Tirita 97.6 FM Radio

እንድታውቁት?
***
የአዲስ አበባ ፖሊስ ከጥር 10 እስከ ጥር 12 ቀን 2017 ዓ/ም ድረስ ለተሽከርካሪ ዝግ የሚሆኑ መንገዶችን አስታውቋል

የአዲስ አበባ ፖሊስ በመግለጫው ከጥር 10 እስከ ጥር 12 ቀን 2017 ዓ/ም ድረስ ጃን ሜዳ እና አቃቂ ቃሊቲ ታቦት ማደሪያ በሚከበረው የከተራና የጥምቀት በዓል ምክንያት የትራፊክ መጨናነቅ እንዳይፈጠር የተወሰኑ መንገዶች ለተሽከርካሪ ዝግ ስለሚሆኑ አሽከርካሪዎች አማራጭ መንገዶችን እንዲጠቀሙ አስታውቋል፡፡

በዓሉ በሚከበርባቸው ቦታዎች ሁሉ ከአካባቢው ነባራዊ ሁኔታ ጋር የተጣጣመ የስምሪት አቅጣጫን በመከተል ፀጥታ የማስከበር ተግባሩ የሚከናወን ሲሆን ከዚህም ጋር ተያይዞ ከጥር 10 ቀን 2017 ዓ/ም ጀምሮ በ11ዱም ክ/ከተሞች ጥምቀተ ባህር ባሉባቸው ቦታዎች ሁሉ በ500 ሜትር ክልል ውስጥ ታቦታት ሲወጡና ሲገቡ እንዲሁም በሚሄዱባቸው መንገዶች ለአጭር ጊዜም ይሁን ለረዥም ጊዜ ተሽከርካሪ አቁሞ መሄድ የተከለከለ መሆኑን ገልጿል።

እንዲሁም ከጥር 10 እስከ ጥር 12 ቀን 2017 ዓ/ም ድረስ በጃን ሜዳ እና አቃቂ ቃሊቲ ታቦት ማደሪያ በሚከበረው የከተራና የጥምቀት በዓል ምክንያት በአካባቢው የትራፊክ መጨናነቅ እንዳይፈጠር፦

ከ6 ኪሎ አደባባይ - ምኒልክ ሆስፒታል
ከምኒልክ ሆስፒታል - መከላከያ 3ኛ ሻለቃ አደባባይ
ከ3ኛ ሻለቃ አደባባይ - 6 ኪሎ አደባባይ እንዲሁም አቃቂ ቃሊቲ አካባቢ
ከዋልያ ቢራ - ጥሩነሽ ቤይጂንግ ሆስፒታል
ከአቃቂ ዋናው መንገድ - ጥሩነሽ ቤይጂንግ ሆስፒታል
ከ08 - አቃቂ ድልድይ ድረስ ከጥር 10 ቀን 2017 ዓ/ም ከጠዋቱ 4:00 ሰዓት ጀምሮ መንገዱ ለተሽከርካሪዎች ዝግ ስለሚሆን አሽከርካሪዎች አማራጭ መንገዶችን መጠቀም እንደሚገባቸው የአዲስ አበባ ፖሊስ መልዕክቱን አስተላልፏል።

#ትርታ 97.7 FM #ከልብዎ_የቀረበ

አንድ መቶ አዳዲስ የኤሌክትሪክ አውቶብሶች አገልግሎት መስጠት ይጀምራሉ
***
በአዲስ አበባ 100 የኤሌክትሪክ አውቶብሶች ከአንድ ወር በኋላ አገልግሎት መስጠት እንደሚጀምሩ የትራንስፖርትና ሎጅስቲክስ ሚኒስቴር አስታወቀ፡፡

የትራንስፖርትና ሎጅስቲክስ ሚኒስትር ዴኤታ በርኦ ሀሰን እንደገለጹት፤ የመዲናዋን የትራንስፖርት አገልግሎት ችግር ለመፍታትና አረንጓዴ ትራንስፖርት ስትራቴጂን ተግባራዊ ለማድረግ እየተሰራ ነው።

በዚህም 100 የኤሌክትሪክ አውቶብሶች ገብተው እየተገጣጠሙ ነው ብለዋል። ከአንድ ወር በኋላም አገልግሎት መስጠት እንደሚጀምሩ መግለጻቸውን ትርታ ከተቋሙ ያገኘው መረጃ ያመለክታል።

የኤሌክትሪክ አውቶብሶች በብዛት እንዲገቡ እየተሰራ መሆኑንም ጠቅሰው፤ ከ15 መቀመጫ በላይ ያላቸው ሚዲባሶችም ገብተው የትራንስፖርት አገልግሎት እየሰጡ እንደሚገኙ አስታውሰዋል።

#ትርታ 97.6 FM #ከልብዎ_የቀረበ

የኃይል ስርቆት በፈፀሙ ደንበኞች ላይ እርምጃ ተወሰደ
***
በኢትዮጵያ ኤሌክትሪክ አገልግሎት ደቡብ አዲስ አበባ ሪጅን ቆጣሪዎችን በመነካካት የኃይል ስርቆት በፈፀሙ የወፍጮ ቤት፣ የዳቦ እና የእንጀራ መጋገሪያ ቤት ደንበኞች ላይ እርምጃ መውሰዱን ገለጸ፡፡

በተያዘው በጀት ዓመት ብቻ 18 ዘመናዊ ቆጣሪዎች ላይ የኃይል ስርቆት የተፈፀመበት ሲሆን፣ በስርቆት ያጣውን ከ4 ሚለየን ብር በላይ የኃይል ፍጆታ ሂሳብ ገንዘብ ማስከፈሉን የሪጅኑ የኢነርጂ ማኔጅመንት ኃላፊ ለሚ አዱኛ ተናግረዋል፡፡

በተጨማሪም 11 ሥርቆት የፈፀሙ ድርጅቶች ላይ ከ5 ሺህ እስከ 10 ሺህ ብር ቅጣት እንዲቀጡ ማድረጉንና በስርቆት ወቅት ለተበላሹ ቆጣሪዎች 18 ሺህ ብር እንዲከፍሉ መደረጉን ተናግረዋል፡፡

የኃይል ስርቆት መረጃው የተገኘው ተቋሙ በሚጠቀመው መተግበሪያ አማካኝነት ሲሆን በዚህ ዓመት ብቻ በኃይል ስርቆት ላይ በተሳተፉ ስምንት ደንበኞች ላይ ክስ ተመስርቶ ክትትል እየተደረገባቸው እንደሆነና ሦስቱ በሂደት ላይ መሆናቸውን ሃላፊው መናገራቸውን ከአገልግሎቱ ያገኘነው መረጃ ያመለክታል፡፡

#ትርታ 97.6 FM #ከልብዎ_የቀረበ

የየመንበረ ፀባኦት ቅድስት ስላሴ ካቴድራል ህንጻ ቤተክርስቲያን እድሳት ተጠናቆ ተመረቀ
***

እድሳቱ ሁለት ዓመታትን የፈጀው የታሪካዊዉ የመንበረ ፀባኦት ቅድስት ስላሴ ካቴድራል ህንጻ ቤተክርስቲያን እድሳት ተጠናቆ ዛሬ ተመርቋል ፡፡

ህንፃ ቤተ ክርስቲያኑን መርቀው የከፈቱት ብፁእ ወ ቅዱስ አቡነ ማቲያስ ፓትሪያርክ ርእሰ ሊቃነ ጳጳሳት ዘ ኢትዮጵያ ወ እጨጌ ዘመንበረ ተክለ ሀይማኖት ናቸው።

መንበረ ጸባኦት ቅድስት ስላሴ ቤተክርስቲያን 81 አመታትን ያስቆጠረ ባለ ታሪክ ቤተክርስቲያን ነው።

የመንበረ ጸባዖት ቅድስት ሥላሴ ካቴድራል ሕንጻ ቤተ ክርስቲያን ጥንታዊነቱን በጠበቀ መልኩ ዕድሳት እንደተደረገለትም ተጠቁሟል።

ብፁዕ ወቅዱስ አቡነ ማትያስ ፣ ብፁዕ አቡነ አብርሃም የመንበረ ፓትርያርክ ጠቅላይ ቤተ ክህነት ዋና ሥራ አክኪያጅና የባሕርዳርና የሰሜን ጎጃም አህጉረ ስብከት ሊቀ ጳጳስ፣ ብፁዕ አቡነ ሄኖክ የአዲስ አበባ ሀገረ ስብከት ሊቀ ጳጳስ እንዲሁም ሌሎች ብፁዓን አበው ሊቃነ ጳጳሳት የመንበረ ፓትርያርክና የአዲስ አበባ ሀገረ ስብከት የሥራ ሐላፊዎች ጥሪ የተደረገላቸው እንግዶች በተገኙበት የቡራኬ ቤተ ክርስቲያኑ ሥርዓት እየተከናወነ ይገኛል።

በቀደመ ስሙ መካነ ሥላሴ በኋላ መንበረ ጸባዖት ቅድስት ሥላሴ ካቴድራል የተባለው ይህው ቤተ ክርስትያን የዛሬ 81 ዓመት በግርማዊ ንጉሠ ነገሥት አጼ ኃይለ ሥላሴ ዘመነ መንግሥት ጥር 7ቀን 1936 ዓ.ም ግንባታው ተጠናቆ ቅዳሴ ቤቱ መከበሩን መረጃዎች ያስረዳሉ።

የመንበረ ፀባኦት ቅድስት ስላሴ ካቴድራል እድሳት በመጠናቀቁ ታቦቱም በበርካታ ምእመናን ህብረ ዝማሬና እልልታ ታጅቦ ወደ መንበረ ክብሩ ተመልሷል።

#ትርታ 97.6 FM #ከልብዎ_የቀረበ

ኢትዮጵያ እና ሶማሊያ በቀጣናው ሰላምና መረጋጋት ላይ ያላቸውን ትብብር ለማጠናከር ከስምምነት ላይ መድረሳቸው ተገልጿል።

ጠቅላይ ሚኒስትር ዐቢይ አሕመድ  በኢትዮጵያ የስራ ጉብኝት ለማድረግ ወደ ኢትዮጵያ የመጡትን የሶማሊያ ፕሬዝዳንት ሀሰን ሼክ መሐሙድን ተቀብለው ተወያይተዋል።

የሁለቱ አገራት መሪዎች ዛሬ በአዲስ አበባ የጋራ ፍላጎታቸው በሆኑ የተለያዩ የሁለትዮሽ እና ቀጣናዊ ጉዳዮች ላይ ሀሳቦች መለዋወጣቸውን ባወጡት የጋራ አመልክተዋል።

የአገራቱን ህዝቦች የወንድማማችነት ግንኙነት ለማጠናከር የሚያስችል ፍሬያማ ውይይት ማድረጋቸው ተገልጿል።

በየአገራቱ ያላቸው ሙሉ የዲፕሎማሲ ውክልና በመመለስ ያላቸውን የሁለትዮሽ ግንኙነታቸውን ወደ ነበረበት ለመመለስ እና ለማሻሻል ከስምምነት ላይ ደርሰዋል።

የአገራቱ መሪዎች የዲፕሎማሲ ሚሲዮኖቻቸው በባለብዝሃ ወገን እና በቀጣናዊ ፎረሞች ላይ የሀገራቱ የጋራ ፍላጎቶች ላይ በቅርበት መስራት እንዳለባቸው አጽንኦት የሰጡበት ጉዳይ እንደሆነ ነው በመግለጫው ላይ የተጠቆመው።

መሪዎቹ ለቀጣናው መረጋጋት የሁለቱ አገራት በጋራ መተማመን፣ ተአማኒነት እና መከባበር ላይ የተመሰረተ ጠንካራ ትብብር እንደሚያስፈልግም ገልጸዋል።

በቀጣናዊ ጉዳዮች ላይ ያላቸውን ትብብር ለማሻሻል፣ የጋራ መግባባት ለመፍጠርና የጋራ ግቦችን እውን ለማድረግ በትብብር ለመስራት ከስምምነት ላይ ደርሰዋል።

በተጨማሪም በውይይቱ ላይ ኢትዮጵያ እና ሶማሊያ የጸጥታና ደህንነት ትብብራቸውን ለማጠናከር ቀጣይነት ያለው ስራ ማከናወን እንደሚያስፈልግ ተመላከቷል።

በየጊዜው እየደገ የመጣው እና አሳሳቢ የሆነው የታጠቁ ቡድኖች በቀጣናው ላይ የደቀኑት ስጋት በውይይቱ ላይ ተነስቷል።

የአገራቱ መሪዎች የጸጥታ ተቋማቶቻቸው መመሪያ በመስጠት ቀጣናዊ ሰላም እና መረጋጋት ያላቸውን ትብብር እንዲያጠናክሩ ለማድረግ ተስማማተዋል።

በተጨማሪም መሪዎቹ ሁለቱ አገራት በኢኮኖሚ፣ ኢንቨስትመንት እና ንግድ ያላቸውን ትብብር ይበልጥ ለማጠናከር መስራት እንዳለባቸው ገልጸዋል።

ኢትዮጵያ እና ሶማሊያ ጠንካራ የኢኮኖሚ ትብብር በመፍጠር የንግድ ትስስራቸውን የሚያሳልጡ የመሰረተ ልማት መስመሮችን ለማስፋት እና የጋራ ብልጽግናቸውን ለማረጋገጥ ከስምምነት ላይ መድረሳቸው በጋራ መግለጫው ላይ ተጠቅሷል።

መሪዎቹ ለአንካራው ስምምነት ትግበራ በቁርጠኝነት እንደሚሰሩ ገልጸው ስምምነቱ ከአገራቱ የወዳጅነት እና የአጋርነት መንፈስ የመነጨ መሆኑን አንስተዋል።

