حسام أسعد حسن

"من أكثر ما يُفسد عيش الإنسان تخلّيه عن تحمّل مسؤولية حياته..."

📖 فسحة الأمل - أحمد سالم

-----

دائما ما بتقع لي فكرة التفاؤل أو التشاؤم إطلاقًا...، ما هو احنا ما عندنا خيار آخر...، دي حياتك، ودا واقعك، ودا مستقبلك (دنيا ثم آخرة)...، احنا المسؤولين...، وعلى قدر سعينا بنلقى

فالمنطقي والحكيم أنك تكمل تسعى بغض النظر عن إحساسك وتحليلاتك بتخليك تتشاءم أو تتفاءل، أنت ما عندك حل غير تحاول تسعى لحياة طيبة هنا وبعدين... غير كدا ستهلك..، وحضرتك المسؤول... وربك الحيسألك عالم بالظروف الختاك فيها وحيديك قدر صدقك وسعيك بزيادة..

خذ حياتك الدنيا والآخرة بجد وبقوة واصبر وربك كريم إن شاء الله

مرحبًا، جمعة مباركة بإذن الله..
بالله تعال أقيف معاي في "رحمة من ربك" في الآية دي :

"وَأَمَّا الْجِدَارُ فَكَانَ لِغُلَامَيْنِ يَتِيمَيْنِ فِي الْمَدِينَةِ وَكَانَ تَحْتَهُ كَنزٌ لَّهُمَا وَكَانَ أَبُوهُمَا صَالِحًا فَأَرَادَ رَبُّكَ أَن يَبْلُغَا أَشُدَّهُمَا وَيَسْتَخْرِجَا كَنزَهُمَا رَحْمَةً مِّن رَّبِّكَ وَمَا فَعَلْتُهُ عَنْ أَمْرِي ذَلِكَ تَأْوِيلُ مَا لَمْ تَسْطِع عَّلَيْهِ صَبْرًا" [الكهف : 82]

كلما أمر عليها أتذكر إشارة د. أحمد عبد المنعم: أنت متخيل يعني شنو ربنا جل جلاله يرسّل موسى والخضر عشان يحفظوا كنز الغلامين...

"رحمة من ربك"

يعني كل القصة والرحلة الطويلة دي حصلت ليه؟ = رحمة من ربك!

ياها دي رحمة رب العالمين، تتحرّك الأقدار والكون كله ليحل مشكلة اثنين صغار كان أبوهما صالحًا...

اذكر الرحمن في قلبك ومسألتك الخايف منها دي بطّل تعاين ليها بحسابات الدنيا المحدودة...، لك رب رحيم لطيف لما يشاء...، عليك الصبر والسعي والدعاء وما شغلتك بتنعدل كيف، بس أحسن الظن وتوكّل على ربك العزيز الرحيم...

مساء الخير🙋
تعال أقيف معاي وقفة صغيرة مع الآيات دي، ربي أعلم بتفسيرها لكن كلماتها بيظهر فيها معاني بتخاطبنا وغالبا تلقى نفسك فيها...

ربك الكريم بيخاطب النبي ﷺ بيحكي ليهو عن شخص بتعبير يوحي بالذم وبيقول :

"أفرأيت الذي تولى ... وأعطى قليلًا وأكدى..."

العايزك تتأمله "أكدى" دي..، اتخيل معاي جماعة طيبين بيحفروا بئر، ومشو كويس كم متر بعدين لاقاهم حجر قوي!...

أها كسلوا منها وقالوا غلبتنا ومشوا خلوها

الحجر دا هو الكُدية، والكسر حنك الحفر دا بنقول أنه "أكدى"...!

فربنا بيعاتب ويذم الشخص اللي بدر منه حبة خير وبمجرد ما واجه امتحان كسر الحنك...!

ويستمر العتاب : "أعنده علم الغيب فهو يرى"؟ ... أنت بتعلم الغيب ولا عارف ربنا مقدر ليك شنو ولا عارف رحمة ربك قدر شنو فقنعت وقلت ماف طريقة وماف فائدة...؟

"أم لم يُنبأ بما في صحف موسى... وإبراهيم الذي وفى... ألا تزر وازرة وزر أخرى"..!!

