HELAL ALKERNAZI ❤️

🙁

_ بتذكر مرة كنت عم أقرأ قصة فيها هالجملة :
( مادامت الذكريات لا تموت , فإن الحب لا يموت )

يمكن بوقتها ما عرفت معناها ، بس وقت غنى حسين الجسمي :
_ انا كل ما نويت انسى ، لك الذكرى ترجعني _
سرحت بالاغنية وتذكرت الجملة ، بلشت حلل ولامس انو بهالكلام كان عم يحاول ينساها !
ينسى الكسر يلي بقلبو ويكمل حياتو عادي ، بس الذكريات كان الها دور كبير انها تعمل شعلة بقلبو ، وتضل الذكريات هي شعلة الحب...
ذكريات إنو بوقت ما كان هالشخص هون، وقت بكينا عمل شي ليعدل المزاج ونروق، بوقت ما ضحكنا سوا، ويمكن كمان تحملنا بعض كتير...
بعد ما يغيب الشخص عنا منرجع منحن كتير لأيام بتجمعنا سوا، مش لأن هو حدا كتير منيح، لا المنيح بضل ما بروح، بس يمكن لأن أخد مكان بالقلب صعب حدا ياخدو...

يا ترى قديش بتكون الذكريات بتوجع وبتغمرنا بقسوة بعد الفراق ، الا انها هي بتجدد الحب بكل مرة منتذكر فيها تفاصيل جمعتنا بشي يوم مع ناس منحبهم او دخلو بحياتنا بطريقة فجائية يمكن !!!
هاد السبب يلي بخلينا ما نوقف حبنا لشخص بعدنا عنو، لأن الذاكرة قادرة تحفظ تفاصيل، ما بتروح لو راحو الكل..

هيه ذكريات وراحت

#Helal_alkernazi

صرلي سنة ع اخر مرة كتبت 😣😣 اييه ايام حلوة 🌚

#انت_الحظ
#عمرو_دياب

يسعدلي اوقاتكن❤️🙈
عم تدور على قنوات ذات محتوى مفيد؟! ماضيعلك وقت وتلاقي كل طلباتك فيها
هي روابط قنواتنا اختصرناهن وبعتناهن ✨🌸

#تنويه : قنواتنا خالية من الاعلانات او روابط قنوات تانية

Channel photo updated

بتعرفي شو الحلو بالحب ؟

الحلو بالحب هو انتي ، اي انتي ، وقت يكون الحب معك انتي، حب الوقت معك ، وحب الايام معك، وحب الحب لأن معك .

الحب لما نتزاعل ونكتشف اديش منحب بعض ، لان بوقتا بحس ب قيمة حبنا ، وقت المشاكل والخلافات بلامس اديش نحن قراب من بعضنا .

الحب لما تخافي عليي ، لما تهتمي ، لما تغاري ، لما تعصبي ، ولما تفرحي .

بكل مرة كنت شوفك ، كنت شوف بعيونك ، جواتك ، في شي جديد ، شي جديد ما مرق عليي بحياتي ولا حسيتو الا معك ، هيك حس بغمرة آمان عم تتكون فيكي .

كنت قول انا كمية مشاعر واحساس ، مين رح يحتويهن ، مين رح يقدرهن ، مين رح يفهمني ، مين رح يحبني متل ما رح حبو .

و رب العالمين جاوبني ، فيكي انتي ، عطاني وهداني اياكي انتي .

كنتي وبتضلي تواسيني بكل خيباتي وبكل الضربات يلي أكلت من قلبي ، كنت انطرك ، وبكل مرة كنتي تجي فوراً ما تتأخري .

شلتي اي لحظة حزن مرت بحياتي ، او خيبة او غصة كانت بقلبي ، وفتحتي قلبي من جديد لحتى يحتويكي بس انتي .

