وفاء الشقيري.

قالت:

أنا أنكب على وشي ماية نار وحبيبي أتجوز بنت عمي بدالي، وعرفت أن السبب في ده كله مرات عمي.

#كانسر | ٢٠٢٥.
#جُمل_بلسان_أصحابها.
#وفاء_الشقيري.

"ولما سألوه سيبتها ليه؟
قال علشان مش هينفع يتجوز وحدة عامية،
والبنات غيرها كتير".

#كانسر | ٢٠٢٥.
#وفاء_الشقيري.

كنت بسمع صوته وهو بيخوني وبيقول عني أني غضبانة بيت أهلي بسبب أنه أكتشفني بخونه، علشان يكسب تعاطف الستات معاه".

أنا أتظلمت، أبويا وعمي ظلموني وحددوا مصيري من أول ليلة نزلت فيها الدنيا، أسمي إيمان وعندي أختين بنات، أنا أكبرهم، أول ما أتولدت راح عمي قال إيمان لمحمود ومحمود لإيمان، محمود ده أبن عمي وأكبر مني بـ 8 سنين، وقروا فاتحتنا ساعتها قبل ما أكمل أسبوع كانوا أختارولي جوزي وشريك حياتي، حاجة منتهى العبث.

كبرت والموضوع كبر معانا، وأنتشر في قريتنا وكل الناس عرفت أني مخطوبة لمحمود، هو الشهادة لله شكله جميل جدًا وعيونه حلوة وراجل وجدع ويعجب أي حد.. واللي حصل أني حبيته بناء على كلامهم، وفضلت بحبه لحد ما كبرت وبدأت أفهم، حبيته من أنا وفي الطفولة.

وقتها دي كانت أمه تقوله خد إيمان وصلها المدرسة
وأمي تخليني أتعلم الأكل وأدخل بيه عنده الأوضة بحكم أننا بيت واحد لأننا بيت عيلة، كانت علاقتنا حلوة إلى حد ما، لكن هو كان صعب معايا، أنا أكتشفت ده متأخر لأني كنت فاكرة أن الطبيعي بتاع أي إنسان أنه صعب وقاسي.

وحدة وحدة وخلصت ثانوية ودخلت الكلية وهو لبسني دبلة علشان محدش يتقدملي وبعدها فرحنا أتحدد، كنت في أمتحانات الترم الأولى من سنة تانية، كان وقتها دي أشتغل في القاهرة وأحنا من الصعيد فأخد معايا أسبوع بالظبط وسافر.

من أول يوم جواز وأنا وهو متخاصمين.. مش بيكلمني إلا لما يكون عاوز حاجة، جاف جدًا لا حضن ولا كلمة حلوة ولا نظرة حلوة ولا يقولي هدومك دي جميلة مثلًا، ولا أي حاجة، حياتي معاه في البيت عبارة أنه عاوز ياكل أو يكوي هدوم، حتى العلاقة كل فترة وفترة، ما بيضحكش معايا إلا وقت ما يكون عاوز شيء جسدي، وبما أننا بناخد 15 يوم وأكتر من غير لمس فأنا مش بشوف ضحكته إلا كل 15 يوم.

سافر القاهرة ونسيني خالص، خلفت بنتي الأولى، وقولت يمكن لما يبقى أب يتغير وهو بردو زي مهو، بالعكس زاد جدًا جدًا في القسوة، حتى بنته مش بيبص عليها، أتكلمت معاه كتير، حاولت أشرحله نتيجة عدم أحتوائه ليا ممكن تكون عاملة أزاي؟ وبردو هو مكعب تلج زي مهو.

واللي زاد بقا أنه بيخوني، كان لما بيجي البلد أجازة من الشغل يدخل الأوضة ويقفل على نفسه، بقيت أتجسس عليه رغم عدم إيماني بده، لكن مرة سمعته بيقول أني بخونه وأني عارفة رجالة غيره وده سبب أنه بيكلم ستات كتير غيري.

تعبت حقيقي، مش عارفة أعمل أيه؟
نفسي أحس أني ست، مش مجرد وحدة في البيت للأكل والعيال والعلاقة، نفسي يحن عليا، نفسي في حضن، وللآسف مقدرش أتطلق أبويا وعمي وكل الناس رافضين الطلاق لأني حكيت لهم قبل كده قالولي عادي ده طبع، بس مافيش إنسان طبعه القسوة دي.

#جُمل_بلسان_أصحابها
#وفاء_الشقيري

محدش بيهزر في الطلاق أنما جوزي بيهزر ونص.
بقالي سنين بقنعه أننا ننفصل لكن هو متمسك بيا زيادة عن اللزوم وبيقولي أني رزقه الحلو في الدنيا وأنه مش هيعرف يعيش من غيري، علاقتنا روحية أكتر من كونها عاطفية أو جسدية.

والسبب أني عاوزة أنفصل عنه هو أننا مبنخلفش..
اللي حصل بقى هو أنه أمه دعت عليه أنه لو هيتجوزني ميشوفش الخلفة ابدًا، لأنها كانت رفضاني وعاوزة تجوزه وحدة من قرايبها.

أتمسك بيا ومفكرش في أي حاجة وبعد مشاكل وخناقات كتيرة مع أهله وصلنا للبيت اللي أحنا فيه ده، أستحمل أهانة وشتيمة وأذى نفسي كتير من أمه بسببي.

منعت أنها تحضرله الأكل
منعت تغسله هدومه مع أخواته
منعت تتكلم معاه
منعت تناديه بأسمه
منعت منه كل حاجة من حقه وأخر ما زهجت من إصراره عليا وافقت.

وافقت وحرفيًا عملت معايا مشاكل كتير جدًا بعد الجواز وفي كل وقت وحين وكل ما تشوفني أو تشوفه تدعي علينا وتدعي بدعم الخلفة، كانت طول الوقت تقوله يارب تبقى عقيم يا ولدي علشان أنا مراتك دي مش عاوزاها، لكن اللي حصل أنه مش عقيم ولا عنده ضعف، أنا اللي مستحيل أخلف منه هو تحديدًا ولو حصل أنفصال وأتجوز حد تاني هيخلف بكل سهولة وأنا كذلك.

لكن هو متمسك بيا، بيصالحني طول الوقت علشان عارف أني زعلانة بسبب الموضوع ده، حنين معايا، بيجيبلي قطط علشان بحبها، دايمًا يقولي أنتِ بنتي الأولى، بيسمعني ويحتويني، بيعمل معايا كل الحاجات اللي بتخليني ادعيله من قلبي أنه ربنا يراضيه زي ما بيراضيني، لكن موضوع الخلفة بيأذيني وبيجرح فيا خصوصًا أنها بتعايرنا بكده.

كل يوم بطلب منه الطلاق وهو رافض، متمسك بيا زيادة عن الأول، وأنا قلبي كل يوم يوجعني عليه أكتر لأنه جميل يستاهل أنه يكون أب.

والحقيقة أن كل اللي مصبرني على الغلب ده هو والعيشة الهنية اللي معيشهالي، واتأكدت فعلًا أن الراجل أما بيحب لا بيفرقله عيال ولا غيره هو كل الحكاية بيكون عاوز الست اللي بيحبها معاه وبس..

العيب فيكم يا في حبايبكم لأن الحب مخليه ماسك فيا رغم وجود حاجة تربطنا، ما بيربطناش إلا قلب وضمة أخر الليل وشوية مواقف حلوة.

#وفاء_الشقيري

-أتجاهات الدُنيا كتير أوي، لكن ولا أتجاه هيسيعني بالخراب اللي جوايا.

#رواية_سيسيليا | ٢٠٢٣.
#وفاء_الشقيري.

مبقاش ليا منه إلا حبة صور
صور مموتاني،
وقلبي طول الوقت بيسألني:
"معقول هي دي نهاية الرحلة اللي مشيناها سوا".

#رسائل_من_كل_قلبي
#وفاء_الشقيري

قالت:

أنا كنت بسمع صوته وهو بيخوني وبيقول عني أني غضبانة بيت أهلي بسبب أنه أكتشفني بخونه علشان يكسب تعاطف الستات معاه.

#جُمل_بلسان_أصحابها
#وفاء_الشقيري

وحدة صحبتي علاقتها باظت بصحبتها القريبة جدًا و النهاردة بعد غياب أتكلموا فـ سألتها أنتِ كويسة؟
بتقولي قولتلها أيوا كويسة، لكن حاسة أني عاوزة أعيط لها زي زمان وأشكيلها، عاوزة أعيط لها خصوصًا منها.

السؤال هِنا بقا "ليه بنوصل بأعز علاقات في حياتنا لمراحل قاسية زي دي"؟

#وفاء_الشقيري

-
أنا طول الوقت قوية، لكن المرة دي لا، الخصم مش غالي وبس، الخصم قلبي.

#رسائل_من_كل_قلبي
#وفاء_الشقيري

"هما مش فاهمين أني بكلمه علشان أعيش، هو الحاجة الوحيدة الكويسة في حياتي، غيابه تقيل على قلبي جدًا".

#كانسر | ٢٠٢٥.
#وفاء_الشقيري

كنت بحس أنه في حد بيخنقني لكن الحد ده مش موجود..))

#رواية_راندوم | ٢٠٢٤
#وفاء_الشقيري

لذة الوصول في كتف آمن تسند راسك عليه دون قلق، إيمانًا منك أنه المكان الحقيقي والوحيد في العالم.

وهِنا يكمن معنى الدنيا الحنين، معنى الدنيا اللي بجد🌿.

#وفاء_الشقيري

-
وخلصت حدوتنا الجميلة بخبطة على قلبي عُمري ما كنت أتوقعها.

#كانسر | ٢٠٢٥.
#وفاء_الشقيري

"الثقة جوايا أتهزت والسبب أمي".

أنا حاليًا سني يقارب الـ٣٠ سنة، أنا مش صغيرة وحقيقي متأثرة جدًا جدًا باللي حصل، أنا وأخواتي أكتشفنا أن أمي بتخون أبويا مرتين.. مرة مع زميلها في الشغل ومرة تاني مع صديق العيلة.

حكايتي بالتفصيل بدأت لما ماما أتغصبت من تيتا أنها تتجوز بابا، هي في البداية كانت رافضة علشان فرق السن اللي بينهم، هو أكبر منها بـ١٨ سنة، لكن مع الوقت بدأت تحبه، بابا حس أنها مش مرتاحة لفرق السن وقالها نفسخ لكن هي رفضت وكملت معاه وقبلت بيه، وأتجوزوا وكانت العلاقة بينهم حلوة خالص كلها حب ودلع.

أبويا سخي أوي وكريم جدًا وظروفه كانت حلوة وكنا عايشين كويس لحد ما جت كورونا والظروف بدأت تتعثر معاه وماما بدأت تشتغل وتساعد في البيت.

ماما أترتب في بيت منغلق جدًا وبابا كمان كان قافل علينا خصوصّا أننا ٤ بنات، فهي لما خرجت وأشتغلت حست بالحرية وأبدت أفكارها تتغير وأمتلكتها رغبة التحكم في كل اللي حواليها فـ كانت حابة أن بابا يكون وجوده صورة فقط وفعلًا لغت شخصيته بالتدريج وأصبحت الكلمة ليها.

وفي مرة كنت بقلب في موبايلها صدفة وأكتشفت علاقة بينها وبين صديق العيلة اللي هو مصاحبني أنا وبابا وأخواتي كمان، لقيت حب وغرام وساعتها واجهتها أنا وأخواتي وكانت خايفة جدًا أن بابا يعرف وكانت شايفة أن الخيانة دي من حقها ولأنها حاسة بأهمال من أتجاه بابا وأننا مش من حقنا نزعل.

المرة التانية أختي كانت بتقلب في موبايلها بردو صدفة والكلام ده بعد سنتين تلاتة من خيانتها الأولى، ولقيت ماما بتشتكي لزميلتها من واحد معاها في الشغل أنه معدش بيهتم بيها زي الأول، وأما دورت في فونها أكتر، لقيت حب وغرام بينها وبين الراجل ده هو أصغر منها بحوالي ١٥ سنة أو أكتر.

والمشكلة أنها فاتحتنا في موضوع زواجها منه وكانت عاوزة تنفصل عن أبويا وطول الوقت مشاكل لكن أهل الراجل ده رفضوها ورفضوا الجوازة وحاليًا علاقتهم زمالة فقط.

وأما أتكلمنا معاها أنا وأخواتي في إن ده ما يصحش كان ردها أن كل وحدة فينا بتحب بحكم أني كنت بحب جوزي قبل ما أتجوز وأن أختي ليها زمايل في الشغل وأن بابا مابقيش زي الأول لا في فلوس ولا أهتمام ولا حتى علاقة حميمة.

وزميلها ده كان طالب منها أنهم يعملوا علاقة أنما هي رفضت.
وكانت تروح تحكي لأختي اللي في أعدادي عن الكلام وكنت أقولها عيب دي طفلة بلاش نفتح عينها على كلام أكبر، كانت تقول أنتو صحابي، هي مصحبانا جدًا لكن بتحكي في كلام للآسف ما يصحش.

وبالمناسبة زميلها ده كان معانا في كل حاجة وأحنا بنشتري جهازي كان بيروح معانا ويختار معانا حتى يوم ما كنا بنودي حاجتي الشقة كان معانا وكانت عينه طول الوقت على ماما وفي وجود بابا كمان، أنا عارفة أنها بتفرح بالمكانة اللي هو عاملهالها على عكس بابا بيتعامل معاها عادي.

هي فعلًا أقتنعت بأنها ما ينفعش تتجوز حد أنما مقتنعة أن ده حقها ودي مشاعرها ومن حقها تخون عادي علشان تحس بأنها لسه ست.. ومشكلتي بجد أنها عمرها ما شافت أنها غلطانة والثقة جوة مني أنا وأخواتي أتهزت، لأن المفروض الشخص الآمن في حياتنا هو أكتر شخص سبب لنا أذى، حقيقي قلبي بيوجعني أما أشوف أم متقية الله في بيتها وولادها وبتسعى جاهدة أنها توفر لهم كل حاجة على عكس أمي تمامًا.

#جُمل_بلسان_أصحابها
#وفاء_الشقيري

--أنا بحبك،
قد ما العالم وجعني قبلك.♥️

#رواية_سيسيليا | ٢٠٢٣.
#وفاء_الشقيري.

بوست بخصوص كانسر لأني كتير بتسأل عنه.!

أسم العمل مالوش علاقة بمرض السرطان، الفكرة كلها أني بشوف أشباه البشر (الناس المؤذيين) هما سرطان الواقع وسرطان صعب جدًا كمان، لأن الإنسان مش بيتعافى بسهولة من الصدمات النفسية.

الكتاب عبارة عن قصص، أنا بقالي سنين بسمع قصص فقررت أجمعهم في كتاب واحد وهنعتبره مرجع للأمراض النفسية اللي محاوطانا.

من يومين دخل أحد المتابعين بيسأل عن نوع القصص وأني في أغلب مقالاتي أو قصصي بكون متحاملة على الرجالة، لكن ده مجموعة قصصية مالهاش علاقة لا برجالة ولا ستات، المؤذيين في قصصي من كل صنف ونوع.

ليه أخترت باب عن قصص الحب الفاشلة وسميته منتصف قلوب النساء ببساطة لأن اللي حكولي ستات مش رجالة ولو كنت كونت مجموعة قصص تنفع لكتابة باب بأسم منتصف قلوب الرجال كنت عملت كده، أنا في العموم مع الطرف المظلوم.

الكتاب عبارة عن الواقع، قصص من قلوب البيوت ومن الشوارع ومن كل شكل ولون، الكتاب واقعي بحت ده أنا حتى متركتش لخيالي مساحته لأن الواقع معقد جدًا ومؤذي جدًا.

الكتاب هيكون موجود في معرض الكتاب صالة 1 جناح B13، جناح دار مختلف للنشر والتوزيع.

سعر الكتاب مش أختصاصي ده غير أني الدار أصلًا عاملة خصم على الأعمال كلها فـ ممكن تسألوا السؤال ده للدار.

الكتاب بسيط مش معقد خالص..
هو هيجيبلك عقدة نفسية فقط😅

وأخيرًا تقدروا تطلبوه من واتساب الدار على الرقم ده
01008325074
وهيوصلكم لحد البيت..

#وفاء_الشقيري

صديقة ليا كل ما تشوفني تسألني:
هو أنا ماكنتش كفاية يا وفاء؟ هو أنا ما أستحقش طيب؟

والحقيقو أن ده أسوء شعور ممكن يصيب الإنسان أنه يحس أنه مش كفاية وما يستحقش أبسط حقوقه.

#وفاء_الشقيري

-ولا عارفة ممكن أحضنك حضن تاني زي ده أمتى؟

#رواية_راندوم | ٢٠٢٤.
#وفاء_الشقيري.

"لذة الدنيا في النجاح ووجود راجل حلو،
وست بتفهم وتقدر".

الزواج بيغربل، بيوضح الطباع والأمراض النفسية.
بيحتوي على ٩٠٪ من الحقيقة اللي ممكن إنسان يزيفها طول فترة الخطوبة وبيعرفنا أن العيشة تحت سقف واحد هي الكاشف الوحيد للشخصيات الحقيقية.

صديقة ليا مرت بقصة حب وفي النهاية فشلت وأنتهت بالأنفصال ليه؟ كان بخيل، كان غشيم، كان بيخونها، وكان أناني.
صديقة تاني طول الوقت تدعي لزوجها وللراجل اللي عرفها عليه والسبب حنين.. أصيل، أبن ناس، متربي وسوي نفسيًا.

"الزواج الناجح كولاجين القلب وبيخلي القلب شباب ومن غير تجاعيد لو مر عليه أربعين سنة، والزواج الفاشل بيعجز القلب بسرعة، وبتصاب بشيخوخة بتكبرك فوق عمرك، عمر تاني".

وعلشان كده هنوضح أسس الزواج الصح:
-راجل حنين بيعترف بالغلط.
-ست بتقول حاضر طالما لا يتعارض مع مصلحتها ولا مع الدين وكمان بتنفذ ده.
-ست نضيفة طول الوقت وبتلمع.
-راجل مسئول بيعرف يحتوي ويطمن.
-مشاركة في كل الأشياء.
-المساعدة في النجاح.
-الحضن اليومي (مهما حصل ومهما كبرتوا في السن أوعوا تتخلوا عنه) الأحضان علاج نفسي مفعوله حنين وسريع.
-الدعم، الحوار، البر بالأهل دون عنصرية (الزواج مافيهوش أمي وأمك).
-والأهم قبل كل ده.. "الحب" لأنه الشيء الوحيد اللي بيعيشنا.
......

خلصت المقال وركنته جنبي ونزلت أشتري شوية طلبات، كُنت سيباه نايم وأصلًا هو بيقدملي الدعم أنما ما بيقرأش كتاباتي.
رجعت من برة لقيته صاحي وبيسألني:
-وفاء أنا راجل حلو؟
--يا حياتي أنت أحلى راجل في الدنيا.
-لا بجد أنا شبه المقال اللي كتبتيه؟ هل أنا مخليكي سعيدة.!

فكرت أرد رد دبلوماسي أنما لقيتني بقرب منه وبقوله "أنا لو مش سعيدة في علاقة بمشي، حتى لو أغلى علاقة في حياتي".

