قصيدة وشاعر 💙 📜 "

بصوت مظفر

مظفر النواب - گالولي



روحي ولا تكَلها : شبيج
وانت الماي
مكَطوعة مثل خيط السمج روحي
حلاوة ليل محروكَة حرك روحي
حمرية كَصب مهزومة بالفالة ولك روحي
وعتبها هواي ....
لا مرّيت ... لانشديت .... لا حنيت
وكَالولي عليك هواي
وعودان العمر كلهن كَضن ويّاك
يا ثلج الي ماوجيت
تعال بحلم ... أحسبها إلك جيّه واكَولن جيت
يلي شوفتك شبّاج للقاسم ... ودخول السنة من الكَاك
يا فيّ النبع واطعم .... عطش صبّير ولا فركاك
يلرهميت ... يا مفتاح فضة ولا رهم غيرك عليّ مفتاح
أجرت لك مخدتي وانطر الشبّاج اليجيبك
وانت عرس الليل والقدّاح
يا هلبت تجي وترتاح ؟؟
طركَــ المسج والنوم ...... طركَــ المسج والنوم
عمر واتعده التلاثين ... لا يفلان
عمر واتعدّه واتعديت
ولا نوبة عذر ودّيت
وانه والمسج والنوم ... واغمّض عود اجيسك يا ترف تاخذني زخة لوم
واكَلك : ليش وازيت العمر يفلان
يفلان العمر ... يشكَر ولك يفلان
وهجرك دم ... كل ليلة اشوفك بالحلم عريس
اكَول اليوم يجيبه .... خلص كَلبي واكَول اليوم
ولا التفتيت ... ولا وعديت ... ولا استخطيت
ولا طارش جذب ودّيت
ولا مرّة شلت عينك تعرف البيت
وكَالولي عليك هواي .... ورحت ابراي وجيت ابراي
حسبالي سنة وسنتين وتلاثة
واشوفك ذاك البكَلبي .... واضوكَــ الماي .. واضوكَك ماي
حسبالي اشوفك ابن اوادم .... يا شكَلك ... موش اشوفك هاي
ولا حسّيت ....... ولا استخطيت
ولا جيت اعله ماي
تبيع بيّه وتشتري بالسوكَــ
لا ما جيت
وكَالولي عليك هواي .. كَالولي ..
كَالولي

محمد الزبيدي


الجماد بكونا هم عنده روح
لچن مايعرف يثرثر.. حچيه سكتة..
الباب من اتطبگه حيل يزقفل انفاسه ويموت ويدري هنته!

يبقى جامد،
حتى ماينطبگ مرة الثانية ويجرح العتبة، العتبة بتّه..

الباب يعرف كل بشر
من صوت دگته!
اليعرف بگلب البحر لمّن يطبله
راح يشبگ مايه... بس نظن يفوجه..
الجرف من يبدي يجف اعتبره مثلك
عاشگ وفاگدله موجة..

الحايط يعيش اكثر من البشر
فوگ الگاع هاي،
ايعاند الگمرة وشمسنا ويوگف وينطينا فيّ!
ايبوگ طيف من الضوة ويشعل الظلمة
ويحس انّ الظلمة ضي!

اي يروحي،
ماكو شي بالكون ساكن
كلشي قابل للتمرّد والتحرُّك هو طبع الدنيا هچي!
لچن من طبع البشر ينغر بروحه
ويعتقد بس هو قادر،
يضرب الحصوة بغرابة
ما يفكر ان تكون الحصوة طفلة وراح ترجع لامها تبچي!

كآظم اسمآعيل الكآطع



تهت
ذبني سمه اجناحي ابشبچ غربه
طحت بولاية الغربه
اجر عمري ابجدم حيران
اعت روحي ابجدم تعبان
ينگلني وانگله
بهمة الفحطان

شايل غربتي ابچفي
وشايل دنيتي ابچفي
وشايل غايتي ابگلبي
ادورلهن حياة اتلوگ للانسان
تايه والدرب ما يندل ادروبه
وصفن مثلي
و رمح شايل الخوف بقطعه مكتوبه :
الحچي ممنوع ..!
اهل هذا الدرب خرسان !!
الومي ممنوع ..!
اهل ذاك الدرب عميان!!
وبوجهي الضوه قفـل شبابيچه
وظلام الليل غلف وحشة الحيطان
ذباني ابدرب شاتل رصيفه اسيوف
وسيوف الرصيف اوسادة التعبان
وافتر ...
والعمر بكرة خساره ايلف
وانه ودربي
احس ثگل التعب
حية جزيره اعله الجدم تلتف
احس باجي العزم
گطره ابهبوب
وما رضت تنشف
واشوف الناس بس اوجوه
متخيط حلگها بخوف
ومشبگه الحچي بزنجيل
والدنيا ارگصت للطايح بيده الدف

لا چنها نست
من جلب هذا الدف!
منهو العاش مية طف؟
منهو العلگوا راسه
وبگت روحه نبع
سباحها بگلب الزمن يزحف
بعد عين السواجي
ايصب عله خدود الرمل دمعها
وجرحها من الكبر ينزف
وانه وليلي
وعمر بكرة خساره ايلف
انتحلم بالضوه
وننخه الشمس بلچن تجي ابهالليل
وتخلي الوكت يكشف

وانه ودربي
فرد سچه
وقطار العشگته اميسر
فرد طاسه غريبه ومايه امطشر
تعاتب غيمها الغايب
يچان الغيم مهره امجنحه
ابطاري العطش تعثر
چان الطف يشتم الجفن البعيد
وايمام الجرح
گبل الندب يحضر
وانه وگلبي
بعدنه ابشبچة الغربه
انتحلم بالعلم الابيض عله السده
نربي اظنون
وتصلي الدموع افروض كل رده
وانه وليلي الكبر ذنبه
خنگ كل الضوه ابعيني
ولا فرگس ضوه ابخده
وبعدني ابظنة الرده

اصبر بالعمر ،، تاني
اصبر بالعطش ،، تاني
اصبر بالدرب ،، تاني
ثگل ذنب الظلام
وگاعه جاي ادوس
جاي اتهب مساحي الريح
وتكسر اعناد الباب
وتفك الضوه المحبوس
جاي اتهب هلاهل ليل المعرسين
وترد لجسمها الروس
يمته..
اتهب هلاهل ليل المعرسين ؟؟
وترد لجسمها الروس ؟؟

عمآر خضير


انه وگلبي
وچم موعد دفه بخلين وأيد بأيد
انه وگلبي
ولوحدنه ومن ايدي انمسح موعد
ومثل شمعه ومنذوره لدرب عميان
وين الليل بيه يريد

انه مالي سمه ويالناس
محد عذر بيه هلال اسمر لون
من عاشور لاگه العيد

ادور لون لجروحي
وشفت كل لون عني بعيد
اه يهلال يامسرع غروب العيد
گادتني السنين لكل فرح مشلول

مخنوگ وشفت روحي گمر تايه
عله چتاف الگصب مشيول
وجهي من السنين رماد
ماصادفت چف گمره وونيني
يناغي كل مكتول

ادور بالسوالف تاهت حروفي
ادور نسمه بين اوجوه اليمرون ماصحت
شفت تابوت لاخر چف لگه چفوفي

وطحت مكتول بين البلكت وخوفي
بس انه وبلايه عيون تحضني
ضعت بين الشمس والليل وطيوفي
وفشلتي جناح لاح الگاع
ماصحت هلا تكحلني لضيوفي

وصحت كافي وصحيت بوجه كل غيمه
انه وگلبي ومشينه دروب محصوده

وفزيت بتوالي الناس شفت الفزه مريوده

منهد ذاك النهار الطاح من چف الفجر عالگاع بيده الشمس مشدوده
سمعت الوادم تسولف عله جروحي بسوالف غيم وبروده

من عدهه عرفت الناس
تشبهني لسن ووجوه
بس گلوبهم سوده

من عدهه افتهمت الناس
وكت الاه كلمن يلتهي بروحه

من عدهه افتهمت الگمر من يحزن
لوحده يعيش
على وجه الضلام ويرسم جروحه

من عدهه افتهمت السكته للملچوم مفضوحه

من عدهه ولوحدنه انه وگلبي تگاودنه
ومامش للنهار ابواب لا چف الشمس عتنه
وضعنه وجوه غربه بحضن الولايات مبيوعين عالنسيان
لانسمة هوه ونرتاح لاصح گبر يشهگنه

وتوسدنه الحزن تابوت
نترجه الصلاة وشموع
اثار الوحشه التزتنه

وتوادعنه فجر وغروب وي الناس
طشينه الموادع طيب

خفنه نصير عثرة شوگ لو وشلة خطيه
بدرب المتيهين لو طحنه

انه وگلبي مشينه لحد صدى النسيان
غنينه وحفرنه گبورنه ومتنه

أعادة نشر " عشگت الموت "

محسن الخياط السماوي


هويت وما عرفت عليه شيصير ..
و لا فد يوم اشوفن حالي واصحه ..
جبت بيدي الأصيلة للنواعيــــر
وانا من ايدي الظلام الضاع صبحه
وعگب عش الحمامة والعصافير
لفاني غراب لف جنحي اعله جنحه

انا البضلوعي دگيت البسامير ..
لخنجر ما حسبت احساب ذبحه ..
يهلبت انتبه واخذ تدابيـــــر
واسولف عالشداد اليدّي جرحه

