الشاعر حيدر مطر العبادي

خادم الزهره وأظل أتباهه ..
              وأبقه دوم على العهد وياهه ..
          يالزجيه  .. يالزجيه
.....................................
انه خادم وابقه رافع راسي ..
فاطمه انتي الهوه البنفاسي ..
أغلى من اخواني وهلي وناسي ..
ونبض كلبي حيدري وعباسي ..
دوم مأساتج تعيش ويانه ..
             ياأساس المذهب وعنوانه ..
        يالزجيه .. يالزجيه
......................................
هالهويه بحب علي مختومه ..
وبصمة العباس سبع الحومه ..
وبيهه دمعه عالوجه مرسومه ..
عالذبيح السلبوله هدومه ..
للزجيه خادم وتدروني ..
               دوم ماينشف دمعهه اعيوني ..
       يالزجيه .. يالزجيه
....................................
انه مابطل ابد وناتي ..
عالوجن حفرن نهر دمعاتي ..
عالزجيه الطاهره مولاتي ..
ادري بيهه تقضي كل حاجاتي ..
خيرج مغطيني حد الهامه ..
                       نظره يامولاتي لللطامه ..
يالزجيه .. يالزجيه
..............................
الليله عالزهره لطم وقرايه ..
وكلنه نحضر مجلسج وفايه..
كوثر انتي والشرب من مايه..
غرف منج  مكرمات هوايه ..
مكرماتج فاطمه مشهوده ..
                       اي وحك الكطعوله ازنوده ..
يالزجيه .. يالزجيه
.................................
الحضر مجلس فاطمه هنياله ..
لابس اسود واللطم يحلاله ..
الليله تجري دموعنه هماله ..
جن شهر عاشور هل اهلاله ..
هالليالي الفاطمه نحييهه..
                      أبوصالح ندري حاضر بيهه ..
يالزجيه  ..  يالزجيه
.................................
الليله حتى المنبر يهل الدمع ..
عالزجيه الطاهره وكسر الضلع ..
كل موالي الليله خل يعلك شمع ..
من قره الرادوود نبجي ونستمع ..
الخدمه كلمه والعرف معناهه ..
                          هامته بعلو النجم علاهه ..
يالزجيه .. يالزجيه
.....................................
الزجيه عاشت بوجداني ..
ابد مافارك اسمهه الساني ..
ابقه للموت أبغض المرواني ..
ألعن الاول وأسب الثاني ..
الظلم بضعة طاهه والوج ناره ..
                             بصدر كل شيعي غرز بسماره ..
       يالزجيه  ..  يالزجيه
......................................
حيدر مطر العبادي

على طور سؤالي بياسبب الحاج باسم الكربلائي
بابك يانبي لو غاضريه .. فاطم هاذي لو زينب سبيه
الأمس بالغار.. حركهه بنار
خيانه .. خيانه
..........................
حرب بيبان سوتهه السقيفه ..
حته يصير فاجرهم خليفه ..
أصحاب النوايه المو نظيفه ..
ظلمو فاطمه البضعه الشريفه ..
توّن وتنوح ظلت أم أبوها .. صحبانك يطاهه السلبوهه
ظلمهم جار  .. حركهه بنار
خيانه .. خيانه
.......................
فعلتهم أبد لا مو غريبه ..
جمر بالباب ظل يسعر لهيبه ..
مثل مافاطمه بدمهه خضيبه ..
باجر زينب تعيش المصيبه  ..
تذكر أمهه وتشاكف بديهه .. سوط المارحم غربة سبيهه
وسط أشرار .. حركهه بنار
خيانه .. خيانه
.....................
أبد ماينوصف حقد العصابه ..
الخله الدار أشبه بالخرابه ..
التجسر عالزجيه بلا مهابه ..
حرك روح النبي ودينه وكتابه ..
يدرون بحرك عش الحمامه .. رماد تصير أحلام اليتامه
صفت طشار .. حركهه بنار
خيانه .. خيانه
.......................
الظلم والجور يعتبروه شجاعه ..
وخبر موت النبي سَرهم سماعه ..
الخله الناصبي ينزع قناعه .
ويحرك عتبة الهادي أبشاعه ..
الماعدهم ولا ذرة رجوله .. حرك باب النبي عدهم بطوله
الخزي والعار .. حركهه بنار
خيانه .. خيانه
..........................
الخان المصطفى بايع ضميره ..
سطر وجه الشمس وكت الظهيره ..
نزل نجم السمه يواسي الأميره ..
العاشت لوعة الراحت أسيره ..
نفس الزمره كلهم ناصبيه .. ونشوف بكربله حقد آل أميه
الزمن غدار .. حركهه بنار
خيانه .. خيانه
...........................
اليوم الزهره باجر صدر الحسين ..
تسحكه خيول أميه ونبله بالعين ..
وزينب لوبقت تنطي الوجه وين ..
والكافل رميه بلايه جفين ..
تظل محتاره ياعظم الفجيعه .. حالة فاطمه تعيش الوديعه
فرق بسمار .. حركهه بنار
خيانه .. خيانه
...........................
حيدر مطر العبادي