سأل تاني: يعني مش سعيدة معايا؟
--سعيدة.
-وست حلوة وعظيمة وناجحة كمان.
--بحبك، أنت كمان راجل حلو.
-وأنتِ كمان ست عظيمة وناجحة ولذيذة، تعرفي أنا الدنيا قبلك كنت شايفها شيء عادي أنما وجودك خلى الدنيا ليها لذة يا وفاء، أنا الدنيا بالنسبة لي وفاء، مهما يجي في بالك من أفكار، أنا لذة الدنيا بالنسبة لي أنتِ وعيونك وقلبك، أنا لذة الدنيا بحسها في حضنك، لذة الدنيا في لمستك، أنتِ يا وفاء اللذة نفسها، والنجاح اللي بجد أني أتجوزتك.

الكلام في اللحظات اللي زي دي أعتقد أنه ممكن يضيع عظمة أحساسي بيه، حضنته ونسيت أني ما أتكلمتش عن الأمان في مقالي، وبعد يوم لذيذ بينا وأختلافات ونقاشات حول كل حاجة في العالم حتى حجم الذرة أتكلمنا فيه، حضرنا أكل ودخلنا ننام، حسيت أني لسه عاوزة أكتب تاني لكن المرة هكتب عن الأمان وتخطي القلق والخوف، فتحت المقال وكتبت..

"لذة الزواج في قوامة الرجال، والنجاح الحقيقي هو الزواج الناجح، وتخطي الخوف والقلق شيء بسيط مع الشخص الصح، أما عن الأمان فهو خط سير العلاقات الصحية"

لأن الزواج رحلة من مركب خشب بتمشيها رياح الأمان.

وهنا في الخلفية كان صوت الست بيقول:
-صالحت بيك أيامي، سامحت بيك الزمن.

#وفاء_الشقيري

''
أنا أزاي لما حطيت راسي على كتفه ما أخدتش بالي أن ده الكتف الغلط؟

#رواية_راندوم | ٢٠٢٤
#وفاء_الشقيري

"أنا حاليًا 42 سنة، أتجوزت المرة الأولى وأنا 21 سنة وكان بينا فرق سِن 16 وأكتر والتفاهم كان إلى حد ما معقول، أنا حبيته جدًا جدًا فرغت كل طاقة الحب اللي جوايا له لكن هو كان جاف، أناني شيء ما، بيحب أمه أكتر، وبعد فترة من الجواز ومشاكل بينا وبدأ يسيبني ويبات عند مامته، للعلم مامته في منطقة حيوية وأنا وهو ساكنين في مكان شبه الصحرا ومع ذلك تحملت."

خلفت ولدين حاليًا في جامعة وثانوية، أخر سنتين أنا أنفصلت عنه أنفصال نفسي، وبقينا شبه منفصلين وكان لينا قرابة الـ19 سنة متجوزين، وحرفيًا الحياة بينا كانت صعبة جدًا وأنا تعبت نفسيًا بسبب قلة الأهتمام وبدأت أتعالج نفسيًا ودخلت في المُهدئات وغيره، علاقتي بمامتي مش أفضل حاجة وأختي كمان علاقتنا عادية، حتى أولادي مش حنينين وفيهم ولد واخد كل صفات أبوه وجاف جدًا جدًا معايا...

وفجأة أبو الولاد أتوفى، أنا طبعًا زعلت عِشرة عمري وجوزي لكن وقتها دي كنت جعانة عاطفيًا وفي أمس الحاجة لكلمة حلوة من راجل، بعد فترة مش طويلة بالظبط 6 شهور من وفاة جوزي، أنا أتجوزت عُرفي والمبرر بتاعي علشان أفضل أخد معاش جوزي ومعاش والدي، وللآسف جوزي الحالي مريض نفسي وسيء جدًا..

وتفاصيل حكايتي معاه كالتالي:.
أتعرفنا صدفة فأتجوزنا عرفي دون ما حد يعرف وبالصدفة أمي عرفت وكانت عاوزة تتبرى مني، وحاليًا ماحدش يعرف غير أمي وأختي وخالتي.. ولادي ما يعرفوش أي حاجة.

هو بيترعب من مراته رعب، مراته بتحكم عليه أنه ما ينزلش القهوة ولا يكلم صحابه ولا يعرف عنهم أي حاجة، وهو بيسمع الكلام وبيخاف عليها وعلى زعلها وبيخاف منها كمان، أكتشفت بالصدفة أنه بتاع علاقات حرام كتير جدًا وده السبب اللي مخلي مراته حازمة معاه.
ده غير أنها شخصية قوية جدًا وحلفتله أنها لو قفشته مع ست تاني هتطلق وتمنعه يشوف بناته، هي مرة قفشتنا علشان كلنا ساكنين في منطقة وحدة وعملت خناقة كبيرة وهو حلف أنه ما يعرفنيش وهي صدقت أو عدت الموضوع يعني.

أنا بقابله في الأسبوع 4 ساعات فقط في شقة إيجار غير اللي مراته قفشتنا نازلين منها.. مش بيديني فلوس إلا نادرًا لأني بشتغل أصلًا.
هو علاقته بمراته كأنهم مراهقين ولسه بيبدأوا حياتهم الشات عبارة عن كتلة حب وده اللي واجعلي قلبي أنا أتجوزني ليه؟؟؟؟؟

هو بيقول أنه مش بيحبها أنما تصرفاته عكس كده خالص، في مرة سافرت معاه كان نفهم مراته أنه مسافر شغل.
فأمه علشان عارفاه قالتله أنت ماكنتش في شغل انت كنت من وحدة وأتقي الله معاك بنات، فقالها أنا متجوز عرفي، قالتله يا تعلن وجوازك منها يا تطلقها يا تقطع الورقة دي قدامي، قطع الورقة بتاعته وفضلت أنا معايا ورقتي اللي تثبت جوازنا للعلم أتجوزنا عند محامي، وفي خناقة بينا قطع بردو ورقة جوازي يعني أنا حاليًا مش معايا ورق ولا حاجة تثبت أني مراته.

أنا عارفة أني غلطت وعارفة أنها هتنتهي في يوم، أنا عاوزة حل.. أنا لو قادرة أبعد هبعد أنا بقالي سنة ونص معاه عايشة أصعب أيام حياتي، لكن أنا تعبانة نفسيًا ولازم وجود راجل في حياتي لأني عندي جوع عاطفي، أنا بنام بالمُهدئات وبتعب وبعيط وبكتئب، أنا حاليًا بفكر أموت نفسي.. أنما أنا عاوزة حل يكون أقل خساير ممكن، لأني مش حِمل كمان أني أخسر ولادي خصوصًا أنهم رجالة ورافضين جدًا جدًا موضوع أنه راجل تاني يحل محل أبوهم، ولو عرفوا أني أتجوزت هيسيبوا البيت خالص ومش هعرف لهم طريق.

#جُمل_بلسان_أصحابها.
#وفاء_الشقيري

مساء الخير

ده واحد من أهم الكتب اللي عملتها لأنه دون تزييف حرف واحد أو كلمة واحدة...

أنا فقط سردت الواقع والقصص اللي أتحكتلي..

الكتاب موجود في معرض الكتاب صالة 1 جناح b13

أو ممكن تطلبوه من واتساب الدار على الرقم ده
01008325074

"بعد حب 5 سنين باعني وخطب، من كتر الزعل جالي سرطان في الحلق ومش ناوية ولا عاوزة أتعالج، أنا بس عاوزاه هو".

حبيته لما قابلته صدفة، حبيته من أول نظرة.
أرتبطنا وأخدنا سوا 5 سنين، 5 سنين حب ومشاعر وهدايا وخروجات ودلع.
قولت أن الراجل ده أستحالة يحب غيري أو يبص عليها حتى!!

لكنه كان أناني، صعب جدًا في التعامل، بيغيب بمزاجه، بيظهر بمزاجه، كان ضامن وجودي أوي وكأن بيأذيني جدًا بناء على ضمانه ليا وثقته في حبي ليه.

أتقدملي وكان في قراية فاتحة أو حاجة شبه كده يعني.. فيما معناه أن أهله وأهلي كانوا عارفين أننا لبعض.
كان أكبر مني بـ 3 سنين وقالي أنه أول ما يخلص دراسة هنتخطب رسمي، علاقته بأهلي حلوة أنما علاقتي بأهله مش أد كده يعني.

فجأة أختفى وعملي بلوكات في كل حتة، أرن عليه مافيش رد.. لحد ما دخلت على أكونته من عند صحبتي لقيته خطب.

خطب طب وأنا؟؟؟؟؟؟؟ خطب طب وقلبي؟؟؟؟؟؟؟

كلمته بعد معاناة وبهدلة ليا ولنفسيتي، وكان رده أن أمه مش عاوزاني وعاوزة عروسته وأنه أستحالة هيعصى أمه وكلامها، على الرغم من أني جميلة جدًا وأمتلك عقلية جذابة وكل اللي يعرفني يشهدلي بكده.

رفضت رجالة أغنى وأحلى وأنضج علشانه وفي الآخر حط السكين في قلبي والدبلة في أيدي ست تاني.
وقتها دي تعبت جدًا وأكتشفت أن عندي سرطان في الحلق والسرطان أنتشر في جسمي كله، ورفضت العلاج نهائي، بعد محاولات من صحابي وكل اللي حواليا قررت أتعالج.

أنا بس مش واجع قلبي أد أنه كان أقل من أني أحبه ومع ذلك كملت معاه ورفضت كتير علشانه وتمسكت بيه وفي النهاية رماني زي كيس الزبالة في أقرب باسكت واختار ست غير علشان يرضي قلب أمه، موتني بالحياة حسبي الله ونعم الوكيل.

#جُمل_بلسان_أصحابها.
#وفاء_الشقيري

كُنت منزلة أستوري واتساب لنرنورة بخصوص غلاف كتابها الجديد وهي ما شافتوش، فأنا قولتلها أني نزلتلها أستوري بهدف أني أفرحها لا أكتر ولا أقل، لقيتها بتحلف بالله أنها ما شافتوش وزعلانة من نفسها جدًا..

أنا أصلًا عارفة أنها ما شافتوش، ومش زعلانة منها أطلاقًا أنا هدفي أن الناس تعرف كتابها وتشتريه مش أكتر، فـ بعت لها فويس قولتلها أني بحبها وأني عملت كده نوع من أنواع الدعم أنما أنا والله ما في دماغي ترد على الاستوري ولا لا؟ وأني هفضل أدعمها وأحبها طول ما هي مش بتأذيني نفسيًا.

أنا من الناس اللي بحب أدعم اللي حواليا في شغلهم وأشجعهم، ما بالك لما أحب حد ده أنا بدعمه وأسنده وأشيله في عيوني، أنا من عطايا ربنا ليا أني بحس بالمسؤولية أتجاه صحابي وبكون أم فعلًا..

وحقيقي أنا mami attitude مع أي حد بحبه، وطالما بحبك هتلاقيني بسمعلك، بشاركك، بسألك عن أنجازاتك، هجري عليك وأحكيلك كل اللي حاصل معايا، أنا حقيقي جوايا كم حب رهيب للي بحبهم وده بظهره في تصرفاتي كلها معاهم..

ملخص الفويس أنا كنت بقولها طالما أنتِ مش بتأذيني نفسيًا فأنا هحبك وأدعمك حتى لو ما شوفتيش، فـ كان ردها أني مريحة وقلبي جميل، والحقيقة أيوا أنا قلبي جميل واللي يحبه قلبي يا بخته واللهِ..

بالمناسبة أنا كنت معاها في كل الفترات ودخلت في دماغها فكرة أنها تنزل معرض الكتاب من تاني، وبينا مكالمات كتير، ورغي أكتر، وحقيقي عاوزة أشوفها أحسن وحدة في الدنيا، والله والله والله من كل قلبي أتمنى أشوف كل اللي بحبهم في مراتب عالية أوي وناجحين ومحققين أحلامهم.

ربنا يرزق كل مشتاق حبي لأنه صادق، ومش بعمل حاجة للي بحبهم غير أنهم بدعمهم وأدعيلهم طول الوقت وأكون ركن خفيف مريح في حياتهم يطيبوا قلوبهم بيه من العبث اللي بتعمله فيهم الأيام.

#وفاء_الشقيري

"أنا جوزي مسكني غصب عني وعمل معايا جماع حرام واتألمت كتير بسبب الموضوع ده وما فكرش حتى يجيبلي مرهم."

قصتي بالتفصيل أنا حاليًا 19 سنة، واخدة تمريض.
لما كنت فى تانية أعدادي أتخطبت، لأن عندنا اللي توصل 20 سنة دون زواج دي تعتبر عانس.

أتخطبت 4 سنين كنت بحبه جامد وهو كمان، كنا لايقين على بعض وحلوين، لكن أهلي كانوا طول الوقت بيضغطوني علشان أفركش، وبيطلبوا منه طلبات تعجيزية، وفي نهاية لما لقيوا أننا متمسكين ببعض، أخدوني في شقة في القاهرة بعيد عن البلد ونزلوا فيا ضرب لمدة شهر كامل.

ضرب وأهانة وشتيمة لحد ما أتنازلت وقررت أفسخ خطوبتي، كان بقالي شهر ما سمعتش صوته وأما رنيت عليه بعد شهر قولتله الزواج قسمة ونصيب.
مافيش وجع ممكن يمر على وحدة قد الوجع اللي مريت بيه في اللحظة دي.

فات وقت بسيط وبدأت الناس تتقدملي، ناس كتير جدًا لدرجة أن أهلي شكوا أني بنزل على النت أني عاوزة أتخطب، وبعدين جه حد أتقدملي وكنت هوافق عليه وقال أنه عاوز خطوبة سنتين، فـ خالتي قالت لأهلي لا سنتين أيه؟ دي كده هتدخل في الـ20 وهتعنس، خالتي هي المسيطرة وكل أهلي بيسمعوا كلمتها.

بعدين جه أتقدملي "طليقي" كان فرق السن بينا 17 سنة بالظبط، أهلي غصبوا عليا علشان ظروفه حلوة، أتخطبنا شهر واحد وبعدين أتجوزته، أنا كنت عاوزة أهرب من أهلي بأي طريقة.
أول أسبوع كان كويس لكن فجأة أتغير وبقي شخص تاني خالص، أخدت معاه بالظبط 3 شهور وما قدرتش أستحمل الغُلب، أهلي أصلًا ما سألوش عنه، هما بصوا لفلوسه فقط.

مع أن الأهل المفروض يبصوا لراحة بنتهم حتى لو هتعيش في أوضة وصالة، أنما هما فرحوا بالغيط والبهايم والأراضي اللي عندهم ونسيوا أهم حاجة وهي أخلاقه.

من بعد أول أسبوع وهي أجبرني أنزل الغيط لأنه بيستخسر يجيب حد يساعده ويدفع له فلوس، لأنه بخيل بطريقة لا توصف بخيل بخل السنين.
أنا عمري ما حطيت أكل لكتكوت في بيتنا لقيتهم بيخلوني أحط أكل البهايم والفراخ وشتيمة من حماتي وأهانة، ده حتى في مرة بنات أخته لسعوني بالنار.

بهدلوني وماكانوش ناس محترمين أطلاقًا مع أني أظهرتلهم الحب على أمل أنهم يبقوا كويسين معايا، أنا طول الوقت بحاول أكون كويسة معاهم وأعاملهم زي أهلي.

مرة بردو خروف من عندهم نطحني فقولتله هاتلي حقنة كيتولاك رفض علشان بالسرنجة بتاعتها عاملة 11 جنيه، مش بيدفع ربع جنيه حرفيًا لأي حاجة.
ده أنا رجلي أخدت شهر بالظبط كل ما أصحى من النوم أفضل ساعة أو اتنين لحد ما أقدر أمشي عليها وياريت بمشي زي الناس أقسم بالله العظيم كنت أعرج وبردو ما صعبتش عليه، أحنا لو شوفنا طفل تعبان أو حد كبير تعبان بنعيط ونتعاطف معاه، أنما ده كان جوزي وبردو ما تعاطفش معايا نهائي.

ولما كنت أقوله هاتلي علاج كان يقولي العلاج بيجيب الأمراض، أستني هتخفي لوحدك.

عمره ما حد أني أعمل واجب مع حد، لما حد كان يجي يزورني كان يزعقلي لو طلعتله بسكويت وكحك، ده مرة بنت خالي جاتلي وقدمتلها من الكحك بتاعي بهدلني رغم أني كنت منزلة لأهله يومها كحك بردو، وفي اليوم بعد ما بهدلني جه أخر الليل وعمل معايا جماع حرام غصب عني وأنا والله ما كنت أعرف أنه ده حرام ورغم أني أصلًا كنت رافضة القرف ده، أخدت 15 يوم تعبانة حتى مرهم ما رضيش يجيبلي.

مش بيحبني أحضنه أو أجي جنبه، لو لمسته بيتكهرب، أنما عند العلاقة بيكون عادي مش عارفة ماله لدرجة مرة سألته لو بتحب غيري قولي؟ طب ليه متجوزني لما هتظلمني؟

مرة كمان قولتله أني نفسي في طعمية لأني شايفة أن ظروفه ماشاء الله ويقدر يجيبلي الطعمية يعني لو كنت شايفة ظروفه بسيطة أنا ماكنتش هطلب أساسًا.. طلبت منه الطعمية ألاقيه جابلي كام وحدة في ورقة ساقعين كانوا فضلوا من ناس في الشغل، أستخسر يجيبلي طعمية جابلي بواقي الناس.!!!!!!!!!

كان في أي خناقة يلعن اليوم اللي أتجوزني فيه، خلى أهله يحطوا عليا جامد وهو ساكت وبيتفرج وبيأذيني أكتر منهم، أنا كنت نفسي أشوف يوم حلو معاه!!!!

وبعد معاناة و3 شهور قاسيين جدًا جدًا طلبت أتطلق رفض، رفعت عليه قضية وسيبتله البيت، ماكنش عاوز يديني أي حاجة وأنا حلفت أني مش هخلي أي حاجة له في الشقة لازم أوجع قلبه زي ما وجع قلبي وكسر نفسي.
أهلي قالولي نخلص الحوار ودي قولت لا لازم أخد كل حاجة وحكيت للمحامي كل اللي حصل وقولتله عن الجماع الحرام والقضية الحمدلله كسبتها وأتحكملي بالدهب وبفلوس نفقة وحاليًا لسه في جلسة تاني يوم 21 علشان كانت اتحددتلي جلسة قبل كده في يوم كان أجازة ومافيش حاجة حصلت.

أهلي خلوني أنزل أشتغل وأشيل أتعاب المحامي، وقالولي مع نفسك أحنا مش هنصرف عليكي ولا على قضيتك، هما حاسين بالذنب إلى حد ما لكن بيقاوحوا، أنا كنت كل شوية أتحسبن عليهم وحرفيًا كان كل شوية تحصلهم مصيبة لكن بطلت مهما كان أهلي بردو، أنما جوايا نار والله.

وأحنا في المحكمة طلبوا مننا نتصالح ونتفاهم يمكن نرجع، لقيته أتحول 180 درجة وعمل دور البرئ وأنكر أننا قعدنا مع بعض 3 شهور وقال إن كل اللي عيشناه سوا 10 أيام، وأنكر حتى الجماع الحرام، أنكر كل حاجة، من رحمة عليا ربنا أني ما خلفتش منه.

أهلي هما السبب في كل اللي أنا فيه خصوصًا خالتي وأتمنى بجد قصتي تكون نصيحة لكل الأهالي بلاش تغصبوا ولادكم على حاجة علشان أنا خسرت نفسي بسبب أهلي.

#جُمل_بلسان_أصحابها.
#وفاء_الشقيري

قد تبدو مسدج من واحد لحبيبته أنما المسدج دي من أعز إنسان أهدتهولي الدنيا وأغلى واحد على قلبي "أخويا"..
أخويا حبيبي والأبن البار والصديق الصالح والسند اللي ماليش غيره في الدنيا.

