ទីស្តីការគណៈរដ្ឋមន្រ្តី- The Office of the Council of Ministers

ឯកឧត្ដមឧបនាយករដ្ឋមន្ត្រីប្រចាំការ វង្សី វិស្សុត ទទួលជួបពិភាក្សាការងារ
ជាមួយអនុរដ្ឋមន្រ្តីក្រសួងយុត្តិធម៌ចិន
====================
នាថ្ងៃទី១៩ ខែវិច្ឆិកា ឆ្នាំ២០២៤ នៅទីស្តីការគណៈរដ្ឋមន្រ្តី, ឯកឧត្ដម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី, ប្រធានក្រុមប្រឹក្សាអ្នកច្បាប់ និងជាប្រធានគណៈកម្មាធិការដឹកនាំការកែទម្រង់ច្បាប់ បានអនុញ្ញាតឱ្យឯកឧត្ដម WANG Zhenjiang អនុរដ្ឋមន្ត្រីក្រសួងយុត្តិធម៌នៃសាធារណរដ្ឋប្រជាមានិតចិន និងគណៈប្រតិភូ ចូលជួបសម្ដែងការគួរសម និងពិភាក្សាការងារ នៅក្នុងឱកាសដែលឯកឧត្តមដឹកនាំគណៈប្រតិភូមកបំពេញទស្សនកិច្ចនៅកម្ពុជា ដើម្បីពង្រឹងកិច្ចសហប្រតិបត្តិការឱ្យកាន់តែស៊ីជម្រៅលើវិស័យច្បាប់និងយុត្តិធម៌រវាងកម្ពុជា-ចិន។ អានបន្ត

ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត ដឹកនាំកិច្ចប្រជុំត្រួតពិនិត្យចុងក្រោយ
ដើម្បីពិនិត្យនិងពិភាក្សាលើសេចក្តីព្រាងច្បាប់ស្តីពីជលផល
==============
(ភ្នំពេញ)៖ ព្រឹកថ្ងៃច័ន្ទ ៣រោច ខែកត្តិក ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៨ ខែវិច្ឆិកា ឆ្នាំ២០២៤ នៅទីស្តីការគណៈរដ្ឋមន្រ្តី ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមប្រឹក្សាអ្នកច្បាប់ បានដឹកនាំកិច្ចប្រជុំត្រួតពិនិត្យចុងក្រោយ ដើម្បីពិនិត្យ និងពិភាក្សាលើសេចក្តីព្រាងច្បាប់ស្តីពីជលផល។ កិច្ចប្រជុំនេះ មានការអញ្ជើញចូលរួមពីសំណាក់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងសហការី និងតំណាងក្រសួងស្ថាប័នពាក់ព័ន្ធ ព្រមទាំងថ្នាក់ដឹកនាំ និងមន្រ្តីជំនាញពាក់ព័ន្ធនៃទីស្តីការគណៈរដ្ឋមន្រ្តី។
សេចក្តីព្រាងច្បាប់ស្តីពីជលផលនេះ ត្រូវបានរៀបចំឡើងឱ្យស្របតាមសភាពការណ៍វិវត្តន៍ឈានឡើងនៃសង្គម-សេដ្ឋកិច្ចកម្ពុជា ពិសេសការគ្រប់គ្រង និងអភិវឌ្ឍវិស័យជលផល។ សេចក្តីព្រាងច្បាប់នេះ នឹងរួមចំណែកផ្តល់នូវសារៈប្រយោជន៍ដូចជា៖ ១.គ្រប់គ្រង ការពារ អភិរក្ស និងអភិវឌ្ឍធនធានជលផល ឱ្យមាននិរន្តភាព ២.ការពារផលប្រយោជន៍ប្រជានេសាទ សហគមន៍នេសាទ វារីវប្បករ និងអាជីវករដែលធ្វើអាជីវកម្មផលផលិតផលតជលផល ៣.គាំទ្រដល់ការអនុវត្តផែនការយុទ្ធសាស្រ្តវិស័យជលផល ស្របតាមគោលនយោបាយរបស់រាជរដ្ឋាភិបាល និង ៤.បំពេញបាននូវលក្ខខណ្ឌតម្រូវនិងស្តង់ដារឱ្យមានសង្គិតភាពទៅនឹងបទដ្ឋានគតិយុត្តអន្តរជាតិ ដើម្បីឆ្លើយតបទៅនឹងបរិបទថ្មី ក្នុងការធ្វើសកលភាវូបនីយកម្ម និងសមាហរណកម្មទៅក្នុងតំបន់និងអន្តរជាតិ។
សេចក្តីព្រាងច្បាប់នេះ កំណត់អំពីការគ្រប់គ្រង ការអភិរក្ស និងការអភិវឌ្ឍធនធានជលផលប្រកបដោយប្រសិទ្ធភាព និងនិរន្តរភាព សំដៅលើកកម្ពស់សន្តិសុខស្បៀងនិងសេដ្ឋកិច្ចជាតិ ព្រមទាំងធានាដល់ការការពារសិទ្ធិនិងផលប្រយោជន៍របស់ប្រជានេសាទ សហគមន៍នេសាទ វារីវប្បករ និងអាជីវករដែលធ្វើអាជីវកម្មផល ផលិតផលជលផល។
អង្គប្រជុំបានធ្វើការពិភាក្សា និងពិនិត្យឡើងវិញនូវរបាយការណ៍ផលប៉ះពាល់គតិយុត្ត (Regulatory Impact Assessment) នៃសេចក្តីព្រាងច្បាប់នេះ មកលើសង្គម និងសេដ្ឋកិច្ចកម្ពុជា និងជីវភាពរស់នៅប្រចាំថ្ងៃរបស់ប្រជាពលរដ្ឋ ពិសេសបងប្អូនប្រជានេសាទ។ អង្គប្រជុំក៏បានពិភាក្សាផងដែរ អំពីការផ្ទេរ និងបែងចែកមុខងារនិងការទទួលខុសត្រូវ ពាក់ព័ន្ធការគ្រប់គ្រង ការអភិរក្ស និងការអភិវឌ្ឍជលផលទៅឱ្យរដ្ឋបាលថ្នាក់ក្រោមជាតិ។ ទន្ទឹមនេះ អង្គប្រជុំក៏បានពិភាក្សាផងដែរពាក់ព័ន្ធនឹងការជំរុញការធ្វើវារីវប្បកម្ម ពិសេសសម្រាប់ការនាំចេញ និងការកំណត់ប្រភេទឧបករណ៍នេសាទ ដោយម្ខាងដើម្បីកុំឱ្យមានការប៉ះពាល់ដល់ការនេសាទជាប្រពៃណីរបស់ប្រជានេសាទផង និងម្ខាងទៀតដើម្បីការពារនិងអភិរក្សធនធានជលផលឱ្យមានប្រសិទ្ធភាព និងនិរន្តរភាពផងដែរ។ ក្រៅពីនេះ អង្គប្រជុំក៏បានពិភាក្សាអំពីវិធានពាក់ព័ន្ធនឹងការនាំចូលផល ផលិតផលជលផលជាលក្ខណៈពាណិជ្ជកម្ម។
អង្គប្រជុំបានធ្វើការពិនិត្យ និងពិភាក្សាលើសេចក្តីព្រាងច្បាប់នេះ ដែលមាន ១៥ ជំពូក និង ១០៥មាត្រា ព្រមទាំងឧបសម្ព័ន្ធចំនួន ២ យ៉ាងផុលផុស ដើម្បីត្រៀមដាក់ឆ្លងកិច្ចប្រជុំពេញអង្គគណៈរដ្ឋមន្រ្តីនាពេលខាងមុខ។

សារលិខិតជូនពរ
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅក្នុងឱកាសពិធីចម្រើនជន្មាយុគម្រប់៧២ឆ្នាំ ឈានចូល៧៣ឆ្នាំ

ឯកឧត្តម វង្សី វិស្សុត ជួបសំណេះសំណាលលើកទឹកចិត្តបងប្អូនកីឡាករទូកងមកពីខេត្តកំពង់ធំ
នៅក្នុងថ្ងៃប្រណាំងផ្តាច់ព្រ័ត្ត

