القصيده الكامله @alshar_alsahih Channel on Telegram

القصيده الكامله

12 Nov, 19:53

الثورة من تبدي گصيبة
وتنضفر للوطن , للچف النظيف
لديرة سمرة..
الثورة من تبدي قصيدة
وفكر شعبي
الما تلمّ الناس ماتسّمّه ثورة...
وطولك اليندل مشاوير الملح والماي
وعيون الشمس
كلما يطيح تغنّي فوگ ترابه شجرة...
انت يازفة عشگ ليلة مطر
صلّت عليها گلوب خضره..
گلبك يجيس الفلِح والگاع
وتهلهل بيادر
ترگص الحنطة وطن والديرة خير...
صوتك يعلّمني
احب گاعي وهويتي
واضحك بوجه الهوى شماغنّى طير..
چنْت الم دمعي اعلى مودك
يم جرف عاشور ابدّي
واشتعلّك شمعة شمعة...
هسه چم عاشوريندل
خلّص دموعي وكسرني
الليلة مابيّاش دمعة...
الليلة بس آنه
وضريحك والبخور
وعلگ بالشباچ من عاشگ علامة...
الليلة اشد راسي بحضرتك
ياندى يالون
ياطلعة فجر يتنفّس الدنيا ابتسامة....
للعشگ مشتولة روحك
طينتك طينة صريفة و نيّتك نيّة حمامة...
أكبر من الدمعة صوتك
وأبعد من الشعر ماضيّه وجديده....
انت بس عبد الله عندك يشتل الصحره براءة
و يسگي تاريخ العطش ماي وقصيدة...
غروبهم مابدّه شمسك
ذيچ شمسك طافحة بچبد السمه....
وذاك شوفك
يمتد لآخر مدينة
يسيّر اعليها العمه ...
وهذا صوتك يغزل السچة البعيدة
ويندل المهرة الجموح...
واحنا شبّينه اعلى مودك
عِشرة صرنا ويه الرماح
وغزّرت بينه الجروح ...
شكثر متنه
شكثر فوگ صدورنا داست حوافر
وانت تشهگنه اعلى كيفك
نسمة نسمة ...
تريدنه نضوّي الوطن
من تكبر جبال الظلام
ونشتعل بالثورة نجمة.....
الليلة من يطفه الگمر
چم نجمة تطفه ؟!..
وچم نهر بالديرة ينسد؟..
وباچربوجه العطش چم وردة توگف!
باچرالغيم ايتدلّه
وچم علگ للثورة ينشد!..
خاطر يطش الخضار ويه المطر
ويطير دخان الحرب
واللون الاسود....
خاطر يبردن عليك گلوب اهلنا
وگلب خيمة زينب المحروگ يبرد
گلب خيمة زينب المحروگ يبرد

ميثاق الهلالي
@alshar_alsahih

627

القصيده الكامله

07 Oct, 22:41

چنت بين الحلم و النوم
و اعيوني سما و دخان
بلساني غريب الصوت يوصل شفتي و ينعس
مشيت اعلى الضباب ارموش
و بچتافي حلم نورس
و صفنتلهه .. و شفت كلشي
الصبح يستعطي بخة نور و بچفه الشمس تغرگ
و لون الدنيا باهت حيل و بقوس القزح تشرگ
و متفرهد عفاف الليل و من گصته الگمر يزلگ
اروحن وين احس روحي ذنب مكتول
لا ينّسي و لا ينعد
و اطيحن على الريح اشراع
و الروج بشراييني
و تنطش علجرف روحي سعف و ارماد
و اتبخر لهب و ارماد
و يتخيل جفن عيني دمع و ارماد
يگعد علجرف صوتي و ونين الهور
و الگمرة زلف و ارماد
اروحن وين ادگ ياباب ؟
ابيا شباچ الگه العشگ مو مغسول؟
و الگط ريحة العشاگ من يا خد؟
و ادوّر يا حلم و النوم بابه انسد؟
و افز مرعوب من فكري
و يمشيني الحزن جمرة اعلى صدر الماي
و اتراگص لهيب و ماي
و اتغنه
و يغنيني البرد دخان
و اتبخر نجم مدفون بالگمرة
أنا شاعر حزن ما اندفن بالضيم
الشاعر بالفرح گبره
يضل صوتي وميض اسهيل
يلاگي الروي من يخشن ظلام الليل
و يضل شعري حديقة هيل
من تعطش الگاع و ما تخضر سيل
من الثلج يطغى بثورة البربين
من الموت يتطاول على العدلين
اضل آنا و يضل فكري
و يضل صوتي امتداد الطين