انا ايلوموني اليدرون بالصار
وانا فوگ الملامة عاشرت مر
اتاعي بوصله حمرة لطير مطيار
گلت بلـﭼـن يحط وعليه يكسـر
الطير الما يصيد الصيده مو عار
لجن العار من تفلت من الحر ..
ﭼـثير من العشگ جريته مجرار
لگاح بنخلة ميتة شلون يثمر
ونزلت الحس دلو وبصرة البير
العطش يطرحني نوبة ونوبة اطرحه

انا البضلوعي دگيت البسامير
لخنجر ما حسبت احساب ذبحه
بعد يمته انتبه واخذ تدابير
واسولف عالشداد اليدّي جرحه

عشگت الموت سكتة و لا تنخيت
وعبنها الطيبة بيه اضواي يمتد
خشف ميتة امهاته بهيمة ضليت
غلبني الغالبه والبيه يشتد
الوكت من شافني بعكازة رديت
بنى ﭼـالي اعله ﭼـالي وگالي اصعد
واجب ماخذت بس واجب انطييت
وانا ذنبي وفيت الراح والرد ..
والمعزب طردني من المسايير
حويت من الحصاد اتراب رحة

انا البضلوعي دگيت البسامير
لخنجر ما حسبت احساب ذبحه
بعد يمته انتبه واخذ تدابير
واسولف عالشداد اليدّي جرحه

اجيت وطوگ تاليت العمر راح
وخلت بيه المحطة وفاتني الريل
وحسبته يگوم ذاك العاثر و طاح
گلت مركاض هذا وتعثر الخيل
اثاريني برمح من ايـد رماح
اشوف الدنيا ظلمة وما گلت ليل
بعد حگه الـ عليّه توكح وصـاح
مهو الـﭼـنگال ﭼـلب بالزناجيل
وصعب بس انا كسري اعله الجبابير
صدگ سواهه وكتي بلايه ملحه ..

انا البضلوعي دگيت البسامير
لخنجر ما حسبت احساب ذبحه
بعد يمته انتبه واخذ تدابير
واسولف عالشداد اليدّي جرحه

عطآ السعيدي




بناك تنام ليلك وانه اظل سهران
وتغط بالوسن وتكول سهرته..

وتتثاوب كسل ومنغصات الليل
مامرن عليك وضكت ماضكته..

وتفرهدني الليالي والتهي بطرواك
بس اجتر حزن واذرف دمع سكته..

اذا هذا اليدور بخاطرك غلطان
ماتعرف عطا وعن كرب جربته..

موش انته البالي ولا انت المقصود
مدري شلون رهمت وانت صرت انت..

وردتك عود ترهم مارهمت وياي
وردت بس ما تهيأ الحاسبه وردته..

على الخامس وسادس كالبتهه وياك
وارخيلك حبل وبلا وعي تعته..

ويمر صيفك واجرعه وعود اتاني شتاك
ياحنضل مرار ان كاظ وان شتـــّـه..

لهسه مرورتك تحت اللسان تبات
عكده وكل حلو بهواك ما ضكته..

صواهيگ وعطش وفياي مامش بيك
لا بالگيض في ولا دفو بشته ..

واحس بمنجلك يحصد ورود الشوك
اول ما نما الحدين وشرته..

اباريلك عليمن ليش بعد ارجاك
مجفي وكل سبب للوصل كطعته..

دناك انه الرجيج المايعرف الغيض
لو انه اليسيل الماي من تحته..

انا من اغتاظ افك للغيظ مية باب
واغلك للمراضه وللصلح سته..

انا يسمر نكور ومثل نزر الطير
اول مال لجحت البيك فرزنته..

مو صاحب طويله ولا ثمل بهواك
ولا انت ولام كلبي وصدك والمته..

اذن سيان عندي ان رحت وان ظليت
دامنت اعله هجرك عمر عاشرته..

اذا هذي رغبتك والهجر سلواك
موش انه اليعت بذيال بايعته..

ولانه اليشتري غالي ويبيع ارخيص
ويحط ثمن نفسه بسوك عاطفته..

ولو ادري اتغنــَّـج والغنج مطلوب
بس لعب العواطف فاتي او فتتــّـه..

انا بشرع العشك دين وصلاة وصوم
وبثكل البوارح لو حكم صمته..

وبشرعك شطارة وغالب ومغلوب
وكلمن يرى الناس بعين شاكلته..

اناحزني التلولي اعله المهد الوحيد
ماينشبع منه شكثر ما عدته ..

علامك ما تفرق الچمه عن الچوخ
ولا عمرك لبست الزري وكدرته ..

هو انه الزري .. والعله متونك چيد
بعد ما دار حوله وبله وسملته ..

على الغارب حبلها وروح لا رديت
مليت المسايس ما نفع شفته..

مقفوله وابوه اليدك باب اهواك
لا ابو يوصلك لو تظل بس انت..

مصطفى الخزاعي

لا تحلم الدنيا أصغر من عيونك
الدنيا وجوه وأشكال وضحك چذاب
بس أنت بطرگ لونك ..
بس أنت تفيض من البجي اعلى الناس
كافي تفيض مايك بلل اظنونك ..
كافي تعاتب النجمة ..
الشمس طيرة صبح حطت على عيونك
ووجهك باعته الظلمة .. والـ بعينك تبدة وسال ..
حزن عينك دفو موال!
اخذ كل صورة برموشك وسافر للصبح خيال ..
واخذ روحك .. ضباب الناس يكبر وأنتَ عمر اهلال ..
أخذ روحك ..
أنت متاني گذلة من الشمس تنباع للحيطان ..
كل ذنبك رفضت تطيح ..
أجت غيمة .. بچى وجهك رمل عالريح ..
وجزت غيمة .. وضحك وجهك رمل بالريح
أنت اعلى الضباب الـ ضيّع ارسومك ضواك يصيح ..
ضواك الباگته الوحشة ..
اعلى كل شباچ مد چفه ..
وارسومك الذبلانات مدري بيا جفن تغفى ..
گبل ليلة بالدخان ترسم وجهك الشفّة ..
الـ يمتى؟ وليلك يبيع البرد للناس
وتشب وولايتك تدفى ..
السهر بيبان مفتوحة لـ بچي الوسفة
السهر موگد حدر فَي الجفن يطفى ..
وحدر الـ آآآآه وجروحك تنام جروح الولاية ..
جروح اللوم ما ينشف نزفها بضحكة امراية ..
امشي اعلى الزعل ما دامهم ماشين ..
وبيبان الملاگة تسدهم حچاية ..
باچر والصدگ يخبط زلال اوجوه
كلمن چذب بـ مايه ..
وباچر لو جزوا طاريك ..
حدر كل نجمة توگف عينك امراية

غآزي ثجيل


صواني اشموع للغايب
يدجلة اچم وچم وديت
تتهادى اويه جاري الماي
وبعيني ملح حطيت

وأتنطر وأعد أيام وحجارة درب ذبيت

أدگ كل باب لعيونك
يجاسي الماعلي حنيت
تدريني يلفني الشوگ
وابدربك انة انذبيت
مر بيَّ ولو طارش واگولن مر علي للبيت

مر بيه ولو شامت
واگولن ليك انه انذريت
مر بينه گلب يفلان
ذابل وارضه لو مريت
شنهي المارچه عيوني
على اعيونك گبل ماجيت

شنهي البدل گليبك يخايب ليش مانشديت

نذر لعيونك عيوني ..
وحنيني ...
وكل بجايا الحيل
يلكلّك طمع عاشج
يعايل ماتعرف العيل
أظن تدري ابحنيني يموت
مالوم اعله چف اسهيل
واشچيلك واحن مگرود
يلوصلك ترافه وهيل
احن چالفاجده امن النوگ
لو فگدت حوار بليل
يالمها گلب مصدوع واتردها مدامع سيل

يطربها الحنين بشوگ
لو حنت ثلث توكات
وروحي الماغداها الفوت
لفها وجمع بيها وفات
يفطمها الهجر واتعود
ترضع بالوصل مرات

ديدان الهوه هذا ..
وصل
وامكابر
وحسرات
لاچن ياحلاة الشوگ لودگ بالگلت نغمات

يدعيلك حماد الروح
روض يعانج النسمات
محفوف ابسواجي الود
عليه أمروز ملتفات
مشتول ابأمل باچر
فرح بجناح فراشات
ترسم للهوه اخيالك
وتهديك بترف نجمات

يلما عاتتك كل شوگ غير اطيافك الحلوة

ينيسان الهوه ابترتيب
ياسلوه اعلى كل سلوه
هواك ابكل كتر چودر وسموك الخلگ بلوه

حيدر شيآع



حـاﭼـيني الـدروب اذنـوب
من يشـتـد عـطش بالـروح
تسبيـح العطش للماي
يرسـم بالفياي احبـوب

يـاقـداح
ياضـحكـة هـرش بعـيون كل فلاح
احـس بعيـوني ليل ودم
صـاحب ثار مايـحلـم
ياذيـني هـوه اجـويريـد
من كـل صـوب صوت ازرگ

ياعشـگ الصبـة والـكاس
حـلات الكاس من يعتـگ
اجـرحني وٲگـولن والمت جـرحي
اطـوش امنيـن ؟
وانت بكـل كتـر برحـي
كلـشي البيـك مامـگـيول للحـايف
ولامـاخـوذ منـك للـغريب امتـاع
حـلاتك عالسـوالف يشـتريك الراي
ماتنبـاع

حـاﭼـيني النـشد موعيب للهايـم
هنيـال الستر يتسمة بسمة الثوب
حـدرة اشـﭼـم گمـر نايـــم

تـعال ابـروحي اناغيـلك
وسـولفلك سبـع شبـگات
عن خصـرك واغنيـلك
وٲبـدي اگـبال عيـنك
دمعتي السمره

اخـاف مـن الـمحابس
وانـته نجـمة ابلـــيل
بعـيون الـزلـم شــذرة
ولـك ياهيـــل
بيـه امنـل خضـار اعله النخل صاعود
واسـتاهـل تلمني ابيـن اصابيعـك ورد ذابــــل

ﭼـم ليل ايتبسم والصبح ناطـور
بـﭼـيت اشـﭼـم قميـص ابـلاعطـر منــك!!!!!