በስምምነቱ የተቀመጠውን የቴክኒክ ድርድሮች በፍጥነት እንዲጀመሩ ለማድረግ ከስምምነት ላይ መድረሳቸውን የጋራ መግለጫው ማመላከቱን ከጠቅላይ ሚኒስትር ጽህፈት ቤት የተገኘው መረጃ ያመለክታል።

#ትርታ 97.6 FM #ከልብዎ_የቀረበ

ሁለተኛዉ ዙር ተዋሕዶ ኤክስፖ በኤግዚቢሽን ማዕከል ተከፍቷል።

በሁለተኛዉ ዙር ተዋሕዶ ኤክስፖ ለመጀመሪያ ግዜ በሚካሄደው የጥምቀት ኤክስፖ ላይም፤ ነዋየ ቅድሳት፣ ባህላዊ አልባሳት፣ የማዕድ ቤት ዕቃዎችን ጨምሮ የተለያዩ ምርቶች መቅረባቸው ተገልጿል።

ከጠዋት እስከ ምሽት ድረስ ከሚካሄዱ ግብይቶች ባሻገር ዝማሬዎችና የኪነ ጥበብ ስራዎች ይቀርባሉ ተብሏል።

በሁለተኛዉ ዙር ተዋሕዶ ኤክስፖ የመክፈቻ ፕሮግራም ላይም የሀይማኖት አባቶች ፣ ጥሪ የተደረገላቸዉ እንግዶች፤ እንዲሁም የመገናኛ ብዙሀን ባለሙያዎች ተገኝተዉበታል።

ማርኮናል ኤቨንት ከጠቅላይ ቤተክህነትና ከአዲስ አበባ ሀገረ ስብከት ጋር በመተባበር ያዘጋጁት የጥምቀት ኤክስፖው ከዛሬ ጥር 3 ቀን ጀምሮ እስከ ጥር 9 ቀን 2017 ዓም ድረስ ለተከታታይ 7 ቀናት በኤግዚቢሽን ማዕከል ይካሄዳል።

(በትባረክ ኢሳያስ)

#ትርታ 97.6 FM #ከልብዎ_የቀረበ

አሁናዊ መረጃ!
ከኢትዮጵያ ስፔስ ሳይንስ ሶሳይቲ
***
በትናንቱ እንግዳ የሕዋ ክስተት ዙሪያ ከተለያዩ የሕዋ አካላት መከታተያ እና የመረጃ ቋቶች ያገኘናቸውን መረጃዎች በማጠናቀር ባደረግነው ጥልቅ የሆነ ትንተና መሰረት የሚከተለው ሳይንሳዊ መላምት ላይ ደርሰናል።
በመረጃው መሰረት የሕዋ አካሉ ባለቤትነቱ የቻይና የሆነ ሺ ጂያን-19 (ShiJian-19) የተባለ ሳተላይት ቀሪ አካል ሊሆን እንደሚችል ያመላክታል።

ከዚህም በተጨማሪ የሳተላይቱን ቀሪ አካል የምህዋር እና የይዘት መረጃ ጨምረን ጠቅላላ ትንታኔውን ከዚህ ልጥፍ ጋር አጋርተናል። ሳተላይቱ በ መስከረም 17 2017 ዓ.ም ወደ ምህዋር የተወነጨፈ ሲሆን ተልዕኮውን ጨርሶ በ ጥቅምት 1 2017 ዓ.ም ወደ መሬት ተመልሷል።

ነገር ግን ሳተላይቱ በተልዕኮው ላይ ሲገለገልባቸው የነበሩ የተለያዩ ክፍሎቹ ከዋናው ሳተላይት ተነጥለው በምህዋር ላይ ሲዞሩ ቆይተዋል።

ለትንተናው የተጠቀምናቸው መረጃዎች ከሶስተኛ ወገን የመረጃ ቋቶች የተገኙ በመሆኑ የተረጋገጠ መረጃውን የሳተላይቱ ባለቤት ሃገር ቻይና እስክታረጋግጥ መጠበቅ ይኖርብናል።

ዋቢ ምንጮች፡

https://www.satcat.com/sats/61506
http://www.satflare.com/track.asp?q=61506&sid=2#TOP

#ትርታ 97.6 FM #ከልብዎ_የቀረበ

#አዲስ_መረጃ

ከኢትዮጵያ ስፔስ ሳይንስ ሶሳይቲ የተሰጠ
***
አስቀድመን ጥያቄ ባቀረብነው መሰረት የደረሱንን ቪዲዮዎችን እና በጉዳዩ ዙሪያ ያሉ ሌሎችን የመረጃ ምንጮችን ዋቢ አድርገን የሚከተለውን የእይታ ካርታ አዘጋጅተናል።

ከካርታው መመልከት እንደሚቻለው የታየው አካል በኢትዮጵያ ደቡብ እና ደቡበ ምዕራብ ክፍል አቋርጦ ወደ ኬንያ ሰሜናዊ ግዛት እንደገባ መመልከት ይቻላል። በሕዋ አካሉ ምንነት ላይ ያገኘነውን ተጨማሪ ማብራሪያ ከጥቂት ደቂቃዎችን በኋላ እናጋራለን።

#ትርታ 97.6 FM #ከልብዎ_የቀረበ

#አዲስ_መረጃ

በትናንትናው ምሽት በደቡብ ኢትዮጵያ ክፍል ሰማይ ላይ እየተቃጠለ ተቆራርጦ ወደ ምድር ሲጓዝ የታየው ቁስ በሰው ሰራሽ የስፔስ ቁስ ምክንያት የተከሰተ ሊሆን እንደሚችል የስፔስ ሳይንስ እና ጂኦፓሻል ኢኒስቲትዩት ገለፀ፡፡

በተቋሙ የከባቢ አየር ሳይንስ ተመራማሪ የሆኑት ገመቹ ፋንታ (ዶ/ር) ከመንግስት መገናኛ ብዙሀን ጋር በነበራቸው ቆይታ፤ ጊዜ ያበቃላቸው ሳተላይት እንዲሁም ሳተላይቶችን የመጠቁባቸው የሮኬት  ቁርጥራጮች ሊሆኑ ይችላሉ ሲሉ ነው የተናገሩት፡፡

በማንኛውም ሰው ሰራሽ መንገድ ህዋ ላይ  የሚንቀሳቀሱ ነገሮች ሊኖሩ ስለሚችሉ  ወደ ከባቢ አየር ውስጥ ሲገቡ  የመቃጠል እና ተሰባብሮ የመውረድ ምልክቶችን እንደሚያሳዩ ገልጸዋል፡፡

ክስተቱ የተፈጠረው በተፈጥሮአዊ የህዋ አካላት ምክንያት ሊሆን እንደሚችል ጠቅሰዋል፡፡

ከመሬት እና ከሶላር ሲስተም አፈጣጠር አንጻር አለቶች በመኖራቸው  በማንኛውም ጊዜ እየተቆራረጡ ሊወርዱ እንደሚችሉ ነው ያነሱት፡፡

በዓለም ላይ እንደዚህ ያለ ሁነት እንደሚከሰቱ የሚናገሩት ተመራማሪው፤ አልፎ አልፎ ቁጥራቸው በርከት ያሉት  ወደ ምድር እንደሚወርዱም ገልፀዋል፡፡

ሰው የሚኖርበት ቦታ ከ 4 እስከ 5 በመቶ እንደማይበልጥ የሚናገሩት ተመራማሪው፤ ተቆራርጠው የሚወርዱ ነገሮች ከሰው ዕይታ ውጪ የሚከሰቱበት ሁኔታው ስለመኖሩም ጠቅሰዋል። አልፎ አልፎ ግን ለሰው ዕይታ እንደሚጋለጡም ነው አያይዘው የገለጹት፡፡

ጥናቶች እንደሚያሳዩት በዓመት እስከ 6 ሺህ ድረስ ተቆራርጠው ምድር የሚደርሱ እና  አለፍ ሲልም የአሸዋ ቅንጣት በመሆን ወደ ምድር የሚወርዱ ስለመኖራቸው ነው ተመራማሪው የተናገሩት፡፡

የሚቃጠሉበት ምክንያት ደግሞ ወደ ከባቢ አየር ሲገቡ ከከባቢ አየር ጋር በሚያደርጉት ፍትጊያ የሚፈጠር ስለመሆኑም አያይዘዋል፡፡

"አሁን እንዳለን መረጃ በደቡባዊ  ክፍል የታየው ምስል ሰማይ ላይ እየተቃጠለ ነው የሄደው፤ አርፏል አላረፈም የሚለውን እስካሁን ማወቅ አልቻልንም" ብለዋል፡፡

ምድር ሦስት አራተኛዋ ውኃ በመሆኑ በአብዛኛው ውኃ ውስጥ እንደሚወድቅ የሚናገሩት ተመራማሪው፤ ሰዎች የሚኖሩበት አካባቢ ካልወደቀ በስተቀር ጉዳት እንደሌለው ነው የተናገሩት፡፡

#ትርታ 97.6 FM #ከልብዎ_የቀረበ

ትናንት ምሽት በደቡብና ደቡብ ምዕራብ ኢትዮጵያ ክፍሎች በሰማይ ላይ ስለታየው ክስተት

የኢትዮጵያ የስፔስ ሳይንስ ሶሳይቲ በትናንትናው ዕለት ከምሽቱ 1፡30 ገደማ በደቡብና ደቡብ ምዕራብ ኢትዮጵያ ክፍሎች በሰማይ ላይ እየተቀጣጠሉ በከፍተኛ ፍጥነት ሲንቀሳቀሱ የነበሩ የቁስ አካላት ስብስብ መታየታቸውን አስታውቋል።

ተቋሙ በታዩት ተንቀሳቃሽ ምስሎች ለመመልከት እንደቻለውም የእነዚህ አካላት ስብስብ የጠፈር ፍርስራሾች አሊያም የሚቲዮር አለቶች እንደሚመስሉ ይፋ አድርጓል።

ስብስቡ ወደ ደቡባዊ የሃገሪቱ አቅጣጫ በከፍተኛ ፍጥነት በሰማይ ላይ ሲምዘገዘግ እንደነበረም ነው የተመላከተው።

የክስተቱን ተፈጥሮ በእርግጠኝነት ለማብራራት ያስችል ዘንድ ሁኔታውን በቅርበት እያጣራ እንደሚገኝ ተቋሙ ገልጿል።

የተጣራ መረጃ ሲደርስ ለህብረተሰቡ ይፋ እንደሚደረግም ተጠቁሟል።

የማጣራት ሥራው እስኪጠናቀቅ ድረስ ሁሉም ሰው በተረጋጋ መንፈስ እንዲጠባበቅ ተቋሙ አሳስቧል።

#ትርታ 97.6 FM #ከልብዎ_የቀረበ

ኦቪድ ሪል እስቴት የጫካ ፕሮጀክት አካል የሆነ የመኖሪያ ቤት ግንባታን ለመጀመር ዝግጅቱን ማጠናቀቁን ገለፀ።

በ9.46 ሄክታር ጠቅላላ ስፋት ላይ የሚገነቡት ቤቶቹ በሁሉም መስመሮች ለከተማዋ መግቢያ የተመቹ መንገዶች ያሉት ነዉ ተብሏል።

ኦቪድ ሪል እስቴት በአዲስ አበባ የሚስተዋለዉን የቤት ችግር ለመቅረፍ ለዝቅተኛና ለመካከለኛ ነዋሪዎች በተመጣጣኝ ዋጋ መኖሪያ ቤቶችን እያቀረበ እንደሆነ የተገለፀ ሲሆን ፣ ይህ ፕሮጀክትም በጠቅላይ ሚኒስትር ዐብይ አህመድ አነሳሽነት የተጀመረዉ የጫካ ፕሮጀክት አንዱ አካል እንደሆነ ነዉ የተነገረዉ።

መሠረቱን የካ ተራራ ላይ ያደረገዉ ፕሮጀክቱ እስከ መሀል ከተማዋ የሚዘረጋ እንዲሁም ከእንጦጦ አንስቶ እስከ የካ አባዶ የሚደርስ ሲኾን፣ በ5 አመት ለማጠናቀቅም ዕቅድ እንደተያዘ ተነግሯል።

#ትርታ 97.6 FM #ከልብዎ_የቀረበ

6 ነጥብ 2 ኪሎ ግራም የሚመዝን ልጅ ተወለደ
***
በጅማ ዞን ኦሞ ናዳ ወረዳ አንዲት እናት 6 ነጥብ 2 ኪሎ ግራም የሚመዝን ልጅ ተገላግላለች፡፡

ህጻኑ በናዳ ሆስፒታል በቀዶ ጥገና መወለዱን በሆስፒታሉ የቀዶ ጥገና ስፔሻሊስት ዶክተር ደሳለኝ ተስፋዬ ተናግረዋል፡፡

በአሁኑ ሰዓት ህጻኑ እና ወላጅ እናት በመልካም ጤንነት ላይ እንደሚገኙም ኦቢኤን ዘግቧል፡፡

ጤናማ አዲስ የሚወለድ የህጻን ልጅ አማካኝ ክብደት 3 ነጥብ 4 ኪሎ ግራም መሆኑን የጤና ባለሙያዎች ይናገራሉ፡፡

#ትርታ 97.6 FM #ከልብዎ_የቀረበ

ጤና ሚኒስቴር ለመቄዶኒያ የአምቡላስ፣ የመድሃኒትና ቁሳቁስ ድጋፍ አደረገ
***

ጤና ሚኒስቴር የገናን በዓል ምክንያት በማድረግ ለመቄዶኒያ በጎ አድራጎት ማህበር የአምቡላስ እንዲሁም 4 ነጥብ 5 ሚሊዮን ብር የሚገመት የመድኃኒት እና ቁሳቁስ ድጋፍ አደረገ።

