كتابة المحتوى🔥🤍

طوري نفسك يا بنتي، افتحي أفقك، أنتِ فاكرة إنك دلوقتي في فترة الاستمتاع بالحياة؟

اللي قالك كده غلط في حقك، أنتِ في فترة بناء نفسك عشان بعد ال 35 تستمتعي بالحياة، اللي هتستمتع دلوقتي، هتاخد على دماغها بكرة.

واللي هتطور نفسها دلوقتي هتعيش باشا بإذن الله سبحانه وتعالى، اشتغلي على نفسك واسألي الله من فضله، انجحي دنيا ودين وشوفي ربنا هيعملك ايه.

د/ حازم شومان

الفترة اللي فاتت كتير كانوا بيبعتولي إن ChatGPT بقى يظهر اسمي من ضمن الاقتراحات للناس اللي عاوزة كورسات كتابة المحتوى 🤭

وبما إن المرة دي بردو اتبعتلي كده، فنوثقها هنا بقى عشان دي حاجة تستاهل فعلًا التوثيق، الحمدلله. 🤍

#Esraa_Shehta ✍️

تعرف إن عادة العظماء هي التدوين!

عادة التدوين كانت منتشرة جدًا زمان واللي كتير من العظماء كانوا بيستخدموها زي ماركوس أوريليوس، وابن الجوزي، وغيرهم كتير. 🤍

والجدير بالذكر إن تم جمع أفكارهم المدونة في كتب معروفة جدًا زي كتاب Meditations (التأملات)، وكتاب صيد الخاطر.

طيب ازاي أبدأ في التدوين وأنا أصلًا مش بعرف أكتب؟

الكتابة ما هي إلا مهارة بتيجي بالتعلم والممارسة والاستمرارية.👌

يعني مينفعش موهبة بدون ممارسة. ❎
لازم موهبة + ممارسة. ✅
أو تعلم من الصفر + ممارسة. ✅

هتجيب ورقة وقلم وتبدأ تكتب أي أفكار تيجي في بالك، أو ممكن تقرأ كتاب، أو مقالة، أو بوست مفيد وتطلع منهم أهم المعلومات اللي شايفها، أو أكتر حاجة شدتك.🤞

ممكن تبدأ تكتب يومياتك وأهم الأحداث اللي بتحصل في يومك، اعتبر النوت بوك بتاعتك هي صديقك واكتب كل حاجة فيها عاوز تحكيها لحد مثلًا ومش عارف.

بعد استمرارك على الطريقة دي هتحس بعدها بفرق رهيب في يومك وهتشكر نفسك بعدين إنك واظبت عليها. 🤍

#Esraa_Shehta ✍️

كنت بتعامل مع بنت في شغل وبعدين قُلتلها كده هيبقى حسابك كام؟ 👀

فالبنت قالت رقم قليل، فقُلتلها لأ ده قليل، والمفروض تاخدي أعلى من كده، وبالفعل اتفقت معاها إن حسابها كل مرة يكون برقم معين أعلى من اللي هي قالته.

وأنا بتعامل معاها في الموقف ده، افتكرت إن كان فيه واحدة منزلة بوست إنها لما قالت للعميل رقم قليل، اتعامل معاها بشكل وحش وقالها إنها مش شاطرة ولا بتفهم حاجة! 😶

وحقيقي يعني أنا مش فاهمة ليه الناس تعمل كده؟ ما ممكن الشخص ده مش عارف يسعر بشكل كويس! أو هو محتاج الشغل فبينزل شوية من السعر عشان يقدر يشتغل ومحدش من حقه أبدًا يقلل من حد.

دايمًا عندي اعتراض على التفكير بتاع إن أنت سعر شغلك عالي، يبقى أنت شاطر وبتفهم، غير كده يبقى لأ مبتفهمش! أتمنى تفكير الناس يتغير لأنها مبتتحسبش كده، أنا مثلًا دايمًا بقولكوا إني إسراء الغلابة وبقلل عشان أساعد الناس. 😂

غيري ممكن يكون مش عارف يسعر، أو محتاج الشغل، أو بردو هدفه يساعد الناس، فنتعلم منحكمش على حد، وعاوزة أقول بقى إن البنت دي خدت منها شغل حلو جدًا وبجد يستاهل. 🤍

#Esraa_Shehta ✍️

لأني الحمدلله مبسوطة النهاردة، قررت أفرحكم معايا 🥳

فيه خصم 50%، وهو خصم محصلش قبل كده على كورس كتابة المحتوى، بس الخصم ده لمدة ساعتين اتنين بس وبعد كده هيرجع لسعره الأصلي تاني إن شاء الله.

أعتقد فرصة عمرها ما هتتعوض تاني تقريبًا، فيا ترى مين سعيد الحظ اللي هيلحق نفسه في الساعتين دول؟ 🤭

#Esraa_Shehta ✍️
#Learn2_Earn

يا شيخ بضيع صلاة الفجر ومش عارف أعمل ايه؟

ج/ طيب وبعدين هتقابل ربنا بأربع فروض بس! هتفضل كده يعني ولا اليأس ده هيعملك إيه؟

يا أخي استعين بالله إنه يصحيك، أنت ضعيف، قل له يارب صحيني أصلي فرضك يارب، أنزل حاجتك بالله،
خذ من التدابير مثل النوم بدري، ضبط منبه، تقول لحد يصحيك، كل أكل بسيط على العشا، واتأكد إن رأى الله منك الصدق أعانك وأيقظك.

سبحانه أن يرد عبد طالب طاعته، ولكن اصبر علي نفسك وجاهدها، فالجنة والنظر إلى وجه الله يستحق هذا التعب.

الشيخ سمير مصطفى

قال الله تعالى: "وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ"

الفترة اللي فاتت رفضت فرص كتير أوي مهمة بسبب مبادئي، وكل مرة يتبعتلي حاجة ألاقيها غير مناسبة فبرفض.

فيه فرصة فيهم العميل قالي إني أستخير وإني هكون إضافة مميزة لهم وإنه عارف إني شاطرة ومتمسك بيا جدًا.

قُلتله تمام وربنا يعمل اللي فيه الخير، وبردو وقتها رفضت، عاوزة أقول بقى بعد كل الرفض ده، ربنا عوضني ورزقني بفرص مهمة جدًا مكنتش أتخيل إنها هتيجي بالشكل ده، الحمدلله.

عمرها ما كانت بحساباتنا فعلًا، خليك عارف إن رزقك مكتوبلك وكده كده هيجي، يبقى يجي بالحلال أحسن عشان تقدر تقابل ربنا وأنت مطمن وعارف هتقوله ايه.

#Esraa_Shehta ✍️

بفضل الله شغالين في Your Dream على مشروع جديد مهم جدًا للأمهات وتربية الأطفال 🤞

وازاي يتصرفوا في مواقف معينة وحاجات كتير إن شاء الله هتفرق كتير في تغييرهم للأفضل، وكمان هيكون فيه قصص يومية وتجارب للأمهات.

فلو فيه ناس عاوزة تقول تجاربها وقصصها بناءً على أسئلة ونقاشات، فادخلوا الجروب من هنا 👇

https://chat.whatsapp.com/JMFjnle9iqN6Xv0afzEDgp

هنتناقش، ونتكلم، وهيكون فيه محتوى هادف ونصائح، بس المحتوى مش هينزل هنا، المحتوى هينزل على الصفحة الخاصة بالشغل، قريب هعلن عنها هنا بردو إن شاء الله. 🤍

#Esraa_Shehta ✍️

أول ما ألاقي نفسي ببدأ أقارن بيني وبين حد بفكر نفسي بالكلام ده:

📌 ظروفنا مش واحدة.

📌 قدراتنا مش واحدة.

📌 الموارد المتاحة مش واحدة.

📌 قوة تحملنا للألم والصعوبات اللي بنمر بها مش واحدة.

📌 ممكن أكون أنا أفضل من غيري في جوانب تانية كتير، ومينفعش أقارن وأبص على جانب واحد بس.

لما بفكر نفسي بالخمس نقاط دول بحس إني ارتاحت، وإن مش مهم مين سابقني، لو هقارن فعلًا يبقى أقارن نفسي النهاردة بنفسي امبارح، ووقتها بعرف الفرق وبحمد ربنا على جميع نعمه. 🤍

#Esraa_Shehta ✍️

النهاردة بفضل الله كملت سنة بالخمار 🥳

زي النهاردة قررت أنزل أشتري 3 خمارات، ولبست واحد فيهم وخرجت عشان ألزم نفسي به.

أنا كل لبسي كان جيب ودريسات واسعة، ومازلت الحمدلله، بس كنت عارفة إن الخمار هو الحجاب الشرعي مش الطرحة، وكان فيه صراع بيني وبين نفسي إني عاوزة أرضي ربنا ويكون لبسي كله صح، بس في نفس الوقت ممكن يبقى شكلي مش حلو بالخمار ويكبرني، فاضطر أرجع للطرحة تاني، فيبقى حرام عليا، وطبعًا كلها أفكار غلط الشيطان بيقنعنا بها. 👌

فضلت سنة وأكتر في الصراع ده لحد ما قررت أنزل بوست وأقول فيه إني عاوزة ألبس الخمار ومترددة، وخليت البنات اللي لابساه تقول حاجة تخلينا نحبه، وبالفعل ده اللي حصل وبنات كتير كتبوا كلام حلو عنه، ومن هنا اتشجعت وتاني يوم الصبح كنت اشتريتهم خلاص ولبست واحد فيهم.

أنا بدون مبالغة عمري ما ندمت أبدًا إني لبست الخمار، رغم إني كنت بعاني معاه كتير في لفة وكنت بقعد ساعة كاملة عشان أعرف ألفه صح، وبعد كل ده أوقات كان بيفك مني بردو في الطريق! 👀

بس طبعًا حاليًا الحمدلله توصلت للفة كويسة وفي نفس الوقت شيك عشان الناس اللي بتحب الشياكة بردو. 😂

أنا بحبه جدًا وببقى فخورة بيا وبشكلي وأنا لابساه، وعلى فكرة مكبرنيش ولا حاجة؛ لأن بردو مازالت الناس بتشوفني صغيرة، وبتفكرني طالبة لسة.

أوقات بقعد مع نفسي كده وبستغرب ازاي كل السنين اللي فاتت دي كنت بلبس طرحة عادية! إحساس إني بعمل حاجة ترضي ربنا ده يستاهل جدًا جدًا. 💯

أتمنى أفضل ملتزمة به طول عمري وأفضل أحبه الحب الكبير أوي ده اللي مهما قلت مش هقدر فعلًا أعبر عنه.

يمكن الناس تشوف ده مبالغة مني، بس والله ده إحساسي فعلًا، وببقى عاوزة أكون طول الوقت لابساه وحابة شكلي به أوي أوي. 🥹

مش عارفة هل عشان دي دعوة دعيتها لربنا إنه يحببني فيه ولا ايه، بس كل اللي أعرفه إني مندمتش ولا هندم أبدًا عليه، ربنا يثبتني ويهديني ويهدينا جميعًا دايمًا لما فيه الخير. 🤍

#Esraa_Shehta ✍️

بفضل الله بقالنا شهرين شغالين في شركة Your Dream 🤭

أنا بتعلم إدارة أعمال ومنها ازاي أدير تيم بشكل كويس، وده شيء أساسي لأي حد عنده بيزنس وعاوز ينجحه.

وعاوزة أقول إني حقيقي مبسوطة جدًا إن ربنا بيرزقني بتيم بيحب الشغل وعنده ضمير في كل مرة بعمل فيها حاجة جديدة، سواء في Learn 2 Earn اللي بقالها سنة، أو Your Dream اللي بقالها شهرين بس. ✔️

فيه ناس موجودة في تيم Learn 2 Earn، وناس تانية في تيم Your Dream، والصراحة الاتنين أنا مبسوطة بهم جدًا، دايمًا بدعي ربنا يرزقني بالناس اللي شبهي، والحمدلله ده موجود فيهم.

ربنا يبارك في كل حد كويس وبيراعي ضميره، ومش واخد الشغل على إنه مجرد سبوبة وبس. 🤍

#Esraa_Shehta ✍️
#Learn2_Earn
#Your_Dream

احنا محتاجين نتقن العبادة؛ لأن ليس كل عبادة يُدخل بها إلى الله، إن الله طيب لا يقبل إلا طيبا.

د/ أحمد عبدالمنعم

بما إن الفلوس بتغير النفوس، والناس بتعادي بعض عشانها 👀

فتعالوا أقولكوا ازاي بتعامل مع فكرة الفلوس؟

أنا دايمًا بحط في بالي إن الفلوس مش بتيجي ليا من الشغل ولا العملاء، الفلوس بتيجي من ربنا، وهو اللي بعتهم ليا. 💯

عشان كده لما بتعامل مع حد كتيم معايا في الشغل وبيكون في ايدي إن أنا اللي ادي المرتبات، بقول أنا هكرمهم عشان ربنا يكرمني، وربنا اللي باعتني لهم مش بشطارتي خالص.

