجها وعمره قصير (شتسوي بجزيء يبقى لساعات او ايام؟) وهلشي يعني تأثيره قصير هم وهلشي يخلي يتفوق على DNA الي تغيره كلش صعب ويحتاج لاجيال ليظهر تأثيره وكذلك عمره طويل وهذا يعني انو محيكدر يستجاب للتغيرات السريعه الي بالبيئة.
لذلك ال RNA يخدم الغرض بان يوصل الرسالة بين الخلايا بسرعة ويستجاب للتغيرات بسرعة.

لكن بالحقيقة اكو تساؤلات لسه تبقى لغز وممحلوله وهي انو على الرغم من ملاحظة خلايا الاركيا اللخ تستقبل هلرسائل بس هل هي فعلا حتتجاوب وياها؟ زين شلون حتتفاعل وياها الكائنات اللخ الي موجوده ضمن نفس المحيط البيئي هل حتقراها هم لو مجرد حتبتلعها بدون ان تعرف تفك تشفريها؟

بينما هلشي يبقى لغز بالنسبة لل H. volcanii لكن الباحثين كدروا يثبتون انو هلرسائل هي لغة مشتركة عبر شجرة الحياة.

عجبتني صراحة 😂

سبق وعلمتكم شوي عن لغة البكتريا

منو مستعد يتعلم لغة الحياة؟ لغة عالمية تحجي بيها ويا اي خلية حية وحتفهمك.

.

إلى أين تسعی یا گلگامش ؟ فالحياة التي تبحث عنها، لن تجدها ، إذ عندما خلقت الآلهة البشر، قدرت الموت عليهم، واستأثرت هي بالحياة، أما أنت يا گلگامش، لتكن معدتك مليئة دوماً، وكن مرحاً ليل نهار، وأقم الأفراح في كل يوم من أيام حياتك، وأرقص وابتهج نهار مساء، وأجعل ثيابك نظيفة زاهية، واغتسل بالماء، دلل الطفل الذي يمسك بيدك، وأسعد الزوجة التي بين احضانك فهذا هو نصيب البشرية.

..

..

..

..

اجت فكرة ببالي صار كم يوم مداتتركني
مثل متعرفون حضراتكم البلاستيك هو واحد من اكبر المشاكل البيئية الي دنعاني منها كل سنة ينتج البشر 360 مليون طن من البلاستيك! والمشكلة انو هلبلاستيك تحلله يحتاج لسنوات طويله توصل ل 500 سنة.

من كم سنة صارت بعض التطورات مثل اكتشاف بكتريا Ideonella sakaiensis الي لكوها تطورت لتنتج انزيم PETase الي تستخدم لتحليل نوع من البلاستيك يعرف بالبولي ايثيلين تيرفثالات هذا النوع يستخدم ببطالة المي والعصائر وعلب تعليب الاكل، البكتريا جانت عدها قدرة تحلله وتستخلص منه الكاربون الي تستخدمه للتكاثر والنمو، واكو محاولات لخ نجحت لهندسة بكتريا لتنتج انزيمات تحلل البلاستيك وفعلا اكو مصانع حاليا ولو بعدد قليل بس بدت تستخدم هلانزيمات لتدوير البلاسيتك الى مواده الاولية الي ترجع تستخدم لتصنيع البلاستيك.


الفكرة الي ببالي وكلش حاب اتفرغ وابحوش وراها هي انو ليش منفكر نهندس الطحالب مثل الدياتومات الي تغطي اغلب المحيطات لتنتج هيج انزيمات لتحلل البلاستيك. رغم نعرف هي لحد الان التطورات الي وصنالها ممكن متكدر تحلله بشكل كامل لكن على اقل الى مواده الاولية.

بس يبقى هنا سؤال هل هلشي حيخلي البلاستيك يكون ضرره اكبر؟ ام فعلا حيكون تطبيق مفيد؟

https://youtu.be/lL2ZwXj1tXM?si=gMPpGpm8EPbsSc-x

وهم تذكر انك مو وحيد بهلعالم اكو تريليونات الخلايا دتشتغل لاجلك، دتجاهد لتبقيك على قيد الحياة.

تعرف باليوم كم خلية تموت بس حتى لا تأذيك؟ لو كم خلية تشتغل 24/7 لتدافع عنك ضد كائنات دتحاول تأذيك و لتوفرلك احتياجاتك من البروتينات والهرمونات والانزيمات وال ATP وغيرهم

انت 30 تريليون خلية واعية لذاتها ! وهذا ممكن يكون اعظم شي انوجد بتاريخ الكون

 “Whenever you feel sad remember that your body contains trillions of cells and all they care about you.”

😂😂

.

