𓆩 qamari 𓆪

اثــر طعنّتك زنجر والــخناجر بـيـض
عكـس گلبك وياي الـماصفت نيــته..

انـه دمــعة غــريب بكل سهوله تطيح
جـدمي لذكــرياتك ليش وديــته..

فــراغك والگــبر يتشابهن بالعــين
منـو منهن يعــيش بروحي وصيته..

بگــفّه كـــلمن يمرني تسافر الدمعات
بس انــته عليـك العــمر بديــته..

اذا تــمشي بخــيالي أتـعـثرك اللحظات
الــبيهن جدمـك ويَ الغــير مشـيته..

بــعد لتودي طــيفك ليلي مابي شــوگ
اجـاني وبـاب جفني بـوجهه ســديته..

آنـه من الــورد ضليت آضـم الـشــوف
لأن كــلش يشبهــك ما شتــميــته..

#علي_رشم

هم انت ،، شكو ، لخاطر الرحت وياه
هدني لخاطر الله اتركني بس ذكرى

"مثلي شكد اكو طب للگبور وشوف
مات من القهر مكتوب يم گبره"..

على دفعة صدر يتدخل الشيطان
وشكم استغفرالله بساع تتبره..

وبالدم والصلح بس البخت حاجوز
مرات البخت هم ينطرد بره..

مكان الما الك بي گعده لاتدناه
الغراب استحه وماحط على الشجرة..

شجابك لا تجي لك باوع الشيطان
بي عزة نفس ما يدخل الحضره..

جبتلك عين ذيب وهم نمت شتريد
وسألوني وگلت ما ماخذ الشمره..

غبت عني لان عنك رحت يومين
اليحب ينتظر لتگلي يتبره..

گبل حببني جدي بطير لكن طار
ولحد هسه انه گاعد باقي منتظره..

اهي گطره عَلّى گصة كل بشر مخلوق
وميذل العشگ لتگلي بالفتره..

جربت العشگ ماذلني تدري شلون
طاحت گصتي وما طاحت الگطره..

ولك لو كلها مثلك ما تجازي الطيب
جان وداعتك محد زرع شجره..

ولو بس العسل مرغوب بالديوان
جان الگهوه ابد ما تنشرب مره..

#علي_نجم

مامحتاج اسولف وابتسم،
المختصر محتاجلك..

لو يمي كل هاي البشر،
انت الوحيد اشتاكلك..

جا ليش عني تغيرت،
مو تدري محتاجك لان..
لا بيه احب غيرك بشر لا بيه اعيش بدونك..
بـالغالي يحلف كل محب..
واحلف جنت بعيونك..

بجيت ولان يمك ما مكابر،
بجيت وكسر ضلعي ولا الخاطر..
هاي الـنذوره مااوفيها مو عوز..
لان ماحاسب شكم مره ناذر..

تزرع لغم يـالزارعلك ورود،
وهيج ويايه تتجازه المشاعر..
مو شغلة قصيده ووزن واحساس..
اليجيب اخبار عنك هذا شاعر..

اميزك جنت اني بهوسة الناس،
انت العرف اليشوفه اليسافر..

اول مره ميبجيني الوداع،
واني الذبلان ورده بنص دفاتر..

#محمد_العبدلي

تذكر من احط بوسات إلك عالباب
والباب الصبح من تطلع يگلك

وتذكر من اجي لشوفتك جية الروج
وعلى حطتك جرف ضليت ما املك

لا انه من البحر خلصان وابقى وياك
ولا جرفك يكضني وتعبت خلّك

بصراحة انت جرح وادري من اخيطه يطيب
غلاتك لو صبر مانعني ما شلك

"السما بعينك شبچ" عوف الاوهام وطير
حط ايدك بأدي لو اموت ماحلك

بعدك والسهر والليل والآهات
تولني نهش وتشوف ما اگلك

نَسمة بعاصفة لو رحت هم الگاك
ضل بالليل ماكو وميَّزت ضِلك

واندلك واجيك واگدر اوصلك
ادورك ما املّ والگاك واندلك

ولو حبة رمل عنوانك بصحراء
اشمن ريحتك بالگاع واوصلك

#سمير_صبيح

تعاليلي تعاليلي،
الشمس غيرت تفاصيلي..
ولو عندج مطر عـ الغير..
منج گطره خليلي..

تعاليلي اريد اتميز بجيلي..

#علي_البديري

مدري شجاسني وفزيت مرعوب
"دم من الحلم سايح عالمخاد"
مو بس النفس والغرفة والبيت
امس حسيت ضاگت بيه بغداد

.............................................

قلت غلاتك والوعي ازداد
ووخرته دمي الفوگ المخاد
چانت گبل تخنگني وتضيگ
بس هسه جنه بعيني بغداد..


#علي_العربي

ماشيت النهر بس ماصرت ناعور
ورافگت الفرح بس ماضگت ملحه..

شاركت الحزن والعمر راس المال
وحچاية بخت شبعان من ربحه..

مثل الخيط عايش والحياة حظوظ
لو تسكن شمع لو تسكن بسبحه..