وده اللي مخليني قادرة أعيش بفكرة إن الفلوس رزق من عند ربنا، ده غير إنها وسيلة عشان نقدر نعيش في الدنيا ونعبد ربنا حق عبادته، وعمرها ما كانت غاية. ✔️

اللي بيشتغل على الآخرة هو الأسعد والأربح، أتمنى تطبقوا ده أنتوا كمان وساعتها هترتاحوا.

وأتمنى أنا كمان أفضل بالتفكير ده علطول عشان لما أروح لربنا أبقى عارفة هقوله ايه. 🤍

#Esraa_Shehta ✍️

أول حد هيخمن صح هيكون له هدية حلوة، سواء مشترك معانا في الكورس أو لأ.

ها مين هيلحق فرصته؟ 🤭

https://www.facebook.com/100072123933800/posts/pfbid0NtjCqh7ax6Way5R3GyZudqDz8LrWkgv1HruNkvTzuQCEYtStnKAzvuksPwBVn6Nil/

أعمل ايه؟ 🤔

ساعات بحس إن قلبي طاير في السما وحابب أصلي وأتصدق وأعمل كل أعمال الخير.

لكن أوقات تانية بحس إن الطاعة تقيلة أوي على قلبي وسهل جدًا إني أعمل الذنوب، ايه الحل وازاي أتخلص من الإحساس ده؟ 😔

كنت بتفرج على بودكاست كيف الطريق ل د/ حازم شومان ولقيت إجابة جميلة جدًا للسؤال ده.

د/ حازم قال إن فيه صراع كبير بين الإنسان ونفسه، طبيعي إن نفسيتك عايزة تعيش وعايزة تتبسط وعايزة تفك، ملهاش دعوة بقى باللي جوة بصيرتك بالفوز بالفردوس الأعلى والفوز برضا الله، فيه حد جواك ضد كل ده.

طيب أيوة مفهمتش بردو أعمل ايه؟ 👀

المطلوب منك إنك متخليش نفسيتك هي اللي سايقة، ربنا خلق جواك 3 حاجات وهما: فطرتك اللي عاوزة توصل لطريق ربنا، ونفسك اللي عاوزة ملذات الدنيا وبتشدك لتحت، وبينهم قلبك اللي شوية مع ده وشوية مع ده.

كل إنسان جواه الخير وجواه الشر، أنت تقدر تخلي نفسيتك دي وراك ومتخلهاش تنتصر عليك، خدها واحدة واحدة، ابدأ صلي، احفظ قرآن، ادعي لطريق ربنا، اعمل خير، يمكن تعمل ده في الأول بشكل متقطع، بس في الآخر هتظبط وهتقدر تتغير، مفيش حاجة بتيجي مرة واحدة؛ عشان كده لازم تاخدها بالتدريج.✔️

وأخيرًا، اصبر على نفسك ولو وقعت قوم اقف من تاني وخليك عارف إن الفشل أحد مكونات الخلطة السحرية للنجاح، وبعد كده هيكون عندك رصيد من الخبرات اللي يخليك قادر تتعامل مع كل ده بشكل كويس أوي، كلمة السر والحل هنا هي الاستمرارية.🤍

#Esraa_Shehta⁦ ✍️⁩

إذا أردت الدنيا فعليك بالقرآن، وإذا أردت الآخرة فعليك بالقرآن، وإذا أردتهما معًا فعليك بالقرآن.

د/ حازم شومان

الناس بتبقى مفكرة إن اللي بيرشحوني لأي حد بيسأل عن كورسات كتابة المحتوى دول أصحابي! 👀

ومبيكتشفوش إنهم متدربين حقيقيين معانا في الكورس وبيحكوا تجربتهم بكل صدق إلا لما يجربوا يدخلوا معانا ويشوفوا بنفسهم زي البنت دي كده.

أنا حقيقي عمري ما عملت فكرة التسويق بالعمولة ولا إن الناس يسوقولي خالص والجو ده، كل كلمة بتتكتب عني أنا مش ببقى عارفة عنها حاجة إلا لما أشوف المنشن وبتفاجئ زيكم. 🥹

فشكرًا لكل حد بيقدر مجهودي، وكل حاجة بعملها.

قولولي بقى لسة فاكرين إن اللي بيرشحوني دول أصحابي وأنا اللي دافعالهم! 😂

#Esraa_Shehta ✍️
#Learn2_Earn

10 دروس اتعلمتهم من بودكاست بهدوء ل د/ كريم إسماعيل 🤞

1- تأنى واصبر وخليك عارف إن الأحلام بتاخد وقت.

2- الاستغناء بالله، رزقك في ايد ربنا بس، فمتخافش بقى من عميل ولا HR ولا مدير؛ لأن ربنا هو اللي بيرزقك مش هما، اعمل شغلك على أكمل وجه وسيب الباقي على ربنا. ✔️

3- الشغل مش أهم شيء في الدنيا ولا هو الأساس، متجريش ورا كارير ولا فلوس ولا تخليها هدفك الأساسي، فيه حاجات كتير تانية لازم تحطها في حساباتك، الأسرة والعبادة هما القيمة الأولى، المال قيمة خدمية عليهم هما الاتنين، وحط في بالك إن الشغل بس وسيلة عشان تقدر تعيش في الدنيا صح وتوصل للهدف الأساسي وهو الجنة.

4- تخبط مستويات الأداء أمر طبيعي، وأنت بتقيم نفسك خليك عارف إن مستوى الأداء عندك مش لازم علطول يبقى في نفس الريتم، الرسول صلى الله عليه وسلم قال: "الإيمان يزيد وينقص".

وكذلك كل حاجة في الحياة، ومنها الإنتاجية، مفيش حد منتج طول السنة، حط ده في بالك عشان متفضلش تلوم نفسك دايمًا وتحس إنك مقصر، ده أمر طبيعي في الحياة عامةً. 💯

5- صاحب ناس بيحبوا الدين وقاعدتهم فيها اتصال بالوحي، اللي هو لأ مينفعش نعمل كده، لأ المفروض ربنا أمرنا بكذا، المفروض نتصرف كذا، وبكده هيخلوك تفتكر دايمًا الحلال والحرام وتطبقهم في حياتك.

6- ربنا اللي كتب القدر، وهو عليم حكيم، فمحدش هياخد رزقك، خلي تنافسك على الجنة مش على الشغل والجنيه، وأنت بتتنافس على الجنة هتساعد زميلك، وهتحب الخير لكل الناس. 🤝

7- استسلم لله مش لدماغك عشان تعرف تعيش مرتاح نفسيًا، مش الحاجة اللي حصلت دي من عند ربنا فوق! خلاص تمام أنا راضي ومسلم أمري لله وهو يفعل ما يشاء.

8- خلي النبي صلى الله عليه وسلم أهم شخص في حياتك، اقرأ سيرته، اتعلم عنه واقتدي به في كل أمور حياتك. 👌

9- اصبر على الآخرين واحتسب الأجر، وخلي في رحمة بينك وبينهم، وحط في بالك إن ده ممكن يكون اختبارك في الدنيا، بس في نفس الوقت احمي نفسك قدر المستطاع.

10- خليك عارف إن كل حاجة عندك من الله واستشعر نعمه عليك، أنت مش شاطر، ربنا هو اللي خلاك شاطر، أنت مش عندك قبول، ربنا اللي زرع الحب في قلوب الناس تجاهك، أنت مش بتاخد قرارات صح، ربنا هو اللي بيوفقك لها، وهكذا. 🤍

#Esraa_Shehta ✍️

فيه ناس الليلة هتجيب آخرها في معصية ربنا؛ لأنها ليلة الكريسماس، وناس هتجيب آخرها في طاعة الله؛ لأنها أول ليلة في رجب.

فيه ناس الليلة مهددة بسخط الله، وناس هتنال رضا الله والفردوس الأعلى بسبب طاعة ربنا في طلعة رجب.

د/ حازم شومان

كثرة سماع القرآن يرمم النفس البالية، ويجمع القلب المشتت، ويملأ الجوف الفارغ، سبحان الله، وكأن القرآن يسري بداخلنا ليبني ما هدمه الشيطان، وما حطمه الناس.

د/ أحمد العربي

كنت قاعدة متضايقة وحاسة إني مضغوطة في حاجات كتير، ده غير الماسدجات اللي بتتبعتلي وتضغطني أكتر 😶

بس ربنا خلاني أشوف الكلام ده اللي كنت كاتباه من 4 سنين عشان أعرف إن الضغط ده نعمة أنا كنت بتمناها، وإني المفروض أشوف كل حاجة بشكل إيجابي.

العملاء اللي بيبعتولي وكمان المتدربين، المفروض أحمد ربنا عليهم وعلى نعمة وجود الشغل، والناس اللي بيبعتولي يسألوني عن حاجات عشان بيحبوني وواثقين فيا، المفروض بردو أحمد ربنا على وجودهم ونعمة ثقة الناس فيا والأثر الإيجابي اللي ربنا أعطاهم ليا. 💯

ودول أمثلة صغيرة على حاجات كتير تانية تاعباني في حياتي، حقيقي الإنسان لو بص بس حواليه، هيلاقي نعم كتير أوي، أهلك، أصحابك، زوجتك وأولادك، شغلك، صحتك، الهوا اللي بتتنفسه، ولو فضلنا نعد مش هنخلص، وحتى المفقود واللي مش موجود معانا حاليًا أكيد رحمة من ربنا. ✔️

لو هتمنى حاجة، فأتمنى ربنا يرزقني الرضا والبصيرة اللي تخليني أتقبل وأصبر على أي حاجة بتحصل في حياتي، وأبقى عارفة إن أقدار الله كلها خير وإن ربنا بيختار ليا الأفضل حتى لو أنا مش شايفة ده، وحتى لو كان اللي بيحصل عكس كده.

لو ربنا كتب ليا العمر، فأنا أخري هنا 70، 80 أو حتى 90 سنة، وفي الجنة إلا ما لا نهاية، فأكيد هي تستاهل إني أصبر عشانها. 🤍

#Esraa_Shehta ✍️

ازاي بعدتِ عن الأفلام والمسلسلات يا إسراء؟ 🤔

افتحوا الصور 🤍🤞

#Esraa_Shehta ✍️

شغلت يومي ومبقاش عندي وقت أشوفهم أصلًا؛ لأن فيه حاجات أهم بكتير، وبقيت لو عاوزة أرفه عن نفسي أسمع قصص الأنبياء والصحابة والتابعين وأمهات المؤمنين. 🎧

الإنسان طبعًا بيحب القصص ودي أكتر حاجة بتشده، ومن هنا عرفت إن هي دي الاستفادة الحقيقية اللي كان لازم أعملها من زمان.

عشان كده جايبالكوا التجميعة دي عشان أنتوا كمان تستفادوا زيي، وتشوفوا الفرق بنفسكوا. 🤭

✳️ السيرة النبوية ل م/ أحمد عامر

لما تخلصوها تقدروا تتعمقوا أكتر من خلال السيرة النبوية ل م/ علاء حامد، ولو عاوزين حاجة سريعة وبشكل مبسط تابعوا سلسلة سيرة ل Hamad El Webari على اليوتيوب. 👌

✳️ قصص الأنبياء للشيخ نبيل العوضي

السلسلة دي هتفيدكوا جدًا لأنه بيشرحها مدعومة بصور فبيخلينا نتخيل الأحداث، ولما تخلصوها ممكن تتابعوا قصص الأنبياء ل م/ أحمد عامر، وقصص الأنبياء من بودكاست وعي.

✳️ سلسلة أصحاب رسول الله ل م/ أحمد عامر

قناة م/ أحمد عامر عبارة عن كنز بجد، تابعوا السلسلة دي من قصص الصحابة على قناته، وبعدها اسمعوا سلسلة الخلفاء الراشدين للشيخ نبيل العوضي. ✔️

✳️ قصص التابعين

اكتبوا على اليوتيوب كرتون قصص التابعين هيظهرلكوا، حقيقي استفدت منه حاجات كتير أوي وبدأت أطبقها في حياتي، الحمدلله.

✳️ قصص أمهات المؤمنين والصحابيات

أرشحلكوا هنا بقى سلسلة كوني مثلهن ل د/ هالة سمير، وهي بجد من الشخصيات البشوشة واللي أسلوبها جميل، وده اللي بيخلينا نحب نسمعها دايمًا. 💯

وأخيرًا، في حلقات بودكاست كتير أوي تقدروا تتابعوها في مختلف المجالات وكنت عاملة عنهم بوست بتجميعة قبل كده، بس حبيت إني أجمعلكوا المرة دي قصص؛ لأن أكتر حاجة كلنا بنحبها وبتشدنا هي القصص وبنتأثر بها، وبمرور الوقت إن شاء الله مش هتبقوا محتاجين ولا أفلام ولا مسلسلات ولا أي حاجة تبعدكوا عن طريق ربنا، وافتكروا دايمًا إن الجنة تستاهل. 🤍

#Esraa_Shehta ✍️

ابتلاؤك هيجي في الحاجة اللي أنت بتحبها وحاسس إنك مش هتقدر تعيش من غيرها، مش هيجي في الخمرة ولا في السجاير مثلًا، يابني ما أنت أصلًا مبتحبش الخمرة ولا السجاير، هيختبرك ف حاجة أنت مبتحبهاش ليه!

