وفاء الشقيري.

قالت:

قصة حب 7 سبع أنتهت بـ شلل نصفي، لما سابني فجأة أخدت يومين متواصلين عياط فقط دون أكل أو شرب، والنتيجة أن حاليًا أمي وأخواتي بيدخلوني الحمام ويحموني ويغيرولي هدومي.. أنا فقدت المشي بسببه.!

#جُمل_بلسان_أصحابها.
#المجموعة_القصصية_الجديدة.

-

بنوتة بتفضفض معايا برايفت قالتلي:
"آخر مرة قالي مش هسيبك لدماغك تاني ووعدني أننا مش هنتخاصم بالأيام، ومع ذلك سابني، هو أنا ما أستاهلش يحاول علشاني؟"

سؤال كُل مرة بقا:
طالما هتقدروا تبعدوا بتوعدوهم ليه؟ ليه بقينا نستهون بنفسيات بعض! ليه؟

وفاء الشقيري.

قالت:

أنا كُنت طول الوقت بقول أنها صحبتي الوحيدة، النهارده أنا واصلة لمرحلة أني بدعي على نفسي بسببها وبسبب سوء أختياري ليها.. دي أتجوزت جوزي وحطمت حياتي وبوظت نفسية أبني، حقيقي مافيش أسوء من اللي هي وصلتني ليه؟

#جُمل_بلسان_أصحابها.

بتأثر فيا الحنية بطريقة مش معقولة، نبرة صوت الشخص الحنين، نظرة عيونه، لطف كلماته، ردود أفعاله الحنينة اللي بتأكد صدق قلبه وجماله، كل دي صفات بتأثرني وبتأثر فيا وببقى عايزة أحضن الشخص الحنين بين ضلوعي طول الوقت علشان أعبرله عن مدى حبي له ولحنيته، وحقيقي مهما كان الشخص فيه صفات حلوة هتفضل الحنية أجمل وأعظم صفة وضعها ربنا فيه.
الحنية صفة من الجمال، ويابخت اللي توقعه الدنيا في ناس حنينة.

وفاء الشقيري.

-
لما كُنا سوا كانوا يقولولي أننا شبه بعض في الملامح، لكن هو ما يشبهنيش عمره ما كان ولا هيكون شبهي خاصة في القلوب، طول عمره قلبه قاسي.

#رسائل_من_كل_قلبي.
وفاء الشقيري.

-هو أنت ماشي هادي كده ليه؟ طول عمرك بتحب تسوق بسرعة.

--علشان إنتِ معايا، وإنتِ بتخافي من السرعة!

-أيه ده؟ وأنت مين قالك أني بخاف من السرعة؟

--إنتِ في بداية كلامنا لما سألتك عن العلامة اللي في أيدك يومها قولتي أنك كُنتي في عربية مسافرة مع أهلك وحصلت حادثة بسبب أنه السواق ماشي بسرعة ووقتها أتعورتي والتعويرة سابت علامة، ومن يومها وبقي عندك فوبيا من السرعة.

-ده أنت ماشاءالله على ذاكرتك فاكر كل حاجة أهو!

--مش بنسى حاجة معاكي أو كلام بينا.

-بحبك، بس بردو طول عمرك بتحب المغامرات وبتشوف أنه السرعة أجن مغامرة.

--لكن بحبك إنتِ أكتر، والمغامرة الحقيقية هي حبك، أنا مش عارف أرتب كلامي لكن تعرفي لو طلبتي مني أني أزود السرعة أنا هرفض لأن ده شيء بيخوفك وأنا لازم أكون أمانك.
......
كان قادر يزود السرعة ويختار مغامرته اللي بيحبها وينفض لكلامها كأنه ما سمعوش، كان قادر ياخد سؤالها عن عدم السرعة حجة يزود بيها السرعة ويقول هي اللي طلبت.
لكنه فكر في أمانها معاه، أمانها فقط وأختار مشاعرها ونصفها على خوفها وحبه للمغامرات، ببساطة فضلها على نفسه.
وهِنا ظهور قوي لأسمى معاني الحب "الأمان" لأن الحب هو أن نأمن ونتخطى القلق والتوتر والخوف، الحب هو أن يبقى حبيبك هو أمانك الوحيد. ❤️

وفاء الشقيري.

