Dildora_bookaholic

Yana wishlistdan kitoblar 🥰

Yaqinlar sogʻ boʻlsin.

​​“Seni qamab qoʻyishlari, zanjirband qilishlari, har qanday istaklaringni haqorat qilishlari mumkin, lekin ozodligingni tortib olish qoʻllaridan kelmaydi”

Abdurazzoq Gurna – Jannat

Bosh qahramon Yusuf ismli yigit. Otasining qarzi evaziga boy savdogarga berib yuborilgandan keyingi hayoti, savdogar bilan qit’a boʻylab sayohati haqida hikoya qilinadi. Afrika inglizlar nazorati ostida boʻlgan, temir yoʻl qurish bahonasida nemislar ham qit’aga kirib kelayotgan kunlar, qullik qonunan taqiqlansa ham, amalda yoʻqolmagan, otalar qarzi evaziga farzandini berib yuborgan zamonlar bilan tanishasiz.

Ochigʻi, asarning yarmidan oʻtguncha ham muallif gapni qayerga olib borayotganini tushunmadim. Zerikkan joylarim ham boʻldi. Yoʻq, deyman oʻzimga oʻzim, Afrika qabila-urugʻlarining turmush tarzi, an’analari tasviridangina iborat boʻlmasligi kerak bu kitob. Kutganimdek, muallif hamma gapini asarning soʻnggi 60-70 betlariga asrab qoʻygan ekan. Yozuvchining butun mahorati shu sahifalarda namoyon boʻldi. Spoyler qilmoqchimasman, ammo Yusufning soʻnggi tanlovi kuchli ta’sir qildi menga. Kitobni tugatganimda bir muddat nafas olishdan toʻxtab qolgandek edim.

Asar nomi nimaga “Jannat”? Sababi Yusuf savdogarning hovlisidagi bogʻni yer yuzidagi jannat deb hisoblaydi, bu bogʻ uning yagona istagi, ovunchogʻiga aylanadi. Ammo bu bogʻning oʻz “ta’qiqlangan mevasi” bor edi. Bu mevadan tatib koʻrgan insonga jannatdan quvilish muqarrar edi. Yusuf uchun jannat boʻlgan bu joy kim uchundir doʻzax ekanini u juda kech angladi.

Bundan tashqari, bu asarni Yusuf va Zulayho qissasining yangicha talqini deyish mumkin. Bu hikoyada yozuvchi inson erkini ulugʻlagan. Erk insonga berilgan eng ulugʻ ne’mat ekanini yana bir bor oʻquvchiga eslatgan.

Men har doim takrorlayman, bizga Afrika, Lotin Amerikasi, Janubiy Osiyo adabiyotidan koʻproq tarjimalar kerak. Ular bizga Yevropa, Shimoliy Amerikadan koʻra yaqinroq, muammolarimiz, ogʻriqlarimiz bir ular bilan. Shuni hisobga olgan holda yana bir muhim asarni ona tilimizda oʻqish imkoniga ega boʻldik deyishimiz mumkin. Barchaga tavsiya qilaman.

@dildora_bookaholic

@dildora_bookaholic

Wishlist’imdagi kitoblar kela boshladi (listda 12 qoida bor edi, “Yalpizli ertak” ni qoʻshib yuborishibdi). Ochigʻi, nega haligacha sovgʻalar kelmayotganiga hayron boʻlishni boshlagandim 😄

Kimdanligi yozilmagan ekan. Ammo kim yuborgan boʻlsa ham rahmat, xursand boʻldim 😌

​​“Biroq bugun ham oʻtmish qadar qorongʻi va xuddi kelajak yangligʻ mavhumotlarga toʻla”

Pol Oster – Nyu-York trilogiyasi

“Nyu-York trilogiyasi” – nomi aytib turganidek uch qismdan iborat: “Shisha shahar”, “Sharpalar” va “Qulflangan xona”. Bu qissalar bir-biridan mustaqil va ayni vaqtda bir-biriga koʻrinmas iplar bilan bogʻlangan. Bu iplarni aniq koʻrmasangiz ham, mutolaa davomida ichingizdan his qilib turasiz.

Yozuvchi huddi bir voqeani uch xil usulda hikoya qilib bergandek taassurot qoldiradi. Ammo har safar hikoya yangicha koʻrinish olaveradi. Asarning oʻziga xosligi ham aynan shunda.

