КҮНДӨЛҮК

Көптөн бери ичимде турган нерсени жазып, жеңилдеп калдым… Чынымды айтсам аябай уялып жатамын окурмандарымдан, эң биринчи кезекте Жараткандан…
Жазбай эле коёюн дегенмин, бирок ичимде көптөн бери жүрдү, курбуларым деле билет бул жөнүндө бирок кайра-кайра айтып, алардын бекер эле убактысын, энергиясын алгым келген жок…

Буюрса, бардыгы жакшы болот.

А берки мырза жөнүндө башка күнү кененирээк баяндап берем) Балким кийин жоолугуп сүйлөшүп калуубуз ыктымал, бирок тилекке каршы бирге боло албайбыз…

Мен дагы силердей эле бир жөнөкөй адаммын, күнөөсү жок периште эмесмин, ошондуктан жазгандарымды туура кабыл алыңыздар🫶

Мен ооруп калдым десем, жолдун алыстыгына карабай түнкү үчтө даары-дармек, таттууларды алып келген мырза болду. Эртең окуума чакыртып атат десем, жумушунан атайын эрте суранып, менин жумушум шаардан алыс болгонуна карабай келип, үйгө таштап, эртеси кайра жумушума алып келген адам болду. Мен үчүн өз үй бүлөөсүнө каршы чыгып, катуу урушкан адам болду. Артыман калбай чуркап, сезимдерин айта ырларды арнаган мырза болду. Менден эч нерсени аябай, колунан келгенин кылып берген адам болду. Көп убакыт өтсө да унута албай, кайра-кайра жашоомдо пайда болуп жүрө берген адам болду. Өзүнүн машинасы болбосо да досунукун айдап келип, кечинде коркпосун, таксиге отургузбайм деп үйгө жеткирген адам болду. Мени сейилдөөгө чакыруу үчүн үйүнө кетпей, менин жумушумдун бүтөөр убагын күтүп, мени менен сейилдеп, үйгө киргизип коюп, жумушуна барып түнөгөн адам болгон. Менин улуу экениме да көзүн жуумп, бардыгына каршы чыккан да адам болгон. Ата-энемдин алдына келип, үй бүлөөсүнө чейин айтып, мени тааныштырам могу числого даяр бол деген адам болгон… Бирок алардын ичинде бир башкача адам болду… Эмнегедир ошол адамга эле тартыла берем. Болбосо арадан 6-7 ай өттү… Ооба, жакшы эле адамдар жашоомдо пайда болду, бирок такыр алар менен сүйлөшүүгө көңүлүм жок. Өткөндө эле жумуштан бир эмес эки үч мырза сезимин билдирди, алардын ичинен бирөөсү айрыкча ашык болду. Бирок айттым:
-Кечирип кой, мен мамилеге даяр эмесмин…
-(көп убакыт унчукпай турду,көздөрүндөгү муңду көрүп боорум ооруйт, бирок жүрөгүмө буйрук бере албай турдум)… Канча убакыттан кийин даяр болосуң анда?
-Мен такыр эч ким менен сүйлөшкүм келбейт. Турмуш куруу оюмда да жок…
Мени көпкө карап турду да:
-Ай байкуш ай, ким мынчалык көңүлүңдү калтырган?
-…
Ал кайдан билсин, бир адамдан тескерисинче көңүлүмдү калтыра албай, унута албай жүргөнүмдү… Баары бир ошол адамды эстей берем… Ошондооой) Ал адамды унутмайынча, башка адам менен такыр мамиле баштай албаймын. Аны унутуу үчүн бирөө менен мамиле да кургум келбейт.

🫶

2024-жылда көп нерсе болуп өттү. Кээ бир окуяларымдын 5-10% бул жакка “терип-терип” жазып коюп жаттым) Аллахыма чексиз шүгүр. Аман бололу жана адам бололу ! Мени менен бирге болгон ар бир окурманыма ырахматымды айтам 🫰❤️

🪫

Кээде психологдун ордуна курбу кызың менен сүйлөшүп отуруу алда канча жакшыраак🎀✨

Когда тебя постигли жизненные невзгоды и иссякли силы бороться, а душа уже истощена Вспомни эти аяты:

«Разве не поминанием Аллаha
утешаются сердца?»

13:28

«...Взывайте ко мне и Я отвечу вам..»

40:60

«За каждой тягостью наступает облегчение»

94:5

«Воистину, будущее для тебя лучше, чем настоящее»

93:4

Жан дүйнөңө жакпаган, жүрөгүң менен тартыла албаган адам болсо, башыңдан ылдый алтын куюп, асмандагы айды алып берүүгө даяр болуп жатса да жакшы көрө албайт экенсиң…

Мен эми түшүндүм окшойт…

❄️

…

Балким бакыт кымбат унаа, үйүңдө,
Балким бакыт байлык менен сүйүүдө.
Талаш-тартыш аёсуз бул өмүрдө,
Нагыз бакыт - бир жанды чын сүйүүдө.
Бакыт балким чет эл ашып кыдыруу,
Балким бакыт миллиондорго чөмүлүү
Негизинде бул дүйнөдө бир бакыт,
Чын достуктун керектигин бир угуу.
Бакыт балким кымбат саат колдогу,
Балким бакыт кымбат сарай коргонуу
Башкы бакыт бул өмүрдө унутпа!
Ата-энендин аман-эсен болгону.