(ភ្នំពេញ)៖ នាព្រឹកថ្ងៃទី១៦ ខែវិច្ឆិកា ឆ្នាំ២០២៤នេះ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានអញ្ជើញចុះជួបសំណេះសំណាលជាមួយបងប្អូនជាកីឡាករទូក ង ទាំងអស់មកពីខេត្តកំពង់ធំ ដើម្បីជាការលើកទឹកចិត្ត និងសាកសួរសុខទុក្ខ នៅក្នុងថ្ងៃប្រណាំងផ្តាច់ព្រ័ត្ត។ គួរបញ្ជាក់ផងដែរថា សម្រាប់ឆ្នាំ២០២៤នេះ ខេត្តកំពង់ធំមានទូកងសរុបចំនួន ៩ និងមានកីឡាករចំនួន ៧៥៦នាក់ បានឡើងមកចូលរួមប្រណាំងថ្នាក់ជាតិនៅទន្លេចតុមុខ ក្នុងឱកាសព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដែលបាននិងកំពុងប្រារព្ធធ្វើឡើងរយៈពេល៣ថ្ងៃ គឺថ្ងៃទី១៤-១៥ និងថ្ងៃទី១៦ ខែវិច្ឆិកា ឆ្នាំ២០២៤ នេះ។ ទូកងទាំង ៩ មានឈ្មោះ ដូចតទៅ៖ ១. ចំប៉ាពិសីសែនជ័យ ២.ពោធិ៍អណ្តែតធិបតីសែនជ័យ ៣.ឌួងសូរិយាបុប្ផាស្ទឹងសែនបារមីក្តីដូង ៤.តាអោកតេជោសែនជ័យបារមីកំពង់ស្បូវ ៥.សែនសិរីមានជ័យ ៦.ចតុលោកតេជោសែនជ័យបារមីវត្តចតុលោក ៧.ស្រីស្រស់ស្ទឹងសែន ៨.តេជោសែនជ័យបារមីវត្តកងមាស និង ៩.ច័ន្ទមណីគគីរមានជ័យ។     
                  ក្នុងឱកាសជួបសំណេះសំណាលនេះ ឯកឧត្តម វង្សី វិស្សុត បានថ្លែងនូវការកោតសរសើរដល់បងប្អូនកីឡាករប្រណាំងទូកងទាំងអស់ ដែលបានខិតខំប្រឹងប្រែងយកអស់ពីកម្លាំងកាយចិត្ត និងទេពកោសល្យតាមបច្ចេកទេសរៀងៗខ្លួន ហើយទទួលបាននូវលទ្ធផលល្អប្រសើរជាបន្តបន្ទាប់ នៅក្នុងការចូលរួមប្រណាំងទូក ង រយៈពេល ២ថ្ងៃមកនេះ។ ឯកឧត្តមឧបនាយករដ្ឋមន្ត្រីប្រចាំការ បានជូនពរ និងលើកទឹកចិត្តដល់កីឡាករមកពីខេត្តកំពង់ធំទាំងអស់ សូមឱ្យបន្តខិតខំប្រឹងប្រែងបន្ថែមទៀត ដើម្បីដណ្តើមយកជ័យជំនះនៅក្នុងថ្ងៃទី៣ ដែលជាថ្ងៃផ្តាច់ព្រ័ត្រជាបន្តទៀត ដើម្បីនាំយកនូវកិត្តិយសដល់ខេត្តកំពង់ធំយើង ក៏ដូចភូមិឃុំយើង វត្តយើង និងក្រុមគ្រួសាររបស់យើងទាំងអស់គ្នាផងដែរ។ ឯកឧត្តមក៏បានផ្តាំផ្ញើដល់កីឡាករទាំងអស់ សូមប្រកាន់ខ្ជាប់នូវវិន័យ សាមគ្គីភាព ភាពថ្លៃថ្នូរ និងរក្សាសុខភាពផ្ទាល់ខ្លួនឱ្យបានល្អ ដើម្បីដណ្តើមជ័យជំនះ រួចត្រឡប់ទៅមូលដ្ឋានភូមិឃុំរបស់យើងវិញប្រកបដោយសុវត្ថិភាព និងមោទនភាព។ ក្នុងឱកាសនេះផងដែរ ឯកឧត្តមបាននាំយកនូវភេសជ្ជៈប៉ូវកម្លាំង សម្រាប់ជូនដល់បងប្អូនកីឡាករ បន្ថែមលើការឧបត្ថម្ភនាពេលកន្លងមកផងដែរ។ អានបន្ត

