Dr. Mohamed Mamdouh Abdalbary د. محمد ممدوح عبدالباري

💡 ملخص لأخبار مهمة عن السمنة وعلاجاتها💡

السمنة مش بس بتأثر على المظهر الخارجي، السمنة مرض مزمن بيأثر على جودة حياتنا وصحتنا لكن التطورات العلمية في السنين الأخيرة قدمت حلول فعّالة لعلاج السمنة، سواء من أدوية السكر الجديدة أو الجراحات المختلفة👇

1️⃣ "ريتاتروتايد": بطل جديد في عالم السمنة!
بعد الأدوية اللي بتشتغل على مستقبل واحد زي الأوزميبك واللي بتشتغل على مستقبلين زي المونجارو .. ظهر ريتاتروتايد اللي بيشتغل على تلات مستقبلات ..
الدواء الجديد يعتبر من أقوى أدوية السمنة في السوق حاليًا، والمرضى اللي استخدموه قدروا يخسروا وزن بنسبة أكبر بكتير من غيره من الأدوية.
نتائج الدواء ده ممكن تكون ثورية لمرضى السمنة والسكر.

2️⃣ في خطوة تعتبر تاريخية، دواء السمنة الجديد تيرزيباتيد من "ليلي" أصبح مغطى تحت التأمين الصحي ميديكير في أمريكا. ده معناه إن المرضى اللي بيعانوا من السمنة وانقطاع النفس أثناء النوم يقدروا دلوقتي يحصلوا على العلاج بشكل أرخص وأسهل. ولأن انقطاع النفس أثناء النوم مرض مرتبط مباشرة بالسمنة، فالتأمين اعتبره علاج أساسي وغطى تكلفته .. نتمنى في المستقبل نشوف خطوات مماثلة عندنا !

3️⃣ دراسة جديدة طرحت سؤال مهم: "إيه أفضل طريقة لعلاج السمنة؟ الدايت، الأدوية، ولا جراحات السمنة؟ "
والإجابة كانت ببساطة: "حسب حالتك الصحية".

🔹 *لو السمنة لسه في مراحلها الأولى:*
الدايت والرياضة ممكن يكونوا كافيين مع شوية التزام.

🔹 *لو السمنة متقدمة ووزنك مش بينزل بسهولة:
أدوية زي "GLP-1" (زي "ريتا تروتايد") بتوفر نتائج مبهرة وبتساعد على خسارة وزن كبيرة من غير تدخل جراحي.

🔹 *في حالات السمنة المفرطة جدًا:*
الجراحات زي التكميم أو تحويل المسار بتكون الخيار الأفضل لأنها بتغير أسلوب التعامل مع الأكل تمامًا.

#كلام_في_الطب_د_محمد_ممدوح

📢 فيروس جديد يكتسح الصين.. إيه القصة؟

الفترة الأخيرة، الأخبار مليانة كلام عن فيروس جديد بيظهر بقوة في الصين، وبيسبب قلق .
الفيروس هو
HMPV
أو المعروف باسم الفيروس الرئوي البشري أو الميتانيمو
تعالوا نفهم إيه الحكاية:

🔹 إيه هو الفيروس ده؟
ده فيروس تنفسي قديم مش جديد تم اكتشافه في عام
2001
بيعمل أعراض شبيهة بالبرد زي السعال والرشح والحرارة.
وفي بعض الحالات، ممكن يسبب مشاكل أكبر زي التهاب الرئة خصوصًا عند الأطفال وكبار السن أو الناس اللي عندهم مشاكل في المناعة.

🔹 ليه الكلام عليه دلوقتي؟
الصين بتشهد زيادة في عدد الحالات، وده عمل قلق عند الناس هناك، خصوصًا إن المستشفيات بقت زحمة بالأطفال اللي أقل من 14 سنة. لكن السلطات الصحية أكدت إن الزيادة دي متوقعة في الشتاء ومافيش دليل إنها أخطر من المعتاد.

🔹 هل في خطر عالمي؟
لحد دلوقتي، منظمة الصحة العالمية بتقول إن الفيروس ما بيشكلش تهديد عالمي زي كورونا. وإن الأعراض بتتعالج عادي جدًا بالراحة وشرب السوائل وأدوية البرد اللي من غير روشتة.

🔹 هل فيه لقاح ؟
للأسف، مفيش لقاح مخصص للفيروس ده لحد دلوقتي، لكن الوقاية هي الحل

🛡️ إزاي نحمي نفسنا؟
- اغسل إيديك كويس وباستمرار
- ابعد عن أي حد عنده أعراض برد
- لو حاسس بتعب، ارتاح في البيت

💡 الخلاصة:
الفيروس ده مش جديد، وأعراضه غالبًا بسيطة وبتعدي. المهم نفضل حريصين على صحتنا وصحة اللي حوالينا.

هتلاقوا المصادر في التعليقات ولو عندكم أي أسئلة أو استفسارات، اكتبوها في الكومنتات 👇

#كلام_في_الطب_د_محمد_ممدوح

----
يعني إيه أكياس الكلى وايه أنواعها ؟

https://www.tiktok.com/@dr.mohamed.m.abdalbary/video/7403340263533382930
https://www.facebook.com/share/v/1DbaPuTUC9/

تكيسات الكلى الوراثية - الحلقة الأولى الأسباب وطبيعة المرض

https://www.tiktok.com/@dr.mohamed.m.abdalbary/video/7425209125866409234
https://www.facebook.com/share/v/15Ff9Weio8/

تكيسات الكلى الوراثية - ٢ التشخيص والأعراض

https://www.tiktok.com/@dr.mohamed.m.abdalbary/video/7426888710416813330
https://www.facebook.com/share/v/1BL8a3XLXf/

تكيسات الكلى الوراثية - ٣ إمتى نبدأ نعمل فحص للأولاد لو الأب أو الأم عندهم تكيسات الكلى الوراثية

https://www.tiktok.com/@dr.mohamed.m.abdalbary/video/7429035138945748242
https://www.facebook.com/share/v/1A2nVMg4yG/

تكيسات الكلى الوراثية - ٤ إيه العلاج؟ نعمل إيه لتاخير الفشل الكلوي

https://www.tiktok.com/@dr.mohamed.m.abdalbary/video/7430463777499680008
https://www.facebook.com/share/v/18V5QhJTWr/

----
ينفع نطبخ ونقلي بزيت الزيتون ؟

https://www.tiktok.com/@dr.mohamed.m.abdalbary/video/7452855257404591368
https://www.facebook.com/share/v/1Gn6v7uAgP

نصائح مهمة جداً لتجنب مضاعفات سرطان الثدي و القولون والكبد

https://www.tiktok.com/@dr.mohamed.m.abdalbary/video/7401848650630008072
https://www.facebook.com/share/r/15AkA3SPA7

معلومات مهمة للوقاية من أورام الرحم والبروستاتا

https://www.tiktok.com/@dr.mohamed.m.abdalbary/video/7407066443721772295
https://www.facebook.com/reel/898127878826073

البوست ده احفظه عندك وابعته لأي مريض كلى تعرفه
أو لأي حد مهتم بالمعلومات الطبية عموماً ..