Бир жолу билем да китепканада отурам, анан орун калбай калып, бир жигит маңдайыма келип отурду. Менде ноутбук, анда ноутбук болуп, такыр бири-бирибизди карабай элебиз. Бир маалда мен ислам дини боюнча видео көрүп жатып, ыйлап салсам болобу😂… Тиги бала унчукпай отурат, же кантип жардам берээрин билбейт, улам -улам карап коёт. Мени менен кошо жаман болгон.
Анан эки күндөн кийин кайра китепканага бардым. Мага да орун жок бир кыздын маңдайына отурдум. Бир маалда ал ыйлап баштаса болобу😂… Өзүмдү сырттан карап алып аябай жаман болгом. Ал дагы видео көрүп отурган, кулагында наушник бар болчу. Чын жүрөктөн анын сезимдерин түшүнүп, бирок мен да унчуккан эмесмин. “Мейли ыйлап алсынчы, алаксытпайын ,ичине бук толуп калган окшойт” дегем)

Ушундай кызык окуялар көп болот китепканада деле😊

2024 - жыл бүтө элек жатып эле, жыл жыйынтыгын чыгарып салдым. Аллахыма чексиз шүгүр жыл өткөн сайын абалымды жакшыртып жатат. Алдыда кыла турчу иштерим көп. Ошолорго жетип, мен ойлогондон дагы ийгиликтүү айым болууну насип кылсын. Мен бир аз пландаштырымыш этем, бирок менин планымдан сырткары башка нерселер болуп жатса бардыгын Аллахка тапшырып коём. Анткени Аллах Тааланын планы биздикинен миң эсе артык! Бардык учурларда Ага гана таянам жана Андан гана жардам сураймын. Аллахым өзүнөн алыстатпасын бизди, унуттуруп салбасын: бул жашоого эмне үчүн келгенибизди✨
Жаңы жашоого, жаңы ачылыштарга даярмын. Аллахым күч-кубат берсин: руханий, моралдык, физикалык жана материалдык жактан да

Кечээ апам чалып калды:
-Кандайсың, кызым? Эмне кылып жатасың?
-Жакшымын. Сиз кандайсыз? Китепканада болчумун
-Каражаным десе, мен жакшымын
-Ошо топтолуп калган иштеримди пландаштырганча, ушу жылдын жыйынтыгын чыгарайын дегем.
-Бул жыл сага жемиштүү,ийгиликтүү жылдардын бири болду. Эң негизгиси : акча сурабай калдың(😂), тескерисинче бизге жардам берип жатасың
-Аа рахмат рахмат😂😂😂 Болду сурабаганга аракет кылам.
-Макул,кызым сени алаксытпайын. Жакшы тур
- Ии макул)

Негизи буга чейин кыйналган күндөрүм болду. “Акчамды ашыкча коротпошум керек, ал үчүн китепканага барсам коробойт” деп жатып, ушу китепканада көп нерселерди аткардым. Ошондуктан мага жаккан жерлердин бири - китепкана. Мечиттен кийинки эле эң тынч жер десем жаңылышпайттырмын. Эхх бул китепканада канча жолу ыйладым… Кээде жөн гана баарын көргүм келбей тажаганда кетип калчумун. Китепканага келгенде телефонумду өчүрүп, баарын унутууга аракеттене, такыр башка ааламга жол тартам)

Жаңы күндөлүк алдым🥰 Берки күндөлүгүмдүн ичи толуп калды. Бир аз барактары калды эле, улантып жазгым келген жок. Анткени ичин ачканда такыр башкача ааламга түшүп калгансып, мурдагы жарааттарымды эстей, эч нерсени жаза албай отуруп калчу болдум. Бирок 2024-жылы колдонгон күндөлүгүмдүн ичинде абдан көп пайдалуу инсайттар бар) Эми сүрөттө турган күндөлүгүм Ин ША Аллах 2025-жылдыкы болот 💌✨ Буюрса ушуну алып алып чет жакка чыгууну Аллахым насип кылсын, аминь🥰

”Мен бакытты издейм” десем алыстан.
”Жаныңда эле жүрөт” деди даанышман…

Сен байланган адам сенин өмүрлүк жарың болсун, арманың эмес…

Мен сүйгөн жерлердин бири - китепканадамын)

Жүрөктү сүйүү жаралабайт.
Сүйө албаган адам жаралайт.