لا يعني أنت قايل لما تكسر حنك الخير وتقنع، في زول حيشيل عنك مسؤولياتك؟ ولا في زول حيتحمل ذنبك؟..

لا أبدا...، هو بس اللي أنت بذلته وعملته، "وأن ليس للإنسان إلا ما سعى.."

ولو واصلت سعيك وما استعجلت النتائج فأظهرت لربك صدقك فإن سعيك سوف يُرى ولك قدره وزيادة وما عليك أبدًا أبدًا بالنتيجة كانت شنو...

بس أنت أثبت، وأحسن ظنك بربك، واستمر...

يا وصلت غايتك في الدنيا أو أخذت أجرك كامل ومضاعف حسب نيتك في الآخرة وفي كل حال خير... والله لطيف لما يشاء..♥️

#التعلم_هو_الحل بس أنت أصبر ولا تيأس، وكمّل محاولات وسعي..!

«واعلمْ أنَّ في الصبرِ على ما تَكرهُ خيرًا كثيرًا، وأنَّ النصرَ مع الصبر، وأنَّ الفرجَ مع الكرب، وأنَّ مع العُسرِ يُسرًا».

من وصية النبي ﷺ لابن عباس (رضي الله عنهما)...

لا حل آخر، عشان تعدي من حال أنت فيه إلى حال أنت عايزه، لابد تقطع رحلة مليانة دروب ثقيلة عليك...، ما عندك حل غير تستجمع كل ما عندك من صبر وتمشي...، وإن النصر مع الصبر....

#التعلم_هو_الحل ، وماف تعلم بيتم بدون صبرك على ما تكره، وإن صبرت فأبشر بخير كثيير....!

"كن على مدارسة ما في قلبك أحرص منك على حفظ ما في كتبك"

📖 ارتياض العلوم
-----

في سعيك وأنت بتتعلّم حاجة جديدة عليك بالله ما تقع في نفس ورطة الردم الكنت بتعملها في التعليم...
يردموك معلومات وتشيل وتحشي وتمشي البعده والبعده...
تقرا الشيت كامل أو تحضر كورس كامل في فترة وجيزة... وتشوف البعده!

تؤ تؤ دا ما تعلّم!.... أبرد واستكين وأهضم كل معلومة جديدة، تأمل فيها، فكّر وأسقطها على الواقع، جرّبها، اتخيّلها، اسأل عنها وفيها، ناقشها حتى تمشي للبعدها...

في التعليم كان في استعجال...، لكن رحلة التعلّم حقتك، ممتدة مع عمرك - ربنا يبارك فيه - ماف استعجال، أهضم كل فكرة وكل مهارة كويس حتى فتش للبعدها...

بتتعلم مهارة وعرفت ليك حركة جديدة، أقعد طبقها في مشاريع مختلفة لحدي ما تلقى روحك أبدعت شي جديد... أو بتتعلم لغة وعرفت كلمة جديدة، فتش عنها ودخلها في جمل وشوف ليها قصائد وفكر في معناها بلغتك وجات من وين وبتشبه شنو من الكلمات... وهكذا

#التعلم_هو_الحل ... والتعلّم لابد يكون بتأني وإتقان!

مرحبا...
يُنسب للشافعي أنه قال :

ومَن لَمْ يَذْق مُرّ التعلُّم سَاعَةً
تَجرّع ذُلّ الجَهْل طُول حَياتِهِ!

وقد صدق!...، النفس دائما بتطمح، ولو تأملت حتلقى كثيير الكان واقف بينك وبين ما تطمح إليه أنك تتعلم حاجة...، وهل في ذُلّ أكثر من طموح قدام عينك ما قادر ترفع ليهو يدك...؟

#التعلم_هو_الحل
...نواصل😁👋

مرحبا...

خلّيك دائما عارف أنه رزق ربنا الكريم يؤخذ بالأسباب... وأحد أهم أسباب العصر الحالي هو شطارتك وخبرتك العالية في حاجة صعبة يحتاجها الناس..

يلا شطارتك في أي شيء بتجي بعد رحلة تعلّم...، وتعلّمك أيها العزيز بيتم لما تتلقى خبرة غيرك، سواء قالها ليك وجربت أو قرأتها وجربت.. على أي حال أنت بتتلقى كلام...

