پست‌های تلگرام الشاعر كرار حسين الكربلائي

الهي بموسى ابن جعفر شافي وعافي كل مريض يا رب

دمعي اعله حيطان السجن
يشبه دمع رقيه
يرسم نحر يرسم خيم يرسم حرم سبيه
وجروحي ماتنام
وبوحشته الظلام يرسم حرم سبيه
...
١٥ عام بسجن عن اهلي غايب
شيبت حته العمامه من المصايب
حالتي حالة رقيه بالخرايب
ارد اموت من البواچي اعله الحبايب
بسجني عشت ضيم السبي
وتجرعت عذابه
والعايش بظلمة سجن يفهم حچي الخرابه
دمعي دمع امام
وبوحشته الظلام .. يرسم حرم سبيه
....
حزني عاشورائي ودموعي قليله
عمري گضيته مجالس ليله ليله
ليش اسمي صاحب السجده الطويله
جنت لله اشتكي سبي العقيله
مل السجن من ونتي وكمت استمع ونينه
والتنسبي عمته تره ماتغفه لحظه عينه
اعليه الفرح حرام
وبوحشته الظلام .. يرسم حرم سبيه
...
گيدوني وكلمه خلت دمعي هامل
احنه گيدنه علي گبله بسلاسل
اتذكرت زينب سبوها بلا محامل
بسجني گمت اصرخ مثلها يابوفاضل
وشما اصلي بالسجن اتخيل المصيبه
مچتوفه صلت عالهزل بت حيدر الغريبه
وشيوصف الكلام
وبوحشته الظلام .. يرسم حرم سبيه
...
غربتي يا شيعتي بالكاظميه
عيشتني مصاب يوم الغاضريه
من انسطر وجهي اذكرت سطرة رقيه
وعيني صارت حمره مثل امي الزچيه
تتشتم امي فاطمه وگلبي يشب حنينه
وكلما يضربون المتن اذكر متن سُكينه
دمعي بعث سلام
وبوحشته الظلام .. يرسم حرم سبيه
...
بالسجن والطف الي يبعث نسيمه
يا خلگ يوميه اشم دخان خيمه
ساعه اسمع عالنحر ونة يتيمه
وصوت كسر ضلوع بالحافر هشيمه
وحرمه اعله تل الزينبي يوميه انظرلها
ماعدها خيمه للحرم واتحشم الكفلها
عيله بلا خيام
وبوحشته الظلام .. يرسم حرم سبيه
...
من متت واتشيعت تشييعي هيبه
بالنعش واتذكرت هاي المصيبه
حسين ظل بلادفن جثه سليبه
وسلمت بدموعي عالشيبه الخضيبه
جسمي سليم وبالدفن حضرت الي عشيره
وجدي وذر وبدفنته يلمونه بالحصيره
صار الدمع ختام
وبوحشته الظلام .. يرسم حرم سبيه
...
خادم الحسين ( عليه السلام)
كرار حسين الكربلائي

نزل وحي الموت ياخذ روحي بالسجن
گعد يم راسي يعد جروحي بالسجن
شاف بعيوني حيره
لا اهل لا عشيره
بالسجن .. بالسجن
...
خمسطعش عام كاظم الغيض
وي سجدته الطويله
بغربته ذيج بالسجن شاف
وحي الأجل هالليله

قبّل يمينه الطاهره ناح وسجد يمه
يبچي اعله حالت سيّده بجنحه مسح دمه

وظل يسولفله الامام السابع
قصته
هالمسيه يسمع الماسامع قصته
محنه كلش جبيره
لا اهل لا عشيره
بالسجن .. بالسجن
...
يا وحي الموت عايش اسنين
محد سأل عليه
برگبتي گيد بالجدم گيد
والسلسله بديه

إسأل حياطين السجن
تحچيلك جروحي
ليل ونهار بغربتي ومعذبه روحي

دنيه ظلمه وما شفت كل راحه بدنيتي
ما اميّز ليلي من مصباحه
بدنيتي
عمري شنهو مصيره
لا اهل لا عشيره
بالسجن .. بالسجن
...
يا وحي الموت عندي سجان
يتلذذ بونيني
حمره عيناي والسبب چان
هو سطرني بعيني

