Alex Abreham አሌክስ አብረሃም

አንዳንድ ጦሰኛ ሰው አለ!

ከአራት ዓመት በፊት ጓደኛየ ፀጉሬ እየሳሳ ነው ያልሞከርኩት ትሪትመንት የለም ምናምን ብሎ ሲጨናነቅ፣ ሲባል ሰምቸ ይሁን አልያም አንብቤ እኔጃ፣ ብቻ ተላጨውና አዲስ ፀጉር ያበቅልለሃል አልኩት። ተላጨ! ይሄው አራት አመቱ ሰይፉ ፋንታሁንን መስሎ ቀረ። በቃ እንደተመለጠ ቀረ። ምን እንደተፈጠረ እስከዛሬ አልገባኝም፣ አንድ ፀጉር አልበቀለም። መንገድ ላይ ሲያየኝ ሁሉ እንዴት እንደሚገለማምጠኝ። ባለፈው የጋራ ጓደኞቻችን ሁለታችንንም ገስፀው"አንተም ምክር አታብዛ፣ አንተም እግዜር የመለጠህን እርሱ ምን ያድርግ" ብለው አስታረቁን። እንደአዲስ ጓደኝነታችን ታደሰ። ኮፍያ ሁሉ ስጦታ ሰጠሁት። የዛሬ ወር የተዳነቀ አዲስ ስልክ ገዝቶ መጣና "በተደጋጋሚ ስልኬ አብዴት እያደረገ አስቸገረኝ አለኝ ። "አጥፋና አብራው " አልኩት ቀለል አድርጌ ፤ አጠፋው ....ጠፋ ጠፋ ጠፋ !ቢለው ቢሰራው በቃ ጠፋ! እንደገና ዘግቶኛል😀

ውይ ወንዶች!

ባል ነገረኛ ሚስቱ በነገር ስትለበልበው እስኪ በረድ ቀዝቀዝ ብትል ይልና ለጉብኝት ወደኢየሩሳሌም ይወስዳታል ይላል የሰማሁት ቀልድ! ያው ምላሷን ቻል አድርጎ ብዙ ነገር ጎበኙ። በመጨረሻ ኢየሱስ በሶስተኛው ቀን ከሞት የተነሳበትን መቃብር ጎብኝተው ከተመለሱ በኋላ ምሳ ሲበሉ ሚስት ትን ይላታል። (ስንጠረጥር እየበላችም ንዝንዝ ላይ ነበረች 😀) ብቻ ትንታው አጓጉል ስለነበር ትሞታለች። በኋላ የአካባቢው ሰወች ባልን በገጠመው ድንገተኛ ሀዘን ሊያፅናኑት ሞከሩ "በደረሰብህ ነገር እናዝናለን ግን እዚህ የተቀደሰ ስፍራ መሞቷ እድለኛ መሆኗን ያሳያል...በአጋጣሚ ደግሞ በዚህ ወር ለሚቀበሩ ብቻ ነፃ ስለሆነ ለቀብር ምንም አትከፍልም። ወደአገርህ ለመውሰድ ከፈለክ ግን በትንሹ ለማጓጓዣ አስር ሽ ዶላር ያስወጣሀል ይሉታል! ባል"ግዴለም የፈጀውን ይፍጅ ወደአገሬ ጫኑልኝ" ... አለና በሆዱ " እዚህ ልማደኛ ቦታ በሶስተኛው ቀን ብትነሳ የማን ያለህ ይባላል?" 😀 ጮክ ብሎ ደግሞ "እኔን ያስቀድመኝ የኔ ፍቅር... ህህህህህህ"

ቆይቷል! ሰፈር ውስጥ ሁለት ሰወች በቀናት ልዮነት ሞቱ። እና ሰፈርተኛው ተከፋፍሎ ሁለቱም ቤት ያስተዛዝናል። አንድ ምሽት አቤና ተስፉ የሚባሉ ታዋቂ ሰካራሞች እኛ ወዳለንበት ወደአንዱ ለቅሶ ቤት መጡና ተቀመጡ። በቀጥታ ከመጠጥ ቤት ስለመጡ እንዳለ ቤቱ በመጠጥ ሽታ ተሞላ። እዚህኛው ቤት ሀዘኑ አዲስ ስለነበር እንደዛንኛው ሀዘን ቤት ካርታ፣ ጨዋታ ፣ ወሬ ምናምን አልነበረም። ፀጥ ብሏል። ተስፉ ጓደኛውን በክንዱ ነካ አድርጎት በሰከረ ድምፅ "ቤት እንቀይር" ሲለው ፀጥ ያለው ሀዘንተኛ ሳቁ ፈነዳ!😀 ምን ልላችሁ ነው? ፌስቡክ ግን በጣም ተፋዟል። አሪፍ ፀሀፊወቻችን ክፉኛ ተመናምነዋል። እነዚያ ሰፈሩን የቱሪስት መስእብ ያደርጉት የነበሩ እህቶች ሁሉ ዛሬ የሚበዙት የሉም። በእውነት ሲጀመርም ሞቅታ አልጠራንም፣ "ስንኖር ፌስቡካዊ ስንሞት ፌስቡክ ሜሞሪ እንሆናለን" ብለን ምለናል እንጅ ነገሩ "ቤት እንቀይር" የሚያስብል ነው።

እንዴት እንዴት ነው ይሄ የመሬት መንቀጥቀጥ? በወጉ እናውራው እንጅ ጓዶች! ኧረ የማይለመድ ነገር እየለመድን ነው... በጣም እያሳሳቀን ነው።

ይሄ ሶሻል ሚዲያማ አበላሽቶኛል😀 16 ወይም 17 ዓመት የሚሆናት ልጇ ጋር የምትኖር ሚስኪን ፈረንጅ ጎረቤት አለችኝ። ብቻዋን ነው ልጇን የምታሳድጋት። ትሁት ሰላምተኛየ ደግሞ። ሁሉ ነገሯ ፣ ህይወቷ ልጇ ናት ። የትም እናት ያው እናት ናት መቸስ! ልጅቱ ግን ዕድሜዋ አጉል አይደል ትንሽ ጀብረር ያደርጋታል። እና ዛሬ ወደቤቴ እየሄድኩ የትራፊክ መብራት ላይ ቆሜ ዞር ስል ከጎኔ ሙዚቃው እንደወፍጮ ቤት የሚጮህ መኪና ቆሟል። መኪናው ውስጥ ይችው ልጅና አንድ በንቅሳት ያበደ ጎረምሳ ምናምናቸውን ሲያጨሱ ዓይኔ ላይ ጣላቸው። ....ጭራሽ ተንጠራርታ ያንን ታቱዋም አትስመውም? አበሻነቴ ተነሳብኛ! ይሄው እስካሁን ድረስ እቤት ገብቸ ሁሉ ለብቻየ በተለያየ ድምፅ "ቤቲ ለናትሽ ....ለናትሽ ቤቲ ለናትሽ ...ታይተሻል " እያልኩ ነው😀😀

አስተዋውቀን አትበሉኝ ኑና ራሳችሁ ታወቁ!!
(አሌክስ አብርሃም) !

ለምንድነው ግን ሰብስክራይብ አስደርግልን "አስተዋውቀን" የሚል መልእክት መላክ የማይደክማችሁ? የት አውቂያችሁ ነው የማስተዋውቃችሁ? ስልችት ያለኝ ነገር! "የምንትስ ችሎታ አለኝ ግን እድሉን የሚሰጠኝ አጣሁ ፣ በቲፎዞ ነው፣ በዘመድ ነው ብዙ ሰው ላይክ አያደርገኝም ምናምን " እና ምን ይሁን? ማንም ስለእናተ ሰማይ ሰቅሏችሁ ስላወራ የሚቀየር ነገር የለም! አንድ ሰው ብቻ ነው ታሪካችሁን የሚቀይረው....ያ ሰው ደግሞ እናንተ ራሳችሁ ናችሁ!! በአንዲት አጋጣሚ ታይተው ሰማይ ጥግ የደረሱ ታዋቂወችን ተመልከቱ! እንዴትና ምን ይዠ በምን መንገድ ልታይ ነው ጥያቄው!

በአንድ ነገር ግን ልረዳችሁ ዝግጁ ነኝ! አሪፍ ነገር ሰርታችሁ ለህዝብ የምታቀርቡበት መንገድ የብዙወቻችሁ ችግር ነው። ራሳችሁን በራሳችሁ ለብዙ መቶ ሺወች ገፋ ሲልም ለሚሊየኖች እንድታስተዋውቁ እድሉን ላመቻችላችሁ እችላለሁ! ምንድነው ችሎታችሁ? ተሰጧችሁ? ጥሪያችሁ? ግጥም ማንበብ?፣ ፅሁፍ በአሪፍ ድምፅ መተረክ? መተወን፣ ወግ ? ኮሜዲ? ድምፅ ማስመሰል? መደነስ? መዝፈን? ፎቶ ማንሳት? ዶሮ ማርባት? ልብስ ዲዛየን ማድረግ፣ ሜካፕ መስራት? በየእምነታችሁ መስበክ? መነጫነጭ? ማልቀስ? መነገድ? መሳቅ? ልምዳችሁን ማካፈል? መምከር? መውደቅ ? መነሳት? ምን? ምንም ችሎታ የለኝም እንዲሁ አገር ይየኝ ቆንጆ ነኝ እወቁኝ በቃ ማለት ከፈለጋችሁም የራሳችሁ ፍላጎት ነው? ከመታየት ምን እንደሚፈጠር ምን አውቃለሁ?

ብቻ ስለእናተ ምንም አስተያየት አልሰጥም፣ ራሳችሁ ችሎታችሁን የሚያሳይ ፣ ወይም ለሌሎች ማስተላለፍ መንገር የምትፈልጉትን ነገር ካለ አጭር ቪዲዮ ቀርፃችሁ በኢንቦክስ ላኩልኝ ... እዚህ በሶሻል ሚዲያው በርካታ ሰወች ከሚጎበኟቸው አካውንቶች አንዱ የሆነው የፌስቡክ አካውንቴ ላይ ተከታይ የለውም ከምትሉት የፌስቡክ ወይም ከቲክቶክ አድራሻችሁ ጋር ፖስት አደርግላችኋለሁ፣ ከዚያ ስራችሁ ያውጣችሁ! አሁን እኔ ጋር እኩል ተመልካች፣ አንባቢ አላችሁ ማለት ነው። ይሄው ነው።

እነዚህ በዮቲዮብ ፖድካስት የሚለቀቁ ቪዲዮወች ርዕስ ነገር ግን ወዴት እየሄደ ነው? እንዴ! መቸለታ አንዲት ቆንጆ ከአንድ ሰይጣን የሷን ተቃራኒ ለመስራት የተጋበት ከሚመስል ፖድካስተር ጋር ኢንተርቪው ያደረገችበትን ቪዲዮ አየሁ። ርዕሱ ዓለም በቃኝ ያሉ ወንዶች እንኳን የሚፈትን ነበር።

" እየታገልኩ ሳስቸግረው ጓደኛውን ጠርቶ ለሁለት እግሮቸን ግራና ቀኝ ከፈቱና....ሲጨርሱ ግን በደስታ አለቀስኩ" ይላል። ይች አገር ወደየት እየሄደች ነው ብየ ተከዝኩ! ግን ጉዱን ልየው ብየ ቪዲዮውን ከፈትኩ ... እያሳለፍኩና እየመለስኩ የእግሩ ጉዳይ ላይ ስደርስ የምታወራው ስላዋለዷት ሁለት ዶክተሮች ሆኖ አገኘሁት። ሜርድ!

በእናቶች ብርጌድ የሚጠበቅ ችግር!
(አሌክስ አብርሃም)

እውነት እላችኋላሁ እናቶች ለዘመናት ያጠራቀሙትን አሮጌ የቤት ዕቃ ከመቀየር መንግስትን መቀየር ይቀላል። ምንግስት ምናለው! የደበራችሁ መንግስት ቢበዛ ኢስራኤል ራሽያ ምናምን ባሰለጠነቻቸው ኮማንዶወች ቢጠበቅ ነው። እናተም ሰልጥናችሁ ገድላችሁም ይሁን ሙታችሁ ታስወግዱታላችሁ። በቃ! እናቶች የሚከዝኑት አሮጌ ዕቃ ግን ...በስመአብ! ብትጠሉትም የሚጠበቀው በጣም በምትወዷት እናት በምትባል፣ ፍቅር ያሰለጠናት ኮማንዶ ነው።ለተነደለ ብረት ድስት ሁሉ እስከደም ጠብታ የምትዋጋችሁ እናት ክፍለጦር😀

በበኩሌ ተስፋ የቆረጥኩት መቸ መሰላችሁ ? ማዘር ከመቆየቱ ብዛት ቅድም አያቴ የሚመስለኝ የተነደለ ማንቆርቆሪያ አላት....አንበሳ አርማ ከመሆኑ በፊት ስለተመረተ አርማው ሁሉ ዳይኖሰር ነው! እና አንድ ቀን "አሁን ይሄ አሮጌ ማንቆርቆሪያ ምን ያደርግልሻል? " አልኳት ...ካለችበት በፓራሹት ወርዳ ማንቆርቆሪያው አጠገብ ቆመችና በአይነ ቁራኛ እያየችኝ " አሁን ይሄ ምኑ ነው አሮጌ? አንተ ስትወለድ ወድቆ ትንሽ ጫር ብሎ እንጅ ገና ጥሬኮነው" 😀እንግዲህ ወገኖቸ እኔ ማለት እንደምታውቁት በሰገሌ ጦርነት ጊዜ ስንት ጀብዱ የሰራሁ ወንድማችሁ ነኝ። አንዳንዴ ታዲያ ከዚህ ቀልድ ባለፈ ስለነገሩ አስባለሁ፣ እናቶች ቤታቸው ሲፈርስ በውስጣቸው የሚፈጠረው ሀዘን...በውስጣቸው የሚፈራርሰው የሆነ የማናውቀው በጓዳቸው ለዓመታት የገነቡት መንግስት....

ኒቆ ያች መፅሐፍ ቅዱሰ ላይ ያለ የምስጋና ጥቅስ ሁሉ ፖስት አድርጋ የጨረሰች የፌስቡክ ወዳጀ፣ ሰሞኑን መነጫነጭ ማማረር ጀምራለች። የዛሬ ሳምንት "ሰውን ማመን ቀብሮ ነው" ብላ ለጠፈች፤ ከዘፍጥረት እስከራዕይ አስሸ ጥቅሱ ከመፅሐፍ ቅዱስ እንዳልተወሰደ ገባኝ። ከትላንት ወዲያ "ለፍቅረኛው በዓመት አንድ ቸኮሌት ገዝቶ የማያውቅ አስሯን ሴት ይመኛል🤣🤣 ብላ ከሳቅ ኢሞጅ ጋር ፖስት አደረገች፤ ስለማን እንዳወራች አላውቅም ግን የስምንት ዓመት የፌስቡክ ጓደኛየ ነበረችና ላይክ አደረኩ።/የጉርብትና ላይክ የምለው አለኝ/ ከሰላሳ ደይቃ በኋላ ያ ሄኖክ የሚባል የፌስቡክ ጓደኛየ የቁጣ ኢሞጅ ለብሶ ኢሞጅ ጎርሶ "አንድ ጥናት ላይ እንዳየሁት ውሻ ቸኮሌት ከበላ ይሞታል" 😡😡ብሎ ለጠፈ ። እኔም ይሄን ነገር ሰምቸ ስለነበር ለመደገፍ ላይክ አደረኩ። አሁን ሁለቱም ብሎክ አድርገውኛል! የሳት ራት የሆንኩ ሰውየ! የዛሬ ዓመት ሁለቱም "የሰው ፅሁፍ ላይክ አታደርግም ታዋቂ ሆነህ ልብህ ውልቅ ብሏል" ብለው ወቅሰውኝ ነበርኮ! በእውነቱ ፍቅረኛ እንደነበሩም ባለፈው ሳምንት እንደተለያዮም ገና መስማቴ ነው። እንዲህኮ ነው በሁሉም ነገር ሳይገባን እየጠነቆልን የእሳት ራት የምንሆነው!

ወይኔ በላቸው!!

ህይወት ክሽን ያለች ድራማኮ ነች። አላመናችሁኝም? ያዙ ይችን ወግ ...