كعديه لشهادة مولاتي السيده فاطمه الزهراء ع
بدموع العيون .. هاي المسيه ..
تتوادع أم عون .. ويه الزجيه ..
البيها ريحة طاهه .. آخر وداع وياهه
هاي المسيه هاي المسيه
.....................................
الليله آهات ومدامع واضح بزينب قهرها
كابلت أمها الزجيه وبالكلب يسعر جمرها
بين باب وبين حايط نعصرت وظالم سطرها
تبجي وتنوح من الألم .. رافضه وماكالت نعم
ماركعت أمنه لكل صنم .. رغم بسمار بصدرها
نظرات الأوداع .. هاي الأخيره
ندفن سمه بكاع .. حيره جبيره
كسر الضلع ألّمها .. متسامح الظلمها
هاي المسيه .. هاي المسيه
.....................................
زينب تعاين لأبوها والحزن يشرح وضعها
تشوف ذاك القلع خيبر أيده بالكوه رفعها
يودع بزهرة حياته وخاف لا يلجم ظلعها
أصعب وداع ويّ الولي .. فاطمه صوته يعتلي
الله اليعينك ياعلي .. أعيونه غركانه بدمعها
والقالع الباب .. مايرفع أيده
تتشمت أحزاب .. بحزن الصميده
يذبح حجي الشماته .. وين الرديه ذاته
هاي المسيه .. هاي المسيه
........................................
بالحزن هالليله عايش االحسن يا حال حاله
أمه أعز من روحه جانت يذكر أيامه ودلاله
ربي خليي أمنه خيمه يدعي يا رب الجلاله
ياربي خلينه سوه .. أمي أعز من الهوه
ننصر حسين بنينوه .. والكمر راعي الكفاله
ونعيش الأحساس .. حسين وشعوره
والكمر عباس .. من يطفه نوره
من تحترك خيمنه .. نريد الزجيه يمنه
هاي المسيه .. هاي المسيه
..........................................
هاي لحظات الموادع وأمي ليلتها الأخيره
صوتها الخافت أسمعه والوجه ليه تديره
زينب تظلين باجر بلا أهل وبلا عشيره
بخيمتج نار وتشتعل .. جم حرمه يمج جم طفل
مسبيه مجتوفه بحبل .. عالهزل للشام أسيره
روس أعله الأرماح .. كل الغوالي
واليحدي ذبّاح .. ياوسفه تالي
ضعن الخدر سبايه .. مجتوفه آيه بآيه
هاي المسيه .. هاي المسيه
........................................
صعبه هاي الليله وأدري باجر الأصعب صباحه
قهر وفراك ومواجع بكل كلب ياخذ مساحه
السمه بلا شمس باجر والحزن فارش أجناحه
باجر الدنيا مظلمه .. وبلا شمس وجه السمه
لو راحت أمنه فاطمه .. وداعها بآآه ومناحه
بعيون الحسين .. عبره شكبرها
ينطي الوجه وين .. ومخفي كبرها
أمه وأعز من روحه .. وحجاية المملوحه
هاي المسيه .. هاي المسيه
........................................
المصيبه
.............
نعيش ليلتها الأخيره وبعد ما بالأيد حيله
هاي لحظات الموادع صعبه والمدمع نسيله
وصف هالليله وحزنها شما أريد أوصف قليله
ماقصرت أم الحسن ..
للفاكد أم جانت وطن ..
نودع السر المؤتمن ..
بعد ياهو النشتكيله وراحت أمنه من أدينه
...........................................
حيدر مطر العبادي

قناة خادم الحسين الشاعر سيد أياد الغالبي
للأشتراك
https://t.me/fydyi

ضلعي أنكسر وبصدري بسمار .. وجفوف أديه أحتركت بنار
ياوسفه أطيح على الترب .. مهضومه والمدمع يصب
وجفوف أديه أحتركت بنار
...................................
هجمت أعليه العصابه        من رحل نور النبي
صوت أسمع وإن فاطم     صاح حيل الناصبي
زمره ملعونه وخبيثه       من الحرق حد السبي
وعلي مجتوف بوصيه     والحسن بعده صبي

هاي الضغينه والحقد ليش .. أباب النبوّه أهل الغدر جيش
حسبالك بساحة حرب .. مهضومه والمدمع يصب
وجفوف أديه أحتركت بنار
...................................
يانبي الله ورسوله            أشلون بابك يندفع
دمي عالحايط تناثر           وأثر عالخد منطبع
الظالم بأيده سطرني      عيني دم تجري ودمع
وطاح من عندي جنيني     أوّن مكسورة ضلع

ما أكدر أنهض أزحف زحوف .. ريتك محمد حاضر تشوف
ترضه أم أبوها تنضرب .. مهضومه والمدمع يصب
وجفوف أديه أحتركت بنار
...................................
صحت يافضه أسنديني    أتوجه عالحايط وأطيح
حيل هدتني الرزيه           ربي سترك كمت أصيح
أنهض وأعثر وأطيحن      مثل طير ملاكي ريح     
جني أشوف الغاضريه       حسين عالغبره ذبيح

