الشاعر عقيل العرد

ما دام محد يجي
المن نسوي درب
والمن نرش الباب

والمن نخلي عطر
و المن نبدل ثياب

والمن نتاني بعد
و اهل البعد غياب

ان شاء الله نحب صدك
ويبين الجذاب

وان شاء الله نرد سوا
ونتعاتب وننعاب

وان شاء الله ما ترد
واصفن بوجهك سنة
خاف ارد مثلك شاب

وان شاء الله من انكسر
جام اوكف بخطوتك
حتى انسحگ و انهاب

الخ

عقيل العرد

جيب من الماي ماي وحطني بي
وگلي من تلكه النوايا الصافية

النوارس بالنهر تلعب ؟ تخاف ؟
الله يدريها بگلبها شخافية

وانه تلگه بگلبي من كد الامان
النوارس والجوارح غافية

ناس ما اخسر ،، تجي الوادم تروح
آنه ما خسران غير العافية

عقيل العرد

هذا الميل بالساعة
حرامي ابيض

حرامي ودكت جدامه تدك بالراس

اسمعه
وحيل مابيه عليه انهض

حرامي يبوك من عمري
يبوك سنيني من صندوك گلبي

وگلبي حيل جبير ومفضض

انا گلبي ذهب جاسه ولف زيبگ

اخذ لونه وچوه رسومه

ويالون الذهب لو راح
حتى بذهب من ينطلي ما يصفه
ولا يغلى ولا يرخص
ذهب ما يرضى يتعوض