كنت انتظر رفيق او صديق او شخص يطبطب ع كتفي ، لما كون ضعيف .
وبأول مطب كانوا يوقعوا قبلي ، وضليتي انتي معي ، انتي يلي علمتيني اني اكتفي فيكي رفقة العمر لان الحياة بدون رفيق ما بتنعاش .

ماقدروا يتحملوا جزء بسيط من مزاجيتي ، او شافوا الجانب السيء من حياتي ، وانتي كنتي معي بكل مراحل حياتي .

انتي غيرتيلي اطباع واطباع كتيرة ، وبقولوا الطبع غلب التطبع ، وانتي غلبتي كلشي فيي وانطبعتي فيني .

رح كون معك طفل صغير عم يتعلم كيف يمشي اول خطواتو بدون ما يوقع لانو ماسك ايدك ، ويضل مفكر انو في ايد عم تسندو بكل مرة ، ويحس بالأمان .

الأمان يلي صار فيني اليوم قول أنا أقوى وأحسن بس لما بتكوني معي .!!

ونسيت خبرك عن ايامي يلي كان يصيبها الملل والكأبة ، بس بوجودك صارت كلا فرح وسعادة .

مارح شبهك بالملجىء حتى ما كون بشبه باقي الناس وخونك ، رح شبهك بالصلاة كل ما بعدنا ، بسجدة قلوبنا بتتصل .
اكتشفت انو اكتر الناس لما كانوا يحكوا عن الحب بالزواج التقليدي فاشل ومو حلو ، كذابين او يمكن ما لقو نصن التاني !!؟

بس أنا اليوم فيني قول إنو الحياة بتنعاش ، ولسا في خير كبير ، ولسا منقدر نحس حالنا مالكين الدنيا كلا من نظرة عين بس .
وإنو الحب مش بس كلمة بحبك، أو حتى بيت صغير وعيلة لأ ، هو شي تاني تماماً .

الحب هو انتي !.

#Helal_alkernazi

‏من عقوبات المعاصي أن يُسلب الله منك التوفيق؛ تسهر بلا فائدة، وتنام على إثم، وتستقيظ بعد طلوع الفجر، تؤخر الصلوات بغير عذر، ثم تستقبل يومًا كئيباً بئيساً منزوع البركة..!

أين ستجد البركة والسكينة وراحة البال وهذا حالك؟!

♥️🤲

هلوووو 😎 بعرف اشتقتو لكتاباتي والفيديوهات 😂♥️

طولت عليكن 🌚 ،
بهالمناسبة عطونا افكار ساعدوني مشان اكتب عنها .

وان شاء الله بتضلو بخير ♥️

✋

عنجد الواحد ما لازم يتوقع الافضل او الاحسن ، لازم نضل اخدين حذرنا و نعيش كل لحظة بلحظتها وننتظر شو ممكن يتقدملنا وشو رح نكسب !!
لان صار عندي قناعة كبيرة انو لا الكلام ولا الاحساس ولا المشاعر الحلوة صادقة متل المشاكل .

مثلاً لما تصير المشكلة ، ما بتلاقي الشخص بعاملك عطبيعتو ، ويلي كان معك ب وقت المشاعر كان شخص تاني ، شخص كذاب ، شخص اناني ، شخص جحود ، أو ممكن حدا جوعان كتير وانت وعدتو تقدملو شي أكلة دسمة بالتالي رح يضل منيح لحتى ياكل وبعدين ببين أصلو .!؟

هلأ بنط كم شخص وبيقعد بيتهجمني وبقلي لك شو عم تحكي انت وتخبص ، أو يمكن نحنَ ما وصلنا لهون لسا من الانحطاط !!

بس اي اي ، انا كتير منيح بعرف شو عم احكي وشو بقصد بكلامي ، وشو عشت وشو شفت وشو تبينلي ؛

ما بيخطرلك انو اديش في الناس عم تنظلم ، واديش في ناس انجرحت ، وكم شخص مكسور بهالدنيا ، وكم حدا انخذل من الشخص المفضل ، وكم حدا رجع يلملم جراحو ..