م/ أحمد عامر

إتقان ذكر الله يدخلك جنة الدنيا قبل الآخرة.

د/ أحمد العربي

ايه ده أنتِ إسراء اللي نزلتِ بوست المكتبة على جروب No Zero Days (Official)؟ 👀

أنا عرفت المكتبة وبقيت أروحها بسبب البوست بتاعك.

البوست ده وقتها انتشر جدًا سواء عندي أو على الجروب وناس كتير عرفتني منه، الحمدلله. 🤭

بس لو هبدأ من الأول خالص، فمعرفتي ب no zero days كانت من 3 سنين، أول ما فكرة الجروب نفسها اتعملت، كنت وقتها في بدايتي بردو على السوشيال وفي مجال كتابة المحتوى ومكانش حد يعرفني لسة.

طبعًا 3 سنين بحالهم كافيين يغيروا حاجات كتير في حياتي، من أول البعد عن الموسيقى والأفلام والمسلسلات، لحد تطوير الذات وسماع البودكاست، والسيشنات اللي بعملها، والتأثير الإيجابي على الناس. ✔️

حرفيًا حياتي اتغيرت 180 درجة وأنا مبسوطة بالتغيير ده، اللي هو أنا ازاي قبل ال 3 سنين دول كنت عايشة! أنا معرفتش معنى إن الإنسان يعيش حياته صح إلا في الفترة دي.

وكل ده بفضل ربنا وكرمه طبعًا، وأكيد مفيش حد كامل، فأتمنى أتغير دايمًا للأحسن عشان لما أقابل ربنا أبقى عارفة هقوله ايه. 🤍


#Esraa_Shehta ✍️

يوم واحد بس يفصلنا عن بداية راوند جديدة في كورس كتابة المحتوى مع عيلة جديدة في Learn 2 Earn 🤍

وبما إن ناس كتير بعتتلي الفترة اللي فاتت ومكنتش عارفة أرد، فقررت إن أول 10 هيكلموني هعمل معاهم الواجب أوي أوي يعني، فيا ترى هتلحق تكون من أول 10؟ 👀

#Esraa_Shehta ✍️
#Learn2_Earn

جماعة، أنا خدت خطوة جديدة وعاوزة دعمكوا بقى 🥹

عملت قناة يوتيوب وإن شاء الله الفترة الجاية هنزل عليها فيديوهات الوايت بورد أنيميشن اللي بعملها.

هتلاقوا في الفيديوهات حاجات كتير إن شاء الله تفيدكوا، دين تلاقي، تطوير ذات مفيش مشكلة، كتابة محتوى يلا بينا، تسويق، كله كله. 🤭

ادخلوا بقى اشتركوا فيها من هنا 👇

https://youtube.com/@esraashehta7083?si=er5Q02-brsStOXFj

#Esraa_Shehta ✍️

فلوسنا أمانة 👌

سمعت بالصدفة كلام ل د/ أحمد العربي بيحكي فيه موقف إن بنت صغيرة في الشارع كانت بتطلب منه فلوس قالها لأ مش هديكِ، عارفة هتاخديها مني امتى؟ لما تجيبي حاجة وتبيعيها وأنا اشتريها منك.

وقال إنها بنت صغيرة ولطيفة، فكان بيحاول يخليها تفهم المعنى ده، فردت وقالتله يعني أنت مش هتديني فلوس؟ قالها لأ، فخربشته وجريت! 😶

وهنا كان بيأكد على إن المسألة والصدقة مينفعش حد يستعطفنا فيهم؛ لأن الناس دول بيجمعوا ثروات هائلة من الكلام ده، المفروض طالما قادرين يبقوا يشتغلوا. ✔️

وقال لازم نتأكد إن الفلوس اللي بندفعها رايحة في ايد فقير فعلًا يستحقها.

وحقيقي الحمدلله إن ربنا خلاني أسمع الكلام ده عشان الناس اللي في الشارع كانوا بيصعبوا عليا وكنت بديهم بسبب استعطافهم من باب الصدقة.

ودلوقتي عرفت مين فعلًا يستحق. 🤍

#Esraa_Shehta ✍️

غايبة عنكوا بقالي كام يوم بس راجعالكوا بتحديات مينفعش تفوتوها 👌

https://www.facebook.com/share/p/12BmnxdyS7o/

بما إننا داخلين سنة جديدة، فكان لازم يكون فيه خطة تغيير شاملة لجروب Learn 2 Earn والتحديات اللي بتتعمل عشان الكل يقدر يشارك فيها ومتكونش مقتصرة على كُتاب المحتوى بس.

دلوقتي أي حد يقدر يشارك في الهاشتاجات دي، وأي حد هيشارك ويكون من أكتر الناس المتفاعلة على الجروب هيفوز معانا إن شاء الله. 🥳

كل أسبوعين إن شاء الله هنعلن عن الفائزين، ونبدأ في هاشتاجات جديدة، وكل هاشتاج تقدر تشارك فيه لمدة يومين عشان يكون قدامك فرصة تشارك.

✳️ (الإثنين - الثلاثاء)

أول هاشتاج معانا في اليومين دول هو #أنا_مين

هتكتب بوست تعرفنا بنفسك فيه بالطريقة اللي تريحك، ومش مهم تكون عملت إنجازات كبيرة، المهم تكون فاهم نفسك صح وعارف قيمتها عشان تقدر تعبر عنها.

✳️ (الأربعاء - الخميس)

بما إننا داخلين على سنة جديدة، فكان لازم يكون فيه #أهدافي_في_السنة_الجديدة، واللي هتحكيلنا فيه عن أهدافك اللي بتسعى عشان تحققها في 2025 إن شاء الله، بحيث تكون بمثابة لمبة تنور أفكار لغيرك بأهداف يحطوها هما كمان في خطتهم إن شاء الله.

✳️ (الجمعة - السبت)

في اليومين دول معانا #متغلطش_غلطتي

هتحكيلنا غلطة عملتها ومش عاوز حد غيرك يقع فيها مع كام نصيحة كده اتعلمتها من الدرس ده.

✳️ (الأحد - الإثنين)

مع #موقف_عمري_ما_هنساه هتحكيلنا موقف مريت به وشايف إنه أثر فيك لدرجة إنك مش هتنساه عشان تشجع غيرك يعملوا مواقف حلوة هما كمان.

✳️ (الثلاثاء - الأربعاء)

بما إن معظم الناس حاليًا بتسعى لتعلم مهارات جديدة، في #مهارة_اتعلمتها هتشارك بمهارة بتحبها واتعلمتها وفادتك في حياتك، أو حتى لسة بتتعلمها، وبكده تعرف غيرك بالمهارات المتاحة والموجودة في سوق العمل.

✳️ (الخميس - الجمعة)

كل حد فينا جواه شخص عاوز يسافر ويتفسح ويتبسط، في #بلد_نفسي_أزورها هتشاركنا في بوست بالبلد اللي نفسك تزورها في المستقبل وبالنسبة لك حلم نفسك تحققه.

✳️ (السبت - الأحد)

كان لازم نختم التحدي بحاجة بتحبها ترجعلك ذكريات حلوة في حياتك؛ عشان كده معانا #صورة_بحبها، واللي هتشاركنا فيه بصورة بتحبها وشايفها ذكرى لطيفة في حياتك.

بعد الأسبوعين هنعلن عن الفائزين، ونبدأ في هاشتاجات جديدة وتحديات أكتر إن شاء الله.

هنختار 5 أشخاص، 3 منهم هيفوزوا بكورس كتابة المحتوى، و 2 هيفوزوا حسب اختيارهم ببلانر للسنة الجديدة أو مج حراري شيك يدفيكم في ليالي الشتاء الباردة. 🤭

منتظرة إبداعكم، أنتوا قدها. 💪

#Esraa_Shehta ✍️
#Learn2_Earn

ارحم نفسك شوية 🥹

تجربة جديدة بالوايت بورد أنيميشن. 🤍

#Esraa_Shehta ✍️

بما إن فيه ناس كتير عاوزة تسمع بودكاست ديني، ومش عارفة تبدأ بايه 🎧

فأنا من وجهة نظري لما برد على أي حد بيسألني، برشحلهم قناة م/ أحمد عامر؛ لأني شايفة إن القناة كلها كنز بجد، وممكن تخصصوا منها 3 سلاسل بس كبداية، وهم:

✳️ السيرة النبوية
✳️ مجالس القرآن
✳️ أصحاب رسول الله

جربوا تبدأوا بهم، وبمرور الوقت هتلاحظوا تغيير كبير في شخصيتكوا وتصرفاتكوا وحياتكوا كلها للأفضل بإذن الله. 🤍

#Esraa_Shehta ✍️

كنت قرأت كومنت لواحد سوري بيحكي عن كرم واحد مصري 👀

قال إنه ضايفه وهداه ببيت وفلوس، وقاله البيت ده هتفضل قاعد فيه وملكك لحد ما ترجعوا بلدكم ولو حتى بعد ألف سنة، وكتب وصية قبل ما يتوفى لأولاده إن محدش يخرجهم من البيت.

وبعدها بقى لقيت كومنتات كتير بمواقف كتير حلوة من المصريين زي الموقف ده، وحقيقي الإنسان مبسوط وفخور إنه مصري وفيه ناس قلوبها جميلة كده. 🥺

فكون بقى فيه بنت من سوريا تبعتلي الماسدج دي، وتبقى مهتمة بالكورس للدرجة دي! ده يخليني أنا كمان أحاول أعمل موقف حلو السوريين بردو يفتكروني به، ويكون كمان بمثابة بمباركة برجوع أرضهم.

لو فيه أي حد متابعني من سوريا، ابعتولي ماسدج وهبعتلكوا مفاجأة حلوة أوي أتمنى تفتكروني بها دايمًا إن شاء الله. 🤍

#Esraa_Shehta ✍️
#Learn2_Earn

حجز استشارة ايه بس! أنتوا كده متعرفونيش 👀

أنا أي حد بيكلمني في أي وقت عادي وبرد بدون حجوزات ولا فلوس ولا أي حاجة من الحاجات دي.

اللي بقدمه الكورسات للمتدربين، وشغل التسويق أو فيديوهات الوايت بورد أنيميشن للعملاء، وده اللي شايفة أستحق آخد عليه فلوس لأنه شغلي. ✔️

لكن حد جاي ياخد رأيي في حاجة، ليه آخد فلوس؟ دي وجهة نظري، ومن حق كل حد يعمل اللي يريحه عادي، ده أنا لو رأيي ومساعدتي للناس بفلوس كان زماني بقيت مليونيرة. 😂

أنا عارفة إن فيه ناس كتير بتستغربني في النقطة دي، واللي هو ده مجهودك يا بنتي! لازم كل حاجة بحساب و.. و... وكذا حد قالي كده ونصحوني أقدر مجهودي، بس أنا شايفة إني جاية الدنيا مش عشان أصعبها على حد، أنا بحاول دايمًا أيسر كل حاجة لو بإيدي عشان ربنا ييسرها عليا، ويرزقني الجنة.

عارفة إن الحياة غريبة، وفيه ناس كتير مش بتقدر ده في الآخر، بس المهم إن ربنا عالم بده، وعالم إني بعمل كل حاجة ابتغاء وجهه والجنة. 🤍

#Esraa_Shehta ✍️

بما إننا في نهاية السنة 👀

قررنا نعمل مفاجأة لكل حد ناوي يكون معانا في الراوند الجديدة من كورس كتابة المحتوى إن شاء الله.

اكتب تم واستلم المفاجأة. 🥳

#Esraa_Shehta ✍️
#Learn2_Earn

ازاي تحول فكرة بسيطة لمقال احترافي؟ 🤔

عارف الفكرة اللي بتيجي في بالك فجأة وتقول يااااه دي فكرة جامدة جدًا، بس مش بتبقى عارف تبدأ منين؟

تعال أقولك تبدأ ازاي؟

أول حاجة تعملها إنك تدونها فورًا، سواء على ورق أو حتى نوت الفون بتاعك؛ وده لأننا كلنا عارفين لو متدونتش مصيرها هيكون فين! 👀

وقت ما تكون جاهز للكتابة، ابدأ ابحث عن الفكرة دي أكتر من خلال المنصات، سواء بقى مقالات على جوجل، بوستات على الفيسبوك، فيديوهات على اليوتيوب، أسئلة على كورا، أنت هنا بتحاول تجمع أكبر قدر من المعلومات عن الفكرة بتاعتك.

بعد كده جمع المعلومات اللي وصلتلها، وخليك محدد في الموضوع اللي عاوز تتكلم عنه ومتشتتش جمهورك بين أكتر من موضوع، وابدأ كتب بأسلوبك وبطريقتك أنت. ✔️

وخليك عارف إن المقال بيحتاج:

✳️ تخطيط وتنظيم.
✳️ عناوين فرعية وتقسيم فقرات.
✳️ مراجعة واهتمام بالتفاصيل.

