#IBRAT
Bir yigit donishmandning oldiga kelib, salom alikdan so‘ng:
- Taqsir, haqqimga duo qilsangiz, men ham badavlat bo‘lib ketsam va ko‘p ko‘p ehsonlar qilsam”, dedi. U zot:
- O‘g‘lim, boy bo‘lsangiz o‘zgarib qolishingiz ham mumkin, ana ko‘ring, ming-minglab boylar bor, lekin ko‘pchiligi ehson qilishdan qochadi. Siz boy bo‘lmasingizdan turib ham ehson qilavering”, - deb aytdi.
- Mening hech narsam yo‘q-ku, qanday ehson qilaman?
- To‘rt muchangiz butun va beshta a’zoingiz – ko‘z, og‘iz, quloq, qo‘l, oyoqlaringiz sog‘lom, shular bilan ehson qilasiz”.
- Iltimos, kengroq tushuntirib bering.
Ko‘zim bilan qanday ehson qilaman?
- Odamlarga mehr nazari bilan qarang, hech kimga hasad bilan qarab “bu odam buncha boylikni qayerdan oldi, u nima ish qilar ekan, boyligini menga bersa edi”, degan o‘ylarga bormang. Ayollarga shafqat nazari bilan qarang, shahvat bilan emas. Chunki birinchidan, u sizga nomahram, ikkinchidan, har bir ayol yo kimningdir qizi yoki kimningdir xotini bo‘ladi. Odamlarga qo‘lingizdan kelgancha mehr ko‘rsatingki, toki ular ham sizga mehr bilan javob qaytarishsin. Quyoshni ko‘rmaysizmi, hammaga birdek kulib qaraydi, shu sababli uni hamma yaxshi ko‘radi”.
- Og‘zim bilan qanday ehson qilaman?
- Og‘zingizni faqat yaxshi, xayrli so‘zlar aytishga xizmat qildiring. Yolg‘on, bo‘hton, so‘kish so‘zlarini aytishdan uzoq bo‘ling. Birovlarni soxta takalluf va maqtovlar bilan o‘zingizga og‘dirishga urinmang.
-Qulog‘im bilan qanday ehson qilaman?
-Qulog‘ingizni yomon so‘zlar, yomon suhbatlarga tutmang; g‘iybat bo‘layotgan joydan qoching, agar kuchingiz yetsa, o‘sha g‘iybatni to‘xtating yoki g‘iybat qilinayotgan insonni himoya qiling, bu siz uchun foydali bo‘ladi; nogoh biror nojoiz suhbatga yo‘liqib qolsangiz, o‘zingizni eshitmaganga olib, o‘sha joydan uzoqlashing va bu suhbatni hech yerda oshkor qilmang.
- Qo‘lim bilan qanday ehson qilaman?
- Qo‘lingiz bilan solih amallar bajarasiz; imkoningiz boricha odamlarga yordam qilasiz; biror joyda yomon ishni ko‘rib qolsangiz, qo‘lingiz bilan to‘xtating, shunda o‘sha yomonlik qilmoqchi bo‘lganlarga Alloh yo‘lida yaxshilik qilgan bo‘lasiz.
— Oyog‘im bilan qanday ehson qilaman?
- Gunoh ish bo‘layotgan, biror fitna uyushtirilayotgan joylarga qadam bosmaysiz, yaxshi ish bo‘layotgan joylarga, ishlarga qarab yurasiz. Shundan keyin donishmand yigitning haqiga duoyi xayr qilibdi. Yigit esa xursand bo‘lib:
- Sizga katta rahmat! Menda shunday keng imkoniyatlar borligiga e’tibor bermas ekanman, albatta, aytganlaringizni qilaman debdi.
Donishmand esa:
“ - Bolam, himmatingizni baland tutsangiz Razzoq Egam qo‘lingizga davlat berganini bilmay ham qolasiz”, - deya yigitni uzoq duo qilibdi. Yigit raxmat aytib, diliga yuksak niyatlar tugib, donishmandning huzuridan chiqibdi.
https://t.me/Dildora_nur