حكايتنا صعبة جدًا أنما هو خلى السهل صعب، أخويا اللي بوجوده حضر لين التفاصيل، وبقيت أيامي سهلة.

أنا حاليًا 26 سنة، وهو 24.
بابا وماما أتوفوا في نفس السنة وكُنت أنا في أولى إعدادي وهو في سنة خامسة، ماما بعد ما خلفتنا جالها السكر وماخلفتش غيرنا وكانت طول الوقت بتجيلها غيبوبة السكر وماتت فجأة، وبعدها في نفس السنة بابا أتوفى في حادثة.

أنا راعيت أخويا وأتعلمت الأكل وشيلت المسئولية.
وهو كان بيحاول يشتغل، مرة أشتغل في فرن عيش، ومرة عند نجار ومرة تاني في قهوة، كان طول الوقت بيحاول يجيب لنا فلوس ويصرف علينا.

كبرنا وأنا وصلت أولى ثانوي وهو تانية إعدادي.
حاولت وأجتهدت وكان كرم ربنا عليا واسع ودخلت طب بشري، أنما هو ساب تعليمه في سنة تالتة علشان يصرف على تعليمي، لأن مصاريف الدروس اخر سنة في ثانوي كانت صعبة جدًا، وحاول معايا وساعدني وكنا ضهر بعض، وأنا في رابعة جامعة طلبت منه يكمل تعليم وفعلًا وبدأ ودخل فني صناعي علشان مصاريفه قليلة وبردو ما زال بيشتغل وبيعافر بيشتغل أكتر من 16 ساعة يوميًا علشان يوفرلي مصاريف ولبس وفون حلو للجامعة.

حرفيًا بيحرم الحاجة من نفسه ويديهالي.

في حفلة التخرج جابلي ورد وأتصور معايا وماشي يقول للناس أختي الدكتورة أهي..
حنين حنية لا توصف، أبويا وأخويا وعيوني والله، أنا مش حاسة للحظة أن أبويا مش موجود، هو الكل في الكل في حياتي.

من كتر الشغل بقينا نتكلم واتساب، يتطمن عليا كل شوية، لو في يوم تعبانة بياخدني للدكتور ويعملي شُربة ويجيبلي برتقان وليمون ويجيبلي العلاج، بيعمل معايا زي الستات المتجوزة ما بيعملوا مع رجالتهم.

صاحبي ومش بنخبي عن بعض حاجة وهو عوضي الحلو، ناجح جدًا في شغله ودراسته وأتعلم منهة السباكة وشاطر في شغله ومحترم على الآخر، أنا فخورة أن الراجل الحلو ده أخويا.

صحيح ما عنديش أب ولا أم لكن ده نصيبي، ومن أرزاقي الحلوة في الدنيا أخويا، يارب نعيش طول العمر حنينين في بعض ونسند بعض، يارب ما أشوف فيه مكروه ويجبر بخاطره زي ما جابر بخاطري طول الوقت يارب.

#جُمل_بلسان_أصحابها.
#وفاء_الشقيري

-وسط الخناقات والدوشة اللي حاصلة بينا بيجبر قلبي كل مرة أنه يرجع له بسبب سؤال أنتِ كويسة؟

كل مرة حنيته تغلبني وينتصر عليا بـ سؤال بسيط، وبيركن الخلافات على جنب ويتطمن عليا.

-قد تبدو جملة عادية لكن تأثيرها على قلبي عالي جدًا، كل مرة يثبت لي قوامته وقوة عقله ونضجة وأعتقد أن -هذا أكثر ما يميز الرجال-

وهِنا تظهر لذة الحب في أنه بيعرف يحضني بالكلام حتى لو برسالة، كفاية أني مبهونش عليه وفي عز الخناقات بيسألني عن حالي، والحقيقة أني حالي أحسن وهو معايا.

ببساطة لأنه شايلنا أنا وقلبي في عيونه.. ❤️

#وفاء_الشقيري

من سنتين بالظبط كتبت بوست عن الأختيار الغلط وعن أني كل أختياراتي غلط وأني بتأذي جدًا من الموضوع ده.

كنت حاسة أن حمول العالم كلها فوق كتافي، خصوصًا وأنا بسمع جملة "ده أختيارك محدش ضربك على يدك".

والحقيقة أنه فعلًا محدش ضربني على يدي أنما أتضربت على قلبي ضربة تخليني أخاف أبص للحب تاني حتى لو برمش عيني.

من أسبوع بالظبط جاتلي منه مسدج.
-نسيتي يا وفاء؟
معرفتش أرد عليه بـ آه ولا لا.
معرفتش أسكت ولا أخاف ولا أهرب ولا أواجه ولا أعمله بلوك، سكت وقولتله "معتقدش أنه يخصك أني أنسى أو ما أنساش"

-يمكن ما يخصنيش نسيانك أنما أنتِ واللهِ يا وفاء تخصيني.
--اللي بيحب حد ما بيسيبوش سنتين واكتر.
-اللي بيحب حد بيحافظ عليه، أنا كنت بحافظ عليكي من شيطاني، كنت وما زلت عاوزك لبيتي يا فوف.
--فوف؟ وحشتني الكلمة دي، محدش كان بيقولهالي غيرك.
-أنتِ كلك وحشتيني يا وفاء، نتصالح؟
--نتصالح.
-ترجعي؟
--صعب، أنا بقيت مختلفة تمامًا عن زمان، كل حاجة فيا أتغيرت حتى حبي ليك ما بقاش زي الأول.
-أنما حبي ليكِ عمره ما قل لحظة.

فكرت شوية في أيامي معاه، منا بردو محبتش في حياتي غيره، ولا عرفت الدنيا إلا بوجوده.
لحظتها الست غنت "وهي تبقي الدنيا دنيا إلا بيك".

-فرصة جديدة في الحلال المرة دي؟
--بمعنى!
-هتقدملك موافقة؟
--نعمل رؤية شرعية ونحكي، يمكن نتفاهم.

وفي الحقيقة كان قلبي ميال جدًا وكأنه مغبش عني لحظة.

جه وجاب أهله.
كنت حاسة بأنتصار عظيم.. الدنيا طلعت حنينة أهي.

أتكلمنا.
أنا أتغيرت وهو كمان، سنتين كفيلة تغير كتير في كل حد فينا.
بدأ كلامه بـ " عارف أني كنت غلطان لما مشيت وحقك عليا أني سيبتك لدماغك، لكن دماغك اهون من شيطاني تعرفي يمكن لو ماكناش بعدنا السنتين دول كنا وصلنا لمراحل أصعب وماكناش عرفنا نرجع تاني، أتغيرت طول السنتين دول كنت بفكر أزاي أوصلك لكن بما يرضي الله، أنا عاوزك ست لبيتي وست لقلبي، أنا عاوزك ست لأيامي كلها.

رديت عليه..
عارف أيه أكتر حاجة أذتني طول الفترة دي أن كل اللي رايح واللي جاي أذاني، كلامهم كان صعب، أذتني أوي جملة "محدش ضربك على أيدك".

وبعد نقاش طويل طمني من تاني فيه.
ختم كلامه بـ "أنا أتغيرت للأحسن علشانك، سيبتك علشان أحافظ عليكي وكنت دعوة قيام الليل لسنتين متواصلين، بعدت علشانك وعلشان أحميكي، وكل اللي زعلك بكلمة ردي عليه بـ الدبلة مش أكتر، أنا حاليًا راجع ومش عاوز إلا أني أشوفك مبسوطة وأنا هحاول طول الوقت علشان سعادتك".

.....
اللي بيحب بجد بيتغير، بيرجع، بيقدر يوصل.
اللي شاري ما بتأثرش فيه سنتين ولا حتى مليون سنة، لأنه ببساطة الحب هو اللي بيحركه.
والحقيقة أنه العيب فيكم يا في حبايبكم أما الحب يا روحي عليه♥️.

#وفاء_الشقيري

من أهم أهداف العلاقة بالنسبة لي شخص أكون ملجأه، علاجه، راحته، بيته، والمكان اللي بيكون كويس فيه..

أمبارح وأحنا بنتكلم الساعة ٣ العصر قفل نت وما فتحش إلا النهارده الساعة ١٢ بليل، تخيلوا بقا حجم قلقي وعدد المكالمات والمسدجات اللي بعتهاله.

اللي حصل أنه تعب فجأة وأحنا بنتكلم راح المستشفى وبعدها رجع نام وماحسش إلا النهارده الساعة ١١ بليل تقريبًا.

ممكن حد يظهر يقول مافيش إنسان بينام الوقت ده كله هقولك لو حد بيشتغل أكتر من ١٦ ساعة يوميًا ممكن ينام أكتر من كده، بحس بيه لو كداب أو بيعمل شيء غلط.

عمره ما كان خاين
عمره ما كانت كلمته مهزوزة وعمره ما كدب عليا.
طول الوقت جميل.

أغلب الوقت بيناديني نورعيني!
ما بيعرفش يكون كويس إلا بيا ومعايا، قولتله أنه يروح ينام رفض وكأنه بيعتذر بشياكة عن اليوم اللي ضاع من غير ما نتكلم، وطول الكلام بيعتذرلي رغم أني زعلانة أنه تعبان مش زعلانة منه.

أرحم وأحن هدف في العلاقة بتاعتنا أنه مافيناش قلب بيهون على التاني، والحقيقة أنه هو اللي عيوني وننها ونورها واللهِ، أتعلموا الحب أو اجتنبوه لو مش هتبقى قلوبكم على بعض.

"العيب فيكم يا في حبايبكم، أما الحب ياروحي عليه"

#وفاء_الشقيري

ببساطة هو ده الحب ♥️

وكان فضل الله عليك عظيمًا♥️..

رُفع السِتار عن "كانسر" مجموعتي القصصية الجديدة، وأختياري للأسم مش من فراغ لكن لإني شايفة أن أشباه البشر هما سرطان الواقع فعلًا.

حقيقي العمل خد مني وقت وجهد، وكفاية عياطي وأنا بسمع القصص وبكتبها وأنا عايشة مكان أصحابها علشان أقدر أخرجهالكم بنفس الإحساس.

العمل تحفة ومنتهى اللذاذة، واللذيذ أكتر أنه من قلب الواقع دون تزييف حرف واحد أو كلمة واحدة.

كانسر ما هو إلا رحلة مؤلمة نابعة من قلوب البشر.

#كانسر | ٢٠٢٥.
#جُمل_بلسان_أصحابها
#وفاء_الشقيري

"قبل ما تختاري العريس أختاري أمه، أمه أهم منه شخصيًا".

أنا أتخطبت ٣ مرات، في المرة الأولى كانت أمه بتكرهني دون أي سبب، وشايفاني سمرة ووحشة وما أستحقش أبنها سعادة الباشا اللي هي فاكراه أن حلاوته شبه حلاوة عمر الشريف مثلًا، والست كتر خيرها أفتعلت مليون مشكلة وفسخت الخطوبة.

خطيبي التاني كانت أمه ست غريبة لا كلمتني ولا جاتلي ولا حتى عرفت شكلي، وما أتواصلناش نهائي وبردو فسخت والسبب أن أمه مش حباني.

بدأت أحس أن العيب فيا وأن هقبل بالعريس الجاي وخلاص حتى لو أمه وحشة لكن سبحان الله وكأن ابواب السما كانت مفتوحة على مسرعيها وأنا بدعي يارب ألاقي حد أمه كويسة.

وحصل أني أتخطبت لواحد ما أعرفوش وعصبي جدًا جدًا وطباعه صعبة، لكن حنين وبيرجع بسرعة.
والأحن وأجمل منه أمه، ست حنينة وجميلة وفرفوشة جدًا.

ما بتتكلمش كلمتين جد في حياتها وكل كلامها هزار، بتحب تنكش البيت كله وتهزر معانا وبتعاملنا كأنها بناتها، خالقة للبيت جو حنين وجميل ودافي.

عمرها ما سابتني أزعل من جوزي نهائي، وكل ما أزعل منه تصالحنا، حرفيًا أمه الجزء الحلو اللي في حياتي.

وأخر خناقة بينا أنا صممت أني أروح بيت أهلي علشان أتعصب فـ مد أيده عليا.
لقيتها جت ورايا وحبت تاخدني معاها وأنا رفضت، وكانت ترن عليا كل شوية تطمن عليا وعلى بنتي.

وعلشان أرجع قامت بعتتلي المسدج دي، وكل كلامها عبارة عن ضحك ومش عاوزة غير أن البيوت تكون هادية.

ده غير أنها لو معايا نضافة بتاخد بنتي عندها، وتروح معايا للدكتور ولو عملت أكل تبعتلي حقي بيتي أو تخليلي حقي لحد ما أروح عندها، حقيقي أمي التانية.

وبتقلب على جوزي لو زعلني وتفضل تأنب فيه وبتعاملنا كلنا واحد ومافيش تفرقة بينا، بتعاملنا أفضل ما بتعامل ولادها، وتفرح لو جوزي أشترالي حاجة وعمرها ما بصت على أي حاجة في بيتي أو تلاجتي أو دولابي وطول الوقت تدعيلي كتير وحنينة على الآخر.

وصدق اللي قال أن عمرت البيوت من الحموات وأن خربت بردو منهم.♥️

#وفاء_الشقيري

-لسه بتحبيه؟
--وإن كنت أقدر أحب تاني، فأنا بردو هحبه هو.

#رواية_راندوم | ٢٠٢٤.
#وفاء_الشقيري

هو بيقول أنها سرقت كل فلوسه والله أعلى وأعلم بردو، لكن جه بعدين وحب أنه يرجع لي وحكالي اللي حصل كله وكأن ربنا بيقولي أهو حقك بيجي لحد عندك، وبدأ يتعالج نفسيًا ونفسيته أتدمرت، وأنا كمان رفضته لأني مش حمل وجع قلب تاني.

وبالمناسبة أخته كمان أنفصلت وأهل جوزها غيرولها العفش بتاعها وبهدلوها وضربوها هي وأمها لما راحوا يجيبوا حاجاتهم من الشقة، وحرفيًا هو وأمه كانوا هيموتوا بسبب مراته الجديدة.

للحظة أني حسيت بالأنتصار وأن ربنا بيقولي حقك جه، حقيقي والله كما تدين تدان، ربنا أقوى وأشد منهم جميعًا.

#جُمل_بلسان_أصحابها
#وفاء_الشقيري.

آمين.. ألف مرة♥️

"أتجاهات الدُنيا كتير أوي،
لكن ولا أتجاه هيسيعني بالخراب اللي جوايا."

ذكرت الجملة دي على لسان بطلة رواية سيسيليا، لكن السؤال اللي جاي في بالي الفترة دي أروح فين؟ ساعات كده بحس أن كُل أتجاهات الدنيا ضيقة ولا أتجاه فيه راحتي، وقتها واللهِ بحس أني حزينة فعلًا.

#وفاء_الشقيري

"بعد ما أتشوهت بسببه رفض يتزوجني".

كان أول حب في حياتي.
أغلى حب وأكتر راجل حنين عرفته في الدنيا دي، حبني جدًا من كتر حبه فيا حبيت روحي وأنا وياه، وآمنت فعلًا أن الحب جميل.
.....
أبويا شخص بيحب الشغل وما عندوش وقت ليا.
فقدت أمي وأنا في بداية حياتي كُنت لسه سنتين وشهرين
وبدأت في ماسأة مرات الأب.

أبويا مش فاضي طول الوقت برة بيشتغل أو عند صحابه وأنا أتربيت وسط أخواتي اللي هما من أبويا، وكانت مراته بتفرق بينا في المعاملة جدًا، بتفرق تفرقة واضحة وصريحة.
.....
مع الوقت بدأت أحس أني جعانة عاطفيًا
دور الأم منتهي من حياتي تمامًا،
دور الأب كذلك، حتى الأخوات مش كبار كفاية علشان يفهموني وكمان أمهم كانت شخصية قوية فـ أخواتي كانوا بيخافوا يتكلموا معايا أو يحكوا في أي حاجة.

بدأت ألتفت إلى العالم الخارجي وأفكر في الحل الوحيد وهو "العلاقات".. العلاقات العاطفية تحديدًا وده لأني عندي جفاف في المنطقة دي، أنا درست علم نفس وأتعلمت كتير وقرأت في الفلسفة والمنطق، أنما المنطق ما منعنيش أني أقع في الحب على جدوى رقبتي.
.....
ألتقيت بشخص وحبينا بعض والموضوع أتطور بينا ووصلت بينا إلى علاقات جنسية ألتكرونية..
ومافيش مانع أن كُنا سوا وحصل تجاوز أو ربما عدة تجاوزات، أنا عارفة أن ده أكبر حرام وأكبر غلط، لكن أنا كنت ضعيفة معاه وغصب عني علشان بحبه.

أتقدم لي وللآسف أبويا رفض وكان في الوقت ده تحديدًا بتحصل مشاكل كتير بيني وبين مرات أبويا، ومع رفض أبويا له أنا بدأت أتعصب وكل اللي كنت مخبياه وكتماه طول السنين الفاتت بدأ يخرج، أتعصبت وأتنرفزت وشتمت ووقفت قصاد بابا وقولتله أني لازم أتزوجه.
.....
بابا رفض وهو تمسك بيا أكتر وفي يوم كنت بكلمه فون وكانت المكالمة للآسف مش كويسة، سمعتني مرات أبويا وراحت قالت له، مسكني وفضل يضرب فيا وخبط دماغي في الحيطة وبعدها رماني على المرايا.. الحمدلله أن عيني سليمة لكن وشي أتشوه وأخدت فترة بتعالج وما زلت وقررت من يومها ألبس نقاب.

وبعدها مرات أبويا أقنعته أننا لازم نتزوج فـ بمجرد ما بابا وافق هو رفض وقاله:
"أنا من أول ما رفضتني حلفت أنها لو أخر وحدة في الدنيا مش هتزوجها أنا أستنيت أنك توافق علشان أرفضها أنا".
.....
أهو أنا حاليًا علاقتي بـ بابا مش أفضل حاجة لا هو ولا مراته
وعلاقتي بيه باظت ووشي باظ وقلبي أتحرق ومش عارفة ممكن حياتي تتصلح أمتى؟

#جُمل_بلسان_أصحابها
#وفاء_الشقيري

٢٨ أكتوبر ٢٠٢٢.

-أن أنجو به من كل هزائمي،
أعبر معه الصعاب بـ لين
وأجده حين أحتاجه،
هذا هو الحب في مخيلتي.

#وفاء_الشقيري

"
كُنت أتمنى شخص آمن مثلي
يخشى على قلبي الألم
يهبني رحمة عظيمة يفوق عقلي تخيلها،

كُنت أظن هذا مستحيل لكنني "وجدته"
أصفه في مقطع وردة الحنون:
"وفي يوم لقيته لقيته هو، هو اللي كُنت بتمنى أشوفه".

أعتقد أنه مكافأة نهاية الوجع الذي مررت به قبله..! ♥️

#وفاء_الشقيري

النهاردة بنوتة قالتلي:
مش عارفة أزاي حد يكون واثق من حبي ليه ويسيبني زعلانة أيام.. أنا لو في حد بيحبني ومتأكدة من ده أنا عمري ما هسيبه يزعل ربع ساعة، وده الفرق اللي بينا..
أنا بهون عليه أنما هو واللهِ عمره ما هان عليا".

السؤال هِنا بقا.. "ليه؟ ليه تزعل حد واثق أنك لو لفيت الدنيا مش هتلاقي حد يحبك زيه؟ ليه ما تفهمش أن الساعات اللي بتعدي وأحنا زعلانين من بعض بتعدي تقيلة جدًا.. وليه ما نطبقش قاعدة أن العمر قصير والزعل المفروض يكون غايب فيه"..

