Ethiopian Orthodoxs Daily

አንድ አምላክ በሆነ በአብ በወልድ በመንፈስ ቅዱስ ስም የካቲት ሠላሳ በዚችም ዕለት የመጥምቁ ዮሐንስ የከበረች ራሱ ተገኘች::

ይህም እንዲህ ነው ከሐዲ ኄሮድስ የከበረ ዮሐንስን ራሱን ይቆርጡ ዘንድ በአዘዘ ጊዜ በእስር ቤት ራሱን ቆርጠው ወደ ኄሮድስ አቀረቧት እርሱም ለወገኖቹ በማሳየት በቅዱስ ዮሐንስ ላይ ስለ አደረገው ሥራ እንደሚያዝን ገለጠላቸው የክቡር ዮሐንስንም ራስ በቤቱ ውስጥ አሰቀራት::

የፊተኛዪቱ ሚስት የንጉሥ አርጣ ልጅ ግን በአበረራት ጊዜ ወደ አባቷ መጥታ በፊቱ አለቀሰች:: ኄሮድስ በእርሷ ላይ ያደረገውን ሁሉ እርሷን አሳዶ የወንድሙን ሚስት ኄሮድያዳን እንዳገባ ነገረችው::

በዚያንም ጊዜ ንጉሥ አርጣ ተቆጥቶ ተነሣ:: ሠራዊቱንም ሰብስቦ ወደ ገሊላ ዘመተ:: የገሊላንም ሀገሮች ሁሉ አጠፋ በእሳትም አቃጠለ::

ንጉሥ ጢባርዮስ ቄሣር በኄሮድስ ሥራ ተቆጣ ወደርሱም አስቀርቦ ታላቁንም ነቢይ ስለገደለው ከሹመቱ ሻረውና እንድልኩ ወደሚባል አገር አጋዘው በዚያም በክፉ አሟሟት ሞተ::

የቅዱስ የሐንስ ራስ ግን በኄሮድስ ቤት ተቀብራ ትኖር ነበር:: ከዚህም በኋላ ንጉሥ ጢባርዮስ ጭፍሮቹን ልኮ የኄሮድስን ቤት አስፈረሰ ጥሪቱን ሁሉ ወሰደ ለሚያየውም ሁሉ አርአያና ተረት ሆነ ያለ ያለ ጣሪያና ያለ ደጃፍ ቀርቷልና ቤቱ ነጋዲዎችም መነሃሪያ አድርገው ያድሩበት ነበር::

በዚያም ወራት በገንዘብ ድኆች በሃይማኖት ባለጸጎች የሆኑ ሁለት ሰዎች ነበሩ:: እነርሱም ሊሰግዱ የከበረች የአርባ ቀን ጾምንም ሊጾሙ ወደ ኢየሩሳሌም ተጓዙ ይህም ከብዙ ዘመን በኋላ ነው::

እነዚህም ሰዎች ምሽት በሆነ ጊዜ ምድረ በዳ በሆነ በኄሮድስ ቤት ውስጥ አደሩ:: ቅዱስ ዮሐንስም ከእርሳቸው ለአንዱ በሕልም ተገለጠለትና የከበረች ራሱ ያለችበትን ቦታ አስረዳው ወደ ቤትም ተሸክሞ ይወስዳት ዘንድ አዘዘው::

ከእንቅልፉም በነቃም ጊዜ ራእይን እንዳየ ራሱ በዚህ ቤት ተቀብራ እንዳለች ነገረኝ ብሎ ለባለንጀራው ነገረው::

በራእይ ቅዱስ ዮሐንስም እንዳመለከተው ወደዚያ ቦታ ተነስተው ሔዱ:: በቆፈሩም ጊዜ የሸክላ ዕቃ አግኝተው ከፈቷት ያንግዜ እጅግ የሚመስጥ በጎ መዓዛ ወጣ:: የቅዱስ ዮሐንስንም ራስ አገኘዋት ደስ አላቸው ከእርሷም ተባረኩ ወደ ሸክላውም ዕቃ መለሱትና በፊት እንደነበረ አፉን ዘጉ ያም ሰው ከእርሱ ጋር ወደ ቤቱ ወሰዳት ታላቅ ክብርንም አከበራት ሁል ጊዜም የሚያበሩ መብራቶችን በፊቷ አኖረ::

