و يبقي الأثر🌸

كنا بنجري بسرعة قبل المحاضرة ما تبدأ الساعة ١٢ ونص عشان نلحق صلاة الظهر ف قابلنا ممرضة في التلاتينات كده مثلًا..

ف أول ما شافتنا بنصلي قالت ما شاء الله أنا فرحانة أوي عشان في بنات بتصلي،
ف قلتلها احنا كتير على فكرة الحمد لله ال بنصلي الصلاة في وقتها..

ف قالتلي لا أنا أقصد فرحانة إن في بنات بتصلي أصلًا😳!!!
وكملت بتقولي:
أصلي أنا كان معايا أصحابي وكنا كلنا مش بنصلي وفي ناس منهم اتوفوا وهما مش بيصلوا بس أنا بصلي الحمد لله..

مش عايزة أقلكم الفرحة ال على وشها واستشعارها بنعمة إن ربنا أكرمها وأمد في عمرها وقدرت تصلي وتنتظم في الصلاة كمان..
واحنا بنشتكي عشان الجو برد!!

الحمدلله برد وليس زلزال
الحمدلله برد وليس انعدام للأمن
الحمدلله برد وليس تشريد
الحمدلله برد وليس جوع وعطش
الحمدلله برد ولدينا بيوت دافئة،وننعم بصحة جيدة
ضجوا بــــ الحمدلله فَـالنعم علينا لا تعد وَ لا تحصى
الحمدلله حمدًا كثيرًا🩵🩵🩵😍

لسه مش مستوعبه إن فاضل كام يوم على 2025،
"السنة ال كنا بنقرأ في الكتب واحنا صغيرين إننا هنبقى بنركب عربيات بتطير لما تيجي"

كأن العالم طلع من 2019 دخل 2025 في سنة واحدة،
محدش حس خالص بالسنين الـ عدت دي،

الساعات بقت بتجري بشكل مُرعب،
و المرعب منه حديث رسول الله صلى الله عليه وسلم :
عن أنس بن مالك، رضى الله عنه، قال: قال رسول الله، صلى الله عليه وسلم:
(لا تقوم الساعة حتى يتقارب الزمان، فتكون السنة كالشهر، والشهر كالجمعة، وتكون الجمعة كاليوم، ويكون اليوم كالساعة، وتكون الساعة كالضرمة بالنار)،

محتاجين نفوق شوية، احنا بقينا بنعيش في علامات الساعة خلاص،
في واحد بيفوق لما بيصلي على حد أو يشوف حادثة،
وفي واحد بيفوق لما نصلي عليه هو..

اهدنا الصراط المستقيم يا الله، لأن الطرق اختلطت وتشابهت، والأحلام تشوهت، والعزائم فترت، والقلوب زاغت، والأبصار ضعفت، والرؤى غائمة، والحق والباطل امتزجا..

اهدنا الصراط المستقيم لأننا أصبحنا ننوي الخير ولا نفعله، ونفعل الشر دون أن ننويه...

اهدنا الصراط المستقيم لكي نقترب، ومع الصراط ارزقنا الهمة لأن الهمة ضيعها الأسى،

اهدنا، أعنّا، وثبّتنا.

الفترة الأخيرة بسمع كلام وحش جدااا "شتائم" من أطفال لسه مكملوش ال ٣ سنين والحقيقة مش بعيب عليهم على قد ما بعيب على الأهل ال سايبين أولادهم بالمنظر ده..

الأسبوعين ال فاتوا شفت حالتين في المستشفى طفل ٦ شهور وبنت ٣١ سنة والاتنين السبب الأساسي لحجزهم في المستشفى هم الأهل:

الطفل عنده "marasmus" حالة مرضية الطفل بيبقى جلد على عظم بمعني الكلمة بسبب سوء التغذية والاهتمام من جانب الأهل،

البنت عندها "bipolar disorder" مرض ثنائي القطب وده مرض نفسي بيغير في سلوك المريض بشكل سيء جدًاا وبرضو سبب إنه جالها هو الخناقات المستمرة بين والدها ووالدتها..

متكلموش أولادكم عن الصح والغلط كتير،
خلوهم يشوفوهم في تصرفاتكم
(كلكم راعٍ وكلكم مسؤول عن رعيته)

"الطفل ما هو إلا حصاد زرع سنين من سلوك الأم والأب"

عندي مشكلة بلاحظها كل ما نرجع للدراسة بعد بضع أيام الإجازة..