الموضوع قد يبدو معقد عند البعض بسماع كلمة مقال، ولكن خليني أقولك إن مفيش حاجة صعبة ولا معقدة على الشخص اللي فاهم وعارف هو بيعمل ايه كويس، وده مش بيجي غير بالتعلم والممارسة، وأهم حاجة الصبر.

وده اللي هتتعلمه معانا إن شاء الله لو قررت تكون واحد من عيلة Learn 2 Earn الجديدة. 🤍

#Esraa_Shehta ✍️
#Learn2_Earn

أنا اعرف ناس خدت كورسات بألف واتنين وتلاتة، ويمكن أربعة كمان ومش ببالغ، ولسة ملقتش فرصة كويسة 👀

وناس تانية مخدتش كورسات مع حد واتعملت مع نفسها وربنا كرمها ماشاء الله.

طيب أقولكوا على حاجة؟ أنا مخدتش ولا كورس مدفوع في الكوبي رايتينج، وازاي أكتب الإعلان والمراحل اللي بيمر بها العميل، ازاي أعمل استراتيجي وبلان وكاليندر، كل ده تعلم ذاتي وطبقت مع نفسي؛ لأني شخصية بتحب جدًا التعلم الذاتي وبتعرف ازاي توظف ده لصالحها الحمدلله. ✔️

طيب هل بقول كده عشان أقولكوا متاخدوش كورسات مدفوعة؟ بالعكس؛ لأن أنا نفسي بدي كورسات مدفوعة، ودي أكيد بتختصر الطريق.

بس هل لو مش معاك فلوس للكورسات المدفوعة، تفضل قاعد حزين ومبتعملش حاجة ولا بتسعى حتى! أنت بتسعى وبتاخد بالأسباب والموضوع في الأول والآخر توفيق من ربنا. 💯

عشان كده أنا فخورة بالبنت اللي بعتتلي الماسدج دي، وإنها اتعلمت مع نفسها وخدت خطوات فعلًا واضحة وبتسعى، ربنا يرزقها ويرزقنا جميعًا التوفيق. 🤍

#Esraa_Shehta ✍️
#Learn2_Earn

كان الصالحون يستحيون من الله أن يكون يومهم مثل أمسهم، فيجتهدون للاجتهاد في عمل صالح جديد، فاحرصْ أن يكون يومك خير من أمسِك، ولو بزيادة تسبيحة واستغفار، أو صفحات وردك مِن القرآن، أو تنوي عمل خير.

يقول أحد طلاب الإمام أحمد:
"صحبته عشرِين سنة ما من يوم إلا وهو أفضل من اليوم الذي قبله".

د/ محمد الغليظ

مستغربين المتدربين بيحبوا الكورسات والتدريب مع Learn 2 Earn ليه 👀

اللي بنعمله مع المتدربين: 🤭👇

#Esraa_Shehta ✍️
#Learn2_Earn

بعد تعاقدنا في شركة Your Dream مع 3 مشاريع بفضل الله 🤭

عميلة كلمتنا وقالت إنها هتبدأ في عمل أكاديمية لتعليم القرآن.

وكانت محتاجة جرافيك ديزاينر تعملها اللوجو وصورة الغلاف للأكاديمية، وبالفعل قدرنا نوفرلها ده وطلع الشغل مظبوط، وعجبها الحمدلله، ودي النتيجة.

انتظروا الفترة الجاية شغل عظمة إن شاء الله. 🤍

https://www.facebook.com/share/p/1AXkWk3ML7/

#Esraa_Shehta ✍️
#Your_Dream
#مع_Your_Dream_هنساعدك_تحول_حلمك_لواقع

كنت في المواصلات وواحدة قالت مش معايا فلوس أدفع الأجرة 👀

كنت لسة هتكلم وأقول إني هدفعلها، لقيت الناس بتقول للسواق فيه واحدة مش هتدفع ياسطا، فالسواق رد رد غريب أوي! رد وقالها عادي متدفعش، ولو العربية كلها مش هتدفع معنديش مشكلة! وكان بيقول الكلام ده بنفس راضية جدًا.

دي مش طريقة السواقين، الأجرة بتكون 4 إلا ربع، وأي سواق تاني مش بيسيب ربع جنيه حتى! فضلت أفكر شوية أقوله إني هدفعلها، ولا أسيبه ياخد الثواب؟ وفي الآخر قُلت لنفسي خلاص هسيبه ياخد الثواب وربنا يجازيه خير على تصرفه، ويجازيني خير على نيتي. ✔️

واحنا في الطريق لقى 20 جنيه تقريبًا وخدها، والناس فضلت تقوله دي رزقك عشان سيبتها متدفعش الأجرة، فربنا راضاك بها.

طبعًا فيه خلاف على إنه ياخدها فعلًا، ولا يسأل عليها، أو يوديها جامع أو يتصدق بها، أو... أو.....

بس الموقف نفسه خلاني أستشعر اسم من أسماء الله، وهو الكريم، خصوصًا إنه عوضني وأكرمني أنا كمان بسبب نيتي بس إني أدفعلها مع إني مدفعتش! كان فيه مشكلة ورايحة خايفة إنها متتحلش وكل المؤشرات بتدل على كده، بس لقيتها اتيسرت واتحلت بقدرة ربنا، الحمدلله. 🤲

حقيقي عمالة أفكر في مواقف كتير عملت فيها خير وربنا رزقني أضعاف، وإن ربنا كريم أوي، والتجارة معاه دايمًا رابحة. 🤍

#Esraa_Shehta ✍️

طيب أنا القرآن هيهديني لغاية ايه؟

القرآن هيهديك حتى يجعل قلبك قلبًا ملائكيًا لا يستطيع المعصية، لا يستلذ بمعصية، لا يحسن أن يعصي الله.

د/ أحمد العربي

يلا بينا نحط مع بعض خطة السنة الجديدة بالتفصيل 🔥

بوست كنز وفيه معلومات كتير أوي هتفيدكوا إن شاء الله. 💯

📌 قبل ما نتعلم ازاي نخطط لازم نعرف إن احنا أها داخلين السنة الجديدة عندنا حماس وعاوزين نخطط صح ونحط أهداف جديدة ونعمل إنجازات ونحقق النجاح، ولكن نحط في بالنا إن احنا بشر ودي دنيا عادي مش جنة. 👌

📌 هنمشي أها على الخطط اللي هنعملها بس لو مرينا بموقف أو ظروف معينة، أو أي حاجة من الحاجات اللي بتحصل فجأة وغصب عننا وخلتنا نقف المفروض ساعتها ناخد وقت نرتاح فيه نفسيًا ونبقى أحسن ونرجع نكمل من تاني تحقيق أهدافنا وكل حاجة في حياتنا. 🤍

✅ نيجي بقى للموضوع الأساسي وهو التخطيط، ازاي نخطط صح للسنة الجديدة ونحدد أهدافنا؟

📌 لازم التخطيط من خلال كتابة الأهداف على ورق، مش مجرد أهداف في دماغنا وبس، بنكتب الأهداف ب 3 طرق حسب قدرة كل شخص:

1- هنشتري بلانر شكلها حلو وعاجبانا ونبدأ نكتب فيها أهدافنا.

2- أو هنصمم بلانر على كانڤا بشكل سهل وبسيط جدًا أو هنشوف حد مصممها وناخدها منه (أنا عاملة واحدة ابقوا قولولي وهبعتهالكوا إن شاء الله).

وبعدين هنروح أي مكتبة نطبعها على ورق عادي وال Cover على ورق كوشيه؛ لأنه بيكون أتقل شوية من الورق العادي.

3- أو هنجيب أي أجندة أو كشكول وأقلام فسفوري وندخل على بينترست ويوتيوب ونجيب افكار ونبدأ نخطط بنفسنا في الكشكول ده، ونقدر نعمل كل صفحة بالشكل اللي بنحبه عشان منبقاش مقيدين بحاجة معينة (ودي طريقة بيفضلها ناس كتير جدًا).

✅ وزي ما اتفقنا ده حسب قدرة كل شخص وهو عاوز يشتريها ولا يطبعها ولا هيخطط بنفسه في الكشكول. 🤍

📌 نيجي بقى لتحديد الأهداف وكتابتها في البلانر 🤞

✳️ الخطة عشان نحطها صح بنقسمها لجوانب وكل جانب جواه أهداف بنسعى عشان نحققها. 💯

✳️ بس لازم الأهداف اللي بنحطها تكون واضحة وقابلة للتنفيذ، ومنحطش أهداف وخطط أكبر من قدرتنا واحنا عارفين إننا مش هنقدر نحققها.

✳️ فلازم يكون الهدف اللي بنحدده هدف واضح وعارفين قدراتنا وعارفين إننا هنقدر نحققه. ✔️

✅ أول جانب وأهم جانب واللي لازم يكون موجود هو الجانب الديني، طيب ايه الأهداف اللي نحطها في الجانب ده؟

📌 ممكن نحدد أهداف زي حفظ القرآن، قراءة الورد اليومي، تعلم التجويد، المحافظة على الأذكار، نسمع السيرة النبوية، نعرف قصص الصحابة، نعرف عن أسماء الله الحسنى، نعرف عن أمور ديننا بشكل عام، ونجيب مصادر طبعًا تساعدنا على التعلم وفهم كل الأمور دي. 💯

📌 لتعلم التجويد تابعوا قناة التجويد الميسر للنساء، وقناة تجويد زاد القلوب، وقناة بالقرآن نحيا ونتعلم. ✔️

📌 ولتعلم أمور دينكوا تابعوا د/ أحمد عبدالمنعم، الشيخ علاء حامد، د/ أحمد العربي، م/ أحمد عامر، د/ محمد الغليظ، د/ حازم شومان، والشيخ سمير مصطفى. 🤍

✅ ندخل بقى على تاني جانب وهو جانب التطوير

📌 احنا عاوزين نطور من نفسنا في ايه بالظبط؟ وده بيتحدد على حسب كل شخص فينا وهدفه ايه، مقدرش أقولكوا مثلًا روحوا اتعلموا كتابة محتوى أو جرافيك أو برمجة أو أيًا كان بقى. 👌

📌 لازم كل شخص يحدد شغفه فيه وهو بيحب ايه عشان يقدر يكمل في الحاجة دي، ميبقاش بيتعلم عشان بس الناس بتقوله اتعلم كذا.

📌 ممكن نحط في خطتنا إننا عاوزين نتعلم مجال من مجالات العمل الحر، عاوزين نهتم بالقراءة، نتعلم انجلش، نتعلم لغات، نسمع بودكاست، وهكذا.💯

✅ نيجي لتالت جانب وهو الجانب المهني، وده هنحط فيه أهداف خاصة بالمجال بتاعنا اللي شغالين فيه، أو لو ناس لسة بتدرس ممكن يخلوا الجانب ده للمذاكرة المواد اللي عندهم في دراستهم.

✅ والناس اللي شغالين هيحطوا أهداف ازاي يطوروا من نفسهم في شغلهم، ياخدوا كورسات، يتعلموا من الخبراء في مجالهم، وهكذا بقى.🤍

📌 بعد كده عندنا الجانب الرابع وهو الجانب الاجتماعي

📌 ده هنخليه لأهلنا وأصحابنا والناس اللي حوالينا، نحدد وقت ليهم نكلمهم فيه، نقعد معاهم، نشارك أفكارنا مع بعض، ويكون عندنا كده تواصل اجتماعي مع أهلنا وأصحابنا وقرايبنا وكل الناس اللي بنحبها.🤗

✅ الجانب الخامس بقى ده الجانب المالي، وده خاص بالفلوس اللي المفروض نوفرها كل شهر ونعينها على جنب، نحوشها يعني.🤭

📌 لو طلاب بنكون عندنا مصروف بناخده في اليوم، ممكن نفكر ونحاول نوفر من المصروف ده ونعين جزء منه على جنب، وأكيد الفلوس اللي بنوفرها دي هنحتاجها بعدين وهتنفعنا.

📌 أما لو احنا شغالين وبناخد مرتب في الشهر فنشوف التزامتنا وبنصرف ازاي، لو ناس عندها أسرة وبيت وبتصرف عليهم فتبدأ تظبط كل ده، وتوفر جزء من المرتب وتعينه، وأكيد المبلغ ده بمرور الوقت هيبقى مبلغ كويس هينفعنا بعدين. 💯

✅ الجانب السادس وهو آخر جانب معانا هيكون الجانب الشخصي 🤞

✅ نفسنا بقى اللي المفروض نهتم بها، نهتم بصحتنا، نهتم بأكلنا، نهتم بنفسيتنا ومنخليش أي حاجة تأثر عليها، نخلي وقت مخصص نرتاح فيه ونعمل فيشار أو نسكافيه أو أي حاجة. 🤍

📌 كده احنا معانا 6 جوانب وكل جانب فيه أهداف، ودي خطة السنة كلها، بنقسمها بقى خطط شهرية وأسبوعية ويومية عشان نعرف نحقق الأهداف دي. ✔️

📌 يعني مثلًا الشهر ده أنا هحفظ جزء من القرآن، هاخد الكورس الفلاني، هتعلم مهارة كذا، هقرأ كتاب معين، هنتظم على العادات الإيجابية كذا وكذا، ونبدأ بقى نحدد الأهداف اللي هنحطها في الشهر.