في أغنية بهاء سلطان الجديدة في كوبليه بيقول:
"أصل التفاصيل أجمل بكتير بوجودك فيها.."

فـ بمناسبة التفاصيل أتمنى أن حظي من الدنيا يكون مع راجل بيهتم بتفاصيلي، راجل يعرف عيوني لو زعلانة، راجل يفهمني من نبرة صوتي، راجل يحس تفاصيلي ويركز فيها ويحبها، يركز في ملامحي وضحكتي وكل حاجة.

لأني أنا بحب اللي بحبهم وبحب تفاصيل اللي بحبهم وههتم بكل تفصيلة في علاقتي بيه، فـ يارب لما أتجوز حد يكون بيعرف يحب أو بمعنى أدق بيفهم في التفاصيل.

لأني مش هنسى جملة وحدة صحبتي لما قالت:
"اللي مصبرني على غلب الدنيا التفاصيل الحلوة اللي بينا"
فـ يارب حد يفهم ويحتوي ويضم ويطبطب.
يارب حد شبهي وشبه قلبي وعلاقة زي ما قلبي بيتمنى❤️

وفاء الشقيري.

"أنا جوزي خلاني أبيع دهبي ودهب ماما وطلقني وما رضيش يعترف بأبنه وقالي ده مش أبني".
......
أكتر شخص ضحيت علشانه ضحى بيا، حتى الآن قلبي مش مستوعب الصدمة.
حبيته لما كُنا في ثانوي وأتخطبنا وأتجوزنا بعد 7 سنين وكان حلو طول الخطوبة وأول شهر جواز بعد كده أتغير!
أتغير أوي أو ظهر على حقيقته لأنه ده أستحالة يكون الراجل اللي حبيته ده تعبان ومؤذي لآخر الدنيا.
.....
من بعد أول شهر جواز وشال إيده من مصاريف البيت، بدأت أنا أصرف وأهلي يبعتولي فلوس وأشتري حاجات ليا وليه وأكل وشرب وهو نايم في البيت ومع ذلك كنت بحاول ألاقي أعذار وتبريرات وأقول يمكن تعبان يمكن مش قادر يشتغل، أو بمعنى أصح قلبي كان بيبررله.
.....
حصل حمل وطبعًا ماما وبابا بدأوا يشتكوا من المصاريف بتاعتي وبابا قالي "هو أنا جوزتك علشان أصرف عليكم أنتي وجوزك ولا أيه؟"
وكلامه صح مليون في الـ١٠٠ لكن أنا كنت بقاوح معاه وأخلق حجج فارغة علشان قلة الشغل.
.....
ماما عندها دهب وبابا كان جابلي حلق وغويشتين وسلسلة وخاتم قبل الجواز وقالي دول للزمن الدنيا مش مضمونة وأنا مش ضامن عمري.
هو كان عنده علم بالدهب اللي معايا والدهب اللي عند ماما، فـ بعد مليون خناقة على الشغل وأنه لازم يشتغل.. وكنت خلاص قربت أولد لقيته بيقولي أنه قرر يتحرك ويشتغل.
وللآسف هيفتح مشروع ومحتاج منه كـ بداية ١٠٠ ألف، كان وقتها الدهب لسه ما رفعش وطلب مني مساعدة في المبلغ فـ قولتله أني ما أمتلكش إلا الدهب اللي معايا فـ أخده مني وقالي أول ما ربنا يفرجها عليا هعوضك، صدقته ومشيت وراه زي الأغبياء وباع الدهب فعلًا، وطلب مني بكل بجاحة أني أسرق دهب أمي فـ رفضت فـ قالي طب أعرضي عليها يمكن توافق، عرضت عليها وهي علشان بتحبني ومش بترفضلي طلب وافقت وباعت دهبها وأخد الفلوس وكان المفروض أنه بيعمل مشروع، لكنه في يوم طلب مني أروح بيت أبويا أبات هناك وفعلًا روحت وفجأة أتخانق معايا وقالي ما تجيش البيت لو رجعتي هطلقك وحلف يمين، وفضلت اسأل نفسي عن غلطي؟ يمكن ألاقي سبب يخليه يعمل كده؟ وبردو مش لاقية أسباب، أخدت ١٥ يوم بيت أهلي وبعدها كنت خلاص هولد فقولت أروح أجيب حاجة البيبي وحاجتي من الشقة.
وصلت هناك لقيته ماشاءالله معاه وحدة وأكتشفت أنها مراته بورقة عُرفي وبعد معاناة أكتشفت أنه فلوس دهبي أنا وأمي هي اللي أتجوزها بيها لأنه البيه عملها فرح كبير في بلدها لأنه أرملة وبتاخد معاش أبوها فـ علشان كده ما كتبش رسمي وكمان طلع بيها مصيف وأتفسح وعاش حياته وكل ده بفلوسي أنا وأهلي.
......
واللي مش عادي بقا ومخليني هموت حتى الآن هو أني أزاي أكتر حد حبيته يعمل فيا كده؟ لأن البيه رفض يعترف بالبيبي أو يكتبه بأسمه وقالي ده مش أبني وعملنا تحاليل DNA وأثبت فعلًا أن الطفل أبنه ورفض أنه يسجله بأسمه علشان ما يصرفش عليه وقالي نصًا أنا أخدت اللي عاوزه منك ويالا غوري لا عاوز أشوفك أنتي ولا أبنك تاني..
وحاليًا أبني معايا وأنا اللي بصرف عليه وما يعرفش حتى شكله أيه؟
لكن السؤال اللي يوجع بجد بقا ليه عمل فيا كده وهو ما شافش إلا كل خير مني؟