ጓደኛየ በድሉ ፍቅረኛ ነበረችው! በጣም ነበር የሚወዳት። ቶሎ የኮሌጅ ትምህርቱን ጨርሶ ስራ ነገር ይዞ እሷን ማግባት ነበር ዓላማው። ልጅቱ ስታስበው ስታስበው ራቀባት! ገና ስራ ፈልጎ ለዛውም በደመወዝ ኑሮ ምናምን አለችና አማራጭ ነገር አየት አደረገች። የሆነ ክፉኛ የሚፈልጋት ልጅ ጋር ተግባባችና በሱዳን በኩል ተያይዘው ተሰደዱ። ልጁ አሜሪካ ቤተሰቦች አሉኝ ሱዳን ከደረስን በኋላ ያስወጡናል ተጋብተን ምናምን ብሏታል። ምን ዋጋ አለው ለሁለት ዓመት ከተዝናናባት በኋላ አውላላ አሸዋ ላይ ትቷት ሄደ። ወደስድስት ዓመት በረሀ ለበረሀ ስትንከራተት ያች ቆንጅየ ልጅ መልኳ ሁሉ ወደግመልነት ተቀየረ። በመጨረሻ የሆነ እርዳታ ድርጅት የሚቀበልሽ ሰው ካለ የአሜሪካ ቪዛ እናመቻችልሻለን ይላታል። ወደቤተሰቦቿ ደውላ አሜሪካ የሚቀበለኝ ሰው የነፍስ ፈልጉልኝ ስትል ምን ቢሏት ጥሩ ነው? እንዴ በድሉኮ አሜሪካ ነው በዲቪ ከሄደ አራት ዓመቱ! 🤔

ጆሮ እንኳን የማትሰጡ መናጢወች አትሁኑ!
(አሌክስ አብርሃም)

ማንም ሰው፣ የፈለገ ጠንካራ ቢሆን የሆነ ጊዜ ችግሩን የሚሰማው ሰው ይፈልጋል፤ የገንዘብም ይሁን ሌላ እርዳታ ምናምን ከእናንተ ባይፈልግ እንኳ በቃ የሆነ የሚሰማው ጆሮ የሚሰጠው ሰው። እና አንዳንድ "ብሽቅ" ሰወች አሉ፤ የገጠማችሁን፣ያዘናችሁበትን፣ ወይም የተበሳጫችሁበትን፣ ከአቅማችሁ በላይ ሆኖ ሊያሳብዳችሁ የደረሰን ከባድ ጉዳይ ስታወሯቸው ተሽቀዳድመው "እኔምኮ" ብለው የራሳቸውን እንቶ ፈንቶ ችግር ለአንድ ሰዓት የሚዘበዝቡ! ከችግራችሁ ጎን ችግራቸውን እያስሮጡ ሰዓት አሻሽለው ለመቅደም የሚጣጣሩ። ሰው በችግር ይወዳደራል? ቢያንስ ምንም ማድረግ ማፅናናት ባትችሉ እንኳን አይዞህ/አይዞሽ፣ ፈጣሪ ይርዳህ ፣ ያልፋል፣ ምንድነው ታዲያ እኔ በዓቅሜ ላደርግልህ የምችለው? ምናምን በሉ እስኪ! በየጓዳቸው በችግር እያለቀሱ በደስታ በሀዘን አብረው ሲደሰቱና ሲያፅናኑ የኖሩ አባትና እናቶች ነበሩኮ ያሳደጉን! ወይስ ጎዳና ነው ያደጋችሁት? ቢያንስ ችግሩን ያወራችሁን ሰው ድካም ፣ህመም እንደተረዳችሁት ማሳየት ትልቅ ነገር ነው። በዓለም ላይ ችግር የሌለበት አንድም ሰው የለም። ቢያንስ በየተራ መሰማማት ማንን ገደለ?

ይህን ያውቁ ኑሯል? 😀

በዓለማችን ላይ እስካሁን የታወቁ 339 የውሻ ዝርያወች አሉ። መቸስ ስለውሻ እህ ብላችሁ ከሰማችሁ ዝርዝሩ ለጉድ ነው። እናላችሁ ይሄ ፎቶውን ከታች የምታዮት የውሻ ዘር ባሳንጂ ይባላል። ሲያድን ንስር በሉት፣ ቤት ጠብቅ ካላችሁት ወፍ ዝር አይልም፣ ታማኝነቱ ወደር የለውም፣ በውበትም በጣም ነው የሚያምረው በዛ ላይ ጎበዝ ዋናተኛ ነው። ፀጉሩ ስለማይበን አለርጅ አያስጨንቅም። ይሄን አስገራሚ ውሻ ከሌሎቹ 338 ዝርያወች ልዮ የሚያደርገው ምን መሰላችሁ? አይጮህም! በቃ በውሻ ታሪክ መጮህ የማይችል ብቸኛ ዝርያ ነው!! ኢትዮጵያን ጨምሮ ብዙ የአፍሪካ አገራት ይህን የማይጮህ የውሻ ዝርያ "ባለቤት አልባ" እያሉ በመርዝ ይገድሉታል። አሜሪካ እና አውሮፓ ላይ እነዛ የሚጮሁት ተንደላቀው አይጥ ሲያዮ እየተደበቁ ሶፋ ላይ ይንደላቀቃሉ!! ከንቱ ዓለም!

ሚስት የለህም እንጅ አግብተሀል!!
(አሌክስ አብርሃም)

ይሄ ፅሁፍ ገና ስታየው ረዘመብህ? ሳታገባ በፊት ግን ባንዴ ነበር ፉት የምትላት...አየህ ሚስት ባይኖርህም አግብትሃል!

"አግብትሃል?" ብላችሁ ስትጠይቋቸው "አወ...ማለቴ አላገባሁም" የሚሉ ወንዶች አልበዙባችሁም? የሆነ "ችት" ማድረግ የፈለጉ ምናምን ሊመስላችሁ ይችላል ...እኔም ይመስለኝ ነበር! ግን እውነታቸውን ነው አግብተዋ ...ማለቴ አላገቡም! ነገሩን በትኩረት ስከታተለው ይሄ ነገር በብዛት የሚታየው ሶሻል ሚዲያ ፣በተለይ ቲክቶክ አብዝተው የሚጠቀሙ ወንዶች ላይ መሆኑን ደረስኩበት። ያገባ ሰው ከሚያገኛቸው ልዮ ጥቅሞች እና ከሚጠብቁት ሐላፊነቶች መካከል የተወሰኑትን ንገሩኝ እስኪ? ...እና በዚህ ዘመን ሳትፈልግ ሁሉንም እንደተሸከምክ ላሳይህ? አቆልቁል....

1ኛ. በጭራሽ ለማግባት ሀሳብ የሌለህን ሰውየ እጮኛ እንኳን ሳይኖርህ ፓስተር ቸሬ ይመጣና ለእጮኞች ብቻ የሚሰጥ የቅድመ ትዳር ትምህርት ሳትወድ በግድህ በየቀኑ ያስተምርሃል ፣ ዶ/ር እከሌ ደግሞ ወደፍች ስለሚወስድ ስነልቦናና ማህበራዊ ኑሮ ቤተሰብ ያለውን መስተጋብርና መስተናግርት ሚስትን ስለመታገስ ይተነትንልሃል።

2ኛ. ያገባ ወንድ ሚስቱን በጡት ማስያዣ ወይም ካለማስያዣ፣ በስስ ፒጃማ ወይም ያለፒጃማ 360° የማየት መብት ይኖረዋል ! ቢራራቁም የመተያየት መብት አላቸው! ዌል እንግዲህ ቲክቶክ ባታገቧቸውም በርካታ ሴቶችን ሚስቶቻችሁ እስኪመስሏችሁ በጌም ስም በኮንቴንት ክርኤቲቭ ምናምን ስም ላይቭ እንድታዮዋቸው መኝታ ቤታቸው ድረስ እንድትዘልቁ ያመቻችላችኋል... የምታያት ባለትዳር ሴትም ልትሆን ትችላለች! አንዲት ሴት ከባሏ ጋር በአይንህ በመንፈስህ ተጋርተሃል ...አንድ በስጋ ሳታገባ በመንፈስ የሺ ባል ሁነሀል ። ካገባህ ደግሞ በስጋ አግብተህ በመንፈስ ተፋተሃል!

3ኛ. ትዳር ለወለዳችሁት ልጅ አስፈላጊውን የገንዘብና የሞራል ድጋፍ የማድረግ ሀላፊነት ይሰጣችኋል። ለሚስታችሁ የፍቅር ስጦታ መስጠትንም ይጨምራል ቲክቶክና ሌሎች ሶሻል ሚዲያወች ላይ ያልወለዳችሁት ልጅ ወይም ልጆች ይዘው "መቸም አንተ እያለህ ልጆቸ በእርሃብ አይሞቱም ፣ የትምህርት ቤት ክፍያ አያልፍባቸውም ብየ እንጅ ልመና ምናምን አይመቸኝም የሚሉ እህቶች እንደጉድ የሚንጋጉበት መድረክ ሁኗል። በተለይ የሆነች ትንሽ ስኬት ነገርህን ደስ ብሎህ ለወዳጆችህ ካካፈልክ ፣ በንፋስም ይሁን በጎርፍ አገር ለቀህ ከወጣህ ወዘተ "እና ብቻህን ልትበላው ነው?" በሚመስል ፈጣጣነት ያልተፈራረምከውን ሰማንያ ይዘው ከች ይሉልሃል። አሳዛኙ ነገር ያንኑ ቴክስት ከዓመት ዓመት ለብዙ ሰወች ስለሚልኩ ነገሩ የአንድ ሰሞን ችግር ሳይሆን የተደራጀ የልመና ቢዝነስ መሆኑ ይገበሀል። ልጅን የማሳደግና ገቢህን የማካፈል በጎ ስራ ፍላጎት ሳይሆን ግዴታ ከተደረገብህ ባታገባም አግብተሀል።

4ኛ. ሚስትህ ጋር ብቻ ልታወራቸውና ከእርሷ ብቻ ልትሰማቸው የሚገቡ "የግል ወሬወችን" 24 ሰዓት ሙሉ የሚያወሩልህ ሴቶች ስልክህን በከፈትክ ቁጥር ከመጡብህ በመንፈስ የጋብቻን ሀላፊነት ተሸክምሃል። ማውራት ብቻ አይደለም ላይክ አድርገኝም ትባላለህ። ቃል በነፃም ብትሰማው ተራ ነገር እንዳይመስልህ? ጆሮ አይሞላም እያልክ የሰማኸው ነገር አንተን ያጎድልሃል።

5ኛ. በእናተ እንዳይደርስ ለመምከር ነው የምትል ባሏ ጋር የተፋታች ሴትዮ ለአንድ ሰዓት በትዳሯ ውስጥ ስለነበረ ገመና ከነተረከችህ ፣ ባልየው በተራው መጥቶ "እመነኝ ወንድሜ የዲኤን ኤ ምርመራ ካላሰራህ ልጅ አለኝ እንዳትል" ካለህ....በሌለህ ትዳር ተመክረህ በሌለህ ልጅ ስጋት ውስጥ ከገባህ ብታገባስ ከዚህ በላይ ምን ትሆናለህ?

6ኛ. ከቤትህ ስትወጣ የሪል ስቴት ኤጀንቶች፣ የባንክ ሰራተኞች "ለአዲስ ጎጆ ወጭ ብርና ቤት ወሳኝ ነው" እያሉ ሁለት ሁነው መገናኛ ያለህ እስኪመስልህ ቀንህን ግርግር ሲያደርጉብህ ፣ ድፍን የሴት ዘር ተጠራርቶ ስንት ሽማግሌ መላክ እንዳለብህ፣ እንዴት መንበርከክ እንዳለብህ ፣ምናይነት ቬሎ እንደሚፈልጉ ሳትጠይቃቸው ሲያወሩህ አልጋ ላይ ሁሉ ስለሚሰራው ጉዳይ ጥልቅና ዝርዝር መመሪያ፣ ማስጠንቀቂያና ማረሚያ ሲሰጡህ ....አግብቻለሁ ነው የምትለው አላገባሁም?

7ኛ. ሳትፈልግ የማታውቃት ልጅ ቤተሰብ ጋር ትውውቅ፣ ቅልቅል ታደርጋለህ እናቷ ሁሉ በኦን ላይን ይመርቁሃል፣ አባቷ ስለልጃቸው ጨዋነት ይነግሩሃል ....የኦን ላይን አማቾች!

8ኛ.መጥፎ ትዳር ኑሮህ አልያም ባለጌ ሁነህ ሚስትህን መስደብና መደብደበ የትዳርህ አካል ከሆነ ፣ እርሱም ቲክቶክ ላይ በሽበሽ ነው። በቃል ቢሆንም ስትገባ ስትወጣ ትጠዛጠዛለህ!

9ኛ. ትዳር ሀላፊነቱ እንደበፊትህ እንድትሆን አይፈቅድልህም። ማንበብ ትቀንሳለህ ፣ ማህበራዊ ኑሮህ ውስን ይሆናል በጊዜ ትገባለህ ! ቲክቶክ ከጀመርክ ጀምሮ እንደበፊትህ ታነባለህ?ሰዎች ጋር ትገናኛለህ ታወራለህ? አግብትሀል የምልህ ምልክቱን አይቸ ነው!

10ኛ . ምን ቀረህ ጓድ ? እእእእእእእእ? እሱንም ቢሆን ጋብቻህ የመንፈስ ነውና ህልመ ሌሊቱ ፣ ምኞተ ጡዘቱ ስልክህ ላይ የምታየው እንትን ወዘተው ያው ያንተው ጣጣ ነው! እስኪ ከእናንተ ያላገባ ቀድሞ ይውገረኝ ...ወገኖቸ አግብታችኋል ወይስ አላገባችሁም?

"ሽቶ ነስንሱ ህንፃ ቀልሱ"

በአንዳንድ "መንፈሳዊ" መምህራን ክፉኛ እየተስፋፋ የመጣው "ሽቶ ነስንሱ ህንፃ ቀልሱ" አይነት ስብከትና እንጨት የሆነ ኢ ሰብአዊ አስተሳሰብ መረን እየለቀቀ ነው። ልማትን ማድነቅ ጤናማ ነው፣ ግን ህንፃና መንገድ የወንጌል ነፀብራቅ ከሆነ ይህ ሰው ያለው ወንጌል ንክች ያላደረጋቸው እነቻይና፣ የግንባታ ብር የሚመፀውቱን የአረብ አገራት የገነቡት ውብ ከተማ የምን ውጤት ሊሆን ነው? የዋናው መልእክት መዛነፍ ይቆየንና የሰውየውን ቃል አጠቃቀም ተመልከቱት "እብድ" "እብድ ቆሻሻ ነው የሚፈልገው" ... ወዘተ! ወንጌል ኢየሱስ የአእምሮ ህመምተኞች በየመቃብሩና በየቆሻሻው ሄዶ ሲፈውሳቸው እንጅ መገኛቸውን አውሮፓ አስመስሎ እንዳጠፋቸው አይነግረንም። ይሄ ሰው እነዛ "ቆሻሻ የሚፈልጉ" ሚስኪኖች ከአይኑ ዘወር መደረጋቸው በደስታ አምነሽንሾታል...ጓድ የት ሄዱ የት ወደቁ በል ...ተጠርተህ ከሆነ የተጠራሃው ህንፃ እንድትቆጥር አይደለም፣ እነዛን የወደቁ ሰወች የት ወደቁ እንድትል ነው! ብቻ የእግዚአብሔር ሰወች እግዚአብሔር ይሁናችሁ ፣ይሄ ዘመን ካለልኩ አዲስ ልብስ እንደተገዛለት የድሀ ልጅ ሰፋፍቶባችኋል! መንፈሳዊ ክሳት!

ተረት ተረት ...
(አሌክስ አብርሃም)

ከዕለታት አንድ ቀን ሁለት ዛፍ ቆራጮች መጥረቢያና ገመዳቸውን ይዘው ዛፍ ለመቁረጥ ወደጫካ ይሄዳሉ! ጫካው አጋማሽ ላይ ሲደርሱ አንዳች የሚያክል አንበሳ መንገዱን ዘግቶ ጋደም እንዳለ ተገጣጠሙ። ደንገጥ ብለው ...
"እንደምን አደርክ የጫካው ንጉስ" አሉ በአክብሮት
"የጫካ ንጉስ? ከተማውንስ ማን ከልክሎኝ ..."አለ ቆጣ ብሎ አንበሳው። ምግብ ከቀመሰ ሶስት ቀኑ ስለነበር ... ሰወቹ ሰው ሳይሆኑ የሚራመዱና የሚናገሩ ቁርሶች መስለው ነበር የሚታዮት ...
"አይይይይ...ማለት የፈለግነው ....እ...." ሲሉ አቋረጣቸው

"አሁን እሱን ተውት ዛፍ ቆራጭ ናችሁ አይደለም?
"አወ ጌታየ "
"እናንተ ናችኋ ጫካውን ጨፍጭፋችሁ መኖሪያ ያሳጣችሁን"
"ኧረ ጌታየ ጋሬጣ እንዳይሆንብወት የደረቀውን እንጨት ነው የምንቆርጠው ...ደግሞኮ ጫካው ለእርሶ ይቅርና ለልጅ ልጆችወ ይበቃል....ዋናው ተቻችሎና ተሳስቦ መኗኗሩ ነው"

"ጥሩ እንግዲህ ጫካው ለመኖር ይበቃል ካላችሁ ጥያቄ እጠይቃችኋለሁ ...ለመሆኑ ለአንድ አንበሳ መኖሪያ የሚሆን ጫካ በውስጡ ስንት ዛፎች ሊኖሩት ይገባል? ነግሪያለሁ "ብዙ" እንዳትሉኝ ቁጥር ንገሩኝ?"

ሰወቹ ተጨነቁ ሺ ብንል ናቃችሁኝ ይላል ሺ ዛፍ ለአንበሳ የከተማ ሰወች ስቱዲዮ እንደሚሉትኮነው ...ሚሊዮን ብንል አጓጉል ግነት ነው ....በቃ አስር ሺ እንበል " ተባባሉና "ለእንደርሰወ ያለ ጌታ ለጊዜው አስር ሺ ዛፍ ይበቃል ጌታየ "አሉ።

አንበሳ ቀና አለና ወደኋላቸው እያየ "ማነህ በል የጫካውን ዛፍ ቁጠርና አሳውቀን " ብሎ አዘዘ። ዞር ቢሉ አንድ የተራበ ጅብ ከኋላቸው መንገድ ዘግቶ መቆሙን ተመለከቱ። ጅቡ ጫካውን ለግማሽ ደይቃ ቃኘት አደረገና ቶሎ ተመልሶ
"ዛፎቹ 9999 ናቸው አያ አንበሳ " አለና በሰፊው አዛጋ ።
አንበሳ ወደሰወቹ እያየ "አያችሁ በገለልተኛ ወገን በተደረገው ሳይንሳዊ ቆጠራ አንድ ዛፍ ጎድሏል... እንግዲህ እንኗኗር ካላችሁ አንድ ችግኝ በጋራ እንትከል ፣ግን እስከሚበቅል እዚሁ እኔ ጋር ትቆያላችሁ"
በቀጣዮ ቀን በደም የተጨማለቀ መጥረቢያና ገመድ በመንገደኞች ወድቆ ተገኘ።

ወገኖቸ ቅዳሜም ትሰራላችሁ እንዴ?
(አሌክስ አብርሃም)

ይሁን ግዴለም! ብቻ ይችን ነገር ስሙ! አሜሪካዊው ሰውየና ሚስቱ እሳት ለብሰው እሳት ጎርሰው ፍርድ ቤት ሄዱና ከአፍሪካ መጥቶ ከጎናቸው የሚኖር ጎረቤታቸውን ከሰሱ! በቃ ችሎት ገተሩት! ምን አገናኛቸው? በዶሮ ነው? በልጅ ነው? በሚስት ወይንስ በድንበር? በሁሉም አይደለም ! ነገሩ በጣም ወዲህ ነው። እንደውም እኛን ጭቁኖችን ሳይመለከተን አይቀርም!

