نتاوي

شركة Alphabet (جوجل) بتواجه أزمة وجودية حاليا بتهدد بتفككها 👨‍⚖️

في قضية بقالها فترة بين وزارة العدل الأمريكية وشركة ألفابت، الشركة الأم لجوجل بسبب ممارسات الشركة الاحتكارية.

تقارير تم نشرها امبارح عن نية وزارة العدل إجبار جوجل على بيع متصفح كروم، متصفح الإنترنت الأكثر استخداما على الإطلاق.

كمان ممكن يتم إجبار جوجل على فصل نظام الأندرويد عن متجر جوجل بلاي ومحرك البحث الخاص بيها، بحيث منتجات جوجل موجودة إجباريا على نظام الأندرويد زي ما هو حاليا.

وزارة العدل عايزة كمان تفرض على جوجل مشاركة بيانات البحث والتكنولوجيا مع الشركات الأخرى لتحسين المنافسة في السوق.

الهدف من الخطوات دي هو تقليل سيطرة جوجل، خصوصا إنها بتستخدم معظم المنتجات المنتجات دي لجمع بيانات عن المستخدمين والاعتماد عليها في خدمات البحث بتاعتها والذكاء الاصطناعي، وده بيخلي المنافسين يلاقوا صعوبة في المنافسة.
ده ممكن يفتح فرص لشركات تانية زي Bing & DuckDuckGO لكن جوجل بترد إن الخطوات دي "متطرفة" وبتقول إنها هتضر المستخدمين والمطورين.

إصدار iOS 18 بيمنع إعادة استخدام أجزاء الآيفون المسروق زي الشاشة والكاميرا والبطارية من إعادة الاستخدام.

التحديث بيعمل ربط بين معرفات الأجزاء دي وبين معرف المستخدم نفسه "Apple ID"، بحيث إنها لو تم محاولة استخدامها على جهاز بمعرف مختلف مش هتستخدم.

اللي هيسرق آيفون بنظام iOS 18 دلوقتي مش هيعرف يعمل بيه حاجة..

بسبب العقوبات والحظر المفروض عليها من الحصول على معظم تقنيات والشرائح الخاصة بالهاردوير؛ شركة هواوي نجحت في تطوير نوع جديد من وسائط التخزين اسمه Magneto-Electric Disk (MED).

كل وسيط تخزين بيكون موجود فيه SSD معاه نظام شرايط خاص بيه وبكرات ومحركات ورؤوس قراءة وكتابة. البيانات اللي بتتكتب على الـ MED بتتخزن أول حاجة على الـ SSD عشان تبقى متاحة بسرعة، وبعد كده بتتنقل بشكل متتابع للشريط الداخلي للتخزين.

حسب الشركة فالنوع ده بيستهلك حوالي 10% من الطاقة اللي بيستهلكها هارد HDD عادي، وبيوفر سرعة نقل بيانات تصل إلى 8 جيجابايت في الثانية.

أول إصدار من الوسيط ده هيكون بحجم 72 تيرابايت.

آجهزة آيفون بأحدث إصدار iOS 18 بقت بتعمل إعادة تشغيل تلقائي لنفسها بشكل غامض!

في تقرير مسرب من بعض المعامل الجنائية الرقمية في أمريكا، اشتكى المحللين فيها من قيام أجهزة الآيفون اللي من المفترض هتخضع لتحليل جنائي رقمي بسبب ارتباطها بقضايا بإعادة تشغيل نفسها تلقائيا بشكل غريب لأول مرة يحصل!

المحليين خمنوا إن ممكن تكون شركة آبل قدمت تحديث غير معلن في الإصدار رقم 18 من نظام iOS، من خلال أجهزة الآيفون بتتواصل مع بعضها، وخلال التواصل ده لو جهاز اكتشف جهاز تاني شغال وتم فصله عن شبكة الاتصالات لمدة 24 ساعة بيبعتله أمر بإعادة التشغيل.