የጤና ሚኒስቴርና ተጠሪ ተቋማት ሰራተኞች የጤና ሚኒስትሯ ዶክተር መቅደስ ዳባ እና ሌሎችም የተቋሙ የስራ ሃላፊዎች በተገኙበት የገና በዓልን ምክንያት በመቄዶኒያ የበጎ አድራጎት ማህበር ለሚኖሩ ወገኖች ማዕድ አጋርተዋል።

የመቄዶኒያ የበጎ አድራጎት ማህበር መስራችና ዋና ስራ አስኪያጅ ቢኒያም በለጠ፥ ድርጅቱ በተለያዩ የአገሪቱ አካባቢዎች በ44 ቅርንጫፎች ከ8 ሺህ በላይ ወገኖችን እየደገፈ መሆኑን ገልጸዋል።

በቀጣይ የሚደግፋቸውን ወገኖች ቁጥር 20 ሺህ የማድረስ ዕቅድ እንዳለው ገልፀው፤ ማህበሩ በ15 ከተሞች የቅርንጫፍ ማዕከላት ግንባታ እያካሄደ መሆኑን ተናግረዋል ሲል ኢዜአ ዘግቧል።

#ትርታ 97.6 FM #ከልብዎ_የቀረበ

የነዳጅ ምርቶች የችርቻሮ መሸጫ ዋጋ ላይ ጭማሪ ተደረገ!
***

የንግድና ቀጣናዊ ትስስር ሚኒስቴር ይፋ እንዳደረገው ከዛሬ ታኅሣሥ 29 ቀን 2017 ዓ.ም ከምሽቱ 12 ሰዓት ጀምሮ በአዲስ አበባ ከተማ ተግባራዊ የሚሆነው የነዳጅ ምርቶች የችርቻሮ መሸጫ ዋጋ ተወስኗል።

በዚሁ መሰረት ፦

➡ አንድ ሊትር ቤንዚን 101.47 ብር፣

➡ አንድ ሊትር ናፍጣ 98.98 ብር፣

➡ አንድ ሊትር ኬሮሲን 98.98 ብር፣

➡ የአውሮፕላን ነዳጅ 109.56 ብር፣

➡ አንድ ሊትር ከባድ ጥቁር ናፍጣ 105.97 ብር

➡ አንድ ሊትር ቀላል ጥቁር ናፍጣ 108.30 ብር ሆኖ እንዲሸጥ ተወስኗል።

#ትርታ 97.6 FM #ከልብዎ_የቀረበ

የአእላፋት ዝማሬ የምስጋና መርሐ ግብር በድምቀት ተካሂዷል።
***
ለሁለተኛ ግዜ የተዘጋጀው የአእላፋት ዝማሬ የምስጋና መርሐ ግብር በቦሌ ደብረ ሳሌም መድሃኒዓለም ካቴድራል በድምቀት ተካሂዷል።

በመርሐ ግብሩ የኢትዮጵያ ኦርቶዶክስ ተዋህዶ ቤተክርስቲያን ፓትርያርክ ብፁዕ ወቅዱስ አቡነ ማትያስ፣ የአዲስ አበባ ሀገረ ስብከት ሊቀ ጳጳስ ብፁዕ አቡነ ሄኖክ እና ሌሎች ብፁዓን አበው ሊቃነ ጳጳሳት እንዲሁም ምእመናን ተገኝተዋል፡፡

የጃንደረባው ትውልድ ማኅበር ባዘጋጀው የአእላፋት ዝማሬ የምስጋና መርሐ ግብር ላይ በብዙ ሺህ የሚቆጠሩ ምዕመናንና ምዕመናት ተሳትፈዋል።

#ትርታ 97.6 FM #ከልብዎ_የቀረበ

መልካም የገና በአል!

ለመላው የክርስትና እምነት ተከታዮች በሙሉ:-
እንኳን ለኢየሱስ ክርስቶስ የልደት በአል አደረሳችሁ!

#ትርታ 97.6 FM #ከልብዎ_የቀረበ

ፖለቲከኛና የምጣኔ ሀብት ባለሙያው ቡልቻ ደመቅሳ በዛሬው ዕለት በ94 ዓመታቸው በሞት አርፈዋል።

ቡልቻ ደመቅሳ በኢትዮጵያ የኢኮኖሚ እና የፖለቲካ እንቅስቃሴ ውስጥ ጉልህ ስፍራ አላቸው። በአጼ ኃይለሥላሴ ዘመነ መንግሥት የገንዘብ ሚኒስቴር ምክትል ሚኒስትር እንዲሁም የዓለም ባንክ የአፍሪካ ተወካይ በመሆን ሠርተዋል። በተባበሩት መንግሥታት ድርጅት ተቀጥረው በተለያዩ ሀገራት አገልግለዋል።

በምዕራብ ወለጋ ዞን ቦጂ ቢርመጂ ወረዳ ከአባታቸው ደመቅሳ ሰንበቶ እና ከእናታቸው ናሲሴ ሰርዳ በ1923 ዓ.ም ተወለዱ።
የመጀመርያ ደረጃ ትምህርታቸውን በጊምቢ አድቬንቲስት እንዲሁም የሁለተኛ ደረጃ ትምህርታቸውን በኩየራ አድቬንቲስት ተምረዋል።

ከአዲስ አበባ ዩኒቨርሲቲ በኢኮኖሚክስ እና በሕግ ዲግሪዎች ተመርቀዋል። በወቅቱም በዩኒቨርሲቲው ከፍተኛ ውጤት በማምጣት ከተመረቁ 10 ተማሪዎች መካከል አንዱ በመሆን ወደ አሜሪካ በመሄድ በሲራኪዩዝ ዩኒቨርሲቲ የሁለተኛ ዲግሪ ትምህርታቸውን ተከታትለው ወደ ሀገራቸው ተመልሰዋል።

ቡልቻ ደመቅሳ በዘመናዊ የግል ንግድ ባንኮች ምሥረታ ታሪክ ተጠቃሽ የሆነው የአዋሽ ባንክ መሥራች ናቸው።

#ትርታ 97.6 FM #ከልብዎ_የቀረበ

ፋብሪካው በመሬት መንቀጥቀጡ ስራ አቁሟል!
***
በአፋር ክልል ዱላሳ ወረዳ የሚገኘው ከሰም ስኳር ፋብሪካ በመሬት መንቀጥቀጡ ከፍተኛ ጉዳት ደርሶበታል ተብሏል። ፋብሪካው ሙሉ ለሙሉ ስራ እንዳቆመም ተገልጿል።

በክልሉ በከፍተኛ ሁኔታ እየጨመረ የሚገኘው የመሬት መንቀጥቀጥ በስኳር ፋብሪካው አስተዳደር ህንፃ፣ በኃይል ማስተላለፊያ ክፍል፣ የላብራቶሪ እና ኤሌክትሮ ሜካኒካል ክፍል ላይ ከፍተኛ ጉዳት ማስተናገዱን የፋብካው ስራ አስኪያጅ አሊ ሁሴን ኡመር ለመንግስት መገናኛ ብዙሀን ተናግረዋል።

ጉዳት በደረሰባቸው ህንፃዎች ውስጥ የሚገኙትን ሌሎች ንብረቶችን ለማዳን የመሬት መንቀጥቀጡ ከፍተኛ ስጋት እንደሆነባቸው ገልፀዋል።

የፋብሪካው ሰራተኞች ላይ ጉዳት እንዳይደርስ አስቀድሞ እንዲለቁ መደረጉን ጠቅሰው፣ በፋብሪካው ንብረት ላይ ስርቆት እንዳይፈጸም ከመከላከያ፣ ፌዴራል ፖሊስ እና ከዞን ፖሊስ እንዲሁም ሌሎች ባለድርሻ አካላት ጋር በቅንጅት እየተሰራ እንደሚገኝ ተናግረዋል።

ከ4 ሺህ በላይ ሰራተኞች ያለው የከሰም ስኳር ፋብሪካ በመሬት መንቀጥቀጡ ምክንያት አሁን ላይ ሙሉ በሙሉ ስራ ማቆሙ ተጠቅሷል።

#ትርታ 97.6 FM #ከልብዎ_የቀረበ

በመሬት መንቀጥቀጥ ዙሪያ በባለሙያ የሚሰጡ የጥንቃቄ መልዕክቶችን ህብረተሰቡ እንዲከታተልና በጥብቅ እንዲተገብር የኢፌዲሪ የመንግስት ኮሙኒኬሽን አገልግሎት አሳሰበ። የመሬት መንቀጥቀጡ እስካሁን በከተሞች ምንም ጉዳት አለማድረሱንም አስታውቋል፡፡

አገልግሎቱ እንዳስታወቀው፣ በአፋር፤ ኦሮሚያ እና አማራ ከልል አዋሳኝ አካባቢዎች ማዕከላቸውን አድርገው የተለያየ መጠን ያላቸው የርዕደ መሬት ክሥተቶች በተደጋጋሚ ተከስተዋል፡፡

ክሥተቶቹ ከጊዜ ወደ ጊዜ በመጠን እና በድግግሞሽ እያደጉ ይገኛሉ። በተለይም በዚህ ሳምንት በርዕደ መሬት መለኪያ እስከ 5.8 ሬክተር ስኬል የተመዘገበ መንቀጥቀጥ መከሠቱን መረጃዎች ያሳያሉ።

መንግሥት የርዕደ መሬቱ ማዕከል (epicenter) የሆኑት አካባቢዎችን በመለየት በ12 ቀበሌዎች ላይ ከተለያዩ የሙያ ዘርፎች የተውጣጡ የአደጋ ጊዜ ሠራተኞች በቦታው በማሰማራት የጉዳቱን መጠን አሠሣ እያደረገ ይገኛል ብሏል።

በእነዚህ ቀበሌዎች ከሚኖሩ 80 ሺህ ዜጎች ቅድሚያ የሚሰጣቸውን በመለየት ነዋሪዎችን ከአካባቢው በማራቅ ለማሥፈር ከፍተኛ ርብርብ እየተደረገ መሆኑን ጠቅሷል።

በተጨማሪም ርዕደቱ በማኅበራዊ አገልግሎት ሰጭ ተቋማት፤ በኢኮኖሚ ተቋማት እና በመሠረተ ልማት ላይ ሊኖረው የሚችሰውን ተጽዕኖ በመከታተል ላይ ነው ብሏል።

እስካሁን ባለው ሁኔታ በዋና ዋና ከተሞች የጎላ ተጽዕኖ ያላደረሰ ቢሆንም ዜጎች በባለሞያዎች የሚሰጡ የጥንቃቄ መልእከቶችን እንዲከታተሉና በጥብቅ አንዲተገብሩ አሳስቧል፡፡

በቀጣይም ጉዳዩን በቅርበት በመከታተል አስፈላጊ መረጃዎችን በሚመስከታቸው ተቋማት አማካይነት የሚያደርስ መሆኑን አስታውቋል።

#ትርታ 97.6 FM #ከልብዎ_የቀረበ

ኃይሌ ሪዞርት በጅማ ተመረቀ
***
ኃይሌና ዓለም ኢንተርናሽናል ኃ/የተ/የግ/ማህበር 10ኛውን ባለ አራት ኮኮብ ሪዞርት በጅማ ከተማ በዛሬው እለት አስመርቋል።

ሪዞርቱ በ1 ነጥብ 7 ቢሊየን ብር ወጪ የተሰራ ሲሆን ሁለት አመት ባልሞላ ጊዜ ውስጥም የተጠናቀቀ ነው።

ሪዞርቱ የእንግዶች ማረፊያ ክፍሎች፣ የምግብ አዳራሾች፣ የተለያዩ ባሮች፣ የመዋኛ ገንዳ፣ ስፓ፣ ጂምናዚየም አሉት።

ሆቴሉ ኦዲዮ ቪዥዋል መሳሪያዎች የተሟሉላቸው 5 የስብሰባ አዳራሾችና አራት ዘመናዊና ባህላዊ ምግቦችን የሚያቀርቡ ሬስቶራንቶች እንዳሉት ተነግሯል።

ሆቴሉ ከ210 በላይ ቋሚ የሥራ እድል የፈጠረ ሲኾን፣ በቀጣይ በሙሉ አቅም ሥራ ሲጀምር 400 ለሚሆኑ ዜጎች ቋሚ የሥራ እድል እንደሚፈጥርም ተገልጿል።

በአጠቃላይ ሀይሌ ሆቴሎችና ሪዞርቶች ባሉት ሁሉም መዳረሻዎች ላይ ከ2 ሺህ 500 ሰራተኞች የሥራ እድል በመፍጠር እየሰራ ይገኛል ተብሏል።

#ትርታ 97.6 FM #ከልብዎ_የቀረበ

የኢትዮጵያ ንግድ ባንክ የደንበኞች አገልግሎት ወር የመክፈቻ መርሀ ግብር አስጀመረ። 

መርሀ ግብሩ የባንኩ የ82 አመታት ጉዞ ላይ የደንበኞች አስተዋፅኦ የማይተካ በመሆኑ: ይበልጥ ደንበኛ ተኮር የአሰራር ስርዓት ለመዘርጋት ቃል የሚገባበት መሆኑ ተገልጿል።

ከአራት አመት ወዲህ ለመጀመሪያ ጊዜ በተዘጋጀው እና ለተከታታይ አራት ሳምንታት በሚቆየው የደንበኞች አገልግሎት ወር ለአንድ ሳምንት የሚቆይ አውደ ርዕይ የተከፈተ ሲሆን፡ በቀጣይም ተከታታይ ውይይቶች፡ የ የደም ልገሳ እንዲሁም የማስ ስፖርት ዝግጅቶች ይካሄዳሉ።