هتلاقوا فيه كل الفيديوهات اللي عملتها خلال الشهور اللي فاتت للتوعية عن أمراض الكلى وغيرها وهيضاف ليه الفيديوهات الجاية إن شاء الله ..
----

علاج إلتهابات مجرى البول المتكررة

https://www.tiktok.com/@dr.mohamed.m.abdalbary/video/7445074894380895496
https://www.facebook.com/share/v/1D33wWBuQb/

إزاي تمنع تكون حصوات وأملاح الكلى ؟

https://www.tiktok.com/@dr.mohamed.m.abdalbary/video/7395322095770684680
https://www.facebook.com/share/v/19tiJCWnWD/

عملت تحليل وطلع عندك نقرس.. تعمل إيه ؟!

https://www.tiktok.com/@dr.mohamed.m.abdalbary/video/7439874849335463175
https://www.facebook.com/share/v/1DoXs5dToX/

أسباب كثرة التبول دليلاً وطريقة العلاج

https://www.tiktok.com/@dr.mohamed.m.abdalbary/video/7433172666846088466
https://www.facebook.com/share/v/15UVQQGsRr/

---
لو عندك زلال في البول إزاي تحافظ على الكلى بتاعتك ؟
https://www.tiktok.com/@dr.mohamed.m.abdalbary/video/7390048629924433159
https://www.facebook.com/share/r/15oQCe43jB/

أهم النصائح لمريض الكلى لتجنب الفشل الكلوي

https://www.tiktok.com/@dr.mohamed.m.abdalbary/video/7411219863278062866
https://www.facebook.com/share/v/19kop2bA1j/

الأكل المفيد لمريض القصور الكلوي المزمن
الخطوط العريضة في التغذية المفيدة لمريض القصور الكلوي المزمن

https://www.tiktok.com/@dr.mohamed.m.abdalbary/video/7418682373451156744
https://www.facebook.com/share/v/1SXn2ZVZoX/

احترس من الأعراض الصامتة للفشل الكلوي

https://www.tiktok.com/@dr.mohamed.m.abdalbary/video/7399650785702825224
https://www.facebook.com/share/r/1BK4utsPvw/

الاختيارات الطبية قدام مريض المرحلة الأخيرة من القصور الكلوي المزمن

https://www.tiktok.com/@dr.mohamed.m.abdalbary/video/7414629374072278290
https://www.facebook.com/reel/1579111116034098

كشف حقيقة جودة عواد.. احذر على كليتك من نصائحه

https://www.tiktok.com/@dr.mohamed.m.abdalbary/video/7438227143332547858
https://www.facebook.com/share/v/15TwjrGLaL/

----
يعني إيه قصور كلوي حاد - ارتفاع الكرياتنين ؟

https://www.tiktok.com/@dr.mohamed.m.abdalbary/video/7382631485003549959
https://www.facebook.com/share/r/14XHydmvAx

الكالسيمات والوان ألفا مش علاج للكلى! أمال إيه العلاج؟ وليه بنستخدم الكالسيمات والوان ألفا في بعض الحالات

https://www.tiktok.com/@dr.mohamed.m.abdalbary/video/7442403639630810376
https://www.facebook.com/share/v/17oMAGC8SS/

إيه هيا أسباب وطرق علاج القصور الكلوي الحاد ؟
https://www.tiktok.com/@dr.mohamed.m.abdalbary/video/7383437686469594375
https://www.facebook.com/share/r/1BWPVVoCJf/

----
يعني إيه التهاب نفروزي أو التهاب الكلى ؟ إيه أسبابه ؟ وامتى نشك إن فيه التهاب نفروزي

https://www.tiktok.com/@dr.mohamed.m.abdalbary/video/7386036696539794695
https://www.facebook.com/share/r/15VN4eho3A

إزاي بنشخص الالتهاب النفروزي ؟ وإيه دور العينة الكلوية ؟

https://www.tiktok.com/@dr.mohamed.m.abdalbary/video/7387886658265337096
https://www.facebook.com/share/r/1BWfzjvHQs/

إزاي بنعمل عينة الكلى وإيه التعليمات والاحتياطات قبلها وبعدها

https://www.tiktok.com/@dr.mohamed.m.abdalbary/video/7450209807971437842
https://www.facebook.com/share/v/1H5txrYgWX\

هل عينة الكلى مطلوبة في كل حالات الالتهاب النفروزي ؟

https://www.tiktok.com/@dr.mohamed.m.abdalbary/video/7388964052514426120
https://www.facebook.com/share/r/15xiduWH1E/

----
التحاليل والفحوصات اللي لازم أي مريض سكر يعملها كل فترة

https://www.tiktok.com/@dr.mohamed.m.abdalbary/video/7397146892846583057
https://www.facebook.com/share/v/1PswdeMpuT/

لو عندك السكر إزاي تحافظ على الكلى ؟

https://www.tiktok.com/@dr.mohamed.m.abdalbary/video/7400902644811713799
https://www.facebook.com/share/r/1XrSB8ErHA/

سبب رئيسي لوجود سكر بالبول برغم عدم وجود مرض السكر
https://www.tiktok.com/@dr.mohamed.m.abdalbary/video/7455390397787835666
https://www.facebook.com/share/v/1Czzvdf4j1/

خطأ كبير بيقع فيه كل مرضى الضغط
https://www.tiktok.com/@dr.mohamed.m.abdalbary/video/7392695514233408776

هل مريض الضغط والكلى يشرب قهوة ؟ هل القهوة غلط على القلب ؟ إيه تأثير القهوة على الكبد

https://www.tiktok.com/@dr.mohamed.m.abdalbary/video/7434616406106246407
https://www.facebook.com/share/v/1Ac92D9rsu/

إزاي بناخد عينة "خزعة" الكلى؟
وايه التعليمات والاحتياطات قبل وبعد العينة الكلوية؟

لو عندكم أسئلة أو تجارب مع عينة الكلى اكتبوها في التعليقات

https://www.facebook.com/share/v/15vnqHfNdg/

أدوية السكر والتخسيس من عيلة
GLP-1 Agonists
زي الساكسيندا والاوزمبيك
أو الأدوية الجديدة زي المونجارو مع انتشار استخدامها وبعض الأخبار عنها كتر الكلام عليها في الفترة الأخيرة..

في البوست ده هنتكلم عنها بالتفصيل..

🔸 الدراسات على الأدوية اتعلمت على آلاف البشر وأثبتت كفاءة عالية وبياخدها ملايين البشر حالياً في العالم كله..
لكن أي دواء ممكن يبقى ليه آثار جانبية..

🔷 أغلب الآثار الجانبية بتكون حاجات بسيطة يسهل علاجها ومرتبطة بطريقة عمل الأدوية دي زي:

🔸 غثيان أو ميل للقيء خصوصًا أول ما تبدأ الدواء، بس ده غالبًا بيقل مع الوقت.

🔸 إسهال أو إمساك: تغيير في حركة الأمعاء وارد يحصل، بس بيتظبط بعد كده.

🔸 انتفاخ أو عسر هضم: تحس إن معدتك تقيلة شوية بعد الأكل.

🔸 صداع: ممكن ييجي بشكل خفيف ومش مزعج أوي.

🔸 تعب عام: تحس إنك مرهق أو كسلان أول كام يوم من الاستخدام.

🔷 نصائح للتعامل مع الآثار الجانبية دي:

🔸 لو فيه غثيان، حاول تاكل وجبات صغيرة وخفيفة.

