موقف كفيل يخلي الانسان حقيقي يقفل من كل شيء
من اسبوع عميلة جت مع طفلها ف حدود ٨ سنين بتسنده حرفيا مش قادر يمشي ... دكتور الولد ده تعبني معاه سخونة شديدة ووجع ف الجسم وبيقولي مش قادر اتحرك وحتى الاكل تقريبا منعه ... الدور ده داخل ف اسبوعين كشفت عند دكتور وقالي عنده دور برد شديد ... ودكتور تاني قال ان ده متحور كورونا وكتب ادوية واعزليه ف البيت اسبوعين .. بس السخونة مش بتنزل والاعراض عمالة تزيد
بصيت ع الطفل واضح ان الدور مش كورونا ولا دور برد ... قولتله انت بتحس بأيه .. لقيته بيقول صداع شديد يا دكتور وسخونة حاسس ان جسمي بيتفتت ...
فضلت افكر ف الاحتمالات قلت يمكن virus A والدكاترة مأخدوش بالهم .. سألته البول لونه غامق؟ قالي لا ... طب افتح عينك كده وجيت اقرب بالكشاف لقيته بيصوت وبيقولي مش مستحمل النور ... اتخضيت قلت يمكن يكون عنده meningitis! طب حرك رقبتك كده لقيته بيحركها كويس مفيش rigidity او تخشيبة ... قولتله انت مانع الاكل خالص حتى المياه؟ ... لقيت امه بتقول ده مش بيخاف من حاجة قد المياه ... حقيقي خفت جدا ... قولتله انت ريقك بيجري ع طولوقلقان ومتعصب؟ قالي اه وهنا حقيقي قلبي اتعصر
Fever, tiredness, fatigue, severe headache, light sensitivity,aggression, hydrophobia, and xss salivation
دي اعراض ال Rabies السعار .. بس ازاي! .. سألت أمه هو اتعض او اتخربش الفترة الاخيرة من شهر مثلا او اكتر؟ ف لقيتها سكتت
بقولها حصل صح؟ ... قالتلي انت مش فاكر يا دكتور انا جيت لك بيه من شهرين كده وقولتلك ف قطة عضته وروحت صيدلية اللي فيها قالي ده سطحي وعادي وجيت لك قولتلي تطلعي بيه ع المستشفى حالا ياخد المصل .. بس الصراحة جيراني قالولي الدكتور بيكبر الموضوع ع الفاضي والواد كويس وفعلا محصلوش حاجة
محستش بنفسي عير وانا بزعق فيها وبقولها اه حصل ... شوفي اهمالك وصلنا لايه وبعدين جيران مين اللي تسمعي كلامهم ع كلام الدكتور حرام عليكي بجد ... اطلعي بيه حالا ع مششتفى الحميات واحكيلهم اللي حصل ... قالتلي هو الموضوع خطر اوي كده! قولتلها ربنا يستر اطلعي دلوقتي متستنيش وانا حاسس بغليان ف جسمي
العميلة جات لي النهاردة من نص ساعة وهي بتعيط وبتقولي يا ريتني كنت سمعت كلامك ابني مات امبارح
ليه بجد ... يعني الواحد المفروض يعمل ايه علشان الناس تصدق ان الدكتور هو الوحيد اللي فاهم المرض مش القرايب ولا الجيران .. ليه لازم نقول يا ريتنا! ... انا قعدت طول الاسبوع أوهم نفسي واقول يمكن يتلحق وانا عارف انه مش هيعيش لان خلاص ال incubation period عدت والاعراض كلها ظهرت
حقيقي مخنوق جدا من اللي وصلنا له ... يا جماعة اي مخلوق عض ابنك خربش ابنك لازم ياخد المصل ... اصل يا دكتور منزلش دم .. اصل عضه من فوق الهدوم كل ده ملوش قيمة ياخد المصل ونبقى ف الامان .. احسن ما نرجع ونقول يا ريتنا!