هواجس شعر @portw90 Channel on Telegram

هواجس شعر

@portw90

هواجس شعر (Arabic)

هل تبحث عن مكان للتعبير عن مشاعرك من خلال الشعر؟ إذا كانت الإجابة نعم، فقناة "هواجس شعر" هي المكان المثالي لك! تعتبر هذه القناة الهادفة والمحفزة مكانًا مميزًا لجميع عشاق الشعر، حيث يمكنكم مشاركة قصائدكم، واكتشاف أعمال شعراء مميزين، والتواصل مع مجتمع يشترك في نفس الشغف. يمكنكم الاستمتاع بتجارب ثقافية جديدة وتوسيع آفاقكم من خلال قراءة وتبادل الأفكار والمشاعر من خلال الشعر. ومع وجود المستخدم "portw90" كمدير للقناة، يمكنكم الاطلاع على محتوى ثري ومتنوع بانتظاركم. انضموا اليوم إلى "هواجس شعر" لتكونوا جزءًا من هذا العالم الشعري الرائع والملهم!

هواجس شعر

10 Feb, 15:19

شتلنه ارواحنه بليل المواعيد
وبينا الشوگ كحّل لمعة الگمره

الثلج البينا حار الشايله الراس
ومن حرگة دمعنا العين حمره

فتحنه احضانه ولاگتنه الظهور
غشمه وصدگينه الناس فطره

الواصل غايته يغير سلامه وياك
اللگه بغيرك مكان يبدلك بفتره

مرات الفعل اهون لچمته اتصير
واللچمه الچبيره تصيبك بعذره

اليهتم بيك زايد بالك اتثق بيه
اليداري الغصن هم يرجع يكسره

وثاري الفلح من تتعب اعله الگاع
التعب مو منه لله ادوّر الثمره

غير اليلگه يمك واهس يداريك
ويحسبلك احساب وتعبك يقدره

الحاول يلغي دورك لون قيس يصير
لا يعرف يحب ولا اهل عشره

مثل ماانت كون الرايدك يشريك
ولانك تستحق مگعادك بصدره

اليجهل قيمتك مامفتهم معناك
صگر والمايعرفه يرخّص بسعره

لملم ذكرياتك من گفه المجفين
بالك للحنين تردك الذكرى

وسافر ويه روحك من تخذلك ناس
وحلاتك ويه نفسك تگعد بسَفره

ولا تنطر لغيرك بالجفه يواسيك
كسرة خاطرك بس انت التجبره


وسام السعيدي
335
هواجس شعر

08 Feb, 14:26

هجرني الجانت اعيونه دوالي
جمر وابگلبي بس يشعل دوالي
گلتله ارجوك خل نرجع
حير عقلي ما يقنع
ضحك وستهزا بل مدمع
النفس من حرگته اتگطع
الوجه من خوفه صار ابشع
اصيحه ابصوت مايسمع
الجلد من عضمي ضل ينزع
الموگد بيه احس يلسع
السواد ابعيني گام ايروح
احس بل موت شي ينفع
تركني وگاملي اوگلي دولي
اونكرني ابكل صلافه اوعض اديه

حسن العتابي
521
هواجس شعر

08 Feb, 14:25

ابكثر ضيم اليالي مر حملنه
صبرنه وماكو خير مر حملنه
الجروح البينه صارت مرحملنه
اوكعدنه انوح كل وحده ابثنيه

حسن العتابي
505
هواجس شعر

08 Feb, 14:25

وحگ من ذبحو اوليده بديتاه
السواد ابعيني ماشفته بديتاه
الحزن شبساع خلصته وبديتاه
وانا ابعمر الورد وانگطع بيه

حسن العتابي
499
هواجس شعر

06 Feb, 17:54

الگالولي نهد كلمن سحب رايه
اضن استعجلو شمروها الحجايه
غشمه ومادرو بيه اني مثل البير
يتعب الراد يشرب حته من مايه
عليه اتشاطرو كل ضنهم ايربحون
اورادو بس اطيح اوماطحت رايه
بيرغ واليكضني ايدور اعل الصيت
الحجي البلساني ارتله بصيغت الايه
انا ابسوگ الملاسن ماملثگ الثوب
ولارخصت نفسي اگبال شرايه
تفگه اومن اثور اتجاهل المجيوس
الفشگه المني تطلع بيها الف غايه
النكروني اومشو طاحو امن الغربيل
اخفاف اومابقو غربيلي الئ ادرايه
مثل خام الطبل بس صوت منفوخين
وكت الشده كلمن يرتخي ابرايه
الحمدلله اكشفتهم ونتها المستور
واعرفت الرفاگه ابضهري رمايه
المهم عدهم الجيب الفارغ ايبيعوه
واليحجي الصدگ مايلگه تجايه
كلمن حسب سعره اومضهره يبيعوه
الخوه ابهل وكت تحتاج مصفايه
لازم تستعد اتحط ربعك ابغربيل
وتغربل اصحابك وجه وامرايه
واضربلك مثل بلبدوي عاش ابعيد
خلص كل حياته ايماشي بس نايه
تره اليكتل الشجره مو جف الحطاب
الجذر هوه السبب اتعنئ الاذئ عنايه
البير اشحصل ابعشرت الدلو اسنين
خلص كل حياته ايوشل ابمايه
المثل غلطان من گال العرف مريود
الاقارب هم عقارب مثل الحيايه
اليريد الوفه خل يذكر العباس
ذاك النذر روحه اوماخلف رايه

حسن العتابي
709
هواجس شعر

22 Jan, 16:00

لاتشكو للناس جرحآ انته صاحبه


ماريد اشكي حالي الشكوه هم ذله
بعد ماريد اسامح واغفر الزله
خلص وكت الكلام انته الطيب اهناه
من هل ساعه كلمن يلتهي ابحمله
نخل واتكترت ماريد عطف الفاس
ولااريد اني اصير لكل حشف سله
شني الحصلته خاطر اشكي هم للناس
الموگد جاب عمره امعاشر الدله
عشت مثل السواتر ابصدري اصد النار
اومن خلصت حربهم هدموه كله
وادم بس لسن مثل الحيايه اخباث
اشما تنطيها تصعد فوگك اوتعله
محد يسوه تعبك عيش مثل البير
عاش ابوحده اومن بعد ضل يغله
البشر مثل الكتب بس اغلفه وعنوان
اذئ تقرئ البگلبه ايصدمك ابشكله
الگمر حگه ايتكتر عاش عمره اوحيد
بقه لاخر نفس عالي ابطرگ ضله
اثاري الينعزل يگضي العمر مرتاح
يشوف الناس كلها اتقدسه واتجله
يعجبني الصگر خلص حياته ابعيد
اختار ايعيش حر اومارضئ الذله
البشر ماعنده صاحب صاحبه الدينار
المن تشكي همك اوياهو الا تگله
يراوونك وجه مثل الگطن شفاف
اوبس تندار. تلگه ابضهرك السله
عليمن تشكي همك للبشر غلطان
اخذ طبع الجبل ماهضمته التله
عشرت هلوكت مثل شمس تنباگ
المغرب من يجي ايحط بلشمس عله
الوجع بس صاحبه ايحس بلمراره البيه
يحس وين اليلجمه اويوجعه اوشله
الماضايگ وجع كل ضنك ايحس بيك
هيه العميه عميه اشتنفع الكحله

حسن العتابي
1,521
هواجس شعر

19 Jan, 22:13

غصه ابگلبي اريد اطلعها واحجيها
واريد الزم تفگتي ابصفي اتجيها
بعد كافي انهضم مليت دور البير
شني الحصلته خاطر نفسي ائذيها
عشت مثل البخور ابين هاي الناس
انضح بس عطر. وانسحگ تاليها
اعاملهم ابطيبه اشبع حضن لجمات
اگول اليوم تخلص وارجع ابديها
گلب ماعندي يحقد كله بيه الصوج
اصوج الناس هيه الناس شعليها
يشبهني اني فالح ربه صگره واخاب
وانا عندي گلب حته استحي احجيها
يلم وين التغثني وتردي بيه الحال
احس ابروحي موگد مشتعل بيها
مثل الجثه عايش حلمي صم اتراب
اناطر بلكي واحد جثتي يحويها
بقيت اموسد ابطرگ الهدم والشوف
احسب بل اعزاز الجنت اداريها
عبالي امن اطيح ابطيحتي يطيحون
اثاري الناس بس السان تحجيها
بعد ماراح اصدگ كل حجي الينگال
وادور راحتي وكل ضيجتي امحيها
واليگلي غلط انطي عرض مكفاي
واعوض عيني عن كل دمعه تبجيها
كافي الي خسرته اصبر وعوض راح
من هل ساعه راح الكل اصفيها
وانسئ الماضي كله وابدي من الجاي
وعيش الوحدي وكل شدتي اطويها
وغربل ناسي كلها وانسئ كل الفات
واحط ابگلبي صخره وطيبتي الغيها
موبس ناس اغير حته اسمي انساه
هيج ابكل سهوله الناس ابديها
الحياه عبره وتجارب جانو يگولون
وانا احفضت الحياه واطويت ماضيها

حسن العتابي
1,560
هواجس شعر

05 Jan, 17:31

ياوحيد الدنيا تستفرد بروحك من تعيش الليل وحدك
الغربه ونستها بصفنتك
بيك تبحر لآخر ولايات عمرك
كلشي بيك يرجعك اللحظات زغرك
للأمان الچان وي امك تعيشه
الهسه ماكو وعايش بخوفك غريب
انباگت الضحكات منك وانترس گلبك ثغيب
تايه وماتدري عدمن راح حلمك
كسرتك ماتجبرها الاسف والاعذار اتغثك التسمعها تالي
ضوجتك مو لحظة تگضي
معبّر ايام وليالي
مسافر بحزنك عمر .. صعبه ترجع للفرح من غير اقامة
انت جنسيتك دمعتك
انت لونك مثل گلبك سومرت بيك المحنة وشربت الذكرى حنينك
انت سكتة بلايه صوت الوحّدك تسمع ونينك
لا ادور وادم بخطوة صفنتك انت وينك شوف روحك يا محطه مضيعه عمرك واشتهيت اتعيش ضايع
وانت وي روحك مشيتوا ضايع يدور اعله ضايع

معاگب النيه يتيهك
مو طريقك
كلشي ضدك صار بس حزنك صديقك
منفي من كلشي احتويته وفرطت ناس التحبها الچانت مچلبه بخيالك

ديرتك دارت وجهها وفتحت الغيرك حظنها
شگد بچيت بكل شوارعها ومدنها
سكّت عيونك يگلبي
ولا تسولف كلشي بيك
الناس شمات اعله حزنك لاتصدگ باليجيك
وابقه وحدك عيش وحدك
تتعب وماكو اليفهمك

انت افهم روحك اول وتالي دور عاليفهمك
انت وي روحك صراع وفوضوية ومالگيت الي تريده وتمشي تايه
يمته تندل
عابر بخوفك ليل غابه وضجت اصوات الوحوش الكلها عطشانه اعله دمك
وانت لا راي اليرشدك عالطريق ولا اكو حيل يشيل حملك
وانت مكسور بغربتك
كلشي بالدنيا ضحك باچر يلچمك
انت محسود اعله حزنك
ميت وماتدري ميت
ابنادم من يموت
حلمه يعيش ميت

وسام السعيدي
2,237
هواجس شعر

04 Jan, 23:05

ولا تعصر صورهم ماكو اي ذوق
يضل لون الهجر بيديك مطبوع

لان يمهن لكو اثار ال جمال
حسبوهن حفر بس هنه ينبوع

ضحكنه اويه الجرف وتحرك الروج
وعلى الماي ال طشر كالو دموع

زفينه العرايس والفشك ثار
عوض عن البراكع لبسن ادروع

على جناح الشمس لا تشعل النار
ترف ريش الضوه ونخاف ليموع

وعلى درب النجم لا تشمر ءاحبال
لا يصعد حجر ويصير موضوع

خل يبقه حذر لعيونه حلوات
لياكلهن حلم بليل اذا يجوع

وذا وجه التراجي ءاتشوفه مذلول
معناهه ءالبسهن خده مشلوع

وذا جرح الذهب ينشك بلخيوط
يعله ءامن التكبر خشم الشموع

وصلتنه الرسايل كلنه نرتاح
وبنصهن لكينه ..سيوف وضلوع

سلمنه العشك بجفوف ال شراع
مشه ويه السفينه وصار مرفوع

ياريت البعد مزروع بلكاع
چا هسه بمناجل حبنه مكطوع

واحنه ابحبنه ام والبعد اطفال
ولكيناهه بوصط كاروع مزروع

مالك شنشول
1,834
هواجس شعر

04 Jan, 23:05

الشغلة الوحيدة البيك مشتاگلها
لا والله مشتاگ العشرتك كلها

وهاي القصيدة الراح تسمعها اليوم
امورّث جگارة وباچي ومكملها

ما جاي استوعبها مرّت سنتين
وكلمة أحبك إلك ما گايلها

مرات الأشياء البسيطة تأذيك
والمو بسيطة يجوز تتحملها

الماتت أمه من الصبح عادي تصير
المو عادي لمّن نامت امزعّلها

إنسان إنت وآني ما مختلفين
لكن فرق ما بين نوعية الطين

انه التراب البالحدايق موجود
وانت التراب البي انطم الميتين

فارگ وتلگه الهوسة مو بس بالبال
بكنتورك بتسريحتك بالروتين

هذا الفراگ الصدگي ميفض بدموع
يحتاج شي أكثر أذية الموضوع

بگعدة وحدة استوعب فراگك ليش؟
انه الفلم لو بي فراگ ابچي اسبوع

والفتح گلبه تگله سد الموضوع؟؟

اليوم اسد الدنيا وي موضوعي

ويوجعي ضل كل شي وشكض احتاريت
گلت اضعف الإيمان اكض ادموعي

مقرر اندار بشوفتك .. وكل ظني
وحتى السفينة اندارت اسرع مني

تسألني باچي؟ گلت ما باچي هواي
من لحظة وداعك لحد .. هستوني

تلاگينه مكسورين انه وانت
مشابگ اخوان الميت بفاتحته

مشكلتك انه وانت مشكلتي تصير
وبالدرب صارت كلمن ومشكلته

چا هيچ سهلة الموعد من تفوته؟
وانه الغشيم اليبچي لمن يشتاگ
لو موعدك بالتسعة اجي من الستة


يونس محسن
1,664
هواجس شعر

04 Jan, 23:04

بالحلم چني متت ويسألني منكر اجه وچن الحلم واقع

يسألني بس مو مثل ما سولفولي هلي ولا مثل ما سامع

يسألني يا طلعة اشد من روح طلعت بعد ما چانت تنازع

خل كلشي يطلع گلت .. الروح تطلع ولا من يم قطار السفر چف يطلع يوادع

ويسألني يا صوت اشد من صوت صور الحشر اليخلّي كلشي تراب

گتله اسأل الأحباب.. اليتاني ولفه يجي
ما تسمع اذنه بعد بس صوت دگة الباب

ويسألني عدكم وفه؟ گتله انت ما تدري
يگطعون حبل الوصل وانه ادري هذا الگطع بيهم طبع فطري

ظلّت عليهم لعد هي امي لمّن صرت گطعت حبل سري

رد سأل .. چا گلي شو دمّعت؟ لا عادي گلته الدمع انه ابچي من الزغر حد ما كبر عودي

وحزن امي خلّه الدمع مثل النساوة يضل ثابت على خدودي

وماكو فرح بالعمر وعمري من اقيسه شبر من حظن امي طفل لحد يوم بيه احساب

وشترجى وانه بشبر وراسي من احركه يطخ حظن امي والسرداب

رد سأل گتله اعتذر راح اطلع من الحلم وادري انت تعذرني

الكون اعوفه بعد من امي تندهني

الاسود لبسته صدگ بس گلبي رغم الحزن ما همّه لون الهدم
وشلون عندي گلب مرة رفعته بحرب ظنوه راية سلم

احمد سعيد
1,505
هواجس شعر

04 Jan, 23:02

ألم گلبي واجيك اركاض
خوف امغطى بثيابي وجرح چنه عمه بغربه


واصيحك هاك اخذ گلبي
مسيحك خاف يشبع موت اذا ما يلگه اليصلبه

اجيلك لهفتي بشفتي اعوف الماي والنهران واتعناااك
والصعبة امد ايدي اجيسنك نهر مرسوم مايك محد يشربه

وشگلك؟؟؟ والعزيز الينهضم شيگول؟؟
موته يگول البگلبه

واكابر والملامه بنار تدفعني واعاند والصبر گصبه

ويهد صوبي الظلام سيوف عطشانة وانا اتلگاهن برگبه

ويخف عگلي واسيّر للگمر بالليل
حسبالي المشي يگربه

وهذاك انت... محنة ديرتي اتذم الذهب بيه وتزكّي احجارة الغربة

اصوغنك بدي گلبي گلايد يركع الها الجيد
وانت تبيع بحچايه

ومنو يدگ بابك بضحكه تضل تشوفني برايه
مني ولا يجيسك عيب يرجع بس ضواك اعليك شمعة گبال المرايه

وانه ادري البيه من گلبي
اشوفك دم ال بسيفك يچذبني
واشهّد لوم الولايه

ولا يقنع .. والچمه ويرفس ضلوعي
اليگص عمر الگصب بالهور موش المنجل فيايه

وانشده أگله تخاف ع العشرة شبعد منها شفتها على الشرك تلتف سمل رايه

مجذافك جمر لتخاف گدامك نهر مرسوم
عبره ويشتعل مايه

اعبرك والتفت لني عفت گلبي هذااك الصوب
مهرة تخاف شي يكتلها من تعبر

و ارد امبرگع اعنادي وانا اجناحي حلم كل حر
واعوف اعيوني عالشاطي واهيم وياااك
اگلك وين ما تهمس لك النجمة طريق ابحر

توهمتك حلم غيمه تمر گاعي
گمت بآخر ايامي ابذر
وانا وبذري خنگنا تراب المتانه
عمر ننطر

واجيت انت ... ولا هزك عطش گاعي
تعديته وبتت فوگ الرمل تمطر

واذا غثيتك بچلمه تهددني بجفاك المر
ولا چني حلم شجرة كتلته بدفنة البذره
تهددني بعد فوس الجفه شتكسر؟
وتضوگني جفاك المر
وتروووح لوحّدك تبحر
وألم گلبي واجيك اركاض
خوووف امغطى بثيابي


مصطفى الموسوي
1,487
هواجس شعر

04 Jan, 23:01

ضيّعت المشوا دخان تالي الليل
هندس والدرب ينفض بوجهي اشباح

وصيحت شكثر بس فشلة الجيثوم
لو شگيت زيجك ما يفيد صياح

وألم اركاد صبري بمنخلي التعبان
وادري بچف الأعمى ينشّز المصباح

مريم تقتنع چذبة الصليب نگول
بس هي المصيبة الناس كلها ألواح

مدري بيا محطة انباگ مني اصباي
مدري بيا قطار انوخذ مني وراح

جرحك مو إلك.. يا گلبي تنزف ليش؟!
لو سولة الدلة اعله الجمر ترتاح؟!

الله ويانه گتله وگلي الله وياك
حز نحري وتمدد يرفس الذبّاح

ادعي ليا مطر؟
يا زرع؟
يا محصول؟
يا چذبة حصاد تحرّك المرواح؟!