#جُمل_بلسان_أصحابها.
وفاء الشقيري.

النهاردة وحدة صحبتي سألتني:
"ليه رفضني من غير سبب رغم أني أنا عملت علشانه كُل حاجة؟"

السؤال هِنا بقى "ليه الإنسان طبعه نمرود؟"
ليه التكبر على نعمة ربنا أدهالنا؟ ليه حد يهجر قلب بيحبه!

قالت:

صحيح ماحدش عارف الخير فين؟ لكن أنا كان نفسي الخير يكون معاه هو.!

#رسائل_من_كل_قلبي.
وفاء الشقيري.

وحدة صحبتي منفصلة عن جوزها أمبارح قالتلي:
"أنا لو بإيدي أختار تاني هختاره هو، وده اللي قاهرني إني لسه قلبي عايزه، كأن طفل تاه مني، أنا من ساعة ما عرفت أنه زعلان وأنا ببكي عليه زي المجنونة، ورجعت لحالتي النفسية السيئة، وبقيت أتعب وأعيط بصويت، لسه مستنياه يجي يصالحني، كأنه سابني أمبارح".

السؤال هِنا بقى: ليه إنسان يكون عارف أن في وحدة بتحبه بالطريقة دي وبسهولة يمشي؟ أعتقد لو في أجابة مقنعة هتكون أنه إنسان ما بيقدرش قيمة الحب.

وفاء الشقيري.

-
كأنه خد قلبي في إيديه وهو ماشي، زرع جوايا شوك لأي راجل غيره.

#رواية_سيسيليا | ٢٠٢٣

"اتأكدت أني بحبك النهاردة، لما حسيت أني ممكن أخسرك قلبي خاف، رغم أنه طول عمره جامد وعمره ما هاب فراق حد، لكن إنتِ بالذات خوفت أنك تفارقيني، أنا مغرم".

....
مرة حد قالي عاوزة تتأكدي من مشاعرك أتجاه حد؟ شوفي إنتِ خايفة على فراقه أد أيه؟

المشاعر الحقيقية تُقاس بالخوف من الخسارة والخوف من البُعد والخوف من الهجر.