ذهب خانه البخت والحظ

الخ

عقيل العرد

سيل والمردي انكسر مشحوفي صار
خشبة خشبة اتكسرت وتناثرت

اني واجهت الحياة بعين ذيب
شاه رادوني انذبح بس ما ردت

واني ميت بس بقيت بلايه عين
روحي طلعت بس ابد ما غمضت

عندي ، ما عندي ، الكرم ما عفته يوم
ايدي گصرت بس ابد ما گصرت

عقيل العرد

انا تعبان وانفاسي قليلة
والروجة العلى متوني ثگيلة

انا بنادم صدك مذبوح واحتاج
بنادم مثلي مذبوح اشتكيله

من دكات گلبي وروحي زعلان
وحچي المرتاح احسه بگلبي چيله

انا اليجرحني اعذره وگلبي مرتاح
وگبل لا اعاتبه بعيني . استحيله

وما سامح لحدما اغسل الغيض
وانظف گلبي من حقده وغليله

شكد فارش شليلي وي اليحبون
بس ما عاتب الفارش شليله

واذا غلطان ادنگ للصلح ماي
وما اخلي الزعل يعبرني ليلة

الكرامة براسي تاج وما انذليت
وحرام تلوگلي الهامة الذليلة

انا لو ذالها ومن وجهي وطيت
صرت هسه انه ابو اليد الطويلة

ليلية انه روحي اعله السما تروح
و احير بفاتحة گلبي الثجيلة

انگع وجهي بدموع الخسارات
وعلى وجوه الشموس انشر غسيله

احس الصار بيه اكبر من الصار
وابد ما توصفه ابياتي الهزيلة

الشعر لو ما يوصف حالة الروح
على روح الشعر نقرا العديلة

واذا صار المغالب ماله عنوان
ما اورط العرجة وي الاصيلة

نسيت عيوني بخدود المحطات
وتهت والرجعة صارت مستحيلة

عقيل العرد

ما هديتهن بس طيرت منهن
البگلبي وكحات وگوه ساجنهن

جوا من الجفن مكبرة وكلها اعزاز
المواقف والسوالف كوه دافنهن

الميت بالعيون شما سگيته يموت
بحلمهن ما يعيش الما يثمنهن

والبيهن نزف دام الثياب انظاف
شما ضميتهن نزفك يبينهن

العجايب سبعة بس من شفت هاي الناس
شفت گلبي وضميري وصبري ثامنهن

عقيل العرد

من يبدي الشتا اتذكر
ومن اتذكر اتعور

ومن اتعور احتاجك
بر ويتاني مزنة ماي

والبر يصبر عله الماي
مثل صبر الشتا ع البر

تهجرني واضل مشتاك
كطرة ماي تسكيني .. واكول اكدر

يالكطعي يالمدلل
ماريدك مطر
مر ندى وما حاجيك

اخضر اردود الك .، لو بس يمر طاريك

تلكاني عرد والروح سدرة بر

وتلكاني ضما وبالروح ورد احمر

عقيل العرد

موعد عنده زحمة يأخر الموعد
ترعد ساعته وجان التفگ يرعد

ضبط عگرب الساعة وعگرب الرشاش
هذا يعد ثواني وذاك روس ايعد

مات بساعته بس عاش تاريخين
المثلك لازم بنص اهله يستشهد

عقيل العرد

خلي سونارك اباب حسين
و أمنع ما يلي

السياسي الخان شعبي
المرابي الباگ تعبي
وخبزتي ومستقبلي

و الچفوف الشالت الكاتم
على ناسي وهلي

مو بكيفك تمنع الفقرة حزنها
ومو بكيفك تطرد طيور العشگ من في غصنها
حسين اخونا
وكلنا من ظهرك علي
...............
الحسين للفقراء والثوار بشرط النقاء

عقيل العرد

اليوم تلقيت اتصال مفرح من الحبيب الشاعر الكبير والصديق النقي ايهاب المالكي قال لي رأيتك في المنام رؤية مفرحة جداً ليلة البارحة ( إذ كان هناك عزاء كبير للامام الحسين عليه السلام وانت ترتدي السواد وتجلس في وسط ذلك المجلس وكنت فرحاً برؤيتك ... واستحيت ان اتعمق بتفاصيل ما رآه ابا حيدر في منامه ) فقال هل كتبت جديد ام لديك عمل جديد ام ربما هذه إشارة وبشارة فقلت له لا جديد يا ابو حيدر سوى انني احب الحسين بيني وبين نفسي بصدق وخجل

بعد انتهاء الاتصال استذكرت قصيدة ( الحلم ) كتبتها للامام الحسين عليه السلام قبل سنوات
..........
شعطلك عن الحلم

