كرار العطوي السماوي

شكرآ ياحسين ورحت مشايه
بچيت هواي بس مقصر هوايه
خلصت هاي هيه لا ابد منگول
مايخلص لطمنه ونوح القرايه

والله وحشه ~ هسه كل خادم رجع
والله وحشه ~ واگف ابعينه الدمع
والله وحشه ~ ضلمه من دون الشمع

عدنه مطلب يالحنين ** لعوده نصرخ ياحسين
~~~~
تره العاشگ الك ما سلهمت عينه
عمت عينه الصدگ مايبچي لحسينه
كون الثوب طين ونلطم اعله الراس
وبحرگه نصيح العجل مهدينه

والله هظمه ~ زينب ابديرة غرب
والله هظمه ~ اخ والموقف صعب
والله هظمه ~ احنه راحتنه التعب

كون نگضيهه ابونين *** لعوده نصرخ ياحسين
~~
ألك حافي المشي يالتعرف شبيه
تمر طفله اعله بالي ازغيره علويه
يوم الحرگو الخيمه وهوت للگاع
اجت تركض ركض وجدام مچويه

عمه عمه ~ عمه زينب صيحت
عمه عمه ~ بالبواچي فرفحت
عمه عمه ~ عالترايب من هوت

عالجره ماتغفه عين *** لعوده نصرخ ياحسين
~
من يمشي المسير ونوگ تعبانه
وابو الموكب تحزم فتح ذرعانه
تشابيه السبايه وناعي هم ايصيح
زينب من اهلهه اتريد عوانه

والله صعبه ~ مرت ابساع وگضت
والله صعبه ~ عل خدامه اتعودت
والله صعبه ~ بجاه كل جاه وبخت

بجاه امير المؤمنين *** لعوده نصرخ ياحسين
~~
كرار العطوي السماوي

لحسين من اولهه والتاليهه
ارواحنه الغيرك فلا نفديهه
~~~~~~~
احنه نذر للموت لبن الزهره
بگلوبنه وتلسع حرارة جمره
مو يوم لويومين بيهن نقره
وي لمواكب هاي صارت عشره
اليوم باجر بعدين ~ ادموعنه اضل لحسين
والما بچت هالعين شلك بيهه
~~~~~
هاي النشامه اليوم رفو رايه
اهواي ثم اهواي ثم اهوايه
من البحر لنحر هل مشايه
من الصبح لليل كلهه اقرايه
العالم اتعنه ايزور ~ من البحر للمنحور
احنه بضماير هاي من نحچيهه
~~~~~~
واحدنا بالخدمه يعيش بهمه
يحسين حبك والله يجري بدمه
الما حضر بالمجلس ايغث امه
اتگله اخدم حته احسبك زلمه
عزالله ماترضه اعلي ~ بالخدمه يبني اتوصي
هاي المجالس عامره وطاريهه
~~~~~
الدنيا متروسه معاصي وغلطه
من ورطه تاخذ بالشباب الورطه
والعاف كلشي وأجه يمنه اتخطه
جاب الحروف وحط عليهه النقطه
احنه عشيره الخدام ~ وحسينه الشيخ العام
بالخدمه هاي ارواحنه انماشيهه
~~~~~~~~
كرار العطوي السماوي

Channel photo updated

الحسن هاليوم بايد حيله
زينب او يخوانهه اتچيله
~
بينت من هسه شوغات الزمن
دارت الدنيا اعله زينب والمحن
ضهره مكسور الحسين ويالحسن
علي غايب عن دياره اليله
~
علي غايب والاخو ايواسي الاخو
صعبه عن البيت لو شال الابو
كل يتيم ابابك ايصيح شكو
راح راعيكم يشد ارحيله
~
راح راعيكم بعد ماضن يرد
واليتيم اتكتله خطوات البعد
يله حضرو ارواحكم هاي الشدد
چان حيدر بس يعدل الميله
~
چان حيدر خيمه عالوام ستر
شايل الحنيه وبگلبه اشكثر
رحمه مايعرف ابد اسم الغدر
باب خيبر بس چفوفه اتشيله
~
باب خيبر ترجف اگبالك علي
يا ابو الحسنين بس انته الولي
من بعد عيناك بالدنيا شلي
فاهي مگعاد الابو  ياويله
~~
فاهي مگعاده وينوح وكله هم
يا أمير وما يصح مثلك شهم
يا أبن عم النبي وسيد العجم
چنك القرأن  وي ترتيله
~~
چنك القرأن ما تشبه احد
لم يلد مثله ولم يولد بعد
تالي بين المگبره يضمك لحد
والتراب احسين بيده ايهيله
~~
كرار العطوي السماوي