كلما يأذيني الضلع حيل .. أبصدره أشوفن تسحك الخيل
محروم من ماي الشرب .. مهضومه والمدمع يصب
وجفوف أديه أحتركت بنار
......................................
تآمرت أهل السقيفه        والنبي على المغتسل
كل قناع أنشال عنهم      من مشه الهادي ورحل
على تشييعك محمد         أبد ما واحد سأل
أتكفل بغسل الجنازه         والدفن خير العمل

وكت الكلافه أتبين الناس .. ياهو الصديق وياهو وسواس
حتى العرف صارو غرُب .. مهضومه والمدمع يصب
وجفوف أديه أحتركت بنار
.........................................
سِمَعت الصوت وأجتني      وشافت آثار الرفس
ركضت وشبكتني زينب      تشعر بأمهه و تحس
وين حماي الحميه           تهمس  بأذني  همس
خل أبوي يسل فقاره       خل يرد أهل الرجس     

أهل السقيفه أتمادت هواي .. بالنار رادت تحرق الماي
رادو خلافتهم غصب .. مهضومه والمدمع يصب
وجفوف أديه أحتركت بنار
......................................
  لو متت باجر يحيدر    كبل مايطلع فجر
بليل تدفني وصيتي      وتخفي آثار الكبر
ما أوصييك أبنيني        والعقيله أم الخدر
خاف بأرض الغاضريه    بسوط يضربهه الشمر

لو راح محسن تلكه عباس .. نعم الأخو بي ترفع الراس
وخلافه للمجلس تطب  .. مهضومه والمدمع يصب
وجفوف أديه أحتركت بنار
.......................................
حيدر مطر العبادي

ويلي عالزهره المظلومه
عاشت وماتت مهضومه
.....................
على المظلومه نبجي ونلطم بحسره
ظل على الوجه مطبوع أثر سطره
خاطرهه  أنكسر  وأضلوع  منكسره
أباب الدار نار الحقد مضرومه
...........................
ليالي فاطمه كل ليله نحييهه
بدموع الحزن نحضر لياليهه
نلطم عالصدر والهامه ندميهه
تظل بكل عزه الهامات مدمومه
.........................
لحد يوم المنيه دموعنه عللخد
تسعر  بالكلب  نارج  فلا تبرد
نلطم عالزجيه ونلبس الأسود
جروح كلوبنه بفركاج ملجومه
...........................
هنياله  اليموت  ودمعته  بعينه
يخلص بالمجالس عمره وسنينه
خادم فاطمه وخادم لأبو سكينه
مثل عابس بيوم الشكك هدومه
.............................
ندك عالراس حيل ونطبر الهامه
وأنواسي علي المحتار بيتامه
وحسين وحسن يبجون كدامه
منالأم زينب بهاليوم محرومه
............................
باجر نبني حضره ونكصد نزورج
مناره وكبه منهن خل يشع نورج
برواياتج  يزهره  أنقيم عاشورج
بعاشور الزجيه صدور مهشومه
................................
حيدر مطر العبادي

ماصخه الدنيه بلهاته    الفاكد أمه
دافن  وياهه  أمنياته     الفاكد أمه
فاكد الحيل      والدمع سيل
الفاكد أمه
........................
كل  كتر  بالدار  يسأل  عن  ضواهه
البيت مدري شلون شمس الله حتواهه
أمي  ياقطب  الرحه  وكوكب  سماهه
هيه  بنت  وهيه  أم  الجدنه  طاهه
ليش  روح  المصطفى      كسرو ضلعهه
ونور شمس الله أنطفى     كسرو ضلعهه
وجلجل الليل       والدمع سيل
الفاكد أمه
  .................................
ودّعتهه وراحت  أحله أيام عمري
عليهه حيلي منهدم ودموعي تجري
ضاكت  عليه الوسيعه وربي  يدري
كمت من أمشي أحّط أيدي على ظهري
اليعيش بلايه أم        شله بحياته
دنيته دمعه وألم        شله بحياته
بآآه وبويل      والدمع سيل
الفاكد أمه
.........................
أبجي وأعيوني علبوي الصعبه حاله
ذاك  المتعّب  الحروب  بكل بساله
رجع  مكسور  الظهر  دافن  حلاله
يخط  بجدامه  وعثر حتى بخياله
ليش  عفتينه  يزهره        مو وكتهه
الفركه صعبه وحيل مره    مو وكتهه
فارك الهيل        والدمع سيل
الفاكد أمه
........................
الله  يجبر  خاطر  أخواني اليتامه
حسين يبجي والدمع سولف كلامه
والحسن من  اللطم  مطبوره هامه
دار  الأحزان أصبحت دار  الأمامه
ألج  نشتاك  شكثر      يمنه الحنينه
الورده مو مالت كبر        يمنه الحنينه
الشامت يعيل     والدمع سيل
الفاكد أمه
........................
أنه وحسين وحسن صابتنه حيره
أصغار بس عدنه أماني شكد جبيره
أمي  كالت  ويه الأنفاس  الأخيره
باجر  تروحين  يازينب  أسيره
جم  يتيمه  وجم  جرح       عينج تشوفه
حسين راسه على الرمح      عينج تشوفه
وعالصدر خيل         والدمع سيل
الفاكد أمه
............................
باجر  الديرة  غرب امشي  سبيه
يجوي بأجدامي الرمل مجتوفه أديه
أبخرابه  أنبات  أنه  و سكنه  ورقيه
هناك  أريدج  حاضره   يأمنه  الزجيه
السوط لو زورك أجتافي      أحتار بأمري
لو رقيه  تمشي  حافي         أحتار بأمري
صراخ وأعويل       والدمع سيل
الفاكد أمه
....................................
حيدر مطر العبادي

