سجاد الكريزي

فك لثام الغيبه ياتالي السَلَف
والحگ النه حالنه حيل اختلف

الحگ النه الباطل يصول ويجول
وچم أثر لهلك تهدم وانتلف

چم قريب الصبّح بوادي الغريب
جرّته احبال المداهن وانزلَف

( ابو موسى ) لهسه يخلع بالأمير
وبزر فكره تبيع ذهب الله بعلف

بولد ذات الرايه متخومه الديار
اعلينه چفهم ويّ الِيّهود احتلف

اخصومنه اتگوت علينه بكل مكان
واحنه نتخاصم عله اجلاد الملف

اطيح يوميه الرگب لجل الغدير
واحنه بين المؤتلف والمُختَلَف

الدين رايد حيل واسيوف ورجال
ومثل غيرة ( جندب الأزدي ) الخَلَف

فكر مابيه سيف متهزهز يعيش
ومايرد ( اليعوي ) لو طب للسلف

لا تأجّـل عجّـل بجيّـتك تـراه
لگلب المتاني الجزع وسفه دَلَف

كونك اتـاني نحـدّلك بالسيـوف
يطول يبن العسكري ثار السَلَف



اللهم عجل لوليك الفرج

لمولانا موسى بن جعفر ( صلوات الله عليه )




بحزن وجروح ... غريبه تنوح
جنازة موسى بن جعفر

~~~~~~~~~~~~~

نهار وكلشي بيه وحشه ... ومنّ گـد الكِدر أظلم
بيه حته الهوه مخنوگ ... وحزن العرش بيه ينشم
نعش راعيه ثگل الگاع ... غريب وميت امسمم
واصوات السقيفه تصيح ... ركن من حيدر اتهدم

سليل النور ... رحل مغدور
بـ سم الباغض لحيـدر

~~~~~~~~~

عجب فوگ الجسر نعشه ... يحير بشوفته الناظر
عله مصابه الحجر يبجي ... وجارح كل گلب طاهر
هضيمه اشلون چف الخير ... عليه گيد الحقد داير
حزن خـلّ بيه مدار الكون ... أبد لا مو حزن عابر

جمر بالعين ... الجده حسين
عليه گلب الشرع جَمّر

~~~~~~~~~

راهب آل ابـو الزهراء ... العله الوادم علم ينهل
گضه عمره بزمن هارون ... بين اسجونه يتنقل
امن البصرة لسجن بغداد ... مگيوده چفوف الحَل
وحته الدين ماينعاب ... عذاب وضيم يتحمل

عذاب وآه ... وا ويلاه
چبده امن السم اتفطر

~~~~~~~~~

باب التوبه والحاجه ... الشريعه انحفظت بسِده
عدل ميت ابو طلبه ... ينطي امراد الي يگصده
اليتعنه بجبال اهموم ... يرد مرتاح من عنْده
ادخيلك ياأسد بغداد ... تصح مفتاح كل شدّه

اليجيه مكسور ... يرد منظور
بعينه وتنگضي التعسر

~~~~~~~~~~

من يوم الغدير الناس ... ماي اگصصهم اتبده
ويشهد بيت ابو الحسنين ... عليه چم ظالم اتعده
وآل المرتـضى مابين ... اگيود احقـاد التضده
گضو بين الصعد مذبوح ... وبين السّم گصه بچبده

بـنشد متعوب ... متىْ المحجوب
يـردّ احگوگهم يحضر


~~~~~~~~~


سجاد الگريزي

لمولانا راهب بني هاشم موسى بن جعفر الكاظم صلوات الله عليهم




بـيـن الضـمـاير والحَبس
مسجونه بالظلمه الشمس
وكل المصايب إلها رِس ... منّ الـ ( وإن ) متواتره

من باب فاطم والـ ( وإن )
اعله اولادها حَلّ الحزن
سم وذبح گيد وسجن ... ونـار السقيفه اموجّره

كل حزن صار عليهم سكوت الوادم
عافـو النار واهلها اعله عتّبةّ فاطم
الگيـدو أيـد علي ذيچ صلبها اتوارث
نفس الاحقاد أثرها اعله گيد الكاظم

وينه العله الدين انحسب ؟
واتشخص اعليه وانتسب
عالّـ سـاجـن الوارث نبي
ساكت عله الحگه انسلب !!


الأمر ال آله بأيده ... الغربه سجنه وگيده
الراد خير الوادم ... يغيب ليش تريده ؟

~~~~~~~~~~~~~~~~~~~

شجرة علي الها غصن
ينگاد من سجن لسجن
وگيده على چفه يون ... وصبره عله جرحه نعه

وارث علوم المصطفه
أصل الشرع والمعرفه
محد دره بحاله اشصفه ... وبوب الحزن متشرعه


ويلي عالغابت اهله وعَمامه ابعيده
وقـلّـةّ النـاصـر الخّلّه گـيـده بأيده
آل طـه قَـدرهـم ذبـح لـو منفى
وكل زمن وي ظلمهم صبح تعويده


عاده الزمن بآل النبي
ذبح وسجن غيبه وسبي
ومولانا موسى بغربته
أبن الوصي وصار اجنبي


حگ علي واولاده ... منسلب كالعاده
وهمّ دين الباري ... وساده فوگ الساده

~~~~~~~~~~~

بين الطلب كرسي القصر
وبين الرعيه بيا عذر ؟
اتشرع ذبـح ضيّ الفجر ... واحبال وصله تِگطعه

دين الله كسروله ضلع
صب اعله محمود الطبع
موسى ابن جعفر يادمع ... مات بأديه الجامعه

مـات سابع إمام وبعيده اعزازه
وين أهله اعله ثاره تِدوّر العازه
وهو ياهو البقاله عشيره وخلّصت
وعالجسر ضلت ابلا أهلها اجنازه

متّـغرب ومـات بغرب
لا رايه لهله بكل درب
ياهو اليداعي بذبّحته
والناس متحجّرةّ گلب

ناس صار ايمانها .. بلـ أسم عنوانها
والقصر وامـواله ... والخليفه اوثانها

~~~~~~~~~~~
نيشان حزن امصيبته
تاخذنه حيرة غربته
للوجّـروها خيمته ... وراسه اعله رمحه العالي

وگيده خذانه بهضمته
لسبي الضعون وعمته
العاش وتلالي دمعته ... عـالضـلـت ابـلا والي

عاش دمعة مصيبه اعله ظهر العاشر
عالذبيح البقه اوحيد ولا من ناصر
ومـن خـرابه لخـرابه الـدلال بگيده
منكسر عالأميره وگلبها الحاير

نار وجرح گلبه العطش
عالضل ثلاثه ابلا نعش
ولا مندفن صفوّة علي
ودمه عله الرمضه انفرش


مـات دمعه بعينه ... وليله ونّ لونينه
للذبيح اجـروحـه ... والنزف تكفينه

~~~~~~~~~~~

سجاد الگريزي

https://youtu.be/v3zDwR1i19c?si=z8MoHkUq86NRAKF5

https://youtu.be/MS-bjFfHfsw?si=DrAO6dt9s-K0Z7IR

https://youtu.be/I2xFuuVZQgY?si=7DI6v8cMEdwPC2tp

https://youtu.be/KBbXtqgRMng?si=EygdY4CRcXnnNwAq

لمولاتنا عقيلة بني هاشم ( صلوات الله عليها )


المستهل


زينب عزيزة هاشم اعليها الأجل حان
مـاتت غريبه والنعش ماشالته اخوان

وصوت المواجع معتلي ... معقوله زينب بت علي

ماتت غريبه والنعش ماشالته اخوان

~~~~~~~~~~~~~~~~~

ويلي بنْت البيده رد شمس الضحه
اعليها دار الوكت چـن دورة رحه
ماتت اشگد گـبـل هـاي النايحه
موت فرگه وموت سبي ومستحه


منّ اوي اهلها اتفارگت ويلي اصبح الحال
ابـلا هودج وفوگ الهزل وبچفها الاحبال

بنت الولي بعازة ولي ... معقوله زينب بت علي

ماتت غريبه والنعش ماشالته اخوان

~~~~~~~~~~~~~~~~~

ليش بنت الزهره والجدها النبي
اتموت متغربه بديار الأجنبي
ليش حته بموتها هم تنسبي
عنها وين الهاشمي والطالبي