خل عينك اتشوف المتن ويذهلك المشهد
يضربني سوط بكل مسه وصار المتن أسود

روحي صارت عالحزن معتاده
للأسف
والزمن ما يحترم اسياده
للأسف
حزني ما صح نظيره
لا اهل لا عشيره
بالسجن .. بالسجن
...
يا وحي الموت من عذابي
گمت اندعي بصلاتي
يا إلهي بفاطمه اعليك
قرّب الي وفاتي

يوم الفرج اريده بس الفرج وينه
والمثلي عايش بالغرب شيسوي بسنينه

والله مشتاگ لهلي واحبابي
يالأجل
من زمان انتظرك اتدگ بابي يالأجل

روحي للهم اسيره
لا اهل لا عشيره
بالسجن .. بالسجن
...
يا وحي الموت أُقبض الروح
خل ينتهي مراري
بجسر الاحزان شيعتي هناك
ملهوفه بنتظاري

جمعه اعله جمعه انتظر
يمته يجي موتي
رايح اروح لشيعتي
شايلني تابوتي

وانه ميت روحي تتلگاهم
عالجسر
وينتظرإبني الرضا وياهم
عالجسر
بس دموعي الغزيره
لا اهل لا عشيره
بالسجن .. بالسجن
...
يا وحي الموت قصتي هاي
من اعظم المصايب
ثاري موجود والامل صار
بيد الامام الغايب

المهدي بسلامه من يجي الثارات بظهوره
ثار الذبح ثار السبي وضلوع مكسوره

الشيعه خلها تندعي بكل ليله بالفرج
واليحبنه المنتظر يدعيله بالفرج

الغايب الكله غيره
لا اهل لا عشيره
بالسجن .. بالسجن
...
خادم الحسين ( عليه السلام)
كرار حسين الكربلائي
( ابو كميل)

يهلنه جروحي ظلت غافيه
يهلنه يا مسية العافيه
يهلنه شوفه منكم كافيه
...
شايل بگلبي جرح محد يشيله
للفرج احسب ليالي ليله ليله
آنه اسمي صاحب السجده الطويله
شعندي غير الباري اسجد واشتكيله

يدنيه روحي ما مرتاحه
يدنيه يمته اشوف الراحه
يدنيه وياي ابد ما وافيه
...
عمري غربه والزمن شتت شملنه
الدنيه ما ادري بعد ترجع تلمنه
چانت الدنيه بوجود احبابي جنه
يا مسية العافيه اعليكم يهلنه

عيالي ما دريت اشلونهم
عيالي ما اعيش بدونهم
عيالي داري منهم خاليه
...
ما اجت منهم رساله ولا وصيه
15 عام السلاسل فوگ اديه
احجي ويه الليل ودموعي جريه
ليش محد من هلي يسأل عليه

يليلي اهلي وين الگاهم
يليلي انحب لفرگاهم
يليلي شو سمائك صافيه
...
اهلي احباب الگلب يصعب هجرهم
لا يمرّوني ولا اگدر أمرهم
ما نسيت وشايل بعيني صورهم
والله احبهم من عسن عمري لعمرهم

حنيني للرضا ورسومه
حنيني لفاطمه المعصومه
حنيني جمرته ما طافيه
...
بالله المفارگ هله گلبه شيصبره
روحي عدها اويه الحزن والدمعه عشره
بدم رگبتي صايتي مصبوغه حمره
انه مثل الزهره هم بعيوني سطره

يعيني حمره من السطره
يعيني مثل عين الزهره
يعيني بالسجن ما غافيه
...
حيرتي ياهالخلگ ما منها حيره
ردت اشوف احبابي بالساعه الاخيره
يوم موتي شيعت جسمي العشيره
اذكرت جدي حسين لمّوه بحصيره

حُسيناه جثته مرميه
حسيناه عيلته مسبيه
حسيناه اشفافه ظلت ضاميه
...
خادم الحسين ( عليه السلام)
كرار حسين الكربلائي
( ابو كميل)