ضمت كل نواها وبگت صبخة الگاع
چي ضاگت نهر غرگان بي فلاح

يا روحي شبعد؟صارن احلامي اتراب
وكتج مو سهل ويريد ناس اوكاح

حطّاني بقفص.. والقفص هم مسجون
وگالوا قصرت لو گاص منه جناح

گاااع بعيني احط وتطيح منها الناس
تكفرّ بالأذان وتسمع اللّفاح

وگمت بروحي اشكّن شك بخيل انباگ
من گالوا براءة بدمعة التمساح

وجاملت الجرح من چان بالسچين
لمعة وجوه ضلعي يعيش من يختل

وضميته برهاوة وبالألم حسيت
ما صحت آخ منك حتى لا يجفل

ورافگته واعرف برفگة الدفان
لو شاف الجنازة بداخله يهلهل

واغلگ روحي بيه واندفن جواي
مدري منين بأذني اصواتهم تدخل

أصعب شغلة هي وتكتل المكتول
لو چتّاله شافه بجثته يغسّل


مصطفى الموسوي
1,319
هواجس شعر

04 Jan, 23:01

نسيت أسمك
خفت أتذكرك
ويعود شوگي أردود
منها وشگگت رسمك ...
أسامح چنت
كل شي أوياك
هسه تغيرت
مابي حمل همك ...
تركتك نگطه سوده
بسلة النسيان
خليها الليالي
أعله الوفه تعلمك ...
حسبالك غشيم الحال
صار سنين ما أفهمك ...
أفهم كل صفات البيك
أميزك زين وأعرف
شنهي ليلچمك ...
چنت تعتازني
وشاخص وگفت وياك
وكت شريان گلبي
بدگته يضمك ...
شطبت أسمك
من شوف العيون
الچنت بيها تبات
من شفتك گلب دفان
حتى بموتي ما أهمك ...
من طبعك ردي
وگبالك يسوموك
رخيص ومحد يهضمك ...
عذرتك ألف مره
ومن درت مگفاك
حالف دين لا أريدك
ولا أكلمك ...
بخاصرتي دفن سچينك
من زمان ساكت ماگلت
چي شامتي يمك ...
وادري أنته صلف
عندك وكاحة عين
ودري هواي وادم
كارها تحزمك ...
على ياهي بعد
كفت العشره أوياك
دنان أطشرت
ما نشتهي نلمك ...

فلاح السيد
1,264
هواجس شعر

04 Jan, 23:00

والم خوفي …
واردنلك شجاع يخاف من خوفه
وألم صبري …
واشوفنك حلم غركان بطيوفه
والم روحي …
واحسنك يلن روحك لروح الغير موصوفه
وتموت …
وينشتل صوتك على الساني
وتموت …
وتطبع الوانك على الواني
وتموت …
وضاع ميتنه المتت انته المتت اني
وانه ياهو التريده يصير
انه ( الحلاج ) يا جرف الهوه الثاني
وعليك انه يحاديني …
بسماي الغيم مجروح ونشف مايه
وعليك انه يذاريني …
صلاة عيون مطبوع الحزن بيها …
طبع كل صورة بمرايه
وثكل عمرين بشفافي العتب وياك
بس ماوجدت ياطيف
دغدغ زيبك عيوني وحجه حجايه
وسكتنه …
وسولفت روحي
العذاب يهون وانته تهون …
وأخبرنك يحاديني …
هاي وجوه ماتحزن
وهاي وجوه ما شگگ سججها دموع
واكلك اي يحاديني …
حلاة الموت لو مات الرجل وكفه …
مثل موتت الشوف بعين
غفله ولا ضوه اليلمض
مثل موت الگلوب بساع …
سكته ولا نفس ينبض
مثل موت النخل بالكاع …
وكفه ولا عرج يغمض

( ذياب كزار )
يوسف حيدر
1,198
هواجس شعر

04 Jan, 22:59

گتلك ابقى اعله العطش مو إلا ماي
البير بس اتغمجه تطلع عينه

ومو ذنبها الحية اذا يطربها ناي
ذووقها يخبل واذا مو زينه

هذا وكت المو شرط بچفوفه سيف
هواي عدنا خدود تهوى الطينه

هواي ناس اعله الصنم هدّتها فاس
هدّموه بس همه المسوينه

كون عدنه بهالوكت عابس نفوز
وچان ما طوّل سفر مهدينه

وچان ما نعزم خشب گوة اعله نار
وندري بي للمگبرة يودينه

احنه عفنه الورده تبچي اعله الفراش
وشلنه وين المو ورد بأيدينه

واحنه بعنا المعركة من اول نزال
وحتى فوگ الجبل ما ضلينه

شلووون بعد حسين يكشخ بينه
شلون ما نمسح وجه ماضينه

الظنوا العباس من طاح اعله ماي
ذوله درب الله فلا ماشينه

عدنه الله .. وجبلته بعازة جبين
وحتى من صلينه ما صلينه

طحنا من أول فرض للحفرة خوف
وبس (طواف) المنتظر ضلينه

وحتى من باگوا تراچي ارقية لييش
بس نباوع كل شي ما سوينه


ضياء الرويمي
1,187
هواجس شعر

04 Jan, 22:59

الخطاب الچان منهج يصنع إنسان
هو اليصنع بلا شك حضارة

صعب كلّش صعب تبنيلك إنسان
وسهل من طين تبنيلك عمارة

بضمير الدنيا حتى القائد يعيش
گبل بيته يأمّن بيت جاره

الحُر يموت بس يموت مرتاح
العبيد تعيش بس تشبع مرارة

جهل الناس حط عالكرسي جلّاد
العبيد الشيّدت قصر الإمارة

بدستور ابن هند الأولويات
السلم مركون .. للموت الصدارة

وصلاة المصلحة يصليها مخمور
والنفعية مزدحمة اعله داره

وحتى الدين يبقى بمشيته يميل
چان الخط الاول للسكاره

لكن بالمقابل چان الحسين
كل مظلوم واگف ب إنتظاره

فتح باب العطاء حسين للناس
وسد بالدين بيبان التجارة

وخط المستقيم اسمه اعله معناه
ما چان بحساباته استدارة

رايح للهدف لو اموت لو اموت
نعم تأكيد ما بيها استعارة

حسين انذبح بالطف سحگته الخيل
ولكن اعلن بموته إنتصاره

شلون استوعب المذبوح منصور
الجيش المنتصر غط بانتصاره(بانكساره)

الما قاري علي ما يفهم حسين
والفاهم علي يفوز بجدارة

ابوصلة الحقيقة براي الحسين
والعنده عقل يبقى بمداره

واليخسر حياته وياه محسود
لأن كلّش رِبح هاي الخسارة

اليعشق يلتحق ب اصحاب الحسين
ما يحتاج يملي له استمارة

والگالوا تعال وضموا الروس
عبيد ولزموا اعله الذل خفارة

اليتفرّج على المذبوح مذبوح
العار بلايه شك يصير داره

ابن العاص غطّنه الروايات
بس ما گدرن يغطن له عاره

دنيا العقل فهمت مطلب حسين
وصاغت موقفه بأجمل عبارة

النخل للجوع من يحمّل اعثوگ
ساكت لكن يقنعك حواره

لائك صاحت ابراهيم والفاس
ردّ ما دام ردّوها الحجارة

وابن قاسم گلتلك چانوا اصحاب
متت والدين ردّوه للمغارة

وگلت النوح رد طوفان الاخلاق
هاي الأمة صنعتها السفارة

وگلت العيسى حط رجلك عله الماي
حتى اعله العطش يلغي الأمارة

صحت يا جون هدّ ما دامك انسان
افعالك البيض تسوي چارة

الفخر للثمر ما يعنيكم اللون
العاگول يتباهى بخضاره

حبيب بلا إشارة وصبّح وياك
والحُر چان تكفيه الإشارة

وعباس الضوه الما يوجعه السيف
كريم وبدّل چفوفه بمنارة

أهل البيت موضع حكمة الله
وفقط بس إلكم تلوگ الإمارة


علاء الياسين
1,063
هواجس شعر

04 Jan, 22:57

بيني وبين الله رساله؟

ضمني بتراتيل الحمد بذنوبي واهس رحمتك..
ركعه عله شباج العفو  وسجده عله باب محبتك..

وجفوفي ابللهه بفجر وانكث دعائي بقبلتك ..
وامسح صلاتي البسهو   واصلب عيوني لهيبتك...

والغي المواقيت اليجن موعد خشوع لساعتك..
جاساني فيّ عشكك صدك واندهت شمسي بجف علي وسلمت موطن ذلتي لهيبة جلالة عزتك...

غيمة شياطين وسهر وذنوبي تمطر للصبح
واتغطه بلحاف التعب يندهني اسمك و انتبه!

وارجع بخطوة غفلتي وجدم المياله شكد وكح

استعبدني شيطان الهوى وشكك رسايل فطرتي
وطاحت انجوم المغفره

وعبرني سفان الضحك اشيكسر اشراعي الملتهي
وارجع واتوب بكنطره

ضيعني دينار الغشم مشتري الدنيا وتيهت
ماعرف سعر الاخره

ومطرت اذنوبي عله الڇفن بس وجهك ابيض يلتفت
وانه عله باب المكبره

ضمني العفو  البيدك وطن لاجئ واجيت بلا سفر
وانته التوقع التذكره

عطشني واشربلك نذر تذبل بساتين العنب وارجع ابنادم يستحي

وتعبني واكسر كل هبل واصبر بلال بحضرتك
والصخره نزلها وحي

واشرك بتفاح الجهل واتهجه حرفك والخبز واقره عله كل سبحه الحمد

واشتل رياحين الصبر واشتمك بجف كل غصن
واستغفرك وي كل ورد

وانده انجومي لشوفتك واقره عله بابك كل حلم
واتفسر بكيف السمه

تزغر اذنوبي بيوسفك وارجعلك بجربة ڱبل واترس محطاتي ضمه

وانته التمطر صحوتك وترشني رحمه ومغفره وماخلي م‌ـــِْن غيرك عطر

واستحيي كلشي برغبتي واتبخر بمسك النعم
وبلائك اتطين عمر

استغفرت كل صح جفلتك واسترجعت وعي الخطٲ
وهسه بملاذك امنت

توبة عشك م‌ـــِْن كل عشك من كل صنم باسمك تبت
باسم الآه استغفرت

محمود الموسوي
959
هواجس شعر

04 Jan, 22:57

انه الماعثرن بالي المعصيات

اطبلهن واحط لاثكالهن حد

سماري وسومريتي هواي كلفات

ولحيتي ولون وجهي وثوبي الاسود

اهز جذع الحيايا الكلهن اسموم

بخت سيد اكبالي الحيه تبرد

عفي وحلك الجرح ماسده بضماد

بحرك عطابه جرحي معلمه ينسد

تخاويت بثكل مو خوة اخفاف

الحمل كلما ثكل راعيه يشتد

نباهة بدوي شايل واعرف الريح

واميز الضعن من ابعيد لو رد

جدم صياد جدمي ويندل الليل

واطر ليل الصحاري الذيبها انهد

الاكي الخوف ملكه امحاضن ارماح

واشچ ارماح صبري بطينة الصد

واعاند كل شديد يعاند الحيل

بچباشه خلكي اعبره الماي لو مد

جمر كلما طفيت بشيبتي انهاب

ابيض لكن الجواي موگد

خيالي يوهدن الحط باله وياي

ويم تعويذتي الجن ماله مگعد

السكته البيه حكمه ودهري ديوان

من احط حچايتي الميزان يصعد

ماخفيت جدمي عله الطمع يوم

ولا باطل شفت ولساني يرتد

شهب بعيوني وارجم باليحسدون

وببوفاضل امحصن صارلي شكد

حليم الگوم بس ما حالم بجاه

ولادورت غايه وبيها مگصد

كتبت الشعر من حسين لحسين

واتشرف قصيده اباب مرقد



محمود الموسوي
938
هواجس شعر

04 Jan, 22:57

ضمتني المحنه هواي.. حرز للحب والملاكه علك للرايح وماجاي

سولفني الشعر عالناس.. دورني اليريد فياي

علكني التعب نيشان..  ضوكني الفراك اشتاي

مد روحه عله كدي الليل.. والتف السهر بغطاي

جاساني العشك والشيب..  حطاني الحجي عله الراي

سومرني الملح والكاع.. بس ماجاس كلبي الماي

ذاك انه البعدني هواي

بعدني بكل محطه اهلال سفر للناس المعيدين

ملامح كل كلب ملجوم ضوه للكلش ابعيدين

بجي لكل عين ماترتاح ديرة لوادم متيهين

رساله بجنح الولايات سبحه بجف المتانين

نجمه بكل درب نيشان.. فانوس عله درب الريل

متن للماله كل جناز.. غبشه اتزيح حمل الليل

مضيف لكل هلا من ابعيد.. خاجيه وثكل خيال

محنة وادم السبعين.. حريه بوجه جتال

بيرغ للزعل والخير.. فزعه لكل سلف هلهل

شدت علك عالشباج. . نذر كلبي ولاينحل

هذاك انه نهر للشوك..   صوغه بعين المدلل

شمس رازونه عالمسجون.. عطر والتاه بيه اندل

ذاك انه الشعر ماموت.. كلشي بدفتري مسجل

واحبكم

محمود الموسوي
962
هواجس شعر

04 Jan, 22:57

العباس ع وخطابه مع العقيله زينب ع من راس الرمح فكلما سألها اجابته؟

كتلها العتب كالتلي بابه انسد

كتلها الرمح كالت كمر يصعد

كتلها الخيم كالت نذر لحسين

كتلها الحرك كالتلي يتضمد

كتلها التعب كالت عطش ويروح

كتلها العطش كالتلي مدري شكد

كتلها الركض كالتلي حجة نار

كتلها الطواف وكالت المرقد🕍

كتلها السبي وكالتلي الله يريد

كتلها الذبح كالت يريد ازيد

عمود الخيمه كتلها وعمود الراس

كالت طيحتك يصواب مايبرد

كتلها الدمع كالت عزيز وراح
كتلها ورجع كالتلي لا مارد

كتلها الصبر كالت بكد الشيب

كتلها الوفه وكالتلي ماينعد

الخرابه ونومتج كتلها والنسوان
كالت فاتحه وجادرها ماينهد

عباتج والتراب ودمعتج والليل

كالت ينسن كتلها  صبرج حد؟

خدرج والتعب كتلها متنج زين

كالت مدري يمكن هسه صار اسود؟

كتلها السهم كالتلي عد عيناك

كتلها الشمس كالت فيايك هد

كتلها الهزل كالت العصمه أسرار

كتلها الحبل كالت جرح ينشد

زينب حيرتني من الخيم للشام

صبرت  صبر زينب مايصبره أحد

كتلها القصر كالت بجلمه ايطيح

كتلها الحجي وكالتلي نتسيد

كتلها العمر محسوب مامحسوب

كالت هو هودج طاح وتفرهد

كتلها اخيرا كالت العباس

عله افراكك اخيتك راح تتعود

محمود الموسوي
463
هواجس شعر

04 Jan, 22:57

يصاحبنه .. بعد للضيم مابينه

تعبنه هواي

شمتيهين ماندري ولاواحد يدلينه

عشنه اشموع نبجي انموت بس محد بچه علينه

يصاحبنه العمر طفوا راوزينه

يصاحبنه الوطن مذبوح واحنه اتگول كتاله ويگلبون بجناسينه

بعنه ارواحنه ودمنه وكتبنالك اسامينه

يصاحبنه مشينه انذور مطلوبين مدري المن

سلف شياب زعلانين وتراب بدواوينه

يصاحبنه بعد محد يصاحبنه؟ جاهلبت تحاجينه

ودينه الرسايل عله جناح الطير

حطينه الشمع بالماي نص الليل

كتبنالك تعب حمال شال التعب وسنينه

جاهلبت تمر بينه

يصاحبنه الدمع متروس ضيم اطفال وبيوت وسوالف طين

واحلام الزغار اتموت برسوم الرمل والماي

ياعيد اليمر انضيع بهدوم الفقر والعوز

ياصاحبنه تعبانين

ياصاحبنه وين انروح يل عدك عرف بالفوك

تره هذا الوطن مبيوك

ماعدنه بخت ويشور بهالدين؟

ولو بخت الصريفه ارواگها المشگوگ

صاحبنه البواچي اسنين

گالوا بالوطن جنه وتوضينه عله الساتر

وصلينه عله فطرتنه وباچر سير لباچر

ومن فتحوا كتاب الله وقروا بالطور

عبروا كل شطر زيتون خاف انگول وين التين؟

ياصاحبنه مدري انموت لو احنه صدك ميتين!

مبيوك الوطن والدين وين انروح

ومن شفنه القميص انباگ خفنه ايروح منا حسين!

محمود الموسوي
553
هواجس شعر

04 Jan, 22:57

عشكهم بارد وملكاهم ايجذب

وانه طبعي ثكيل ومن انكط حب

انه رايدلي وادم من تحب اتغار

وادم من اجيها بروحتي اتچلب

وانه كل العشتهم مثل صدفة طيف

من عيوني طاحوا طيحة المغرب

روحتهم شمس سلموا مارديت

وانه موبالي يمهم بالي جاي اكتب..

انه عفت الضعن جي بيه سوالف نوك

انه ذاك البعد لو زعل مايعتب؟

انه عايش حياتي بخير جي معزول

عن وادم حجيهم صاير ايخرب

عايش راحتي وسالفتي ديرة ماي

من يعبر بلم يلگاني المعزب

من يحتار طير اطيه غصن ويبات

احب هاي الحياة الحلوه ماتتعب

احب مشول عمامي البيه سوالف خير

احب طابگ خبزنه الحار المچسب

عفت ذيج الحياة المتعبه من الناس

عفت ذاك اليحبني وغيري عشره ايحب

رجعت لكل نهر كاتب عليه تذكار

رجعت لكلشي يابس بالملاگه ايشب!

عفتهم وانه شاعر من اچز البيت

اچزنه بمشاعر حتى غيره اكتب

محمود الموسوي
567
هواجس شعر

04 Jan, 22:47

يا وسفه وعفت گلبي

تذكر من چنت نبضه

اعوضك گلت بس التعب شي عوضه
اعوضك كلت بس الدمع شي عوضه

الگبل تقراني حتى تشافي بيه الناس

مثل ما ينقرى القران عل مرضى

احبك وانته ما ترضى

وگاطعها سمعت اگلادتي الفضه

ودومك رايك اتفرضه

وحتى بعرضتي ما تبقى  چنت اتكول عرضت جاهل وما تنحسب عرضه
يل مني رحت مبيوگ اول مره افزن وانا ما مشبوگ

رغم حارگني بس بجنازتي مدفيك

يحس بدفو اليمشي بدفنت المحروگ

والك ما هضمتك مخنوگ

وما لايگلي اچذب اعليك اذا اگلك عليه تلوگ

بعدك تدري كلبي يحير

وكرهت البعد لو بالقصيده يصير

بتعب امتوني انا اشريتك

والك مو مال اكرهك توني حبيتك

واذا تمشي خسرت انته

ورغم من تخطي چنت اتاذه بالسكته

هو الكاعد بديوان اذا مشلول

تغث اجدامه لمن تمشي سالفته

عجين الشص جبان هواي

لمن دره بأهله احتركو بتنور

ركض ذب روحه وسط الماي

چا لمن رحت للغير شفتك جاي

ولك ما غثتك رايح

ما. نرجع بعد ما ينفع الصايح

هو الواكف بحفره وسطها يكوم

لو مو بيها واكف ينحسب طايح

ردت عمدا تضيعني محابس جومه من بياع بايگني

وخاطر لا يشك بيك السلف بواك

يم كل تاجر اتبيع بجزء مني

ومن فكرت بالرجعه
مو شغلت اريد افراك

بس فكرت ارد مخنوك
العجوز اتشضت الحيلها اتشضى وعمرها چبير
تفكر شلون ترجع من تطب للسوگ
ومدري بياهو گلبه انصاب
وبشنو غص وشبع دگ اعله ضهره الباب
وأبد ما منطي ضهري الوجه مو جي زين
گعده بنص مضيف امننطي ضهري انعاب
ومن حبيته ما حبني
ورغم ذاك التعب وياه تعبني
هدم أضحي بروحي ويذبني
وكارهني  شعجب مو جان كلبك يفور
نسى ملكاني عربيات عل تنور
وكلشي يمرني چان يخوف اجدامي
عطر شياب صعبه يغير ايامي
موكلهن كلت لتبوگهن وتروح
واحد واحد منتبوگها احلامي
612
هواجس شعر