مليون ليه في دماغي ومع ذلك لسه مش واصلة لأجابة لكن أعتقد أنها "جفا وقسوة قلوب".

#وفاء_الشقيري

من شوية أفتكرت حد مشي من حياتي وهو ماشي شوه صورته في عيني جدًا وأكتشفت كمية كذب ونفاق.. أتخذلت فعلًا..

فـ سؤالنا النهاردة بقا:
هو كان قادر يمشي وأنا كُنت هتقبل ده لكن ليه الكذب؟ ليه الدوشة اللي توجع القلب دي؟ ليه ما تسيبوش وراكم ذكرى حلوة؟ ليه مصممين تشوهوا كل المواقف الطيبة اللي حصلت! وحتى الآن مش لاقية سبب مقنع أفهم ليه كده بجد؟

#وفاء_الشقيري

أتخطبت ٤ مرات وكُل مرة فيهم يحصل فركشة قبل الفرح بفترة قليلة أو تحصل مشكلة جامدة والسبب أخو مرات أخويا.

حكايتي بدأت من حوالي ١٤ سنة لما أخويا أتجوز وكُنت لسه طفلة عندي ٨ سنين.
يومها مرات أخويا قالت لأمي أنها عاوزة تحجزني لأخوها اللي عنده ١٧ سنة وأني لحد ما أكمل ١٦ أو ١٧ هو يكون جهز نفسه ونتجوز.
أمي أستهترت بكلام مرات أخويا وقالتلها أن شاء الله.

بعد فترة بقي يجي عندنا وكُنت بدأت أكبر ووصلت المراهقة وعرضوا الموضوع بطريقة رسمي لكن أمي رفضت، لأن أخته من بداية زواجها من أخويا وهي بتتخانق معانا، وأمي مش عاوزة نفس العيلة دي تاني.

أتخطبت لأبن عمي ويومها مرات أخويا عملت حوار معانا وولعت الدنيا وأخويا ماحضرش الخطوبة وبعدها حصلت مشاكل جامدة بينا وبين بيت عمي والسبب مرات أخويا وقعت بينا والمشكلة أنها قصاد أخويا بتفضل تعيط وتحسسه أنها مظلومة.

الخطوبة الأولى أتفسخت وبعدين أخو مرات أخويا أتقدم تاني وبدأ يكلمني ويرن عليا وأنا أصده دون رد ولا أي حاجة، بعدين أتخطبت لواحد تاني وفجأة رن عليا مش عاوزني تاني وقالي الزواج نصيب والسبب أن حد راح له مكان شغله وقاله أنه لو ما بعدش عني هيموته وللآسف مش أخو مرات أخويا وبعد فترة أكتشفنا أنه صاحبه اللي عمل كده.

اللي مؤذي في الموضوع أن أخويا لا حياة لمن تنادي وواضح جدًا أن حاله متحول ١٨٠ درجة، وبعدين وحدة جارتنا قالت لماما أنها قابلت مرات أخويا عند شيخ ومعروف عنه بيعمل الأعمال الوحشة.. وبعدها أنا حالي بدأ يتغير وحسيت أني قابلة أتزوج من أخو مرات أخويا، وأتخطبت المرة التالتة ودي كانت لأخو مرات أخويا اللي أنا حتى الآن مش عارفة أنا وافقت عليه أزاي وقبل الفرح حصلت خناقة على القايمة وأتفسخنا.

والمرة الرابعة دي من حوالي سنة أتخطبت وبردو فسخت بسبب مرات أخويا وصلت كلام بالكدب عن أخت العريس لأبويا، مش دي مشكلتي أنا مشكلتي أني حالي وقف وماحدش بيتقدملي نهائي.

واللي حصل وكشف حاجات كتير هي أن مرات أخويا قالت لأبويا أنها عاوزة حق زوجها في الميراث ووصلنا كلام أنها عاملة لي عمل ومش هيتفك مع أننا بنحاول كتير ومش مبطلين محاولات وعاوزين حد قوي لأنها في أخر خناقة واجهتها وقالتلي أنها مش هتدوقني طعم الراحة وحاليًا بينا مشاكل وأخويا كمان عاوز حقه وبدأ يرفع صوته على أبويا ومد أيده على أمي.

وحياتنا أتشقلبت جدًا وبيتنا عبارة عن كتلة نار والسبب مرات أخويا وخبثها وجمعها واتأكدلنا كمان أنا مش لوحدها اللي طمعانة فينا لا دي هي وعيلتها كلها.

#جُمل_بلسان_أصحابها
#وفاء_الشقيري

النهاردة وحدة صحبتي قالتلي:
هو الحاجة الحلوة والحاجة الوحشة في حياتي.

أفتكرت حسنات في الليل وآخره لما قالت:
ده أحلى ما في العمر وأمر ما فيه.

والقاعدة الثابتة هي أن الوحدة لما بتحب بتشوفك كل الحاجات وده عندها أهون من أنها تشوف حد غيرك!!

#وفاء_الشقيري

شخصية ما قالتلي بالحرف:
"رغم أني بحسدك على قوة ذاكرتك، إلا أني بشفق عليكِ خالص، أنتِ اللي زيك مابينساش وأن نسي بيكون التعافي عنده صعب جدًا" .

والحقيقة أني دي أصدق جملة حزينة سمعتها في ٢٠٢٢.
لأني سمعت الأحزن منها زمان "مش هتعرفي تعدي الأيام كده، الأيام هي اللي هتعدي بيكِ بذاكرتك دي".

وبأمانة يعني مفيش مُر أمر من ذاكرتي، ولا غُلب أكتر من اللي أنا فيه، ملعون أبوها الذاكرة اللي مخلية الماضي حاضر عايشينه بتفاصيل مميتة مع ناس غابت .

أنا واللي زيي محتاجين العالم كُله يدعيلنا ننسى اللي بيأذينا واللهِ، أحنا مش طالبين المستحيل يارب، أحنا عايزين نعيش من غير ألم .

#وفاء_الشقيري

واحد من أشد أسباب زعل الإنسان على نفسه أنه يكون عارف وشايف ومؤمن أن الطرف اللي معاه مؤذي ومع ذلك مكمل، اللي هو "أنا مصمم أشوفك كويس رغم كُل السوء اللي بتظهره، وده من شدة حبي فيك مش أكتر".

وده اللي أكدته إليسا لما قالت "بصبر عليك من حبي فيك"!
والحقيقة أنه مش غباء قد ما هو حب وعشم وخوف من البعد والفرقة.

#وفاء_الشقيري

"ليه قابلته لما مش هو ده صاحب النصيب؟"..
ده كان سؤال صديقة ليا النهاردة.

والحقيقة لسه مش عارفة أجابة للسؤال.. يمكن علشان ننضج ونكبر ويمكن علشان نتعلم أن مش كل اللي هنحبه هنطوله لأنها دنيا والألم من قوانينها.

مش عارفة بجد؟ وفي نفس حيرة الأستاذ محمد عبدالوهاب لما قال "كُل ده كان ليه؟".

#وفاء_الشقيري

أول صورة هتجمعك في حضني هي دي أول ليلة هحس فيها بالأنتصار، هبقى حققت أعظم أنتصار في حياتي وهو أني وعدت ووفيت ودلوقتي حضني ملكك، حياتي ملكك وكلي تحت أمرك.

وحابب أعرفك حبة قوانين كده هنمشي عليهم:
-الخصام ما يعرفش لعلاقتنا طريق، هنزعل أو نتخانق أو حتى نقطع بعض كل ده هيحصل في نص ساعة وبعدين نرجع نحضن بعض تاني.
-ما عنديش بنات تنام زعلانة لو في يوم زعلتك غصب عني تقوليلي وأنا هتشقلب لحد ما تتراضي.

-هنختار هدومك سوا وتختاري معايا هدومي، هشتريلك روچ وبلاشر وباقي التعاويذ اللي بتحطيها وإنتِ خارجة ومش عارف أحفظ أسمائهم، وأساسًا إنتِ من غير نقطة ميكب حلوة، أيوا واللهِ إنتِ حلوة.
-هدومك شيء ما يخصنيش دي مش حمشنة مني، أنا حبيتك وإنتِ بتلبسي بنطلونات عادي فـ أنا مش ضد ده لكن أنا عاوزك طول الوقت محترمة وحلوة، أنا مش همنعك من أستايلك لكن ياريت تحسي برجولتي شوية وتلبسي حاجات ما تخليش حد يتكلم عليا وحش.

-صحابك للخروج والفسح والصور، مش للدخول في مشاكلنا، أي علاقة فيها طرف تالت ما بتكملش أنا عاوز أحافظ عليكي وعلى أفضل وحدة قبلتها في عمري.
-أهلي وأهلك ما يعرفوش غير إننا بخير، خلافاتنا مش سلعة نعرضها عليهم، خلي اللي بينا بينا يا حبيبة قلبي.

-أعملي حسابك مافيش حاجة أسمها تنزلي تشتري طلبات إنتِ ست الستات مش للنزول كل شوية أنا اللي هشتري كل حاجة وإن كنتي مدايقة في يوم تعالي هنزلك نتمشي وأجيبلك قهوة وأحب فيكي على البحر.
-أكلك مهما كان طعمه عمري ما هعايرك أنه وحش، وماتخافيش أنا كده كده هدخل معاكي المطبخ هنعك سوا وربنا يسلم.

-أنا فرفوش وحنين وبحب الرقص لكن أهم حاجة الدين عندي صلاتك أولّا وتعاملنا بما يرضي الله، ونحط ربنا في الخانة الأولى من كل التفاصيل علشان ربنا يباركلنا في الحياة الجديدة اللي هنبدأها سوا.
-الكلام جوايا كتير والحاجات الحلوة اللي هنعيشها لما يتقفل علينا باب أحسن من اللي كتبتهولك مليون مرة، كل دي شوية حاجات بسيطة أنا ناوي أعملها في الجواز، وآه نسيت أهم حاجة أنك تتحضني كل يوم علشان الأحضان نقطة ضعفك، بس الحقيقة إنتِ اللي نقطة ضعفي، علشان كده بقولك "تتجوزيني؟ يا أغلى ما في الحياة"

أمضاء:
عاشق داب في عينيكي.

#وفاء_الشقيري

سيدة أربعينية كانت بتتكلم معايا النهاردة في أنها عاوزة تنفصل عن زوجها وأنها عندها بنتين وولد أصغر منهم عنده 19 سنة.. وأنها مش بتشتغل ولا عندها سكن وأهلها متوفيين.

فأنا قولتلها لو في رصيد حلو للراجل ده يشفعله كملي معاه.. قالتلي "لا ده وحش ومش بيديني أشتري حاجة لنفسي وكمان بيمد أيده عليا".. المهم أني قولتلها حل نهائي أنها طالما ولادها كبار فـ تنزل تأجر شقة بيهم وأفراد الأسرة كلهم يشتغلوا ويساعدوا بعض..

والحقيقة أنا مش عارفة ليه راجل ممكن يضرب ست! أو ليه حد عمومًا يؤذي شريك حياته؟ مش فاهمة حقيقة نفسيات الناس دي بجد؟

السؤال هِنا بقا "ما سمعتوش عن الآية القرآنية اللي قالت وجعلنا بينكم مودة ورحمة"؟
ليه إنسان يعمل كده في الشخص اللي مفروض يكونوا سند وونس لبعض!؟ لله الأمر واللهِ.

#وفاء_الشقيري

-
قالت:

لسه مش عارفة أستوعب أني اللي وقعت بينا أختي علشان تتجوزه هي وتاخده لنفسها.. دي صورتني وأنا بـ هدوم النوم وبعتتهاله، دمرتلي حياتي بالمعنى الحرفي.

#جُمل_بلسان_أصحابها
#المجموعة_القصصية_الجديدة
#وفاء_الشقيري

النهاردة رنت في وداني جملة:
"الراجل الأول في حياة الست بيسيب بصمة في قلبها ومهما حبت تاني، هو بيفضل ليه تأثيره"..!!

النهاردة مافيش سؤال كفاية عليكم أثر الجملة.😅

#وفاء_الشقيري

أنا حاليًا 20 سنة لسه حتى الآن مش عارفة أستوعب أزاي في أم ممكن تكون سبب في تدمير نفسية ولادها.

أتجوزت بابا وهي 18 سنة، كان ليها علاقات كتير قبل الزواج وده اللي أنا عرفته مؤخرًا يعني.!

بعد فترة من زواجهم هي كانت صاحبة شخصية قوية وهو كان إلى حد ما طيب، بدأت تسيطر عليه وتمشي كلمتها عليه وتعمل مشاكل مع عيلته لحد ما قطع علاقته بيهم، هي أتبلت عليهم في أمور كتير زي السرقة والظلم، كانت تقول أن عمتي سرقت دهبها ومرة قالت أني عمتي ضربتها وده ما حصلش.

للآسف ماما كذابة ومريضة نفسية.!!

بعد فترة من مقاطعة بابا لأهله بابا أشتد عليه المرض ومنعت حتى أخواته أنهم يشوفوه، كانوا يتصلوا بيها عاوزين يكلموه أو يتطمنوا عليه تقفل في وشهم.

أخويا الكبير مشي في سكة الأدمان وبابا ما أستحملش أنه مدمن فـ من كتر الخناقات معاه توفى.. يوم الوفاة منعت أخواته أنهم يدخلوا عليه وبعد الدفنة مباشرة قالت مافيش عزا وخلت عمامي وعمتي مشيوا من غير ما ياخدوا عزا أخوهم.

أخويا الصغير كان بيقلد أخويا الكبير دايمّا.. وأنا اللي كنت صامتة بتفرج فقط.

بعد 3 شهور من موت بابا أخويا عمل مشكلة مع واحد أبوه نصاب وماما راحت للراجل ده وأتكلمت معاه لأن أبنه كان عاوز يقتل أخويا، فـ أمي حبت تحل المشاكل.

دخلت في دوامة وتعبت نفسيًا وقولت أني لازم أتعافى فـ كان الكلام ده بالظبط بعد وفاة بابا بـ 4 شهور ونص.. رفضت أني أتعالج وفضلت أعاني لوحدي، لحد ما بدأت ماما تخرج الصبح ترجع آخر اليوم، فـ بقيت أروح عند صحابي مرة ومرة روحت لدكتور نفسي من وراها لكن ما قدرتش أكمل علشان غالي.

قولت أنزل أشتغل أهو منها أتسلى ومنها أجيب فلوس ومنها أتخطى أبويا لأنه كان حنين وجميل وكنت متعلقة بيه جدًا.

وفي يوم موبايلي باظ وأخدت موبايلها أرن على وحدة صحبتي لقيت مكالمات بينها وبين راجل أسمه ''محروس''.. مدة المكالمات بينهم كبيرة فـ شكيت أني بينهم علاقة.. فتحت الواتساب أكتشفت بلاوي، هي فعلًا على علاقة بيه وباعتة له صور وحاجات مقرفة.

وبعدها فضلت فترة مخاصماها ومش عارفة أعمل أيه؟ فكرت أقول لأخواتي وطبعًا واحد مدمن والتاني بدأ يمشي في نفس السكة.. فـ لقيت نفسي بعد فترة غصب عني واجتها.

وبعد خناقة وأتهمتني أني بتجسس عليها.. عرفت أنها متجوزاه عرفي!!!!!!!!!
حتى الآن مش عارفة أستوعب أزاي ست تعمل كده؟

ولما سألتها ليه عرفي قالتلي علشان أهل أبويا ما يعرفوش وخايفة جدًا على حوار المعاش..

ومع كتر المشاكل عرفتنا على زوج الهنا الأستاذ "محروس" أكتشفت بقا أنه نصاب وبيتاجر في المخدرات وهي معاه وعرضت عليا أشتغل معاهم علشان أنا بنت ومش هيتشك فيا، وطبعًا أخواني تفاعلوا معاه وعجبهم الحال، وفي أكتشفت أن زوجها يبقى أبو الولد اللي أخويا أتخانق معاه.

ساءت جدًا نفسيتي ومش عارفة حتى الآن أعمل أيه وأتعافى أزاي؟

وهو بيجي عندنا البيت كتير وهي كمان بقيت تشرب معاه أنواع مقرفة ودخلت في سكة المنشطات، حقيقي أتمنى ربنا يكرمني وأتعافى أو تحصل معجزة تغير الواقع بتاعي أو أفقد الذاكرة مثلًا!!

أنا حتى خايفة أدخل في علاقة أو قصة حب علشان ما أعتقدش أنه في حد ممكن يرضي بـ أم زي أمي وأخوات مدمنين.

#جُمل_بلسان_أصحابها.
#وفاء_الشقيري.

النهاردة صحبتي قالتلي:
"ليه الأحلام في الحب صعبة؟
أنا حاسة أني عاوزة واسطة علشان أوصل قلبه".

السؤال هِنا بقا:
ليه أمر الهوى دايمًا غلاب؟ ليه نهوى اللي مش غاوينا ونفضل على نفسنا ناس مش أهل للحب؟ ليه ما بتظبطش معانا؟

والحقيقة أن مش بس الأحلام في الحب صعبة!! لا ده كُل الأحلام لازم نفسك يتقطع علشان توصل وأنت وحظك، ببساطة هي ضربة حظ.

#وفاء_الشقيري

قالت:

لسه بحاول أتعافى من موت أبويا لقيتها جايبة لي جوز أم عاوزني أتاجر في المخدرات..

#جُمل_بلسان_أصحابها.
#وفاء_الشقيري.

وحدة أعرفها أتخطبت من فترة لواحد غير مقتنعة بيه وبعد سنة فركشت الخطوبة، في مناسبة كلام قالتلي أنها كانت بتجرب حظها معاه يا نفعوا سوا يا لا.

والحقيقة مش عارفة أزاي ممكن يكون إنسان بالعقلية دي، تعالى أشرحلك شيء قبل كل حاجة "أصل الزواج قبول وتعايش" والقبول هو هو الأقتناع، يعني طالما مافيش أقتناع يبقى مافيش قبول.

الوضوح والصراحة ربما مُحزنين وممكن يوجعوا فترة أنما الطرف التاني هيستوعب عدم وجود مشاعر ويتأقلم، لكن تعمل خطوبة وبعدين تفسخ وتقوله سوري مش هكمل.. طب فين العدل؟

منتهى الظلم أنك تكون ما بتحبش وتجرب في الناس، الناس مش فأر تجارب معاليك.. دول بشر بمشاعر وقلب..
وللآسف السياسة دي بنات كتير بتتبعها وأحيانًا رجالة وهي سياسة غبية وظالمة جدًا.

فـ أرجوكم طالما مافيش مشاعر ما تبدأوش علاقات علشان قلوب الناس مش للتسلية، سيبوا قلوبهم لقلوب شبهم.
الحب ما فيهوش تجارب، يا بحبك يا لا، مافيش في الحب حلول وسط.

في أغنية بحبها فيها كوبليه بيقول:
ما تعشموش حد بـ لُقا ومافيش في بالكم غير فراق.

#وفاء_الشقيري

-
النهاردة في محادثة بيني وبين صحبتي سألتني "هو أزاي أتحمل فراقي؟ أزاي هان عليه حبي؟ ده أنا بنيت كل أحلامي عليه؟".

مافيش سؤال النهاردة لأني هكتفي بـ "الشخص لما يكون بيحكي عن شخص تاني خذله، أو عن حلم فاته.. نبرته صوته القوية دي بتكون واضحة جدًا أنها متفبركة".

