Ревизор 🧮

Кадастрчиларни қимматбаҳо машинаси ҳақида

@revizor_uzb томонидан ўтказилган ўрганиш давомида қуйидагилар маълум бўлди:

Иқтисодиёт ва молия вазирлиги ҳузуридаги Кадастр агентлиги раҳбари ҳозирги кунда давлат рақами 01|704 PSV бўлган «Genesis G90» русумли транспорт воситасидан хизмат мақсадларида фойдаланади.

Айни пайтда ушбу моделдаги автомобиллар иккиламчи бозорда ўртача 1,8 - 2,5 млрд сўм нарх (ёки $147 минг - $208 минг) атрофида сотилмоқда.

Очиқ манбаларда (27.08.2024 й.ҳолатига) агентликнинг марказий аппарати балансида давлат рақами 01|704 VCA бўлган «Mercedes-Benz E-450» русумли хизмат автомобили мавжуд эканлиги кўрсатилган. 2022 йилда эса агентликнинг балансида давлат рақами 01|704 PSV бўлган «Mercedes-Benz S-450» русумли хизмат автомобили мавжуд бўлганини кўриш мумкин.

Бироқ ҳеч қайси очиқ манбада Кадастр агентлиги балансида «Genesis G90» русумли премиум классдаги қимматбаҳо хизмат автомобили мавжуд эканлигини ҳамда унинг харид қилинишига оид бирорта маълумотни топиш имконсиз.

Юқори эҳтимол билан мазкур транспорт воситаси ёпиқ қарор ва баённомалар орқали харид қилинган бўлиши мумкин. Давлат харидлари билан боғлиқ жараёнлар, айниқса, қимматбаҳо хизмат автомобилларига доир харидларни ўрганиш борасида ортирилган тажриба, ҳар ҳолда шундай хулосага олиб келяпти.

Иқтисодиёт ва молия вазирлиги ҳузуридаги Божхона қўмитаси томонидан «Li L9 ULTRA» транспорт воситаси харид қилиниши юзасидан тузилган шартнома бекор қилинди.

Бу ҳақда давлат харидлари электрон тизимида тегишли ўзгартиришлар қайд этилган.

@revizor_uzb

Давлат харидлари электрон тизими маълумотларига кўра, Иқтисодиёт ва молия вазирлиги ҳузуридаги Божхона қўмитаси томонидан 875 млн сўмга бир дона «Li L9 ULTRA» транспорт воситаси харид қилинмоқда.

МИБ Фарғона шаҳар бўлими иш юритувидаги ижро ҳужжатига асосан қўмитанинг умумий қарздоргили 71 млн 745 минг сўмни ташкил этади.

@revizor_uzb

Тўғридан-тўғри шартномаларга «махфий» грифи босилмоқда

Давлат харидлари электрон тизими (xarid.uzex.uz)да буюртмачилар томонидан тўғридан-тўғри шартнома тузиш орқали амалга оширилаётган айрим давлат харидларига «махфий» грифи қўйилмоқда.

Масалан, «Боғишамол йўллардан мунтазам фойдаланиш» УК ва «Diyora» МЧЖ ўртасида 43,5 млн сўмлик тўғридан-тўғри шартнома имзоланган (лот рақами: 241200423380372). Ушбу шартнома билан танишиш ва уни муҳокама қилиш имкони йўқ, чунки «Давлат сири билан боғлиқ ҳамда махфий харктерга эга бўлган харидлар» тоифасига киритилган.

Қизиқ, чакана ва улгуржи савдо ҳамда транспорт воситаларни таъмирлаш билан боғлиқ давлат харидида қандай давлат сири бўлиши мумкин? Ёки йўлсозлар бирорта ҳарбий техникани таъмирлатишган-у, шу сабабли махфий давлат хариди тоифасига киритишганми?

Мана шундай кўплаб «махфий» давлат харидларидан бир мисол келтирдик, холос. Давлат харидлари электрон тизимида айни пайтда шу каби «махфий» давлат харидлари болалаб кетди.

Давлат буюртмачилари томонидан тўғридан-тўғри шартнома тузиш орқали амалга оширилаётган харидлари жамоатчиликка очиқланмай, махфий тарзда амалга оширилаверса, менимча, тўғридан-тўғри харидлар — ўғридан-ўғри харидга айланади. Коррупцияга йўл очади.

PS. Хуллас, @revizor_ uzbга иш йўқ энди. Канални ёпиб юборсак ҳам бўлаверади. Очиқлик тугаётгандек.

