Ethiopian Press Agency/አማርኛ /

ፀሐይ - 2 አውሮፕላን የመጀመሪያ ስኬታማ የሙከራ በረራ‼️

የቡድን 20 አባል ሀገራት ባለሃብቶች በኢትዮጵያ በኢነርጂ ዘርፍ ኢንቨስት እንዲያደርጉ ጥሪ ቀረበ
******
(ኢ ፕ ድ)

በደቡብ አፍሪካ ጆሃንስበርግ ከተማ ለሁለት ቀናት የተካሄደው የቡድን 20 አባል ሀገራት ስብሰባ ተጠናቋል።

ከስብሰባው ጎን ለጎን የውጭ ጉዳይ ሚኒስትር ጌዲዮን ጢሞቴዎስ ከህንድ፣ እንግሊዝ፣ የአዉሮፓ ህብረትና ሩሲያ አቻቸው ጋር በጋራ ጉዳዮች ላይ ፍሬያማ የሁለትዮሽ ዉይይት አድርገዋል።

በመድረኩ የዉጭ ጉዳይ ሚኒስትር ጌዲዮን ጢሞቴዎስ (ዶ/ር)፣ የቡድን 20 አባል ሀገራት ባለሀብቶች በኢነርጂና በኃይል ማመንጫ መስኮች ኢንቨስት እንዲያደርጉና በአፍሪካ የኤሌክትሪክ ኃይል ዝርጋታ እንዲሳተፉ ጥሪ አቅርበዋል።

አባል ሀገራቱ አሁን የሚስተዋሉ ተግዳሮቶችን ለመቅረፍ ትብብርና የጋራ መፍትሄ እንደሚያስፈልግ ጠቁመዉ፣ በአየር ንብረት ለዉጥ፣ ወረርሽኝና በድህረ-ግጭት መልሶ ግንባታ በትብብር መስራት አፅንዖት እንደሚያስፈልገው ገልጸዋል።

ኢትዮጵያ በቡድን 20 አባል ሀገራት ጉባኤ ላይ እንድትሳተፍ በደቡብ አፍሪካ መጋበዟ ከደቡብ አፍሪካ ጋር ያላት ወዳጅነት ስለመጠናከሩ አይነተኛ ማሳያ እንደሆነ በፕሪቶሪያ የኢትዮጵያ ኤምባሲ አስታውቋል።

የካቲት 15 ቀን 2017 ዓም

"ከነገሮች ሁሉ ለሰላምና ለአንድነት ቅድሚያ በመስጠት ጾሙን ልንጾም ይገባል"
- ብፁዕ ወቅዱስ አቡነ ማትያስ
*
(ኢ ፕ ድ)

የዓብይ ጾምን ከነገሮች ሁሉ በፊት ለሰላምና ለአንድነት ቅድሚያ በመስጠት ልንጾም እንደሚገባ የኢትዮጵያ ኦርቶዶክስ ተዋህዶ ቤተክርስቲያን ፓትሪያርክ ብፁዕ ወቅዱስ አቡነ ማትያስ ቀዳማያዊ ርዕሰ ሊቃነጳጳሳት ዘኢትዮጵያ ሊቀጳጳስ ዘአክሱም ወእጨጌ ዘመንበረ ተክለ ሃይማኖት አሳሰቡ፡፡

ብፁዕነታቸው የፊታችን ሰኞ የሚጀመረውን የዓብይ ጾም አስመልከተው ጋዜጣዊ መግለጫ ሰጥተዋል፡፡

በመግለጫቸው ምዕመኑ ጾሙን የተራበውን በመመገብ፣ የተራቆተውን በማልበስ ከነገሮች ሁሉ ለሰላምና ለአንድነት ቅድሚያ በመስጠት ጾሙን ሊያሳልፉ እንደሚገባ አባታዊ መልእክታቸውን አስተላልፈዋል።

ኢየሱስ ክርስቶስ 40 ቀንና ሌሊት ያለምንም ምግብ አሳልፏል፤ እኛ ከዚህ የምንማረው ሰው በህይወት መኖር የሚችለው በእንጀራ ብቻ እንዳልሆነ ነው። ብዙ ዜጎች እንጀራ ሳያጡ በየዕለቱ ህይወታቸውን እያጡ በመሆኑ በህይወት ለመኖር የእግዚአብሔር ቃልም በእጅጉ አስፈላጊ መሆኑ ተናግረዋል።

በየዓመቱ የሚጾመው ታላቁ የዓብይ ጾም ዓላማ ዲያብሎስን ለማሸነፍ ነው፤ የመልካም ኀሊና ልዕልናም ነው ብለዋል።

ሰውነት በመብልና በመጠጥ ሲደነድን መልካም ኀሊና ዓቅም ያጥረዋል ያሉት ብፁዕነታቸው፤ በአንጻሩ ደግሞ ሰውነት ከመብልና ከመጠጥ ሲለይ መልካም ኅሊና፣ ቁጥብነት፤ ማስተዋልና ማመዛዘን ጉልበት እንደሚያገኝ ተናግረዋል።

እንደ ብፁዕነታቸው ገለፃ፤ ዲያብሎስን ለማሸነፍ መጾም ግድ ስለሆነ ጌታችን በከፈተልንና ባሳየን መንገድ እንጾማለን፤ በወርኃ ጾም ከመልካም ኅሊና የሚመነጭ መልካም ስራ ማከናወንም ግድ ይለናል።

በቃልኪዳን አሳዬ

የካቲት 15 ቀን 2017 ዓም

“ለትግራይ ክልል ፖለቲካዊ ውጥረት መንስዔው የሥልጣን ጥማት ነው”
– አቶ ሙሉብርሃን ኃይለ
*****
(ኢ ፕ ድ)

በትግራይ ክልል በየጊዜው ለሚፈጠረው ፖለቲካዊ ውጥረት መንስዔው የሥልጣን ጥማት እንጂ የሕዝብን ጥቅም መሠረት ያደረገ አለመሆኑን የትግራይ ዲሞክራሲያዊ ፓርቲ ጽሕፈት ቤት ኃላፊ አቶ ሙሉብርሃን ኃይለ ገለጹ፡፡

የፖርቲው ጽሕፈት ቤት ኃላፊ አቶ ሙሉብርሃን ኃይለ ለኢፕድ እንደገለፁት፤ ሁለት ቦታ በተቧደኑት የትግራይ ፖለቲካ ኃይሎች መካከል የዓላማ እና የርዕዮት ልዩነትና ፀብ የለም፡፡ የልዩነቱ መንስዔ የግል ጥቅምና የሥልጣን ሽኩቻ ነው፡፡

ጊዜያዊ መስተዳድሩ የተሰጠውን ኃላፊነት ለመወጣት ሲንቀሳቀስ የተወሰኑ ኃይሎች የግል ጥቅማቸውን ለማሳካት በየወቅቱ የመግለጫ ጋጋታ ያወጣሉ፤ የሕዝቡን ትኩረት ለመሳብ እና ሁከት ለመፍጠር ቀን ከሌት ይሠራሉ፤ ይህ ድርጊትም ዕርቅ ለመፍጠር የሚያስችል አይደለም ብለዋል።