អបអរសាទរ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក

ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានបន្តចុះពិនិត្យប្រទីបរាជរដ្ឋាភិបាល ដែលកំពុងដំណើរការរៀបចំនៅត្រើយខាងកើតទន្លេទល់មុខព្រះបរមរាជវាំង
=================
រាជធានីភ្នំពេញ៖  នៅល្ងាចថ្ងៃសៅរ៍ ទី៩ ខែវិច្ឆិកា ឆ្នាំ២០២៤ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានបន្តពិនិត្យប្រទីបរាជរដ្ឋាភិបាល នៅត្រើយខាងកើតទន្លេទល់មុខព្រះបរមរាជវាំង ដែលកំពុងដំណើរការរៀបចំ ដើម្បីត្រៀមចូលរួមអបអរក្នុងព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅរយៈពេល ៣ថ្ងៃ ចាប់ពីថ្ងៃព្រហស្បតិ៍ សុក្រ និង សៅរ៍ ត្រូវនឹងថ្ងៃទី១៤-១៥-១៦ ខែវិច្ឆិកា ឆ្នាំ២០២៤ នៅតាមដងទន្លេសាប មុខព្រះបរមរាជវាំង រាជធានីភ្នំពេញ។

ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៤នេះ គ្រោងនឹងប្រព្រឹត្តទៅយ៉ាងមហោឡារិក អធិកអធម ស្របទៅតាមប្រពៃណីជាតិ ដែលមានតាំងពីបរមបុរាណដ៏យូរលង់មកហើយ ដោយមានបណ្តែតប្រទីប អុជកាំជ្រួច ប្រគំតន្ត្រីសម័យ បុរាណ និង សម្តែងសិល្បៈ ទាំង៣រាត្រីដើម្បីបើកឱកាសជូនប្រជាពលរដ្ឋបានចូលរួមកម្សាន្តសប្បាយរីករាយ ដោយធានាបាននូវសុវត្ថិភាព ក្រោមម្លប់នៃសន្តិភាព៕

ឧបនាយករដ្ឋមន្ត្រីប្រចាំការ វង្សី វិស្សុត អញ្ជើញបើកសន្និសីទអន្តរជាតិស្តីពីប្រវត្តិសាស្ត្រប្រទេសកម្ពុជា

ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត អញ្ជើញដាក់កម្រងផ្កាគោរពវិញ្ញាណក្ខន្ធ
នៅវិមានឯករាជ្យ
=======================
នារសៀលថ្ងៃទី៨ ខែវិច្ឆិកា ឆ្នាំ២០២៤ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការរដ្ឋមន្រ្តី ទទួលបន្ទុកទីស្តីការគណៈរដ្ឋមន្រ្តី បានអញ្ជើញ ដាក់កម្រងផ្កាគោរពវិញ្ញាណក្ខន្ធ នៅវិមានឯករាជ្យ និងបន្តដំណើរអញ្ជើញទៅថ្វាយកម្រងផ្កា គោរពព្រះវិញ្ញាណក្ខន្ធ ព្រះករុណាព្រះបាទ សម្តេចព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯករាជ្យជាតិខ្មែរ ព្រះបរមរតនកោដ្ឋ នាមណ្ឌបព្រះបរមរូប សួនច្បារខាងកើតវិមានឯករាជ្យ នៅក្នុងឱកាសអបអរសាទរខួបលើកទី៧១ នៃទិវាបុណ្យឯករាជ្យជាតិ ៩ វិច្ឆិកា (៩វិច្ឆិកា ១៩៥៣ - ៩ វិច្ឆិកា ២០២៤) និងអបអរសាទរទិវាកំណើត នៃកងយោធពលខេមរភូមិន្ទ ឆ្នាំ២០២៤ នៅបរិវេណវិមានឯករាជ្យ។ ថ្នាក់ដឹកនាំដែលបានអញ្ជើញចូលរួមអមឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី នៅក្នុងពិធីខាងលើនេះ រួមមាន៖ ១.ថ្នាក់ដឹកនាំជាទេសរដ្ឋមន្រ្តីចំនួន ៨រូប គឺ៖ ឯកឧត្តម អៀង មូលី, ឯកឧត្តម ថោង ខុន, ឯកឧត្តម សក់ សេដ្ឋា, ឯកឧត្តម អ៊ី ឈាន,ឯកឧត្តម អ៊ុក ប្រាថ្នា, ឯកឧត្តម សុក ស៊ីផាន់ណា, ឯកឧត្តម ស្រ៊ី ថារុង្គ និង ឯកឧត្តម ប៉ែន វិបុល ២.រដ្ឋមន្រ្តីប្រតិភូអមនាយករដ្ឋមន្រ្តីចំនួន ៨ រូប គឺ៖ ឯកឧត្តម ឡាំ ហេងហួត, ឯកឧត្តម នរ៉ាណាឬទ្ធិ អានន្ទដាយ៉ាត, ឯកឧត្តម ឈួន ដារ៉ា, ឯកឧត្តម ប៉ែន បូណា, លោកជំទាវ កុយ ពិសី, ឯកឧត្តម រ័ត្ន សណ្តាប់, ឯកឧត្តម ផៃ ប៊ុនឈឿន និងឯកឧត្តម សូ ម៉ារ៉ា និង ៣.ឯកឧត្តម លោកជំទាវ ជារដ្ឋលេខាធិការ និងអនុរដ្ឋលេខាធិការនៃទីស្តីការគណៈរដ្ឋមន្រ្តី ចំនួន ២០ រូប។
ទិវាបុណ្យឯករាជ្យជាតិ ០៩ វិច្ឆិកា និងទិវាកំណើតនៃកងយុទ្ធពលខេមរភូមិន្ទ ត្រូវបានប្រារព្ធឡើងដើម្បីរម្លឹក និងចងចាំជានិច្ច នូវឧបការគុណរបស់បុព្វបុរស ជាពិសេសយុទ្ធជនខ្មែរ ដែលបានពលីជីវិតដើម្បីជាតិ និងប្រជាជន។
មួយវិញទៀត គឺដើម្បីរំលឹកអំពីព្រះរាជបេសកកម្ម ដើម្បីជាតិមាតុភូមិ ព្រះករុណាព្រះបាទសម្តេច ព្រះនរោត្តម សីហនុ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណយ៉ាងក្លៀវក្លាបំផុត តស៊ូក្នុងក្របខ័ណ្ឌនៃព្រះរាជបូជនីយកិច្ច ដើម្បីទាមទារឯករាជ្យដ៏ពិតប្រាកដ ជូនប្រជាជាតិទាំងមូល ។
ព្រះមហាករុណាទិគុណដ៏ធំធេងរបស់ព្រះករុណា ព្រះមហាវីរក្សត្រ ព្រះបរមរតនកោដ្ឋ នៅក្នុងបុព្វហេតុទាមទារឯករាជ្យ ការកសាងជាតិ ការបង្រួបបង្រួមជាតិ ការការពារបូរណភាពទឹក គឺពិតជាស្ថិតនៅក្នុងដួងចិត្តប្រជាជនខ្មែរគ្រប់រូប ដោយគ្មានថ្ងៃបំភ្លេចបានឡើយ៕

សុន្ទរកថា ឯកឧត្ដម វង្សី វិស្សុត ឧបនាយករដ្ឋមន្ដ្រីប្រចាំការ រដ្ឋមន្ដ្រី ទទួលបន្ទុកទីស្ដីការគណៈរដ្ឋមន្ដ្រី ថ្លែងក្នុងពិធីបើកសន្និសីទអន្តរជាតិ ស្តីពី
«ប្រវត្តិសាស្ត្រប្រទេសកម្ពុជា : កម្ពុជាក្នុងសម័យអាណានិគមបារាំង»
រាជបណ្ឌិត្យសភាកម្ពុជា, ថ្ងៃទី៧ ខែវិច្ឆិកា ឆ្នាំ២០២៤

សារលិខិតរំលែកមរណទុក្ខផ្ញើជូន លោកជំទាវឧកញ៉ា ខៀវ ស៊ីណា ជាចាន់តូ និងក្រុមគ្រួសារ

ប្រសាសន៍ដើមទាំងស្រុងរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីសម្ពោធដាក់ឱ្យប្រើប្រាស់ជាផ្លូវការ ទំនប់អូរតេធិបតី ទំនប់សែនសុខដុម និងទំនប់សែនមនោរម្យ ខេត្តមណ្ឌលគិរី