وهي إن في الإجازة ببقى بسمع بودكاستات دينية كتير ف بكتشف إن حاجات كتير بعملها كانت غلط ف بنوي بقا إنها تتغير!!

لكن للأسف مع أول يوم نزول للواقع الملموس كل التغيير ده بيتلاشى🫥

ومش ببقى عارفة هل لأننا بننخرط في الدنيا بزيادة ف بنتغافل عن أمور دينية كتير؟؟

ولا الطبيعي هو تقلب الأحوال ده؟؟

ولوهلة كده وأنا في الجامعة وفي وسط كل الدوشة ال حواليا فكرت ثانيتين "ثانيتين" بس في كل الحاجات ال قلت لازم أغيرها للأفضل،
ولأول مرة أفرمل نفسي في وسط البنزين ال دايسينه واحنا ماشيين✋🏻..

'ف غالبًا الحل في "ثانيتين" التفكير دول'

"مفيش واحدة لابسة نقاب أو خمار اتعاملت معاها وطلعت كويسة..عرفتوا ليه مش عايزة أختمر؟؟"

مش عايزة أقولكم كام مرة سمعت الجملة دي من ناس أعرفهم وناس غريبة وغيييره كتير..

الإيمان عمره ما كان بس في القلب..
ما أنا ممكن أقول لوالدتي كل يوم إني بحبها بحبها بحبها لكن ولا فعل بعمله يثبت لها كده!!

مفيش حد فينا PERFECT كلنا بنحاول ف لما نشوف واحدة مختمرة أو واحد ملتحي منقعدش نتصيد له في أخطاء عشان بس...
نثبت لنفسنا إن احنا صح ومش لازم الزي الشرعي أو اللحية أو غيره عشان نبقى صح.

النقاش زمان كان في النقاب فرض ولا سنة؟؟
خايفة نوصل ل هي صلاة العصر فرض ولا سنة!!

في مرة فتحت استوري وكان فيها أغنية ف أول ما فتحتها قفلتها على طول لكن الحقيقة الموبايل فضل معلق ومشغل الصوت رغم إني مش فاتحة الاستوري..

كنت متضايقة جدًاا وعمالة أخبط فيه وأقفله وأفتحه..

ولوهلة فكرت لو دي حياتي وبطبيعة إننا بشر ف احنا مش دائمًا بنكون ماشيين صح،،
طيب لو حصلي زي الموبايل كده وروحي اتقبضت وأنا على معصية أو حاجة مش كويسة ايه ال ممكن يحصل؟!

أصلي احنا بنتعامل مع الجنة كأنها امتحان دنيا ال هو "ذاكر يا عم وكده كده هننجح "
وكأننا ضامنين إننا داخلينها..

ويبدأ بقا الشيطان يدخلك من ناحية ما أنت بتصلي وتصوم وبتقرأ قرآن وبتعامل الناس كويس ف براحتك بقا متدققش أوي،
وتدرك متأخر للأسف الشديد إنك بتملأ حسنات في شوال مخروم..

"المشتتات زادت فمنتشغلش جامد بامتحان الدنيا ونغفل عن الامتحان الأهم"

هو البنت ال اتجوزها أكبر منه؟!!
طب هي حامل في ولد ولا بنت؟
طب هو جاب امتياز ولا جيد جدًا؟

وغيره من أسئلة كتير بنسألها في حياتنا مفيش لإجابتها أي فايدة أو ضرر لينا ف ليه نشغل بالنا في التفكير فيها؟؟

فرق شاسع بين سؤالك على الشخص عشان تتطمن عليه،
وبين سؤالك على أخباره عشان ترضي فضولك..

{وَلا تَمُدَّنَّ عَيْنَيْكَ} مش بس للحاجة ال غيرك بيمتلكها ده لحياة غيرك بوجه عام..
احترم خصوصية الناس!!

متخليش الوقت يسرقك وأنت بتتابع حياة غيرك وناسي تمامًا حياتك..

