منار الراوي .

صباح الخير 🦋
يوم جديد ومحاوله جديده ✨✨✨

شونكم ✨✨

القناه هاي نبذات مختصره عن مشاعري ومواقف مريت بيها ، وقصص سامعتها وبيها عبره ، وكلشي يخصني راح ينكتب هنا .✨🦋🦋

العوض 🦋✨✨✨✨

اذكر بيوم النتائج چنت كلش متوتره وامي چانت تسوي حلويات عبالك تدري راح انجح ، أول شي ع اسال يدزون النتائج على المنصه ب6 العصر واني افتر بالصاله ردت اموت شوكت تصير بال6 وبعدين صار الوقت رحت للمنصه وبس اريدهن يطلعن ماكو وتوقفت المنصه وكعدت منهاره من البجي والخوف وفد ربع ساعه دزوهن بي دي اف ، انتظر مخافظتي تحمل ويمه بعدين حملت والرعب والخوف موتني وطليت وادور ع مدرستي وعلى اسمي وعيوني ومغوشه وماشوف ومن وصلت يم اسمي صرت النفس گوه اتنفسه وشفت اسمي شفت الاسلاميه 95 عفتها ورحت اشوف اخر شي ناجحه اي ناجحه ، گمت اصيح والطم وابجي "ولج يمه ولج يمه" "الحمدلله والشكر يربي الحمدالله" وسجدت واني ابچي واشكر الله واحمده واني حتى ماشفت معدلي شكد ، چانت فرحتي اكبر من فرحة الطالبه الي مطلعه معدل ميه ، ليش ؟ لان تعبت تعبت هواي والحمدلله رب العالمين جازاني على تعبي ، امي اچت وعبالها راسبه لان حرفياً وضعي مال وحده راسبه بس ابجي ، شافت النتيجة مالتي وفرحتلي وبعدها تلفون امي ماسكت من وحده لوحده تخابر واني كضيتها ابجي بيومها دموعي نشفن بكد البجي البچيته واجه وكت الصلاه وبچيت ع السجاده وصليت ركعتين شكر ، يعني رب العالمين شكد كريم شكد غفور شكد رحيم صدك هلفرحه عوضتني عن كلشي صار وياي صدك التعب الي تعتبه يستاهل هلفرحه والحمدلله والشكر .

مناࢪ الراوي .

السادس اعدادي كلمه بـمجرد ذكرها تجيب الرعب والخوف ، چانت رحلتي حلوه ومخيفه بنفس الوقت ، كلها مصاعب ، الم وفقدان ، فترة السادس الي بلشت من شهر السادس العام لحد شهر السابع السنه ، والحمدلله عدت ، بس ماعدت بسهوله ، سلبت راحتي ، نومتي وكلشي في سبيل تتحقق ، ضحيت بهواي شغلات لخاطر هاي اللحظه الي اگول بيها اني خلصت اني نجحت ، والحمدلله ماكو تضحيه راحت سُدا ، رب العالمين عوضني بفرحة نجاحي عن كل دمعه بجيتها لخاطر اكمل ، بداية رحتلي چانت حلوه ، وچنت من الناس الي اؤمن ماكو شي صعب على البشر مجرد تقره تنجح بس ماجنت اعرف انُ الضغط الي تحسه بنهاية رحلتك يختلف عن الثقه الموجودة بداية هاي الرحله ، مرت الأيام وچنت اطلع بالشهريات امتياز لان اقره والماده شويه واكدر اسيطر ، بس الغلط مالتي شنو ؟ ، غلطي بذلت كل جُهدي بداية السنه وجنت اقره بدون ملل ومرات اقره ماده ما ماخذينها وما يوم رحت للمدرسه اذا مقاريه تحضيري ، وهذا الشي اثر عليّ ووكعني بنهاية السادس ، وخلاني افقد قوتي وصحتي ، هاي من عدا العمال الي اهلي تذكروا انُ يردون يرممون البيت بفترة المراجعه ، وچنت اقره بالمراحغه بـ استقبال بيت عمي لان چان هو الوحيد الي فارغ واشرد من العمال اروح هناك للهدوء ، و وره العمال صار الغسل والتنظيف الي ماله والي لدرجه نهد حيلي ومن اوصل للكتاب اغفه من التعب ، اني البنيه الي كدرت تتخطى كلشي وتنجح لخاطر مستقبلها ، الي محد بالبيت اعتبرها سادس او سوالها جو سادس وچانت تكمل واجباتها كـ بنيه يلا تقره ، البنيه الي جمعت فلوس بـصف الخامس من مصروفها السنه كلها حتى بالسادس تشتري ملازم وبدون ما تطلب من احد شي ، البنيه الي اشترت تلفون اخوها العطلان وحافظة عليّ في سبيل تدرس ، بس هالشي ما يعني اهلي ما يحبوني لا اهلي يحبوني ويخافون عليّ ويردون الي الاحسن اني متأكده من هالشي بس الظروف حكمت ، وبعد ما نجحت حروح للقسم الي اهلي اختاروا مو تصنعاً بس همه الهم فضل بوجودي ، إما نجاحي هو بفضل الله واهل البيت و بفضل تعبي وسهر الليالي ، وختاماّ الحمدالله خلص السادس بحلوه ومره ، بـتعبه وراحته ، بـفرحه وحزنه ، هسه اگدر انام بدون تأنيب ضمير وبدون احلام رسوب ، و كلها چانت رايده مني معدل ميه بس هدفي چان سبعين وطلعت 73 وفخوره كلش بنفسي لان معَ كلشي صار گدرت استمر ، گدرت انجح .