العايزك تعرفه يا سيد يا معافر أنه فهمك واستيعابك للكلام المقروء أو المسموع هو دا السقف الحتصطدم وتقع فيه كل مرة تحاول فيها تتعلم...

فخذها مني وصية...، لو لسه في بداية طريقك خلي تركيزك على اللغة ( أي لغة متوفر فيها مصادر تلقي لما تتعلم)

#التعلم_هو_الحل وماف تعلّم بدون مهارات لغوية جيدة!

ساعتين في غاية الأهمية لأي شخص ناوي يطور لغته أو يتعلم لغة جديدة...
جرّب أسمعها وفكر في كل كلمة بيقولها الباش مهندس واسأل ربنا له الفرج القريب

https://youtu.be/hsv0XpUvP6A?feature=shared

#التعلم_هو_الحل

يا سيد يا كريم🙋

نضمنا قبل كدا لكن نقول تاني : "استثمارك في اللغات (بداية من لغتك الأم) هو أهم استثمار تعمله في حياتك!"

وتعال المرة دي أونسك في سؤال "كيف؟"

احنا البشر ديل بتجي في داخل أفكارنا معاني ومشاعر...، لما نجي نعبر عنها بنعمل شنو؟

بشكل تلقائي جدًا بتمشي لمخزن من الكلمات والعبارات موجود في ذهنك، بتعزل من المخزن خيارات زابطة ومناسبة للمعنى العندك.... بعدين تجيب القدرت عليه وترتبهم مع بعض بأسلوب يعبر عن المعنى دا، وأخيرا بتقول أو تكتب المنتج النهائي المرتب

كذلك لما تسمع أو تقرأ كلام فحضرتك بتشيل المنتج المرتب دا وتفككه لعبارات وكلمات وتمشي تفتشها في مخزنك تشوفها بتعني شنو...، وتربطها مع الأسلوب عشان تستوعب المعنى

يلا لو فهمت النضمي الكثير بتاعي دا حتستنتج أنه في 3 أركان مهمة جدًا جدًا هي البتعمل كل شيء، وهي الأساس لو عايز تقوي لغتك ... ألا وهي :

- مخزن الكلمات والألفاظ
- مخزن للعبارات
- مهارة ترتيب الكلمات والعبارات (الأسلوب)

الثلاثة ديل هم البينموا مستوى القدرة اللغوية عندك (على مستوى الفهم والتعبير) ودا البينمي إدراكك وقدرتك على التعلّم..

في أمور أكاديمية أخرى تبع كل لغة، وللأسف كل التركيز بيكون عليها في التعليم وبيهملوا الثلاثة أركان القلناها فوق...

أنا رأيي وأسلوبي دائما : أفضل درب وأهم حاجة تركز عليها = تعرف وتفهم أكبر قدر ممكن من الألفاظ الشائعة ثم = تفهم وتستخدم كل لفظ في أكبر قدر ممكن من العبارات والجمل ثم = تمارس كثير شديد أنك تعبر عن أي معنى باستخدام العبارات والألفاظ العرفتها كتابةً ولفظًا...

وما هي إلا مسألة وقت وبقت أركانك أمتن، واستيعابك أفضل وتعبيرك أقوى... تزيد عليها تعلم قواعد وفنيات اللغة وتصبر...، بتلقى نفسك في مستوى جيد وبينعكس طوالي على مختلف جوانب حياتك..

#التعلم_هو_الحل

قال ابن القيم الجوزية رحمه الله:

"وإنما يعرف فضل القرآن مَنْ عرف كلام العرب، فعرف علم اللغة وعلم العربية، وعلم البيان، ونظر في أشعار العرب وخطبها".

أهو الدليل والهدى للدنيا والآخرة قائم على اللغة..، وكفى بهذا دليلًا على ضرورة العناية بمستواك اللغوي وقدرتك على هضم الكلام وحسن فهمه واستيعابه وحسن التعامل معاه...

#التعلم_هو_الحل

"الاستثمار في اللغة = أفضل خيار تقضي فيه فراغك"

حجر الأساس عندك البتبني عليه أي رحلة تعلم هو قدراتك اللغوية..

الحبيب أيمن عبد الرحيم بيقول : "الاستثمار في مهاراتك اللغوية هو استثمار طويل الأمد"...، ودائما أي قرش أو زمن تقدمه في تقوية لغتك حيرجع ليك لقدام في طريقك وتعال أوريك ليه...