ويـدگ گلبي علـﻰ المامش
اثـاري الـدم رفيق ايسولف الــدمـك

تـدنالي الشتال يعيش گاع الله
ويخضر بالسـواجي الـوان
من يلـگة النفس صدريــن
ياخـذ كل هوه البستـان
علـﻰ يامال؟
ادور بالفتاوي ومالگيت الدين
فتـوة تحلل البـــوســة

علـﻰ يامال؟
لوسولف العاشـگ بالعشگ يلام
واكبار العشاير تنگلب هـوسـة
ماترهـم اگـلادة او جيـد
مـرهون بـحرز ينســام
ولاتـرهم ﭼـگارة حيــف
تنصـاغ الـحلـگ نمام
ﭼا ليش الحجـر مـذمــوم
لو صادف اخدود الـجام

ليش اللام؟
وانه اول دمـــع مستـور
اضـحـك ع الـرحي من اتـدور
واخضـر رغـم غيـض النار
سالـوفة رغيف ابـحلگ كل تنور
اسـبگ للضفاير مسـتحة او حنـه
واطش روحـي اعلـه كل مغـتاض
بـﭼـفوفي هـله وشـاجـور
حـاﭼـيني ابـكثر ما حاولت انساك يالغالي
التلوحـة الجـفوف ارخـيص
مو مثل التـريض وانعشـگ
تالـي.

مـامرة عبايـة وتحـت منها انـتـه
ولابصـمات اديـه
الحضنـة الشباﭾ
مر بيها النـدة وطاح الاثر سكتـه
هـذا انـه حلـم مـگـيول
للماغمضة عيـنة
وهذا انـه جـرح بالـگاع
يضـحك والمساحي تسولف ابطيـنة

احـن واشتاگـلك عز الشـتة الـمالوم
شـوگ الشمس للـوردة
تعال اعيـوني كلها انجـوم
وحـدة تسولف الـوحدة
انـه اول عشـگ منـهوب
ليش اللام لو گلت الدروب اذنوب
تسبيح العطش للماي
يرسم بالفياي احـبوب

مرتضى مطشر

ياحبيبي ولا اتخاف
احنه كلما نبعد نرد للبدايه
گاع ربنا مدوره ومامش نهايه
ويجي يوم الگاع تفتر ونتلاگه
وكل وسيله تصير غايه

يجي يوم الزم اچفوفك
واوكف بگلب الولايه
يجي يوم وبالحلال بزفه افضحك
يجي يوم اهمس بذانك
همسه العرسان ذيج
المدري شيگولون بيها
المهم تضحك

يجي يوم ابفرد ماعون انتعشه
يجي يوم وتغفى فوگ ضلوع صدري
واحسب بنمشات وجهك نمشة نمشه

واني ناذرلك اجيب الزفه ممشة
وموش بالليل الصبح نغبش عليك
الرايد يجيب الرزق يغبشله غبشه

انت يالماتشبه احد
دائما من ارد اوصفك اصفن واحتار بيش
انت خصله براس كل ليله مضلمه
خصله محطوطلها ميش
شلون تعقلها اهدك
وانه غرگان ولگيتك حدري گيش

انه احبك گد حلاتك
لا اتـگلـي اتـحبني لــيـش
انت تدري عيونك مسويتلي واهس حتى اعيش ؟
انت تدري خدودك اترف من شكو بالدنيا ريش ؟
انت تدري بلون شعرك على لون الليل طاغي ؟
انت تدري الاوردة المتفرعه بيدك
كلها متفرعه بدماغي ؟

انت عندك علم برموشك يضحكن ؟
تدري بيهن بالخجل مرات يحچن ؟

انت ماعندك علم بيهن هذني
انت لو تدري بهذني
غازلت روحك غزل حتى احلى مني

اضحك اگبال المراية وشوف روحك ...

سمير صبيح


ترستك ماي خوة و لا نداوة الگـيت
طلع جودك شبچ واسراري تطشر

خاويتك عشب
ويـ كل نسيم اتميل
جربتك شجر بالريح تتكســــــــــر

ومن صارت صدگ
ردتك ولو حاجوز
وغصب عذرك قبلته اتخاف تتعــور

بزلاتك اضم
ردتك ضمير اتصـــــير
وجذبت الصدگ حتى انته ما تخسر

وعاونتك عَلَي
من شفت عذرك خاب
وقنعت النفس گلتلها يتغـــــــــير

لا كصرك طول
لا فاض بيك الطيب
لا شمسك علت والراكد اتبــــخر

لا مدك وصل
والعين شافت نـــور
لا گصرك طول لا لغزك اتفســــــر

گدامك طحت ما شفت وجهك گام
وهاك ابسط مثال وشوف واتصور

ولك خشبة بطبر
فرگست چف حطاب
من شافت حطب گدامها اتطـــبر

وجبت تعبي درب
صغته بعدالة ماي
يا درب الاصوغه وبعد ما تعثــــــر

ياليل اليظل لو فجر يتعـــــــناه
يا گلب اليدگ لو دمه يتخـــــثر

يا ذلة النهر يقبل سواجي ايصير
وگبل كل السواجي المايه تتنطر

گلت تطرح ثمر
غرني الخضار البيك
وبقت روحي اعله فيك تالي تتحسر

هآشم الخزآعي


لفّه شالك
زلفك اتبدّه اعله خدّك...
هوّد وخليني احضنك
حضني تفصاله اعله كدّك...

لا تصدلي بذيل عينك
اوكع بطبكات ضنّي
وضنّي ضنك.
يالرجت وجفوفي دبكن من حونّك.

يعجبني عندك طبع
بالغيض تمطر دفه
ومن تصفه جنّك نبع.
ومن تمشي برهدنه
تميل اشوفك ضبي
ودناك تطلع سبع.
ما هون اكبص الك
وجنات نيزك وظن الماي لو بلّلك
بالماي اظن تنصدع.
ورجع وشبكك نفس من عنده ما ينشبع.

وقنع وكولن صعب
بس كلبي ما يقتنع.
وردود ارد النظر
ولكاك عين وجفن
من عدهه ما ينشلع

وعليك التاف
مثل سف السفيف
وشربكة خصاف.
وفضيلك خلك طواش
فج فجة عباته وينطر الصفصاف.
وذبحلك الوحشة اضحية امعرسين
خاف اتخاف.
وخل حيلي اعله حيلك يفتح احزامه.
واسرسح عليك براضة مسيرين
وحط خشمي اعله خشمك خلك خزّامه
ووكع فوك خدك جن سنيح اوساد
والزك بي مثل ما تلزك الشامه.

ما تنضم وضمّك وكحه عين الناس
وجا كلّي الصبح هم ينضم بخامه؟؟؟؟
وكرداله اعله جيدك اصب روحي انكاش.
وتشلبه اعله طولك شوك يردم شوك
بلجن من تطخ تنّاش.
يالمالك تنين بسجة الحلوات
شماعيشك احسك بعد هم تنعاش.
وفصّل يومي الـ يومك
وسويلك نهاري فراش.

والليل الصدك من يجل هندس شوف
مو مطلع انجومه ودافن الخفاش.
واجل اعليك ليل
وجل على محبين
ومسامر ورنّة كاس.
واشبكك شبكة اجويريد
من يشبك اركاك الناس.

وازف روحي لكلّت مشتهاتك حيل
والم كل الكواغد ووج طرف الليل
واسبكلك مسافر من يتاني الريل
سجّه الخاطر بفركاك
وطيوفك اجدام اتحوف
يتشردغ محنّه بيوم بيهن كل وكت ينداس....