ከሳሽ ባል የ65 ዓመት ሰው ሲሆን ሚስቱም እዛው ዕድሜ ክልል አካባቢ ናት። በቂ ገንዘብ ስላልቆጠቡ ጡረታቸውን አራዝመው ትንሽ ለመስራት ያሰቡ፣ ግረው ጥረው የሚያድሩ ፈረንጆች ናቸው። እድሜ ልካቸውን ሰርተው ይሄን የሚኖሩበትን ቆንጆ ቤት ገዝተዋል፤ እዳውን በሰላሳ ዓመት ገና ሰሞኑን ከፍለው መጨረሳቸው ነው። ሁለት ልጆቻቸውን እንዲሁ በስንት ዓመት ብድር አስተምረው ራሳቸውን ችለው ሄደውላቸዋል። አርባ አመት ሙሉ ረዢም ረፍት ምን እንደሆነ አያውቁም፤ ወፍ ሲንጫጫ ወጥተው ጅብ ሲንጫጫ የሚመለሱ ላብ አደር ታታሪወች። ስራ ስራ ስራ ነው! አሁን ደግሞ መጦሪያ ለማጠራቀም ይሰራሉ። በአሜሪካ የተለመደ ስለሆነ ምንም ቅር ብሏቸው አያውቁም።

እንግዲህ ከአንድ አመት በፊት አንድ ናይጀሪያዊ ሰባት ልጆቹና ሚስቱ ጋር ሆኖ ከጎናቸው ያለውን ባለመዋኛ ገንዳ ቅንጡ የተንጣለለ ቪላ ገዝቶ ገባ። መልካም ጎረቤት ናቸውና አዲስ ገቢወቹን እንኳን ደስ ያላችሁ ሊሏቸው ሲሄዱ በጨዋታ መሀል ቤቱን በካሽ ከፍለው መግዛታቸውን ሰሙ። ብዙወች ቢያደርጉትም አሜሪካ በጣም ሀብታም ካልሆኑ እንዲህ ያለው ግዢ የተለመደ አይደለም። "What do you do for a living?" ቢሉ ናይጀሪያ ውስጥ ትንሽ የመንግስት ስልጣን የነበረው ሰው መሆኑንና መንግስት ጋር ባለመስማማቱ ከነቤተሰቡ አገሩን ትቶ መምጣቱን በትካዜ ነገራቸው። አዘኑ።

እያደር ግን የዚህ ናይጀሪያዊ ቤተሰብ አኗኗር ባልና ሚስትን ለከባድ ድብርት ዳረጋቸው። በእርግጥ ምንም የደረሰባቸው ነገር የለም፣ ስርዓት ያለው ጨዋ ቤተሰብ ነው። ግ...ን መዋኘት ነው...ጥግብ እስኪሉ መተኛት ነው...ደግሰው ወዳጅ ዘመዶቻቸው ጋር ዘና ማለት ነው...ውድ መኪና ፣ ልብስ መቀያየር ነው፣ ደስታ ነው። በቃ ድፍን ቤተሰቡ እንዲች ብሎ ስራ አይሰራ አይማር... እነዛ ሚስኪን ባልና ሚስቶች ምናምን የተቀባች ዳቦና ቡናቸውን ይዘው ጧት ሱክ ሱክ እያሉ ወደስራ ሲሄዱ የአጅሬው ቤተሰብ በጧት እነደፀሐይ ወጥቶ በረንዳው ላይ ቡናና ጠረጴዛ ሙሉ ምግብ አቅርቦ ቁርስ ደግሶ ቀኑን በከባዱ ሲጀምር ያያሉ...ማታ በስራ ጨርቅ ሁነው ሲገቡ... ጎረቤት ዋይኑ ተደርድሮ ግሪል ጥብሱ እየጠረነ ሙዚቃው በስሱ ተከፍቶ ሳቁ ጨዋታው ደርቶ ያገኙታል ... ቅዳሜና እሁድማ ሰርግ ነው። ባልና ሚስት የመስኮት መጋረጃቸውን ገለጥ ያደርጉና ተቃቅፈው መጎምጀት ሆነ ስራቸው።እና መረራቸው! ከባድ የስነልቦና ጥቃትና ዋጋ ቢስነት እንዲሰማን ከመሆናችንም በላይ የስራ ሞራላችን ሙቷል ...በየቀኑ በምናየው ቅንጡ ኑሮና ያላሰለሰ ረፍት፣ ቀኑ ሁሉ እሁድ እየመሰለን ነው...በቃ እሁድ ስራ የገባን እየመሰለን ነው አሉ። ከሰኞ እስከአርባችንን እሁድ አድርገውብናል!

የአሜሪካ መንግስት ህግ ላይ ቀልድ አያውቅም፣ ነገሩን በከፍተኛ ጥሞና ሰምቶ ሲያበቃ ምናላቸው ?
አይዟችሁ ቻሉት! 😀ኤዲያ አሜሪካ ምን ህግ አለ! እና ቅዳሜ በቁርጥ ቤት በር ስታልፉ ምናምን በምታዮት ሁሉ አይዞን! ከሰኞ እስከአርባችሁን እሁድ ጋር ያምታቱባችሁ ጎረቤቶች የፌስቡክ ሰለብሪቲወች ወዘተወች ቢኖሩ ....በቃ አይዞን!

አለሁ ማለት ከንቱ!
(አሌክስ አብርሃም)

ታላላቅ ፖለቲከኞች፣ ጋዜጠኞች፣ በየሐይማኖቱ ያሉ ሰባኪወች ዘማሪወች፣ሀብታሞች ፣ በጎ አድራጊወች ወዘተ...በማህበራዊ ሚዲያ ያላቸውን የተከታይ ቁጥር የተወዳጅነታቸው መለኪያ ሲያደርጉት እና ሲታበዮ ይታያሉ። ይችን ነገር ስሙ.....ራሻያዊዋ ሱፐር ሞዴል አይሪና ሸይክ የታዋቂው ኳስ ተጨዋች ክርስቲያን ሮናልዶ ፍቅረኛ ነበረች፤ ብዙ ሚሊየኖች ኢንስታግራም ላይ ይከተሏታል ያንቆለጳጵሷታል። ያው በቁንጅናዋ እንደሚከተሏት ነበር ሚዲያው ሁሉ የሚያራግበው። እና አንድ ቀን ክርስቲያን ሮናልዶ ጋር ፍቅራቸው አልቆለት ተለያዮ... አጅሪት በብስጭት "ከአሁን ጀምሮ ከራሴ ማንነት ይልቅ የክርስቲያኖ ፍቅረኛ ስለሆንኩ ብቻ ፎሎው ያደረጋችሁኝ አንፎሎው አድርጉኝ" ብላ ለጠፈች። በ24 ሰዓት ውስጥ 11 ሚሊየን ህዝብ አንፎሎው አድርጓት ጭር። በዘራችሁ አይድረስ! በሶሻል ሚዲያ ታሪክ እንዲህ አይነት የአንፎሎው ጎርፍ ታይቶ አይታወቅም! በእርግጥ አሁን የራሷን ተከታይ አፍርታለች።

ምን ለማለት ነው ....የአገራችን ታዋቂወች ....የሚከተላችሁ ህዝብ ከስራችሁ የተኮለኮለው ለምትመሯት አገሩ፣ ለምትሰብኩለት ዕምነቱ፣ ለምትነግሩት መረጃ ፣ ለምትረዷቸው ሚስኪኖች ሲል እንጅ እናንተን በግላችሁ ወዶ ላይሆን ይችላል የት አውቋችሁ? አንድ ቀን ከስልጣን ወይም ከተደገፋችሁት መድረክ ስትወርዱ ጥላችሁ ራሱ የማይከተላችሁ ጥላ ቢስ ልትሆኑ ትችላላችሁ። አለሁ ማለት ከንቱ😀

የተስፋየ ካሳ የቆየ ቀልድ ትዝ አለኝ.... ልጁ ቤት ሊከራይ ሄዶ አከራይ እያሳዮት ነው።
"ይሄው እንግዲህ ቤቱ...በዚህ በር አለው...በዚህም በር አለው...ከፈለክ ይሄንኛውን ወደጓሮ የሚወስደውን ትዘጋና ...ዋናውን በር ደግሞ ትከፍታለህ ያው የገባንበት ማለት ነው...." ሲሉት

"እንዴ ማዘር ይሄ ሁሉ በር ምን ያደርግልኛል?"

"አሄሄ እሱንኳ ተወው ፣ ሌባ መሆንህን ደላላው ነግሮኛል ባንዱ ፖሊስ መጥቶ ሲቆም በሌላው...." 😀

አሁንም እዛው ኩላሊት ላይ ናችሁ እ? የማይደክማችሁ ፍጥረቶች! ይልቅ ቆየት ቢልም ይሄን ዜና አስታወሳችሁኝ። የምታዮት ናይጀሪያዊ አሳ አጥማጅ አንድ ቀን "ብሉ ማርሊን" የሚባል ትልቅ አሳ አጠመደ። ከቀናት በኋላ ሲሰማ አሳው ተራ አሳ አይደለም ለካ! 2.6 ሚሊየን ዶላር የሚሸጥ እጅግ ውድ አሳ ነበር፤ ምን ዋጋ አለው አጅሬው እንዳጠመደው ጎረቤቶቹ ጋር ሰብሰብ ብሎ ከገንፎ ጋር ቅርጥፍ አድርገው በልተውታል። ቦኖ ውሃ እንኳ የሌለው ጎረቤት ይሄን ሁሉ ሃብት ቅርጥፍ! ሚስኪኑ አሳ አጥማጅ ጎረቤቶቹ ጋር በተጣላ ቁጥር ፣ ዱቤ በከለከሉት ቁጥር ፣የጎረቤቶቹ ቆነጃጅቶች ፊት በነሱት ቁጥር ሆዱን ባየ ቁጥር "በልቶ ካጅ" እያለም ቢሆን ጉርብትናው በልጦበት በፀፀት አለ እላችኋለሁ! ፍቅር ይበልጣል። "በቃ ተበላ" 😀

((የእለት "ነገራችንን" አትንሳን)) በሚል እርዕስ ከአስር ዓመት በፊት በተከታታይ የየቀኑን አጀንዳ መፃፍ ጀምሬ ነበር። እንደዚህ በፍጥነት የተሰማ ፆሎት በድፍን ጦቢያ ያለ አይመስለኝም። ጭራሽ በየቀኑ ሁለትም ሶስትም አጀንዳ ይሰጠን ጀመርኮ። ከሆነስ ሆና ዛሬ ምን ላይ ነን?😀

ሽልማት!

ከጓድ መንግስቱ ሐይለማሪያም ተነበው የማይጠገቡ ትረካወች ጋር ወደፊት✊

ጓዶች! ብየ እጀምራለሁ! ዛሬ የቲክቶክ እንቶፈንቶ፣ተራ የጓዳ አጀንዳና ያለማንበብ አዚም እዚህ አፍንጫችን ስር...ደርሶ ሊውጠን በደረሰበት ሰዓት እኛ ተኝተናል። ይሄ አዚማም ፎርስ አደገኛ ነው ጓዶች ፣ በፍጥነት መጥፋት አለበት! አሁን ጥያቄው እናንብብና ይሄን አዚም እናጥፋው ወይስ ተጎልተን እንጥፋ ነው? እናንብብ ካላችሁ እነሆ ሽልማት!?😀

ወደቁም ነገሩ! በደራሲ ይታገሱ ጌትነት የተሰናዳውና በአጭር ጊዜ የመጀመሪያው ህትመት አልቆ ከአስፈላጊ እርምቶችና ማስተካከያወች ጋር ለሁለተኛ ጊዜ የታተመው ይህ ግሩም መፅሐፍ ገበያ ላይ ነው። መፅሐፉ የእውነት መነበብ የሚገባው ለታሪክም የሚቀመጥ ዶክሜንት ጭምር ነው።ጓድ መንግስቱ ስልጣን ከለቀቁ በኋላ በአካል ካገኟቸውና ኢንተርቪው ካደረጓቸው በአንድ እጅ ጣት የሚቆጠሩ ሰወች ምናልባትም 3? ይታገሱ አንዱ ነው። አገር ውስጥ በሁሉም መፅሐፍት መደብሮችና አዟሪወች ላይ እንዲሁም በውጭ አገር በአማዞን በኩል ይገኛል።/የአማዞን ሊንክ ኮሜንት ላይ አስቀምጣለሁ/ ደራሲው ለአንባቢወቸ እሸልም ዘንድ የተወሰኑ መፅሐፍትን በስጦታ አበርክቶልኛል።

መስፈርቱ ቀላል ነው፦ ስለጓድ መንግስቱ የሚሰማችሁን፣ ወይም ከተናገሩት የማይረሳችሁን...ማንኛውንም ጉዳይ ፃፍ ማድረግ ነው በቃ። ዳይ የተወሰነ ሰዓት አላችሁ።

አንዱ ፣ካሊፎርኒያ የሆነ አደባባይ ላይ የሚያልፉ ቆንጆ ሴቶችን እያስቆመ "ለመጨረሻ ጊዜ መንገድ ላይ ወንድ የለከፋችሁ መቸ ነበር?" እያለ ይጠይቃቸዋል። ወደ 50 ሴቶች ጠየኩ ይላል። የሁሉም መልስ "ተለክፈን አናውቅም" የሚል ሲሆን አንዷ ብቻ "ከ16 ዓመታት በፊት የሀይስኩል ተማሪ ሆኘ አንድ ሹፌር አፏጭቶብኛል" ብላ መለሰች🤐 እስኪ እኔም ልጠይቅ "የተከበራችሁ ሴት እህቶቸ" ለመጨረሻ ጊዜ ሳትለከፉ የዋላችሁበት ሳምንት መቸ ነበር?

ወንዶች በሰርግ ሚስት ሲያገቡ ሴቶች ግን በባል ሰርጉን ነው የምታገቡት?! ከምር ግን ሚስኪን ባላችሁን በመንፈቅ ስትረሱት ሞት ራሱ ግን ከሰርግ ትዝታችሁ አይለያችሁም። እንዴ! የእሳት አደጋ ሰራተኛው ይህችን አሮጊት ሴትዮ ከሞት መንጋጋ አውጥቶ ለማትረፍ እንደምታዮት አቅፏቸው ሲሮጥ ሴትዮዋ የሆነ ነገር ይሉታል ። ማቀፍ እስኪያቅተው በሳቅ ፈረሰ። ገናኮ ከአደጋው ሙሉ ለሙሉ አልወጡም።
"ምን ብለውህ ነው የሳከው?" ተባለ
"እንዲህ አቅፈኸኝ ስትሄድ የሰርጌን ቀን ምሽት ነው ያስታወስከኝ...ባሌ ወደምኝታ ቤት የወሰደኝ ልክ እንዲህ እንደአንተ አቅፎ ነበር"😀 ሆ!

"ልባምን ሴት ማን ሊያገኛት ይችላል? ዋጋዋ ከቀይ እንቁ ይበልጣል..." በሚል ጎርናና ድምፅ ፣ ወይም አፍቅሬሽ አፍቅሬሻለሁ ፣ በቁንጅና የለሽም አምሳያ ፣ትህትናሽ ..ምናምን በሚል ዘፈን የሚስለመለሙበትን የራሳቸውን ቪዲዮ አቀናብረው ቲክቶክ ላይ ፣ፌስቡክ ላይ ምናምን ፖስት የሚያደርጉ ሴቶች ... ራሳቸውን ለማግባት፣ ለራሳቸው ቤተሰብ፣ ራሳቸውን ሽምግልና የላኩ ነው የሚመስለኝ😀

ቲ
∞
አዘካኒ ከበነካ
አወዳቸ ነገረካ
ከቸምሁ ነረየለ
ሸተወንፍ ፈተበለ
በገመኩል አትፈደል
መጨበራው ደራኮተል

የነሳቲ መደሻፈል
ጅኖዲዛ አወለከል
ቲ
ያሀረሳው ጎማሊዛ
ባንተገባ ባን ከራዛ
ዟበ ከፈል ዟበ ግዳ
ካዘል ሻበ ዋከሳንዳ
ቲ

እናንተ! ጀርመኖች ቢራ ሲጥጡ አይታችሁ ይሆን? ያንትያለህ! በዛ ሰፊ መዳፋቸው ውስጥ ጠርሙዙን ሲይዙት የጠብታ እቃ ነውኮ ይምትመስለው! ሲጠጡም ሙሉዋን ጠብ ቁጭ ነው !ይሄው እነሱ ከጎኔ ተቀምጠው ለጠጡት እኔ ሰክሬ ወደቤቴ እየገባሁ ነው!ክሰፈር ሱቅ ማስቲካ ሁሉ ገዛሁኮ😀ምን ቀረኝ? ወደሰፈር ጠጋ ስል "እያንዳንድሽ የሰው ማንነት አታውቂም" ላለማለቴ ምን ዋስትና አለኝ?😀

ቲክቶክ ላይ በጣም የሚያስጠሏችሁን፣ ተራ፣ መሀይም፣ ባለጌ፣ ጋጠወጥ የምትሏቸውን ሰወች አሳዳችሁ የምታዮት ለምንድነው ታዲያ? 😀

በነገራችን ላይ የኑሮ ደረጃህን ሁልጊዜ የአለም ባንክ እስኪነግርህ አትጠብቅ። የድህነት ወለል ጣራ እያልክ አትድከም። ድህነትህን ቤት ባፈራው ነገር ለካ። ለምሳሌ ለይሄ ፎቶው ላይ የሚታየው ምንድነው? አየህ! መልስህና አጠቃቀምህ ደረጃህን ይነግርሃል ....ሐብታሞች በብዛት ገዝተው በብዛት ለብር ማስያዣነት ይጠቀሙበታል። ደሀ ሴቶች ለፀጉር ማስያዣ ፣ ደሀና ከይሲ ፈላወች ወስፈንጠር ሰርተው አላፊ አግዳሚ ለመነጀስ ይጠቀሙበታል። አንድ የሀብታም ልጅ በወስፈንጠር ሲጫወት አታገኝም። ይሄን ላስቲክ "ለቁርጥማት ጥሩ ነው" ብሎ እንደብራዝሌት እጁ ላይ የሚያስር ቁርጥማታምም አለ። ምን ላይ ነን ?😀 በነገራችን ላይ ይሄንንም ከቻይና ነው የምናስመጣው አይደል? ቁርጥማቱ እንደአገር ነውኮ!