اللي بيحب بجد بيخاف يخسر اللي بيحبه، بيخاف يكدب فـ يخسر اللي بيحبه، بيخاف يأذي فـ يخسر اللي بيحبه، بيخاف عمومًا ويترعب من خسارة اللي بيحبه، اللي هان عليه خسارة حبيبه ما حبش أو يمكن كان فاهم الحب غلط، أنما اللي بيحب ما بيسيبش فرصة للخسارة، لأنه ما بيفكرش إلا في أزاي يحافظ على اللي بيحبه.

وفاء الشقيري.

قالت:

أنا الليالي الخريفية دي بتخليني أعيط من قلبي، لإن تقريبًا أغلى حاجة خسرتها، خسرتها في الأيام دي!

#رسائل_من_كل_قلبي.
وفاء الشقيري.

كان ليا صديقة مريضة نفسيًا وبتجيلها نوبات هلع وبتقاوم الأكتئاب ومتدمرة فـ مرة جت سيرة علاقتها بـ جوزها قالتلي: "هو بيحترم تعبي النفسي، بيقدر أني مش دايمًا حلوة، بيحترم مخاوفي، بيحاول يساعدني بمليون طريقة ومتمسك بيا رغم عيوبي ومرضي، أنا حاليًا أفضل من الأول أنا قبل ما أعرفه كُنت متدمرة خالص".

فـ أعتقد أن الشخص الصح هو اللي يعرف يعالج ويصلح ويرمم حاجات مالوش دخل فيها، هو الشخص اللي في وجوده أحنا بنكون أحسن، شخص نشوفه نهدى ونسأل معقول في حد حلو كده!!

وفاء الشقيري.

النهارده توقفت قدام جملة يعني أيه شخص آمن بالنسبة لك؟
آمن يعني: لما أحط دماغي على كتفه الحِمول تخف.
-يعني شخص يشوف عيوبي وأشوف عيوبه ونقبل بعض.
-شخص عاوزني لشخصي بعيد عن أي مميزات فيا.
-شخص يخلق حكايات معايا، يسمعني ويفهمني ونتقاسم الأكل والحزن والمشاعر.

أنا شخصيًا بصب الحب صب على قلب اللي بحبهم فأتمنى أني أتحب بنفس الطريقة، شخص آمن من وجهة نظري أني ما أتعبش وأنا معاه، بالعكس ده إيديه هي اللي تمسح وجع الدنيا، لأني ومن خلال معرفتي بيا أنا شخص حنون آمن لأبعد حد فأتمنى أن أقع على طير من نفس فصيلتي بجد.

واثقة مليون مرة أن الحياة هتكون أحن وألطف. 💕

وفاء الشقيري.