ባንኩ 81 ከመቶ የሚሆኑ ደንበኞቹ የዲጂታል ቴክኖሎጂ እንዲጠቀሙ ማስቻሉ በመርሀ ግብሩ ላይ ተጠቅሷል።

በዛሬው እለት በዋና መስሪያ ቤቱ የተካሄደው ይህ መርሀ ግብር ''የላቀ አገልግሎት ደስተኛ ደንበኛ'' በሚል መሪ ቃል በሁሉም ቅርንጫፎች ከታህሳስ 24 እስከ ጥር 25 ቀን 2017 ዓ.ም በተለያዩ ዝግጅቶች ይከበራል።

በመክፈቻ መርሀ ግብሩ ላይም የገንዘብ ሚኒስቴር አህመድ ሽዴ ፣ የባንኩ ከፍተኛ የስራ ሀላፊዎች እና ሰራተኞች ተገኝተዋል።

(በንጉሱ በሪሁን)

#ትርታ 97.6 FM #ከልብዎ_የቀረበ

የኢትዮጵያ ብሔራዊ ቡድን ኮንጎ ዲሞክራቲክ ሪፐብሊክን አሸነፉ!
***
በ2025 የሞሮኮ የአፍሪካ ዋንጫ ማጣሪያ የመጨረሻ የምድብ ጨዋታ የኢትዮጵያ ብሔራዊ እግርኳስ ቡድን ኮንጎ ዲሞክራቲክ ሪፐብሊክን 2 ለ 1 አሸንፏል።

ጨዋታው ዛሬ ምሽት 1 ሠዓት ላይ ኬንሻሳ በሚገኘው ስታድ ደ ማርትየርስ ስታዲየም የተደረገ ሲሆን÷ ዋሊያዎቹ በበረከት ደስታና መሐመድኑር ናስር  ግቦች 2 ለ 1 አሸንፈዋል፡፡

የኢትዮጵያ ብሄራዊ ቡድን ከአፍሪካ ዋንጫ ውጭ መሆኑ ይታወቃል፡፡

#ትርታ 97.6 FM #ከልብዎ_የቀረበ

የአዲስ አበባ ከተማ ምክር ቤት የተለያዩ ሹመቶችን አጸደቀ
***

የአዲስ አበባ ከተማ ምክር ቤት የከተማዋ ከንቲባ አዳነች አቤቤ ያቀረቧቸውን ተሿሚዎች በሙሉ ድምፅ አፅድቋል ።

በዚህም መሰረት:-

1. አቶ ወንድሙ ሴታ - በም/ከንቲባ ማዕረግ የአ/አ ከተማ ዋና ሥራ አስኪያጅ

2. አቶ ተንኩዌይ ጆክ ሮም - የመንግሥት ልማት ድርጅቶች ተቆጣጣሪ ባለሥልጣን ኃላፊ

3. አቶ ይመር ከበደ ይማም - የህብረተሰብ ተሳትፎና በጎ ፈቃድ ማስተባበሪያ ኮሚሽን ኮሚሽነር

4. አቶ ግዛቸው አይካ - በአዲስ አበባ ምክርቤት የመሰረተ ልማትና መዘጋጃ ቤታዊ ጉዳዮች ቋሚ ኮሚቴ ሰብሳቢ

የቦታ ለውጥ ያደረጉ

1. አቶ አደም ኑሪ - የፕላንና ልማት ቢሮ ሃላፊ

2. አቶ ቢንያም ምክሩ - የገቢዎች ቢሮ ኃላፊ

3. ወ/ሮ ሃቢባ ሲራጅ - የንግድ ቢሮ ኃላፊ አድርጎ በማፅደቅ የአዲስ አበባ ከተማ ምክር ቤት 4ኛ ዓመት 1ኛ መደበኛ ጉባኤውን ማጠናቀቁን ከከንቲባ ፅ/ቤት ያገኘነው መረጃ ያመለክታል፡፡

#ትርታ 97.6 FM #ከልብዎ_የቀረበ

አየር መንገዱ የዓለም አራት ኮኮብ ደረጃ ዕውቅና እና ሽልማት አገኘ
*
የኢትዮጵያ አየር መንገድ በዓመታዊው አፔክስ ፓሴንጀር ቾይስ አዋርድ 2025 (APEX Passenger Choice Awards 2025) የዓለም አራት ኮኮብ አየር መንገድ ደረጃ ዕውቅና እና ሽልማት አገኘ።

ይህ የዓለም አራት ኮኮብ አየር መንገድ ሽልማት ከአንድ ሚሊዮን በላይ ከተረጋገጡ ጉዞዎች በረራ በኋላ ከመንገደኞች በተሰጡ ድምፆች መሰረት የተበረከተና በአቪዬሽኑ ዘርፍ ትልቅ ስፍራ የሚሰጠው ዓለም አቀፍ ዕውቅና መሆኑን የአየር መንገዱ መረጃ አመላክቷል።

የኢትዮጵያ አየር መንገድ ግሩፕ  ዋና ስራ አስፈጻሚ መስፍን ጣሰው እውቅናውን አስመልክተው “ይህ ሽልማት የኢትዮጵያ አየር መንገድ ከፍተኛ የአገልግሎት ደረጃዎችን ለማስጠበቅ ያለውን ቁርጠኝነት የሚያጎላ ነው። ጥረታችን እውቅና በማግኘቱ በጣም ደስተኞች ነን፣ ይህም ለበለጠ ስኬት እንድንጥር ያነሳሳናል” ብለዋል።

#ትርታ 97.6 FM #ከልብዎ_የቀረበ

የኃይል ማስተላለፊያ መስመር ላይ የወጣ ወጣት በተአምር ህይወቱ ተርፏል
***
በከፍተኛ የኃይል ማስተላለፊያ መስመር ተሸካሚ የብረት ምሰሶ ላይ የወጣ ወጣት ኃይል እንዲቋረጥ ማድረጉን በኢትዮጵያ ኤሌክትሪክ ኃይል የማስተላለፊያ መስመሮችና ማከፋፈያ ጣቢያዎች ኦፕሬሽን ዘርፍ አስታውቋል፡፡

በዘርፉ የደቡብ ሁለት ሪጅን እንደገለፀው ወጣቱ ዛሬ ከቀኑ 8:00 ጀምሮ ከወላይታ ሶዶ ወደ ሳውላ በሚሄደው ከፍተኛ የኃይል ማስተላለፊያ መስመር ላይ ወጥቶ አልወርድም በማለቱ በደቡብ ኢትዮጵያ ክልል በሚገኙ ጎፋ ዞን፣ አሪ ዞን፣ ባስኬቶ ዞን እና ኦሞ ዞን ሙሉ በሙሉ እንዲሁም ጋሞ ዞን በከፊል ከሦስት ሰዓታት በላይ ኃይል ተቋርጦ ቆይቷል፡፡

በምን ምክንያት የኃይል ማስተላለፊያ መስመሩ ላይ እንደወጣ ያልታወቀው ወጣት በአካባቢው ሽማግሌዎችና የመስተዳድር አካላት ቢለመንም ለመውረድ ግን አስቸግሮ እንደነበር መምሪያው ገልጿል፡፡

የኢትዮጵያ ኤሌክትሪክ ኃይል ባለሙያዎች ኃይል በማቋረጥ ወጣቱ ሳይጎዳ በገመድ አስረው በማውረድ በተአምር ህይወቱን ታድገዋል፡፡

የከፍተኛ ኃይል ማስተላለፊያ መስመሮች የሚያስተላልፉት የቮልቴጅ መጠን ከፍተኛ በመሆኑ ህብረተሰቡ ጥንቃቄ እንዲያደርግ መምሪያው አሳስቧል።

#ትርታ 97.6 FM #ከልብዎ_የቀረበ

ከአንድ ሺ በላይ ጥንዶች አንድ ላይ ይሞሸራሉ!
***
በዘንድሮ የ"የሺ ጋብቻ" መርሀ ግብር ከተለያዩ የአፍሪካ ሀገሮች የተውጣጡ 250 ተጋቢዎችን ጨምሮ ከአንድ ሺ በላይ ጥንዶች ይሞሸራሉ ተብሏል።

"ቤተሰብን መመስረት ሀገርን መገንባት ነዉ" በሚል መርህ በ2005 ዓ.ም የመጀመሪያዎቹን ተጋቢዎች የዳረዉ ያሜንት ኃ/የተ/የግል ማህበር፣ ሶስተኛዉን ዙር የብዙዎች ጋብቻ መድረክን በያዝነዉ ዓመት እንደሚከዉን ዛሬ በሀርመኒ ሆቴል በሰጠው መግለጫ አስታዉቋል።

ጥር 18 ቀን 2017 ዓ.ም ላይ በሚካሄደዉ የየሺ ጋብቻ መርሀ ግብር ላይም፤ ከተለያዩ የአፍሪካ ሀገሮች 250 ጥንዶችን ጨምሮ በኢትዮጲያ ካሉት ተጋቢዎች ጋር በድምሩ 1ሺህ 250 ጥንዶች ይዳራሉ ተብሏል።

በሚኒሊየም አዳራሽ በሚካሄደዉ የዘንድሮዉ የየሺ ጋብቻ መርሀ ግብር ላይም 2017 ኪ.ግ የሚመዝን ድፎ ዳቦ፣12 ሺህ የሚደርሱ የቡና ሲኒዎች ያሉት የቡና እንጠጣ ፕሮግራምን እንደሚኖርም ተመላክቷል።

(በትባረክ ኢሳያስ)

#ትርታ 97.6 FM #ከልብዎ_የቀረበ

ከነገ ጀምሮ ላኪዎች ካመነጩት የውጭ ምንዛሬ 50 በመቶውን በመሸጥ ቀሪውን በአካውንታቸው ማስቀመጥ ይችላሉ - ብሔራዊ ባንክ

****

ላኪዎች ያመነጩትን የውጭ ምንዛሬ 50 በመቶ ወዲያውኑ በመሸጥ ቀሪውን 50 በመቶ ላልተወሰነ ጊዜ ኢትዮጵያ ውስጥ ባለአካውንታቸው ማስቀመጥ የሚችሉበት አሰራር ከነገ ጀምሮ ተግባራዊ እንደሚደረግ የኢትዮጵያ ብሔራዊ ባንክ ገለጸ።

የባንኩ ገዥ ማሞ ምህረቱ እንዳሉት፣ ላኪዎች ካመነጩት የውጭ ምንዛሬ 50 በመቶውን ለባንኮች ወዲያውኑ በመሸጥ ቀሪውንም በአንድ ወር ውስጥ መሸጥ ይገደዱ ነበር።

በወቅቱ አሰራሩ በጊዜያዊነት ተግባራዊ ሲደረግ የተረጋጋ የውጭ ምንዛሬ ፍሰት እንዲኖር ከመፈለግ እንደነበር አስታውሰዋል።

ከነገ ጀምሮ ግን ላኪዎች ያመነጩትን የውጭ ምንዛሬ 50 በመቶ ወዲያውኑ በመሸጥ ቀሪውን 50 በመቶ ላልተወሰነ ጊዜ በአካውንታቸው ማስቀመጥ ይችላሉ ብለዋል።

ይህም ማለት ያመነጩትን የውጭ ምንዛሬ በአንድ ወር ውስጥ እንዲሸጡ አይገደዱም ብለዋል ሲል ኢዜአ ዘግቧል።

#ትርታ 97.6 FM #ከልብዎ_የቀረበ

ልቀት ኮሌጅ ነፃ የትምህርት እድል ሰጠ
***
ልቀት የኪነጥበብ እና ቢዝነስ ኮሌጅ የተመሰረተበትን ሰባተኛ  ዓመት ምክንያት በማድረግ በ2017 ዓ.ም የትምህርት ዘመን ለ200 ተማሪዎች የአንድ ሴሚስተር  ከወርሃዊ ክፍያ ነፃ የትምህርት እድል እንደሚሰጥ አሳውቋል።

ኮሌጁ ህዳር 2 ቀን 2010 ዓ.ም በአራት ወጣት ባለሞያዎች ተመስርቶ በሀገሪቱ ትምህርትን በከፍተኛ ጥራት እና ልዩነት እያስተማረ ቆይቷል።

ኮሌጁ በልዩነት በሚታወቅበት የፊልም ትምህርትን በአዲስ አበባ በብቸኝነት በዲፕሎማ ሲያስተምር ቆይቶ አሁን ደግሞ በኢትዮጵያ በግል ኮሌጆች ታሪክ የመጀመሪያ የሆነውን የፊልም ጥበብ ትምህርትን በመጀመሪያ ዲግሪ በመስጠት ላይ ይገኛል።

ልቀት ኮሌጅ በየዓመቱ ዝቅተኛ ገቢ ያላቸውን ዜጎች በከፍተኛ ቅናሽ በማስተማር ማህበራዊ ኃላፊነቱን ሲወጣ የቆየ ሲሆን በ2017 ዓ.ም የትምህርት ዘመንም የተመሰረተበትን ሰባተኛ ዓመት ምክንያት በማድረግ  የመጀመሪያውን ሴሚስተር ወርሃዊ ክፍያ በነጻ  የትምህርት እድል እንደሚሰጥ አሳውቋል።

ነፃ የትምህርት እድል የተሰጠባቸውም የትምህርት መስኮች:-ቪዲዮ ካሜራና ኤዲቲንግ፣
አካውንቲንግ፣ ማርኬቲንግ፣
የሰው ኃብት አስተዳደር እና
የቴአትር ጥበባት ሲሆኑ ምዝገባ ከህዳር 2 - 10 ቀን 2017 ዓ.ም ድረስ ብቻ መሆኑን የተቋሙ ዲን መሉጌታ ሙሃመድ ገልፀዋል።
ተመዝጋቢዎች የትምህርት ማስረጃቸውን ዋናውን እና ኮፒ ፣ በተጨማሪም ሁለት ጉርድ ፎቶ ግራፍ ይዘው በአካል ቀርበው መመዝገብ እንደሚችሉ ገልፀዋል።
ዕድሉ መጠቀም የሚፈልግ ሁሉ  አራት ኪሎ ትምህርት ሚኒስቴር ጀርባ ኢክላስ ህንፃ ላይ በሚገኘው የኮሌጁ ቢሮ በመምጣት መመዝገብ ይችላሉ ተብሏል።
ለበለጠ መረጃ በ09 84 71 71 44/09 40 08 99 99 መደወል እንደሚቻልም አሳውቋል

