بـلـوچـی لـبـزانـک

دیدگ چے پَیم ءَ اِنسر اَنت
گم گَلّہ ئیں مارا گِر اَنت

مہراں سپر شوہاز اتگ
مئے راہ سر نیلیں زِر اَنت

ارساں سدپ شُہرت کُت انت
بچکند مئے ساہ ءَ گِر اَنت

زیبائی ءِ نیاد ءَ جَن اَنت
جنگل مئے اہد ءِ زرگِر اَنت

مئے سہب ءُ بیگاہاں بچار
درچکاں چہ ساہگ پچگِر اَنت

تو میر پہ کئے زندگ ئے
مردم ہزار رندا مِر اَنت

میر عمر میر

مبارک کازی وَ موسمانی تہ ءَ ￴ھم گون انت گوں، کازی ءَ ￴چہ کجا کجا کش ئے؟

ناھدا ءَ ￴من ءَ ￴جست کُت کہ گْوادر کتاب میڑہ ءِ ھال انت، باریں کدی انت؟ منی دل ءَ ￴جَت کہ ناھدا ءِ ￵اسل جّست اے نہ بیت، الم دگہ ھُنرے سازیت ءُ ￶مارا بداں روہ کنت۔

من گُشت سیزدہ فروری ءَ ￴چہ بندات انت۔ بلے مبارک کازی ءِ ￵نام ءَ ￴مشاعرہ گون انت گوں۔
ناھدا ءَ ￴جَت کندگے، گُشی وضاحت چیا کنگ ءَ ￴ئے؟ ما وَ زان ایں کہ دو سالیں جیڑہ ھمے بوتگ کہ کازی ءِ ￵نام ءَ ￴کتاب میڑہ ءَ ￴بہ کن ئے اوں قوم ھبر کنت کہ زندگیں کازی ءَ ￴ھمے کمپان ءِ ￵تہ ءَ ￴توار جنگ ءِ ￵رزا نیست اَت ءُ ￶مرگ ءَ ￴پد ھمے کمپان ءَ ￴آئی ءِ ￵نام ءَ ￴میڑہ اِنت، اگاں مہ کن ئے ھم ھبر بیت، گڑا اے رندی کتاب میڑہ کئی نام ءَ ￴اِنت؟ مجید ءِ ￵، عطاء ءِ ￵یا سید ءِ ￵؟

من گُشت انّاں ناھدا اے رندی ساھدارانی نام ءَ ￴نہ انت بلکیں اے بَری کتاب مراگاہ موسمانی بدلی ءِ ￵نام ءَ ￴انت۔۔۔

پد ءَ ￴شُت ناھدا ءِ ￵کندگ ”موسماں ٹپے کُدینتگ من ندارہ چاراِتگ، ءُ ￶گوں وتی مکر ءُ ￶پریباں گوں وتی زوراکیاں تؤ من ءَ ￴پونز ءَ ￴رسینتگ من نداراہ چاراِتگ“۔ پد ءَ ￴ناھدا ءَ ￴گُشت کازی ءَ ￴چہ کجا کجا کش ئے؟ کازی وَ موسمانی تہ ءَ ￴ھم گون انت گوں، کازی اڑے گرند، گروک، ایروپ، آشوب، کتاب، تیر ءُ ￶تُپنگ ھر کجا گون انت گوں، میڑہ اگاں بانّک ءِ ￵نام ءَ ￴بہ بیت یا ڈاکٹر مالک ءِ ￵نام ءَ کازی گون انت گوں۔۔۔ کازی ءَ ￴چہ کجا کجا کش ئے۔۔۔۔باور نہ بیت راج ءَ ￴جُست گِر بہ گُش کازی کجا کجا گون نئیں؟

من گُشت ناھدا گپ اے نہ انت، موسمی بدلی انّوں جھان ءِ ￵جیڑہ یاں چہ یکے۔ بلوچستان ءُ ￶گْوادر نہ گیگیں وڑے ءَ ￴موسمی بدلیانی دیمپان اَنت۔
ناھدا من ءَ ￴ھراب ھراب ءَ ￴چارگ ءَ ￴لگ اِت، گُشی ھاں! گڑا موسمانی تہ ءَ ￴دزمانجی کنوکانی ھبر بیت؟ اے ڈامبر ءِ ￵ڈک، کَل گوجوکیں مشین، آپ ءِ ￵ھُشک کنوکیں نَھار، تیاب ءَ ￴تیلانک دئیوکیں مستری، دیمی زِر ءُ ￶پدی زِر ءِ ￵بھا کنوکیں ٹھیکہ دار ٹِک ءُ ￶نشان کنگ بنت یا آ وَت میڑہ ءِ ￵اسپانسر کنوک بنت؟ شما ھُشک ءَ ￴کُرسیاں پُر کن اِت، کتابانی زرّاں ھساب کن اِت، دُمبل ءَ ￴چنڈ اِت ءُ ￶میڑہ ءَ ￴پیچ اِت کہ مبارک کازی ءِ ￵نام ءَ ￴شئیری دیوانے بوت ھلاس۔
بَلے بے ھال مہ بئے راج ءَ ￴جُست کن کازی کجا کجا گون نئیں؟۔۔۔
جاوید بلوچ

‎شم سر ءِ شھیدانی شھادت ءِ اولی سالروچ ءَ آہاں سھر چکیں دروت ندر کن ایں

‎من ماھیں ماھیکان ءُ ماہ زیب آں
‎وتی دیمونیاں پہ بِراہ زیب آں
‎ما زند ءِ متلب ءُ مانا نہ زانتگ
‎دیاں دردے ترا جان ءَ نہ زانتگ
‎پہ نپت ءُ بیر ءُ گوں دمبال کائے
‎پہ بال گرد ءُ گراب رندا مٰے ساہ ئِے
‎تماہ ءُ تپلُکیں داباں پُلئے مئے
‎ندیدیں دتّکی واباں پُلئے مئے
‎چو زھر ءَ تئی رگ ءُ جان ءَ رِچاں ما
‎ پہ آجوئیں وتن شھم ءَ ترپاں ما
‎چو گواڑک سرپتگیں ھاک ءَ تِجاں ما

‎چراگ ءِ لیلواں تراکینت تئی دل
‎تو آس دات گوانزگے چم جھلیں کاتل
‎گوں بمب ءُ ایٹماں اتک ئے سرین ئے
‎ترا رُزواہ شرپ نہ شرم ءُ دین ئِے
‎تو درکاں بابر ءِ ھاموش کنئے چوں
‎چہ کٹّاں ھانلے پِراموش کنئے چوں
‎اے گنجاں کہ وتن پہ گنج بکشاں
‎سِلاھاں نوک کنان ءَ سنج بکشاں
‎دپ ءِ تام ءَ وتیگ ءَ شر چَشے تو
‎مئے واب ءَ وپتگیں تپلاں کُشے تو
‎نی انگاراں بَئئے ءُ جل جُشے تو
‎منے نجمہ مڑاہ ءِ پھر ءُ شاناں
‎پہ براتاں دروت چو انجیر تراناں
‎وپا ءِ مکتب ءَ چُنت کرن ماناں
‎من براتی درد ءَ چو آیات واناں
‎من مِھراں مَنتگاں داں اھد ماناں
‎فرہاد ءِ دائمی مھر ءِ زباناں
‎منی مِھرانی ھنکین سبز بیت ایں
‎بلوچی گشتن ءُ ہَر لبز بہ بیت ایں
‎اے نپت ءُ بیر پدی نیاھاں نہ ترکاں
‎من جزماں سُھر چیل ءُ تَسپ رَکاں
‎تئی ساہ ءُ نپس داں ایر بہ بُکّاں