#مسلم_الخنفري

@alshar_alsahih

2,345

القصيده الكامله

24 Sep, 11:38

ملامح الظلام

نام و ارزق عينك شويه ظلام النور وحشة
و غيّر اشويه اعتقادك و اكفر بتاريخ فكرك
تلگه هاي الناس چذبة و تلگه هذا الغيم چذبة
و حتى هذا الصبح چذبة
و تلگه بين الچذب روحك سفر ما بين الملامح
وين ما يلتفت فكرك يلگه حل بلا سؤال
و انت تمشي
چن متاهة ، و ضايع بنفسك خريطة
تريد تحچي،تضيع بين اللسن چلمة
تريد تصرخ، تلگه صوتك طفل اخرس يخمط من الفوضى حلمة
وين رايح خلصت عمرك مسافر
خلصتهن ذكرياتك سفرة سفرة
خلصت صفنات وجهك ذكرى ذكرى
النور حريةْ تطرّف
الشمس للظمة قناع
و الحقيقة خيوط هاجس ضاعن بصفنات شاعر
إفتح اعيونك و عاين ، وين ماتعاين تناقض
وين ما تنولد فكرة تموت عاجر
إلإباحية حقيقة و لبسوها الليل ساتر
و السكوت شگد مقدس و الحچي طغيان كافر
و انت تمشي، تشوف وادم من حزن
ناس ما يضحك ثغرها تريد ضحكة من الجفن
اتريد خيط من الشمس ياخذها لله
و طعم موت و باب جنة و قفل مفتاحه ذهب
الجنة حريةْ سجن
ناس ما شبعانه موت،لأن ما شافت حياة
و الحلم ، ما شاف عمره
الليل من يطلگ حلم ذباحه فجره
الصبح مأذنةْ المگبرة
هذا يعني الموت فكرة
و الحياة اعلى الحياة تصير ثورة
و الوكت ثورةْ ملامح و انقلاب اعلى الشغف
و احتلال بلون أبيض تنگط اسنونه نفاق
كلشي بالدنيا منافق لونه أبيض
كل ضوه يتعده جفنك هذا حلمك
غمض اعيونك و عاين تلگه للظلمة وجهْ
و تلگه هذا الغيم ياخذ من جمال الورد رشة
و تلگه ناس بلا دغش
و الصبح لو يغفه بالليل يتغشه
نام و ارزق عينك شويه ظلام ، النور وحشة

#للرائع _مسلم_الخنفري
@alshar_alsahih

3,106

القصيده الكامله

18 Sep, 22:03

اكتبني ضوه بكل حايط أظلم

فيضني نهر كل روح يغسلها،

العطش من يشتهيك ألتم

حمامه لكل مدينه ينام بيها الليل غبشه

ويگعد الناس الصبح ميتين

يمته يگوم بيَّ الطين

شجره

ويصعد بروحي الحنين

گمره

تفيض بيَّ الروح گمره

وتلعب بروحي الشمس مهره

مهره.. وقصيده

توگع بروحي ورگ سدره وفرات

أخضّر.. واشتعل.. واردود

مرات

مرات الزمن يشتلني بيرغ ظيم بالشدات

افوتن نار بالشدات

اردنْ لابِسْ ثيابْ الرمادْ

اردن والحزن ليغاد

سواجي وناس تعبانه السچچ بيها

وضمير.. يجيس ممشه الشمس تالي الليل

ويغسل حزن عمره بسواجيها

وتظل تحوم، طيرة ماي.. روحي العطش ماذيها

أموتن غبشه ثوبي تراب

عشب روحي صبر ع الباب

أموتن سكته گلبي كتاب

واليقره الگلب يعمه

وأظل بين الگلوب الميته چلمة خوف

روح الشعر چلمة خوف

تاخذني شماته بكل گلب ممحل

واطكـ بيد السوالف شوف

واوگف لك سمه وواهس يگلك موت واني أصهل

وأظل گامه بگلب ممحل

أظل گامه بسفرها الگاع تتعب..

