فَضفَضة|أحمَد جَان.

العلاقات بين الناس بتنتهي بالسكوت، بتنتهي بين الصمت والانتظار وتفضل تفكر إزاي كنتوا في كل الأوقات سوا ودلوقتي مفيش غير السكوت السائد بينكم.
وعلشان كدا أنت محتاج تتكلم وتدرك إنك في خطر وبتخسر الطرف التاني، وكل واحد منتظر التاني يبدأ ويبادر بالكلام وده مخليك واقف من غير حركة بتنتهي بالفراق.
عزيزي القارئ مفيش حد بيحب السكوت ومفيش حد بيفضل ساكت دايمًا علشان كدا لازم تتكلم وتقول وتسمع الأسباب وتحدد تقدر تكمل أو تمشي وتنتنهي بس خليك واثق إن اصدارك الحكم من غير سماعك مبررات الطرف التاني هو ظلم له ولنفسك.
#أحمد_جان.
#فضفضة

صديقي العزيز، فكرة نسيان الأحداث من حولك هي فكرة بتحصلنا علشان نقدر نتجاوز إللي حصل ولكن في الحقيقة الإنسان بطبعه لا ينسى ويمكن النسيان بيحدث نتيجة تراكم الأحداث ولكن بيفضل الوجع ثابت وبرضو لسه منستش....
مراحل النسيان بتبدأ بالألم وتنتهي بالشفاء، كتير منا بيحاول ينسى إللي فات في محاولات يائسة زي إنك تنسى شخص أو تنسى موقف أو إنك تنسى ذكريات الماضي وفي وسط زحمة الأيام تلاقي نفسك بتفتكر! وكأن كل جرح ماضي لسة كان امبارح وكل وجع هو وجع النهاردة مش وجع من سنين، وده يا عزيزي لأنك بتهرب من الألم وعمرك ما وجهته ولا استعديت له.
وعلشان تستعد للألم هو إنك تدرك إن الحياة في حد ذاتها مش معمولة اللقاءات المفتوحة دي وإن كل كام يوم ذكرى شكل وكل كام سنة وجع من نوع خاص ولكن الحياة في طبيعتها ابتلاء واختبار من ربنا لينا وبالتالي فكرة حبك لشخص مش ليك فكرة صعبة ورهان كبير والألم هي نتيجته وفكرة موت شخص عننا هو ابتلاء عظيم علشان يبقى في عظة وعبرة ليك بعدين وذكرى معينة خايف منها تبقى درس تتعلم منه..
وأما المرحلة التانية فهي تقبلك للألم ذاته والتعامل معاه وكأنه جزء مؤقت وبينتهي، ينتهي لما ترضى وتصبر، ينتهي لما تدرك إن اللي حصل كان لازم يحصل وتعرف أنت بتتعلق ب إيه وبمين؟ وقتها هتدرك ليه الألم من البداية...
واخيرًا يا صديقي هي إنك تفضل تحب نفسك مهما كان وتحب ذكرياتك وتعرف إنك لولاها مكنش زمانك في المكان إللي أنت فيه سواء كان حلو أو كان وحش بس كل اللي اقدر أقوله ليك إنك عديت بكتير فالشوية دول تقدر تواجه نفسك وذكرياتك.
#أحمد_جان
#فضفضة

عزيزي القارئ، الحياة رغم قساوتها عليك ولغبطة أيامك وعدم فهمك للأمور في بعض الأحيان وبداية التوهان وعقلك يفضل يقولك إن نهاية الدنيا من خوفه من المجهول وإحساسه بالفقد والخذلان..
في الواقع يا عزيزي إن الإنسان بطبعه بيدور على الأمان والسكن ودي غايته الإستقرار والسكن حتى وجودنا هنا سكن ومواساتنا لبعض أمان وسكن.
كل لحظة أنت قريب فيها أو بعيد عن إللي بتحبه هي لحظة فيها سكن وسكينة بدون ما تحس بيه ومجرد ما يروح يبدأ حاجتك له تزيد..وتخاف من جديد وعلشان كدا أنت محتاج تلاقي نصك التاني ورفيق الدرب.
عزيزي، الحياة جميلة فوق ما تتخيل بس بتيسير ربنا حياتك جميلة برضاك عنها، حياتك جميلة بوجودك هنا رغم كل وجع مريت بيه وعلشان كدا فأنت بطل.♥️
#أحمد_جان
#فضفضة