#ትርታ 97.6 FM #ከልብዎ_የቀረበ

የሆቴል ባለሙያዎችን አለባበስ እና የመዋቢያ ጌጣጌጥ አጠቃቀም ሥርዓት የሚወስን ደንብ ወጣ
***
በሆቴልና መሰል አገልግሎት ሰጪ ተቋማት ውስጥ ለሚሰሩ ባለሙያዎች ወጥ የሆነ የአለባበስ፤ የጌጣጌጥ እና የመዋቢያ አጠቃቀም ሥርዓት በመዘርጋት የሀገር ባህልና እሴት እንዲጠበቅ ለማድረግ የወጣ ደንብ ሲኾን፣ ደንብ ቁጥር 178/2017 ሆኖ መውጣቱም ተገልጿል።

ከደንቡ የአለባበስ ስርአት ውስጥ ለአብነት ደረት ክፍልን ያልሸፈነ ወይም ከአንገት በታች ያለውን የሰውነት ክፍል የሚሸፍን ሸሚዝ ያለበሰ፤የሴቶች ጉርድ ቀሚስ ቁመቱና ቅዱ ከጉልበት በላይ ከሆነ፤ ከጋብቻ ቀለበት ውጪ ጌጣጌጦችን በሚታዩ የሰውነት ክፍሎች ላይ ከተደረገ እንደሚያስቀጣ ያስቀምጣል፡፡

ደንብ ቁጥር 178/2017 በዘርፉ ተሰማርተው የሚሰሩ ሙያተኞች ሊደርስባቸው ከሚችለው አካላዊ፤ ሥነ-ልቦናዊ ጫና እና አላስፈላጊ ጥቃቶችን ለመከላከል ብሎም በከተማው የሚሰጠው የሆቴል አገልግሎት ዓለም አቀፍ መስፈርትን የሚያሟላ እንዲሆን ማድረግ ነው፡፡

ይህ ደንብ በሆቴልና መሰል አገልግሎት ሰጪ ተቋማት የተሰማራ ባለሙያ በደንቡ በተደነገገው መሰረት አክብሮ እየሰራ ስለመሆኑ ወቅቱን የጠበቀ ክትትል የሚደረግ ሲሆን የአዲስ አበባ ከተማ አስተዳደር ባህል፣ ኪነጥበብና ቱሪዝም ቢሮ ከአዲስ አበባ ከተማ ፖሊስ ኮሚሽን እና የደንብ ማስከበር ባለሥልጣን ጋር በቅንጅት በመስራት ደንቡ ተፈጻሚ እንዲሆን ይደረጋል መባሉን ትርታ ከአዲስ አበባ ፍትህ ቢሮ ሰምቷል።

#ትርታ 97.6 FM #ከልብዎ_የቀረበ

የራይድ መንደር ግንባታ ሊጀመር ነው!
***
በሜትር ታክሲ አገልግሎት ፈር ቀዳጅ የሆነው የሀይብሪድ ዲዛይንስ ምልክት ራይድ እና ሰዋሰው መልቲ ሚዲያ ከኦቪድ ሪል ስቴት በገቡት ውል መሰረት የራይድ መንደር ግንባታ ሊጀመር ነው።

በዛሬው እለትም የራይድ ዘመናዊ መንደር በሚገነባበት በገላን ጉራ አካባቢ የመሰረት ድንጋይ የማኖር ስነ-ስርዓት ተከናውኗል።

ራይድ ትራንስፖርት ለአሽከርካሪዎች፣ ለደንበኞቹ፣ ለሰዋሰው መልቲሚዲያ እና በስሩ ለሚገኙ ድርጅቶች ሰራተኞች የመኖሪያ መንደር ለመገንባት የያዘው ፕሮጀክት ወሳኝ ምዕራፍ የተጀመረበት መሆኑ ተገልጿል።

ራይድ አምስት ሺ ቤቶችን ከስድስት ወር እስከ አንድ አመት ባለው ግዜ ውስጥ ገንብቶ ለማጠናቀቅ ማቀዱን የሃይብሪድ ዲዛይንስ መስራችና ዋና ስራ አስፈጻሚ ሳምራዊት ፍቅሩ አስታውቀዋል።

በዛሬው መርሀ ግበር ላይም ከአዲስ አበባ ከተማ አስተዳደር ከፍተኛ የመንግስት የስራ አመራሮች ጨምሮ፤ ከራይድ ትራንስፖርት፣ ከሰዋሰው መልቲሚዲያ እና ከኦቪድ ሪል እስቴት ከፍተኛ የስራ ሃላፊዎች፣ ከ200 በላይ የራይድ ትራንስፖርት አሽከርካሪዎች እና የስራ ባልደረቦች ተገኝተዋል።

(በአህመዲን ሸረፋ)

#ትርታ 97.6 FM #ከልብዎ_የቀረበ

ፍራንኮ ቫሉታ ተሰርዟል!
***
የገንዘብ ሚኒስቴር የፍራንኮ ቫሉታ ወደ አገር ውስጥ እንዲገቡ ተፈቅደው የነበሩ ምርቶች ፍቃድ መሰረዙን አስታውቋል።

ሚኒስቴሩ ውሳኔውን ያሳለፈው መንግሥት የማክሮ ኢኮኖሚ ማሻሻያው ተከትሎ የዋጋ ግሽበት እንዳይከሰት በሚል እንደነበር አስታውሶ፤ "አሁን ላይ ዋነኛውን ምእራፍ የታለፈ በመሆኑ ፍቃዱን አንስቻለሁ" ብሏል በመግለጫው።

ወደ አገር ውስጥ እንዲገቡ ተፈቅደው የነበሩ የምግብና የፋብሪካ ግብአት የሚውሉ የውጭ ምርቶች መሆናቸውም ተገልጿል።

የፍራንኮ ቫሉታ ፍቃዱን ከጥቅምት 29/2017 ዓም ጀምሮ ተግባራዊ የማይደረግ መሆኑን ለጉምሩክ ኮሚሽን አባሪ አድርጎ በላከው ደብዳቤ ላይ ገልጿል።

የውጭ ምንዛሪ አቅርቦት በተመለከተ በኢትዮጵያ ያሉ ንግድ ባንኮች በቂ የሚባል የውጭ ምንዛሪ በበቂ ሁኔታ እየቀየረ ስለሆነም ከእንግዲህ በኃላ ፍራንኮቫሉታ የሚባል ነገር እንደማይኖርም አሳውቋል።

#ትርታ 97.6 FM #ከልብዎ_የቀረበ

10ኛዉ የአፍሪካ ሶርሲንግ እና የፋሽን ሳምንት በአዲስ አበባ መካሄድ ጀመረ::

የአፍሪካ ሶርሲንግ እና የፋሽን ሳምንት ከዛሬ ጥቅምት 29 እስከ ህዳር 2 ቀን 2017 ዓ.ም ድረስ በስካይላይት ሆቴል የሚካሄድ ሲኾን፣ የፋሽን ጨርቃጨርቅ እና ቆዳ ኢንደስትሪዎችን በአንድ ጣራ ስር ያሰባሰበ ነዉ ተብሏል::

በዝግጅቱም ከ30 ሀገራት የተወጣጡ ከ250 በላይ የዘርፉ ባለሙያዎች ምርትና አገልግሎታቸዉን ያስተዋውቃሉ።

ከ60 በላይ ሀገሮች የሚመጡ ከ7 ሺ በላይ የንግድ ዘርፍ ባለሙያዎች ተቋማትና ግለሰቦች እንደሚገኙበት ተገልጿል።

(ትባረክ ኢሳያስ)

#ትርታ 97.6 FM #ከልብዎ_የቀረበ

"ፊናፍ" የተሰኘ የኦሮምኛ ፊልም ከዛሬ ጀምሮ በቴሌ ቲቪ መታየት ይጀምራል::

ኤግልላየን ሲስተም ቴክኖሎጂ፣ ከኢትዮ ቴሌኮም ጋር በመተባበር ቴሌ ቲቪ የተሰኘ የኦላይን ሲኒማ መተግበሪያን ይፋ ማድረጉ ይታወሳል። በዚህም
<<ፊናፍ>> የተሰኘ የኦሮምኛ ፊልም በቴሌ ቲቪ አማካኝነት በዛሬዉ ዕለት መታየት እንደሚጀምር የኤግልላየን ሲስተም ቴክኖሎጂ መሥራችና ዋና ሥራ አስፈጻሚ በሱፈቃድ ጌታቸው ገልፀዋል::

በእጅ ስልክ በመታገዝ በ ቴሌ ቲቪ ፊልሞችን ለመመልከትም በሀገር ዉስጥ በቴሌ ብር እንዲሁም በዉጭ ሀገር በማስተር ካርድ በቪዛ እና በአሜሪካን ኤክስፕረስ የክፍያ አማራጮች መጠቀም እንደሚቻልም አብራርተዋል።

የድራማ ዘዉግ እና የአንድ ሰዓት ከ45 ደቂቃ ቆይታ ያለዉ <<ፊናፍ>> ፊልም በእንግሊዘኛም ትርጉም የተሰራለት መሆኑ፣ ቋንቋዉን ለማይረዱ  መናገርም ሆነ መስማት ለማይችሉ በአማራጭነት መቅረቡን የፊልሙ ፀሀፊ እና አዘጋጅ ቢቂላ አስፍዉ ተናግረዋል::

ፊናፍን ጨምሮ 8 ሀገርኛ ፊልሞችን በቴሌ ቲቪ የኦላይን ሲኒማ መተግበሪያ ለዕይታ መቅረባቸዉም ተገልጿል።

(ትባረክ ኢሳያስ)

#ትርታ 97.6 FM #ከልብዎ_የቀረበ

ግሎባል አልያንስ 4.6 ሚልዮን ብር ለአፋርና ለአማራ ልማት ማህበሮች ድጋፍ አደረገ!

ግሎባል አሉያንስ የገንዘብ ድጋፉን ያደረገው በሰሜኑ ጦርነት ወቅት ከፍተኛ ውድመት የደረሰባቸውን ትምህርት ቤቶችን  መልሶ ለማቋቋምና ግንባታዎችን ለማካሄድ ይረዳ ዘንድ እንደሆነ ዛሬ በነበረው የርክክብ ፕሮግራም ላይ ተጠቅሷል።

በእርዳታ የተገኘውን 4.6 ሚልየን ብር ሁለቱ ማህበሮች እኩል ተካፍለዋል። የማህበራቱ ተወካዮችም ድጋፌን በአካል ተገኝተው ተረክበዋል። ለግሎባል አሊያንስም ምስጋናቸውን አቅርበዋል።

ግሎባል አልያንስ በአጠቃላይ ላለፉት ስድስት አመታት በመላው የሀገሪቱ አካባቢዎች ላጋጠሙ ሰው ሰራሽና ተፈጥሯዊ አደጋዎችን ተከትሎ ከ300 ሚሊየን ብር በላይ ድጋፍ ማድረጉ ተጠቁሟል።

(ራህማ መሐመድ)

#ትርታ 97.6 FM #ከልብዎ_የቀረበ

ዶናልድ ትራምፕ የ2024 የአሜሪካን ፕሬዝዳንታዊ ምርጫን ማሸነፋቸውን ሲ ኤን ኤን በይፋ ዘግቧል!

#ትርታ 97.6 FM #ከልብዎ_የቀረበ

አዲስ አበባ ዩኒቨርሲቲ የብሪክስ ሀገራት ዩኒቨርሲቲዎች ማህበር መስራች አባል ሆነ
**
አዲስ አበባ ዩኒቨርሲቲ ሩሲያ፣ ህንድና ብራዚልን ጨምሮ ከብሪክስ ሀገራት ዩኒቨርሲቲዎች ጋር በመሆን በጣምራ የብሪክስ ሀገሮች ዩኒቨርሲቲዎች ማኅበርን በመመስረት የመጀመሪያው የምስራቅ አፍሪካ ሀገር ዩኒቨርስቲ መሆኑን አስታውቋል። 

አራቱ የብሪክስ ሀገራት ዩኒቨርሲቲዎች የመሰረቱት ማህበር በትምህርት በዲፕሎማሲ በጥናትና ምርምር እንዲሁም በፈጠራ ስራ በጋራ መሰራት የሚያስችላቸው መሆኑ ተመላክቷል።

ዩኒቨርስቲው በአዲሱ የራስ-ገዝ ስትራቴጂክ እቅድ መሰረት አጋርነትና ዓለማቀፋዊነትን በትኩረት እየሰራ እንደሚገኝ በማኅበራዊ ትስስር ገጹ አስታውቋል።

#ትርታ 97.6 FM #ከልብዎ_የቀረበ

በእሳት አደጋ የእናትና ልጅ ህይወት አልፏል።
***
በዛሬው እለት በፉሪ ክፍለ-ከተማ በመስሪያና መሸጫ ሼድ ላይ በተነሳ የእሳት አደጋ  የአንድ  እናት ከስድስት ወር ልጃቸው  ጋር ህይወታቸው ማለፉ ተገልጿል። ስድስት የንግድ ሱቆችም ተቃጥለዋል ተብሏል።

ከንግድ ሱቆቹ መካከል በአንደኛዉ ነዳጅ በፕላስቲክ ጠርሙስ በችርቻሮ የሚሸጥበት ሱቅ በመሆኑ ለሽያጭ የተዘጋጀዉ ነዳጅ ለቃጠሎ መከሰትና  መባባስ ጉዳት ምክንያት ሊሆን እንደሚችል ከአዲስ አበባ እሳት እና አደጋ ስጋት ስራ አመራር ኮሚሽን ያገኘነው መረጃ ያመላክታል።