يا راهب الدمعه
موعدنه بالجمعه
بجسر الرصافه من گلت جيت وتلاگينه
عدنه وعد ثاني
للغايب نتاني
مرت الف جمعه ولا مر بينه مهدينه
....
بالسجن ذابت حياتك چنها شمعه
ولدعاء الفرج من تقرا نِسمعه
المهدي مثلك غايب و بعيونه دمعه
ولظهوره صرنه نحسب جمعه جمعه

جمعه جمعه نحسبله
دخيل اترابك اتگله
تراهي الدنيه بغيابه
وحگ چبد الحسن ذله

يا موسى ابن جعفر
گله شوكت يظهر
بچفنه قبضنه جمرته والجمره تچوينه

كل جمعه ننتظره
ريحانة الزهره
مرت الف جمعه ولا مر بينه مهدينه
....
انت وحدك بالسجن والمهدي وحده
ومثلك بگيد الصبر مچتوف زنده
مثل دمك تجري دمعاته اعله خده
عايش بغربة وطن والدنيه ضده

الغايب مثلك بحيره
من ديره لعد ديره
ما ندريبه ساكن وين
على بختك يبو الغيره

كل عمره بحزانه
وما نندل امچانه
وين استقر بيا وطن وبيا بلد وينه

لحّد يبو طلبه
صعبه تره صعبه
مرت الف جمعه ولا مر بينه مهدينه
....
المهدي مثلك سيدي عاشر نحيبه
عايش بهيئة جرح ميت طبيبه
ظل غريب وشيعته مثله غريبه
شياكل شيشرب ولا ندري بمغيبه

يغفه ويصحه عالآلام
چم عام المضه چم عام
يمكن من يجيسه الضيم
يم بابك يجي وينام

ويانه بالحضره
يلطم عله صدره
حاضر عزانه ودمعته هيه التبچينه

وين الله ونشوفه
وانقبّل اچفوفه
مرت الف جمعه ولا مر بينه مهدينه
....
السوط من خله عله متونك اشاره
اتذكرت عمتكم ودمعك تجاره
المهدي يبچي اعله السبي ليله ونهاره
كل مسيه آه يا زينب شعاره

من النوح ما يتعب
لزينب كل وكت ينحب
يصيح بصوت مسبيه
آه اعليج يا زينب

درب السبي جروحه
ظل يسحن بروحه
كل عمره ما ينسه الشمر من چتّف اسكينه

ايده عله ظهره
ويساعد الفقره
مرت الف جمعه ولا مر بينه مهدينه
....
جسمك من اتشيّع ابين العشيره
انت ميت واعله وجهك شفنه حيره
اتذكرت جدك بقه بحر الظهيره
آه يحسين انجمع جسمه بحصيره

والموعود بغيابه
دموع عيونه سچابه
نسمع صوته ويه الصاح
آيحسين ومصابه

والمهدي ما ينسه
بصدره اثر رفسه
جده انذبح من الگُفه واعله الحرم عينه

كل احنه هليله
بالفرج ندعيله
مرت الف جمعه ولا مر بينه مهدينه
....
بحضرتك جينه نجددلك عهدنه
عدنه طلبه ويابو طلبه ما تردنه
انريد منك سيدي تنصر حشدنه
وبسلامه من الحرب ترجع ولدنه

شباب هواي قدمنه
وفدوه لگبتك دمنه
ما دام الضريح بخير
كلشي يصير ما يهمنه

وشچم الشهيد الطاح
ولجل الولايه راح
فدوه مناحرنه الك بس تقبل اعلينه
الله يصبرنه
والمهدي ينصرنه
مرت الف جمعه ولا مر بينه مهدينه
....
خادم الحسين ( عليه السلام)
كرار حسين الكربلائي
( ابو كميل)

نقراها بكتاب الحزن آهاتك الموسوية
يمته الفرج من السجن يايوسف الكاظمية
◾◾◾
بالسجن وبسجدتك نسمع بكاءك
بچت عيون العرش لهجة دعاءك
تدري چم يعقوب ملهوف للقاءك
لا إجت ويا النسم ريحة رداءك
بلهفة گلبها على الجمر تنتظرك الرافضية
يمته الفرج من السجن يايوسف الكاظمية