Kitob eng boshidan sizni aldaydi, oddiy detektiv asarlardek koʻrinishga harakat qiladi. Shu bilan birga ilk sahifalardan oddiy asar emasligini bildirib qoʻyadi. Ammo sahifalar ortda qolgan sari dastlabki tasavvurga darz keta boshlaydi. Endi jinoyatlar-u izquvarliklar ahamiyatini yoʻqotib, qahramonlarning evrilishi asosiy planga chiqadi. Qahramonlar boshqalarning hayotidagi sirlarni topishga harakat qilgani sari oʻzini yoʻqotib boraveradi.

Oʻqiyotganlaringiz biroz gʻalati, ba’zida esa tushunarsizdek tuyulsa ham, yozuvchi asar oxirigacha oʻquvchini ushlab tura olishni uddasidan chiqqan. Har bir qismida esa Nyu-York dekoratsiya boʻlib xizmat qilishi esa asar beradigan atmosfera va kayfiyatni yanada yuqoriga koʻtaradi.

Bu asar shunchaki vaqtingizni maroqli oʻtkazish uchun oʻqiladiganlar toifasidan emas. Miyangizni qiynab, har bir jumla ustida bosh qotirib oʻqiladigan asar. Shunday asar qidirib yurgan boʻlsangiz, tavsiya qilaman.

@dildora_bookaholic

​​“Koʻrinishingiz qandayligini menga ahamiyati yoʻq. Men sizning soʻzlaringizga oshiqman”

Daniel Glattauer – Shimol shamoli shashti

Barchasi birgina notoʻgʻri kiritilgan harfdan boshlandi. Emma obunani bekor qilish maqsadida gazeta tahririyatiga email yozadi. Ammo adashib Leo Laykening shaxsiy pochtasiga yuboradi. Bu esa bir-biriga butkul begona ikki inson oʻrtasida yillab davom etgan yozishmalarning debochasi edi.

Zamonaviy dunyoda tobora ijtimoiy tarmoqlarga tobe boʻlib borayotgan ekanmiz, har kuni yangi chehralarga duch kelamiz, tanishamiz, doʻstlashamiz. Ba’zan bunday tanishuvlar real hayotga ham koʻchishi mumkin. Aytmoqchimanki, ortiq bizni hech narsa hayratlantirmay qoʻygan. Kimningdir koʻrinishi/fikrlashi yoqsa suratiga/postiga like bosib yoʻlimizda davom etaveramiz, nari borsa 1 kundan keyin esa unutib yuboramiz.

Ammo mana shunday globallashgan dunyoda ham qalbidagi sof hislarni asrab, chin muhabbatga oʻrin topayotganlar bor. Leo va Emmi shulardan biri. Oʻzlari aytganidek, ular aytarli hech narsa haqida gaplashmaydi, ammo bir-biri haqida hamma narsani biladi, ikkisidan yaqin inson yoʻq bu olamda, garchi hayotda bir marta koʻrishmagan boʻlsa ham.

Inson qalbdoshini uchratsa shunday boʻladi. Bir-birini soʻzsiz tushuna boshlaydi, boshqalarga ehtiyoj sezmay qoʻyadi, shu inson bor-u yoʻgʻiga aylanib qolganini oʻzi ham sezmay qoladi…

Biz oʻzimizni juda koʻp qoliplashtirib yuborganmiz. Bu yerda muloyim boʻlish kerak, u yerda kam gapirish kerak, bunisida esa umuman gapirmay oʻtirgan ma’qul. Qachon oʻzimiz boʻlamiz, turli niqoblarni chetga uloqtirib, atrofdagilarga borimizcha koʻrinamiz? Shunday joy bormi oʻzi? Shunday insoningiz bormi? Agar boʻlsa, tabriklayman, kam sonli baxtli insonlardan ekansiz. Yoʻq boʻlsa, tezroq uchratishingizga chin dildan tilakdoshman. Chunki bu hayotdagi eng muhimi. Ishoning, bu soxta dunyoda inson hammasidan ham bir dildoshga muhtoj. Hammaning bir dildoshi boʻlsin.

@dildora_bookaholic

Kuz – Dostoyevskiy oʻqish uchun eng munosib mavsum

Reaksiyalarni tekshirib koʻrishingiz mumkin 🌚

@dildora_bookaholic

1821-yil 11-noyabr buyuk rus yozuvchisi va faylasufi Fyodor Mixaylovich Dostoyevskiy tavallud topgan kun!

Asarlari 170 dan ortiq tillarga tarjima qilingan, eng ko’p o’qiladigan yozuvchilardan biri. Bunday insonlar 100 yilda bir dunyoga keladi!

Rahmat, Fyodor Mixaylovich, biz uchun shunday asarlar yozganingiz uchun!

Badiiy Tarjima Darslariga Barcha Qiziquvchilarni Taklif Qilamiz.