وما بظن انك بتعرف او بتحس او بتتخيل حجم هلكلام ومعاناة الناس ، يمكن انت بتعرف شغلات صغيرة وكتير .

_ بلله انت بتعرف انو كل يلي اتطلقوا هلأ واقفين لبعض بالمحاكم ، كانوا بيوم عاملين افخم عرس ورقصوا فيه وكان طاير عقلهن ببعض ، وكانوا يحكوا عن حب اسطوري ، ومش بس هيك قالوا قيس وليلى وعنتر وعبلة لسا موجودين فينا ، وحبنا كتير صادق ، وكم مرة صفنوا بعيون بعض وقالوا ياسندي لما الدنيا تميل ، وليكا الدنيا مالت وانكسرت واتهدمت القاعدة و طلع مافي سند بكل القصة .

_ و انت بتعرف انو كل يلي بعايروا بعض وبيحكوا عبعض كانوا بيوم من الأيام اصحاب واخوة على اساس ، والمعايرة يلي صارت بيناتن كانت ب لحظة " فضفضة " و "اسرار " حكوها لبعض ، ورجعوها سكاكين ، وع قصص فاضية ..

_ و بتعرف انو كل يلي قاعد هلأ يضحك ويتمسخر ويشمت ع ابتلاء فيك كان بوقتها عم يواسيك عليه من زمااان ، والله رح يرجع يعاقبو بنفس الداء !!

_ وبتعرف انو كان في شخص يعزك وما يرضى تنحكى عليك كلمة ، وهلأ كل همو يخرب بسمعتك بين الناس ، ليقول أنا المجني عليه ؟!

و بتعرف وبتعرف وبتعرف !!؟؟ ….. ف مشان الله حاول تخفف سقف توقعاتك ، لانو ممكن بيوم وليلة وحدة تنقلب موازين التوقعات ويكون الثمن ثقتك و عشمك الزايد ، ضل متذكر حتى أنت بوقت ما خذلت حالك ، لاتنطر شي أكتر من الغريب ..!!

#Helal_alkernazi

ب مناسبة نتائج الشهادة العامة في سوريا ، اديش في ناس بهاليوم انكسر خاطرها واديش في ناس فرحوا وطار عقلن ،
مبروك للناجحين وان شاء الله بتعوضوها بالسنة الجديدة وافضل بكتير ان شاء الله للراسبين ، عفكرا انا بتذكر اني رسبت بس مابعرف بلتاسع او بكلوريا وبعدين رجعت اقوى اخدت بكلوريتين 😂😂 ودرست معهد وجامعة وبعدين سافرت ، ف الحياة مابتوقف ع سنة ، او نتحطم بسبب هالسنة عادي شعور صعب صح بس لازم هالشعور يعلمنا ويقوينا وخلو هالشي تحدي بينكن وبين نفسكن انكن رح تكونوا افضل واقوى من هلأ وان شاء الله بتكون حياتكن حلوة وناجحة متل وجهكن الحلو 🤍

صرت عم اكتب عن شغلات التهجمية عن اسلوب الحقد عن المشاعر المكسورة عن حكي و وعود كذابة عن تفكير محصور بين الندم و الانتقام ، اديش الشخص بصير ضعيف ب لحظة واديش في ناس انانية ما بتفكر الا ب حالها ، اديش نحن محاطين ب ناس همها الكسر والخداع و الكذب ، بدنا وقت كتير لنرجع لشخصنا ول حالنا القديمة ، بدنا نصلي وندعي كتير ، بدنا نصبر ،
يمكن انا من اكتر الاشخاص لما كان يجي حدا ويحكيلي قصتو حس في حس ب جرحو ب زعلو ب كسرو ب خيبتو يلي عم يحس فيها ويلي عايشها ، وكنت قول ياريت فيني طيبلو جرحو كنت اسمعو كتير وكنت قول الحمد لله انا من سنين ما دخلت بعلاقات عابرة او جدية حتى ، كنت فكر بحياتي اكتر وكنت بعيد عن شغلات الحب والمشاعر ، مع اني من اكتر الاشخاص بيمتلك فائض بالمشاعر ، صرت خاف يصيبني هاد الاذى بالشعور ، والاذى بالتفكير ، والاذى بالاحساس ، والخيبة يلي مامنطلع منها بسهولة ، ف لازم لواحد ينتظر نصيبو فقط من رب العالمين ، واذا اجا شعور الحب والمشاعر الحلوة ، يحاول قدر الامكان ياخد حذروا ، من كل الشغلات السيئة ، ويحاول يكون كلشي بلحلال من البداية للنهاية .
لانو الحب ما بإيدينا ، احياناً بيجي اقوى مننا ومن تفكيرنا ✋