والشمس بيها عمر تتعب..

يظل فيها شبر

يحچي النده ويه الرمل والعاگول

لو يحچي الحزن گلبي

كل ما يرتوي الخوف البروحي يطول

يا هلبت يجي ويكتبني مهرأخضر

وأفتح بالهوا البيبان ع الگمره

نهر أسمر

يفتح بالمسامات الينابيع البعيدة

والقصيدة

بلبل بروحي يغني الماي.. والحرية.. والگاع الجديدة

إكتبني الدهر يمحي الصدگ.. ويعاند النيات

نبعت بعين شمسك ماي بارد.. يثگل بدمي الفرات

يركض بروحي الفرات الزين دهله

يصعد بروحي الحچي الواگف ضمير

وانتَ ذاك الماي كل دنياك سهله

وآني بيك ينام گلبي ويگعد بحومة عذابه

يمته اشوفك فارس بتالي يجدح مهابه

يمته اشوفك.. چفك يجيب الصبح للبيت

وينام الصبح ويه الزغار

يكبر بحلم الزغار

دنيا.. وولايات

يگعد بدرب المدارس، عافيه.. وورد الصبح

يمته اشوفك.. مهرك يدگ الحوافر ع الهوا رايات

وأگلك هاك روحي وروح

يا ريتك تخلصني الحزن مثل الخبز..

مثل القميص

الشمس مثل الناس، من يثگل حزنها بروحي،

وأسكت هم

يا ريتك تعتني من السما للگاع

وانبت طير فوگ الدم

تاخذني جنح مضوي.. السفر واهس..

وأطير بكل سما

بكل حايط أظلم

مكتوب العمر من يشتعل بالناس حيره.. وهم

مناره هناك تلهث للنبوه سيوف

من تلهث مناره هناك

أرد للروح أفيضها

العطش من يشتهيك ألتم

وأظل.. أظل ألتم

وأرد نقطه بحرف چتال

علي الشباني
@alshar_alsahih

3,169

القصيده الكامله

27 Aug, 23:01

امس من باگو اعيونك گلت غنو مواويلي

امس من من شبگو چفوفك

تكسر سنبلي بچفي وعرفت ابكسرة الفلاح
من ضاعت محاصيلي

يا بذات يالتشبه حنين الخذلو إمالة

تعز روحي اسمع بطاريك وتكتر بالوشاله

چنت راويك ياعرج الصنوبر وانا المحليك

ياطير العشگ غير الصدگ شنطيك
امس من حطو اعله اسمك سوالف لوم گمت ابچي
غطيني
بحلات النوم ياطيفي وحبيب النوم

اخذني اوياك يا ميزت عيوني ولذة المكتوم
يانبعة ولع روحي الگظاها الوم

خفت يالوصلتني امن الزعل للسوم
لون تدري الضوه ابراس الضرير احلام ماخليتني اتمنه

ولو طبع الرجه ايتعب الگلوب البيض
وخاف ابذلتي اتحنه

ونشدك ليش كاروك الصور يمك غفه بحسرة دللولك

گبل من حملي وتنخاك هسه احمولي وحمولك

شوف شگد خذتنا بعيد يالنادر

ولا حب اشتهي اتخطاك غلطه بعثرة الشاطر

_مصطفى الاشتراني

3,695

القصيده الكامله

21 Jul, 13:02

العش مو حطب !!!
خل يفهم الحطاب
العش بيت شرعي وساكناته طيور
وأحياناً يضم عشاگ متصافين ..
أحلام ،
وأريكه
ونافذه إعله النور

