قناة انيس الخفاجي الكربلائي

الليالي الزينبية

والله زينب ما تسد بيبانها
والرسالة مبينة من عنوانها
"""""""""
باب زينب جنة وتوزع امان
شلون تنسد يا بشر باب الجنان
بيوت الله ويرتفع بيها الاذان
والاذان الحيدري اذانها
"""""""""
تبقه بيبان المقام امفتحه
والرسالة مبينة ذيج وواضحه
لراد يمحي الذكر تاليها انمحه
مات ذكره وهي عالي شانها
"""""""""
لگال زينب تنسبي يسمع إلي
لا وحگ هو علي ما تنولي
دامها اتشم الهوه شيعة علي
ويله لـيمس ذرة من بنيانها
"""""""""
روح بالتاريخ إقره وافتهم
اسم زينب تره ايخوّف هالاسم
ذلت بكربله الاف الزلم
شامخة ظلت عكس عدوانها
"""""""""
بهالارض لولا مقام السيده
چان هذا الشام محد يگصده
بوب هاي الدنيا كلها مسدده
وباب زينب فاتحة ذرعانها
"""""""""
اني وانت نريد لكن شي اكيد
زينب بإذن الله تفعل ما تريد
جبل وگباله انحنوا زمرة يزيد
هاي ترچية إذن لـفلانها
"""""""""
هاي زينب ما هي حي الله مره
هاي اخوها اسمه سبع الگنطره
وابو عدها اسمه قالع خيبره
والنعم من حيدره وخوانها
"""""""""
زينب لانفاسنا هي الهوه
عدها حضرة تارسة الدنيا ضوه
وباب عدها دگته وصفة دوه
ببابها تسجد انسها وجانها

انيس الخفاجي الكربلائي

الليالي الزينبية

عيني اعله بابي والدمع هامل
منتظرة دگة چف ابو فاضل
كل لحظة اشيل الراس
ما بيّن العباس
"""""""""
راسي بالگوه اشيله نُصي ميت نُصي حي
راح اموت وبيه حسرة ما شربت امن ايده مي
حته لو مگطوع راسه واخته لو صاحت يخي
بلايه راس ايجيني يركض تنطويله الارض طي
باخر نفس بلكن يمر بيه
يلحگلي لو ما يلحگ اعليه
منتظرة اعز الناس
ما بيّن العباس
""""""""""
اللي دگ ايده اعله صدره ورفرف اعله اخته بعلم
ما يتّيه بابي ادري ايجيبه دخان الخيم
ولو يجيني تبقه شغلة اتزيّد ابروحي الالم
شلون راح ايشوف اخته وعينه مصيوبة بسهم
لو حته نبلة بعينه يندلني
عباس اعرفه الا يوصلني
طيب واصيل الساس
ما بيّن العباس
""""""""""
صار مرتين ارد اودعه وما يصح توديع إله
هاي مرة ومرة چانت عالشريعة بكربله
ميتة وينه اللي كفلني كون دفني يكفله
الفاتحة يقره اعله روحي الليلة اخته راحله
مو بيد اخوتي اندفن صعبه
زينب غريبة وماتت بغربه
امتعبني هالاحساس
ما بيّن العباس
"""""""""
عيني عالباب وأسبّح وانخه يا رب فاطمه
كون ابو فاضل يجيني وحيل احضنه والزمه
وزينب اشلونچ يگلي يسأل ويبچي دمه
ابريني يختي الذمة بالطف عفتچ بحر الضمه
ما قصرت متفضل اعليه
يا خويه روح الذمة مبريه
مختنگة شو لانفاس
ما بيّن العباس
"""""""""
بابي وين الله ويدگها ويحضر العباس إلي
خويه سنّدني اگله ايگلي يختي اتدللي
ارد اگوم انطيني چفك وينه چفك كافلي
والله لو موجود چفك خطوة ما چنت انولي
لو ما يطيحن كافلي اچفوفه
ما چان ابد اخذوني مچتوفه
انشد عن النوماس
ما بيّن العباس
""""""""""
ها يجي لا ما يجيني ليش انه امحيره
وانه ادري براسه شايل غيرة الله وحيدره
وادري ما يرضاها نعشي ايمسه واحد بظفره
فوگ چتفه ايشيل نعشي ويمشي بي للمگبره
وصلوله من زينب هالحچايه
مشتاگة اختك چانت هوايه
حزني بشنو ينقاس
ما بيّن العباس