Бизнесмен-ректорга тегишли фирма танлов ғолиб бўлди

«Қамчиқавтойўл» ихтисослаштирилган йўллардан фойдаланиш ДМ балансидаги автотранспорт воситалари КДМ меркаторларга керакли бўлган резина пичоқлар етказиб бериш юзасидан бошланғич нархи 140 млн сўмлик танлов ўтказилган.

Ушбу танловда энг яхши таклифни танлаш орқали 124 млн 440 минг сўм нарх таклифи билан «B-TEC» МЧЖ ғолибликни қўлга киритган.

«B-TEC» МЧЖнинг 100 фоиз улуши Тулаганов Бахром Абдукабиловичга тегишли бўлиб, у бир вақтнинг ўзида Тошкент архитектура-қурилиш университети ректори лавозимида ишлайди.

Бундан ташқари, Тулаганов Бахром Абдукабилович — «INTRABAU» МЧЖнинг 26 фоиз улушига эгалик қилади. Мазкур корхонанинг раҳбари ва таъсисчиларидан (25 фоиз) бири Каримов Умид Абдукахарович бир вақтнинг ўзида бир нечта тадбиркорлик субъектларига алоқадор бўлган ҳолда Тошкент архитектура-қурилиш университетига тегишли «AQLLI VA BARQAROR SHAHARLAR MARKAZI» МЧЖнинг ҳам раҳбари ҳисобланади.

@revizor_uzb

Бугун Фавқулодда вазиятлар вазирлиги 27 дона «ўт ўчириш машинаси»ни харид қилиш юзасидан қарийб 100 млрд сўмлик шартнома имзолади.

Айни пайтда Тошкент Давлат аграр Университети ҳудудидаги бинода содир бўлаётган ёнғин кўлами ФВВ автопаркларини янги ва замонавий транспорт воситалари, зарур техникалар билан янада бойитишини тақозо этади деб ўйлайман.

@revizor_uzb

Конституциявий Суд 1 млрд. сўмдан зиёд пулларга машина сотиб олмоқда

Очиқ манбалардаги маълумотларга кўра, Ўзбекистон Республикаси Конституциявий Суди 409,7 млн сўмга бир дона «BYD SONG PLUS DM-i CHAMPION» ва 630,4 млн сўмга икки дона «BYD CHAZOR DM-i» русумли транспорт воситаларини харид қилмоқда.

@revizor_uzb

Пулинг бўлса бюджетда, ярим миллиардга дам оласан Ялтада

Самарқанд вилояти ҳокимлиги томонидан Россиянинг Кисловодск шаҳаридаги «Ўзбекистон» санаторийсида 20 киши дам олиши учун 500 млн сўм маблағ сарфланди.

@revizor_uzb

«ME`MOR» МЧЖ ғолиб бўлган ушбу танловда «OFFICE TECHNO» МЧЖ захира ғолиби деб эълон қилинган.

Захира ғолиби томонидан танловга тақдим этилган хужжатларни ўрганиш жараёнида, танловнинг айрим қатъий мезонларга иштирокчи адашиб умуман бошқа юридик шахсни хужжатларини тақдим этганлиги аниқланди.

Хусусан, "Танлов иштирокчилари томонидан коррупсия кўринишларига йўл қўймаслиги бўйича кафолат хатининг мавжудлиги" ҳамда "Ўз вақтида ишларни бажариш ва тугрисида кафолат хати ва 1-йил бошка тузилган шартномалари" қатъий мезонларига «BEXRUZ FAYZ» МЧЖ нинг хужжатлари тақдим этилган.

«BEXRUZ FAYZ» МЧЖ ушбу танловга бехосдан аралашиб қолмаган, унинг 100 фоиз улушига Нурафшон шаҳар Камбағалликни қисқартириш ва бандликка кўмаклашиш бўлими бош ҳисобчиси, танлов комиссиясининг котиби Курбанова Гавхар Хамидуллаевна эгалик қилади.

Ушбу танловдаги қонунбузарлик бўйича Рақобат қўмитаси ҳам, Антикоррупция агентлиги ҳам ҳозирча муносабат билдиргани йўқ. Умуман олганда, кузатувларимизга кўра мазкур икки ташкилот @revizor_uzb эълон қилинган материаллардаги эҳтимолий қонунбузарликларга нисбатан танланма усулда муносабат билдираётгандек. Бу ҳақда батафсил пост эълон қилинади.