وحقيقي بتألمني أوي طبقة صوتهم المدبوحة بـ سكين الخذلان.

#وفاء_الشقيري

قالت:

بحاول أنساه بس واللهِ العظيم ما راضي يخرج من دماغي!

#رسائل_من_كل_قلبي
#وفاء_الشقيري

من ملذات الحياة الحلوة بالنسبة لي الوقت اللي بقضيه وأنا بسمع الست خصوصًا لو بتتكلم عن الحب..

كُل المطربين غنوا عن المشاعر أنما الست أختارت جُمل لذيذة في أغانيها وعبرت بيها عن الحب والجملة الأشهر واللي بحسها بتدس معنى الحب رغم بساطتها هي "العيب فيكم يا في حبايبكم، أما الحب يا روحي عليه".

وده تأكيد منها أن الحب واحد مهما كانت ظروف وشخصية المحب، الست عمومًا بتهدي قلبي بأغانيها وبسافر عالم تاني وأنا على الأرض، أنا قلبي أسير الست دي وأسير الحب.

ونضيف كمان أنها لما عبرت لحبيبها عن مشاعرها ما قالتش يالا نحب! لا دي قالت "دي ليلة حب حلوة بألف ليلة وليلة".

ولما حب تعاتبه غنت "حب أيه" وقالتله "أنت عارف معنى الحب أيه؟".. كانت ست بسيطة وتعبيراتها بسيطة وبتتكلم عن أسمى معنى في الدنيا.

طول عمري بقول أنها تستحق كلمة "الله يا ست" تستحقها وتستحق لقب "أعظم من وصفت الحب"..

ومن كُل قلبي بقولها الله يا ست، الله يا ست الستات، دي المحبة فعلًا جنة وأنتِ ست المحبة وست الكلام الحلو كُله.

لذة الدنيا في أغاني الست، لذة الدنيا في الحب ذاته.

#وفاء_الشقيري

قالت:

مش عارفة أوصف كم الخذلان اللي حسيت بيه ساعتها، معقول ده يكون رد فعل الشخص اللي أنا حاولت كتير علشان نكون سوا؟ معقول أفضل أعافر سنين وفي النهاية هو اللي يبيع؟

#رسائل_من_كل_قلبي.
وفاء الشقيري.

-الست منهم ما تحبش الراجل يعملها اللي يفرحها وبس، الست منهم تحب الراجل اللي يتحاشى أذاها النفسي، يحترمها بينه وبينها قبل الناس، يتقي الله فيها، يزود ثقتها في نفسها، يحس بيها لما تكون تعبانة..

-الست محتاجة لراجل صادق، يتحمل المسؤولية، يخاف عليها، يطمنها، يجيبلها حقها لو في بطن الحوت..

-الست تحب اللي يسمعها، يشاركها تفاصيلها، يستر سرها لأنها طالما حبتك هتتعرى قدامك مش التعرية الجسدية لا، تعرية المشاعر.. فـ أوعى في يوم من الأيام تفشي سر بينكم لأي حد، أوعى تعايرها بسر أستأمنتك عليه وحكتهولك.. الست تحب اللي يغطي عليها في كل حاجة.

-الست والراجل لازم يبقوا ستر وغطا على بعض، خليك ضهرها وصاحبها، ما تخليهاش تخاف تحكيلك خليها ما تلاقيش حل للمشاكل إلا وياك، خليك أختيار صح، كون أب وأخ وصاحب، كون ليها كل شيء، علشان يوم ما تجي تتعرى قدامك بكل المعاني تبقى أتعرت قصاد الشخص الصح..♥️

#رواية_سيسيليا
وفاء الشقيري.

صديقة ليا النهاردة قالتلي:
"عارفة لما حد يفضل حاضنك طول الوقت وفي النهاية الحضن ده يكون أمان فعلًا! أهو ده اللي حصلي معاه رغم أني من أول ما عرفته وأنا منتظرة خيانته ليا أو هروبه من الحكاية لكن كمل، الله يسامح اللي كان قبله، خلى قلبي مش عارف يستمتع بالقصة الجميلة دي".

السؤال هِنا بقا:
ليه بنفضل خايفين طول الوقت حتى وأحنا واثقين أنه ده العوض، ليه الترست إيشوز بتفضل ملازمنا، ليه ما بنعرفش نستمتع؟ وليه شبح الماضي دايمًا بيظهر قصادنا؟ وليه حتى الآن مش عارفين ننسى؟

توصلت لإجابة وهي:
"لأن القلب شبه الإزاز بيفضل الشرخ فيه مأثر و باين".

وفاء الشقيري.

ياريت بجد ما ناخدش حد صديق عمر لأن الطعنة مش بتجي إلا منهم.

#جُمل_بلسان_أصحابها
وفاء الشقيري.

"صحبة عمري صدمة عمري وهي النكسة الأكبر في حياتي".

حكايتي بالتفصيل بدأت من 20 سنة لما كُنا لسه محولين بيتنا من الجيزة إلى الشرقية، أبويا أصلًا من مواليد الشرقية وكل أهله هناك لكن عاش عمره كُله في الجيزة والدنيا جت عليه شوية وحصلت معاه مشاكل فقرر يرجع لمحافظته لأن عيلته كلها هناك وكان له بيت تمليك أفضل من الإيجار في الجيزة، وقتها أنا كنت 10 سنين أنا حاليًا 30 سنة ده اللي في البطاقة أنما حاسة أني بقا عندي 100 سنة من كتر اللي حصلي.
.....

أول ما وصلنا أتعرفت على أهل بابا وعيلته وكانوا ناس للأمانة أخر أحترام، بعد شوية كده أتعرفت بنت أبن عم بابا وبقيت صحبتي الوحيدة كان أسمها "وحيدة" على أسم جدتها وبيقولولها يا "نسرين".

بقيت صحبتي بطريقة أوفر ولأني ماما ماكنش عندها أعتراض على خروجاتي معاها أنا كنت بروح البيت عندهم كل يوم وكنا نلعب وناكل ونشرب ونذاكر.

لكن كانت دايمًا معرضة للأهانة من أهلها، أمها بتقلل منها وتشتمها وتحسسها أنها عار عليها لأنها ماكنتش بتحب خلفة البنات.. أبوها كان يضربها ويزعق فيها وخلاها قعدت في البيت من غير تعليم على عكس أمي وأبويا خالص، صحيح أبويا كان صعب شوية لكن كان بيحبني.

هي كانت طول الوقت تحسدني على الحب ده وتفضل تقولي يا بختك أمك بتحبك يا بختك أبوكي مش بيجبرك تسيبي التعليم وفي يوم أبوها غصب عليها تتخطب لأبن عمها كان وقتها عندها 17 سنة ويوم الخطوبة فجأة أختفت، كله فضل يسأل فينها وغابت بالظبط أسبوع.

أسبوع والبلد حرفيًا مقلوبة عليها ولما رجعت قالت كلام غريب للكل ولقيتني أنا اللي بشيل الذنب لوحدي.. قالت أني عرفتها على واحد وهربتها معاه وجه أبويا ضربني وقرايبي بهدلوني وحكموا بالدبح عليا وعليها، وكله جه بحكم أني عيشت فترة طويلة في المدينة وكله شايف أسلوبي وحش وأني مش متربية مع أني متربية جدًا وعارفة الصح من الغلط الحمدلله.

وبعدين كشفوا عليها وعليا مش عارفة ليه؟ ولما اتأكدوا أننا لسه بنات أتدخلت ناس كتير وقالوا الدبح حرام وأمي وقتها كانت هتموت من كتر الرعب عليا وجالها السكر وأنا جالي مرض نفسي من وقتها والخوف ملى قلبي وبقيت أخاف من أقل حاجة طبعًا انا أكتشفت المرض النفسي ده من سنتين أنما الأحساس فيا بقاله سنين.

بعد فترة رجعت تعيط وصالحتني وأعتذرت وقالت ما كنتش عارفة أقول أيه أنا قولت كده علشان أنقذ نفسي.
في الوقت ده كان أبن عمها بيدور على الولد اللي هربت معاه وكان يجي يسألني عنه ويهزأني ويقولي كلام وحش جدًا.

أتبهدلت بسببها ومع ذلك سامحتها ورجعنا صحاب وهي فضلت من غير جواز وأنا ربنا كرمني بحد أبن حلال من برة البلد وأتجوزنا.

خلفت أبني وكنت عايشة حياة هادية أوي وجميلة وحاسة أن ربنا عوضني وكنت مبسوطة، الكلام ده من حوالي 7 سنين كده..

أبوها أتوفى فـ أنا روحت الواجب مع ماما وبدأنا نتكلم وسألتني عن جوزي وقولتلها أن علاقتنا إلى حد ما كويسة، جابت موبايل لأن أبوها كان مانعها منه وفضلت تحكيلي عن معاناتها في حياة أبوها كل يوم وتتصل بيا.
وفجأة بدأت تترد عليا في البيت.

أنتقبت وكانت تتكلم معايا عن الدين كتير وأني لازم أنتقب فـ جوزي كان أحيانًا يسمعنا ويقولي أتعلمي منها وبقيت صحبته هو كمان.

لحد ما في يوم أكتشفت كلام بينهم على الفيس وأن بينهم علاقة صداقة قوية.
وأول ما واجهته أن العلاقة دي لازم تنتهي قالي لا دي صحبتي.

وفضلت كل يوم خناقة معاه وخناقة معاها لحد ما قررت أمشي من البيت خالص.
بعد كام يوم بعتلي وقالي: "هتجوز على عفشك يا شمال"
رنيت عليه علشان أعرف أصل كلمة شمال.!
ألاقي الست "نسرين" قالتله على القصة القديمة وأني هربتها مع واحد وكمان أني عملت علاقات جنسية غير كاملة قبل الجواز، وأن بعد الجواز بقيت بعمل علاقات كاملة وللآسف أدته رقم واحد وقاله أيوا أنا ماشي مع مراتك وجيت شقتك وبالأمارة شقتك فيها نيش بني وأنتريه نبيتي وفيه ورد بيج ووصفله الشقة كلها، وطبعًا الست هي اللي كانت معرفاه بكل التفاصيل دي.

وقتها بعتلي ورقتي وطلقني وأتجوزها على عفشي ولحد ما فكرت اني أرفع عليه قضية علشان أخد عفشي لقيته رفع عليا قضية أني زانية وما ينفعش أكون حاضنة لأبني وبهدلني حرفيًا لولا ربنا بيجي مع المظلوم وكسبت القضية الأولى وهو أتنازل عن القضية التانية مقابل أنه ياخد الدهب لأني لما مشيت الدهب كان معايا وفي ناس كتير أتدخلت في الموضوع فـ شبه أتلم ودي.

حاليًا هي متجوزة جوزي وأنا كل ليلة بدعي ربنا ياخدني علشان مش عارفة أخد حقي منها أنا نفسي جدًا أنتقم منها لكن برجع وأقول أنه ربنا منتقم جبار.

جوزي مش بيسأل في أبني نهائي ومرة أتقابلوا حكى لأبني أني ست شمال ومن وقتها وأنا منعته يشوفه تاني.

بالمناسبة أنا بتعالج نفسيًا.
عندي الضغط والسكر والقولون العصبي، مش عارفة اتأقلم ولا أعيش حياتي طبيعية لسه الندبة في قلبي.

اللي حكيته ده أبسط التفاصيل واللهِ أنا شوفت البشاعة بمعناها الحرفي، منها لله.

-
من فترة ست كبيرة قالتلي أختاري اللي يخاف على تعبك مرة وأختاري اللي يقدرك وقت تعبك ألف مرة، أختاري اللي يخاف على عيونك من الشمس وعلى رجلك من كتر اللف، اللي ما يقبلش أنك تشيلي شنط تقيلة وتمشي بيها في الشارع، ركزي في التفاصيل ركزي في الراجل اللي بيشيل عنك، والأهم لما تحطي دماغك على كتفه يشيل عنك حمولك ويبدلهم دفا وفرح.
-

النهاردة كنت مرهقة شوية وعندي صداع شديد وحاسة أني مش كويسة وليا شنطة هاند ميد لولي عند وحدة ساكنة في مكان بعيد عننا وعندنا مناسبة في العيلة بكرة فلازم الشنطة تكون جاهزة ومعايا علشان الأوتفيت بتاع فوفا ما يبوظش.
-
كلمته وطلبت منه يجيبهالي بالرغم من بُعد شغله عن المكان اللي فيه الشنطة وتعبه طول الوقت إلا أنه رد عليا كده..
رده لوحده خلاني كأني في السما، كفاية جبر خاطري بالدنيا ومافيها والله حتى لو ما جابش الشنطة يكفي أنه ما أحرجنيش ولا قال أنا مالي ولا طنش المسدج بالعكس ده رد عليا في عز شغله وأشترى قلبي وأنا نقطة ضعفي حد يشتري خاطري ويعاملني حلو..
هقوم اعمله أكل بيحبه وعصير فريش علشان لما يرجع يلاقيهم وينبسط..!
-
قد يبدو موقف بسيط للبعض لكنه بالنسبة لي كبير وكبير جدًا كمان، وكل مواقفه الحنينة معايا هتفضلي محفورة في قلبي، الحياة مش ساهلة بس وجود ناس حلوة وحنينة بيخليها لذيذة وليها طعم.
-
صدقت الست اللي قالت أختاري اللي يقدرك وقت تعبك ألف مرة، أحب أوضح: ما تختاريش غير اللي يقدرك وقت تعبك مليون مرة.
-
وفي الخلفية صوت الست:
وأبتديت دلوقتي بس أحب عمري.

وفاء الشقيري.

قالت:

قصة حب 7 سبع أنتهت بـ شلل نصفي، لما سابني فجأة أخدت يومين متواصلين عياط فقط دون أكل أو شرب، والنتيجة أن حاليًا أمي وأخواتي بيدخلوني الحمام ويحموني ويغيرولي هدومي.. أنا فقدت المشي بسببه.!

#جُمل_بلسان_أصحابها.
#المجموعة_القصصية_الجديدة.

-

بنوتة بتفضفض معايا برايفت قالتلي:
"آخر مرة قالي مش هسيبك لدماغك تاني ووعدني أننا مش هنتخاصم بالأيام، ومع ذلك سابني، هو أنا ما أستاهلش يحاول علشاني؟"

سؤال كُل مرة بقا:
طالما هتقدروا تبعدوا بتوعدوهم ليه؟ ليه بقينا نستهون بنفسيات بعض! ليه؟

وفاء الشقيري.

قالت:

أنا كُنت طول الوقت بقول أنها صحبتي الوحيدة، النهارده أنا واصلة لمرحلة أني بدعي على نفسي بسببها وبسبب سوء أختياري ليها.. دي أتجوزت جوزي وحطمت حياتي وبوظت نفسية أبني، حقيقي مافيش أسوء من اللي هي وصلتني ليه؟

#جُمل_بلسان_أصحابها.

بتأثر فيا الحنية بطريقة مش معقولة، نبرة صوت الشخص الحنين، نظرة عيونه، لطف كلماته، ردود أفعاله الحنينة اللي بتأكد صدق قلبه وجماله، كل دي صفات بتأثرني وبتأثر فيا وببقى عايزة أحضن الشخص الحنين بين ضلوعي طول الوقت علشان أعبرله عن مدى حبي له ولحنيته، وحقيقي مهما كان الشخص فيه صفات حلوة هتفضل الحنية أجمل وأعظم صفة وضعها ربنا فيه.
الحنية صفة من الجمال، ويابخت اللي توقعه الدنيا في ناس حنينة.

وفاء الشقيري.

-
لما كُنا سوا كانوا يقولولي أننا شبه بعض في الملامح، لكن هو ما يشبهنيش عمره ما كان ولا هيكون شبهي خاصة في القلوب، طول عمره قلبه قاسي.

#رسائل_من_كل_قلبي.
وفاء الشقيري.

-هو أنت ماشي هادي كده ليه؟ طول عمرك بتحب تسوق بسرعة.

--علشان إنتِ معايا، وإنتِ بتخافي من السرعة!

-أيه ده؟ وأنت مين قالك أني بخاف من السرعة؟

--إنتِ في بداية كلامنا لما سألتك عن العلامة اللي في أيدك يومها قولتي أنك كُنتي في عربية مسافرة مع أهلك وحصلت حادثة بسبب أنه السواق ماشي بسرعة ووقتها أتعورتي والتعويرة سابت علامة، ومن يومها وبقي عندك فوبيا من السرعة.

-ده أنت ماشاءالله على ذاكرتك فاكر كل حاجة أهو!

--مش بنسى حاجة معاكي أو كلام بينا.

-بحبك، بس بردو طول عمرك بتحب المغامرات وبتشوف أنه السرعة أجن مغامرة.

--لكن بحبك إنتِ أكتر، والمغامرة الحقيقية هي حبك، أنا مش عارف أرتب كلامي لكن تعرفي لو طلبتي مني أني أزود السرعة أنا هرفض لأن ده شيء بيخوفك وأنا لازم أكون أمانك.
......
كان قادر يزود السرعة ويختار مغامرته اللي بيحبها وينفض لكلامها كأنه ما سمعوش، كان قادر ياخد سؤالها عن عدم السرعة حجة يزود بيها السرعة ويقول هي اللي طلبت.
لكنه فكر في أمانها معاه، أمانها فقط وأختار مشاعرها ونصفها على خوفها وحبه للمغامرات، ببساطة فضلها على نفسه.
وهِنا ظهور قوي لأسمى معاني الحب "الأمان" لأن الحب هو أن نأمن ونتخطى القلق والتوتر والخوف، الحب هو أن يبقى حبيبك هو أمانك الوحيد. ❤️

وفاء الشقيري.

في أغنية بهاء سلطان الجديدة في كوبليه بيقول:
"أصل التفاصيل أجمل بكتير بوجودك فيها.."

فـ بمناسبة التفاصيل أتمنى أن حظي من الدنيا يكون مع راجل بيهتم بتفاصيلي، راجل يعرف عيوني لو زعلانة، راجل يفهمني من نبرة صوتي، راجل يحس تفاصيلي ويركز فيها ويحبها، يركز في ملامحي وضحكتي وكل حاجة.

لأني أنا بحب اللي بحبهم وبحب تفاصيل اللي بحبهم وههتم بكل تفصيلة في علاقتي بيه، فـ يارب لما أتجوز حد يكون بيعرف يحب أو بمعنى أدق بيفهم في التفاصيل.

لأني مش هنسى جملة وحدة صحبتي لما قالت:
"اللي مصبرني على غلب الدنيا التفاصيل الحلوة اللي بينا"
فـ يارب حد يفهم ويحتوي ويضم ويطبطب.
يارب حد شبهي وشبه قلبي وعلاقة زي ما قلبي بيتمنى❤️

وفاء الشقيري.