Darslar uch oy, haftada ikki marta davom etadi.

Bu jarayonda sizga o'rgatiladiganlar:

- Badiiy Tarjima
- Tarjima Uchun Matn Tanlash
- Mualliflik Huquqlarini Olish
- Nashriyot Topish
- Tarjima Metodlari

Dars narxi oyiga 600.000 so'm
Faqat ingliz va turk tillarini kamida B2 darajasida biluvchilar qabul qilinadi.

Murojaat uchun: @willemesque

Shekspirning Sovet davrida nashr qilingan 5 tomlik tanlangan asarlarini bilasiz-a? Hech boʻlmasa koʻzingiz tushgan.

Ana shu toʻplam @Karamazovlar kanalida kimoshdi savdosiga qoʻyilayotgan ekan. Hozir Shekspir asarlarining sotuvda norm nashri yoʻqligini hisobga olsak, bu toʻplamni ikkilanmasdan ulkan xazina deb aytish mumkin. Kimoshdi savdosidan tushgan mablagʻ esa maktab kutubxonasiga kitoblar sovgʻa qilishga sarflanar ekan.

Toʻplamning 1-kitobi bugun 18:00 da sotuvga qoʻyiladi. Qolganlari ham navbati bilan oʻynaladi. Imkoniyatni qoʻldan boy bermang!

Noyob kitoblar topib berishi bilan kitobxonlar orasida nom qozongan Jahongir yangi kanalida faoliyatini davom ettiryapti:

https://t.me/Xazinalar_ombori

Yaxshi kitoblardan quruq qolmaslik uchun kanalga obuna boʻlib, kuzatib boring 🌚

@dildora_bookaholic

https://t.me/TillanisoEN/5082

Yaqinda bir tanishimni uchratib qoldim. Suhbat orasida umumiy tanishimizni tilga olib, "Shu qiz esingdami, vafot etibdi, eri urib o‘ldirib qo‘ygan ekan" deb qoldi. Ishongim kelmadi, eslasam haligacha shokka tushaman.

Bu voqea ijtimoiy tarmoqlarda shov-shuv bo‘lganmi, yo‘qmi, bilmadim. Menimcha bo‘lmagan. Gulistonlik degani e'tiborimni tortgan bo‘lardi. Aytmoqchi bo‘lganim, raqamlar o‘ylaganimizdan ancha katta. Atrofimizda qanchadan-qancha qiz-ayollarni urib o‘ldirishyapti, joniga qasd qilishgacha olib borishyapti. Biz esa bexabarmiz.

U qiz bilan lagerga birga borardik. Sportspenka edi. O‘zi ham aqlli qiz edi. Shu bilan birga irodasi kuchli, ichida bitmas energiya zahirasi bordek edi go‘yo. Pozitivligiga har doim havas qilganman. Qaynona, qaynisingil va hokazolar bilan mojarolar haqida gap ketsa, "menga kimdir shunaqa muomala qilsa urvorsam kerak" derdi yarim hazil, yarim chin qilib.

Hayot shunday qizni ham sindiribdi. Eri urib o‘ldirib qo‘yadigan darajagacha chidab yashagan, tasavvur qilyapsizmi?

Biz qayerdadir xato qilyapmiz. Ammo qayerda? Nimanidir o‘zgartirishimiz kerak. Bunday davom etishi mumkinmas axir. Ungacha yana nechta ayol-qiz jon berishi kerak, bilmadim.

Men eng sevgan oy oktyabrning soʻnggi lahzalari oʻtib bormoqda. Bu yil oktyabrdan yetarlicha zavq ololmadim, qanday oʻtib ketganini ham sezmay qolibman hatto.

Shunday boʻlsa ham bu oy unumli boʻldi deb oʻylayman. Yaxshi kitoblar oʻqidim, filmlar tomosha qildim.

#sarhisob bilan rasmda tanishishingiz mumkin. “Nyu-York trilogiyasi” kecha tugadi. 1-2 kunda fikrlarim bilan boʻlishaman.

Siz bu oy qanday kitoblar oʻqidingiz?

@dildora_bookaholic

​​“Mariannaga oʻzining haqiqiy hayoti uzoqlarda, usiz kechayotgandek tuyulardi. U esa hatto qachondir bu hayotga yetisha olishini ham bilmasdi”

Sally Rooney - Normal People

Konnell – maktab yulduzi, Marianna esa e’tibordan chetda qolgan “серая мышь”…

Oʻzim shunaqa annotatsiya yozilgan kitoblardan imkon qadar qochaman, chunki oʻqimasdan ham voqealar qanday rivojlanishini aytib berishim mumkin. Bu asarni ham hafsalasizlik bilan boshlagandim. Lekin odatdagidan boshqacharoq boʻlib chiqdi. Yoqdi demasam ham, kutganimdan yaxshiroq ekan.

