Dr. Mohamed Mamdouh Abdalbary د. محمد ممدوح عبدالباري

مرضى كتير أما بيتقالهم إن القصور الكلوي المزمن ملوش علاج يشفي منه نهائياً بيقولوا خلاص يبقى مش فارقة ولا نتابع ولا ناخد علاج طالما كده كده مش بيروح..

وده غلط كبير في فهم طبيعة الأمراض المزمنة..

لو هناخد مثال يوضح الفكرة..

لو عندنا اتنين في سن الستين مثلاً في نفس الحالة الصحية وعندهم قصور كلوي مزمن في المرحلة التانية.. ودي تعتبر في البدايات.. يعني كرياتنين من ١.٥-٢ تقريباً..

المريض أ.. متابعش من بدري ولا انتظم في العلاج والمتابعة ولا خد الأدوية اللازمة للحفاظ على وظيفة الكلى..

المريض ب.. اتشخص وتابع بدري وانتظم في العلاج والمتابعة وخد الأدوية اللازمة للحفاظ على وظيفة الكلى..

الأبحاث بتقولنا إن بعد ٧-١٠ سنين تقريبا المريض أ هيوصل للمرحلة الأخيرة مرحلة الفشل الكلوي وهيحتاج يغسل أو يزرع..

لكن المريض ب عشان يوصل لنفس المرحلة دي هيحتاج ٢١ سنة وأكثر.. وربما لا يصل لتلك المرحلة ..

يعني فرق أكثر من ١١ سنة بعيداً عن الغسيل الكلوي ..
وده بالتأكيد حاجة تستحق الاهتمام والمتابعة..

لو نفس المرضى لكن تم اكتشافهم والتدخل العلاجي معاهم بشكل متأخر ده برضه بيبعدنا عن الغسيل الكلوي.. لكن مدة أقل.. حوالي ٣-٥ سنوات.

عشان كده بنقول دايماً : اكشف بدري.. اعمل تحليل وظايف كلى وتحليل بول بصفة دورية.. ارجع لدكتور الكلى حتى لو فيه ارتفاع بسيط في الكرياتينين.. والتزم بالعلاج والمتابعة.

#كلام_في_الطب_د_محمد_ممدوح

💡 ملخص لأخبار مهمة عن السمنة وعلاجاتها💡

السمنة مش بس بتأثر على المظهر الخارجي، السمنة مرض مزمن بيأثر على جودة حياتنا وصحتنا لكن التطورات العلمية في السنين الأخيرة قدمت حلول فعّالة لعلاج السمنة، سواء من أدوية السكر الجديدة أو الجراحات المختلفة👇

1️⃣ "ريتاتروتايد": بطل جديد في عالم السمنة!
بعد الأدوية اللي بتشتغل على مستقبل واحد زي الأوزميبك واللي بتشتغل على مستقبلين زي المونجارو .. ظهر ريتاتروتايد اللي بيشتغل على تلات مستقبلات ..
الدواء الجديد يعتبر من أقوى أدوية السمنة في السوق حاليًا، والمرضى اللي استخدموه قدروا يخسروا وزن بنسبة أكبر بكتير من غيره من الأدوية.
نتائج الدواء ده ممكن تكون ثورية لمرضى السمنة والسكر.

2️⃣ في خطوة تعتبر تاريخية، دواء السمنة الجديد تيرزيباتيد من "ليلي" أصبح مغطى تحت التأمين الصحي ميديكير في أمريكا. ده معناه إن المرضى اللي بيعانوا من السمنة وانقطاع النفس أثناء النوم يقدروا دلوقتي يحصلوا على العلاج بشكل أرخص وأسهل. ولأن انقطاع النفس أثناء النوم مرض مرتبط مباشرة بالسمنة، فالتأمين اعتبره علاج أساسي وغطى تكلفته .. نتمنى في المستقبل نشوف خطوات مماثلة عندنا !

3️⃣ دراسة جديدة طرحت سؤال مهم: "إيه أفضل طريقة لعلاج السمنة؟ الدايت، الأدوية، ولا جراحات السمنة؟ "
والإجابة كانت ببساطة: "حسب حالتك الصحية".

🔹 *لو السمنة لسه في مراحلها الأولى:*
الدايت والرياضة ممكن يكونوا كافيين مع شوية التزام.

🔹 *لو السمنة متقدمة ووزنك مش بينزل بسهولة:
أدوية زي "GLP-1" (زي "ريتا تروتايد") بتوفر نتائج مبهرة وبتساعد على خسارة وزن كبيرة من غير تدخل جراحي.