ሞት ቅፅበት፣ አለመኖር ግን ዘላለማዊ ነው!

ይሄ እዮብ እዚህ ነበር...አሁን እዚህ የለም። ፎቶውን እዚህና እዛ ባየሁ ቁጥር የሆነ የሚያስደነግጠኝ ነገር አለ። ከአስር ዓመት ባለፈ የፌስቡክ ቆይታየ አንድም ቃል ተነጋግረንም ሆነ ጓደኛ ሆነን አናውቅም። ግን እዚህ ነበር። እዚህ ሰፈር በራሱ ሰፈር ሆኖ ነበር። ልክ ፒያሳ ፣ አራት ኪሎ ፣ሜክሲኮ፣ ቦሌ እንደሚባሉ ሰፈሮች ቤታችን እዛም ሆነ አልሆነ የምናውቀው ሰፈር ነበር። የሆኑ የምናውቃቸው ካፌወች ሱቆች ቢሮወች ሰወች ያሉበት ሰፈር። የምንበሳጭበት የምንስቅበት ነገር ያለበት ሰፈር! ሰወች ብቻ አይደለንም ለካ! እና ጧት ስትነሱ አንድ ሰፈር ቢጠፋ እንደማለት ነው። እንደዛ ነው የሚሰማኝ። ቀስ እያሉ በዙሪያው የነበሩ ሰወች ሲጠፉ ሲበተኑ ታያላችሁ። ከነጨዋታቸው፣ ከነሆነ የአነጋገር የመግባባት፣ ባህላቸው !የሆነ ጣዕም ይጎድላል። ብቻ ሞት የሆነ ቅፅበት ነው ከዛ በኋላ ያለው አለመኖር ርዝመቱ.... እንዲያው እንዲሁ ባየሁት ቁጥር ስለሚያሳዝነኝ ነው።

አንድ የዱር አጋዘን ኮለራዶ የሚባለው የአሜሪካ ግዛት ወደሚገኝ የምግብ መሸጫ ሱቅ ድንገት ገብቶ ይቆማል። እንግዲህ አጋዘን እንኳን በዚህ ልክ ሰወችን ሊቀርብ የቅጠል ኮሽታ እስከጠረፍ የሚያስሮጠው እንስሳ ነው። በአቅራቢያው ካለ ጫካ ወጥቶ ነው ። እና የሱቁ ባለቤት ይሄ አጋዘን እንደተራበ ስለገባው የታሸገ ለውዝ ይከፍትና ይሰጠዋል። ያችን አጣጥሞ ወጥቶ ወደጫካው ሄደ። ከሰላሳ ደይቃ በኋላ ግን አጋዘኑ ቤተሰቡን ( ሚስቱንና ሁለት ልጆቹን) ይዞ ወደሱቁ ተመለሰና ቁልጭ ቁልጭ። እንግዲህ በአጋዘንኛ "እኔና ደጀኔ ቸግሮናል" ነው😀 ርሀብ የሞራልም የተፈጥሮም ባህሪያችሁ የማይፈቅድበት ቦታ የሚያቆም አሳዛኝ ነገር ነው። በተለይ ቤተሰብ መቸም አይራብ!! እንደአገር እንደህዝብ ራሳችንን ነው ያሳየኝ። ለቤተሰብ ሲሉ ከከብር አጥራቸው ወጥተው ሰው ፊት ለቆሙ ሁሉ እስኪ መልካም ዘመን ይምጣ🙏

"የከሸፉ ሐይማኖተኞች" ከሚድኑ ዳይኖሰር በመርፌ ቀዳዳ ቢያልፍ ይቀለዋል!
(አሌክስ አብርሃም)

አንድ ፈጣሪን በጥልቀት ወይም ከነጭራሹ የማያውቅ ፣ ባለማወቁም የማይፈራ ነፍሰ ገዳይ አምላኩን ያወቀ ቀን ፍፁም ከቀደመ ክፋቱ የመመለስ እድሉ ከፍተኛ ነው። ከነክፋቱ ወደፈጣሪ ሲቀርብ ነገሮች ይቀየራሉ። ይሄን ለማረጋገጥ ታላላቅ የሚባሉ የሀይማኖት አባቶችን ታሪክ ተመልሳችሁ ፈትሹ።

በክርስትናው ከብሉይ ኪዳን ጀምራችሁ የኢየሱስ 12 ደቀመዛሙርትን ይዛችሁ እስከአሁን ያሉትን፣ በሌሎቹም እምነቶች በየዘመኑ የተነሱትን ተመልከቱ። አንዳንዶቹ አመንዝራ፣ሌሎቹ ቀራጭ ፣ ሌባ ፣ ሴተኛ አዳሪ፣ ለማህበረሰብ መከራ ወዘተ የነበሩ... ከዛስ? የገባቸው ቀን የእውነት የተቀየሩ የፈጣሪ ባሪያወች ፣የማህበረሰቡም ምሳሌወች ይሆናሉ። ሩቅ ሳንሄድ በዚህ ክፍለ ዘመን ራሱ ዘር ማጥፋትን ጨምሮ ብዙ ዘግናኝ ወንጀል የሰሩ ባለስልጣናት፣ አሸባሪወች ፣ አደንዛዢ እፅ አዘዋዋሪወች ፣ ሴተኛ አዳሪወች ወዘተ እስር ቤት ውስጥ ፈጣሪን አውቀው ተለውጠው ሲወጡ ማየት የተለመደ ነው። ብዙ መዘርዘር ይቻላል። እነሱም አይደብቁም እንዲህ ነበርኩ ፈጣሪ ቀየረኝ ይላሉ በአደባባይ።

አሁን ተመለሱና ከይሁዳ ኧረ ከዛም በፊት ጀምሩ...የተመረጡ የፈጣሪን ታላቅነት፣ ክብር ፣ ያወቁ ተዓምራቱን ያዮ ፣የተመረጡ የተቀደሱ ለአመታት የሰበኩ፣ ያስተማሩ "ሐይማኖተኞች" ሸርተት ብለው ገንዘብና ጥቅማጥቅም ውስጥ ከገቡ፣ ወሲብ ፣ስልጣን፣ የታመመ ፖለቲካ ፣ ዘረኝነት ውስጥ ከተዘፈቁ ከሞት በስተቀር ምንም ከክፋታቸው አይመልሳቸውም። ምንም! የመጨረሻውን ሀያል አምላክ ክደውት ተመልሰዋል ማን ይዳኛቸዋል? ኢየሱስን ራሱን አሰቅለውታልኮ! ችግሩ ደግ ሰወች ፣ ትሁትና ፈጣሪን የሚወዱ ሰወችን ከነፍሳቸው ይጠላሉ። ምክንያቱም ክህደታቸውን፣ ያፈረሱትን መለኮታዊ ቃል ኪዳን ያስታውሷቸዋል። ተቅበዝባዢ ናቸው። የጎደለው ከፍሳቸው ስለሆነ ምንም ምድራዊ ሀብት ስልጣን አይሞላቸውም። እና እንዲህ መሆናቸውን አያምኑም። አሁንም ሊሰብኩ ሊያስተምሩ ይችላሉ። የሚሰብኩት ግን ራሳቸውን ነው። የወደቁለትን ሐብት ፣ዝና ፣ስልጣን ነው።

ንሰሐ መጨረሻ ባይኖረውም በገሀድ እንደምናየው፣ እንዲህ አይነት "ሐይማኖተኞች" ግን በታሪክም በአሁኑ የኑሮ እማኝነታችንም ስጋና ደም የለበሱ የአጥፍቶ ጠፊ ፈንጅወች ናቸው። የጭካኔም የብልግናም መጨረሻወች። አገር ሳይቀር ያፈራርሳሉ። በነገራችን ላይ ሰይጣን ራሱ መለዓክ ነበር ዘጭ ሲል ነው አሁን የሆነውን የሆነው! አሰራሩ አንድ አይነት ነው።

መፅሐፍ ከማሳተማችሁ በፊት🚫
ለማሳተም ሐሳብ ላላችሁ
(አሌክስ አብርሃም)

ብዙ ወዳጆቸ መፅሐፍ ለማሳተም እንደምትፈልጉና ከህትመት ጋር በተያያዘ አስተያየት እንድሰጣችሁ በየጊዜው ትጠይቁኛላችሁ። ምክንያቱ ባይገባኝም በተለይ ሰሞኑን ደግሞ
ጥያቄው በዛ ብሏል። አንዳንዶቻችሁ መልስ አለመስጠቴ ትንሽ እንዳሳዘናችሁ ፅፋችሁልኛል። ኩራት አልያም ንቄት ነው ያላችሁኝም አላችሁ። እውነታው በዚህ ጉዳይ ምክርም አስተያየትም መስጠት አስቸጋሪ ሆኖብኝ ነው። የግድ አስተያየቴን መስጠት ካለብኝ ግን ቀጣዮቹን 10 ነጥቦች ላካፍል። የተለየ ሐሳብ ካለም በደስታ እቀበላለሁ።

1ኛ. እንኳን ፃፋችሁ፣ መፃፋችሁን ቀጥሉ! ከእናንተ የሚጠበቀው ከባዱ ሀላፊነት ይሄው ነው። የፀሐፊ ስራው ሳይታክት መፃፍ፣መፃፍ አሁንም መፃፍ ነው። ይህ ፅሁፍ ግን ስለመፃፍ ብቻ ሳይሆን ((ስለማሳተም)) ነው።

2.መፅሐፍ ስታሳትሙ ለህትመት ያወጣችሁትን ገንዘብ እንደጠፋ፣ እንደተሰረቀ ወይም ፈፅሞ ከዚህ በኋላ እንደማታገኙት ሐብት ቁጠሩት። ከተመለሰ እሰየው! ካልተመለሰም በሞራልም በገንዘብም ህይወታችሁን እንዳያመሳቅል ብዙ ተስፋ አታድርጉ።

3.🚫በጣም እንዳትሞክሩት የምመክረው ...ንብረት በመሸጥ፣ በማስያዝ፣ ወይም በብዙ ድካም ለሌላ ጉዳይ ያጠራቀማችሁትን ገንዘብ በማውጣት መፅሐፍ አታሳትሙ። እባካችሁ አታሳትሙ። ስፖንሰር ከተገኘ፣ ለማሳተም ብዙም የገንዘብ ችግር ከሌለባችሁና ለስሜታችሁ ስትሉ ማሳተም ከቻላችሁ ችግር የለውም።

4. የግጥም መፅሐፍ ማሳተም አሁን ባለው የመፅሐፍ ገበያ የሚመከር አይደለም።

5. ጥሩ ፅፋችሁ በአመታት ድካምና መስዋዕትነት ያሳተማችሁት መፅሐፍ በቀናት ውስጥ በዮ ቲዮብ፣ በሬዲዮ ጣቢያዎች ፣ በቲክቶክና በቴሌግራም አየር ላይ ተበትኖ የሽያጩ ነገር ከአፈር ሲደባለቅ ማየት የዚህ ዘመን የደራሲያን የልብ ስብራት ነው።

6. እነእንትና እንኳ ፅፈው ተነቦላቸው የለ የሚል ሞኝ ንፅፅር ውስጥ ራሳችሁን አታስገቡ። ሰወች ምንጊዜም እንደባህር አለት ጫፋቸው ብቻ የሚታይ ፍጥረቶች ናቸው ውሀው ውስጥ ያላቸውን መሠረት አናውቅም።

7. ሁልጊዜም ሽፋን ላይ የምታዮት ዋጋ ለደራሲው በቀጥታ የሚደርስ አይደለም። እውነታው ግማሹ እንኳን አይደርሰውም። ስለዚህ ማሳተም ስታስቡ ይሄን ያህል ኮፒ በዚህ ዋጋ ቢሸጥ ከሚል የዋህ "ቀቢፀ ሒሳብ" ውጡ።

8. እንዲህም ሆኖ ብዙ መፅሐፍት ይታተማሉ የሚል ግርታ ውስጥ ከሆናችሁ ከብዙወቹ እንደአንዱ ከመሆናችሁ በፊት በእነዚህ ነጥቦች ላይ የራሳችሁን ጥናት ደግሞ አድርጉ። በማይገባኝ ምክንያት ደራሲያን ትክክለኛውን መረጃ እርስ በእርስ አይለዋወጡም።

9. መሠረታዊ ችግሩ በሁሉም ዘርፍ ያለው የዋጋ መናር ካለን ደካማ የንባብ ባህል ጋር መዳመሩ ሲሆን በተጨማሪም አንባቢው በተደጋጋሚ በሚታተሙ መፅሐፍት ያሰበውን ያህል እርካታ ማግኘት አለመቻሉ ያሳደረው ተፅዕኖም ቀላል የሚባል አይደለም።

10. መፅሐፋችሁ መሸጡ ወይም አለመሸጡ የእናተን ደካማ ደራሲነት ወይም ጥሩ ፀሐፊነት ማረጋገጫ ላይሆን ይችላል። ሊሆን የሚችልበትም አጋጣሚም ይኖራል። የመፅሐፍ ገበያ እብድ ነው። ታዋቂ ሁናችሁ ያጨበጨበው ሁሉ ድራሹ ሊጠፋ በተቃራኒው ድንገት ብቅ ብላችሁ ህዝብ ሊሻማ ጥሩ ሊሸጥና ሊነበብም ይችላል። ግን ከመቶ ሁለትና ሶስት እንኳን ይሄ እድል አይገጥመውም። በበኩሌ ህይወትን ለዕድል መተው ለማንም የምመክረው ነገር አይደለም። ዕድልን በህይወት ውስጥ መጠቀምን እመርጣለሁ። ምክንያቱ ብዙና ውስብስብ ነው። የሆነ ሆኖ የተሻለ ተስፋ ብሰጣችሁ ደስ ይለኝ ነበር፤ ግን እውነታው ቢታደጋችሁ ይሻላል። አውቃችሁ ተጋፈጡት!!

አሜሪካ ማለትኮ ከአለም አንደኛ ሀብታም የሆነውን ሰውየ ካድሬ አድርጋ የምትሾም ብቸኛ አገር ናት😀

ጓድ ኤለን መስክ
በዮኤስ ኤ /አስ/ የዶ/ት/አስተ/ቢ/ወ/ሙ/የስራ ሒደት ዋና ሀላፊ😀

የቁም ተስካራችሁን አውጡ!
(አሌክስ አብርሃም)

ዕድሜ ልካቸውን ስለታላላቅ ሰወች ፣ ስለታላላቅ ስራወች በማውራት ትልቅነታቸውን ለማሳየት ፍዳቸውን የሚበሉ ሰወች አሉ። በተለይ በጥበቡ ውስጥ ስለነበሩና ስላሉ ታላላቆች። ዘፋኞች፣ ተዋናዮች፣ ደራሲያን ወዘተ። እንዲህ አይነት ሰወች መቸም ታላቅ አይሆኑም። ወደራሳችሁ ተመለሱ፣ ሰው የተፈጠረው ዕድሜ ልኩን ሌሎችን ሲዘክር ለመኖር አይደለም። ሰው የራሱን የቁም ተስካር እንዲያወጣ እድል የተሰጠው ፍጡር ነው። የራሳችሁ ትንሽነት ዘክሩ። ማድነቅና ማክበር እንደእርሾ ነው። ለራሳችን ስኬት የሚረዳ ቅመም ነገር።

ታላላቆች ምን ሰሩ ብለን እንጠይቅ? ታናናሾችን በጥበባቸው አጎሉ። መንገድ ጠረጉ፣ ድምፅ ሆኑ ። አንብቡ የአለምን ሊትሬቸር...ስለጭቁኖች ማንም ዙሮ ስለማያቸው ጥቃቅኖች የተፃፈው ይበዛል። አንድ ዘፋኝ ታዋቂና ታላቅ ሰው አፈቀርኩ ብሎ ሲዘፍን ሰምታችኋል? ስለተቀደደ ጫማችሁ ፃፉ፣ ባል ስለማጣታችሁ ፃፉ፣ ስለነተበ ሸሚዛችሁ ፃፉ፣ ዘይት ስላነሰው ሹሮ ወጣችሁ ፃፉ ፣ ጠይቃችኋት እምቢ ስላለቻችሁ የቤት ሰራተኛ ፃፉ፣ ስለተንጨባረረ ትዳራችሁ ፃፉ፣ ስለህመማችሁ፣ ስለረሀባችሁ፣ ስለብስጭትና ተስፋችሁ ፣ስላንገሸገሻችሁ ኑሮ ፃፉ። በህመማችሁ ልክ አቃስቱ፣ በሀዘናችሁ ልክ አልቅሱ፣ በደስታችሁም ልክ ሳቁ። ጫማችሁ ሸቷቸው ስላስነጠሳቸው ሰወች ስለተሰማችሁ ሀፍረት ፃፉ! በተለይ ነፍሴ ለጥበብ ተጠርታለች ብላችሁ የምታስቡ ጊዚያችሁን በማጨብጨብ አታባክኑ! የሚያጨበጭቡ እጆች ብእር መጨበጥ አይችሉም። ሚሊየኖች እንደምታጨበጭቡላቸው ሰወች ሳይሆን እንደእናተ ነው የሚኖሩት። እናተ ሚሊየኖች ናችሁ። ታላቅነት በሰው ተስካር አደጋገስን ማሳመር አይደለም፣ የቁም ተስካርን ማውጣት ነው። ወደትንሽነታችሁ ተመለሱ። ከአንቆላባሽነት ውጡ። ጥሩ ነው ታላቆችን ማክበር ግን የእድሜ ልክ ስራ አይደለም። ቢያንስ መሰላሎቹ ላይ ለመውጣት ሞክሩ። መሰላል ተሸክሞ መዞር ከፍ አያደርግም።

ቸርቿ ልትሸልመኝ ይገባል!