اعله غفلة من الزمن
لن بيتهن مهدوم ...
والغصن اليشيله من الاصل مبتور
الدستور؟؟
منقوص اعله هذا الحال
الحقيقه ، العشگ لازم ينكتب دستور
العصافير اعتراض الهن اعله الحطاب
جاب عشوشهن
ونطاها للتنور !!!
ازرع گاع روحك
رازقي ونسرين ..
واشتلها گصب من يشح ماي الهور
وأفطم منجلك
لوراد يحصد غيم
وأكسر منجلك لو راد يحصد زور؟
واخذ دمعة عزيزك
واستعيره أفراح
ولبسه العيد بيدك واكشخ بعاشور!!!
انشدني ..
العسل ماضايگه النحال ..
القاروره بيده
والعسل محضور
من تلثم فراشه
خدود زهره تنام
تسكر بالندى وتطيح بالمحذور
شارب من خضار
عيونك الصفصاف
وراضع من بياض خدودك البلور
روح أشتل حياتي بشجرة الصبير
أنا احلامي عوانس
مايهمها البور!!
افرشلي ضحكتك
خلي ، أمدد كيف
وخل في ّ الضفيرة يدغدغ الناطور

تغرف روحي مني
بچفك النعسان ؟؟
وتشربني خطيه وخاطرك مكسور!!
جمعنه المايصير
البرد والنيران
شفتي تنث بروده
وشفتك تنث نور
يقام الحدّ
على من لمس شفتك يوم ؟؟
ويُحاسب ، مثل مايتحاسب المخمور
أخذ مني دمع
ماطالبك بالدين
يمته النهر راد فصول من ناعور
تدريني سَليل ،
الما يشم مشموم ،
ابن بيت العفاف
الصاوغ الله نحور
بعد شبرين عنك والحضن ينخاك
أشم ريحة ثيابك
والگلب مسحور
ياجنة عدن
يادنيه تنبت روز
ياسحر الهند وأحلام نيسابور
هسه الحب حضارة
وبابها كرستال
تتلاگه المجره بكل مسيه تدور
أنا روحي ندى
وروح البنات ورود
أنا موتي ندى
وگلب البنات أگبور !!
بالك تحط روحك
دكـه للتغسيل
جثمان الفرح مافززه الكافور؟؟؟

سيد عماد المطاريحي

@alshar_alsahih

5,067

القصيده الكامله

02 Jul, 12:15

((علم اخرس))

شفه تتراگص رعب
ولحچي ايظم الحچي

ول جدار ايزع جدار

ولوطن كادود اسمر ظهره بيمن ينتچي
ودمع چذاب ايتضحوك بلبچي

السكوت اول عدو
وموگد احچاية الثائر تلگه بييه اشگد دفو

شعب حگه امطلعه من عين الحلم
علم اخرس حجزو ابگلبه الچلم
وحچو اتفاگ القبائل حته لايحچي القلم

وطن ينزف دم حزن
وطن لو ناسك نزيهه اتهد گطن
وطن وعيونك دخيله ابياسلف متروسه خاطر تستچن

ياوطن مامن رفيچ........
دمع شمعه اتخلص اصفاحك حريج
عطش مشحوف ايتحلم بلغريج

امنين متباوع جفاف
امنين متباوع حمل طاغي ابوزنته عله الچتاف
رعنه هايه حزانه وتردف رداف

فقر كافر......
فقر دمع قافيه وماصحله شاعر
فقر زلمه وسيف اكو بس ماكو شاهر

كلشي ذمه........
صوت عينك من تكتمه
شوف صوتك من تلچمه
الزلمه لو ماصار زلمه

للظلم لاتنطي ظهرك يستقلك هايه ولمه
وزع الموت اعله روحك ورفض اتلمك مذمه

#علي_محسن_المطوري

@alshar_alsahih

6,224

القصيده الكامله

04 Jun, 21:55

العمر كاضي / كاظم اسماعيل كاطع
________
لعمر كاضي
الدنيا ما دام انتهت..
والعمر كاضي
منهو بينه بلا خطيئة
خَلْ يكوم اعلّه الملف
يكشف الماضي

