Посты канала الشاعر سعد هادي الشمري

إنـه زيـنـب يـبـو زينـب   ،،  يمـاي العـيـن
الكلب لو هامك اتصوب  ،،  يبو الحسنين

يماي العين  حاجيني ..  يبو الحسنين

،،،،،،

انه ودمعة حزن امي عَـلَـي جلباب
اجيت اسأل على امصابك يداحي الباب
الجرح وسط الگلب عايش بعد ما طاب
وجرح ثاني نِـدَهْ روحي يبو الاطياب

الحسن وحسين يا حيدر   إلي جابوك 
يغالي وراسك امطبر   لَـمَـن خلّوك

كلتلك يا نظر عيني   المصاب امنين

،،،،،

رحت للمسجد اتأدي الفرض لله
واجيت وشيبك بدمّه خضيب الگاه
اثاري بسيف ابن ملجم اقاسي الآه
وسط گلبي جرح ثاني الظلم خلّاه

كَسِر ضلع امي من بالي   بعد ما راوح
وتخضب كالوا الوالي   وعلي اللي طاح

صحت يا دمعه عينيني   الصبر ميعين

.....

يبويه انظُر جرح هامك وازيد اهموم
يتيمة فاطمه اتجَـدّد يتمهه اليوم
شصبّر روحي وغيابك أمر محتوم
الگلب ويه الجفن بعدك صُبَح ملچوم

اودعك يا علي ونوحي يفيض جروح
وريت اموَدعه روحي قبل لتروح

الدهر ياريته راميني   بمرامي البين

،،،،،،

اجت الفقره وايتامك يبو الايتام
اعله بابك وگفت اتنادي الدهر بالام
نسألك يا دهر النه دگول شضام
اذا تاخذ علي منّه صدگ ننضام

منو بكل ليله يفگدنه   لوّنه ايغيب
ويشبعنه اذا جعنه   وجرحنه يطيب

علي لو راح دلينه   نروح لوين

.....

تنفَّسني الالم بعدك يحامي الجار
واذا براسك ،، انه بروحي الجرح والنار
فتح  باب لعذاباتي يبويه الصار
واذا. جن ليلي .. بدموعي وونيني احتار

مثل حزن امي للهادي الالم بركان
بيوت اولادك بفگدك بيوت احزان

اجود بدمعي وبنوحي   للمعَــزين

.........

الشاعر سعد هادي الشمري

سيف الاله اسمـه علي
والـ  لا فتىٰ اسمه علي
الـقـرآن آيــاتــه عـلـي

يا حيدر يكرار يا حيدر

***

بدر واحد والاحزاب
والقالع لخيبر باب
موت وولاده بمحراب    ..   حامي الحميه

الـ قَط ما سجد للأصنام
وابسيفه صار الاسلام
بنفسه نبي بوجه ايمام   ..   فخر الزچيه


الحُبه جنه وبغضه نار اتفسر
وصك الشفاعه بأيده فوگ المعبر
حامل لواء الحمد يوم المحشر
حيدر ويخرس كل اسم يم حيدر


خادم محمد نُعرُفه
القرآن من ايوصُّفه
وصُّفه بنَفس المصطفى


يا حيدر  يكرار  يا حيدر

***


اسمه شريك القرآن
حبه اليثگّل الميزان
ينقاس بي الايمان  ..  حُب الصميده

يا والد الميامين 
بي تهتدي الموالين
معنى علي معنى الدين  ..  شافع نريده


عشگ الإله و سِر صعب تفسيره
واحنه وفاءً أله لهاي السيره
قبل الفرض والنيّه والتكبيره
نشهدُ أنَّ علي الحُب لا غيره


هالليله حزنه انجدده
متهدّمه اركان الهُده
وعالورد مذبوح النده


يا حيدر  يكرار  يا حيدر

***

بكل الشدد نلگاه جاي
والوفه ايسميه وفاي
لو رايد يصلّي الماي  .. يتوضه بسمه

يتفايض من اسمه الخير
حيدره الحق ولا غير
عالنسمه يمدلّي الطير  .. لجناحه رحمه


يبدي التسلسل باسمه ما يتبدل
اي وين ما خلّوا علي يصير اول
معظلة خصمه المرتضى، وألنه الحَل
تعطش الصحره وتذكره وتتبلل