‎پہ گلرنگیں وتی ناز ءِ بھشت ءَ
‎منے دوستا پہ وت ھچی نہ اشت ءَ
‎من ھست ءُ نیست پہ اے ھاک کِشت ءَ
‎وپا ءِ داستان انچش نبشت ءَ
‎کہ شیر زالے اگاں چو شازیہ ءَ بی
‎تہ مھر ءِ درس دگے اندازے ءَ بی
‎زمانگ سمبھیت ءُ سازے ءَ بی
‎وتن زیبا ئیاں گوں نازے ءَ بی
‎ما ھیشیں سر وتی باندات ءَ داتاں
‎شھیدیں ھالواں پھریگ ماتاں
‎تباھی پہ تئی کوٹ ءُ کلاتاں

‎واھگ نیاد

بـلـوچـی لـبـزانـک pinned «بیوانکی ءَ ھمراز نیست چَماّں چِیا آواز نیست یک شیرکنیں ھاموشی یے بِچکندگ ءَ را ساز نیست دیوانگ ءِ راز ءَ بِہ زان دیوانگ ءَ ھِچ راز نیست انچیں دلے گون اِنت من ءَ ￴ آواز کنت، آواز نیست تھنا سر ءِ شیدائی اِنت سِنگ ءَ دگہ انداز نیست تئی مِھر درگیج…»

میر

سر سُچگ بے ننگی یے بے آسریں
پھک سُتکین ئے کہ پُر تئی سریمگیں
دشت ءِ گرماگی شمالاں رُپت اِت اَنت
چنڈتین اَنت اِش ماں مسکیں کیلگاں
پہ مڑا ھر پرشتگیں پوڑ ءِ شم ءَ
نوکیں زند ءِ نوکیں دَھلاں جَھ جتیں
بُن شُتیں وامان ءُ بیرانی پد ءَ
بیڑ بُرتین اِش پہ جوریں دژمن ءَ
گوں ملندروہ ءُ مزاری پنجگاں
بلّے چُک چین ءُ دیار سوچ اِش کُتیں
تاک پولنگ اِش بہ شُشتین اَنت تئی
آس دئے بے ننگی ءِ زند ءَ وتی
شر بہ سوچ ءُ شر بہ سُچ کہ سر سُچگ
سر سُچگ بےننگی یے بے آسریں

#سیدہاشمی
@balochilabzank

اے دردءِ آس کَے ءَ روک کُتگ دل ءِ جان ءَ
داں تو نیائے زمستاں نہ بیت زمستان ءَ

اے اَہد ءِ بُت گُش ئے بانوری ءِ تماہان اِنت
پہ ارس مین ایت وتی ہِنّیاں چوں کندان ءَ

تو سرگرئے تہ وتی پاد ءِ تْراولاں پہریز
ادا کہ آگہیں درْچکانی واب بے مانا

شپ ءِ ودارءَ نہ کنت کوش ءِ نازبوئیں نپس
نوں بیا بہار ءَ وت ءَ سر کُتگ گیابان ءَ

تئی ھیال ءِ بشارت چہ دُور پیداک اِنت
من پُلّے ایر کُتگ موسم ءِ سر ءِ بان ءَ

اے تپل نوبت ءِ نازینک ءِ لذّت ءَ دور اِنت
بیا دردءِ گْوانزگ ءَ کَشّ ایں چہ شھر ءِ زندانءَ

تئی مھر ءِ کیپ سُرین ایت جنگل ءِ دْرچکاں
کہ انچو مکتبی وان انت قرآن لُڈّان ءَ

تئی نام رہسراں نکش اِنت ھیالے رُژنائیں
ما گْوستگ ایں چِد ءَ دائم چراگ داران ءَ

منیر مومن
https://whatsapp.com/channel/0029Vahmb57FXUubUNizYc29

موتک
منیر مومن

تئی گَم پہ اھد ءَ مزواکے

چو آس بل ایت لُنٹانی سرا

ھر چم زھیراں پیڑاتہ

بے اولاک ءَ بے توجیل ءَ

تو پرچا اینچو دور شت ئے

نوں لیب کن ئے گوں استالاں

بچکند تئی کانچ ءِ لیبو یے

یا ماہ ءَ درسے وانین ئے

چہ کرن مُلور ءُ گریواسکیں

اِستیناں نِندئے سھڑین ئے

مئے لبز تو گوں وت بُرت اَنت گوں

ہر شیپ چکار اِنت ھوناں تئی

نوں آھُو تانگو آپ بور اَنت؟

@balochilabzank

پد گْوانگ
یک روچے دُرہیں ساہ دار مر انت
من ھم چہ نگاہاں اندرباں
تو ھم چہ گمان ءَ دور روئے
ماں وہد ءِ پتینکاں باورکن
مئے احوالے ھم گواہ نہ کنت
ھچ چیز نہ مانیت آتراپ ءَ
تَہنا اے زمانگ پشت کپ ایت
#مبارک_کازی

کَلّڑ ءُ زِباراں من ، سُتکگیں ڈگاراں من
چراِتگیں بھاراں ، آدروھیں کِشاراں من

ناں پہ دوستاں سیت ءُ نے پہ دژمناں تاوان
چہ تِلاھیں بَرچانک ءَ پرشتگیں سگاراں من

منزل ءَ مُرادانی من رساں ھما روچ ءَ
من بِزاناں گار اِنت دل، دل بزانت گاراں من

ارس گُلگُل ءَ کاینت مھر ءُ دوستی ءِ چمّاں
من گَلاں کہ وارئے تو، تو گل ئے کہ واراں من

چمّن ءَ بِگر جُست ءَ کہ چہ مدّتے دراجیں
پیر ءُ پرشتگیں جُٹّ ءِ پُلّیں سرمھاراں من

بے گمی پہ گم دوستیں زِرد ءَ مرگ ءِ مستاگ اِنت
درد ءُ دوراں ساٹان ءُ انگراں سماراں من

گرّ ءَ پمّنی نام ءَ کلّڑیں کلوہ داتگ
”پہ شُومّکیں ریشاں مُرگمیش کاراں من“

کئے بکنت کراماتے کہ بِگپت اَنّاماں
وائے من کہ نُھ جاہ ءَ پرشتگیں تلاراں من

پُلّیں دژمنیں بیل ءُ کَست ءُ کینگیں ھمبل
درست منا سید دوستاں چہ ایشاں زانتکاراں من

سید ھاشمی
https://whatsapp.com/channel/0029Vahmb57FXUubUNizYc29

دستونک ۔۔۔۔۔۔۔۔ مجید عاجز

گشتوں ، بُناسیں ارس چیا پُر نہ بوتگ اَنت
گُشت ئِے ، تئی آہ ھیر ءُ کَلمپُر نہ بوتگ اَنت

گُشتوں ، من ءَ بہ نال کھیرانی شاھڑاں
گُشت ئِے ، سروزیں تار دل ءِ سُر نہ بوتگ اَنت

گِشتوں ، من تتراناں تئی بنگیں دیدگاں
گُشت ئِے ، اے ھورکیں تاس کدی پُر نہ بوتگ اَنت

گُشتوں ، منارا دوچ گوں جالاریں دْریکّگاں
گُشت ئِے ، چِنئگ تئی شیشگیں ٹُکّر نہ بوتگ اَنت