خل يجي يسويله مره..
ايشوف بيتي إشراح وشظل
من غراضي
ناس صعدت ناس بعدت
وأنا بخيمتي وسوقي وعكاظي
وجان بامكاني أصير
لكن هموم العشيرة…
لا أنا راضي على شيخي
ولا عليَّه شيخي راضي
جان بإمكاني أصير
أملاك وقصور وأراضي
لكن أعرف هاي كلها
ماتساوي فركة إيد..
وراس محني ابّاب قاضي
لكن اعرف هاي كلها ماتساوي
نوم ليلة اعله المخده
بليَّه خوف وبال فاضي
هِيَّ مو بالسرعة تلَّم
ولو على السرعة يصير
أغنى شخص عدنه الرياضي
خلصت عمري بدولتي
لا أنا راضي اعله وضعي..
ولا عليَّه الوضع راضي

كاظم اسماعيل كاطع

@alshar_alsahih

5,463

القصيده الكامله

04 Jun, 21:53

ريحة الحنطة
آخر قصيدة للشاعر الكبير
كاظم إسماعيل كاطع

ماخذ وياي العراق بجنـــــطه
ما كفت الجنــــطه
طالعه منها مناره وعثك نخلـــه
وشعله من عيون نفطه

وراح نوصل… ذاك حد السيطرات
وذيج ضوايات المحطه
وين اضمها.
لا هوه اكتاب ويخليه المسافر جوّه أبطـــه
الحمد لله.. الدنيا ليل… ونقطة التفتيش سنطه
هاي نقطه ويمها واحد
نقطتين. ثلاثة. خمسه
ست نقاط ويمها واحد!!
تنحسب مليون نقطــه
وصاح مسؤول النقاط بصوت عالي
هاي ما معقوله جنطـه
بصيحته انزرعت الساحــــه
رجال أمن ورجال سلطه
بجرة السَحَاب شافت عينه نجمـه
وطكته ريحة الحنطــه
ما لكه غير العلم.. كلي شيـفيدك
كتله غربه
إحنه غربه
ومن نموت هناك… جا بيش انتغطه؟
أخذ للجنطه تحيه… وكلي توصل بالسلامه
وهاي أول مره أفوت بسيطره…
وما انطي رشوه وتستعد كدامي شرطه

@alshar_alsahih

6,045

القصيده الكامله

07 May, 10:46

كل قصايدهم ضگتها
ولا قصيدة الطفت حزني

أستاحشيت
أگعد بصفك
والزم أجفوفك وغني ..

رادو يسدون
باب أسمي ولگوك ..

وسابگوني ..
وخلصت الگاع ولگوني
غاد من خصر الوفه واگف واحبك

ضمني ..
بس الليله يمك

أرجف ..
ابابك أولايـه
شارده من الضلمه
وجدام السكاره

كافي ..
أكد اعله الـنذور الما تجيبك

كل كمر ..
تانـه قميصك
زنجر بعيني أنتضاره

جيتك مدنگ ..
يملاچ الستر

مدري ياهو ..
الباگ ليـلي
وضلت أحلامي عرايـه

ومدري ..
ياحسبه الـ خذتني
وعفت وجهي اعله المرايـه

وين اسافر ..
وانسه وجهك

وانـته اسمك ..
تارس أجفوف الشوارع لافـتات

نابت بدمي ..
الخليج أشراع حافي
ومايك بصف العتب مابيه الوحه

ليش ..
ما تطيني ديني
عيوني تطلب گصتك شطين ماي

كون تدري ..
الروح طفله
ليش كسرت المعاضد

وليش ..
لمن كبر ذنبي
هدمت كل المعابد

هيه مو حسبة شجاعه

مزاحم أشواگـك كتلـني
وانـته تدري الكلب واحد

كلشي سويته حرام ..

جفك المالم دمعتي
أتصبح بخدي حرام

والرساله
الماخذتـها
ماتت أبابك حرام

شوغتي
ودم المحاجر والجكاير

والعيون
الطبعن
بضهـر الستاير
حسب أحسابك حرام

وخاف من نتلاگه باجر
خاف من نتلاگه باجر
ردلي ديني
هاكثر مطلوبلي دموع وخواطر

ناصر البدري
@alshar_alsahih

7,818

القصيده الكامله

30 Apr, 09:02

مو حزن لكن حزين

مو حزن
لكن حزين ..!
مثل ماتنگطع
جوا المطر
شتلة ياسمين !