2024 йил 12 сентябрь куни Тошкент вилояти Нурафшон шаҳар Камбағалликни қисқартириш ва бандликка кўмаклашиш бўлими томонидан «Учқун МФЙ биносини қуриш учун қурулиш моллари» харид қилиш юзасидан бошланғич нархи 349 млн 410 минг сўмлик танлов эълон қилинган. Лотнинг тугаш санаси 2024 йил 19 сентябрь этиб белгиланган.

Харид комиссияси томонидан жорий йил 20 сентябрь куни шакллантирилган баённомага кўра, танловда энг яхши таклифни аниқлаш орқали 347 млн 645 минг сўм нарх таклифини билдирган «ME`MOR» МЧЖ ғолиб деб топилган.

«ME`MOR» МЧЖнинг раҳбари Бахритдинов Жамолиддин Зайнитдинович бир вақтнинг ўзида 4 ой аввал ташкил қилинган «BIO BAT» МЧЖнинг ҳам раҳбари ҳисобланади.

«BIO BAT» МЧЖнинг 100 фоиз улушига эгалик қилувчи Курбанова Гавхар Хамидуллаевна айни вақтда Тошкент вилояти Нурафшон шаҳар Камбағалликни қисқартириш ва бандликка кўмаклашиш бўлимида бош ҳисобчи лавозимида ишлаб, юқоридаги давлат хариди жараёнида танлов комиссиясига котиблик қилган бўлиши мумкин.

@revizor_uzb

2024 йил 19 сентябрь куни «XORAZM PITNAK PLAST» МЧЖ томонидан «Damas автомобилининг пластмасса эҳтиёт қисмини ишлаб чиқариш» бўйича бошланғич нархи 3 млрд 900 млн сўмлик танлов ўтказилган.

«XORAZM PITNAK PLAST» МЧЖ давлат корхонаси ҳисобланиб, унинг 100 фоиз улушига Давлат активларини бошқариш агентлиги эгалик қилади.

Ушбу танловда энг яхши таклифни аниқлаш орқали 3 млрд 750 млн сўм нарх таклифини билдирган «SIFATLI IDEAL QURUVCHI» МЧЖ танлов ғолиби, «FIBRA KABEL» МЧЖ эса заҳира ғолиби деб топилган.

Иштирокчилар томонидан танлов комиссиясига тақдим этилган маълумотларга кўра, «SIFATLI IDEAL QURUVCHI» МЧЖ — Фарғона вилояти, Марғилон шаҳар, Тўралар 1-берк кўчаси 12-уйда жойлашган. «FIBRA KABEL» МЧЖнинг ягона таъсисчиси Гафуров Алишер Бахтиярович эса Фарғона вилояти, Марғилон шаҳар, Тўралар 2-берк кўчаси 12-уйда яшайди.

Бундан ташқари, «FIBRA KABEL» МЧЖ жойлашган манзилда «SIFATLI IDEAL QURUVCHI» МЧЖнинг раҳабри ва ягона таъсисчиси ҳисобланувчи Эминов Азаматжонга тегишли бўлган «HITECH TOYS» МЧЖ (ҳозирда фаолият кўрсатмайди) ҳам фаолият юритган.

Кўриниб турибдики, танлаш ғолиби ва заҳира ғолиби бир-бирига бегона эмас, уларни боғловчи алоқалар айни бир манзилга олиб боради.

@revizor_uzb

«INBAZAR» тугатилиш жараёнида

«INBAZAR» МЧЖ тадбиркорлик субъекти сифати 2020 йил 7 фервраль куни рўйхтатдан ўтган. Муратов Хикматулла Хабибуллаевич МЧЖ раҳабри ва таъсисчиси (13,20%) ҳисобланади. МЧЖнинг 86,80 фоиз улушига Холматов Омабдек Собиржон ўғли эгалик қилади.

2024 йил 16 сентябрь куни ҳолатига «INBAZAR» МЧЖнинг фаоллик ҳолати «фаолият кўрсатаётган» бўлган.

stat.uz’нинг 19 сентябрь кунги маълумотига кўра, МЧЖнинг ҳолати «фаолият кўрсатмаётган» ҳолатга ўзгартирилган.

Шунингдек, бир қатор очиқ манбаларда 18 сентябрь куни «INBAZAR» МЧЖнинг ҳолатига ўзгартириш киритилиб, «тугатилиш жараёнида» эканлиги қайд этилган.

@revizor_uzb

2024 йил 16 сентаябрь куни «Ўзавтосаноат» АЖ тизимидаги «O`Z-TONG HONG KOMPANI» АЖ ҚК томонидан «Дамас автомобиль ўриндиқлари учун «пружина» бутловчи қисмларини харид қилиш юзасидан бошлағич нархи 804 млн сўмлик танлов ўтказилган.