🔸 اشرب مياه كتير لو فيه إسهال عشان تعوض السوائل.

🔸 ارجع للدكتور تآني لو أي عرض طول أكتر من اللازم أو كان مزعج بالنسبة لك.

🔷 بعض الآثار الجانبية بتبقى خطيرة لكنها نادرة الحدوث.. نسب حدوثها تقريباً ١٪ أو أقل.. ودي اللي بعضها عمل ذعر للناس على مواقع التواصل .. زي

🔸 التهاب البنكرياس: ممكن المريض يحس بألم شديد جدًا في البطن ممكن يمتد للظهر غالبًا بيكون مصحوب بغثيان أو قيء مستمر وهنا لازم توقف الدواء وتراجع الدكتور.

🔸 مشاكل المرارة: ألم في الجانب الأيمن من البطن مع غثيان أو قيء.

🔸 تغيرات في المزاج: أحيانًا تظهر أعراض زي الاكتئاب أو التفكير السلبي، لكنها نادرة جدًا.

🔸 حساسية:
زي أي دواء آخر.. لو كانت شديدة في صورة طفح جلدي أو صعوبة في التنفس أو تورم في الوجه والشفتين لازم تروح للطوارئ.

..
🔷 الأدوية نفسها مش "مسببة للوفاة"، لكن زي أي دواء قوي، لو حصلت مضاعفات وما تمش التعامل معاها بسرعة، ممكن تبقى خطيرة.
..
🔷 على الناحية التانية فوايد الأدوية كتيرة جداً وغيرت حياة آلاف البشر زي :

🔸 تحسين السكر في الدم

🔸المساعدة على فقدان الوزن.. بتقلل الشهية وبتبطّئ تفريغ المعدة، فبتخليك تحس بالشبع لفترة أطول.
بتحفز هرمونات الشبع وتثبط هرمونات الجوع وده بيخليها فعالة جدًا للناس اللي بيعانوا من السمنة أو زيادة الوزن.

🔸تقليل خطر أمراض القلب : بتقلل خطر الجلطات القلبية والسكتات الدماغية عند مرضى السكر من النوع التاني.

🔸تحسين صحة الجهاز الهضمي: بتقلل حركة الأمعاء بشكل بيساعد في تقليل مشاكل الهضم المرتبطة بالأكل السريع أو غير الصحي.

🔸 تقليل مضاعفات مرض السكر زي مشاكل الكلى، الأعصاب، والعيون.

🟫 الخلاصة:

الأدوية دي بتعتبر "ثورة" في علاج السكر والسمنة، وفوايدها مش بس بتظهر في التحسن السريع، لكن كمان في الوقاية من مشاكل صحية خطيرة على المدى الطويل. لو بتاخدها عشان السكر أو السمنة متقلقش من الأخبار اللي بتسمعها لكن زي أي دواء لازم تستخدم تحت إشراف طبي كامل.

🔘 متنساش تشير البوست عشان الناس تفهم الصورة بشكل كامل ولو بتستخدم الأدوية دي بشكل شخصي قولنا تجربتك في الكومنتات.

#كلام_في_الطب_د_محمد_ممدوح

🔸 تطعيم الانفلونزا .. معلومات مهمة 🔸

- مين المفروض ياخد تطعيم الانفلونزا الموسمية❓

مركز مكافحة الأمراض المعدية بيقول إن أي حد عمره أكبر من ست شهور المفروض ياخده كل سنة.. فيها فئات ليها الأولوية وهي الفئات الأكتر عرضة لمضاعفات الانفلونزا زي الناس الكبيرة في السن فوق الخمسين سنة والأطفال تحت الأربع سنوات والحوامل ومعاهم الناس اللي عندها مشاكل تنفسية أو مناعتها ضعيفة ومرضى الزرع.

- مين مينفعش ياخده❓
١-الأطفال أقل من ست شهور.
٢-الناس اللي عندها حساسية شديدة من البيض لأن أغلب أنواعه بتحتوي على بروتينات موجودة في البيض.
٣-الناس اللي ظهر عندها حساسية من تطعيم الانفلونزا قبل كده.

- إمتى بيتاخد التطعيم❓
مع بداية فصل الشتا لو متوفر .. تطعيم كل سنة هو خاص بالسنة دي ومينفعش يتاخد في السنة اللي بعدها.

- هل فيه فرق بين التطعيمات الموجودة في السوق وجرعتها إيه ؟❓
في مصر وأغلب العالم فيه نوعين من تطعيم الانفلونزا وهما :
- التطعيم الثلاثي Trivalent vaccine اسمه كده عشان فيه ٣ سلالات للانفلونزا.. لو الطفل من ست شهور لتلات سنين بياخد نص جرعة الكبير ربع ملل بدل نص ملل.
- التطعيم الرباعي Quadrivalent vaccine فيه سلالة إضافية من سلالات الانفلونزا.. الأطفال والكبار بياخدوا نفس الجرعة وهي نص ملل..

أنواعه التجارية❓
- Influvac tetra
قبل كده مكنش بيتاخد أقل من تلات سنين لكن السنة دي عدلوه وبقى ينفع يتاخد فوق الست شهور.
- Vaxigrip tetra بيتاخد في الأطفال فوق الست شهور.
التطعيم سواء الثلاثي أو الرباعي بيبقى جرعة واحدة لكن لو اللي بياخد التطعيم سنه أقل من تسع سنين ومخدش التطعيم بتاع الانفلونزا ولا مرة في السنين اللي قبل كده بيحتاج جرعتين الفرق بينهم شهر.

- خلصت كده❓
معلومة أخيرة.. فيه نوع تاني من تطعيم الانفلونزا بيبقى على شكل بخاخ للأنف Nasal spray وده live attenuated بعكس التطعيم الحقن ومش منتشر ولا متاح في مصر وده مينفعش في الأطفال تحت السنتين ومرضى الزرع والناس إللي عندها مشاكل صحية أو مناعتها ضعيفة.. من الآخر ملكوش دعوة بيه. 😁

متنسوش الإعجاب والمشاركة عشان يعم النفع بالمعلومات الطبية.

#كلام_في_الطب_د_محمد_ممدوح

النظام الغذائي المحاكي للصيام ممكن يحسن وظائف الكلى في مرضى القصور الكلوي المزمن حسب تجارب أولية.🩺

🔸Fasting-mimicking diet (FMD)
أو النظام المحاكي للصيام هو نظام غذائي مصمم بحيث يدي الجسم نفس الفوائد اللي بيحققها الصيام التقليدي، بس من غير الامتناع التام عن الأكل.

يعني هو صيام بشكل غير مباشر، الشخص بيقلل فيه جدًا من كمية السعرات الحرارية والنشويات والبروتينات، وبيستمر في استهلاك كمية قليلة من الأكل لأيام محددة بتكون في الغالب من 3 لـ 5 أيام كل شهر.

🔸 النظام ده اتعمل عليه دراسات حديثة بتقول إنه بيحفز الجسم على التخلص من الخلايا التالفة وتجديد الأنسجة 🧬 ، وبيساعد على تقليل مستويات الالتهاب وتحسين صحة الأوعية الدموية.