صديقي العزيز، محتاج منك تقعد مع نفسك كتير تحاسبها وتشوف وجهتها وتقف مع نفسك كل ما تحس أنك بتغير اتجاهاتك وده لأننا بنمشي ورا أهوائنا وبننسى الهدف الحقيقي من الحياة.
عايز أقولك إن الحياة مش مستاهلة كل إللي بنعمله وبكل اللي بنحس بيه رغم المشاعر الصعبة من الحب والوجع والفراق ومشاعر صعبة من القسى وكل مشاعر سلبية إلا إن في ناس تانية مش قادرة إنها تحس..
في ناس تانية مش عايشة في الحياة، كل يوم بيعدي عليك أنت شايفه صعب فكر نفسك إن في ناس ابتلت في نفسها وفي أولادها وفي حبايبهم وقرايبهم
أفتكر إن في غيرك مش قادر يشوف أهله ولا قادر يحسوا بيه... أنا مش جاي بصغر وجعك بس جاي أصبرك وأقولك إنك مش لوحدك بتتألم ومش لوحدك اللي مكروب وعلشان كدا أتعلم الصبر يا عزيزي.
#أحمد_جان
#فضفضة

عزيزي القارئ، حابب أقولك إن كلنا جوانا عيوب وكلنا فينا مشاكل وكلنا بنواجه نفس الأزمات بس بطرق مختلفة، مافيش حد حزنه أكتر من حد أو مصيبته أكبر من حد كله بياخد أقداره باللي يقدر يشيله ويستحمله... وعلشان كدا ربنا عز وجل قال {وبشر الصابرين} .
إللي حابك تشوفه وتدركه أن مش كل الناس عايشة حياة من غير معاناة ومش كل الناس عايشة حياة كريمة.
كلنا بنواجه فخ الأقدار فخليك دايمًا راضي.
#أحمد_جان
#فضفضة

عزيزي القارئ الجميل، الحياة دروس ومواقف ومشاعر حزن وفرح ويأس وخوف وتوهان وفقد ثقة وحاجات كتيرة تانية مجهولة أنت شايلها جواك وساكت...
في الحقيقة كنت جاي أقولك عن سر خطير من أسرار الحياة وهو الوقت والرسالة
الوقت إللي بتبقى فيه كل حاجة جميلة معاك وكل حاجة بتعيشها اليوم بيومه وبتصحى لتاني يوم مستني كل حاجة تنعاد إلا إن أصبح معاد الرسالة خلص والشخص اللي بيقدمها كمان دوره خلص...
في الحقيقة يا عزيزي إن كلنا دروس وعِبر لبعض بناخد منها إللي ناقصنا واللي يكملنا والباقي بنسيبه وكأن لكل واحد فينا حلقة بتكمل لما نلاقي حد يعلمنا إزاي نلاقيها وتنتهي وقت ما تتقنها..
وعلشان كدا يا عزيزي متزعلش وقت فراقك وقت حزنك وقت خوفك متزعلش لأن هيجي اللي يكمل رسالته معاك ويعلمك شيء تاني جديد.
#أحمد_جان
#فضفضة

صديقي العزيز، عايز أقولك إنك مُحاط بكم من الاختيارات الغير معلومة بالنسبة لك وهي بتأثر عليك في كل اللحظات من غير ما تدرك؛ من أول اختيارك لتنسيق ألوانك لحد اختيار شريك حياتك وعلشان كدا أنت مُدرك كويس أهمية الاختيار...
في الواقع يا عزيزي أنت فعلًا مدركه ولكن خايف من العواقب والأزمات، خايف من الألم والخلافات بس أنت نسيت نقطة مهمة جدًا وتفصيلة صغيرة علشان كدا أنت نسيتها وهي إنك عمرك ما بتخسر
أنت بس بتفقد نفسك للحظة، لساعة، ليوم، لشهر، لسنة، بس أنت في إيدك متفقدهاش!
عزيزي أنت في الحياة الدنيوية إللي فيها كل شيء يحمل الصواب والخطأ ودورك هنا إنك تتدارك الموضوع مش إنك تتركه!
وعلشان كدا يا عزيزي حابب أقولك رسالة خدها من صديقك العزيز وهي إنك عمرك ما بتخسر أنت بتتعلم، أنت عمرك ما هتموت أنت بس بتتألم لحظات فرحت فيها بالشيء وده تمن فرحتك فأنت مخسرتش حاجة، لأنك ما بتخسرش.
#أحمد_جان.
#فضفضة

