Силосга мўлжалланган экинларнинг намлиги 75% дан юқори бўлганда, уларга 10% ва ундан ортиқ бошоқлилар сомонидан қўшиш мумкин. Юқори намликдаги озиқларни силослашда чиқадиган ширани шимиб олиши учун силос тайёрлайдиган хандақларнинг таг қисмига 0,5-1,0 метр қалинликда майда сомон солинади. Силослашга силосланадиган массанинг қандай катта–кичикликда майдаланганлиги маълум даражада таъсир этади.
Кўплаб тадқиқотлар асосида маккажўхорининг энг мақбул майдаланиш ўлчами аниқланган – донни сут-мум даврида намлик 70-75% бўлганда 2,4 см, сут ва сут-мум пишиқлигида 75-80% бўлганда 5-7 см, намлик 80-85% бўлса 8-10 см, 85% ва ундан юқори бўлганда 10-12 см узунликда ўриш тавсия этилади.
Маккажўхори ва бошқа ўсимликлардаги намлик 70% дан камроқ бўлганда уларнинг узунасига ёриб, 1,5-2,0 см қилиб майдалаш лозим. Майдалаш озуқалар сифатига, ундан сут кислотасини ҳосил қилувчи бактериялар учун шира ажралишига, маҳкам шиббаланишига, силосни силосхоналардан осон олишга ва бошқа озуқалар билан қўшиб озиқ таркибига қўшишга таъсир этади.
Маккажўхори ва сорго дони олингандан сўнгги пояси, лавлаги барги, тарвуз, қовун, қовоқ палаги, карам барги, помидор пояси ва бошқа далачилик қолдиқлари силос тайёрлашдаги катта захирадир. Намлиги 70% га яқин бўлган маккажўхори ва сорго поялари ҳеч нима қўшмасдан силосланади. Намлиги 30-45% бўлганда эса қовоқ, тарвуз, кабачки, қовун, майдаланган илдизмевалар, карам барги, лавлаги барги каби серсув маҳсулотлар 1-8, 1-8 нисбатда қўшиб силос тайёрланади.
Қишлоқ хўжалигига оид энг яхши тавсияларни АГРО ОЛАМда кузатиб боринг
Обуна бўлинг