🔸 بيتكون النظام في أيام تطبيقه من أكلات بسيطة فيها سعرات أقل من 1000 سعر حراري بس .. ممكن يبقى فيها شوربة خضار - سلطات 🌱 - شاي خالي من الكافيين - مايه - بعض الفيتامينات والمعادن الأساسية 💊.

🔸دراسة جديدة بتقول إن النظام ده ممكن يساعد في تحسين وظائف الكلى عند الناس اللي عندهم قصور مزمن بالكلى.

🔸التجربة اتعملت بنظام غذائي قليل الملح بيحاكي الصيام لمدة 5 أيام في الشهر ولمدة 3 شهور.

🔸 كان فيه شق اتعمل على فئران التجارب ولقى إن النظام ده بيقلل من زلال البول 🐭 وتدهور أنسجة الكلى وخفف الأضرار اللي بتحصل في الأنابيب الكلوية 🚫.

🔸كمان فيه تجربة أولية على 13 شخص عندهم المرحلة التالتة من مرض الكلى المزمن، وكانوا بياكلوا أكل نباتي غني بالفيتامينات والمعادن .. ولقوا تحسن في زلال البول.

🔸النتائج دي لسه مبدئية ومحتاجين دراسات أكبر عشان نتأكد من فعالية النظام ده ونشوف إذا ممكن يساعد فعلاً في تحسين وظائف الكلى .. لكن دي مؤشرات على إن النظام ده ممكن يبقى ليه نفع في المستقبل.

متنسوش تسجيل الإعجاب والمشاركة عشان يعم النفع بالمعلومات الطبية.

#كلام_في_الطب_د_محمد_ممدوح

خبر مهم للناس اللي بتعاني من التهابات المسالك البولية المتكررة.

- منظمة الغذاء والدواء الأمريكية وافقت على دواء جديد اسمه أورلينفا
Orlynvah

- ده أول مضاد حيوي من عيلة الـ "بينم" بيتاخد عن طريق الفم ويتوافق عليه في أمريكا، وكمان ده تاني علاج بيتوافق عليه للتهابات المسالك البولية غير المعقدة خلال الـ20 سنة اللي فاتوا.

- الدواء معمول مخصوص للعدوى اللي بقت مقاومة للأدوية العادية، وبيستهدف أنواع بكتيريا منتشرة زي *E. coli* و*Klebsiella* و*Proteus mirabilis*، وده بيفيد الناس اللي بيعانوا من التهابات مش بتتحسن بالأدوية التقليدية.

- الدواء فيه مكونين مهمين: *sulopenem etzadroxil* اللي بيشتغل كمضاد حيوي قوي، و*probenecid* اللي بيساعد على تقوية تأثير المضاد الحيوي ده عشان يفضل شغال في الجسم فترة أطول.

- فيه دراسات سريرية أكدت إن الدواء فعّال مع العدوى المقاومة، وده بيدي أمل لكتير من السيدات اللي بيعانوا من مشاكل متكررة في المسالك البولية.

- الدواء لسه مش موجود في مصر لكن إن شاء الله يتوفر في المستقبل القريب .. كمان مهم نعرف إن الدوا ده مش مخصص للحالات اللي بتحتاج علاج داخل المستشفى.

#كلام_في_الطب_د_محمد_ممدوح

تكيسات الكلى الوراثية من أكتر الحالات اللي بنقابلها وواحدة من أكتر الأمراض الوراثية المنتشرة في العالم

في الأربع حلقات القصيرة دي حاولت أغطي كل المعلومات المهمة للمرضى

1- يعني إيه تكيسات الكلى الوراثية ؟
https://www.facebook.com/share/v/KTuPocyHHPqhVkZc/
2- التشخيص والأعراض
https://www.facebook.com/share/v/Pc6yCZH5E4P2sU9E/
3- إمتى نطمن على الأولاد ؟
https://www.facebook.com/share/v/PQPVmueohJp2Yowh/
4- العلاج
https://www.facebook.com/share/v/KNCx6Tfw94y58kvN/

ولو عندكم حساب على التيكتوك هتلاقوهم هنا:
https://www.tiktok.com/@dr.mohamed.m.abdalbary

ممكن تنشروها لعلها تكون مفيدة لمرضى التكيسات وعائلاتهم
ودمتم سالمين

إزاي نتغلب على الأكل الكتير بليل؟ 🤔

لو بتلاقي نفسك بتاكل كتير قبل النوم، جرب النصايح دي وهتساعدك تتحكم في الموضوع:

1. ابدأ يومك بفطار متوازن: خلي الفطار فيه بروتين زي البيض أو الزبادي مع شوية فاكهة أو شوفان، ده هيقلل جوعك طول اليوم. 🥣🍳

2. قسم الأكل على مدار اليوم: بدل ما تجمع كل الأكل بليل، كل وجبات صغيرة على مدار اليوم عشان معدتك تفضل شبعانة. 🍽️

3. اختار عشا خفيف وفي نفس الوقت مشبع: اختار حاجة خفيفة زي سلطة مع بروتين زي التونة أو الفراخ، وابعد عن الأكلات الدسمة والكربوهيدرات الكتير. 🥗🐟

4. ابعد عن التليفزيون وقت الأكل: لو بتاكل وانت مش مركز، هتاكل أكتر من غير ما تحس. حاول تاكل وانت مركز في الأكل بس. 📱🚫

5. اشرب مياه طول اليوم: شرب المياه بيشبع وبيقلل الرغبة في الأكل بليل، حط لنفسك هدف كبايات مياه يومية. 💧

6. اشغل نفسك بحاجة بتحبها: لو حاسس بملل، ممكن تلجأ للأكل. جرب تعمل حاجة زي قراءة كتاب أو رياضة خفيفة بدل الأكل. 📚🏃‍♂️

7. نظم مواعيد نومك: السهر بيخلي الجوع يزيد. النوم الكويس بينظم هرمونات الجوع، فحاول تنام بدري وتلتزم بمواعيد نوم ثابتة. 🛌

جربوا النصايح دي وبالتدريج هتلاحظوا الفرق!
شاركونا في الكومنتات لو عندكم نصايح تانية للتحكم في الأكل بليل 👇

#كلام_في_الطب_د_محمد_ممدوح

- حسب دراسة من ألمانيا أكتر من ١٠ مليون شخص في ألمانيا عندهم قصور كلوي مزمن ومع انخفاض وظائف الكلى بيزيد خطر الإصابة بأمراض القلب والأوعية الدموية.

- ٣ من كل ٤ مرضى مش عارفين إنهم عندهم الكلى ، وده لأن ٩٠٪ من وظائف الكلى ممكن تتدهور من غير أي أعراض، حسب الجمعية الألمانية لأمراض الكلى.

- قصور الكلى ممكن نكتشفه بدري عن طريق اختبارين بسيطين بعمل وظايف كلى في عينة من الدم وتحليل زلال في البول.

- بس المشكلة إن الكشف المبكر مش دايمًا بيتم،
برغم توفر أدوية جديدة حالياً ممكن تأخر تدهور وظايف الكلى بشكل كبير لو تم اكتشاف المرض في البداية.

عشان كده بننصح دايما بالاطمئنان على وظايف الكلى لأن الكشف المبكر بيفرق كتير.