ከስድስት ወር ልጇ ጋር ህይወቷ ያለፈችዉ እናት በእሳት አደጋዉ ከተቃጠሉት የንግድ ሱቆች ዉስጥ በአንደኛዉ ሱቅ የንግድ ስራ ላይ የነበረች መሆኗም ተጠቅሷል።

ነዳጅ መከማቸትም ሆነ መሸጥ ያለበት በተፈቀደለትና የአደጋ ደህንነት መስፈርትን ባሟሉ የነዳጅ መሸጫ ጣቢያዎች ዉስጥ ብቻ ነው ያለው ኮሚሽኑ፣ በተለያዩ የንግድ ሱቆች ዉስጥ ነዳጅ ማከማቸትም ሆነ መሸጥ መሰል አደጋዎችን የሚያስከትል በመሆኑ የንግድ ፈቃድ የሚሰጡ አካላትም ተገቢዉን ቁጥጥር ማድረግ ይኖርባቸዋል ብሏል።

#ትርታ 97.6 FM #ከልብዎ_የቀረበ

የኢትዮጵያ አየር መንገድ በአፍሪካ የመጀመሪያ የሆነውን አውሮፕላን ተረከበ።
***
የኢትዮጵያ አየር መንገድ በአፍሪካ የመጀመሪያ የሆነውን ኤር ባስ A350-1000 አውሮፕላን ተረከበ፡፡

በርክክብ ሥነ ስርዓቱ ላይ የኢትዮጵያ አየር ኃይል ዋና አዛዥ እና የኢትዮጵያ አየር መንገድ ግሩፕ የቦርድ ሰብሳቢ ሌተናል ጄነራል ይልማ መርዳሳ፣ የኢትዮጵያ አየር መንገድ ዋና ሥራ አስፈፃሚ መስፍን ጣሰው፣ የአየር መንገዱ ከፍተኛ የሥራ ኃላፊዎች፣ በኢትዮጵያ የፈረንሳይ አምባሳደር አሌክሲ ለሚክ፣ የኤር ባስ ኩባንያ ተወካዮች እና ጥሪ የተደረገላቸው እንግዶች ተገኝተዋል።

የላቀ አገልግሎት መስጠት የሚያስችል ቴክኖሎጂ የተገጠመለት አውሮፕላኑ በአየር መንገዱ ምድረ ቀደምት (Ethiopia land of origins) የሚል ስያሜ ተሰጥቶታል፡፡

በአፍሪካ የመጀመሪያ የሆነው A350-1000 አውሮፕላን 400 መቀመጫዎች አሉት፡፡

አየር መንገዱ እንደ አውሮፓዊያን አቆጣጠር በ2035 በዓመት 67 ሚሊዮን መንገደኞችን በማጓጓዝ 25 ቢሊዮን ዶላር ዓመታዊ ገቢ ለማግኘት እየሰራ እንደሚገኝ ተገልጿል።

በአሁኑ ወቅትም ባሉት 147 አውሮፕላኖች 139 ዓለም አቀፍ እና 22 የሀገር ውስጥ የበረራ መዳረሻዎችን እየሸፈነ ይገኛል፡፡

#ትርታ 97.6 FM #ከልብዎ_የቀረበ

ታምራት ቶላ የኒው ዮርክ ማራቶን በአራተኛነት አጠናቋል!

ውድድሩን ለኔዘርላንድስ የሚሮጠው ትውልደ ሶማሌያዊው አብዲ ነገዬ በ2:07:39 ሲያሸንፍ፣ ኬንያውያኑ ኢቫንስ ቼቤት እና አልበርት ኮሪር ሁለተኛና ሶስተኛ ሆነው ገብተዋል!

የአምናው አሸናፊ ታምራት ቶላ ርቀቱን 2:08:12 ነው ያጠናቀቀው።

#ትርታ 97.6 FM #ከልብዎ_የቀረበ

የኬንያ አትሌቶች በሴቶች የኒው ዮርክ ማራቶንን ተከታትለው በመግባት አሸንፈዋል!

ውድድሩን ሼይላ ቼፕኪሩይ በ2:24:35 በቀዳሚነት ስታጠናቅቅ፣ ሄለን ኦቢሪ በ2:24:49 እና ቪቪያን ቺርዮት በ2:25:21 ሁለተኛና ሶስተኛ ሆነው ገብተዋል።

ኢትዮጵያዊቷ ሰንበሬ ተፈሪ በ 2:27:14 ሰባተኛ ደረጃን አግኝታለች።

#ትርታ 97.6 FM #ከልብዎ_የቀረበ

ጥሩነሽ ዲባባ በዛሬው የኒው ዮርክ ማራቶን ትሮጣለች።
***

የ39 አመቷ ጥሩነሽ: የዛሬው የኒው ዮርክ ማራቶን ከስድስት አመት በኋላ ወደ ማራቶን ውድድር የተመለሰችበት መድረክ ነው።
ሰንበሬ ተፈሪ በውድድሩ ከፍተኛ ግምት የተሰጣት ስትሆን ፣ የኬንያዎቹ ሄለን ኦቢሪ፣ ሻሮን ሎኬዲ እና ቪቪያን ቺርዮት ከፍተኛ የአሸናፊነት ግምት አግኝተዋል።

#ትርታ 97.6 FM #ከልብዎ_የቀረበ

#ትርታ 97.6 FM

ታምራት ቶላ በኒው ዮርክ ማራቶን ለድል ይጠበቃል!
**
በዛሬው የኒው ዮርክ ከተማ ማራቶን ፉክክር በወንዶች የአምናው አሸናፊ ታምራት ቶላ ድል እንደሚያደርግ ግምት ተሰጥቶታል።

ኬንያዊው ኢቫንስ ቼቤት ሌላኛው ለድል የተገመት አትሌት ነውን

#ትርታ 97.6 FM #ከልብዎ_የቀረበ

የኢትዮጵያ አየር መንገድ በአፍሪካ የመጀመሪያ የሆነውን አውሮፕላን ከነገ በስቲያ ይረከባል
****

የኢትዮጵያ አየር መንገድ በአፍሪካ የመጀመሪያ የሆነውን ኤርባስ A350-1000 አውሮፕላን የፊታችን ማክሰኞ ይረከባል፡፡

የላቀ አገልግሎት መስጠት የሚያስችል ቴክኖሎጂ የተገጠመለት አውሮፕላኑ በአየር መንገዱ ምድረ ቀደምት (Ethiopia land of origins) የሚል ስያሜ ተሰጥቶታል፡፡

በአፍሪካ የመጀመሪያ የሆነው A350-1000 አውሮፕላን 400 መቀመጫዎች አሉት፡፡

አየር መንገዱ እንደ አውሮፓዊያን አቆጣጠር በ2035 በዓመት 67 ሚሊዮን መንገደኞችን በማጓጓዝ 25 ቢሊዮን ዶላር ዓመታዊ ገቢ ለማግኘት እንደሚሰራ አስታውቋል ።

በአሁኑ ወቅትም ባሉት 147 አውሮፕላኖች 139 ዓለም አቀፍ እና 22 የሀገር ውስጥ የበረራ መዳረሻዎችን እየሸፈነ ነው።

#ትርታ 97.6 FM #ከልብዎ_የቀረበ

የላቀ የሴቶች ፖለቲካዊ ውክልና እና የአመራርነት ተሳትፎ ለምንፈልጋት አፍሪካ እጅጉን አስፈላጊ እንደሆነ ተገልጿል።

የ2024 የፓን አፍሪካ አመራር ሳውቦና ( Pan - African Leadership Sawubona) ጉባኤ በአዲስ አበባ በዛሬው እለት በራዲሰን ብሉ ሆቴል ተካሒዷል፡፡

ጉባኤውን አኪና ማማ ዋ አፍሪካ (Akina Mama Wa Afrika) የተሰኘው አህጉራዊ ተቋም ከአጋር አካላት ጋር በመሆን ያዘጋጀው ሲኾን፣ በአፍሪካ ሴቶች ላይ ትኩረት አድርገው የሚሰሩ ተቋማት ተወካዮችና የመብት ተሟጋቾች ተሳትፈውበታል፡፡

በመድረኩም የሴቶችን የአመራርነት ተሳትፎና የፖለቲካ ውክልና በመጨመር የተሻለች አፍሪካን ለመገንባት በሚቻልበት ሁኔታ ላይ ጥናት ቀርቦ ውይይት ተደርጓል፡፡

የታንዛኒያ የህዝብ ተወካዮች ምክር ቤት አባል ኒማ ሉጋንጊራ: እየተጠናቀቀ የሚገኘው የፈረንጆቹ 2024 እና መጪው 2025 አመት ብዙ የዐፍሪካ ሀገሮች ምርጫን ያካሔዱና የሚያካሒዱ መሆናቸውን ጠቅሰው: የሴቶች ፖለቲካዊ ተሳትፎና ውክልና ትኩረት ሊሰጠው ይገባል ብለዋል፡፡

"በአፍሪካ እንዲኖር ለምንሻው የአመራር አይነት: ሴቶች በአመራርነትና በፖለቲካ ተሳትፎ የሚኖራቸው ሚና እጅጉን መሰረታዊ ነው" ሲሉም ተናግረዋል።

የአኪና ማማ ዋ አፍሪካ ዋና ዳይሬክተር ኢዩንስ ሙሲሜ በበኩላቸው: አፍሪካ ውስጥ አሁንም ድረስ በአመራር ደረጃ ወንዶች በዝተው የተገኙበት እና የሴቶች የፖለቲካ ውክልና አነስተኛ የሆነበት ምክንያቶች ላይ ጉባኤው ትኩረት ማድረጉን ገልጸውልናል፡፡

"ለምንፈልጋት አፍሪካ እውን መሆን የሴቶች አመራርነት መጨመርና የፖለቲካ ተሳትፎ መኖር አስፈላጊ ነው" ሲሉም ተናግረዋል።

(ቆንጂት ተሾመ)

#ትርታ 97.6 FM #ከልብዎ_የቀረበ

ከጥራት ደረጃ በታች ምርት በሚያመርቱ 14 ፋብሪካዎች ላይ እርምጃ መወሰዱን የንግድና ቀጣናዊ ትስስር ሚኒስቴር አስታወቀ፡፡

ሚኒስቴሩ በ2017 በጀት ዓመት የመጀመሪያ ሩብ አስገዳጅ የኢትዮጵያ ደረጃ ያላቸውን ምርቶች የሚያመርቱ 100 ፋብሪካዎች ላይ የኢንስፔክሽን ስራ ተሰርቷል ብሏል። በዚህም የ14 ፋብሪካ ምርቶች ከጥራት ደረጃ በታች ሆኖ በመገኘታቸው ርምጃ እንደተወሰደባቸው አመልክቷል።

እርምጃ የተወሰደባቸው ፋብሪካዎች የቆርቆሮ፣ የዕቃና የልብስ ሳሙናዎች፣ የአርማታ ብረት፣ ዱቄት ሳሙና፣ ዋየር፣ ፈሳሽ ሳሙና ማከፋፈያ መሆናቸው ተገልጿል፡፡

በዚህም ድርጅቶቹ ከማምረት ሂደት እንዲታገዱ፣ ምርትን ወደ ገበያ እንዳያቀርቡ የማሸግ ስራ እንዲሁም ምርታቸውን ከገበያ ላይ እንዲሰበስቡና የማስተካከያ ስራዎችን እንዲሰሩ የሚያደርግ እርምጃ ተወስዷል ብሏል።

በሩብ ዓመቱ ከደረጃ በታች በሆኑ 3 ሺሕ ካርቶን የልብስ ሳሙና፣ 543 ፍሬ ፈሳሽ የዕቃ ማጠቢያ ሳሙናዎች፣ የአሌክትሪክ ገመዶች እና 2 ሺሕ 683 ባለ 14 ዲያሜትር አርማታ ብረት ወደ ገበያ እንዳይወጣና እንዲወገድ መደረጉ ተገልጿል፡፡

እንዲሁም 77 ሺሕ 356 ሽንሽን ቆርቆሮ ምርት ወደ ገበያ እንዳይወጣ የማድረግ እና 760 ጥቅል የተለያየ መጠን ያላቸው ዋየር ምርቶች ለገበያ እንዳይቀርቡና ከገበያ ላይ እንዲሰበሰቡ በማደረግ አስተዳደራዊ እርምጃ ተወስዷል ነው የተባለው፡፡

በዚህም ሸማቹ ጥራታቸውና ደህንነታቸው ካልተረጋገጡ ምርቶች በመከላከል የማህበረሰቡን ጤናና ደህንነት ማስጠበቅ መቻሉን የሚኒስቴሩ መረጃ ያመላክታል፡፡

#ትርታ 97.6 FM #ከልብዎ_የቀረበ

የአፄ ቴዎድሮስ ጋሻ ከ150 አመታት በኃላ ወደ ሀገሩ ተመልሷል።
****
በመቅደላ ጦርነት ወቅት ከኢትዮጵያ ተዘርፎ እንግሊዝ  የተወሰደ  የአፄ ቴዎድሮስ ጋሻ ከ150 ዓመታት በኋላ ወደ ሀገሩ  ተመለሰ፡፡

ጋሻው እ.ኤ.አ በ1868 በተደረገው የመቅደላ ጦርነት በእንግሊዝ ወታደሮች ተዘርፎ የተወሰደና  አንደርሰን ኤንድ ጋርላንድ በተባለ የጨረታ ኩባንያ  አማካኝነት በኒውካስል ለጨረታ ሽያጭ ለመቅረብ የካቲት 21/2016 ዓ.ም  በእቅድ ተይዞ ነበር።