የቅዱስ ዮሐንስ ራስም ታላላቅ የሆኑ  ተአምራትን አደረገች:: እነርሱም አክብረው መብራት እያበሩለት አከበረቱ::

ለእግዚአብሔር ምስጋና ይሁን እኛንም መለኮትን በአጠመቀ  በከበረ ዮሐንስ ጸሎት ይማረን ልዩ የሆነቾ በረከቱም ከእኛ ጋር ትኑር ለዘላለሙ አሜን::

በእግዚአብሔር ቸርነት በየካቲት ወር የሚነበበው ምንባብ ደረሰ ተፈጸመ:: ተመስገን እንደ ኃጢአታችን ብዛት እንደበደላችን ክፋት ሳይሆን የተባረከችውን የየካቲት ወር በሰላም አስፈጸመን::

ለእግዚአብሔር ምስጋና ይሁን የነቢያት የሐዋርያት የጻድቃን የሰማዕታት የደናግላን የመነኰሳትም የቅዱሳን መላእክትም በረከታቸው አምላክን የወለደች የእመቤታችን የቅድስት ማርያምም በረከቷ በአገራችን ኢትዮጵያ በሁላችን የክርስቲያን ወገኖች ላይ ይደር ለዘላለሙ አሜን::
🇪🇹@ethiopianorthodoxs⛪️⛪️

የዕለቱ መልእክት ሮሜ 12
1፤ እንግዲህ፥ ወንድሞች ሆይ፥ ሰውነታችሁን እግዚአብሔርን ደስ የሚያሰኝና ሕያው ቅዱስም መሥዋዕት አድርጋችሁ ታቀርቡ ዘንድ በእግዚአብሔር ርኅራኄ እለምናችኋለሁ፥ እርሱም ለአእምሮ የሚመች አገልግሎታችሁ ነው።

2፤ የእግዚአብሔር ፈቃድ እርሱም በጎና ደስ የሚያሰኝ ፍጹምም የሆነው ነገር ምን እንደ ሆነ ፈትናችሁ ታውቁ ዘንድ በልባችሁ መታደስ ተለወጡ እንጂ ይህን ዓለም አትምሰሉ።
🇪🇹@ethiopianorthodoxs⛪️

አባ መርትያኖስ :-
አንድ አምላክ በሚሆን በአብ በወልድ በመንፈስ ቅዱስ ስም የካቲት ዐሥራ ዘጠኝ በዚች ቀን ዕለት የተጋዳይ መነኰስ የአባ መርትያኖስ ሥጋው ከአቴና አገር ወደ አንጾኪያ የፈለሰበት ሆነ::

ይኽም ታላቅ ፃድቅ ከልጅኑቱ ጀምሮ በቅድስና ሕይወት ያጌጠ ነው። ሐመረ ኖኅ ከምትባል ገዳም ገብቶ መንኩሶ 67 ዓመት ኖረ።

ምግባር ሃይማኖቱ ገድሉና ትሩፋቱ በቦታው ሁሉ  በተሰማ ጊዜ አንዲት በክፉ ሥራዋና በዝሙቷ የታወቀች ኃጢአተኛ አመንዝራ ሴት ቅድስናውን ሰማች። እርሷም መልኳ እጅግ ያማረ ነበር።

ይህችም ሠነፍ ይህን መልኳን ታብያ ፅድቁንና ቅድስናውን ለሚመሰክሩ ሰዎች እንዲህ አለቻቸው "እናንተ ታመሰግኑታላችሁ እርሱ የሚኖረው በዱር ነው የሴት ፊት አይቶ አያውቅም እኔን ቢያይ ግን ድንግልናዋን አጥፍቼ ቅድስናውን አረክስበታለሁ" አለቻቸው።