مو حزن
لكن حزين ..!
مثل صندوگ العرس
ينباع خردة عشگ
من تمضي السنين

انا گتلك
مو حزن لكن .. حزين !!
مثل بلبل گعد متأخر
لقى البستان كلها بلاية تين

مو حزن لامو حزن لامو حزن لكن
احبك من چنت يا اسمر جنين

خذني يابحر
خذني خشبة
خذني والبحارة لو نسيوك كلهم
مانسيتك

الخشبة عاشت عمر طيب
عشقت كل المخاطر
عاندت .. مشيت بوجه الريح
لكن ماكسرها
وصارت تسافر وحدها
بلا اتجاه !
وارجع احط خدي على خدك
يابحر

خشبه وبحر
خشبه .. خشبه وكلش حزينه
خشبه لكن حيل
اهيب من سفينه

مابكيتك
فارقت انت السفينه
وانا جايبلك بحر . . !

جبتلك طوفان الحلم
حلم منذور بغياب الشمس
فارگت حلم الناس
ومليت السفينه والسفر ؟

مابچيتك
انا بچتني السفينه !
منين ماطش الرذاذ .. تريد تبحر !

تدري نوبات السفن
لو ضاق خاطرها بجبن قبطانها
تسافرو حدها وبلا تجاه !

انا مابچيتك
انا بچتني السفينه ! !

الأب مظفر النواب
@alshar_alsahih

5,664

القصيده الكامله

05 Jan, 15:11

اشموَع اَلغايب

أما آن للنهايات أن تبدأ ؟!

حزنان الجرف، واللوح شال اشموع محتاره
والشط ابسواده اينوح، شايل ضيم خطاره
والنور اعلى چف الماي، شاف اسرار باسراره
انشده رايه
/ ما يعرف يحل اللغاز ، بالشط فلشت ناره /
شهگ مايه
اوحچى احچايه
- من يگدر يشوف الروح،
فوگ اخيال بمرايه؟
••••••••••••••••
يچل الضيف
يفتر سندباد الطيف
يسأل كل شواطي الليل:
- وين الغاب باسراره !
وينه الگال، وكت الضيم،
يخفگ سيف مختاره ؟
وينه اللي رهن بالبير ثدي امه اوهجر داره ؟
اوشتل گطرة حليب اوگال..
اجي اويه اسهيل تسياره ؟
••••••••••••••••••
اويفتر سندباد الطيف
يطش سنبل على اجروفه
لهلبت لو خطف مهره، اعلى غفله السنبل اتشوفه اوتسولف له..
الصبر نگضان،
اوتگله الساعه ملهوفه
••••••••••••••••••
اويفتر سندباد الطيف
شايل حنة الصبير
يحني الماي وجروفه
يحني اهروش متلوفه
اويحني الطير
اويظل ينطر صهيل الريح...
.........................؟
............................!
مامش،
لا صدىَ اولا طيف
ولا حيف اليرد الحيف
شط اخرس
جرف اخرس
شمع اخرس
اوهالة ليل دواره
- عليمن چاتذب انذور، واسبوعك خمس تيام ؟
نحروا نجمة الأحد، و الجمعة اندفن بالشام
والسنبل تدوسه الگاع، نذر للطين حباته
اويذري الريح بالحنه، اويلم الماي حسباته
•••••••••••••••••••••••
اوينام النور..
تنگض خشبة الخايب
بس ومضه اعلى خد اللوح،
تلهث فوگ جثة شمعة الغايب
تكتب عالجرف والليل:
- ياجرح السفر جل توب من ثارك
- يَلن اللي طفح ثاره، صبح تايب !