◾◾◾
بدنيا ما بيها وفاء المن نعاتب
شما مصايب تنتهي تبدا مصايب
ابيضت عيون الروافض ونته غايب
يمته ترجع تمسح دموع الحبايب
ولشوفتك كل شيعتك نذرت عمرها هدية
يمته الفرج من السجن يايوسف الكاظمية
◾◾◾
حلم فسر يوسف و حصل نجاته
إنت يالكاظم چنت سر معجزاته
منهو مثلك بالسجن خلصت حياته
و گيده يجرح رگبته حتى بصلاته
دايم على الهم و الألم بدموعك الزينبية
يمته الفرج من السجن يايوسف الكاظمية
◾◾◾
١٥ عام السجن عشت بظلامه
من عذابك شيبت حتى العمامة
بليل حزنك ما يمر فجر ابتسامة
و اليفارگ اهله يا ليل الينامه
يا راهب العترة و الك مشبوحة عين المنية
يمته الفرج من السجن يايوسف الكاظمية
◾◾◾
يا شمس و الدنيا مشتاگه لنهارك
يمته تخلص سيدي رحلة مرارك
فاطمه المعصومه بنتك بنتظارك
تلزم ايديها و ترد بيها على دارك
من طلعة انوارك بقت يالغالي دارك خلية
يمته الفرج من السجن يايوسف الكاظمية
◾◾◾
كل موالي بيده وردة و بيده شمعة
گلنا يوم الجمعة بينا تصلي جمعة
لاح نعشك و اربعة چانت تشيعه
إنت ميت ونك و نوحك نسمعه
يالگطعوا چبدك بعد ما تسأل الجعفرية
يمته الفرج من السجن يايوسف الكاظمية

15 عام بدموعي الموسويه
بالسجن عايش ليالي زينبيه
بكلشي يمر بيه
اذكر المسبيه
بالسجن عايش ليالي زينبيه
...
موسى بن جعفر يا زمن وانفاسي مهمومه
وخمس طعش عام الجفن ما ملتقي بنومه
مشتاگ لوليدي الرضا وما ادري شعلومه
والروح فاضت بالألم لبنيتي معصومه

انه بحنيني .. ما تغفه عيني
مشتاگه روحي .. لشوفة بنيني


لو رجب مر بيه يبقه گلبي مكسور
من ازورن جدي اذكر يوم عاشور
يا ناس ليليه
اذكر المسبيه
بالسجن عايش ليالي زينبيه
...
حزن العقيله بكربله بي شبه من حزني
السجان اشوفنه شمر لمن يعذبني
اذكر متن زينب لمن بسياطه يضربني
ذاك اليسب ام الخدر وسط السجن سبني

نيراني تلهب .. گلبي تعذب
يضربوني واصرخ .. آه اعله زينب

من يمرني الليل ابقه ابچي وحدي
عمتي اذكرهاواهل دمعي اعله خدي
بدمعه حسينيه
اذكر المسبيه
بالسجن عايش ليالي زينبيه
...
ثگل الحديد برگبتي و لا مو سهل گيدي
ذيج السلاسل اصبحت حمره بدمه اوريدي
اذكر حبل چف عمتي من انظر لأيدي
وازينبا وازينبا كل لحظه ترديدي

دمعي اسيله .. بسجده طويله
ياناس نوحي .. لسبي العقيله

آنه صح بيدي سلاسل والگلب ناح
لچن ما شفت المناحر فوگ الرماح
آهاتي مخفيه
اذكر المسبيه
بالسجن عايش ليالي زينبيه
...
مره ردت اشتم هوه هيهات انساها
السجان اجه لوجهي سطر ولعيني طفاها
اتذكرت زينب بالسبي مسطوره عيناها
شسوه الزمان بعمّتي من بعد ولياها

ويلي عليها .. سمعو بچيها
وبنار الخيام .. مچويه اديها

بهالسجن وحدي انوح بحسرة احباب
عمْتي گعدت بالخرابه فوگ التراب
بهذا الجره اعليه
اذكر المسبيه
بالسجن عايش ليالي زينبيه
...
وتالي نزل امر القدر وبسجني سموني
واتغسلت واتكفنت واحبابي شيعوني
بنعشي اعله جدي المنذبح تتهامل اعيوني
عريان باقي بلا دفن بس انه دفنوني