ልትፈትነውም በጨለማ ወደ በዓቱ ሔደች በሩንም እያንኳኳች "አውሬ ሊበላኝ ወንበዴ ሊደፍረኝ ነው አድነኝ ተቸገርኩ አሳድረኝ" አለችው።

እርሱም ባስገባት ሴት ናት ልትፈትነኝ ነው ባላስገባት እንግዳ ሆኜ አልተቀበልከኝም የሚለው ቃልን አሰበ።

የጌታን ቃልስ ከምሽርስ ፈተናውን ብቋቋም ይሻላል ብሎ አስገባት። እርሷም በኃጢአት ልትጥለው በወደደች ጊዜ ልብሷን አወላልቃ ና እንተኛ አለችው ይህም አባት እሺ መኝታውን ላዘጋጅ ጠብቂኝ ብሎ ከምድጃው ላይ እሳት እያፈሰ መሬት ላይ እንደምንጣፍ አንጥፎ እሳቱ ላይ ተኛ።

እርሷም አይታ እሳቱ እያቃጠለው በእሳቱ ላይ ሲተኛ አባቴ እሳቱ እያቃጠለህ ነው ብትለው ያኛው እሳት ከዚህ እሳት ይበልጣል በማለት የሲዖልን እሳት ከዚህኛው እሳት እያነፃፀረ ቢነግራት ልቦ ተነክቶ ንስሐ ገባች።

እርሱም መንኵሳ በገድል እስከ ተጸመደች ድረስ ስቦ ወደ ንስሓ መልሷታል::

ይህች ሴት ይህን ቅዱስ አስተዋለው ብላ ተወራርዳ ነበር እንግዳ ሁና ከበአቱ የገባችው ነገር ግን በፍጹም መንፈሳዊነት ድል ነሳት:: ተጸጽታ ንስሐ እስክትገባም አልተዋትም::

አስተምሮ አሳምኖ በገድል ተቀጥቅጣ ብትመነኵስ በአቱን ጥሎላት ሔደ::

ከዚህም በኋላ መኖሪያውን ትቶላት ከሀገር ወደ ሀገር የሚዞር ሆነ ከአቴና አገርም ደርሶ በዚያ ጥቂት ቀን ኖረ ጥቂትም ታመመና በሰላም አረፈ::

በዚህ ዘመን ፈተናው ወደ እኛ መጥቶ ሳይሆን እኛ ሔደንበት እንወድቃለን:: የኛን መንፈሳዊነት ተመልክተው ወደ እግዚአብሔር ይመራኛል ብለውንም ሲቀርቡን ብሶብን ስንሰነካከል ብዙዎችን ከሃይማኖት በአፋ አስወጥተናል ይቅር ይበለን::

መንፈሳዊነት ትጋት መንፈሳዊነት ፆም ፀሎት ይፈልጋል ያለ ትህትና እና ያለ መንፈሳዊነት ማንንም መመለስ አይችልም።

ለእግዚአብሔርም ምስጋና ይሁን እኛንም በጸሎቱ ይማረን በረከቱም ከእኛ ጋር ትኑር ለዘላለሙ አሜን::
🇪🇹@ethiopianorthodoxs⛪️⛪️