عزيزي القارئ، كلنا جوانا ذكريات مدفونة مخبينها بينا وبين نفسنا ومحدش يعرف عنها حاجة؛ وده لإنك أتيقنت إن مافيش حد هيقدر يساعد فيها وقررت تقفل كل الأبواب وتفتح باب واحد وهو إنك تمضي لطريقك وتكمل لحالك في محاولة منك لإنقاذ نفسك...
في الواقع هو بداية لشيء سيئ من غير ما تحس مجرد ما يحصل شيء يفكرك بالماضي كل الأبواب هتنفتح وكل إللي بتهرب منه هيبقى وراك...
وعلشان كدا يا صديقي اوعى تهرب أوعى تيأس من المواجهة، واجه ألمك، وواجه خوفك وبلاش هروب.
تألم حتى تُشفى يا عزيزي.
#أحمد_جان.
#فضفضة

صديقي العزيز الثانوية العامة ما هي إلا مرحلة في حياتك بتعديها بكل الظروف إللي فيها، في اللي بيقدر يعديها باللي كان مخطط له وفي إللي للأسف اللي الدنيا بتعانده لحكمة بيعرفها بعدين...
أي كان أنت أنهي واحد فيهم وأي طرف بينهم أنت عملت إللي عليك واللي كان كان خلاص أنت مش في ايدك أي حاجة غير إنك تقول الحمدالله وتبدأ تعافر من جديد... مافيش كلية قمة وكلية قاع! مافيش حاجة اسمها أنا فشلت فخلاص! عزيزي أنت لسه بتبدأ حياتك فكل اللي تقدر عليه دلوقتي هو إنك تبدأ بداية جديدة وتبني حلم من جديد ...
#أحمد_جان

التخلص من الماضي
عزيزي القارئ الجميل لازم قبل ما نبدأ كلام نعرف شوية حاجات بسيطة نحاول نبنيها جوانا ونقوم عليها حياتنا بعد كدا وأولهم إن حياتك أحداثها مش مِلك ليك، وكل إللي بيحصل وهيحصل ده نصيبك مكتوب من قبل بداية الخلق وعلشان كدا مينفعش تشكك وتسأل أشمعنى أنا؟ علشان ملهاش رد غير كدا! ربنا عايز كدا!
الحاجة التانية اللي مفروض تعرفها.. إنك مش وحش! ولا عمرك كنت وحش في حق حد مش معنى الطرف التاني سابك يبقى أنت وحش مش معنى هجره لك لأسباب مش واضحة يبقى أنت وحش، بالعكس يا عزيزي أنت أجمل واحد في الدنيا بس أنت مش عارف قيمة نفسك كويس.
الحاجة التالتة
إنك تستحق، تستحق تعيش، تستحق حاجة أفضل من دي وتستحق تتحب بكل حاجة فيك، بخوفك، بقلقك، بحبك الشديد وبكل عيب فيك.
"ما منع الله عليك من أمر كان خير لك" فأكيد أنت ربنا شايلك حاجة أحسن من كدا بكتير...
____
عزيزي القارئ الماضي عمرنا ما هنعرف نغيره بالقدر اللي نتخيل إننا نقدر ولكن إحنا نقدر نتقبله ونتقبل كل جرح ساب علامات جواك وندوب جوا قلبك..
كل اللي بتحاول تخفيه جواك هو سجن أنت بتحطه بنفسك وبتقفل على نفسك علشان خايف تواجه إللي بيحصل..
خد نفس عميق كدا؟
أخدت؟ زفير بعديه وفكر بصوت عالي
أنا دلوقتي فين؟
أنا مين؟
أنا بقيت مين؟
وهات ورقة وقلم اكتب كل إجاباتك بكل صدق أنت مش هتكدب على نفسك وأنت عارف الحقيقة..
في الواقع يا صديقي عقلنا بيحاول يخدعنا علشان نفضل في مرحلة معينة وهي الخوف من المجهول وهو إني كدا كويس أنا آه تعبان بس كويس... خايف بس كويس الخوف ده أحسن من خوف أزيد هحس بيه بعدين.
وهنا بنقعد مع نفسنا شوية ونشوف هل في ايدينا أننا نعرف المستقبل؟
نقدر نغير الأقدار؟
نقدر نختار قدرنا؟
في الحقيقة الإجابة هي لأ بس نقدر نقول الحمدالله والشكر لله ونصبر ونحتسب لأنك مش في جنة أنت في دار شقاء ودار ابتلاء .
_____
الخلاصة في سطور بسيطة
- أنت مُصير مهما كانت الاختيارات قدامك.
_ أنت بتعيش الحياة زي ما هي بمرها وحلاوتها محدش بياخد الوحش على طول ولا الحلو على طول.
- احنا مش ملايكة أحنا بشر اختيارتنا مش دايمًا صح فمتزعلش إنك اخترت غلط، اتعلم من غلطك يا عزيزي.
- خليك واثق إنك مش محتاج لناس تكون مرايتك أنت بس محتاج مراية في اوضتك تشوف فيها نفسك وهتعرف قيمتك كويس.
____
في الأخير يا صديقي بشكرك على وجودك هنا وانك قرأت للنهاية.♥️
شير علشان غيرك يستفيد.🤍