محمد ابو سرآج


گضاني الشوگ
وتعنيت الحلم سهران
نيتي اتناوشك بالبوك

انه بنشغة حلم صاعود..
وتراوالي ضواك عثوك

نبت مردي العتب بالطيف..
يشيعني المعاتب هور..
ويخيطني الگصب سكته
وعلى طاري روازينك..
افرّع ريّتي تابوت

ولا جثة نفس طارش استورحته

سگيتك مستحه يوسف
واگول تروج.
بأول طيحتك مرطوب..
اتلگاك عثرة بير
لاگيني بحضن تنور..
الك بيه سمار شعير

وتباريني شمس غروب.
اطش روحي سفر حنّه..
ورفيف..
وهدوة ولايات.
وغنه برحي..
حسبة سنبله بيه وسچچ عوزك سوالف ناس تركض للحصاد متون

وكلها ظنون
ظني المستحاه بيبان..
يعرگ طير للدگه
ودگينه الگصص چم ريل..
مافزّن حمد ملگه
واتيهك طيف.. وشتلگه ؟
حدر كل فطر شفّه تلگاني عطش وظنون فشلة ماي
واتحدّر سراب بذمة اخر ساجيه بلا راي

وتتمشه بأمل طرواك شذرات النده بروحي سرب حفاي
بعرس الگيض اطشن واهليه فياي

واتختل تراچي بكل زلف ناعور يچفيني ضوه مفرّط
وألم حچيك جرف هيل وسمر عنبر
وعلى جيد الدفو تنزل نده كلاده
بسفر ليل المشه براسي نواطير وسوالف ماحضن بلسان
اتشلبه السمه دخان
غنيت الشمس حالوب..
بوكت طول النخل خدران

بجويريد چلمه نعيش
فَي حچي الدلال رماد
وانت فياي نسمة ريش
ورمش طفله وعرس نعناع
باريني صهيل شراع..
تلگاني صدر ضفّه
شما تزگي الدرب وسفه..
والف وسفه..
چنّه نفيض.. من چان النهر نيشان
عصفورين.. من چان السمه تفك ريجها بغربان

وتعنيت الحلم سهران..
نيتي اتناوشك بالبوك
وگضاني الشوگ

عقيل العرد


انا تعبان وانفاسي قليلة
والروجة العلى متوني ثگيلة

انا بنادم صدك مذبوح واحتاج
بنادم مثلي مذبوح اشتكيله

من دكات گلبي وروحي زعلان
وحچي المرتاح احسه بگلبي چيله

انا اليجرحني اعذره وگلبي مرتاح
وگبل لا اعاتبه بعيني . استحيله

وما سامح لحدما اغسل الغيض
وانظف گلبي من حقده وغليله

شكد فارش شليلي وي اليحبون
بس ما عاتب الفارش شليله

واذا غلطان ادنگ للصلح ماي
وما اخلي الزعل يعبرني ليلة

الكرامة براسي تاج وما انذليت
وحرام تلوگلي الهامة الذليلة

انا لو ذالها ومن وجهي وطيت
صرت هسه انه ابو اليد الطويلة

ليلية انه روحي اعله السما تروح
و احير بفاتحة گلبي الثجيلة

انگع وجهي بدموع الخسارات
وعلى وجوه الشموس انشر غسيله

احس الصار بيه اكبر من الصار
وابد ما توصفه ابياتي الهزيلة

الشعر لو ما يوصف حالة الروح
على روح الشعر نقرا العديلة

واذا صار المغالب ماله عنوان
ما اورط العرجة وي الاصيلة

نسيت عيوني بخدود المحطات
وتهت والرجعة صارت مستحيلة

حسين سليم


مامش وطن بس عينك
عيونك مرقد الينجاس بيه النذر من يبرد
يفز جم معبد ابعينك لون جاسة الكحل مرود
الماحبو مثل عينك تموت بساع

يالشايل حلاة الناس 
الما صلاك مو عاشك

شكلت لله وتبديت بجفوفة اللوان
شخلة ونزلت اعيونك صبح عالجام
شكلت للماي وتبدة الخصر مضمام

مرة ويالسهر كتلك
كلتلك من اتيه وياك فك زيجك
وكلي الوطن فوك الشامة البصدري
وكلتلي الشوك من يبرد يخضر بالشبك عمري
رديت وكلتلك ويين ما بست النِهد شباج
ينفك للصدك نذري

تهت مرة على بيبانك غديت تراب
وندليت من فز النهِد شَذري
يالخصرك هلال الله
وسهر خمري
تاخذني سكر بهداي
اطيح من السما مطشر
والاكي اجفوفك تلمني واصيرن ماي

كلك تشتعل كمرة من اصيرن ماي
اغنيلك واضيع وياك
واكلك كلشي بعيونك يدليني من اضيع وياك
اجيت مكدر العينك واموت وياك

لكيت ولاية العطشان بعيونك
ولكيت الليل من يتعب ينام ويغفة بمتونك
ما ادري اليحب ايضيع بعيونك كحل مجفي
ما حسبت هاي الروح من اتيه غيرك وطن مايكفي

من يا ديرة هذ الليل البعينك
من يا طين اجيت اسمر
ولك مدري شكلت لله واجيت اسمر 
انة اندليت بيبان السما ابعينك
لمن شفتك عرفت اسهر
عرفت الليل بعيونك كحل ينجر
كلشي بعينك ايدليني من اصغر
تبرد مشتهاتي وياك كل ما بالعشك نكبر
وهذ انت يچالي الماي يمخدر

محمد الخزآعي


رسمتك والمطر غنه
اعلـه كل شبــاچ صفنة مــاي
ورسمت الطيف حنة شمس لعيونك
وفز رمشك وطوله افياي
تره اجدامك هوه ابلا راي

طفـه وجهك كمر
والغبشه ترس البال
اجيتــك هندس امرايــه
ومن شفتك كحل
وعيونهم خرسه
لضمت اسوالفي ابطولك
وغازلتك دفو حچايه

ومشه بيه شلب خصرك الوجه الهور
والكيت البلم خدران يم عينــك
والكيت النوارس والجرف والماي
كلهــا تسولف ابطينـك

واشتـلـت العيون وسجة جفوني لمشابك ريل
بلكي يصد حمــد طيفك
اثاري الأه البروحي ذنب مخمور بس يستغفر بكيفك

يصيت الفيــض
اشو نشفت مواعيدك
يا طيفي الكلاده تموت اذا مــا لبست بجيدك

ياشوكي العطر بالعيد
ما مرغــوب اذا ما شـم مراجيحك
يا كمره الوطن احنـه كلتلك
و النجوم تضيع اذا طحنه
لاكيني عرس بيبان اسامر
كل سواجيك وازفلهن نهر حنه

واطش لـرسوم كل موعد ضحك شباچ
ومشاور سوالف شوك معگوده باصابعنه

ذكرتـك وانجفى بروحي سلف دخان
بفراكك بياض العندي بس الشيب والنيه
حمامة برد بضلوعي ولا جنك
فخاتي ازغار غركــانه بدفو ابنيه

وهذا انه
كلشي اوياي ضـل سهران
الدمع بليل يتسمى مطر نعســان
مرلي وخـل نلم ارواحنه ونوكف شـذر عرسان

وعفت كلشـي ولكـيت الشعـر بمتاعي
شردت أمن القهر لولاية الضحكه وريــد ارتاح
جست روحي ولا مرتـاح
الحـزن بس بالشعــر يلاح

قناة (قصيدة وشاعر) للشعر الفصيح


https://t.me/sha3er_1000

عبآس الغآلبي




ارد أگلك جانت ايدي خوف ساعه
تمشي بيها الصفنة بجفوفك واغار من الوكت

وارد اگلك
چان عيد البرد أوّل ما شهگنة
وذكرى ماتنصف زمنها

امنين ماتحسبني ابدي بدورة عيونك واضيع   

يا ملاگة  الباب من يغدر البيت
ويغبش  لملّة غريبة

يا فهاوة أي اريدك
من تسولفها الحبيبة

اي اريدك
جنح مد روحة اعل طيرة يگلها 
ريضي عتبة بنادم متاهات التجيبة

كسرة الخبزة بحلگ  مسجون روحك
سجن مال مواهس المسجون لأسمة

وتحسب أسمك
تلگة روحك خبصة  مگاريد عن راي الحكومة بكل عمرهم

هيج اريدك

فطنة المرسال من يوجع  بريدة
خوف جنسية بجريدة

وارد اگلك انه جنسيتك
عگب ما صافحتني 
والصدگ مامش خبر ...

كرآر حسن




كبل ليله تواعدنه
وتفاركنه كبل ليله
ومشه ذاك اليغنيلي واغنيله
مشه ذاك العليه كل ما ضاكت الدنيا
ادور ضلمه وابچيله

وكبل ليله
دريت
الدنيا ما تهوه اليمد روحه جسر للغير

ودريت
الشجره كل موسم
يمرها اورقاها من اطيح
ما يرغب غصنها اي طير

وكبل ليله
خذتني الدنيا مدري الوين
ومدري الوين ودتني !

دورت الصدك والكاس
وكلبت الصور والناس
مابيهم ولا واحد عرف حزني

مشيت ودمعي ماخذني …

بس صدكني من رديت
احس بروحي ما خسران !

لان فشله اذا غيرك عرف حزني
ولان فشله اذا غيرك بشر لمني

كبل ليله
دريت بروحي للمثلك حلم عابر
جا هيج المجازه يصير
عفتني وانت ما غلطان
ولسه ومعرف شصاير

تذكر من جنت تغلط واعديلك
تبعد
من ترد تلكه العذر حاضر

جا هسه شعجب وشغير ضنونك
وانه الكاتلتني ومحتار
ياهوه الانشده واعرف شلونك
وياهوه اليكلك بعدك شلوني

و اخ شسوت عيونك

كبل ليلة
راودني القلق والخوف
من شفت الكمر زعلان
من التم عليه الغيم واتغطه
وما ضل الضواه بيبان

من شفت النجم ضايع وباهت لون
ومستاحش سماه وذابل وخدران

ساعتها اعرفت بحساس كل خسران

شمدريني الصور من ذكريات اصير
اضل تثكل عله الحيطان

حسبالي الجرح مضمونه دم يصير
مرات الجرح انسان
واثاريني جنت غلطان
كل هذا كبل ليله

كآظم اسمآعيل الكآطع


كف يجف افراكهم ..كف لاتعتني ..
كفني من جنه وجنت ..
وايام ناسيهه ونستني
لاتكحلني ابصورهم
وك مراودهم عمتني ..