አንዱ የቤተክርስቲያን ኪቦርድ ተጨዋች ትልቅ ስህተት ይሳሳታል። እሱ እንኳን ጥሩ ልጅ ነበር ፣ያ የተረገመ ሰይጣን የሆነ ቀን ኪቦርድ ከሚያስተምራት የፓስተሩ ሚስት ጋር አሳስቶት እንጅ። እሷም ጥሩ ልጅ ነበረች ዕድሜዋ ከባሏ በ22 ዓመት ከማነሱና ጌታ ጭው ካለ ገጠር ካወጣው ፓስተር ጋር የተጋባች የከተማ ልጅ ከመሆኗ ውጭ! እና ከማንኛውም አገልግሎት ይታገዱ በሚሉና ለዛሬ በምክር ይታለፉ በሚል ምእመኑ ለሁለት ተከፈለ። መከፈል ብቻ አይደለም በዓለም እንኳን ተሰምቶ በማይታወቅ ፣ማንም ከዚህ በፊት ባልተሳደበበት ፣ ገና በዛ ዓመት ከጥልቁ ተመርቶ ለገበያ በቀረበ ዜሮ ዜሮ ስድብ ጉባኤው ይሞላለጭ ጀመር። ከቃል አልፎ በጣት ምልክት ሁሉ እንካ እንች ምናምን እየተባባሉ። እና ልጁ በግርምት ስድድቡን ዛቻውን ሲኮመኩም ቆየ። የሱ ድርጊት ከሚያየው ጉድ አነሰበት። ሲወጣላቸው ሲረጋጉ "እሽ አስተያየትህ ምንድነው ይሉታል ንስሀ ትገባለህ ወይስ?"

ወገኖቸ ! የገረመኝ የእኔ መባለግ አይደለም። እኔኮ ስትቅለሰለሱ ስትፀልዩና ስትሰብኩ በትእግስት የጌታን መምጣት የምትጠባበቁ ነበር የመሰለኝ። ለካ እዚህ ተሰብስባችሁ ብልግናችሁን የምትተነፍሱበት አንድ ባለጌ ስትጠብቁ ነው የቆያችሁት። ሰበብ ሆንኳችሁ፣ ለዓመታት በፆሎት ያልተገለጠ አጋንንታችሁ በብልግናየ እየጮኸ ወጣ....ቸርቿ ልትሸልመኝ ይገባል😀

ምን ለማለት ነው? የማንም መባለግ እናንተ ባለጌ እንድትሆኑ ልዮ ፈቃድ ሊሆናችሁ አይችልም። የጨዋነታችሁ መሰረቱና ሚዛኑ የሌላው መቅለል አይደለም። ሰሞኑን አንዱ የጊኒ ባለስልጣን የባለገበትን የወሲብ ቪዲዮ ለማየት የተለየ ፈቃድ የተሰጣችሁ ይመስል ስትራኮቱና ስትኮመኩሙ ፣ ልገስፅ ላስተምር ስትሉ ለከረማችሁ "ሸም ኦን ዩ" 😀 በቀጣይ ብትፆሙ ብትፀልዮ እድሜ ልካችሁን ከአእምሯችሁ ትእይንቱ የማይጠፋ የወሲብ ፊልም ነው ስትጋቱ የከረማችሁት።

🚫 የወሲብ ቪዲዮ /pornography/ ለአንድ ደቂቃ ብትመለከቱ ትዕይንቱ በትንሹ ለ20 ዓመታት ከአእምሯችሁ አይጠፋም። ያውም እንደዕድሜ ደረጃችሁ። ይሄ በጥናት የተረጋገጠ እውነት ነው። ጆሮ ያለው ይስማ።

ጉተታው
(አሌክስ አብርሃም)

ኤለመንታሪ ተማሪወች እንደነበርን አስማተኛ ነኝ የሚል ሰው በጆሮየ መኪና እጎትታለሁ ሃምሳ ሳንቲም ትኬት ቁረጡ እያለ ወደትምህርት ቤታችን መጣ..ማንም አልቆረጠለትም፤ እንደውም መፈንከት አምሮን ነበር። ከዛ በፊት ተታለን ነበራ! ጅል መሰልነው እንዴ?! ይህን የሰሙ ወላጆች ሁሉ ሳይቀር ተቆጡ። በኋላ እኛ ፈላወቹ የባነንበት ሰውየ ሀይስኩል ሄዶ መኪና በጆሮው እንደሚጎትት እና ትኬቱም አንድ ብር እንደሆነ ሲነግራቸው እንኳን ተማሪ አስተማሪና ወላጆች ሳይቀሩ ትኬት ለመቁረጥ ግድያ ሆነ። የተቆጡ ወላጆች ሁሉ ሐሳባቸውን ቀይረው ይጋፉ ጀመር። ግራ ገባን። እንደውም ቦታ ጠቦ ብዙ ትርኢቱን ሊመለከቱ የሄዱ ሴቶች እያዘኑ ተመለሱ። "በአጥርም ቢሆን ይሄን ጉድ እናያለን" ያሉም ነበሩ።

የገረመን ለመመልከት ከሚጋፉት ሴቶች ይበዙ ነበር። ሰውየው እውነትም አስማተኛ ነው ...ከኋላ ከፍሎ ባሰማራቸው ሰወቹ መኪናውን የሚጎትተው በጆሮው አይደለም ልጅ ፊት እንደዛ ስለማይባል ነው እንጅ በእንትኑ ...ነው የሚጎትተው" ብለው አውርተው ነበር። ህዝቡ ነቅሎ ገባ። ብለው ብለው መኪና ሊጎትቱበት? እየተባባለ። ልጆች እዛች ግድም እንዳንደርስ ተከለከልን። በኋላ ሰውየው አንዲት ታክሲ እንደምንም በጆሮው ትንሽ ጎተተ ። ህዝቡ አልተደነቀም፣ ልቡ የተሰቀለው ሌላው ጉዳይ ላይ ነበር። ቀጣዮን ለማየት አዳሜና ሂዋኔ እንደጓጓ "ትርኢቱ አለቀ" ብሎ ኩም አደረጋቸው አስማተኛው።

እንዴ እንትኑሳ?
ምኑ?
መኪናውን የምትጎትተው በእንትንህ...ነው አልተባለም እንዴ? አሉ ወደእንትኑ እየጠቆሙ።
ፈገግ ብሎ የሱሪውን ዚፕ እየነካ "በዚህማ ይሄን ሁሉ አንድ ከተማ ህዝብ ጎተትኩበት!!"😀

ይሄው እስከዛሬ እንትን ጋር የተያያዘ ወሬ እንደጉድ እየጎተተ ይሰበስበናል። እንዳለ ህዝቡ አስማት ሊያይ ኢኳቶሪያል ጊኒ ጠቅልሎ ገባኮ ጓዶች።😀 ያ የተረገመ ሰውየ በእንትኑ ጎትቶ ጊኒ አጎረን።

የእለት ‹‹ነገራችንን›› አትንሳን!
(አሌክስ አብርሃም)

እያንዳንዱ ብሔርና ብሔረሰብ "ኢትዮጵያ አገሬ ባህሌን፣ ወጌን ፣ትውፊቴን ታክብር አለበለዚያ ...." ቢልስ? ለምሳሌ ብዙ ጊዜ የሰወችን "አክሰንት" ወይም ሌላ አካላዊ ገፅታ፣ ባህልና አምልኮ በመስማትና በመመልከት ? በጨዋነት ብሔራቸውን ትገምታላችሁ። እና አክሰንታቸው እንደፈለገ ይወለጋገድ ፣ ገፅታቸውም ይሁን አለባበስና ባህላቸው ምንም ይሁን እምነታቸውን አትመኑበት ቢያንስ ፊት ለፊት መጥፎ ነገር አትናገሩም። ብሔር ናታ! እሳት ናታ! ኡፉ ናታ! እንደውም "ኢትስ ኦኬ" ልትኮራበት ነው የሚገባው ብላችሁ ለመመሳሰል ዘጭ እንቦጭ ምናምንን ነው የምትሉት። ኋላ ቀር ጎጅ ምናምን ማለትማ አይታሰብም።

ቦርጫም ወንድ ስታዮ ግን፣ ስፖርት ስሩ፣ ኮሌስትሮል .... ምናምን የምትሉት ለምንድነው? ለቅፅበት እንኳን ፊታችሁ የቆመው ጓድ የቦዲ ማህበረሰብ ያፈራው ኢትዮጵያዊ ሊሆን ይችላል ብላችሁ ለምን አታስቡም? ከተማ ብገባም ወግና ባህሌን ማንነቴን አልጥልም እምቢኝ ያለ ቦዲያዊ የለም ያለው ማነው?! በቅድም አያቴ በምንጅላቴ ቦዲ ነኝ ቢልስ? እንደውም "ቦርጭን ለማጥፋት" የሚል ንግግር የአንድን ብሔር ወግና ባህል ለማጥፋት የሚደረግ ሙከራ በመሆኑ በህግ ሊታገድ ይገባል ቢልስ? በብሔራዊ ቴሌቪዢናችን ሳይቀር ባለሙያ ጋብዛችሁ "እንዴት ቦርጭ ማጥፋት እንደሚቻል" ትሰብካላችሁ። ምንዓይነት ሕዝብን መናቅ ነው ይሔ ወገኖቸ?! የጥላቻ ንግግር ልንለው እንችላለንኮ።

የሆነ ሆኖ የቦዲ ማህበረሰብ ግን በሞጋሳ / ጉዲፈቻ ወዘተ የብሔራቸው አባል የሚያደርጉበት ስርዓት ይኖራቸው ይሆን? ባንዴ በኢትዮጵያ ትልቁ ብሔር ነበር የሚሆኑት። ወይ ደህና መካሪ ማጣት!ከተሜው በሙሉ ቦርጭ የታደለው ነውኮ የሚመስለው። ደግሞ ጅም ሂዱ ማለት ምንድነው የአንድ ብሔረሰብን መገለጫ ለማጥፋት ይሄ ሁሉ ርብርብ ለምን? እንደውም ከለጠጥነው ዘር ማጥፋት ጭምር ነው! ቦርጭ ከሌለ ሚስት የለም! ሚስት ከሌለ ዘር ከየት ይተካል? ዘር ማጥፋት ወይ የተወለደውን መጨፍጨፍ አልያም እንዳይወለድ ማድረግ አይደለምን? ይችንም ብሔር ጋር ካላያያዝናት ማንም እየተነሳ ሊዘልፈን አይደል? በዚህ አጋጣሚ የሐመር ሴቶች ኢቲቪ ፣ፋና ተቀጥረው በባህላዊ አልባሳታቸው ተውበው ዜና ያንብቡ ፕሮግራም ይምሩ ፣ ፖርላማ ይሰየሙ ብየ የጠየኩት ነገር ከምን ደረሰ? ኧረ ለህዝብ ጥያቄ ጆሮ እየሰጣችሁ ጓዶች!

እስኪ ሰላም ያውለን!

የእውነት ግን ትንሽም ቢሆን ስፖርት ስሩ፣ ኧረ ዱብ ዱብ በሉ ጓዶች። አሁን አጠገቤ ተቀምጦ ስልኩን ሲጎረጉር የነበረው ዘናጭ ወጣት ፣ ድንገት ተነስቶ ሲቆም ጉልበቱ እንዴት እንደተንቋቋ! ቋቋቋቋቋቋ ቅጭጭጭጭ! ከስጋና አጥንት የተሰራ ሰው እንዴት እንዲህ ይንቋቋል? ዲሞፍተር ያቀባበለኮ ነው የሚመስለው😀

በቃ እንዲሁ ልንቀጥል ነው?
(አሌክስ አብርሃም)

"የዛሬ አምስት ዓመት የምሰራበት የህክምና ተቋም ህንፃ ላይ የተፃፈውን ስምና፣ ዋንጫ ላይ የተጠመጠመ እባብ ከነምላሱ ከዚህ ጋ ሆኘ ቁልጭ አድርጌ ማየት እችል ነበር...አሁን ግን በጣም ካልተጠጋሁ በስተቀር ቀለሙ እንጅ ፊደሎቹም እባቡም አይታየኝም። ብዢዢዢ ይልብኛል። ይህን የታዘብኩት ከወር በፊት ነው በአጋጣሚ" አለኝ። ከሩቅ የሚታየውን ህንፃ እያሳየኝ። እናም " አይኔን ያደከመው ቀን ሌሊት ሳልል የምጎረጉረው ስልክ ነው። መነፀር ያስፈልገሀል ተብያለሁ። ፀሐይ ላይ ስሆን እንባየ ያስቸግረኛል። ካየሁት ሁሉ ምን ተጠቀምኩ? ተዝናናሁ እንበል ለመዝናናት የዓይን ጤናን መክፈል ያዋጣል? እንቅልፍ ያጣሁባቸው ምሽቶች ቁጥር ስፍር የላቸውም፤ ምን አገኘሁ? ምንም። መረጃ እንበል ፣ እንቅልፍ የሚከፈልለት መረጃ የትኛው ነበር ? የት እንዳይሄድ? የቱ ህይወት የሚቀይር መረጃ? " አለም አንድ ሆነች ብለው ከራሳችን ለዮን።

እያወራኝ አሰብኩ ...በብዙ ሺ የሚቆጠሩ የማይመለከቷችሁን ቪዲዮዎች አያችሁ፣ እንቅልፍ እንደበፊቱ እየተኛችሁ አይደለም በጣም እየተጎዳችሁ ነው፣ ከምትወዷቸው ጋር የምታሳልፉት ጊዜ ተወስዷል፣ ( ልጆቻችሁ ጭምር) ብዙወቻችሁ አይናችሁን ቸክ ተደረጉ እስኪ ወይም ራሳችሁ አድርጉት እይታችሁ እንደበፊቱ ነው? ... ሌላም ውሎ አድሮ የሚከሰት አካላዊም ይሁን አዕምሯዊ ችግር አይቀሬ ነው። ያውም የኢንተርኔት ክፍያው፣ የስነልቦና ጫናው፣ ጥላቻው፣ ስጋቱ፣ ባልተገባ ውድድር የሚፈጠርባችሁ የበታችነት ስሜት፣ ከእምነትና ማንነታችሁ ጋር የሚጋጭ ትእይንትና ነውር ወዘተ ሳይቆጠር። ምንድነው ሳናቋርጥ ስልካችን ላይ የምንፈልገው? ምን? የሆነስ ሆነና ሶሻል ሚዲያው ላይ "ዘና ለማለት" በሚል ይሄን ሁሉ መክፈላችን ያዋጣል? እንደቀልድ ቁጭ ብለን ሰዓቱ እንዴት እንደሚፈተለክ አስባችሁታል? ዕድሜ የሚከፈልለት ምን? በቃ እንደዚህ እየኖርን ልናረጅ ነው? በቃ ህይወታችን ይሄ ሊሆን ነው ?እስከመቸ?

እየገረመኝ ያለው ነገር በአገራችን ጉዳይ ላይ ሚዲያወች መዋሸት አለመዋሸታቸው አይደለም አሱኔማ አደግንበት አረጀንበት። የሚገርመኝ አድማጭ ተመልካቹ ውሸት መምረጡ ነው። አለ አይደል "በፍላጎቴ ልክ የተወራ ውሸት እውነት ነው" ብሎ መገገም። ለምሳሌ ስለሆነ ጉዳይ መስማት የምትፈልገው ውድቀቱን ነው እንበል፤ ውድቀቱን የሚያወራልህን ሚዲያ ከፍተህ ትሰማለህ። ያንኑ ዜና በተቃራኒው ስኬቱን መስማት ብትፈልግ ስኬቱን የሚያወራልህን ሚዲያ ትከፍታለህ። ሁሉም ዜና እንደቻይና እቃ በመግዛት አቅምህ ፣ በሙድህ ልክ ይሰራል። ምሳሌ ልጥቀስ ወይስ አልገብቷችኋል? 😀

ሰሞኑን አንድ ስለሳይንስና ቴክኖሎጅ ጉዳዮች በፍቅር የሚያወራ ልጅ ቲክቶክ ላይ ተመለከተኩ። (የዮኒቨርስቲ መምህር ነው አሉኝ) ልጁ ለቴክኖሎጅ ያለው ፍቅር ደስ ይላል ፤ በሚያወራውም ነገር በእርግጥ በጉዳዮ ላይ ደህና መረዳት እንዳለው ያስታውቃል። ብዙሀኑ ግን ልጁ ላይ ሙድ ከመያዝ ባለፈ የሳይንሱ ነገር አልተዋጠለትም። ለምን? የልጁ ድምፅ ቀጭንና አክሰንቱም ወደገጠር ወሰድ የሚያደርገው ነው በሚል። የአይዶል ተፅእኖ ሕዝቤ ላይ አርፏል። አብዝቶ ስለዘፋኞች ከማውራቱና ዘፋኞችን ከመተቸቱ የተነሳ ሳይንስ የሚያወራን ሰው ሳይቀር "ድምፅህ ቀጥኗል እንደገና ሞክር" እያለ ነው😀

ልጁ አንድ ቪዲዮው ላይ "ምን ይሻላል? ብናለቅስ ይሻል ይሆን?" እንዳለው ነው ነገሩ😀

እንደምን አመሻችሁ በመላው አሜሪካ የምትኖሩ አበሻ አሜሪካንስ መራጮች? እንዲሁ ለሰላምታ ነው😀

ተከራይ ኪራይ ለመክፈል፣ አከራይ ሌላ የምትከራይ ሰርቪስ ለመቀለስ ሁሉም ቲክቶክ ላይ ይጨፍራሉ😀

እንደምን አደራችሁ? መልካም ቅዳሜ። ድሮ ድሮኮ ቅዳሜ ቅዳሜ ጠረጴዛውን በጠርሙዝ ሞልታችሁ መጠጥ ትጠጡ ፎቶም ትለጥፉ ነበር አይደል? እንደውም ሰው ትጋብዙ ሁሉ ነበር! እኔም አትጠጡ፣ እናተም አታብዙ እንጅ አትጠጡ አይባልም ምናምን እንባባል ነበር እ? ነበር እንዲህ ቅርብ ነው? አሁን ግን ጠጡ ብላችሁ እንደውም ወንድ ከሆናችሁ አብዝታችሁ ጠጡ ብላችሁ ድሮ ጠጥታችሁ ባልመለሳችሁት ጠርሙዝ ነው የምትፈነክቱኝ😀 በዚህ ኑሮ ጠጡ ይላል እንዴ "ምኑ ጀዝባ ነው" አሉ ያ ሰውየ....😀

ትራምፕን ምረጡ!!
ይህ አሜሪካ ለሚኖሩ አበሾች የምርጫ ቅስቀሳ ነው!!