شوف أنت في دنياك وفي آخرتك يا عزيز تعاملك مع أي شيء بيعتمد على الأفكار البتدور في بالك، وعلى المعاني البترسخ عندك...، والمعاني دي هي في أصلها عبارة عن لغة = كيف بتتعاطى معاها وكيف بتفهمها وشنو البيطلع منك كله قائم على توصيفك اللغوي للمعاني دي لنفسك ولغيرك

وأنا هنا ما بتكلم عن العربي أو الإنجليزي ولا القواعد أو القرامر... لا، أنا بعني صوتك البتسمعه جواك حاليًا وأنت بتقرأ في الكلام دا وبتحاول تفهم حسام دا داير شنو... الصوت البيشتغل دا كفاءته واقفة على سقف المهارة اللغوية العندك!

وكلما كان السقف أعلى بينعكس دا عليك بشكل كبير : على تعاملك مع الناس، على فهمك المواقف والأحداث، وعلى فهمك وتعاملك مع نفسك...، وعلى قدرتك على تعلم أي شيء..

فلو أنت في رحلة التعلّم واقف على سؤال أتعلم شنو، فأنا وصيتي لك لحدي ما تلقى إجابة خلي كل جهدك على قدراتك اللغوية (يعني تسوي شنو؟ جاايييك وحجاوبك😉)

#التعلم_هو_الحل

مقطع يغير حياتك | حديث أول مرة تعرف معناه الصحيح | الشيخ أحمد السيد

"الملل جزء طبيعي من الحياة"

شوف أنت لو عايز تعمل أي حاجة في دنيتك دي غير قعادك هنا في الفيس، لابد تتقبل وتصلح علاقتك مع الملل...!

عاين...

من زماااان كان طبيعي وعااادي جدًا أن الإنسان بيقعد في حاجة واحدة، بالساعات الطويلة لحدي ما يخلصها، مهما كانت هي شنو..، طالما هي مهمة ومفروض تتعمل يبقى تتعمل..

ولكن..، شوية شوية الإنسان بيفقد القدرة دي..، اتعودنا بسبب طبيعة الحياة الحالية ٱن العقل محفز ونشط بسرعة واستمرار...، فتحولت الأعمال البطيئة المحتاجة لتركيز إلى وسيلة تعذيب!

ولعدم وضوحنا وصراحتنا مع أنفسنا بقت حياتنا مليانة حيل وأعذار، لو تأمل الإنسان فيها بيلقاها ما هي إلا هروب من الشعور بالملل...

كلما استعجلت في علاج الأمر كانت فرصتك في أنك تستمر في تعلم ما تحب أكبر وأكبر...،

يلا كيف؟؟... = هذا هو السؤال😁
نلتقي في ونسة صوتية إن شاء الله قرييبا، وإلى ذلك الحين جرب خش اليوتيوب وأكتب "اجعل الممل ممتعا" لعلي محمد علي وركز معاه كويس..

#التعلم_هو_الحل

"خذ الدرب بقوة!"

قال إبراهيم السكران : "في بيئة يغلب عليها ضجيج اللهو وخفة المرح وقهقهات الفكاهة.. أتُراها تنتج مُسندًا أو مدونةً أو مَعْلَمةً أو مُعجمًا؟! منطق الحياة يأبى ذلك.. والعلم جعله الله ثمينًا لا يُجلب في الأسواق المخفضة".
-----
📖 مسلكيات ص١٣
-----

دائمًا أي شخص يجي يتونس معاي أو يسألني عن تعلم أمر ما، فأول حاجة بشوفها هي "هل الزول دا جادي؟!" = أخذك للأمر بمسؤولية وجد دا بداية الدرب، ولو اتخطيت الحاجة دي وماخذ الأمر كتجربة ساي كدا ... أبشرك ما حتواصل

نقول ونذكرك تاني أساس الصبر على التعلم : "غاية واضحة + علاقة طيبة مع الملل + جدية ومسؤولية + خارطة طريق"

من الأربعة ديل أي واحدة منهم قد تكون هي المشكلة والعائق بالنسبة ليك؟

#التعلم_هو_الحل

والعجزُ وضَعفُ الهِمَّةِ واضطرابِ الرأي في لُغَةِ العقلِ معانٍ ثلاثةٌ لكلمةٍ واحدةٍ هي الخَيبة، وما أسرارُ النجاحِ إلا الثلاثةُ التي تُقابِلُها وهي القوُة والعزيمةُ والثبات.