يا رحمة الله الواسعه
وبيبان رحمه امشرّعه
عبرة اجفوني الدامعه


يا حيدر  يكرار  يا حيدر

***


بنص الگلب حُبه انشال
لكل الضماير خيّال
واشگد فخر لو ننگال   .. لاسمه احنه شيعه

سيره وگلب نفس اللون
باللون الابيض يزهون
لحيدره الناس ايوصفون  .. درع الشريعه


والعاش كل عمره سبب فرحتنه
بدم هامته تالي كسر عبرتنه
لو هيچ ندري اتظل تصب دمعتنه
بذاك الفجر وي طبرِته چا متنه


صامت وعالدمعه افطرَت
الفُقره  ابد ما عيّدت
بگد حُبك ايتامك بچت


يا حيدر  يكرار  يا حيدر

***


بگد حزنه لجل البسمار
بالشيعه تتلاهب نار
ليلة مصاب الكرار   ..  حزن الديانه

للبير حيدر شكواه
وتشكي المن الشيعه الآه
الليله الفرح ودّعناه  ..  من ودّعانه


نفس الوجع ليلته وليل العشره
ومو هامِته چنهه بگلبنه الطبره
وهذا اللي وسط اصدورنه شيفسره
الشيعه عدهه اگلوب تچوي الجمره


يا حُب علي الما حدّه حَد
ولو گالوا اشگد  ، ماله گد
گلب النبي بأسمه برد


يا حيدر يكرار يا حيدر

***


الشاعر سعد هادي الشمري

السلام على يعسوب الدين ومولى الموحدين
الإمام علي بن ابي طالب

#السلام_على_الطفل_الرضيع



بـالـخـيـمـه نـار وظـلت  ..  يــم مـهـدك اعــيــونــي
والـنـار الـه لـو وصـلـت  ..  يــولـيـدي يــعــمــونــي

                    مدري اشفه لو يجرحني
                    من اشتَم اگماطك يبني

                              عبد الله 

                  *---------------*---------------*

يـمـعـلّـگ بـصـدري نـفـس لا تجفي يـولـيـدي اختنگ
بـالــســهــم ذابـلّـك گـلـب واعـلـه المـهـد أذبل حـرگ
يالطابگ اجـفـونـه الظـمـه جـفـنـي بعد مـا يـنـطـبـگ
مشتاگه بس حضني فـرغ والـمـنـذبـح مــا يـنـشـبـگ

صارت وسـاده الـرمـلـه .. و تــچــويــك ادريــهــه
انـه ادري يـا عـبـد اللـه .. نــامــت شـمـس بـيـهـه

                    يـا تــرف يـثـگـل ونــي
                    من اشتَم اگماطك يبني

                              عبد الله

                *---------------*---------------*

يالـكـاشـخ بـعـطـر الـنـبـي واسمك عالگماط انـكـتـب
ألـمـثَـل صح ابـطـيـحِـتـك يحوي التراب اشكد ذهـب )
اتـلاگـيتـوا ، نبله ودم نحر واحد من الـثـانـي اقـتـرب
وامـحـيّـره الـظـامـي مـنـو  شفت الـسـهـم مـنك شرب

امـثـلـث و نـاگـع بالسم .. سـهـم الـحـقـد سـهـمـك
عـطـشـان ماي ومو دم .. و الــمــوت الـيـفـطـمـك

                    لـشـيـبـات ابـوك امحنّي
                    من اشتَم اگماطك يبني

                              عبد الله

                *---------------*---------------*

عمر ابـنَ سـعـد لـهـيـبـتـك مـذهـول ظل صابـه الفزع
گـطـعـوا نــزاع الـقـوم الـه يـالازغـر وگـلـبـي انـگـطـع
يا گـلـب الحسين اشـجـره و حسين الــه ون انـسـمـع
ظلت اعيونه اعـلـه الارض من صدره ما ادري اشوگع

عبدالله ظل بس مهدك .. مــن عِــشــرِتــك ذكــره
ومن نـار خـيـمـة زينب .. وصـلـتـلـه چـــم جـمـره

                    وهـالـمـنـظـر الـعـذبـنـي
                    من اشتَم اگماطك يبني

                              عبد الله

                *---------------*---------------*

الخيمات صــارلـهـه حطب مــهــدك لــمــن نـاره دوت
اتـعـنـيـت بالشبـعـن ضرب بچفوفي اطفي ومـا طفت
والـعـشـره المكسره الصدر بثكل الـسـنـابـك مـن اجت
اشّــافــت بـنـص الــمــهــد خـيـل العده وبيه اسحگت

لـحـسـيـن شـافن دمعه .. و بــالــمــهــد شـمـنّـهـه
والدمعه مـثـل اضلوعه .. هـالـخـيـل سـحـگـنـهـه