گُشتوں ، منوں دڑامبیں وپاھانی دُومّگے
گُشت ئِے ، لگوریں ریٹّ بھادُر نہ بوتگ اَنت

گُشتوں ، تئی ڈسُ ءُ نکش ءُ نشان اِش کَروتکگ اَنت
گُشت ئِے ، چٹانکے اینگُر ءُ آنگُر نہ بوتگ اَنت

گُشتوں ، تئی زامرانیں زھیراں من آزگاں
گشت ئِے ، کہ ناڑ امبری زامُر نہ بوتگ اَنت

گُشتوں ، کہ شپگِروکے شبستان ءَ شھم اِتگ
گُشت ئِے ، بگندے سِتر منی دُر نہ بوتگ اَنت

گُشتوں ، مجید عاجز ءَ دردے دل ءَ بدئے
گُشت ئِے ، منی اَدا چشیں کُنگُر نہ بوتگ اَنت

WhatsApp: https://whatsapp.com/channel/0029Vahmb57FXUubUNizYc29

کسّہے پش کپتگیں

تو چے بہ زان ئے
اے زندمان ءَ چے پیئم پمن تگرد گوْپتگ
کجام پہنات ءَ واب گیگ انت
من شر زاناں
آ گوْانزگی شیک
چے پیمیں داد اَنت مردمانی
آکوہنیں گَردواں چُنت بالاد گوْاز کُرتگ
منی گوْر ءَ اَنت
آلیب ءُ گوْازی کہ زور پچ گپتگ اَنت چہ زہگاں
تو چے بہ زان ئے
کہ ماس ءِ مہراں اے زہگ ءِ چماں
شُد ءَ را چُنت رندا بار داتگ
وتا چَرے زندمان ءِ چاگرد ءَ گار داتگ
تو چے بہ زان ئے
اے گژنگیں چم ءِ آشنائی کجام دروازگ ءَ
بُہ ٹُک ایت
من شر زاناں
آ تاس دستیں شہاراں ماس ءِ
کہ دنیگہ گوشاں سپر کن انت توار تاس ءِ
تو چے بہ زان ئے
اے زندمان ءَ چے پمن تَگرد گوْپتگ
کجام پہنات ءَ واب وش اِنت

میر عمر میر
https://whatsapp.com/channel/0029Vahmb57FXUubUNizYc29

ھوشام ءِ سپر جُنز اِتگ نہ وار ٹَہان اِنت
چمانی تہ ءَ نوبـت ءِ بازار ٹَہان اِنت

وابانی بہارگاہ اِنت،منی عشق کپوتے
تُناپیں وتی جـــــــــنگلءَ پلگار ٹَہان اِنت

اے وھم پہ منی جیڑگءِ بســــتارءَ دوایے
اے وھم پہ زِرءِ مُرگاں گشے مار ٹہان اِنت

اوشــــتاتگ منی ساھگ ءِ ایرگواتءَ چراگے
چاران اِنت شپ ءِ ســــــورتءَ آزار ٹہان اِنت

من جندءَ بُــزوران ءُ کجام پاندءَ بہ جُنـــز آں
ھر کِشـــــــکءِ سر ءَ آپےءِ دیوار ٹہان اِنت

اے دل گوں وتی ھاجتءِ سد رنگیں مُکاماں
دردانی مُــــــــــجاں کپتگءُ بیمار ٹہان اِنت

شــــیدائی امیرؔ وھد ءِ ، آدینکی گـــــــبارے
اوســـــتانی وتی ٹکــــــــــراں نزآر ٹہان اِنت

_______ امیــــــــــردوست _______

تراولیں ندارگ

ندارگ تراول اَنت
دمکاں دل ءِ
ہر رو شِپاد ءَ سئیل کنت کسّے
گشئے انچو منی وھماں شریدار اِنت
دل ءُ دیدگ اد ءَ میراس اَنت
تہنا ازمکارانی
اد ءَ پہ ارس ءُ بچکنداں کجا نیمون شوہازئے
دریگاں متلبی اوشتنت
دراں پنڈوک شوہاز اَنت

میر عمر میر
https://whatsapp.com/channel/0029Vahmb57FXUubUNizYc29

یاتانی شَل

چہ زرگون ءِ گِر ءُ گٹاں گُلیناں
شلان اَنت ترمپ ترند ءُ ترونگلیناں
ترپوکیں ڈن ءُ دشتاں بکملیناں
من گیرآروں پہ دوستاں مَہولیناں

ہما دوستاں کہ چو قُمری زہیر اَنت
پہ رنگ ءُ دروشم ءَ مَہتُوس ءُ ہیر اَنت
مکُیم اَنت ماں دل ءَ چمّاں چہ دیر اَنت
گُلیں یات اش پہ جاں کاٹار ءُ تیر اَنت
چہ درداں سر پہ وت بازیں پکیر اَنت

پہ ھاک ءَ اوشتگ ءُ ھک ءَ روان اَنت
اُلس ءِ روشنیں راہ ءِ نشان اَنت
مروچی کپتہ ماں دنز ءُ مُجان اَنت

گہیں ورنا مزاری جہہ جنان ءَ
چو بَش ءِ کُہکِر ءُ سیاہیں مُجان ءَ
اناگاہ سمبران ءُ در کپان ءَ
سُرپانی ترونگلاں گرمیں شلان ءَ
مزن لاپ ءُ سراں گورموش دیان ءَ

جہانے نوک تریں ءُ روژنائیں
جہانے بے گم ءُ بے بادشائیں
چہ جہل ءُ بُرز ءَ پاک ءُ بے ریائیں
پُل ءُ لٹ ءِ گناہ ءَ بے گنائیں
نصیر ءِ گال ءُ گپتار اَنت دَرائیں

گل خان نصیر

#سالروچ
14 مئی 1914 ۔۔۔۔6 دسمبر 1983 🥀

@balochilabzank

شپ ءِ آزمان

(خالق ارمان)

پہ من ءَ روچ ءِ آزمان دِگرے
روچ ویرانیں ڈاکے ءَ کپتگ
یک ءُ تھنا زمانگ ءِ پاند ءَ
سر جن آں سر جن آں، رو آں کہ رو آں
چِست بنت دنزءُ لُوڈ وھمانی
چونیں دروھاپے چول جنت بُرز ءَ
کمّیں دُور اِنت ناں باز نزّیک اِنت
روچ آسے کہ آس نوشان اِنت
شیشگیں برانزاں وھد پروشان اِنت
پُکّی ئیں جمّراں لگوشان اِنت
روچ تھنائیں ڈاکے ءَ کپتگ
من وتی اُمر ءِ ساھتاں جیڑ آں
زندگی چونیں اِلّتے باریں
پہ من ءَ روچ ءِ آزماں دگرے
روچ بے نامیں جَنگے ءَ گِپتگ
جنگ باریں کدی ھلاس بہ بیت

باریں شپ چوں تھار بیت باند ءَ
باریں استار روک بنت کہ نہ بنت
کسّے پؤراں ھساب کنت کہ نہ کنت
ماھیں گیوار روک بنت کہ نہ بنت
پاسپان اَنت چِرِت، توارانی
گُنگیں گویاک گالوارانی
مِِھر ءِ بام ءُ سھیل در کا اَنت
چاریں پاسانی کِسّہ اِش گون اَنت
روچ بلکیں وتی دل ءَ جیڑ ایت
کہ شپ ءِ آزمان، دِگہ ھلکے
بے دیاریں چراگ چمّانی
لیب کنت گوں مِجازیں استاراں
ماھِکان پاس جنت وتی شھر ءَ
شپ گشے ایمنیں پناھگاھے
مان پوش اتگ تھاری ءَ پوشاک
واب کپتگ زمانگ ءِ ارواہ
ھو شپ ءِ آزمان دِگہ چیزے
پہ من ءَ روچ ءِ آزمان دِگرے
@balochilabzank