የአሜሪካ ምርጫ አንድ ሳምንት ቀረው። ታዲያ እኛ ምናገባን የምትሉ እንዳላችሁ አውቃለሁ። ይህ ፅሁፍ ለእናንተ ስላልሆነ ልክ ናችሁ አያገባችሁም። በአሜሪካ ለሚኖሩና የመምረጥ መብት ላላቸው አበሾች የተፃፈ ነው። በተለይም የአበሻ ወላጆችን ለቅሶ ጭንቀትና መከራ እንዳየ ሰው ይህን እላለሁ።

ምናልባት እስከአሁን ማንን እንደምትመርጡ ካልወሰናችሁ እኔ በግልፅ ትራምፕን እንድትመርጡ ለመቀስቀስ ነው ይህን የምፅፈው። በዘረኝነት እና ወዘተ ስሙ በክፉ እንደሚነሳ ግልፅ ነው። ይህም ቢሆን ባስተዳደረባቸው አመታት ከነጆ ባይደን የባሰ የሚወራውን ያህል የከፋ ነገር አልታየበትም። ለሀብታሞች ያደላል የሚል ቅሬታም ይነሳል። ኮቪድን ጨምሮ በተከሰቱ ሁነቶች ድሆችን ከተራ ምግብ ጀምሮ መክፈል እስካቃታቸው ሞርጌጅ በተለያየ መንገድ የደገፋቸው የትራምፕ አስተዳደር ነበር። እውነታው ትራምፕ አሜሪካን ከልብ ይወዳል፣ ከነጉድለቱ በፈጣሪ መኖር ያምናል። ከምንም በላይ ግን ...

ብዙሀኑ አበሻ የመጨረሻ ህይወቱ ልጆቹ ናቸው። ለልጆቹ እድሜውን፣ ጤናውን ፣ ጉልበቱን ያልከፈለ አበሻ የለም። እንቅልፍና አምሮቱን ሁሉ ለልጆቹ ያልሰዋ ወላጅ አይገኝም። ህልሙም የልጆቹ የነገ ስኬት ነው። ልጆቹ ነፍሱ ናቸው "ሰው አለሙን ሁሉ ቢያተርፍ ነፍሱን ግን ቢያጣ ምን ያደርግለታል" እንዲል መፅሐፉ ካሜላና ፓርቲዋ በቀጥታ የአበሻም ይሁን ሌሎች ልጆች እጣ ፋንታ ላይ አደገኛ ካርድ የመዘዙ የጥፋት ደቀመዝሙሮች ናቸው። አሜሪካን ወደአሳዛኝ ገደል እየገፉና በዴሞክራሲ ስም የመጨረሻውን የዴሞክራሲ አስኳል እሱንም "ልጅን በራስ ባህል በራስ እምነትና ማንነት የማሳደግ መብት" ለመንጠቅ እየታገሉ ነው። ቤተሰብን የሚበትን መርገምት። ፅንስ መግደልን እንደትልቅ የዴሞክራሲ ስጦታ እየሰበኩ ነው፣ በአጠቃላይ ኢኮኖሚ ጉዳዮችም ቢሆን እዚህ ግባ የሚባል እቅድ የላቸውም። እንደውም አሜሪካ በታሪኳ አይታው የማታውቀው የኑሮ ውድነት ላይ ጥደዋታል። ቤት ህልም ሁኗል፣ ምግብ ተትረፍርፎ ገንዳዎችን የሚሞላባት አሜሪካ የምግብ ወጭ እስከማሳሰብ ደርሷል።

ትራምፕ ሐብታሞችን መደገፉ ፍፁም ጤነኛ መንገድ ነው። ሁላችንም ወደአሜሪካ የመጣነውና ሚሊየኖችም አሜሪካን የሚመኙት ለፅድቅ አይደለም! ሐብታም አገር ስለሆነች ነው። ሰርቶ ተምሮ ለመለወጥ፣ የተሻለ ኑሮ ለመኖር። የሀብቷ ምንጭ የብዙ ሀብታም ግለሰቦች ድምር አገር መሆኗ ነው። ለማንም አገር ቢሆን ሀብታም ማብዛት ኢንቨስትመንትን ማበረታታት የህልውናው ጉዳይ ነው። የውጭ ፖሊሲያቸው ላይ አገራችንን ጨምሮ የተለያየ ሊሆን ይችላል። ከራሳቸው አንፃር ስለሚያዮት ማንም አገር የራሱን ጥቅም ካላስከበረ ሌላው ለርሱ ብሎ ፖሊሲ ሊቀርፅለት አይችልም።

የሆነ ሆኖ ለልጆቻችሁ እጣ ፋንታ፣ ለሰበአዊነት፣ እንዲሁም ለቆማችሁለት ሞራላዊም ይሁን ሐይማኖታዊ እምነት የሚበጃችሁ ትራምፕ ነው። በነገራችን ላይ መምረጥ መቻላችሁን እንደቀልድ አይታችሁ እንዳታሳልፉት ። ለዚህ መብታችሁ ብዙዎች ነፍሳቸውን ከፍለዋ፣ ፊዳ ሆነዋል። ምረጡ! ፍላጎትና ማንነታችሁን በድምፃችሁ አስከብሩ። ድምፃችሁ ለልጆቻችሁ የምትመዙት የዋስትና ካርድ ነው። ትራምፕ ጥቁር ብሎ ሰደባችሁ የሚሉት ሕይወታችሁን ጨለማ እንዲዘሩበት አትፍቀዱ። ከልጆቻችሁ የሚቀድም አንድ ነገር አስቡ ...አለ?

ድል ለጓድ ዶናልድ ትራምፕ
ሰላም ፣ፍቅር ፣ሰርቶ ልጆችን በራሱ ወግና ባህል ፣ እምነትና ስርዓት ማሳደግ፣ ለቁም ነገር ማብቃት፣ ቤተሰብን መርዳት ለመላው አበሻ፣ ለመላው ቤተሰብ!!

ምክንያቱ ምንም ይሁን የደከማችሁ ከምር አይዟችሁ። በተለይ ወጣት ሆናችሁ የደከማችሁ አይዟችሁ። በምድር ላይ ከባዱ ስራ ፣ መስራት እየቻሉ ምንም አለመስራት ይመስለኛል። ከስጋ አልፎ ነፍስን ነው የሚያደክመው። ምንም ይሁን ግን አይዟችሁ። አይዞን!

የሁምሳና ገርቢቻ ረቢ የማምሻ ወጎች አዲስ መፅሐፍ ተሸላሚወች እነሆ።

1. Eshetu taye
2.Eyasu Desta
3.ሄኖክ ስጦታው ናሁሰናይ
4. Addis Zak
5.Birhane Welde
6.Tofike brodcast
7.Sileshi Negash
8.ፍቅረ አብየ በርሶማ
9 Darsema Temesgen
10.Getahun Alebachew Mersi

አድራሻ

ሁምናሳ ገርቢቻ ረቢ ከዛሬ ጀምሮ እስከ ዐርብ "ንቃ ቡና" ይገኛል።

ሰዓት:- ጠዋት 3:45 - 6:00 ሰዓት፤
ከሰዓት 8:25 - 11:00 ሰዓት።

~ "የማምሻ ወጎች"ን ያልገዛችኹ፣

~ ገዝታችኹ ሁምኔ እንዲፈርምላችኹ የምትፈልጉ (ማስፈረም ፈልጋችኹ ያላገኛችኹት

ከሁምኔ ጋር ምርጥ ቡና እየቀማመሳችኹ ጥቂት ለማውጋት የምትሹ መከሰት ትችላላችኹ።

አድራሻ:- "ንቃ ቡና"
ከአራት ኪሎ ወደ ፒያሳ በሚወስደው መንገድ፣
ከአራዳ ክፍለ ከተማ አጠገብ፤ አንግላ በርገር የሚገኝበት አንደኛ
ፎቅ።

ወይም Behailu Gebreegziabher በኢንቦክስ አናግሩት።

መልካም ንባብ።

እኔ ዲዛየነር ብሆን ኖሮ አብሬ ኮንታ ኮንታ ከማለት ይልቅ እንደጎሳየ ቲሸርት፣ እንደባለባንዲራው ፎጣ የዚህን የኮንታ ሰውየ ባለኮፍያ ልብስ ፋሽን ነበር የማደርጋት። በቃኮ ማስታወቂያው በህዝብ ተሰርቶ ያለቀ ብራንድ ነው። Bejai Nerash Naiker ከኮፍያ እስከግልገል ሱሪ በሶስት ወር አምርቸ በቆነጃጅቶቹ ሞዴልነት ከተማውን ላንቦገቡገው ቃል እገባለሁ። በቀጣዮ ውድድር ይመዝገብልኝ።

ያከሸፈቻቸው ያከሸፏት አገር!
(አሌክስ አብርሃም)

የ8ኛ ክፍል ተማሪወች እንደነበርን ነው። አንድ ቀን የሆነ አስተማሪ ቀረ። በዛ ክፍት ክፍለጊዜ ሁላችንም ደስ ያለንን ስንሰራ (አብዛሀኞቻችን ወሬና መንጫጫት) አንድ ምስጋናው? የሚባል ስዕል መሳል የሚችል የክፍላችን ልጅ ብላክቦርድ ላይ በወዳደቀ ቾክ ሁለት ሰወችን ሳለ። ስዕል ስላችሁ ይሄ ዝም ብሎ የልጅ ስዕል አይደለም፣ ባስታወስኩት ቁጥር የሚገርመኝ የፊታቸው መስመር፣ ፊታቸው ላይ ያረፈው ጥላ፣ ልብሳቸው ላይ ያለው ፓተርን እና ጌጣጌጥ ሳይቀር ፎቶ የሚመሳስሉ ፖርትሬቶች። ደግሞ የሳለው ምንም እያየ አልነበረም። እማሆይ ቴሬሳ ሁለት እጆቻቸውን እንደህንዶች ሰላምታ አገናኝተው ግንባራቸውን እንዳስነኩ እጃቸው መሀል መቁጠሪያ ተንጠልጥሎ፣ እንዲሁም ቀዳማዊ ሀይለስላሴ ከነንጉሳዊ ልብሳቸው ወደጎን ዞር ብለው። ሁላችንም ተገረምን ተደነቅን። የስእሎቹ መጠን የእውነት ሰው ያካክሉ ነበር።

ቀጣዮ ክላስ ጅኦግራፊ ። ኮስታራው አስተማሪያችን ገባና ስዕሎቹን አየት አድርጎ "ማነው የሳለው?" አለ ። በአንድ አፍ "ምስጋናው" አልን በአድናቆት ጭምር። ራሱ ወደምስጋናው ወንበር ተራምዶ ለአንድ ክፍል ልጅ የያዘው ልምጭ ተሰባብሮ እስከሚያልቅ ቀጠቀጠው። ምስጋናው በህመም ተንሰፈሰፈ። እና በቁጣ "ይሄ የተከበረ የትምህርት ገበታ ነው ! ማንም እየተነሳ የሚሸናበት አይደለም፤ ደደብ!" ብሎ ደነፋ። ዳስተሩን አንስቶ አንዴ እጁን ሲያስወነጭፈው ሀይለስላሴን ለሁለት እማሆይ ቴሬሳን አናታቸውን ገመሳቸው። አጠፋፍቶ ማስተማሩን ቀጠለ። ምስጋናው ከዛ በኋላ እንኳን ሰሌዳ ላይ ወረቀት ላይ ሲስል አላስታውስም።

ብዙ ዓመታት አለፉ። አንድ ቀን አዲስ አበባ ፒያሳ መርከብ የምትባል ምግብ ቤት ምሳ በልተን ስንወጣ በር ላይ አንድ የጎዳና ተዳዳሪ በፌስታል ፍርፋሪ ሲበላ አየሁ ምስጋናው ነበር። ቢጎሳቆልም አልጠፋኝም። ዛሬ በምን አስታወስኩት? አንድ አሜሪካዊ ህፃን ሰሌዳ ላይ በቾክ የሳለው ስእል በአስተማሪዎቹና በትምህርት ቤቷ ርዕሰ መምህር ስለተደነቀ በቀስታ ሰሌዳውን አንስተው አንድ ቢሮ ግድግዳ ላይ እንደሰቀሉት አነበብኩ። ስዕሉ ለዓመታት እንዲቆይ የሆነ ነገር እናስደርጋለን ብላለች ርዕሰ መምህርቷ። አገር ባከበረቻቸው ትከብራለች ባከሸፈቻቸው ትከሽፋለች። ይህ ሒሳብ የገባቸው ብፁአን ናቸው። ለትውልድ ፍቅር ያወርሳሉና።

ልስን ድሃ
(አሌክስ አብርሃም)

የዛሬን አያድርገውና "ያጣ የነጣ" የሚለው አባባል ድሃና ድህነትን የሚገልፅ አባባል ነበር። አሁን ላይ በተለይ የከተማ ድሃ ያጣል ግን አይነጣም። ከምግብ ሳይሆን ከሜካፕ እና ከፊልተር በሚፍለቀለቅ ወዝና ውበት በአካልም በሚዲያም እያማረ ይራባል። ድሃ ነው ግን አይነጣም ፣አይገረጣም። ሜካፑ እንዳይበላሽ የሚያለቅሰው ወደውስጡ ነው። ይህ ውበት የነጣና ያገጠጠ ድህነትን ከላይ በሚያብረቀርቅ ነገር በመለሰን የሚሸፋፍን ሲበዛ አሳሳች ውበት ነው።

ልክ እንደመቃብር ሃውልት የውጩ ውበት የውስጡን አፅም ይሸፍንብናል። በዛ ላይ ሀውልቱ ላይ የሚፃፈው የተጋነነ ታሪክና የሚለጠፈው ፎቶ ለሟች ከማዘን ይልቅ በሀውልቱ እንድንደመም ያደርገናል። የሟች ቤተሰቦች ከሟቹም በላይ አንጀታቸውን አስረው ለሀውልት ባወጡት ወጭ ያለቅሳሉ። መፅሐፉ "እናተ በኖራ የተለሰናችሁ መቃብሮች ናችሁ" ያለውኮ እንዲህ ያለው የውስጥና የውጭ ባህሪ አልገጥም ቢለው ነው። ነገሩ ግለሰባዊ ብቻ አይደለም ከተሞችም ተመሳሳይ ባህሪ አላቸው። ለምሳሌ አዲስ አበባን ተመልከቱ። በመብራት፣ በቀለም፣ በህንፃ ተለስና ስትታይ ከምድራችን የድሃ ድሃ አገራት የአስከፊዋ ድሃ አገራችን ዋና ከተማ ትመስላለች? የደሀ ደሀ ፣ ልዝብ ደሃ፣ መራር ደሃ ከሚሉት ማዕረጎቻችን በተጨማሪ " ልስን ድሃ" የሚል የድህነት ደረጃ ጨምረናል።

በሁሉም ነገር ላይ ለዛ ቢስ ሙት ሳቅ
መሳቅ የሚችል ጥርሳም፣ ጅልና ናርስሲስት ትውልድ ተፈጥሯል። በንብረት መውደም ይስቃል፣ በንፁሐን እልቂት ይስቃል፣ በሰው ሞት ይስቃል፣ በሌሎች ለቅሶ ይስቃል፣ ጥርሱን በቦክስ ሲያረግፉት ሁሉ በድዱ ይስቃል። ከንፈሩን መክደን እንዳይችል፣ እንደለፈለፈና እንደገለፈጠ እንዲኖር የተረገመ ጅል። ጥርሱን አግጥጦ የቆመ አፅም።

ይሄ ሞት የሚባል ነገር ከመካከላችን አንድኛችንን ሲያነሳ የሚተወው ሰፊና ጨለማ ቦታ ጥልቀቱ ይጨንቃል። ድንገተኝነቱ የሆነ የሚያፍን ግራ የሚያጋባ ነገር አለው። የኢዮብ ነገር ያሳዝናል። አንዳንድ ሰው አለ ወደውስጣችሁ የሚያስለቅስ። ያሳዝናል። ነፍስህ በሰላም ትረፍ።

በዜሮ ...
(አሌክስ አብርሃም)

አንድ ጓደኛየ መንጃ ፈቃድ አውጥቶ መኪና መንዳት በጀመረ በመጀመሪያው ቀን በሰላም በእግሬ ከምሄድበት ጠራኝና
"ና ግባ አደባባዮን ላሻግርህ" አለኝ
"ግዴለም በእግሬ እሻገራለሁ" አልኩ። ነዝንዞ አስገባኝና ጋቢና አስቀመጠኝ። ገና በሩን ከመዝጋቴ ስለመኪና ባህሪና ስለአነዳድ ቴክኒክ ልቤ እስኪደክም ያስረዳኝ ጀመር። ያለምንም ዓላማ ከተማችንን አንድ ጊዜ አዞረኝ። እስከዚህ ደህና ነበር። "ይሄ ፍሬን ይባላል፣ ድንገተኛ ነገር ሰው ፣ አህያ ወይም የተናኘ ባል የሚነዳው መኪና ቢገቡብህ ማቆሚያ ነው" አለና አጎንብሶ ፍሬኑንን ይፈልግ ጀመረ...(ተናኘ ሹፌር ያገባች የቀድሞ ፍቅረኛው ናት) "እስክትፈልግ ግን ....ከማለቴ ፍሬኑን አግኝቶ ባለ በሌለ ሀይሉ ረገጠው። ወደፊት ተወርውሬ የሆነ ነገር ጋር ተጋጭቸ ተመለስኩ። ዘና ብሎ "አሁን የገጨኸው ዳሽ ቦርድ ይባላል የትም አገር የሚያጋጥም ነገር ነው" አለና ቀጠለ። ደረቴን ደግፌ እያሳልኩ ዝም አልኩ።

ብቻ እንዲህ አሰቃይቶኝ በመጨረሻ "አንዲት ብዙ ሹፌሮች ያልባነኑባት ቴክኒክ ላሳይህ ወደፊት ይጠቅምህ ይሆናል" አለኝ። ወይ እዳየ። ከዚህ ሁሉ ለዓመታት የነዳ ሹፌር ተደብቆ ገና በአንድ ቀን ምን ተገልጦለት ይሆን እያልኩ ሳስብ በከተማችን አለ ወደሚባለው ቁልቁለት መንገድ ወሰደኝና "አሁን እዚህ ቁልቁለት ላይ ሞተሩን ታጠፋውና በዜሮ ትሄዳለህ ...መሪዋ ላይ ብቻ መጫወት ነው...ነዳጅ አተረፍክ ማለት ነው አባቴ" ብሎ ትልቅ ግኝት እንደነገረኝ አይነት በኩራት ሀሀሀሀሀ ብሎ ሳቀ። እኔ ግን ነፍሴ ተጨነቀች። መኪናው ወደታች ፍጥነት እየጨመረ መምዘግዘግ ጀመረ ። ወገኖቸ ባጭሩ ፍሬን ቢረግጥ ምን ቢረግጥ (እኔን ሁሉ እግሬን ቢረግጥ) መኪናው አልቆምም አለ። አታምኑኝም ዞር ስል የሹፌሩ በር ተከፍቶ አጅሬው ሲዘል ተገጣጠምን። ለደይቃወች ራሱን በሚነዳ መኪና ከተጓዝኩ በኋላ .... መኪናዋና እኔ ለግንባታ ፒራሚድ መስሎ የተከመረ አሸዋና ጠጠር ክምር ጫፍ ላይ ጉብ አልን። እዚህ ቴውድሮስ አደባባይ ያለውን የአፄ ቴውድሮስን የመድፍ ሀውልት ነበር የምንመስለው።

አሁን ያለንበትን የኑሮ ሁኔታ ሳየው፣ የሆነ ቴክኒክ ላሳያችሁ ብሎ ያሳፈረን ሹፌር ዘሎ የወረደ እስኪመስለኝ ቀላል እየተምዘገዘግን ነው?! ብቻ ማረፊያችንን ያሳምረው።

መዘበራረቅ

ዝብረቃ 1.

