Mohamed Hossam Khedr

أكتر حد باقدره وباحبه في الله وباشوفه محقق أصعب درجة من التسليم لله هو اللي عايش في مشاكل وضغوط بسبب والده أو والدته أو الاتنين.. سواء بسبب الكبر وصعوبة الطباع أو بسبب إساءات وظلم تجاهه..

لما بالاقيه بيتكلم عنهم بطريقة فيها اعتراف بفضلهم أثناء ما يكون بيحكي الإساءات نفسها.. لما يكون واضح عليه الرضا بالقضاء وعدم السخط بقضاء الله.. لما يحكي محاولاته في ازاي بيضغط على نفسه عشان يبرهم على قد ما يقدر.. لما يدمع أو يبكي من القهر.. لما يكون بيدعي ربنا انه يهديه هو ويهديهم ويقول لي بالله عليك ادعي لي وادعي لهم..

السبب في الدرجة العالية دي من وجهة نظري ان فيه حاجتين اجتمعوا مع بعض:
الأول ان الابتلاء ده الشخص نفسه مش بيكون له يد فيه.. بمعنى انه ما أخدش قرار انه يتولد للأب وللأم دول.. فهو مجبر على الوضع ده من الناحية دي.. ما ينفعش يغيرهم.. ما ينفعش يتبرا منهم..

التاني ان ربنا سبحانه وتعالى أمر أمر واضح مافيهوش لبس ولا فيه استثناءات بالبر بالوالدين.. أب وأم خلفوا عيل فالعيل ده مأمور ببرهم والإحسان إليهم طول عمرهم.. بس كده..

تجمع الحاجتين دول مع بعض يظهر لك الابتلاء وقد ايه هو فعلا صعب.. وقد ايه النجاح فيه يتطلب استسلام كامل لله وطاعة حقيقية وأصيلة لأوامره.. قد ايه الواحد لازم يكون بيحب ربنا أكتر من حبه لنفسه.. بكتييييييييير..

وشوف رحمة ربنا بينا في الآية دي بعد آيات وصانا فيها بالإحسان بالوالدين ونهانا عن الإساءة لهم وأمرنا بالتذلل لهم شوف قال ايه:

"ربكم أعلم بما في نفوسكم
إن تكونوا صالحين فإنه كان للأوابين غفورا"

الأمر لصعوبته -في الحالة اللي باتكلم عنها- ما بيخلاش من شعور بعدم البر تجاههم أحيانا.. من إساءة غير متعمدة.. من انتصار للنفس على اتباع مراد الله ساعات.. وربنا بيتوب على اللي بيستغفره ويتوب إليه من الذنوب دي لما يشوف فيه خير ونية صادقة للبر ويشوف منه مجهود بيبذل في الاتجاه ده..

اللهم لا تقبضنا إلا وأهلونا راضون عنا..
ولا تقبضهم إلا وهم راضون عنا..
آمين..

لو وجدت قيمة في المنشور فانشره.. جزاكم الله خيرا.