وين الأمس كل العده منهم يرجفون
ماتت عقيلتهم لچن ماغمضت اعيون

تانتهم بدمع ايغلي ... معقوله زينب بت علي

ماتت غريبه والنعش ماشالته اخوان

~~~~~~~~~~~~~~~~~

الچانت بفيّ الحسين وكل هله
وبكفالة روح اخيته امدللـه
سلب كلشي منها عاشر كربله
وعاشت بسد النواعي امعلعله


عاشت سنه ونص والدمع مافارگ العين
سـاعـه تون ياابا الفضل ساعات يحسين

راحت الـ ( خويه ادللي ) ... معقوله زينب بت علي

ماتت غريبه والنعش ماشالته اخوان

~~~~~~~~~~~~~~~~~

هاي موته وشالعه ابتوت الدليل
بگاع غربه اتموت بت حامي الدخيل
حاير بعمته بقه اوياها العليل
شيّعاها بليل وادموعه تسيل

مثل امها من استشهدت متشيعه بالليل
هناكَ علي اولّده الفرق وهنا مچاتيل

ويندب هضمها ياهلي ... معقوله زينب بت علي

ماتت غريبه والنعش ماشالته اخوان

~~~~~~~~~~~~~~~~~

الحرگو اخيمها وعله الراحو تحنّ
الوكت خلاها بـخرايب تنسجن
ودعت ضيم الحياة ام الحزن
اندفنت ويمها علي ينوح ويونّ

الماتت رقيتها بأديها بخربة الشام
ماتت واديها امحرگه من نار الخيام

وگلب المصيبه يصطلي ... معقوله زينب بت علي

ماتت غريبه والنعش ماشالته اخوان

~~~~~~~~~~~~~~~~~


سجاد الگريزي

طينين البشر مو من فرد طينه
خلق منهن الباري وبده بتكوينه

طين الحب الاول دايفه الإيمان
من گاع الجنان وعِينةّ العِينه

الطين الثاني ناتج من جحيم النار
الكبائر والكفر يحون مضامينه

الخلقهن حطله حدّ ابين هالطينين
قبول اولاية الكرار وابنينه

وقبلنه بكل عبوديتنه للـرحمـٰن
لعلي وذريته چلمة عاشگ انطينه

بس اضدادنه الرفضت هذاك اليوم
لذلك للأرض عدوان من جينه

إجينه وحب علي تتناقله الأصلاب
وهيامه بدمنه بـ اوردته وشرايينه

إجينه وأول الفرحه باأسامينه
اليحبهم ربنه بااسماهم تسمينه

تعلمنه الحچي وأول أسم گـلّـناه
لفظنه الـ ( ياعلي ) وفرحت أهالينه

فـرحو بالطهارة وعـفـة الأنساب
الحمد لله الجعل كراره والينه

الحمدلله السترنه بصاية اهل البيت
وبرحمة ( علي ) الحطها بمعانينه

عشنه وشفنه كلشي بهالحياةّ ايهون
وبس المرتضى للموت غالينه

تحملنه لعلي ونتحمل اكثر ضـيـم
لأن بشاره هاي لكل موالينه

غديريون ماكو لسان يلّوينه
لأن بحب علي مونة محاچينه

غديريون اجينه ونبقه حته الموت
ودخلنه بحصن ابو الحسنين حامينه

يهب النه الهوه منّ النجف ونصيح
يمته ياعلي تحقق أمانينه

يمته انطيح منحر ويّه راعي الثار
وبدم حبك انحنيهن ايدينه

يمته انجاورك يامن تحامي الجار
وحقك ياعلي للموت حنينه

قال مولانا الإمام الباقر (ع)

{ اقطع أسباب الطمع ببرد اليأس }.


متباركين واسعد الله قلوبكم بولادة مولانا وشفيعنا باقر العلوم صلوات الله عليه 🤍

لمولانا امير المؤمنين علي ( عليه السلام )




عـشگ وبـلا قوةّ گلب
رسمه برمل مابيه رجه

ينمحي بأي روجة حرب
وراعيه كل همه النجه

واحنه عشگنه عَلوي ... بولايته الينبض گِوي
نلوي وابد ما نلّوي ... بچف ناصبي

ايعادينه خل كل الفضه ... المهم حب المرتضى نرفض الناس الترفضه ... صهر النبي


بَعّل الزهره العالي المن الله عَلي
ماعدنه ولا نرضه بغيره كل ولي
شيعه وطبع الشيعي مايعرف يذل
ولو توصل للمذبح مانترك علي


أميرنا علي ... حبيبنا علي

_______________________

ذبنه بهواه ذوبة شمع
وما ساعه ذكره نفارگه

عِشّاگه والعاشگ جرع
اجبيله عدو العاشگه


واحنه عدونه بكل زمن ... العاده علي أبو الحسن
لو ننفي من كل وطن ... حيدر وطن

البات بفراش المصطفى ... عـزّنه السگانه المعرفه
ولجروحنه اسمه الشفه ... جالي المحن


بايعنه سر الله حلال الشدد
لو نتگطع لجله منعوفه ابد
اطمئنان الشيعه اشماجار الوكت
وكل كلفه ندفعها بياحيدر مدد

ملاذنا علي ... حبيبنا علي

_______________________

ناغانه اسمه امن المهد
وبس ياعلي نحب نستمع

واعقولنه انقفلت بعد
وغـيـره بشر مـا نتِـبع


هنيالنه بقطب البشر ... المولى علي فارس مضر
اشما نكبر اويانه كبر ... حب طاعته

ولو يعبد ابنادم دهر ... ابلا حب علي كلشي خسر
وتاليته يستوطن سقر ... يـا خيبته


الاعمال المقبوله عد رب السمه
شايلهن حب حيدر حماي الحمه
واعله الجاحد حقه ينرد كل فرض
ويخسر جنة الباري وكوثر فاطمه

نجاتنا علي حبيبنا علي
_______________________

كل گلب طاهر مولده
واليّه قالع خيبره

وتلهج لسنّه بهالنده
ياحيدره ياحيدره


بحصن القلع حصن العده .. ادخلنه بكفالة ساعده
وبلنجف لذنه بمشهده ... لوذةّ عشگ

عدلين ميتين بحماه ... عميان مشيتنه وراه
وگلوبنه التطلب رضاه ... بااسمه تدگ


امنية كل شيعي التجبر خاطره
يخدم والد زينب خدمة قنبره
وتگضي ايام اسنينه بهاي المنزله
وتطلع روحه بحبه وگبره مجاوره


ولينا علي ... حبيبنا علي
_______________________


سجاد الگريزي

لمولاتنا الطاهرة ام البنين ( صلوات الله عليها )



المستهل :-


آخر دمعتين اعله الحسين
نـزلن ومـاتت أم البنين


عاشت ثلاث اسنين مالومه
عالمنذبح وامسلبه اهدومه


_______________________

مـاتـم عله فراش الأجل ... وام الگمر ناعيته
يحسين يالِـبّ الگلب ... بيها ابتدت تعزيته
من راح من عدها صبح ... مظلم عمرها وبيته
الّجله نست كلشي لچن ... بس هو ما ناسيته


نعي الگلب ماترجمه الصوت
ومـا بـرّداه امجالع الموت

وما هوّدت نار الطف ويومه
عالمنذبح وامسلبه اهدومه

___________________

الودت وي احسين اربعه ... يفدون اثر خطواته
مارد عليها امن السفر ... وذبلت بـ اثر حسراته
عاشت ابلا راحه وهنه ... بنار الهضم وآهاته
اولا عافت بساعه البچي ... عالخضبو شيباته

عالضل ثلاثه ابغير دفان
عاشت ثلاث اعوام الاحزان

تون وتحنّ ابـروح مهضومه
عالمنذبح وامسلبه اهدومه

___________________

وي زينب شگد گابلت ... وياها دمعه بدمعه
املاگه الثواكل والبچي ... امناوب وكلمن تنعه
ام البنين اعله الأبن ... كل گلب يمها اتشلعه
وزينب عله راعي العلم ... گلب الصخور اتصدعه

وياها سنه ونص ضلت ام عون
ومـاتت ابضيم امغوّر العيون

من كربله والسبي مضيومه
عالمنذبح وامسلبه اهدومه

___________________

ذبـلـت عزيزة فاطمة ... مـنّ الهضم والحرگه
فراگ الفطر چبده العطش ... ذبحاها شهگه شهگه
حدما لفه اعليها الأجل ... وميته لگاها بفرگه
راحت ومشبوحة نظر ... وچانت ابحسرة ملگه


ذبلانه ماتت موتت الياس
لا يمها الحسين اولَاْ عباس

ملچومه لمن مشت ملچومه
عالمنذبح وامسلبه اهدومه

___________________

ماتت ام عباس وحيّت ... سِنةّ البچي والخدمه
لبـوة علي وأم الـوفه ... باب العطف والرحمه
لـ اهل الشرع حطت شرط ... وللزلم حطت لزمه
المايفدي لحسين النحر ... مو مسلم ولا زلمه


