"ДАЙМОХК" ГАЗЕТ

Нохчийн Республикин Мехк-Дас Кадыров Ахьмад-Хьаьжин Рамзана дӀакхайкхийначу Нохчийн къоман историн а, историн хӀолламийн а, архитектурин а, культурин тӀаьхьалонийн а шарна лерина, Нохчийн Республикин Мехк-Ден гӀоьнчас, НР-н къоман политикин, арахьарчу зӀенийн, зорбанан, хаамийн министран Дудаев Ахьмадан тӀедилларца Журналисташ кечбаран а, йухакечбаран а туьшо "Хенийн зӀе: нохчийн журналистика тахана а, кхана а" цӀе йолу горга стол дӀайаьхьна "Даймохк" газетан редакцехь.

Цигахь дакъалаьцна республикин бевзаш болчу журналисташа, йаздархоша, историкаша.

Гулбеллачара йийцаре йира нохчийн журналистикин истори а, тахана долу хьал а, цуьнан кхане а.

Чекхдолучу шеран уггаре а сатийсина хилам!

ГӀуран беттан 4-чу дийнахь Нохчийн Республикин Мехк-Ден Кадыров Ахьмад-Хьаьжин Рамзанан дуьххьалдӀа эфир хир йу.

Цуьнан гурашкахь Нохчийчоьнан Мехк-Дас жоьпаш лур ду журналистийн а, бахархойн а хаттаршна.

Шун аьтто бу шайн хаттар хӀокху лоьмарца 8 (995) 800-01-11 тайп-тайпанчу мессенджершкахула схьадаийта.

ДуьххьалдӀа эфир гойтур йу НР-н Мехк-Ден социальни зӀенашкарчу агӀонашкахь а, "Грозный" НПТРК-н эфирехь а, регионан шуьйрачу хаамийн гӀирсийн социальни зӀенашкарчу агӀонашкахь а.

Украинера леррина операци, Йуххера Малхбале, чоьхьара а, арахьара а политика, республика кхиаран тӀаьхьалуонаш, бахархойн хьашташ кхочушдар - уьш а, кхидолу гӀуллакхаш а хир ду Нохчийн Республикин Мехк-Дас дакъалоцучу дуьххьалдӀачу эфирехь!

Ларйе эфир!

Нохчийн Республикин Мехк-Дега Кадыров Ахьмад-Хьаьжин Рамзане хаттарш дан аьтто бу Нохчийн Республикин бахархойн а, хьешийн а. ЗӀенехула шен хаттар дала аьтто боцучунна, и шен хаттар кехат тӀе а йаздина, чутаса меттиг а йу кечйина Соьлжа-ГӀалин Эсамбаев Махьмудан цӀарахчу бульварехь.

ГӀуран баттахь Нохчийн Республикин Мехк-Ден Кадыров Ахьмад-Хьаьжин Рамзанан хӀорашеран пресс-конференци дӀахьур йу.

Дагадоуьйту, Кадыров Рамзанан стохкалера дуьххьалдӀа эфир 2,5 сохьтехь лаьттина хилар а, цо 57 хаттарна жоп делла хилар а.

ДуьххьалдӀа эфирехь довзийта ца ларийна долу хаттарш а ца дуьсу жоп доцуш, царна а дуьззина жоьпаш ло.

2024-чу шарахь Къоман спортан премин лауреат йаьлла Нохчийн Республика. Цу хьокъехь хаам бина Нохчийн Республикин физически культурин а, спортан а министра Кадыров Ахьмада телеграммерчу шен агӀонехь.

"Хазахетарца хаам бо 2024-чу шарахь Нохчийн Республика Къоман спортан премин лауреат йаьлла хиларан хьокъехь. Вайн регионо хьалхара меттиг йаьккхина "ГТО-н комплекс — могашалла а, кхиаре а некъ: Йерригроссин "Готов к труду и обороне" физкультурни-спортан комплекс йукъайалорехь тоьлла организаци" декъехь. Вай даккхийде оцу мехалчу декъехь хьалхара хиларх", — йаздина Кадыров Ахьмада.