Кечинде сүрөт кетирди дагы, астына мага билдирүү жазыптыр:
-Айды карачы😁, жүрү эшикке сейилдеп келебиз?
-Вау сонун го😍. Бирок мен чыга албаймын…
-Эмнеге?
-Жанымдагылар чыгарбайт.
-Ааа. Бирок алардын сенин жашооңо эмне тиешеси бар?
-Тынч жүрүшүм керек, жумушта ушак көп.
-Качан уктайсың?
-Азыр.
-Эрте элеби?
-Ооба бирок курсагым ачып кетти жана эч нерсе жебей жатып алгам…(эмне дээр экен дедим)
-Жүрү эшикке чык, чай ичип келебиз?
-Жоок чыга албаймын.

Ортодо бир аз убакыт жок болуп кетти. Ал маалда курбу кызым менен сүйлөшүп жаткам, бир убакта кайра билдирүү келди:
Чоң форелди бышыртып, жумуш жагыма келиптир.Балыктын сүрөтүн тартып кетирди да:
-Каадаланбай чык эми, балык алып келдим
-Азыр…
Кийинип эшикке чыгып бара жатсам алдыман бизди көзөмөлдөгөн байке чыгып калды жанында тиги мырза турат. Көзөмөл кылган байке:
- Что там ? Эмне болуп кетти?
-Жөн эле сизди ойготкону чыккам. Жана ойготуп койчу деп жатпадыңыз беле ?(Чын эле ушинтип айткан да эки саат мурун, а мен болсо кыйын киши болуп, “Жоок мен ойгото албайм сизди, азыр уктаймын бөлмөмө барып” дегем да😂)
Деп туруп артка кайрылдым да , кирип кеттим 😂😂😂
Аябай жаман болдум, тиги байке билбей калды эмне болуп кеткенин. Берки мырзага да унчукпай туруп басып кеттим.
Беш мүнөт өткөндө жазды кайра:
-Баспайбы эми? Күтүп жатам.
-Эй мага жана айтып койбойт белең тиги байке бар деп ? Таарындым. Болду жебейм, тоюп калдым. Ошо байке менен жеп алгыла!
Деп туруп, телефонду өчүрүп, жатып алдым🥲

Бирок ал мырзадан мынчалык нерсени күткөн эмесмин. Ичимден ыраазы болуп калдым😊. Көрсө сени жактырган адам бардыгын кылып берет тура…

Бирок балыкты жебей, жатып алганым жаман болду😂. Эртең менен курсагым ачка болуп ойгондум да , кечээки күндү эстеп алып аябай күлдүм)

Жакын курбум турмуш жолуна аттанганына бир жылдан ашып калды. Ушинтип манты түйгөн сайын, үйүнө чакыра берет. Анан күйөөсү үчөөбүзгө таттууларды алып алып, келип калам. Үчөөбүз отуруп алып сонун тамактанганча, сүйлөшүп отура беребиз. Аллахым буюрса кийин мен да турмушка чыксам, үй бүлөөбүз менен катышууну каалаймын🥰

Курбум атына заты жарашкан гүл кыз) Өзү да, колу да гүл❤️

Почти десять месяцев прошло с момента, как я сделала этот снимок.🤳

Асманды карап туруу ~ менин кичинекей медитациям сыяктуу, күнүмдүк түйшүктөрдөн тышкары түбөлүктүү жана кооз нерселердин бар экенин эсиме салып турат.🧘🏻‍♀️🌎

🌥️(Түбөлүктүү эркиндик, бейпилдик жана тынчтык)💭

Булуттар болсо, өтүп жаткан учурлардын, ой жана сезимдеримдин бир сыныгы сыяктуу. Ар биринин өзүнчө тарыхы бар, жана алардын ар бири мага жаңы күч, дем берип турат🤍