"مرات أبويا كان بترضع أختي كولا، وسابت أخويا ياكل حشيش علشان يموت، وأنا أدتني لناس قرايبها علشان يدبحوني لكن الحكومة أنقذتني".
.....
أسمي "هبة" من منطقة شعبية في القاهرة وللآسف منطقتنا دي أكتر منطقة فيها جريمة ومشاكل وأذى مبالغ فيه.
ماما كانت مريضة بالضغط وفي يوم جالها نزيف بالمخ وأخدت أسبوع في المستشفى وحياتها أنتهت.
أنا كُنت وقتها في 2 ابتدائي، أختي "جنى" كانت 3 شهور، وأخويا "حسين" 4 سنين ونص.
أبويا للآسف مُبتلي بالشرب، بيشرب كُل أنواع المخدرات اللي ممكن تتخيليها، طول الوقت تايه ومش مركز وأمي الله يرحمها هي اللي كانت بتاخد بالها مننا ولما ماتت جدتي أم أبويا رمتنا قالت أنا ما أتحملش مسئولية أنا ست كبيرة وجوزي راجل كفيف وحملهم صعب، فـ كان أبويا مش قدامه إلا حل واحد وهو ''الزواج''.
حصل وأتجوز خلال 6 شهور، أتجوز جارتنا المنفصلة عن جوزها من حوالي 3 سنين، والست تم أختيارها بناء على أدبها وأخلاقها العالية، وكُله كان شايف أن هي بتتقي الله فـ هتعاملنا زي أولادها خصوصًا أنها مخلفة ولد وفاهمة وعارفة يعني أيه ضنا؟
.....
أول أسبوع جواز أحنا كُنا واخدينه عند جدتي أم أبويا وبعدها روحنا الشقة مع مرات أبويا، وكان أبويا نزل الشغل وهو بيشتغل من الصبح لحد الساعة 7 بليل، اللي بيشتغل بيهم بيجيب بيهم مخدرات وأكل لينا فقط، عمره ما جاب هدوم ولا أي أحتياجات تانية لينا هو بيجيب أكل وبس.
وأحنا وقتها كُنا أطفال مش فاهمين أي حاجة.
وبدأت المعاملة الجافة من مرات أبويا تظهر.. كانت بتخليني أمسح الحمام، وأغسل السجاد وأدخل المطبخ أغسل المواعين وكانت تضربني ضرب جامد وتقولي "أنا أصلًا كارهة حياتي مش عارفة ليه أتجننت في مخي ووافقت أتجوز".
.....
كانت أختي الصغيرة خلاص قربت تكمل سنة والمفروض أنها بترضع لبن صناعي لكن كانت مرات أبويا تشتري الكولا وتشربها لها طول الوقت، أنا كُنت طفلة ومش فاهمة كويس لكن كُنت أقولها هي جعانة أديها أكل أو لبن تقولي لا الكولا أحلى.
وكانت تشيل مننا الأكل طول النهار وأول ما يجي أبويا تاخدنا كُلنا ناكل معاها وتدخلنا الحمام تحمينا وتنضفنا كانت تتلون قدام أبويا جدًا.
.....
في يوم كان أخويا بيلعب في الصالة وأخويا شقي جدًا، فـ كانت في حتة حشيش واقعة من أبويا راحت مرات أبويا قالتله بهزار: "كُلها يا حسين" وأكلها فعلًا وتعب جدًا وراح المستشفى، وأبويا عاقبني أنا علشان مش مخلية بالي على أخواتي.
......
أما أنا بقا كُنت بلعب في يوم فـ بعتتي أشتريلها حاجات من السوبر ماركت وبعدها أروح بيت قرايبها أجيبلها حاجة من هناك، هي قالتلي نصًا "روحي عندهم هيدوكي حاجة ليا أوعي تجي من غير الحاجة لو جيتي من غيرها هضربك".
فضلت مستنية أنهم يدوني الحاجة وبعدها لقيت قريبتها بتحط منديل على وشي وكان فيه مخدر لأني ما حستش بنفسي إلا وأنا في القسم.. اللي حصل بقا وعلشان ليا عُمر أعيش أن قرايبها دول تحصل بينهم وبين جيرانهم خناقة كبيرة وتجي الحكومة تلم كُل اللي في الخناقة وكُل اللي في البيت وسألوني عن اللي حصل وحكيت لهم وقريبتها أنكرت كلامي وقالت أني قريبتها وبايتة عندهم وجت مرات أبويا وأبويا أستلموني بابا كان مخضوض عليا جامد وحكيت له اللي حصل وبردو كدبتني.
.....
وفضلت المشاكل بينا لحد ما كبرت أنا وأخواتي، ومرة قالت لبابا أني بكلم ولد بالكدب ومرة تانية قالت أنها شافتني مع أبن صاحب بابا في مدخل العمارة عملت كُل شيء بشع ممكن حد يعمله مع حد، وفي النهاية أكتشفنا أنها أصلًا بتتعاطي مخدرات وأنواع برشام غريبة وماتت بطريقة بشعة وهي أنها في خناقة جامدة مع بابا زودت في كمية البرشام فـ أتوفت.
......
هي أتوفت لكن أنا وأخواتي أتعقدنا وبقي عندنا عُقد نفسية كبيرة بسببها، وحقيقي الواقع أقسى مليون مرة من اللي بنشوفه في الأفلام، حرفيًا دمرتنا ودمر كُل الحلو اللي فينا، أنا حتى مش قادرة أدعيلها بالرحمة عاشت حية وماتت حية، الله يعوضنا أنا وأخواتي خير.