اخ ياشلعان گلبي 
گالت الحرمه الجبيره
حيل ماضل بعد عندي
من وگع شيخ العشيره
فزعة الخيل اعله جسمه
تالي لموه ابحصيره

تمنيته يصير اليوم موتي
ولا دنيا ابعدتني من اخوتي

تالي العمر زينب من دون الحسين
تگضي الزمن كله بس لوعه وونين
~~
هاي هيه وبعد صارت
والخيم هم احرگوهه
هاي سكنه وي رقيه
بل براري ركظوهه
مالت الدنيه وي زينب
لسبي من طلعوهه

تره الماعدهه اهل ماعدهه عوان
مثل خيي الحسين الباقي عريان

حر الشمس فوگه ضل عل ترابه
وخته مشت عنه لضيم الخرابه
~~
هذا حادينه تماده
گام يزمخ عل سبايه
وحنه نسكت ياهضمنه
ماكو راي وماكو رايه
الحبل واحد جمعنه
كل عبايه بصف عبايه

تره الملچوم گلبه يبقه مي طيب
والمشيب بعد ماينمحي الشيب

جابوهن وصاحو باجر على النوگ
والمادره يدري ايدخلوهن السوگ
~~
اخ ياسوگ الشماته
زينب الوگفت غريبه
بس عليل وماكو والي
هيه هاي اكبر مصيبه
وين اخوي يصيح كلبي
باقي بس جثه سليبه

انه بتالي العمر ادخل لديوان
ومن دگ الطبول اگليبي خلصان

هذا الفرح صاير ومدنگه الراس
جبناهه مسبيه اختك يعباس
~
كرارالعطوي السماوي

https://youtu.be/wMbqLx-0OH0?si=SwtYbg9Lh5Ua_ip1

https://youtu.be/QW0gBhVoPrc?si=0FZxZIgImbhz4ejE

https://t.me/mohand00ll

ياروحي
محد اجه وشال النعش
ياروحي
مثل السراب او يالعطش
ياروحي
خلصانه من ليل اهدعش

وين الهواشم ناشدت زينب غريبه
تعبر مصيبه والزمن ذبهه ابمصيبه

كل اجنازه من تنهاب بچتاف
بس تابوت زينب ليش ينعاف
ضل مطروح بس بالعين ينشاف
~~~~~~
والحيره
بس العليل ابحيرته
والحيره
بس هوه يبچي العمته
والحيره
مامش عرف من ديرته

الناس كلهه سولفت هل ميت امنين
متبسم وگلهم تره هاي اخت الحسين

هاي الچانت اتشاگف النيران
صح ام عون لكن ماكو عوان
لا يمهه عرف لا عندهه خوان
~~~~~
هضموني
يا أهلي مابين الغرب
هضموني
ديوان ابن زياد اطب
هضموني
ماينسي وموقف صعب

الصعبه والما تنسي بشفاه الحسين
بالعصى يضربهه وضحك يم النساوين

مجروح الگلب ياهلي مجروح
مو حگي عليكم لو متت نوح
من گد المصايب تعبت الروح
~~~~~~
أمنيتي
تحضرني امي بموتتي
أمنيتي
وحسيني يمسح دمعتي
أمنيتي
هاشم تشيل اجنازتي

هوه اليموت وعنده اخو يحضر منيته
بس انه اخوي بكربله موذر لگيته

يا روحي بعد المن اتاني
هوه الشام هذا الوعاني
حته ابموتي ومحد اجاني
~~~~~~~
كرار العطوي السماوي

https://youtu.be/yG9B-rbn0XA

https://youtube.com/watch?v=A1Q_fyz2Tx8&si=YFKCNa8yIPYn2oxH

كل عام واني بعازتك يامولاي
كل عام ونذرلك ايامي ودنياي
الناس فرحانه ويدگون اطبول
وبيوم واحد واحد اني ابمچاي
::
الناس يامولاي شو فرحانه
ويام أمك لسه ما خلصانه

