یاری من

دڵی دێوانە ویساڵی لەبی جانانی دەوێ
بولبولی شیفتە خەندەی گوڵی باغانی دەوێ..


#وەفایی

دەبێت بژین
هەندێ کات لەگەڵ گوڵێکی سوور
هەندێ کات لەگەڵ دڵێـکی تەنگ
هەندێ کات لەگەڵ هیوایەکی کەم...


#فروغ

عاشقی خونچەی دەمت تا کەی دەبێ ئاوارە بێ
مەحڕەمی ڕازە حەواڵەی چۆڵ و وێرانەی مەکە

هەر بەڕەسمی دیدەنی باسێکی نایێنی دەمت
دڵبەری وا نابێ عەیبە نانەجیبانەی مەکە


#ئەدیب

ئەگەر چاوم لە تۆ جوانتر کەسێکی دی هەتا ماوم
ئەڵێم خوایە لە ئەو دونیاش بەساغی هەڵنەیە چاوم


#ئەخۆل

وەفات دەرحەق بە من بەینێ بوو
ئێستاکە جەفاکاری

چ ڕووی داوە لە بەندەی عاشقی
شەیدایی مەجنوونت..


#کەمالی

خۆشی فەرموو چ مەجنوون و چ مەنسوور
بەشی عاشق درا هەر بەرد و هەر دار

ئەوی چوو بۆ سوراغی، بێسوراغە
خەبەر وایە کە کەس نابێ خەبەردار



#مەحوی

ڕەگ و ڕیشەی دڵم ھەر دەنگ و ناڵەی عیشقی تۆی لێ دێ

#وەفایی

دڵ بەبێ تۆ ماوەتۆ بێ شەوق و نوور
عاجز و مات و حەزین و بێ سروور..


#ناری

نەشتەری چاوی حەبیبم دێ بە سینەمدا دەچێ
مەرهەمی نازی تەبیبم بۆ دڵی خوێنین دەبا..



#وەفایی

بنازم دڵبەری خۆم چەندە پڕ وەسف و چ بێ‌عەیبە:

بە چاو مەسـت و، بە دڵ هوشیـار، بە ئەبرۆ جووت و هەم تاقە!

#نالی

تا کەی چوون مەجنوون ویڵی هەردان بم
تا کەی خەمزەدەی باری هیجران بم

هەر ساتێ دووریت سەد ساڵەن جە لام
دەردم کارییەن وە سەرگەردت بام

بەزەییت بەیۆ وە جەستە و حاڵم
ڕیشەم بەراما، هەرەس وە ماڵم..


#مەولەوی

لە دنیادا دڵ ئارامێک و ئارامی دڵێکم بوو
بە جارێ ماڵی وێرانم، ئەمیشم چوو، ئەویشم چوو

خوێنی دڵ لە بەر چاوم نەبێ تا کەی ڕەوان ئاخر!
ئەوا ڕۆیی لە بەر چاوم ئەوی ڕۆحی ڕەوانم بوو

چ حاڵە! قوڕبەسەر حەتتا بە حاڵم پێکەنینی دێ
بە دەست ئەتواری تۆوە قوڕبەسەر خۆم، ئەی دڵەی بەدخوو

دڵ و دڵبەر لە یەک بەدخووترن، سا من خودا چ بکەم؟

#مەحوی

خەستەی خاری خەم خەم خەیاڵی وێم
وەکزەی دەروون تەن زوخاڵی وێم

بێ ئەبرۆی هیلال نەو نیهاڵی وێم
نییەت نادروست عید بەتاڵی وێم..


#مەولەوی

پەی کەسێ جەرگت جە داخان کەیل بۆ
تۆ مەجنوون خەیاڵ ئەو وێنەی لەیل بۆ


#وەلی_دێوانە

هەیهات چ بێ میهر و وەفا دەرچوو نیگارم
حاڵی بە گەرم پرسش ئەکەم، ساردە جەوابم..