01 Jan, 13:39

كلما انوي ابعدك حبك ابعد
ومثل سيف بحؤب ليلية تنحد

بعدها بلون اسمك فوك الزنود
خضر عفت الجروح علوك تنشد

لخضار اجروحي جم فزاعة حطيت

وادري بطير طيفك سولته الصد

لكن جنت اكابر بلكت يفيد
انصب بالصحاري لروجتك سد

واجي كبل الوكت موعد الجادود
وادفه بضحكتك من جسمي يبرد

واتعمد امر من اليصيدون
واطيح بمصيدة حبك الاوحد

وانتظرك بريء يتاني الافراج
ويشوف القبله حكموهم مؤبد

وتجي حتى بسلامك بالك بعيد
مثل عريس وانه احلامي تنهد

وافز فزة الماي الطاح ع النار
مثل فزة النوارس من يجي المد 

شكصر جيتك دعاء الباله مرتاح
وانه ملاني حته الماله مرقد

واعذارك نفسها هدوم حجاج
لاتتغير ولا تنطي جدد

واندريهن جذب صفكةالخسران
من يشوف غيره بحلمه يصعد

واسال كلبي خاف مقصر وياه
ويجي مومنه من الشامت الرد

الگلب جيله بعرس بس صوته مسموع
لا كاصد بشر لا شافه احد

اصحه الكه السنين بكد النذور
من ساعة لقاك لساعة الصد

المهم فرصة سعيدة بهاي الجروح
واتمنة ويه غيري تكون الاسعد

وتشرفت بيها عيونك السود
وماشرفني كلش كلبك اسود

وماتوكف اعله احد بعدك نكول
بس بعدك فلا دورنه احد
974
هواجس شعر

30 Dec, 12:17

اجربهم ردت بس افهم الغايه
واول ماطحت ذموني بحجايه
گالو طاح چنه وبعد بيش ايگوم
مايدرون ضهري احنيته عن غايه
كتب جانو ابالي وبين المضمون
اثاري الناس تكره طبع المرايه
واثاري الگلبه طيب ينوكل بسكوت
اشويه اشويه يعرف ربعه الاحيايه
المغرب سولته ايبوگ الشمس ويروح
الضلام ايضوج من اشموع الولايه
الفجر لمن يطر يعدم حيات اليل
البدوي ايموت اذئ مايعزف ابنايه
البير اشگد حنين وعاش عمره وحيد
الدلو من گلبه ضل ايعزب ابمايه
الگلب من ينكسر صوج المحنه البيه
الحنين ابهل وكت مايلگه تجايه
طلعو مو كفو وجه اوگفه امبينين
السواد الشفته بيهم بارز اهوايه
چان احساس عدي بطيحتي يفكرون
وطحت واسمع ضحكهم طش بلولايه
اوگمت گدامهم واتكشف المستور
اوسفطت الحجي اسفاط المصلايه
امحسبهم ورد طلعو ضهر عاگول
امرايه اوجوهم وابضهري سلايه
سود گلوبهم منها البياض ايخاف
الگطن من گد حقدهم ماله شرايه
غشيم وحسبتهم مثل گلبي انضاف
اثاري الوادم اعلئ الطمع عنايه
واثاري التجربه تعرفك اطباع الناس
وتشوفك اصحابك گلب وامرايه
العشره ابلايه موقف مالها اي تقدير
الزين ابهل وكت ينباع بحجايه

حسن العتابي
1,088
هواجس شعر

30 Dec, 00:03

ألليلة براحتي أبچيلك وأموت إعليك
ألليلة إعناد ما أغمض

إبن آدم يعرف المي يكتل ألمحروگ
بس من يحترگ لأول نهر يركض

وترى المحروگ ماينلام
القلق ياخذني ويدنيك
شمس مالك عرف بالليل قبل ألسيسبان إتنام

ألليلة منين ما أصدلها بيها إشكال

ترجية نده بزلف ألشجر مصلوب شفت الحيل
لا يخلص ولا ينگال

ألليلة أصوات مدري منين إجت وبحيلها إتغنيك
ألليلة ألذاكرة لو مهَر ماتنطيك

ألليلة منين ما أصدلها بيها إشكال

ألليلة وياك واصل مرحلة من ألخوف ما تنگال
ألليلة بيا إسم الله أنشال

ألليلة شلون أضم حزني
گمر وشموع مشتعلات ودموعي شضه كرستال

ألليلة ألذكريات أشكال
ومثل دمع ألثلج تنزل رمح عالبال

ألليلة آني وتصاويرك بلا حاجوز لو مكتول لو كتال

ألليلة منين ما أباوع تفز ألروح ويگوم من ألوجع خيال

يااا أنت وبعد مامش وجع ينگال……
…………… إلخ ألليل
786
هواجس شعر

20 Dec, 09:49

اني فايض شوگ بيها وما اگول
گلبي ضل بعيونها ايسولف هوئ
الله منطيها الصفات بكل مكان
ما اضن ابنيه اضن حبت دوئ
نرجسيه وبيها عطر امن الجنان
اخدوده ابلون الگمر صارن سوئ
ياشكلها ايخبل اوكلش عجيب
گرنفل اوهيل انمزج وي النوئ
ياعطرها ايفوح من عدت جهات
السانها امن ايسولف الله امعطرئ
اجفوف اديها اويا المعاضد راهمات
والحواجب سيف مسلول ابوغئ
اترف امن التين واحلا من الحرير
الخزره من عيونها ابميت مرئ
بيه فدعه امن الگمر جذابه حيل
الگطن لمن شافها احتار وعمئ
لوحه قدسيه اتلامع جنها هيل
تروي كل عطشان يحتاج لضمئ
نازكه وبيها المعاني اتشع بياض
امن اصباح الناس تزاحم سرئ
ياشعرها ايغازله الريح ابسكون
الشامه وي الخد تگول امفصلئ
نادره وبيها الزلم تضرب مثال
الله حط بيها المعاني ابمقدرئ
تشبه الصفصاف عدها شگد طباع
ناعمه وترفه وطريه ابمستحئ
رصعه بين اخدودها وبزرت دلال
اومن حلكها الكلمه تطلع جوهرئ
كحيله بت اشيوخ وربايت مضيف
النضره منها اعيونها اتجيب اخرئ
سرمديه اوبل شكل شكل النجوم
منها نجم اسهيل ضل ياخذ ضوئ
تحفه للا وطان تنحط لتراث
ابمعرض اتحطها فقط للتذكرئ
بيها روعه امن الورد يمكن خيال
ابعينها اتشوف النجوم امسطرئ
راهيه اوحلوه اوزكيه ابهل صفات
ابجف رجلها ادوس كلشي تخضرئ

حسن العتابي
1,362
هواجس شعر

18 Dec, 07:50

راح اغير طبعي واسلوبي القديم
وامشي مثل الميل مارد للوره
وليگلي انساني ماچلب بديه
مودع اومحروس خل ينطي اضهره
الصفنه من اتموت تكتلها الرياح
واليموت الغيم شمس الله تره
واني شمس اوريح متهمني الغيوم
راح اصفي الربع كلهم بل سره
وارجع امن اول واحطلهم حدود
والتغثه احجايتي ايصف ليوره
مااثني احجايه وارجع بل كلام
ولا يهمني انسان كل همه الثره
ذيب طبعي ومن صفاتي احمل وفاء
مادنت نفسي اعلئ جيفه امجرجره
صنت روحي وماعشت عيشت ذليل
ولا مدحت انسان خاين جوهره
شفت عده اوجوه وانواع الطباع
هاذ كله امسجله واعرف اخره
اني صح انسان بس عشت بحياء
خلصيت اسنيني لجل الاخره
جربت كل ربعي طلعو بس غلاف
وانفضح مضمون كل شي امدثره
بل مصالح عاشو وشفت العجيب
گلبي من گد الطعن سب خاطره
امصفي نيتي ونيت الوادم ضباب
الناس سوده اكلوبها تحس مگبره
راح غير طبعي بل شكل الصحيح
وابدي من الصفر واليجفي اعبره
واترك الطيبه واشد گلبي الجريح
واكشف المستور والسيف اشهره
واعبر الصعبات كلها وما اطيح
واليطيح ابلا سبب راح اخسره
واكتب المضمون وانسه الي يروح
واليحب ايشوف خل يلزم سره
التواضع والقيم وگلب الفطير
هذن من اليوم ضلن ليوره

حسن العتابي
1,379
هواجس شعر

15 Dec, 21:29

يالذيذ شگد احبك خل اسيرلك هوئ
انته بلسم عطر خدك صار لعيوني دوئ
يبن گلبي لدنيا موسم ونته لعيوني لخضار
سنبلك شب اوي روحي مالي حيل لانتضار
اشتلني ورده ابطرف جيدك
اسگيني من نبضت وريدك
اني شاعر من اشوفك ابدع بصوره جديدك
انته غيمه واني يابس چني گاع
امطر وخليني اخضر حته اموت هل ضياع
مرني لو بل طيف مره
خل اضوگك عشگ يسوه
اني ذاك الصاغ جيدك صوغه حلوه
اني ذاك المن لذيذك ناسي كل جرح يتلوه
يلمهيل ولله حيره
انطيني گلبك خل اديره
شوگي طافح وانته ريح اتهب عليه
وغيرت
كل شي ابمسارك حته احلامي الزغيره
امرايت احديثات انته
فرحت امعرسين انته
ياهدوئك خل كل ركني ايتهدهد
گمت انطرك طيف بلكي اعليه تنشد
حطني كحل ابجفن عينك
روحي مشتاگه الحنينك
فدوه دهدهني اعلئ روحك
بلكي انشف ادموعي من حرگت ونينك
انته صوغه ابروحي گاعد
انته لهفه ابجفني لابد
تدري ياشلال روحي
من تغازلني ابنضرتك انهطر وابقه اني بايد
انته مزنه ومن تهب تلكاني شتله
انته بس امطر ولو بلخفيه ختله
اني واحد ناسي روحه وعاش لجلك
اني حارگ حلمي بيدي وگدت حلمك
انتبه وافطن لاديه
سولف الشهگات اليه
انته يا اجمل اعذيبي ايمر عليه

حسن العتابي
1,330
هواجس شعر

15 Dec, 12:39

........... الوصيــة ...........
ولو كل الكَلوب اسرار ،
ولو كل الدروب اكَصار ،
ولـــو كل شي
ورغم كل شي
حاول تحب كل الناس
بس لا تعتمد عالناس
صدور الناس ظلمة غار
ناس اسرار
يجوز ابعد انسان يصيرلك شريان
ويجوز اقرب صديق يصيرلك جــزار
ناس اسرار
ناس اسرار
لا تمشي بدرب مديوس
هاي دروب تعبانه ، عليها اثار
سوي لك درب تنشاف بيْه وتشوف ،
درب تشتعل بيْه شمعة فرح للناس ،
بس لا تعتمد عالناس
سوي لك درب تلكَه عليْه نفسك .......
سفينه وصاريه وبحّار
انت يجوز تلكَه النار بالجنه،
نعم ، .......
ويجوز تلكَه الجنه وسط النار
المهم انت الذي تختار
المهم لا تنسى حب الناس ،
بس لا تعتمد عالناس
اعزف على العود بريشه من جمار ،
اكتب عالنجــــــــوم بلـؤلـؤة محـار
اكسر قيدك بايدك ........
كَبل ما يعتك وترهم على الزنجار ،
احفر كَبرك بايدك .
يمكن باجر امن تموت ....
ما تلكَـــــــه ولا حفّـار

عبدالكريم القصاب
1,292
هواجس شعر

15 Dec, 11:58

............ مــوال الوحشــــة ...........
وين آلكاك ؟
يل حتى آبمرايا الطيف .....
ماتنشاف ، ماتنجاس ،
يل ماخذ الواهس والحلم وياك ،
يمذوّب آشموعي آبصفنة الوهواس ،
وين آلكاك ؟
كون آلكاك ،
ولو رشفة ندى مترب ،
وآكولن من تصح ، لاباس ،
ولو نسمة عطر جلمة .......
تهز بيه وتر حساس ،
ولو رعشه على اجفوفي ،
من روس الاصابع ، بالدمع تنباس .
وين آلكاك ؟
ياسبحة آسنيني آلمن أصابيعي ....
انفرطت مثل خيط الماي ،
يا كلبي الطلع دامع آمن اعيوني ......
آبجنح لحظه ،........
مثلما ينكظع ويضيع خيط آنعاس ،
يا واهس الغبشه ..........
ابروح عصفورة ندى .......
اتمشط آزلوف الياس .
عصفورة حدايق ، ماده الجنحين ..........
مرجوحة مرح بين الشجر والياس .
وين آلكاك ؟
كل شي بلا طعم ، لا سالفه آبلياك .
بعدك ماصدح صبح البلابل بالنفس ، .........
لافاخ مني الراس .
صفنه ولا هوه آيحرك غصن مياس .
دنيا بلا وجه ويّاي ،
دنيا آشفافها بوس آعلى ناس وناس ،
دنيا بلا طعم ، لا لون،
دنيا بلا ضــوه آبلياك ،
وحشة مكبره آبلياك ،
وين آلكاك ؟
كون آلكاك ،
كون آترد علي ، كون آيحصل ملكاك ،
جا ردّت الدنيا آوياك ،
جا ردّت عروس ، آثيابها آنا آوياك ،
جا دكّت آيامي الصافنات اجراس ،
جا مدّت الكمره آبساطها .....
وبات الكمر بالكاس .
كمره آتحل ضفايرها خمر فضي ،......
يرَكْص الكاس والوحشه .......
وخصر دنياي والاحساس ،
ومراجيح الضوه ابعيني ،......
وعشب روحي ،
ويفوخ الراس .
كون آلكاك .
وين آلكاك ؟

عبدالكريم القصاب
1,232
هواجس شعر

15 Dec, 05:16

انا الهاويك من جانت عيونك في
من جان الخضار ابروحي احس صبي
تعال وجيسني ابروحك ثلج ولمي
انت امغلغل ابروحي وسمارك ضي
انا جثه بگبرها و عشت لجلك حي
اخذني العالمك مليت فرحني اريد شوي
دسرسحني بغميجك خل اضوگگ شي
يبزر الهيل سير يمي ليله وخل اشوفك عي
منتضرك حلم وطيوف گاعدلك جرف للمي
يبس بيه الخضار وصرت مثل البور
دسيرخل شوفك جاي وشبگنك شبگ بيدي
يمدري شحاط بيك الله وصفنت اعليك
خليني الصفن ينراد
مامرخوص تمنعني اوتگلي اشبي
علگني ابرگبتك خل اشوف الجيد
الذنب مرات لليشتاگ اتحسه ادوي
يبيت اوبل قصيده انكتب مامروي
يل عشگك سلبني النوم هدي اعلي
يبو عيون الشهل گربلي اريد ارتاح
مامعقوله تبعد واني اريد احوي
تعال البيه ماينگال يعشگ الطيش
تعال الحگلي
هايم بيك وضعي ابشوفتك مزري
دغازلني العمر خلصان شيكفي
تعال وخل اذب ابشوفتك تعبي
يماي الله اشحلاتك بيك اريد اسگي
يل گرنفل دسير ريح لو هبيت
اعيشك عيشت
العرسان باول يوم من تبدي
يكاروك الطفوله ابحضنك ارد ابجي
يلمرصع ابخدك گلبي ضل عطشان
دعيشني حلم وردي

حسن العتابي
1,105
هواجس شعر

14 Dec, 08:46

الليله وحدك
تارس الدنيا محطات وعتاب
الليله وحدك
خانگه القمصان روحك
والشمع من هسه طافي وانت لآخر طين شاب

الليله وحدك
والشبابيچ القديمه اتريد صوتك
الليله وحدك ما يعرفك حتى موتك

وذيچ بيبانك يتيمه وباب يتدنه اعله باب
الليله من ياخوف تطلع ماكو للنسيان باب
ولا يصح للنوم باب

الليله تگطر عينك إبلا معرفتهم
وين وداك السراب
الليله دمعك والصور حصة التراب

شلون تشرد من ضياعك
وبيش تعبر للصبح والخطوه ذيب
الليله كل الدنيا اغاني وانت ذاك الماله بالوادم حبيب

الليله وحدك رافضه الحيطان إدينك
الليله تبچي وما إتخلص الليل عينك

الليله محد يدري بيك
الليله حتى مرايتك تضحك عليك

الليله كلشي إچبير يمك وانت شاب
الليله من داخل غرفتك يبدي مشروع الضباب...

بشار المحاويلي
1,279
هواجس شعر

13 Dec, 06:42

قصيده بحق الام

امي يا اجمل مره بهاذ الزمان
امي بيها اطباع حيل امعدله
امي شمعه ابكل درب صاير ضلام
امي ايه امن السماء امنزله
امي تحت اقدامها اتصير الجنان
البيت احس ابدونها ايطبه البله
العايش ابدون امه فاگد للحياه
ايعيش كل سنينه جثه امعلعله
الله منطيها مقام اشگد عضيم
ايه بل قران حطها امبجله
امي من تدعيلي ربي يگلي هاك
اخذ كلشي اتريد لجل الفاضله
هاك اخذ مني الرزق ومنها الدعاء
حطها لسنينك ذخر لا تهمله
امي يا سر ولغز حير عقول
الهسه ماواحد قراه اوحلله
امعزبه امي وبابها ايجهبه الغريب
من يطب الضيف تسبگه بياهله
امي تجايه اوسند وكت العجاف
اسنين يوسف خلصتها امهدله
ملاوه وي العوز ماطختله راس
اولا حنت هامتها خاف اتذل اله
شالت العفه ابگلبها ابكل اصول
ابوكت جان الشرف ينباع بغله
امي كلش واضحه ابلون البياض
امي من تدعي البشر ما تسئله
بيها عد اوصاف وانواع الطباع
الله خالقها ابمعاني امفصله
امي مثل الورده تنشم كل صباح
اوبل نهار اتحسها نجمه ونازله
امي عكازه وفخر وكت الصعاب
امي بيها الناس تضرب امثله

حسن العتابي
1,233
هواجس شعر

06 Dec, 21:45

صوتك ندهني او مو حلم

وفزيت من نومي

وگلت..

مو صدگ لايمكن صدگ!!

والروح ويّ صوتك مشت

وناديت

والخطوه ابعدت..

والصوت ويّ مشي الجدم

*من ينلحگ.. ما ينلحگ ..

وعالأثر نمشي اعله الأثر..

والشوگ سابگنه سبگ

والگلب لم روحه واجه..

ودگاته احسهه بلا وعي..

مو مثل يوميه يـــدگ !!

* * * *

ويم بابك وياحيرتي .... مدري اشندهني وجابني؟!!

وحتى نسيت اشلون

عالباب من ادگ؟!

* * * *

ظنيت ما اشوفك بعد

من شفت ضويات الدرب

يطفونهه شما تعتلگ

* * * *

ومن شفت شتلات الفرح.. مات الفرح

وامثلمه

والحزن صار اسنين ياكل بالعــــــــرگ

****

ورادوني مااشوفك أبد.. ضمّوا تصاويرك عليّ

واعلنوا لازم نفـــترگ

* * * *

وشالوك حتى من الحلم!!

وحلمك يجيني بلا صور

وبـلا خلـــگ

****

ولمن أفز.. يبجي الحلم..

واثنينّه اعله الروس نتگابل ندگ

ورادوني مااشوفك ابد.. والعين مثل ام الولد..

وانته الولد

لمن إجت ..ماشافتك ..الجفن صار الزيج

گامت بيه تشگ

وياحال من بعدك عشت.. غصن وخذوني من الشجر

وذبوني يم نار الهجر..

واليوم باجر احترگ!!

* * * *

وعشت بطرگ

روحي وسوادين العشگ

واسأل عليك وتيهت… واسأل منو ..

وبيمن اثق؟!!

* * * *

وانسدن بوجهي احس كل الطرق..

والگه الأسأله وكيفت

والگاهن الجلمات ويضيع الحلـگ

* * * *

وخلني اسولفلك بعد.. ياواهسي وغيرك منو؟

والروح اجت مسودنه..

واشبگهه وي روحك شبگ

* * * *

لاتبچي اطيح ويه الدمع ..والروح اسويهه نفس

ومناشغ اشهگني شهگ

* * * *

وابريّتك يا ريّتي ولمن اصيرلّك نفس

لاخنگك ولا

اختنـــگ…!!