( ماتنشف ناذرهه اعيوني)
~~~~~~
كل عام وتعاهدلك ابترتيلي
كل عام فدوه يروحلك كل جيلي
مرات اضيع وبعد ما املك راي
وتردني اهات العزه وتوميلي
::
كل عام وحچايه نفسهه ابالي
غير ابو الاكبر مابشر يحلالي

( هنيالي وحبيت احسيني )
~~~~~~
ياموطن الماعاف واحد محتار
وبصايتك لميتنه ازغار اكبار
حته الفقير بحبك اصبح زنگيل
يا جنة الله الما يعشگك لنار
::

الناس حگهم كلهم ايحبونك
الكون الله امطرزه من اعيونك

( لميت الخادم بعيوبه)
~~~~~~
اجروحي ماتشفه بعلاج ودكتور
ترتاح بس من ابچي عن المنحور
عريان ويوزع حرير اعله الناس
مايصح مثلك لو الف عام ايدور

::

كل الخدم تعبد املوك ادريها
بس خدمتك ربك امبارك بيها

( لا ماصح واحد برسومه )
~~~~~~
ألف انعمالله اعليك ومخليني
خادم ابخيمة امك اتبچيني
يا اول انسان النحبه بلا شوف
عالفطره عاهدناك ياكل ديني
::
كل عمري الطم عن حرگ خيماته
والطين فوگ الهدم يا محلاته

( كل عام ونلطم لجروحه )
~~~~~~
كرار العطوي السماوي

من مصيبه العد مصيبه هاي اختكم حايره
لحضه ماغمضت عيني عاليتامه امساهره
~~~ ~~~~~
مساهره بليل الخرابه وشايله هموم الضعن
هاي نامت هاي گالت يمته نرجع للوطن
عيون زينبكم يخوتي بل مدامع غورگن
مناطره وابچي وردن بالبواچي مناطره
~~~~~~
حايره وماعندي والي وايدي مچتوفه بحبل
هاي ماصارت يخوتي زينب تروح ابهزل
طحت وسفه بأيد وادم ماتحن اعله الطفل
والضعن بيدين غربه للغرب بي سايره
~~~~~~
اخ ياشوغات گلبي وفوگ خمسين العمر
والاخو لو راح اخيه چفه يطبع عالضهر
عالوطيه احسين عاري وابو فاضل عالنهر
بس عليل وياي باقي وحيل يكسر خاطره
~~~~~~
يوم بين الخيل باقي حسين گوه تحملت
كون ماميت حسين وانه بالحافر متت
جسمه ضايع بالحوافر يمه آنه وتيهت
والله كل الصار بينه بالخلگ ماصايره
~~~~~~
ادخل السوگ وحرمكم يال هاشم يستحن
دگت اطبول الشماته وعيد بالشام انعلن
بالرماح اگبال عيني روس اخوتي اتعلگن
أخت وتفارگ أخوهه خطوه تمشي وعاثره
~~~~~~
طبت الديوان تكتل ماتلوك اعله الخدر
جدمي ما لايح تراب وهسه لايحهه الجمر
والشماته ستقبلونه اطبول بالسوگ العصر
خاطر الاطفال هايه گوه امشي وصابره
~~~~~~
✍️ مرتضى الرافضي
✍️ كرار العطوي السماوي

https://youtu.be/xiV-VM7hdHM?si=7BNooLCPi_klFcjN

ياخويه
أول مراسيم الدهر
ياخويه
راواني انواع القهر
ياخويه
تاليهه ادخل للقصر

ياخويه مو انه الچنت مكفوله بحماك
ام عون گلي بيا وكت فارگهه طرواك

ماصدگ تره تتفارگ اوياي
انته الماي خويه شلي بالماي
اسمعني يروحي ونضر عيناي
~~
وحسيني
مامش ولا ناصر أله
وحسيني
محد بگاله من هله
وحسيني
عاري وسليب ابكرله