قال رسول الله صلى الله عليه وسلم:
(لا تَحاسَدُوا، ولا تَباغَضُوا، ولا تَجَسَّسُوا، ولا تَحَسَّسُوا، ولا تَناجَشُوا، وكُونُوا عِبادَ اللهِ إخْوانًا)

السلام عليكم ورحمة الله وبركاته♥♥♥
أنا شايفة حالة من الحزن واليأس والتقاعس من كل القريبين من عمري أو الشباب بمعني أصح، فى حالة عامة من اليأس وعدم الرغبة حتي فى السعي،

أنا عايزة أقولكم إن مش ده اللى أمرنا بيه ديننا، الرسول صلى الله عليه وسلم وضع قاعدة عظيمة فى السعي الدائم بغض النظر عن النتائج حتى لو مش هتشوفها أصلا قال رسول الله صلى الله عليه وسلم:"إِنْ قَامَتْ عَلَى أَحَدِكُمُ الْقِيَامَةُ، وَفِي يَدِهِ فَسِيلَةٌ فَلْيَغْرِسْهَا"

دايما كل ما كنت أقرأ الحديث اتعجب بجد هو ده مين اللى هيبقى شايف أهوال يوم القيامة ويغرس فسيلة هو مش هيشوف شجرتها أصلا، أدركت لحظتها إن الرسول صلى الله عليه وسلم يؤسس داخل كل مسلم مبدأ مهم جدا جدا وهو السعي الدائم والمستمر الغير متأثر بأي ظروف حوالينا،

لو استنينا اللحظة المثالية علشان نبدأ، عمرنا ما هنبدأ، علشان كدا أنت لازم تسعى بغض النظر عن أى ظروف حولك، وحتى لو أنت مشوفتش نتيجة فعلك خليك واثق دايما إن ربك كريم وإنك مش لازم تتم العمل علشان تاخد أجره، المهم تبدأ وتنوى الإتمام، حاول ولو وقعت ألف مرة اوعى تيأس أبدا،

الفشل الحقيقي إنك تبطل تحاول، مفيش حد بيحاول وبيجيب صفر، بلاش اليأس والحزن وتفاءلوا وظنوا بالله خيراً ♥

امتحانات العملي في الكلية عندنا بتبقى الدفعة متقسمة لجروبات عشان العدد كبير..

ف أنا في جروب b ال في النص ف دائمًا بنشوف تجربة الجروب ال قبلنا ونسألهم عملوا ايه والامتحان كان كويس ولا لأ وكل ده..

ف أول ما جروب a امتحنوا سألت واحدة صاحبتي اي أخبار الامتحان قالتلي "الحمد لله"
طيب الوقت كان كافي قالتلي "الحمد لله"
وبدون مبالغة مسألتهاش على حاجة إلا لما قالت: الحمد لله من غير دخول في أي تفاصيل ممكن تخوفني من الامتحان..

*علمًا بإن الامتحان مكانش أفضل حاجة والوقت مكانش كويس خااالص😔

بس كل ال لفت نظري في الموضوع هو جمال ردود البنت دي وحرصها الدائم إنها تصدر لي الجزء الحلو عشان متعقدش من الامتحان وأخاف منه قبل ما نبدأ ولأن جملة (الامتحان كان صعب أو الوقت مش كويس لا هتقدم ولا هتأخر)..

وحقيقي احنا ناقصنا ناس كتير زيها تحمد ربنا دائمًاا🩵😍
لأن جو الصياح المستمر في وقت الامتحانات على كل حاجة سواء الامتحان سهل أو صعب ده من أسوأ الحاجات ال متتشرة حاليًاا..

'سكوا باب الأحزان بمسامير الرضا'

من ساعة ما بدأت المدرسة وملاحظة أختي الصغيرة العزيزة تعاني قليلًا🤏
بسبب موضوع التقييمات لأنها حاسة طول الوقت إنهم تحت رحمة المدرس..

وبصراحة أنا عارفة برضو شعورها لأن بالمثل..
احنا في الجامعة بنعاني كثييرًا🙉
بسبب الشفوي ال هنمتحنه وال برضو تحت رحمة الدكتور هل عجبته الإجابة دي ولا لأ؟ حتى وإن كانت صح

ف بعد تفكييير عميييق..
اكتشفت إن الغلط طلع من عندنا
احنا ليه بنعمل الحاجة عشان نرضي ال قدامنا،
ليه مش بنعمل الحاجة لله "فقط لله"

يعني أنا هذاكر عشان أرضي ربنا
وهعمل الحاجة ال ترضي ربنا
وهجاوب الإجابة ال ترضي ربنا

فوالله
رضا الناس غاية لا تُدرك، ورضا الله غاية لا تُترك
فاترك ما لا يدرك لأجل ما لا يترك فالله يملك كل ما لا يدرك🥹

ربنا يرزقنا الإخلاص في القول والعمل ويجعل عملنا خالصًا لوجهه سبحانه وتعالى🩵🤲

طيب واحنا؟؟
هم بيستشهدوا وكلنا عارفين مصيرهم الفردوس الأعلى بإذن الله

احنا بنعمل ايه في حياتنا يخلينا نموت واحنا متطمنين إننا داخلين الجنة إن شاء الله..