"أنا جوزي خلاني أبيع دهبي ودهب ماما وطلقني وما رضيش يعترف بأبنه وقالي ده مش أبني".
......
أكتر شخص ضحيت علشانه ضحى بيا، حتى الآن قلبي مش مستوعب الصدمة.
حبيته لما كُنا في ثانوي وأتخطبنا وأتجوزنا بعد 7 سنين وكان حلو طول الخطوبة وأول شهر جواز بعد كده أتغير!
أتغير أوي أو ظهر على حقيقته لأنه ده أستحالة يكون الراجل اللي حبيته ده تعبان ومؤذي لآخر الدنيا.
.....
من بعد أول شهر جواز وشال إيده من مصاريف البيت، بدأت أنا أصرف وأهلي يبعتولي فلوس وأشتري حاجات ليا وليه وأكل وشرب وهو نايم في البيت ومع ذلك كنت بحاول ألاقي أعذار وتبريرات وأقول يمكن تعبان يمكن مش قادر يشتغل، أو بمعنى أصح قلبي كان بيبررله.
.....
حصل حمل وطبعًا ماما وبابا بدأوا يشتكوا من المصاريف بتاعتي وبابا قالي "هو أنا جوزتك علشان أصرف عليكم أنتي وجوزك ولا أيه؟"
وكلامه صح مليون في الـ١٠٠ لكن أنا كنت بقاوح معاه وأخلق حجج فارغة علشان قلة الشغل.
.....
ماما عندها دهب وبابا كان جابلي حلق وغويشتين وسلسلة وخاتم قبل الجواز وقالي دول للزمن الدنيا مش مضمونة وأنا مش ضامن عمري.
هو كان عنده علم بالدهب اللي معايا والدهب اللي عند ماما، فـ بعد مليون خناقة على الشغل وأنه لازم يشتغل.. وكنت خلاص قربت أولد لقيته بيقولي أنه قرر يتحرك ويشتغل.
وللآسف هيفتح مشروع ومحتاج منه كـ بداية ١٠٠ ألف، كان وقتها الدهب لسه ما رفعش وطلب مني مساعدة في المبلغ فـ قولتله أني ما أمتلكش إلا الدهب اللي معايا فـ أخده مني وقالي أول ما ربنا يفرجها عليا هعوضك، صدقته ومشيت وراه زي الأغبياء وباع الدهب فعلًا، وطلب مني بكل بجاحة أني أسرق دهب أمي فـ رفضت فـ قالي طب أعرضي عليها يمكن توافق، عرضت عليها وهي علشان بتحبني ومش بترفضلي طلب وافقت وباعت دهبها وأخد الفلوس وكان المفروض أنه بيعمل مشروع، لكنه في يوم طلب مني أروح بيت أبويا أبات هناك وفعلًا روحت وفجأة أتخانق معايا وقالي ما تجيش البيت لو رجعتي هطلقك وحلف يمين، وفضلت اسأل نفسي عن غلطي؟ يمكن ألاقي سبب يخليه يعمل كده؟ وبردو مش لاقية أسباب، أخدت ١٥ يوم بيت أهلي وبعدها كنت خلاص هولد فقولت أروح أجيب حاجة البيبي وحاجتي من الشقة.
وصلت هناك لقيته ماشاءالله معاه وحدة وأكتشفت أنها مراته بورقة عُرفي وبعد معاناة أكتشفت أنه فلوس دهبي أنا وأمي هي اللي أتجوزها بيها لأنه البيه عملها فرح كبير في بلدها لأنه أرملة وبتاخد معاش أبوها فـ علشان كده ما كتبش رسمي وكمان طلع بيها مصيف وأتفسح وعاش حياته وكل ده بفلوسي أنا وأهلي.
......
واللي مش عادي بقا ومخليني هموت حتى الآن هو أني أزاي أكتر حد حبيته يعمل فيا كده؟ لأن البيه رفض يعترف بالبيبي أو يكتبه بأسمه وقالي ده مش أبني وعملنا تحاليل DNA وأثبت فعلًا أن الطفل أبنه ورفض أنه يسجله بأسمه علشان ما يصرفش عليه وقالي نصًا أنا أخدت اللي عاوزه منك ويالا غوري لا عاوز أشوفك أنتي ولا أبنك تاني..
وحاليًا أبني معايا وأنا اللي بصرف عليه وما يعرفش حتى شكله أيه؟
لكن السؤال اللي يوجع بجد بقا ليه عمل فيا كده وهو ما شافش إلا كل خير مني؟

#جُمل_بلسان_أصحابها.
وفاء الشقيري.

النهاردة وحدة صحبتي سألتني:
"ليه رفضني من غير سبب رغم أني أنا عملت علشانه كُل حاجة؟"

السؤال هِنا بقى "ليه الإنسان طبعه نمرود؟"
ليه التكبر على نعمة ربنا أدهالنا؟ ليه حد يهجر قلب بيحبه!

قالت:

صحيح ماحدش عارف الخير فين؟ لكن أنا كان نفسي الخير يكون معاه هو.!

#رسائل_من_كل_قلبي.
وفاء الشقيري.

وحدة صحبتي منفصلة عن جوزها أمبارح قالتلي:
"أنا لو بإيدي أختار تاني هختاره هو، وده اللي قاهرني إني لسه قلبي عايزه، كأن طفل تاه مني، أنا من ساعة ما عرفت أنه زعلان وأنا ببكي عليه زي المجنونة، ورجعت لحالتي النفسية السيئة، وبقيت أتعب وأعيط بصويت، لسه مستنياه يجي يصالحني، كأنه سابني أمبارح".

السؤال هِنا بقى: ليه إنسان يكون عارف أن في وحدة بتحبه بالطريقة دي وبسهولة يمشي؟ أعتقد لو في أجابة مقنعة هتكون أنه إنسان ما بيقدرش قيمة الحب.

وفاء الشقيري.

-
كأنه خد قلبي في إيديه وهو ماشي، زرع جوايا شوك لأي راجل غيره.

#رواية_سيسيليا | ٢٠٢٣

"اتأكدت أني بحبك النهاردة، لما حسيت أني ممكن أخسرك قلبي خاف، رغم أنه طول عمره جامد وعمره ما هاب فراق حد، لكن إنتِ بالذات خوفت أنك تفارقيني، أنا مغرم".

....
مرة حد قالي عاوزة تتأكدي من مشاعرك أتجاه حد؟ شوفي إنتِ خايفة على فراقه أد أيه؟

المشاعر الحقيقية تُقاس بالخوف من الخسارة والخوف من البُعد والخوف من الهجر.

اللي بيحب بجد بيخاف يخسر اللي بيحبه، بيخاف يكدب فـ يخسر اللي بيحبه، بيخاف يأذي فـ يخسر اللي بيحبه، بيخاف عمومًا ويترعب من خسارة اللي بيحبه، اللي هان عليه خسارة حبيبه ما حبش أو يمكن كان فاهم الحب غلط، أنما اللي بيحب ما بيسيبش فرصة للخسارة، لأنه ما بيفكرش إلا في أزاي يحافظ على اللي بيحبه.

وفاء الشقيري.

قالت:

أنا الليالي الخريفية دي بتخليني أعيط من قلبي، لإن تقريبًا أغلى حاجة خسرتها، خسرتها في الأيام دي!

#رسائل_من_كل_قلبي.
وفاء الشقيري.

كان ليا صديقة مريضة نفسيًا وبتجيلها نوبات هلع وبتقاوم الأكتئاب ومتدمرة فـ مرة جت سيرة علاقتها بـ جوزها قالتلي: "هو بيحترم تعبي النفسي، بيقدر أني مش دايمًا حلوة، بيحترم مخاوفي، بيحاول يساعدني بمليون طريقة ومتمسك بيا رغم عيوبي ومرضي، أنا حاليًا أفضل من الأول أنا قبل ما أعرفه كُنت متدمرة خالص".

فـ أعتقد أن الشخص الصح هو اللي يعرف يعالج ويصلح ويرمم حاجات مالوش دخل فيها، هو الشخص اللي في وجوده أحنا بنكون أحسن، شخص نشوفه نهدى ونسأل معقول في حد حلو كده!!

وفاء الشقيري.

النهارده توقفت قدام جملة يعني أيه شخص آمن بالنسبة لك؟
آمن يعني: لما أحط دماغي على كتفه الحِمول تخف.
-يعني شخص يشوف عيوبي وأشوف عيوبه ونقبل بعض.
-شخص عاوزني لشخصي بعيد عن أي مميزات فيا.
-شخص يخلق حكايات معايا، يسمعني ويفهمني ونتقاسم الأكل والحزن والمشاعر.

أنا شخصيًا بصب الحب صب على قلب اللي بحبهم فأتمنى أني أتحب بنفس الطريقة، شخص آمن من وجهة نظري أني ما أتعبش وأنا معاه، بالعكس ده إيديه هي اللي تمسح وجع الدنيا، لأني ومن خلال معرفتي بيا أنا شخص حنون آمن لأبعد حد فأتمنى أن أقع على طير من نفس فصيلتي بجد.

واثقة مليون مرة أن الحياة هتكون أحن وألطف. 💕

وفاء الشقيري.

"مرات أبويا كان بترضع أختي كولا، وسابت أخويا ياكل حشيش علشان يموت، وأنا أدتني لناس قرايبها علشان يدبحوني لكن الحكومة أنقذتني".
.....
أسمي "هبة" من منطقة شعبية في القاهرة وللآسف منطقتنا دي أكتر منطقة فيها جريمة ومشاكل وأذى مبالغ فيه.
ماما كانت مريضة بالضغط وفي يوم جالها نزيف بالمخ وأخدت أسبوع في المستشفى وحياتها أنتهت.
أنا كُنت وقتها في 2 ابتدائي، أختي "جنى" كانت 3 شهور، وأخويا "حسين" 4 سنين ونص.
أبويا للآسف مُبتلي بالشرب، بيشرب كُل أنواع المخدرات اللي ممكن تتخيليها، طول الوقت تايه ومش مركز وأمي الله يرحمها هي اللي كانت بتاخد بالها مننا ولما ماتت جدتي أم أبويا رمتنا قالت أنا ما أتحملش مسئولية أنا ست كبيرة وجوزي راجل كفيف وحملهم صعب، فـ كان أبويا مش قدامه إلا حل واحد وهو ''الزواج''.
حصل وأتجوز خلال 6 شهور، أتجوز جارتنا المنفصلة عن جوزها من حوالي 3 سنين، والست تم أختيارها بناء على أدبها وأخلاقها العالية، وكُله كان شايف أن هي بتتقي الله فـ هتعاملنا زي أولادها خصوصًا أنها مخلفة ولد وفاهمة وعارفة يعني أيه ضنا؟
.....
أول أسبوع جواز أحنا كُنا واخدينه عند جدتي أم أبويا وبعدها روحنا الشقة مع مرات أبويا، وكان أبويا نزل الشغل وهو بيشتغل من الصبح لحد الساعة 7 بليل، اللي بيشتغل بيهم بيجيب بيهم مخدرات وأكل لينا فقط، عمره ما جاب هدوم ولا أي أحتياجات تانية لينا هو بيجيب أكل وبس.
وأحنا وقتها كُنا أطفال مش فاهمين أي حاجة.
وبدأت المعاملة الجافة من مرات أبويا تظهر.. كانت بتخليني أمسح الحمام، وأغسل السجاد وأدخل المطبخ أغسل المواعين وكانت تضربني ضرب جامد وتقولي "أنا أصلًا كارهة حياتي مش عارفة ليه أتجننت في مخي ووافقت أتجوز".
.....
كانت أختي الصغيرة خلاص قربت تكمل سنة والمفروض أنها بترضع لبن صناعي لكن كانت مرات أبويا تشتري الكولا وتشربها لها طول الوقت، أنا كُنت طفلة ومش فاهمة كويس لكن كُنت أقولها هي جعانة أديها أكل أو لبن تقولي لا الكولا أحلى.
وكانت تشيل مننا الأكل طول النهار وأول ما يجي أبويا تاخدنا كُلنا ناكل معاها وتدخلنا الحمام تحمينا وتنضفنا كانت تتلون قدام أبويا جدًا.
.....
في يوم كان أخويا بيلعب في الصالة وأخويا شقي جدًا، فـ كانت في حتة حشيش واقعة من أبويا راحت مرات أبويا قالتله بهزار: "كُلها يا حسين" وأكلها فعلًا وتعب جدًا وراح المستشفى، وأبويا عاقبني أنا علشان مش مخلية بالي على أخواتي.
......
أما أنا بقا كُنت بلعب في يوم فـ بعتتي أشتريلها حاجات من السوبر ماركت وبعدها أروح بيت قرايبها أجيبلها حاجة من هناك، هي قالتلي نصًا "روحي عندهم هيدوكي حاجة ليا أوعي تجي من غير الحاجة لو جيتي من غيرها هضربك".
فضلت مستنية أنهم يدوني الحاجة وبعدها لقيت قريبتها بتحط منديل على وشي وكان فيه مخدر لأني ما حستش بنفسي إلا وأنا في القسم.. اللي حصل بقا وعلشان ليا عُمر أعيش أن قرايبها دول تحصل بينهم وبين جيرانهم خناقة كبيرة وتجي الحكومة تلم كُل اللي في الخناقة وكُل اللي في البيت وسألوني عن اللي حصل وحكيت لهم وقريبتها أنكرت كلامي وقالت أني قريبتها وبايتة عندهم وجت مرات أبويا وأبويا أستلموني بابا كان مخضوض عليا جامد وحكيت له اللي حصل وبردو كدبتني.
.....
وفضلت المشاكل بينا لحد ما كبرت أنا وأخواتي، ومرة قالت لبابا أني بكلم ولد بالكدب ومرة تانية قالت أنها شافتني مع أبن صاحب بابا في مدخل العمارة عملت كُل شيء بشع ممكن حد يعمله مع حد، وفي النهاية أكتشفنا أنها أصلًا بتتعاطي مخدرات وأنواع برشام غريبة وماتت بطريقة بشعة وهي أنها في خناقة جامدة مع بابا زودت في كمية البرشام فـ أتوفت.
......
هي أتوفت لكن أنا وأخواتي أتعقدنا وبقي عندنا عُقد نفسية كبيرة بسببها، وحقيقي الواقع أقسى مليون مرة من اللي بنشوفه في الأفلام، حرفيًا دمرتنا ودمر كُل الحلو اللي فينا، أنا حتى مش قادرة أدعيلها بالرحمة عاشت حية وماتت حية، الله يعوضنا أنا وأخواتي خير.

#جُمل_بلسان_أصحابها.
وفاء الشقيري

-أحنا كُنا بنقول أيه؟

--كُنت بتقولي أنك بتحبني.

-لا، قبلها كُنت بقولك أيه لو تفتكري كده، أرجعي بذاكرة السمك بتاعت دي لكام دقيقة وأفتكري!

--مش فاكرة يا أحمد أنجز! كُنت بتكلمني عن السمك بتقولي أول مرة أعرف أعمله شبه بتاع مامتك.

-لا، بردو يا كتلة الغباء اللي أتدبست فيها.. كُنت بقولك أني بقيت أحسن وأني ثقتي في نفسي بدأت ترجع وتزيد معاكي، رجعتيني لأيامي الأولى وثقتي اللي أتخلقت بيها، رغم الصراعات اللي كانت جوايا لكن قدرتي تعالجيني.

--أنا كُل اللي عملته أني حبيتك، حبيتك بصدق.

-مهو الصدق أساس الموضوع، الصدق هو النجاة والأمان، الصدق هو اللي خلى وحدة بسيطة زيك تسكن قلبي المعقد ده اللي مليان عُقد عاوزة لها سنين علشان تتفك، الصدق هو اللي خلاني أرجع أثق في البشر من تاني، دعمك ليا، عياطك عليا وقت تعبي، وقفتك جنبي، تحملك لحاجات كتير أنتِ كُنتي بكُل سهولة ممكن ترفضيها وتقولي لا مش هكمل، كُل حاجة صادقة منك أدتني قصادها ١٠٠ كيلو من الشعور الحلو وأهمهم الثقة بالنفس.

--أنت تستحق! أنا ما عملتش المستحيل، أنا أتعاملت باللي في قلبي يا أحمد.

-إنتِ جميلة، وصدقيني المستحيل في الزمن ده حد شبهك، حد بيتعامل باللي جوة قلبه، حد صادق لأنك تعرفي أيه أعظم شعورين ممكن يوصلهم الإنسان على خط العمر!؟

--أيه يا حبيبي؟

-يتحب بصدق، وثقته في نفسه وفي اللي حواليه ترجع من تاني، وهي الدنيا أيه غير مشاعر واضحة وحب بجد والحب اللي بجد هو اللي بيزرع جوانا كُل أحساس جميل أجملهم الثقة بالنفس، لكن لو مش هكون ببالغ يعني أجمل أحساس حسيته حبك وأحلى حاجة في الدنيا إنتِ، هاتي حضن لأنك تستحقيه يكفي أنك عاملتيني كإنسان، فـ مليون شكرًا أنك هِنا ومليون شكرًا على السمك القمر ده.

--شكرًا لأنك بتقولي شكرًا، كفاية أنك مقدر مشاعري، بموت فيك.

وفاء الشقيري.

-عارفة لما توقعي في راجل من اللي بيتقال عنهم بيجوا مرة وحدة في العمر دول! أهو نفس اللي حصلي في حكايتي معاه، أنا وقعت في أحلى راجل في الكون، راجل لو فضلت أحلف أنه مافيش حلاوته من هنا لحد مليون سنة مش هوفيه حقه بجد.

راجل حنين وفاهم في التعامل مع الستات والأحلى أنه مخصصلي كل خميس ليا لوحدي، وعدني قبل الجواز وقالي "كل خميس هخطفك من العالم ونكد الأيام نغيب غيبة حنينة ونرجع بعدها للروتين اليومي عادي، كل خميس معايا يا حلوة هيكون جنة ربنا على الأرض، ده أنا واللهِ ما عاوز إلا رضاكي".

بصراحة ما صدقتوش.
معقول أصلًا في رجالة حلوة كده؟ دي الرجالة ما بتصدق تهرب من ستاتها، معقول ده هيخلي كل خميس جنة؟ عمومًا اديني مكملة معاه والمية تكدب زعيم الغطاسين.

أتجوزنا، عارفين في وصف جوازتي منه أقول أيه:
"كل الأحلام بقيت في حضني، كل حلاوة العالم ملكي".
عارفين كوبليه الست في أغنية أمل حياتي لما سألت أحن سؤال في تاريخها وقالت:
-أحكيلي قولي أيه من الأماني ناقصني تاني وأنا بين أيديك؟
مش هبقى ببالغ لو قولت كل الأماني أتحققت بوجوده، حبيبي يستحق الحب كله.

ما علينا تعالوا أحكيلكوا على كام خميس حلوين من اللي جربتهم معاه أصلنا لسه متجوزين من كام شهر.
في خميس بتاريخ 26 أبريل خدني وسافرنا يوم صد رد الغردقة.
وخميس تاني كنا في مايو تقريبًا يوم 14 لففني كل كافيهات الأقصر، وصورني وعملي سيشن حلو أوي شبهه، هو احلى من كل السيشنات، هو أحلى من كل الصور.

وخميس ورا خميس وأنا بحبه اكتر واتأكدت أنه مش كداب.
ونظرًا لأني النهارده الخميس كان عنده فكرة مختلفة جدًا، النهارده عملي الغدا، أول مرة يدخل المطبخ من أول الجواز عملي رز معجن وسلطة ناقصة ملح وبطاطس محروقة واللحمة نية بس قدر ولطف أنه ما ولعش في المطبخ اللي مكلف عليا فوق الـ 80k جنيه ده.

أينعم هو مابيعرفش يعمل أكل لكنه عرف يحببني في الجواز والحياة، عرف يخليني أكمل وقدر يقنعني أنه الدنيا حقيقي فيها رجالة حلوة، واللي يقولك الدنيا مافيهاش رجالة بتدلع ستاتهم قوليلي كداب وفاء جوزها مدلعها، ده نن عيني ولا في زي حنيته.

هو فاكر أنه كل خميس بيسعدني والحقيقة أنه السعادة الحقيقية جاتلي معاه..
أنا بقيت أحسن بيه، أمراضي النفسية كلها أتمحت معاه، أنا حبيتني أوي، حبيتني من حبه ليا، هو جميل وحنين ومختلف وأفكاره مختلفة في الحياة.