#كلام_في_الطب_د_محمد_ممدوح

لو مريض عنده أكتر من مرض مزمن بيبقى صعب تحديد نظام غذائي ليه .. عشان كده البوست ده اقتراح لأسبوع كامل لمريض عنده السكر والضغط والكلى ...
كل يوم فيه تلات وجبات وسناكس ..
ممكن تنشروا البوست عشان يفيد المرضى.

🍽 برنامج غذائي لمريض الكلى والسكر والضغط لمدة أسبوع 🍽

🗓 اليوم الأول:

- الإفطار :
🥚 بيضة مسلوقة
🧀 قطعة صغيرة من الجبن القريش (قليل الملح)
🥖 رغيف عيش بلدي
🥒 خيار وطماطم

- سناك:
🍎 تفاحة صغيرة

- الغداء:
🍗 صدر دجاج مشوي (150 جم)
🍚 نصف كوب أرز بسمتي مسلوق
🥕 خضار سوتيه (كوسة، جزر، بسلة)

- سناك:
🌰 5-6 حبات لوز أو فول

- العشاء:
🐟 سلطة تونة بدون زيت مع زيت زيتون وعصير ليمون
🥖 رغيف عيش بلدي
🥬 خس وجزر

---

🗓 اليوم الثاني:

- الإفطار:
🫘 فول مدمس (بدون زيت) مع عصير ليمون
🥖 رغيف عيش بلدي
🥒 خيار وجرجير

- سناك:
🍊 برتقالة صغيرة

- الغداء:
🐟 سمك مشوي (200 جم بوري أو بلطي)
🍚 نصف كوب أرز بني مسلوق
🥗 سلطة خضراء

- سناك:
🍠 قطعة صغيرة من البطاطا الحلوة المشوية

- العشاء:
🥚 بيضتين مسلوقتين
🥗 سلطة خضراء
🥖 رغيف عيش بلدي

---

🗓 اليوم الثالث:

- الإفطار:
🥣 شوفان مطبوخ مع لبن خالي الدسم
🍯 ملعقة صغيرة من العسل الطبيعي
🍓 حفنة من التوت أو الفراولة

- سناك:
🥒 خيارتين

- الغداء:
🍖 كفتة مشوية (150 جم لحم أحمر قليل الدهن)
🥒 خضار مشوية (فلفل، كوسة، باذنجان)
🥖 نصف رغيف عيش بلدي

- سناك:
🥒 قطعة خيار أو طماطم

- العشاء:
🫘 سلطة فاصوليا بيضاء مع زيت زيتون وعصير ليمون
🥖 رغيف عيش بلدي
🥒 خس وخيار

---

🗓 اليوم الرابع:

- الإفطار:
🥛 كوب لبن خالي الدسم
🍞 شريحة توست أسمر مع ملعقة صغيرة جبن قريش
🥒 خيار وجرجير

- سناك:
🍏 قطعة فاكهة (كيوي أو تفاحة)

- الغداء:
🍗 دجاج محشي بالخضار مشوي (150 جم)
🍚 نصف كوب أرز بني مسلوق
🥗 سلطة خيار وجزر

- سناك:
🍠 قطعة صغيرة من البطاطا الحلوة المسلوقة

- العشاء:
🫘 شوربة عدس مع شريحة توست أسمر
🥗 سلطة خضراء

---

🗓 اليوم الخامس:

- الإفطار:
🥚 بيضتين مسلوقتين
🥖 رغيف عيش بلدي
🥒 خيار وطماطم

- سناك:
🥒 خيارة أو طماطم

- الغداء:
🐟 سمك مشوي (200 جم)
🍚 نصف كوب أرز بني مسلوق
🍅 سلطة طماطم وخيار

- سناك :
🧀 قطعة صغيرة من الجبن القريش مع خس

- العشاء:
🍞 شريحة توست أسمر مع تونة خالية من الزيت
🥗 سلطة خضراء

---

🗓 اليوم السادس:

- الإفطار:
🫘 فول مدمس (بدون زيت) مع عصير ليمون
🥖 رغيف عيش بلدي
🥒 خيار وجرجير

- سناك:
🍏 تفاحة

- الغداء:
🥩 لحمة مشوية (150 جم قليل الدهن)
🍚 نصف كوب أرز بني مسلوق
🥗 سلطة خضار متنوعة

- سناك:
🥒 قطعة خيار أو خس

- العشاء:
🥚 بيض مسلوق
🐟 سلطة تونة بدون زيت
🥖 رغيف عيش بلدي

---

🗓 اليوم السابع:

- الإفطار:
🥛 كوب لبن خالي الدسم
🍞 شريحة توست أسمر مع ملعقة صغيرة عسل
🥒 خيار وجزر

- سناك:
🍊 برتقالة صغيرة

- الغداء:
🍗 فراخ مشوية (150 جم)
🍚 نصف كوب أرز بسمتي
🥕 خضار مسلوق (جزر، كوسة)

- سناك:
🍠 قطعة صغيرة من البطاطا الحلوة المشوية

- العشاء:
🥗 سلطة خضراء مع جبن قريش
🍞 شريحة توست أسمر

---

🌟 نصائح عامة
⚠️ تجنب الأطعمة المالحة والمعلبات
🥄 استخدم زيت الزيتون بدلاً من الزيوت المهدرجة
💧 شرب الماء بانتظام

#كلام_في_الطب_د_محمد_ممدوح

- الناس اللي بتاكل أكل مصنع (Ultra-Processed Food) - اللي هو الأكل اللي بيتعرض لعمليات تصنيع وتغيير في مكوناته الأساسية قبل ما يوصل للمستهلك زي إضافة مواد حافظة، نكهات صناعية، ألوان صناعية، وسكر أو ملح بكميات كبيرة - بتكون معرضة أكتر للإصابة بمرض السكري النوع التاني، والعكس صحيح.
يعني لو استبدلنا الأكل المصنع بأكل طبيعي أو مصنع بدرجة أقل، هنقلل احتمالية الإصابة بالسكري. الدراسات اللي اتعملت على آلاف الناس في أوروبا، أثبتت إن الأكل الطبيعي بيساعد في تقليل المخاطر. لكن مش كل الأكل المصنع سيء بنفس الدرجة، وفي حاجات زي الخبز والبسكويت بتكون أقل ضرر.

أمثلة على الأكل المصنع:

- السناكس زي الشيبس والبسكويت.
- اللحوم المصنعة زي السوسيس والهوت دوج واللانشون.
- المشروبات الغازية والعصائر المعلبة.
- الأطعمة المجمدة الجاهزة للأكل زي البيتزا المجمدة أو النودلز الفورية.
- الحلويات المغلفة زي الشوكولاتة والكب كيك.

#كلام_في_الطب_د_محمد_ممدوح

العلماء بيكتشفوا شبكة في المخ بتكون أكبر عند مرضى الاكتئاب

الدراسات اللي اتعملت على تصوير المخ على مدار السنين كانت دايمًا بتبين فروقات بسيطة في تركيبة المخ والاتصال العصبي عند الأشخاص المصابين بالاكتئاب، وده كان بيصعب علينا نفهم بالضبط إيه اللي بيحصل في المخ وقت الاكتئاب أو إزاي نقدر نحدد الأشخاص اللي ممكن يبقى عندهم خطر الإصابة بالاكتئاب قبل ما يحصل.