حطت شرط بيه عِزّ الاسلام
كـلّها لـونّ لـ حسين خدام

رابح الرخص روحه وادمومه
عالمنذبح وامسلبه اهدومه

___________________


سجاد الگريزي

طلبتك وانته ابو الطلبه
يرحمه وللرمح ماخشنت خاطر

ندبتك والعمر ليلين
يشمس لكل نظر باصر

اناجيك بنواعي الغوث
بشوغة ( أم ) لچن عاجر

عندي اعله البچي جنحان
بس بعالم اجروحك
بعدني لهسه ماطاير

بعدني بمجلسك مولاي
أهمّ بعيشتي وحالي ... او لا همّيت عالحافر

بعدني بغفلتي وجهلي
وبعدها ( خدمتك ) ساتر

بعدني اوي الخلگ مشغوف
وبعدك عالعبد صابر

بعدني اغفه بلحن حزنك
لچن غفوة جفن تاجر

بعدني اتعذّرك وانته ... تعبّرلي الحچي الماذر

چايمته يبو اليمه
أرضّيك بفعل گلبي ... مو بس دردمة شاعر

چايمته يبو اليمه
يأذّن حبك بروحي ... واصيرلك درع ناصر

چايمته يبو اليمه
يجازي بخيرك وغامر

اعتصمت بحبلك اعصمني
وخل گلبي إلك فاير

خليني فطن وياك
اخاف اتمرني انوارك
واحسبهن ضوه عابر

اخاف ( الهوى ) يكسرني
ومن كثر اعتذاراتي
ما الگاك الي جابر

#يامهجة_الزهراء

يابيت الرسول ... شنهي الصاير ابابك
زلم تحرگ ... زلم تشتم ... زلم تدفع

يابيت الرسول ... انهتكت حرمة اعتابك
عِلت نارك ... ولا واحد ... إلك يفزع

وادم هاجمه بـ غلّها
اولا چن النبي گلها
بنتي لَحَد يوصلها ... اويلاه

يرضّيني اليرضيها
يـأذيني اليأذيها
واحاسب باچر اعليها ... اويلاه

هتكو حرمته ... وآذو زهرته
هجمو عليها ... اولا چنها بنته
وعصروها خلف الباب

سبط النبوه ... بكسرة سترها
محسن ابنها ... طاح بعصرها
وحـط بگـلبـها صواب


~~~~~~~~~~~~~~~~~~

حمّاي الدخيل ... يجهز نعش عافيته
اولا مسلم ... إجاه عانه ... وبگه لوحده

حمّاي الدخيل ... عدوانه ادخلو بيته
واهو بهمه ... وي ابن عمه ... وجرح فگده

مشغول بـ اخوه حاله
يجهز اجنازة آماله
عافوه مشو لعياله ... أويلاه

اموصـه درو فقاره
يسكت لو دنت داره
عبيد الكافر ونـاره ... أويلاه

غيضه يكظمه .. وصبره يلچمه
واليحمي جاره .. جاره اليظلمه
ويحرگ عله اهله الدار

أمة محمد .. خانت محمد
صفعت بضعته .. الله ولحد
وصاب الضلع بسمار


~~~~~~~~~~~~~~~~~~

زهراء السماء ... المبروكه الأرض بيها
امنعو عنها ... ورث طه ... الهداه ليها

زهراء السماء ... لرسول الله بواچيها
اشتكو منها ... لكثر ونها ... ونواعيها

مـا ترتـاح خـلوها
فوگ الظلم ظلموها
ومن الدمعه منعوها ... اويلاه

طلعت ويلي الِـ ايتيمه
لبيت احزانها وضيمه
وتنعه لفگد ابو الشيمه ... اويلاه

بفرگة ابوها ... شافت نوايب
الدنيه عليها ... صبت مصايب
اتهد بثگلها اجبال

جرة نفسها ... يلچم ضلعها
وصارت نحيله ... من گد وجعها
الشاهدها چنها اخيال


~~~~~~~~~~~~~~~~~~

مكسور الأمير ... جليس البيت والحسره
ولي الأمه ... الف وسفه ... اسلبو حگه

مكسور الأمير ... ومات بـدفنة الزهره
ذبل شكله ... وثگل حمله ... منِ الفرگه

الگبل بالعين شايلته
شاهد كسر فاطمته
الجانت تنوجع سكته ... اويلاه

ودعها ودفن روحه
وياها ودوه اجروحه
وعليها دمعته ونوحه ... اويلاه

هال الترايب ... فوگ الحبيبه
ورد اعله بيته ... بنار المصيبه
ودم يجري من العين

اتلگت دموعه ... وطوله التحدب
بمدمع هضمها ... غاليته زينب
وياها الحسن وحسين

~~~~~~~~~~~~~~~~~~

سجاد الگريزي

https://youtu.be/olhbzKUcqIw?si=jaiS70BHKMjxUenw

لمولاتنا الصديقة الكبرى ( صلوات الله عليها )




هاي يادار اعتلت نيرانها ؟
اواصل لحضن السمه دخانها

~~~~~~~~~~~~~~

تنشد ايتام المدينه بكل ذهول
منين هاي النار لان گايل يگول
هالحرگ من دار حيدر والبتول
وطاح جمر المدمع امن اجفانها

~~~~~~~~~~~~~~

طاح جمر المدمع بخد اليتيم
واحترگ گلبه مثل نار بهشيم
اشلون دار المصطفى بناره الزنيم
يهجم ويهتك سترها وشانها

~~~~~~~~~~~~~~

يهجم ويهتك ستر بيت الآله
اليغضب لأجله ويرضّيه لرضاه
الساتر الوادم والايتام بحماه
شِمتت بحرگه ( المره ) واعوانها

~~~~~~~~~~~~~~

شِمتت بحرگه وفرح گلب الحقود
والضماير صارت امن البغض سود
المحترگ بيت الوحي ليش القعود ؟
الچان يدخل شرط بـ استأذانها

~~~~~~~~~~~~~~

الچان يدخل ليها جبريل الوحي
دخل ليها الرجس والما يستحي
لثگه بهدوم العرب ما تنمحي
النصرت اعله اهل الشرف عدوانها

~~~~~~~~~~~~~~

النصرت اعله اهل الشرف أهل الدجل
والنبي بعده اعله دچة المغتسل
وياه بس المرتضى خير العمل
وزهرته بالبيت تبچي اغصانها

~~~~~~~~~~~~~~

زهرته بالبيت مكسورة ضلع
والاسباط عليها دم تبچي الدمع
ومحسن اعله الگاع طايح منصرع
وآه من عصره خذت دفانها

~~~~~~~~~~~~~~

آه من عصره خذت ثالث إبن
ترجته لآخر عمرها يضل حضن
وي حسن وحسين يحضر للدفن
مو يسد جفنه گبل أجفانها

~~~~~~~~~~~~~~

مو يسد جفنه ويهدها بمصرعه
امعصبه الراس وتعيش املوّعه
ويلي وابرگع هضمها امبرگعه
الچانت اتلمنه بحنين احضانها

~~~~~~~~~~~~~~

الچانت اتلمنه بحنين وعاطفه
وچنه بيها انشوف ابوها المصطفى
راحت وبيناتنه حَـلّ الجفه
وكل ايتيم بگلبه بيت احزانها

~~~~~~~~~~~~~~

كل يتيم بگلبه ( كون ) امن الحزن
عله الخدها انصفع والماتت تون
وعله المتوصي بسكوته الممتحن
وصي الأمه العادته بـ شنّـآنها

~~~~~~~~~~~~~~

سجاد الگريزي

ياذات الـنـور والرحمه اطوفچ
والكون يدور كله اعله چفوفچ

مولاتي دخيلچ ... مولاتي دخيلچ

~~~~~~~~~~~~~~~~

ياضياء الله وكماله وفرض طاعة اعله البشر
استودع بذاتچ اسراره وصرتي الهن مستقر
ياقطب كـل الوجود ويـامـؤثـر يـا أثـر
عله معرفتج يفاطم دارت اقرون الدهر


سرچ مستور ... بوجدان احروفچ
والكون يدور ... كله اعله چفوفچ

مولاتي دخيلچ ... مولاتي دخيلچ

~~~~~~~~~~~~~~~~

ياشرط مَجد النبوه الباري شارط هالشرط
والرضيته اعليه والله امن الملائك ينغبط
الماعرف سابق مقامج الله من قدره يحط
المالهج گلبه بمحبتچ علّظى جدمه يخط