#أحمد_جان.

فَضفَضة|أحمَد جَان. pinned Deleted message

عزيزي القارئ، أوقات استسلامنا للواقع هي بدايتنا في التغيير، القبول بأمر الواقع وعدالة السماء، آخر نفس جواك وآخر تنهيدة جوانا بتعلن عن رفع الراية البيضاء، في الحقيقة هي ممكن تكون بداية جديدة...
صديقي العزيز السقوط في الهاوية مش معناه النهاية ولا هدم الأحلام إللي بنيتها هي النهاية... النهاية هي إنك بتصمم على نفس الغلط في كل مرة وكأنك حابب الوقوع في نفس المكان، وعلشان كدا جاي أقولك أرضى بالنصيب وأرضى باللي بيحصل وعيش كل لحظة بلحظتها لا أنت تقدر تغير الدنيا، ولا تقدر تغير القدر ولا تقدر تختاره...
أنت مُصير مهما كانت الاختيارات قدامك
#أحمد_جان.
#فضفضة

الحُزن هو طريقك الأبدي لو بطلت تحاول، الحُزن هي مشاعر بتتعاش بكل تفصيلة مؤلمة جواها، بكل كسرة نِفس وبكل قسى حسيته، بكل إحساس مؤلم ولكل وجع فراق.
في الواقع يا عزيزي إحنا بنزعل وبنحس بالحزن نتيجة الضغوط حاجة أشبه بطوبة حُزن مع طوبة ضغط وطوب ورا طوب لحد ما يتبني حاجز كبير بينك وبين الإستقرار إللي أنت كنت فيه؛ حالة حزنك دلوقتي هي منحنى ويرجع السهم لحالة إستقرار تاني من جديد، بس تفتكر المنحنى هيستمر في السقوط لحد فين؟ ولحد ما تخسر إيه؟
وعلشان كدا عيش حزنك بكل تفصيلة فيه
بس أوعى تخلي حزنك ينهي كل جميل فيك
عزيزي أنت جميل رغم حزنك وجميل رغم قسى الدنيا عليك.
#أحمد_جان.
#فضفضة