#سمير_صبيح

لا تسأل عليه شلوني بلياك،
بالحظ والبخت كاضي..

جم مره كمت زعلان من عندك،
وارجع محد مراضيني..
بس راضي..


#سعد_شميل

وشدينه الجرح ونگطع حبل الخوف
ونشفنه الدمع ونسدت العبره..

بعد ما ننطي لزمه نضم ملح بالماي
ميزنا الحروف ووضحت الجفره..

ما نغلط بعد ونصير مثل الخيط
تحطنه علَى الفتگ وتعوفنه الابره..

عود احنه ويبس منصير ماشة نار
مو بينه الحفر والغيرنه المجره..

"تچوينه نعم نگطع هواها تموت
كافي اتظل عمر بجفوفنه الجمره.."

مانعرف مشينا وياهم مغمضين
دفعونا ووگعنه وغطوا الحفره..

والچفه طول مدها وطلع وارتاح
وابو النفس العزيزة لهسه بالنگره..

وبيه شگد عتب وشگد ملامه وحيف
على الدمع البچيته وماطفت حسره..

على الردلي يتبختر لا فرس لا سيف
ويحجي بكل رهاوة وطعنته بظهره..

على اليوگع فريسة شلون يغفة الليل
ينام بيا وجه وذياب التنطره..

مثل شذره الكرامة ومحبس الانسان
وبيها شگد محابس ذبت الشذره..



#سمير_صبيح

الجانن بيك يشوفن،
من يروحن معذورات..

#مرتضى_حرب

قبل عشرون جرحاً من الموت،
قصة موتي بدأت عندما قلت لها..
صيحي بأسمي..
المو من شفافج نشاز ..
اسمي فاهي بحلك غيرج ..
جن دعاء بصوت فد واحد غني..

انتي يالـتروين كلشي،
الماي التشربي يكلوله هني..

عندما كانت روحي تحاول ان تلفظ انفاسها الاخيره،
وجدتها تلفظ اسمها..

تلاشت،
وكلت ألـمّج..
بس شلمج وانتي ظِل غروب طَش..
غيمه فصلية سما وزفوها رَش..



كنت اضن بأننا فهمنا بعضنا فـ(همنا) في بعضنا .. عادت في الوقت الذي اصبحت فيه لم أعد أُعُد ..

فعندما يصبح الاعتبار عجوزاً اعمى،
ما المغزى بأن يأخذوك بعين الاعتبار..
عندها علمت بأن النهر عيناً و اجفانه ضفتان..
فعندما يشعر بالنعاس سيطبق اجفانه على مائهِ و يموت ...

الجرف جفن النهر و الماي جن عين ،
لا يطبك جفونه النوم كتال ..
و ليلي بدون طيفك مرني تابوت .. صبحوا بوجهي صح الموت تنكال ...
مو ذيج التعوز كفة ردان ...
تطب عركة حجي حاجوزك لسان...
اني و رويحتي محوطينه شمات
كد ما للغني محوطينه صحبان..
الطعم اقبح كرم اليعزبه يريد ..
لكمة موت ينطي لضيف جوعان ..
شما يلتم شملنه الكاني خسران..
الحطب يلتم حرك مو لمة اخوان..

"بعد كلبي اشتعل بلكت يشوفوك ،
ينشاف الهوى من يصير دخان ..


#المطوري

تعرف غلاتك لوبعد،
احتاج ابينها اكثر..

يالبيك لهاني العمر،
ماركزت بي من مر..
يمكن إذا گتلي شكثر،
تهواني راح اتحير..

الليل اعد محبتك،
بس باجر تزود اكثر..

(الادري بي من تبتعد،
مدري شأحس بحيرتي..
صدري حفر بي خنجر..
مكطوع شريان ابهر)..

يندفع شباچ الجفه،
وبالروح شي يتكسر..
اشتاكلك ...
بس الحجي المضموم الك يتبعثر..
وبدون موج احتاجلك..
بالبر واحس بيك البر..

مرات ادور لـجيتي،
كبالك سبب يتفسر..

وتلمحني احرك الخاتم،
وابدي ارتبك واتحسر..

"وهنا تحس بقيمته،
البس على شوفك يضطر"..

يافكة عيون الگلب،
ياميزتي البيها انغر..
مو رايدك واتنفسك..
لا يانفس شي اكبر..

ياروح ماتطلع مثل،
روحي التموت من اكبر..

اني اعرف بزعلك قبل،
ماتزعل وياي اكدر..
والنوم يتركني وقت
ماتنوي عينك تسهر..

ياريت ..كل هذا الحجي،
من اكعد كبالك يحضر..

ومن التهي بعينك بعد،
تهمسلي حتى اتذكر..

وياك اذا ماسولفت،
من الصمت لاتحذر..
مرات مو كل الحجي..
يلم المشاعر يكدر..

اني اؤمن التهوى صدك،
تتنخه بي من تعثر..
روحك عليّ تتكدر..
تنشف لحد مايخضر..
لوبرد ملكا تشتعل..
وارماد خلكك ينذر..
وانت اعرف شلون اختنك..
من نسمتك تتأخر..