РогӀера XV-гӀа Къоман спортан премин толамхой билгалбаьхна Москвахь. Куьйгаллехь Нохчийн Республикин физически культурин а, спортан а министран хьалхара заместитель Даудов Ӏумар а волуш нохчийн делегаци хилла цигахь.

Цул сов, цигахь Республикин футболан спортан школин белхахо Алдамова Зулихан а тоьлла лерина йуьртахь физкультурни-спортан болх вовшахтохарехь.

"И кхиамаш Нохчийн Республикин Мехк-Дас, Россин Турпалхочо Кадыров Ахьмад-Хьаьжин Рамзана массо а агӀор гӀо дар бахьана долуш бохуш бу. Физически культура а, спорт а лелон лууш волчунна тоьлла хьелаш кхуллу цо", — аьлла Нохчийчоьнан физически культурин а, спортан а министра.

Культурехь а, модехь а йоккха меттиг дӀалоцуш долу "Firdaws" модийн цӀа шен15 шо кхачар билгалдоккхуш ду. Нохчийн къоман гӀиллакхаш а, Ӏадаташ а лардеш кхузаманан инновацешна йуьстах ца буьсуш схьабогӀуш бу цӀийнан белхахой.

Модийн цӀийнан бух Кадырова Медница боьзна бу. 2009-чу шарахь цо диллина ду и цӀа. Цо куьйгалла а деш, шатайпа духаран коллекцеш арахоьцу бренд хилла дӀахӀоьттира "Firdaws". Цо йоккха меттиг дӀалоцу дуьненан модийн дахарехь.

Мусин Меднин йоккхаха йолу йоӀ Кадыров Ӏайшат а йара жима йолуш дуьйна дизайнаца а, модица а чӀогӀа гергарло долуш. Иштта, 2016-чу шарахь "Firdaws" модийн цӀийнан куьйгалле хӀоьттира иза. Цо куьйгалла а деш, дуьненан дуккха а болчу гайтамашкахь дакъалоцуш схьайогӀуш йу бренд.

Тахана модийн цӀийнан белхахой 15 шо кхачарна леринчу юбилейна кечамаш беш бу. Оцу денна лерина даздарш а дӀахьур ду Соьлжа-ГӀалахь.

"Даймохк" газетан белхахоша даггара декъалбо "Firdaws" модийн цӀийнан белхахой 15 шо кхачарца. Дала тӀаьхье беркате йойла шун!

ТӀеман леррина операци дӀайахьаран муьрехь Даймехкан патриоташ гулбаларан туш а хилла дӀахӀоьттина Россин Федерацин Президентан Путин Владимиран цӀарах йолу Россин спецназан университет (Гуьмсе).

Мехкан суверенитет а, цхьаалла а Ӏалашйаран гӀаролехь латта кийча болу кегийнах бӀеннашкахь богӀу цигахь Ӏама.

Царна Ӏама мел оьшуш долу хьелаш цигахь кхоьллина ду.

Шаьш Ӏамочу бӀаьхошна тактикин а, тӀеман а, инженерин а, техникин а, топографин а, медицинин а, хаамийн а хаарш хьоьху меттигерчу инструкторша.

Цул сов, РУС-хь а Ӏемаш, тӀеман лерринчу операцехь шайн лаамехь дакъалаца боьлхучарна кхузаманахьлерчу, дикачу барзакъца а, герзаца а, кхиболу гӀирсашца а кхачойар а.

Баттахь 200 000 сов сом а луш, 4 баттана Россин Оборонин министерствоца барт бо. Иштта Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цӀарахчу йукъараллин фондера 100 000 сом а ло.

Иштта, РУС-н зӀенаш а йовзийтина цо:
1️⃣+7(925)319-77-77;
2️⃣+7(925)328-77-77;
3️⃣+7(925)661-77-77.

Нохчийн Республикин а, Къилбаседа ХӀирийн Республикин а Парламенташа цхьаьнагӀуллакхаш дан барт бина.