ខេត្តមណ្ឌលគិរី ព្រឹកថ្ងៃព្រហស្បតិ៍ ទី២៤ តុលា ២០២៤

កិច្ចសម្ភាសពិសេស៖ ការបោះពុម្ភក្រដាសប្រាក់ថ្មី មិនប៉ះពាល់ដល់សេដ្ឋកិច្ច ហើយក៏មិនមែនរដ្ឋខ្វះខាតការចំណាយនោះទេ

ឯកឧត្តម វង្សី វិស្សុត ផ្តួចផ្តើមធ្វើបុណ្យកឋិនទានសាមគ្គីដង្ហែទៅវត្តកំរ៉ែងរតនារាម ស្ថិតក្នុងស្រុកបាភ្នំ ខេត្តព្រៃវែង

នារសៀលថ្ងៃទី២១ ខែតុលា ឆ្នាំ២០២៤ វេលាម៉ោង ២.០០ រសៀល នៅសាលពហុបំណងរបស់អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) នៃទីស្ដីការគណៈរដ្ឋមន្រ្ដី ឯកឧត្តមបណ្ឌិត្យសភាចារ្យ ហ៊ីង ថូរ៉ាក់ស៊ី រដ្ឋលេខាធិការប្រចាំការទីស្ដីការគណៈរដ្ឋមន្រ្ដី តំណាងដ៏ខ្ពង់ខ្ពស់ឯកឧត្តមឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអញ្ជើញជាអធិបតី ក្នុងវគ្គបណ្តុះបណ្តាលស្តីពី “របៀបសរសេររបាយការណ៍ កំណត់ហេតុនៃកិច្ចប្រជុំ និងការធ្វើប្រតិចារឹក” សម្រាប់រយៈពេល៥ថ្ងៃជាប់គ្នា ចាប់ពីថ្ងៃទី២១ ដល់ថ្ងៃទី២៥ ខែតុលា ឆ្នាំ២០២៤នេះ ដែលឧទ្ទេសនាមដោយលោកស្រី លី សុផល មន្រ្តីប្រតិចារឹកនៃអង្គជំនុំជម្រះវិសាមញ្ញក្នុងតុលាការកម្ពុជា ដោយមានការអញ្ជើញចូលរួមពីថ្នាក់ដឹកនាំ និងសិក្ខាកាមចំនួន ៤០រូប។
វគ្គបណ្ដុះបណ្ដាលនេះ គឺជាប្រធានបទថ្មីដ៏មានសារៈសំខាន់ឆ្លើយតប ទៅនឹងតួនាទីរបស់ទីស្ដីការគណៈរដ្ឋមន្រ្ដី ក្នុងនាមជាសេនាធិការរបស់រាជរដ្ឋាភិបាលក្នុងការសម្របសម្រួលការងារប្រចាំថ្ងៃរបស់គណៈរដ្ឋមន្រ្ដី ជាពិសេសលើការងាររៀបចំរបាយការណ៍ កំណត់ហេតុនៃកិច្ចប្រជុំ និងការរៀបចំឯកសារជំនួយស្មារតី ព្រមទាំងការសំយោគនូវព័ត៌មានសំខាន់ៗនៃកិច្ចប្រជុំជំនាញបច្ចេកទេស កិច្ចប្រជុំអន្ដរក្រសួង និងកិច្ចប្រជុំពេញអង្គគណៈរដ្ឋមន្រ្ដីជាដើម។

ប្រសាសន៍ដើមទាំងស្រុងរបស់ សម្តេចមហាបវរធិបតី ហ៊ុន ម៉ាណែត​​ នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីបិទ “ការប្រកួតកីឡាយុទ្ធគុនចម្រុះខ្មែរបុរាណ ពានរង្វាន់សម្តេចបវរធិបតី” ។