جبار رشيد
1,670
هواجس شعر

06 Dec, 21:40

أعاشرمن
شيرهملي
چثيره أوجوه المهلين لاچن بالمفارگ محد أيهلي
عود الناس تشبهمن
شفتهم لافتات ومحد أيدلي
ولڪيت الناس لا مثلك ولا مثلي
شـ أعاتب
آه تنده آه
عثرات
وسموم
وحزن مثل الموت ما يڪضي
ولك يا موت شيلملم المتشضي
أثاريني بواچي شما حضيت بخد
وأثاريني حچي بڪلب الرساله الـ ما قراها أحد
شثڪل حزنه ...؟
اليطشر واهسه أعله البوب
ويرد تاڪل بڪلبه حچاية الـ محد ..♥️
1,414
هواجس شعر

04 Dec, 17:30

الفركه حيل اتريد و
اني ابلايه حيل
واني عايش عيشت
الكاتل دخيل
اشگد ترافه ابروحي
ماتت واني اكابر
والضجيج البيه صاير
يشبه اصوات المگابر
حال حال الضيم صاير
اكل ابروحي گمت مثل الجگاير
مدري شيخرخش ابگلبي
وماعرف لي هسه حاير
عشعش اغراب ابصفنتي
اوماگلتلك جنت اناطر
عايش ابعز انكساري
وليلي بايگ كل نهاري
خاف اموت ومحد الياخذلي ثاري
نايمه الضحكه ابعبرتي
اومختنگ موزينه صحتي
گمت اشدشد بلعلوگ
ومن يجي المغرب اوشل كل دمعتي
جفني من عيني تبره
ودمعي ضل يحرگني گوه
ماجنت ادري انت هيج
اتگوم تگطع بل امروه
عايش ابضيم اوحرايج
والجفن من ردني ضايج
اشلون انام وجرحي مايرضه ايتعالج
البيه ماينگال واشچي
والوجع ماكلني وابچي
بله گلي اشلون احچي
ابعيني شفته انذبح حلمي
واهسي من الفرگه غثني
حال حال المات ابنها
وضلت ابحركتها تدمي
شمالني اركض عل نسوني
ودمعي ينزف من جفوني
اخ كون الگه الجفوني
چان هسه الفرح مافارگ عيوني
روحي متهشمه وتعاني
واسمع اونين واغاني
مدري ياهو الجاي اسمعه
يضحك اعلئ الفارگاني
هي هايه الدنيا گشره
واليوافي اضل تنكره
ريتني اتوسد ابحفره
ولا اشوف ابعيني ذكره
اخ يا روحي الحنينه
وصبري خلصته ابونينه
كون اطلع كلبي وادفن كل حنينه
هاذ حالي اعليك ينحب
اشبه الهد واتصوب
امنين اجيب الروحي مهرب
وانسئ ايامي الحزينه

حسن العتابي
1,788
هواجس شعر

24 Nov, 19:03

الموكده وعلي ماحاجه يشعل نار
تره بيت البخيل شتنفع الدله
المايملك كرم مايسوه دكت باب
صعب حيل تعنه وجدمك تشله
لتغطي الوجه مكشوف تالي اليل
تنشاف العرايس من وره الكله
اذا تكشخ بعقلك كون تخدم بيه
طبع فتل الشوارب من زمن وله
ماقدو قميصك من زمن مشكوك
محد راودك بس عايش بذله
مثل دور يوسف موعلي على الغير
بيك طباع هوده واضحه العله
نخلناكم عدل حد مابله الغربيل
ولكينه البي علي بس العدد قله
الطيبه الزايده سببت كوم غلاط
وسببه كلوبنه وتصورو خله
كل عجده التمر ننخاله الكرار
اذا عجده بضميرك ياهو اليحله
شعندي وياك اريدك واضح ويناس
شتحضر جواب الربك تكله
تحله بكلب ناكه وشوف حب الناس
تره الغثيث طبعه الوادم تمله
وتره اليزرع ورد يحصد كلوب الناس
بس البي مواقف نوكف نجله
اخذ طبع الشمس تضحك بوجه اليل
يخجل من ضواه ويالبد بضله
اذا جرحك نزف حشم جفوفك ليه
عود جفوف غيرك جرحك تشله
اذا كلبك رجيج تروح برجلين
ورجل اقرب صديق البيك تتسله
ضغم روج البحر ماغزر بملاح
مالح اي نعم بس غزرت دجله
حسن السيلاوي
2,247
هواجس شعر

23 Nov, 07:01

ــــــــــــــــــــــــــــــــــــــــــ
ــــــــــ سولف مع روحك ــــــ

شل جرحك بديك ولا تورج ناس
وهمومك الغيرك عيب تشكيها

خل طبعك كتوم اتحمل الطكات
شتفيد السوالف كون تحچيها

سولف ويه روحك موش وي الغير
لچماتك التوجع سكته داويها

صدك ماينفعك حتى اعز الناس
يطعنها عشرتك مايوافيها

مرات النفس هم تاخذك لسوء
حتى النفس يعني تخون راعيها

لو هبت عواصف ماتدوم تروح
خل كلبك جلد لاتشــــــكي عديــها

ناسك موش ناسك والوضع مريون
احــــــذر لاتأمن دنيتك بيها

مالت مصلحه وبراز شخصيات
كف روحك بعد بالك توازيها

امشي الوحدك لاتحتك ويالناس
تبيعك بالبخس لو روح تطيها

على سوگ التمر يتكاثر الذبان
بعد كومة سوالف زحمه احچيها

منك هم احذرك والحذر مـــــــــطلوب
اصبعك هم يجي العينك ويعميها

اخذ صاحب تجارب موش قال وقيل
ودروب المواجع كلها ماشيـــــــــها،

جروح التوجعك ماتوجع الجيران
ولا توجع اخوك بســـــــكته خليــــــها،

بالك من تطيح تصيخ اخ بيوم
كوم الوحــــــدك والروح تچـــــــيها

اوكف بالچذب لوطحت خلك حيد
مچانات النزف حيل ادبچ عليها

فوت الوحدك لاتنخه عون وياك
على درب المهابه الروح جديــــــها

حلو طبع الصكر ينتحر من ينصاد
مايهوى معيشه بذلــــــــه يكظيها

موت بعزتك وبجرحك الماطاب
همومك والجروح بكبرك ارويها

غالب الموسوي
2,275
هواجس شعر

21 Nov, 17:27

انصفيني ..ولو مره

اني انسان
مبيوع بثمن عمره

وملحوگ اعله عافيته
ولا ضاگ الفرح گطره

انه انسان مو شجرة

هواي احجارچ بروحي
وبعدني بواهس العشرة

انصفيني بضمير انسان مايظلم
وأعذريني العذر محفوظ
گدرة بگلب اليسامح

مو ذاك القوي ومتعوب
كل غيبة شمس طايح

بوجهي عناد ومكابر
بس بداخلي مصايح

أكسرت بيه السنين هواي
والوادم كلت عمري

كلشي البيه مو انه
بقايه الغام متشضي
وعابر بالعمر كبري

يدنيا شويه ارحميني
تراني انسان مو صخره

انا المكسور
اجبريني ولو مره

عشت الليل
بين الاخ والكسره

وبين الشوغه والحسره
بتفاصيلي تخضر .. للحزن جمره


عليش وياي يادنيا
الضمه واصل لحد آخر
حلم عندي

وفرشتيني اعله طول الليل
تسيورة لجدم حزني

ورسمتيلي الفرح ميت
گلتیلي اتعمد يچزني

ليلي ملاگه لاهاتي
ودمع وي كل صفنه متبدي

عمر مامفتهم منه
گحط يوسف
أعيشه بطوله ولوحدي

وسجن دنيا وبلا حيطان
لكن مايصح مهرب

مؤبد تنحكم بيها
وعلى اوتار الوجع تصلب

صح انت بوسط ناسك
ولكن عيشتك صعبه

وكافي من العذاب
الكبراني هواي
مابين الجفه وغربه

ما كافي الظروف الماخذه سنيني
بنوايه الطيش

ديرة مطشره آمالي
ولا گلب اليوالمني
وحيل الوكت غثني

هذا الليل .. هاي الناس
كلشي گبالي يلچمني


هذن كلهن گبل چانن
عشت چفهن يضمدني


وسام السعيدي
2,434
هواجس شعر

20 Nov, 22:56

محمد ابو سرآج


گضاني الشوگ
وتعنيت الحلم سهران
نيتي اتناوشك بالبوك

انه بنشغة حلم صاعود..
وتراوالي ضواك عثوك

نبت مردي العتب بالطيف..
يشيعني المعاتب هور..
ويخيطني الگصب سكته
وعلى طاري روازينك..
افرّع ريّتي تابوت

ولا جثة نفس طارش استورحته

سگيتك مستحه يوسف
واگول تروج.
بأول طيحتك مرطوب..
اتلگاك عثرة بير
لاگيني بحضن تنور..
الك بيه سمار شعير

وتباريني شمس غروب.
اطش روحي سفر حنّه..
ورفيف..
وهدوة ولايات.
وغنه برحي..
حسبة سنبله بيه وسچچ عوزك سوالف ناس تركض للحصاد متون

وكلها ظنون
ظني المستحاه بيبان..
يعرگ طير للدگه
ودگينه الگصص چم ريل..
مافزّن حمد ملگه
واتيهك طيف.. وشتلگه ؟
حدر كل فطر شفّه تلگاني عطش وظنون فشلة ماي
واتحدّر سراب بذمة اخر ساجيه بلا راي

وتتمشه بأمل طرواك شذرات النده بروحي سرب حفاي
بعرس الگيض اطشن واهليه فياي

واتختل تراچي بكل زلف ناعور يچفيني ضوه مفرّط
وألم حچيك جرف هيل وسمر عنبر
وعلى جيد الدفو تنزل نده كلاده
بسفر ليل المشه براسي نواطير وسوالف ماحضن بلسان
اتشلبه السمه دخان
غنيت الشمس حالوب..
بوكت طول النخل خدران

بجويريد چلمه نعيش
فَي حچي الدلال رماد
وانت فياي نسمة ريش
ورمش طفله وعرس نعناع
باريني صهيل شراع..
تلگاني صدر ضفّه
شما تزگي الدرب وسفه..
والف وسفه..
چنّه نفيض.. من چان النهر نيشان
عصفورين.. من چان السمه تفك ريجها بغربان

وتعنيت الحلم سهران..
نيتي اتناوشك بالبوك
وگضاني الشوگ
1,722
هواجس شعر

20 Nov, 22:55

هلي وذاك طويركم رد وجزه
وصل فوگ إسطوحنه وجاسه ألصفير وفززه

ياهلي ألظلمه محطه
وغبشة ألمديون كلفه

أليغبش إيدور ألمدينه ويرد فارغ يرد بس إيعوف چفه
وهي هاي شما إزدحمو عألجنازه إيتيه ألجناز چتفه

وسولفتهن .....سولفتهن
لچمه لچمه إعله ألحدايق
بس وردكم سد إذانه وباع زلفه

ياوردكم آاااخ لو بس مره يسمع وأشتكيله
ياهلي ألــ شسمك ثجيله
ياهلي ألــ بسك ثجيله
وحتى ألــ شلونك ثجيله

وآنه ذااك ألماي بس ما صح نهر حتى أنتميله
وآنه ذااك ألنوم نجوم ألسماوات وغفن ذمه بشليله

وكلشي غنيتلكم وشفتوني عيد
وخلصت عمري بحضنكم بس بعيييد....!!

وحتى سچتكم بعيده
ياهلي أليوجعني (كلكم بالقصيده)...

شلون أخاملني وأبوگ ألروح مني                         
وعلى إعناد غروبكم كل حيلي أغني

ياهلي ألخشبات طاحن وين أشد مصلوبي وين

ياهلي أل مشتاااگ ديين

وانتو ذولاك ألجحاده ألما تريدون ألحنين

وانتو ذولاك ألكتلتو ألسندباد
وفارشين دموعكم حسبة چذب عد ياسمين

كون يوم إيطيعني ويسمع چلمتي وينطي بيكم
ايي وحقكم گلبي لو وياي چا سديت بيباني وحچيكم

منيلكم ذني ألگلتهن

غير كون أعرف وأعييل
شمالني شما أريد أغثكم أنشتل يم بابكم شتلة دخيل

ياهلي ألما هنه راحن وألضحك شغلة وزه
وذااااك ذاك طويركم رد وجزه

لـ بشار المحاويلي
1,637
هواجس شعر

20 Nov, 15:24

سهله مو صعبه امن خلي ابعقلي راي
انا ماي ومن اسولف اهدم سده بگفاي
ازناد تفگه ومن انيشن ما اخيب
الفشگه من اتثور احطها ابمشتهاي
اليل رافگ عيني بس ما نمته ذيب
الصحره اشگگها ابجدم حافر خطاي
ابروحي دله اوموگد وشيخ اومضيف
الضيف اسبگه ابخطوه اذئ شوفنه جاي
طبعي بدوي ومن صفاتي اتسمه بير
اسنين عشت ابصحره ماعرفت نواي
ابعمري ماطارد بشر چاهب دخيل
ولاحچيت احچايه مو من مستواي
العركه من ادخلها اسوي المستحيل
السيف اثلمه امن النصل لو ضل وراي
الضلمه. اضوگها الرعب لو مرني ليل
ثابت الخطوه امن اسولف عندي راي
الغيم من يجهب احسب جيته خير
الشمس اصدها ابروحي وانطيها الفياي
الساني ماخشن خواطر طبعي هيل
الدله تجوي ابروحها الخاطر نواي
السهم ماحب طبعه شي يرجع ذليل
ابراسي برنو من اصوب ماافكر للوراي
حطلي شعره امغمض اگطعها وافوت
اتخيل الفرضه اوشعيره اوگلي هاي
الغابه مامر بيها اذئ مابيها صوت
اليل اتعبه امن السهر وانطي ضواي
طبعي حاجب فوگ من العين اعيش
الصفنه اهز اعروگها ابعجت هواي
ثاري مثل البدوي ماطيحه واميل
بيه ضربو كل مثل من گد وفاي
اسلاحي ماغمض جفن گد ما اصيل
امغمض امشي ومادرت لحضه لگفاي

حسن العتابي
1,669
هواجس شعر

20 Nov, 10:31

ملچوم گلبي اليله ملچوم
ومن الدمع غاسلها الهدوم
ماهم للگلي شبيك ويلوم
راوست حر بطيرة البوم

مغلوب حگي الليله ماانام
والاخ بيه تصل ... بالعظام
امشي اعله اديه وعازتي اجدام
غثني الوراي وصار گدام

مهموم گلبي وبالي .. سارح
وبروحي يا كثر .... النوايح
مسودنه بطرگ... الصوايح
والتعب فوگ .. العمر طايح

واتسابگت طعنات الچفوف
تدري الشماته ودگت ادفوف
والگلب من الوجع مزروف
والعین عميه بعازة طيوف

یگضي بعلي ليل المعاناة
وياي بس حسراتي التبات
يا كلشي بيه من الحزن مات
ولچماتي بس تزيد لچمات

اشرب حزن موش اشرب الماي
یاليل جیب الگاطع وياي
ودور اهلي ومامش دواي
وترستني شوغه واخ دنياي

گلبي غصن ومگابل الفوس
وأمسى بعطش وي شحة الطوس
والحچي بصدري سنين محبوس
وياما الوكت علمني بدروس

معتزل هسه وراسي خالي
وماهمن بشرجي وشمالي
عود انتبه واصحه اعله حالي
وأنسه الگبل چان اعله ابالي

زريت جرحي وبيدي رفته
والفوگ عالي .. حدري شفته
الراد يعوف هسه انه عفته
وسرگيت گلبي. وقفلته


الحمدلله انكشفت الناس
وبين الفارغ من الاحساس
ضگت بظهر طعنات جساس
بس رجعت مرفوع للراس

شنفع الانسان بلاكرامه
الرخص روحه يذل مقامه
اعبر الدنيا بكل سلامه
ويعيش صح بلا ندامه



وسام السعيدي
1,699
هواجس شعر

19 Nov, 18:50

تانيتكم حد ماطفه الشوف
مثل الوحيد بغربه وبخوف
مو بس اديه العگل مچتوف
ليلي بجفاكم ليل الطفوف

مشتاگ بس مااعرف شحچي
بچي ام وحيد الفاگدة ابچي
والحزن يمي بشوگه يرچي
والحظ انشده شوكت يلچي

كسر الجفه وماخذني العناد
ودموعي اضمهن ويالمخاد
والچان گايد ... هسه ينگاد
ولا نوم يهنه .. ولا يلذ زاد

الگلبه يگوده يتعب هواي
و بسبب رايه يضيع الراي
رخصني وسفه الموش شراي
وغمها شكثر صلفه يدنياي

حصتي صفر من ذاك الحساب
ردت اقنع بچذبات الاسباب
والذمني يقصد ترضى الجناب
گلوله عيب ..... المثلي ينعاب

ذمني الگبل يتمنه چلمه
مني ونطر بحجايه اقيمه
ولن الوفه ياناس ازمه
كل بشر لازم حده حجمه

وحساب گلبي أحسب للگلوب
تالي طلعت ياحيف مغلوب
چمدوب اسامح دوم چمدوب
وأبوابي افكها وسدو البوب

الحاسب سند شچ بيه رمحه
ومن الطعن ماعاد اصحه
بضلعي المصايب طحن رحه
والحزن زاد وطال شرحه

كل فاگده وحرگتها بيه
ابدي من الصبح للمغربيه
چن للوكت مطلوب ديه
وگطعت.. الوادم... عليه


واتزامطوا وكتي ويالعزاز
بلشو طعن من هامي للچاز
و اليوفي ربعه بهيج يتجاز
غربه بحياته .. وماله جناز


وسام السعيدي
1,593
هواجس شعر

18 Nov, 18:27

من اول حزن مكتوب تقراني.
جرح من ديرة الحفاي.
يقراني اليعرف الهور.
ويميز شواطيي وسماري وطيبتي وديرة ملح وياي.
انا المستاحش المتعوب.
البعيد القريب التايه بلا راي.
المغركهم العطشان..
هذا فراك بيني وبين وجه الماي.
اجي شايل فرات بروحي من اشتاك.
ادور عن هلا تلمني.
وطيح بكاع مابيها الحنين اليغرك بملكاي.
الم جروحهم وسكت ولا سولفهن اعله البير.
شكثر سولفت للشمعات بلكي تجيب طاريهم.
شكثر وصيت حته المالهم خبرة وعرف بيهم.
شكثر فوك النهر خليت..
رسايل شوك وتعذرني ساعي الماي مايندل شواطيهم.
شكثر وشكثر لمن راحن ويالروج.
دمعاتي ورسايلهم وساميهم.
وتاني اعله الجرف عطشان ادور بلا وعي والدنيا بيه ادور.
اتاني الضيعو دربي وضل افرك بدي من يمر عرس طيور.
هيجي وينفتحلك باب هيجي وتفتره ياخاطري المكسور.
اكول شمالها الوادم ثلج ماتنجوي بناري.
اثاري اليل برد حركت المكتوب.
اكول شبيك ياكلبي جنح فختاية عطشانه ولحكها غروب.
وتحزم ورد اعتب وطلع ناري بالدخان.
تاخذني الجكارة الديرة سكرانه.
غريب ومالي بيها اوجوه.
والضويات يطفن من تمر اجدام خدرانه.
ابختمن باكو ارسومي.
وتبدل واهسي وانكلبت الوانه.
ابختمن ضيعت عمري.
ابختمن ماعرف روحي انا بيا وكت موش انه..

المبهر ميثاق الهلالي...
1,322
هواجس شعر

18 Nov, 16:22

(عناوين الخبز)

بينه من باچر چذب
والجاي
ما نحسبله واليوگع
يضيع

ندگ بعدنه
وفوگنه شچم ليل
يندگ

احنه والگاع
وشمسنه الفارغه وچفوفنه المشلوله
تعرگ
من لگينه
ابلا خمر سكرانه الدروب
الغريبه
بلونها البارد
غرگنه

بكل عناوين الخبز
ما النه فرصه نعيش بيها الدم
رخيص

ضعنه چم مره بعمرنه

نبگنه چم گمره بزغرنه

اللون الاسود
ما يردنه الاصابع
والبنفسج والاغاني وحسرة الله
اعله الفقير

چلمة الله
ما معلمين الدروب تموت
واحنه انعيش تابوت وچتف ودموع
خرسه

ليش عصبنه الشمس بدروب
سوده

ليش رشينه القصايد
وّنسينه

يومنه الما تشتهي
حتى المگابر بيه
رضينه

والجديدات الامس مرن حزنهن
ما مفرزن

هنا امس تابوت فرفح

ذوله احنه
وهاي ادينه ودمنه
ذاك

رايحين ابلا عناوين
الكتبناهن قصايد
وانّسينه

نبگنه شوف اعيونه
جدام اهلنا
ومادرينه

بكل صباح انضيع
ونرد عين تبچي
ودم
يوج بدروبنه شچم ديره
خرسه..!!
وما نوج وما تِحركنه التصاوير
وعطشها الما طفت
من بردت الگاع
وزلمها..!!

لليبيع انصفگ ولليشتري
انصفگ بعدنه

احنه ما نرهم نعيش ابلايه
دم

الضحكه عدنه
ارخيصه
والدمعه اشتريناها
بولدنه

نموت نعرف..!
ليش ما ندري
ولا ندري اعله ياهو انموت
باچر..؟

الحسره مو مفتاح للضيع
سماها
وگاعه واطيوف الشمس والطف
قصيدة..!