                    عـالـحـال لا تــسـألــنــي
                    من اشتَم اگماطك يبني

                              عبد الله

                *---------------*---------------*

كـل ذكــريــاتــك يـالـولـد صـارت ارمـاد ويـه الخيم
وابـالـي صــوره مـــا الـك بـالـبـال ظل بس الـسـهـم
كل الظعن يـشـكـي الظمه وعطشانـه الك دمعه والم
ومـن كـثـر ما بـيّـه بـچـي اطلب اعيون مـن الـحـرم

المكسور گلبه ، الدمعه .. يـالــغــالــي مـتـجـبـره
ويصبح رماد احساسه .. الـتـحـتـرگ بــي ذكـره

انـكـسـر واشـيـجـبـرنـي
                    من اشتَم اگماطك يبني

                              عبد الله

                *---------------*---------------*

. محرم¹⁴⁴⁶
✍️خادم الحسين ع
الشاعر سعد هادي الشمري

السلام على #رضيع_الحسين



. عـبـد الـلـه
                  عـبـد الـلـه
                  يبني اعله اسمك اسم الله

                  محروم .. مظلوم
                  لـيـش بــســهــم مـفـطـوم

                  *---------------*---------------*

             يعبد الله يـفـرحـة عـمـري يا حـزنـي
             اهـز مـهـدك يـغـالـي ودمعتي اتهزني
             صـرت اغـفـه اعـلـه آه وآه اتـفـززنـي
             بـكـثـر مـاعـزّك اگلوُب الأسى اتعزني

                  و عـيـونـي
                  و عـيـونـي
                  تسولـف حـيـرتـي اعيوني

                  مالوم .. مظلوم
                  لـيـش بــســهــم مـفـطـوم

                  *---------------*---------------*


             لــو ادري الـعـطـش للموت حـد دربـه
             چـان اعصر دليلي ابچفي واتـشـربـه
             ردتـك بـيـن اديـه بـحـضـنـي تـتـربـه
             شْجنيت وحرمله لنحرك دِمه يخضبه

                  دلّالــــــــي
                  دلّالــــــــي
                  احـتـرگ بـالـحـيـره دلّالـي

                  مضروم .. مظلوم
                  لـيـش بــســهــم مـفـطـوم

                *---------------*---------------*

             مثل مـا نشف نحر الـعـالـتـرب يِـدي
             نشف جـفـنـي عليك ودمـع ما عندي
             طـــول الـلـيـل گـاعـد ذكـرك بـسـدي
             آنـه ويــاه نـسـهـر والـعـتـب يــبــدي

                  و بـروحـي
                  و بـروحـي
                  هــمّــك يـاكـل بـــروحــي

                  لليوم .. مظلوم
                  لـيـش بــســهــم مـفـطـوم

                *---------------*---------------*

             بـيـش اتـصـبّـر اعله افـراگـك وانسه
             مو انته الچـنـت لـرويـحـتـي وِنـسـه
             بعدني احسب احسابك لو مسه مسّه
             احـضـرلـك اگـمـاطـك بـعـد لـيـهـسـه

                  يـا ظـامــي
                  يـا ظـامــي
                  أصــــرخ لـسـه يـا ظـامـي

                  مهموم  .. مظلوم
                  لـيـش بــســهــم مـفـطـوم

                *---------------*---------------*

             يبني الما شفت من عمره بـس هـمّـه
             ويبني الما سِـمـعـت بصوتـه يـا يُـمـه
             مـثـلك يـا رضـيــع الـيـفـطُـمـه دمّــه
الـرزايـه بغيـبـتـك عـالـروح مـلـتـمّـه

                  عـاشَــرنـي
                  عـاشَــرنـي
             الدمع والـنـوح عـاشَـرنـي

              محروم  .. مظلوم
              لـيـش بــســهــم مـفـطـوم

                *---------------*---------------*

. محرم¹⁴⁴⁶
✍️خادم الحسين ع
الشاعر سعد هادي الشمري

.