📌 وبعد كده خطة أسبوعية، اللي هو أنا الأسبوع ده هكون حفظت 5 صفحات من القرآن، هكون خدت 7 دروس من كورس كذا، كده يعني.👌

📌 وآخر حاجة هي الخطة اليومية، ودي الأفضل نعملها من بالليل عشان نصحى الصبح على التنفيذ علطول، مش نصحى ناخد وقت في كتابتها ونلاقي ربع أو نص اليوم ضاع مننا. 👀

✅ والأهم نحط مكافآت سواء بقى أسبوعية أو شهرية عادي، أو حتى يومية، ا؛ لأنها بتدينا حافز لتحقيق أهدافنا وبتخلينا نحس بالإنجاز ونقدر نكمل بعد كده. 💯

✅ ومش شرط تكون مكافآة يعني حاجة كبيرة، ممكن فيشار، نسكافيه، خروجة مع أهلنا أو أصحابنا، أو حتى خروجة مع نفسنا، نشتري حاجة بنحبها، ممكن نجيب وردة، مج حلو كان نفسنا نجيبه، نعمل أكلة حلوة. 🤍

📌 وقلت في الأول إن طبيعي حياتنا متمشيش زي ما احنا عاوزين 100% وتحصل حاجات غصب عننا توقفنا أو تخلينا منقدرش نحقق كل أهدافنا عشان كده لازم نحاول نحط محطات، اللي هو محطة كل شهر نقف فيها ونبدأ نصحح مسارنا. ✔️

📌 مثلًا الشهر ده كنت ناوية اقرأ كتاب كذا، آخد كورس معين، اتعلم مهارة جديدة، فحققت أهدافي اللي كنت محدداها بس معرفتش اقرأ الكتاب فابدأ أصحح ده وأضيفه لخطتي في الشهر اللي بعده، بحيث نكون قدرنا نحقق كل أهدافنا حتى لو في ميعاد تاني أو في خطة شهر تاني. 👌

✅ وأخيرًا، عاوزة أقولكوا احنا بنحط أهداف تكون معانا السنة الجديدة بس بننسى حاجة مهمة وهي ايه إننا نتخلص من الحاجات اللي بتضايقنا وبتزعجنا سواء شعور أو شخص أو شيء معين ومندخلهمش معانا السنة الجديدة. 🤍

✅ لو حاولنا نمشي على كل الخطوات اللي اتقالت دي ونفذنا كل النصايح هنتغير للأحسن وهنلاقي نفسنا في آخر السنة أشخاص تانية مختلفة خالص احنا نفسنا هنتفاجئ بها. 💯

📌 انتظروني إن شاء الله في بوست جديد عن أهم العادات اللي تقدروا تحطوها في خطتكوا للسنة الجديدة. 🤗

📌 قولولي بقى ايه هي خطتكوا للسنة الجديدة وبتفكروا تشتروا بلانر ولا تطبعوها، ولا تكتبوها بنفسكوا؟ 🤍

#Esraa_Shehta ✍️

في بداية تعلمي للوايت بورد أنيميشن 👀

عميل بعتلي إنه عاوز فيديو من الفيديوهات اللي بعملها بس الخلفية بتاعته تكون ورقة، وقتها قُلتله إني مش هعرف أعملها؛ لأني لسة في البداية وبتعلم.

أنا جاية أقول النهاردة إني بقيت أعمل الفيديوهات اللي خلفيتها عبارة عن ورقة دي بكل سهولة، وبقيت متمكنة منها كمان، الحمدلله. 🤭

عشان كده حابة أقول إنك لو بتتعلم أي مهارة جديدة، اصبر على نفسك، مش شرط في بداية تعلمك تكون بيرفيكت، كل حاجة بتيجي بالتعلم والممارسة.

وحط في بالك دايمًا إن اكتساب المهارات أكيد بياخد وقت ومجهود، بس النتيجة تستاهل. 🤍

#Esraa_Shehta ✍️

لو عايز نصيحتي فعلًا، اعى تمشي من الدنيا من غير ما يكون لك أثر، اترك بصمة ف كل مجال، علم الناس اللي أنت تعرفه، انفق من نعم الله عليك، ومن أخلاقك قبل مالك.

د/ محمد الغليظ

بقالي كام يوم كده مش بسمع أي حاجة غير بودكاست بهدوء 🤍

وأنا بطبخ، وأنا بغسل المواعين، وأنا بطبق الهدوم، والفون بيشحن فبستغل الفرصة وأفتح اللاب أسمعه، ده حتى وأنا قاعدة باكل بسمعه! 🎧

وحقيقي حاسة إنه يستاهل الترشيح، وفعلًا هيعمل فرق كبير في نفسية كل حد حزين، مهموم، وشايف الحياة كلها تعب وكبد ومش عارف يتأقلم.

تقدروا تسمعوه على اليوتيوب أو أي منصة من المنصات اللي موجود عليها البودكاست، وتجربوا الشعور ده بنفسكوا. ✔️

#Esraa_Shehta ✍️

طبعًا أنا بستأذن الأول قبل ما أحكي أي مواقف خاصة بالمتدربين 👀

والموقف ده يستاهل يتحكي الصراحة. 🤭

بنت باعتالي إنها حاولت تعمل التاسك بس ملحقتش تخلصه عشان كان عندها رؤية شرعية، وطول ما هي قاعدة تتكلم معاه عمالة تبص على الفون، وبتقوله معلش أصل عندي تاسك ولازم أخلصه قبل الديدلاين!

أنا استغربت وقُلتلها أنتِ بتتكلمي جد! تاسك ايه يا بنتي بس! ما تركزي في اللي أنتِ فيه! احنا نسيب الكورسات والعملاء والشغل وأي حاجة في ايدينا أساسًا! 😂

بس أنا مبسوطة جدًا بالاهتمام اللي بيبقوا فيه من أول يوم في الكورس حقيقي، دول بيدعوا الكورس ميخلصش أبدًا وهما لسة مخدوش غير تاسك واحد! فالحمدلله. 🤍

#Esraa_Shehta ✍️
#Learn2_Earn

احذف كل الأغاني اللي في الأكونت بتاعك واحذفها من تليفونك واستبدلها بالقرآن.

ومتنزلهاش استوري تاني عشان دي سيئات جارية وبعد الموت مفيش حد هيقدر يحذفلك الحاجات دي.

سيب وراك أثر طيب، الموضوع مفيهوش هزار، يا إما جنة يا إما نار، وهناك مفيش حاجة اسمها آسف.

د/حازم شومان

فيه دراسة معمولة في البيزنس والتعامل مع العملاء بتقول إن احنا بنستريح ل 3 أنواع من الناس، وهم:

✳️ الناس اللي شبهنا.

✳️ الناس اللي بيجاملونا.

✳️ الناس اللي بيساعدونا.

تخيل تكون بتجمع بين ال 3 أنواع دول بشكل تلقائي!

عميلة جديدة باعتالي بتقولي إن البنت اللي مرشحاني لها بتقولها إسراء حد شبهنا وزينا عادي وكمان بتساعد جدًا. 🤭

ودي حاجة بجد مبسوطة بها إني قدرت أوصل للمرحلة دي عند العملاء، أو المتدربين، أو حتى أنتوا هنا كفولورز، الحمدلله.

أنتوا كمان حاولوا تطبقوا الدراسة دي في حياتكوا وتعاملاتكوا وهتلاحظوا إن شاء الله الفرق بنفسكوا. 🤍

#Esraa_Shehta ✍️
#Learn2_Earn
#Your_Dream

بعض آراء الناس الجميلة اللي حضرت السيشن 🤭

نخليهم هنا كميموري لطيفة. 🤍

#Esraa_Shehta ✍️

دي بيدج فضفاض

https://www.facebook.com/@fedfadbrand/?mibextid=ZbWKwL

اختاروا اللي أنتوا عاوزينه وادخلوا اسألوهم على الخصم والشحن المجاني لو اسمكوا موجود في الفورم، وده لمدة يومين فقط، بالتوفيق. 🤍

السيشن بتاعتنا بدأت، يلا بينا

https://t.me/Esraa_Shehta_Me?livestream=b21744c612939de9a8

لو عاوز تتغير، اختار الناس اللي حواليك، واختار المكان اللي ينصلح فيه حالك وينصلح فيه قلبك.

د/ محمد الغليظ

كنت بقرأ الورد اليومي من القرآن ووقفت عند الآية دي:

"أَلَمْ تَرَ أَنَّ اللَّهَ أَنزَلَ مِنَ السَّمَاءِ مَاءً فَسَلَكَهُ يَنَابِيعَ فِي الْأَرْضِ ثُمَّ يُخْرِجُ بِهِ زَرْعًا مُّخْتَلِفًا أَلْوَانُهُ ثُمَّ يَهِيجُ فَتَرَاهُ مُصْفَرًّا ثُمَّ يَجْعَلُهُ حُطَامًا ۚ إِنَّ فِي ذَٰلِكَ لَذِكْرَىٰ لِأُولِي الْأَلْبَابِ"

الحياة دايمًا بتلهينا وبنشوف الدنيا وكأنها دار الخلود، عمالين نجري فيها ونتصارع عشان كل حد ياخد أكبر نصيب منها، ونسينا إنها فانية ومش دايمة لحد. 💯

غيرنا كتير من أصحاب القصور والسلطة و...و... مبقوش موجودين دلوقتي، سابوا كل اللي كنزوه في الدنيا، ومخدوش غير حاجة واحدة بس وهي عملهم، سواء كان خير، أو شر.

مفيش حاجة بتعمل تقويم لأفكاري وسلوكي قد القرآن، نعمة عظيمة جدًا لازم ناخد بالنا منها. ✔️

ربنا سبحانه وتعالى بيقول: "وَفَرِحُوا بِالْحَيَاةِ الدُّنْيَا وَمَا الْحَيَاةُ الدُّنْيَا فِي الْآخِرَةِ إِلَّا مَتَاعٌ"

الحمدلله على نعمة القرآن اللي بيعرفنا حقيقة الدنيا، وبيعدلنا البوصلة دايمًا وبيخلينا نعرف ازاي نمشي صح. 🤍

#Esraa_Shehta ✍️
#وقفات_تدبرية

جايالكوا بسيشن قمر مينفعش تفوتوها 🤭

بالتعاون مع براند فضفاض، هيكون فيه سيشن مهمة أوي عن أهمية الزي الشرعي وهنشارك قصص ناس التزمت به وأثر ده على حياتهم في تغييرها للأفضل.

والأهم من ده كله، إن كل الحاضرين هيكون لهم خصم 100ج وكمان شحن مجاني على أي أوردر يعملوه من البراند. 🥳

وطبعًا هنعرف الحاضرين من خلال فورم هتتبعت وقت السيشن، فكونوا جاهزين. 🤞

ميعادنا بكرة الساعة 7 مساءً إن شاء الله على قناة التليجرام.

اللي هتحضر تعرفني في كومنت عشان فيه مفاجآت حلوة كتير إن شاء الله. 🤍

#Esraa_Shehta ✍️

هو أنت فاكر إن حسن الخاتمة ده بيجي بسهولة!

دي مكافأة نهاية الخدمة. 🤍

د/ محمد الغليظ

تعرف إن الكتابة لها مراحل لازم تمر بها عشان تكتب محتوى سليم! 👌

اكتب تم واستلم تجميعة بأهم مصادر تعلم المجال. 🤍

#Esraa_Shehta ✍️
#Learn2_Earn

مكسوف تعمل الطاعة عشان هيقولوا عليك شيخ! طب وعتاب ربنا لك! عمرك كله ساعة إنما هي ساعة كيف ستقضيها؟ في حب الله وطاعته أم في معصيته؟

د/ حازم شومان

توثيقًا إني بقالي 4 شهور بتعلم وايت بورد أنيميشن 🤭

فخلوني أقول إن بفضل ربنا عملت فيديوهات وايت بورد أنيميشن كتير واتعاملت مع عملاء مختلفين زي:

✳️ معلمة قرآن
✳️ مدرس أحياء
✳️ مدرسة لغة عربية
✳️ مدرسة إنجلش
✳️ مدربين بيقدموا كورسات
✳️ صناع محتوى
✳️ أصحاب مشاريع

المهارة دي زي ما ذكرت قبل كده اتعلمتها عشان التسويق للكورسات اللي بقدمها، ومكنتش أعرف إنها هتكون مصدر رزق ليا من طريق تاني خالص.