كمان، الاكتئاب عادة بيجي على فترات، لكن الدراسات اللي بترصد تغيرات المخ على مدار الوقت كانت قليلة، وده مأخر فهمنا للآليات اللي بتأثر على تغيرات المزاج.

هنا بييجي دور مجال جديد اسمه "رسم الخرائط الوظيفية الدقيقة"، اللي بيعتمد على تصوير المخ بشكل دقيق جدًا وبياخد بيانات تصويرية على مدار فترات طويلة.

المجال ده قدر يبين اختلافات سلوكية في شكل شبكات المخ واتصالها بين الأشخاص الأصحاء، بحث جديد اتنشر في نيتشر استخدم التقنية دي واكتشف إن شبكة في المخ اسمها "شبكة البروز الجبهي المخططي"، واللي ليها دور في معالجة تعاملنا مع المكافآت ومع المحفزات، بتبقى أكبر في الأشخاص المصابين بالاكتئاب تقريبًا ضعف حجمها عند الناس العادية.

الغريب إن التوسع ده بيبقى ثابت على مدار الوقت، ومش بيتأثر بحالة المزاج، يعني حتى لو الشخص مزاجه اتحسن، التوسع ده بيكون موجود. والأغرب كمان إنه ممكن نكتشف التوسع ده في مخ الأطفال قبل ما يبدأوا يمروا بأعراض الاكتئاب في سن المراهقة.

في تحليل على ناس اتعملهم تصوير للمخ أكتر من 60 مرة خلال سنة ونص، الباحثين لقوا إن في تغيرات في اتصال الدوائر العصبية الجبهية المخططية، والتغيرات دي كانت بتتبع أعراض معينة زي فقدان الشعور بالمتعة (انعدام التلذذ)، وكانت بتنبأ بظهور الأعراض دي في المستقبل.

باختصار البحث ده بيقول إن توسع الشبكة دي ممكن يبقى علامة خطر ثابتة للإصابة بالاكتئاب، ده يفتح الباب قدام علاجات جديدة وأكثر دقة، سواء باستخدام تقنيات زي التحفيز المغناطيسي أو العلاجات اللي بتستهدف الشبكة دي، وكمان ممكن نستخدمه للكشف المبكر عن الأشخاص المعرضين للاكتئاب.

#كلام_في_الطب_د_محمد_ممدوح

احذر من إزالة الغدة الدرقية جراحياً بدون داعي ⚠️

🔶حسب دراسة نشرت من أيام من الدنمارك المرضى اللي بيعملوا استئصال كلي للغدة الدرقية بيبقى عندهم خطر أكبر للإصابة بقصور الكلى المزمن وخصوصًا اللي بيعانوا من نقص في نشاط الغدة الجار درقية بعد العملية.

🔶 الباحثين حللوا بيانات 2421 مريض عملوا العملية دي وقارنوهم بـ 24210 شخص من عامة الناس.

🔶 بعد 10 سنين من العملية، كان خطر الإصابة بمرض الكلى المزمن أعلى بمرتين لثلاث مرات عند الناس اللي عملوا العملية مقارنة بغيرهم في المجموعة المقارنة.

🔶 نسبة الإصابة بمرض الكلى المزمن كانت أعلى عند الناس اللي عندهم فرط نشاط الغدة الدرقية، وبعديهم مرضى تضخم الغدة الدرقية، وماكانتش عالية عند مرضى السرطان.

🔶 المرضى اللي عندهم نقص في نشاط الغدة الجار درقية وبيحتاجوا علاج طويل الأمد بفيتامين D النشط بعد العملية، بيبقى عندهم خطر أكبر للإصابة بمرض الكلى المزمن. وكمان خطر الإصابة بمرض الكلى المزمن بيزيد لكن بمعدل أقل حتى لو كانت وظيفة الغدة الجار درقية كانت طبيعية بعد العملية.

🟥 ملخص الدراسة: لازم تاخد رأي متخصص قبل قرار إستئصال الغدة الدرقية عشان تجنب نفسك مشاكل نقص الغدة الدرقية والجاردرقية ونقص الكالسيوم وخطر القصور الكلوي بدون داعي.

رابط الدراسة هتلاقيه في التعليقات .
ومتنساش تشير البوست لو المعلومات فيه مفيدة.

#كلام_في_الطب_د_محمد_ممدوح

وجود الدم في البول من أكتر الحاجات اللي بتقلق المرضى .. في البوست ده هنتكلم عن الأسباب والتشخيص والعلاج.

🔶لو لقيت دم في البول، ده أكيد ممكن يخض، بس ما تقلقش الدم في البول مش دايمًا حاجة خطيرة، لكن لازم تشوف دكتور عشان تطمن.

🔶الدم ممكن ييجي من الكلى اللي بتصنع البول، أو من أي مكان في الجهاز البولي.

🔶في أسباب كتير ممكن تسبب ظهور الدم في البول زي:
- التهاب المثانة، اللي بيكون معاه حرقان أو ألم وانت بتتبول.
- التهاب الكلى، وده ممكن ييجي معاه ألم في الضهر وسخونية.
- حصوات الكلى.
- الالتهاب النفروزي بالكلى.
- تمرين عنيف أحياناً.
- تضخم البروستاتا، وده شائع عند الرجالة الأكبر سنًا.
- سرطان المثانة أو البروستاتا أو الكلى وده نادر وبيأثر أكتر على اللي فوق الـ50 سنة.
وطبعاً العلاج بيعتمد على معرفة السبب.

🔶لو شفت دم في البول أو لو البول بقى لونه أحمر، بني محمر أو لون الشاي، لازم تشوف دكتور. ممكن يبقى فيه دم في تحليل البول، حتى لو البول شكله طبيعي.

🔶لو الدكتور شاف إنك محتاج فحوصات، ممكن يطلب حاجات زي:
- تحليل بول.
- تحاليل دم للكلى.
- سونار على الكلى أو أشعة مقطعية.
- أحياناً منظار للمثانة أو عينة من الكلى.

لو البوست مفيد ليك متنساش تعمله لايك وشير عشان يوصل لعدد أكبر من المتابعين.

#كلام_في_الطب_د_محمد_ممدوح

إيه هو جدري القرود؟ إمتى عرفناه وإمتى بدأ ينتشر تاني؟ إيه أعراضه؟
وليه العالم قلقان النهارده ؟ ⚠️⚠️

🔶 جدري القرود اتسمى بالاسم ده لأنه تم اكتشافه لأول مرة في سنة 1958 في معمل بحثي على مجموعة من القرود اللي كان بيتم دراستهم.
ورغم إن القرود هي اللي كانت أول حالة مكتشفة، إلا إن المرض مش مرتبط بس بالقرود، لكنه بينتقل كمان من حيوانات تانية زي القوارض عشان كده اتغير اسمه إلى Mpox في 2022 من قبل منظمة الصحة العالمية لتقليل الوصمة والتمييز المرتبط بالاسم القديم.

🔶 أول حالة إصابة بجدري القرود في البشر تم تسجيلها سنة 1970 في الكونغو لما تم رصد حالة لطفل صغير كان بيعيش في منطقة كانت خالية من الجدري البشري بعد ما تم القضاء عليه بالتطعيمات.