ده أغلبنا إن لم يكن كلنا لما بنسمع حد بيقول حاسس إني هموت، بنقوله بعيد "الشر" عليك..

ف الواضح إننا بنخاف من مجرد ذكر الموت،
لكن الحقيقة مش عارفة الخوف ده بيدفعنا لايه بالظبط؟
ده ذنوب كتيرة بنعملها و نكون حاسين بالذنب واحنا بنعمل الذنب نفسه ومكمليبين...

المهم إننا منوقفش توبة أبدًاا لعل وعسى تقبض روحنا على عمل صالح وتكون خاتمتنا خيرًا بإذن الله.

"لو كانت هزيمة الجيش متوقفة علي حياة قائدهم..لهلكت الأمة بعد وفاة النبي صلى الله عليه وعلي آله وصحبه وسلم"

لاحظ أن القرآن لم ينه عن تسمية الشهيد؛ ميِّتًا فقط "ولا تقولوا لِمن يُقتَل في سبيل الله أمواتٌ".. بل حتى نهى عن اعتقاده ميِّتًا "ولا تَحسَبنَّ الذين قُتلوا في سبيل الله أمواتًا بل أحياء"، وتأكيدًا لذلك أخبر أنهم يُرزقون ويستبشرون ويفرحون ولا يَحْزَنون!

ومنه كان الأمر بألا يُغَسَّل كما تُغَسَّل الأموات، ولا يُنزع عنه ثيابه بل يُدفن بها.. وكان الإخبار بأن الشهادة كالنصر في المنزلة في قوله تعالى "قُل هل ترَبَّصون بنا إلا أحدى الحُسنَيَين"، لأن الشهادة ارتقاء، والارتقاء نصرٌ لا هزيمة..

المؤمن الذي يُقاتل باسم الله لا يُهزم أبدًا وإن مات!

الأنفال، الأحزاب، آل عمران، مُحمد، والبروج...
مفيش حاجة هتعملها دلوقتي غير إنك تفتح مصحفك، وتقرأ السور دي وتعرف الحقائق !
حقيقة إزاي تبقى عندك قوة نفسية تقدر تواجه بها الأحداث، وحقيقة إزاي توظّف طاقتك كمسلم بشكل إيجابي واقعي مش مجرد مشاعر وخلاص.

"القرآن اتوجد عشان تفتحه وفي الأوقات دي بالذات"

بخصوص حادث جامعة الجلالة فيه حديث للطبراني بيقول : "من جاءه أجله وهو يطلب العلم لقي الله ولم يكن بينه وبين النبيين إلا درجة النبوة"

جدد نيتك كل يوم وانت نازل الجامعة بأنك تتعلم العلم دا في سبيل الله .. في سبيل رفع الألم عن مريض مبينامش من الألم .. في سبيل رفع الألم عن مريض غير مقتدر

محدش فينا عارف مصيره امتى وفين وازاي !!
فخلي كل عاداتك طاعات لعلك تقبض عليها فتفوز ان شاء الله

في حباية غلسة أووي طالعة على مناخيري وطول السكشن امبارح ألمسها بإيدي،
وكل ما أحط إيدي عليها
صديقتي العزيزة تقولي:
شيلي إيدك

وأكررها وتقولي شييييلي إييدك

لغاية آخر مرة قالتلي:
شيييييييلي إيدك ده ال danger zone😡

تعرفوا ايه بقا عن مثلث الخطر⚠️:
في وشنا في منطقة خطييرة ال هي منطقة المناخير والشنب يعني أي حبة بتطلع فيها لو حصل فيها عدوى بتروح للمخ مباشرة🧠

ف خلي بالكم وقولوا لأولادكم أي حباية تطلع في المنطقة دي محدش يلمسها ولا يحاول يفرقعها

ربنا يحفظ أحبابنا جميعًا ويشفي كل مرضانا🩵🤲

السلام عليكم الجروب ده إن شاء الله هيكون خاص بالجامعة العامة والأهلية هينزل عليه شرح لجميع محتوي المديول الأول تقدروا تنضموا من اللينك ده
https://t.me/gpatkacad
هتلاقوا شرح محاضرة البايو الأولي
Amino acids
😃

السبت ٧ أكتوبر ابتسمنا في صباحه وبكينا في المساء..مرَّ ٣٦٥ يوم ولم يأت صباح الأحد.!