وعيني ..!
عيني لوحه مشرگه ..
بالك تدك
وتبسمر الطيف اعله جفني ..
وانه ماعايز حزن ..
عاين بعدني بثوب حزني ..
كفني باعوني رخيص
او غيرهم وادم شرتني

رخصوني ضيعوني ..
جنت ليره اعله الدرب
وعيونهم ماوجدتني

جنت ليره اتلوح اعله اصدورهم ..
لاجن كلايدهم شبه وما والمتني ..

كف يجف افراكهم
عين العشت بيهه انكرتني
كربوني ..
ذبو الشص ونتل كلبي الجرفهم والسوالف دللتني
سمجه خطار اعتنت
واعله الزهر شصهم عزمني ..

ذبلوني ..
وجفلو من عيني حتى النوم ..
طار وماخفك جنحه اعله جفني

يوم الموادع نسوني ..
وحتى روحي
المشت وياهم نست ماودعتني
لاترد بيه الدربهم ..
جيت منه اوحيد
بس دمعي يزتني
جيت من درب العشك
مكسور خاطر
سحكو اسنين المودة
ومشو اكليبي الوفي ابسجة خناجر

لبسو دنياي غيم
او فورو اعليه الحزن داير مداير
كون اشك كلبي واشوفك
چا كلت عفيه عليك شلون صابر

چنت شمعه اضويلهم
لاچن عواصفهم طفتني
وچنت ليره اعله الدرب
وعيونهم ماوجدتني
وعيونهم ماوجدتني

عبد الكريم القصآب



وين مبحر؟
الموج آعلى من السفينه
وخامة شراعك ضباب ...

وين مبحر؟
وآنت ماتعرف آطباع الموج الآسود
وآختلاف الريح والليل الغميج ،
والدعاء اليعصر جفون السحاب ..

وين رايح ؟
ماخذ شموع المدينه
وحاطها بحلك البحور
الما تحطك على تراب

وين رايح بالبلابل ..
والصباحات النديه ..
والعصاري المزهريه ..
والليالي الخادره آبليّه شراب ؟

بعدك الدنيا فراغ
بعدك آصرخ بالفراغ
وما اجد للصوت باب .

وين مبحر ؟
بعدك آزغيّر على اسرار البحر
ما روّه عودك ماي بيتك ،
بعدك آبيض على نيتك ،
ماطفح فوك الوجه حب الشباب .

وين رايح بالرفيف الحار
يل كَوه لكَيتك ؟
كَلبي من ماي السفر خايف عليك .
خاف تهتز بالهوه .
وتعثر بموجة ماي
ويطير العطر من الثياب .
بعدك آزغيّر مثل صبري عليك ،
بعدك آبيض على نيتك ،
ما آمعوّد عالغياب .
وهذا موج بلا امان
وهاي دنيا بلا امان .
كل شي بالدنيا إله آكثر من وجه
وآنت آعلى نيتك
كل شي بالدنيا يغشك بالوميض ،
كل شي بالدنيا سراب
حتى ماي الله سراب.

كّلبي من ماي السفر خايف عليك.
كل شي بيّه ،الليل كله آيون عليك.
لشوفتك وصيت بيك نجوم ليلي
ولوّنت ضيها بمواويل العتاب .
بلجي نجمه آتحط على عيونك آشفايف بوس ....
وتمص الضباب ،
بلجي تندم ،
بلجي تزعل عالسراب ،
بلجي بخيوط الضوه آيلاكَيك وجهي.
وتستحي آمن دموع عيني ،
تستحي ونادم تجيني ،
وترجع الشجره الخريفيه شباب ،
وآرجع آزغر من شباب.

ميثآق الهلآلي


دفاتر للوجع گلبي
يالمطرِّز حروفي بنار
مدري شلون
مشعل بالورق عفتك
حلم گتلك يريد هلال
وانت بكل ظلامك جيت
غيم اسود زرعت الليل!
كَسرَة گمر سالفتك

صدگ ما ظل؟
يابو تسيورة العميه
اخذ سچّينتك وارجع
ضحكتك ما موالمتك

مطر غيَّرهن عيوني!
گبل يالگبل گتلي عيونك تهمني

گمت ماشوفك الرسّام
ذاك الحافظ ألواني
هذاك الچنت لوحاتك بنفسج واشتعل بيها
اليجي والرايح يشمني
ولا ذاك الگبل تركض على دموعي
بچفافي الوانك تلمني ..
ولا ذاك الچنت أول مواضيعك
(ضوه وظل وهوا وشلال )شِتْبَدَّل؟
صرت بآخر اللوحه فراگ ترسمني

بعد ما إلي اويه خطوطك ولا شبگه
من اهد ما صار لون السكته يلچمني
وبقن دربين
واحد مات 
أخذ درب الزعل وافتك
ومراجيح العشگ ضمهن
وراك وجوه
ما معلوم بلكت وجه باچر يفتهم قصتك

ولا اْنِصحك تبسّط  بالچذب
والدنيا سوگ حبال
وانت سوالفك حدها لطرف شفتك

شلك وياي؟
بيّ عناد حجرة طين
من يتسودن جويريد
ويذبّل غنا الرمّان
بابي اعلى الشمس يفتك
واذَكْرَك
هم ترد باچر
تجر خيوط المعاتب
وتَحَوّل سهم بعيوني
وينشدوني
واگلّلهم ولا شفتك

سجآد السيد هآدي



آنه الهم ستر وحجاب
دفعوني ومشوا لبعيد حال (البوب)
(ظل شجرة) صفيت بكل كتر مصيوب ..

انه البيه الحزن ينعاش  ..
ونه مرني الفرح ( رفة جنح فراش )
انه المصيوب ..
لا خيط التصحلي الوادم وأبرة ..
ولا شفت الفرح بلكاس ..

مابايك ندة من يطيح
احب سوالف البستان
جا شتريد مني الناس

وعمر منهوب ..
شمعه بعز شمس معلوكه ماواحد درة بحالي
وجم طول اعله طول يطيح 
من اتناوش دموعي
لحد ما ظلي يصفالي .

انه الما فزعوله جتاف من ثجلت حمول الطيب
انه الطايح (بجف غركان) ياخذني الحزن ويجيب ..

انه الضايع ..
(هوة عذيبي ويطب لكبور ) مامش للنفس شراي ..
انه المن شاخ كيض عيونهم صحرة ..
صغت روحي كلايد ماي .

انه المن شرع كليبه لهواهم كمر ومرايات ..
شو شفت الخلك عميان ..
انه الكاتلته وحشه وسكته البيبان ..
وادم ماتحب الطيب وانه انسان ..
هذا انه بكايا انسان ..
ما وردة التلم نداي ..
ولا فانوس لم روحي
وسراديب الظنون اجهبن عمر الراي ...
اه لو بس يلمني صباي ...

كل نسمه التمرني احتام لايام الجهل والطين
حد ما تزهك طيوفي .....
وكل هذا واكول بخير ..
ومن شفت اليخون يعيش
وانه بروج  ماحشمت مشحوفي ..
واتبلل من امشي اب بر ..
اثاريها من دموعي ..
واسترها بعبي حديثات لشموعي ..

وكمت شما امر متعوب استر وجهي بجفوفي ..
اخاف تسولف همومي
ويكولون التعب وازاه ..
وامشي ب(ضحكه الخالين)
بس كون استر اعله الـ اااه .

عبآس العبآدي


مد ايدك عليهن خلهن يفْترنْ
وارحمهن بعد مابيهن يسهرن

يبس ظلهن وراك
وعرگ ظيهن نار
ابخهن بالصبر والگاهن يسعرن

انه عيوني ماي
وجفني خفگة طير
كلما رمشن بفرگاك ينسطرن

درب مناطرك ذرهن دمع وتراب
صكن گامن من الصوت ينكسرن

لا لم الفجر
بصفاحهن جنحان
ولا من ينطرح خيط الضوه يوكرن

صحن كلما بوصلك ناوشتهن شوف
وكلما غيم هجرك نالهن مطرن

يبرلك طفل
بالبحر والتابوت
والله يلمثلهن كون ينبرن

دموعي بغيبتك لگمة بحلگ كادود
من كتر لكتر بالعين يفترن

بعدني الظم أيام
وفلت راس الخيط
ونثار معير ملاگي الهوى انثرن

شحط لـ صورك  المادفع منهن عود
الــ لا ينهجرن ولايرضن يخضرن

يفاهم زاد وصلك ترس بطن الطير
افتني باحلام كلما سلهم يمرن

بعدني بعز شهگتي
وباب عطرك طاح
انچفه ويبسن التوهن بدن يخْضَرنْ

والظلن بعد ترسة شراعك ريح
على جنح الوسن لطيوفك يعبرن

حسين شعلآن




سافرتلك بآخر اجناحين عمري
وطحت فوگ امتونك من الهم گصيبه

وسولفتلك عني وشگد مشتهيك
انت يا روحي  الغريبه
كل روازينك غريبه

ومنين ماچهبك بعيد
اهناك اني وهاي روحي
اهنانه يمك بس غريبه

شماخذ امن الروح انته
وليش هلگد تشتهيك
وليش كل هذا الندى البچفوف أديك

شرد اگلك
وانه شفت الگمره تتباوع عليك
وليش بخدود السمه كل نجمه ماهي
شما تفك شباج صار الليل فاهي

وداعتك
يالبيك لون الماي واسوالف مطر
انگع بكل چلمه منك
مدلي اصابيعك گناطر بينك وبيني نهر
شمالها عيونك سفر
واعتنيك شوفي بزلوفك عثر