إيه المشكلة في إعادة التشغيل؟
المشكلة للمحللين إن لو الآيفون شغال في وضع [After First Unlock (AFU)] يعني تم فتح القفل بتاعه مرة على واحدة على الأقل، ده بيسهل عليهم الدخول للموبايل، لكن لو الموبايل فقد الوضع ده بإعادة التشغيل [Before First Unlock (BFU)] بيكون من شبه المستحيل الدخول للموبايل.

الأغرب في القصة دي إن فيه موبايل حصله إعادة تشغيل بالرغم من وجوده داخل Faraday Box، وده صندوق بيعزل المؤثرات الكهرومغناطيسية والخارجية، عشان يمنع أي محاولة للتواصل من الخارج مع الجهاز!!!

شركة جوجل أعلنت عن اكتشاف الذكاء الاصطناعي لثغرة أمنية من نوع 0-Day للمرة الأولى 🤖

جوجل عاملة مشروع مشترك بين فريق Project Zero اللي بيضم مجموعة من أفضل الباحثين في مجال أمن المعلومات، وبين فريق DeepMind اللي بيضم مجموعة من أفضل الباحثين في مجال الذكاء الاصطناعي لتطوير نموذج ذكاء اصطناعي اسمه Big Sleep قادر على اكتشاف الثغرات الأمنية.

النموذج ده قدر يكتشف ثغرة أمنية من نوع Stack Buffer Underflow تصنيفها Zero-Day في محرك قواعد البيانات الشهير SQLite، ودي بتعتبر من أخطر أنواع الثغرات الأمنية، عشان تكون دي أول مرة يكتشف فيها نموذج AI ثغرة من النوع ده.

25% من الكود البرمجي اللي بتنتجه شركة جوجل دلوقتي بيتم كتابته بواسطة الذكاء الاصطناعي 🤖

ده مؤشر مهم على:
1. اتجاه صناعة البرمجة في السنوات القادمة مع تطور قدرات الذكاء الاصطناعي، واعتماد الشركات عليه، مقابل تسريح آلاف المطورين من أكبر شركات التقنية زي جوجل & مايكروسوفت.

2. سبب التجربة السيئة اللي أصبحت كتير من منتجات جوجل بتقدمها مؤخرا وأولها محرك البحث.

فريق حملة المرشحة في الانتخابات الأمريكية كامالا هاريس عملوا خريطة في لعبة Fortnite كنوع من الترويج والوصول لشريحة الجيمرز والناخبين الشباب.

زي عندنا كدة..

ده الماوس الوايرلس الـ Type-C الجديد من شركة آبل Magic Mouse اللي سعره 100$..

ما زالت فتحة شحن الماوس موجودة في أغبى مكان ممكن تتصمم فيه أسفل الماوس، عشان متقدرش تستخدمه وهو بيشحن، ولازم تقلب الماوس على ضهره عشان ترضعه قصدي تشحنه..

آبل بتعمل التصميم ده كدة بقالها سنين..

من أسبوعين كدة تم اعتقال هاكر برازيلي مشهور اسمه USDoD كان مسئول عن اختراقات ضخمة منها InfraGard التابعة للإف بي آي، شركة CrowdStrike واحدة من أكبر شركات الأمن السيبراني، قاعدة بيانات National Public Data اللي كان فيها 2 مليار سجل عن مئات الملايين من مواطني الولايات المتحدة.. واختراقات أخرى..

المهم دي صورة لجهاز الكمبيوتر بتاعه..

لبدء تقديم إنترنت بسرعة 1 جيجابت في الثانية؛ شركة SpaceX قدمت طلب لزيادة عدد أقمارها الاصطناعي اللي بتدور حول الأرض ليصل إلى 30 ألف قمر 🛰

الشركة كانت حصلت على تصريح لإطلاق 7,500 قمر فقط، تم إرسال 6,000 قمر منهم حتى الآن.

الشركة أيضا طلبت إذن بخفض مدار الأقمار لمدى 340 إلى 365 كيلومتر فقط بغرض خفض معدل التأخير لأقل من 20 ملي ثانية.