الغريب إن نفس الجمهور ال شوفته من كام يوم بيشجع فريقه هو هو ال كان بينتقد أي لاعب مش بيدعم المقاطعة..
وده نفس الجمهور ال فرح الأسبوع ال فات لفوز الزمالك في حين أصبح على الصامت بعد الضربات القوية التي أصابت الاحتلال..

فالظاهر إن أكبر مشاكلنا هي ازدواجية المعايير الغريبة دي وأولويات حياتنا ال محتاج يتعاد ترتيبها🔀..

ولو صارحت حد بحاجة زي كده..
يقولك وأنا في إيدي ايه أعمله؟؟!
هو احنا فاكرين نفسنا فعلًا بنعمل كل ال علينا❗
والله بنضحك على نفسنا مش أكتر.

وواحد يقولك أنتم جايين في الكورة
"الحاجة الوحيدة ال بنرفه بيها عن نفسنا وبتعكننوا علينا"
ف لما تبقى بتكلم واحد كل مصدر رفاهيته وسعادته في الحياة "إن فريقه يفوز"

يبقى لنا الله..لنا الله.

ياريت لو تبعتوها لأي حد تعرفوه في أولى طب أسيوط..
ربنا ينفعهم وينفع بينا جميعًا

GPA.tk academy
أهلاً بكم جميعاً وألف مبروك لكل دكاترة الدفعة الجديدة في طب أسيوط 😶‍🌫

- احنا مجموعة من زمايلكم الأكبر منكم من أول دفعة انتجريتد حبينا نعمل حاجة جديدة تكون موجهة ليكم نساعدكم بيها ونقدم بيها الحلول اللي اكتشفناها خلال رحلتنا في الكلية ونقدر نحل الفجوة الكبيرة اللي كانت ومازالت مشكلة بين مصادر المذاكرة الخارجية ومحاضرات الكلية ونساعدكم تجمعوا أكبر قدر ممكن من الدرجات اللي تخليكم مرتاحين بعد التخرج في اختيار تخصص مناسب بعيداً عن الأسئلة علي جروبات الإمتياز عن فرصة تخصص نسا لحد طالع ب ٧٣ 🫠
- وعشان احنا كمان عدينا بنفس التجربة وكنا أول دفعة تجرب الطريق ده فأحنا قررنا نعمل طريقة منهجية بسيطة نضمن بيها فهم وإتقان المادة العلمية اللي محتاجها كدكتور وبتحاول تحصل عليها من سماع مصادر الأونلاين وكمان درجات الكلية اللي محتاجها من داتا المحاضرات وده هيكون مغلف بخبرات أوائل دفعة النظام الجديد
- هنحاول دايما نركز علي الفهم وتجميع الدرجات وهنتكلم بالتفصيل عن كل محتوي داتا الكلية وكمان هنراجع ونحل كل الأسئلة المهمة واللي بتتكرر في الإمتحانات وكده نبقي قدرنا ناخد كل المميزات اللي محتاجينها للفهم وكمان للدرجات
- كمان هنتكلم عن طرق المذاكرة وازاي تقدر تعمل ده بنفسك واي هي الحاجات اللي محتاج تركز عليها سواء في الكلية أو حياتك كطبيب وهنتكلم عن مابعد التخرج والسكك المتاحة وطريق كل اختيار وازاي تقدر تحدد هدفك وتبدأ فيه بدري
- كمان هنعرف مع بعض أهمية ال GPA وازاي بيتجمع واي تاثيره علي حياتك العملية وكمان هنتكلم في موضوعات أكتر تفيدكم كلكم 🥰
- في الأيام القليلة اللي جاية هنبدأ نكون معاكم بمجموعة من المحاضرات الأونلاين اللي هتساعدكم كتير فيه فهم الكلية والمرحلة الجديدة اللي داخلين عليها كمان هنتكلم عن المواد وطرق مذاكرتها ونعرفكم بشكل أكبر أسهل وأضمن الطرق لفهم كل مادة وتحصيل أكبر قدر من الدرجات كمان هيكون معانا محاضرات مراجعة وشرح لمواضيع المنهج بإستمرار
- وده من خلال دكاترة كانوا دايما بيحاولوا يساعدوا زمايلكم الأكبر منكم علي مدار السنين اللي فاتت ودلوقتي جه دوركم تشاركونا في رحلتنا يا أبطال
- متنسوش تنورونا علي الجروب الخاص بالدفعة الجديدة عشان تقدروا تستفيدوا من المحاضرات الأونلاين وكمان عشان تقدروا تحضروا معانا الأيام اللي بنقدمها كمراجعة أو كحل أسئلة أو حتي الإيفنتس بتاعتنا واللي بتكون أيام لطيفة هتنبسطوا فيها جدا وكمان هتستفادو وهيكون فيها مفاجآت لطيفة 🫣❤️
- المحاضرات الأونلاين هتكون مجانية بالكامل متقلقوش كمان الإيفنتس كلها بتكون مجانية😂❤️.
- ده لينك جروب دفعة أولي طب أسيوط الجديدة :
- https://chat.whatsapp.com/KKSAAJ2yEex7sXIDI8Ly5L
* ده لينك البيدج علي الفيس بوك:
https://www.facebook.com/profile.php?id=61557918631235&mibextid=ZbWKwL
* وده لينك تشانل التليجرام :
* https://t.me/gpatkacademy