Asar ikki doʻst Konnell va Marianna haqida. Yuqori sinfda tushunarsiz shaklda boshlangan munosabatlari universitet yillarida ham oydinlashmagan ikki yaqin inson, ularning hamma qatori normal odam boʻlishga urinishi, jamiyatga qanday qilib boʻlmasin moslashishga harakati haqida.

Mutolaani boshlashim bilan gʻashimga tegishni boshlagan narsa dialoglar tinish belgilari bilan ajratilmagani boʻldi. Buyuk yozuvchilarda tinish belgilari ishlatilmagan hollarga duch kelganmiz, lekin ular fikr quyilib kelganidan, tinish belgi ishlatishga vaqtini qizgʻangandan shunday qilgan. Ammo ataylabdan tinish belgilarni tashlab ketish oʻziga stil yaratishga behuda urinishdek koʻrindi koʻzimga. Ya’ni bu narsa yozuvchini aqllidek koʻrsatib, darajasini yuksaltirib qoʻymadi koʻz oldimda. Yoki men tushunmagan biron ramz bormikan buning ortida? Xullas, asabimga tegdi, yarmiga kelgandagina zoʻrgʻa koʻnikdim.

Bu asarni barcha oʻsmirlar va yoshlar oʻqishi kerak deb hisoblayman. Chunki qahramonlardagi muammolar hech birimizga begona emas. Zamonaviy dunyo yoshlarining chinakam ogʻriqlari tilga olingan bunday asarlar juda kam. Balki shu sababdan Salli Runini “zamonamiz Selinjeri” deya alqashar.

Bundan tashqari maktablarda doimiy kun tartibida boʻlib keladigan muammo – ijtimoiy ierarxiya ham asosiy plandagi mavzulardan hisoblanadi. Bu jarayonni barcha oʻsmir/yoshlar boshdan kechirishini hisobga olsak, asarning aktualligi yanada ortadi.

Asarni barcha oʻsmir/yoshlar oʻqishi kerak, oʻzlarini yaxshiroq anglashga yordam beradi. U yoshdan oʻtib ketganman desangiz ham baribir oʻqing, oʻtmishdagi ogʻriqlaringiz bilan yuzlashib, ularni tahlil qilish uchun yaxshi imkoniyat. Xullas, barchaga tavsiya qilaman.

Bilaman, menga kitob sovgʻa qilgisi kelganlar koʻp. Kitoblarim koʻpligidan qaysi kitobni sovgʻa qilishni bilmayotganlar ham koʻp. Bu wishlist’ni sizlarga oson boʻlsin deb tuzdim.

Oxirgi vaqtlar tanish-bilishlar orasida “Sizga nima kitob sovgʻa qilishni ham bilmaydi odam” degan gaplarni tez-tez eshitib qolayotganim uchun wishlist tuzildi. Bu real hayotdagi tanishlar uchun. Shaxsan tanish boʻlmaganlar, chalgʻimaymiz, kelgan joyidan davom etaveramiz.

P.S. List doimiy yangilanib boriladi.

https://mywishlist.online/w/tuxrif/dildoras-wishlist

​​“Agar butun dunyo yoʻqlikka yuz tutib, faqat u qolsa, men mavjud boʻlishda davom etaveraman; agar barchasi qolsa-yu, faqat u ketsa, olam men uchun ulkan begona maydonga aylanadi, ortiq bir qismi boʻlmay qolaman”

Emili Bronte - Boʻronli tepaliklar

Boʻronli tepaliklar – Ernsholar oilasiga qarashli mulk nomi. U yerdagilarning hayoti sokin kechardi, baxtlariga goʻyo hech narsa soya solmayotgandek. Ammo kunlardan bir kuni oila boshligʻi koʻchadan topib olgan bolakayni uyga yetaklab kelishi bir maromda kechayotgan hayotni izdan chiqarib yuboradi. Nafaqat “Boʻronli tepaliklar”dagilarni, balki atrofdagi boshqalarning ham hayotiga ta’sir qila boshlaydi…

Emili Brontening “Boʻronli tepaliklar”i shunchaki klassika emas. U oʻz davri qobiqlarini yorib chiqqan, ayol ijodkor haqidagi tasavvurlarni butkul oʻzgartirib yuborgan asar. Shu sababdan ham dastlab asar jiddiy qabul qilinmagan boʻlsa kerak. Tiniq osmonda gumburlagan momoqaldiroqdek kirib kelgandi adabiyotga.