الحر يخضر بالشعب دمه
ويرد كل التضيع
وما يبيع..

الما حسبها براسه ما يلگاه
راسه

ويطفه سكته..!

من الشمس حد التوابيت وعطشها
اچتاف ادينه..!!

حسين ما يقبل نموت
امچتفين...!!

.احمد فشلان الوائلي
879
هواجس شعر

18 Nov, 16:21

موش انه تره الينهطر من ظله
جفن وبلايه صوت الطيف يوصلّه

انه تفسير حزني ابطن ما مضنوك
هلال العيد كلها تريد تندلّه

نصيحة اتبع ضواك العمه يجيسك خاف
وباچر منّك الحيطان تتخلّى

شوفك ما بحر خاف السراب يضيع
وعلى شفة جبينك ضمه شيوصلّه

ي ضايع حگ چلمتك طگة الحايوز
ضميرك ما يشوف شجاي ترسمله

ليلك ما يسترك لو عيوبك صوت
الندم لا يستحي ولا يستر الخلّه

يم باب الشمس مشعلك ما بي صيت
بير بصف نهر چا منو اليوصلّه

عمري بوجه الأسود ما صرت شامة
عشت بين البشر واضح فطر جامة

شبچ لليعتنيلي اضحكله من كل صوب
ونهر شايلهم اشما صاروا ابلامه

والاگيهم هلا شما دفع ولده القوس
معزب ما يهمني الموت بسهامه

لو ميت ابوي اضحك گبال الضيف
وخيط من الحزن مااشدلي جدامه

نده وفازع شبگ لليبس عوده ضماد
وچنت ادري الشمس لبّدها بحزامه

عمر ناطرت عيده انتظر وجهه هلال
وكلت عيني السما وما شرّع الثامه

ويگلهم لا يچلب ظهري مو شباچ
عگب ما چنه نبعد راس وعمامه

من عيني اعله موده ادفع حلاة النوم
جرح وشما ضحكلي الليل ماانامه

ذنب بعيوني طوله استغفر وما راح
واغمضها وترد لطيوفه محتامة

حنيين وللگمر غنيت خاف ينام
الفجر غفلة يجي وميحقق احلامه

وعبّالي المطر يتعوّر من ايطيح
وانه ودمع عيني انطيح جدامه

برمحك گمت افزز جرحي خاف ينام
ولو هو الجرح مرات يتعامه

جدمك ما تحرّك لا يجيسك شوگ
بمكانك ي العشت توقيع الاقلامه

كل ما طال هجرك چف صفنتي يطيح
ويجي طولك أگبالي ويسحب اقسامه

يطولك منتچي اعله البال .. والنسيان
ما مر اعله باب وسحگت اجدامه

ولتكلف اچفوفك خاف يوم تعود
تره صوتك يدگ بيبان الخيامه

ما مرتاح بعدك عشت مدري شلون
قلق مثل اليناطر لحظة اعدامه


ضياء المشرفاوي
815
هواجس شعر

16 Nov, 21:40

انا تعبان وانفاسي قليلة
والروجة العلى متوني ثگيلة

انا بنادم صدك مذبوح واحتاج
بنادم مثلي مذبوح اشتكيله

من دكات گلبي وروحي زعلان
وحچي المرتاح احسه بگلبي چيله

انا اليجرحني اعذره وگلبي مرتاح
وگبل لا اعاتبه بعيني . استحيله

وما سامح لحدما اغسل الغيض
وانظف گلبي من حقده وغليله

شكد فارش شليلي وي اليحبون
بس ما عاتب الفارش شليله

واذا غلطان ادنگ للصلح ماي
وما اخلي الزعل يعبرني ليلة

الكرامة براسي تاج وما انذليت
وحرام تلوگلي الهامة الذليلة

انا لو ذالها ومن وجهي وطيت
صرت هسه انه ابو اليد الطويلة

ليلية انه روحي اعله السما تروح
و احير بفاتحة گلبي الثجيلة

انگع وجهي بدموع الخسارات
وعلى وجوه الشموس انشر غسيله

احس الصار بيه اكبر من الصار
وابد ما توصفه ابياتي الهزيلة

الشعر لو ما يوصف حالة الروح
على روح الشعر نقرا العديلة

واذا صار المغالب ماله عنوان
ما اورط العرجة وي الاصيلة

نسيت عيوني بخدود المحطات
وتهت والرجعة صارت مستحيلة

عقيل العرد
1,078
هواجس شعر

15 Nov, 08:36

لاتسولف بيه بافعال الزغار
صير زلمه وخلي كلماتك فشك
الراد اطيحن هاذ مو من مستواي
اني بيرغ واعرف الفشكه التطك
الحجو عني ذوله صحبتهم حرام
مايذمني انسان يتنخه اب علك
اصفنلها وشوف طبعي اشكد رحيم
اني من اسكت تواضع ماخاف من العرك
اني رايه بكل حلك شدت لسان
اني اعرفه الخام حجيه من الزك
هيه سوله وسولت الوادم نفاق
العين تعشك كل حواجب تفترك
اني سالفتي وي ربعي مثل عاجر
وام جهال مارضت مره اتصافه
كل دقيقه ونشتهر بين الخلك
شكد صفيت وفارشلهم روحي
طيب وتالي ماتالي اعلئ طيبي
انكروني وعيروني ابكل فتك
جانو ايحطوني ساتر للثكال
وجنت اطب العركه بسلوب رشك
وهسه ياوسفه وندامه تحسفيت
ماجنت حاسب احساب لكل حلك
راح اعوف الخوه للناس الضعاف
بعد ماتمشي عليه سوالف وضحك وصفك
هاذ اول درس واخر شي يصير
راح اصيرن سيف بلشده واطك
بعد ماريده التواضع شحصليت
اريد ازيد اشكوك كلمن بي فتك
بعد ما استر ابد لا مستحيل
الشمعه كلي شحصلت غير الحرك
شكد جويت ابروحي خاطر تدفه ناس
واني ابيض طبعي رادوني انلثك
موشرط اعجب الناس بكل طباع
اني عايش بلمضيف وهمه عاشو بشكك
لاتئمن كل حلك يحجي بنفاه
الخوه بس عباس فرزنها الصدك
انا صح ملجوم بس ماورثيت
التمره خلصت روحها بكلب العثك
اني رايح بس بعد ماكو امان
المايصدك باجر يشمله الحرك

حسن العتابي
1,166
هواجس شعر

14 Nov, 21:10

ذكرتك والوجع غنّه بتعابيري
وصعد شوگي على عيوني
وطفه بحلمي

وضحك بعدك على دموعي
وشرب من لونهن حزني

يساعي الهم اخذ تعبي بمكاتيبك
وجع وآهات

بتجاعيد الكبر بيه اخرب وجه المرايات

اعله طرواهم غزاني الشيب وتوچه اعله خاصرتي تعب شياب

اعله طرواهم طفح بيه الدمع خنياب

بذكرهم كل مسية اغروب يطلع بالنفس عطاب

خوفي بلا مبرر عابر الكل خوف
رعب روحي كتل كل لذه بايامي
حذر من كلشي گدامي
رعب گلبي ولا مشيوف
وماامن بعد بچفوف تلزمني
ولا اصدگ حچي الوادم
على كلشي صبح ماضي صرت نادم

اجفلت روحي مثل ضبيه
تفز وگبالها الكاسر
اجفلت روحي مثل عاجر
من اول كلمة للدكتور من عرفت صدگ عاجر

انكسر كل واهس بروحي ولا تنطر ضوه الباچر

وعشت خوف الخلص عمره
بسجن ماحركوا سرگي اعله بيبانه

عذابه الحايط ايحس بي
الذابح عمره المتانه

الحياة بلا طعم لا لون من يبحر جفه وداعي
سفر من كلشي اخذ روحي متاع برفگة الراعي

من افگدك
كلشي احس ايصيح بيه بلا وعي اتوانه

دمع الفاگد ومكسور نگّع حتى قمصانه
وي كلشي عليك ابچي بدمع ثكله
وسكر حانه

ومواسم آخ امر بيهن ولا فصل الفرح مرني
وحيد ومختلي بحزني

تعب فلاح من يطلع بلا ريعه
سؤال شحصلت كل ساع يلچمني

عمر بس بالخساير ليش من كلشي ضگت لسعه
هيه الدنيا من تجفي تحطّلك بالگلب وجعه

ولاخر ولايات تعبي امحنّى ادز طيفي عله عيونك
واتانيك بنعاسي ايام ما سيّر حلم لونك
وانت الغافي ماتدري برمش ياوادم انشديت
وانه وي عيني عليك انتلافت عمر مااجيت
ومن بعيد واگطفلك هلا شمالك ولا حنيت
وتمر بلا سلام طيوفك وتعبّر للغرب ضحكه
وانه بحزني تچوي الغيم بيه حرورة الشهگه
وتجي مگاود للشماته عيون وتبدلني برمش غيري
ويوالف كل بشر طيفك

وانه بغيرك ولا همني وعليك من اسكر بحزني
وارد بتعبي من ليلك دمع فرگه وظهر محني


وسام السعيدي
1,145
هواجس شعر

14 Nov, 03:29

امس عشت المصايب وحده وحده
بجيت اودمعي سال اعلئ المخده
وصلت الحاله جفني من الرمش شاب
بحيث اليمي گاعد ما اوچده
نمت واسمع هلي ايصحون اضن مات
وامي اتگل لابوي الحگ نگعده
مامعقوله مات وماعرف بيه
گلب الوالده ايحس اعلئ ولده
بجت واسمعه تندب باسمي واتصيح
اگعد يل مكانك بيش اسده
اگعد يل جنت لعيوني الهلال
گلبي اليله احس ممرود چبده
فزيت وشفت دمع امي شلال
وابوي ادموعه من ردنه اتبده
اشم بيهم حريج الخشبه البنار
شبگوني واحس بجرحي نده
اتخوصر بقيت ابكلشي مافيد
الماي ابريجي احس گوه ايتعده
ضليت اختنگ كل مايجي اليل
احط ايدي اعلئ خدي لدمعي سده
المغرب من يجي يفز الوجع بيه
العلگ ملاني گد ماگمت اشده
ماخليت سيد ما تعنيت
حروز الساده صارت عدي شده
كل هاذ العذاب اوماصحت اخ
اجيب اليل بيدي وفرحي افگده
مثل البير باقي اتنطر اوجوه
يتيم وباقي بس دلوه اعل خده
بقت بيه الطيوف احبال الاعدام
كل ساعه وتضيگ ابراسي عگده
خلص عندي الصبر وتبدت احلام
وبجروحي بقه السيف ايتصده
شگد شفت ابحياتي اطيوف ووهام
بس ماجنت اشوف الهسه اشهده
جثث عاشت ابراسي اوحشت گبور
الصريخ الجنت اسمعه ايفوق حده
اسنين اوخلصتها ابسوئ الاحوال
اكضن خدي بيدي ودمعي اهده
كل هاذ وعليه اململمه اهموم
واگول اتهون تخلص هيه مده
بس بعد العشتهن والصراعات
هسه تيقنت ماكو موده

حسن العتابي
1,261
هواجس شعر

12 Nov, 01:29

الغابه الواقعيه

كلش سهله اعيش انسان وحداني
بس امن الصعب اعشگ عشگ ثاني
الگلب مره يحب ماخذ صفه من ذيب
العشگ كلش مقدس نصه قراني
بس احنه البشر گمنه انتلاعب بيه
وضل واحدنه يعشگ عشره ويعاني
المشاعر عدنه صارت ماله اي تقدير
المهم عدنه العدد ميهمنه شي ثاني
عالم بس تناقض عاش بيهه ابليس
تلعب عل حبل واتگول اخ اني
صار الحب تجاره وناس باعت ناس
واليعشگ صدگ ينرجم كل زاني
عقول اتبدلت والبي وفه ايكرهوه
هسه الحب صبح للعقله شيطاني
انست عادات اهلنه وصرنه متخلفين
صفه عدنه العشگ تعشگني وانساني
واذئ اضطر الامر كل يوم غير انسان
ماكو مشكله اتروح اويجي الثاني
مثل بطن السفينه العشگ صاير هيج
اليصعد ينحسب واليبقه من تاني
كله امجرحه المستشفئ بينه اتحير
ومن اتگله خير ايگول خاناني
عقول امحجره عدنه هواي بيها اغلاط
حيره امنين تبدي ااهواي التعاني
ابگد كوكب زحل عدنه الخيانه انواع
اويحلفلك جذب واتشوفه حقاني
ندور علئ راحه وعشنه متلونين
اليضل ثابت نكرها وندعي اله ايعاني
مانعرف نصون وشلنه طبع الخوف
ونكره الي يگول العشگ رباني
زمن كله نفاق الدجل بيه اشكال
وحته الحب صبح منضوره شيطاني
غابه الحب صبح تفترس ويفرسوك
ماكو اي صدگ كلمن يگول اني
وانا ختاريت اعيش ابعيد عن ناس
وامخلص حياتي الحالي وحداني

حسن العتابي
1,295
هواجس شعر

11 Nov, 04:12

اليله شينشف
دمعتي عيوني گبت بيه نار
واني مثل الميل صاير
دوم اكرها الانتضار
اليله شيجيب التركني
اليله خايف راح اموت
اليله راخي اهواي حيلي
اليله انام ابلا خليلي
اليله بس دمعي ابشليلي
اشلون اعيش ابلايه صوت
سنيني خلصت بل خساره
وعايش اعلئ الله وجگاره
ابراسي صوت اشما انام
يگوم يدوي اتگول عايش
عيشت العاش ابمغاره
اعصابي ضلت بيه تذبل
والوجع بيه ايتغلغل
وعيني فگدت كل بصرها
ومابقت بل شوف تندل
ساعه اطيح وساعه اگوم
وساعه اجلب بل اهدوم
اوگلبي بفراگك هملني
وضل يسفط بل اهموم
امنيلي الواهس واتاني
خايف احفر گبري بيدي
اوروحتك خربت عيدي
وگلبي ينزف من وريدي
اشكد جنت اكتب قصايد
هسه خايف من جديدي
بيه حرگه اوبيه لهفه
ااني عاشگ ضاع ولفه
النار بس بيه اتدفه
امنين اجيب انوب صدفه
اتلمني بحبيبي التركني
اسنيني خلصت واني صابر
انهدل متني واني اكابر
اوليلي متقصد يغثني
يدري بيه اكسر الخاطر
اسمع اونين اوبواجي
وجهي من النوح اسود
صاير ابلون الخواجي
ياخساره وياهضيمه
اتنزل ادموعي جريمه
حبنه جان ابكلبي اضمه
وقصته كلش عضيمه
يبن گلبي ويبن روحي
لاتكثر بيه نوحي
ارجع وداوي اجروحي
اتكاونن كلهن عليه

حسن العتابي
1,245
هواجس شعر

10 Nov, 10:55

متانيمن يگلبي وتعّبت حالك
ماتنسه النسوك وتركد شمالك
عثگهم للغرب شبّع طيور وناس
وردّت فارغه من الزارعه اسلالك
المرّك بالحلم حاسبله عشره وياك؟
والعاش اعله تعبك مادره بحالك
وتمحمّل هلا وتگصد على اليهواك
ويأشر من بعيد ولا .. اتدنالك
يالجابر خواطر طعنت بمگفاك
ياهو الناشدك لو عارف احوالك
يالنيتك نوارس وادمك غربان
لتصدگ حچيها التمدح اگبالك
شما ضموا ضواك بغيمهم ينزاح
وترد تضحك هلاك وتخدر ادلالك
اليابس راسهم مانبت بيهم راي
وانت يطگ حِكم لو فاض شلالك
عليك انطش حجرهم مااهتميت
وانت اعله الگطه مافار محچالك
تداري طيوفهم وبواقع ايأذوك
الأقربهم الك شو صار چتالك
لاترجع يگلبي الناسك الصلفين
يطعنوك وترد اعليهم شمالك
تكرار التسامح ذله بيه اتصير
متوهم يگلبي موش الابالك
ضل بعزلتك وتكتّر من ابعيد
ضل الوحّدك ياگلبي واحلالك
عيش ويالشعر لمن يچهبك ليل
وخل ناي الحزن ب الونّة ينعالك
واسمع للجرح لمن يجيسك شوگ
بطوره من الوجع يتغنى موالك
وضل اكتب الروحك لاتسمع الناس
واتذوق الروحك لمن تقرالك
يل وحدك عشت شسوي بماشين
مثل سرك متت يالعايش الحالك

وسام السعيدي
1,135
هواجس شعر

10 Nov, 04:01

وكت خلصته مامرتاح والودم گصت بيه
واني اسوالفي اويشيب انغث من طواريه
عمر خلصته كل ساعه ابفصل مطلوب
حته المات موت الله يحسبونه علي ديه
عشت مثل السجين ابحلمه ضل مرعوب
من شاف ابرگبته الحبل يلف بشكل حيه
التعب والخوف اوحريج اليبقه تالي اليل
تحس ابداخلك منهار اذن مبيوگه ترجيه
نهر مايدري وين يروح غدرت بيه سواجيه
شيخ وذمته العربان وانطه ابنيته فصليه
شهيد وشيعو عريس ضلت نفسه ببنيه
عاجر ضل حلمها اوليد ضلت تدعي ليليه
جثه اوبل علن متروك ميت موته وهميه
جگاره ابشفت المرتاح ماضاگ التعب بيه
فصل دم شيخ محد اخذ ثاري وبرد اعليه
جبير وبين اخوته انهان محد جاب طاريه
حايط وانهدم مجروح ذنبه اتواضع ابفيه
بير بصحره ضل متروك محدشرب من ميه
هذن كلهن لفني اوشفت كومه اهموم
واصبر روحي اگول اتهون لابد للفرح جيه
الوجع ماخذ فراغ ابگلبي حيل اجبير
مثل الشمعه باقي احترگ ليليه
عشت مثل الاسير انهضم بس ماگول
امخلص الغربه كل ساعه اوبجه اشويه
الدموع البيه ضلت تجوي من الخوف
السواد ابروحي ضل ايزيد يوميه
احس ابعمري عايش عيشت سرداب
الحريج ابعيني احس ارماد جمريه
كلش مشتهي النومه ابحضن تابوت
بعد ماريد اعيشن عيشه وهميه

حسن العتابي
1,120
هواجس شعر

09 Nov, 21:40

بعد غيابٍ طويل عادَ مبتسماً غيرَ مُبالي ويسألُني بكلِ وقاحة وهو يعلم بما ترك خلفه من وجع...