‏لو دافعوا عن دينِهم كما يدافعون عن فريقِهم لَحَكم الإسلامُ العالم.

د/ أحمد سبيع

بحس بقمة تأنيب الضمير لما أهلي يكونوا بيعملوا حاجة وأنا مش بساعد بحجة إني بذاكر وأكون أصلًا مش بذاكر!!
بحس كده كأن خُنت ثقتهم فيا..بجد والله مش مبالغة😅

يمكن ده موقف مصغر لمواقف كتيير جدًاا أهلنا بيبقى عندهم الثقة الكاملة فينا وفي تصرفاتنا وقد نكون قدها أو لا،
ومن حقهم علينا إن نحافظ على الثقة دي..

حقيقي صدمة الأهل بابنهم في موقف معين أسوأ بكتييير من شعورك بالذنب حاليًا وأنت بتعمل حاجة من وراهم وعارف إنها غلط..

سواء بتشرب سجاير
بتشتم
بتكلمي أولاد
بتقلعي الطرحة لما تخرجي

(خدها قاعدة بقا)
أي حاجة بتعملها وخايف أهلك يعرفوها اعرف إنها غلط،
وإن كان الخوف من ربنا أولى عشان متعملهاش.

وبمناسبة بدء الدراسة صدقوني..
عمر ما مساعدتك لأهلك هتضيع وقتك زي ما متخيل،
بالعكس هتشعر ببركة كبييرة في الوقت البسيط المتاح ليك..
بارك الله لنا في الوقت والمجهود🩵🩵🥹

بالصدفة فتحت جوجل أشوف مواعيد الصلاة لقيتها مبقيتش موجودة ،
قلت ممكن يكونوا بيعدلوا حاجة أو كده يوم ٢ ٣ لسه برضو مش موجودة..

وبالصدفة بسمع خطبة الجمعة لقيتها معدتش ال ١٠ دقايق..

وبالصدفة انتشر أشخاص كده غريبين الأطوار على إنهم رجال دين والناس قربوا يعبدوهم..

زمان كان الاحتلال باحتلال البلاد
دلوقتي بقا أصبح بطرق أبسط بكتير..
وأنت قاعد مكانك "باحتلال الفِكر"

عايزين نتمسك بديننا،،منبقاش أداة بيستخدموها عشان يوصلوا لغرضهم..

لسه فاكرين إن كل ده بيحصل بالصدفة؟!!

يحتفلون بمولدهِ وَيكرهون سُنّته وَلحيتهُ وقميصه ونقاب زوجاته..

إن مُحمدًا ﷺ يُطالبكُم بإقامة الدِين
لا بإقامة المُولد..!!