تانيتك هوايه

شايف بروحي ذنب ؟

لو سامع حجاية ؟

يحسين هاي السنه طيفك ولا مرلي

وجف ابو فاضل طلع بالماي واشرلي

وكبل اربعينك نذر راح امشي مشايا

عطشان يا ابو علي

ردتك تمر غيمة

ما يمي اثر علكمي

ومطلوب الف هيمه

وكلما امر زينبك يزغر بروحي الحجي

وجفني اليچمل البحر

يستحي يهل ضيمه

اتذكرتك ودخنت
وبصدري ثغبت مرة

بجرة الجكارة طلع يمكن حرك خيمة

واكف بنص كربله

واتخيل اخيامك

هنا طاح رب الوفه

هنا ركضت ايتامك

ومكسور خاطر رحت

يم كنطرة نوحي

وطاحن جفوف وعلم وتلاكن بروحي

يحسين بيه حجي ما ينحجي لغيرك

لو ما اشوفك وطن جا ماصرت طيرك

يحسين دربك عدل
من اوله اندله
منك عرفت الزلم لو موت لو ذله

عاشورك بخاطري

وباهلت الولاية

تراوالي وجهك نهر بس ما ضكت ماية

تانيت بس ماطلع

صوت من المراية

أشايف بروحي ذنب ؟

لو سامع حجاية ؟

عاشورك بخاطري

وفريت الولاية

ويطيح مني گلب كلما شفت راية

عقيل العرد

#العباس

تأخرت عنك لأن
ردت الوكت يهدا

وشدة انت يا أبا الفضل
والشعر يم حضرتك هم واكع بشدة

ردت الشعر يستقر
واكتبلك شجم شطر
من يلم روحه الفجر
و تفتح الورده

كالولي عنك كمر
كلتلهم لوحده

وكالولي جوده انجفى
كلت النهر عنده

كالولي والعلكمي
كتلهم شحده

كالولي عنك طحت
كلت الضوى تبدى

كالولي راسه انضرب
كتلهم يرد عدل بس زينب تشده

الماي كلش رخص
ياهو اليجي وسده

وعباس عنده نهر
والنهر .. ما عنده

هد زنده عالمشرعة
بس جوده ما هده

وعباس حاجى الجرف
ومن شافه ما يستحي
حط وادمه بخده
..................
عقيل العرد

الرسالة ٢

ردت اكتبك واستحيت

ردت اصيحك
بس خنگني السهم من گلبي وبچيت

ردت احضنك
شفتك بروحي
واجيتك واختفيت

ردت اصيحك
بس لكيت الصوت ينگال ويموت

الا صوتك .. عابر الموجات كلها
منين ما ذبحوك اجيت

گبل لا تاخذ قرارك
ظلمة چانت والضمير بلايه شوف
الدنيا كلش غمضت
و انت ضويت

وحزني ياخذني اعله نحرك واستحي
القلم يوگع من ايدي
وما يجي براسي الوحي

اركض من گماط عبد الله لنحره
اتعب من الخوف واعثر
يا ذبيح الله ارد اكتبك وانمحي

عقيل العرد

رسالة ١

هنا ضريح
ترابه بي دم حار ..
بي منحر ذبيح

هنا صحن
بي منبر
ولاقطة صوت

الصوت من المفترض كلش صريح

بين راعي الصحن عن صوته مسافة

وبالمسافة البين نحره وصوت صحنه
صوته جان اول جريح

الصوت يرعب
لازم يكسر شبابيج القصور
الصوت يجدح نار
يرهب
يصرخ وما يستريح

الصوت يعصف
يقلع جذور الطغاة
الصوت بالتاريخ ريح

الصوت كون يشرف وجوه المناير
والمنارة بصوتها تعلى وتطيح

وبين هذا المنحر المذبوح صوته من الوريد
وبين ذيج اللاقطة تشويش صار

الصوت صار يفشل وكلش قبيح

الصوت ما يشبه المنحر صار وسفه
وانه اخاف المنحر من عيون ناس اهله يطيح

والله حتى حسين اذا يوكف بصحنه
ينزلونه
ويكطعون البث عليه

و ياخذون اللاقطة من ايده النظيفة
ويذبحونه اردود اذا قرر يصيح

................
عقيل العرد

تنزف الگاع ويضمدها الصبر

بالحلم جانت حديقة
وبالصدك صارت قبر

مسلمين احنا وكفو من المسلمين
احنا شجعان شكثر ؟

يسحك اعله وجوهنا بسطال مرحب
ونقرا نشرات الأخبار وننقهر !

والله كلش ننقهر

القهر موقف ؟
وهاي اخر مرحلة برف المواقف
وين نوصل بالعهر ؟

ينزف الدم ... ينشف الدم

الحقيقة الثابتة بآخر نزيف
غـ.ـ.ـزة حتماً تنتصر

عقيل العرد

عقيل العرد


مشيت بلايه ما نيشن لعيني شراع
انا بنادم بعت مفتاحي بجفوفي
ورجعت اتوسل البيبان تفتح رزة حروفي

وحگ بيبانا الما دگها شوگ ذراع
انه وروحي دمعنا انباع
يا وسفة دمعنا انباع
مهرة انجتل فارسها بظهرها وتيهتها الگاع

عفت روحي وراي تصيح
يا مجتول
لم ارسومك من الريح
يا مجتول
يالمالك ربع وي مستحاك اتطيح

انا وحنية ضلوعي
خصر حنطة للمتانين ؟
ورغيف امي سفر خوة للمتيهين

انا ونكران ذاتي
وضحك عيني ذراع للمغتاض
وعلى المايسوى طاري نصيح ك
انا وروحي مطر نيسان
مطر
بس ما عرفنا بيا مجان نطيح

الى جرح علي عليه السلام
........