شلونك گالّي ورجّعني جيلين
مو ماي النزل حسيت فص عين

الشلونك سهم مو چلمه تنگال
ورجعت ذكرياتي من اول منين

غشيم وصدگت ضحكات الوجوه
ورجعت من الظهر شايل سچاچين

تضحك جايني وما جايبك شوگ
وانه بصوت النعي امفطر حياطين

الشلونك شردها بيا ... تناهيد
وانه مبين علي رسم النياشين

عليه اتأخرت ماضلي كل لون
وذبلت بغيبتك مثل البساتين

شايف من يشح الماي عالگاع؟؟
هيچ جروحي بيك امفطّره سنين

تسألني اعله لون الشيب مفضوح
وانه بحزن القصائد خط عناوين

عِلتي تحيّرت بيها اهلي والناس
وتعبت من قرت بيه الفناجين

يل شلونك تگلي تريد يا لون
وبوجهي الگحط دمعة ومساكين

تگلي شبيك ما رديتلي جواب
وبروحي الحچي مصايح دواوين

ياهو الغاثك شو دمعك هواي
گلتها وگمت احس البيك ميتين

گلبك؟ غيرتك؟ ماشايل احساس؟
المثلك ينسأل عن جيتك منين

عافوك ورجعت ادّور اخبار
لو راجع ندم للبعته بالدين

اعرفك ما تحن مصلحتك اتريد
بس وجهك وكح وعيون صلفين

ظنك من تردلي افتحلك احضان؟
لو اطشلك عطر جوري ورياحين؟

عشت حربي بغيابك عيشة الزير
وطفت گد مادوت بيه الچوانين

الضگتهن مو سهل يحچيهن السان
زعيم وللخصم مچتوف الايدين

علي ضحكت عبيد الچانت اتعيش
بخيري وما وگف بعيونهم زين

الخاسرهن الك ماينمحن بعتاب
تشفى بيا حلم من تتلف العين

تدري شوكت اقبلك واقتنع عود؟
اذا عذر الشمر بي يقنع حسين


وسام السعيدي
1,416
هواجس شعر

09 Nov, 20:21

قصيده ابو الفضل العباس عليه السلام

مگابل گابل الجيش الاجه ابوحده
وگال لربعه لدخلون كلمن يلتزم حده
هاذ الجيش حصتي وجنت انا متانيه
مامرخوص واحد غيري اليصده
وطب المعركه وگلبها بس دخان
وگمنه نشوف بس ارگاب تتعده
ماخلاله راس ابجسد مامگطوع
ضل يسحگ جثث حدما هدل زنده
طلع بلجيش مگبل بلعرض وطول
ياهو الگابلاه بس راس ضل عده
ملك الموت مالحگ يسجل اسماء
ضل صافن يشوف شهلعزم عده
ولا لحضه تراجع شرد منه الجيش
يمنه ويسره سيفه يبتر ابشده
وسمع بحسين رايد يروي من الماي
شال العلگمي بكبره وخذه العنده
ورجع للمعركه والسيف بيده احتار
شيگصص رگب لو جثث ممتده
ماخله العدو يشم الهوه ويرتاح
اخذهم عالي ناصي ولبدو ابسده
كلمن رفع سيفه يشوف راسه هناك
مشمور ودمعته منزله ابخده
شوفهم البرزخ عن حقيقه وشوف
ماخله طريقه اتصده بس شرده
وزئر بلمعركه وگال اني اريد اسباع
اريدن زلمه كون احجايته ابگده
طلعولي زلمكم خل اشوف ارجال
ماريدن خصم ينزع مثل جده
اريد اليوم فارس ينطي حق السيف
ويجرني ابنزال وكون ماهده
راح انطي استراحه وارد للميدان
والبي خير خليبرز نزال ويطلع العده

حسن العتابي
736
هواجس شعر

09 Nov, 18:50

بيت الشمس
*****
تجي تحرگ دليلي وما يشب بالنار
لان صاير رماد وما يشب لرماد
اختار الي التريده من اول المشوار
يجي يوم الندم يفتح عليك ازناد
تحت سگف الجدار اسرار مضمومات
ومثل ماي السبيل السر طلع يعناد
اشوفك چن حمام دوح صرت وياي
يعوف المشتري ويرجع على الصياد
ما اريدك حديد الماي تغرك بي
اريدنك جبل ماينكسر بعناد
مثل سيل البحر باچر تجي الطعنات
لا انت لتكضهن لا تفيد اوتاد
مو لوحه دلليك يثبت بسمار
كوم اكسر خشمهم حتى ما تنعاد
واذا صارت حرب گصتهم النيشان
احنه اربات حيدر مو لبن شداد
يقنعوك بهوهم يطفي روحك ليش
صدگت بحجيهم ول هوه هداد
مثل بيت الشمس ما مره گعدت بي
العمر خلص معاك برايح انت وراد
وذا رايد نصيحة تخلصك من الجور
كض شباج حيدر حلفه بالاولاد
وخذ حكمة علي وبيها استفاد اليوم
ومضمون الرواية اليعتزله ستاد
نور نزار شبيب
747
هواجس شعر

09 Nov, 18:50

نص الليل
...............
جايبك مدافع ترمي بيها اطيور
وانا ابطن القفص ما ودي اخليها
ارد العين الك بالعين بس اصبر
وامطرها جهنم فوك راعيها
كل عقلك حرب ويانه جاي تخوض
انا ابن السحبها وجر سراكيها
اذا رايد سلام تبوسني بيمناي
وغصبن ما عليك الراية الغيها
بعدنه احنه الحشد ما جبنه طاري وياه
وذا صار الزوم البصرة امشيها
اعرفنك جبان وما الك اي دور
امس من حيفا شعلت كل طواريها
من صوت البلابل يرعش ابنك جاي
وابني وي الصكور يسولف عليها
غم روح التراب الشالك اوسواك
تكرب للجهال تريد تغويها
حرب اهليه كتلك حربك انت وياي
من شيث انولدنه وكلها تدريها
يا دية التسد اكليبي غير الثار
ولحد يوم القيامة النار اطفيها
ميضمك عطارد لو مهرتي تغير
لو تسكن الاواج اسلاحي يرميها
يكصرنه البرد ونكرص ابحلى ازناد
وما كلنه شعلينه وهوه منطيها
هذول احنا الملح فززنه نص الليل
وكعدنه بغزة نحجيلك مآسيها
انا الجندي الطلع من بطن الحديثات
وانت ابن الحرام نجيب طاريها
نور نزار شبيب
706
هواجس شعر

09 Nov, 18:50

شط العرب
اجيت بلهفتك تركض عليَّ تفور
تعال وياي رمم هذا عش مهجور
وچن جيت حمامة گليبي جبت عليك
وشفت روحك عجيبه تريد بس كافور
اباوع للشمس واستغفر الله اهواي
لان وجهك اشد من عدها من ادور
حط كل شيء بمكانه لو ردت ترتاح
القلم يبقى قلم لتگله ابد طبشور
رحت يم اليگص ايد التمد الخير
ومن گصها تگلي الطملك بعاشور
بس حيدر ثبت من عبرو الكفار
والباقين كلها تحولت جمهور
عصرت ايد الشمس من رفضتك يازين
ولحد هسه الگمر يطلبني کومه اكسور
جندي بصحرة گلبي يخيط المفتوك
عفتني الزم كتابي والزم الشاجور
مثل صوت النهر يخفگ دليلي عليك
هيچ بروحي صوتك گاعد ومستور
لاني ايوب واتحمل عليك اوجاع
ولا يعقوب واتحمل عليك اشهور
عاركنه الهوه من گتلي ورگي يطيح
وعفت برحية البصرة وجبتلي اگشور
حجّبت الشمس من گتلي فيك راح
على طيح النخل ما يضحك العصفور
تسولف عا السعر تعرف غلات الماي
وضاعت قيمتك ضيعت شعر مكسور
مثل مشي الحزن لون الفرح بجفاك
عفت شط العرب ومچلب بناعور
بعد لا تعتقد تفرح يجيك الخير
شلون تريد تعزف واصبعك مبتور
ورد مكطوع كلبك ما يعيش اردود
اليريد الخبز يحمل لهبت التنور
لان گلبك حديد بماي اجو رشوك
ولو گلبك خشب جا حركو المذكور
ما خايف اطر الصحرة ليل انهار
بس خوفي سراب يبين العاثور
اليحبك ما يهمه شما چنت مخلوق
اليحب النخلة ما همه شكل الجذور
شتريد الشمس تطلع علينه بليل
مو عيب الگمر ينظر عليها اسفور
اذا تحفرلي غمك حفرتك وک زين
اخاف من اطلع انت طيح يا مغرور
انه ادريبك رخي وتبيع لو كضوك
وكلت تهون سهله وما جبت صاطور
انا الخاطر طبخ امك اعوفك جاي
لان طبعي اصيل اللگمه تبقى ادهور
لتسولف نده يم الشمس ميصير
وضم راسك لونك تخطي صيد صكور
حجي كالو عليك يشيب الرضعان
وكتلهم صديقي ماله هيچ اذكور
شمعة بيت اعمى ما تعيش وياي
اخافن لا احركك من تجيب الطور
افک اعيون كلبي بجيتک يا ليل
لان ادري اليريد الوردة ضل ناطور
تكلهم كلها منى ضيمي والشوغات
هوه انا اشعليه وكلها منك نور
نور نزار شبيب
353
هواجس شعر

06 Nov, 22:44

عباس الغالبي يا رفگتي

يارفكتي الليل ينشد  والسوالف والضوه
عنك ويامن مشيت وين تشتم ياهوه
هاذي قسمة حظنة لاموقسمة الله
چنت تمدح بالقطار وحسبت مومنه لله
گلي ليش تغربت ياكلبي رد
يالشتلت ابعيني شوفك وين ماخذ يادرب
اسكي بوشالة صلاتي وخظرت بعيوني رب
يامواعيدك جزني ولاشفت
چلبت بيهن خظار وچفي كاع ولايهد
گلي ليش اتغربت ياكلبي رد
مابيه حيل معاتبك ياشدهة البال
ليل على نيته وفاكدك من الكمر شال
چم دوب اكولن   عاذرك
خلصت عمري مناطرك
مابيه بس الخاطرك متعني الثكال
يالشايل وجوه السفر كله ابسواليفك
عايشلك ابكيف الغرب بس ميت ابكيفك
كونك تريدولايتي چاصادفتني
وانا على ريح ولايتك تايه وغني
كربتني ابظوكك اوحلوة رظاك
تيهتني ابممشه مايلحك وراك
عيشتني بكل سلام وكلمن ايحب الهله
كلهه موحلوة بعيوني وطيفك الميت حله
دوهنتني الله يدوهن من خذاك
موتني وياك شهكات العتب
من قريتك شوفه شوغه اتسامر ابروحي النشد مدري شعجب
يالكيت وياك كلشي
يالتمشيت اعلى رمشي
الدنيا تنزف من عثكها ومامش رويحة رطب
هايخير وين غافي ابياشليل
اوين صرت بيابخت عنبر سبيل
مانه كد مامشتهيك
عيني صحره وشوفي خيل
يالكيت وياك كلشي
يالتمشيت اعلى رمشي
الدنيا تنزف من عثكها ومامش رويحة رطب
592
هواجس شعر

01 Nov, 16:56

ضوه مثلَّم بعيني الشوف
وبروحي ملامه وخوف
يتلاگن بروحي اثنين
وآنه هناك مابين الوجع والآخ
تعب ندمة وملامح خرباها افراگ
ضل عايش عذابه الينتظر مشتاگ

والمشهد عجيب ومثله ما مألوف
احس كل فاتحه براسي طبل ودفوف
احس طعم العرس حزنين
يغطيني تناقض مثله ما مشيوف

وما بين التريده وما تريده الروح
تايه فكري وبلا راي
مرجوحة بلم روحي ويهزها الروج

ياخذني الوكت ركضه
مُهر عرجه بوجعها تلوج

خضتها ويالزمن حربي
وشرب سيفه بتعابيري
وگضني الضيم والحسره
ورجعت مچتف بشيبي معاني اسرى

انهدم كلشي انبنه ابعمري
وبديت ابروحي احس ضايع
كلشي البيه مو انه
هذا البيه مو انه

ابعدوا هواي عن دربي
الحياة بعيني زغرانه

ضياع الماتوا اهله
ومشه بغير ادروب

وبطيشه هوت سمعه
بنتها اجيال بسوالف لعب وذنوب

هذا انه العنيد المايعرف يتوب
انكسر واهس غنى اشواگي
وطحت بيد الحزن مصيوب

لگيت وياي بس انه اليتچيلي

رجعت بفشلة الچفه تطرده البوب

اكو بأيده كتب علته
مو كلشي قدر مكتوب

عشت احساس مااعرفه
مثل العاش بين اهله ويحس مذبوب

لذه الكلشي ماعندي
انعجنت ويه الملل حنه
وصبغت بفكري كل نيه
وصلت الهيج مو صدفه
التجارب أثرن بيه

الضياع البينه من ننطي الگلبنه الراي
التشتت هذا رغبتنه بصدف ماجاي
واضح من تكرّبله السراب
شجايبه اعله الماي
ومشينه بلا وعي متيهين
ورجعنه بكلشي خسرانين
انه وروحي تعبنه هواي


وسام السعيدي
989
هواجس شعر

30 Oct, 18:12

شلون اگلها
وشرد اگلها
واليحبها ملولحة روحه بكلامه
وهي شامة
وعدها شامة
والربيع تجيبة گوة
تگعده من هودچ منامه
وتجني منه الورد الأحمر
تاخذه تصوغه إبتسامة
الليل لو رادت تودعه
وتحدي شمعتها بظلامه
يتعب المرايا مشطها
ويگضي صبره
ويصعد التل الشعر حگ السلامة
وهي لو بالعيد طلعت
يضحك العيد على روحه
وبالشتاء يصير الدخول
وينشگ الطليع هامة
وهي حلوة
وجنها مهرة وعابرة الشط
وبشهامة
چنها مهرة ارچابها يغني لرسنها
ولف سرجها بهوى حزامه
وهي واحة
كلها ماي وكلها راحة
وگمرة وي الصبح عدها
وما نفرزن ضي گمرها من صباحه
وهي واحة
وفيّ نخلها
وين ما يحلاله يفرش
يعن بية وبية يطرش
وبالگلب باني على جرحه
وبالصبي عاشن أيامه
وعالحواجب ديرة أهله
وعالرمش ديرة عمامه
وهي خطار الهوى
وهي المعزبة
وياما ياما
ضوة مشمرها لصدرها
والجفافي چن غزالة
تثني اديها وترضع بگذلة غرامه
وگفت بريش الگطايا
وفرشت بريش النعامة
ومايها ماي السماوة
وطينها طين النشامة
وبخت عد ذاك اليوجّي بمايها ويربط ابلامه
وهي حلوة
حلوة ومحمله وطويلة
وتامة وفوگ التمامة
شايله البستان كله
وغاطة بالجوري گامة
الريح لو يشبگ عليها
تهوف روحه وتنمرد
من يومها ليوم القيامة
لو جرح بالليل يدي
وتعصر جفونه الندامة
مانفرزن هذا جرحي لو جرحها
وهن توم وما نعرفه هذا ياهو من التوامة
شلون اغطي جروحي بيها
وجرحي صورة وهي جامة
شلون اخلص گلبي منها
وگلبي خيط وهي خامة
شلون اضل مادور بيها
وانا ليلة وهي دفتر روزنامة

الكبير محسن_الخياط
996
هواجس شعر

30 Oct, 15:28

جاسني الشوگ وذكرتك
دمعت اعيوني وابجيت
وانتضرت اتمرني نسمه
اطفي شوگي وما اجيت
اليل من بعدك كرهته
والجفن ماطبگ رمشه
الهسه صاحي وماغفيت
ضاله ابروحي انتلاگه
وعمري غادرته الرفاگه
اويا محنه گلبي ضل
ايحن عليگ بگلب ناگه
كودني الحضنك وغني
وخل اداوي اليوجعني
يابعد ذني اوهذني
اشلون انام وانته يمي
استاهلك وابروحي شوغه
اوحاطك بعيوني صوغه
العاشگك امكسره اضلوعه
امنين اجيبن مثل طوعه
اتشوف بيه اشكثر لوعه
انهار كلمن سمع وني
الشوفتك ضليت احني
ادموعي باگت ردني مني
بله من اشتاگ ياگلب ليلمني
عمري خلصته اني اعاني
وصوتي شگگ طبل اذاني
ودمعي بغيابك جواني
الشوفتك ليليه اتاني
ارجع وشوف اشبلاني
يابعد ضيمي الكلاني
بانتضارك كمت احسب لثواني
بخاطري ضلت الشهگه
اوگلبي عاش اليله خنگه
مختنك وبگلبي حرگه
اومثل گلبك وين الگه
دورت محد يدلي
اليله نوحي اعليك يلتم
الجيتك روحي اتحزم
وناس كالت اهواي تحلم
وبلا اخير انته اتندم
ترضه روحي اعليك تنذم
يابعد گلبي اوريده
عايش ابروحي قصيده
اوصاير ابهجرك ونيده
وضيمي مكتوب ابجريده
اوكلبي صاير جن حديده
ميت وگلبك كعدني

حسن العتابي
898
هواجس شعر

28 Oct, 18:21

اني گلبي وهل نجف يتشابهون
اثنين ابكض الخواصر نختنگ
وشلينه ادموعنه اعلئ المايجون
ضلت اصورهم بدينه اونحترگ
عشت مثل الماتله اوليده الوحيد
صعد عل تابوت واهگ بي شبگ
راده يگعد بس يحاجيه اويروح
ماعرف بي هوه ميت من صدگ
شگگ الثوب اعل طوله امن نحيب
عاش عمره ايملش ابراسه اويدگ
واني دگيت اونحبت. اومايفيد
ضال شبه انسان ملفوف ابعلگ
امعلگ اصورهم تذاكر عل رفوف
باقي بس بيهن اصفن واحترگ
سنين مرت واني عايش جن يتيم
اتوچه عل حيطان لمن اختنگ
الهسه باقي اسهر عليهم ماغفيت
اعيوني من النوح اشم بيها حرگ
اطشرت صفناتي كلها اعل اطريق
الهسه ملگاهم ابراسي اوماعتگ
النار حرگت روحي گد مابيها حيل
واني ثوبي امن الردن ضل ينفتگ
اشگد دعيت المغرب ايرد اليروح
تالي ضليت ابتعب روحي انشهگ
حته هاي المگبره ام گلب الجبير
شفت بيها الجثث ضلت تفترگ
عشت كومه اسنين لابسني السواد
ماشفت مره الفرح مرني اوصدگ
ناس تفرح واني عايش بس دموع
امفصل اوياي الحزن نخله اوعثگ
الريل عافاني وصرت سجت قطار
روحي ضلت بل يودع تنسحگ
النار بيه ولو گلت ماضن يجون
عمري خلص كل دقيقه اشبع هدگ
الموته نامت واني باقي عل ارصيف
الحزن بس اوياي عايش بل عشگ

حسن العتابي
963
هواجس شعر

27 Oct, 05:33

امزعلني اويگلي اشبيك متسامح
واني الجان دمي ابكل فصل طايح
يريد اضحك واسامح ونسه كل صار
بعد ماخله جرحي ابخنجره اينازح
عنده العشره سهله وتقن دوره اوياي
واني اوياه عايش عيشت الطارح
كلش عادي عنده انطعن اصرخ حيل
المهم يرتاح يسمع طرب بل صايح
عاش اسنينه مثل الخدم عد امون
دومه ايريد اذيتي ابكلشي ما فالح
خلص عمره يجرح واني اسامح بيه
واگول اتهون يمكن قصده يتواكح
بس عاد اكتفيت اوصل حدها اوياه
من هل ساعه اغمن گصتي اذئ صالح
كافي اغفر وعدي وتالي تعبي ايروح
بعد لو موت ماارجعله واتسامح
عشره وخلصتها ابلا ذنب مخنوگ
اتكتم ابجرحي ودمعي بي فاضح
صعب يتراهمن شمس العصر وغروب
لازم ينمحي الغيم ابشمس واضح
وانته الغيمت واحسب احساب ادور
الغيمه اوي الشمس تصبح نهر سايح
مو كلشي التريده ايصير دوم اوياك
ولا كل سيف ايبقه ابغمده مو جارح
الزرع لو زاد مايه ايصير دم فوكاه
يكتل كل خضاره التعب بي رايح
الغنم من ينوكل تلگئ الخلل راعيه
ماحافض عليه وضل علي. سارح
وانا گتلك استعدل لاضل خسران
بس انته العفتني اودمي ضل طافح
علئ ياهي اعذرك. هنه حيل اهواي
تحلم بعد بيدي اتكضني واتصافح
شلت ايدي بعد وامسامحك ميفيد
اني انسان اريد اعشگ عشگ ناجح
اريد انسان يسو التعب وتعب بيه
مثل الورد يبقه ابكل عطر فايح
ماريدن بشر بلحيله يمشي اوياي
اريد اعشگ انسان ايكونلي البارح
مريت ابتجارب خذت مني اسنين
باگت تعبي مني اسنين مافارح
عيش ابراحتك دورك صبح مكشوف
بعد ماحاجه اردلك الشفته شي واضح

حسن العتابي
1,101
هواجس شعر

26 Oct, 10:54

عزت النفس

الصگر عاف المدينه وعاش جو البر
لان يدري البشر لو جاع بي يغدر
اختار العزله عاش العمر كله ابعيد
خاطر من يصيد ابراحته ايدور
عرف معنه الحيات ونام بصحراء
دور راحته اعلئ الجبل واتكتر
مادور غلب يختار صيده اخيار
خلص عمره عايش طير متحرر
عزت نفسه مايملكها ياهو الجان
يكتل نفسه بيده ابعمره من يكبر
يستنگي اليصيده المات يتحاشاه
يضل جوعان اذئ بيه الامر يضطر
طير وعده مبدئ جاابن ادم اشبيه
ينهش لحم اخيه ابحرگه ويطشر
حگه ايعيش وحده البشر هم تشويه
اذئ هو الطعن صاير امن المنحر
عشنه ابغابه صارت كاتل ومكتول
كلمن حسب سعره ايطعنك وينكر
صارت مشتره والناس باعت ناس
والوادم البيضه استوطناها الشر
ماتگدر اتئمن تنطي ضهرك وين
بس تندار تلگئ ابضهرك الخنجر
صفت دنيتنه مثل الحايط المهدوم
ماينفع اتجي اولا صعد تگدر
الصگر حيوان بس يعرف بطبع اناس
عاش اسنينه كلها ابصيدته يفكر
ماراد القفص نام ابجبل مرتاح
واجهه الصعوبه ابگلب متحذر
سلك درب الوعر ولسهل ماراداه
ترك جو المدينه اوضيمه اليوتر
اختار البر وطن ونضرب بل امثال
الشجاعه العد ضلت كل وكت تذكر
طير ابنص عقل واختار حر ايعيش
وابنادم ابعقله اوضل عبد للشر