Күндөн-күнгө өзгөрүп жаткандаймын. Албетте мен өзгөрбөй элемин, ал нерсенин болушун Аллах Таала каалап жатат. Анткени бардык нерсе Анын гана каалоосу менен болот)
Мурда көп нерсени ичиме жутуп жүрчү экенмин. Мага “больно” болсо болсун, бирок башкага болбосун деп. Эххх, бул кандай гана жаңылышуу болгон. Антип ойлонуунун кесепетинен моралдык жактан да, физикалык жактан да жабыркадым, орто жолдон өзүмдү жоготуп алдым… Балким ошо кезде башкалардын көзүнө “периште” болуп көрүнгүм келсе керек. Башка нерсени жоготсоң жогот, бирок өзүңдү жоготпоого аракет кылуу керек экен. Сага бирөө жаман сүйлөдүбү? Ал нерсени көтөрө албасаң, сөзсүз ага карата өз оюңду айткының, түшүндүр - сага андай агрессивдүү сөздөрдүн, мамиленин кереги жок экенин, канчалык сага катуу тийгенин.
Ал эми өзүңдү жоготпоо үчүн күнүгө, жада калса ар мүнөт сайын Аллах Таалага жакындап, Аны эстеп, кечирим суроого тырышуу керек. Жалган дүнүйөнүн артынан чуркап жүрө берет экенбиз да көрсө… Ошентип отуруп, кантип жашап жатканыбызды унутуп калат экенбиз. Жок дегенде жатаар алдын “Бүгүн күнүмдү кандай өткөрдүм? Максатыма жетүү үчүн эмне кыла алдым? Өзүмдү кандай алып жүрдүм? Эч кимди таарынтып албадымбы ? Акысына кирбедимби ?” - деп, өзүбүзгө өзүбүз суроо берип турсак кичине болсо да алдыга жылуу болот деп ойлоймун. Мисалы жашоомдо ар кандай окуялар болот, арасынан терип анан бул жакка жазамын. Ал окуялардын арасында жаманы да, жакшысы да бар. Жаманы азыраак болсо экен деп тилек кылам. Андай учурга кабылып калсам, акыретимди ойлоп, напсимди токтото салууга ашыгамын. Бардык учурда акыретти ойлоп жүрүү жана Жараткан Эгеңди эстөө - чоң жетишкендик. Аллахым бизди өзүнөн алыстатпасын 🫀.

УЧУРДА КАЙСЫ ЖЕРДЕ ЖАШАЙСЫЗ❓🤗🏡🌸

Ал адамдын мени жактырганын сезем.
Анын көз карашы, ар бир кыймылыма көңүл койгону, коргоп турганы, жардам бергени - бардыгын билип турам. Тамашалап алып, менин таарынганымды байкаса ошо замат токтоп калганы, башка адамга кыжырданып жатсам, мени тамаша аралаш сүйлөп, эркелеткени. Жанымдан кеткиси келбей, иши толтура болсо да мага жардам бергени, башкадан кызганып турганы- баары сезилет. Жада калса жанымдагылар да “сени жактырып калган” деп айта башташты… Бирок… Өзүмө 2-3 ай мурун сөз бергенмин “келечегимди бирге элестете албаган адамга көңүл бөлбөймүн,сезимдери менен ойнобойм” деп. Ойногон өтө жаман…Негизи эле жашоомдо көп эле адамдарды жоолуктурам, колдоноюн, муну-тигини алдырып алайын, акча, белек сурайын деп ниет кылбайт экенмин. Анткени акысына кирип калам деп, корко берем. Сени бактылуу кылгысы келген адам, айттырбай эле кылат🥰.

Бир күнү болбосо, бир күнү сөзсүз сураласың. Бул жашоо кайтар дүйнө. Бүгүн жыргап жүрсөң, бир аз убакыт өтпөй сыздап ыйлап калышың мүмкүн. Кыздар унутпайлы, ал да бирөөнүн мөлтүрөгөн баласы😅, иниси, агасы. Эркек деп эле ойлонбой сүйлөп алабыз. Бирок аларда дагы жүрөк бар✨ Алар деле бизге окшоп ыйлайт, күчтүү көрүнүш үчүн аны бизге билгизбейт, ичтен сызышат…
А берки адам менен болгон мамилеге келсем. Чынымды айтсам- башым катып калды. Туруп-туруп эле башкача болуп, орой мамиле кылсам да болбойт.Мурдагыдай жүрө берейин десем, азырынча сүйлөшүп кайра мамиле курууга даяр эмесмин. Анткени бирөөнү унутуу үчүн, башка бир мамилеге дароо секирбеймин. Мага көп убакыт керектелет…
Эмнеси болсо да ар бир адам өз жарын таап, ылайым бактылуу болсунчу🤍✨

Адамдын ордун адам басат экен…

Ысык кофе, таттуулар жана жакын курбуң 🤍♾️

Өзүмдү күнөөлүү сезип жатам…
Мурдагыдай ой-толгоомду жазбай калдым. Күнүмдүк эле бир нерсени эптеп жазгандай болом. Эмнегедир, мурда сөз байлыгым да аябай жакшы болчу экен, азыр тексттеримди байкасам: орунсуз кайталоолор өтө көп…🫣
Телефонумду да алмаштырганмын, бир аз көнө албай жатамын. Ин Ша Аллах сонун тексттерди жазамын💌

Эч нерсе болбогондой, ооруганыма карабай, жумушка келдим. Аллахыма шүгүр ахыбалым алда канча жакшы)
Өзүңөрдү жакшы карагыла, жылуу кийингиле❤️‍🩹

Төшөктөн тура албай жатып калдым…
Акыркы күндөрү жаным тынбай эле жүргөнмүн,Аллахым бир аз эс ал дегендей эле, азыр башымды да көтөрө албай жатам. 😷🤒🤧
Бүгүн бүтүрчү иштерим толтура эле… Ыйлап коёмун улам-улам. Үйдө даарыларым түгөнүптүр, аны алуу үчүн эшикке чыгуу керек, а мен тура албаймын. Араң турсам жакын курбу кызым жазат “ чоң апам өтүп кетти” деп ыйлап, анын үнүн угуп алып мен ыйлайм 💔 Эхх… Мен үчүн дуба кылып койгулачы, төшөктөн туруп, айыгып кетейин. Анан дагы курбу кызым да жакшы болуп кетсе экен, чоң апасынын жаткан жери жайлуу болсун !