نايم بقه بحر الضهر وتسحگه الخيول
گوه بحصيره ينجمع مونعش مشيول

حته ابنيته صاحت بابه بابه
من حضنك لحيطان الخرابه
ياضيم اليمرنه ويا مصابه
~~
هضموني
احمر صفه لون العبي
هضموني
حاديهه زينب اجنبي
هضموني
ياخويه بدروب السبي

ياوسفه تنشاف الگبل ماشافت الباب
تاليهه عالهزله أجت يم سوگ الاجناب

اول تالي چفي مگيد احبال
روس اخواني بالارماح تنشال
تدريهه الغرب ما ترحم الحال
~~
تدريني
انه الاميره بت علي
تدرىيني
عالهزله صاير محملي
تدريني
مو هذا حيلي الاولي

بالشام وطبول الفرح گالتهه عدوان
هاي البقت لا من أبن لا عدهه خوان

بالغربه يخويه وفوگ كل دار
ماي الحار سب مگاطف حجار
بالشام وگلب زينب يشب نار
~~
تاليهه
نسوانكم بيد الغرب
تاليهه
ديوان أبن زياد اطب
تاليهه
هسه اشتكيلك والصعب

الصعبه والما تنسي بشفاه الحسين
بالعصى يضربهه وضحك يم النساوين

مجروح الگلب عباس مجروح
مو حگي عليكم لو متت نوح
من گد المصايب تعبت الروح
~~
كرار العطوي السماوي

ها ييمه
بيش يرتاح اليفارگ
أمه ويريح الگلب
مو صعب لمن تعاشر
بس الموادع صعب
الوطن محسوب أنتي
وهسه عايش بالغرب
والذبح بنسان غالي
موشرط ذبح الرگب

يتعب الانسان لمن عيشته تصير بدمع
منك وبيك اليألمك خيط يكتلهه الشمع
والضلع مايصح جبره وانتي كسرچ بالضلع
راح نورچ ذاك يمه الچان نص دارچ يشع

يالحبيبه = هالمصيبه
عطرچ ابدارچ نشمه ~ هااااييمه
~~~~~~
ها ييمه
توه شد الضيم حيله
وگلبي بالفرگه انچوه
توه صار اليل غربه
بحسرة الفاگد ضوه
هاي اول اخ طلعت
ما يمض بيهه الدوه
واليخنگه فراگ أمه
ينحني بريته الهوه

أمي يانبع المحنه وتنطي للخايف أمان
أمي لمتنه بحضنهه من برد بينه الزمان
ياحلم يجمعني بيهه بيا مسيه بيا مكان
أمي أدت رحمة الله وعالخلگ تمطر حنان

ها يليلي = راح حيلي
جرحي ما اگدر ألضمه ~ هااااااا يميه
~~~~~~
ها ييمه
باجر انه اعله الوطيه
موسد ابحر الضهر
والجسد عاري ييمه
وخيل تسحگ عالصدر
ماكو ناصر يبقه يمي
وراح يتماده الشمر
صعبه بين النار تركض
حرمه واچبيرة عمر

حيره عد ام عون يمه والفواطم حايرات
ياسگف ويصير ضلهن والخيم متوجرات
صعبه علويات هاشم بالخرايب من تبات
ضيم فوگ الضيم والهم والهضم متگبعات

هيه هايه = ماكو رايه
گلبي مو بس هذا همه ~ هااااا ييمه
~~~~~~
ها ييمه
دنيا أذتني بحزنهه
والوكت ماعنده راي
چانت گبالي ابتسامه
وهسه لا صارت وراي
روحي عطشانه الحنانچ
ماكو شي ويسد ضماي
مثل عطشان ويدور
بس سراب وماكو ماي

دمعة الفاگد ثگيله تخلي اثر فوك الجفن
اخ من يذكر سوالف تالي ليله ومن يحن
چانت الايام حلوه راحن ابساع وگضن
چنه نغفه بنص حضنهه وهسه حاضنهه الچفن

ما نسينه = يالحنينه
دنيا صارت حيل ضلمه ~ هاااااا ييمه
~~~~~~
كرار العطوي السماوي