ተኝታችሁ ከተስማማችሁ በኋላ ተንበርክካችሁ "ታገቢኛለሽ?" ማለታችሁ ትንሽ የቅደም ተከተል ችግር አለበት ልበል? ለፆለት የሚንበረከከው ወንድ ከዚህኛው መንበርከክ በቁጥር እያነሰ መምጣቱ እንዳያስቀስፈን ጓዶች።

ዝብረቃ 2.

ፊልሙን ለመስራት 1.5 ሚሊየን ብር አወጣን ካላችሁን በኋላ የዋናዋ ገፀ ባህሪ ሰራተኛ እህት ልጅ ሁና የተወነችው እንስት የሽልማት መድረኮች ላይ 2.9999 ሚሊየን ብር የፈጀ ቀሚስ(አውትፊት ይሉታል) ለብሳ የምትታይበት ሳይንስ ትንሽ ግራ ያጋባል። አንዳንዴ በውበትም በዋጋም ከፊልሙ የሚበልጥ ቀሚስ ስናይ የልብስ ሰፊወች አዋርድ እየመሰለን ተቸግረናል። ለነገሩ የትም አለም የተለመደ ነው።

የውጭ ዝብረቃ 3.

ኤለን መስክ የሚባል በቴክኖሎጅ ፍቅር ልብሱን ጥሎ ያበደ ሰውየ፣ የሆነ መሪ የሌለው መኪና እያስተዋወቀ ነው። በዓለም የመጀመሪያው ካለመሪ የሚንቀሳቀስ ነው አለ። እንኳን መኪና እእእእእ 😀 እሽ ይሁን። የሆነ ሆኖ መኪናው እናንተ ቤታችሁ ተቀምጣችሁ ብቻውን ሄዶ ኡበር /ታክሲ/ ይሰራል ይሸቅላል ሲል ነበር። እና ሮቦቶች የሰወችን ስራ አይነጥቁም? ሲባል ምናለ? ይንጠቋ! ሮቦቶች ይሰራሉ ሰወች ዘና ብላችሁ የኪስ ገንዘብ እየተሰጣችሁ ትኖራላችሁ። ከመጠግረር ምን አላችሁ?

አዕምሮየ ውስጥ የሚተራመሰው ትዝታ ቁጥር ስፍር የለውም። ደሴን ካለእርሳቸው ማሰብ ፣ ልጅነታችን ውስጥ ከነደማቅ ዘርፋፋ የምንኩስና ቀሚሳቸው፣ ከትካሻቸው ከነማትጠፋ የድምፅ ማጉያቸው...ነጥሎ ማስታወስ የሚቻል ነገር አይደለም። ምን ብየ እንደምፅፍ እንኳን አላውቅም። አባ መፍቀሬ መንፈሳዊ አባት ናቸው፣ በዚያ ላይ እሳቸው ያሉበት ሳቅ አይጠፋም። ከቤተክርስቲያን እኩል የከተማውን ህዝብ ይጠቅማል የተባለ የልማት ስራ ላይ በውርርድ አይታጡም። ህዝብን በጎ ላሉት ተግባር ሁሉ ማስተባበር ሙሉ ህይወታቸው ነበር። እንዲህም አይነት ላመኑበት መሰጠት፣ እንዲህም አይነት የሁሉም ሰው ወዳጅ የሁሉም አባት መሆን እንዴት እንደቻሉ ይገርመኛል። ሌላ ጊዜ ስለእርሳቸው በሰፊው እፅፋለሁ። ምንም ቢባል አባይን በጭልፋ ነው። ለዛሬ እርሳቸውን ባሰብኩ ቁጥር የሚታወሰኝን አንድ የልጅነት ትዝታየን ልንገራችሁ :-

ኳስ የምንጫወተው የቤተ ክርስቲያን መተላለፊያ አቧራማ መንገድ ላይ ነበር። ክረምትና ቀዝቃዛ ቀን ነው ። መንገዱ ጭቃ ሁኗል። አባ መፍቀሬ ለብቻቸው ፀሐይ የወጣላቸው የሚያስመስላቸውን ደማቅ የምንኩስና ልብሳቸውን ለብሰው ረጋ ባለ ርምጃ መጡ። ለወትሮው ሰው ሲያልፍ "ፖዝ" እንዳደረጉት ቪዲዮ በያለንበት ቁመን በማሳለፍ የምንመረቅ ልጆች የዛን ቀን ምን እንደተፈጠረ እኔጃ፣ (ምናልባት አላየናቸውም?) ብቻ በጭቃ የተለወሰችው ኳስ ተጠለዘች፤ በቀጥታ ወደ አባ መፍቀሬ ተወነጨፈች። በመቋሚያቸው ሊከላከሏት ቢሞክሩም አልፋ ልብሳቸው ላይ ጭቃውን አተመችው። በጣም ብልግና ነበር። ወዲያው የምንቀሰፍ ሁሉ ነበር የመሰለን። መሳቀቃችን እስከአሁን ስሜቱ አይረሳኝም። ተቆጡ የእውነት ተቆጡ! አጠገባቸው ወደነበርነው ልጆች መቋሚያቸውን እንደማንሳትም ቃጣቸው። "አትሄዱም ከዚህ ሰው በየት አልፎ ቤተስኪያን ይሳም?" እያሉ ሲገስፁን አንዲት ከየት እንደመጣች ያላየናት ነገረኛ ሴትዮ(እስከአሁን ሳስባት እበሳጫለሁ) ርግማኗን ታወርድብን ጀመር። "መደሀኒያለም እግራችሁን ይስበረው ፣ የመስከረምን ውሃ አያጠጣችሁ....."

አባ ማፍቀሬ "በህግ አምላክ" ብለው ጮሁ። ለእኛ መስሎን በቆምንበት ደርቀን ቀረን "በህግ አምላክ ይችን ሴትዮ አፏን ያዙልኝ፣ የሚያድጉ ልጆች እረግማ አንድ ነገር ቢሆኑ ውርድ ከራሴ😀😢 እኒህ አባት አባ መፍቀሬ አረፉ።

ችግራችሁን እያየን ያልደረስንላችሁ ይቅርታ!
ችግራችንን እያያችሁ ያልደረሳችሁልንም ይቅርታ!
(አሌክስ አብርሃም)

ፍቅር ብቻውን መልስ የሚሆንበት ጊዜ ላይ አይደለንም።
በማንም ላይ መፍረድ ከባድ ነው። ሲቸገሩ መርዳት አለመቻል ከሚፈጥረው ህመም ለመራቅ ከምንወዳቸው ወዳጆቻችን እንርቃለን። ዓይናቸው ውስጥ ያለውን ስቃይ ላለማየት ዓይናችንን እንሰብራለን።የአቅማችንን መደገፍ እንኳን ከአቅም በላይ ሆኗል። የተወለድንበት እና ያደግንበት ስር የሰደደ አብሮነት፣ መረዳዳት አሁን እግር ከወርች ካሰረን ኑሮ ጋር አብሮ አልሄድ ብሎ አስጨንቆናል። ረስተነው ወደወዳጆቻችን መንገድ ከጀመርን ፣ልንደውል ስልክ ካነሳን በኋላ ባዶ አይናቸው እጃችሁ ከምን ቢለንስ ብለን ተመልሰናል። ከመሄዳችን በላይ ምን ይዛችሁ መጣችሁ የሚለን አንደበታቸው ሳይሆን ኑሯቸው ሁኗል። የተጨነቀ መንፈስ፣ የተጨነቀ አየር። የማንንም እርዳታ የማይፈልጉ መንፈሰ ፅኑ ወዳጆቻችን ነገሮች ከአቅም በላይ ሆነውባቸው በዓይናቸው ባዶ ኪሳችንን ሲቃኙ ብናይ መርዳቱ ቢቀር አንታዘባቸውም። "እንትናም ተቸገረ?" ብለን አናሾካሹክም። ይገባናል ሰው ወደገደል ቢወድቅ አዳነውም አላዳነውም አጠገቡ ያገኘውን ሳርም ይሁን ቅጠል በደመነፍስ ጨምድዶ እንደሚይዝ። ሁላችንም ገደሉ ውስጥ ነን።ልብሳችንን አንቀው የሚማፀኑን እኛም የሌሎችን ልብስ አንቀን መንጠልጠላችንን ያውቃሉ። የመያያዙ መጨረሻ፣ የገደሉ ጫፍ የት እንደሆነ ማን ያውቃል?! እጃችን እየዛለ ነው። ደመነፍስ ላይ ነን። ማንንም ለመዳን እንይዛለን በማንም እንያዛለን። ችግራችሁን እያየን ያልደረስንላችሁ ይቅርታ። ችግራችንን እያያችሁ ያልደረሳችሁልንም ይቅርታ። ሁላችንም ገደሉ ውስጥ ነን።

$$$$ $$$$$$?
($$$$ $$$$$)

$$$$$$$ $$ $$$$$ $$$$$$$$$$?
$$$$ $$$$$ $$$$$፦
1.$$$ $$$$
2.$$$$$ $$$$$
3.$$$$$$ $$$$ $$$
4.$$$$$$$ $$$$$$ $$$
5.$$$$$$$$$$ $$ $$$$ $$....

ጅሆቫ ዊትነሶች(የይሖዋ ምስክሮች) ግን አስተምሮታቸው ምንም ይሁን፤ እንዲሁ መረጋጋታቸው የዘላለም ህይወት መኖሩን ፣ ጌታም ተመልሶ እንደሚመጣ ይሰብካል!በመንገዴ አንዲት ቦታ ላይ ቆመው ለሚፈልግ ሰው ወረቀት የሚሰጡ ሶስት ሴቶች አሉ፣ ረዢም ቀሚሳቸው የማያልቅ ፏፏቴ የመሠለ! የሆነች ተሽከርካሪ ነገር ላይ መፅሄትና ወረቀቶቻቸውን በስርዓት ደርድረው ይሄው ስድስት ዓመቴ እኔ እንኳን ሳያቸው! አይለያዮ፣ ቦታ አይቀይሩ፣አያረጁ እንደጎፋው አፍቃሪ እዛቹ ቁመው አሉ አሉ! አሜሪካ ምድር ላይ "ቸርቾች" እንኳ እንዲህ ፀንተው አንድ ላይ አይቆዩም!

ለረዢም ጊዜ ሳልፍ አይናችን ሲገጣጠም ፈገግ ብለው ድምፅ የሌለው ሰላምታ ይሰጡኛል! የለመለመው መስክ፣ ፏፏቴው፣ አንበሳው ፣አበባው ፣ነብሩ፣ አበባውና እባቡ ከጎናቸው የሉም እንጅ እርጋታቸው ጌታ መጥቶ የሺ ዓመት መንግስቱን የተከለ ሁሉ ነው የሚመስለው! ከዓመታት የአንገት ሰላምታ በኋላ ለምንድነው የማይሰብኩኝ "ወንድሜ ይችን ያዛት የማይሉኝ" ብየ አሰብኩ! አሁን አሁንማ ስንተያይ ሸም እየያዘኝ ራሴ ሄጀ እስኪ እነዚህን ወረቀቶች ስጡኝ ማለት ይቃጣኛል !የማወራው ስለአስተምሮቱ አይደለም ስለዛ ምንም አላውቅም! እርጋታና ትህትናቸው ግን የእውነት ያስደምመኛል! ለመሆኑ እዛ እምነት ውስጥ ያላችሁ ወዳጆች ትኖሩኝ ይሆን? በዚህ ዓይነት ቃል ሳትተነፍሱ አስር ዓመት ጓደኞቸ ሁናችሁ ይሆናልኮ😀

ሙዚቃ ራሱ የእናት ፍቅር ፊት አቅም የለውም!
(አሌክስ አብርሃም)

ጋዜጠኛ መዓዛ መላኩ በድምፃዊ ሀጫሉ ሁንዴሳ ህይወትና ስራዎች ላይ የሚያጠነጥን ቆንጆ ዘጋቢ ፊልም አዘጋጅታ ነበር ! ብዙ የሙዚቃ ባለሙያ ወዳጆቹን አቅርባ ስለግጥምና ዜማ ችሎታው፣ ስለጥበብ ፍቅሩ፣ ለኦሮሞ ህዝብ ስላደረገው ትግል፣ ስለጀግንነቱ ፣ስለመልካም ባህሪው ወዘተ ብዙ አሉ፤ በመጨረሻ እናቱን ጠየቀቻቸው " ሲዘፍን ሳየው ምነው አበዙበት ደክሞትኮ ነው እላለሁ ፤ ዘፈኑ እቤት ሲከፈት እራሱ አላይም ነበር! ደሞ አያስችለኝም ይሄን ሱሉልታ የሰራውን አየዋለሁ ፤ ዘፈን እወዳለሁ፤ ግን እንጃ እሱን ሳየው እሰስታለሁ፣ አየነው ሲሉኝ እሰስታለሁ" አሉ! ቋንቋውን የማይችለው ህዝብ እንኳን የሚያረግድላቸው እነዛ የሀጫሉ ዘፈኖች እናቱን የሚያስፈነደቁ አልሆኑም! የአድናቆት ክንብንቦቹን ገፈው ልጃቸውን ነበር የሚያስቡት! ግጥም ዜማ ጀግንነት ቅብርጥስ ለእናት ምኗ ነው?! አይደለም ሌሎች ከራሷ አይን እንኳን የምትሰስትለት ልጇ ነው አልፋና ኦሜጋዋ! ያኔ ወይ እናትነት አልኩ! የስሜቱ ጥልቀት አመመኝ! ከሙሉ ፊልሙ ያችን ክፍል ስንት ጊዜ ደጋገምኳት!

በቅርቡ ደግሞ የድምፃዊ ዳኘ ዋለ ወንድ ልጅ ቆረጠ " የሚል ዘፈን ተለቀቀ ፤አገር ምድሩን በስሜት አንዘረዘረው፤ ግጥሙ ዜማው ደመ ቀዝቃዛ ነኝ የሚለውን ሳይቀር ናጠው! ሳር ቅጠሉ ዘራፍ አለ! እና በዚህ መሀል (((የድምፃዊው እናት ናቸው))) የተባሉ አዛውንት (በትክክል እናቱ ይሁኑ አይሁኑ አላወኩም)፣የሆነች ልጅ በስልክ የዳኘን ዘፈን ስታሳያቸው የሚያሳይ ቪዲዮ ተለቀቀ! እናት ለደይቃዎች እንኳን ማየት አልቻሉም፤ ፊታቸው ላይ ያለው ስጋትና ስቃይና ስስት በቃል አይገለፅም ፤ እራሳቸውን በሀዘን እየነቀነቁ ስልኩን መልሰው ክፉኛ ተከዙ ፤ ከእርሳቸው በቀር በዛ ዘፈን ማንም መተከዝ አይችልም! እና እንባ በሚተናነቀው ድምፅ ምናሉ " የከፋው ከፋው ነው .." ወደሰማይ ቀና ብለው " አምላኬ እንዴት ታረገኝ ይሆን? አደራህን ቅድሚያ ለኔ..." ብለው በጥልቅ ትካዜ ወደሚቆሉት ቡና አቀረቀሩ! ልጅቱ እንደገና እንዲያዩት ብትጋብዛቸውም ማየት አልፈለጉም! እንዴት ይሆን ሙዚቃን ያህል ምትሀት እናቶችን በሪትሙ ከእናትነት ፍቅራቸው፣ በግጥሙም ከስስታቸው ማዘናጋት ያልቻለው? በእርስ በርስ ጦርነታችን ስን ሚሊየን እናቶች ይሆኑ እንዲህ ከዘፈንና ፕሮፖጋንዳው ኋላ ለልጆቻቸው የሚንሰፈሰፉት? በሀዘንና በስጋት የሚሰቃዩት? እንጃ ስሜቴን በትክክል ገልጨው ከሆነ! ብቻ ሲገርመኝ እኖራለሁ!

