!مرغوب المسائل چینل!

’’اگر تو آج واپس آگئی تو تجھے طلاق‘‘ پھر بیوی رات دس بجے آگئی؟
سوال(۴۲۷):- کیا فرماتے ہیں علماء دین ومفتیانِ شرع متین مسئلہ ذیل کے بارے میں کہ: ایک شخص کی بیوی اپنے گھر جارہی تھی، تقریباً آٹھ بجے دن کا وقت تھا، اس کے شوہر نے اس سے یہ کہا کہ اگر تو آج واپس آئی تو تجھ کو طلاق، اور وہ عورت دس بجے رات کو واپس آئی، تو اس پر طلاق واقع ہوگی یا نہیں؟ اگر ہوگی تو کونسی ہوگی؟
باسمہٖ سبحانہ تعالیٰ
الجواب وباللہ التوفیق: ہمارے عرف میں دن گذرنے کے بعد رات میں آنا بھی اُسی دن کا آنا سمجھا جاتا ہے؛ لہٰذا صورتِ مسئولہ میں کم از کم ایک طلاق رجعی واقع ہوجائے گی؛ البتہ شوہر اگر یہ کہے کہ میں نے آج سے صرف دن کا وقت مراد لیا تھا تو اس کی بات قبول ہوگی اور طلاق واقع نہ ہوگی۔
کما تستفاد من عبارۃ الشامي: أما لفظ الیوم فیطلق علی بیاض النہار حقیقۃ اتفاقاً، وقیل: وعلی مطلق الوقت حقیقۃً أیضاً …، ولو نویٰ بالیوم بیاض النہار صدق قضاء اً؛ لأنہ نویٰ حقیقۃ کلامہ…، ثم الیوم إنما یکون لمطلق الوقت فیما لایمتد۔ (شامي، الطلاق / باب الصریح، مطلب في قولہم الیوم متی قرن بفعل ممتد ۳؍۲۷۱ دار الفکر بیروت، ۴؍۴۹۱ زکریا) فقط واللہ تعالیٰ اعلم
کتبہ: احقر محمد سلمان منصورپوری غفرلہ
۱۵؍۱۱؍۱۴۱۱ھ
کتاب النوازل جلد9ص539
محمدمرغوب الرحمٰن القاسمی غفرلہ

سوال نمبر: 131090
عنوان:اگر کوئی شخص اللہ پر یقین رکھے مگر فرائض پر عمل نہ كرے؟
سوال:(۱) اگر کوئی شخص اللہ پر یقین رکھے اور اس حقیقت کا احترام کرے کہ آپ صلی اللہ علیہ وسلم اللہ کے رسول ہیں، مگر وہ ارکان اسلام جیسے نماز، روزہ، زکاة اور حج ، پر عمل نہ کرے تو کیا وہ شخص مسلمان کہلائے گا یا غیر مسلم کہلائے گا؟ (۲) اہل کتاب سے شادی جائز ہونے کی اصل وجہ کیا ہے؟کیا نکاح جائز ہونے کے لیے اہل کتاب کا مسلمان ہونا ضروری ہے؟ (۳) اگر کوئی لڑکی ہندوہے مگر بھگوان پر یقین نہیں رکھتی ہے، اور نہ ہی اس کی پوجا کرتی ہے ، مگر وہ لڑکی ایک اللہ پر یقین رکھتی ہے تو اس کو کیا سمجھائے گا، مسلم یا غیر مسلم؟ (۴) اگر کوئی لڑکی شہادت پر یقین رکھے کہ اللہ ایک ہے اور آپ صلی اللہ علیہ وسلم اللہ کے رسول ہیں تو کیا اس کا نکاح مسلمان مرد کے ساتھ ہوسکتاہے؟کیا اس طرح کے اسلام میں داخل ہونے والوں کے لیے ارکان اسلام کو ماننے اور عمل کرنے کے لیے کوئی وقت درکار ہے؟
جواب نمبر: 131090
بسم الله الرحمن الرحيم
Fatwa ID: 1532-1533/L=2/1438
(۱) اگر کوئی شخص اللہ رب العزت کو اللہ کی جمیع صفات کے ساتھ مانتا ہو اور آپ صلی اللہ علیہ وسلم کی رسالت کا قائل ہوتو وہ شخص مسلمان ہے اگر چہ تکاسلاً وہ نماز، روزہ، حج وغیرہ مامورات پر عمل نہ کرتا ہو۔
(۲) اصل وجہ تو قرآن میں اس حکم کا مذکور ہونا ہے؛ البتہ علماء نے اس کی حکمت لکھی ہے کہ اہل کتاب کا کفر مشرکین و مجوس وغیرہ کے کفر سے اخف ہے؛ کیونکہ یہود و نصاریٰ دینِ سماوی کے قائل ہیں اور شریعت کے اصول و کلیات سے واقف ہیں؛ اس لیے وہ دین اسلام سے اقرب ہیں، لہٰذا مسلمان مرد کا نکاح کتابیہ سے جائز رکھا گیا کہ وہ شوہر کا اثر قبول کرکے مسلمان ہو جائے گی، کیونکہ شوہر بیوی پر غالب اور حاکم رہتا ہے، واضح رہے کہ کتابی عورتوں سے نکاح کے سلسلے میں اب صورتِ حال بدل گئی ہے، خاص طور پر غیر مسلم ممالک (یورپ و امریکہ) میں عورتیں مردوں کے زیر اثر نہیں رہیں، اور کتابی عورتوں سے جو مسلمان نکاح کرتے ہیں وہ بھی عام طور پر دین سے آشنا نہیں ہوتے؛ اس لیے ان عورتوں کے اسلام قبول کرنے کے واقعات بہت ہی کم ہیں عام طور پر مرد ہی عورت کا اثر قبول کرلیتا ہے اور بچے تو ماں کے زیر اثر ہی پروان چڑھتے ہیں؛ اس لیے اب یہ نکاح باعث فتنہ ہے پس اس سے احتراز ضروری ہے۔ (رحمة اللہ الواسعہ: ۵/۱۰۲) اہل کتاب کی عورتوں سے نکاح کے جائز ہونے کے لیے ان کا مسلمان ہونا ضروری نہیں؛ البتہ حضرت موسیٰ یا حضرت عیسیٰ علیہما السلام پر ایمان لانا اور توریت یا انجیل کو آسمانی کتابیں تسلیم کرنا ضروری ہے۔
(۳) اگر بھگوان سے مراد ان کے دیوی دیوتا ہیں او روہ لڑکی ان سے براء ت کا اظہار کرتی ہے اللہ پر یقین رکھتی ہے اور رسول اللہ صلی اللہ علیہ وسلم کی رسالت کی قائل ہے تووہ مسلمان سمجھی جائے گی بشرطیکہ اس کا اقرار بھی زبان سے کرے اور اگر وہ صرف اللہ پر یقین رکھتی ہے رسول اللہ صلی اللہ علیہ وسلم کی رسالت کی قائل نہیں تو وہ غیر مسلم سمجھی جائے گی۔
(۴) جی ہاں! اس لڑکی کا نکاح مسلمان مردسے ہو سکتا ہے، مسلمان ہوتے ہی ارکان اسلام متعلق ہو جاتے ہیں اس کے لیے وقت درکار نہیں، جو بھی مسلمان ہو اس کو چاہئے کہ جلد از جلد ارکان اسلام کو سیکھ کر اس پر عمل کرنا شروع کردے۔