#جُمل_بلسان_أصحابها.
وفاء الشقيري

-أحنا كُنا بنقول أيه؟

--كُنت بتقولي أنك بتحبني.

-لا، قبلها كُنت بقولك أيه لو تفتكري كده، أرجعي بذاكرة السمك بتاعت دي لكام دقيقة وأفتكري!

--مش فاكرة يا أحمد أنجز! كُنت بتكلمني عن السمك بتقولي أول مرة أعرف أعمله شبه بتاع مامتك.

-لا، بردو يا كتلة الغباء اللي أتدبست فيها.. كُنت بقولك أني بقيت أحسن وأني ثقتي في نفسي بدأت ترجع وتزيد معاكي، رجعتيني لأيامي الأولى وثقتي اللي أتخلقت بيها، رغم الصراعات اللي كانت جوايا لكن قدرتي تعالجيني.

--أنا كُل اللي عملته أني حبيتك، حبيتك بصدق.

-مهو الصدق أساس الموضوع، الصدق هو النجاة والأمان، الصدق هو اللي خلى وحدة بسيطة زيك تسكن قلبي المعقد ده اللي مليان عُقد عاوزة لها سنين علشان تتفك، الصدق هو اللي خلاني أرجع أثق في البشر من تاني، دعمك ليا، عياطك عليا وقت تعبي، وقفتك جنبي، تحملك لحاجات كتير أنتِ كُنتي بكُل سهولة ممكن ترفضيها وتقولي لا مش هكمل، كُل حاجة صادقة منك أدتني قصادها ١٠٠ كيلو من الشعور الحلو وأهمهم الثقة بالنفس.

--أنت تستحق! أنا ما عملتش المستحيل، أنا أتعاملت باللي في قلبي يا أحمد.

-إنتِ جميلة، وصدقيني المستحيل في الزمن ده حد شبهك، حد بيتعامل باللي جوة قلبه، حد صادق لأنك تعرفي أيه أعظم شعورين ممكن يوصلهم الإنسان على خط العمر!؟

--أيه يا حبيبي؟

-يتحب بصدق، وثقته في نفسه وفي اللي حواليه ترجع من تاني، وهي الدنيا أيه غير مشاعر واضحة وحب بجد والحب اللي بجد هو اللي بيزرع جوانا كُل أحساس جميل أجملهم الثقة بالنفس، لكن لو مش هكون ببالغ يعني أجمل أحساس حسيته حبك وأحلى حاجة في الدنيا إنتِ، هاتي حضن لأنك تستحقيه يكفي أنك عاملتيني كإنسان، فـ مليون شكرًا أنك هِنا ومليون شكرًا على السمك القمر ده.

--شكرًا لأنك بتقولي شكرًا، كفاية أنك مقدر مشاعري، بموت فيك.

وفاء الشقيري.

-عارفة لما توقعي في راجل من اللي بيتقال عنهم بيجوا مرة وحدة في العمر دول! أهو نفس اللي حصلي في حكايتي معاه، أنا وقعت في أحلى راجل في الكون، راجل لو فضلت أحلف أنه مافيش حلاوته من هنا لحد مليون سنة مش هوفيه حقه بجد.

راجل حنين وفاهم في التعامل مع الستات والأحلى أنه مخصصلي كل خميس ليا لوحدي، وعدني قبل الجواز وقالي "كل خميس هخطفك من العالم ونكد الأيام نغيب غيبة حنينة ونرجع بعدها للروتين اليومي عادي، كل خميس معايا يا حلوة هيكون جنة ربنا على الأرض، ده أنا واللهِ ما عاوز إلا رضاكي".

بصراحة ما صدقتوش.
معقول أصلًا في رجالة حلوة كده؟ دي الرجالة ما بتصدق تهرب من ستاتها، معقول ده هيخلي كل خميس جنة؟ عمومًا اديني مكملة معاه والمية تكدب زعيم الغطاسين.