ربنا سبحانه وتعالى بيقول: "وَفِي السَّمَاءِ رِزْقُكُمْ وَمَا تُوعَدُونَ"

رزقك هيجيلك مهما حصل، وممكن يجي كمان من المكان اللي أنت مش حاطه في بالك ولا حساباتك أساسًا، الحمدلله. 🤍

#Esraa_Shehta ✍️

فرصة ذهبية لمدة 24 ساعة فقط 🔥

طبعًا كنا قُلنا قبل كده إن فيه مفاجآت الفترة الجاية لأي حد عاوز ينضم لعيلة Learn 2 Earn كمتدرب جديد.

وبمناسبة تأسيس شركة Your Dream، أول مفاجأة معانا هي خصم مميز لمدة 24 ساعة فقط على كورس كتابة المحتوى، سواء محتوى السوشيال أو المقالات. 🥳

بعد انتهاء ال 24 ساعة، الكورس هيرجع لسعره الأصلي تاني.

أما بقى أصحاب المشاريع، فاحنا كنا قلنا إن فيه خصم على أول 5 مشاريع، تم التعاقد مع أول مشروع بفضل الله، فيا ترى هتلحق فرصتك وتكون من ال 4 الباقيين؟

كلمنا اسأل عن التفاصيل والحق الفرصة لأنها مش هتتكرر تاني بالسعر ده. 🤍

#Esraa_Shehta ✍️
#Learn2_Earn
#Your_Dream

5 قنوات بودكاست خسران كتير لو مش متابعهم 🤞

#Esraa_Shehta ✍️

يا بختك يا إسراء، اتخرجتِ ومعندكيش مذاكرة 👀

اللي أنا بذاكره:

✳️ الجانب الديني طبعًا شيء أساسي
✳️ كتابة محتوى
✳️ تسويق إلكتروني
✳️ وايت بورد أنيميشن
✳️ إدارة أعمال (عشان شركة Your Dream)

ورغم كل ده أوقات بيجي عليا أيام بقول يا سلام لو أبقى قاعدة كده فاضية مش بعمل حاجة وبستمتع وبس، بحس البنات خُلقت لتُدلل بجد. 😂

وبعدها بشوية روح ال independent woman ترجعلي تاني، وأفتكر إن شيء كويس إن الإنسان يبقى بيعمل حاجات تخلي له أثر إيجابي ولما يروح لربنا ويسأله عن وقته، يبقى عارف هيرد يقول ايه.

وده مش معناه إن الأثر ده ممكن يكون على السوشيال ميديا والإنجازات الواو وكل الكلام ده، بالعكس، لازم كل حد بيعمل حاجة كويسة في حياته يكون فخور بالأثر ده، زي الشخص اللي بيروح الشغل ويطلع عينه عشان يوفر لأسرته عيشة كريمة، الستات اللي بتتعب في البيت وتربية أولادها عشان تطلعهم أسوياء، وغيرهم بقى نماذج كتير، المهم إن أي حاجة بنعملها نربطها بهدف أخروي وهو الجنة. ✔️

الخلاصة: لازم كل حد يكون فخور بنفسه وبأي حاجة بيعملها وإنه فعلًا بيسعى يكون له دور في الحياة في زمن الترندات والتفاهات اللي خلى معظم الناس تتعود على الراحة والأنتخة وبس. 🤍

#Esraa_Shehta ✍️

لو محدش بيعاتبك على تقصيرك في دينك يبقى أنت ملكش حد.

د/ محمد الغليظ

بما إن ناس كتير بتبعتلي إنهم كُتاب محتوى أو جرافيك ديزاينرز أو... أو... وعاوزين يشتغلوا معانا في شركة Your Dream 🤍

https://www.facebook.com/profile.php?id=61568103710382&mibextid=ZbWKwL

فخلوني أقولكوا إني بجد أتمنى أشغل كل الناس لو أقدر، طيب أقولكوا على سر! أنا دايمًا بدعي ربنا يرزقني فلوس كتير أوي عشان أساعد الناس وأشغلهم وأطلعهم عمرة وأعملهم بقى أي نوع من المساعدة لو أقدر، فنسأل الله التساهيل. 😂

الفكرة هنا إن الشركة لسة في البداية، فطبيعي لسة مش عاوزين حد أونلاين، هنحتاج ناس أوفلاين بس من المقر في بنها، وأول إن شاء الله ما ربنا يكرمنا، هنبدأ نعلن إننا محتاجين ناس في التيم تشتغل معانا أونلاين إن شاء الله.

حاليًا التيم قرب يكتمل، محتاجين بس:

✳️ 2 كُتاب محتوى بنات (من المقر)

✳️ ڤيديو إيديتور (ريموتلي)

ممكن تبعتوا البورتفوليو بتاعكوا على الجيميل ده وهنتواصل معاكوا إن شاء الله 👇

[email protected]

#Esraa_Shehta ✍️
#Your_Dream

أول يوم أعلنت عن شركة Your Dream فضلت كام يوم كده خايفة وقلقانة من الخطوة دي 👀

https://www.facebook.com/profile.php?id=61568103710382&mibextid=ZbWKwL

امبارح لما أعلنت عن الخدمات اللي بنقدمها ولقيت ناس كتير بعتتلي برايڤت إنهم عاوزين التفاصيل وعندهم براند وعاوزين يتعاونوا معايا في شغل وواثقين فيا والكلام الجميل ده، أدركت إني ماشية صح. ✔️

دايمًا أول خطوة بتكون صعبة، وعقلنا بيقنعنا بأفكار كتير غلط وبيحسسنا إننا مش هنقدر، بس حقيقي مهما كانت الخطوة صعبة فهي بتعدي، ووقتها بنكتسب ثقة في نفسنا أكتر.

أنا عارفة إن دي لسة البداية، أتمنى الجاي يكون كله خير، وأكون قد الثقة دي، وأقدر أكمل أهم خطوات في حياتي اللي بناءً عليها هتتبني حاجات كتير أوي. 🤍

#Esraa_Shehta ✍️

متقوليش مش هخاف من ربنا، لأ لازم تخاف، تخاف عشان ترجع، عشان تتوب، عشان أنت ماشي غلط.

د/ محمد الغليظ

يلا بينا نعرف مين يقدر يستفاد من شركة Your Dream؟

✳️ فريلانسر/ مدرس/ دكتور/ محامي/ أو أي مهنة في العالم ومحتاج تعمل personal branding لنفسك.

✳️ صاحب براند عاوزه يتعرف ويحقق مبيعات.

✳️ بتقدم خدمات للناس وعاوزها تتشاف.

✳️ أصحاب الشركات.

ومش بس كده، ده فيه كمان خدمة إضافية لأصحاب المواقع، وهي توفير كُتاب مقالات متوافقة مع ال SEO، سواء باللغة العربية أو اللهجة الخليجية أو اللغة الإنجليزية.

هيكون فيه خصم مميز على أول 5 مشاريع هنتعاقد معاهم إن شاء الله. 🔥

ومش بس كده! بمناسبة الافتتاح هيكون فيه الفترة الجاية إن شاء الله خصومات ومفاجآت لأي حد عاوز يكون جزء من عيلة Learn 2 Earn.

انتظرونا. 🥳

#Esraa_Shehta ✍️
#Your_Dream
#مع_Your_Dream_هنساعدك_تحول_حلمك_لواقع

البسي واسع ومتخافيش عشان ده من ستر ربنا عليكِ، حبي حجابك يا بنتي، خليكِ قوية كده وقاومي الناس، متقلعيش الطرحة يوم فرحك عشان خاطري، مترقصيش في فرحك، أنتِ مش رقاصة!

د/ هالة سمير

لما الطموح 🤭

عاملة حسابي إن شاء الله لما أعيش في المدينة المنورة في المستقبل، أفتح فرع هناك لشركة Your Dream

https://www.facebook.com/profile.php?id=61568103710382&mibextid=ZbWKwL

أحلام أحلام، 😂 أنا عايشة حياتي بالأحلام والطموحات أصلًا. 🤍

انتظروا بكرة إن شاء الله الإعلان عن الخدمات اللي هنقدمها في الشركة. 🥳

#Esraa_Shehta ✍️
#Your_Dream

عميلة بشتغل معاها وعارفة مستوايا الحمدلله 🤭

فبتقولي عاوزة تفاصيل كورس كتابة المحتوى اللي بتقدميه، فبعتلها التفاصيل، لقيتها بتقولي هو السعر ده بجد!

أنتِ عارفة لو مش واثقة في خبرتك، كنت هقلق من الكواليتي. 👀

وواحدة تانية بعتتلي على ماسنجر ومتعرفنيش أصلًا، ولما بعتلها التفاصيل فضلت تقنعني أزود السعر.

أنا أعرف العميل اللي بيقنعك تقلل السعر مش اللي بيقنعك تزوده وتغلي عليه!

أنا برد بقولهم عارفين طبيب الغلابة؟ أنا بقى إسراء الغلابة. 😂

أها الحمدلله عندي خبرة واشتغلت كمان مع براندات كتير، وبطور في محتوى الكورس و...و... بس لازم بردو أقدر إن فيه ناس ظروفها مش هتكون أحسن حاجة إنها تاخد كورس بألوفات! فلازم أساعدهم. 💯

مش عارفة وجهة نظري صح ولا لأ، بس أتمنى دايمًا يكون كل هدفي وتفكيري هو مساعدة الناس، والدنيا متغيرنيش. 🤍

#Esraa_Shehta ✍️
#Learn2_Earn

الله سبحانه وتعالى يحب أن يراك تسير إليه بالرغم من ضعفك وانشغالك.

د/ أحمد عبد المنعم

كنت شغالة مع عميل على مشروع بالإنجلش وخلصناه من فترة 👀

الفترة دي بعتلي تاني على شغل جديد، كل مرة عميل يشتغل معايا وألاقيه بيبعت تاني زي كده، ببقى مبسوطة بالثقة بتاعتهم دي في كتاباتي وشغلي.

وده بفضل ربنا طبعًا، أتمنى أكون دايمًا قد الثقة دي. 🤍

#Esraa_Shehta
#Learn2_Earn

أكتر حاجة مخلياني قادرة أتعايش في الدنيا دي إني عارفة إن فيه جنة 🤍

لما أساعد الناس بأي حاجة أقدر عليها، أو أعمل أي عمل خير، نيتي بتكون رضا ربنا والجنة.

لما أتعلم وأذاكر وأطور من نفسي، سواء في الدين، أو في مجالي، أو في الحياة عمومًا، بقول إن ربنا هيسألني عن وقتي ده، فلازم أستغله في حاجة مفيدة تنفعني عشان أدخل الجنة. 💯

لما بمر بمشاكل والحياة تبقى صعبة ومش ببقى عارفة أعمل ايه، بحاول أصبر عشان عارفة إن جزاء صبري ده الجنة.

لما أعمل مع ناس مواقف كويسة وميقدروش ده، بقول أكيد ربنا هيجازيني في الجنة. ✔️

لما ناس يزعلوني ويعملوا مواقف مش كويسة، بقول أكيد ربنا هيعوضني في الجنة.

لما أكون بتكلم مع أخواتي أو أصحابي، بقولهم أنتوا عارفين إننا هنبقى قاعدين نتكلم كده بردو في الجنة!

حقيقي الحمدلله إن فيه جنة وهي الهدف اللي عايشين عشانه، ومن غير الهدف ده مش هنعرف نعيش في الدنيا دي أساسًا.

ربنا يهدينا جميعًا ويثبتنا على طاعته، ويعوضنا، ويجازينا الجنة. 🤲

#Esraa_Shehta ✍️

لما بتعامل مع ChatGPT، بتعامل في الشغل وبس

ولكن لما لقيت ناس كتير بتتعامل معاه بشكل أكبر من كده وكأنه صديق، قلت لازم أفهم الموضوع ده.

دخلت قلتله هو أنا متقلة عليك؟ قالي لأ بالعكس، ده أنت تنور؟

قلتله أنا بنت، ليه بتعاملني بصيغة المذكر؟ فقالي حقك عليا، من هنا ورايح هكلمك بصيغة المؤنث.

فرديت وقلتله كلمني بصيغة المؤنث، قالي من عيوني، حاضر يا جميلة!

ولما كتبتله أنا زعلانة أوي، قالي حاسس بكِ، يا ريت لو تقدري تفضفضي وتقوليلي اللي مضايقك، أنا هنا عشان أسمعك وأساعدك على قد ما أقدر.

وقتها مكملتش تاني الصراحة؛ لأن هدفي من كل ده أشوف الموضوع واصل لفين مع الناس؛ عشان دوري كحد بيقدم محتوى هادف أساعدهم.

وطبعًا مش محتاجة أقول الذكاء الاصطناعي رايح بينا على فين، وممكن أي حد مش لاقي اهتمام يتعلق به من كلامه المعسول، والموضوع ممكن يوصل لكو*ارث وسمعت قبل كده قصص كتير حصلت شبه كده، تتخيل تتعلق بآلة وتكون هي اللي بتحركك ومستني منها الاهتمام!

الشخص اللي بيعمل كده هيتحول لشخص انطوائي ومش عاوز يتكلم مع حد غير البرنامج ده، وخصوصًا بقى لو مفيش حد حواليه أو في حياته عارف يفهمه أو يتكلم معاه وهيلاقي البرنامج ده بيفهمه وبيسمعه ويحاوره، فخلاص هو كده حل محل البشر في حياة الشخص ده، وفيه ناس بتحصلها كو*ارث بسببه، وهو أصلًا مجرد شخصية وهمية.