مناࢪ الراوي .

محرم الحرام
شهر محرم هو شهر مقدس واله حرمته بين الشهور ، هو شهر نبتعد بيه عن المعاصي لاقصى حد بس هذا مو معناه انُ نغلط كل السنه بس بهل شهر ماراح نغلط ، لا انتوا فاهمين السالفه خطأ ، لان محرم من قبل معركه الطف رب العالمين حرم بي القتال، الكفران ...الخ ، بسبب حرمة هلشهر وقدسيته .
واكو ناس تگول و تدعي ان الشيعه بس بمحرم تبتعد عن المعاصي و تعبد الحسين مو رب العالمين مع العلم هو الي خلقنا مو الحسين ! ، زين انتوا ما فكرتوا بعقل شويه؟ الشيعه ما تعبد الامام الحسين عليه السلام او اي أمام ثانِ بس تتقرب بيهم لرب العالمين ، لان مثل متعرفون رب العالمين يحب النبي محمد صلى الله عليه وسلم وعلى اثر حبه اله هو يحب ال بيته وكل من حبهم واعتز بيهم ، و الشيعه من حبهم لربهم تتقرب اله من خلال اوليائه واحبائه كالحسين والعباس عليهم السلام ، كذلك الشيعه من تروح تزور المرقد وتبچي هناك مو تخلف لا ، بس راحتهم هناك ، راحتهم بالاماكن المقدسه الي قدسيتها من قدسية الكعبه المشرفه ، و من تلطم وتسوي مجالس هذا هم مو تخلف ، لان لو صار شي بأهلنه او ناسنه راح نبچي ونلطم ف شلون ما تردونه نقيم المجالس لاحياء ذكرى الحسين ونبچي ونلطم على امامنه وهو أستشهد علمود شيعته واهل بيته ! ومن يخدمون بالمواكب مو معناها دا يذلون نفسهم لا ، بس يخدمون الزوار لان قدرهم عالِ عند الحسين و عند رب العالمين عز وجل ، و كذلك الخدام قدرهم عظيم والهم اجر وثواب كلش چبير عند رب العالمين والنبي محمد وال بيته .

مناࢪ الراوي .

شونكم يابه🫡

__

هلاو يابه شونكم
الي ميعرفني اني صديقة منار
وهي صار اشهر ساده كل حساباتها لان سادس ودا تقره ، وتعرفون النفسيه شونها بالسادس 👎🏻 .
فـتسلم عليكم ، ومشتاقتلكم هوايه ، وتگول أن شاءالله بس انجح اكبر القناه واتعب عليها كلش هواي .
وهي حالياً بس محتاجه دعواتكم الها بالتوفيق .