*ال Bisphenol A موجود بمميات الاطفال*

ليش خلال مراحل تانر البنية تكول اطول من الولد؟

بالمناسبة البنية تدخل بمراحل تانر بعد عمر ال 8 والولد يتاخر بعد عمر ال9 او 10.

فخلال المرحلة الثالثة البنية يكون عمرها شي 12 ويزداد طولها باقصى معدل سنوي يوصل ل 8.12 سم.

الولد يدخل بعمر ال 13 ويزداد طوله باقصى معدل ليكون 5-8 سم.

لذلك خلال هلفتره البنيه تشوفها تكون اطول.

تغير عمر بدء اول حيض menarche عبر السنين بالنسبة لبعض الدول (امريكا، فرنسا، المانيا)

#الجزء_الثاني

شنو هي اسباب البلوغ المبكر؟

سبب سرعة البلوغ المبكر بالحقيقة ما ممكن ان نرجعه لعامل واحد فقط، اكو مجموعة كلش كبيرة من العوامل البيئية و الجينية والفسيولوجية الي تلعب دور مهم جداً.

تعتبر السمنة هي وحده من العوامل الي يعتقد انها الها دور مهم بالبلوغ المبكر.

بوحدة من الدراسات المنشورة سنة 2003 تضمنت فحص 1100 بنية من كان عمرهم 9 وبعدها من صار عمرهم 26 ; لكت ان البنات الي يعانن من السمنة تجيهن اول دورة شهرية بوقت ابكر من الضعاف، وكان هلاحتمال يزيد كل ميكون مؤشر كتلة جسمهم اكبر BMI كل ميزيد احتمالية تجيهم الدورة الشهرية قبل عمر ال 12.
الميكانزم وره تاثير السمنة ممكن يرجع لهرمون اللبتين leptin او ما يعرف بهرمون الشبع او السمنة هذا الهرمون تفرزه الانسجة او الخلايا الدهنية لتنطي اشارة بالشبع والتوقف عن الاكل.

لكن لهلهرمون هم دور بتحفيز افراز هرمون الكيسبيبتين kisspeptin، لذلك كل متكون البنية اسمن كل محيكون عدها اللبتين والكيسبيبتين اعلى وهلشي يزيد من احتمالية دخولها لعمر البلوغ اسرع.

لكن بالحقيقة السمنة وحدها ما تفسر كلشي، اكو عوامل لخ هم تاثر مثل هرمون الميلاتونين Melatonin او هرمون النوم هذا الهرمون جسمنا يفرزه بالظلام، ولهذا الهرمون قدرة على تثبيط افراز الكيسبيبتين لذلك كل ميزيد التعرض للضوء (سواء طبيعي او اصطناعي) كل ميكون مستوى الميلاتونين منخفض ومستوى الكيسبيبتين اعلى وبالتالي البلوغ اسرع.

وهلشي اثبتته ملاحظة انو اطفال الدول الاستوائية يكونون خلال طفولتهم معرضين اكثر للضوء لذلك يبلغون بشكل اسرع من الاطفال الي يعيشون بدول قريبة من القطبين حتى وان كانوا من نفس الخلفية الجينية.

التدخين هم اله دور بسبب احتوائه على الكادميوم cadmium ارتبط التعرض قبل الولادة للكادميوم بتسريع عمر البلوغ.

من الملاحظات المثيرة للاهتمام انو الاطفال الخدج premature infants يدخلون بمرحلة البلوغ اسرع من غيرهم وهلشي يمكن يرجع لكون هلاطفال يكون عدهم خلال مراحل الطفولة المبكرة نمو اسرع وهرمونات الاندروجينات اعلى.

#المواد_الكيميائية

اكو هواي مواد  كيميائية تسبب اضطرابات بالغدد الصماء endocrine-disrupting chemicals او اختصاراً EDs موجودة بكثرة بالبيئة المحيطة بينا وهي اما تكون طبيعية او مصنعه، غالبا تعرضنه الها يكون عن طريق المي او الاكل او حتى المنتجات الي نتسخدمها بشكل يومي. ومو بس هيج الEDs اثبتت قدرتها على ان تنقل من الام الحامل للجنين عن طريق المشيمة وبعد الولادة عن طريق حليب الثدي.

هاي المواد بعض الاحيان يكون تاثيرها تراكمي، فهي تجمع بلانسجة الدهنية fat tissues  على مدى فترات زمنية طويلة.

تأثر ال EDs بطرق مختلفة ؛ مثل ارتباطها بمستقبلات بعض الهرمونات وتاثر اما بشكل مباشر على مسارات الاشارات الخلوية signaling pathways او على الجهاز العصبي المركزي CNS ونظام الغد الصم العصبي عن طريق تثبيطها لتصنيع بعض الهرمونات، او بشكل غير مباشر بتاثيرها السمي على بعض الاعضاء.