انيس الخفاجي الكربلائي

لمولاتي ام البنين ع

صاحت ام البنين
نورَ عيني حسين
"""""""
يا ناس يم الغالي بس ودوني
باخر نفس من عنده لتحرموني
ميتة وتصد لكربلاء اعيوني
اخذوني يمه وبالصحن دفنوني
حيل هزني الحنين
نورَ عيني حسين
""""""""
باخر نفس گلبي الصبر ميفيده
مشتاگه عيني للحسين اتريده
معقوله اغمض وانه عنه ابعيده
ومعقوله نعشي ما يحمله بأيده
بدمعة ابقه وونين
نورَ عيني حسين
""""""""
حسره اشوف الغالي ظلت حسره
اتمنه گبري ينبني يم گبره
باخر حياتي رايده اشتم عطره
ياريت صدري الهشموا مو صدره
لابني گلبي حزين
نورَ عيني حسين
""""""""
من راح ابو اليمه اخذ عافيتي
وي روحته طاح وتهدّم بيتي
امنيتي چانت لو متت تاليتي
چانت دفنتي بحضرته امنيتي
هو وين انه وين
نورَ عيني حسين
""""""""
محرومة من عنده وعشت مالومه
وحته بمماتي راح اظل محرومه
ما انسه ابو اليمه ومصابه ويومه
ويلي عليه امسلبين اهدومه
وخاتمه امسلبين
نورَ عيني حسين
""""""""
يالـبُعده جمرة وتستعر بحشايه
اخذوني يمه عندي بس حچايه
يبريلي ذمتي ارد اگله بهايه
وبحقه انه امقصره احس اهوايه
برگبتي يبقه دين
نورَ عيني حسين
""""""""
باخر حياتي بدمعتي السچابه
اتمنه والله ايشيعوني ببابه
واتمنه يسجد نعشي يم اعتابه
وهناك جسمي يندفن بترابه
اه من السنين
نورَ عيني حسين


انيس الخفاجي الكربلائي

مولاتي ام البنين ع

باچي على حسين شكثر .. بس الله يعلم
جيتچ يمولاتي وجبت .. دمعة محرم
ما عندي بس هالدمعة تدرين
تگضيها ادري وما تقصرين
""""""""
بيه تدرين .. انه مو راعي مُلُك بس راعي دمعه
بحرگة ابچي .. لو سمعت الناعي آ يحسين ينعه
نحر الحسين .. الطم اعله الراس لو طاريه اسمعه
لزمي ايدي .. اقسم اعليچ بگطع نحره واصبعه
بنحر ابنچ الضامي اسألچ .. مولاتي نظره
واعرف الچ يام الوفه .. شگد غالي نحره
نظريني بلله بداعت حسين
تگضيها ادري وما تقصرين
"""""""
هيچي طبعي .. عادتي بابچ ادگ من عندي شده
بالشدايد .. انتي باب الله الچبير الـدوم اگصده
براحة اشعر .. اگعد ببابچ واسولف وحده وحده
اُّم احسّچ .. والله ما اخجل إلچ چفي أمده
مي وجهي اذبه وعرفچ .. طيبة وكريمه
وتگضيها لن تدريني ابو .. فطرة سليمه
عالحاجة انتي بس توقعين
تگضيها ادري وما تقصرين
""""""""
ادري طبعچ .. لو نطيتيني واذا ادگ بابچ اردود
شگد كريمة .. لا ولا مرة لگيت الباب مسدود
ولو فرضنه .. الجود چان بهيئة الانسان موجود
چا لگينه .. يگدي يومية اعله بابچ واگف الجود
گالوها من اهل الكرم .. تأتي المكارم
وانتي علي متفضلة .. ممنون وخادم
مشكورة فوگ الراس والعين
تگضيها ادري وما تقصرين
""""""""
دوم والله ..لو قريت الفاتحة واهديها لسمچ
الحوائج .. الصغيرة والچبيرة تگضي يمچ
ابقه انه .. خادمچ فدوه رحت لتراب جدمچ
وما اگلچ .. بس اگلچ هالله هالله بالـيخدمچ
حاجاتي انه اتعودت .. اطلبها منچ
ويومية أدعي الله لا .. يبعدني عنچ
ولا مرة اطلب گلتي بعدين
تگضيها ادري وما تقصرين
""""""""
بالنوايب .. ادري واندل زين إلمن اشكي حالي
الحاجة اسأل .. عن طريقچ للسمه يصعد سؤالي
خالي ارجع .. والله ما يخطر ابد مرة اعله بالي
منچ ادري .. مال ارد خالي فلا اترديني خالي
دگيت بيبان شكثر .. وجربت ميفيد
بس ادگ بابچ واندعي .. الگاها بالايد
باب الله بابچ يام الابنين
تگضيها ادري وما تقصرين
""""""""
ارد احلفچ .. بداعت الما ضاگ مي بالغاضريه
ارد احلفچ .. بللي سحگت صدره خيل الاعوجيه
ارد احلفچ .. بذاكه راسه الـشبگته وماتت رقيه
ارد احلفچ .. بالحسين اتوسلچ نظرة إليه
يللي فزعتي باربعة .. رايدلي فزعه
عندي طلب ريت الطلب .. چفچ يوقعه
لاهل الحوائج ما تعوفين
تگضيها ادري وما تقصرين