ظل راسه مگطوع .. وبرمح مرفوع
وبحافر الخيل .. مهشومه الضلوع

بنتي مصيونه بغيابي وتبچي بسكوت
مو مثل بنته رقيه بالسبي تموت

عالراس محنيه
اذكر المسبيه
بالسجن عايش ليالي زينبيه
...
خادم الحسين ( عليه السلام)
كرار حسين الكربلائي
( ابو كميل)
جوار السيده زينب صلوات الله عليها

انه وغربتي وليل المنيه
وحيطان السجن تبچي عليه
وتصيح السموات .. يا موسى ابن جعفر
...
ذبل ليل الله لونيني وهاجت بروحي المحنه
بالسجن خُلصت حياتي وفارگِت لمّة اهلنه
ما ترد ذيچ الليالي والوكت طشر شملنه

عطشانه العيون لهلي
لديرة علي وخلفة علي
بالغربه محد ما إلي
الليل يخلص ونه ونه

اكتب والله مشتاگ بدمعتي
واكسر خاطر الظلمه بصفنتي
تگضي الليل حسبات .. يا موسى ابن جعفر
...
يوسف وسجنه ومصابه عشر معشار بمصابي
سجني ما بي حته شمعه وانطفت شمعة شبابي
تاكل بزندي السلاسل لحد ما دگ موتي بابي

فوگ الغرب فوگ السجن
تلعب سياط اعله المتن
سجني مثل بيت الحزن
انقرت بي قصة عذابي

يوسف ما جرع سم المصيبه
وانه جنازتي ظلت غريبه
نعشك عالجسر بات.. يا موسى ابن جعفر
...
يونس يگولون عنه ابطن حوت سنين گضّه
لچن ما چان الحديد برگبته وساگه يرضه
براحته لربه يصلي من يريد يأدي فرضه

وانه بفرض وبنافله
برگبتي وايدي السلسله
وتكتب دمومي السايله
اخذ يا رب حته ترضه

اوگف بالصلا وبعيني عبره
ومن دمي عباتي تصير حمره
وتنوح المناجاة .. يا موسى ابن جعفر
...
الموت مر بيه ولگاني ميت من الغربه وحدي
شگد تمنيت بمماتي عليه يلتمون ولدي
بنيتي معصومه تجيني وتمسح ادموعي اعله خدي

تالي بسجن عمري گضه
وما شايف وليدي الرضه
والسم سره بدمي ومضه
وگطع حته هروش چبدي

صاحولي امام الرافضيه
وانه آسمي ضوه عيون الزچيه
شلت شگد جراحات .. يا موسى ابن جعفر
...
نعشي من شالته الوادم نحت يصحاب البصيره
اذكرت يوم الغاضريه وشيخ ظل بلا عشيره
ظل ثلث تيام عاري وشيعو جسمه بحصيره

من بعد شيال العلم
حرگو اعله اعياله الخيم
وانسحگ صدره وانهشم
وخذو علوياته اسيره

حسين ضلوعه بالحافر هشيمه
وزينب تنسبي والله هظيمه
نوح اعله السبيات .. يا موسى ابن جعفر
...
خادم الحسين ( عليه السلام)
كرار حسين الكربلائي
( ابو كميل )

بجفوفه بجفوفه كون ‏ ‏الله بجفوفه
علَّة وجود الكون
ݥات بسجن هارون
عين السمه تشوفه كون الله بجفوفه
ـــ
هذا الكليم الناجه ربه اعله الطور
لو شبه موسه مدري واهب موسه
نور الله عجبه يموت ماشاف النور
سابع شموسه بالسجن محبوسه
هذا العله اجفوفع الفلك كله يدور
ربك بموسه روعته ملموسه

بنفاسه بنفاسه عطر الله بنفاسه
كبل ماسامع هاي أنغّسل الماي بماي
غيرته معروفه كون الله بجفوفه
ــــــ
طبعه مثل طبع الهِوه ماينشاف
تشعر وجوده العالارض موجوده
يشبه محمد بالخلق والاوصاف
چن علي عوده من يوافي اوعوده
امگيّد بسجنه ودوله من عنده اتخاف
حته قِيوده اتكبّر اعله زنوده