#گۆران

هەریەکەمان بەسەدان شێوە بەخەیاڵ ژیاوین.
من بەخەیاڵ ماوەیەک دراوسێت بووم، شەوان درەنگ کە ئاوی گەڕەک دەهاتەوە، تانکی سەربانی ئێوەشم پڕ دەکرد.
ماوەیەک هاوڕێت بووم، بەناوی دەرسەوە، بەناوی جل کڕین و پیاسەوە، بەناوی قەرەباڵغییەوە لە چێشتخانەکاندا دەمبردیە شوێنی تایبەت بەخێزان.
ماوەیەک هاوسەر بووین، وردە شەڕی شیرینمان هەبوو، تۆ دەتگوت شت بۆ ماڵەوە مەکڕە نایزانی، منیش دەمگوت بۆچی قەت سابوون لەسەر مەغسەلەکەدا نیە؟
لەگەڵ یەکتردا بەخەیاڵ سەدان کەس بووین، سەدان..
ئێستا هەر یەکەمان تەنها خۆی ماوەتەوە و دەرگای داخستووە، نەک بۆ بەڕەڵانەبوونی تەنیایی، بەڵکو بۆ ئەوەی خەون نەیەتە ژوورەوە..
سەدان خۆمان، بەدەستی خۆمان ناشت.
قەینا ئازیزم، لە ژیانی ڕاستیماندا خۆ ئێمە لەگۆڕی بەکۆمەڵ ڕاهاتووین !

#تەڵعەت تاهیر

دڵبەر پێی وتم: بۆچی غەمگینی؟
گرفتاری کام شۆخی شیرینی؟

هەستام ئاوێنەم بۆ هێنا وتم:
لە ئاوێنەدا تۆ کێ دەبینی؟


#عەونی

لە خزمەت شەوقی تۆدا شەوچرا چین؟!

#نالی

من د باغێ گولفرۆشان دی ڕەسمەک غەریب
خارتەبعان گول د دەستن گولپەرستان خار بەس!


#مەلای_جزیری

لە باغی گوڵفرۆشاندا ئەوەی بینیم شتێکی غەریب و سەیر بوو، ئەو کەسانەی وەک دڕک وان دەستەگوڵیان بە دەستەوە. ئەوانەش کە گوڵپەرستن ھەر دڕکیان بە نسیب دەبێت!

بڵێ بەو ئاشنایە: بێ چرایە شامی من بێ ڕووت

#مەحوی

باکم نییە ئەم چەرخە بڕووخێ کە بەسەرما
دنیا هەموو بێ بایەخ و قەدرە لە نەزەرما

هیوای نییە هەرگیز نە بە دنیا و نە بە عوقبا
کەی عاشقی شەیدا بەتەمای سوود و زەرەر ما

تۆ ڕۆحمی بۆیە کە ئەڕۆی دەسبەجێ ئەمرم
گەر بێیتەوە ڕۆح دێتەوە دووبارە بەبەرما

دائیم لە سەری ڕێگەکەتا کەوتووم ئێستا
بەم هۆیە کە ڕەحمت بێ بنێی پێیە بەسەرما

جەرگ و دڵی خۆم کردووە بە شاباشی بەری پێت
بۆ وەی کە فیدای تۆ ببێ هەر نووری بەسەر ما

تۆی مایەیی ئیلهامی قەسیدە و غەزەلی من
بێ تۆ نە قەسیدە نە غەزەل ما نە هونەر ما

#کەمالی

ڕۆیی دڵی مەحزوونم داخم ئەوە نەمزانی
دوو چاوی ڕەشت بردی یا زولفی پەرێشانت

باکم نییە مورغی دڵ بیکەی بە کەباب ئەمما
بیدە بە سەگ و مەیدە دەرخوردی ڕەقیبانت


#کوردی

تاڵی بێیار و دیار و تار و مار
عەلقەمی چی؟ ئەرقەمی چی؟ سەم دەخۆم!

#نالی

عەلقەم: کاڵەکە مارانە
ئەرقەم: ماری شل(جۆرە مارێکی کوشندەیە)

#واتا: من تاڵی و ناخۆشییەک دەخۆم
کاڵەکە مارانە و ژاری ماری شل لە چاویدا هیچ نین. من تاڵی غەریبی و بێکەسی و دەربەدەری دەخۆم..واتا ژەهری ڕاستەقینە دەخۆم.

ئەو نەھاتن؛ دەردە، داغی ئەو نەھاتن؛ دەردەھا
کەس بە دەردی من نەچێ، وەک من نەبێ تووشی نەھات

#مەحوی