اغتيال وكلشي جاهز
والسما عدها علم

وگف جيش من الجهل
ضد مدينة من العلم

گبل ليلة من الجرح بالكوفة خوف
والشوارع نايمه وشافت حلم

من السما لمسجد الكوفه
يثعول الدخان مرة
ومرة حايط ينثلم

ومر شريط الدنيا بعيون الامام
كام يتمشى الفجر بالذكريات

يبوس ذو الفقار
ويعلگه اعله صبره

ويرجع لبِشت النبي
يحضنه و يشم

مبينه نظرات الوداع بعين حيدر
ويلمح وجوه اليتامى ويبتسم

من زمان الصحرة تستاهل عطشها
ومو مكانك ياعلي تبديت بيها
هاي ناس تقدس الما يفتهم

وقبل اذان الفجر
نعسان الضمير

و توه فز جفن البلابل
من الندى تنَشَف جنحها
و اعله باب الله تطير

الشوارع باقي بيها الليل ما يقبل يروح
والوضع بالكوفة من يومه خطير

عرضة صارت بس علي مواعد يتيم
وزينب مسويه سحور
وحيدر أباله فقير

هنا طلع للمسجد يصلي الامير

تلمع سيوف الخوارج
بس علي بلايه حماية
لا يصلي من ورى الجامة وي ربعه
ومثل هاي الناس ما يقبل يصير

تحت كل سجادة سيف
وسيف الــ يصلون ما يحتاج اجازة
هنا بداية جرح الاسلام الجبير

الخ

عقيل العرد

والله ولا جان اعله بالي
مديتلك جفي وسؤالي
حسبالي حالك مثل حالي
انه انسى كلشي وكَلبي خالي
جكليت طشيت ال(هلا ) عليك
واستغربتلك ؟ مو بحالي .

تاليتي ابد مو خوش تالي
خله اليطك صورة لخيالي
ثكلان وجهه وصار غالي
ضميت بالكوة انفعالي
وانه الموزع دمعي عالناس
وبعيون ناسي دموع مالي .

عفتك انصيص هسه عالي
يالهدمت من كَلبي جالي
امس انه جذبت الحجالي
خاين وكلتلهم حلالي
وياريت ما لاكيتك اردود
ملكاك حط المو ابالي

تلاكينه شرجية وشمالي
ملكه التواضع والتعالي
مستاهدك عالروح غالي
زعلان؟ تكره ؟ لو مثالي ؟

ومن كل كَمر حطيتلك لون
ثاري الليالي تضل ليالي

عقيل العرد

انام وما مخلي بكلب واحد غيض
واكعد والكه كلبي من الحجي مورم

اسكت وانتجي بدخان اصبر الروح
وجه يضحك ويبجي بدمعه متبسم

من كدما جرعت من النفاق اشكال
كلبي مشكك ونص دمي متسمم

اذا رايد اتندم عن فعل والله
على الحب و التواضع حيل متندم

على ذيج الاخلاق الزايدة وي الناس
وعلى هاي المحنة الزايدة التلجم

الحفظته من الطعن بالغيب والمو غيب
لكيته وي الغريب بظهري متحزم

يردوني نجم اصعد واصغر حيل
وانه اكبر من فكرهم ، شمس ما نَجم

وماريد الأسم شفت الإسم تحجيم
بس عندي مواقف واضحة تشيم

لو ريد الكمر جا كلت سر الليل
وسخرت الارواح الضامها الطلسم

واشن حرب الصدك بوجوه اليجذبون
واخليها فضيحة لثانية تسلم

الثلمت وياه خبز ، يثلم ضميري العار
اذا يوم بسمعته حجايتي تثَلم

اليضوكني هلا من لبة الجمار
وعد بعثوكي اذا يستبرد ايجيم

ابن صحرة وغربتي بطول شوف النوك
وصكر ما دامني خلي السما تغيم

وخل يغتاض عن دربي النهر ماموت
انه من ماي وجهي يرَبع الموسم

وخل يحجون ، حافر مهرتي المسموع
وراهم غاير ورديت متقدم

الخ...

