Қандай кунларга қолдик-а?
деган сўзлар тез-тез қулоққа чалинади.
Фитна тўфони ўраб олди: бузғунчилик, нафрат, фахш, хиёнат, қотиллик… Мусулмон мусулмон билан ихтилоф қилади, юзлар бир-биридан бурилади, сўнг қалбларга адоват киради. Сўнг ҳар икки тараф бир-бирини йўқотиш пайига тушади.
Дунё пойгасидаги хасад-мақтаниш, обрў, мансаб, мол-дунё учун инсонлар бир-бирига қўрқмасдан тухмат қилади.
Шайтон Одам боласининг ортидан қадамма-қадам юриб, қулоғи тагида васваса қилади, қалб тинчлигини йўқотади. Ҳатто хасад ортидан бир кун қўлларга қурол олиниб, ўз биродарига, мўъмин мўъминни қатл қилиш учун қурол кўтаради.
Бундан-да оғир мусибат йўқ!
Атрофга боқинг: диндор диндорга душман, илми борнинг душмани илм аҳлидан, бойнинг душмани бой, гадонинг душмани гадо.
Фарзандлар мактаб ёшидан душман орттиради,
ака-ука бир-бирини кўролмайди,
опа-сингил ғийбат қилади,
қўшни қўшнидан аразлайди,
қайнона келинни тили билан қақшатади,
келин овсинига тузоқ қўяди,
она болани болага ёмонлайди,
эркаклар мардликни, аёллар ҳаёни унутади.
Дунё учун кураш майдонида
фақат бир тоифа – Охират пойгасида бўлганларгина омонда қоладилар, қолганларнинг бари ҳалок бўлади.
Фитна тўлқинида оқиб кетманг!!!
Ёмонлик тўфони гирдобида ҳалок бўлмай, десангиз,
Рaсулуллоҳ алайҳи вассаламнинг қўлларидан тутинг!
У Зотнинг саҳиҳ ҳадисларида:
“Ким “харж” (фитна, ихтилоф кўпайган, ёмонлик тарқаган) замонида ибодатини кўпайтирса, унинг ажри гўёки, Маккадан мени олдимга Мадинага ҳижрат қилганнинг ажрига тенг бўлади,” деганлар.
Бугун биз ҳадисда айтилган ана ўша “харж” замонидамиз!
Ҳалок бўлишдан қўрқинг!
Ўзгани қўйиб, ўзингизни ислоҳингиз билан овора бўлинг!
Фитна ишларга аралашиб қолманг, ҳамманинг орасида гап-сўз бўлаётган ишлардан қулоғингизни беркитиб, ибодат билан ўзингизни машғул қилинг!
Ибодатни кўпайтириб, ўзини ва аҳлининг ислоҳи билан овора бўлгангина саломат қолади. Акс ҳолда фитна бўрони сизни учириб, нажот йўқ сахрога олиб бориб улоқтиради. Ҳалок бўласиз.
Сизни Пайғамбар адашишдан тўсдилар.
Тўхта!
Тилингни тий,
уйинг сени сиғдирсин,
бефойда юришлардан сақлан,
уйингда ўтирсанг, нажот топасан,
хатоларингга йиғлаб ўт,
ибодатингни кўпайтир,
кўзинг ибодат қилсин,
қулоғинг хайри бор сўзни тингласин,
тилинг яхшилик бўлса, сўзласин, бўлмаса сукут қилиб Жаҳаннамдан сақланиб қол, дедилар.
Бугун динингизда сабр қилиб, ибодатнинг ҳар турига амал қилишни кўпайтирсангиз, сиз Росул алайҳиссаломга ҳижрат қилиб бориб, у Зотнинг ёнида динга ёрдам берганнинг ажрида яшайсиз.
Намозингизни вақтида муҳофаза этинг, у сизни Охиратда муҳофаза қилади.
Қуръон билан бирга яшанг, у сизга Қиёмат жазирамасида паноҳ бўлади.
Аллоҳнинг зикрини кўпайтиринг, Аллоҳ сизни кўп зикр қилади.
Илм олинг, у сизни зулмат ҳаётдан нурга олиб чиқади.
Бугун пули йўқ оч қолса,
Охиратда зикри йўқ оч қолади.
Бугун уйи йўқ — кўчада қолса,
Охиратда истиғфори йўқ — хор бўлади.
Ҳеч ким айтмаса ҳам, бу нарсаларни яхши биларсиз.
Лекин сизни Ҳавз олдида кутаётган Росулингиз сизга қайта-қайта эслатиб, Жаннатга чақиряптилар.
Ҳар тунда минглаб раҳмат нозил қилинганидай, ҳар тунда минглаб фитна ҳам нозил бўлади.
Ибодатни кўпайтиринг – Росулингиз кўрсатган Жаннат йўлида адашманг.
Саловотлар билан ибодатларингизни кўпайтиринг.
Росул алайҳиссалом буюрган:
Ошкор ва яширин фитналардан паноҳ сўрашни унутманг.
⭕️ Аллоҳумма инна наъузу бика минал фитан,
ма зохаро минҳа ва ма батон.
Аллоҳим, Сендан ошкор ва махфий ҳолда келувчи адаштириб юборадиган фитналардан паноҳ сўраймиз.
Аллоҳим, Сенга билган ҳолда ширк келтириб қўйишдан паноҳ сўраймиз ва билмай қилган хатоларимизга истиғфор айтамиз. Бизларни кечир, адаштириб қўйма.
✈️ Telegram 📷 Instagram