والنار تفـور ... لنـاكـر معروفج
والكون يدور .. كله اعله چفوفچ

مولاتي دخيلچ ... مولاتي دخيلچ
~~~~~~~~~~~~~~~~

ياينـابيـع المـوده ويا مَعين لكل عطف
عاجز ادراك الخليقه يصنع لشانچ وصف
جفت اقلام الصفات وماانطت حگ بحرف
وانتي بس الله ورسوله وحيدره بيچ ايعرف


الدين المعمور ... أقرب موصوفچ
والكون يدور ... كله اعله چفوفچ

مولاتي دخيلچ ... مولاتي دخيلچ
~~~~~~~~~~~~~~~~

أنتي ديمومة الـديـن وللغياره انتي نَـبِع
يم قضيتچ ماكو غالي انحور لجلچ تنگطع
عسه لا يطلع علينه صبح لو ننسه الضلع
من نصافح چف سقيفي بعنه ميثاق الشرع


هالك مقبور ... حظنه امن ايعوفچ
والكون يدور ... كله اعله چفوفچ

مولاتي دخيلچ ... مولاتي دخيلچ
~~~~~~~~~~~~~~~~

يمته واليمته جرحها مايطيب بكل دوه
يمته يجبل راعي ثارچ يخفگ بمتنه اللوه
يمته حگ ضلعچ يرده ويرد حگ الي هِوه
يمته گبرچ يظهرلنه ونجي ليه من نينوه


چايمته نزور ... ونصير اضيوفچ
والكون يدور ... كله اعله چفوفچ

مولاتي دخيلچ ... مولاتي دخيلچ
~~~~~~~~~~~~~~~~


سجاد الگريزي

https://youtu.be/teCMYGU6GMI?si=r9mZjnwvd3RpqExY

لمولاتنا الصديقة الكبرى فاطمة صلوات الله عليها


قصة شرع واحجاب ... ترويها نار الباب
بيها العجايب
وي ما محمد غاب ... ضلع الرساله انصاب
وحلت نوايب

فاطمه بحزن الرسول ... وعَلي بتجهيزه انشغل
ليش چا صَحبه نگول ... عافته اعله المغتسل
ومشت هجمت عالبتول ... وحاربو خير العمل

اتزعم الگوم وثنها اعله باب المعبد
بثوب المصاب لگوها يتيمة أحمد
وعصرو الباب عليها وتدور المَسند
وفوگ التراب يويلي الجنين اتوسد

أيـه أيـه الـمـوده تنـاثـر وِدها
اعليها هجمو يويلي وَهِي لوحّدها
صوت الاضلاع نعاها وحَمار بخدها

_______________________

بيت الوحي والنور ... وطعم الهله المنثور
فوگ المدينه
محد أجاه فـزاع ... وصوت الضمير انباع
لـ اهل الضغينه

ماكو عالـ( يهجر ) سيوف ... حگ الاسلام انغصب
اتحـشم الـنـار الچفوف ... وعالـ ( وإن ) وين العرب
أمـه فـوگ امـن الألـوف ... صفت حمّالة حَطَب ؟!

خـد رسـالة نبيهـا انصفع واتّورم
والسكوت اعله ظلم الزچيه اتحرم
اليرضه الله لرضها نحيله امن الهم
بعتبة الباب رماد الحرگ غطّه الدم

ما يدوم التستر عله الّي يحاول
يبقه دم الضحيه جواب السائل
لعنة الله اعله ثاني زنيم القاتل

_________________________

أرث النبي المختار ... املاكه وفدك والدار
لبنته الحبيبه
كلهن صفن لاغراب ... ابليس اليفسر اكتاب
هاي المصيبه

كل نبي يورث هله ... اعلوم واملاك او وطن
بس محمد ما أله ... ورث عـلّـنـاهـا الوثن
داعت أگبال المَله ... بحگها مظلومه ام حسن


باب الگلوب تدگه بحچي هاديها
لكن اصخور تشوف الرحم جازيها
امن الغدير الضماير هُبل شاريها
نكبه يـوم السقيفه النـوايب بيها

لبيت الاحزان نِفوها واهي مالومه
وعذبوها وطفلها الصعد بدمومه
بالسمه ينادي أم الحسن مظلومه

_________________________

من التعب والنوح ... بالحسره صعدت روح
فاطم حزينه
وچف اليحامي الجار ... بجروحه چم بسمار
يلچم حنينه

يساعد الله المرتضى ... بالوصيه امن الّتِزمّ
سيفه بالسَل ماحضه ... وبگه بگراب الألم
وبالـگلب نـار الغضه ... وحيل ابو الكلفه انهدم

قـالـع البـاب چفوفه بجنازةّ روحه
ترجف بغيض صبرها وفقاره ينوحه
شيّـع بليـل زهرته وتشيعه اجروحه
بهالـجنـازه حمـامةّ فـرح مذبوحه

دار ابو حسين فرحته بترب مدفونه
لـونه چـان السعادة وتكدّر لـونه
اوّحشةّ الذكرى جمرةّ هضم بعيونه

_________________________

سجاد الگريزي

لمولاتنا سكينة بنت الحسين عليها وعلى ابيها الصلاة والسلام




ياغريب بگاعك
غرباني اوداعك
بنتك بحيره وعِطش

لجيتك ملهوفه
بروحتك مجتوفه
عدله واغيابك نعش


يلي جسمك ... عالتراب ... وراسك برمحه اعتله
النوگ هِزلت... للمصاب ... اشلون چا بالعايله ؟!

ضعنك اتسلب أمانه
وحده منْ مهرك لفانه

لمخيمك .. وحده المهر .. ملوي السرج .. لمن رجع
خيل وزلم .. بنيران اجت .. بويه الضعن .. للبر طلع
ابدال الورد .. درب الجمر .. لمدللك .. وفوگه وگع


يا عايله ... وجدها الرسول
وسط الفله ... ابين الخيول ؟

~~~~~~~~~~~~~~~~~~

ياتعب دلّالي
مادريت بحالي
سكنه ساكنها الحزن

ياكسرتي ونوحي
فاطميه اجروحي
والخيم حصة الّـ( وإن )

عالنوايب ... بويه صبري ... استارثيته من علي
الليل بير ... لكل سبيه ... الحايره الفگدت ولي

الليل ساتر دمع عينه
الفاگد اهله وفاگدينه

من كربله .. بدرب اليسر .. لعينك أصد ..ياكل هلي
جابو عذب .. محد شرب .. من الضعن .. يابو علي
كونك ترد .. ساعة زمن .. يهون الجره .. يمدللي

صوت الدمع ... صاحك تعال
كسرة ضلع ... شدت الحبال

~~~~~~~~~~~~~~~~~~

ياجمر هجرانك
والگلب عطشانك
والرمح ذبحة عَذب

ياعمر مصباحه
غيبتك ذبّـاحه
والضوه غطاه ترب

دمعه دمعه ... نطيح بويه ... بفرگتك منّ عالهزل
حسين بويه ... والعفتهن ... الخرابه الهن نِزل

نشغة الحسره اعله رايه
الهاضمه اگلوب السبايه

محد فزع .. لحرمة علي .. بديرة عدو .. بولية غرب
من كربله .. لشام الحزن .. لجية الگمر .. يربي الگلب
والمنكفل .. جرحه عَلَم .. ودمع الهضم .. منه يصب

الجده النبي ... سيد العرب
ليش السبي ... اعليه انكتب ؟

~~~~~~~~~~~~~~~~~~

كل أمل جازينه
بويه من طبينه
الحره جارحها القصر

يادوه اليشفيها
والّي مر اعليها
جرح مايشفيه گبر

منْ مشيت .. المر علينه .. ماكو واحد بيه سمع
والّسبانه .. ابلايه رحمه .. بكربله بثوبك طمع

حده للشام برحيلك
بالحـراير وبـ عليلك

لمن وصل .. چان الفرح .. ماينوصف .. لا ينحچي
الماله أهل .. وحمله ثگله .. يابويه بيمن ينتچي
بليل التعب .. وشوگ الگلب .. ماتت رقيه امن البچي


الجرحه يحن .. طيفك طبيب
يموت بحزن ... مثلك غريب

~~~~~~~~~~~~~~~~~~

سجاد الگريزي

https://youtu.be/OC2b20QKr8U?si=v9eAiZlAU1RBXSlB

https://youtu.be/br3_z0zb8cM?si=Lzl863Taligx7Jzo

لمولاتنا عزيزة الحسين رقية ( صلوات الله عليها )