حسن العتابي
1,107
هواجس شعر

25 Oct, 07:33

عفتك وانتهت والباب تندله
وبعد ماحاجه تعشگ گلبي وذله
وبعد موش اني ذاك سهل وتراضيه
ولاذاك الغشيم الجنت تگدرله
من هسه انتهت والباب سديناه
خل غيري ايتحملك وانته تتحمله
عيش ابراحتك ول يعجبك سويه
من هل ساعه كلمن يلتهي ابحمله
عفت دور المسامح طيب ذاك انساه
الفطير العاش ضيمك انسه ترجعله
حلم تحلم بعد ترجع واثقن بيك
انمحت كل ذكرياتك صفت بل سله
خذت طبع الجبل متهمني جيتك ريح
اشما عصفت رياحك جتفي متهدله
وصلت الحاله گمت اكره اسم طاريك
بحيث اليذكر اسمك غيض اباوعله
عشت وياك ضيم الفگد ضل مصدوم
العذاب الشفته منك ماعشت مثله
عمر خلصته كل ساعه انتجي وماگوم
كل هاذه واسوي امن الصعب سهله
كافي انطيك عمري او تعب مال سنين
اونته اوياي كل ساعه اوردت زله
شگد دافعت عنك رغم بيك اعيوب
جنت اول ابنادم عشگه يشهدله
بعد منا ورايح احسب الف احساب
واعود گلبي كلشي الرخصه ايهمله
وابدي امن الصفر والماضي كله انساه
واليگلي العشگ اشعل ابشيب اهله
غلطه وصدكت بل حب اضل مرتاح
العشگ بس اليعرفه ايقدسه ويجله
مثل طبع البدو راح اني اعيش الدور
اصبر حتئ اعوض عمري واتعبله
حيل اتغيرت شگگت كل مرسال
واعرفت النتيجه وضحت الشغله
اولا تعتب بعد وتگلي شو مليت
انته الي ردتها واني الاتخله

حسن العتابي
1,266
هواجس شعر

15 Oct, 22:41

ما بديت الا بنهاية
وماخذيت الا بركض مو باية باية

كتّروا عني الهوى وعزّيت شمّي
وماغرَت ريتي التواسيل الهواية

وأخروا مرسالهم واعرفت گدري
والحچي الماينكتب هم اله اقراية

المامدورني عِرف تيّهته والي
وشلت تاريخ الوجوه البالزواية

وعفت كل داعي وبچيت بغير داعي
حتى وي دموعي ماخليت غاية

البي صدگ فزعة صلح يندل زعلتي
ليش احشم دروبهم واسمع حچاية ؟

اليدري عد يا ليل حلمه ينام صاحي
ويزرع السكته الطويلة ويجني راية

وآنه چنت ادري شكثر راح امشي وحدي
باول اسطر وضح مضمون الرواية

علّمت روحي الدوه إمن اول مرضها
لحد ما بلسم صفت لاهل الچواية

دنيا واليذكرها موت يعيش ناسي
وماتفز بعمره صفنات المرآية .

ايما صباح
1,781
هواجس شعر

15 Oct, 20:59

حمل دنيا اعله متني وماگلت آخ
وشلت وين التسوّي الحنوه بالنوگ

وكلتها امرادف الطگات عالهام
ومر المر جرعته بنشوة الضوگ

وتلاويت ويه وكتي ايام وسنين
وعلى ذله الجفن مامر مطبوگ

عنيد وماضعفت اگبال سلطان
واگله من الشعب ما بسّك اتبوگ

بس ساعة جفاك وجية الليل
مثل حامل اجاها بتوم الطلوگ

تشيط بروحي حرگه واكتم الآخ
اخافن للشماته اتضحك الحلوگ

وأضم حزنك ذهب لعجيز الريف
رغم لجدام دمعي طبعت سحوگ

وأكابر والوجع مخلب نسر جاع
گلبي بسيف زير اعليك مفروگ

هذا العالي چان وجنحه بالغيم
فخاتيهم علن وجناحهن فوگ

وهذاك الچان همه يعيش وياك
رد يندّي شيبه بدمعة الموگ

ذاك الماحسب بفراگك يعيش
عاش مشدده بذرعانه العلوگ

سكت من شاف كلها اتدوّر اخبار
رغم لشبيك چانت ترس الحلوگ

شد جرحه ونهض بصوابه مجبور
ولا بيّن عليه چويات الحروگ

العثرة البزدحام الناس تنگال
ماتستر اسرار اسوالف السوگ

على ميلة جدم باچر يذموك
حتى الطوله تارس فشلته فتوگ

عشتهن وحدي بيك اسوالفي وياك
وحشة صحرة بيّه وجيّتك نوگ

شايفلك بشر هلگد بچه اعليك
الصبح والمغرب بطرواك مخنوگ

مايگدر يسولف عِلته للناس
وگلبه من الوجع والآخ مشگوگ


وسام السعيدي
1,518
هواجس شعر

12 Oct, 17:36

الصبر
مات وي روحي خيال وسط الضل
اني اول ابن عشرين
شاحب لون وجها وغصنه ضل يذبل
اجيتك ميت وامنهار اريد اعدل
حفضتك سالفه ابروحي ولا تنمل
گلي اشلون يمدلل
اغنيلك غنه السبعين عاش بلذت ريه
ووافيض
وبيه لهفه شوگ زلف عاشگله ترجيه
تعال وخل اناغيلك
تعال وخل خضاري ايشب
تعال الحگ
گبل لاموت وسنين العشگ تخرب
تعال الحگ ايامي البقت لا تنحب
يل مطرز ابريسم شوفتك ترهب
يماي ومن دلالك لبس وزره الحب
اعتنيتك ريجي ضل عطشان اريد اشرب
امانه اضمني
بعيونك قصيدت شاعر امرتب
خل انعيش عشره مرز والمشرب
يصوغه ليلو
اشمارادو ايعوفوك ماتخرب
تعال وسير ابروحي گصب للماي
اعتنيتك سالفه ابگلبي احبه اهواي
ريض ياقطار الشوگ وامشي احذاي
اريد ارويك بعيوني واصير افياي
يلذه وطاحت ابريتي شكر بل ماي
كاتبلك رسايل تلهم العشاگ
ابگد شعر البراسي واحس بيها اشواي
يلمهيل ابطعمك لاتضل ابعيد
گرب حته اشوفك يمي رايح جاي
تعال اوسير ابروحي شمس واطيوف
واشوفنك مشاعر غافيه امن اسنين
غيرت حته لون السيف من الخوف
گرب ياتعب دنياي اريد اوگفلك امحزم
ميهمني كلام الناس العاشگ گلبه ماينذم
احبك لو تصير السم
اعشگگ لو تصير الدم
هويتك يادوه وابلسم
عيشني اعل گد دنياي وخل الناس بيه تذم

حسن العتابي
1,611
هواجس شعر

11 Oct, 11:04

عشرتك خلصت رماي وامصوب
انته اخر ابنادم يحجي عن الحب
جربتك اوشفتك تهوه غير اوجوه
ماتصلح حبيب اشلون بيك اعتب
عشت وياك مثل القلم والقرطاس
اموديلك اضروف الورد بيها يشب
كاتبلك رسايل حنت جنح الطير
القلم ملاني گد ماجنت بيك اكتب
بس هسه اعرفت انته الجنت رماي
كلش عاشت ايدك تعرف اتصوب
نيشانك حفضته ابگلبي الك تذكار
تحلم باجر ايدي اتكضها واتجلب
تلافيته الغلط والصار غلطه اوياك
بعد ماحاجه نرجع نحب وانجرب
خرز سبحه وتطشر بعد مالم بيك
معزتك خلصت ماباقي الك مهرب
مثل البلم ماحبه اليضل بل گيش
الجرف شابع دمغ شماينثلم يثغب
ادوارك انعرفت واصبحت مكشوف
شمسك غوربت وانفضحت المغرب
اوبعد مثل اليطيح ابرمشي ماخليك
سنبل جان طبعك واعوج امحدب
خلص ذاك المسامر لم هواك واروح
انته اول خساره الربح بيها ايصب
مثل البير اعيش الوحدي اضل مرتاح
عليش انطيك فرصه وابقه متعذب
شگد باريتلك واني ابصفنتي احتار
لحد ماگمت اشوفن جرحي ضل يلهب
اني اول بشر چتاله عاش اوياه
بقه دمه اعله طوله اوفصل مايطلب
واعذرني بعد ماريد اارد اوياك
كافي الشفته منك زحمه اسمي حب
اعشگ غيري روح ابراحتك محروس
سوي الي تريده اتحبه ضل جذب
وصلت حدها ماريدك بعد لو اموت
عيش الوحدك بس يمي لا تگرب

حسن العتابي
1,079
هواجس شعر

07 Oct, 04:10

بعد ماراح اسامح

بعد ماراح اسامح لكلشي احطن حد
ادور راحتي وكل عشره خل تبرد
اليريد ايروح خل ايروح الله اوياه
مامتوازي اضل كل ساعه واتهدد
من تحمي الحديده اوياك يختلفون
ماكو كل بشر تگدر ابضهره اتشد
مثل طبع النجوم اوياك بس بليل
او من تطلع شمس حته الگمر يلبد
خناجرهم ابضهري وگلت يتشاقون
وگلت يمكن رموهن مو طعن مقصد
بس هسه انتهت والبير ذب اغطاه
دست ذاك الوفي البل طعن يتردد
بعد ماحاجه اضوج انكشفت الاوراق
والطيب گلب شيعته واستشهد
هسه الدور الي والماضي ذاك انزاح
بعد منا وغاد ابكل شي اضل احقد
شلت باب الصلح ونسد هذاك الباب
والطيب بعد عاش اعلئ طبع اسود
امساوم راح اساوم شلت ذاك الطيب
والي تغثه عشرتي ايروح خل يبعد
مامجبور اصيرن گطن وسط ارماد
ولا مجبور اعيش اسنيني متقيد
اهم شي راحتي والباقي ماهم بيه
بعد موش اني ذاك الحايط الينهد
عفت ذاك التعب الهدل متني اسنين
بعد ماصير سيف ايحدني كل مبرد
ولا صيرن شجر وانعاف من كل طير
احساب احسب خطوتي گبل لا انهد
قريت اوجوه ربعي وطلعو استنساخ
عدهم كل شي واضح صبح يتفرهد
درس حطيتهم من هسه صار احساب
وخل انشوف باجر منو الگلبه اسود

حسن العتابي
1,392
هواجس شعر

01 Oct, 21:47

قصيده بحق السيد حسن نصر الله رحمه الله


امس طاحت العزه اوسيفه الاشهر
امس حته الجوامع بجت واتكبر
امس ودعنه ذاك البلحرب صنديد
ذاك الجان خيمه باسم ابو الاكبر
راح الجان عالي وعجزو يطيحوه
مات الخله اسمه ابكل گلب خنجر
بعد ذيج الخساره الهسه مصدومين
الجرح شبساع طاب ورجع رد خضر
خساره ايموت زلمه بايد كومه انذال
حرام تعيش وادم بل حجي اتبعثر
خبر موتك رصاصه بگلب كل مضلوم
شيعوضك دكلي ابيا بشر واصبر
انته اول عمود ايطيح وادمئ اگلوب
الحرگه البينه ضلت بل جبل تفطر
هدمت ابيوتنه ابساعت وفاتك ذيج
عساه اليوم الاكشر ريته لا يذكر
بهل سرعه خذك من عدنه عزرائيل
مافكر اگلوب العشگتك تنضر
اشعلامك غربت يارمش هاي العين
الحيات اخلاف وجهك غيم واطشر
عفتنه ابهل سهوله شلون من نشتاگ
ابيش انكض دمعنه ابيا عذر نگدر
راح اضل سهم ابگلوبنه ايحز دوم
مثل العود كل مايبس رد خضر

حسن العتابي
1,500
هواجس شعر

30 Sep, 22:13

امعاند خلصته ابكل شي تتوعد
عمر خلصته بس ابعشرتي اتهدد
عالگلك اصابع عشره كلها اشموع
كل هاذ وعلي ماتسئل او تنشد
مامستقر وضعك دوم بيك اعذار
من كل كتر صاير تطعن او تشرد
صلف كلش بطبعك ابد ما تنطاق
مثل الحيه دومك تگرص اوتبعد
المصيبه البيك ماتقتنع من كل راي
اشلون اتريد اقنعك وانته متردد
جنت واضح اوياك وعشت مامرتاح
باول مشكله اضم راسك او تلبد
فطير وجنت اصدگ الوعد والحلفان
من گد ما غشيم الكلشي ماحط حد
عشت وياي مثل المرض دوم اتعيل
تفرح لو شفت بيه المرض يشتد
ساترلك افتوگ الخيط منها ايخاف
الابر جانت تفضحك واني بيك اسند
مشيت اوياك اعمه ورغم عدي اعيون
وانته اوياي تمشي ابغلب متقصد
تستنگي التغثني اوحيله تمشي اوياي
تفرح لو شفتني ابجرحي متمدد
اسنيني اوياك خلصت ثار عد مكتول
الحسره البيه ضلت بل چفن تسرد
العشره اوياك صعبه اتريد طولت بال
وانا امخلص صبر واتريدني اتودد
كل شي الشفته منك صعب واتحاشاه
واگول ايجوز ماي ويصفه من يركد
تحملت اعلمودك كل شي ما مقبول
ولا مره مشيت ابعكس لو بل ضد
انا انطيتك گلب تعبان حيل اعليه
وانته ابكل صلافه اوي شماته اتهد
بل ابيض مشيت وعشت بس خسران
اهواي اوصاف عدك صلفه ماتنعد
واعذرني بعد عقلي وكره طاريك
من هل ساعه كل واحد بجرحه يشد

حسن العتابي
1,418
هواجس شعر

30 Sep, 11:32

هظيمه والكسر عابرها الحدود
وعلى نعش الوجع بالاخ مشدود

التعب ماله نهايه ولا عناوين
وغير الله صبح كل باب مسدود

الحزن مخنوگ مایطلع بالصياح
مغاره ادموعنه مسويتها الخدود

موكلشي يتعوض انه ضد هاي
اذا انگطعت السبحه الراح شاهود

وليغركم شكلنه انكابر عناد
تره بينا الگلب ياناس ممرود

مو مالت ضعف شماتنه هواي
لازم ننتفض ونفاخر بزود

تعلمنه الحزن مو صدفه نلگاه
وهيبتنه اصبحت بثيابنه السود

الله ويانه يكفي ومالنه بعوز
وعلى الخذلان متعوده الرساله

امس بالخيل داسو صدر الحسين
ونحر مگطوع بيه الدين شاله

صبرآ مثل زينب لازم انصير
وجع محتوم بيه دور الثكاله

وماتقطع نسل طعنات اليهود
وسلاله تكمل الطفكم سلاله

نصر الله فعل مو اسم ينگال
ومن چفه الرعب عاش احتلاله


والجده علي يموت اعله الفراش
لازم ينذبح هوه وجهاله

فخر النه المحمد نحمي السلام
وعلى التطبيع دمنه الگال لا له


ومانخلص نموت اتخضر انصار
وابوصالح غدآ يفرض عداله

وسام السعيدي
1,256
هواجس شعر

22 Sep, 18:49

خلص ذاك العتب لاتحلم ابرده
سيفين ابغمد مانرهم ابگعده
الرحت ولي بقيت لباب يوسع ذاك
تعرف بيمن اقصد نفسه التقصده
لاعبالك ارجع وافك ذاك الباب
بعد تحلم حلم تفك بابي وتسده
وبعد لتصدگ ارجع ذاك اليتانيك
الكل ماينطعن ينجرح ويشده
وصلت حدها كلواحد ابدربه ايروح
السهم نيشانه بس الصيده البگده
وانا عرفتك عطر تنحط ابكل امجان
كل واحد يرشك تطبع ابخده
وانا طبعي صگر. من الزم ماعيش
حته امن ارد اموت الناس تتحسده
خنجر ماصرت وانحط ابكل احزام
ماي اني من اسولف اهدم السده
مثل الگمگم انحط دوم فوگ الراس
ماحب الحبل شي بيه الف شده
وانا عرفتك حبل كل واحد يشد بيك
دوم اتماشي ناس ابكلشي تتعده
هدمته الحايط الدومك اتجي اعليه
بعد ماريد اشوفك تختل ابسده
خلص وكت الصلح ماريدك ابمرسال
بعد منا ورايح كل حجي انسده
الشفته ابعشرتك ماشافه كل مضلوم
ولا شافه اليموت ابغربته الوحده
المايدخل حرب بلسيف ما مجبور
يدخل كل نزال ويبرز ابوحده
وانا سيف وعشت ابگرابك المكسور
لاتعتب بعد سيفي وكسر حده
العاش ابدون موعد مايعرف الغيم
والطبعه الغدر شيفهمه بلورده
وضحت ونتهت واكشفت كل مستور
واعرفت النتيجه ابكل عشگ مده

حسن العتابي
1,663
هواجس شعر

21 Sep, 17:11

رديت بگلب متعوب
ذاك انه الدمعتي الماتچن
.... تسچب

رديت بحسرتي وروح بس
شوغان مافكها
الحزن عاشگها
.... ومچلب

غرگان بندم ومدوهن وخسران ماحصلت
كلشي وحيل
.... متعذب

اخظ بشچوتي وتعبان صار اسنين
فقاعات عله جدري
الشچوه بس
..... اذب

انه وغربتي والوحشه والأهات
نتسامر سويه بليل
...... المغندب

وتلفت عليه بكل كتر مطعون
ونزف مدري شنهي بلونه
..... مستغرب

صافن والجرح يدي عله كل احشاي
مابطل نزيفه الكل عضو
..... مخرب

سهر ليلي اونيني وحسرتي
والأخ
يچون بالدليل ومنهن
..... معطب

ورد محتار وهمومي البراسي
تغيم وترعد
مابيها مزن وتهون بس
..... تتعب

المن اتجه ياصوب
بس ريح النفاق وياالنسيم
..... ايهب

وين اطي الوجه وتلفت الياصوب
رغم ناس شكثر بس انه
...... متغرب

فنيت سنين عمري مقشمر عله الروح
اهديها بحلم چذاب
اكللها يعود الغاب
وكلها الناس بيها اطياب
خطيه وصدكت مسكينه بس
..... اتحب