هو الاحتفال بالمولد النبوي جائز ولا لأ🤔؟؟
قبل ما تسأل الاحتفال جائز أم غير جائز
اسأل ماذا يحب رسول الله🥹؟؟
هل كان يحب...
الكذب، تأخير الصلاة
قراءة القرآن من رمضان لرمضان
عقوق الوالدين، عدم صلة الرحم

معذرة!!
ليس لدي إجابة فالسؤال من البداية مخطوء..
فالاحتفال يكون يومي بتطبيق ما يحب رسول الله🩵

يوووه لسه برضو ملقيناش إجابة😠..
سأل أحد الملحدين الشيخ أحمد ديدات:
ما هو شعورك إذا مِت، ووجدت أن الآخرة كذب؟
فأجاب الشيخ : ليس أسوء من شعورك إذا مت ووجدت أن الآخرة حقيقة..

نقدر نعمل إسقاط لنفس الفكرة في الاحتفال بالمولد النبوي أو أي بدعة شاكين فيها..
فحتى لو البعض أجازها فتركها أحوط
صلوا على سيدنا محمد🩵🩵

كله جري جري مفيش مشي خالص🏃‍♀️🏃‍♀️..
كل يوم بجري عشان ألحق السكاشن
وألاقي أب بيجري عشان شغله
وأم بتجري عشان ترجع بيتها تعمل الغدا

والسؤال ال بيراودني أحيانًا كتيير..
هو احنا بنجري من ايه وورا ايه؟؟

مش بترعب قد لما بقرأ الآية دي..
“قُلْ هَلْ نُنَبِّئُكُم بِالْأَخْسَرِينَ أَعْمَالًا۝ الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا۝“

ف ييجي في بالي بقا يعني كل الجري ده ممكن يبقى ورا اللا شيء،
ف لقيت الحل الأمثل عشان كل سعينا الدنيوي ده يبقى في ميزان حسناتنا هو "النية"

اه والله،النية قادرة تغير العمل الصالح لطالح والعكس صحيح..

يعني لو نيتي كل يوم قبل ما أروح الكلية..
إني بسعى عشان أقدر أرفع من شأن المسلمين،أرضي والدي ووالدتي وأسعدهم بالنتيجة،أخفف ألم ولو عن مريض واحد،أقابل أصحابي وأجبر بخاطرهم ولو بكلمة

هيبقى وأخييرًا السعي ده مش ورا اللا شيء..

الأسبوع الفات حصل معانا كم مواقف غريبة جدًاا..
نضارة والدي وقعت واتكسرت
نضارتي أخويا الرشييق قعد عليها وكسرها
أختي وقعت وموبايلها اتكسر
وحاجات تاني بس خاصة شوية ف كفاية كده😅

ولما بنقول لأي حد ال حصل ده أول حاجة بيقولها..حسد👀

‏ونحن نتخبط في الذنوب والمعاصي ولم يخطر ببال أحدنا أن سبب المصائب النازلة هي الذنوب!!

قال تعالى :

‏- "فأخذهم الله بذنوبهم"
‏- "فأهلكنـٰهم بذنوبهم"
‏- "أصبناهم بذنوبهم"

'ف قبل ما نجيب كل حاجة على الحسد تعالوا نحاول نراجع أفعالنا شوية'

يوم امتحان الباطنة كانت المواصلات صعبة جدًاا لدرجة طول ما أنا واقفة بفكر في حلول لو وصلت متأخر،
وفي وسط الدوشة ال جوه دماغي "دعيت" ربنا إن نلاقي مواصلات
ووالله مكملناش دقيقة والعربية وقفت جمبنا بالظبط

في بداية الترم لقيت اسمي في سكشن تاني غير السكشن ال متعودة عليه(لأنه كان في آخر القائمة😢)،
وحاولت بكل الطرق عشان ألاقي تحويل وملقيتش
ف ربنا ألهمني إني "أدعي" وفي آخر يوم مسموح بيه بالتحويل لقيت تحويل من حيث لا أدري🥹

عايزة أقولكم إني كنت من الناس ال نادرًا ما بدعي أو بدعي لما يكون موضوع كبير أووي بحجة إن ربنا عارف ال جوايا،
لغايت من فترة وعرفت إن الصحابة كانوا بيدعوا في أبسط الحاجات
بقيت بدعي في أي موقف أقف قصاده مهما يبان بسيط🤗

وافتكر دايما..
(أَمَّن يُجِيبُ الْمُضْطَرَّ إِذَا دَعَاهُ)
"المضطر" دي مهمة جدًاا..يعني مش بعد ما كل الحلول تتقفل في وشك تفتكر تدعي
لا لا لا
أول حاجة تفتكر تعملها إنك تدعي🥹