المستهل :-

بين الطشـت والرمـح ... طعم النفس منذبح
وكل نظره تنزف جرح ... شوگ ومعاناة

_______________________________

ارقيه آنه يلمالك صدر ...  عگبك متت چم موته
من كربله لجية الطشت ... بنعت السبي منعوته
والّـي يودعونه هـلـه ...  يصـيـر البچـي تابوته
يفزّعمن وزجر العده ... يجاوب امناشغ صوته

اعيونك لَمَن غَمّضن ... احبال وهزايل أجن
چتفن وشالن ضعن ... من مصرعك فات
___________________________

يلرحت بااحضان الرمح ... ومفتوح باب چفوفي
عايفني انتظرك تجي ... اتهوّد اجروحي وخوفي
عگبك صرت ورده بجمر ... والعطش ناره بجوفي
ودرب السبي يابو علي ... ذبّـل اعيوني وشوفي

عشت بوداعك قهر ... ما مار بويه ابّشر ‏
گلب التحبها انكسر ... وفيّك جزه ومات
___________________________

بليل وطحت من ناگتي ... وحبل اليسر بيديه
وماعدي صوت وينسمع ... ويدلي زينب بيه
حاولت الحگ بالضعن ... بس عاندن رجليه
عالجمر من گد مامشن ... عالگومه ابد مابيه

بمچانه رمحك ثبت ... لجلي وتدور إجت
زينب تردني اعتنعت ... لضعن الغريبات

___________________________

لاحت الشام اعله النظر ... وضعنك دليله اتفطّر
والهـزّل اعلينه بـچـن ... والصخر گلبه اتكسر
ابنات النبي والمرتضى ... طبن الشام الأگشر
يضمن وجهن مستحه ... وبچه العرش هالمنظر

الچانن بخدر وستر ... ضاگن مرار اليسر
وطبن يبويه بـ قصر ... متروس شمات

___________________________

آخر خرابه امن التعب ... مجبوره غمضت عيني
وبلكت أشوفك بالحلم ... مو منذبح تلفيني
وشفتك ودلالي ابتشر ... اهلاً يلي امبچيني
خذني بعد ماضل صبر ... بالدنيه لتخليني

خذني تعب فرگتك ... وارقيه مشتاگتك
وعمر وبلا شبگتك ... ماعيشه هيهات
___________________________



سجاد الكريزي

رجوع السبايا الى كربلاء


جـينـه وريتـك تتلگـانه ... متعوبه اضعونك
وسبي الشام اهواي اذانه ... وادموع اعيونك

آه يبن امي ... جبت الايتام
آه يبن امي ... أذتنه الشام ... وادموع عيونك

~~~~~~~~~~~~~~~~~

جينه يحسين بهضمنه ... من بعد يسر وحَبس
جينه بس عدلين اسمنه ... أحنه ميتين امن امس
متنه من راح الكفلنه ... وماكو فيّ بيه نحترس
متنه من حرگو خيمنه ... وانته طايح بالشمس

رحنه سبايه اعله النوگ ... وگلب المدلل محروگ
حگنه من انموت يلـچنه بحماك
تعذيب فگدك تعذيب ... ودمك صبغ لون الشيب
يمشي رمحك واحنه نتعذب وراك


بعد الفرگه وضيم الغربه ... للطف ردينه
صعبه اليفگد مثلك صعبه ... ياروح اسكينه
آه يبن امي ... غربه وآلام
آه يبن امي ... أذتنه الشام ... وادموع عيونك
~~~~~~~~~~~~~

حسين يبن امي أخبرك ... هواي تعبّنه الدرب
خلص وكت السبي وخدرك ... بيه چم شلعة گلب
جينه ياخويه اعله گبرك ... وكون بيه باب ونطب
وكون مانلگه اعله صدرك ... جرح من طعن الحرب

محتاره ياخويه الروح ... تتمنه مابيك جروح
وانت جسمك صار مگدار الحصير
يلجبت راسك والبال ... مِدّوهن بهذا الحال
أتمنه كون يصير خويه الما يصير


تتمنه اختك ترجع سالم ... ضعنك محتامك
وراسك يمي وعگلي حالم ... تتلگه ايتامك
آه يبن امي ... الگلب محتام
آه يبن امي ... أذتنه الشام ... وادموع عيونك

~~~~~~~~~~~~~

يمن جرحك مِن يجرعه ؟ ... ونحرك لذبحه غبش
طحت فوگك دمعه دمعه ... يمن جنازك عِطش
وذكرياتك صفت شمعه ... بليل المعاتب نعش
والحچي المضموم ينعه ... ويمك بجرحه انفرش

كل خوفي اجرحك يحسين .. يادمعتي وماي العين
الشام بس الشام اگلك يالغيور
مهيوبه بس گلبي انصاب .. والخاطر بكسره انعاب
تنسبي اختك هضمه وبهزله تدور


التلچم جرحي وتذبح بيه ... الشامت ناداني
هاي المتغربه المسبيه ... خلوها اتعاني
آه يبن امي ... وبخربه انّام
آه يبن امي ... أذتنه الشام ... وادموع عيونك

~~~~~~~~~~~~~

جايبه صوغه ابأديه ... وياك اريدن تندفن
هـاي تـرچية رقيه ... وأدري لبنيتك تحن
امدللـه وصارت سبيه ... وعالطشت ماتت تون
موعد الملگه المنيه ... بس يضل جرح الحزن

الياذيها چفها المحروگ ... ومنّ السبي ومن الشوگ
ماتت اعله الموعد اعيون الـ( تعال )
جرح الدلال المبخوت ... مايلتم بخيط الموت
يكبر اشـما شـاف بالدنيه حبال


خويه الشام بصبحه وليله ... سلّاب الراحه
وچم طفله الماتت بلعيله ... بدرب الذبّاحه
آه يبن امي ... فيّك مادام
آه يبن امي ... أذتنه الشام ... وادموع عيونك

~~~~~~~~~~~~~


سجاد الگريزي

لمولانا علي بن الحسين السجاد ( صلوات الله عليه )



جاني الموت ... يـاخـذ روحي
وابلا صوت ... اتصيح اجروحي

آنه الميت عمره وحيله
من عاشور وسبي العيله

اتصيح اجروحي
~~~~~~~~~~~~~~~~~~~

آنه الگبل مـوتـه اشكثـر ميت نوح
آنه العاش گلبه اعله الرمح مجروح
وياروح التضـل عگـب الأبـو يـاروح
من شفت الخيول ادوس عالمذبوح

بويه حسين ... اتصيح دموعي
كـون البين ... رض اضلوعي

ماخذ روحي الطف وخيله
من عاشور وسبي العيله

اتصيح اجروحي

~~~~~~~~~~~~~~~~~~~

عطاشه اهلي گضو منحور يم منحور
الدلال اوي الخيم صارن رماد ابخور
و فر ضعن الحسين وبالبراري يدور
ضامي ومحترگ وامجرح ومكسور


بالبر تاه ... الچان امدلل
وقصة الآه ... يرويها التل

وللكـافل عين امداليله
من عاشور وسبي العيله

اتصيح اجروحي

~~~~~~~~~~~~~~~~~~~

انسبيت آنه وعيال حسين والحادي
يصيح أجرح ( علي ) هاليوم والهادي
مشينه وعفنه اهلنه اجساد بالوادي
( ويلاه عالحسين ) ادموعنه تنادي


شدهة بال ... لجرح افراگه
اطيح اطفال ... منّ عالناگه

گيد وهزله وعثره ومِيله
من عاشور وسبي العيله

اتصيح اجروحي

~~~~~~~~~~~~~~~~~~~

گبل قصر الأماره وطبت الديوان
فزعت چم عشيره وأخذت النسوان
وشفت عمتي بدمعها ولوعة الحيران
لا فـزعت هـواشم لا أجـت خـوّان

ابلا حمّاي ... بهاي الديره
وشح الماي ... بوجه الغِيره

بغضاً كلشي بحامي ادخيله
من عاشور وسبي العيله

اتصيح اجروحي

~~~~~~~~~~~~~~~~~~~

كـل اجـروح گـلب المنسبي المحتام
كلها اضعاف صارت من دخلنه الشام
الفرح صوبين چان بملگه ضعن ايتام
وذرية محمد ويل صارت بالخرابه تنام