انيس الخفاجي الكربلائي

الليالي الفاطمية
شوط كربلائي

على حب فاطمة نبقه اهل دمعة واهل فطره
احنه بصاية الزهره سلام الله على الزهره
"""""""""
يسألونا عن الزهرة شكثر وشگد تحبوها
بسؤال احنه نجاوبهم نِعَم الله تعدوها ؟
نحبها گد نِعَم الله اظن هسه عرفتوها
نِعَم ربنا فلا تنعد
نحب مولاتنا هلگد
نحبها هلگد وأزيد
حبنا بالحقيقة اكثر لكن ردنا نختصره
"""""""""
ندور بالعيون نريد عيون امن البچي ابيضت
ندور بالصدور نريد گد ما لطمت انرضت
ندور بالگلوب نريد گلوب لفاطمة حفظت
تشبهنا ندور ناس
تبچي اعله الضلع باحساس
وتلطم عالصدر والراس
وينه المحترگ گلبه لـعالزهرة يرض صدره
""""""""""
عشنه وليعيش يشوف اشكال القصص وانواع
كلشي يشتره وينباع الا الدمعة ما تنباع
دمعتنا على الزهرة لو نزلت ترج الگاع
مو كل دمعة يا وادم
دمعة تنحسب لازم
بس الچانت لفاطم
هاي الدمعة صدگية ما تنباع ولا تشره
"""""""""
مرات الحسد ينراد وآنه اشرحلك المقصود
من تنحسد عالخدمة هنانه هالحسد مريود
يهنياله الف مرة خادم فاطمة محسود
رزق من الله هالخدمه
خادمها تره برحمه
بـنُص الخير والنعمه
مثل خدمتنا ما موجود خُم العالم ودوّره
"""""""""
شـيسموكم ايسألون ومنو انتو يسألونه
نجاوب وبفخر ونگول خدم فاطم يسمونه
دون الناس طينتنا بحب الزهرة معجونه
سؤالك احنه جاوبناه
وعنوان السكن گلناه
بمجلس فاطمة تلگاه
يبقه يصيح يا زهراء حتى الميت بگبره
"""""""""
ناس تگول وين الله بهاي الخدمة ينقبلون
وآنه الزهرة قبلتني اخدمها اويه ليخدمون
وجه وگفه ابوس ايدي ولها شاكر وممنون
لهذا الدرب جابتني
هي بأسمي طلبتني
وخادم إلها حسبتني
عين الزهرة نظرتني والله شـكبر هالنظره