.                گـلـبــي نــــاداك   يـالاكـبـر بــويـه
                 الـلــه ويــــــــاك   يـالاكـبـر بــويـه

                         رايـــد تـــروح   علي
                         مـاخـذ الـروح   علي

                        *---------------*---------------*

اسـم ابـوي، و وجـه جـدي   و ابـنـي الاكـبـر، كلهن انته
المثلك ايـودعــونـه يـبـنـي   اتـلـث وداعـات بـطـلـعـتـه
يا احچايه التـكـفـي حزني   وجـفـنـي مـجروح بدمعته
آنــه ابــن نـهـج الـبــلاغــة   والـبـلاغــة اهـنـا السـكـتـه

                 تـنــوصـف بيش   يـالاكـبـر بــويـه
                 وتـنـذبـح لـيـش   يـالاكـبـر بــويـه

                         بطولك اجروح   علي
                         مـاخــذ الـروح   علي

                        *---------------*---------------*

يـا عـلـي والـشـايـل اسمك   والـدفـنـهـه بـسر بـأجـلـهـه
وتـد هــاي الـخــيــم انـتـه   ومن تـطـيـح اتطيح كلـهـه
خــلــهــه الـعـيـون اتـلاگـه   وتـحـچـي بالنظرات خلـهه
وطــوّل بـلـحـظـة وداعـك   هـاي لـحـظـه الـمـا امـلـهـه

                 لـحـظـة اغـيـاب   يـالاكـبـر بــويـه
                 و الــگـلــب ذاب   يـالاكـبـر بــويـه

                         مهجتي اتنـوح   علي
                         مـاخــذ الـروح   علي

                        *---------------*---------------*

لـو وگـفـت اكبالي اودعـك   من احـضـنـك ويـن اشمك
وادري بـالـسـيـف ايتـعـنّـه   لـكـل مـكـان الـبـي ألـزمـك
خاف مـا توصل الـشـاطـي   يـا عـلـي ويــزيــد هــمــك
فــوگ وجـنـاتـك عـفـتـهـن   دمـعـتـي وي دمـعــة امـك


                 تـرتــوي ادمـوع   يـالاكـبـر بــويـه
                 وابقه مـفـجـوع   يـالاكـبـر بــويـه

                         دمعي مسفوح   علي
                         مـاخــذ الـروح   علي

                        *---------------*---------------*

يا عـلـي وخـيـمـات عمتك   نــار فـگـدك بـيـهـه تـلـهـب
ماينه النـعـطـشـلـه وجهك   شـوفـتـك مـو ماي نـشـرب
الـنـهـر خل تـبـعـد اجروفه   سِـحـر عـيـنـك يبني اعذب
والجربه خل تفرغ ابأسمك   تــرتـــوي خـيـمـات زيـنـب  


                 شـوفـتـك مــاي   يـالاكـبـر بــويـه
                 انــتـــه دنــيــاي   يـالاكـبـر بــويـه

                         اغلى الـجـروح   علي
                         مـاخــذ الـروح   علي

                        *---------------*---------------*

بـمـصـرعـك لــو شفت يبني   اجــروحـك بـنـزفـك تـدمـن
بحسـرتـي بـدمـعـتـي بهمي   مـن الفـرس للگاع اطـيـحـن 
احـتـار لـو ردت انـه اشيلك   وانـتـه بـس الـنِـفَـس والـوَن
كـتـر ارفـعـه يـطـيـح ثـانـي   اشـلــون لـلـخـيــمــات اردن

                 اجروحك اثگال   يـالاكـبـر بــويـه
                 صعـبـه تـنـشـال   يـالاكـبـر بــويـه

                         تـالـي مـذبــوح   علي
                         مـاخــذ الــروح   علي

                        *---------------*---------------*

.      محرم¹⁴⁴⁶
✍️خادم الحسين ع
الشاعر سعد هادي الشمري

#وا_قاسماه
#السلام_عل_جبل_الصبر


#زينب_والقاسم 👇
.
.

الحــســن جـرحــه يجاسم.. هـايجاسم
وزماني الـطــغــه، لگلبي بـ .. هـايجاسم
مِـثـل الـحَـسَــــن چـــنّــــك.. ها يجاسم

مـتـت واتــعــانــي مــن اســهــام امــيّــه


(١)هيّجه السَم  (٢) قسّم گلبي  (٣) القاسم

                                     *---------------*---------------*

مــثـلـك مـنـــو بــيـوم الــمــوت.. ينزَف
يا مــن جــرحــه وســط الگـلـب.. ينزف
نـحـرك بــعــده فـــوگ الـسـيــف.. ينزِف

وانــزف خــبــر مــوت حــســيــن الــيــه


(١)الزفّه  (٢) ينز أوف  (٣) نزيف النحر

                                     *---------------*---------------*

✍️الشاعر
سعد هادي الشمري

ابوذيات #القاسم_عليه_السلام
#لسان_حال_رملة #ام_القاسم ع



السبي ويه ام عـون گلبي اسنين.. رمله
وانـســه ابـنـي لـونـهـه اتـصـيـح.. رمله
جـفـنـي . الـطـف شـبـيـهـه ومثل.. رمله