سیْہ شپیں زند ءِ گم جتیں پاساں ھرکدی
من چراگ جاڑیں شانتگ انت گُل بیتہ ودی

واھگ ءِ ایمان ءِ گُناہ ءِ سر پہ در اِنت
کس تئی بنّام ءِ نہ گپت نام ءَ پہ بدی

دوزھی گَشت اَنت، جنتی ارمان ءِ پد ءَ
دل گَل ءَ بال انت، جی ھیالءِ نا سرپدی

زند! اگن نی لیکاں ترا مہرانی دوار..!!
راست، مئے سرکپتگ تئی ھلک ءَ پہ ردی

بے رگام ءَ ءُ بے تئی نیاد ءِ دْراھی ءَ
گم تئی ارسیں ترانگ ءِ استین اِنت دْردی

نستگیں ساہ انت، چندنیں جیگ ءِ منزل ءَ
نی نہ بنت مھرانی کدم ھچ رنگ ءَ پدی

عطا شاد

@balochilabzank

#مبارک_کازی

پرے زمینءَ مئے زندءَ وپا مہ بیت تہ چے؟
برے مئے ارسے برے سجدگے نمیران اِنت

✏️#منیر_مومن
📚نگاهءِ باتنءِ سپر

@balochilabzank

ڪُہنیں اے دودے تو چیا عابد گِلہ ئے
نرمزار پُروش اَنت، تولگ ءُ روباہ اش ور اَنت

#ابراهیم_عابد

📚 چکار
📝#یعقوب_عامل

@balochilabzank

او سیہ شپانی رَهءِ مساپر

او سیہ شپانی رَهءِ مساپر
تو چے بزانـئے
کہ چوں سباءِ ھیال وش اِنت
تو چے بزانـئے کہ ماہ چی یـے
چوں ماہ لقاءِ ھیال وشّ اِنت
تو چے بزانـئے
کہ چوں سارت اَنت
اے آسیں پربند شانتلانی
تو چے بزانـئے
کہ چونیں کَیپ اَنت
آ شَہدیں بچکند مہگُلانی
تو سیہ شپانی رہءِ مساپر
تہاریانی تو سیاھیں ھاتِر
تو چے بزانـئے
تو چے بزانـئے کہ ادلسانی اے سرزمینءَ
چوں ریشمیں جان آس پوش اَنت
تو چـے بزانـئے ماں درد ءُ رنجانی اے تہترینءَ
کہ چنت ھوشامی زهر نوش اَنت
تو چـے بزانئے که درد چی یـے
ءُ ماه جبینءِ زھیر چون اَنت
تو چے بزانـئے کہ زِردءِ زیدءَ
کہ ترْانگانی اے بیر چون اَنت
او سیہ شپانی رهءِ مساپر
تو آس پِر بَست
ءُ تاس نوش اِت
تو کَہر ونتگ
ءُ زھر پوش اِت
تو تہترینءِ گُمان کُرتگ کہ
ماہ جبینءِ زھیر گَران اَنت
تو بادشاھی تاج زُرتگ
کہ رهسرانی پکیر گَران اَنت
او سیہ شپانی رہءِ مساپر
تو چے بزانـئے

✏️منیر_مومن
📚نگاهءِ باتنءِ سپر

@balochilabzank

هیال ءِ کانچ ءِ بادگیرے شر کتگ، تو شر کتگ
گوں بے زبانیں بانڈماں هبر کتگ تو شر کتگ

اے چار روچ ءِ زندگی اِنت هرچی دل گش ایت بہ کن
هما نہ کرتگیں گناه دوبر کتگ، تو شر کتگ

همک هساب ءَ زِر تئی لال ءُ گوهراں زوال کنت
وت ءَ گوں تیاب ءِ چولاں چیر ءُ سر کتگ تو شر کتگ

من چو کدی نہ گُشتگ پَهک تو من ءَ شمشتگ ئے
برے برے هیال گوں من گْور کتگ تو شر کتگ

چہ تُنّ ءَ جوهسرانی مرگ آپ نستگیں مِر اَنت
چُشیں زبهریں موسم ءَ سبر کتگ تو شر کتگ

تئی نشان کازی گندگ ءَ نه ایت ماں دپتراں
چہ پد گُشیں زمانگ ءَ سپر کتگ تو شر کتگ

مبارک کازی
@balochilabzank

آزمانک : گُڈّی کِسّـہ
-------------------------------------------------------------------

کسانی ءَ من ھرشپ چہ بلُّک ھاتون ءَ کِسّہ گوش داشتگ - بـے کسہ ءَ واب نہ کپتگ آں ءُ پد ءَ ھرشپ نوکینے لوٹ اِتگ - مات ءِ لاپشود ءُ لاڈُک بیتگ آں پمیشکہ گَلنازی کتگ ، اِشکُتگیں کسّہ دُبَر گوش نہ داشتگ -
بلّک ھاتون ءَ باز کسّہ یاد اَت - داں سالے کَپّـے ءَ من تماشا کُت - پد ءَ یک شپـے آئی ءِ کسہ کُٹّ اِت اَنت - وھدے آورتگینے بُنگیج ئِے کُت ، گڑا من کوکّار کت کہ اے من اِشکُتگ - بلّک ھاتون ءَ گشت ” تو کسّہ ھلّینتگ اَنت ، نوکیں چہ کجا بیاراں ؟“ بلے من گِرّ بَست - آ سھتُکے بـے توار بوت - گُشئے وتی دل ءَ کِسّھے ساچگ ءَ اَت ءُ پد ءَ گُشت ئِے : ”ھست اَت نماسگے ، ھست اَت بَلُّکے - نماسگ ءَ ھرشپ بلّک ءِ کِرّ ءَ کسّہ گوش داشت - بـے کسہ ءَ نہ وپت - تئی وڑ ءَ ھر شپ نوکینے لوٹ اِت ئِے - ھو ، ھو ، یک شپـے بلک ءِ کسہ کُٹ اِت اَنت - تیوگیں شپ ءَ نماسگ واب نہ کپت - بلّک ءَ تور اِت - دِیر دگہ میتگے ءَ بلّک ءَ کوھنیں دَزگُھارے ھست اَت کہ باز کسّہ ئِے یات اَت - بلّک ءَ گُشت رواں یَپّاریگے دزگھار ءَ چاراں ءُ پہ نماسگ ءَ لھتے کسہ ھم کاراں گوں - اِندگہ روچ ءَ بلّک سر چادر بوت - میتگ دیر اَت - بلّک شپ کپت - سرشپ ءَ میتگ ءِ نزّیک ءَ رَس اِت بلے تھاری ءَ بزّگ ءَ مَیم نہ کُت ءُ کورچاتے ءَ کپت ءُ مُرت ! “
بلّک ھاتون ءَ کِسّہ ھَلّینت -
” گڑا بلّک مُرت ؟ “
” ھو منی چُک ، بلّک مُرت -“
مئے میتگ ءِ نزّیک ءَ ھم کورچاتے ھست اَت - من جست کت ” آ کورچات مئے میتگ ءِ کورچات ءِ وڑینے بیتگ ؟“
” ھو ، ءُ بلّک ھم منی وڑینے بیتگ “
من دل ءَ گُشت بلکیں دیمتر ءَ ھمے گُش اِیت کہ نماسگ ھم تئی وڑینے بیتگ بلے آئی ءَ چو نہ گشت ءُ لَٹّ ءَ جِکّ دیان ءَ شُت ءُ وتی نپادانی سر ءَ وپت -
من داں دیراں واب نہ کپتاں - آ شپی من دگہ وڑیں واب دیست - کورچات اِت اَنت ، تہ ءَ بَلُّک کپتگ اِت اَنت ءُ ڈنّ ءَ نماسگ نِشتگ ءُ گریوگ ءَ اِت اَنت -
من داں مُدّتے ءَ گُشت زاناں کورچات ءِ کِسّہ وتگڑینے بلے مَستر بیتاں گڑا زانت کہ آ شپی بلّک ھاتون ءَ وتی دزگھار ءِ کسّہ آورتگ اَت !