كل شي يصير ويانه هو بالقسمه والنصيب ماكو شي يصير بدون رضا رب العالمين ، و ماكو شي يصير ويانه بسبب دعوة افلان علينه ، لـتحطون هلشي ابالكم لأن الدعوات الضاره بعمرها ماوصلت لرب العالمين ، كـمثال شخص يدعي على شخص يرسب او يتمرض ..الخ ، بس اكو فرق بين الدعوة الضاره والدعوه المُنكسره ، لان الدعوة المُنكسره الي هيَ من انت فعلاً تعبان ، فعلا متأذي وتطلب الانصاف من رب العالمين مو الضرر بالطرف المقابل ، فـالانصاف يجيك من تكون على حق .
وكل شخص بينه راح ياخذ نصيبه سواء كان حزن او فرح ، ماراح يفوتك شي كتبه الك رب العالمين ، و لتگول ماعدي حظ اذا صابك ابتلاء لان هذا قدر ربنا واختبار النه ، وهو كلشي بيده ولا تيأس ابد من رحمته لان رحمته واسعه ، ومن رب العالمين يشوفك راضي بقدرك وتحمده وتشكره تأكد راح يرضيك بسعاده ،
وتدرون شنو الخطأ الي نوگع بي دائما ؟
نتناسه انُ الحياة فانيه ، ونصدگ انُ هيَ ابديه ، ومن نريد شي نعاند ونريد نكمله للنهايه بس القدر يوگف بوجهنه ويذكرنه انُ الدنيا فانيه وبس .

مناࢪ الراوي .

السادس كلش لهاني عنكم واني كلش اعتذر ع الانقطاع الي صار بس هم امتحانات وهم ظروف وهم تعب وحتى افكار براسي ماكو حتى اكتب وكلش مشتاقتلكم يبعدي 🥹🧡

_

اني بداخلي مو شخص واحد ، اني احس بداخلي شخصين ، واحد منهم يبچي على اتفه الاشياء ، ينجرح بسرعه ، يتأذه بسرعه، يحب بسرعه ، يهتم بسرعه ، وما ينسى بسرعه ، إما النوع الثاني ، كلش اناني ، هوايه قوي ، ميهتم لشي ، ميحب أحد اكثر من نفسه، ميهتم لكلام أحد ، مينجرح ابد ، يعامل الناس بالمثل ، عنده نفسه فوق كلشي .
ذني الشخصيات موجودات بيه ، مرات تظهرلكم الشخصيه الاولى ، ومرات الثانيه ، احاول اظهر الشخصيه الاولى ، واخذ قوه من الشخصيه الثانيه ، بس كل وحده تظهر حسب الموقف الي اني بيه وبس .

مناࢪ الراوي .

٢٠٢٤/١/١
ان شاءالله بهاي السنه تكونون الاقرب الى الله🩶

بعد كم ساعه ح نبلش سنه جديده اتمنالكم كل الخير والفرح يارب وان شاءالله تتحقق كُل امنياتكم بهل سنه ، واتمنى منكم ما تگطعون علاقتكم برب العالمين بالعكس توثقون هاي العلاقه اكثر واكثر ، لان ماكو احلى من انُ تبدي سنه جديده وانت محافظ على صلاتك وعلى دينك ، وبهيج حاله رب العالمين راح ينور طريقك ، ويحقق احلامك الي دا تسعى الها .
الله يوفقكم ويحفظكم من كل شر واتمنالكم سنه حلوه وسعيده ودراسه زينه .

مناࢪ الراوي .
@mem_9y

احنه بأخر ايام سنة 2023 اليوم المفروض نگعد مع نفسنه ونشوف انجازاتنه بهاي السنه ، نشوف شنو احنه سوينه بحياتنه من شغلات حلوه ومن شغلات مو حلوه ، كم شخص سببلنه الاذى ، كم شخص سببناله الاذى ، كم شخص سمعنه احچايه وبقت بگلوبنه ، نگعد ونراجع روحنه ، نراجع كلامنه الي حاجينه بدون قصد ، نراجع تصرفاتنه ، نراجع علاقتنه وي ربنا ، نراجع صلاتنه ، و بعد ما نستذكر كلشي سويناه ، نتقرب من رب العالمين ، ونطلب منه التوبه ، نطلب يسامحنه على كلشي موزين سويناه و نبدي سنه جديده بالخير والفرح ،
فـ اتمنالكم سنه سعيده وان شاءالله اي شي تتمنونه يتحقق بـهاي السنه ، واتمنالكم تبقون على دينكم وتتقربون اكثر من رب العالمين ويهديكم وينور طريقكم ، وان شاءالله سنه 2024 هي اجمل سنين حياتكم وشكراً .

مناࢪ الراوي .