دمــــع وادمــوم خــالَــطــهــن ســويــه

                                       *---------------*---------------*

شبيه الـحـسـن بيده الـجـيـش.. جسام
الگـبُـل لا جاس نـحـره السيف.. جسام
بـنــهــار الـعــشــره لـمـن صـال.. جسام

الــجَــمَــل ردّت و رَد الـحـَـســن ضـيّــه

                                       *---------------*---------------*

الـسـبـي والـحـزن ذنـي اثـنيـن.. وِد  لآل
عـلـي ، و  إلـهُـم أربّـي اسـنـيـن.. و ادلال
ابـنـي طـبـع ابـــوه ، اســيــوف.. و ادلال
خـسِـف حَـط بيهه ابـو اچـفـوف السخيه

                                       *---------------*---------------*

اهـــل بــيــت وعـلـى كــل بــيــت.. نعله
وطــفــنـــه بــالـحـــزن جــبــريــل.. نعله
جــاسـم ، جــيــش امـيـه وشـسـع.. نعله

زعــل وبــزعــل شــدهــم عــالــوطــيــه

                                      *---------------*---------------*

يـعـيـنـي مـن مــســيــل الـدمـع.. لاذيـچ
عـلـى الـ مـن الـمـصـايـب عُـمـر .. لا ذيچ
انـسـبـيـت وبــعــد لا مـن هـــاي.. لا ذيچ

   لا زفـــتــــه ولا رد ابـــنـــي الــيّــــه

                                       *---------------*---------------*

  ✍️خادم الحسين ع
الشاعر سعد هادي الشمري

يا #أبا_الفضل


.      هــذا الـعـبــاس و مــعــروف زوده ابـيـمـنـاه
       و مــا خـابـت مـن نـادت زيـنـب واعـبـاسـاه

                *---------------*---------------*

       هــذا الــعــبــاس و لــو كــبّــر شـبـل الـكـرار
       تـصـطـف للموت ومـرعـوبـه ارگـاب الـكـفـار
       صال ومن صـال امن عـيـونـه يـتـجـادح نار

       يــتــجــادح نـار و يـاويـل لــ كـلـمـن عـــاداه

                  *---------------*---------------*

       يـا رفــعــة راس الاســلام الـمـاطـخ الــراس
       عباس وشـايـل وجـدانـه الـغـيـره ونـومـاس
       يــم اخـيـام اعيالـه انـشـوفـه ابهيئة عـبـاس

       بس لو صال وطـب لـلـعـسـكـر حيدر نـلـگـاه

                *---------------*---------------*

       جوده ونـحـره وطـبـرة راسه ومصاب العين
       وچـبـده الـمـتـوذر والظامي وگـطـع الـچفين        يـهـتـف كـلـهـن فدوه ايروحن لتراب حسين

       شـنـهـي الـدنـيـه ابـغـيـر حسين وذلـه ابلياه

                *---------------*---------------*

       مــا خـابـت مـن نـادت زيـنـب هـا يـا حـمّـاي
       هاك الـجـود اطفالك عـطـشـت ياضي عيناي        هـذا الـعـبـاس وبـيـسـاره شــد جــود الـمـاي

       و چــا مــا طـاح الـجـود ولوما گطعة يسراه

                *---------------*---------------*

       يـمحـجـب زينب بحجاب امن سيوف اوزان
       مركب سيفك چان وخصمك دمه الـطـوفـان        عـبـاس وبـالـحـومـه ابچفك موت الـفـرسان

       ياموت الـفـرسـان الـعـايـش دينه امـن ادماه

                *---------------*---------------*

       يبن الـكـرار وصمصامك تـشـهـدلـه اطفوف
       خاف الموت ومن لاگيته مات امن الـخـوف        شلت الدين شلون وعندك مگطوعه اچفوف

مـجـنـون الما يـنـجـن بـسـمـك لـمـن يـقــراه

                *---------------*---------------*

✍️خادم الحسين ع
الشاعر سعد هادي الشمري

#واضيعتنا_بعدك #يا_أبا_الفضل



.             رد حسين يـصـيـح بـعـبـره .. زينب زينب
              عباسچ عـفـتـه اعله الـغـبـره .. زينب زينب