#مجرد_فضفضة_ونصيحة

#مخترع_الكميرا

#جاي عبالي حب حدا غير 🤍

#نحن_نعرف_كيف_البشر_يفترقون

#مو_كلشي_علاجو_الوقت 😪💔

لازم تفكر كتير منيح ، وتبلش مع حالك صفحة جديدة .
هي الصفحة يلي بتكب كل الشغلات السيئة يلي مريت فيها ورا ضهرك ، من الذكريات والاشخاص والمواقف يلي حسستك انك مكسور و ضعيف وبلا أيا سند ، وحسيت حالك فيها حدا منبوذ ، كل يوم بتسأل حالك ؛
العيب فيني أنا !؟
هنن الصح وأنا الغلط!؟
معقول أنا الشرير يلي بيبقى وحيد بنهاية القصة .

" الصفحة يلي بتكون عنوانها ، بدايتها ، سطورها ، ونهايتها انت "

يعني بالمختصر انو تكون الأولوية الأولى إلك ، ما بس بالأول مهم ، وبالأخير تكون محطة للعبور و التجارب ، توصل لمرحلة تقديس الذات ، وتحب حالك أكتر ، وأنو مافي حدا أحق من حالك عليك .

وما يكون في ندم على شي صار ومرق ، ولا على انتظار ل شي متعشم فيه انك ممكن تحصل عليه او لأ !؟

او تزعل على حدا لأنك فقدتو بإختيارو ، ولا يتكون عندك إحباط من اختياراتك الفاشلة .

ولا تقول لو ضل شو كان صار ، وليش راح ، وياترى لو أعطيتو كمان فرصة كان تغير !!

و تختار يكون اول سطر ب صفحتك يلي رح تكتبو :

" مطرح ما رح يحطني فيه الله انا قبلانو بكل رضى ، وكلشي بيجي من الله يا محلاه، ودائماً الخير فيما اختاره الله "

وتكون عندك هي القناعة ، لما قلبك يتغير معو او ما رح يتقبلو ، بكون الله صرف قلبك عنو ، لأن متل ما زرع القبول جواتك قادر يزرع الرفض ولنفس الشخص .

ما تضل تعيش بأوهام وتخيلات براسك على شي مانك متأكد منو !!
و تؤمن انو يلي رح يبقى موجود ب حياتك ، رح يكون لأنو الله أعلم مين المناسب لالك .
ويلي رح يبعد عنك ف بكون رحمة من الله وحماية لقلبك من أمور انت ما بتعرفا .
و رح تحس بأنو أصغر التفاصيل و الأمور كشفتلك عن كل المخبى والمجهول ، يلي بتكون بالاساس غلط .

بتفتح عيونك ، و قلبك ، و عقلك ، وبتصير بتكسب نفسك .
ف لازم تعيش مستسلم ل لله وانت متأكد ومتيقن انو مافي شي بصير بحياتك غير يلي كاتبو الله وبكون الخير .

هي أول خطوة لازم نخطيها لنكسب الراحة الكبيرة يـلي محتاجها قلبنا .

#Helal_alkernazi