Emili Bronte biz kitoblarda oʻqishga oʻrganib qolgan sof muhabbat, sof hislar haqida yozmaydi. Balki, hayotda koʻp uchraydigan nosogʻlom sevgini koʻrsatib beradi. Hislarini nazorat qilolmaydigan, ehtirosi oʻzini boshqarishiga yoʻl qoʻyib bergan insonlarning fojiasini koʻrsatib bergan. Uning qahramonlari ham oʻzgacha va shu bilan birga juda tabiiy. Egoist, alamzada, shafqatsiz insonlar bilan tanishasiz. Axir atrofimizda ham toʻla shunday insonlar-ku, shundaymasmi? Oʻzimizda yoʻqmi bu qusurlar?

Qahramonlar hatto nafrati bilan boʻlsa ham koʻnglingizdan joy egallaydi, hech biri befarq qoldirmaydi. Ammo shaxsan men bosh qahramondan nafratlanolmadim. Uning shu holga kelishiga nimalar sabab boʻlganini eng boshidan kuzatib kelayotganim uchundir balki. Menda unga nisbatan koʻproq achinish hissi bor edi.

Virjiniya Vulf “Shaxsiy xona”sida Emili Bronteni alohida tilga oladi. “Ortiqcha chiranmasdan yozgan” deydi. Asarni oʻqigach Vulf nima demoqchi ekanini tushunib yetdim. Emili koʻnglidagi borini toʻkib solgan, bunda bironta ortiqcha gap uchratmaysiz. Oʻxshamagan, yopishmagan joyi yoʻq, barchasi oʻz oʻrnida.

Yozuvchi menga emotsiyalarni eng keng spektrda his qildirdi. Sevgi va nafrat, gʻazab, mehr, jahl, rahm, achinish, hayrat, barchasi qorishib ketdi mutolaa jarayonida. Barchaga tavsiya qilaman.

Hamma: Urra, isitish tizimi yoqildi, uyimiz issiqqina boʻladi 🥳
Men: Batareyani yonidagi kitoblarni boshqa joyga olish kerak 🤦🏻‍♀️

@dildora_bookaholic

​​“Dunyo oʻta jirkanch makon. Biz esa uning bagʻrida yashashga majburmiz”

Madlen Miller - Kirka

Kirka. Quyosh xudosi Helios va dengiz nimfasi Perseysning toʻngʻich farzandi. Bolalikdan sevilmagan, istalmagan, har doim kamsitib kelingan ma’buda. Yolgʻizlikka doʻst tutingan, har yerda begona sanalgan Kirka.

Madlen Miller bu asarida Kirkani isyonkor, kuchli qilib tasvirlaydi. Qadimgi yunon diyorlarining patriarxal tuzumiga qarshi bosh koʻtargan qahramon edi bu.

“Ayollarni tinmay yerga urish baxshilarning eng sevimli mashgʻulotidek tuyulardi menga. Yerda sudralgan koʻyi sochimizni yulib yigʻlamasak, xuddi rivoyat oʻz sehrini yoʻqotadigandek”

Uning qobiliyati ham tangrilarga tugʻma in’om etilgan emas, balki uzoq yillik matonat bilan qilingan mehnat natijasi edi.

Bu asarda Kirkaning yoʻli Odissey, Prometey, Medeya, Yason, Afina kabi mashhur qahramonlar bilan kesishadi. Ularning taqdiriga Kirkaning nigohi bilan nazar tashlaymiz. Yunon mifologiyasidagi eng muhim hikoyalarni bir nuqtaga jamlagan asar bu.

Va albatta, Kirkaning oʻzini, oʻzligini anglashi, oʻz “men”iga yetib borishigacha boʻlgan jarayonning guvohi boʻlasiz. Mutolaa jarayonida anglaganim, ming yillardan beri hech narsa oʻzgarmagan. Yashash sharoitlarimiz oʻzgargan boʻlishi mumkin, ammo muammolarimiz, ogʻriqlar va oʻy-xayollarimiz oʻzgarishsiz qolmoqda.

Muallif bu asarida ayol tabiatining serqirra va murakkabligini ochib bergan. Kirka qiz, opa, yor, ona, doʻst edi. Uning hikoyasiga turli nuqtalardan nazar tashlar ekanmiz, ayol zotining mukammal portretini koʻrishimiz mumkin.

Asarning tiliga toʻxtalsam. Huddi dostonlardek oʻqiladi. Bu endi yozuvchining mahoratimi yoki tarjimonniki, tushunolmadim, ammo ilk sahifalaridanoq asar sizni olis yunon oʻlkalariga olib ketadi. Tashbehlar oʻz oʻrnida qoʻllanilgan. Jumlalar toʻgʻri koʻnglingizga yetib boradi. Nasr va nazm toʻqnashgan nuqtada yaralgan bu asar.