📕شیتان
✍ڈاکٹـر_ناگمـان
@balochilabzank

ڈولی بیگ

@balochilabzank

جیڑہ

گپ اے نہ اِنت کہ
من ءُ تو دور ایں
جیڑہ ایش اِنت کہ
زندگی گوں ما سک نزّیک اِنت
ءُ اینچو نزّیک ءَ
نزورتریں دژمنے ھم
مردم ءَ کُشت کنت

✒️: منیر مومن
@balochilabzank

بیوانکی ءَ ھمراز نیست
چَماّں چِیا آواز نیست

یک شیرکنیں ھاموشی یے
بِچکندگ ءَ را ساز نیست

دیوانگ ءِ راز ءَ بِہ زان
دیوانگ ءَ ھِچ راز نیست

انچیں دلے گون اِنت من ءَ ￴
آواز کنت، آواز نیست

تھنا سر ءِ شیدائی اِنت
سِنگ ءَ دگہ انداز نیست

تئی مِھر درگیج اَنت کجا
مئے گاری ءَ شوھاز نیست

کسّے بہ پُرس ایت مِھلباں
گْوات ءِ تہ ءَ ￴امباز نیست

ارمان شَرّ اِنت نیاتکگ ئے
چوناھا جیڑہ باز نیست

خالق ارمان

@balochilabzank

ساھگے گپ کنت

ساھگے گپ کنت
"رولہ ءَ مینتگیں ساعتانی زِر ءَ
ساز گِیمُرتگ اَنت
سِنگ چمّاں اڈان اَنت منی
دمک دمبُرتگ اَنت
تاک بندیں درانی دپ ءَ برھنگ ءَ کپتگ اَنت
من کُجا اتکگاں"
ساھگ ءِ گپ چے!
ساھگ ءِ دیدگاں رُستگیں راز چے!
ارس چے ، واب چے!!

✒️; آسِپ شپیک (آصف شفیق)

https://whatsapp.com/channel/0029Vahmb57FXUubUNizYc29

ڈاکیومنٹری

مبارک کازی ءِ بیرانی ءِ وھد ءَ ساجد نور ءِ جوڑ کرتگیں ڈاکیومنٹری👇

https://youtu.be/51sPMObRHpk?si=4nIYlwdfRSZT9Rs9

اَنچیں رازے مان گُش ئے ھمراز ءِ گَماں
کور بُوان اَنت چمّ وتی آواز ءِ گَماں

زند گنوکیں سرمَستے وَ چوناھا
جِیگ نہ دِرتگ ما پہ کدی مِگراز ءِ گَماں

گوات سُرین ایت لَھمیں تاکاں دْرچکانی
بے اُمریں دِل واب کپ ایت امباز ءِ گَماں

مِھر ءُ مڑاہ ءِ سؤت گُش آں پہ کوھساراں
مرچاں منا اِنجیرے کُتگ مَھناز ءِ گَماں

داں اے گنوکیں چمّ پہ راھے پَیم نہ بنت
درگیج آں من چون وتی شوھاز ءِ گَماں

مرچی ارمان دْراھیں جَنگل ھاموش اِنت
مرچی بلکیں مُرگ بِگْریوَنت ساز ءِ گَماں

خالق ارمان
@balochilabzank

ارشاد پرواز

@balochilabzank

I hate Politics

زندگی ءِ متاہ
کُنٹ ءُ کُمزوریں چمانی ھُورکیں تلب
پہ تئی لوٹ ءَ تئی شیدا دگہ چی بہ کنت
چنکس نعرہ بہ جنت
چنچوک دیوال چاکنگ بکنت پہ ترا
چنچوک پمفلٹ دست ءَ بہ دات مردماں
شھدگانی میان ءَ پہ تو لٹ بہ وارت
کیمپاں نِندوک بہ بیت
جنگ بدات گوں ھما مردماں کہ تئی مردم نہ آں
پہ تئی ھاتر ءَ مُچی ءَ گوں بہ ایت
لُچیں نعرہ جنوکانی رَند ءَ بہ بیت
مُپتیں سیاسی سروکانی میان ءَ وتی زانت ءَ پاھو بہ دات
وتسریں کوم پُرستاں گوں دیوان بہ کنت
ھرچ آدینگ ءَ نوکیں پُچاں گوں تھنا پہ تئی ھاتر ءَ
بہ ایت لکچر بہ دات
یا پہ تئی ھاتر ءَ
اِش بکنت انچیں بکواساں کہ چَٹ رَد اَنت
دُرست بے مکسد انت
زندگی ءِ متاہ
آجوئی ءِ لیوار ءَ چہ پیلوشتگیں مردمانی ھبر
زانتکاریں زمین دوستیں بَچانی گپ
کوم پرستیں سَرانی اڑل داتگیں لیکھانی لکیر
گلزمین ءِ پکیر
اے وڑ ءَ چون باں
چون نزانتکار ءُ نوک رُدیں جُستاں گوں لیگاریں چُکاں جن آں
چون نگدانی نوکیں نھالاں کُش آں
چون آس دیستگیں دیدگانی تھا جُنز ءِ پاد اتکگیں سبز ءُ بر بیتگیں جنگل ءَ گار باں
چون "اناں" ءِ لبز ءَ چہ بیزار باں
زندگی ءِ متاہ
کُنٹ ءُ کمزوریں چمانی ھورکیں تلب
تو نہ زان ئے بَلے تئی میان ءَ اے نودربرانی لَڑ ءَ
کس سیاسی نہ اِنت
کس تئی سرجمیں ھلک ءُ بازار ءُ کُنڈانی گپ ءَ نہ کنت
کوم ءِ نام ءَ گِر اَنت
راج ءِ گپ ءَ کن آں
راج تھنا یک گَل ءُ کُٹمب ءِ نہ اِنت
کوم تھنا ھما اِنت کہ تئی لیکهاں گوں تپاک اِنت اگاں...
بُزگراں چون کن ئے
لَٹ واریں ءُ بے روزگاریں سراں چون کن ئے
چہ تئی کشک ءَ جُتا تھنا پہ منزل ءَ پَند بُرّوکیں اے کاپراں چون کن ئے
گوں وتی لیکهاں جنگ ءَ متلب دیوکیں کتابی بَراں چون کن ئے
نگد کنوکیں اے نودربراں چون کن ئے
چون کن ئے آ مُریداں کہ شیدا انت پہ ھانی ءَ بس تئی منّوک نہ انت
زندگی ءِ متاه
من تئی لوٹوک ءُ شیدا پہ تئی ھاتر ءَ
جنگ داشتگ بَلے جنگی مردے نہ آں
تو وَ زان ئے مناں
کہ من تئی گَل ءِ سیاسی سروکانی چماں یک مورے نباں
سیاسی داوا کن آں
وتسریں لچھاں گوں وتی وت پرستی ءَ مُلما کن آں
فلسفیانی مُچی ءَ سجدہ کن آں
زندگی ءِ متاه
من بَلے انگتہ
ھرچ آدینگ ءَ نوکیں پُچاں گوں تھنا پہ تئی ھاتر ءَ
لکچر ءَ اتکگ آں
سرکلاں نِشتگ آں
انی اے سھت ءَ گوں تئی سوگاتے ءَ
من کتابجاہ ءِ بُرزی تبک ءَ کہ سر بیتگ آں
ھالتاکانی میان ءَ کہ دیستہ ترا
تو گوں سیاسی بچکے ءَ بچکندگ ئے
من نہ زانتگ بَلے
پہ زمین زندگیں گَل ءِ زیبائیں یک بَچّے ءَ
اچ من سِستگ تِرا