ده كله كوم والمستوى الأعلى كوم.. اللي شفناه من فيديوهات المتألهين اللي بيدعوك تعبدهم أو تمجدهم وتطيعهم طاعة عمياء.. ممكن يقول لك لا يجوز تشرك في حبه أحدا.. لا يجوز تعصي أمره.. إذا ذكرت اسمه هيجاب طلبك لأنه هو نفسه اسم الله الأعظم..
الجزء ده مش محتاج توضيح للحلال والحرام فمش هاتكلم كتير فيه..
🔲 علاقته بالأمر بالمعروف والنهي عن المنكر
أعتقد انت ممكن تكون استنتجت من اللي فات هيكون الشخص وضعه ايه هنا.. هو بيكره الأمر بالمعروف والنهي عن المنكر جدا.. وشايف -زي العلمانيين واللا دينيين- ان المفروض دع الخلق للخالق.. وبتتقال مقولات صحيحة في أصلها لكن هو بيسيء استخدامها في غرض فاسد زي ان الطريق إلى الله بعدد أنفاس الخلائق.. سئل ابن تيمية عن المقولة دي فأجاب: إن أراد بذلك الأعمال المشروعة الموافقة للكتاب والسنة كالصلاة والصدقة والجهاد والذكر والقراءة وغير ذلك فهذا صحيح.. وإن أراد إلى الله طريقا مخالفا للكتاب والسنة فهو باطل..
بيعتبر اللي بيحرص على الأمر بالمعروف والنهي عن المنكر مش ناضج.. اتقالت مرة بصراحة كده وكانت مع اقتراح اني أدخل جامعة معينة عشان أختلط بالمجتمع اللي فيها وأقدر أفهم وأقدّر اختلاف الناس وازاي ان فيه طريقة "أرقى" للحياة بدون ما أعتبر الآخر عاصي ومذنب..
طبعا ما يفوتنيش أذكر أشهر مغالطة ممكن يقولها: ما حدش وصي على حد.. كل واحد يعبد ربنا بالشكل اللي يشوفه.. مش عايزين نكرر اللي الرسالات الأخرى عملته ويبقى فيه كهنوت وممثلين لله على الأرض.. وده طبعا كلام فارغ لأن الأمر بالمعروف والنهي عن المنكر فريضة على كل مسلم ومسلمة (مع مراعاة فقه الدعوة وازاي يكون النصح في كل حالة).. ولا فيه وصاية ولا فيه حد بيتصور نفسه أعلى من غيره بالعكس الواحد بينصح وهو حاطط ايده على قلبه ليكون من اللي قال الله فيهم "كبر مقتا عند الله أن تقولوا ما لا تفعلون"..
🔲 الحب الحب
أيواااااه بس كده.. وصلت لعلامة مهمة جدا جدا وكنت أشرت إليها في بعض المنشورات لكن ما اتكلمتش عنها بشكل واضح كده..
ابن عربي قال "أدين بدين الحب" في قصيدة بيرفض فيها فكرة ان الإسلام هو الدين الحق وبيعتبر كل الأديان زي الفل ما ينفعش ننكر حاجة منها وان قلبه مليء بالحب للكل حتى عبدة الأوثان..
فالشخص اللي بنتكلم عنه هتلاقيه مؤمن بالحب أكتر بكتير من إيمانه بشرع الله (سواء سماه الحب في الله أو الحب بس).. وده اللي بيخليه يتعامل مع الستات زي ما بيتعامل مع الرجالة: خلوة وطبطبة واهتمام.. وده اللي بيخليه مقتنع ببدعة الديانة الإبراهيمية اللي بتعتبر الرسالات السماوية كلها صح ولا زالت قائمة.. وده اللي بيخلي اللي بيتبعه بيتعلق بيه جدا لأنه طول الوقت بيعزز عنده انه محبوب..
هتشوف ده في التلزيق.. في طريقة كلامه مع الناس اللي متبعاه.. كلام عن الحب والنور والشوق والفرحة والانشراح..
طيب ايه المشكلة؟ ما الحب كويس ولما نعيش بالحب أحسن من اننا نعيش بالكره مثلا.. صح.. بس المغالاة في أي شيء بيحولها إلى خطأ..
الخطأ هنا ان الحب بيصبح مرجعية الناس اللي ماشية ورا الشخص زي ما هي مرجعيته من الأول.. ما بيبقاش الحلال والحرام لهم وزن عنده.. بيبقى الميزان هو: لو ده فعل نابع عن الحب يبقى ممتاز حتى لو هو حرام.. أو لو ده فعل يعبر عن الكره أو يؤدي إليه يبقى غلط حتى لو هو فرض أو مما هو معلوم من الدين بالضرورة من العقيدة..
فتلاقي الست مبسوطة من جرعة المتعة المحرمة اللي جاية من اهتمام راجل غريب بيها ومن مدحه ليها وجمالها وذكاءها ودينها وخلقها وصبرها الخ سواء في لقاء عادي أو في الرسائل.. وما ينفعش حد يتكلم عن اللي بيتمسح بقبر وبيطلب الشفاعة عند الله منه لأنه ده بيؤدي للكراهية..
مرجعية بديلة عن الله.. دين مختلف..
🔲 الإفراط في المدح
الشخص ده هتلاقيه متعود يمدح الناس بشكل مفرط.. بينفخ فيهم.. وده بيديهم شعور بالرضا عن نفسهم وبيزود تمسكهم بيه.. ما دام راضي عنهم وما دام بيتكلم عنهم بالجمال ده والروعة دي يبقى ده تأكيد فوري انهم ماشيين صح..
وبالتالي الناس متعودين يمدحوه بشكل مفرط برضو وينفخوا فيه.. وبيوصل الأمر إلى درجة من الانتفاخ بتخليه يعلا يعلا لغاية ما يشعر انه مجدد للدين.. شوية كمان بقى قطب.. شوية كمان نبي.. شوية كمان بيكتسب سمات إلهية..
واحنا عارفين ان منهجنا مختلف تماما.. منهجنا عكس ده تقريبا.. منهجنا ان لو حد مدحك وبدأ يستطرد في المدح لازم توقفه عن المدح.. يضيق صدرك مش ينشرح صدرك.. ليه؟ عشان انت عارف قدرك أولا من علاقتك بربنا اللي فيها ذنوب وتقصير ولو كشف ستره عنك فانت عارف هيتقال عليك ايه ويكون هو الصح.. وثانيا من ان كل اللي انت فيه واللي حققته هو في الحقيقة من ربنا مش منك.. بص على سورة يوسف هتلاقي كل اللي حصل له ربنا نسبه لنفسه مش لسيدنا يوسف وكذلك كل اللي حققه سيدنا يوسف وحصل له هو نسبه لربنا برضو.. ما عندناش ان حد يتصور انه له قدر ومكانة..
وأكيد حافظ الحديث الشريف "إذا رأيتم المداحين فاحثوا في وجوههم التراب"..