Танловда энг яхши таклифни аниқлаш орқали 800 млн 400 минг сўм нарх таклифини билдирган «XORAZM AVTO NUR» МЧЖ танлов ғолиби, «AUTO SPRING» МЧЖ эса заҳира ғолиби деб топилган.

Мазкур танловда ўзаро аффиланган шахсга тегишли тадбиркорлик субъектлари иштирок этган. «XORAZM AVTO NUR» МЧЖнинг ягона таъсисчиси Рузибаев Ихтиёр Бахтиярович бир вақтнинг ўзида «AUTO SPRING» МЧЖнинг раҳбари ҳисобланади.

@revizor_uzb

2024 йил 16 сентябрь куни «Янгиҳаёт» индустриал технопарки дирекцияси томонидан «Янги авлод» МСЗ ҳудудида вақтинчалик бошқарув офис биносини қуриш бўйича бошлағич нархи 4,6 млард сўмлик танлов ўтказилган.

Танловда икки талабгор томонидан таклифлар билдирилиб, энг яхши таклифни танлаш мезони бўйича 3,8 млрд сўм нарх таклифи билан «SALAMON STANDART STROY» МЧЖ танлаш ғолиби деб топилган.

orginfo.uz сайти маълумотларига кўра, «SALAMON STANDART STROY» МЧЖ «тугатилган» ҳолатда, registr.stat.uz сайтида эса ушбу МЧЖнинг СТИРи «LAURIS DECORATION BUILD» МЧЖ ҚКга тегишли эканлиги қайд этилган.

Юқори эҳтимол билан «SALAMON STANDART STROY» МЧЖ мазкур танлов жараёнида ёки танловдан сўнг номи, жойлашган манзили, раҳбар ва таъсисчилари таркибига ўзгартириш киритиб, «LAURIS DECORATION BUILD» МЧЖ ҚК сифатида қайта ташкил этилган. Бунга танловда иштирокчининг Низом жамғармасида чет эллик инвестор улуши мавжудлиги талаби қўйилганлиги сабаб бўлиши мумкин (IMHO). Аммо танловда иштирокчининг қайта ташкил этиш, тугатиш ёки банкроклик босқичида эмаслиги юзасидан берилган кафолат хати учун танлаш комиссия томонидан юқори (10) балл қўйилган.

Шунингдек, «LAURIS DECORATION BUILD» МЧЖ ҚКнинг бугунги кун ҳолатига 32,5 млн сўм солиқ қарздорлиги мавжуд бўлса-да, унга харид комиссияси томонидан юқори балл қўйилган ва танловнинг кейинги босқичига ўтказиб юборилган.

Шу билан биргаликда, танлов мезонида иштрокчи соҳавий қурилиш-пудрат ташкилотлари рейтингида «DDD» даражасидан юқори бўлиши шарт эканлиги белгиланган. Бироқ «SALAMON STANDART STROY» МЧЖнинг мазкур рейтингда «DDD» даража, яъни 1-қуйи даражада эканлигини кўриш мумкин.

Бундан ташқари, «SALAMON STANDART STROY» МЧЖ рейтингда «DDD» даража бўла туриб, Тошкент шаҳар ҳокимлиги ҳеч қандай тендер ва танловлар ўтказмасдан тўғридан-тўғри шартнома тузиш орқали 63,3 млрд сўмлк қурилиш объектини «тортиқ» қилгани бўйича хабарлар тарқаган.

@revizor_uzb

Кинематография агентлиги ҳузуридаги «Ёшлик» киностудияси томонидан «монтаж-пардозлаш хизматини харид қилиш» юзасидан бошланғич нархи 240 млн сўмлик танлов ўтказилган.

Ушбу танловда жами уч нафар талабгорлар ўз таклифлари билан иштирок этиб, энг яхши таклифни танлаш орқали 237 млн сўм нарх таклифини билдирган «Focus media» МЧЖ танлов ғолиби, ЯТТ «YUNUSOV ILXOMJON RAXMATDJANOVICH» эса заҳира ғолиби деб топилган.

«Focus media» МЧЖнинг раҳбари ва ягона таъсисчиси Yunusov Foziljon Raxmatdjanovich ҳисобланади ва у юқори эҳтимол билан заҳира ғолибининг яқин қариндоши бўлиши мумкин.