Эмнегедир ушу ыр жагат 🥰

Негизи ата-энедеги нерсе сөзсүз балага өтөт го? Мага ата-энемден эмне өткөнүн айтып бергим келип жатат) Апамдын эч кимге тийишпегени,бирок бирөө тийишип,намысына тийсе, аябай жаман абалга салып салганы - менде бар экен… Өткөндө жумушта апамдан да улуу эже мага жалаа жаап, жамандап жатканын угуп калсам болобу? Нары жакта кагаздарды жазып отургам. Баарын тыштай сала, эшикке чыктым. Эшик суук, караңгы болчу. Тынчтанайын дегем,анте албадым. Кайра кирип туруп, ал эжени көздөй жөнөдүм…
-Эже?
-Оу? Эмне болуп кетти?
-Жаңы эл айткан сөздөрүңүздүн баарын уктум. Антип айткыдай сиздин кандай акыңыз бар? Эмнеге мени андай сөздөр менен айтасыз?
Деп бакырып кирсем болобу? Бир дагы жолу анчалык конфликтке барып көргөн эмесмин. Андайды көрбөгөн жаным, көздөрүмдөн жаш кетип, колум калтырап чыкты. Аябай катуу кыйкырып, үстөлдү чаап жаттым. Анткени мени ошого жеткизишти. Директордон бери чуркап келди. Ал байке менин байкем менен тең киши, үй бүлөөлүү, ишине так жүрүп, ашыкча сүйлөбөгөн адам. Мен жаңы жумушка киргениме үч күн болгондо,”жумуштан көтөрүлгөнгө даярдан, сени өз ордума дайындап кетем” деген. Тиги эженин кан басымы көтөрүлүп, аябай жаман болду. Мен болсо, ыйлап токтоно албаймын. Ичимде бугумдун баарын чыгара ыйладым. Жумуш мага баары бир болуп калды ошо учурда. Баарын таштап салып ыйлап отурдум. Мени көрүп директор чыдабай кетип эшикке чыгарды. “Өзүңө кел” деп улам-улам айтат,укпайм. Башым айланып жерге отурдум. Анан биздин эшиктин алдын шыпырып тазалаган орус байке бар. Аты Юра. Бизге чейин келип, сүйлөшүп калчубуз. Ал мени көрүп, директордун жанына барып:
-Что ты сделал с девушкой а? Что ты сделал ? Деп коёт😂(эстеген сайын күлкүм келет)
Директор:
-Да пошел ты Юра! Сен эле жетпей жаткансың деп😂
Директорго мен:
-Булар менин сулуулугумду көрө алышпайт деп ыйлап алганмын🤣🤣🤣
Ошоол… Ошентип болбогон сөздөр үчүн, иштеген жеримди астын-үстү кылып салдым… Өкүнбөймүн бирок. Жаш болсом да, байкап сүйлөп, өз ордуларын билсин дедим. Азыр болсо такыр башкача мамиле кылышат. Атам ыраматылык айтчу эле: “Ушу сага көп сарсанаа болбойм, жемиңди жедирбеген кызсың” деп.
Ар бир адам өз сөзүнө жооп берчү күн келет сөзсүз. Ак ийилет, бирок сынбайт!

Бүгүн бардык иштеримди жыйыштырып коюп, китепканага келдим🥰!
Акыркы жолу жазында барыптырмын. Азыр келсем, китепканада иштеген эжелер тааныды🥹.
Эс тарткан сайын иштериң көбөйөт экен… Бирок баары бир көнгөн адаттарыңды калтыра албайт экенсиң. Альхамдулиллях! Китеп окууну, китепканага барууну буюрса өмүрүмдүн аягына чейин таштабаймын🫀

Тең-теңи менен, тезек кабы менен.

Иш-үй-окуу болуп, өзүмө, курстарга убактым аз болуп жатат. Альхамдулиллях жетишип жатамын, эми тил курстарына жазылып алсам болот эле... Баары келип эле убактыма такалып калып жатат. Жада калса телефон колдонгонго убактым жок, болсо дагы китеп окуганга аракет кылып жатамын. Бүгүн статистиканы карасам күнүгө телефонду 3-4 саат колдонот экенмин...