عزيزي القارئ، أوقات بتزداد علينا الهموم ويزداد معاها اليأس والخوف ويبدأ عقلك والشيطان يقولك إن كل إللي حصل هو تقصير منك وإنك السبب في كل إللي بيحصل...
بيحصل لكتير مننا أننا مش بنقدر نعيش لأيام ونتعامل مع البشر والحياة على إنهم أشياء إجبارية علينا ودايمًا مضايقين ومخنوقين.
في الحقيقة ده شيء طبيعي للي كان بيحصل في الأيام إللي فاتت عندك راجع نفسك فيهم راجع حزنك وشوف، أوقات الضغوطات بتبقى حاجز بين الإنسان ونفسه وسعادته فخلي بالك من النقطة دي.
الصغوط عاملة زي البلونة كل لما زادت فرقعت فخلي بالك من نفسيتك وراجع حزنك ومشكلك وحاول تحلها.
خليك واعي.
#أحمد_جان
#فضفضة

فَضفَضة|أحمَد جَان. pinned «بوت فضفضة تحدث كأنك لم تقل شيئًا، تحدث ستجهل من تكون. لو محتاج تتكلم💙 @fadfada24bot»

بوت فضفضة
تحدث كأنك لم تقل شيئًا، تحدث ستجهل من تكون.

لو محتاج تتكلم💙
@fadfada24bot

عزيزي القارئ أنا جاي أقولك إن اليوم هو يوم مهم جدًا من الناحية الدينية ومن الناحية النفسية، النهاردة هو مواجهة بينك وبين نفسك، بين ذكرياتك إللي كل مرة بتشوفها في شريط بيتعرض قدامك وتفتكر كل لحظة وحشة ومؤلمة وتفتكر أول ليلة لقاء وحلاوتها في الحقيقة هي مادة خصبة للشيطان يلهيك عن ذاتك وعن أحلامك علشان كدا بقولك يا عزيزي وبكل حب أنت لازم تبطل تفكير...
أنت دلوقتي في النهاردة إللي فات خلاص مش في إيدك تغيره ولا في إيدك ترجعه من تاني، العلاقات السابقة هي عدت ولازم تتقبل ده رغم صعوبته بالنسبالك وبالنسبة لأي شخص تاني.
خليك عندك وعي إن تذكر الذكريات هي من دماغنا إحنا فأنت قادر توقفها بنفسك وتنهي ده كله بكلمة الحمد لله لو كان خيرًا لبقى.
وفي النهاية يا عزيزي أتمها الله عليك بالخير واليمن والبركات.
#أحمد_جان.
#فضفضة

المسدج دي لطلاب الثانوية العامة؛ المسدج دي مش مجرد أنها كلام، أنا جي أقولك أن سواء ذاكرت أو مذاكرتش ليك نصيب وهتشوفه، مكتوبلك حاجة وتشوفها، سواء قدمت إللي عليك أو لا.
كلها كام ساعة وتبقى في اللجنة وماسك الورقة وبتفتكر الكلام ده، محدش بياخد غير نصيبه والدنيا بتمشي بالاسباب وعلشان كده قدامك تدعي ربنا أنه يكرمك.
تقبل نجاحك، تقبل فشلك وتقبل درجتك إللي هتجبها، ومش فشل لو درجة قليلة ومش نجاح لو درجة كبيرة كل دي تحت مُسمى كليات القمة وكليات القاع، نختار المكان المناسب، وقتها هتحس أن لو كنت دخلت مكان تاني مكنتش هتنجح لأن مكانك كان هنا القدر إللي مقدره ربنا أنك تشوفه وتعيشه، قوم وصلي وادعي ربنا معاك يا بطل 💙
#أحمد_جان.

طالتِ الأشهرُ واقتربتْ إلى عامٍ، عامٍ لم تلامسْ أحرفي وجهَكِ ولم تداعبْ كلماتي قُبّتكِ، تلك القبّةُ الخضراء.
اشتدّ الحصارُ ولم يبقَ لي سوى الصمتِ، كذلك حالي وحالُ الأممِ من قبلي .. ولكنّ القلبَ يرفضُ ما لا يقدرُ العقلُ على إدراكهِ، ذلك الدمارُ الذي حلّ بكِ يا قدسُ!
محبوبتي القدس، طالتِ الدقائقُ الأخيرةُ كالساعاتِ، وطالتِ الساعاتُ كالأشهر، والأشهرُ كالأعوامِ، أعوامٌ فقدتْ الأمةُ إنسانيتَها، ولم تكنْ لها أيةُ أعذارٍ تعفرُ فعلتها.
لا بأسَ يا قدسي؛ غدًا يكون لقاؤنا في جناتِ خُلدٍ يصحبهُ عناقٌ مني إليكِ بعد طولِ افتراق.
#أحمد_جان
#ما_دونه_القلب