بهاي الگاع ... ماتت طفله
هَم ووداع ... وشوگ وعِله

ماتت عالراس وتشكيله
من عاشور وسبي العيله

اتصيح اجروحي

~~~~~~~~~~~~~~~~~~~

عشتهن وحده وحده والدموع اشهود
اعله هامة حيلي نزلت ضربة العامود
وشضمد يـا جرح حته التنوح اتهود
صبرت بـ( ياعلي ) عِين الگضاها ينود


الموت الجاي ... بيه شيلگه ؟
اجروح اهواي ... بعازة ملگه

راحه الموت الروحه اعليله
مـن عاشور وسبي العيله

اتصيح اجروحي

~~~~~~~~~~~~~~~~~~~

سجاد الگريزي

هنا يحنان ياسور المداليل
عالهزله مشينه و الولي اعليل
واليحدي الهزل يتعمد اتميل
انتم مدري أحنه الـي مچاتيل
بدرب ابعيد سابينه نوه ارحيل

يا گضاية الكلفه
عدوكم بينه يتشفه
بقت آثار للنيران
بمدللكم وچفه

وين ذاك الچان بخيمكم عزيز
والخطر بيه مايمر
من مشيتو راح كلشي من اديه
ومشه بدروب اليسر


راح .. راح ... فـيّ العَلم
راح .. راح ... ويه الخيم


~~~~~~~~~~~~

ضعن حسين راح وفارگ حسين
عايف كربله واعداه صوبين
يشگف ياجرح مگيود الادين
ومن فوگ الرمح تتهامل العين
الچان بـ ( وين ) هسه صاير بـ( وين )

ادموع العين هماله
ورمح حسين شياله
يتعمد يدير الراس
حته يجرح اعياله

مثل شيب حسين دمعات السبوه
وحنّت اعليه الهِزل
امن المخيم للخرايب والجروح
للضعن صارن نِزل


راح .. راح ... بگلبه السهم
راح .. راح ... ويه الخيم

~~~~~~~~~~~~

كل ملچوم ينشد وين عباس ؟
كفّال الضعون الكلّه نوماس
وبحال الكفلها شمتت الناس
محتاره تتاني ؟ تگطع الياس ؟
يسألوها عليه وتهبط الراس

اضعون بغير حاميها
وثگيل اغياب وليها
يم جاري النهر عطشان
الكفيل الچان يرويها

طاح واخيامه هَوت طاحت وراه
ارماد صارن عالترب
ويلي أيد الگبل گايدها الكفيل
انگادت بگيد الغرب


راح .. راح ... الكفّـاله عَم
راح .. راح ... ويه الخيم

~~~~~~~~~~~~

گاع الشام وصلنها الغريبات
وهاي گاع صلفه وبيها ويلات
ساعات اوگفن عالباب ساعات
تلگوهن يويلي بفرح شمات
وبسجن الخرابه الفاطميات

هاي الشام والهضمه
هاي الذابحه الرحمه
هاي التكره الكرار
وتفزع من يمر اسمه


هنانه ضيم الغربه مايدناله ضيم
هنا ولا يگضي الحزن
هنا رقيه اتموت من كثر الجروح
والقصر يصرخ ( وإن )


راح .. راح ... صوت الشيم
راح .. راح ... ويه الخيم

~~~~~~~~~~~~

سجاد الگريزي

جرح الربه بدرب السبي
حـاديّـه ذَبـاح اجنبي
وفوگ الهزل أم الولد

اتلولي عله النوگ وتونّ
لعبدالله والدته تِحنّ
وشيرجع امناغه المهد


اشتاگت اتضمه وتقبّل جيده
ودرّ حليبه وعنّـه أمـه ابعيده
اليشبگ اصبع أمه چان بأيده
گطعت النبله يويلي اوريده


شيرجعه هيهات ... فات الربه فات
ويلي الولد مات ... بالغاضريه

تشتاگه والروح ... مكسوره وتنوح
عبدالله مذبوح ... وامه سبيه


~~~~~~~~~~~~~~~~~~

ضعن اولا كافل اله
مبعد مشه عن كربله
براي العدو مشيّه انجرح

وگلب الرباب المنكسر
لمن يجن ليل اليسر
ادور اعله ابنها المنذبح

ويلي عله ثكله التدوهن بالها
كسر گلب الهزل منظر حالها
وين تلگه الچان كل آمالها
وعالرمح راس الرضيع اگبالها


بيت الأمل طاح ... وراح الولد راح
وحبل اليسر ناح ... عالمحد الها

ثكله وبلا راي ... لا عـدها حمّاي
لا رايه وافيّاي ... مذبوحه اهلها


~~~~~~~~~~~~~~~~~~

من كربله لشام الحزن
تنعه الرباب اعله الأبن
عالضامي مدمعها يصب

ويلي عله المات بعطش
وصدر الأبو أصبح نعش
اتوارو سوه بحضن الترب


عَلّي صدره اتهشم اوي اضلوعه
نـام ضـامي الرگبته مگطوعه
الماكمل عمره سنه واشموعه
طفن وايامه برمح مرفوعه

بصدر الأبو نام ... مذبوح الايام
وراح اوي الخيام ... شمل الغرايب

گلب امه مصيوب ... بجروحه متعوب
بدرب السبي يلوب ... من المصايب


~~~~~~~~~~~~~~~~~~

فـگـد الولد ما ينحمل
ولو سمعت امناغه طفل
يلچم اجروح الفاجده

محروگ كاروك المشه
وخلف جمر وسط الحشه
وتضم دمعها امن العده

ماتطيب بگلب امه اكسوره
والـدللـول بـسهم منحوره
من الشماته الحايره الميسوره
اجروحها من الغرب مستوره


بالسكته تنعاه ... وتتذكر ارباه
عبد الله ويلاه ... يندب حزنها

والحسبت احساب ... يبقه الولد . غاب
ولحضن التراب ... تبقه اعله ونها


~~~~~~~~~~~~~~~~~~

سجاد الگريزي

https://youtu.be/zZsABG7j7zY?feature=shared

https://youtu.be/-GuGXopuRlU?si=H4LujiF9Che-TqJI

https://youtu.be/xFBCO54l-B4?si=vwkWc_9GR6G1SGjb

حَلّ الوداع
وي اهلنه اتوادعينه
طاحو واحنه انسبينه
گضه عاشور المصايب
وعالهزل عنهم مشينه

عالترايب عفنه اهلنه
وعالرمح روس العشيره
بعد الحسين وعضيده
الحال ماينوصف حيره
ابلا هوادج نمشي أسره
وديره تاخذنه اعله ديره

عالرمح مرفوع أملنه
وعالهزل متنه وذبلنه
ابلايه راي ونمشي گوه
وي ذباحة اهلنه

_____________________

الدمع يهمل
لكن يطيح بسكوته
الّبچي ممنوع صوته
يمشي مجبور اعله جرحه
اليمشي وي ذباح اخوته

تنولي الماعدها والي
تبقه منتظره المنيه
الناس مارحمت الثكله
اعليها صاحت خارجيه
وكل درب تمشيه تترك
أثر دمعات الرزيه


ضعن مكسور بدلاله
ماكو فزّاع اعتناله
الچان يرحم باليگصده
ليش محد رحم حاله

_____________________

جروح غربه
ماتطيب بدمع ليله
تعبن حـال العقيله
الشام واهل الشام غربه
وماكو اخو يمي اشتگيله


تتعب الماعدها والي
ولا اخـوان ولا عمام
بت عشيره يحبها ربها
البيها مبعوث وإمام
هاشميه وبت محمد
بغربه وحدها حرام


هاشميه والمصيبه
وحدي وبديره غريبه
بگاع تكره طاري اهلنه
امنين ابو فاضل أجيبه

_____________________

الليل يستر
كون مايخلص ظلامه
الضوه مابيه سلامه
يكشف آثار الغرايب
ويشمت بحال اليتامه

لو طلعنه امن الخرابه
ندخل بقصر الشماته
وطبت العلويه كلفه
وينه حامي امدللاته
وين راعي العلم وينه
يفزع ويلحگ خواته