طيره روحي وغصن خصرك
وارد احط اچفوفي عش
انت يابرد العصر بالروح طش

جيسني بغفوة اعيونك
شما اشمك كون يلبسني قميصك
شميتك وتاه الگمر نگطنه شوگ
وغيمت بگنه الشمس من باجر
حطيتها بصف ضحكتك

وتگاودنه لآخر ماي چان يشوفنه
ورسمنه نجمه اعله الجرف
چان الضوه أمن وجوهنه

وغنيتلك رد الگمر فوگانه باس احروفنه

محسن الخياط

( طاحونة حزن )


روحي المارواهه الماي
حكهه عليك
ل ارسم ونتي اعله اوصافك الحلوات
ياريت الحلم بس بيك
طاحونة حزن مابطلت روحي
تحن وتدور وتلاكيك
كالو ماتجي وجذبت ومتانيك

ياواحة بنفسج وازود واطعم
ابيعك وانخبص واندم
ابيعك واندم واشريك

ياذاك الذهب لوبي رخص تتشمت الفضه
واعديلك جثيره جروح
وامطرلك محنه وبالتعشكه ارضه

وحكك طيبة اليوفون طيرة ماي
لابد ريشهه تنفضه
وتضل مناطره لملكاك
ولاموني ويلومونك
واضيعك ضيعة الزيبك وارد الكاك
لاموني هلي ورديت
وثيابي تعاتبني وبعدني اهواك

اغربل ماي
اشوه
ولااكول انساك

يااا شنهي الملحه المنك اعله الروح

ارضالك واكلك زيد
يلي المن يمر طرواك
يتحنه الورد ويطلع البستان بجويريد
يالمنك دواليب الفرح والعيد

يلي محبتك بالروح
مثل الخيط
كلما تنكطع يطلعله راس جديد
ويطعم حلاوتهه
يرد بعيون شافت ماتشوفه مراية العريس
واحتام اعله شوفتها

وعله الهجروك ..لاتحسبني عالهجروك
كل ورده ولها ريحه
وكلت للزاعلين عليك

شيضر النهر
من تزعل الجيحه ؟!
وخاف توهمت وياي
من تشابه البيبان

كل باب ومفاتيحه....

ذياب كزار

باچر عشكَـ

ياشوگ ياهو اليجي لاتوكف بصفنتي محد يدگ الباب
مو تدري چفي ثلج
وخدودهم من شمس
لو اجيسهن بالحلم
تلگاني صم تراب


مافرحوا لضحكتك لاتنثرلهم عرس
شيجيب باچر عشك
والعشك ضاع من أمـــس

بعيوني شتوة سهر .. بس سلهمت للصبح
من دثروني بحلم
ومن فززوني الصبح
شتّمت حتى الحلم
وأرسمـت صورة حزن
تشبـه وجه ديرتي
ياهلي بنآدم يذل
لو صادروله وطن
والذلة لمن متت ..
من حشمت بالوطن ..
ماشيع جنازتي
ياشوكَـ مامش وطن ياشوكَـ مامش أهل
بعيوني غبشة درب
بس مامشه ولايه
مـن دورو شـفـتـي ..ما وچدوا كـل حـجـي
بـس لـگـوا حـب الـوطـن تـارس حضن شـفـتـي
و ذبـحـوها لـ الـحـجـايـة

سجآد شآكر


انت مشتول بدرب صفاف في
ماكو موعد جاسك ورجفن اديك

فياي كل تعبان يتمطرح عليك

اطيح من راسك لجدمك
مطر ما مجبور خاطر
انعم الله على سواجي تكود بيك

اخ منك وين اضمك
منكسر ما تنظم مرايه عرس
والفشل تارس مجانك

ظال المن

شوفلك واحد غريب
احجيله كل هذا البصدرك .. تستراح
وادمك حدهم ضحكتك
ياهو إلي حبك .. بحزنك

وانت طين
اليسحك بصدرك يغزر ما اتيهله جدم

وهاك شوف
النهر من مايه يندچ بالجروف
وماكو بالدنيا امان
الخوف ما عنده مجان
يجيسك بعتبة ضنونك
من تظل بطرك روحك
والهوى يركص الكواغد

النهر نايم والكمر ناطور كاعد

أنا أول واحد تشمتت بيك
كلها منك
ليش بديت الخلگ كلها عليك

ابقى وحدك
اليظل بوحده يلگه الموت باب
موت حتى تزيح حزنك
موت حتى يطيب جرحك

طيبتك سلعه قديمه الناس شراية اليوم

اليريد يعيش كون يدوس كلبه
ولو هي الكاع فصلية على كد ايد الفلح
والسواجي التضحك مبينه جرح

غيضك التارس عيونك
ضمه لليل الطويل
احجيه لكل نجمه غريبة
احجيه للضايع حبيبه
يضوك حزنك

ولا تفك ذرعانك الوادم .. رمح
القناديل الغشيمه ياهو يفگدها الصبح
وخلها ترجيه (الخسارة) تعرفك شلون .. الربح

وشنهو ربحك
تلهب لعل ما يجون
تعتب وما يستحون
ترجع ودم بقميصك لا كطن لا جلمه تشفي
السكته كنطرة الفشل
تكوم تتلثم بجفك
ومستحاك يكضك بلايه ادين
وعتبة اشفافك ندم
تمشي والسرداب ما واصل وحشتك

حسن قآسم



أجيتك من توالي الهم
من ذيچ النوايه البيض
من چان الشعر يتشابه وي الدم

اجيتك ياضوه السبعين
من طيش الصبا
والطين
والماي
وسمار الگاع

وگالولي ضواك نباع والظلمه شترت لونك
يلون الناس روحي تريد تشرب خمرة عيونك
وتحني الليالي بطينك الخمري

يماتدري !!!!
بعدني بكل مسافة الگاك من عمري 

وبعدني شما يمر طاريك
أتيه بديرتك نسمة هوه وبيبانك تشمني

انه خلافك ظرف وچفوف المتانين تلچمني

وانت هناك متبدي
ولاتدري شنطاني وشخذ مني الشوگ

يفلان اليظل مشتاگ من عمره اليالي تبوگ

سير ياضوه
وخل العيون تضوگ 
من ضيك ينجم سهيل
وتزيح السموم المارضت تنزاح

يفلان الظلام يضيع من يسولف المصباح

ويدور بگايه الليل
مثل وجه الغريب منين ماصحله وطن يلاح

ترى المابي ملامح شوگ
مايفهم حچي البيبان

شموازي الندى إبين الحطب مخنوگ
وانت سوالفك ريحان

يالخاتل بسد الغيم
على اجفون الظمه امطر شوف

لاتنسه الشمس چادودة الكمره
يماتدري العشگ نضره
بعيوني الرسايل ليش ماتقره
وليش من اعتنيك الگاك بس ذكره

وصليلك شعر وابچيك
وانه ادري الشعر نيشان للفقره

والمك طيف وتسافر
ورد اردود المك مشتهه لباچر

خذت لوني القصيدة مراية الشاعر
بيها يشوف كلشي يضيع
من بين العيون بلا نضر ينشاف

القصيدة الماتموت بموت راعيها تصير چتاف

عمآد المطآريحي


يا درج دنيه ألفرح
يا تراتيل ألشعاع
ألطرزت وجه ألصبح

يا مراسيم ألضوه وحلم ألضباب
بحة ألمزمار تهديلك حلم
ولوعة ألتفاح ترسملك جواب

يا ورد مزروع بسفوح ألعمر 
أشرب ذنوب ألخواطر
عرج ألسدرة حلمنه
وصيح بوجوه ألخناجر

من عرفتك عاند ألساني ألجرح
ماتن ألچلمات وظنونك رصاص
ألليل يتركلي فواتير ألصبح
ألليل قارب ذكرياتي
أنتَ  قارب للطفوله
جرحي قارب للألم

جعت للضحكات
مجدافي أعتناك
أحس بسماتك مناديل ألربيع
ويه كل حبة مطر
يضحك شتاك

صوت ساحر ناي مفجوع بقصيده
أنثر نجوم ألضفيره
أفرش ألمهجه فيافي
أزرع ألجرح ألتريده
حبك بعرض أمنياتي
بطعم جرحي
بطول سجادة صلاتي
تحلم أبحور ألرمال بلون وردي
وتحلم أحلامك بسلة ذكرياتي

علمتني
أجمل اللوحات من نوح الطيور
لو نطق حرف ألقصيده يضوي نور
لو ردت تجمع عسل صير وألي عله ألزهور

أحتضن حلمي ألجديد
أسبح بعالم عيونك
أكتب سنين ألعمر كل لحظه عيد
وأنتزعنه ألفجر من چف ألظلام
من ألورد نرسم فراشه
من ألشعاع نخط قصايد
يا عصافير ألخضر شباچي نام

عبآس الغآلبي



مَرنيّ موسم عوز حنيتك شتال
كلفة بس اشرب جفاك
وانت تشرب بس دلال

اشيلحگلها وآنه سالفتي إعله كدي
وينك مناطر بخت كلمن شراني يدلل بحرزة اعل زندي!