Шина регионан законодательни органаша цхьаьнагӀуллакхаш даран барта кӀел куьйгаш йаздина Къилбаседа Кавказан Парламентски Ассоциацин Советан кхеташонехь.

Мехалчу кехаташ кӀел куьйгаш йаздира НР-н Парламентан Председатела Жамалдаев Шаида а, Къилбаседа ХӀирийчоьнан Парламентан Председатела Тускаев Таймураза а.

Паччахьан эскарехь 23 шарахь гIуллакхдина бевллачул тIаьхьа салташна бакъо ло гIопал арахьа (гIопана уллехь) баха ховша. Россехь шайга хьоьжуш да-нана, йиша-ваша доцу салтий баха хевшича, уггаре а хьалха биллинчу урамех цхьаъ бара Александровская цIе йерг. 1850-чу шарахь Нохчийн махкахь хиллачу паччахьан Александр ШолгIачун цIе тиллина берг уггаре а коьрта урам ларалуш а бара. Коьртачу декъана оцу урамехула дIасалелаш бара эскаргIуллакххой а, маьрша нах а. Буьрсачу гIопаца ша тайпа зIе латтош хилла оцу урамо. Оьрз-ГIалара, Шелковскера, Новр-ГIалара вогIуш верг а оцу урамехула вогIура. ВогIучунна дуьхьал богIура «ЦIен Ков» Триумфальни кортал йолчу. Новкъа воккхуш верг а, цига кхаччалц новкъа воккхура. Ткъа и Триумфальни Нортал паччахьан Александр ШолгIачун сийнна йина йара, иза гIопе вар иэсехь дисийта.

(КхидӀа йеша "Даймохк" газетан 91-чу лоьмарехь)

Нохчийн Республикин Мехк-Да, Россин Турпалхо КАДЫРОВ АХЬМАД-ХЬАЬЖИН РАМЗАН.

#Кадыров

Соьлжа-ГIалара цIерпоштнекъан вокзал йаран белхаш чаккхене боьлхуш бу. Оцу хьокъехь хаам бира Нохчийчоьнан пачхьенан мэрин пресс-службехь.

Йина йаьллачул тIаьхьа цIерпоштнекъан вокзала чохь сохьтехь 350 пассажиран хьашт-дезар кхочушдийр ду. Вокзало дIалоцуш йерг кхо эзар сов йиъкIов метр меттиг йу. Таханлерчу денна тIекхочуш белхалойн бригадаша чекхбаьхна 
чоьхьара хьахаран берриге а белхаш. Иштта, чекхдаьккхина инженерни коммуникацеш йар. Карарчу хенахь дIахьош ду гIишлошна арахьара куьцаш дахар а, гонахара меттигаш тойеш-хазйар а.

«Инженерин декъехь чIогIа чолхе объект йу иза. Вокзал 
йеш йу массо а тайпанчу пассажирийн хьашташ кхочушдаран кхузаманан берриге а лехамаш хьесапе а оьцуш. Къаьсттина тидам тIебахийтина дIасабаха хала долчу бахархойн хьашташ кхочушдарна, царна бIегIийла хьелаш кхолларна. Федеральни барамашца нийса а догIуш, царна ма-хуьллу аьхна хьелаш кхолла гIиртина кхузахь. Цу йукъадогIу пандусаш йар, 
цIерпошт схьакхачаре хьоьжучарна къаьсттина зал йар, садаIа чоьнаш йар, иштта цхьамогIа кхидерг. Иштта, берашца цхьаьна болчу пассажирашна оьшуш мел долу хьелаш кхоьллина», – дийцира Соьлжа-ГIалин мэра Кадыров Хас-Мохьмада.

Билгалдаккха деза вайн пачхьенехь йина йолуш йолчу керлачу цIерпоштнекъан вокзалах тера вокзал дуьненахь кхин 
цахилар. Лакхара охьахьаьжча, тIома даьлла доьдучу олхазарх тера хир йу иза. Комплексан кхин цхьа башхалла хир йу 67 метр лекха бIов. Цу тIехь доккха сахьт хир ду.