غريب وچني مو وي ناس
بس ياناس
خيرهم لبس وجهين
.... ويچذب

كلهم جربتهم شلع ماخصيت ولاواحد
عليه مشروه...
يسوه لو ردت
..... تعتب

وين شلون
مدري الياطريق تروح
تتملق الوادم لردي
..... تحدب

وين شلون المن تتجه ياصوب
من تسكت
تشوف الذل
وذا تحچي صرت
..... مذنب

غالب الموسوي
1,527
هواجس شعر

21 Sep, 12:37

بعدني اشتاگ
وشگيلك ورد اندم

بعدني الجيتك محتام
جن جدم الغريب
اليجبل اعلى ولايته ويهتم

بعدني بواهسي وحيلي
رغم تعبي بتفاصيلي
لحلم طرواك اتيمم

اكحل ناظري وگلبي
اذا باوصافك اتحلّم

واناغيك بلحن دافي
بنغم امي ...
الينيم بالشجن ونها

واحن اعليك حن ناگه
انذبح گدامها ابنيها ..
شتظن حنها

وانا الروحي شوصفها
ترفه رويحيتي
ومامش ابد منها

عليش اعنادك يبعدك
يمن مالك وطن غيري

شنهو اسلالي ماتكفيك
لو خلّص عنب خيري؟

اليعيش بلا وطن مكسور
تاكل دمعته بعينه

المايلگه حضن گاعه
تطشره ايامه وسنينه

تغزله الآخ من تبرد
تشمره الناس من يرگد

وتضل تتفرهد سنينه
ضحيت نيّته وگلبه

ونوايا الليل التصلبه

دمع مخذول
مبيوع بسعر غلبه

واثاري اليصدگ بنيته
يطرّز بالحزن شكله

ويرد من التعب ذابل
عطش شتله

ويطشر بياضي وداع
ومكاسر بچي وشهگه

اليعيش ولايه بالغربه

ولا صحت على ابوابه
اثر دگه

اليضم شيبه بوهم يرتاح
مايدري ...
علاجه اتصير المرايه

الما تچه لوجع روحه
يموت وماله تچايه

صراع بروحي عشته اعليك
واكتب من تأذيني

كحّلت القصايد بيك
خاف اطيح من عيني

شفتك نور واليمك ظلام ادهم
وبعيوني انسجت طولك
خواچي شيوخ ومهندم

افسرنك مثل مارادتك روحي
واخطك حرز بابياتي
وتطوف القافيه بوزنك

شلي بشعري اذا يزحف
المهم بافكاري ارسمنك
واكمل الواني من حزنك

المهم انت شعلي بالناس
المهم ارضيك ماادور شعر واحساس

هيه ال الله لعيونه
وكل شي البيّه جمهوره

انا ذوقي بتفاصيله ولا همني الكتب صوره

انت وياي راح اتعيش .. بكتاباتي .. بالهامي

بچيتك مو فقط بالعين عليك مدممه اقلامي
رغم بعدك واحس وياي عشتها بواقع اوهامي

اسافرلك و ارد كل يوم واتمنه
تعيش بواهسك روحي

و ارد وجه الصبح متعوب اضمّد شوغة اجروحي

هذا انه غريب ابگيت والوياي بس نوحي


وسام السعيدي
1,307
هواجس شعر

20 Sep, 14:26

الشمس صبغت عباتي ولونه اتغير
وانا ابروحي ضلام امخيم اويفتر
صريخ اطفال بيه وخيم محترگات
المصايب بس عليه امحزمه وتسعر
الجفن مانام ليله ولاغمض مرتاح
النعاس ابعيني شفته ابلاوعي اتبخر
اخوتي اگبال عيني نترس بيه الگاع
السيوف ابلا رحم ضلت ابگلبي اتكر
الماي شگد صلف عاف الخيم واندار
الدمع من طاح شفته ابحرگه يطشر
روس اهلي صفت فوگ لارض تنداس
وعمت عيني العليل ابكل جدم يعثر
الجثث ضلت عرايه اليل منها ايخاف
الونين البيه ضل ابكل عضم ينخر
السواد ابروحي نام وكل بياض انزاح
العمر خلصته كل ساعه ابگبر اعثر
الحزن ناصب جوادر بيه من كل صوب
البياض ابروحي احسه انمسح وتبعثر
الدموع ابعيني نامت مثل سرب سهام
الشيله امن البجي انصبغت ابلون احمر
الشمر من شاف دمعي الضحك ماكفاه
حط سيفه اعلئ راس الكفل ضل ينحر
رفع راسه ابرمح من شافني ابجي اعليه
الرمح من شاف دمعي انعوج وتكسر
صبح ليلت العاشر هدلي حيلي وراح
باگ الضحكه مني ابلا سبب يذكر
العطش والجوع وسبايه ودمه ودخان
هذن كلهن عشتهن واحس بيه اكثر
الله يعينه گلبي اشگد فگدله اعزاز
روس اهلي اصبحت ع الگاع تتوذر
العذاب الشفته بس الفاگده اتحس بيه
بس البقه ابروحه ايسولف او يعثر
اعله مد البصر ضل يمشي السواد اوياي
البياض البيه ضل ابكل كتر يزغر
مشيت اوي السبايه وگلبي كله اجروح
اذئ حط اني لابره ابجرحي تتعذر
الصار اوياي لو بل جبل جان انهار
الحزن وياي ضل ابكل وكت يفتر

حسن العتابي
1,265
هواجس شعر

18 Sep, 21:17

مشاعرنه صفت عد ناس ماتسوه
الصدگ عدهم ذنب ماينذكر اسمه
المشاعر والصور والسهر تالي اليل
هذن كلهن حريج ابروحك اتشمه
بس دخان يبقئ ابداخلك مهجور
تحس روحك غريب ومحد ايفهمه
السعاده البيك مثل اشمع تبدي ذوب
الحنين ابداخلك من الصعب فهمه
تضل عايش وحيد وناس بيك تموت
الخرايب بيك تبقه ابكل كتر ضلمه
تجي ابالك مواقف نايمه امن سنين
مثل سرب الخناجر تحس متحزمه
الفراغ ابداخلك مثل المغاره ايصير
الحبل نوبات رحمه ايصير عل ذمه
البشر كلش تغير عنده كلشي انباح
الغدر صاير اسلوب الناس تتعلمه
صارت سوله هسه اليوفي مايردوه
واليحجي الصدك مايعتبر زلمه
حسافه انصير محبس بيد ياهو جان
يكشخ بينه حته اليعثر ابهدمه
شكثر بينه سوالف بس بعد شتفيد
هوه المات گلبه اشنفعه من يعمه
مثل قصه ابدفاتر صرنه مكروهين
حته القرو بينه اطلعو هم غشمه
الندامه البينه ضلت كل وكت تذكار
انطينه اگلوب بيضه ارجعت متهشمه
عجيبه البشر ضلت تمشي عكس ريح
الجرف يعرف ابروحه امن البحر ثلمه
الحايط من ايطيح ابساسه تلگه اسباب
الگلب من ينجرح حنيته الي اتلجمه
التجارب والعبر كلهن هذني ادروس
تره اليبقه فطير امن السهل هدمه
هذن كلهن يجن وحده وي لاخره اگدار
المافاهم كلامي اوياه باجر صدمته تفهمه

حسن العتابي
1,378
هواجس شعر

18 Sep, 15:22

وداعتها
فاركتها وجيت اسمعك
شغلت اول غنيه وكفرتني
صوتك يطفي حزن ذيج ألحبيبه
الفاركتني
انه اول من بجه اعله أبستعالو
وباقي حاير
انه اول من يسمعك يسكر بحه ونينك
كله منك
علمتني اعله الجكاير
شماثكل حزن الحبيبه الكاك يمي
اركض اعله البستعالو
ويحترك كلبي مثل حرك الحطب
ياهو الموازيني اسمعك
كوه اجيب الروحي شلعان الكلب
منين اجيب الروحي حيل وحتى اسمعك
واكعد بصف الرسايل وأكدر احجي
من تغني بهيده كلش ياجنوبي
صوتكً يذكرني بيها ودمع ماكو شلون ابجي

تدري ليليه اعله
صوتك ابجي وحدي
وتشتعل روحي وتطفيها الجكاره
وابجي وحدي
وامشي وحدي.
والله ماشارب خمر
بس من اسمعك روحي تنعد عالسكاره
انته وفراك الحبيبه
سبب حزني سبب كلشي
سبب دمعي الطاح سكته
وانت تدري
شما افز الصبح والكه الشيب الأبيض
ياكريم السبب انته
ياهو غيرك يطفي حزني
ورثت اول جكاره وجيت اسمعك
خلص الباكيت باول جلمه منك
يامحمد جتل عدنه
هيه حيره
ذني كلهن كبرني
والمعاتب والموادع والأغاني
وفركه عيون الاحبها
هنه ذني الدمرني
هنه ذني العذبني

سجاد فائق الزبيدي
1,368
هواجس شعر

18 Sep, 15:22

مو مهم شنهي اندفن لو شنهي نوعه
الارض جاهل يتيمه اتنخت بحيدر علي وماتلها جوعة
والشمس نيته بيضه من شگينه من المطر
جتنه متحزمه بضهر
والعقل خيّر لئن
العقل ياخذ قرار الينطبق حسب الفهم
والگلب خيّر لجن   
خيّر ومايفتهم
الفرح لين امه عاجر ضل طفل بس بلحلم
هيه حيره شما يصيبك تلتفت تلكالك اتعس
ونته زين وغيرك اتعس غيره زين
هيجي خلصنه العمر
واحد اعله الثاني صافن 
احنه كلنه حسين لو كلنه الشمر
احنه جمرة بي نسيم انكب غضب
والغضب عن البعض رب الحقيقه
ولفلفوها ولزكوها بحجت الشيطان شاطر
الشياطين التموت ب ايه وحده منين جتهم هلشطاره
هاذه مو معنى العباره
والدليل
انه احب شيطاني شاعر
اليحسبك انته والكاطع زميل
هوه هذا الينحسب شيطان شاطر
وانه شاعر موش كافر
ابرغم مره اذنبت كلت الحقيقه
الحقيقه التكسر بخاطر طفل
والحقيقه التكسر بخاطر يتيم
الحقيقه التكسر خاطر ذنب
اوله من عدها الجذب
احنه شفنه واح نشفنه
احنه لو عميان احسن مانشفنه
احنه مرضع ماتت امه
چن شهيد احياله امه وماتت امه
والله لجل حسين قربها المسافة
الشهيد اطهر خسارة الماتدنس الحسافة
اليحب
يذبح بعقله المبادة جوة رجلين السبب
واليحن
يحرك بروحه الكرامه تضوي دربه من الحزن
وندمت
مره ندمان بسلفنه يكلي عن واحد ندم
هم نصحني وماخذت
ولعجب
هم اكلك ونته تندم
من عقل ندمان الى ندمان اكلك لاتحب
عض ندامه تخلص اسنين الدهر
والندم وجهة نضر
الكفيف مخلي عينه اعله اليشوف
واليشوف مكرم وشوفه العبر
هيه ضلمه واحنه محسودين چي شفنه الكمر
وحنه شفنه وأح نشفنه
احنه لو عميان احسن مانشفنه


مهيمن ثامر
1,399
هواجس شعر

17 Sep, 19:01

جبار رشيد


أيام البعد جبناهه صفنــــات

بيــــن آمالنه

وحيرة امرنه

تجي لوما تجي گضينه الأيام

وصرنه وياهو يدري

شلون صرنه؟!!

صبرنه متاع صار وبعدك بعيد

وتجوع ايامنه

وتاكل صبرنه ..

شبعد يالماتمرّ مو كافي الغياب

وصار اهواي ننتظرك تمرنه …

ونذرنالك تجي وندعيلك اتعود

وعمت سچينّه

وشيّب نذرنــــه

وعلى غيرك چذب ماترهم الروح

ومن غيرك يسد حاجة نظرنــه

يابن الناس غيرك…

ماكو موضوع…

وهلبت بالچذب شخصك ذكرنه

نسولف بيك…

لآخر لحظه بالليل

وترد من الصبح تشغل فكرنـــه

ماعنّت عليك

بساعة غروب…

روحك واشتهت تسمع خبرنـــه

ياروح الگلب

ياعزة الروح…

يادمعاتنه وهمنه وسهـــــــرنـــه

ياأول عهد…

ياتالي الايــــــام

يلعب اصبانه ياشيبة كبرنـــــــه

اشگد گبلك مشوا

ما سلّوا الروح

ولابغيابهم كســــــروا ظهرنـــه

البعد نيران كبره…

ايبخر الدموع

وبس ايزود يتبخر بصرنـــــه

منين انجيب مثلك

حتى ننساك!!

ومنو المثلك يعوضك لوخسرنه

الشبه كل اربعين ..

احچايه تنگال

واذا واحد يصح جان انتظرنه

تعال الجرح..

جن ومارضه يهيد!!

وحچينه وياه ماينفع عذرنـــــه

يشگ روحه اعله

طوله وينكت جروح …

وگضينه اخيوطنه وملّت أبرنه

شوكت يندگ علينه

ويضحك الباب…

ويترس بيتنه وصوتك يسرنه

وترد انته ويجن

الراحن وياك…

وتجيبه وياك يا لماخذعمرنه
1,271
هواجس شعر

16 Sep, 15:02

امس صافن واجني الجنت عازلهن
صعدن فوگ گلبي الما محسبلهن
فزن واني نايم حيل متقصدات
مثل سرب الخناجر بيه اجن كلهن
ولا وحده خطت رمايهن جتال
خبيث ومن رماهن يعرف ابسمهن
اجن يتسابقن اعلا هدم الحال
مالحگت اصدهن لو ازلف عنهن
كلش حاقدات اتكول مثل ابليس
بقن يتقاسمن حزني اعلئ راحتهن
نهشن بيه نهش الجثث من اتموت
اضن حته الجثث ماشافت بگدهن
خبيثات ويعرفن وجع گلبي منين
تخيل مزقن جسمي ابمخالبهن
مثل عطب العجايز اجن متوجرات
نامن علئ اصفاحي وماكدرت الهن
بس دخان اشوف وبيه شب بركان
وحس بعيوني كلش مختنگ خدهن
اباوع بلملامح گمت اشوف اعضام
اباوع علئ اجفوني الشيب ماكلهن
گمت اتشاهد وبيه البياض ايموت
وادعي الربي اگله اتكفني من شرهن
مثل المرض يمشن بيه جن طاعون
دخيلك ياعلي شلون اگدر احملهن
يتيم وخلصتها اندعي ابكل شباج
يوميه ابعلگ كلساع اشد شدهن
خير خلصته و طگني عرج خبال
اروكض بلحلم كل ضني اعبرهن
فزيت ابمنامي. اشگد شفت دخان
الرماد البيه صاير كله من همهن
تعوذت ودعيت وكلت بلكي اتهون
ماهانت عليه ولاگدرت الهن

حسن العتابي
1,225
هواجس شعر

15 Sep, 21:52

عندما تكون نقي بين اصدقائك ولكنهم عكس ذالك فتجبر على ..... (هذه القصيده)

(عقيل العرد )

مدري شمالهم
كلمن يحب نفسه

وكلما احجي..
روحي تصيح, مو هسه

وصل حد التعب.....تندسني,
دمعي يطيح
عكب ما جان گلبي ولاية الونسه

سلبوا راحتي ,
ونشدوني ,,ها مرتاح !

شگد ميت ضميره اليجرح وينسى

هسه ارتاح بالي... وصار المتاني
الحمد لله حقدهم فضحته الفطره

استغلو سكتتي وشامرو مايدرون
اربي جناح جنت لموعد الهجره

ماترهم غصن شايل كناري وبوم
درت وجهي ومشيت لخاطر الشجره

رحت عنهم وطن شح صيتهم بجفاي
بدوني الجنت بوجوهم كطره

الماثمن لهفتي وشبكتي وملكاي
لايعتب علي لو نزلت سعره

يم كلوبهم ريش الغراب يغار
ويم نيتي الوياهم غارت الغتره

وموعطشان صدفه ابيرهم مريت
ولكيت اثنعش يوسف واثنعش عشره

مزاود عالدلو والحبل بيد الذيب
اليطلع مايخلص واليظل فكره

دورت بصورهم مالكيت وجوه
اذكرهم ردت بس رفضت الذكره

مثلهم راح انافق واظحكلهم زور
بفضلهم صار عندي ويالدغش خبره

بعد مااستحي ولاظم حجي ولاخاف
الما متوضي غيره بوجهي لايقره

اليعرف قدر روحه كبالي كون يموت
الافضل يطم روحه التستحي تذكره

بخت من عيني مو من وجهي ماي انطيت
جن ادري بكصصهم من نسل صحره

حصة عينهم من وجهي ثكل النوب
وعليهم غير رفع هلال ماخسره

وابد لاينسى البخاصرتي علك فاس

بخيته وماطول شارة السدره
1,239
هواجس شعر

14 Sep, 14:24

اعيونك
جنهن اولايه ومعانيك شمس وتشع
وخدودك ترافه تين من تلمس تتوجع
جامه وكل شمس تلبسه حته اتشوف
من. گد. ماتلالي اتحسه خدها ايشع
حرز بلجيب تنحط رزق وسط البيت
هيعونه اليشيله ابجيبه من يطلع
المحنه البيها اكثر من حنين النوگ
ماصدگ بشر محتار بيش اقنع
دايخ بيها كلش ماكو شي علبال
اشبها ابنجم اضلمها خاف اطلع
مثل دعوت عجايز بيه خير اهواي
سبحانه الخلقها وصور المطلع
عليه ارموش مثل السيف جتالات
اذئ رمشت تخلي الورد يتگطع
عجيبه اوصاف بيها اهواي تفصيلات
شفافه ونقيه وعدها الف مرصع
مثل الهيله مخلوقه بعطر فواح
الگهوه ابلا اسمها تحسها مج تطلع
السهم يعشگها گد مابقه يدور صيت
موبس صيده اثاري العطر هم ينفع
الترافه البيها خبلت عقل كل نداف
الگطن من شاف اديه اتسودن ودمع
الهوه دغدغ شعرها وذب حضن حسرات
من گد ما خفيف المشط ضل يطمع
الحواجب عدها مثل اهلال مرسومات
الخزره العدها ضلت. بل جبل تصدع
كلش نازگه وبلحجي اتسكت اشيوخ
من تحجي ابرزانه اشيوخ بس تسمع
نصنعت من ضوه والنجم منها يغار
لان كسرت علي وضواها بيه يسطع
انيقه واضحه وبيها السواد ايموت
بصفات الماي ضل بيها العطر يطبع

حسن العتابي
1,384

1,798

subscribers

1

photos

1

videos
Best Similar Channel
🌼ابوذيات+دارميات💜 Telegram Channel
🌼ابوذيات+دارميات💜
56,160 subscribers
@aabothyat
علي الوردي Telegram Channel
علي الوردي
32,904 subscribers
@ali_allwardi0
شعر شعبي Telegram Channel
شعر شعبي
23,639 subscribers
@v_ho_0
قصيدة وشاعر 💙 📜 " Telegram Channel
قصيدة وشاعر 💙 📜 "
22,120 subscribers
@sha3er_100
دارميات وابوذيات مملوحة ✍️💘 Telegram Channel
دارميات وابوذيات مملوحة ✍️💘
17,650 subscribers
@soonarh
اوتار الصمت💙 Telegram Channel
اوتار الصمت💙
13,812 subscribers
@ma27_11
هوسات و رباطات Telegram Channel
هوسات و رباطات
12,291 subscribers
@i1997h1997
شعر اشعار حب غزل عتب عراقيه ️ Telegram Channel
شعر اشعار حب غزل عتب عراقيه ️
11,185 subscribers
@u2x2x
فقرات يلا لودو/ أيسر Telegram Channel
فقرات يلا لودو/ أيسر
11,141 subscribers
@jxwi1
ابـوذيات ( اهل الشعر ) Telegram Channel
ابـوذيات ( اهل الشعر )
11,123 subscribers
@fas96al
Random Similar Channel
سفيان الغزالي [معلومات جامعية] Telegram Channel
سفيان الغزالي [معلومات جامعية]
1,274 subscribers
@t9l_afrun
ضَياع Telegram Channel
ضَياع
2,635 subscribers
@contradictions1
مصادر رياضيات / نوار الاسدي Telegram Channel
مصادر رياضيات / نوار الاسدي
3,810 subscribers
@nawarmath
الشــاعر فـيصل عاشــور 🕊 Telegram Channel
الشــاعر فـيصل عاشــور 🕊
3,898 subscribers
@fai_96
مصطفى الخلف Telegram Channel
مصطفى الخلف
3,396 subscribers
@mustafa_alkhalaf
قِنِأّةّ شٍعٌر أّلَشٍعٌبِيِّ أّبِوِذّيِّأّتّ Telegram Channel
قِنِأّةّ شٍعٌر أّلَشٍعٌبِيِّ أّبِوِذّيِّأّتّ
3,967 subscribers
@xcnnnnm
ستوريات 🖤 أشعار🖤 تمبلر🖤 خواطر 🖤 برامج 🖤 كروبات💙 محادثات 🧡 حزينه 💖 Telegram Channel
ستوريات 🖤 أشعار🖤 تمبلر🖤 خواطر 🖤 برامج 🖤 كروبات💙 محادثات 🧡 حزينه 💖
1,541 subscribers
@mhhmustm
حـب وعـشـق 🫂❤ Telegram Channel
حـب وعـشـق 🫂❤
4,418 subscribers
@vmkzu2000
Omar Al - Byat Telegram Channel
Omar Al - Byat
1,308 subscribers
@omar_albyat
الاستاذ فنر الدباغ لللغة الانكليزية (تجارة) Telegram Channel
الاستاذ فنر الدباغ لللغة الانكليزية (تجارة)
4,436 subscribers
@fanar4english

2025 All Right Reserved

Disclaimer: The content displayed on this website is solely provided by the respective Telegram channels. We hold no ownership or responsibility for the content shared by these channels.