گلبي چيله وحزمت ماي
ومشت ثار إعله بردي

طيفي چول
ولا يصح رسمك دليل
اليعيش بلا حبيبة يعيش عد اهله دخيل
النام ليلة وجفنه بارد عدّه حيل
يّرجت شجرة غنه وعوزي حمام

مصافح الريح اشتراني
ويطلك بچفي سلام
بية الك حسرة ولاية
وشوفة عيونك امام

اشتريني ولا تساومني اعله بختي..
ذيه واشعلني خيم،
ولا ترد مِيمون مكسور بغربتي

آنه غطاني التراب وحتى نهر الشوف وشّل من صفنتي

نفّه لدربي تره عيوني غرب
شوفي شجرة ماس والبرزخ درب
الفرگه تتشضى إعله ريل اعمارنه ...
اتلمستهن سچه سچه عثوگنه ومامش رطب

ودوريتك وين ماعد الله ليل
ومن لگيتك واهس الدنيا صهيل
اشما زغر خصر النهر ينشاف للوادم ذليل

ولاهي ذلّه السبّك لشوفة حبيبة بغير وعيّه
ولاهي ذلّه الضحكته برخص الملاهي اطشّهه نثّيه

العاتبوني بلايه عرفه عاتبتهم
امنيلهم واهس وحشتي
آنه من اجزي المكابر يشتم الميت حسرتي

حسين حيدر


روحي صَحرة وفَي اصابيعك نهر
وعشت يم جرفك نزيز وصوت ماي
وطير مشتاگ اللحن ..

وجيت وية الهوى مكتوب
وبروحي سراب إطيوف
إجيت بلهفة ايامي حزن يعگوب
وترابي يخط بالماي
يتبلل بطاري الخوف

وأمد روحي وية ظلك ليل
امد روحي طفل خايف
طفل بــ أحلامة راسم مزنة للگيعان
راسم شمس للظلمة

و يمر ذكراك وآنة اشتاگ لـذنوبي
وأنة ذنبي ذنب عابد
وشراعك شراع الماي
يحچي لــ النهر سالوفة القداح

هذا انت خضار وطين
راكد حدرك البردي
وهذا انت ضواك مراية عيونك

ويهنيالك على عيونك
أُولاية بگدها إشوفنها بضوة عيونك
أُولاية بگدها إشوفنها بــ ندة إجفونك
وتاخذني واطيح إمراد
ترچية لــ زلف گاعك
واغنيلك يطير الماي
حد ماتخضر علىٰ الراگ بردية
ولمع جنحك سمة والوان عذرية

وأگلك يا معذبني
نسيم اليضحك بزلفك 
لگيتة إيبيع بــ إشراعك
و اريد اعرف يــ كون اعرف
شنو الغثك بــ فيي و نويت إتطير

يــ ما تدري
بهت ياسي و لچح عافيته يم گيضك
و حولين إندثر وجهك
ولا مرة لمعت فضة بعناويني

إنست گلبي بفراغ و طارش البيبان
اخذني أُوياك
دگني علىٰ الخصر جرفين
احب جزرك ..
و احب مدك ..
و اشتلني علىٰ بيبانك ظفاير طين

و أطيرن بيك
و نتهامس ضنة إمن الخوف
و نشهگ شهگة المرواح
من تصرخ بــ روحة الگاع

و ننشد وين تالينا ..
تالينة حزن دنيا و روازين بمگابرنا
تالينا شمس بالگيض
شمس إتنزل إخيوط الفي بساتينة

      

ناظم الحاشي


عوج أغصانهن ماينعدل ضلهن
كبرن وانحنن ماشوف تعدلهن

مالن من زغرهن والگصب شيفيد
اذا شديتهن چف غيرك ايحلهن

ماصلن أبد عالقدس متوضيات
مدري منين ماي ابليس جابلهن

مهن حلن شعرهن لليهود بليل
اومانگدر نگول اشصار بكذلهن

شگن ثوبهن واتكشف المستور
ياقائم محمد گوم خيطلهن

ينزف من غدرهن ياجرح بغداد
ودم اليمن فاضح غدر باطلهن

الحكومات التحلل دم شعب مظلوم
ماعنده شرف كلمن ايجاملهن

ازعلهن وسبهن واليصير ايصير
شلي بصوت الكرامه الما ايزعلهن

حكومات العرب كلهن بله استثناء
اخذلك من جهنم نار واشعلهن

الظماير من تموت ايكف شليله الماي
مايصحن محال اشما اتنگطلهن

دول باعن شرفهن وارتضن بالعار
وأراضيهن يهود الكفر تحتلهن

ظمن چف اديهن من حرب لبنان
وابن سعود هد اوصفگن كلهن

چن ثار القدس ماراح بسرائيل
بأرض اليمن ثار القدس راحلهن

گلي منين أجيبن مثل چف عباس
ينگص عالشريعه اوما ايصفگلهن

اويبن سعود صاير عاليمن رجال
ورايات الكرامه رايد اتذلهن

لوعندك شجاعه حارب اسرائيل
واعلام اليهود الترف نزلهن

اولو عندك شرف رد شبعا والجوﻻن
الصاحلك وبذنك وقر گتلهن

بنات بیوت حيفا اويافا ياملعون
وامس دخلن عليك ورحت تخذلهن

انغصب عرض القدس والخيل مربوطات
وسيوفك صدى الزنجار ماكلهن

تفك الجامهن هسه اوصرت مغوار
بعد ماخلصت عمرك امسنسلهن

چلابك عاليمن حليتهن ياعار..
الواجب عاليهود چلابك اتحلهن
..

عطآ السعيدي


سولفوا عنچ هوايه
گالوا أنتي الف ليله وليله ترفه
وعگب كل ليله أتثاوب شهرزاد..

وسولفوا عنچ هوايه
گالوا أنتي مثل شباچ المراد..
وگالو الطاف بحظرتچ ينزع ثياب السواد..

ومثل كل الناس
أطش ملبس بعتبة الباب
وبعلو حسي أصيح
مراد يا راعي المراد

ياسكم روحي وضناهه
لمسة چفوفك ضماد..
انا يلفحني سموم الگيض
وتبورح الشفه
وحدر زلفچ والتراچي فياي وعذيبي وبراد...

انت يا مزنة الوسمي
وانه شتلة عوسج بطرف الحماد...

تروح دنيا وترد دنيا وانا سكته وانت متكتره لغاد...

انا لا الله هداني و سولفتلچ
ولا عيونچ فسرن شنهو المراد..

وبوگه غفله چفوف غيري فرهدنچ و أفلست والغير صاد..

ما اضمنها عليچ
لسه شوگي جمره مدفونه برماد..

علي عمآد


هنا يمن صم ذهب هديتني من ايدك
لو يستقر النفس جا كلت ماريدك

موسم خضاري بده
توه بده ونشفت مواعيدك

من تسمع تعودت عــ الفركه هز ايدك
شتريد اكلك كضت
وكلادة صغت العمر وتعلك بجيدك

اركض وانا المختنك
نسمات الم الهوى واعزل بالتفيدك

شفتك بصحرة ورد وتحزمتلك صبح
لميت كل الندة اليكسر تقاليدك

جا من شفتني طحت جا كلت مافيدك

انثر دموعي شذر
ودوسهن من تمر
واضحكلك بــ عيني
هو انة حتى الضحك بعدك يبجيني

شيطلع من ايدك هني
تكتلتني تحييني
لنارك ردتني حطب
كيفت ما صدكت

معقولة مهتم صدك وتريد تجويني

معقولة عندي جفن
هم حالي حال الدمع
لو زعل يجفيني

غيرك شتل ما شفت
يتشاهد بكل جرف ويخضر بطيني

رحال اتيه النجم وانت التدليني

وياك اضيع العمر بسكون تلكيني

يالشارد من الكلب
نبضة وخذاها العشك
فرها بشراييني

يابو اللكاط الصدك
مر خل اهزلك عمر
واكطفلك سنيني

مر يالعفت كلشي مر
بلكي الهوى من تمر ما يعثر بريتي

حسين البهادلي


اولى بحزنك انت من الجريبين
مرة اختار روحك كون تختار

اشتحط للطين ؟ من كون اليزل طين
وياخد ؟يلتگيله وضال محتار

السبات الليلهم ليلك سوادين
مادام البراسك كلهن كبار

المن عايف ؟ وتشتاك بعدين
والمن سيفك وگظيتها بصار

بيك وماتعلگ عالحياطين
غير افطورهن ماشوف تذكار

اجيت وواهسك صبح البساتين
وتتزعل واليراضوك خطار

ورحت وعيونك اعمى من السجاجين
التظن غاطيها دم وهو زنجار

نگلة جدمك اتجفل الدرابين
ورجفتك بالنبوة تحسس الغار

ومغيمة سماك وصارله سنين
نگر شصك ومطرت وانت مندار

حطب ناگع وعمره يطول ال يلين
لچن لين الگلوب اعمارها كصار

هيس كاعك البوّرها الونين
چم دوب البواچي تصيرلك كار

عفت فيك وحاير بالروازين
مايحتر مچانة السولف اسرار

انت الطايح المتعوب ..وتعين؟
وحملك عوزه ريشة وينحسب ثار

على كل رفعة ايد من الدعا آمين
غوث من الگلاده اتضيكها سوار

جروح وباچر يصيرن نياشين
ال على عيب اليطيبن عيب مو عار

لو سألك محمد عبد الوهاب ..
كل ده كان ليه؟؟!