قبل 4 سنوات فقط كان عدد الأقمار الاصطناعية في مدار الأرض 2,200 قمر فقط. النهاردة عددهم تخطى 14,000 قمر.

مسئول الاتحاد الدولي للاتصالات قال إنهم حتى الآن تلقوا طلبات لإطلاق 1.7 مليون قمر صناعي!

الأسبوع الماضي وزارة العدل الأمريكية أعلنت عن اعتقال أحمد صلاح يوسف عمر (22 سنة)، علاء صلاح يوسف عمر (27 سنة) على خلفية إدارتهم لجروب الاختراق المعروف باسم أنونيموس سودان Anonymous Sudan.

بيان الاتهام ذكر مسئولية الجروب عن أكثر من 35 ألف هجوم حجب خدمة DDoS ضد عشرات من كبرى الشركات زي مايكروسوفت و OpenAI، وكذلك هيئات حكومية زي البنتاجون | FBI | ووزارة العدل نفسها.

جزء من هجمات الأخوين حسب بيان الاتهام كان بيتحرك من نشاط حراكي، زي شنّ هجمات حجب خدمة ضد مستشفيات أمريكية وتعطيل أنظمتها بالكامل بعد الهجوم الصهيوني على مستشفيات غزة، بالإضافة للهجوم على نظام إنذارات الصواريخ وتعطيله في فلسطين المحتلة.

علاء بيواجه تهم عقوبتها السجن 5 سنوات، وأحمد بيواجه تهم عقوبتها السجن مدى الحياة، ويبدو إنه بسبب تصريحات كتبها على جروب التليجرام بعد الهجوم على مستشفيات أمريكية واللي تم اعتبارها تنفيذ هجمات إلكترونية بنية القتل.

الأخوين اتقبض عليهم، لكن من غير المعروف مكانهم تحديدا، ويبدو إنهم في دولة مختلفة حاليا، ولم يتم ترحيلهم للولايات المتحدة حتى الآن.

موقع ProtonMail اللي كان بيستخدمه مستر روبوت في إرسال واستقبال الإيميلات بشكل آمن تماما 🛡

تعتبر خدمة ProtonMail واحدة من أفضل الخدمات لعمل بريد إلكتروني آمن ومجاني في خطوات بسيطة بدون رقم موبايل.

أهم ميزة في الخدمة إنها بتوفر لك إيميل مشفر تماما ولا يمكن من خلاله تعقبك أو معرفة أي معلومات عنك.

ده مقال بسيط عن الخدمة وكيفية عمل إيميل باستخدامها بسهولة 👇
http://bit.ly/30RQHYD

استهلاك الإنترنت في الإصدار الحديث من محاكي الطيران Microsoft Flight Simulator 2024 قد يصل إلى 180 ميجابت في الثانية ✈️

شركة مايكروسوفت عملت تحديث ضخم على محاكي الطيران الخاص بيها في النسخة الحديثة، وقللت من حجم المحاكي نفسه اللي كان بيصل إلى 400 جيجابايت، واستبدلت المساحة دي بتعزيز تقنيات المحاكاة بشكل فعلي أثناء تجربة الطيران.

التحديث ده بيتطلب استهلاك ضخم للإنترنت خصوصا في الأماكن الحضرية وأثناء تفعيل أعلى جودة للجرافيكس، في المقابل تم خفض حجم المحاكي لحدود 50 جيجابايت فقط.

المعدل ده من الاستهلاك يعني إن اللعبة هتستهلك حوالي 81 جيجابايت بيانات لكل ساعة طيران!

22% من إجابات مساعد الذكاء الاصطناعي الخاص بشركة Microsoft عن الأسئلة الطبية إجابات خاطئة قد تؤدي إلى الوفاة ☠️

بحثين من ألمانيا وبلجيكا عملوا دراسة على أداة الذكاء الاصطناعي Copilot اللي طورتها شركة مايكروسوفت، ومدى دقة إجاباتها عن الأسئلة المرتبطة بمجال الطب.