بعيونه بعيونه نور ‏ الله بعيونه
وايتاني نجم اسهيل دعوته بنص الليل
واضح من احروفه كون ‏ الله بجفوفه
ـــــ
شاف العنب والعنب گام ايحاچيه
راح افت چبدك شعتذر من جدك
موتك يبن جعفر الكون يبچيه
وبنار بُعدك ينچوي من بَعدك
خلصني من دنياي گام ايناديه
هات الي عندك بيّه نفّذ وعدك

خليني خليني انچتل خليني
15)عام اهموم خل انچتل مسموم
ارويحته ملهوفه كون الله بجفوفه
ــــ
لو سجد يسجد كلشي بالكون وياه
والصبر قوته ودمعته ياقوته
بّصمَته وهدوءه تلكه ديره من الاه
حسرة سِكوته تبجّي حته الموته
موسى ابن جعفر مات سبحان الله
ينسمع صوته ايسبح بتابوته

تابوته تابوته عرش الله بتابوته
جسر الرصافه اشگال وفوكه العرش ينشال
وحي السمه ايطوفه كون الله بجفوفه
ــــ
شيعته بلهفه اعله الجسر ينتظرون
كلها منجمعه الوعد يوم الجمعه
لساعة لقاءه لحظه لحظه يحسبون
صاحب الطلعه سالم الله يرجعه
كل محب شايل شمعه بس مايدرون
راحت الدمعه تطفي نور الشمعه
ايشيعونه ايشيعونه شيعته ايشيعونه
وناعي المصايب صاح موسى ابن جعفر راح
الوانه مخطوفه كون ‏ الله بجفوفه
ــٰـــ
عالنعش احبابه انثرت دمع العين
والرافضيه ابنوح ودعت ضيه
جسمه اندفن والآه لمصاب حسين
جسمه رميه اجروحه الف وميه
ע ע تناشد وين زينبهم وين
ذيچ الأبيه اعله الهزل مسبيه

يسبونه يسبونه ستر الله يسبونه
تنظر اعليها الناس باليسر والعباس
هامته مخسوفه كون الله بجفوفه
ــــ
شاعر آل محمد
كرار حسين الكربلائي

قبرٌ ببغداد لنفسٍ زكيه
والرحمه والخير بالكاظميه
…
بالسلف شيخ السلف ما يرد الوادم
الدنيه من تفتر عكس ندگ باب الكاظم

كله بخت بي تحلف الناس والعمه عباس ميرد بشر
ابو الرضه معزب الچثيرين ولخاطر حسين ثوّب نهر

يالطايح بضيج باوع عليه
ما يبقه محتار بالكاظميه
…
من تدگ باب الشمس ضوه يترس روحك
ابو طلبه بحضرته تنسه كل جروحك

والله ونعم باليقضه والطيف ما رجّع الضيف كله كرم
كل الهله كاتب عله الباب ويحل الصعاب باب الحرم

موسى ابن جعفر يحل القضيه
باب الكرم صار بالكاظميه
…
ما عطش غيم السمه السمه تسولف عنه
الزار جنة حضرته يگول هيه الجنه

نعم نعم بالكاظمين صحن الجوادين جنة عدن
عله العهد نوصل اله زحوف وبحضرته نطوف طول الزمن

ضريحه المقدس ملاذ البريه
جنتنه يا ناس بالكاظميه
…
اهل عشرين بصفر اليوم شالت رايه
كلها صاحت يا علي وطلعت المشايه

مشي مشي للكاظم نروح وتطيب الجروح بزيارته

خدم خدم نتحده الايام موعدنه كل عام يم حضرته

يناس اليزوره يفرح الزجيه
نلگاها تنعاه بالكاظميه
…
من عمت عيني گضت بالسجن ايامه
لغربته ومصيبته بكل عزه لطامه

يا فاطمه نگضي عمرنه نلطم صدرنه الكسر العظم
لاخر نفس نحلف بالحسين نگضيها السنين دمعه ولطم

هذا العزه صار النه هويه
موعدنه وياچ بالكاظميه
…
خادم الحسين ( عليه السلام)
كرار حسين الكربلائي
( ابو كميل )