🔹 *في حالات السمنة المفرطة جدًا:*
الجراحات زي التكميم أو تحويل المسار بتكون الخيار الأفضل لأنها بتغير أسلوب التعامل مع الأكل تمامًا.

#كلام_في_الطب_د_محمد_ممدوح

📢 فيروس جديد يكتسح الصين.. إيه القصة؟

الفترة الأخيرة، الأخبار مليانة كلام عن فيروس جديد بيظهر بقوة في الصين، وبيسبب قلق .
الفيروس هو
HMPV
أو المعروف باسم الفيروس الرئوي البشري أو الميتانيمو
تعالوا نفهم إيه الحكاية:

🔹 إيه هو الفيروس ده؟
ده فيروس تنفسي قديم مش جديد تم اكتشافه في عام
2001
بيعمل أعراض شبيهة بالبرد زي السعال والرشح والحرارة.
وفي بعض الحالات، ممكن يسبب مشاكل أكبر زي التهاب الرئة خصوصًا عند الأطفال وكبار السن أو الناس اللي عندهم مشاكل في المناعة.

🔹 ليه الكلام عليه دلوقتي؟
الصين بتشهد زيادة في عدد الحالات، وده عمل قلق عند الناس هناك، خصوصًا إن المستشفيات بقت زحمة بالأطفال اللي أقل من 14 سنة. لكن السلطات الصحية أكدت إن الزيادة دي متوقعة في الشتاء ومافيش دليل إنها أخطر من المعتاد.

🔹 هل في خطر عالمي؟
لحد دلوقتي، منظمة الصحة العالمية بتقول إن الفيروس ما بيشكلش تهديد عالمي زي كورونا. وإن الأعراض بتتعالج عادي جدًا بالراحة وشرب السوائل وأدوية البرد اللي من غير روشتة.

🔹 هل فيه لقاح ؟
للأسف، مفيش لقاح مخصص للفيروس ده لحد دلوقتي، لكن الوقاية هي الحل

🛡️ إزاي نحمي نفسنا؟
- اغسل إيديك كويس وباستمرار
- ابعد عن أي حد عنده أعراض برد
- لو حاسس بتعب، ارتاح في البيت

💡 الخلاصة:
الفيروس ده مش جديد، وأعراضه غالبًا بسيطة وبتعدي. المهم نفضل حريصين على صحتنا وصحة اللي حوالينا.

هتلاقوا المصادر في التعليقات ولو عندكم أي أسئلة أو استفسارات، اكتبوها في الكومنتات 👇

#كلام_في_الطب_د_محمد_ممدوح

----
يعني إيه أكياس الكلى وايه أنواعها ؟

https://www.tiktok.com/@dr.mohamed.m.abdalbary/video/7403340263533382930
https://www.facebook.com/share/v/1DbaPuTUC9/

تكيسات الكلى الوراثية - الحلقة الأولى الأسباب وطبيعة المرض

https://www.tiktok.com/@dr.mohamed.m.abdalbary/video/7425209125866409234
https://www.facebook.com/share/v/15Ff9Weio8/

تكيسات الكلى الوراثية - ٢ التشخيص والأعراض

https://www.tiktok.com/@dr.mohamed.m.abdalbary/video/7426888710416813330
https://www.facebook.com/share/v/1BL8a3XLXf/

تكيسات الكلى الوراثية - ٣ إمتى نبدأ نعمل فحص للأولاد لو الأب أو الأم عندهم تكيسات الكلى الوراثية

https://www.tiktok.com/@dr.mohamed.m.abdalbary/video/7429035138945748242
https://www.facebook.com/share/v/1A2nVMg4yG/

تكيسات الكلى الوراثية - ٤ إيه العلاج؟ نعمل إيه لتاخير الفشل الكلوي

https://www.tiktok.com/@dr.mohamed.m.abdalbary/video/7430463777499680008
https://www.facebook.com/share/v/18V5QhJTWr/

----
ينفع نطبخ ونقلي بزيت الزيتون ؟

https://www.tiktok.com/@dr.mohamed.m.abdalbary/video/7452855257404591368
https://www.facebook.com/share/v/1Gn6v7uAgP

نصائح مهمة جداً لتجنب مضاعفات سرطان الثدي و القولون والكبد

https://www.tiktok.com/@dr.mohamed.m.abdalbary/video/7401848650630008072
https://www.facebook.com/share/r/15AkA3SPA7

معلومات مهمة للوقاية من أورام الرحم والبروستاتا

https://www.tiktok.com/@dr.mohamed.m.abdalbary/video/7407066443721772295
https://www.facebook.com/reel/898127878826073