فڕۆکە کاتێ هەڵفڕی
کۆی جوانی لەگەڵ خۆ برد
لەوبەر دنیا بوو بە بەهار
لەمبەر دنیا، بەهارێ مرد
ئێستێ ، دڵ خانەی ژاکاوی
خەمێ زەردی ئاودامانە
زەمەن، بەستێنی زریانی
دەم بە هەڵپەی بێ ئامانە
تەنیایی بیاوانێکە
لە پێ ئاڵاوە وەک زنجیر
تەکانی کۆچی ئارەزوو
جمەی بڕی لە حزر و بیر
مەخابن دەستێ دەرنایە
قفڵی دووری بکاتەوە
قورمی مەینەت بچێتەوە
زاخاوی دڵ، بداتەوە
فرۆکە کاتێ هەڵفڕی
هەبوو نەبووی، ئاوەژوو کرد
ڕەنگی زاڵی کارەبایی
چی ڕەنگە، هەمووی لە ڕوو برد
محەمەدفاتێح محەمەدی
ف-نامۆ
لینکی کاناڵ: 👇👇👇👇👇
@namopoem