انيس الخفاجي الكربلائي

الليالي الفاطمية

الصعبة والچبيرة الـماكو حل إلها
هي فاطمة تحلها وتسهلها
"""""""
ادگ بس بابها وبهاي إلي اسباب
كلما باب تنسد هي تفتح باب
الـتمسّك بيها دنيا واخرة ما خاب
هاي حچاية اظل للموت گايلها
"""""""
والله اچبيرة كلش نظرة الزهره
صحة وعافية وتوفيق للفقره
آنه بخير لو تنظرني نُص نظره
نُص نظرة شكبرها لو احصلها
""""""""
لو انخاها ادري ما ترجعني
عقيدة عندي من اسألها تسمعني
بحلگ الحوت اذا اوگع تطلعني
عقيدة عندي بيها ما ابدلها
"""""""
على نيتي اسولف إلها امنيتي
ولان تعرفني اطلبها اعله لاهيتي
تنطيني على گد فطرتي ونيتي
غير الزهرة ماكو واحد ايحلها
"""""""
اذا طحت بمصيبة چبيرة ما تسهل
بجاه الزهرة لله ادعي واتوسل
سبحان الله رأساً تسهل وتنحل
صعبة وسهلة يمها تنگضي كلها
"""""""
شكراً فاطمة ما قَصرَت اويايه
بس انه اطلعت لمقصر هوايه
اخدمها رضت متفضلة بـهايه
اظل افضالها عالراس شايلها
"""""""""
وگفات الزچية بيش اجازيها
ما فد يوم ردتني امن احاچيها
الچبيرة والصغيرة هي تگضيها
تگضيها لذلك منها اسألها
"""""""""
دوم لفاطمة اهمومي اسولفها
وسوالف گلبي هي كلها تعرفها
شعد افضال مولاتي وشوصفها
لو اگعد واعدها ما اكملها

انيس الخفاجي الكربلائي

الليالي الفاطمية

للموت نبقه احنه وياها
يا ربي فاشهد ما نسيناها
""""""""
حب وخدمة فاطمة إلنه هويه
ارواحنا واعمارنا بيد الزچيه
والضلع عدنا اهم واكبر قضيه
اننا للموت نبقى فاطميه
حظ وبخت كلمة حچيناها
""""""""
قيمة ما چانت وصارت إلنه قيمه
ببركات وفضل مولاتي العظيمه
شرف خدمتها يرب اعلينا ديمه
نسأل الله اعلينا تبقه الزهرة خيمه
خيمة حنان الباري سواها
""""""""
احنه خدام الزچية وسألوا عنه
عدنه غيرة فاطمية ذوله احنه
والـظلمها احنه مو بس نبره منه
حتى ترضه فاطمة نبقه نلعنه
نلعن ونبره من الآذاها
"""""""""
مثل نعمة فاطمة لا ما لگينا
بخيرها امغرگتنا وامفضلة علينا
هي رفعت شاننا ولزمت ادينا
بجال فاطم درجات احنه علينا
هي وخدمها الله علاها
""""""""
راح احچي وكلمة كلمة دوّنوها
اترك الزهرة چذب لــتصدگوها
كلمة للتاريخ يمكم سجلوها
فاطمي احيا واموت اتذكروها
مـنعيش لو لحظة بلياها
"""""""""
كلمة كل شيعي وسط گلبه كتبها
اغلى من ارواحنه الزهرة نحبها
شما يصير احنه نظل نمشي بدربها
نبقه وياهه بسلمها وبحربها
كلمة شرف احنه نطيناها
""""""""
على العهد الاولي احنه بعدنا
شيعة ولگطع النفس نوفي بعهدنا
الدنيا ما ردناها احنه الزهرة ردنا
بالحشر هي شفيعتنا وسندنا
هي الشفيعة هناكه نلگاها
""""""
طه وصه بفاطمة ولازم نطيعه
ونبقه الهه ولعلي للموت شيعه
بحبهه والله مستعد عمري ابيعه
كلشي ما ينفعني بس حب الوديعه
خدامها وبالعين شلناها