🔶جدري القرود بيشبه إلى حد كبير فيروس الجدري العادي اللي تم القضاء عليه في الثمانينات والأعراض بتاعته بتكون شبيهة بجدري المية اللي عرفناه زمان.

🔶الأعراض بتبدأ عادةً بحمى وصداع شديد وآلام في العضلات والظهر، ومع الوقت بيظهر طفح جلدي مميز بيبدأ من الوش وبعدين بينتشر في باقي الجسم. كمان بيحصل تورم في الغدد الليمفاوية، ودي علامة بتميز جدري القرود عن أمراض تانية. الأعراض بتستمر حوالي من أسبوعين لأربعة، وفي أغلب الحالات بيتعافى الشخص المصاب لوحده، لكن ممكن تكون أخطر لو الشخص مناعته ضعيفة.

🔶المرض كان متواجد بشكل أساسي في مناطق الغابات الاستوائية في وسط وغرب إفريقيا، لكنه في السنوات الأخيرة بدأ ينتشر في أماكن تانية.

🔶في 2024، رجع يظهر بشكل مخيف، خصوصًا في إفريقيا في الكونغو وبوروندي وكينيا ورواندا وأوغندا.. وكمان تم تسجيل حالات في دول خارج إفريقيا زي السويد وباكستان من أشخاص سافروا إلى مناطق متأثرة في إفريقيا.. في دول تانية زي الفلبين، الحالة اللي ظهرت كانت لشخص مارس علاقات جنسية مع آخرين من غير ما يسافر بره.

🔶اللي زود القلق هو ظهور سلالة جديدة من الفيروس اسمها Clade 1b، واللي بقت تنتقل بشكل رئيسي من خلال الشبكات الجنسية.

🔶في شهر أغسطس 2024، منظمة الصحة العالمية أعلنت إن التفشي الجديد للفيروس ده بقى حالة طوارئ صحية عامة ذات اهتمام دولي، وده أعلى مستوى من التحذيرات الصحية العالمية.

🔶فيه لقاح اسمه JYNNEOS من شركة دنماركية بيثبت فعاليته ضد الفيروس، لكنه مش بيمنع الإصابة بشكل كامل، سعره حاليا 100 دولار للجرعة والشخص بيحتاج جرعتين ومنظمة الصحة العالمية بتشتغل على توفير استجابة عالمية شاملة للحد من انتشاره وتوفير اللقاح للأماكن عالية الخطورة بسعر تقدر الدول دي تتحمله.

#كلام_في_الطب_د_محمد_ممدوح

لو انت مريض سكر أو ضغط أو كلى .. ولو حتى مش مريض وعاوز تاكل أكل صحي .. إيه أكتر أربع حاجات تبعد عنها ؟

- أول حاجة، الأكل اللي فيه ملح كتير زي المخللات والشيبسي بيزود ضغط الدم وبيأثر على الكلى.

- تاني حاجة، السكريات اللي في الحلويات والمشروبات الغازية بتعلي السكر في الدم بشكل كبير وبتزود الوزن.

- تالت حاجة، الأكل اللي فيه دهون مشبعة زي الأكل السريع والمقليات بيزود احتمالية الإصابة بأمراض القلب وبيأثر على الكلى.

- رابع حاجة, المعلبات والمواد الحافظة والمشروبات الغازية.

#كلام_في_الطب_د_محمد_ممدوح

الوشم قد يزيد خطر الإصابة بسرطان الغدد اللميفاوية ..

الوشم للأسف بقى موضة مستوردة بالنسبة لنا وبقينا نشوف مشاهير كتير بتقلد الغربيين في القصة دي ..
في البوست ده هناقش التساؤلات عن تأثيره على الصحة.

بالإضافة للحساسية والندوب من آثاره فيه تأثيرين مضرين .. هما العدوى وخطر الإصابة بالسرطان

حسب دراسة في يوليو 2024 26 من 75 نوع حبر وشم في أمريكا كانوا ملوثين ببكتيريا ممكن تسبب عدوى.. وبالتأكيد في غيرها من الأماكن هتلاقي نفس النسب أو أعلى.

الأكتر قلقًا، دراسة من السجل الوطني للسرطان في السويد للأشخاص اللي تتراوح أعمارهم بين 20 و60 سنة وتشخصوا بسرطان الغدد الليمفاوية بين 2007 و2017.

الدراسة لقيت إن الوشم ممكن يزيد خطر الإصابة بسرطان الدم بنسبة 21%.
وكان الخطر بيزيد بشكل كبير في أول سنتين بعد الوشم.

سرطان الغدد اللمفاوية نوع من السرطان بيبدأ في الجهاز اللمفاوي، واللي هو شبكة من الأوعية والعقد اللمفاوية اللي بتمتد في الجسم كله.

صحيح العلاقة لسه مش مؤكدة تماماً لكن الموضوع يستحق لفت النظر والانتباه.

#كلام_في_الطب_د_محمد_ممدوح

ينصح مرضى الكلى وكبار السن بتجنب التعرض لموجات الحر الشديدة حتى لو كانوا بيحافظوا على شرب السوائل بانتظام..

- حسب دراسة جديدة بيحصل تأثر في لوظايف الكلى - زيادة الكرياتينين والسيستاتين سي - عند كبار السن بعد التعرض لحرارة شديدة في بيئة جافة، رغم إنهم بيشربوا مياه كويس.
التغيرات دي بتكون أقل في بيئة رطبة ومع الشباب.

- الباحثين عملوا دراسة على مؤشرات وظائف الكلى عند 20 شاب (21-39 سنة) و18 كبير في السن (65-76 سنة) في ظروف حرارية مختلفة.

- المشاركين اتعرضوا لحرارة 47 درجة مئوية و15% رطوبة (بيئة جافة) و41 درجة مئوية و40% رطوبة (بيئة رطبة) لمدة 3 ساعات.

- جمعوا عينات دم في الأول، بعد التعرض للحرارة، وبعد ساعتين من انتهاء التعرض.

- الكرياتينين والسيستاتين سي كانوا المؤشرات الرئيسية لوظائف الكلى.

- حصل زيادة في مستوى الكرياتينين والسيستاتين سي في الدم عند كبار السن بعد التعرض للحرارة في البيئة الجافة.

- التغيرات في مستويات الكرياتينين عند كبار السن في البيئة الرطبة كانت طفيفة.

- مفيش تغيرات كبيرة في مستويات السيستاتين سي عند الشباب، لكن لوحظت زيادة طفيفة في الكرياتينين بعد ساعتين من التعرض للحرارة.

برغم العدد القليل وقصر عمر التجربة لكنها بتقول إن التعرض للحرارة ممكن يساهم في التأثير على وظائف الكلى خاصة عند كبار السن.

#كلام_في_الطب_د_محمد_ممدوح

https://vt.tiktok.com/ZSYcvuwxE/

إزاي تمنع تكون حصوات وأملاح الكلى

السمنة واحدة من أكبر المشاكل اللي بتواجه مرضى الكلى..
إيه الأكلات اللي يبعد عنها مريض الكلى لو عاوز وزنه ينزل ؟

1. الأكلات اللي فيها صوديوم عالي:
- الأكلات المعلبة: زي الشوربة الجاهزة والصلصات واللحوم المعلبة.
- الوجبات السريعة: زي البرجر والبيتزا.
- المخللات: والأكلات المحفوظة بملح كتير.