الشاعر الكبير الراحل شاكر السماوي
ش.س
١٩٦٧/١١/٤

@alshar_alsahih

10,476

القصيده الكامله

19 Dec, 11:45

وإن اعتذَرَتْ الريحُ ، سيبقى الغصنُ مكسوراً ٠
____
   سايسيتك

   زيبگ امسودن شكظّك

   كظّت   الغربيل من يحضن الماي

   وياجموح المهره بيك

   اشما تعتني   ابلايه راي

   وسايسيتك

   لاني گصبه ابهور   ظلت

   لاني بشفافك الناي

   وخاصمت روحي وتبعتك

   بين غلطه....

    وبين ظني ....

    ومستحاي

   وگاودتني ..... وطاوعيتك

   شفتك ابعز ّ الظهاري

   اتدوّر ابصحره ال افياي

   وعلجروح اتريد ترگص

   گتلك ارگص.... گلبي مات

   المات مايسمع بچاي

   الوادم ... اشمدريهه   بيّه

   الوادم ... اتغرهه ضحكتي

   الوادم...... امصدگه   غناي

   وبلچذب تضحك ابوجهي

   اوبلصدك   تطعن   گفاي

   وسايسيتك.....

   چم شمع يطفه اعله چفي

   وچم زفير الاووف من يخنگ ضواي ؟

   ونته طير ابلاشجر وكت الغروب

   لاتحط ترضه اعله ذيچ

   ولاتحط ترضه اعله هاي ...!

   وماكسرت ابخاطرك ومشي وراك

   ولاشبرت اسنين عمري

   الفحطن وظلّن وراي

   وانه هسّه ابير   يوسف

   لاوحي ايسامر   وحشتي

   ولاظعن بالسچّه جاي

   وسايسيتك...