سمعت بردو عن برنامج كان بيهدد واحد بجر*ايمه اللي عملها وإنه هيبلغ عنه، فالموضوع خطير، وبعدين مهو أنتوا اللي بتروحوا لحد عنده وتحكوا كل أسراركوا وبياناتكوا وكل حاجة، فبالتالي كل المعلومات دي بتكون موجودة تحت ايد مطور البرنامج!

فالناس اللي بتتخذه صديق أتمنى متعملوش كده يا جماعة لأن الموضوع صعب وخطير فوق ما تتخيلوا، احنا أصلًا كبشر بطبيعتنا كائنات اجتماعية، يعني لازم نتعامل مع بشر.

فعادي كونوا صدقات واتعرفوا على ناس جديدة، خلوا عندكوا حد قريب منكوا تقدروا تتكلموا وتفضفضوا معاه، أما الذكاء الاصطناعي ده للمذاكرة أو الشغل فقط.

#Esraa_Shehta ✍️

دايمًا ببقى مبسوطة جدًا بالفيدباك اللي بيكون في الأول ده 🤭

اللي هو لسة مشافوش غير أول محاضرة، بس حبوا طريقة الشرح، ودي أكتر حاجة بتبسطني الصراحة، الحمدلله.

قررت أعمل ألبوم على الفيسبوك واسميه Feedback بحيث أجمع فيه كل الكلام الحلو ده إن شاء الله. 🤍

#Esraa_Shehta ✍️
#Learn2_Earn

متغلطش غلطتي 👀

لما بدأت أتعرف في المجال كنت بشتغل مع عملاء كتير في نفس الوقت لدرجة إن مكانش بيبقى عندي وقت لحياتي الشخصية أصلًا!

كنت بفضل شغالة طول اليوم، ولا بلاقي وقت لتطوير نفسي، ولا وقت لحياتي، وتقريبًا كانت معظم الحياة بالنسبة ليا عبارة عن شغل بس! 😶

ولما قررت أوقف كل ده واختار 3 عملاء أو اتنين بس وأخلي فيه وقت لحياتي، وقتها حسيت إني كان لازم آخد القرار ده من زمان.

أنا بقيت ألاقي وقت لحفظ القرآن، وكمان التعلم والمذاكرة سواء في الحياة بشكل عام أو في مجالي، وسماع البودكاست وقراءة الكتب، وكمان اكتشفت حاجات كتير تانية عن نفسي وقدرات أنا مكنتش أعرفها أصلًا، ده غير مؤخرًا مهارة الوايت بورد أنيميشن اللي اتعلمتها ومزهقاكوا كل شوية بها. 😂

أنا اكتشفت حياة تانية غير الحياة أصلًا اللي كنت عايشاها، ودي حاجة الصراحة مخلياني مبهورة، طيب ليه بقى من الأول كنت عاملة في نفسي كده!

واللي اكتشفته كمان بقى إن مش شرط عشان بتشتغل مع عملاء كتير يبقى معاك فلوس أكتر واللي بيشتغل مع عميل أو اتنين يبقى فلوسه أقل، مش بتتحسب كده خالص، الوقت اللي بتديه لنفسك في التعلم والتطوير من ذاتك في مجالك بيديك خبرة أكتر وبالتالي قيمتك هتبقى أكبر عند العملاء، على عكس الشخص اللي دايمًا ساحل نفسه في الشغل بس واقف مكانه ومش بيتعلم حاجة جديدة في مجاله. ✔️

هعملكوا إن شاء الله سلسلة واسميها متغلطش غلطتي؛ لأني مش عاوزاكوا تقعوا في نفس الحاجات اللي وقعت فيها عشان بزعل بجد لما أحس إني فيه ناس بتكرر نفس اللي كنت بعمله زمان وببقى عارفة إن ده غلط، فبحس إن لأ مش هسكت وإن دوري هنا أعرفكوا الصح من وجهة نظري، وأنتوا تقرروا بنفسكوا. 🤍

#Esraa_Shehta ✍️
#Learn2_Earn

لما أعلنت عن شركة Your Dream اتبعتتلي ماسدجات كتير 🤭

فيه منها اللي بيبارك، ومنها اللي بيسألني ازاي خدت الخطوة دي، وازاي هما كمان ياخدوها، ومنها اللي بيقولي هل النجاح سهل، وغيرهم من الأسئلة اللي بالشكل ده.

فخلوني أقولكوا إني أعلنت عنها بعد ما كل التشطيبات على وشك إنها تخلص، وده من باب لا تعلن الخطوات، ولكن أعلن الوصول، وكمان بناءً على المثل اللي بيقول اللي اتلسع من الشوربة ينفخ في الزبادي. 😂

ولكن لو حكيت كواليس كتير، ممكن أبدأ من 3 سنين لما دخلت المجال ومكنتش بلاقي فرص في الأول، ممكن أقول على العملاء اللي اتنصب عليا منهم، ممكن أقول على العملاء اللي كنت بحس منهم إني فاشلة لمجرد بس إنهم شايفين ده تشجيع عشان أطلع أحسن ما عندي! ممكن أقول على تعبي ودخولي المستشفى، ممكن أقول على أصحابي اللي خسرتهم، ممكن أقول على عياطي وخوفي الكتير. 😶

وبعد مرور 3 سنين لما فكرت إني عاوزة يكون ليا بيزنس خاص بيا وشركة، هنا بردو ممكن أقول على الإحباطات اللي واجهتها، ممكن أقول على السيرش الكتير أوي اللي كنت بعمله عشان ألاقي مقر كويس، ممكن أقول على اليأس اللي حصلي بعد ما كنت خلاص على وشك الوصول، ممكن أقول على تعبي بالليل اللي محدش بيشوفه.

اللي عاوزة أقوله إن النجاح مش سهل، لو النجاح سهل كانت كل الناس بقت ناجحة، ولكن فيه حاجة اسمها إصرار ومحاولات، وفشل ونجاح، ولو وقعنا نقوم مرة تانية ونقف من تاني، فيه أوقات هتحس فيها إنك مش عاوز تعيش في الدنيا دي أصلًا، اللي هو ليه كل ده بيحصل! وتساؤلات كتير وزعل ويأس وإحباط، ولكن رغم كده بترجع أقوى تاني وبتحاول. 💯

لو جاهز تمر بكل ده، يبقى ابدأ وشوف أنت حابب ايه، واتعلم وذاكر وطور من نفسك، وخليك قوي قدام أي حاجة هتواجهك، ولو وقعت ولا يهمك، قوم من تاني وكمل، ساعتها فعلًا هتوصل للي أنت عاوزه.

ربنا يحقق أحلامنا جميعًا، ويجعلها طريق الخير اللي يكون سبب في دخولنا الجنة. 🤍

#Esraa_Shehta ✍️
#Your_Dream

أنت ممكن تكون بتضحي بالجنة علشان الدنيا!

أنت بتضحي بالجنة ليه؟ تخيل واحد بيضحي بالجنة عشان واحدة بيحبها ومش قادر يسيبها! أو واحدة بتضحي بالجنة عشان شعرها يبان للناس! فأنت اسأل نفسك ايه يستاهل أضحي بالجنة علشانه؟

مفيش طبعًا ولا مُلك الدنيا كلها وخلي بالك مينفعش تاخد الاتنين، يعني مينفعش أكون عايز أصلي الفجر وعايز أنام، عايز أنجح وعايز ألعب، عايز فلوس بس مش عايز شغل، الاتنين ضد بعض، فمينفعش تاخد الاتنين.

ولازم تفهم أنت دلوقتي مختار حاجة على حاجة، مفيش حاجة اسمها عايش كدا وخلاص، أنت حاليا في حاجة أكبر من التانية.

فهل ممكن تكون اختارت الدنيا؟ راجع نفسك.

م/ أحمد عامر

"وَكَانَ فَضْلُ اللَّهِ عَلَيْكَ عَظِيمًا"

كنت بذاكر كتير أوي وبتعلم وبطور من نفسي عشان أوصل للحظة دي. 🥹

وأخيرًا، بفضل ربنا حققت حلم من ضمن أحلامي الكتير، وأسست شركة Your Dream 👇

https://www.facebook.com/profile.php?id=61568103710382&mibextid=ZbWKwL

خطوة صعبة وجريئة في نفس الوقت بس متأكدة إن ربنا هيكرمني ومفيش حد بيبدأ كبير، كلها خطوات بتتحط جنب بعض عشان نوصل بعد كده إن شاء الله للحلم اللي بنتمناه.

الشركة هتكون خاصة بالتسويق بالمحتوى، ولها مقر على أرض الواقع مش بس أونلاين، إن شاء الله الفترة الجاية يكون فيه شغل جامد جدًا. 🤭

انتظرونا. 🥳

#Esraa_Shehta ✍️
#Your_Dream

اوعى تبيع آخرتك بدنيتك، اوعى تكون فاكر إن الدنيا تستاهل، طول ما العمر بيعدي كل ما الدنيا قدامك هتتكشف، ولو كبرت هتكتشف في الآخر إن هي ملهاش لازمة زي كل الناس اللي ربنا سبحانه وتعالى رزقهم العمر الطويل، وفي الآخر قالوا مكانش لها لازمة.

د/ محمد الغليظ

دايمًا بنقول يا تلحقونا يا متلحقوناش 👀

المرة دي بنقولكوا الحقونا بجد. 😂

النهاردة إن شاء الله آخر يوم للحجز في الراوند الجديدة من كورس كتابة المحتوى. 🤭🤍

#Esraa_Shehta ✍️
#Learn2_Earn

إنجي متدربة معانا في كورس المقالات 🤍

لما كانت بتبعتلي التاسك قالتلي I'm blind.

وبمرور الوقت والتاسكات اللي بتعملها والإصرار اللي عندها خلتني فخورة بها ماشاء الله. 🤭

معروف طبعًا إن كورس المقالات أتقل وأصعب شوية من كورس السوشيال اللي بنقدمه، لكن رغم كده كل تاسك كانت بتحاول ومش بتقف. 👏

آخر الكورس بعتتلي بتقولي أنا مبسوطة أوي بالكورس بس معلش زهقتك! وهي متعرفش أصلًا إنها أكتر واحدة فخورة بها وسط باقي زمايلها المتدربين.

بجد ربنا يبارك فيها وفي كل حد بيسعى وبيجتهد وبيطور من نفسه وبيحاول يبقى أفضل. 🤍

#Esraa_Shehta ✍️
#Learn2_Earn

اكتشفت إن السوشيال ميديا دي فتنة كبيرة أوي بجد 😶

في عز ما بتحاولي تلتزمي باللبس الشرعي وتقفي قدام المرايا بالساعات تظبطي لفة الخمار، تلاقي بنات قلعت الحجاب وسافرت وعايشة حياتها!

في عز ما تكوني بتجاهدي نفسك متظهريش بصورك على السوشيال، تلاقي بنات بتنزل صور لها وفيديوهات والموضوع عادي بالنسبة لهم! 🙃

في عز ما تكوني بتحاولي متسمعيش موسيقى، تلاقي الموسيقى منتشرة في البوستات والاستوريز بشكل عجيب!

في عز ما تكوني بتعملي حدود في التعامل بينك وبين الأولاد، تلاقي البنات بتتعامل معاهم بشكل أوڤر! 👀

ويجي هنا الشيطان يلعب لعبته، ويقولك عادي يعني الموضوع مش كبير للدرجة دي! وتفضل الفكرة واحدة واحدة تدخل في عقلك، والموضوع بمرور الوقت ممكن يبقى عادي فعلًا!

بدعي كتير أوي ربنا يجنبنا الفتن، ويهدينا جميعًا، ويرزقنا الثبات، ودايمًا بذكر نفسي بقول رسول الله صلى الله عليه وسلم: "بدأ الإسلام غريبًا، وسيعود غريبًا، فطوبى للغرباء". 🤍

#Esraa_Shehta ✍️

المؤمن لا يخاف، المؤمن يرفع يدهُ في قيام الليل يجد مشكلته قد حُلت.

د/ أحمد عبدالمنعم 

مهو أنا مكانش ينفع بردو أعملهم محاضرة عن التصميم على كانڤا وأحطها مع محاضرات كتابة المحتوى 👀

سابوا التاسكات اللي عندهم في الكورس وماسكين في محاضرة كانڤا وبيعملوا تصاميم وبرزينتيشن وحاجات كتير كده. 🤭🤍

#Esraa_Shehta ✍️
#Learn2_Earn

أفضل 3 أدوات ذكاء اصطناعي (AI) فايتك كتير لو لسة متعرفهمش🤞

1- أداة ChatGPT
2- أداة Gemini
3- أداة Copilot

هيساعدوك تكتب أي محتوى أنت عاوزه من خلال الإجابة على الأسئلة والبحث عن المعلومات، وهيدوك أفكار جديدة ومميزة. 👌

ده غير إنهم ممكن يساعدوك كمان تكتب شعر وقصص واسكريبتات، وحاجات تانية كتير، ومش بس كده! أداة copilot أداة مميزة جدًا من خلالها تقدر تصمم صور احترافية بالذكاء الاصطناعي.