واللہ تعالیٰ اعلم

دارالافتاء،
دارالعلوم دیوبند
محمدمرغوب الرحمٰن القاسمی غفرلہ

کسی شخص کو نوکری دلوا کر ہر ماہ تنخواہ میں سے کچھ کمیشن لینا
سوال :
کسی شخص کو نوکری دلوا کر ہر ماہ تنخواہ میں سے کچھ کمیشن لینا جائز ہے یا نہیں ؟حال یہ کہ دلال کہتاہے کہ میں نے تم اپنی ذمہ داری پر کام میں رکھا ہوں ؟
جواب:
بسم الله الرحمن الرحيم
Fatwa : 1377-1027/B=12/1440
دلال نے اگر نوکری دلانے میں محنت و مشقت اٹھائی ہے اس کے لئے بھاگ دوڑ کی ہے تو اپنی اس محنت کا صلہ یعنی اجرت پہلے سے طے کرکے لے سکتا ہے، تنخواہ میں سے کمیشن لینا جائز نہ ہوگا۔ ہر دلال اپنی ذمہ داری پر ہی نوکری دلاتا ہے۔
واللہ تعالیٰ اعلم
دارالافتاء،
دارالعلوم دیوبند
ماخذ :دار الافتاء دار العلوم دیوبند
فتوی نمبر :172931
تاریخ اجراء :Aug 31, 2019
محمدمرغوب الرحمٰن القاسمی غفرلہ

کام دلواکر کمیشن لینا
سوال
میں نے کسی آدمی کو 5000کا کام دلوا یا ، اس سے 500روپے کمیشن لینا درست ہے یا نہیں، واضح رہے کہ کام کرنے والا کاریگر مالک سے 5500وصول کرکے 500مجھے دے، کیا یہ طریقہ درست ہے؟
جواب
صورتِ مسئولہ میں اگر کام دلانے سے پہلے کمیشن طے ہوئی تھی تو کام دلانے کے بعد طے شدہ کمیشن ایک مرتبہ لینا جائز ہو گا، البتہ ہر مہینے اس کی تنخواہ میں سے 500 کا مطالبہ کرنا شرعا درست نہیں، اسی طرح  اگر کام دلوانے میں سائل  کی کوئی محنت  نہیں تھی،  تو اس کے لیے کسی قسم کا کمیشن لینا جائز نہیں۔
شعب الإيمان میں ہے:
"عن سعيد بن عمير الأنصاري قال: سئل رسول الله صلّى الله عليه وسلّم ‌أيّ ‌الكسب أطيب؟ قال:عمل الرجل بيده، وكلّ بيع مبرور."
(التوكل بالله عز وجل والتسليم لأمره تعالى في كل شيء ، ج:2، ص:84، ط:دار الكتب العلمية)
فتاوی شامی میں ہے:
"مطلب في أجرة الدلال [تتمة]
قال في التتارخانية: وفي ‌الدلال ‌والسمسار يجب أجر المثل، وما تواضعوا عليه أن في كل عشرة دنانير كذا فذاك حرام عليهم. وفي الحاوي: سئل محمد بن سلمة عن أجرة السمسار، فقال: أرجو أنه لا بأس به وإن كان في الأصل فاسدا لكثرة التعامل وكثير من هذا غير جائز، فجوزوه لحاجة الناس إليه كدخول الحمام."
(كتاب الاجارة، ج؛6، ص:63، ط:سعيد)
فقط واللہ اعلم
ماخذ: دار الافتاء جامعۃ العلوم الاسلامیۃ بنوری ٹاؤن
فتوی نمبر: 144502101086
تاریخ اجراء: 31-08-2023
محمدمرغوب الرحمٰن القاسمی غفرلہ