كلت الاكل المحروق الني غصب عني، حس بيا قالي:
-واللهِ يا فوفا كنت عاوز أعملك مفاجأة بس الأكل باظ عمومًا ألبسي هنخرج الشارع أفسحك.

خرجت معاه، كان ماشي واخدني في حضنه، عمرنا في مرة ما خرجنا إلا وهو مكلبشني ومخبيني جواه تقولوش هتخطف منه! أول مرة أشوف راجل بيخاف خوف البرد على مراته كده.

مشينا في الشارع، جابلي أيس كريم وشيبسي ومولتو فراولة وبيبس.
دلعني كالعادة وغنالي مع أنه صوت وحش بس أنا بحب أسلوبه وهو بيغني أوي.

وبعدها قررنا نروح تعبنا من اللف، وحاليًا في الأستعداد للخميس الجاي، وحقيقي حياتي من ساعة جوازنا وهي منتهى الـ "يا هلا بالخميس".

هلا بالخميس.
هلا بالخميس.
هلا بالخميس.

ده أنا حبيت الخميس من كل قلبي، تقريبًا هو اليوم الأساسي والرئيسي للدلع.
ما توافقيش تتجوزي أي راجل والسلام، ما توافقيش تتجوزي راجل مش بيدلعك، ما توافقيش تتجوزي علشان كبرتي في السن أستني اللي يروقك ويدلعك ويحبك ويحببك في روحك.

أستني الحلو اللي في وجوده تحلو حياتك، وطول أيامك تبقى يا هلا بالخميس وهلا بالحب وهلا بالدلع، أستني الراجل الصح والحياة الصح مهما طالت الأيام أستني وثقي أنك هتقابلي راجل يستحق أنك تستنيه.

وفاء الشقيري.

"
حتى كلمة "غليان"
أعتقد أنها مش كفيلة توصف الفوران الداخلي..))
لأني ساعات بحس أني اللي جوة قلبي شيء من جهنم.

وفاء الشقيري.

قالت:

كُنت بستنى أوقات زعلنا مخصوص علشان أقنع قلبي أنه لا مش هو ده!

#رسائل_من_كل_قلبي.
وفاء الشقيري.

https://x.com/WElshegairy?t=wtnhp5UkfPwyElkJwpOQSA&s=09

لينك تويتر الجديد
علشان القديم مش عارفة أرجعه.💔

دايمًا في كلمة جميلة بتتقالي من أصحابي وأهلي من غير ما يحسوا بجمالها وهي كلمة "كانت ناقصاكي"

ماما لو راحت مشوار وأنبسطت وأنا مش معاها وترجع البيت اسألها أنبسطتي؟ تقولي واللهِ "كانت ناقصاكي"

صحابي كلهم لما بيكونوا في أي فرح أو تجمع وأنا ما أحضرش واسألهم أيه الجو كان حلو يردوا "كانت ناقصاكي"

تكاد تكون كلمة بتتقال طول الوقت لكنها مش عادية أطلاقًا ولا تأثيرها على قلبي عادي، وأتعلمت منها أني طالما بحب حد بعبرله بيها وأقوله أن الشيء ده كان ناقصك.

فأعتقد ومن وجهة نظري أنه مافيش ألذ من كده طريقة نعبر بيها عن السعادة المش مكتملة في غياب حد بنحبه عن حدث في حياتنا، لأنه أكتر حاجة تُشعر الإنسان بالدفء أنه يحس أنه اللي بيحبهم ويحبوه حياتهم بتنقص من غير فعلًا.

وفاء الشقيري.

قالت:

بنخسر حاجات غالية كتير وبعدها ما بنرجعش زي ما كُنا زمان، وأغلى حاجة خسرتها كانت هو.

#رسائل_من_كل_قلبي.
وفاء الشقيري.

قالت:

أنا كُنت شاكة في خيانته ليا، لكن في يوم رجع البيت وهو مغير هدومه الداخلية فـ بعدها أكتشفت أنه متجوز عليا.

#جُمل_بلسان_أصحابها.
#المجموعة_القصصية_الجديدة.

"التقدير هو وقود العلاقات".

التقدير أثناء المرض، تقدير الخوف
تقدير قلة الحيلة، تقدير ظروفك ومشاعرك
التقدير بكل أشكاله هو أقوى سبب لبقاء العلاقات
لأنه أي علاقة في الدنيا مهما كانت قوتها لو خالية من التقدير مش هتكمل، التقدير عمومًا في مقدمة مقومات العلاقات.💗

وفاء الشقيري.

"كُل يوم بحاول أكون كويسة، لكن مش بعرف أتخطى مشهد أنتحار أبويا، أنا عيشت اللي فات وهعيش اللي جاي كُله بحاول بس أتعافى وللآسف أنا مش بتعافى".

أحنا 5 بنات وولد، أخويا توفى قبل وفاة أبويا بـ سنة.
خلال السنة دي أحنا حياتنا أتغيرت تمامًا.
أخويا لما أتوفى كان 4 سنين لأن أمي جابته بعد ما خلفتنا أحنا الـ 5.

كُنا كويسين ومبسوطين وحياتنا إلى حد ما ماشية بهدوء، أمي ست بسيطة بتحب القرآن والذكر، أخواتي كُلهم خريجين من كُليات قمة، وعندنا مرات عم سيئة جدًا جدًا.

الست دي كانت عايشة معانا في نفس البيت وكانت من الناس المؤذية بكُل الطرق.. سِحر وأعمال وكذب ومشاكل هي هدفها الأول والأخير أننا نطفش من البيت علشان تعيش فيه لوحدها لأنها أكتر من مرة عرضت على أبويا تشتري حقه لكن هو رافض.

أبويا بعد ما المشاكل زادت وأمي بقيت تتعب وجالها السكر والضغط وبدأت وتدخل في مود سيء بسبب الضغط النفسي فكر أنه يبيع لها البيت ونخلص.

وأول ما وافق أنها تشتري نصيبه في البيت قامت رخصت السعر أوي وقالتله أن ده السعر اللي يستحقه البيت، أبويا قالها خلاص رجعت في كلامي ومش بايع وهنا فضلت المشاكل تزيد جدًا.

وجابت ناس وعملت مشاكل مع أبويا، للعلم عمي بيسافر كتير وهي أثناء وجوده ما بتعملش مشاكل.

فالناس اللي جابتهم عملوا مشاكل مع أبويا وضربوه وبعدها بكام يوم أخويا أختفى، أخويا بعد 4 أيام لقيناه غرقان في ترعة قريبة من البلد أحنا ساكنين في قرية وفيها أكتر من ترعة.

للآسف حالة أمي ساءت أكتر، وأبويا تعب وأنا وأخواتي البنات بما أننا كُبار وقفنا قصاد مرات عمي وواجهناها وواجهنا عمي وكالعادة عمي صدقها وما صدقناش وأنتهى الأمر.

آه نسيت أقول أن الطبيب الشرعي قال أن أخويا ما وقعش لوحده أخويا حد رماه في الترعة.

أبويا حس بالعجز وعمل مشاكل كتير مع مرات عمي وحاول كتير يثبت أنها ليها يد في قتل أخويا لكن الكُل شايف أن ده قضاء وقدر والأغلبية قالوله مافيش دليل قاطع يثبت أنها هي.

أبويا كان نفسه في ولد جدًا علشان كده حزن على وفاته، حالته تدهورت وحزن عليه حزن جامد.

أبويا وأمي محافظين جدًا جدًا وبيخافوا علينا من الهوا الطاير، أختي الكبيرة أتجوزت وهي في أولى كلية وأنفصلت عن جوزها لأنها كانت شبه مجبورة عليه من ماما لأنه أبن خالتي، بعدين حبت حد زميلها وقرروا يتجوزوا، أبويا كان رافض الشخص ده جدًا.
لكن أختي صممت وأتجوزته.

وهِنا كانت صدمة الكل أن أختي راحت لعمي ومراته علشان تخلي أبويا يوافق، أختي راحت لأكبر عدوة لينا واللي مفروض أنها قاتلة أخونا وجايبة الأمراض لأمي وأبويا علشان تسندها، عمي ومراته دعموها ومرات عمي طلبت منها أنها تمضي أنها بايعة نصيبها في البيت رغم أن في حياة الأب ماحدش ينفع يكون له ميراث لكن مش عارفة أيه اللي حصل لدماغ أختي.

وبعد كتير من النقاشات والخناقات والصراعات أبويا قالها أتجوزيه بس مش عاوز أعرفك تاني، أتجوزته غصب عننا بحجة أنها المرة الأولى ما عرفتش تختار وأن أهلها اللي أختارولها.

أبويا كان فاكر أنها هترجع في كلامها لكن للآسف أتجوزت وعملت فرح وأخدت عمي ومرات عمي، وفي الفترة دي ماما تعبت وكان علينا ضغط من كل الأتجاهات والضغط خلى أبويا ربط طرحة حوالين رقبته وفارق الدنيا.

مش عارفة بصراحة هو أبويا كان المفروض يستني مش صح؟ أكيد ما كانش النهاية تنفع تكون بالشكل ده، أنا عاوزة أبويا في حياتي وعاوزة حياتي ترجع طبيعية، لأني أختي دي كانت نسمة البيت وكانت مطيعة وفجأة خرجت عن طوع بابا، أنا مش عارفة أعمل أيه! أنا اللي شوفت بابا وهو منتحر والأمر أتحول لطبيب شرعي وقصص كبيرة وكأن الماضي بيعيد نفسه معانا، وفوق كُل ده ما زالت مرات عمي عاوزة أمي تبيع لها نصيبنا من البيت.

#جُمل_بلسان_أصحابها.
وفاء الشقيري.

-بكرة نوفمبر يجي حنين ونكون مع ناس تانية ما تأذيش.

عمرو حسن/ مرة واحد نوفمبر.

"بالصدق أولًا، والمعاملة الحسنة، والرحمة،
والمواقف الطيبة والحب".

باللين تكسب عيني وحبي.
تخاف فراقي وأذايا، ويكون مهمتك تجبر قلبي.
تراعي ربنا في علاقتنا، وتحسسني أني ليا قيمة عندك.

تكسبني بالحنية والدفا والكلمة الحلوة.
تكسبني بأنك تهون عليك الدنيا كلها وأنا وقلبي لا.
تكسبني وتكسب قلبي وتنكتب روحي بأسمك لما أكون مميزة عندك، وأكون جزء مافيش في حياتك أستغناء عنه.
لأني قلبي طلباته بسيطة هو بيتكسب بالود والرضا. ♥️

وفاء الشقيري.

أنا كان نفسي أشوف محاولاتك علشاني، لو محاولة بسيطة حتى أقدر أسكت بيها قلبي اللي مش عارف يبطل يحبك لحد دلوقتي.

أنا لسه عندي أمل ترجع
لسه عاوزاك ترجع رغم أن قلبك مش هِنا
ولسه عشمانة أني أكسب حاجة حبيتها من الدنيا
أنا عمري ما كنت عاوزة أخسرك، لكن تصرفاتك كانت بتقولي أخسريني.

حبيتك وأتمنيتك ودعيت بيك،
كنت بهرب من وجعي ليك، وجعت فيا

حاسة أن الكلام ثابت في قلبي ومش عارفة أقول أيه!
لكن هدعيلك:
"يارب يا حبيبي في غيابي تلاقي وحدة غيري تحبك وتدعيلك".

#رسائل_من_كل_قلبي.
وفاء الشقيري.

"أنت محتاج ثيرابيست يا أحمد! ".
...
دي كانت الجملة اللي قولتهاله قبل ما أرمي الدبلة في وشه وأسيبه وسط كُل الناس بسبب أنه قل قيمتي كتير، أستفزني كتير، أتعصب عليا كتير، وحسسني أني أرخص بنت، رغم خطوبتنا وإصراره عليا لكن بيجي عليا كتير والأسوء أكتشفت أنه مُدمن.

فات سنتين على اللي حصل ده وأنا بعيدة عنه
أول سنة كان حاله بيزداد سوء، أنما السنة التانية بدأ يتغير وسابلي رسالة "طيب شاركي في تعافي حد مُدمن وليكِ الثواب".

حاول كتير وأنا رافضة لحد ما بقي يتعافى فعلًا، وجالي لحد البيت تاني لكن المرة أفضل من المرة الفاتت وقالي "حقك عليا وعلى عيني، إنتِ لما غيبتي تأكدت أن الأدمان الحقيقي هو قربك، ونجاة قلبي في عيونك، أنا أتغيرت، عاوز فرصة".

رغم أني مش من مؤيدي الفرصة التانية لكن قلبي كسب لأني ما بطلتش أحبه، ووصلنا لحد لحظة الزواج وأنا مرعوبة وخايفة أوي، لكنه عالج خوفي بضمة، رجعني أحب الدنيا من تاني!

ودي الذكرى الثانوية الرابعة لجملة
"أنت محتاج ثيرابيست يا أحمد! ".

ومن مميزات زواجي منه أننا:
بنلف في الشوارع زي ما حلمنا.
بنعمل الأكل سوا.
بيشاركني التفاصيل.
والأهم بننام في حضن بعض.

النهاردة باس أيدي وقالي لولا ظهورك وغيابك وهروبك ورجوعك كُنت زماني لسه مُدمن، إنتِ ألذ من الأدمان علشان كده يا وفاء أنا أخترتك.

"العيب فيكم يا في حبايبكم".
لأن المحب بيتغير ويتوب ويرجع لصوابه
المحب بيضحي ويحاول ويعافر
المحب اللي عاوز يطول حبيبه بيخلق من اللاشيء طاقة يقاوح الدنيا بيها، المحب واللهِ يصل.

وفاء الشقيري.

Channel photo updated

قالت:

جدتي مرة كانت مسافرة وفي القطر قابلت وحدة هربانة من أهلها بسبب أنها حامل من علاقة حرام، جابتها معاها البيت وبعد ما ولدت جدتي طردتها وأخدت الطفل وباعته..
ومن ساعتها وأحنا حياتنا أتحولت إلى جحيم ومش عارفة الذنب ده ممكن يخلص أمتى!

#جُمل_بلسان_أصحابها.
#المجموعة_القصصية_الجديدة.

قال:

المفروض الأم أكتر حد يدعم ولاده، أنا أمي كسرتني ودمرتلي علاقتي بأكتر بنت حبيتها في حياتي.!
أنا فعلًا طول الوقت مش بفكر غير أزاي أنتقم من أمي.

#جُمل_بلسان_أصحابها.

-بحبك رغم عدم أقتناعي بفكرة الحب..
بحبك رغم فقدان الشغف والرغبة أصلًا في المناهدة في علاقات مش عارفة نهايتها ممكن تكون أيه؟

-بحبك رغم الخوف والترست إيشوز ومشاكلي النفسية علشان ظهورك صلح كتير باظ على أيد غيرك.

-بحبك رغم الغيرة والخنقة وما تلبسيش ده وما تحطيش روچ زيادة، بحبك رغم كل مواقفك اللي تعصب دي.!

-بحبك جدًا رغم أني كُنت رافضة الفكرة لكن الأمان اللي طلعته من كامل قلبك وحطيته في كف إيدي طمني وخلاني مبسوطة، قالولي زمان لما تحبي هتحلوي، لكن أنا هقول لما حبيتك أحلويت وبقيت مبسوطة ومرتاحة..

وفي الخلفية صوت الست بيقول:
"صالحت بيك أيامي، سامحت بيك الزمن"

وفاء الشقيري.

قالت:

كان نفسي أستهلك مشاعري على شخص صح،
ماكنش نفسي أبدًا يكون هو الشخص الغلط.

#رسائل_من_كل_قلبي.
وفاء الشقيري.

قالت:

أهالينا هما اللي مسئولين عن أمراضنا النفسية، وأنا في المُراهقة غلطت وحبيت، أهلي لما عرفوا موتوني من الضرب ومش بس كده أنا كُنت بصحى من النوم على طفية السجاير في رجلي وأخويا هو اللي كان بيعمل كده.

#جُمل_بلسان_أصحابها.

-

مش عارفة أحب بعده ولا أحب بداله، خد كل المشاعر اللي حيلتي، كأن الحب من بعده حلف ما يزورنيش.

#رواية_سيسيليا | ٢٠٢٣.
وفاء الشقيري.

قالت:

أنا بس عاوزة أعرف أنا كُنت وحشة في أيه معاه؟ علشان رد فعله يكون فراق طعمه مُر بالشكل ده، ده أنا كُنت بحبه أكتر من نفسي واللهِ.

#رسائل_من_كل_قلبي.
وفاء الشقيري.

"دي الشفاعة في الحب كنز،
ويا بخت اللي تلاقي راجل يغفر لها غلطاتها".

سألتها:
هو في حد بيشفع لحد ولا بيغفرله أصلًا..!
ليه هيحبني حد من الرسُل؟

قالتلي:
أدعي إنتِ بس ربنا يرزقك بحد يتقي الله فيكِ
يرزقك براجل يشبه سيدنا النبي.

--ياريت،
يارب يشبه حتى ربع حنية النبي عليه كل صلوات الله وسلامه.

****
مرت الأيام وقابلته..
كأنه عوض الله عن كل ذُل قبله
قلبي أتنهش كتير زمان لكن هو لما ظهر ربط بالحب على قلبي وطبطب بكلامه على خاطري، أشتراني، حسيت أني كان لازم أشوف التعب ده كله قبله، بصراحة هو مكافأة عظيمة.

مافيش غلطة إلا وغفرلها لي وأبتسم،
بينصحني بكُل لين العالم، بيناقشني بهدوء،
بيسمعلي، فاهمني وعارفني كويس.

آخر غلطة كانت صعبة شوية، لأني عندي أضطرابات في المشاعر بسبب أزمات مريت بيها في الطفولة، غصب عني بغلط، وبكل رضا العالم بيغفر.

كُنت رايحة أعتذر ومش عارفة ابدأ كلام منين!
باس كف أيدي وقالي أنا فاهمك صح، ما تعتذريش
نامي جنبي وأنسي كُل حاجة حصلت.

هو مش ملاك وأغلب الوقت بيزعق،
عصبي، نرفوز، لكن بيرجع في أسرع وقت،
بيعذر، بيقدر وبيراضيني.

كفاية أنه من أول يوم جواز بيجي آخر كل يوم ويراضيني بكلامه وأفعاله، بيقولي أنا ماعنديش إلا إنتِ، يعني لو ما بقيتش رحيم بيكِ هبقى رحيم بـ مين بس!
أنتِ من ضلعي يا وفاء، وإن حصل وفي يوم جيت عليكي هبقى بكسر نفسي، علشان كده أنا طول العمر هفضل في ضهرك.

وأتضح أنه أيوا واللهِ الشفاعة في الحب كنز ويابخت اللي تلاقي راجل يغفرلها غلطاتها.

وحقيقي كل ما أشوف معاملته معايا ما بتذكرش إلا قول النبي "أستوصوا بالنساء خيرًا".

وفاء الشقيري.

قالت:

كُل موقف صعب بمر بيه في حياتي، كُل بهدلة بتحصلي بلاقي نفسي ببكي وبقول بس لو كُنت كويس ومعايا دلوقتي ماكنش زمانه ده كُله حصل..
أنا ماكنتش بتفرق معايا المواقف الصعبة وهو معايا.!

#جُمل_بلسان_أصحابها.
#المجموعة_القصصية_الجديدة.

قالت:

حاسة بدوشة في قلبي، نفسي قلبي يبقى هادي.

#رسائل_من_كل_قلبي.
وفاء الشقيري.