រាជធានីភ្នំពេញ ល្ងាចថ្ងៃអាទិត្យ ទី២០ តុលា ២០២៤

ឯកឧត្តម វង្សី វិស្សុត ផ្តួចផ្តើមធ្វើបុណ្យកឋិនទាន សាមគ្គីដង្ហែទៅវត្តកំរ៉ែងរតនារាមស្ថិតក្នុងស្រុកបាភ្នំ ខេត្តព្រៃវែង
=====================
ដោយមានសទ្ធាជ្រះថ្លា ចំពោះព្រះពុទ្ធសាសនា និងតាមសំណូមពររបស់ព្រះគ្រូចៅអធិការ គណៈកម្មការ ពិសេសបងប្អូនប្រជាពលរដ្ឋ ដែលជាពុទ្ធបរិស័ទចំណុះជើងវត្តកំរ៉ែងរតនារាម ស្ថិតក្នុងភូមិស្វាយពក ឃុំស្ពឺ «ក» ស្រុកបាភ្នំ ខេត្តព្រៃវែង, ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងលោកជំទាវ ព្រមទាំងក្រុមគ្រួសារ រួមជាមួយថ្នាក់ដឹកនាំ និងមន្រ្តីរាជការ នៃទីស្តីការគណៈរដ្ឋមន្រ្តី បានផ្តើមធ្វើបុណ្យកឋិនទានសាមគ្គី ដើម្បីដង្ហែវេរប្រគេនព្រះសង្ឃ ដែលគង់ចាំព្រះវស្សា នៅក្នុងពុទ្ធសីមាវត្តកំរ៉ែងរតនារាម ស្ថិតក្នុងភូមិស្វាយពក ឃុំស្ពឺ «ក» ស្រុកបាភ្នំ ខេត្តព្រៃវែង។
កម្មវិធីបុណ្យនៃអង្គកឋិនទាននេះ បានប្រព្រឹត្តទៅដោយមានការរៀបចំធ្វើពិធីក្រុងពាលី និងមានការយាង និងនិមន្ត សម្ដេចព្រះសង្ឃ នាយកស្តីទីគណៈមហានិកាយនៃព្រះរាជាណាចក្រកម្ពុជា និងសម្តេចព្រះរាជាគណៈ ព្រមទាំងព្រះមន្ត្រីសង្ឃចំនួន ៩ អង្គ សូត្រមន្ត ចម្រើនព្រះបរិត្ត និងសំដែងធម៌ទេសនា តាមប្រពៃណីព្រះពុទ្ធសាសនា នៅទីស្តីការគណៈរដ្ឋមន្រ្តី កាលពីរសៀលថ្ងៃសៅរ៍ ២រោច ខែអស្សុជ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៩ ខែតុលា ឆ្នាំ២០២៤ ដោយមានការចូលរួមពីសំណាក់ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី និងពុទ្ធបរិស័ទជិតឆ្ងាយ។
លុះថ្ងៃអាទិត្យ ៣រោច ខែអស្សុជ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២០ ខែតុលា ឆ្នាំ២០២៤, ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងលោកជំទាវ ព្រមទាំងក្រុមគ្រួសារ រួមជាមួយថ្នាក់ដឹកនាំ និងមន្រ្តីរាជការ នៃទីស្តីការគណៈរដ្ឋមន្រ្តី បានដង្ហែអង្គកឋិនទាន ពីរាជធានីភ្នំពេញឆ្ពោះទៅកាន់វត្តកំរ៉ែងរតនារាម ស្ថិតក្នុងភូមិស្វាយពក ឃុំស្ពឺ «ក» ស្រុកបាភ្នំ ខេត្តព្រៃវែង និងធ្វើពិធីដង្ហែរប្រទក្សិណជុំវិញព្រះវិហា បូជាទៀនធូប ធ្វើនមស្សការព្រះរតនត្រ័យ សមាទានសីល រួចវេរប្រគេនត្រៃចីវរ ព្រមទាំងបរិក្ខាកឋិនប្រគេនដល់ព្រះសង្ឃ ដែលគង់ចាំព្រះវស្សាអស់ត្រីមាសក្នុងពុទ្ធសីមា ដើម្បីប្រមូលបច្ច័យកសាងសមិទ្ធផលនានាទុកជាគរុភណ្ឌក្នុងវត្តកំរ៉ែងរតនារាម ជាកិច្ចបង្ហើយបុណ្យ។
អានបន្ត