ضعن يمشي مجتفينه
وكلشي ماضل بأدينه
بس دمعنه وذكرياته
الچان خيمه عالضعينه

~~~~~~~~~~~~~~~



سجاد الگريزي

لساداتنا انصار المولى سيد الشهداء ( صلوات الله عليه )




يتنومس الـسيـف بگلب شياله
اليفرح إذا كثرت سيوف اگباله
هاي الصفه ... بااهل الوفه ... انصار الحسين

____________________________

انصار ابن حامي الحمه ... للموت عقدو نيه
منّ الحسين استأذنو ... روس الوفه الشيعيه
طـبـو شواهين الخيم ... واختضت الحربيه
كل سيف منهم بالوغى ... خلّه الزلم مرميه

مهيونه خلوها وصريعه القاده
گطعو رگب تبغض علي وأولاده
لجل الخيم ... ثبتو قدم ... انصار الحسين

____________________________

اثنين اربعه اطب للحرب ... سبط الرسول اصحابه
اتلاگو املاگه اوي الذبح ... بشوگ الّگه غيّابه
يتنافسون اعله الفخر ... وكلمن بروحه صوابه
واحد غده يوصي البگه ... اعله حسينهم واحبابه


مسلم ابن عوسجه أول ناصر
طاح وعله حسينه يدير الناظر
وصّه بدمع ... براعي الشرع ... انصار الحسين
____________________________

من طب حبيب بشبيته ... شيّب عدّوه بحيله
سبعين عمره وبالحرب ... ينمحي الصار اجبيله
شد حاجبه وشد عالعدو ... ضوگ العايل ويله
وخله الزلم من الرعب ... متصوفره واذليله

سبعين ماچنهن اعداد اسنينه
رد حيله من شاف بغربته حسينه
غيره وعزم ... هاي الزلم ... انصار الحسين

____________________________

زمجر زهير ومن هجم ... حط بالكتايب خوفه
والجيش يسره وميمنه ... يموج اعله كيف اچفوفه
وبعده برير اعله العده ... صال بخطاب احروفه
سيفه ولسانه بصولته ... وجّرن ب اهل الكوفه

والحرّ وصل لشام اثر طگاته
مرعوبه خلّه اگلوبها بصولاته
الجاي وقَبل ... محد مثل ... انصار الحسين
____________________________

بدين الخيم آمن وهب ... وايمانه زكاه نحره
ونافع وجون اعله الترب ... وفوّ حبيب الزهره
شگ ثوبه عابس بالعشگ ... ماراد ثكل ايأخره
عن نصرة الـ بعد الظهر ... محد يضل اينصره

وجون ابيض الموقف مثل خوانه
يـم النبي ولـ ابنه غدو عوّانه
اتخضبو ... واتذبحو ... انصار الحسين

____________________________

طاحو مثل غيث السمه ... وشمعه طفت يم شمعه
وامچانهم خله بـگـلـب ... شيخ الهواشم صدعه
ومن صار وحده بكربله ... ابـلا إخوته ولا ربعه
يندب اساميهم غده ... ولا من مجيب ايسمعه

وحده وغريب وذابلات اعيونه
وجتّه تگود اخته برسن ميمونه
اتقدمه إله ... وراحو هله ... انصار الحسين

____________________________

سجاد الگريزي

بظهره عاشورك يخويه وليله
بـدّل احـوالـي ودلال العيله

~~~~~~~~~~~~~~

من طلعنه امن المدينه لكربله
بهودج الهيبه الضعينه امدلـله
براية العباس اجيت امكفله
وفجأه لن امگيده اعله اهزيله

~~~~~~~~~~~~~~

فجأه لن اخيام عايلتك دِوت
بنار عدوانك يبو الغيره وهوت
اجدام ضعنك بالجمر خويه انچوت
اوّين يدخل ؟ يبن حامي ادخيله

~~~~~~~~~~~~~~

ويـن يدخل والطفوف ابلا أمان
وسيف ذباحك يخويه بكل مكان
بضعنك شسوه يبو سكينه الزمان
لو شفت حاله الصخر يبچيله

~~~~~~~~~~~~~~

لو شفت عالتل عبايه متربه
هاي أختك زينب المتعذبه
عگب عينك حايره ومتغربه
ابلا حِمه ولا كافل التشكيله

~~~~~~~~~~~~~~

ابلا حِمه يامن دمه نحرك يسيل
ولا كفيل وطاح عالشاطي الكفيل
ولا عشيره ومنها ضل بس العليل
وروحه من هضم الطفوف اعليله

~~~~~~~~~~~~~~

روحه من نار المصايب جمّرت
ياهضيمه وعله الوادم ماجرت
زلمه واگباله العلاوي اتمرمرت
وراي ماكو بأيده ويلي وحِيله

~~~~~~~~~~~~~~

راي ماكو ويلي من جانه الحبل
خويه كل الحرم والطفله وطفل
بيده صعدنه الغيور اعله الهزل
جرح ماصار اعله زلمه امثيله

~~~~~~~~~~~~~~

جرح ماصار احتمن بيه الجراح
وعينه مابين الضعينه والرماح
لحدما بالهيمه گالو نستراح
والمدلل راحته بـ عويله

~~~~~~~~~~~~~~

المدلل من عليه ليل اهدعش
چل ظلامه وناخر بعظمه العطش
بلايه خيمه ينوح والهيمه نعش
للدلال العلّـ رمح ترتيله

~~~~~~~~~~~~~~

للدلال العلّـ رمح ينعه الدلال
المنسبي الگاعد على حرّ الرمال
ولنّه مصباح اهدعش حَلّ عالعيال
وعله الكوفه الحادي أنوه ارحيله

~~~~~~~~~~~~~~

سجاد الگريزي

لمولانا القاسم بن الحسن صلوات الله عليه



طالع گمر من الخيم والدنيه مخسوفه
جامع محمد وعلي بـ اْوصاف موصوفه
حـار العدو باللّي برز وارتجت الحومه
رجفها شبل المجتبى والموت بجفوفه

اترجفت عدوانه ... چنه علي بصولاته
بـاسـل الحربيه ... من طبها يامحلاته
خالقه سبحانه ... بيـه وضـع آياته


سبحانه تعالى ... بالقاسم كماله
واضع كل جماله ... وآيات التمام

من رحم الرساله ... وبيوت الجلاله
صنديد البساله ... لعيونه السلام


~~~~~~~~~~~~~~~~~~~~~

لمعت اعيون امخيمه بالدمعه بوداعه
طر الحرب طرت سفن وامهنده اشراعه
وحسين ينظر قاسمه وامشيّم ادموعه
شاب وكسر جيش العدو ماتنلوي اذراعه

رجز وارض الحومه ... منّه صفت مخلوسه
حاكم بصمصامه ... والما خضعله يدوسه
الجيش من طگاته ... ضـل يـدور روسه


البـ عيون المخيم ... والغيره تحزم
لحسينه ايتقدم ... مايرجع محال

يا چـف الينوله ... عالي وعالي طوله
قـرآن البطوله ... ويرتله الجمال


~~~~~~~~~~~~~~~~~~~~

لبّة بني هاشم طلع والفخر يبراله
كرار مثل المرتضى وضرباته چتاله
بكيفه ايتصيّد بالزلم ماگدرو لسيفه
البيده ابو فاضل دربه ياهو يتدناله

امعلم اعله النيبه ... محد دنه لحدوده
والألوف اگباله ... ماأثرنّ بـ اجعوده
تحت شسعه القاده ... ضيّعاها بزوده

صولات الصميده ... وارثهن حفيده
وامدربه اعله ايده ... عباس الكفيل

محد داني ظله ... وعالعالي ايتعله
واتعاينله رمله ... اتحرزه امن الرحيل

~~~~~~~~~~~~~~~~~~~~~

گـالها زود المجتبى والسيف بـيمينه
الموت احلى امن العسل وي والد سكينه
تشهدله ساحة نينوه وارگاب عدوانه
گَرة اعيون امخيمه وامنومس حسينه

كاسر الخياله ... وطف كربله يشهدله
بالسمه مگداره ... وبس المعالي بـ حلّه
صاح وي حسيني ... الموت وياه يحله

فدوه لعمه روحه ... واسنينه وجروحه
الماگدرت تلوحه ... گـدرت بالغدر

طاح وعمه جاله ... مجروح اعتناله
لصوب اخيامه شاله ... ورد بيه منكسر


~~~~~~~~~~~~~~~~~~~~~

سجاد الگريزي

لمولانا القاسم بن الحسن صلوات الله عليهما




يعريس الهواشم وين ... رايح ياگمر أمك
يوليدي وشمع روحي ... طفاهن نزف دمك
ليش اتسدهن اعيونك ... ذابل ليش چا لونك
يبعد اعيوني حاچيني ... يكسرة خاطر اخيمّك

اتبديت يم راسك نواعي
وريح الهجر ذابح اشراعي
يمسافر اتصحرت گاعي
وأمك ولا عفتلها ساعي

ياخلي لتعذب خليلك
أمك يجاسم تشتكيلك
دليني بالله اشلون اجيلك
ومامش بعد ملگه برحيلك