قالت:

أنا كُنت ببقى نايمة جنب بابا وأسمعه بيقولها بحبك ووحشتيني وكلام تاني أوحش، متخيلة طفلة في أولى أعدادي تسمع الكلام ده، أنا ما وصلتش للأكتئاب والتعب ده من قليل.

#جُمل_بلسان_أصحابها.
#المجموعة_القصصية_الجديدة.

بمناسبة الصورة الحنينة اللي منتشرة اليومين دول في التايم لاين، حبيت أقولك القواعد العشر لعلاقة زوجية سعيدة:

-صلاتك وقربك من ربنا فرض، صلي لتسكني ويسكن قلبك ويسكن بيتنا.

-ممنوع منعًا باتًا تنامي زعلانة أو معيطة أو برة حضني.

-ممنوع تتخانقي معايا أنا أتخانق معاكي ماشي لأني هجي أراضيكي وبصراحة بحب أعصبك، أنما أنتي ما تتخانقيش معايا حافظي على الرِقة طول الوقت.

-ممنوع الخوف مني، مهما عملتي تعالي صارحيني لو ماكنتش أنا أسمعك وأسندك وأصدقك هيكون مين؟

-خصوصيتك مهمة، موبايلك ماليش دعوة بيه، أنا واثق فيكي وإنتي مراتي والثقة لو أتهزت بين الراجل ومراته يبقى فراقهم أحسن، فـ مهما كانت الظروف أنا عمري ما همسك موبايلك.

-طنشي أي نصيحة من أي حد حتى لو مفيدة، أحنا سوا هنخلق النصايح ونخلق الحب.

-أهلي وأهلك صلة رحم فقط، لا ليهم حق يتدخلوا في حياتنا ولا عاوزين نديهم فرصة لكده أحنا زوجين وحياتنا لازم تكون لينا لوحدنا.

-لو يوم تعبانة قولي ونجيب أكل من برة وأغسلك المواعين، أهم حاجة صحتك ما تتأثرش ولا نفسيتك.

-الخروجات والفسح مش دايمة دي على حسب ظروفي بس والله لو أملك وقت وفلوس لأخرجك كل يوم مكان مختلف، ما تزعليش أنا قدر طاقتي هعمل كل شيء بتحبيه.

-مافيش خروج إلا لبيت أهلك أو صحابك أو مشوار مهم ودي مش حبسة أنا بس عاوز أوضح أنه طلبات البيت عليا والمشاوير الصعبة عليا والراحة ليكي، أنا جايبك معززة مكرمة من بيت أهلك علشان تفضلي معززة مكرمة بردو في بيتي.

في النهاية أنا مبسوط ومش عاوز ولا حابب إلا حياتي معاكي وأجمل لحظات الدنيا اللحظة اللي جمعتني بيكي، يا ونسي وسكني وسكة النجدة من دنيا الهلاك.

في الخلفية صوت الست بيقول:.
وأبتديت دلوقتي بس أحب عمري
وأبتديت دلوقتي أخاف للعمر يجري.

وفاء الشقيري.

أول طريق النضج هو أقتناعك التام أنه مافيش شيء يستحق جهدك وعنايتك إلا نفسك

في جروب to be a lady كانت وحدة بتسأل بتقول بقالنا ٦ شهور سوا وما تكلمناش في حاجة قليلة الأدب، عملت skip للبوست وقولت أقولكم رأيي هنا:

"من الحياء أنه حتى لو هو قليل الأدب إنتِ توقفيه عند حده وتضعي حدود في التعامل، مش أي كلام يتقال حتى لو في فترة الخطوبة، ومش أي شيء نشوفه على النت أو بين صحابنا نقلده، العلاقات باظت نظرًا للقرف اللي بيحصل فيها، وأحب أطمنك أنه أي علاقة فيها شيء لا يرضي الله ما بتكملش، وربنا يهدينا جميعًا"

أنا لا داعية ولا كائن ما بيغلطش أنا بشر وواجبي أنشر رسالتي لكل البنات لعل بنت تكون محتاجة الرسالة دي أو ماعندهاش اللي يوعيها، حرام وعيب ياماما، أذا عصيت الله في شيء عاقبك بالحرمان منه، أتقوا الله. ❤️

أمبارح كُنت منزلة بوست عن مخاوفي من خطوة الزواج وأنه ممكن يكون من الرجالة اللي بتعاير بعيوب الطرف الآخر.
والحقيقة أنه مش الجملة اللي صعبة، لا ده أسلوب المعايرة أصلًا أسلوب ردئ وسيء جدًا لا يمت للأخلاق بـ صِلة.

الجملة لم تأتي عبثًا لدماغي لكن أنا كتباها عن مجموعة تجارب لستات أعرفهم شخصيًا
-اللي جوزها بيعايرها بأماكن غامقة في جسمها.
-اللي جوزها بيعايرها بأنها مش بتعرف تتسهوك زي بقية الستات.
-اللي جوزها بيعايرها بخناقاتها مع أهلها، وهكذا..

أغلب الستات بتتعاير وساكتين ومكملين علشان البيت والعيال رغم أنه لا دين ولا عُرف قال أن الإنسان يتعاير بالشيء اللي فيه..
أزاي بجد؟ تبقوا تحت سقف واحد وتعايروا بعض!
المعايرة شيء وقح وبيبوظ العلاقات، أصل الحكاية حكاية ثقة فالنهاردة شخص وثق فيك وأتجوزك وحكى أسراره ليك تقوم تعايره؟ هي دي مكافأة نهاية الخدمة يا متربي؟
بلاش أوقات الخناقات تتعموا وتتهبلوا في التصرفات، لإن الخلافات بتنتهي والناس بترجع تاني لبعض لكن بيكون في شروخ ما بينهم ومليون حاجز.

أصل الزواج مودة ورحمة وعلى الطرفين التعامل بما يرضي الله، ومهما كانت الأسباب ما ينفعش تعاير/ي حد، أتقوا الله وأتعلموا أزاي تكونوا ناس كويسة سوا، وأتعلموا تصونوا اللي معاكم في علاقة.

أتربوا وبعدين أتجوزوا.

وفاء الشقيري.

-اللحظة اللي خايفة منها ومرعوبة هي لحظة "عقد القران"
الموضوع مرعب بالنسبة لي جدًا لإن ده أهم قرار على خط العمر، أهم من التعليم والشغل وكل حاجة.

مرعوبة وخايفة يكون شخص سلبي ويجبرني نكون بيت شبه بيوت كتير لا ليها طعم ولا معنى ومكملين علشان ما نهدش البيت والعيال ما تتشردش وتتظلم.

مرعوبة أنه يكون مش حنين ومالوش في الطبطبة أو يحملني مسئولية البيت كاملة، أو يكون من الرجالة اللي بتعاير بعيوب الطرف الآخر، مرعوبة من كل حاجة واللهِ وأتمنى أني ألاقي حد يشبه قلبي في كل شيء.

يشبه قلبي في الحب والقلق والخوف
يشبه قلبي في الرحمة والمحبة والدفا
يشبه قلبي في كل تفاصيل الحياة

أنا حلوة وحنينة وفي اللحظة دي هيكون هو أهم ضلع في مثلث حياتي وهو الأغلى والوحيد الساكن جوة القلب، هكتبله عمري كل بأسمه، هعيش له وهضحي علشانه، هسمعله وأشجعه وأطبخله كل اللي نفسه فيه، هخلي حياته جميلة وهعمل حاجة تأكدله أنه أختار صح، هصنع له جنة واللهِ خصيصًا له.

فـ يارب أنت وحدك اللي عالم بطيبة قلبي وحنيتي المفرطة فاللهم أرزقني براجل يتقي الله فيا، ويحبني أضعاف مضاعفة لحبي له، يارب يكون طيب وجميل يسندني ويراضيني ويحن عليا، يارب ما تخيب أملي في أختياري ولا توجع قلبي في شريك العمر، يارب يكون يستحق قلبي وحبي، أنا عاوزة بس راجل يقدرني ويفهم معنى الإنسانية ويعاملني زي ما قالوا الله ورسوله.

وفاء الشقيري.

"أنا أتخذلت تمامًا من كل الدنيا أهل وصحاب وكله كله، ما بقاش ليا إلا بُكايا والأيام اللي بحاول أعديها دي."

كتبت الجملة دي في ورقة وشخبطتها وكملت عياط ودخلت المحاضرة بعد ما مسحت دموعي وقاومت زي العادة.

-تفتكري الأيام هتعوضنا؟
--جايز ربنا رحيم، قولي يارب.
-يارب.

مشيت وأنا مش عارفة متجهة لفين، بس كنت طول الوقت ببكي..!
هوصل لأيه؟ مش عارفة، تعبت!

فضلت ماشية لحد ما قابلت حد وسألني:
-ناقصك حاجة؟
--عاوزة أبقى كويسة.
-قربي منه وأنتي تبقي عال العال
--من مين؟
-من ربك، هو اللي في أيديه النجدة الرب طب وطبيب الرب علاج ودوا، الرب قربه رحمة وفرحة وراحة، روحي له.

رددت كلامه في دماغي وقررت أن أصلي لأني كنت منقطعة من فترة كبيرة أوي.

وفي يوم ٢٠/٨/٢٠٢٠ من ٤ سنين كتبت المسدج دي لوحدة صحبتي وقفلت الداتا.. ونمت بعدها.

صحيت على حلم قبل الفجر شيخ بـ دقن ولابس جلابية بيضة بيقولي "صلي يا وفاء، صلي".
قومت أخدت حمام وصليت الفجر لأول مرة من سنين طويلة.

بعدها أتكرر الحلم وحالي نفس الشيخ وهو بيقول حاجتك مقضية وقلبي هيتجبر بس أنتي ما تبعديش عن سكة ربنا أبدًا.

بدأت اقرأ عن الصداقات ودورها الفعال في تحقيق الأحلام.
كنت بتصدق بأقل شيء ممكن، وبحاول ما أقطعش في الصلاة.
أنتظمت ٣ سنين لحد من سنة بالظبط كنا في شهر أغسطس بردو، حد قابلني وسألني:
-مخطوبة؟

بعد أسبوع بالظبط لقيته بيتقدم، كنت خايفة ومرتبكة لكن قعدت معاه وفهمته كل شيء أنا محتاجاه، أنا مش عاوزة كتير أنا عاوزة حد يفهمني ويحتويني ويعيش ليا مش عليا، لقيته بالملي شبه أحلامي.

حد حلو، عارف ربنا، شاطر في شغله، نضيف أوي في نفسه، بيحب الشياكة والأهم أنه مش بخيل نهائي.

حبيته بطريقة غبية، سألت نفسي هل كنت بحب قبله بجد؟
بيساعدني أكون أفضل طول الوقت، وعنده صبر عليا ماحصلش.

أتجوزنا بالظبط من شهرين ونص،
حببني في الزواج والرجالة بعد ما كنت بخاف منهم.
طبطب عليا أول ليلة زواج وقالي:
ما تخافيش أنا هكون رحمة ربنا بيكي، هدلعك دلع ما حصلش، هنساعد بعض في شغل البيت بس الأكل ما بعرفش فـ سامحيني، دستور بيتنا القرآن.. القرآن يا وفاء، كل اللي مكتوب في القرآن هننفذه، ما تخافيش مني أنا جايلك علشان أنفذ مقولة رفقًا بالقوارير.

بعدها جالي حلم وكأنه ربنا بيتأكد من فرحتي بالرزق العظيم ده، جالي نفس الشيخ وسألني:
-أجُبر قلبك؟ الله لا يخذل عبدًا قصده وأستنجد به.

ودي تأكيد لجملة "اللي في أيديه النجدة الرب طب وطبيب "

القرب من ربنا رحمة وفرحة وحياة جديدة
الرضا مربط الفرس والدعوات بتحقق المراد
ربنا رحيم عليم ببذرة العبد اللي بيستنجد بيه وعمره ما كسر خاطر مظلوم، أفضل هدية قدمهالي ربنا كانت الزوج الصالح كما يجب أن يكون.

الدنيا بالنسبة لي تكمن في وجوده، ألف شكر لله تعالى على رحمته بيا، وجبر خاطر كل إنسان نفسه في شيء.

أطلب من ربنا أطلب طول الوقت ربنا كرمه واسع♥️

وفاء الشقيري.

قالت:

واقعة في غرام أي حد بيراضيني وزعل قلبي مش بيهون عليه، ولا عمره مرة سابني لوحدي،
واقعة في غرام الشاريين لخاطري.

#رسائل_من_كل_قلبي
وفاء الشقيري.

تعالوا أنستجرام
https://www.instagram.com/reel/C-nV6Kcs8bI/?igsh=MWZ1NnFqN2V2Nmdhbg==

عندي محتوى مفيد جدا هناك
سيبوا مسدجات بكل الأسئلة اللي بتدور في دماغكم وهرد عليكم بريلز❤️

الغريب في الأمر أني قبل الزواج كل الناس كانت بتخوفني من الخطوة دي..!
ناس تقولي أنه هيهملك وناس تاني تقول هيخونك، وغيرهم يقولوا أنه في أوقات مرضك هيرميكي بيت أهلك لكن لا.

أنا لقيت العكس! لقيت سند وونس وأحتواء.
لقيت راجل ساندني بقلبه وعينه، راجل ما يتعوضش.

راجل بيعاملني على نهج الرسول وقانونه الأول هو رفقًا بالقوارير، راجل بيخاف ربنا وبيتقي الله فيا وبيخاف عليا وعلى زعلي.

راجل بالمعنى الحرفي للكلمة.
يدرك معنى القوامة والرجولة والدفء.

والحقيقة أني لسه كنت بقول لمرات أخويا أنه الهدف من الزواج عمره ما يكون فلوس ولا مظهر الهدف هو راجل حنين ويعاملك بما يرضي الله لأن يشهد الله من يوم ما دخلت بيته وهو أبن حلال ومطمني.

أحرق الاكل يقولي المرة الجاية يظبط.
أنام متأخر ينزل من غير فطار ويقدر التعب.
تحصل مشكلة بيني وبينه ألاقيه كتم في نفسه وعمره ما شهر بيا ولا بسر بيتي وسري لأي حد.
حتى أهله مش بيحكيلهم ربع حاجة عن علاقتنا.

للمرة المليون انا أخترت صح وهو كل يوم يثبتلي ده
وتقريبًا أعظم شيء ممكن تهاديه الدنيا لوحدة ست راجل مريح في الزواج.

رزقكم جميعًا حلاوة ما رزقني به، وجمع بينكم وبين رجال ولاد أصول، لأن الزواج فيه مواقف بتوضح معادن الناس الحقيقة وتكشف الأقنعة.

وفاء الشقيري.

"يعني الجواز عن حب مش حلو؟"

سألت السؤال ده لو وحدة صحبتي بعد أنفصالها من شخص عاشت معاه قصة حب طويلة وبعد الجواز فشلت وأنفصلوا، ردت عليا:

--مش بالمعنى الحرفي لكن أغلب الزيجات عن حب بتفشل، أقتنعي بمبدأ الحلال وأن الشيء اللي بيبدأ قصاد ربنا بيكمل، خلي في قناعتك رضا الله دايمًا وأبدًا..

-بس أنا نفسي في حد يكون عاوزني أنا! عاوز وفاء مش حد عاوزة عروسة والسلام، أنا عاوزة حد عاوزني.

--هيجي، ربنا مش بيزعل حد عشمان فيه، أهم حاجة أتقي الله وأبعدي عن العلاقات الحرام والتجاوزات لأن التجاوزات بتخرب أقوى العلاقات، أو بمعنى أصح غضب الله بيظهر.

-يعني ده أعتراف منك أنك كُنتِ تتجاوزي مع طليقك.

--غفر الله لنا جميعًا كلنا بنتعلم، وأنا واللهِ بنصحك لأني تعزي عليا، وربنا يثبتنا على طاعته ورضاه.

الكلام ده من سنين، كان همي علاقة حلوة زي باقي البنات، لكن كأنه ربنا كان بيحصني أو بيبعتلي مناعة ضد العلاقات الحرام، كنت كل ما أعجب بحد أفتكر كلامها وأصبر وأسكت وأدعي أنه يكون ليا، لكن للآسف ولا مرة حد منهم شافني زوجة لحد ما يأست خصوصًا أنه شكلي مش أوي يعني!

مر وقت لحد ما ماما جت قالتلي:
-وفاء في حد شافك في فرح بنت خالتك وعاوز يتقدملك؟
--شافني؟ متأكدة أنه شافني؟ أنا مش حلوة ولا مُلفتة ياماما هو أكيد شاف حد تاني..
-ياستي بطلي كلامك ده.. ده إنتِ ست البنات وأجملهم، وهنعمل رؤية شرعية شوفيه وأتكلمي معاه.

في الرؤية الشرعية:
أتكلمنا سوا، أول جملة قالهالي بترن في ودني كأنها لسه متقالة لي:
-أنا لما شوفتك حسيت أني عاوز أتكلم معاكي، كأنك تخصيني أوي، فقررت أنه ما بدهاش أنا لازم أتقدم، رغم أني ما أعرفكيش ولا حتى أعرف شيء عن سُمعتك وعيلتك بس مهما تكوني سواء حلوة أو مش حلوة فأنا والله عاوزك وراضي بيكِ وسايبلك زمام الأمر.

صليت أستخارة وبعدها قررت أديله فرصة رغم عدم أرتياحي للفكرة وحاسة أني كنت محتاج أتجوز عن حب أو على الأقل حد من اللي أعرفهم.

وبعد كام مكالمة قررت اني أشكر صحبتي على الكام نصيحة دول لأني لولاها كنت زماني عاكة ومدمرة حياتي مع راجل مش صح وماكنتش هكون نقية كده..

سبحانه تحس أنه ربنا شايلني ليه.
وأنه كان له حكمة في كل حاجة.
ربنا كان بيعفني ويحميني لأنه رزقني براجل نقي تقي يعرف الله قدر معرفته.
لا بيشتم، ولا بيسهر برة، ولا بيأذي ولا بيحب حاجة غيري.

شايف الدنيا بيا وخلاني كل حاجة في حياته كأننا عيشنا أحلى وألطف قصة حب في الدنيا.
صاحبي وحبيبي وكل حاجة ليا وأعظم شيء حصلي معرفته..

مش كل الجواز عن حب بينجح دي حقيقة
أنما كل الحلال بيطمن ويدفي ويعيد تجديد القلب والروح، كل حلال يأتي معاه أمان جميل ما حصلش ولا هيحصل.

عمره ما بخل عليا بفلوس ولا خروجة ولا كلمة حلوة..
وطول الوقت ببقى عاوزة أصلي شكر لله على نعمته اللطيفة دي..

هدفي من كلامي أنك ما تستعجليش في العلاقات وأنتظري اللي يتقي الله فيكي في الحلال وأنتظري الحب الطيب الخالي من التجاوزات وكل ما يغضب الله..

اللهم أرزقكم جميعًا لذة الحلال، ويرزقكم حياة هادية مستقرة مع رجالة تتقي الله فيكم.

وفاء الشقيري.

-تعرف أن أنت الشخص الأخير اللي كنت أتوقع أنه يخذلني،
تعرف أنك كنت صاحبي قبل ما تكون حبيبي..
وتعرف كمان أني حتى الآن مكسوفة أقول للناس سيبتك ليه؟ مكسوفة أقولهم أنك خيبت ظني وكسرت قلبي وأملي وتوقعاتي وطلعت مش جدع، لا لا لا طلعت مش راجل أصلًا..
وتعرف أن الكلمتين دول كمان كتير عليك، سلام يا أغلى رهان خسرته.

#رسائل_من_كل_قلبي
وفاء الشقيري.