آزر مراد
@Balochilabzank

چو پہ ارزانی ءَ تائیت نہ بیت تیر منی
دل جم ءَ واب مکن، واجہ منی میر منی

پہ وتی تنگھیں جوھان، بہ شوھاز زِرے
اے زمین انت اد ءَ ھرجاگہ کپ انت بیر منی

پہ من ءَ روک منی عاقبت ءِ کندیل انت
”مرچیگیں “ دنز نہ کنت واھگ ءَ سھگیر منی

بید ء”زنداپ“ ترہ ایت اے منی اِشک ءِ هوشام
وہدءِ”تبدآس“نہ کنت امبلوءَ دیر منی

گرند یک ڈاھے بہ زان ئے کہ شل ایت توپانے
پہ تو یک ھکّلے، اے تھمبل ءُ تاھیر منی

واجہ ھرجاگہ روئے ، راہ پداں گار مہ کن
کہ چو تلک انت ھمک راھسر ءِ پد گیر منی

اے دل ءِ پھکی انت، اے نیّت ءِ نیکی کہ اَتا
وتءَ لیک انت مُرید اے مزنیں پیر منی

اَتا شاد
https://whatsapp.com/channel/0029Vahmb57FXUubUNizYc29

گَم نگاھاں مُلما بنت
مردم چینچو تھنا بنت

وھد بہ بیت کہ بوجیگے
شھر ءُ جنگل دریا بنت

گَم زبان ءَ ترّین اَنت
لبز کتاباں مانا بنت

شپ نہ کُٹّ ایت دور برو
بلکیں ترانگ ڈیوا بنت

بُن گِر اَنت وابیں مارشت
سوز دلانی آگہ بنت

تو کہ سواد ءَ در کائے
نکش نگاراں باڑا بنت

گون مہ بہ ئے تو گرکی تَل
سُھب چِہ پیم ءَ بیگاہ بنت

شھید آکل ازاب
https://whatsapp.com/channel/0029Vahmb57FXUubUNizYc29

جاھے گام ءُ ￶جاھے مَیدان، جاھے گْوست ایں ماں پہ دْرِکّ
گُشت کے ءَ مارا کہ زند ءِ رِپک ءُ ￶ راهاں هچ مَہ سِک

زی پدا بے زانگیں ناسرپد ءَ ￴ گُشتگ من ءَ
کست ءِ ￵سَے بْراگیں تناب ءَ ￴من اُوں چِکّ آں، تو اوں چِک

دهر ءَ ￴میری ءِ ￵کلات ءِ پیژگہ بْرھنگ کُتک
مرچاں آ کیچ ءِ ￵چنال ءِ ￵جاہ ءَ ￴رُستگ کاش ءُ ￶کِک

✒️: برکت برجان
https://whatsapp.com/channel/0029Vahmb57FXUubUNizYc29

گْوست ءِ روچاں دیما کار اَنت گیر کن انت
مردم مارا دوست نَدار اَنت گیر کن انت

بے وَتنی ءِ دَرد اِشانی ھمراہ اِنت
روچے دِیمے لَڈّ ءُ بار اَنت گیر کن انت

یکیں وھد ءَ اینچو کندیل روک مکن
بالو مارا پجاہ بیار اَنت گیر کن انت

زند ءَ بِِلّے دوست ءُ دژمن بے مہر اَنت
مَرگ ءَ رَند وَ دَستے دار اَنت گیر کن انت

ما چو وشبو مَیم نہ بئیں ءُ مارگ بئیں
مارا گوات ءِ چَمّ نچار اَنت گیر کن انت

مرچاں سنگت چو کہ درامد دْروت گِر انت
روچے کاینت روچے گار اَنت، گیر کن انت؟

کوهنیں مردم، کوهنیں روچاں، یک پَیم ءَ
رِپک همیش اِنت کِسّہ کار اَنت گیر کن انت

گیاب ءَ مہ گند انت لوگ ءِ ڈسّ ءَ شوھاز اَنت
مُرگ من ءَ گوں سک ھیلدار اَنت گیر کن انت

اَنچو گش انت تئی شیدا باز اَنت، باز بہ بنت
باریں چُنت اَنت، چُنت ھزار اَنت، گیر کن انت؟

میتگ تئی اِنت، اُود ءِ مردم شوکین اَنت
یکیں چَمّ ءَ درساں چار اَنت گیر کن انت

تہنا بہ بنت تہ مُرگ ءُ موسم، مئے پَیم ءَ
درچک ھما کہ ساھگ دار اَنت گیر کن انت

واب ءِ دریگ ءَ جُست مکن کہ چَمّ امیرؔ
چے چے گند انت، چے پیشدار اَنت، گیر کن انت

#امیردوستؔ

پَتکوس!