تم سؤال المساعد مجموعة أسئلة طبية من الأسئلة الأكثر شيوعا في أمريكا، بالإضافة إلى أسئلة عن 50 من أشهر أنواع الأدوية اللي بيتم وصفها.

42% من إجابات Copilot كانت إجابات تؤدي لحدوث ضرر متوسط ​​أو خفيف، و22% منها تؤدي لإحداث ضرر شديد يصل لحد الوفاة.

المدير التنفيذي السابق لمنصة تداول العملات الرقمية FTX نشر بوست على موقع Linkedin للاحتفال ببداية منصبه الجديد كنزيل في سجن Cumberland!

ريان سلامة كان أحد المديرين التنفيذين أثناء انهيار منصة FTX المفلسة قبل عامين، وتم إدانته بانتهاك قوانين تمويل الحملات الانتخابية، وإدارة نشاط تجاري لتحويل الأموال بدون رخصة، واتحكم عليه بالسجن 7 سنوات ونصف بدأهم امبارح.

محتاجين ننورماليز الإنجازات دي على لينكدإن..

امبارح شخصين اتحكم عليهم بالسجن سنتين لكل واحد بعد ما اتمسكوا وهما بينصبوا على شركة آبل 😁

آبل كانت بتستقبل آيفونات مضروبة مش شغالة أو آيفونات خرجت من الضمان من الاتنين دول بعد ما يتم تزييف المعرّف بتاعها بمعرف آيفونات حقيقية عشان يتم إصلاحها أو استبدالها.

موظفين آبل كانوا مش بيعرفوا يفرقوا بين الآيفون الأصلي والمضروب، وبالفعل لمدة 3 سنين المحنكين دول قدروا يستبدلوا 6,000 آيفون مضروب بآيفون أصلي ❤️

في القانون الأمريكي شركات الاتصالات مجبرة على وضع أبواب خلفية في شبكاتها عشان تسمح لوكالات إنفاذ القانون زي الـ FBI بالتجسس على أي شخص مشتبه فيه بيستخدم خدماتها، وجمع أي بيانات خاصة بيه.

المهم في جروب هاكرز صيني مدعوم من الحكومة اسمه Salt Typhoon قدر إنه يستغل الأبواب الخلفية دي للحصول على وصول مفتوح للبنية التحتية لأكبر شركات اتصالات أمريكية لشهور، وجمع أحجام ضخمة من البيانات عن آلاف الشركات الكبرى وملايين المواطنين.

الأمريكان بيلطموا حاليا من الكارثة وحجم الاختراق اللي شمل أكبر شركات مزودة لخدمة الإنترنت زي Verizon - AT&T - Lumen.

ودي نهاية أي منتج بيتصنع بباب خلفي حتى لو لغرض قانوني.

امبارح الاتحاد الأوروبي قرر فرض جمارك تصل إلى 45% على السيارات الكهربائية الصينية..

قبلها أمريكا وكندا فرضت نسبة 100% جمارك..

ده سببه الرئيسي رغبة الغرب في كبح جماح الصين وتطورها في الصناعة دي تحديدا، وحماية لابن أمريكا المدلل تيسلا.

نفس اللي سبق وعملوه مع هواوي لحماية آبل.

وهو ده السوق الحر والجلوبالايزيشن يا محما يا علي..

ما هو الباد سيكتور Bad Sector؟

الباد سيكتور أو القطاع التالف هي مشكلة تحدث في وسائط التخزين بجميع أنواعها، وهي أكثر شيوعا في الأقراص الصلبة.. وينتج عنها التوقف استخدام هذا القطاع في قراءة أو كتابة البيانات.