🔲 الفراسة
وأنا في الجامعة كان ربنا واهبني فراسة غير طبيعية.. كنت أقدر أبص في عينين الشخص وأتأمل شكله وألقي نظرة على ايديه وأقول له حاجات صحيحة تماما عن نفسه وعن علاقاته وعن حياته تخليه مذهول.. بس بعد كده انشغلت لما اتخرجت والجانب ده اضمحل زي جوانب تانية برضو.. للخير إن شاء الله..
الفراسة دي موجودة عند الشخص اللي باقول لك عليه بنسبة مختلفة من واحد للتاني.. وبيعتمد عليها في إيهام التابع ان دي كرامة.. فيقول له على حاجة حصلت عنده أو حاجة يتوقع انها تحصل وتكون صح.. الموضوع ده أثره على المتلقي رهيب.. بيخليه أوتوماتيك يعتبر الشخص ده في مكان أعلى من الناس.. وبيخليه يتكلم عنه لكل اللي بيقابله فبيعمل له شعبية وبيتحول بالتدريج لأسطورة..
ده بيساهم في طاعة التابع للشخص ده وبيساهم في النفخة اللي بتحصل للشخص نفسه والترقي اللي بيعمله لنفسه في كل مرحلة..
------
ده أطول منشور كتبته في حياتي أظن.. فباعتذر لك عن الوقت اللي راح فيه ويارب يكون نافع وفي ميزان حسناتنا.. ولو لقيت فيه قيمة انشره..