منی اُمر بیست ءُ یک سال انت ، مات ءُ پتانی اولی چک اوں ءُ سور ءِ نھمی ماہ ءَ ودی بوتگ اوں منی ایر گوری دگہ جنکے ءُ چہ آئی پنچ سال ءَ پد بچکے چہ آ ءُ پد ما ھما پنچین انت، پت سرکاری سروکے (افیسر) ءُ مات میتگ ءِ جنکانی پرائمری ءَ نیکراہ وانینیت۔ بلے مے پیرک ءِ درائیں چک ءُ نماسگ یکجاہ نشتگ انت، پدا مات ءُ پت ءِ پیرک یکین انت ، ایشاں ناکو زتک ءُ تروزتک ءَ ابید سانگ نہ کتگ ءُ تاں ما اتکگیں مے درستیں ناکو زتک ءُ تروزتکانی مات ءُ پت وت ما وتا پدا تروزتک ءُ ناکو زتک انت، سرجمی ءَ ما ھپت کھول ھواری ءَ نشتگیں، بلے پہ وشنودی ھرکس وتی ءَ کنت ءُ وارت گیشتر سرکاری کامند انت یا لھتے ءِ وتی کار انت، منی امر یازدہ سال ات من چو گوشت ءُ گَلڑ ءَ الکاپ ات اوں ءُ منی نام پتکوس! ات، من کہ پتکوس ءِ بزانت سما کت گڑا من جیڑ ات کہ من ءَ باریں نامے پر اگاں انا چوناھا نام ھما انت ھمائی کہ ترا مردم توار جن انت ، آ نام کہ پر کتگ بے نہ انت ءُ من ءَ مردم تنیگت پتکوس توار کن انت، نوں من ھُشتگ ءُ ھڈے اوں، برے برے من موداں چاریں گش ئے تاک اش مان پدا وتی ھمسرواں گندیں جیڑیں کہ من ءَ وھم انت۔ من ءَ ھمید سک دوست بوتگ منی مات ءِ برازتک انت۔ نوں منی تروزتکے لوگ ءَ ئِے، آ سالی کہ پہ من ھبر اش آؤرت ءُ من سھی بوت اوں کہ سرگپتگ انت منی لوٹگ ءَ ءُ جنکاں منی کنت کنگ بندات کتگ ات منی پاد گل ءَ زمین ءَ نہ ات انت، بلے ھبر ءِ آرگ ءِ ماھے ءَ پد مات ءَ وتی برات ءَ را گشت کہ ،،ما گشتگ وتیگ نہ زوریں ما ھون ءَ مٹ کنیں،، ھمید پدا منی ءُ وتی تر سو ءِ زامات بوت ءُ نوں سے چکے ھست، من لوگ ءِ کارانی دیمپان اوں ءُ گھار گوں بالگتری مرد ءَ ایمن انت ءُ برات لاڈک انت کہ کستر انت ءُ یکین انت۔ پت ءَ وَ گوں من بِھ پہ وشکامی گپ نہ جتگ ، اگاں برے ءَ توارے کت کارے بستے یا بس جوڑی ڑڑی ءَ ابید دگہ ھچ،من نادوست ھم نہ ات اوں پہ منی واھشتانی سرجمی ءَ مات ئِے یکوئی ھج کت زرے مدام پہ من جتا دات بس منی ءُ آئی تب انچش ات گوں یکے دومی ءَ۔
بلے نوں وَ من مات ءَ را ھم گش ئے دوست نہ اوں مدام پہ زھرکنکی ،، پتکوس چو بکن ، پتکوس آ بکن ، ترا کلام بجنت کلماٹ تو اے گد انگت نہ ششتگاں، پتکوس نام ترا چے کزا انت تو انچو واد بٹان ءَ مان کتگ،، یک وھدے مے ھاندان ءِ ھمک نشتگیں ورنا منی دل ءِ امیت ات ءُ مات ءُ پتانی اے گپ کہ ما وتی نہ زوریں درامد زوریں چو رستر ءَ امیت ءِ کشار ءَ آ دراہ کنان بوت، روچ گوزان ات انت۔ گُڈی ءَ مے لوگ ءَ پدا سک سک بندات بوت کہ چہ بالگتر ءَ مردمے ءَ وتی ھبر آؤرتگ، شریں ھانوادئیں مردم انت، مال ءُ دولت ءَ بد نہ انت سرکاری کاردار انت ءُشریں اگدھانی سرا انت۔ بچک ءِ جند ڈنی ملکان انت، اود ءَ ھم شریں روزگارے ءِ سرا انت ، منی وشیانی بوجیگ زر ءَ کپتگ ات، من امیتانی ماڑیانی تہ ءَ شاہ بانک ات اوں ، ڈھل ءُ چاپ مچتگ ات انت، جل تیار ات منی ھمسروان ءَ دوچاپی ات، منی دپ اش شرکن کت ءُ من ءَ جل اش کت، من گل اوں منی نزیکیں مردم یکوئی برے یکے جل ءَ کیت ءُ روت یکے وَ منی کرا انت مدام، ڈن ءَ کوکار انت گانا بجانا انت، ناچ ءُ سھبت انت، چک ءُ چلانگانی چری چری انت درائیں میتگ گل انت ھرکس گل انت منی جند سکانی سک گل انت ، گُدبری، ھنی بند تاں اتکگ ات نکاہ ءِ شپ ، اے سمبھگ کسے ءِ وداریگ بوھگ درائیں لوگ ءِ سمبھگ درستانی وداریگ بوھگ ءُ واجہ ءِ آھگ ءُ منی کونڈ ءِ سرا وتی کونڈ ءِ پر دیگ ءِ ندارگ ھمک روچ منی ھیالانی باھوٹ ات انت۔ من گل ات اوں من ءَ کسی ھچ گپ نہ تورگ ءَ ات من ءَ پتکوس ھم نہ تورگ ءَ ات، من جیڑگ ءَ ھم نہ ات اوں کہ باریں من ءَ دگہ نامے پر انا ، من لوٹگ ءَ ات اوں کہ منی امیتانی واجکار ھم من ءَ ھمے نام ءَ توار بکنت من ءَ پتکوس بہ گشیت۔ من گوں وشی ءُ اومیتاں ھمنچو ملما ات اوں کہ ھچ سما نہ کپت کہ شپ ءُ روچ چوں گوزان انت ءُ کے چے گشگ ءَ انت تاں ھمے بالگتری بچک ءِ بابت ءَ سک سک ءِ دو ماہ ءَ پدگپ الم بوت زاماتی بوت ءُ یک روچے من گوں امیتانی ریک ءِ کلات ءَ چل ءَ کنور ءَ ات اوں کہ ملوک ( مے ھمساھگ انت) ءُ مات چل ءِ دپ ءَ نشتگ ات انت ملوک ءَ گشت ،،جن ئے! شمے زامات ءَ را کے ءَ گشتگ کہ ترا چشیں ٹھلیں جنکے ھست،، گوں اے گپاں منی گوش مک بوت انت وشیانی بوجیگ زر ءِ نیام ءَ لڈان ات، مات ءِ توار منی گوشاں کپت کہ ،،ایشانی سیادے مے لوگ ءَ شتگ اتکگ ءُ ایشی بانڑی دیستگ،،گوں بانڑی ءِ نام ءَ پتکوس ءُ بانڑی منی مجگ ءَ ھوار بوھگ ءَ ات انت کہ من سٹ کت منی واھگانی کلات ڈران بوت وشیانی بوجیگ نیلیں زر ءِ نیام ءَ ایر روان بوت ءُ درائیں ندارگ منی چماں اندر بوھان بوت انت ءُ منی شانزدہ سالی گھار بانڑی ءِ اکس چماں ردان بوت۔ ...

جے ایم آزاد
@Balochilabzank

یار تئی آواز کُج اِنت
{پہ قاضی ءَ }

یار تو چینچو ھاموش ئے، یار تئی آواز کُج اِنت
یار تو درداں چے پوش ئے، یار تئی آواز کج اِنت
زند تگِردے نیمسوئیں
سَوت نہ جنت ملما اوں نہ کنت
چندے ساھگ چَول جن اَنت
چو مونجے سئیل ءَ در بئیت اِنت
کوپ ءِ بُن ءَ یک ترمپے چاء
انچو گوں مگسکاں الوت کنت
۔۔۔۔۔۔۔۔۔۔۔۔۔۔۔۔۔۔۔۔۔آواز نئیت
یار تو چینچو ھاموش ئے یار تئی آواز کج اِنت
یار اے دنیا مکّاریں
جیگ ءِ کٹِکّ ءَ تِرک نہ جنت
رنگ پُلیت چہ دیدوکاں
ھرچی انچو بیوانک اِنت
نُکّ بُرَوت چہ نادوکاں
زھیر چو دُوت ءَ بال کننت
۔۔۔۔۔۔۔۔۔۔۔۔۔آواز نئیت
یار تو چینچو ھاموش ئے،یار تئی آواز کج اِنت
گُپتار ءِ کہ ھون رِچ اَنت
دنیا ءِ دیوال ءِ سر ءَ
نوکیں اکسے درنجگ بیت
یار ابیتکی ھزگاریں
چمّ ءُ گوشاں رہن مہ کنت
چاڑ کج اِنت تئی ساز کج اِنت
۔۔۔۔۔۔۔۔۔۔۔۔آواز نئیت
یار تو چینچو ھاموش ئے، یار تئی آواز کج اِنت
یار تو درداں چے پوش ئے، یار تئی آواز کج اِنت