ዘወረደ
እንኳን አደረሳችሁ!
ዘወረደ ማለት "ከላይ የመጣ፣ የወረደ'' ማለት ነው። ቅድስት ቤተ ክርስቲያናችን "ዘወረደ እምላዕሉ አይሁድ ሰቀሉ ወሚመ ኢያእመሩ እግዚአ ኩሉ ዘየሐዩ፤ አዳምን ለማዳን ከሰማይ የወረደውን አምላክ አይሁድ ሰቀሉት፤ የሰማይ ሥልጣን ያለው የሁሉ ጌታ እንደሆነም ምንም አላወቁም" እያለች በሰንበት ዋዜማ ዜማውን መሐትው (መግቢያ) አድርጋ የሳምንቱን ዜማ በማስተጋባት የጌታችንን ከሰማይ መውረድ ታመሠጥርበታለች፤ ታመሰግንበታለች። (ጾመ ድጓ፥ ዘዘወረደ ዋዜማ)
ይህን ሳምንት በልዕልና በዘለዓለማዊ ቅድስና እና በማትመረመር ጥበብ ራሱን ሰውሮ የሚኖር አምላክ በገሃድ ለሰው ልጅ የተገለጠበትን፣ ዘለዓለማዊ አምላክ ሰውን ከተደበቀበት ለመፈለግ ብሎ ''ኦ አዳም አይቴ ሀሎከ- አዳም ሆይ ወዴት ነህ" እያለ በማያልቅ የፍቅር ድምፅ ፍለጋ ወደ ዱር (ወደ ዓለም) የገባበትን ሳምንት የምንዘክርበት ነው። አምላካችን እግዚአብሔር የሰውን ልጅ ምን ያህል በበዛ ፍቅሩ እንደሚፈልገው፣ ከፍ ላለ ዓላማውም እንዳጨው ያሳየበት፣ ከሁሉም ደግሞ በሕሊና ሊታሰብ የማይችለውን የሰማይ አኗኗሩን ትቶ በሚታይ የአዳም ሥጋ የተገለጠበት፣ መጋረጃው እሳት፣ ዙፋኑ እሳት፣ ልብሱ እሳት የሆነው አምላክ በሚበሰብስ ሥጋ የተገለጠበት፣ በጨርቅ፣ ያንን የሚያስደነግጥ መለኮታዊ ክብሩን ስለ ሰው ልጅ መዳን ተጨንቆ በሕፃን አምሳል ተገልጦ በበረት የተገኘበትን ሳምንት እናስብበታለን። ቅዱስ አትናቴዎስ የእግዚአብሔር ልጅ ለሰው ልጅ ድኅነት ሲል መወለዱን እንዲህ በማለት ይገልጠዋል፡፡ "ለዚሁ ዓላማ (ለሰው ልጅ ድኅነት) የማይበሰብስ፣ የማይሞት አካል ያለው የእግዚአብሔር ልጅ ወደዚህ ዓለም ገባ" (On the Incarnation: Saint Athanasius page 6)
ዘወረደ ከዚህ ትርጉም ባለፈ የአዳም ሳምንት ተብሎ ይጠራል። አዳምን ከጠፋበት ሊፈልግ፣ ከወደቀበት ሊያነሣ፣ ከገባበት ሊያወጣ የትንቢቱ ጊዜ በደረሰ ሰዓት ከብላቴናይቱ ድንግል ተወልዶ ተስፋ አዳም ተፈጽሞበታልና። “ነገር ግን የዘመኑ ፍጻሜ በደረሰ ጊዜ እግዚአብሔር ከሴት የተወለደውን ከሕግም በታች የተወለደውን ልጁን ላከ፤" እንዲል ሐዋርያው ቅዱስ ጳውሎስ (ገላ.፬:፬)።
ሠለስቱ ምዕት በጸሎተ ሃይማኖት "ዘበእንቲአነ ለሰብእ ወበእንተ መድኃኒትነ ወረደ እምሰማያት፤ ተሰብአ ወተሰገወ እመንፈስ ቅዱስ ወእማርያም እምቅድስት ድንግል፤ ስለ እኛ ስለ ሰዎች እኛን ለማዳን ከሰማይ ወረደ በመንፈስ ቅዱስ ግብር ከቅድስት ድንግል ማርያም ፍጹም ሰው ሆነ" (ጸሎተ ሃይማኖት) እንዲሉ በሥጋ የአዳምን ዘር ለማዳን ሰው ሆኖ ለአዳም የገባውን ኪዳን ፈጸመ። የሥጋ ዘመዳችንም ሆነ። (ሃይማኖተ አበው ዘቅዱስ ጎርጎርዮስ)
ሌላኛው ይህ ሳምንት ጾመ ሕርቃል በመባል ይታወቃል። ይህም በ፮፻፲፬ ዓ.ም የፋርስ ንጉሥ ኪርዮስ ኢየሩሳሌምን ወርሮ፣ አብያተ ክርስቲያናትን ዘርፎ እና መዝብሮ ክርስቲያኖችን ማርኮ ንግሥት ዕሌኒ ካሠራችው ቤተ መቅደስ የክርስቶስን መስቀል ዲያቆናትን አሸክሞ በምርኮ ወሰደ። ከምርኮ ያመለጡ ክርስቲያኖች ወደ ሮሙ ንጉሥ ከ፲፬ ዓመት በኋላ በ፮፻፳፰ ዓ.ም ለንጉሥ ሕርቃል ጩኹታቸውን ያሰማሉ፤ እርሱም በፋርሱ ንጉሥ በኪርዮስ ላይ ድል አግኝቶ መስቀሉን መለሰላቸው። በሕገ ቤተ ክርስቲያን ‹‹ሰው የገደለ ዘመኑን ሁሉ ይጹም›› የሚል በሐዋርያት ስለተደነገገ የንጉሡን ዕድሜ ተከፋፍለው አንድ ሳምንት ደርሶባቸው ስለ ንጉሡ ጾመወለታል፤ በዚህም የእርሱ መታሰቢያ ይሆን ዘንድ ይህ ሳምንት ጾመ ሕርቃል በመባል ይጠራል። እኛም ይህንን ዋቢ አድርገን እንጾማለን። (ምንጭ፡- ስንክሳር ዘወርኀ መጋቢት ፲)
ዘወረደ ከአርብዓው ዕለት የሚካተት ባይሆንም ቤተ ክርስቲያን ትእዛዝ አድርጋ ከአርብዓው ዕለታት ጋር ደምራ እንድንጾም ሕግ ሠርታለታች። እኛም እንደ ፈቃድ ሳይሆን እንደ ትእዛዝ ተቀብለን እንጾማለን።