انيس الخفاجي الكربلائي

الليالي الفاطمية
ميمر كربلائي

نبقه خدم للزهراء بارواحنا نفديها
""""""""
بس للبچي لعيون خليناها
وبس للطم لصدور سويناها
شمنسوي والله مقصرين وياها
والزهرة منطيتنا هواي واحنه شنو شمنطيها
""""""""
كسر الضلع يا فاطمة كاسرنا
كاسرنا من اولنا ولاخرنا
رادودنا ولطّامنا وشاعرنا
هالمحنة تذبح والله كلما نسولف بيها
"""""""""
هاي الخدم منتظرة وتعد ايام
كل فاطمية عدها فزعة الخدام
مسطورة عين الزهرة يا عين تنام
مو دمعة نبچي المفروض عيوننا نبچيها
"""""""""
عوف السوالف والحچي ويه الناس
وعن الضلع سولف سوالف احساس
تعيش وتموت وانت مرفوع الراس
اي والله مرفوع الراس ما دامك اتواليها
""""""""""
اگعد عوج واحچي عدل بالمعقول
ولـتشكك بكسر الضلع ما مقبول
عنه خرافة اتگول بس احنه انگول
غربيلك اعمى ومكسور والشمس ما تخفيها
""""""""""
محد ينفعك لا هلك لا ربعك
بس خدمتك للزهرة هي تنفعك
الوادم تنزلك والزچية اترفعك
تتوفق ببين الناس عالزهرة بس خليها
""""""""""
هالخدمة يا خادمها خل نفهمها
شوف الله شـيجازيك من تلزمها
بالجنة ابشر والله يا خادمها
بالجنة يكتبلك بيت بس فاطمة ترضيها
""""""""""
ثبتنا يا رب اعله نفس الفطره
كل ظالميها نلعن ونتبره
وارواحنا فدوه لتراب الزهره
لو ننطي روح الارواح كلش قليلة اعليها

انيس الخفاجي الكربلائي

الليالي الفاطمية

فتحيها عينچ يا بعد عيني
كلمة ووراها يُمه ودعيني
بكربله انتظرچ تحضريني
"""""""""
بليلة اوداعچ ييمه حسين ابنچ حاير
فاطمة ودعتچ الله ومُلتقانه باچر
راح انتظرچ تجيني بظهر يوم العاشر
بس اشوفچ خل وراها يدوس صدري الحافر
هم مثل صدرچ ينهشم صدري
بدوس الحوافر ينكسر ظهري
وهناكه باخر نفس تلگيني
"""""""""
ابنچ اخر امنياته لحضنچ اتضمينه
بكربله بيا حالة باچر ابنچ تشوفينه
عالارض تلگين جسمي عاري ومسلبينه
ولو نظرتي لفوگ راسي عالرمح تلگينه
يا يمه محنة ثانية سمعي
من اجل خاتم ينگطع صبعي
اريع اصابع تبقه بيميني
"""""""""
جروح جسمي يالحنينة انتي لـتداويها
يمه نبلة گلبي اريدچ بايدچ اتجريها
وگبل نبلة گلبي طلبة لخاطري تسويها
النبلة من عين ابو فاضل اول اتطلعيها
عباس خوفي بهايه ما يقبل
ويگول سهم حسين بالاول
هالموقف هوايه يبچيني
"""""""""
وياچ لاخر نفس انه وردت منچ هايه
بكل مصيبة خطوة خطوة بكربله ويايه
يُمه ذيچ اللحظة والله اتخففيها هوايه
لحظة المذبح ييمه كون اشوفچ جايه
وجهچ تشوفه المهم عيوني
يمه ووراها خل يذبحوني
گوليلي جيتك يُمه يحسيني
"""""""""
مصاب ضلعچ يالحبيبة سوه نتشارك بي
بصدرچ البسمار انتي وانه نبلة بـگلبي
بلا ذنب انذبح باچر هاي ارادة ربي
ذنبي لنّي ابن حيدر وابن فاطم ذنبي
اتمنه أمي بكربله يمي
مشتاگلچ من هسه يا أمي
ما بقت لحظات وتعوفيني
"""""""""
الباب طاحت على صدرچ ونار بيها تسري
وانه مو باب اعله صدري شمر يصعد صدري
بضلعچ انتي نار تمشي وسيف يمشي بنحري
دفنتچ سر ودفنتي وذرة وذرة بگبري
گبرچ ابونه يخفي اثاره
بس صدرچ ايظل اثر بسماره
دمعة ومآسي بينچ وبيني
""""""""
الـذابحين اخوتها يُمه تشكي المن همها
لحگي زينب يام زينب محد ايظل يمها
زينبچ تبقه غريبة ايطيّحون اخيمها
لا حسين ولابو فاضل لا ابوها وامها
بالحبل مچتوفة ويجروها
وعالمتن مثلچ هم يضربوها
ردتچ تواسيها وتواسيني