منیر مومن

وانگی (کتاب): مبارکیں تران
مبارک کازی ءِ جند ءِ تران ءُ آئی ءِ بارہ ءَ ریڈیو زرمبش ءَ بیتگیں تران

شنگ کار: زرمبش شکسار

چہ گیوار ءِ شم ءَ ماھے در اتکگ
پہ تئی دیوانگاں راھے در اتکگ

منی مرگ ءَ چیا پریات ءُ زار اِنت
ھُدا ءِ داتگیں ساھے دراتکگ

پدا کازی ھما انت گندگ ءَ نہ ایت
چہ لوگ ءَ یک بیگاھے در اتکگ

https://whatsapp.com/channel/0029Vahmb57FXUubUNizYc29

مبارک کـازی

16Sept2023 🏴

@Balochilabzank

بلوچی شائر: مُبارک کازی
براہوئی بدل: وحید عامر

اگاں تو چمّن دل گْران ئے من ءَ مھرم دگه باز اِنت
نه اِنت تہنا مَن ءَ تئی گم جہان ءَ گم دگه باز اِنت

اگہ نی غُسّه اُس دا وڑ کنے مَہرم تو پین بازے
کنے تنیا نا اَفّک غم جہانَٹ غم تو پین بازے

اِے دور ءِ آشِکاں بس یک نگاهے دلبریں لوٹ اِیت
نه چارئے تو اگاں سھتے جھان ءَ چمّ دگه باز اِنت

دا دَؤرَٹ آشِکاک تنیا نِگاه ئس مِہرئنا خْواره
اگه هُرپیسه نی دِیخَس گُڑا بورچَمّ تو پین بازے

شموش آں چه دل ءَ تئی نِند ءُ نْیاد ءُ مِھر ءِ سَوگاتاں
اِے اِمروز اِنت اِد ءَ یاتانی شینک ءُ شَم دگه باز اِنت

خیالان دیوه اِی داسه نا مجلس، مِہر ءُ ٹیکی تِے
دا دُنیا ءِ هُرک یاتاته شینک ءُ شَم تو پین بازے

اِے اِمروز ءِ سرے دُوریں ترا مِنّت هزار رَند ءَ
منی درداں بِہ کنت تالان چُشیں همدم دگه باز اِنت

دا دُنیا بَلّو دُنیاسے نے مِنّت کپّره داسه
کنا درداتے کِے تالان دُنو همدم تو پین بازے

من ءَ کازی شگانی تو مکن په شِیشگے آپ ءَ
اگاں تئی مُوڑ په شش پیک ءَ نه اِنت سرجم دگه باز اِنت

کنے کازی شَغانی نی گُلُمّس دِیر ئکِن کپّه
اگه نا مُوڑ شش پیک ئٹ مَفَک سرجم تو پین بازے

https://whatsapp.com/channel/0029Vahmb57FXUubUNizYc29

دل ءِ واھگ اِنت کہ درئیت شپ دہ ءُ چار ءِ ماہ پدی بہ بیت
تو زران ءَ بیا ئے چو مھلب ءَ ھما روچ باریں کدی بہ بیت

ماں ھیالاں وھدے تو ایوک بئے چو چراگ ءَ سرشپ ءِ روک بئے
دل ءَ بل کہ بیت دل ءِ لیب جاہ دل ءَ بل کہ باز ردی بہ بیت

کہ بہ سبز انت ترانگ ءِ روچ پُل، لدیں زرد ءِ باگیچہ ءَ امُل
منی چم ءِ میتگ ءُ ملپداں تئی گمانی ھور ذردی بہ بیت

وتی زھریانی زھینگ ءَ گوں زھیراں سنگتی لازم اِنت
تری من بباں تری تو بہ بہ ئے تری گنجیں چاردہ سدی بہ بیت

دلوں زور جنت کہ چو کاسم ءَ من بگنداں اشرپی چانگ ءَ
تب اوں میل کنت کہ چو پازل ءَ پہ تماشہ سیل ءُ ندی بہ بیت

وتی دوستانی شگان ءُ گم وتی دُژمنانی بد ءُ ستم
چشیں کازی یے کہ مبارؔک اِنت پدا مشکل اِنت کہ ودی بہ بیت

#مبارک_کازی
16.09.2023 ◼️

https://whatsapp.com/channel/0029Vahmb57FXUubUNizYc29

یک نا یکے وَ باید اِنت بہ بیت، یک
انچیں مردُمے کہ آئی کرا تو شُت بہ کن ئے

وهدے کہ تو مہ زان ئے کہ ترا کُجا روگی انت....!

✒️: فرانز کافکا
رجانک: علی دوست
https://whatsapp.com/channel/0029Vahmb57FXUubUNizYc29

مردماں، شمے زنڈیں لاپاں چہ پدّر انت کہ شمارا ھوش مان نیست، ھوش سر ءِ تہ ءَ اِنت ،آ کہ سر ءَ گوں سپر کنت آ پزّور نہ بیت، شما شریں سپاھیگ ھم بوت نہ کن ات پرچا کہ شمے سینگ ھم پتن ءُپراہ نہ اَنت، شما وتی سر دیستگ اَنت چینچو کسان اَنت؟ چینچو سُر اَنت ءُ لرز انت. شما دراہ بس ھمے گم ءَ مرتگ ات کہ نان چوں رس ایت، سبارگءَ پد شما شام ءِ گم ءَ کن ات، ھمیش انت شمے زندمانی ؟
من کہ گوشتانک دَیگ ءَ ات آں پاد ءِ ایرکنگ ءَ جاگہ نیست ات، پدا کہ من چاراں کس نیست من ایوک وت ءَ گوں گپ ءَ آں، ھما روچ ءَ پد اے شھر ءَ من ءَ گنوک ءِ نام ءَ توار کت ۔۔۔۔۔۔۔۔

اے آر داد ،، ءِ آزمانکی یے ٹُکّرے

https://whatsapp.com/channel/0029Vahmb57FXUubUNizYc29

دوئیں کُشتگ انت ۔۔۔ءُ مزار اوں پاھو ءَ درنجگ بوتگ ۔۔۔بلے سگریٹے من ترا دیاں انچیں سگریٹے کہ ترا سک ژند کنت ءُ واب گیج ایت پدا تو ھجبر پاد نیاۓ ۔۔۔۔ھئو ۔۔۔سپاھیگ راست گُشگ ءَ ات موسم ساچان ات ۔۔۔نود اوں کم کم ءَ شنزگ ءَ ات انت ۔۔۔مرچی اولی رند ات کہ سپاھیگ من ءَ دوست بوھگ ءَ ات ۔۔۔۔ھئو منا شاری ءِ بُت اوں دوست بوھگ ءَ ات ۔۔۔۔چمّاں بند کنگ ءَ کمو پیسر سپاھیگ ءَ تُرندیں کندگے ءَ گوں گُشت ۔۔۔تو گپّے زانئے ۔۔۔۔من تو دوئیں لانتی ایں ۔۔۔۔۔۔۔۔من اوں تُرندیں کندگے جت بلے آواز در نہ یتک۔۔۔۔۔۔۔۔۔

( تاج بشیر )

https://whatsapp.com/channel/0029Vahmb57FXUubUNizYc29