ቅዳሴ፡- ቅዳሴ እግዚእ

"ዘበእንቲአነ ለሰብእ ወበእንተ መድኃኒትነ ወረደ እምሰማያት፤ ተሰብአ ወተሰገወ እመንፈስ ቅዱስ ወእማርያም እምቅድስት ድንግል፤ ስለ እኛ ስለ ሰዎች እኛን ለማዳን ከሰማይ ወረደ በመንፈስ ቅዱስ ግብር ከቅድስት ድንግል ማርያም ፍጹም ሰው ሆነ፡፡" ወንጌል (ዮሐ.፫፥፲-፩፬)
ምስባክ ዘነግህ:- (መዝ.፪፥፲፩) "ዘበእንቲአነ ለሰብእ ወበእንተ መድኃኒትነ ወረደ እምሰማያት፤ ተሰብአ ወተሰገወ እመንፈስ ቅዱስ ወእማርያም እምቅድስት ድንግል፤ ስለ እኛ ስለ ሰዎች እኛን ለማዳን ከሰማይ ወረደ በመንፈስ ቅዱስ ግብር ከቅድስት ድንግል ማርያም ፍጹም ሰው ሆነ"
ምስባክ ዘቅዳሴ:- (መዝ.፪፥፲፩) “ተቀነዩ ለእግዚአብሔር፤ ወተሐሠዩ ሎቱ በረዓድ፤ አጽንዕዋ ለጥበብ ከመ ኢይትመዐዕ እግዚአብሔር፤ ለእግዚአብሔር በፍርሃት ተገዙ፤ በረዓድም ደስ ይበላችሁ፤ ጌታ እንዳይቆጣ ተግሣጹንም ተቀበሉ፡፡”
መልእክታት:-
ሠራኢ ዲያቆን ዕብ.፲፫፥፲፯
ንፍቅ ዲያቆን ያዕ. ፬፥፮- ፍጻሜው
ንፍቅ ካህን የሐዋ. ፳፭፥፲፫-ፍጻሜ

ስብሐት ለእግዚአብሔር፤ አሜን!