فمثلا هلمواد ممكن ان ترتبط بمستقبلات  الاستروجين وتحفز نشاط انزيم aromatase  الي يصنع هرمون الاستروجين، او تاثر بشكل مباشر على هرمون GnRH والي يتسبب بتسريع البلوغ (او ممكن تبطئ البلوغ راجع الدراسة).

واحد من اكثر الDEs الطبيعية المعروفة هو الفيتواستروجينز phytoestrogens الي تاثيرها اضعف من تاثير الاستروجين الطبيعي وموجود بالجزر والثوم والكهوة والتفاح والكرز والبقوليات.

اما المواد الصناعية فهي لاتعد ولا تحصى، فمثلاً وحدة من الدراسات الي صارت على تاثير مركب polybrominated biphenyls (PBB) بعد حادثة صناعية بولاية ميشغان الامريكية بسنة 2000 درسوا العلماء تركيز مركب PBB بسيرم serum دم الامهات الحوامل والي كانن يرضعن اطفالهن.

النتيجة كانت البنات الي تعرضن داخل الرحم او عن طريق الرضاعة لتركيز عالي من  7< جزء بالمليون ppm اجتهم الدورة الشهرية اسرع من الي تعرضن لجزء بسيط اقل من 1 ppm.


وحده من المواد اللخ  البيسفينول أ Bisphenol A هاي المركب يستخدم بتصنيع البعض المواد البلاستيكية مثل علب الاكل وبطالة المي وعلب حليب الاطفال والعاب الاطفال وغيرهم.

هذا المركب يسبب تشوه للاجنة وعنده خصائص سرطانية ونفس الوقت يزيد من سرعة البلوغ، الدراسات البشرية قليلة عنه لكن يعتقد انو ممكن يزيد خطر الاصابة بسرطان الثدي.

الفثالات phthalates مركبات موجودة ببعض مواد التجميل مثل العطور وبخاخات الشعر والشامبوات ارتبطت بزيادة ظهور الثدي بوقت مبكر للبنات الي يتعرضلها.

وهواي مواد لخ خصوصاً مبيدات الحشرات والفطريات والرصاص وبعض المواد الي موجوده ببعض المنتجات الي نستخدمها يوميا.

#الجزء_الاول

اغلبكم يمكن ملاحظ بالسنوات الاخيرة الشباب والبنات ديبلغون بشكل سريع، صفاتهم الجسمانية دتكون اكبر من اعمارهم.

شديصير؟ وليش البلوغ ديكون اسرع من وقته؟

تبدا القصة ويا الطبيبة Marcia Herman بالثمانينات لاحظت وهي تشتغل بعيادتها انو كل المصادر الطبية تشير الى انو عمر البلوغ هو تقريبا 11 بالنسبة للبنات، لكن لاحظت الي ديصير هو انو كل الاطفال الي ديراجعوها بعيادتها ديكون عدهم بادي الثدي يتكون رغم اعمارهم 9 او 10.

هلشي حفزها لتبدي تسوي دراسة تضمنت 17000 الف بنية امريكية، هلدراسة توصلت الى انو البلوغ ديكون اسرع من وقته؛ بالنسبة للبنات الامريكيات من اصل افريقي ديكون البلوغ (تبرعم الثدي وظهور شعر العانة) بعمر 8 سنة وتبدي اول دورة شهرية بعمر ال 12.

بينما البيض (يتبرعم الثدي ويظهر شعر العانة) بعمر 10-9، واول دورة شهرية بعمر 12-13.


هو بالحقيقة عمر البلوغ مجان ثابت خلال تاريخنه البشري، بقايا الهياكل العظمية تشير الى انو البنات بالعصر الحجري القديم كانت تبدي عدها اول دورة شهرية menarche¹ بعمر 7-13 (حسب تحليل اطوال العظام الي يشير الى كمية الاستروجين الي كان جسمهم ينتجه)².

وبعد بدء الثورة الزراعية تاخر عمر بدء الحيض لنهاية عمر المراهقة، وبعد الثورة الصناعية وبسبب سوء الحياة المعيشية تاخر عمر بدء الحيض لل 15-16، وبالنصف الثاني من القرن العشرين وبسبب تحسن الظروف الاقتصادية والاجتماعية تراجع لعمر 12-13، وحاليا العمر انخفض لل10.

اما البلوغ puberty فحاليا ديبدء من وقت (قبل ال menarche) وديستمر لفتره اطول، يبدا بعمر 9-10 بعض الاحيان يوصل ل 6-7.