Говзанчаша дийцарехь, цIерпоштнекъан вокзал йечу хенахь пайдаэцна кхузаманан уггаре а тоьллачу технологех а, коьчалех а, гIирсех а. Дозанал арахьара беана шагатIулг а, 
гранит а. Цул сов, архитектурин куьцаш, бустамаш долуш хир 
ду комплексера дерриге а стогарш.

Кадыров Ахьмад-Хьаьжин цӀарахчу йукъараллин фондо тӀеман лерринчу операцехь дакъалоцуш болчу бӀахойн хьашташна 20 грузопассажирски УАЗ машенаш эцна. Цу хьокъехь хаам бина Нохчийн Республикин Мехк-Дас Кадыров Ахьмад-Хьаьжин Рамзана телеграммерчу шен агӀонехь.

"РФ-н МЧС-н Нохчийчухула йолчу урхаллин хьаькамца Цакаев Алиханаца цхьаьна тӀеман леррина операци дӀахьочеш йолчу российски подразделенешна леррина транспорт дӀайелира. Цо дика гӀо-накъосталла дийр ду вайн бӀаьхошна шайна тӀедихкина декхарш кхочушдарехь", — аьлла Кадыров Рамзана.

Нохчийчоьнан Мехк-Дас билгалдаьккхира, СВО-хь болчу бӀаьхошна Кадыров Ахьмад-Хьаьжин фондо гуттар а гӀо деш хилар. Царна йохьуьйту транспорт а, дааран сурсаташ а, молханаш а, тӀеман духар а, кхидерг а.

Кадыров Рамзана тӀеман лерринчу операцехь дакъалоцуш болчу бӀахошна гӀо дарна даггара баркалла элира Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цӀарахчу йукъараллин фондан Президентана Кадырова Айманина.

«Единая Россия» партис йеш йолчу а, ремонт йеш йолчу а социальни объекташкахь долчу хьоле хьожуш, хIора кIиранах беш болу талламаш бира хIокху деношкахь а. Партин декъашхоша а, йукъараллин жигархоша а теллира тайп-тайпанчу объекташкахь дIахьош болчу белхан дикалла. И объекташ йеш йу Партин халкъан программин гурашкахь.

Таллам беш берш хьаьвсира Иласхан-Юьртахь йеш йолчу физкультурин-могашалла чIагIйаран комплексе, Жимачу АтагIахь а, Мартанчохь а йеш йолчу лоьрийн амбулаторешка, Рубежни йуьртахь деш долчу культурин цIийне, ткъа иштта Соьлжа-ГIалахь деш долчу дукхапетарш йолчу цIенойн комплексе. И цIенош деш ду йохарна кхераме йолчу хIусамашкара бахархой чукхалхоран Iалашонца.

Талламаш баро гайтира массанхьа а белхаш билгалйаьхначу хенашкахь дIахьош хилар, белхан дикалла хила деззачу тIегIанехь хилар, гIирсийн а, коьчалийн а дикалла лакхара хилар.

Билгалдаккха деза «Единая Россия» партин халкъан программица вайн берриге а махкахь йан леринарг 213 эзар социальни объект хилар. Нохчийн Республикехь 2022–2023-чуй шерашкахь 600 гергга объект йина, ткъа 2024-чу шарахь йан леринарг а, реконструкци йан леринарг а 200 сов социальни а, инфраструктурин а объект йу. ДIабаьхьначу талламо гайтина ма-хиллара, оцу йерриге а объекташкахь гIишлошйархой кхиамца белхаш беш а, шайна хьалха хIиттийна​ декхарш хьанал кхочушдеш а бу, шайна тIехь долчу жоьпаллех кхеташ а бу.

Нохчийн Республикин Мехк-Дас Кадыров Ахьмад-Хьаьжин Рамзана Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин цӀарахчу йукъараллин фондера рогӀера машенаш дӀайелла ТӀеман лерринчу операцин хьашташна.

Нохчийн Республикин Мехк-Ден хьехамчас Даудов Ӏумара инстаграмерчу шен агӀонехь гайтина цигара видеокийсак.