Айтып берчү көп жаңылыктарым бар, бирок ... Унчукпай эле коёюнчу. Жаныма жакын адамым болсо, талыкпай сүйлөй беремин) Кийин жолдошума кечке сүйлөй берип тажатпасам болду 😅

Первый снег ❄️

Кечээ ушундай китептерди алдык курбум менен 🥰

Бүгүн иним менен бир автобуска отуруп калдык. Ал университетке, мен документ иштер менен чыкканбыз. Эртең менен баарыбыз билгендей киши көп,жол тыгын, автобустун ичи да тыгылыш. Шашып жатканбызга байланыштуу биз да кирип алдык.Улам-улам ары жылып коёбуз. Инимдин алдында бир кыз турган, а кыздын жанында бир эже отурган. Бир маалда ал кыз түшүп кетти. Инимди анын ордуна турат го десем,тескерисинче мени тургузуп койду дагы, артымда өзү түшүп кеткиче жылбай, ар кайсы адамдардан тосуп турду. Ма Ша Аллах🥹❤️. Кантип чоңоюп кеткенин билбей калдым. Кечээ эле "эжеке" деп ээрчип жүрө берчү эле, эми мынтип мени коргоп турат. Альхамдулиллях.

Көз тийип, жин кирбесин десеңиз!

Ушул дубаны багымдат жана аср намазынан кийин окуңуз

ХАСБИЯ ЛЛАХУ ЛЯ ИЛЯХА ИЛЛЯ ХУВА АЛЕЙХИ ТАВАККАЛТУ ВА ХУВА РАББУЛ АРШИЛ АЗЫМ»

حَسْبِيَ اللَّهُ لَا إِلَهَ إِلَّا هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظِيمِ

Азрети Абу Саъид Худрий р.з. айтат : Пайгамбарыбыз с.а.в. жин жана инсандардын көз тийгенинен паана тилейт эле. Фалак жана Нас сүрөөлөрү түшкөндө Пайгамбарыбыз с.а.в. көз тийгенге ушул эки сүрөөнү ыктыяр кылып, калган дубааларды тыштап койду.

(Тирмизи)

ПАЙДАСЫ : Инсан жана жиндердин көз тийгенинен жана алардын зыянынан сактануу үчүн ушул сүрөөлөрдү окуп дем салуу өтө пайдалуу.

Өзүн өзүнө дем салуу системасы...

Дем кандай салынат?

1. Фатиха сүрөөсүн - 7жолу оку

2. Аяталь Курсий сүрөөсүн -3 жолу оку

3. Каафируун сүрөөсү -1 жолу оку

4. Ихлас сүрөсү -3 жолу оку

5. Фалак сүрөсү - 3 жолу оку

6. Нас сүрөсү -3жолу окулат

✍️ : админка 🫀

Чет жакта жүрүп ыйлаган деле эмесмин. Кыргызстанга учуп келгениме 20 күн болду. Эки жолу ыйладым... Кыргызстанда жашоо арзан болгону менен моралдык жактан басым катуу экен.

Акыркы күндөрү жашоомдо көп өзгөрүүлөр болуп жатат. Кыргызстанга келип бүтүрчү иштеримди дагы деле бүтүрө элекмин. Жакшы көнө албай жатамын чынымды айтсам...

Аллахым ушунун баарын көтөрө алганга күч бере көр...🌓

Шаардагы ызы-чуудан качып кеттим...

Ызы-чуу, бака-шака, катуу каткырык, шашылган жашоону жактыра албай калдым. Акыркы жарым жылда шашпай жашоону үйрөнүп баштадым. Сага келчү нерсе, сенден айланып кетип калбайт экен, сенин ырыскың эч кимге качпайт экен. Ооба, кээде жаным чыгып кетчү учурлар болот, бирок ичимен жогорудагы сөздөрдү айтканда сөзсүз тынчтанып отуруп калам. Мен Аллахыма жашоомду эчак эле тапшырып койгонмун. Мен алсызмын. Менин колумдан эч нерсе келбейт. Мен эч киммин. Ушундай ой жүгүртүп баштагандан кийин, жашоомдо күтпөгөн нерселердин баары болуп жатат...🪐

Айылда жүргөнмүн. Улам-улам эле айта бердим: "Жумуш табыш керек"-деп. Анан кайра ниет кылдым:"Ээ, Аллахым мага тынч жашоону насип кылчы, оңой жумуш болсунчу, чет жакта мен иштебей эле акча алгандай болдум, ошондой болсо..."-деймин... Анан эки күн мурун эле группалаш кызым чалат, ушундай-ушундай жумуш, келбейсиңби, аябай жакшы жер, өзүм дагы иштеп жатам, оюма сен келдиң деп. Ойлонбостон эле "макул " дедим. Анткени "ойчул ойлонгуча, тобокелчи тоо ашат" дейт элибизде, шап алдыга келген шансты пайдаланып калууну туура көрөм. Анан жолго чыгып, эртең менен шаарга жетип, 2-3 саат уктап алып эле жумушка чыгып кеттим. Жумушум шаардын четинде, тоолордун арасында жайгашкан, аябай кооз, тынч жер. Кубанычымда чек жок. Аллахым - Угуучу. Альхамдулиллях. Кулак-мээм тынч жерде ишимди баштадым. Азырынча көнүшүп алайын, анан шашпай айлананы кыдырып чыгамын. Айткым келгени: болгону жакшы нерсени ниет кылып эле, сурай бериш керек. Аллахтын колунан келбеген эч нерсе жок ✨ Анан алдыга келген мүмкүнчүлүктү колдон чыгарбоо керек экен ✨