ይሁንና በባለስልጣኑ ፣ በአሜሪካ የኢትዮጵያ ቅርስ አስመላሽ ኮሜቴ አባላት ፣ በልዑል ኤርሚያስ ሣህለ ስላሴ ኃይለ ስላሴ ፣ በዶ/ር አሉላ ፓንክረስት እንዲሁም የኢትዮጵያ ጥንታዊ አርበኞች ማህበር ባደረጉት ጥረት ጨረታው እንዲሰረዝና  ተደርጎ  በግዥ ወደ ሀገሩ ተመልሷል፡፡

በአቀባበል ስነ ስርዓቱ ላይ የኢትዮጵያ ቅርስ ባለስልጣን ዋና ዳይሬክተር ረዳት ፕሮፌሰር አበባው አያሌው: አፄ ቴዎድሮስ መቅደላ ላይ በ1868 ዓ.ም ከእንግሊዝ ወታደሮች ጋር ተዋግተው ራሳቸውን ማጥፋታቸውን ተከትሎ በሀገሪቷ ላይ ብዙ ዘረፋ እንደተፈጸመ ገልፀው፣ ከተዘረፉት ቅርሶች መካከልም የተመለሰው ጋሻ አንዱ እንደሆነ አብራርተዋል፡፡

ጋሻው ለኢትዮጵያ ትልቅ ፋይዳ ያለው ቅርስ እንደሆነ ጠቅሰው፣ ወደ ሀገሩ እንዲመለስ ላደረጉ አካላት ምስጋና አቅርበዋል ።

#ትርታ 97.6 FM #ከልብዎ_የቀረበ

የኢትዮጵያ ብሔራዊ ባንክ ባንኮች እርስ በእርሳቸው የሚበዳደሩበት የገንዘብ ገበያ ይፋ አድርጓል።

ሙሉ ማብራሪያው ተያይዞ ቀርቧል።

#ትርታ 97.6 FM #ከልብዎ_የቀረበ

ኢትዮ ቴሌኮም የአምስተኛው ትውልድ (5G) የሞባይል ኔትዎርክ አገልግሎትን በደቡብ ሪጅን፣ ሐዋሳ ከተማ አስጀመረ
*

አምስተኛ ትውልድ (5G) የሞባይል ኔትዎርክ አገልግሎት ዓለም የደረሰችበት የመጨረሻው ፈጣኑ የሞባይል ኔትዎርክ አገልግሎት መሆኑ በማስጀመሪያ መርሐ ግብሩ ላይ ተገልጿል።

ይህም ለተቋሟት እና ግለሰቦች ፈጣን የኔትዎርክ አገልሎት በመስጠት የስራ ክንውናቸውን ለማቀላጠፍ ሚናው ከፍተኛ ነው ተብሏል።

የግብርና፣ ማዕድን፣ ትምህርት፣ ጤና እና አገልግሎት ዘርፎች የመረጃ ልውውጥን በማሳደግ ዲጂታል ኢኮኖሚን ለማዳበርም ጉልህ ሚና እንደሚኖረው ተጠቅሷል።

በማስጀመሪያ መርሐ ግብሩ ላይ የተገኙት የኢትዮ ቴሌኮም ዋና ስራ አስፈፃሚ ፍሬህይወት ታምሩ፥ ኩባንያው ዲጂታል ኢትዮጵያን እውን በማድረግ ረገድ የበኩሉን ሚና እየተወጣ ያለ ተቋም ስለመሆኑ ተናግረዋል።

የሲዳማ ክልል ርዕሰ መስተዳድር ደስታ ሌዳሞ፥ ኢትዮ ቴሌኮም ዓለም በደረሰበት ዲጂታል ቴክኖሎጂ ተወዳዳሪ ሀገር እና ተወዳዳሪ ኢኮኖሚ በመገንባት ረገድ እያበረከተው ያለው አስተዋጽኦ ከፍተኛ ስለመሆኑ አንስተዋል።

በዘንድሮው በጀት ዓመት የአምስተኛው ትውልድ (5G) የሞባይል ኔትዎርክ አገልግሎትን በ15 የሀገሪቱ ከተሞች ታቅዶ እየተሰራ መሆኑ በማስጀመሪያ መርሐ ግብሩ ላይ ተገልጿል።

ኩባንያው የአምስተኛው ትውልድ (5G) የሞባይል ኔትዎርክ አገልግሎትን ከሐዋሳ አስቀድሞም በአዲስ አበባ፣ አዳማ፣ ድሬዳዋ፣ ሐረር፣ ጂግጂጋ እና ባሕርዳር ማስጀመሩ ይታወቃል።

#ትርታ 97.6 FM #ከልብዎ_የቀረበ

ዛሬ ማምሻውን በአዲስ አበባ በጉለሌ ክ/ከተማ ወረዳ 7 አዲሱ ገበያ አካባቢ በደረሰ የትራፊክ አደጋ እስካሁን የአንድ ሰው ህይወት ማለፉን የአዲስ አበባ ፖሊስ አሳውቋል።

አደጋው በሸገር የህዝብ ማመላለሻ አውቶቡስ ላይ መድረሱን ነው የአዲስ አበባ ፖሊስ የገለጸው። በአደጋው የተጎዱ ሰዎችን ህይወት ለመታደግ ከፍተኛ ርብርብ እየተደረገ እንደሆነ ገልጿል።

"የአደጋው መንስኤ በመጣራት ላይ ነው" ብሏል።

የአዲስ አበባ ከተማ ፓሊስ ኮሚሽን የህዝብ ግንኙነት ዳይሬክተር ኮማንደር ማርቆስ ታደሰ በሰጡት ቃል ፥ ከሰሜን ሆቴል ወደ አዲሱ ገበያ ይሄድ የነበረ ኮድ 3 43994 ሸገር ባስ ላይ ነው አደጋው የደረሰው።

እስካሁን የ1 ሰው ህይወት አልፏል። እድሜውም ከ36 እስከ 40 የሚገመት ነው።

የአካል ጉዳት የደረሰባቸው ሰዎች ወደ ህክምና ተቋም ተልከዋል ብለዋል።


#ትርታ 97.6 FM #ከልብዎ_የቀረበ

የኢትዮጵያ እና ኤርትራ ጨዋታ በጁባ ይካሄዳል።
***
በአፍሪካ ሀገሮች ዋንጫ (ቻን) የማጣሪያ ጨዋታ ኢትዮጵያ ከኤርትራ ጋር የደርሶ መልስ ጨዋታዋን በደቡብ ሱዳን ጁባ እንደምታደርግ ተገለጸ፡፡

በዚሁ መሠረት የሀገራቱ የደርሶ መልስ ጨዋታዎች ጥቅምት 21 ቀን 2017 እና ጥቅምት 24 ቀን 2017 እንደሚከናወኑ መገለጹን የኢትዮጵያ እግር ኳስ ፌዴሬሽን መረጃ አመላክቷል፡፡

ለጨዋታውም ዛሬ ሹመታቸው የተሰማው አሰልጣኝ መሳይ ተፈሪ ለ23 ተጫዋቾች ጥሪ አቅርበዋል።

#ትርታ 97.6 FM #ከልብዎ_የቀረበ

መሳይ ተፈሪ የዋልያዎቹ አሰልጣኝ ሆነ!

የኢትዮጵያ ብሔራዊ ቡድን በአፍሪካ ሀገራት ዋንጫ (ቻን) ማጣርያ የሚያደርጋቸው ጨዋታዎችን በአሰልጣኝ መሳይ ተፈሪ ጊዜያዊ ዋና አሰልጣኝነት እየተመራ እንዲያከናውን መወሰኑን የኢትዮጵያ እግር ኳስ ፌዴሬሽን አስታወቀ፡፡

አሰልጣኝ መሳይ ተፈሪ ላለፉት 12 ወራት የኢትዮጵያ ብሔራዊ ቡድን ምክትል አሰልጣኝ ሆነው ሲሰሩ ቆይተዋል፡፡

የኢትዮጵያ ብሔራዊ ቡድን ከኤርትራ ጋር የሚያከናውናቸውን ጨዋታዎች ጨምሮ የቻን ማጣርያን በጊዜያዊ ዋና አሰልጣኝነት የሚመሩ መሆኑን ከፌዴሬሽኑ ያገኘነው መረጃ ያመላክታል።

መሳይ ተፈሪ በክለብ ደረጃ ወላይታ ድቻን ከምስረታው ጀምሮ በፕሪምየር ሊግ ተሳታፊ እንዲሆንና በ8 ዓመት ቆይታው በ2009 የኢትዮጵያ ዋንጫን በማሳካት በአፍሪካ ኮንፌዴሬሽን ዋንጫ እንዲሳተፍ አስችሏል፡፡

አርባ ምንጭ ከተማን በዋና አሰልጣኝነት በመምራት በ2015 ዳግም ወደ ኢትዮጵያ ፕሪምየር ሊግ እንዲመለስም አድርጓል፡፡

#ትርታ 97.6 FM #ከልብዎ_የቀረበ

በየዓመቱ ጥቅምት 10 የሚከበረው " የዓለም የአዕምሮ ጤና ቀን " በዓለም አቀፍ ደረጃ " በሁሉም የሥራ ቦታ ቅድሚያ ለአዕምሮ ጤና ጊዜው አሁን ነው " በሚል መሪ ቃል ተከብሮ ከሳምንታት በፊት ተከብሮ መዋሉ ይታወሳል፡፡

# በዛሬው ሳምንታዊው የሰሞንኛ የሬድዮ ፕሮግራምም፤የአዕምሮ ጤና መታወክ በምን ምክንያት እና እንዴት ሊያጋጥም ይችላል?

# የአዕምሮ ጤና ህመምን እንዴት እንከላከለው?

# በዚሁ የዕምሮ ጤና ህክምና ላይ ለረጅም ዓመታት አገልግሎት እየሰጠ የሚገኘው አማኑኤል ሆስፒታል ያለው አቅምና የህመሙ ስፋት በምን ልክ የተጣጣመ ነው?

# በስራ ቦታዎች ላይ ቅድሚያ ለአዕምሮ ጤና ይሰጣል? ግንዛቤውስ ምን ድረስ ነው? የሚሉ እና ሌሎች ከአዕምሮ ጤና ጋር ተያያዥነት ያላቸው ጉዳዮች በስፋት ይነሱበታል፡፡

# የዕለቱ ተጋባዥ እንግዳችን በአማኑኤል ስፔሻላይዝድ የአዕምሮ ህሙማን ሆስፒታል የስነ-ልቦና ህክምና ባለሙያ አቶ እንዳለ ማሞ ናቸው፡፡

#ትርታ 97.6 FM #ከልብዎ_የቀረበ

በአዲስ አበባ የሚካሔደውን  46ኛው የአፍሪካ እግርኳስ ኮንፌዴሬሽን (ካፍ) ጠቅላላ ጉባኤ የተሳካ እንዲሆን ለማገዝ ኢትዮጵያ በሚገባ ተዘጋጅታለች ሲሉ ጠቅላይ ሚኒስትር አብይ አህመድ ገለጹ፡፡

ጠቅላይ ሚንስትሩ ዛሬ ጠዋት የካፍ ፕሬዝዳንት ፓትሪስ ሞትሴፔን እና ሌሎች የስራ አስፈጻሚ ከፍተኛ አመራሮችን በጽህፈት ቤታቸው ተቀብለው ማነጋገራቸውንና እየተጠናቀቀ የሚገኘውን የአደይ አበባ ስታዲየምን በጋራ መጎብኘታቸውን አስታውቀዋል፡፡

የካፍ 46ኛው ጠቅላላ ጉባኤ በነገው እለት በስካይ ላይት ሆቴል  ይካሔዳል፡፡

#ትርታ 97.6 FM #ከልብዎ_የቀረበ

ራይድ እና የኢትዮጵያ ንግድ ባንክ ያላቸውን አጋርነት የበለጠ ለማጠናከር የሚያስችል ስምምነት ተፈራረሙ፡፡

የኢትዮጵያ ንግድ ባንክ ምክትል ፕሬዝዳንትና የዲጅታል ባንኪንግ ምክትል ፕሬዝዳንት  ወጋየሁ ገ/ ማርያም እንደተናገሩት ከራይድ ትራንስፖርት ጋር  የተደረገው ስምምነት በተለያዩ የዲጅታል አገልግሎቶች  የክፍያ አማራጮችን በመጠቀም ክፍያን ማሳለጥ በሚያስችሉ ጉዳዮች ላይ በጋራ ለመስራት የሚያስችል ነው።

የራይድ ትራንስፖርት የሽያጭና ማርኬቲንግ  ሃላፊ  ዘላለም ጌታቸው በበኩላቸው :- ስምምነቱ ከ70 ሺህ በላይ ተሽከርካሪዎችና 5 ሚሊየን ደንበኞች ይዞ በሚሠራው ራይድ ትራንስፖርት በዲጅታል ስርአቱ  ፈጣን አገልግሎት ለመስጠት የሚያስችል ነው ብለዋል።

#ትርታ 97.6 FM #ከልብዎ_የቀረበ

የታዋቂው ሩሲያዊ ደራሲ አንቷን ቼኮቭ ተውኔቶችን ስብስብ የያዘ የአማርኛ ትርጉም መፅሀፍ ለንባብ በቃ።

ጠበቃ የህግ አማካሪ እንዲሁም የቲያትር ባለሙያ በሆኑት ሳምሶን ብሬ ተተርጉሞ የቀረበው መጽሀፉ ''የወንዜ ሳቢሳና ሌሎች" በሚል ርእስ የታተመ ሲሆን:- አራት የአንቷን ቼኮቭ ዘመን ተሻጋሪ የምንግዜም ወርቃማ ስራዎች የተካተቱበት ነው።

ለቴአትርና የተውኔት ድርሰት ወዳጆች እና ለአንቷን ቼኮቭ አፍቃሪያን በስጦታነት የቀረበ እንዲሁም ለቴአትር ጥበብ ማስተማሪያነት ሊያገለግል የሚችል መፅሐፍ እንደሆነ ትናንት በምረቃ ዝግጅቱ ላይ ተነግሯል።