                  يا حـزن حسين     بـعـد الــچـفـيـن

                                 زينب زينب

                       *---------------*---------------*

بـخـطـوة وقـار ويـاه حـزن   وبــظــهــره طـابــع چــفــه
ومو خوف حاشاه بـس ألم   بـچـفــوفــه بـانـت رجـفــه
ويخفيهه بـيده اشما هـوت   دمـعــة الــشـامـخ كــلــفــه
بـهـالـحـال ابـو الـيـمـه اجه   وطـب علـى اخــام الـعـفـه


              هـا يـبـن امي اتگله اسم الله .. زينب زينب
              لــ شيبك شموصلهه الـرمـلّـه .. زينب زينب

                  الـدم بيهه منين     بـعـد الــچـفـيـن

                                 زينب زينب

                       *---------------*---------------*

گـالـتـلـه اصـدلك شـو دمـع   بــجــفــون عــيــنــك نـازل
افـتـحـلـي گـلـبـك ياخــبــر   مـن الـنــهـــر بـــي شــايــل
گـلـهــه يـزيـنـب نــخــوتـچ   خـل تـنـسـه "يـا بـو فاضـل
خـويــه اسـتـعـدي للـسـبـي   طـاحــن اچـفـوف الـكـافـل

              والچنتي الشوف اتـسـمـيـنـه .. زينب زينب
              شـايل سهم المـوت ابـعـيـنـه .. زينب زينب

                  مــا ظلّت عـيـن     بـعـد الــچـفـيـن

                                 زينب زينب

                       *---------------*---------------*

گـالـتـلـه ما جبته اشعـجـب   بـيــن الـخــيــم وســطـتــه
گـالـلـهـه كـل وصلـه بـكـتـر   ويــطــيــح كـلـمـا شــلــتــه
وبـحـجـري انومه وما رضه   و اعـلــه الـتــرب وســدتــه
يـگـلـي يـزيــنـب بـالــذبــح   تــغــفــه بـحـجـرمـن انــتـه


              ايحاچيني من ايجود بنفسه .. زينب زينب
              خـجـلان من الـحـره لـهـسـه .. زينب زينب

                  وعد الـحـر دين     بـعـد الــچـفـيـن

                                 زينب زينب

                       *---------------*---------------*

گلب الـصـبـوره مـن الـخـبـر   ذاب بــمـــواجـــع صـــبــره
و الـعـلـگـمـي ومــايـه دمــع   صـــار اعـلـه جـفـن الـحـره
گــالـتـلـه يـحـسـيـن و بـعـد   گِــلــي اشـفـت عــالــغــبـره
گـالـلـهـه گـلـبـه و الــســهــم   طـلـعـن ســوه مـن ظـهــره

              كـلـمـاتــه بــآخـــر انـفـاســه .. زينب زينب
              والـعـامـود امـهـشـم راســـه .. زينب زينب

                  ايرد ظعنج وين     بـعـد الــچـفـيـن 

                                 زينب زينب

                       *---------------*---------------*

گـالـتـلـه يـحـسـيـن العطش   مــا كــســر حــزنــك رايـــه
گــالـلـهـه ظـل بــــارد گـلـب   بــعــده الــفـــرات ومــايــه
گـالـتـلـه والــرايــه . هـــوت   گــالـلـهــه وســفــه الـرايــه
الــويــاه فــوگ الـگــنــطــره   ظـلـت عــــــالـمــســنــايــه

              وما فـكّـر بـالـنـبـلـه بـگـلـبـه .. زينب زينب
              كـل تفكيره ايـوصـل الجربه .. زينب زينب

                  تـشـهـد زنـديـن     بـعـد الــچـفـيـن

                                 زينب زينب

                       *---------------*---------------*

مـو نـار بـدمــوع الـخــيــم   عـگـب الـگـمـر مــحـتــرگــه
والـضـيّـعَـت كـافــل خـــدر   لـو مَـر سـبـيـهـه شــتــلـگـه
گــالــتــلــه مــنــا و ابـتـدت   يـحـسـيـن خـويـه الـفـرگـه
وبدرب الـسـبـي ناگه ورمح بـاچـر يــصــيــر الـمــلــگــه

              باچر فوگ الناگه الـعـجـفـه .. زينب زينب
              وعـالـتـربـان انتم يـا وسفه .. زينب زينب

                  شمسوي الـبـين     بـعـد الــچـفـيـن

                                 زينب زينب

                       *---------------*---------------*

.      محرم¹⁴⁴⁶
✍️خادم الحسين ع
الشاعر سعد هادي الشمري