[كتاب سر النجاح || وحي القلم]

_

وما نَيلُ المَطالِبِ بِالتَمَنّي
‏ولكن تُؤخَذُ الدنيا غِلابا

‏وما استعصى على قومٍ مَنالٌ
‏إِذا الإقدام كانَ لهُم رِكابا.

أحمد شوقي

"...إنَّ اللَّهَ وملائِكتَهُ وأَهلَ السَّماواتِ والأرضِ حتَّى النَّملةَ في جُحرِها وحتَّى الحوتَ ليصلُّونَ على معلِّمِ النَّاسِ الخيرَ"

الراوي : أبو أمامة الباهلي | المحدث : الألباني | المصدر : صحيح الترمذي

----

في حالنا المنطع فيه كل مصادر التربية والتعليم نحن أحوج ما نكون لشباب تتبنى الحديث دا كهدف وغاية يبنوا عليها سعيهم... والله الموفق المستعان

#التعلم_هو_الحل

----

إلى الله نمضي يا هنيئاً لمن سبق
ويا حظ قلب من تقى الله قد خفق

تمر بنا الأيام سرعى كأننا ..
نرى سرعة الأيام كالبرق إن برق

فإن كنت ذا لب حصيف وحكمة ..
فلا تجعل الأيام تمضي كما سبق

و حث إلى الرحمن سيرًا فإننا ..
على هذه الدنيا كحبر على ورق.

مساء الخير...🙋

"غاية واضحة...، علاقة طيبة مع الملل...، جدية ومسؤولية...، خارطة طريق"

في اعتقادي دي هي الأعمدة البتقوم عليها استمراريتك وصبرك على تعلم أي شيء..!

ومع كل واحدة منهم لابد تسعى إليها وتفكر فيها بجد...، وتعال نونسك فيهم واحدة واحدة :

- وضوح الغاية هو المصبراتي الأول والأهم، ولو تأملت فالدنيا قائمة على مبدأ وجود غايات وسعي... السعي بدون غاية يكاد يكون مستحيل،، فلماذا ناوي تتعلم الحاجة دي؟ دا سؤال يا عزيزي محتاج وقفة طوييلة منك..

وعادي جدًا لو قلت عايز أتعلم الشيء الفلاني عشان يجيب لي قروش...، تكون وااضح في كدا وتعرف ليه وقدر شنو هي مهمة ليك دنيا وآخرة...

- العلاقة الطيبة مع الملل دا موضوع داير ليهو نقاشات طويلة إن شاء الله نجيها....

- الجدية...، شفت يا مدير الحياة دي جد، وأهو كل مرة الظروف بتعلمنا أنها ما بستحتمل الهزل المستمر، لا دنيا بتستحمل ولا آخرة بتستحمل... "خذ الحياة بالقوة" قلّب العبارة دي في تفكيرك لحدي ما ألقاك في ونسة جاية عن خارطة الطريق و"حب الملل"...

#التعلم_هو_الحل

"هل لاحظت معى أن أكثر الناس فراغًا هم أكثرهم ضيقًا بالحياة وافتقادًا للسعادة هل تعرف السبب؟ أنا أعرفه؛ لأن من أكثر أسباب شقاء الإنسان ضيق أفقه وكثرة انشغاله بنفسه وتفكيره فيها باستمرار كما لو كانت محور الكون، ومن يشكون الفراغ لا يجدون ما ينشغلون به سوى أنفسهم، وكلما ازداد انشغال أحدهم بنفسه رآها جديرة بحياة غير حياته.."

- عبد الوهاب مطاوع | الفراغ كله شر.

#التعلم_هو_الحل

وقال :

"وأي استثمار في مهارات الدراسة هو استثمار مفيد لجميع التخصصات..."

تفتكر مهارات الدراسة زي شنو🤔

----

"أكثر حاجة استقرت في نفسي إن الاستثمار في أي مهارة لغوية هو استثمار طويل الأجل"

م. أيمن عبد الرحيم

#التعلم_هو_الحل