26.09.2024
19:16
Балмуздак жегенче, сыналгыдан мультфильм көрүп отурам. Жанымда апам бар. Ашканада тамагым да бышып жатат. Эшикте жамгыр жаап, аябай суук болсо да, үйдүн ичи сонун жыттанып, өзүнчө эле жылуулук ✨

#альхамдулиллях

Бул жакка акыркы убакта узун-узун тексттерди жазып киргизчү болдум 🤭. Анткени мен ичимдеги нерсени жазып чыгарамын. Анан күнүгө эле жакын досторума мунун баарын айтып бере берсем деле болбойт го? Ошондуктан кийин китеп жазып калсам деп, бул жакка эстеликке жазып коём. Ар бир моментти пайдаланып, бөлүшкөнгө аракет кылам. Бирок көп учурда атайын убакыт бөлүп, "Илхом" келгенде гана жазат экенмин. Буюрса каналым, атына заты жарашып бара жатат окшойт🫧

Күнүгө эртең менен апам мени ойготуп, бирге чай ичип атканбыз. Бүгүн ойготподу, өзүм турсам, апам жумушка кеткен экен. Мага күн тийбесин деп, терезенин пардасын да ачпаптыр, үйгө бирөө кирип келбесин деп, эшикти жаап, сыртынан таш менен бастырып кетиптир, столдун үстүн карасам сүттүн каймагын алып, өзү жебей, мага таштап кетиптир, жада калса телефонумду да зарядкага сайып кетиптир. Бул кенедей эле нерселер, бирок мен үчүн өтө чоң мааниге ээ. Анткени өзүнчө жашаганда, эч ким апамчалык мага боор тартып, мээрим төкпөсүнө түшүндүм. Анан кантип апаңа бул дүйнөдөгү бардык жакшылыкты каалабайсың ? Кантип апаңа бул жашоодо да, кийинки жашоодо да пайдалуу болууну каалабайсың ?

Ооба, мени урушкан учурлар болот. Бирок ошого мен өзүм жеткизем. Апамдын тагдыры өзүнчө эле кино, ошондуктан башка адамдарды коёюн, жада калса бир туугандарым туура эмес сүйлөсө урушуп кетем. Апамдын бир дагы жолу бирөөгө "жалоб" айтып, ыйлаганын көргөн эмесмин. Аябай тазалыктуу, мээримдүү, убакытка так жүргөн, жароокер адам(ышыгылып сөз байлыгым жетпейт, апамды сүрөттөп беришке). Өткөндө айтып коёт: "Жеңеңди жаш кыз кезинде апасы аябай эле жумуш кылдыртчу экен да, суукта сайга барып отун ташып келчү экен, мал жайлачу экен. Ошону эстеген сайын бир чети кудагыйыма ачуум келип кетет. Кызды деген аяш керек да?!"-деп коёт. Анан түшүндүм, эмнеге апам бизден мурун жеңемди аяп турганын. Жеңем жумуш кылып жүрсө, "ай шашпай жасайсың, бас баланы эмизгенче уктап эс алып ал" деп, башка бөлмөгө киргизип ийет😊. Жеңем туугандарга кызмат кылганы барса, апам бир аз эле оокатын кылдырып, ээрчитип ала келет, таштап койбойт эч качан. Кыш келген сайын баарыбызга жылуу байпактардан эки-үчтөн алып берет, бирөөбүздү да унутуп койбойт, жеңемдер шаарда болсо дагы, салып жиберет. Неберелерине да мээримдүү, келген сайын кийим сатып берип, оозунан чыккан нерсенин алып берет. Апам бирөөгө тийишпейт, бирок бирөө жалаа жаап, тийишсе аябай жаман абалга салып салат. Ошо жагын мен тартсам керек)

Эмне болсо да, ата-энебиз эки дүйнө бактылуу болсун. Биздин сыйыбызды, жакшы жактарыбызды көрүп, бактылуу карылыкты Аллахым насип кылсын❤️✨