كعديه لوفاة السيده فاطمة الزهراء ع
وره الباب .. لاذت فاطمه ويهمل دمعها
وره الباب .. طاح المحسن وكسرو ضلعها
شافت ظلم وأرهاب .. تبجي خيوط الحجاب
لاذت فاطمه ويهمل دمعها
..................................
ندري طبع الذيب ماكر    وما نأّمن بيه ساعه
للحرق عتبة الهادي        أبد ماترهم شفاعه
والدفع باب الثكيله       اللعن والسّب متاعه
يسطرها عالخد النذل .. يعصرها ويطيح الطفل
تلهب النار وتشتعل .. من حقد هاي الجماعه
بسمار .. نابت بالصدر والدم خذاهه
بسمار .. من أبن اللقيط الخان طاهه
جرح للموت ماطاب .. تبجي خيوط الحجاب
لاذت فاطمه ويهمل دمعها
......................................
مانجامل عالحقيقه     ويبقه دوم الصوت عالي
الظلم بضعة محمد       و(إن) صاح وما يبالي
غيره ماعنده ورجوله    وكلبه من الرحمه خالي
نحجي بصراحه وكل ثقه .. وعدنه أدّله موثقه
أهل الظلم والزندقه .. وره حيدر دوم تالي
ملعون .. كلمن  شارك  بغدر  السقيفه
ملعون .. اليبخس حق علي ويصبح خليفه
نور الهادي من غاب .. تبجي خيوط الحجاب
لاذت فاطمه ويهمل دمعها
.................................... 
فاطمه آنه و أنادي    كومي يافضه اسنديني
بصوت مخنوك وأحاذر    لاعلي يسمع ونيني
تره الظالم من عصرني    فرفح أكبالي جنيني
يرفسني حيل الناصبي .. الماكل بماعون النبي
وأبني الحسن بعده صبي .. شاف سطره وحمره عيني
وحسين .. حرك الباب صار أول طفوفه
وحسين .. يريد يطفي نار أمه بجفوفه
حركو بيت الأطياب .. تبجي خيوط الحجاب
لاذت فاطمه ويهمل دمعها
...................................
تريد زينب تشبك أمها      هلبت تخفف ألمها
الزهره تحضنها وتكابر   والضلع مدمي ولجمها
شلها بالدنيا يعالم        االبنيه بلايه أمها
منّ الزغر شافت حرك .. من أمها ماشبعت شبك
وأكبالها تسّب وتطك .. هالعصابه شكد جرمها
والنار .. جوتها من الزغر بأمها الزجيه
والنار .. بخيمتها تشب بالغاضريه
زغيره و الكلب شاب .. تبجي خيوط الحجاب
لاذت فاطمه ويهمل دمعها
........................................
حسرة الزهره شكبرها   وعلي ظل سيفه بكرابه
مجتّف بحبل الوصيه     وينظر الجور العصابه
القلع بابج يخيبر        على الزهره أندفع بابه
موقف صعب عاش الولي .. فاطمه أكباله تنولي
الله اليعينك ياعلي .. أسد وتحيطه الذيابه
محتار .. المحّير عدوه بكل الحروب
محتار .. وأكباله الزجيه شمعه وتذوب
لو خيط الشمع ذاب .. تبجي خيوط الحجاب
لاذت فاطمه ويهمل دمعها
.....................................
المصيبه
الزهره أبدن ماتسامح          لا الأول لا الثاني
وتدعي عالماعنده غيره   وذبح للمحسن أماني
وظلت اليوم المنيه            من جريمتهم تعاني
كالتله حانت ساعتي
ياعلي هاي وصيتي
بالليل أريدن دفنتي
وأخفي كل آثار كبري .. لحد مايطلع المهدي
.............................................
حيدر مطر العبادي

