الفي الصورة دا اسمو جون مكارثي .. وغالبا لو ما كنت في مجال البرمجة يمكن تكون دي أول مرة تسمع بيه .. بس خليهو علي جمب ح نجيهو بعدين 😁
سنة 2017 وبناء على تطبيقات الذكاء الأصطناعي قوقل طورت تطبيق أسمو Google lens .. الي دمجتو لاحقا في كاميرات الاندرويد ..
قوقل لينس او عدسات قوقل عبارة عن محرك بحث ذكي عن الصور .. كان التطبيق قادر على قراية اي صورة ومعرفة نوع المنتج الفيها ومن ثم البحث عنو في محركات البحث والمتاجر الالكترونية المعروفة ( امازون ، نون وهكذا ) ومن ثم افادة المستخدم بالاسعار والمقارنة بينها ..
يعني صاحبتك الغتيتة الما بتقول ليك هي بتستخدم ياتو كريم كوري لوشها .. بينك وبينها صورة للمنتج العجيب الغريب الفي تسريحتها .. وقوقل ح يقوم بي باقي المهمة 😈😈 ..
تطبيقات تانية كتيرة قائمة على الذكاء الأصطناعي .. التشات بوت البرد عليك بدل موظف خدمة العملاء وبتزهج منو وبتقول ليه جيب لي human يكلمني انت مش فاهمني ..🥲🥲
مواقع حجوزات الفنادق البتجيب ليك صورة لي فندق في المالديف وحوالينو المياه الزرقاء الساحرة وتقول ليك ما نفسك تحجز يومين .. علما بإنك فطور يومين ما عندك لكن امس كنت بتتونس مع صاحبك في القهوة وقال ليك ماشي شهر عسل المالديف وقلت ليه شوف صورة ود عمتي في الفيس بوك كان هناك 😁😁
وغيرها كتير من التطبيقات ..المسوقين منذ زمن بعيد بستخدمو مفاهيم متعلقة بال AI لتطوير وتحسين نتايج حملاتهم التسويقية .. اذن الذكاء الأصطناعي ما جديد .. طيب .. ايه الجديد ؟ 🤷♀️
انت الجديد عزيزي المسوق وصاحب المشروع 🤷♀️
جون مكارثي ..الراجل الفي الصورة .. عالم حاسوب امريكي ومعروف بأبو الذكاء الأصطناعي .. عرف ال AI بإنو ( قدرة الانظمة على أداء المهام التي اذا قام بها الأنسان يمكن تسميته ذكيا 😁) بالانجليزي قال considered intelligent .. ومن التعريف دا جات تسمية Artificial intelligence.. بس دي ما المشكلة .. المشكلة انو قال الكلام دا سنة 1971 او قبلها كمان .. عرفت ليه بنقول ليك انت الجديد 💃💃
لازم تفهم وتمارس تطبيقات الذكاء الاصطناعي في حياتك اليومية وحياة مشروعك .. ودا ما ح تقدر تعملو بدون ما تفهم 3 مصطلحات مهمة .. البيانات Data , الخوارزميات algorithms .. والشبكات networks .. بس دي حكاية نحكيها المرات الجاية 😁
#AI_in_Marketing