Менин айылда экенимди билип, классташ балдар учурашканы келишиптир. Эшикте шамал катуу болуп, суук болгондуктан, машинада сүйлөшүп отурдук. Негизи класста он алты бала, беш кыз окуганбыз. Кичинекей кезибизден балдар бизди аябай сыйлап келе жатышат. Бүгүн айткандай "башка класстын балдарындай болуп, кыздарга бир дагы колубуз тийбептир" дейт. Шүгүр кыламын. Ушундай мыкты тарбия берген ата-энелерине да таазим. Дайыма айтып каламын го: менин айылда экенимди билишсе, сөзсүз учурашып кетишет деп. Кечээ да классташ бала жазып, "баралы, сүйлөшөлү" дегенинен, "кеч кирип кетти" деп болбой койгонмун. Бүгүн эртерээк келишти ырас)
Билесиңерби? Мен классташтарымдын жанында өзүмдү өтө эркин сезем. Анткени алар менин мүнөзүмдү билишет жана көтөрө алышат. Бүгүн да бир нерселерди жегенче, отуруп, сүйлөшкөнгө ала келишиптир. Айылда жокторго болсо видеозвонок менен чалып, чер жазышып, сагынычыбызды таратканча, бири-бирибиздин кыжырыбызга тийип, каткырып отурдук. Анан кеч кирип кеткенинен үйгө кирейин десем, классташ бала:
-Ай коё тур, апей
-Ии эмне болду?
Десем, мен отурган жактын эшигин ачып, колун сунса боло😅
Бутумду чыгарып, оң колумду берсем, "Ме, туура эмес. Кайра отур" -деп башыман түртүп, кайра отургузуп койду машинага😂 Отуруп баратып, кирдеген айылдагы шлёпкам жерге түшүп кетсечи? Ичимен "жаман жүдөдүм го" деп ойлонгуча эле, тиги классташ бала жердеги шлепканы алып бутума кийгизсе болобу😂😂😂 Өзүм үйдөгү кийим менен чыкканмын, бутумда калың байпак менен кирдеген шлёпка, бир чети өзүмө күлкүм келсе, бир чети тиги балага да күлкүм келди 😂 Анан аны кийип, сол колумду берип , анан машинадан түштүм. Ушундай... Унутуп калыпмын туура түшүүнү. Ал бала дайыма мага ушундай жакшы мамиле кылат✨. Бактылуу болсун, өтө жакшы адам. Болгону ортобузда достуктан ашык эч нерсе жок. Кээде гана эркектердин психологиясын билүү үчүн ар кандай суроолорду берип, "аа" деп отуруп калам. Ал дагы менден мамиле боюнча сурап, кеңешет.

Ылайым биздин жаныбызды ушундай бизди урматтап-сыйлаган адамдар жандап жүрсүн. Алардын жанында күлүп-жайнап коюп биз да жүрө берели💕

Айылым✨

Бул сүрөттө мен сүйүп жеген нерселердин баары бар)

🪵~🕯~🧸

Стамбулга келип эле, а дегенде ушул мечитке кирүүбүз насип болуптур. Биз таңкы алтыдан бери сейилдөөнү баштаганбыз. Бул мечит тогуз жарымда ачылат экен. Жолдо бара жатып көп жерди кыдырдык, анан мечитке келсек эле жабык...
Эшикте жаан, шамал, суук.
🌧⛈☔️
Биз болсо жука кийинип алганбыз. Жанымдагылар аябай суу болушту. А мен чамоданым оор болду деп, кол чатырды сумкама салып алдым эле, ошонун пайдасы тийди. Ал жакта күтүп туруп бул мечиттин тарыхын ошо жактагы бизге окшоп күтүп турган бир түрк чоң ата айтып берди. Көрсө Султанахмет мечити Султан Сулеймандын чөбөрөсүнүн мечити экен(Кёсем Султандын баласы)😍. Ушунчалык бышык салынгандыктан азыркыга чейин жакшы сакталыптыр. Бир чети чеп сыяктуу экен, анткени сыртында тосуп турган дубалдары бийик, кирип бара жаткан эшиги дагы катуу темирден жасалып, 2-3 метрдей болот окшойт. Бардык шарттары бар, чоң, кооз мечит экен. Түркияда жүрүп, мечиттер ушунчалык көп болгондуктан, музейге айланып кеткенине көзүм жетти. Бул мечитке биз киргенден кийин жарым саат-бир саатта эле чет элдик туристтерге толуп калды. Бардыгы сүрөткө түшүп, тартып жатышты. Арасында кээ бир мусулмандар гана намаз окуп, дуба кылдык. Биз дуба кылып отурсак бир эже келип баласына дуба кылып коюуну суранды. Менин жанымдагы кээ бир кыздар дагы динден алыс эле, кичине болсо да курбум экөөбүз ислам дини боюнча маалымат берип, көпкө дуба кылганча, сүйлөшүп отурдук.
Буюрса, бул жакка дагы көп жолу жакын адамдарыбыз менен келүүнү Аллахым насип кылсын✨

Султанахмет мечити✨