Agar yunon mifologiyasi bilimdoni boʻlsangiz, asar sizga voqealarga yangi rakursdan qarash imkonini beradi. Bordiyu bu boradagi bilimlaringiz menikiga oʻxshab u yer-bu yerda eshitgan/oʻqigan, filmlarda koʻrilgan uzuq-yuluq ma’lumotlar bilan cheklangan boʻlsa, ularni boyitib, tartibga solish uchun ayni muddao. Hech qanday bilimga ega boʻlmasangiz ham oʻylanmang, asar sizni yunon ma’budlarining sehrli olamiga qanday olib ketganini bilmay qolasiz. Xullas, barchaga tavsiya qilaman.

Qizimdan oʻqituvchisi soʻrayapti:

- Кем работает твоя мама?
- Ангел-хранитель

Yelkamga qarab qoʻyibman ikkita qanot oʻsib chiqmadimi deb 😂😂😂

Bilardim, bu dunyoga men qandaydir oliy missiya bilan kelganimni har doim sezib yurardim, ana endi koʻnglim hotirjam tortdi 🤣

Gaplashmaganimizga ancha boʻlibdi. Kim nima oʻqiyapti? Yozing/koʻrsating.

Menda hozir shu kitob. Ayni havoga mos mutolaa boʻlyapti 🍂

@dildora_bookaholic

Potteromanlar, yaqinroq kelinglar 😍

Sizlarni havasingizni (yoki hasadingizni 🤪) keltiradigan kitoblar bilan keldim. Oʻzim uzoq kutgan, chiqqanidan beri xayollarimni oʻgʻirlagan kitoblarga nihoyat erishdim. Boyagina Amazon bagʻridan yetib keldi.

Videolarda har 3 ta kitobdagi interaktivlarni koʻrsatganman. Video hajmi katta boʻlsa ham, internet yaxshi ishlamasa ham, vaqtingiz boʻlmasa ham baribir ochib koʻring. Bu goʻzalliklarni koʻrmasangiz boʻlmaydi 😭😭

Men esa Yangi yilni kutib oʻtirmasdan, Harry Potterni qayta mutolaa qilishga ketdim 💙💙

@dildora_bookaholic

@Bookuzbek_Jizzax 5 ball bilan mutlaq gʻolib boʻlib, “Kirka” ning maxsus nashriga ega boʻldi. Tabriklayman 👏🏼

@oyjamol_books kanali randomda gʻolib boʻldi. Tabriklayman 👏🏼

​​Yagona baxt tugʻilmaslikdir, modomiki tugʻildingmi, mayli, daraxt boʻl, tosh boʻl, hatto undan ham kichkina qum zarrasi boʻl, oʻtkinchilar oyogʻi ostida qonga belanib yotmaysan.

Emil Zolya – Hamal

Asarda Fransiyadagi koʻmir qazuvchilarning hayoti tasvirlangan. Uzoq yillardan beri davom etib kelayotgan ogʻir mehnat sharoiti, yoʻqchilik, ocharchilik, kasalliklar ishchilarning sabr kosasini toʻldirib borardi. Ish izlab yurgan bosh qahramonimiz Etien shaxtaga kelganidan soʻng ishchilarning hayotiga ta’sir oʻtkaza boshlaydi… Ammo buning oqibati kutilganidek yaxshilik bilan tugarmikan?

Asarda yozuvchi eng avvalo ishchilarning ogʻir sharoitini ochib bergan. Umrida toʻyib ovqat yemagan, oylikdan oylikka qarz olmasa yetolmaydigan, farzandlariga ishchi kuchi sifatida qaraydigan, non yetmaganidan hatto bolasiga oʻlim tilagan odamlarning hayoti. Har sahifada ojizlik his qilasiz. Odamlar shunday sharoitda yashagani, hatto ba’zi joylarda hali ham yashayotganini oʻylashning oʻzi ogʻir.

Shuningdek, asarda ijtimoiy tengsizlik ham yaqqol koʻrsatib berilgan. Ishchilarning ogʻir mehnati hisobiga boyligi kun sayin ortib borayotgan burjua va hatto yeyishga noni boʻlmagan ishchi qatlam. Yozuvchi ochiqchasiga sotsialistik gʻoyalarini ilgari suradi. Shu yerda menda aralash hislar qoldi. Burjua ishchilarga adolatsizlik qilayotgani rost. Lekin ulardan adolat talab qilish oʻrniga qoʻlidan boyligini tortib olib, hammaga teng taqsimlashni orzu qilardi odamlar. Ya’ni ular kabi ishlamasdan pul topish niyatida edi. Boy boʻlib tugʻilgani uchungina nafratlanishardi burjuadan.