القطاع هو أصغر وحدة للتخزين، وغالبا ما يكون حجم القطاع الواحد 4 كيلوبايت. قد يتعرض القطاع للتلف لعدة أسباب منها:
▪️ تعرض الهارد للصدمات
▪️ الانقطاع المفاجئ للتيار الكهربائي
▪️ زيادة شدة التيار بشكل غير طبيعي
▪️ ارتفاع كبير في درجة حرارة الهارد
▪️ يكون القطاع تالفا بسبب مشكلة في التصنيع
▪️ مشكلة على مستوى السوفتوير مثل وجود فيروسات
▪️ انتهاء العمر الافتراضي للقطاع وغيرها من الأسباب

➖➖➖➖➖➖➖➖➖➖➖➖➖➖➖

في حالة تلف مجموعة كبيرة من القطاعات؛ قد يفشل الكمبيوتر في الوصول إلى الملفات المخزنة عليها وقراءة البيانات منها.. وفي حالة انتشار هذه المشكلة قد يتوقف الهارد عن العمل بشكل كامل.
فقدان البيانات تعتبر من أسوء المشاكل التي قد يؤدي إليها تلف قطاعات الهارد، خصوصا في حالة تلف عدد ضخم منها.
القطاع التالف على مستوى الهاردوير (يعني تضرر مساحة القطاع على الهارد بسبب صدمة أو مشاكل في التيار أو عيب صناعة) لا يمكن إصلاحها.
على العكس؛ يمكن إصلاح القطاعات التالفة على مستوى السوفتوير، والتي قد تحدث بسبب انقطاع مفاجئ في التيار أو وجود فيروسات أو حدوث مشكلة في الفيرموير أدت إلى تحديد القطاع على أنه قطاع تالف.

➖➖➖➖➖➖➖➖➖➖➖➖➖➖➖

يمكنكم مراجعة هذا المقال لمزيد من المعلومات عن مشكلة الباد سيكتورز وأسباب حدوثها وأنواعها، وكيفية فحص الهارد الخاص بك للتأكد من عدم وجود قطاعات تالفة به، وكيف تقوم بإصلاح الباد سيكتورز في حالة وجودها 👇
https://bit.ly/3DgqIyO

القيمة السوقية لتويتر انخفضت بنسبة 79% من 44 مليار دولار إلى 9.4 مليار دولار 😬

شركة Fidelity Investments واحدة من أضخم الصناديق الاستثمارية في العالم في إفصاحها الدوري عن استثماراتها قيّمت حصتها في المنصة بـ 4.2 مليون دولار فقط بعد ما كانت 19.66 مليون دولار، وده معناه انخفاض تقييم الصندوق لقيمة تويتر من 44 مليار إلى 9.4 مليار دولار فقط.

أنا شايف إن 9 مليار كتير عليه بردو...

فريق مشروع شبكة Tor وفريق مشروع Tails أعلنوا عن قرار مهم لمجال الأمن المعلوماتي على الإنترنت باندماج المطورين والمشروعين تحت مشروع واحد.

مشروع شبكة Tor غني عن التعريف، وهو أفضل مشروع بيوفر اتصال آمن ومشفر عبر الإنترنت، وهو نفس الفريق المطور لمتصفح Tor.

توزيعة Tails هي توزيعة لينكس محمولة، تعتبر واحدة من أفضل توزيعات لينكس على الإطلاق، وتم تصميمها التوزيعة كنظام تشغيل مشفر آمن محمول بيمحي آثار الاستخدام بمجرد إعادة تشغيل التوزيعة، وبيعتمد بشكل رئيسي على شبكة Tor في الاتصال بالإنترنت، ودي التوزيعة اللي كان إدوارد سنودن بيستخدمها أثناء تسريبه الشهير عن وكالة المخابرات المركزية ووكالة الأمن القومي الأمريكية.

شركة جوجل قررت زيادة سعر اشتراك يوتيوب بريميوم بنسبة 30% ~ 50% على مستوى العالم 😑

ده فيديو بشرح فيه ازاي تقدر تتصل بجهازك عن بعد بدون ما تحتاج لوجود شخص يوافق على الاتصال ☺️

موقع تويتر يواجه خطر الإفلاس ☠️

أرباح شركة تويتر انهارت بنسبة 84% مقارنة بأرقام أرباح آخر ربع معلن في 2022.