Бундан ташқари, ЯТТ «YUNUSOV ILXOMJON RAXMATDJANOVICH» танловда иштирок этиш учун талаб қилинган мезонларда фақатгина ўзининг якка тартибдаги тадбиркор сифатида давлат рўйхатидан ўтган гувоҳномасининг нусҳасини тақдим этиш билан чеклаган.

Яна бир иштирокчи — «DS TEAM» ХК томонидан танловда талаб этилган ҳужжатлар тақдим этилишига қарамай, ҳужжатлар етарли эмаслиги ёки йўқлиги важлари келтирилган.

PS. Telegraph платформасида техник носозликлар кузатилаётганлиги сабабли ҳужжатлар изоҳда қолдирилади.

@revizor_uzb

3 дақиқалик ролик учун 224 миллион сўм!

Ветеринария ва чорвачиликни ривожлантириш давлат қўмитаси томонидан «Бутунжаҳон ҳайвонлар соғлигини ҳимоя қилиш ташкилотини 100 йиллиги»га бағишланган видеоролик ишлаб чиқиш бўйича бошланғич нархи 370 млн сўмлик танлов эълон қилинган.

Техник топшириқ ҳужжатларига кўра, видеоролик давомийлиги 3 дақиқа этиб белгиланган.

Танловда 224 млн сўм нарх таклифи билан «SATART-HAUS-BUILDING» МЧЖ ғалаба қозонган. Ушбу МЧЖ яшашга яроқсиз жойларни ижарага бериш ва бошқариш фаолияти билан шуғулланади.

@revizor_uzb

2024 йил 4 сентябрь куни «Қамчиқавтойўл ИЙФК» Давлат муассасаси тасарруфидаги автомобиль йўлларини қишқи қаров сақлаш ишларида сирпанчиққа қарши қум сотиб олиш мақсадида бошланғич нархи 900 млн сўмлик танлов ўтказилган.

Танловда икки иштирокчи томонидан таклифлар билдирилиб, энг яхши таклифни танлаш орқали 897 млн 120 минг сўм нарх таклифи билан «SAND AND GRAVEL WHOLESALE» МЧЖ танлаш ғолиби деб топилган. Иккинчи иштирокчи «BUS PARK AND TRADING» МЧЖ эса заҳира ғолибига айланган.

Мазкур давлат харидида ўзаро аффилланган шахсга тегишли икки тадбиркорлик субъекти иштирок этган, улардан бири ғолибликни қўлга киритган.

Танлов иштирокчиларини айни бир шахс — «Muminov Olimxon Obbosxonovich» боғлаб туради. Яъни, у «SAND AND GRAVEL WHOLESALE» ва «BUS PARK AND TRADING» МЧЖларнинг 100 фоиз улушларига эгалик қилади.

@revizor_uzb

Коррупцияга қарши курашиш агентлиги 380,9 млн сўмга бир дона «BYD SONG PLUS DM-i CHAMPION» русумли транспорт воситасини харид қилмоқда.

Ҳозирги кунда агентлик тасарруфида бир дона «Мерседес-Бенц Е-400», тўрт дона «MALIBU-2» ва бошқа шу каби хизмат автотранспорт воситалари мавжуд.

@revizor_uzb

Қишлоқ хўжалиги вазирлиги БМТнинг ёрдам пулидан қимматбаҳо машина сотиб олди

БМТнинг Озиқ-овқат ва қишлоқ хўжалиги ташкилоти «Ўзбекистоннинг қурғоқчиликка учраган экотизимларида яйловлар ва ўрмонларни барқарор бошқариш» лойиҳаси доирасида Қишоқ хўжалиги вазирлигига дастлабки грант маблағларини ажратган.

Қишлоқ хўжалиги вазирлиги эса лойиҳанинг самарали топширилишини таъминлаш ҳамда лойиҳа ҳудудларига мунтаззам равишда хизмат сафарларини амалга ошириш мақсадида қарийб 600 млн сўмлик бир дона «KIA Carnival Prestige» автомобилини харид қилган.

Жорий йил 5-6 сентябрь кунлари БМТнинг Озиқ-овқат ва қишлоқ хўжалиги ташкилоти (FAO) бош директори Цюй Дунъюй Ўзбекистонга амалий ташриф билан келиши кутилмоқда.

UPD. МИБ маълумотига кўра, Қишлоқ хўжалиги вазирлигига тегишли СТИРда 85,3 млн сўм қарздорлик мавжуд. Бироқ ушбу ҳолатга аниқлик киритилганда вазирлик қарздор эмас, балки ундирувчи эканлиги маълум бўлди.

@revizor_uzb