Umuman hech qaysi tuzum ideal emasligini bilamiz. Lekin qaysi biri kamroq zarar keltiradi? Asar shu savolga javob izlashga undaydi.

Va yana bir muhim masala. Isyon qilgandan ma’no bormi, oxir-oqibat bundan faqat ishchilar oʻzi yutqazishini bilib turgan boʻlsa? Bu savolga yozuvchi aniq javob aytmaydi, ammo soʻngida oz boʻlsa ham umid beradi. Bu uchun muallifga alohida rahmat.

Oʻz davrining kuchli kitobi haligacha aktualligini yoʻqotmagan. Tavsiya qilaman.

Bu yerda tanlov boʻlgandi ✨

Koreyalik yozuvchi Han Kang “tarixiy jarohatlarga qarshi turadigan va inson hayotining moʻrtligini fosh qiladigan shiddatli she’riy nasri uchun” Nobel mukofotiga loyiq koʻrilibdi.

Yil boshida yozuvchining Vegetarian asarini oʻqigandim. Haqiqatdan kuchli yozuvchi.

Dastlab, bu feministik asar deb oʻylaganman. Ammo oʻylayverib, yoʻq, bu butun insoniyatning fojiasini koʻrsatib bergan asar, degan xulosaga keldim (ha, sirlarini osonlikcha ochmaydigan, uzoq vaqt qoʻyvormaydigan asar bu).

Biz tugʻilgan onimizdan boshlab jamiyat qoliplariga moslashtirilamiz. Oʻqish, ishlash, oila qurish, farzand koʻrish, uy solish… hammasida chizib berilgan yoʻldan yuramiz. Shu yoʻldan ozgina ogʻganlarni esa jamiyat qabul qilmaydi, sizdan yuz oʻgiradi, kaltaklaydi, hatto majburlab “ogʻzingizdan goʻsht tiqish”gacha borishi mumkin. Ana shunday inson fojiasi koʻrsatilgan asar bu. Barchaga tavsiya qilaman. Muallifi Nobel olgandan keyin ikkilanmasdan mutolaani boshlashingiz mumkin.

@dildora_bookaholic

​​Shaharlarni yondiring, butun-butun xalqlarni qiring, yoʻlingizdagi hamma narsani supurib tashlang, bu chirigan dunyodan hech nima qolmagan taqdirdagina yaxshiroq dunyoni qurish mumkin boʻlar.

Emil Zolya “Hamal”

26 yosh – Zulayho Boyxonova, Sherali Joʻrayev eshitadigan qoʻshni xolalarga aylanganingni tushunib yetish 🫠

Muhimi — o‘zgalarni ham o‘zingizdek seva olish! Ko‘rdingizmi, eng muhim narsa nima ekan! Bor-yo‘g‘i shu, boshqa hech nima kerakmas: nari yog‘iga qanday yo‘l tutishni o‘sha zahotiyoq o‘zingiz topib olasiz.

Dostoyevskiy “Kulgili odamning tushi”

Sentyabr mutolaasi 🍂

Aytgancha, “Shaxsiy xona” ni bugun 21:00 da @kitobdoira da muhokama qilamiz.

​​“Onam kulmasdi, yigʻlamasdi ham. Onam bilganmikan? Butun hayotim davomida unga ehtiyoj sezganimni bilganmikan?”

Shin Kyong Suk - Onamni asra

Pak Son Yo butun umr qishloqda yashab, beshta farzandni dunyoga keltirgan. Hayotini farzandlariga bagʻishlagan. Kunlardan bir kuni Seulga bolalarinikiga kelgan ayol vokzalda yoʻqolib qoladi. Farzandlari onasini topish maqsadida u haqda bilgan ma’lumotlarini umumlashtirishga harakat qiladi. Ammo hayotidagi eng muhim inson haqida aslida hech narsa bilmasliklari ma’lum boʻladi…

Koreyani oʻrniga har qanday davlatni, Pak Son Yo oʻrniga istalgan onani qoʻyib koʻring, umumiy manzara oʻzgarmaydi. Ona oilasi uchun oʻzini qurbon qilishi hamma davrda tabiiydek qabul qilingan. Ammo oʻzini qurbon qilar ekan, nimalardan voz kechadi, nimalarni his qilgan, bu haqda hech kim oʻylab koʻrmaydi.