لو استمر أداء الموقع المخيب ماليا هيكون ماسك مضطر لبيع حصة كبيرة من أسهم شركة تيسلا الخاصة بيه لإنقاذ الموقع، أو هيضطر لإعلان إفلاس تويتر.

السبب الأول في تراجع أرباح الموقع كانت إيقاف أكبر الشركات في العالم عن الإعلان على الموقع بسبب مشاكل في إدارة المحتوى زي ظهور الإعلانات بجانب محتوى عنصري.

إيلون ماسك كان سبق وقال للمعلنين go fuc* yourself بعد ما وقفوا إعلاناتهم على تويتر، ويبدو إن المعلنين عملوا كدة فعلا، فماسك دلوقتي رافع عليهم قضية عشان مش عايزين يعلنوا على الموقع.

الأسبوع اللي فات الصين نشرت إعلان مهم جدا عن إنتاج ماكينات لتصنيع الشرائح بتقنية الطباعة الحجرية فوق البنفسجية العميقة (DUV).

الإعلان تم لجهازين، الأول بيعمل بطول موجي 193 نانومتر يمكنه إنتاج معالجات بدقة أقل من 65 نانومتر وأداء تراكب 8 نانومتر، والجهاز الآخر بيعمل بطول موجي 248 نانومتر يمكنه إنتاج معالجات بدقة تصل إلى 110 نانومتر وأداء تراكب 25 نانومتر.

للمقارنة؛ أقوى ماكينة منافسة هي ماكينة NXT:1980Fi من شركة ASML الهولندية اللي بتعمل بطول موجي 193 نانومتر، وبتنتج معالجات بدقة 38 نانومتر وأداء تراكب 1.3 نانومتر.

الماكينة التانية هي ماكينة شركة Nikon اليابانية NSR-S636E اللي بتعمل بطول موجي 193 نانومتر، وبتنتج معالجات بدقة 38 نانومتر وأداء تراكب 2.1 نانومتر.

بالرغم إن الماكينات الصينية ما زالت بعيدة عن قدرات المنافسين، إلا إنه تطور مهم جدا، هيكون عامل حاسم في الصراع الصيني الأمريكي حول تقنيات تصنيع الشرائح، خصوصا مع الحظر الشامل الأمريكي المفروض على شركات تصنيع الشرائح والمعالجات من تصدير تقنياتها ومنتجاتها إلى الصين.

يوتيوب اعتمد بشكل رسمي نوع جديد من الإعلانات هيظهر لما توقف الفيديو 😒

الإنترنت الفضائي من شركة ستارلينك أصبح متوفر في اليمن 🛰

توقيت ثعباني شوية..

من كام ساعة حصل انفجار لعدد كبير من أجهزة الاستدعاء الآلي في لبنان؛ أدت لوقوع 7 وفيات وأكثر من 3000 إصابة حتى الآن.

أجهزة الاستدعاء هي نوع قديم من أجهزة التواصل اللي ما زالت مستخدمة حتى الآن بفضل بدائية الجهاز والتكنولوجيا اللي بيعتمد عليها، واللي بتكون مناسبة في حالات معينة من أطراف عندهم تخوف من التجسس عليهم لو استخدموا وسائل متقدمة أكثر زي الهواتف الذكية.

أجهزة الاستدعاء ليها أغراض أخرى، وما زالت بتستخدم في المستشفيات لاستدعاء الدكاترة على سبيل المثال.

كل التكهنات حاليا بتشير إلى وقوف الكيان الصهيوني خلف العملية، وبالنظر إلى حِدة الانفجارات وتأثيرها، فطريقة التنفيذ الأكثر واقعية هي وجود شحنات متفجرة تم دسّها بشكل مسبق داخل أجهزة الاستدعاء اللي تم استيراد شحنة كبيرة منها قبل شهور قليلة، مش مجرد اختراق للجهاز وإصابته بنوع ما من البرمجيات الخبيثة اللي أدت لسخونة البطارية وانفجارها على سبيل المثال.

مساء الخير

آيفون 16 بجميع فئاته هينزل بـ 8 جيجابايت رام بس