شنو راح تجاوبه بـ بيت شعر؟

عباس الغالبي


حسافة تبيع عمرك سكتة بشموعك ..
يطيح الليل من حيلك
وحسافة تشيل حمل الرازقي ومايه
وتدور گمبرة تشيلك ..
يـ تيهة ديرم بـ حِنّة ..
تخيّر سـچة جروحك ..
حكومات الدمع مو الا تبچيلك
وتخيّل دنيتك نثية وبچت بشليلك ادخيلك ..
وخذت طينك ..
سواتر بللت مايك .. لوَن محرابك السنبل يمل حچایته بدينك ..
وگالتلك .. حوافر خيل المرايا ..
يسبّگ شوفك بكيفه،
بعد يا جفن يحلالك لوَنك طايح بعينك
ولا تندم، الشمس مو ستر للظلمة ..
بس الصبح فيّ بيوت ..
يطيح من العذاب إنسان .. ويسولف فرح للموت..
جا المن تصير إنسان وأنتَ من الزغر للموت ..
ﭼـفك مو الك .. للخصر، للتابوت ..
جدمك مو الك .. للگاع .. لـ اغنية غيابك لوَن سچة تفوت ..
عينك مو الك .. لمراية الغيمة .. سكتة وباوعت للصوت ..
شِفتك مو الك .. للندم، للشباچ، للهفة التعتّك من يصيحك توت ..
كلّك مو الك يا تيهة الديرم ..
وبعدك ما شلت عينك ..
عثر أسمك بجفنك من صحت روحك ..
وگوة من الصدى الما لايحك شلتك ..
عليمن تكتب سنينك ..
العمر ضحكة العمر يتوشّل بوكته ..
وها يمته؟ ..
الحَصد ياخذ مكانه بذلة المنجل ..
چم عثرة الـحچت للگاع عنك ما يمر صندل
چم احبيبة سوّتلك گصيبتها ليالي شموع ..
وأنت اتيّه من تندل ..
چم أغنية گالتلك .. تعال وبيعني ثياب اعلى طاريهم ..
ولا تفرش اصابيعك ..حلال برگبة المغزل ..
يخايب ما تهت تتمرجح بضيّك ..
مالك نيّة تتوضى بخمر غالي ..
صلاتك ما جزت فيّك ..
يخايب ورّد بتعبك ..
ولا سوگ الهِداك التشتري جروحك ..
تشتل "ها" وتخضر "صفنتك" رايجة بروحك ..
تحصد تحط گلبك درب للشوگ مو للشوگ
مامش درب ما مسحوگ ..
وما دام الصدگ مبيوگ ..
تاليته الفرح مبيوگ ..

مصطفى الخزاعي

هذاك أنتَ المشى بـ لونه سمار اوداع ..
وهذاك أنت العزيز الماي وجهه الگاع ..
وهذاك أنت عشت نبتة انقرت عاگول
ما ﭼـن منشتل نعناع ..
وكلمن سافر بـ نيته ..
واليعبر شواطي الليل ..ياخذله وجه وي طبگة عيونه يفز اشراع ..
وجه ما غِيرت ارسومه نوايا الگاع ..
وجهك منشتل بيه شتل گمرة ..
لمض عالمنجل الينطر شتا سواليفنا الخضرة ..
يا بيدر ضحك عذري تبده بشفة السمرة
يالحزنك عمر نخلة عراقية عشت فيّ ومتت جمرة ..
يواهس مستحة عيوني شربني النوم
عطش للما حضى بگدره ..
عطش يالمستحة عيونك مري احديثات
قريت الجايب سنيني ..
شما طاريك يذبل ..اشوفه يورّد بعيني ..
وشما تبرد اشفافي اعلى فيّ ضحكة ..
افز واذكر دفو ونيني ..
وأمطرلك بگايا الناس البروحي ..
عسى تجيبك بواﭼـينا ..
وعسى يلالي التعب نجمة بمحاﭼـينا ..
وتگول الناس ماله..
شما عبر گيظه تخضر ساجية بعينه ..
ما يدرون ..
ما يدرون من جان العمر لـچمة توضينا بغناوينا ..
ولا يدرون من جان الزعل نجمة ..
تسامرنا بروازينه ..
جانت تزغر الگمرة بسواجينا ..
وﭼـانت تندهّ الغبشة مساحينا ..
وﭼـان الزعل من يجزي ..
نعرف لذة بواﭼـينا ..
وگلتلي الموت مهرة .. اتفرزن الخيّال لو تاهت نياشينه ..
وگلتلي نعيش والدنيا قصيدة غيم لليغفو الصحو بعينه ..
وگلتلي الما يحب الناس بس الريح
والعاگول ينحر صحرة سنينه ..

اوس النواب

يا عصاري اهلي
ودفو الحوش
وسطحنا

اليشبگ خدود الكمر ويبات يمنه

انت وينك ؟
دوريتك

بالشناشيل العتيگه ومالكيتك
تالي منك ايسيت

ورجعت من الحلم
مكسور طيف

جفي كايد محبسك وبلايه شذرة
جي لان انت شذرتي

جنت اظن جتوفك يتجن كُبرتي
جنت اظن تبقالي دوم

تالي رحت بلايه نشده
حتى مالحكت اودعك

حتى ما لحكت اكلك
من تسافر لاتسافر

سافر بروحي قصيدة
وطير بيه
وصْفك جنيحات گلبك

حطحط اعلى جتافي
حنية جهال

آنه لو موجود اموت وماتروح
وكبل ماتندار اصيحن الك تعال

بس مشيت
وانه بالموت انتجيت
بس مشيت

شاكر الخباز

هلبت بليلة حچيتي لشهريار
حچاية العافت رجلها ..
ﭼـانت بنية ولا كل البنات ..
وحلوة مثلچ شهرزاد ..
چانت وچان الوكت دنّة بحجلها
چانت بكل بيت من كل المحلّة
حچاية النسوان كلها ..
ها حلاها، ها وسع عين العليها
والحلگ، قربان من سوة حلگها
حلگ حمرية شواطي ..
والشعر ظلمة شتا ..
وليل الشتا إعله الگذلة ساطي
والصدر مرمر، ولا قصر الخليفة المنّه حاوي
ولا حوَّة من الشفة حاوي ..
چانن يغارن لوَن سمعن زلمهن
ردّدوا طاري سعاد ..
يا قهر لو وحدة منهن لچحت تحاچي رجلها
چانت أعذب شهرزاد ..
جانت أعذب من ليالي الصيف وأطرة ..
وچانت أترف من حريم الوالي والسلطان وأمره
وچانت و چان الوكت .. دنة بحجلها ..
فاض نبع الشوگ عدها وغرگاها ..
وضلّت تفوج بحلم والمد طواها ..
وشلهت بشاطي أملها بلوح زفة ..
ﭼـان الوليد بكبرها .. شوية أكبر ..
ﭼـان جيران العمر والجورة تكبر ..
وهوَ يكبر وهيَ تكبر
طفّوا بدرب الوكت عشرين شمعة ..
فاض نبع الشوگ عدهم صدفة بالحب ..
وغرگوا بناگوط دمعة ..
دافوا بليل الوصل حفنة سوالف،
باعوا الدنيا وشروها وباعوا وردوا شروا ..
وتمازحوا، وتزاعلوا، وتصالحوا،
وترادفوا مهرة نبي سليمان.
وتعدّوا حچي وشر المضايف
..
..

بشير المرشدي

ماكو واحد ينتظرني ..
غير صورة مدثرة برفّي القديم
وورقة متهزل جسمها ..
كاتبتها ﭼـفوف وادم ..جانت لعيني وطن ..
عايش بدنيا غريب ..
لا شوارع تشتهيني ..
ولا گهاوي .. ولا مسناية العليها اجدامي تغفى ..
امشرد بديرة هلي ..
عمري خلصته اباوع
هلبت يمرني نبي ..
هلبت يگاودني بيده ..
وأصعد بليلي گمر
اتغربيت وخلوا بداري نزل
والطلاليگ الگبل تفتحلي ضيها
جتفوها بسنسلة ورزّة وقفل
وبهتت ارسومي صفيت بلايا لون
وكاسريت ايام عمري
ووضاعن بشهگة نفس
وصارت الضحكة حرام
وصارت الدمعة حلال
وانصلبت بنص سكتتي
طير مكسور الجنح ..
لا سما ظلّت تودني ..
ولا غصن أشرلي بيده ..
وأعزف بمتنه لحن ..
عود مگطوع الوتر بـ ﭼـفوف اعمى
امناطر ابنادم فطن ..
يخيط اهموم السنين
ويترس الشارع غنا ..

حسين التوبي

عصفت والشمع مگبل بوجه الريح
ولهب يغرف عناد النهر والخدّر
خذوا سم للخليفة بدون ما يدرون
وهاي أول حرب ما بيها كر وفر
خبز ما عشت غربة بكل مجان اتمون
بس جانت التوجع غربة المنبر
النصر مو لحظة الكلها متوقعة تفوز
النصر من تطب والكل حاسبك تخسر
تندل وين ينحط منجل الـﭼـوّاي
وگلت غدر الأقلام أشرس من الخنجر
وگلت لون الخصم ما يقبل التلوين
ومثل وضح الشرف هم واضح المنكر
رفضك يكشف أعذار اليدوّر أعذار
المسح ﭼـتف الحكومة بحجة المضطر
گلت " لا " بوكت بس الـ "نعم " تحميك
وأصدگت بوكت بس الـﭼـذب معبر
ميّت والحسين أطول الموجودين
برمح ولا برمح فيّ الثبت يكبر
الموت بخطبتك حريّة للينهان
وتلاشت والزلم ما لحگت تگصر
سكتة وبالقصر يطلع صدى من الريش
وحطب ما ينسمع اله صياح من يسعر
كلت بطش السيوف بسطوة الإيمان
وجابهت الرماد بشفرة الكوثر
وعِلت وصلت علي وسبابة الزهراء
ونهظت بالعقايد همّة المنبر
أول مرة تطّي مكشف ويم ناس
من شلت النصر وأطيته للمنحر