روشتة مهمة وطويلة حبتين.. كنت بادردش مع ولادي ازاي يكون عندهم معيار وميزان عشان يقدروا يعرفوا ان اللي بيتابعوه أو اللي ماشيين وراه ومقتنعين بأفكاره هو أقرب للهدى واللا أقرب للضلال.. ولقيت نفسي بجمّع قائمة من الخصائص من واقع تجاربي الشخصية وتجارب معارفي والمشاهدات.. وحبيت أشاركها معاك..
الحاجات اللي جاية دي كل ما كان كتير منها موجود في الشخص فأنصحك ما تاخدش منه أو على الأقل تكون حريص وتوزن اللي بيطرحه بكلام العلماء أول بأول.. وطبعا أنا مش باتكلم عن حد محدد أنا باتكلم عن الأوصاف المجمعة من ناس متعددين..
🔲 علاقته بالقرآن
طيب.. مع انه بيكون معترف بالقرآن لكن مش بيكون معترف بالتفسير.. فبيفسر بمزاجه استنادا إلى آيات كريمة (هو اللي مفسرها بمزاجه برضو) زي "أفلا يتدبرون القرآن" و"ولقد يسرنا القرآن للذكر فهل من مدّكر".. واستنادا إلى تفسيره الخاطئ للحديث الشريف "فإن اجتهد فأخطأ فله أجر"..
في حين أن العلماء علمونا أن تفسير القرآن على أربعة أقسام:
1. قسم يدركه كل واحد مثل "قل هو الله أحد" و"فاعلم أنه لا إله إلا الله" و"وأقيموا الصلاة وآتوا الزكاة"..
2. وقسم لا يدركه إلا عالم باللغة العربية مثل "إن الإنسان لربه لكنود" و"هل في ذلك قسم لذي حجر" و"فجاءها بأسنا بياتا أو هم قائلون"..
3. وقسم لا يدركه إلا العلماء مثل "والأرض بعد ذلك دحاها" و"ولا تمش في الأرض مرحا" و"وأنه تعالى جد ربنا ما اتخذ صاحبة ولا ولدا"..
4. وقسم لا يعلمه إلا الله مثل "كهيعص"..
فإذا حد اجتهد بدماغه في الأقسام الثلاثة الأخيرة وهو أصلا مش متمكن من اللغة العربية النحو والصرف والبلاغة وغيرها ولا عالم بالناسخ والمنسوخ وأسباب النزول والمحكم والمتشابه والمطلق والمقيد وغيرها من أصول التفسير ده هيدخل في منطقة محرمة وهي القول في القرآن بغير علم..
وقد قال الرسول صلى الله عليه وسلم "ومن قال في القرآن برأيه فليتبوأ مقعده من النار".. وقال ابن تيمية ما معناه إن من اجتهد في القرآن بغير علم فأصاب فقد أخطأ.. يعني أصاب في المعنى اللي وصل له لكنه أخطأ في أنه يتجرأ على التفسير وهو مش أهل لذلك..
طب هو ليه بيعمل كده؟ عشان عايز القرآن يؤيده في ضلاله مش عايز يتعلم الصح.. ابن القيم قال كلمة حكمة معناها ان لو أي فرقة ضالة (أو شخص) حاولت تتأول القرآن بحيث يؤيد ضلالها هتقدر تعمل كده.. يقصد هتقدر تبقى مقنعة.. بس الطريقة نفسها حرام..
النقطة الثانية في علاقته بالقرآن انه بيؤمن ان القرآن صالح لزمانه اللي نزل فيه فقط (أو على الأقل بيميل جدا إلى ذلك فبيظهر على كلامه بدون أن يصرح به).. وده كلام العلمانيين ومالوش علاقة بكلام أهل العلم والمؤمنين..
🔲 علاقته بالحديث الشريف
بالإضافة للي قلناه عن علاقته بالقرآن الكريم اللي برضو بينطبق على الحديث الشريف عنده (من حيث التفسير بمزاجه بغير علم + انه غير صالح لكل الأزمنة وبالذات لتعميمه للحديث الشريف "أنتم أعلم بشؤون دنياكم" ليحكم كل المواقف حتى اللي فيها حكم شرعي) ففيه شيء إضافي:
يضع الحديث في مرتبة أقل بكثير من القرآن تصل في بعض الحالات إلى إنكاره تماما.. وحججه ممكن تكون ان الأحاديث اللي فيها أحكام قليلة جدا مما يعني أنه لم يكن مقصودا من الحديث أن يشرّع.. والشك في سلامة الأحاديث مع انتقالها من فرد لفرد حتى وصلتنا بدليل والعدد الضخم من الأحاديث الذي لم يرو منه البخاري إلى عددا قليلا جدا.. وأن القرآن هو كلام الله المنزه وما عدا ذلك لا.. الخ..
وكل الشبهات المثارة عن الحديث بدأها ملحدون ورد عليهم علماء.. يعني لو كان الشخص ده فعلا مهتم بدينه وبالتمسك بالصراط المستقيم لكان عرف الحق لكن هو بيبحث عما يوافق هواه ويقلل من الأوامر والنواهي المفروضة عليه في الدين..
نقطة كمان انه لا يتورع عن الاستشهاد بالأحاديث الموضوعة والمتروكة والمنكرة لو بتوافقه هواه.. في النقطة دي بيكون عنده تناقض واضح من حيث مش بيعترف بالحديث وبيستشهد بأحاديث غير صحيحة..
ملاحظة: علاقته بالفقه شبيهة بعلاقته بالحديث من حيث البحث عن الشاذ من الآراء عشان يؤيد بيه هواه..
🔲 المخالفات الشرعية
أوه هوووووو هوووووووووه.. حدث ولا حرج.. أصلا أهم سبب بيخلي حد يضل ويضل غيره هو انه مش عايز يلتزم بفروض الدين وينتهي عن نواهيه.. مستصعب الدين.. وعشان كده دي أكبر علامة ممكن يتعرف منها..
ما عندوش مشكلة في المحرمات ولا بقى بيفكر فيها أو بتسبب له ضيق (زي ما المؤمن بيشعر لما يرتكب ذنب).. زي تفويت الصلاة (أو التوقف عنها) وعدم تحري الحلال في الرزق وحلق اللحية (ملاحظة: أنا واقع في الذنب ده وأسأل الله الهداية والمغفرة) والاستماع للموسيقى والاختلاط (والأحضان واللمس البريء - بجد) والكذب والخلوة غير الشرعية وعدم ارتداء الحجاب والتزين وغيره..