أتجوزنا، عارفين في وصف جوازتي منه أقول أيه:
"كل الأحلام بقيت في حضني، كل حلاوة العالم ملكي".
عارفين كوبليه الست في أغنية أمل حياتي لما سألت أحن سؤال في تاريخها وقالت:
-أحكيلي قولي أيه من الأماني ناقصني تاني وأنا بين أيديك؟
مش هبقى ببالغ لو قولت كل الأماني أتحققت بوجوده، حبيبي يستحق الحب كله.

ما علينا تعالوا أحكيلكوا على كام خميس حلوين من اللي جربتهم معاه أصلنا لسه متجوزين من كام شهر.
في خميس بتاريخ 26 أبريل خدني وسافرنا يوم صد رد الغردقة.
وخميس تاني كنا في مايو تقريبًا يوم 14 لففني كل كافيهات الأقصر، وصورني وعملي سيشن حلو أوي شبهه، هو احلى من كل السيشنات، هو أحلى من كل الصور.

وخميس ورا خميس وأنا بحبه اكتر واتأكدت أنه مش كداب.
ونظرًا لأني النهارده الخميس كان عنده فكرة مختلفة جدًا، النهارده عملي الغدا، أول مرة يدخل المطبخ من أول الجواز عملي رز معجن وسلطة ناقصة ملح وبطاطس محروقة واللحمة نية بس قدر ولطف أنه ما ولعش في المطبخ اللي مكلف عليا فوق الـ 80k جنيه ده.

أينعم هو مابيعرفش يعمل أكل لكنه عرف يحببني في الجواز والحياة، عرف يخليني أكمل وقدر يقنعني أنه الدنيا حقيقي فيها رجالة حلوة، واللي يقولك الدنيا مافيهاش رجالة بتدلع ستاتهم قوليلي كداب وفاء جوزها مدلعها، ده نن عيني ولا في زي حنيته.

هو فاكر أنه كل خميس بيسعدني والحقيقة أنه السعادة الحقيقية جاتلي معاه..
أنا بقيت أحسن بيه، أمراضي النفسية كلها أتمحت معاه، أنا حبيتني أوي، حبيتني من حبه ليا، هو جميل وحنين ومختلف وأفكاره مختلفة في الحياة.

كلت الاكل المحروق الني غصب عني، حس بيا قالي:
-واللهِ يا فوفا كنت عاوز أعملك مفاجأة بس الأكل باظ عمومًا ألبسي هنخرج الشارع أفسحك.

خرجت معاه، كان ماشي واخدني في حضنه، عمرنا في مرة ما خرجنا إلا وهو مكلبشني ومخبيني جواه تقولوش هتخطف منه! أول مرة أشوف راجل بيخاف خوف البرد على مراته كده.

مشينا في الشارع، جابلي أيس كريم وشيبسي ومولتو فراولة وبيبس.
دلعني كالعادة وغنالي مع أنه صوت وحش بس أنا بحب أسلوبه وهو بيغني أوي.

وبعدها قررنا نروح تعبنا من اللف، وحاليًا في الأستعداد للخميس الجاي، وحقيقي حياتي من ساعة جوازنا وهي منتهى الـ "يا هلا بالخميس".

هلا بالخميس.
هلا بالخميس.
هلا بالخميس.

ده أنا حبيت الخميس من كل قلبي، تقريبًا هو اليوم الأساسي والرئيسي للدلع.
ما توافقيش تتجوزي أي راجل والسلام، ما توافقيش تتجوزي راجل مش بيدلعك، ما توافقيش تتجوزي علشان كبرتي في السن أستني اللي يروقك ويدلعك ويحبك ويحببك في روحك.

أستني الحلو اللي في وجوده تحلو حياتك، وطول أيامك تبقى يا هلا بالخميس وهلا بالحب وهلا بالدلع، أستني الراجل الصح والحياة الصح مهما طالت الأيام أستني وثقي أنك هتقابلي راجل يستحق أنك تستنيه.

وفاء الشقيري.

"
حتى كلمة "غليان"
أعتقد أنها مش كفيلة توصف الفوران الداخلي..))
لأني ساعات بحس أني اللي جوة قلبي شيء من جهنم.

وفاء الشقيري.