اتجاه مماثل تم ملاحظته بالنسبة للولد هم.

#دخول_مرحلة_البلوغ

تبدا طقوس الدخول لمرحلة البلوغ بافراز هرمون الكيسبيبتين kisspeptin من الهايبوثلامس hypothalamus هذا الهرمون يحفز الخلايا العصبية لتخلي الهايبوثلامس تفرز هرمون GnRH.

بنفس الوقت الغدة الكظرية adrenal glands تصير اكثر نشاط وتفرز الهرمونات الجنسية (الاندروجينات androgens).


#مراحل_تانر Tanner stages

البنت اول او الولد من يوصل لعمر البلوغ يبدي يتقدم خلال مراحل تانر  ال5 :

#المرحلة_الاولى :

بهاي المرحلة لسه ماكو اي صفات جسدية تدل على بلوغ، يبدي بيها الدماغ يدز اشارات للجسم ليبدي يتحضر للتغيرات.

تبدي الهايبوثلامس تفرز GnRH الهرمون يروح بالدم للجزء الامامي من الغدة النخامية anterior pituitary gland ويحفزها تفرز هرمونين هما FSH و LH الي يتنظمون افراز الهرمونات الجنسية.

هذولي الهرمونيين عند الرجل يرحون للخصيتان testes بالنسبة لل FSH يحفز انتاج النطف sperms اما ال LH يحفز انتاج الهرمون الذكري التستوستيرون testosterone.

اما بالنسبة للمرأة هرمون ال FSH يحفز نمو ونضج الحويصلات follicles بالمبيض وال LH يحفز الاباضة وافراز هرمون البروجيسترون(هاي التغيرات تكون بالمراحل اللاحقة).


#المرحلة_الثانية :

بهلمرحلة تبدي الهرمونات تشتغل وتدز اشارات خلال الجسم وتبدي الصفات الجسمية تطور : بالنسبة للاناث حيبدي الثدي يتبرعم ويبدي الرحم يكبر وشعر العانه يظهر.
بالنسبة للذكر يبدي صوته يخشن وينمو الشعر بجسمه.


#المرحلة_الثالثة

بهاي المرحلة الصفات الجسدية تبدي تكون اكثر وضوح.

بالنسبة للاناث يستمر الثدي بالنمو ويبدي يظهر شعر الابط وتصير اطول وممكن يظهر الحبوب على وجه وتغيرات لخ.

بالنسبة للذكر الخصيتين تكبر وهم ممكن يصير عنده احتلام والصوت يخشن وتزاد كتلته العضلية ويزداد طوله.


#المرحلة_الرابعة

بهلمرحلة بلاناث يبدي الثدي ياخذ شكل ممتلئ وشعر العانة يصير اكثف وممكن بعضهم يمر بالدورة الشهرية الاولى. ويقل معدل الطول.

بالنسبة للذكر تستمر اعضائه التناسلية بالنمو وشعر الابط يبدي يظهر وممكن يبدي يظهر حبوب بوجهه.

#المرحلة_الخامس

هي المرحلة الاخيرة الي بعدها يدخل الولد او البنت للنضج الجسدي.

بالنسبة للاناث بهلمرحلة الثدي يوصل الى الشكل والحجم البالغ، على الرغم من انو الثدي ممكن يستمر بالتغير لحد عمر 18.
تبدي الدورة الشهرية تنتظم بعد 6 اشهر الى سنتين، وتوصل لطولها النهائية بعد 1-2 سنة من اول دورة شهرية، وتغيرات لخ.

بالنسبة للذكر فهنا اعضائه التناسلية وصلت للحجم النهائي ، ويبدي شعر يظهر على وجهه بعضهم يحتاج يبدي الحلاقة ويبدي يتناقص معدل الطول والكتلة العضلية تستمر بالزيادة بعد عمر ال 18 اغلب الذكور يوصل للنمو الكامل.

#الهامش

1- الmenarche : هي اول دورة شهرية للبنية والي تصير بالعادة بعد 2-3 سنة من بداية تبرعم الثدي.

2- للاستروجين دور مهم بالبنات والولد فهو يساهم بنمو ونضج العظام وهم اله دور مهم كمنظم لتحويل العظام لعظام بالغة والمحافظة على كثافة العظام.
المرأة بعد سن اليأس ينخفض عندها انتاج الاستروجين وهلشي هو الي يخليها اكثر عرضة لهشاشة العظام.

"I wasn't interested in learning stuff. I was just interested in understanding"

#Barry_Marshall

رجعت من الشغل تعبان فنمت وبقيت قلق ان وعدت انزل بوست الليلة وخاف ما الحك اكعد قبل ال12 وما اوفي بوعدي هسه ارتاحيت 😂.