በእለቱም ከአንቷን ቼኮቭ ተውኔቶች ውስጥ ''የትንባሆ ጉዳት'' የተሰኘ ባለ አንድ ገቢር የአንድ ሰው አጭር ተውኔት ቀርቧል።

የመጽሀፍ ምረቃውን መቅረዝ ስነ-ኪን ከ IBEX ኢንተርቴይመንት በጋራ ያዘጋጁት ሲሆን ወጣት የኪነጥበብ ባለሞያዎችም የግጥም እና የሙዚቃ ስራዎቻቸውን አቅርበዋል።

በብሔራዊ ቤተመዛግብትና ቤተመጻሕፍት አገልግሎት (ወመዘክር ) አዳራሽ በተካሄደው የመጽሀፍ ምረቃ አንጋፋው ከያኒ ተስፋዬ አበበ (ፋዘር) የክብር እንግዳ በመሆን ተገኝተዋል። ልዩ የምስጋና የምስክር ወረቀትም ተበርክቶላቸዋል።
 
(በንጉሱ በሪሁን)

#ትርታ 97.6 FM #ከልብዎ_የቀረበ

ሹመት ሰጥተዋል!
***
ጠቅላይ ሚኒስትር ዐቢይ አሕመድ በዛሬው እለት የሚከተሉትን ሹመቶች ሰጥተዋል።

1. ዶ/ር ጌዲዮን ጥሞቲዮስ፦ የውጪ ጉዳይ ሚኒስቴር ሚኒስትር
2. ወ/ሮ ሰላማዊት ካሳ፦ የቱርዝም ሚኒስቴር ሚኒስትር
3. ወ/ሮ ሃና አርአያስላሴ፦ የፍትህ ሚኒስቴር ሚኒስትር

የጠቅላይ ሚኒስትር ጽህፈት ቤት

#ትርታ 97.6 FM #ከልብዎ_የቀረበ

አዲስ አበባ በአፍሪካ ከፍተኛ የገንዘብ ሽልማት የሚያስገኘውን የቴክኖሎጂ ፈጠራ የአርቴፊሻል ኢንተለጀንስ ውድድርን አስተናግዳ፣ ኢትዮጵያኖቹ ተወዳዳሪዎችም ሶስተኛ ደረጃን አግኝተዋል።
ውድድሩንም አብርሆት ቤተ መጽሀፍ ከ Africa 2 Silcon Valley ከተባለው ተቋም ጋር በትብብር ነው ያዘጋጀው።
"የአርቴፊሻል ኢንተለጀንስ ለበጎ ተጽእኖ" በሚል መሪ ቃል የተዘጋጀው ውድድር ላይም በመጀመሪያ ከ48 የአፍሪካ ሀገሮች 4900 በላይ ተወዳዳሪዎች ተሳታፊ የሆኑበት ነበር። በየደረጃው በተካሔደው ማጣሪያም ስምንት ቡድኖች ለፍጻሜ መቅረብ ችለዋል። ተወዳዳሪዎቹ በሳይንስ ሙዚየም የፈጠራ ስራቸው አውደ ርእይ ለሶስት ቀናት የቀረበ ሲኾን፣ በትናንትናው እለት ምሽት ላይ በአድዋ ሙዚየም አሸናፊዎቹ ለሽልማት የበቁበት ስነ-ስርአት ተካሂዷል።

ሁለት አባላት ያሉት የኢትዮጵያ ቡድን በውድድሩ ሶስተኛ ደረጃን አግኝቶ የ4ሺ ዶላር ሽልማት ተበርክቶለታል።

የቡድኑ አባል እስጢፋኖስ በሀይሉ ፣ ፈጠራቸው ለተማሪዎች የጥናት ዘዴ የሚረዳ መሆኑን በተለይ ለትርታ ገልጿል። ተማሪዎች በእለታዊ የትምህርት መርሀግብር ወቅት እንዲመለስላቸው የሚፈልጉትን ጥያቄ በመተግበሪያው ምላሽ ያገኙበታል ሲል አስረድቷል።

በአፍሪካ የቴክኖሎጂ ፈጠራ ውድድሩ ሁለት የቱኒዝያ ቡድኖች በፍጻሜ ውድድር አንደኛና ሁለተኛ ደረጃን አግኝተዋል።
የአብርሆት ቤተ መጽሀፍ ዳይሬክተር ኢንጂነር ውብአየሁ ማሞ አፍሪካ በቴክኖሎጂው ዘርፍ ከምእራቡ አለም ያለባትን ክፍተት ለመሙላት እንዲህ ያለው የውድድር መድረክ ለአህጉሪቱ ወጣቶች መዘጋጀታቸው አስፈላጊ መሆኑን ገልጸዋል። የአፍሪካ ችግሮችንም በራሷ ልጆች ለመፍታት እጅጉን የሚረዳ አይነተኛ መንገድ ነው" በማለት መሰል መድረኮች በቀጣይነትም ሊካሄዱ እንደሚገባ አስምረውበታል።

#ትርታ 97.6 FM #ከልብዎ_የቀረበ

እነ ጆን ዳንኤል ላይ የስር ፍርድ ቤት የሰጠውን የዋስትና ብይን ጠቅላይ ፍርድ ቤት አጽንቶታል።
***
"ከአውሮፕላን አንወርድም" በማለት የኢትዮጵያ አየር መንገድን ደህንነት አደጋ ላይ ለመጣል ተንቀሳቅሰዋል ተብለው የተከሰሱት ስድስት ግለሰቦች ላይ በስር ፍርድ ቤት ውድቅ የተደረገባቸውን የዋስትና ጥያቄን የፌደራል ጠቅላይ ፍርድ ቤት ይግባኝ ሰሚ ችሎት አፀና።

ከ15 ቀናት በፊት በስር ፍርድ ቤት የዋስትና ጥያቄያቸውን ውድቅ አድርጎ በማረሚያ ቤት ሆነው ጉዳያቸውን እንዲከታተሉ ብይን መስጠቱ ይታወሳል።

ዮሃንስ ዳንኤል (ጆን ዳንኤል)፣ አማኑኤል መውጫ፣ ናትናኤል ወንድወሰን፣ ኤልያስ ድሪባ፣ ይዲድያ ነጻነት እና እሌኒ ክንፈ የተባሉ ተከሳሾች ግን በጠበቆቻቸው አማካኝነት የዋስትና ጥያቄያቸው ውድቅ መደረጉ አግባብ አለመሆኑን ጠቅሰው ለጠቅላይ ፍርድ ቤት ይግባኝ ብለው ነበር።

ይግባኝ ሰሚ ችሎቱ የይግባኝ ባዮችን አቤቱታን እና የከሳሽ ዐቃቤ ሕግ መልስ፣ የግራ ቀኝ ክርክርን መርምሮ የስር ፍርድ ቤት ዋስትና ጥያቄውን ውድቅ ማድረጉ ከህግ አንጻር ተገቢ ነው በማለት ብይኑን አጽንቷል። በመሆኑም ተከሳሾች በማረሚያ ቤት ሆነው ጉዳያቸውን ይከታተላሉ።

#ትርታ 97.6 FM #ከልብዎ_የቀረበ

በሕገ-ወጥ የሰዎች ዝውውር ወንጀል ጥፋተኛ ተብለው በ13 መዝገብ የተከሰሱ ግለሰቦች ከአንድ ዓመት እስከ 25 ዓመት በሚደርስ ፅኑ እስራት ተቀጡ፡፡

በ13 የክስ መዝገብ ተከሰው የፍርድ ውሳኔ የተላለፈባቸው፡-

1ኛ. ተካ ወ/ማርያም 25 ዓመት ጽኑ እስራት እና 28 ሺሕ ብር የገንዘብ ቅጣት፤ በሌላ የክስ መዝገብ ደግሞ 16 ዓመት ከ6 ወር ጽኑ እስራት፣

2ኛ. ለማ ተማሮ 10 ዓመት ጽኑ እስራት፣

3ኛ. መለሰ ካህሳይ 11 ዓመት ጽኑ እስራትና 76 ሺሕ ብር የገንዘብ ቅጣት፣

4ኛ. ደመቀች ማጉጂ 15 ዓመት እስራት እና 30 ሺሕ ብር የገንዘብ ቅጣት፣

5ኛ. ስምኦን ተወልደ 3 ዓመት ከ7 ወር እስራት እና 4 ሺሕ 500 ብር የገንዘብ ቅጣት ፣

6ኛ. ዮሃንስ ፍስሃዩ 5 ዓመት ከ7 ወር እስራትና 7 ሺሕ 500 ብር የገንዘብ ቅጣት፣

7ኛ. ሀና ዲኖ 3 ዓመት ከ3 ወር እስራትና 2 ሺሕ 500 ብር የገንዘብ ቅጣት፣

8ኛ. ረዳት ሳጅን መሀመድ አህመድ 6 ዓመት እና 8 ሺሕ ብር የገንዘብ ቅጣት፣

9ኛ. ገ/ትንሳኤ ሀጎስ በ16 ዓመት ከ6 ወር ጽኑ እስራት እና 80 ሺሕ ብር የገንዘብ ቅጣት፣

10ኛ. አብዱል ሽኩር ይማም 10 ዓመት እና 11 ሺሕ ብር የገንዘብ ቅጣት፣

11ኛ. ሙህዲን አማን መሀመድ 10 ዓመት እና 11 ሺሕ ብር የገንዘብ ቅጣት፣

12ኛ. አብዱላዚዝ ራህመቶ ዳንቴቦ 5 ዓመት እና 6 ሺሕ ብር የገንዘብ ቅጣት፣

13ኛ. ዘላለም ብርሃኑ 5 ዓመት እስራት እና 3 ሺሕ ብር የገንዘብ ቅጣት፣

14ኛ. ናርዶስ ሀብቴ ደበሌ 4 ዓመት ከ5 ወር እስራት እና 3 ሺሕ 500 ብር የገንዘብ ቅጣት፣

15ኛ. ፍሬሕይወት በላይ ግርማ 6 ዓመት እስራት እና 110 ሺሕ ብር የገንዘብ ቅጣት፣

16ኛ. ቅዱስ ኃ/ሚካኤል ሳምቢ 4 ዓመት ከ5 ወር እስራት እና 3 ሺሕ 500 ብር የገንዘብ ቅጣት፣

17ኛ. ሚኪያስ ተሾመ ፈጡላ 410 ሺሕ ብር የገንዘብ ቅጣት

የፌደራል የመጀመሪያ ደረጃ ፍርድ ቤት ልደታ ምድብ ችሎት በ13 የምርመራ መዝገቦች ሲታይ የቆየውን የሕገ-ወጥ የሰዎች ዝውውር የወንጀል መዝገብ መርምሮ ጥፋተኞችን ያርማል ሌሎችንም ያስተምራል በሚል ከአንድ ዓመት እስከ 25 ዓመት ፅኑ እስራት እንዲሁም ከ2 ሺሕ ብር እስከ 410 ሺሕ ብር የገንዘብ መቀጮ እንደወሰነባቸው የፌደራል ፖሊስ መረጃ ያሳያል።

#ትርታ 97.6 FM #ከልብዎ_የቀረበ

የአርቲስት ሰለሞን ቦጋለ "የራስ መንገድ" ፊልም በቴሌቲቪ መተግበሪያ ከዛሬ ጀምሮ ለህዝብ ለዕይታ ይቀርባል፡፡ ይህንን በማስመልከትም በዛሬው እለት በጎልደን ቱሊፕ ሆቴል የፈርማ ስነ-ስርዓት ተከናውኗል።

ቴሌ ቲቪ በአጭር ጊዜ ውስጥ ለዕይታ ቀርበው የነበሩ ፊልሞችን መልሶ ለህዝብ ዕይታ እንዲበቁ በማድረግ የተሻለ አማራጭ ሆኖ እንደቀረበ የተናገሩት የኤግልላይን ቴክኖሎጂ መስራች እና ስራ አስኪያጅ በእርሱ ፍቃድ ጌታቸው ናቸው፡፡

ለአብነትም ከተመሠረተ እና ስራውን ከጀመረ ከአራት ወራት የማይበልጥ ዕደሜ ቢኖረውም ከእዚህ ቀደም በቴሌ ቲቪ ዶቃ እና ጥቁር አደይ፣ ትዝታና 6 ሰዓት ከሌሊቱ የተሰኙ ፊልሞች ለዕይታ መቅረቡን አስታውሰዋል።

መሰል ተግባራት ለሀገርና ለኪነጥበብ እድገት ያለው ሚና የላቀ ከመሆኑም በላይ የውጭ ምንዛሬን በማምጣት ሁሉም በጋራ የሚጠቀምበት መንገድ ነው ሲሉም ተናግረዋል፡፡

ይህንንም አሰራር በማሳደግ ቴሌቲቪ ላይ የሚገኙትን የተመረጡ ሀገርኛ ፊልሞችን በቅርቡ ከስልክ በተጨማሪ በቴሌቪዝን ለመመልከት የሚያስችል ስራ እያለቀ መሆኑን አስታውቀዋል።

በዛሬው የፊርማ ስነ ስርዓት ላይም መሰል የኪነ ጥበብ ተባባሪ ቤተሠቦች ሊበረታቱ እንደሚገባ ደራሲና አዘጋጁ ሰለሞን ቦጋለ ተናግሯል።

በቀጣይ በቴሌ ቲቪ የውጭ ሀገር የተመረጡ ፊልሞችና ዘጋቢ ፊልሞችን በማካተት በብዙ ዘርፎች ለተመልካች እንደሚቀርብ ተገልጿል።

(አህመዲን ሸረፋ)

#ትርታ 97.6 FM #ከልብዎ_የቀረበ