Onangizni shaxs sifatida tasavvur qilib koʻrganmisiz? Aynan mustaqil shaxs sifatida, ona sifatida emas. Qiyin-a? Axir, onalarimizning ham oiladan tashqarida shaxsiy hayoti bor-ku. Yoki bizdan ortib shaxsiy hayotini qura olmaganmikan? Sizni deb nimalardan kechgani-chi, u haqda hech oʻylab koʻrganmisiz? Orzu-maqsadlari, istaklari, hislari, qoʻrquvi, qiziqishlari boʻlganmikan. Axir onalarimiz ham qachondir bola boʻlgan, yurishni, gapirishni oʻrgangan. Bolalik, oʻsmirlik davrini boshdan kechirgan. Sevgan, sevilgan. Orzu qilgan, xayollarga berilgan. Ammo biz tugʻilgach unga faqatgina bitta rol – ona rolini qoldirdik.

Ona boʻlgachgina onangni tushuna boshlaysan deyishadi. Yoʻq, ona boʻlib ham baribir tushunolmaysiz. Bir-ikki marta oʻylab koʻrasiz, shu bilan munosabatingizda deyarli hech narsa oʻzgarmaydi. Onangiz sizni deganidek, siz ham “farzandim” deysiz. Ertaga siz ham farzandingiz hayotida keyingi planga tushib qolasiz. Bu zanjir reaksiyadek davom etaveradi.

Asardagi har bir boʻlim farzandlari va turmush oʻrtogʻi hikoyasidan iborat. 2-shaxs tilidan hikoya qilingani asarning muvaffaqiyati. Har bir qahramonga “sen” deya murojaat qilishi huddi sizga qarata aytilgandek yanada ta’sirli qiladi.

Juda banalno boʻlsa ham gapimni oʻsha shablon gaplar bilan tugataman. Onangizni qadriga yeting. Tez-tez qoʻngʻiroq qilib, yoʻqlab boring. Yaxshi koʻrishingizni ayting, onangizni tinglang. Onangiz qoʻngʻirogʻingizni, kelishingizni har doim kutadi, garchi buni ochiq aytmasa ham.

Onalarimiz bilan yaqindan tanishish uchun imkon beradi bu asar. Barchaga tavsiya qilaman.

Odatda bu kabi postlar qoʻymayman. Ammo bu bir yaqin tanishimning jiyani ekani, oʻzimning ishonchim komil boʻlgani uchun ulashyapman.

Mirusmonda rak aniqlangan. Ilik koʻchirish operatsiyasi uchun zudlik bilan pul zarur boʻlyapti. Bee’tibor qoldirmaysiz degan umiddaman 🙏🏻

Mirxalilov Mirusmon GEMOFOGOSITARNIY LIMFOGISTISITOZ (Rakni turi) aniqlangan, aprel oyidan beri qon plazma quyiladi. Sudurgi xam paydo bo'lgan.

Sizlardan iltimos, davolatish uchun, dori-darmon uchun mablag' yig'ishimizda yordam qo'lini cho'zing!
Aloqa uchun:
📞+998971023432

💳HUMO Karta raqami:
8600060493692819
Muratova Mavjuda nomida.

Qo'ldan kelgancha yordamizni ayamang, duo qiling, xabarni tarqating, guruhimizga doʻstlaringizni taklif qiling.
Sizning har qanday darajadagi qilgan yordamingiz biz uchun juda muhim!

Qilayotgan ehsonlaringizning ajr-u savoblarini bersin!


https://t.me/+qURc9lm5z1thMDRi

https://t.me/nofalsafiy/1986

Oʻzi nimaga oilada har doim u yoki bu jinsning gapi oʻtib, qoʻli baland kelishi kerak? Sogʻlom fikrlaydigan odamlar kabi, bir-birini tinglab, fikr almashib qaror qabul qilishni iloji yoʻqmi?

Qizlar, uyda faqat meni aytganim boʻladi deydiganlardan qoching. Toki yosh bolacha qarashlari bilan hayotingizni zaharlamasin. Va bunday qarashli yigitlarni ajratib olish uchun ham oʻzingizni rivojlantirishni unutmang.

P.S. Izohlarda qarashini oʻzi yetarli boʻlishi kerak, deganlar bor ekan. Ba’zan nigohlar soʻzlardan koʻproq travma qoldiradi. Bunaqa bema’ni fikrlarga aldanmanglar.

Angladimki, ayollarga ham qanot bermoqlik joiz ekan, zotan, ular ham parvoz etishga qodirdirlar.

Ertaga 15:00 da Book.uz kitoblar doʻkonida muhim asar taqdimotida koʻrishamiz.