2. الأكلات اللي فيها فوسفور عالي:
- اللحوم المصنعة: زي السوسيس والسلامي.

3. الأكلات اللي فيها دهون مشبعة:
- المقليات: زي البطاطس المحمرة والوجبات السريعة.
- الحلويات.
- الأكلات المصنعة: زي السناكس المقلية والحاجات الجاهزة.

4. المشروبات:
- المشروبات الغازية: فيها فوسفور صوديوم وسكر كتير.
- العصاير المحلاة: فيها سكر كتير.

نصايح إضافية:
- شرب الميه: بكمية كافية حسب تعليمات الدكتور علشان تتجنب الجفاف وتحافظ على وظائف الكلى.
- تحضير الأكل في البيت: علشان تتحكم في مكونات الأكل وكميات الملح والدهون.
- مراقبة حصص الأكل: كل كميات صغيرة ومتكررة علشان تحفز عملية الأيض.

الابتعاد عن الأكلات دي هيساعد في الحفاظ على صحة الكلى ويساهم في خسارة الوزن بشكل آمن وصحي لكن دايما استشير دكتورك قبل أي تغييرات كبيرة في نظامك الغذائي.

لو البوست مفيد ليك متنساش تعمله لايك وشير عشان يوصل لعدد أكبر من المتابعين.

#كلام_في_الطب_د_محمد_ممدوح

https://vt.tiktok.com/ZSYnBrhSt/

قلقان من الإصابة بمرض السكر من النوع الثاني ؟
إطفاء النور بليل ممكن يبعدك عن السكر !

بجانب الاستراتيجيات الوقائية المعروفة زي النظام الغذائي والتمارين الرياضية فيه استراتيجية بسيطة جداً ممكن تساعد في الوقاية من السكر وهي إطفاء الضوء ليلاً.

دراسة نشرت من أيام في مجلة "The Lancet" العريقة وجدت أن الأشخاص اللي تعرضوا لأكبر قدر من الضوء بين الساعة 12:30 صباحاً و6 صباحاً كانوا أكثر عرضة بمقدار 1.5 مرة للإصابة بالسكر مقارنةً باللي ناموا في الظلام خلال الفترة دي.

باستخدام بيانات من 85,000 مشارك من UK Biobank، تعتبر هذه الدراسة الأكبر حتى الآن التي تربط بين خطر السكر والتعرض للضوء ليلاً.

بخلاف الدراسات السابقة التي اعتمدت على بيانات الأقمار الصناعية لمستويات الضوء الخارجي، اعتمدت الدراسة الأخيرة على قياس الضوء الشخصي مباشرة بواسطة جهاز استشعار يرتديه الأفراد.

الضوء الليلي يمكن أن يعطل الإيقاع اليومي للجسم، وهو مهم لتنظيم تناول الطعام، امتصاص السكر، وإفراز الأنسولين.
الخلل في الإيقاع ده مرتبط بمقاومة الأنسولين، وهو ما يسبق الإصابة بالسكري من النوع الثاني.

إطفاء الضوء ليلاً ممكن يساعد في تقليل خطر الإصابة بالسكر.
ولكن لا زلنا محتاجين دراسات أكبر لتأكيد لو استراتيجيات زي إطفاء الشاشات، إطفاء الأضواء، أو استخدام الستائر المعتمة يمكن أن تقلل من الخطر ده.

في سياق الوقاية من السكر وبناءً على نتائج الدراسة دي من الجيد تشجيع الناس على تبني أنماط صحية للتعرض للضوء والنوم.

بسبب تقييد الفيسبوك للبوستات بدون إعلانات محتوى الصفحة بقى بيوصل لعدد قليل من المتابعين.. لو البوست مفيد ليك متنساش تعمله لايك وشير عشان يوصل لعدد أكبر من الناس.
رابط الدراسة في التعليقات

#كلام_في_الطب_د_محمد_ممدوح

الكلى وأمراض العظام..

- أمراض الكلى ممكن تسبب مشاكل في العظام، وده بيبدأ بدري مع القصور الكلوي وبيسوء مع الوقت لو متعالجش.

- مشاكل العظام بتحصل لما مستويات الفوسفات، فيتامين د، الكالسيوم، وهرمون الغدة الجار درقية (PTH) تتلخبط.

- ده بيخلي فيه ألم في العظام، المفاصل، أو العضلات، وضعف، وزيادة خطر كسور العظام، وده بيزيد مع زيادة القصور الكلوي.. وبيبقى نسبه عالية في مرضى الغسيل الكلوي.

- العلاج بيعتمد على شدة مرض الكلى، سن المريض، ومستويات الفوسفات، الكالسيوم، فيتامين د، وPTH.

- العلاج بيتضمن خفض مستويات الفوسفات من خلال تغيير النظام الغذائي واستخدام أدوية معينة، وكمان أدوية فيتامين د وأدوية بتشتغل زي الكالسيوم.
بعض الحالات، ممكن تحتاج تدخل جراحي للغدد الجار درقية.

- عشان كده مهم عمل تحاليل دم منتظمة عشان نقيس مستويات الفوسفات، الكالسيوم، فيتامين د، وهرمون الغدة الجاردرقية،
واحيانا ممكن نعمل قياس كثافة العظام أو أشعات أخرى.

#كلام_في_الطب_د_محمد_ممدوح

متابعة الضغط خاصة في كبار السن في فترات الصيف مهم جداً لأن كتير منهم بيتعرضوا لنوبات جفاف وانخفاض في الضغط بسبب نقص السوائل وتمدد الأوعية الدموية مع ارتفاع درجات الحرارة والرطوبة.

#كلام_في_الطب_د_محمد_ممدوح

الأطعمة فائقة المعالجة، ما هي وما آثارها على صحتك ؟

في 2010 اكتسب عالم الأوبئة البرازيلي الدكتور كارلوس مونتيرو شهرة عالمية لتطويره تصنيف NOVA.

يُصنّف هذا النظام الأطعمة بناءً على درجة معالجتها إلى:
الأطعمة غير المعالجة أو المعالجة بشكل طفيف، مكونات الطهي المعالجة، الأطعمة المعالجة،
والأطعمة فائقة المعالجة مثل المشروبات الغازية والبسكويت والبيتزا المجمدة.

الأطعمة فائقة المعالجة تم إنشاؤها لتحل محل الوجبات الطازجة، وليست لتوفير النسب الغذائية اللي بنحتاجها.
وتضاف إليها إضافات تجميلية لتحسين المذاق وزيادة مدة الصلاحية فتفقد المواد المفيدة وتحتوي على مواد كيميائية ضارة..

أظهرت دراسة تحليلية شملت بيانات من 93 دولة أن استهلاك الأطعمة فائقة المعالجة يتزايد بشكل مستمر، خاصة في البلدان ذات الدخل المنخفض والمتوسط. والأشخاص الذين يتناولون هذه الأطعمة يستهلكون سعرات حرارية أكثر بكثير، مما يؤدي إلى زيادة الوزن.

استهلاك هذه الأطعمة يرتبط بمخاطر صحية متعددة مثل الوفيات والسرطان ومشاكل الصحة النفسية والجهاز التنفسي والقلب والأوعية الدموية والجهاز الهضمي.

في الصورة أمثلة على الأطعمة فائقة المعالجة.. #