نزل دمعي المدرار ..
على مشكاة الانوار ..
نبي الله المختار ..
سيدي  .. سيدي
...................
يظل ليله ونهاره ..
يصب دمعي بغزاره ..
على المن عنده دين الله ابتدت اول شراره ..
ألك ناذر سنيني ..
يحلمي ويايقيني ..
انه بيوم الحشر يالمصطفى أنتظرك تجيني..
يمنبع للاسلام ..
بمدينه وبارض الشام ..
قست بينه الايام ..
سيدي .. سيدي
..........................
ينور الله وجماله ..
نبي من أشرف سلاله..
الوحي لمن أجاك أقرأ محمد هالرساله ..
لمس بيدك أمانه..
يمنهاج الديانه ..
أكيد حتى الوحي كبّررفع صوته بأذانه ..
الحمام الوسط الغار ..
فرش جنحه وما طار ..
وحماك من الاشرار ..
سيدي .. سيدي
.........................
شفت اروع بطوله ..
بحبيب الله ورسوله ..
أكيد من اذكر اسمك ينذكر معنى الرجوله ..
يدين الله وكتابه ..
رغم غدر الصحابه ..
على دارك لمن هجمو بجت حتى الخرابه ..
انه اعرف صبرك زين ..
الغرف من عنده حسين ..
وعليكم تبجي العين ..
سيدي .. سيدي
........................
بصفر حزني وسوادي ..
على فراكك يهادي ..
تره حبك وسط روحي ويظل ساكن فؤادي ..
اريد ابجي بمناحه ..
وابد ماكو أستراحه ..
على العلمّنه منهاج الامانه والسماحه ..
تظل لكل انسان ..
نموذج للاديان ..
لأن انت العنوان ..
سيدي .. سيدي
.....................
نقيم مجلس وفاتك ..
يطاهه الطيبه ذاتك ..
ابد ماكو بشر ياسيدي شايل صفاتك ..
شعظم هاي الرزيه ..
يبو الزهره الزجيه..
عليك ألبس سواد ياسيدي الحد المنيه ..
اظل للموت انعاك ..
وابد مالحظه أنساك ..
صعب كلش فركاك ..
سيدي .. سيدي
.............................
حيدر مطر العبادي

بالكلب حسرات واهات وأنين..
اليوم راح المصطفى طه الأمين..
.............................
الليلة نعلن سيدي عليك الحداد..
ولبست أملاك السمه ثوب السواد..
يارسول اللاه ياباب المراد..
يا أبا الزهراء يا جد الحسين..
.....................................
ياأبا الزهراء يارمز الأباة..
بالأمانه  والصدق كضه الحياة..
أبد مايمنعنه كل جور الطغاة..
شما قست دنيانه وتدور السنين..
......................................
عالبقيع البلمهد يبجي وينوح..
يامحمد أنت بلسم للجروح..
يندفع باب الزجيه من تروح..
ويشعل النار بحقد ذاك اللعين..
.......................................
يشعل النار بحقد هالناصبي..
وينتهك حرمة ولينه والنبي..
أمهات الخدر ميعرفن سبي..
وللوصيه انقاد أمير المؤمنين..
.....................................
للوصيه انقاد وبيوم الغدير..
عالي صوتك بعدي بس حيدر أمير..
لكن أصحاب السقيفة بلا ضمير..
تآمرو ظل يطلع الحقد الدفين..
......................................
تآمرو عالمصطفى خير الأنام..
النّزل عليه الوحي من ألله السلام..
وصاح أقرأ يارسول الله الكلام..
تبلغ بهاي الرساله العالمين..
.....................................
تبلغ بهاي الرساله وبالطفوف..
تعاين أهل البيت وبعينك تشوف..
والمخيم هجمت عليه الالوف ..
والحسين بلايه ناصر لا معين..
.......................................
والحسين بلايه ناصر لا ولي..
ريت حاضر لومحمد لو علي ..
يشوف ظلم الناصبي والجاهلي..
على ضنوة فاطمه وأم البنين..
.........................................
لخادم الحسين
حيدر مطر العبادي