خليك عارف إنك بتبذل أقصى حاجة عندك رغم إنك مش شايف نتيجة، خليك واثق إن محدش بيضر نفسه ولكن أنت بس مش قادر تبذل أكتر من كدا، مينفعش تلوم نفسك على شيء هي مش قادرة تعمله، ولا ينفع تسيب نفسك للهوى لإنه هيبقى هلاكك بعد كدا.
عزيزي القارئ مافيش حاجة تحت مسمى مبقاش عندي الشغف ومفيش حاجة تحت مسمى أنا فقد الشغف لإن الإنسان بطبعة لازم يُجبر على مسألته؛ وده لإنك مش هتتحرك غير بوجود مؤثر تاني، لو الآخرة مفيهاش جنة ونار مكنتش الناس اتسارعت على الخيرات ولو الحياة من غير أجر محدش هيتحرك، ولو أنت مش خايف من بكرة مش هتمشي.
عايز أقولك إنك بس فاقد الطريق وفاقد الأسلوب فخليك دايمًا مركز لحلمك وأوعى تفرط فيه.
#أحمد_جان.
#فضفضة

صديقي العزيز، خلي بالك دايمًا من الذكريات، وخلي بالك وأنت بتختارها وأنت بتفتكرها، الذكريات هي لعنة الماضي إللي بتواجها بـإبتسامة هزيمة ممزوجة بالرضى وكلمة لو كان خيرٌ لبقى...
في الحقيقة يا عزيزي أنت لازم تعمل حساب اللحظة دي من بدري وتختار صح لإن لو اختيارك من البداية غلط كل حاجة هتنقلب عليك في الأخر وهتفضل تلوم نفسك طيب ليه؟ طيب علشان إيه؟ وتخش في دوامة تشكيك النفس وإنكار الذات، هل مقدمتش اللي المفروض أقدمه؟ هل قصرت في حاجة ما خدتش بالي منها؟ ويجي اللي بعده ونفكر تاني في اللي قابله وتشيل نفس الخوف بزيادة خوف إنه يمشي زي اللي فات وتتلاشى أخطاء الماضي؟ فيمشي
مشفق على الإنسان كونه حب، مشفق على الكل كونهم مش قادرين ينسوا أجزاء من حياتهم كانت كل حاجة في يوم من الأيام.
#أحمد_جان
#فضفضة

السلام عليكم يا شباب
هيتم غلق البوت لحين اشعار آخر.
طالب منك الدعاء ليا ولاخواتنا في فلسطين( في ملك هيقولك ولك بالمثل) ♥️
لو في أي مشكلة تقدر تعرضها خلال آخر اليوم
_ أحـمد جـان.

عزيزي القارئ، سيب الوقت يعلمك دروس ماكنتش تعرف عنها حاجة، الوقت هو الشيء الوحيد إللي بيدل على مدى وعيك في الحياة، الحب، الفراق، التعب، المرض، الفرح، السعادة، الشقاء وغيرهم وغيرهم هم شيء لحظي وبينتهي وبيفضل لسة موجود الوقت زي ما هو لأن هو شيء ثابت.
خليك دايمًا مدرك لحقيقة إن كل شيء له معاد وكل بداية نهاية، للحلو بيدوم للأبد ولا الوحش بنفضل فيه كتير، الحياة خليط بين الاتنين وجود شيء اكتر من التاني بيحصلك خلل عدم توازن في حياتك ولكن في الحقيقة الإلهية إنك في المكان إللي بيأهلك لمرحلة تانية.
عزيزي القارئ أنت مش لوحدك، ربنا معاك وشايفك وسامعك وحاسس بيك إشكي همومك وداوي جروحك بقربك لله وخليك دايمًا متيقن إن ربنا إذا أحب العبد ابتلاه.
#أحمد_جان.
#فضفضة