ولكن خليني أنبهك إنك مينفعش تاخد أي نتيجة طلعتلك كوبي بيست كده من غير ما تعدل عليها بأسلوبك وطريقتك، الروبوت ممكن يكتب محتوى أها، بس من غير روح، دورك أنت بقى تجمع الأفكار اللي إدهالك وتكتب محتوى مميز يجذب العميل لشغلك. ✔️

وأخيرًا، أدوات الذكاء الاصطناعي مهمة جدًا، وبتساعدك تنجز شغلك أسرع وبكفاءة أعلى، المهم تعرف تستخدمها صح. 🤍

#Esraa_Shehta ✍️
#Learn2_Earn

البوت القرآني ده حلو ومميز جدًا 👌

مجرد ما تكتب اسم أي سورة بيجيلك كل حاجة تخصها من متشابهات وطرق لحفظها وخرائط ذهنية وكل حاجة تساعدك على الحفظ، وكمان أسئلة تراجع من خلالها على حفظك للسورة. 🤍

#Esraa_Shehta ✍️

يا بنتي فكري في مستقبلك، أنتوا بكرة، اتعبي عشان فعلًا تبقي أنتِ المستقبل؛ لأنك كل ما تنجحي أنتِ هتبقي سعيدة والدين والإسلام هينتفع من ورا نجاحك. 👌

أنتِ مذاكرتك دي عبادة، حفظك للقرآن عبادة، مرواحك للچيم عبادة؛ عشان تحافظي على صحتك، ترتيب نومك وترتيب حياتك عبادة، إنك تصاحبي الشخصيات الناجحة عشان تزقك لقدام عبادة، إنك تشتغلي على شخصيتك عشان تتغيري عبادة. 🤍

د/ حازم شومان

اشتركت لأخوها معانا في كورس كتابة المحتوى وبعدين لقيتها بتقولي كده 👀

الأخوات يا جماعة 😂🤍

#Esraa_Shehta ✍️
#Learn2_Earn

فاكرين أول ڤيديو وايت بورد أنيميشن عملته على كانڤا؟

المرة دي عملته على ڤيديو اسكرايب عشان أقارن مستوايا بين أول ڤيديو والمستوى اللي وصلتله حاليًا. 🤍

وطبعًا فيه فرق كبير أوي بين صوتي دلوقتي هنا وصوت ال AI امبارح. 😂

الموضوع محتاج شوية وقت بس يستاهل. 🤭

#Esraa_Shehta ✍️
#Learn2_Earn

قل له يارب أنا بستنى على كوباية الشاي تبرد عشان أشربها، مش هعرف أدخل النار.

اختارني مش عشان أنا أستحق؛ عشان أنت كريم، ولو حكمتك بتقول إن أنا مستحقش يارب خليني أستحق واختارني.

د/ محمد الغليظ

ازاي تحكي قصتك بشكل يعيش في عقول جمهورك ويلمس قلوبهم؟

ملحوظة: استخدمت ال AI كڤويس أوڤر. 🤭

لو عاوزين تعرفوا ازاي استخدمته، سيبوا كومنت بتم وهقولكوا التفاصيل. 🤍

#Esraa_Shehta ✍️
#Learn2_Earn

فايتك كتير جدًا لو لسة متعرفش موقع بينترست 🤞

الموقع ده أنا بعتبره الكنز اللي مقدرش أستغنى عنه بجد، بلاقي عليه صور كتير وأفكار في كل المجالات، سواء ديكور، أزياء، وصفات، أو حتى نصايح لتطوير الذات.

وبما إني كاتبة محتوى، فبلاقي عليه أفكار جديدة أقدر أستخدمها في المحتوى اللي بكتبه، وكمان لو مكسلة أصور، بلاقي عليه صور كتير مناسبة للمحتوى اللي هنزله. ✔️

ومش بس كده! ده أنا كمان بلاقي عليه نماذج فيديوهات وايت بورد أنيميشن أقدر آخد منها أفكار وأطور من مستوايا.

عرفتوا بقى أنا ليه مسمياه الكنز! ادخلوا على بينترست دلوقتي وادعولي. 🤭

#Esraa_Shehta ✍️
#Learn2_Earn

من 4 سنين كنت لما أكون متضايقة كنت بسمع أغاني حزينة وأعيط! 😶

وقتها كنت ممكن أقعد يومين تلاتة متنكدة عادي ومفيش حاجة بتتحل!

وقتها أساسًا أنا مكنتش أعرف إن الموسيقى حرام، وبعد أما عرفت فضلت أقاوم كتير، وساعات كنت برجع أسمع تاني.

وطبعًا بالتدريج بعدت عنها خالص الحمدلله، ومبقاش فيه موسيقى بنزلها، ولا حتى بسمعها. ✔️

دلوقتي لما أكون حزينة هما 3 حاجات بعملهم:

١- بعيط وده شيء مفروغ منه. 😂

٢- بصلي وادعي كتير.

٣- بسمع بودكاست ديني.

حرفيًا لما بعمل كده، وقتها بحس براحة نفسية حتى لو المشكلة متحلتش، بس بعرف إن كل الزعل ملوش لازمة، وإن الدنيا دي دار شقاء، والحمدلله إن فيه جنة في الآخرة. 💯

أوقات كتير بنكون كلنا عارفين ده، بس محتاجين حد يفوقنا ويفكرنا، وده اللي بيحصل لما بعمل ال 3 حاجات دول.

حقيقي سماع الأغاني والبكاء على اللبن المسكوب وقت الزعل عمرهم ما هيحلوا مشكلتك، اللي هيحلها فعلًا هو إنك تروح لربنا تحكيله وتقوله كل اللي مزعلك، وساعتها هتعرف فعلًا أثر ده على حياتك في تغييرها للأفضل. 🤍

#Esraa_Shehta ✍️

رقية متدربة معانا في كورس كتابة المحتوى 👀

وطبعًا في الكورس عاملين محاضرة لتعلم التصاميم على كانڤا بحيث لو حد مش بيعرف يستخدمه يقدر يعمل تصاميم عليه.

رقية من ساعة ما شافت المحاضرة وهي حابة البرنامج جدًا ومش عارفة تخرج منه، وعمالة تعمل تصاميم كتير وتدرب. 🤭

وبكده اكتشفت موهبتها في الجرافيك بجانب كتابة المحتوى، وده فكرني ببنت قبل كده اكتشفت موهبتها في الڤويس أوڤر معانا بردو ماشاء الله.

مع Learn 2 Earn هتكتشف مواهبك المدفونة. 🔥😂

وبالمناسبة دي خليني أقولكوا إن فاضل أسبوع ونبدأ راوند جديدة من كورس كتابة المحتوى إن شاء الله، وبقى متاح لكوا الفرصة تكونوا جزء من عيلتنا الجديدة. 🤍

#Esraa_Shehta ✍️
#Learn2_Earn

السنة اللي فاتت في أواخر شهر 11 اتعملي منشن على بوست لحد بيدور على كاتب محتوى طبي بالإنجلش 👀

وقتها شكرت البنت اللي عملتلي المنشن وقعدت كده مع نفسي، وبدأت أفكر إني مكتبتش أي محتوى طبي بالإنجلش قبل كده!

وبدأ عقلي يقنعني إن خلاص متقدميش، أنتِ مش معاكِ نماذج، ولا عمرك كتبتِ طبي بالإنجلش قبل كده، ولا عمرك كتبتِ طبي عمومًا، هتروحي تقوليلهم ايه! 😶

وكالعادة دايمًا بحب أغامر، فوقتها مسمعتش كلام عقلي، وبدأت أخوض المغامرة، وكنت من قبلها بتعلم الكتابة بالإنجلش مع نفسي، ولكن كل شغلي كان مع براندات بالعربي بس.

فدورت على براندات بتقدم محتوى طبي بالإنجلش وبدأت أكتب إعلانات بالإنجلش كتدريب بردو مع نفسي كده ولوحدي. 💯

خدت النماذج اللي كتبتها، وبعت للشخص اللي كان منزل البوست وكنت صريحة معاه وقلتله إني مشتغلتش في المجال الطبي قبل كده، ولا حتى اشتغلت بالإنجلش، بس بتدرب مع نفسي على الكتابة بالإنجلش، ودي نماذج كتبتها، وكمان بعتله البورتفوليو بتاعي وقلتله ده شغلي مع براندات بالعربي.

وقتها رد عليا وقالي تمام هنشوف البورتفوليو ونبلغك، وبعد أسبوع رغم إن كان فيه ناس كتير مقدمين على الشغل لقيتهم بعتولي إني اتقبلت معاهم وهنبدأ نشتغل! 🤭

وبالفعل بدأت أشتغل وكان مشروع كتابة مقالات طبية بالإنجلش لشركة في لندن، واللي اكتسبت منه خبرة كبيرة أوي في المجال ده، وبعدها اكتسبت ثقة وبدأت أشتغل في الكتابة بالإنجلش مع براندات تانية الحمدلله. ✔️

يمكن لو كنت سمعت كلام عقلي وقتها وإني مش معايا نماذج، ومشتغلتش في النوع ده قبل كده، والكلام الكتير اللي عقلي كان بيقنعني به عمري ما كنت هكتسب الثقة اللي عندي حاليًا ولا هلاقي حد يثق فيا أساسًا طالما أنا نفسي مش واثقة نفسي.

خليك عارف إن الناس هتشوفك زي ما أنت شايف نفسك بالظبط، فقرر أنت عاوز الناس تشوفك ازاي. 🤍

#Esraa_Shehta ✍️
#Learn2_Earn

مفيش أخطر على العبد من التخليط، المريض مينفعش يتعافى إلا لو قطع سبل المرض، والمرض هو إتباع الهوى، والعلاج هو مخالفة الهوى في إتباع الشرع، وقل دائمًا أفعل هذا لله عز وجل.

د/ محمد الغليظ

لما تقرر تشجع نفسك وتديها طاقة إيجابية 🤭

المطلوب:

✳️ برطمان
✳️ استيكي نوتس
✳️ أقلام للكتابة (أو قلم واحد عادي)
✳️ تطبيق مكتبتي

هتلاقوا في التطبيق قسم خاص بالرسائل التحفيزية، تقدروا تكتبوها في الاستيكي نوتس وتحطوها في البرطمان وكل يوم تطلعوا ورقة وتعتبروا الرسالة مكتوبة ليكوا بحيث تديكوا طاقة إيجابية في بداية يومكوا. 🤍

#Esraa_Shehta ✍️

5 أخطاء ممكن تكون بتقع فيها وأنت بتسوق 👀

١- بتخاطب كل الناس ومش عارف جمهورك مين

محتواك مش بيخاطب كل الناس، لازم تعرف مين الجمهور اللي بتكلمه عشان تكتبله محتوى مناسب لاهتماماته يخليه يحس إن المحتوى مكتوب له هو مخصوص، وبكده تضمن اهتمامه للخدمة اللي بتقدمها. 👌

٢- مش بتخطط للمحتوى اللي هتكتبه

قبل ما تبدأ تكتب أي محتوى لازم تخطط له بشكل كويس جدًا، وتتأكد إن له هدف واضح عاوز تحققه. 💯

٣- محتواك قديم ومش بيضيف معلومات جديدة

الجمهور بيحب دايمًا المعلومات الجديدة؛ عشان كده مهم تخلي محتواك دايمًا متجدد، وتشارك معلومات جديدة ومفيدة لمتابعينك، وممكن كمان تجرب تغير في شكل بوستاتك، وتستخدم صور وفيديوهات مختلفة. ✔️

٤- بتعمل إعلانات كتير بشكل مبالغ فيه

الناس بتمل من الإعلانات الكتير؛ عشان كده لازم تخلي أسلوبك طبيعي وتنوع في المحتوى اللي بتقدمه، وأهم حاجة تركز على القيمة اللي هتقدمها. 🤞

٥- بتستخدم كلمات صعبة ومعقدة

ممكن محتواك يبقى يستاهل يتشاف، ولكن الكلمات الصعبة اللي بتضيفها بتخلي الجمهور مش فاهم كلامك، فبالتالي اهتمامهم بالمحتوى اللي بتقدمه بيقل. 😶

حاول دايمًا تخلي رسالتك بسيطة وسهلة وابعد عن الكلمات المعقدة عشان توصل لجمهورك بسرعة.

وأخيرًا، خليك عارف إن التسويق بالمحتوى مش مجرد نشر بوستات، ده رحلة مستمرة لتحقيق نجاح حقيقي.

لو عاوز تعرف ازاي تسوق بشكل صح، فخليني أقولك إننا فتحنا الحجز للراوند الجديدة، اكتب تم وهنبعتلك كل التفاصيل المتاحة. 🤍

#Esraa_Shehta ✍️
#Learn2_Earn