عهد كل عام نجي نزور زحف مشايه
.........................................
أذن يا أذان .. وكت العشك حان
حتى من الكماط فزعتله رضعان
تزحف مشي تريد .. والرايه بالأيد
لا تعرف الخوف لاتخشه تهديد
كل موكب . ومعزّب . يتمنه تمر ..
ويكرمك . ويخدمك . بجفوفه السمر ..
ثلث  تنعام  يخدام  فعل وحجايه ..
عهد كل عام نجي نزور زحف مشايه ..
..............................
هذا الدرب صار . مركز للأنظار
والعالم يشوف كل هاي الأنصار
حطمنه الأعداد . هواي الرقم زاد
بكبرك سره الناس واصل لبغداد
لو زاير . ظل حاير . مر بيه التعب ..
نشد حيله . نتجيله . زيارتنه بأدب ..
بهاي الدروب . الذنوب . تخف هوايه
عهد كل عام نجي نزور زحف مشايه
.............................. ....
شدو العزم حيل . من غبشه لليل
حتى المعازيب صارو معاميل
ظل أمشي مادام . موجوده خدام
وتتاني زوار عالشارع العام
أتفضل . تتوسل . بالزاير يجي ..
بخدمتكم . جيتكم . كلعام نرتجي ..
خيره موجود وأبو الجود روانه بمايه
عهد كل عام نجي نزور زحف مشايه
....................................
لزيارة حسين . عطشانه كل عين
تزحف ملايين مطلوبه ألك دين
متساوم بيوم . باليقظه والنوم
صوت الحزن صاح ويلا يمظلوم
بشموعنه . ودموعنه . نكتبلك شعر
حسراتنه . وعبراتنه . بكلوبنه شكثر
رفعت الراس ينبراس نظل وفايه
عهد كل عام نجي نزور زحف مشايه
.....................................
تطوي المسافات .  ماعدهه صعبات
مليانه  زوار  حتى المطارات
وبكربله تطوف . مرفوعه الجفوف
أفضال وكرامات خل عينك تشوف
والعاجر . من باجر . تطلك بربعه
والمضطر . يتبشر . كل سوء ودّعه
تصير الهموم وسط ريح مثل كشايه
عهد كل عام نجي نزور زحف مشايه
.........................................
وبدربك المات . نعلكله شمعات
صوت الملايين للذله هيهات
حسين احنه نهواك . ما لحظه ننساك
لحد كطع الأنفاس نبقه أحنه وياك
بدمعاتنه . وآهاتنه . نوصل كربله
ونزورك . وبنورك . جلمة ياهله
بصحنك نطوف والجفوف تعلّي الرايه
عهد كل عام نجي نزور زحف مشايه
...........................................
حيدر مطر العبادي

على لحن صارت عشيره الخدام وحسين شيخ أعليهه  

مد وجزر مثل الروج نزحف ألك مشايه
..........................................
أطفال نسوان وشباب وشايب ..
نمشي لحسين ونأدي الواجب .
خله يحجي شمايكول الناصب ..
العين ماتعله أبد عالحاجب ..
خليهم شما يحجون متهمنه أي حجايه
..............................
رغم صعبه والمسافه أبعيده ..
جنون حبك ندعي الله يزيده ..
كل محب بالأربعين أنريده ..
للغيوم  الرايه توصل  بيده ..
بالطف رفعها العباس متطيح هاي الرايه
................................
بصره ذي قار ونجف وعماره ..
كوت بغداد وسماوه أنصاره ..
الحله وديالى الدمع يتجاره ..
الموصل وكركوك أجو زواره ..
وأهل الديوانيه بشوك الحضرتك عنايّه
...............................
المعتنيلك لو غريب وحاير ..
وطن صحنك ياهله بالزاير ..
يمك الأعمه بصر و يناظر ..
بتوم تطلك من ترد العاجر ..
شفنه الكرامات انواع والمعجزات هوايه
..............................
أي وحك رب العرش وكتابه ..
حسين نبقه شيعته وأحبابه ..
بينه نيران  العشك  لهابه ..
نوّن ونهل الدمع لمصابه ..
وننصبله بدموع العين مجلس عزه وقرايه
............................
اليوم ابو السجاد كلنه أضيوفه ..
خيره غاطينه شكثر معروفه ..
وابو فاضل فارش ألنه أجفوفه ..
حكنه لو لآخر نفس منعوفه ..
هذا العهد كلنه وياك طول العمر وفايه
...............................
شابحه أعيون المناره أعلينه ..
وزين تندل الدرب رجلينّه ..
االزمن شاهد يشوف بعينه ..
الطاغي كلي الحاربك جا وينه ..
أنت القهرت الطاغوت نشهدلك أحنه بهايه
....................................................
حيدر مطر العبادي

https://youtu.be/0Lmpi2Ig_mc?si=IhlUR6-x6IYPMOvs

أويلاه .. الكل كلب عنوانه
أويلاه .. يبجي ظل ديوانه
.............................
آنه زينب عشت آهات المصيبه
وجهه أصفر والحسن أيّس طبيبه
سّمه واصل للجبد يسعر لهيبه
راح أخوي منيدي والراح شيجيبه
أويلاه .. النشهد بأحسانه
أويلاه .. يبجي ظل ديوانه
.............................
هذا أخوي العشت كل عمري بدلاله
واصل البيته الغدر وأيد الظلاله
بيّه وصّه حسين وأنطاه الرساله
ولبو فاضل من علي الزينب كفاله
أويلاه .. وبيه علي وصّانه
أويلاه .. يبجي ظل ديوانه
................................
يا خليفة حيدر ونعم الخليفه
خل تموت بغيضهه أذناب السقيفه
أالحسن باب الكرم عامر مضيفه
والطبيبه الكل مرض بنته الشريفه
أويلاه .. اليا هلا بلسانه
أويلاه .. يبجي ظل ديوانه
....................................
الحسن وحسين أحلى أمنياتي
منّي لو راحو بعد شلي بحياتي
كل مسيه للحسن أدعي بصلاتي
وماكو عند حسين بالدنيه بغلاتي
أويلاه .. الأبد ما ينسانه
أويلاه .. يبجي ظل ديوانه
......................................
الحسن رغم الطغاة اثبت وجوده
مايهاب الطاغيه وكثرت وعوده
اليدعي للناس بصلاته وبسجوده
سافر وخله الأماني كلهه سوده
أويلاه .. التزهي دوم ألوانه
أويلاه .. يبجي ظل ديوانه
.........................................
حسين رادك يالحسن تحضر طفوفه
وتعرف الصار وجره وتعرف ظروفه
القاسم العريس بعيونك تشوفه
بحضن عمه أستشهد وشابك جفوفه
أويلاه .. وكلها دم أردانه
أويلاه .. يبجي ظل ديوانه
.......................................
حيدر مطر العبادي