እህቴ አግብተሻል?

አግብተሻል? የሚለው ጥያቄ (የጥያቄው መንፈስ ጤነኛ እስከሆነ ድረስ) ትክክለኛና በየጊዜው ሊጠየቅ የሚገባው ጥያቄ ነው! ሰዎች ለምን እንደሚበሳጩ አይገባኝም! አለማግባት የነፃነት ምልክት አይደለም፣ በነፍስም በስጋም ብቸኛ የመሆን ፣ የሚፈልጉት ጋር ያለመገናኘት ፣ የነገሮች አለመገጣጠም፣ ወይም ባለፈ የፍቅር ህይዎት መጎዳት ፣ የሌሎች የታመመ ትዳር የሚፈጥረው ፍርሃት ወዘተ ምልክት ሊሆን ይችላል! በእርግጥ ለመንፈሳዊም ሆነ ዓለማዊ ዓላማ መሳካት ሲባል ምርጫም ሊሆን ይችላል! የሆነ ሆኖ እንኳን ባል የልብ ጓደኛ የነፍስ ምቾት ነው! የቷ ነፍስ ናት ምቾት የምትጠላ?
የሆነ ሁኖ እህቴ አግብተሻል? መልስሽ አዎ ከሆነ አይዞሽ😀 ትዳር በራሱ ብዙ የግል ምቾትና እኔነት አፈር ከድሜ የሚያበላ ሀላፊነት ነው! ጤነኛ ትዳር የሚሻለው ከብቸኝነት ብቻ ነው!

ላይቭ ላይ የተጋበዙት እንግዳ ስለሰላም እያወሩ በወሬያቸው መሀል በረዢሙ ሲያገሱ አልቻልኩም' ኧኧኧኧኧኧኧኧኧኧኧ ናዳ ነው የሚመስለው! ሁለተኛም በስሱ ደግመዋል! 😀😀 ቁርሳቸውን ሙሉ ጨጓራ በሁለት ጃምቦ ሳይቀምሱ አልቀሩም! ! የበለጠ ያሳቀኝ ሰውየው ምንም እንዳልተፈጠረ "እና...." ብለው ሊቀጥሉ ሲሉ ጋዜጠኛው በምታሳዝን ፈገግታ "ይቅርታ ተመልካቾቻችን" ብሎ መቀጠሉ! እሳቸው ላገሱት! እስካሁን ያንን ግሳት ያገሳው ጋዜጠኛው ቢሆን በሽብር ጠርጥረው" መንግስትና ህዝብ ላይ በማግሳት ወንጀል" ባሰሩት ነበር!ብቻ ለጉድ ጎልቶናል!

ፍቅራችን ራሱ የጨበጣ ውጊያ!

"እከሌም እከሊትን አወቃት ወንድ ልጅም ወለደች " ይላል መፅሐፉ ነገሩን በፍፁም ጨዋ ቃል ሲገልፀው! የእኛ አገር አገላለፅ ግን አወቃት ሳይሆን ወቃት አይነት ደመ ቁጡ ሞገደኛ ስሜት አለው! እንደሰውም እንደህዝብም ለምንወደው ነገር እንዴት ቆንጆ ቃል መምረጥ አቃተን?

ይገርማችኋል ስለ ወንድና ሴት ግንኙነት ሲወራ የምንጠቀመው ቃል ዘግናኝ ከመሆኑ የተነሳ " ከዚህ ሁሉ ቢቀርብኝስ" የሚያስብል ነው! ግን ማንም ይቅርብኝ ብሎ አያውቅም! ስለሆነ አውዳሚ ጦርነት የምናወራኮነው የሚመስለው! ሴቶቹ ላይማ ገና ሲወለዱ ይጀምራል ! "እንዳትባልግ እንትኗን ገርዟት " አስባችሁታል ወንዱ እንዳይባልግ እንትኑን አጠር አድርጉለት ቢባል? ሲያጭበረብሩ ደግሞ "ወንድም ይገረዛልኮ" ይሉናል! ... ወንድ ሲመረቅ ራሱ "እንደፍየል ቀንድ ያቁምልህ ነው የሚሉት" አደግ ሲሉ አጎጠጎጠች ፣(ብዙ ሴቶች እጅ በደረት የመጀመሪያ ሰልፍ ድፌንሳቸው የሚሆነው ለዛ ነው፣ ከሰው አፍ) አጎነቆለች፣ ቆላት ፣ አንቀለቀላት፣ የሚያደርጋትን አሳጣት ሻፈ*ች...አለጠለጠች ! ኧረ ምኑን ሰጠሽ በዜማ ሁሉ....

ወንድ ጋር ገና ሲቀራረቡ ደግሞ ይቀጥላል... ገለፈጠች ፣ተዳራች፣ ተላፋች፣ ተጓተተች ...እግሯን አነሳች ..አሽኳለለች፣ እሽካነናት ፣ እዮኝ እዮኝ አለች ፣ በሽታዋን ይዛ እንዳትመጣ ፤ ዲቃላዋን እንዳትታቀፍ ፣ አምሯታል፣ እሳት አድርጓታል ፣ ተሸራ**ች....በስርዓት ብታገባ ወሲብ ፣ ግብረ ስጋ፣ ተራክቦ፣ ሩካቤ ስጋ ፣ አንሶላ መጋፈፍ፣ (መጋፈፍን ምን አመጣው? አንች ልበሽ አንተ ልበስ እያለ) መርፌና ክር! ሳታገባ ከሆነ መዳራት፣ ማመንዘር፣ የባለጌ ስራ፣ ከአልጋ መውደቅ ዘመነኛው አገላለፅማ ተውት የመጨረሻ ቀፋፊ ነው! የባሰበት ዘግናኝ! ከአባቶቹም የከፋ ትውልድ ተነስቷል!

ከዛስ ክብረ ንፅህናዋን ገሰሰው፣(የሆነ ለመንገድ ስራ በደማሚት የሚፈርስ ተራራ ነው የሚታየኝ) ድንግልናዋን ወሰደው፣ (መቀበል መፈቃቀድ አይደለም የሆነ ነጥቆ መውሰድ) ብር አምባሯን ሰበረው እንደውም ሰበረለዎ ነው የሚባለው (የጠላትን አከርካሪውን ሰበርነው እንደሚሉት) በጧት ተነስተው አሳየው የደሙን ሻሽ... ይሄ ሁሉ ረብሻ የሆነ ቃል ሳያቆመን 130 ሚሊየን ሞላን! የሴቶቹ አቻቻል የወንዱ ጋሬጣ መሆን ምነው ለልማት እንዲህ በሆንን! ምናልባት "ልማቱን እንግሰሰው" ቢባል ይሄን አይበገሬነት ለልማት ማዋል ይቻል ይሆን?

እንደገና ታትመዋል!
(አሌክስ አብርሃም)

ዙቤይዳ ..........ለ16ኛ
ዶክተር አሸብር...ለ15ኛ
ከዕለታት ግማሽ ቀን 12ኛ
አልተዘዋወረችም ለ7ኛ ጊዜ ታትመው በዚህ ሳምንት እንደገና ለገበያ ቀርበዋል። ቱባ ቲዮብ ላይም ዙቤይዳ በድምፅ ተተርኮ በአማራጭ ቀርቧል፤ ሌሎቹ መፅሐፎቸም በኢ-ቡክ ይገኛሉ! https://tuba.et
እንዲሁም በመላው አለም የግጥም መፅሐፎቸን ጨምሮ ያሳተምኳቸውን 6 መፅሐፍት በአማዞን በኩል በየጊዜው እየታተሙ ስለሆነ ኮሜንት ላይ በተቀመጠው ሊንክ ማዘዝ፣ ማንበብ ይቻላል! እስኪ ያላነበበ አለሁ ይበል'😀 ስላነበባችሁልኝ ደስ ይለኛል! አመሠግናለሁ🙏

ክፍት የጓደኝነት ማስታወቂያ! #FB

ከ2013- 2022 ድረስ አካውንታቸው ላይ ምንም ነገር ፖስት አድርገው የማያውቁ በርካታ አካውንቶችን አንፍሬንድ አድርጊያለሁ! (ፌስቡክ ከተንቀሳቀሱ የቆዩ ሙት አካውንቶችን ሊስት እንዲያሳያችሁ ማድረግ ትችላላችሁ) እና በተሰናበቱት ምትክ አሪፍ ነገር እፅፋለሁ፣ አነባለሁ፣ ቁጥር ብቻ አይደለሁም፣ እንወዳጅ የምትሉ የጓደኝነት ጥያቂያችሁን ላኩልኝ! በስህተት ያሰናበትኩት ካለም የይግባኝ መብቱ የተጠበቀ ነው😀

አንዳንድ ሙሽሮች ግን በተለይ ሴቶች እንዴት እንዴት ነው የሚያደርጋቸው እናተ? የመጨረሻውን መጨማለቅ የሰርጋቸው ቀን አሟጠው ለመጠቀም የወሰኑኮነው የሚመስሉት😀 ነገ ታዲያ "የባሌ ቤተሰቦች አልወደዱኝም" እያላችሁ ተነፋረቁብን ... እንዴ! መቀመጫችሁ የባላችሁን እናት አፍንጫ እስኪነካ እንደዛ ...ሆ! ምንስ ሰርገኛው ምሳ ቢጋበዝ የእናተን...የማየት ምን እዳ አለበት? መቀመጫሽ አያምርም ብሎ የተለያችሁ ኤክሳችሁ ላይ ቂማችሁን የምትወጡኮነው የምትመስሉት! 😀 ዛሬ ያየሁት ቪዲዮ ላይማ ቄሱ ሳይቀሩ ቢጨንቃቸው አይናቸውን ሸፍነው በለሆሳስ ሙሽሪቷን መገዘት ነው የቀራቸው! ከምር ግን ሙሽራ ትንሽ ረጋ ሲል ደስ ይላል! ለመሆኑ የሰርግ ልብስ፣ የሰርግ ዘፈን፣ እንደሚባለው የሰርግ ጭፈራ የለንም?

በበሰበሰ ሚዛን ራስህን አትመዝን!
(አሌክስ አብርሃም)

አንድ ሐሳብ የተሳሳተ ነው ሲባል «እንዴ አሜሪካና አውሮፓ ተቀብለውት የለ እንዴ እንኳን እኛ» የሚል መከራከሪያ የሚያቀርቡ ሰዎች ያልተረዱት አንድ ነገር ያለ ይመስለኛል! አሜሪካና አውሮፓ አሁን ባሉበት ሁኔታ የሞራል፣ የባህል ፣ የመንፈሳዊ ጉዳዮች መለኪያ ሊሆኑ ቀርቶ ራሳቸውም መለኪያቸው ወድቆባቸው ብዙሃኑ የደም እምባ የሚያለቅስባቸው ምድሮች ናቸው! የትኛውም ሰው እንደፈለገ ይኖር ዘንድ ለራሱ አዕምሮ ተላልፎ የተሰጠበት ምድርነው! አይደለምና መከራከሪያ ሐሳብ ያለው ፍልስፍና የፈለከውን መቀዣበር ይዘህ ብትሄድ አይከለክሉህም! ለምሳሌ ጅብ መጋለብ ፣ መስለብ ፣ ጅኒ መጥራት ፣ ጥላ ወጊ አስተምራለሁ ብላችሁ ማስታወቂያ ብትሰሩ «የሚታይ ጉዳት» እስካላስከተለ ድረስ ወይም ጉዳቱን "በፈቃደኝነት ለመቀበል" ሰዎች እስከፈረሙ ድረስ መንግስትም አይከለክላችሁ፣ ህዝቡም እረኛ የለውም ፤ እየመጣ ይመዘገባል! ከእናተ የሚጠበቀው «አርት ነው» ማለት ብቻ ነው! በየመንገዱ መዳፍ አንባቢና መንፈስ ጠሪ ብለው በግልፅ ማስታወቂያ ሰቅለው ታያላችሁ! አማዞንን ጨምሮ በየገባየው የጥንቆላና የመመተቻ ቁሳቁስ በግልፅ ይሸጣል! ወጣቶች እንደቀልድ ገብተውበት ለብዙ የአዕምሮ ህመም እየተዳረጉ ነው!

አስባችሁታል የ13 ዓመት ልጆች ፆታቸውን ማስቀየር ከፈለጉና ትምህርት ቤታቸው ለመምህራቸው ወይም ለአማካሪያቸው ካሳወቁ ወላጅ ፈቃዱ ሳይጠየቅ የፈለጉትን እንዲሆኑ ፈቃድ እስከመስጠት የደረሱ አገራት ናቸው! የ 13 ዓመት ህፃን! ትምህርት ቤት የላከው ወንድ ልጅህ ሳትሰማ ሴት ሁኖ ሊመለስ ይችላል! ዘራፍ ካልክ ከተቆጣህ ተደፈርኩ ምናምን እምነቴ ሐይማኖቴ ካልክ ወስደው ያሳድጉታል! ምን ታመጣለህ?! በዓለማችን ቤተሰብ ላይ ከተፈፀሙ ግፎች ሁሉ የበለጠው ዘግናኝ ግፍ ነው! ግን ስልጡን ናቸው! ለዚህ ግፍ 13 ዓመት የሚል ገደብ ያስቀመጡ ግን ፊልም ለማየት መኪና ለመንዳት 16 እና 18 አመት የሚሉ ስልጡኖች! ምንም እንኳን በሳይንስና ቴክኖረሎጅ ቢመጥቁም መንፈሳዊ ሐብታችሁን እንዲያስተዳድሩላችሁ በአደራ የምትሰጧቸውም ምሳሌ የምታደርጓቸውም አገራት አይደሉም! እንደአገር «መንፈሳዊ» የሚባለው የሰው ልጆች ትልቅ ፀጋና ማስተዋል ነፍሶበታል! በትምህርት አታመጣው በሃብት! ሰው በመሆንህ የሚሰጥ ፀጋ ነው! ከጣልከው ይጥልሃል!

ምን ማለት ነው ? መንፈሳዊነት ሐይማኖተኝነት ማለት አይደለም! ሐይማኖት አይደለም መንፈሳዊነትን የሚፈጥረው መንፈሳዊነት ነው ሐይማኖትን የፈጠረው! ምንም መንፈሳዊ ይዘት የሌለው ሐይማኖት አለኮ! ሰዎች ሐይማኖትን ወደሚፈልጉት መንገድ ሲጠመዝዙት ታያለህ ፣ መንፈሳዊ ማንነት ግን በምንም አይጠመዘዝም! መንፈሳዊ የሆነው ማንነትህ ተታለህም ይሁን ፈልገህ ከሞተ ሰላም፣ ፍቅር፣ ርህራሄ፣ ቅንነት ፣ደግነት፣ ርካታ፣ የሃላፊነት ስሜት ፣ እኒህን ሁሉ ታሳድጋቸው ዘንድ የሚያስታውስህ ሐይማኖት ራሱ እና ሌሎችም የሰው መገለጫ የሆኑ ባህሪና አመለካከቶችን የሚይዘው ክፍልህ ጎድሏል ማለት ነው! መመለስ ከባድ ነው! ስልጡን የምተለው ሕዝብ ነገር ዓለሙ ሲዘባረቅበት ዮጋ ቢል ሜዲቴሽን ቢል ከዚያ ከዚህ የማንንም ፍልስፍና ቢያጠራቅም የረቀቀ የስነልቦና የስነ አዕምሮ ህክምና ላይ ቢደርስ፤ አንተ አሁን አናንቀህ ለመጣል የምትታገለውን መንፈሳዊ ማንነት መልሶ ማግኘት ሱሚ ሆኖበታል! ከመጣልህ በፊት አስብ! ድህነት ያልፋል ፣ ያለህበት የዝቅታ ገዜ ገደብ አለው ፣ የተዘፈክበት የትኛውም ውድቀት አለመረጋጋት ዘላለማዊ አይደለም፣ በምንም የማትመልሰው መንፈሳዊ ማንነትህን ለምንም ነገር አትጣል! ጆሮ ያለው ይስማ!

የኦሾ ነገር!

ንግግሮቹንና ተሰባስበው የታተሙ ስራዎቹን ለዓመታት ሳዳምጥና ሳነብ ነበር ! ከዕምነትም ሆነ ከሌሎች ፅንፍ ከሚያስይዙ ጉዳዮች ነፃ ሆኘ ሳየው ለእኔ ኦሾ ማለት ዩቲዮብ ከመጀመሩ በፊት የነበረ የተሳካለት ዩቲዮበር ነው የሚመስለኝ! የሌሎች ስራ እምነትና ባህል ላይ ተመርኩዞ በውብ ቋንቋና በድፍረት ከመተቸትና ከማንኳሰስ እንዲሁም ጎበዝ ተራኪ ከመሆን ውጭ አንድም የራሱ የሆነ ሐሳብም ይሁን ፍልስፍና ኖሮት አላየሁም! በዚህም ብዙ ተከታይ፣ የሚዘገንን ሐብት እንዲሁም ዝና ከማትረፉ ውጭ ፣ይፍረስ ባለው ላይ የገነባው ወይም የጣለው አዲስ የፍልስፍናም ይሁን የሌላ አስተምሮት መሠረት አላጋጠመኝም! ለዛም ሳይሆን አይቀርም ትልቅ ዝናና ስም ግን በፍጥነት የተሽመደመደ አስተምሮት ባለቤት የሆነው! በእርግጥ ጎበዝ አንባቢና መልከመልካም እንዲሁም የተሳለ አዕምሮ ባለቤት ነበር! ሐሳብ አለ?

ለምንድነው ግን የትም የማይሄዱ ሰዎች እንዲህ ተጋፍተው ተሰቃይተውና ገንዘባቸውን አራግፈው ፓስፖርት የሚያወጡት? ወይስ ፓስፖርት ከዓለም አቀፍ የጉዞ መታወቂያ ዶክሜንትነት ያለፈ የማላውቀው ሌላ አገልግሎት ይኖረው ይሆን?