عقيل العرد

هو ياهو اليدري بيك
صعد سعرك ..
نزل سعرك
انت محد يشتريك

تبجي .. تضحك
توگع بدربك.. تكوم
تصيح افزعوا
ياهو يفزعلك ؟
وياهو اليعتنيك ؟

انت محبس ذهب ضايع من هلك

اهلك موصين سوك الذهب كله وما لكوك

وانت ما ضايع ..
هذاك انت ذهب فوك المنارة

مبين ومحد يجيك

انت ما ضايع ابد
انت هذاك

حتى الاعمى يشوفك ويبجي عليك

وما لكوك

انت ذنبك مشتريهم كلهم .. وكلهم نسوك


عقيل العرد

اتحداك ننزل بالوحل ونشوف
ياهو اليندمر .. ياهو اليضل صافي

انا الزيبگ الغالي الما يدمره الطين
يا ناگص المعدن معدنك طافي

شلتك على چتافي من الوحل للغيم
ما حسبت باچر تلثگ چتافي

لا تفگس عيونك بيدك يذلوك
وتنگاد من اديك اردود يالهافي

نمت بفراشك وجانت الدنيا سيوف
ولگيتك من گضت ويه العهر غافي

انا لو حار واچوي لو أضل بردان
حيل اكره اصحاب الموقف الدافي

الرجل موقف .. الموقف دين يرجع كون
وانا مغرگك مواقف .. ما كلت كافي

انصحك لا تزايد بالشرف وياي
كلش توجعك رفسة المتعافي

ولا تنغر المنصب ما يكبر انسان
ترى المنصب نعال وآنه مو حافي

عقيل العرد

عايش عكس ما ردت
والعمر ساعة رمل
والدنيا بس مرة

تعبان چان الگلب
عطشان يركض عمر ما خلصت الصحرا

ومن وصل ماي البحر
ذب روحه كل قوته
ما يدري جوا البحر
يا موت ينتظره

وبين العطش والغرگ
صار القهر سفرة

بالحايط ارسم زعل
وي گلبك وانصدم

ومن گلبي احطلك گلب
چا گلبك شكبره ؟

نصين صرت انثلم
لا واقعي ولا حلم
ومن كلشي صرت انهزم
بس روحي منتصرة

وبنص سواد العمر
فاتح ممر للضوه
بس الشمس سمرة

من تنهي ليل القهر
دگ اعله خدك گمر
لا تطلع اسود وجه
من تخلص العشرة

عقيل العرد

كل شبر بالگاع يتنفس أمل
وچم غصن زيتون بالاقصى انگتل

الفلسطيني الشريف يريد گاعه
الشريف الما تعب من الحرب ما لحظة مَل

الحياطين القديمة تعرف اهلها
والشوارع ساكته ونايم وردها

والزناجيل الخبيثة تدوس بوجوه الشوارع
تدوس بخدود الصغار

والحدايق ساعة تعطش
ساعة تشرب دم اهلها
وساعة خدها يصير نار

ليل غزة ماخذ من العرب رشوة
وبالسجن مات النهار
والفلسطيني انخذل

وبين جامعة الدول والذلة وانصاف المواقف
يصبح التطبيع حل

العرب ما عوزهم نقطة نظام
عوزهم نقطة خجل

عقيل العرد

ينشد الما يدري بيه
شبيها روحه تغيب وي المغربية

شبيها نظراته وضحكته تغيرت مو الاولية

شبيها عينه الوكت ماليها عتاب وخوف و احزان واذيه

ليش ياهو العاش عمري
وشاف چم جمرة شلتها بهاي اديه

ليش ياهو الذبح روحه
وانطه روحه
ويعرف الچتال والمچتول ما يسواش ديه

عمي بس عوفوني اعيش براحتي
وهنه البقن وياي مو مثل المضن
سنه سنتين واموت وهاي هي

تعبت كل اليحبوني وتعبت من الاحبهم
انه ما مقسوملي ارتاح واعيش

الدنيا لأهل الفرح وانه
انه خط روحه الحزن بچفوف اديه

خلصت اعذاري وطبگته الباب ذاك
و كمت اعوفه براحته اليزعل عليه

عقيل العرد

يا ضوى العرفان
وانفاس الصبح

شلون رهمت كوكب يشيله الرمح

عايشك بغروب روحي وصرت اخاف

وداعتك
كل ليلة اغمض وانذبح


احترگ من اكتب اسمك
ماي بعروگ الگصب والدنيا نار

واكتب اسمك
وانجوي بدمك واموت
باردة الوادم ونحرك بعده حار

كبريائك يكبر بعكس الظروف
شما يعيل العطش بيك
يزود بستانك خضار

تظلم الدنيا وضريحك
ينطي من گلبه نهار

يا ثلج ينزل على روس الجبال

يا لهب يصفع شبابيج القصور

يا حلو ومذبوح ..
دمك ؟ لو بخور ؟

ليلة الوحشة شكثر بيها ظلام
ومن رگبتك للسما شكد بيها نور

عقيل العرد