موشح نجفي لوفاة السيده رقيه ع

طفله خمس سنين بس أعوامها
حافيه و يجوي الرمل بأجدامها
....................................
تمشي مهضومه رقيه للسبي
يسب أبوها بكل صلافه الناصبي
من الشمس صار الوجه لون العبي
وراس الحسين برمح كدامها
................................
من الزغر طفله بأبوها تنفجع
وبرمح كل الأماني ترتفع
والحوافر أبد ما خلت ضلع
سالم وداست جميع أحلامها
.................................
طفله ودموع الحزن عالخد تسيل
بناكه هزله بالدرب تمشي وتميل
ساعه عمه زينب وساعه العليل
تصرخ وظلت تعد بأيامها
....................................
من ترافتها أخذ ريش الحمام
واللسان الينطق بأحله الكلام
أشلون تالي عالترب تغفه وتنام
بالخرابه عكب ذيج أخيامها
...................................
طفله بس أوصافها ما تنوصف
ترست دروب اليسر رقه وعطف
من خدرها الهاشميه تنعرف
تعجز بوصف الخدر أقلامها
.....................................
شمر ما يعرف جبير ولا طفل
مكيدات الهاشميات بحبل
يسبهن الما عنده غيره ولا أصل
الحارب العتره وهتك أسلامها
....................................
زغيره وأهل الشام يرموها بحجر
ضعف من كثر البجي حتى النظر
باليسر كل لحظه تنعد بشهر
ترمي نظرات الشماته سهامها
....................................
بطشت جابو راس أبوها المنذبح
بكل كتر بيه نبله لو طعنه برمح
بجت ودموع الطفل ما تنمسح
بحسره ماتت عالطشت بآلامها
.........................................
حيدر مطر العبادي

https://youtu.be/egYEJe8zSDQ?si=DVs-TTXrvbrk4p6d

https://youtu.be/_GFQOdbOEHM?si=iQ2C9JHpLhgH8Lya

يزوار عالتعب كواكم
يزوار ياهله وحياكم
.........................
هله بالزاير أجانه .. ننتظر جيته لكانه
يمر بينه ولا نسانه .. نحسب لأيامه
بيده شايل رايه سوده .. أحنه بالخدمه على موده
من يشرفنه بوجوده .. يا هله وخدامه
تفرح الزهره الزجيه .. تشوف فزعه جعفريه
وألكم تقدم تحيه .. يالرفعتو الهامه
يزوار المهدي يمشي وياكم
يزوار ياهله وحياكم
........................................
ترفرف الرايه بيمينه .. عالتعب الله اليعينه
ينصر المذهب ودينه.. بيده حلوه الرايه
احنه نحجيهه بصراحه .. بهالدرب كل تعب راحه
بلطم ودموع ومناحه .. توصل المشايه
هالدرب ثامن عجيبه .. عشك محبوب الحبيبه
تهمل دموع المصيبه .. هله بالوفايه
يزوار نلهج بطرواكم
يزوار ياهله وحياكم
...........................................
بموكب الخدمه نشاهد .. شمّرت كلها السواعد
والمعاق بكرسي كاعد .. والهله بلسانه
من الفجر شدت حزمها .. تركض وحافي جدمها
لا تعب لاحر يهمها .. تفرح بملكانه
ابو الموكب صوته عالي .. والدمع عالخد يلالي
فدوه مر بينه يغالي .. وبات يمنه هنانه
يزوار أحنه نترجاكم
يزوار ياهله وحياكم
........................................
أسرع الخطوه يزاير .. بالمشي تحيي الشعاير
باجر تشوف المناير .. كربله متانيتك
للفرج أدعي بمسيرك .. خاطر المهدي يجيرك
دوم مرتاح وضميرك .. صافي يشبه نيتك
لو شفت شايب أسنده .. من الدرب حيله تبده
ماكو بس عوجيته عنده .. حزّمه بجفيتك
يزوار نفرح بملكاكم
يزوار ياهله وحياكم
.........................................
شكرا لرب الجلاله .. خله درب الأستحاله
يصير واقع لا محاله .. حسين هو شراعنه
للحسين الجاذبيه .. وحبه صار ألنه هويه
هالزياره عالميه .. الكون كله بكاعنه
ياهله بكل الجناسي .. الكصدت الزهره تواسي
والله أحطهم على راسي .. خل تشوف أطباعنه
يزوار الدار هاي دياركم
يزوار ياهله وحياكم
........................................
يله شدوها حزمكم .. مرجله وإيثار كلكم
ماكو بالدنيا مثلكم .. بالعشك تتباهه
زياره أبد ماكو مثلها .. الكون محتار بشكلها
لغز ماواحد يحلها .. ولاعرف معناهه
اليلتزم دوم بصلاته .. لافرض فد يوم فاته
هذا موبس بحياته .. آخره شمحلاهه
يزوار للصلاه ناداكم
يزوار ياهله وحياكم
........................................
حيدر مطر العبادي