جسام يايمه ... جسام يايمه
~~~~~~~~~~~~~~~~~~~~

طلعت امن الخيم والعين ... خطواتك تتابعهن
يوجه الحسن واوصافه ... وشمرة سيفه جامعهن
وگلت لحسينك ومولاك ... احلى امن العسل وياك
موتي وفدوه لعيونك ... كـل سنيني اودعهن

يمودع اعيون المخيم
يلرايح اعله الموت مهتم
بممشاك آه يلتمشي بالدم
حيلي اوي كل خطوه يتهدم

اغبار الحرب يبني بنزالك
خلاني ماشوفن جمالك
ومحتاره واتنطر دلالك
ترجع وارد لحضن جالك

جسام يايمه ... جسام يايمه
~~~~~~~~~~~~~~~~~~~~

يلطريت صدر الجيش ... ويوم الموزمه يومك
عله ارگاب الزلم خليت ... أثر ويسولف اعلومك
لكن بالغدر ياحيف ... طحت يبن الكرم والسيف
وخدك يلولد عالگاع ... وموتك غيّر ارسومك

يابن علي وابن المعالي
ويانبع روحي ويا دلالي
اتراده بمصابك يبني حالي
وسيف الهجر گطّع شتالي

ذابحني توديعك يجيدوم
حاچيني يابعد امك وگوم
مضيوم گلبي اعليك مضيوم
وعطشانلك ياحلو الرسوم


جسام يايمه ... جسام يايمه
~~~~~~~~~~~~~~~~~~~~

يفادي منحرك لحسين ... عفت حسينك بضيمه
ردك بالحضن مشيول ... وضيّع مدخل الخيمه
عگل احسين شدهيته ... يبني وگلبه شلعيته
يترضاها يماي العين ... تعوف اعيونّه ايتيمه

يتمت العيون وضواهن
ومنّ البچي فگدك عماهن
ماينحمل يبني جفاهن
انموّت عسن يمه وراهن

يالمعه بـ عيون العشيره
ياگمر بس ذبحه مصيره
كسرة گلب عمك چبيره
اتوديه حيره ترده حيره

جسام يايمه ... جسام يايمه
~~~~~~~~~~~~~~~~~~~~

ردتك يلرحت للـشيب ... وچف الموت مافاتك
يم جسمك يحلو الطول ... اوياي اگعدن عماتك
وكـل الحرم تنعه وياي ... يضامي وماشربت الماي
آه يلمنذبـح عطشـان ... عـفـت الگلب بـ آهاتك


كل الحرم من گابلني
يونن اعليك بطور وني
آه يلولد ياجرح حزني
واويلي أيامك جزنّي

اتگلبت يمك شايطه الروح
من الوجع چن طير مذبوح
عمر الربه يم حسنك ينوح
ومجروح كلشي اعليك مجروح


جسام يايمه ... جسام يايمه
~~~~~~~~~~~~~~~~~~~~


سجاد الگريزي

لمولانا علي الاكبر صلوات الله عليه



عفتني ومشيت ...
اويه كـل خطوه انكسر يـولـيدي

يالاكبر بچيت ...
وانته روحي وراحتي وتعويدي

بگفاك انحنيت ...
وطاح ماي الربه من حضن ايدي


عاده ما عدك ... تبّچي الّيودك
يكونك سالم اترد لـ امك اتعود

لا تجافيني ... لا تخليني
تره اخلافك ايامي شموسهن سود


يفادي حسين شوف حسينك اشلون
وراك ادمـوعـه تهمـل مـنّ العيون
ييمه ورسم وجهه امصوفر اللون

~~~~~~~~~~~~~~

بنزالك بطيت ..
يمته بسمة حسنك اتعودلنه

بدموعي اندعيت ...
حسين وآنه اموادعك علعلنه

لخيامك رجيت ..
ياشبيه المصطفى اتـردلنه

ولنك اگبالي ... علي يلغالي
رجعت لحضن امك ياحلو الطول

ذبلن اوصافك ... فطرن اشفافك
ولِـسانك خشبه صاير آه يمدلول


رجعت اودعتني وللحرب راد
وسيوف اوداعك انغرزن بالفّاد
ومتحضره منيتك ياعلي غاد

~~~~~~~~~~~~~~

بدليلي الرماح ...
والمخيم جمر تنزل عينه

أمل روحي راح ...
وانتظر منك خبر يـلفيـنه

وسؤال الجراح ...
يابو الأكبر أبني الاكبر وينه


ومن أجه صوتك ... يخبر بموتك
فزع صوبك ابوك وحزنه ذباح

اتمدد بسدك ... ويمسح خدك
عله الدنيه العفه يم چثتك صاح


جابك للمخيم يمشي وينوح
بالگوه وصل من ثگل الجروح
مذبوح اعله صدره شال مذبوح

~~~~~~~~~~~~~~

اعله جسمك هويت ...
دمعه فوگ اشفافك المجروحه

بجروحك لگيت ...
چـلـمةّ الـ يـمـه علي مذبوحه

بكسرتك نعيت ...
يـم جمالك والحُسين ينوحه


ما تحاچينه ... ياعلي وينه
جمال ارسوم وجهك يمه ذبلان

كلشي عطشانك ... وكسرة احزانك
تچمّل اكسور روحه الضال عطشان

شوف شسوه موتك يلولد شوف
الضعن صار وچبيره بگاع الطفوف
عله ذبحة جمالك مدمعه يطوف

~~~~~~~~~~~~~~


سجاد الگريزي

لمولانا ابا الفضل صلوات الله عليه




الكافل ... برايته المشهوده
طالع ... امن الخيم وي جوده
عازم ... والنهر مگصوده

الرايه ... اترفرف اعله متونه
ويجدح ... غيضه من اعيونه
عطشت ... وراد يسقي اضعونه


كافل اضعونه عطشت اخيامه
وطلع بغيضه وبيده صمصامه
وينمحي اليوگف بسيفه گدامه


گمر هاشم عالشريعه ... امن المخيم غاير
صار بالجيش العليها ... الـبلخلگ ماصاير
أرگاب عدوانه تطير ... اويالّي بالجو طاير

~~~~~~~~~~~~~~~~~~~~

صنديد ... داخل اعله الحومه
عباس ... ياجمال ارسومه
مذخور ... للحسين ويومه

زينب ... مخدّره بكفالها
والريح ... ماوصل لخيالها
بحماه ... اجت ويّ اعيالها

محمي هودجها بغيرة الكافل
وتمشي مطمّنه بفيّ ابو فاضل
عطشت وغاضب للنهر نازل


اشلون تعطش وابو الغيره ... امن الزغر ساقيها
وغـار عـالشاطي بـجـربته ... بخوّته يمليها
والكتايب مـن اجـاهـا ... اتبسمرت رجليها

~~~~~~~~~~~~~~~~~~~~
شارب ... حيدر وتربيته
عالي ... والمعالي بيته
الساقي ... ابو فاضل صيته

بكيفه ... ابو الغيره بكيفه
گاصي ... بالكتايب حيفه
يطشها ... ويرد لمّها بسيفه

اعلومه ابو الغيره هايه معروفه
خّـلـه بالـوادم والـحجـر خوفه
ادخيلك ايصيحه الشاطي وجروفه


ابن داحي الباب تخضع ... يمّه كل القاده
اوّلد حيدر عالخليقه ... ساده فوگ الساده
وحته ماي النهر خايف ... من وصل گصّاده

~~~~~~~~~~~~~~~~~~~~

بأيده ... يملي جوده بأيده
رايد ... يروي ضعن اعضيده
يريده ... حسين اخوه يريده

ماضاگ ... گطره گبل احسينه
وعينه ... اعله المخيم عينه
ويعود ... وعد منطي اسكينه

دگ ابو الغيره اعله النهر ثايه
الواعد اسكينه يعود بـ مايه
بجوده تتروه وشوفة الرايه


ماشرب ماي ابو النخوه ... گبل المتانينه
لگد مهره وجوده بيده ... وصارمه بيمينه
وراية الغيره اعله متنه ... بيها نومس دينه

~~~~~~~~~~~~~~~~~~~~

راجع ... وللمخيم دربه
لكن ... سهم صاب الجربه
اتبده ... الماي فوگاه گلبه

اخيامه ... تنتظر عطشانه
ويلي ... من غدر عدوانه
طاحن ... عالأرض ذرعانه

طاحت اچفوفه وجربة الخوّه
امن الخجل گلبه وغيضه يتلوه
حسين ياخويه ناده ابو النخوه

وصل يمه حسين ويلي ... بحضنه فاضت روحه
ورجع لخيامه ايتعثر ... من نزيف اجروحه
أنكسر ظهر الخوّه بعده ... والخيم مذبوحه

~~~~~~~~~~~~~~~~~~~~

سجاد الگريزي