*اگبل عليّ روجة عتب،
واتقرب تكون اخطر..
بس هاا عتب بس للمثل..
مو بالزعل تتأثر..
تلگاني ناطر روجتك..
فارش جرف يتعذر..

^بس انت ردتك من جنت،
مابين الاحلام افتر..
ومادامك بحضن الجفن..
جف النظر خل يكصر..

وياك ابتديت ...
بدونك شلون ابتدي شتتصور...

عنك ردت مره ابتعد،
والغيظ بافكاري ابحر..
وتراجعت نفس الوقت..
من حرت بيش اتعطر..

يخفت ضواي..وما يضل،
لوشوف الفراك ابصر..
والليل يتشمت هوى..
بخيط الشمع من يصغر.


#ايهاب_المالكي

جرح الجسد ينتهي،
جرح الكلام اكبر..
يبقى يعذب الگلب،
طول العمر واكثر..
لا عين ابد شافته،لا ينتهي بـ لحظته..
حاولت بس للأسف،
انسى مااكدر..

#غني_محسن

اكل عمري الحزن واستفحل الشيب،
مثل سبوره تاكل بالطباشير..

ولو هو الحزن مريود نوبات،
الخشب جا ضل حطب لوما البسامير..

#يوسف_حسن

مابيه حيلك ولك وصلت قضيتي لحد،
يم اليأذن اون كام اليأذن لحد..
وي غيري جنك ورد ووياي صاير لحد..

جا ترضى ذاتك ولك؟عقل اليحبك يجن،
بنارك اني استلذ ما اود نعيمك يجن..
بليل من اختنك هلكد سوالف يجن..
لا تسمع من اشتكي ولا ترضى اسولف لحد.

#اياد_عبدالله

ضاقت انفاس الهوى يوم الوداع
كضياق القبر في وقت الممات..

كنت تزهو في وسط ورد العيون
كيف للنسيان يمحو الذكريات..

ها قد اتى جيش الجروح متوجهاً
نحو قلبي المات في وقت الحياة..

فترك الجيش في وسط جسدي شهيد
لم يمت بالسيف لكن هو مات..

فكتبوا سبب الوفاة شيئ بسيط
كلمات من حبيب جارحات..

حيل انعم الله علَى الجرح
مشكور منك واعتذر يالتيهيت سنيني
صفنه بوسط گلبي الشعر
في خارطة رأسي وطن
نصبتك انت على العرش
جنت انت الاتدليني
ما ادري جنت اعشگ وهم
احلامي باني علَى الچذب
راسم صفتني على الشمس
طفيت شمس الله لچن
ماكو احد يطفيني
شايلي حظ ما ينحزر
ورده اني زارع بالارض
وعاگول خضر طيني


#علي_المحمداوي

سولف گول الك واهس تضل وياي
واذا ما الك واهس گول لاتخجل..

ما اقبل احبك وانتَ ما مرتاح
وما ارتاح احبك وانتَ ما تقبل..

فكر باليهمك المهم شتريد
انه كل اليهمني المهم ما تزعل..

بكيفك من اجيت وماجبرتك يوم
ماجبرك بكيفك لو ردت ترحل..

ما مليت منك اگدر ابقى وياك
بس المشكلة خاف انه راح انمل..

ميهمني الدرب صار امشي بيه سنين
ما اندل چنت بس هسه صرت اندل..

وماگولن خسارة الراح مني وياك
ويـ كلمن تحبه الروح ما تبخل..

حبيتك صدگ والوكت چذبه هواي
بمعركة الدغش اني نزلت اعزل..

وتعرفني ولو عندك شكوك هواي
وادري لكل شكوكك صار عندك حل..

من شفتك سنابل روحي اجت ترويك
ماي ولاتظن تصيرلك منجل..


ما اقبل احبك وانتَ ما مرتاح
وما ارتاح احبك وانتَ ما تقبل…



#جبار_رشيد

عيوني ويه السهر كلش عبر حدها،
وحمامات الصبح كمت اني اكعدها..


#علي_فاضل_السعيدي

لكَيتك للأسف ياريت مالاكَيك
على وجهك بنيت الماتمنيته

ليغرك نفس بين الگبور يعيش
ماكَعدلة ميت رجعه لبيته

رحت ويه الكَبل من عندة جنت تضوج
حنانك جان الي للخانك انطيته

صوتك والشرب وثنينهن بلراس
السكر بلكاس عطرك نسم بريته

موصوج الخذاك الماخذك معذور
كَلبك مايعرفة وانه وديته

تواعدني وتواعد غيري مامجبور
حچيك لو رجل چا ظهره طكَيته

على كَلبي انتجئ وجتفة وصل لكفاي
وگلت رايد يطب بگلبي خليته

اليحب اول ايامه بعقله تلكَة خبال
مثل سطرة ابو من ينهجم بيته

"على وجهك كَفة كلما تجيني تروح"
عشرة وياي بس مالحظة حاچيته

متنسية بزعل امك زعلت اهواي
دكافي من الزعل مو گلبي شليته

#علي_المحمداوي

من اجيلك گلبي يسبقني بمسافه،
ومن ارد منك يضل گلبي وراي..

#عبدالاله_منشد