    يابعد هاي وي هاي
______
من ديوان سفر دخان

كاظم العطشان

@alshar_alsahih

7,809

القصيده الكامله

17 Nov, 09:00

جربت مرّه

وبعدهه زنجر بكلبي القفل

يوم حب بارد جمعنه.. وعرفت

ما نشتعل

..ردت اجيب الروح كوه

البيتك المسكون

لكن ما رضت دكت رجل

..كانت الشرفه كمين

وخوفي من عدهه يطل

..كل شي بيها مو حقيقي

..حتى هذاالكمر لعبه

من خلص دوره وطلعنا نزلوه

!!اهله بحبل
والنوارس

مو طبيعيه النوارس

كل مهمتها تفرح الناس

وتبجي الجرف من تنكتل

ابيتك المسكون مجلوبه النوارس

..على الناس جناحها يرامي نبل

.. والتماثيل اتحّرك

وعلى طعنات السيوف

الحجر يضحك

وعلى الما يسوى تطيح الروس جمله

والشوارب تنفتل

والطيور ملثمه ابّاب الحدايق

بينهن-ثارات- ودموم وفصل

الساجيه البيتك عليها

...مومثل باقي السواجي

شكد عجيبه الساجيه البيتك عليها؟

!!..ميها..كل كطره شكل

شحصّل الكبلي وجي البيتك

.وخدمه؟

..ومثل الكلوب اشتعل

الشمس ترجع لاهلها

العصر عميه

اثيابها بطين الحدايق تنغسل

..كل حصيلة ذكرياتك

:كاتل ومكتول صرنه

والحقد بيناتنا همزة وصل

آه يا الكلك تناقض

-خدك وكلبك عجايب

..صوره مو طبق الاصل

خدك بلون الوفر ليلة ضباب

وكلبك بلون الكحل

وجان هم كتستغلني

وغصن المكابر بروحي ترشّه ذل

وصرت باعيادك مغنّي

وصرت باعراسك طبل

..وكاس واحد

مره من صحتك شربته. اسنين

خلانيثمل

وشرد اكل للعيروني

واستحي وهسه آنا شايب

..مهرتي حجلةطفل

وهي فصلين الروايه

وانتهى اول فصل

والف هنيالك عليه الفصل الاول

جان تعذ يبه سهل

هسه آنا وياك والبر

سفرة مجانين حرهوانتهى

دور العقل

اثنينه بهاي الجزيره

لاشهود\ ولا قيود\ ولامثل

...نمشي

ومغمضين نمشي

بالرمل غرّز جدمنه

ردنه نطلعما كدرنه

وآه من يلتف على الساك الرمل

يوم مر.. ويوم ثاني

ومايسمعك هالرمل لو

كلت حل

يوم ثالث.. يوم رابع

والعطش والجوعاخذنه

والدمع ما ينشرب

والرمل ما ينوكل

يوم خامس-يومسادس

وما نلحك على السابع يمكن

وبي نحتفل

!وبعد شيفيداعتذارك؟

ينقبل- ما ينقبل

بالسمه الغربان باعتنهوشرتنه

وقسمتنه نصير جم وجبة اكل

#كاظم_اسماعيل_الگاطع

@alshar_alsahih

7,314

القصيده الكامله

15 Nov, 21:11

مطر ملهوف

ماااااشارب قنوت الله

ولا صحتله لمت اچفوف

غرگ بدموعه حد الشوف

ولا فزعة شمس مدتله يد مشحوف

مطر فزااااع .......

مطر ويزخ مظفر ولقوافي اشراع

والشاعر يلم الماي ويعصره ويطلع ابداع

والشاعر حضن للگاع

وقبلهه الغيم نهضه اتحث خبز للجاع

#علي_محسن_المطوري

@alshar_alsahih

5,727

القصيده الكامله

13 Oct, 15:55

#الشاعرعلی_محسن_المطوری
لتوثیق الشعر الشعبی ملتقی گلاید

تاریخ1402/07/19
25/ربیع الاول/1445
11/اکتبر/2023

6,039

القصيده الكامله

05 Oct, 10:25

العش مو حطب !!!
خل يفهم الحطاب
العش بيت شرعي وساكناته طيور
وأحياناً يضم عشاگ متصافين ..
أحلام ،
وأريكه
ونافذه إعله النور

اعله غفلة من الزمن
لن بيتهن مهدوم ...
والغصن اليشيله من الاصل مبتور
الدستور؟؟
منقوص اعله هذا الحال
الحقيقه ، العشگ لازم ينكتب دستور
العصافير اعتراض الهن اعله الحطاب
جاب عشوشهن
ونطاها للتنور !!!
ازرع گاع روحك
رازقي ونسرين ..
واشتلها گصب من يشح ماي الهور
وأفطم منجلك
لوراد يحصد غيم
وأكسر منجلك لو راد يحصد زور؟
واخذ دمعة عزيزك
واستعيره أفراح
ولبسه العيد بيدك واكشخ بعاشور!!!
انشدني ..
العسل ماضايگه النحال ..
القاروره بيده
والعسل محضور
من تلثم فراشه
خدود زهره تنام
تسكر بالندى وتطيح بالمحذور
شارب من خضار
عيونك الصفصاف
وراضع من بياض خدودك البلور
روح أشتل حياتي بشجرة الصبير
أنا احلامي عوانس
مايهمها البور!!
افرشلي ضحكتك
خلي ، أمدد كيف
وخل في ّ الضفيرة يدغدغ الناطور

تغرف روحي مني
بچفك النعسان ؟؟
وتشربني خطيه وخاطرك مكسور!!
جمعنه المايصير
البرد والنيران
شفتي تنث بروده
وشفتك تنث نور
يقام الحدّ
على من لمس شفتك يوم ؟؟
ويُحاسب ، مثل مايتحاسب المخمور
أخذ مني دمع
ماطالبك بالدين
يمته النهر راد فصول من ناعور
تدريني سَليل ،
الما يشم مشموم ،
ابن بيت العفاف
الصاوغ الله نحور
بعد شبرين عنك والحضن ينخاك
أشم ريحة ثيابك
والگلب مسحور
ياجنة عدن
يادنيه تنبت روز
ياسحر الهند وأحلام نيسابور
هسه الحب حضارة
وبابها كرستال
تتلاگه المجره بكل مسيه تدور
أنا روحي ندى
وروح البنات ورود
أنا موتي ندى
وگلب البنات أگبور !!
بالك تحط روحك
دكـه للتغسيل
جثمان الفرح مافززه الكافور؟؟؟

سيد عماد المطاريحي

@alshar_alsahih

6,888