ضامي وغريب ومظلوم ..
حادي الحزن بيه يحوم ..
شايل صحيفة معصوم ..
آنه العليل .. آنه العليل
.................................
رغم المرض رغم الوهن جنت انه بالطف حاضر ..
ألمني موقف والدي وماظل معين وناصر ..
أدعي بدعاء المحتسب المسه الضرر بس صابر ..
موقف أبد ماينوصف موقفنه يوم العاشر ..
ونحر الحسين المذبوح ..
وظل جسمه مليان جروح ..
وانه بعذابي مطروح ..
أنه العليل .. أنه العليل
......................................
بيدي الصحيفه بالسبي ايتام وحرم كدامي ..
وأطفال تنظر عالرمح راس الحسين الدامي ..
كلما تهز ريح الرمح يتناثرن أيامي ..
وتكول زينب عمتي ضاعت بعد أحلامي ..
وزوركت حته المتون ..
واسمعهم من يشتمون ..
تنظر وتبجي العيون ..
أنه العليل .. انه العليل
................................
دمعة رقيه على الأبو تسعر وسط دلالي ..
جانت بعزنه مدلله وللسبي راحت تالي ..
يعرك خجل راس الرمح ويهتز أشوفه أكبالي ..
لو زجر يضربله طفل تظل تبجي كل أطفالي ..
حر الظهيره جواي ..
ومامش ولاكطرة ماي ..
والعله تلهب بحشاي ..
آنه العليل .. آنه العليل
..................................
بخوف وذعر يمشي الضعن والنار تسعر بيه ..
أسياط الشمر ماتنحمل توجع متن رقيه ..
علويه ظلت حايره تلوذ بكتر علويه ..
والشمر صوته يعتلي يازينب السبيه ..
عدهه صبر ماينقاس ..
زينب خلاف العباس ..
وبالكوه أجر الأنفاس ..
انه العليل .. انه العليل
..................................
يستعرضون بكل حقد ونتصارخ الهضيمه ..
أطفال ترمينه بحجر والشام وحشه وهيمه ..
تاليهه بالسوك الضعن حرمه تكض يتيمه  ..
كل ساعه لحسين بحزن موكب عزه نقيمه ..
والناس تنظر للحال ..
تبجي الحرم والأطفال ..
ساجد ودمعي همال ..
أنه العليل .. أنه العليل
....................................
طبن بنات آل النبي بديوان أبن أميه ..
العاشن أميرات البشر ماهابن المنيه ..
مغرور حسباله اليسر يذل زينب الأبيه ..
خطبتهه خطبة عالمه من الزلم تسوه ميه ..
المغرور ضاع لسانه ..
ساكت وسط ديوانه ..
التحجي زينب وآنه ..
أنه العليل .. آنه العليل
...................................
حيدر مطر العبادي

أويلاه على الحسن  .. أويلاه على الحسن
..........................................
هذا  الأمام الما يدنك هامه ..
الحكمه ثوبه والعدل هندامه ..
ب سمّ  الفجيعه خلصّت أيامه ..
طول العمر تبجي عليه خدامه ..
أويلاه على الحسن .. اويلاه على الحسن
.....................................
الشيعه ماوصلت ألك معذوره ..
لاصحن خاطر نعتني ونزوره ..
عالراس نلطم لو نشوف الصوره ..
كبرك حجاره ومايشع بنوره ..
أويلاه على الحسن .. أويلاه على الحسن
...................................
يابو الكرم جلمة هله بلسانه ..
اليعتنيلك حاجته خلصانه ..
ننخاك يالما قصرت ويانه ..
أدفع الفتنه ولا تشمت أعدانه ..
أويلاه على الحسن .. أويلاه على الحسن
....................................
يازاهد  وكل  الطغاة  تهابه ..
خلو حرس يم تربته بمحرابه ..
طير السلام وعاش وسط ذيابه ..
وسمّ الغدر كشّر عليه أنيابه ..
أويلاه على الحسن .. أويلاه على الحسن
..................................
أكبال عينه الزهره دفعو بابهه ..
ذيج الجليله الينحلف بحجابهه ..
يعرف دوافع هالفتن وأسبابهه ..
ويلعن الأسس هالسقيفه وجابهه ..
أويلاه على الحسن  .. أويلاه على الحسن
.....................................
أنت التقي وأنت النقي بأوصافه ..
بس المواعظ والحكم بشفافه ..
بنص الصحاري عاشت الصفصافه  .
سمّك  نجيع  وما أظن تتشافه ..
أويلاه على الحسن .. أويلاه على الحسن
...................................
حيدر مطر العبادي