انيس الخفاجي الكربلائي

الليالي الفاطمية

ما عندي غيره هو بس عندي
يا ربي عجًل طلعة المهدي
""""""
بدموع حمرة جيته منتظره
يا ربي أدعي سهّل بأمره
يرد بالسلامة يوسف الزهره
منتظرة لأبني ودمعتي بخدي
"""""""
بالحال يدري وبالظلم يدري
ظلموني وانه اثمنطعش عمري
وضلعين مكسورات من صدري
كل عمري دمعة منين ما ابدي
""""""""
چفه الشريف ضلوعي يشفيها
وجروحي بس هو اليداويها
بالزهرة يدري شبيها ما بيها
مشتاگة اشوفه بالعجل ودي
""""""""
لو رَد .. اگله حيل عصروني
لابني أشوّفه سطرة اعيوني
واشكيله قنفذ ورّم امتوني
تلثميه چانوا وانه بس وحدي
"""""""""
هالساعة كون المهدي يحضرلي
بس هو بس الباقي من اهلي
ارد اشتكيله سگّطوا حَملي
واحزاني بيه اتجيب وتودي
""""""""
اشكي واگله ضلوعي محنيه
ترضاهه اگله شتّموا بـيه
وبالنار اخبره احترگت ايديه
وچويات إيدي ذوبت چبدي
"""""""
من يوصل ابني ويدخل لداري
اول مـيدخل يلگه بسماري
والمهدي الا ياخذ بثاري
بايديه ثاري وثار كل ولدي
""""""""
ما من مُطالب الا رَد حگه
للمهدي اگله ساعة الملگه
عالشجرة الا الظالم اتحرگه
لخان الامانة وانگلب ضدي

انيس الخفاجي الكربلائي

الليالي الفاطمية

ميتة والاسباب .. نار وضلع وباب
مو مثل هالناس ماتت فاطمه
""""""""
(كّلُ نفسٍ ذائقةَ) طعم المنيه
هاذي آية واضحة امن الله وجليه
لكن ايحز بالگلب هاي المسيه
تنعصر بالباب وتموت الزچيه
وبالصدر بسمار .. يچوي چان وحار
والضلع طگ ينزف وينزف دمه
""""""""
مو سهل بس چان اخف وطأة يشيعه
لو چبيرة بالعمر ميتة الوديعه
بس عمرها اثمنطعش عام بربيعه
تموت مچويات اديها بيا شريعه
ياهو بلله الـمات .. وايده مچويات
لا محمد يرضه لا رب السمه
""""""""
گطعت الانفاس وما گطعته ونها
حگها لو ماتت بحسرتها وحزنها
طاح ابنها وهو ابنها قطعة منها
يمكن اسباب المنية موت ابنها
فضة لحگي تصيح .. ابني شفته يطيح
طيحته صدمتها صدمة مؤلمه
""""""""
مو مثل خلگ الله يا عالم وضعها
ميتة وعله الخد اثر چف الـصفعها
لليموت اسباب بارينه جمعها
وموتة الزهرة بسبب كسرةْ ضلعها
والمصيبة اثنين .. مو ضلع ضلعين
ماتت وضلعين إلها مهشمه
""""""""
لو تموت الأُم صعب كلش فگدها
والاشد ابنيّة لو اولاد عدها
الحسن وحسين شيصبر ولدها
بلايه أُم متيتّمة زينب بعدها
صاحوا الحسنين .. يُمه لا ترحين
وحال زينب الله بس الـيعلمه
"""""""
موتة الزهرة عجيبة وكلنا نعلم
لا بسيف ولا حرب لا حتى بالسم
ماتت بلوعة ضلعها اللي تهشم
عالضلع رب السمه (صلى وسلم)
وسفه هيچي تموت .. نلعن الطاغوت
عالـظلمها لعنة الله الدائمه
"""""""
حتى دفنتها فلا صار بخبرها
اندفنت ووياها هم اندفن سرها
بالگبر يندل ويعرف منتظرها
على ايده انشالله نندل گبرها
ننتظر لظهور .. أُمنيتنا نزور
ندعي اللهم عجّل مقدمه

انيس الخفاجي الكربلائي

https://youtu.be/YBibw2cne_4?si=vvriqsY9UD75CrXg

https://youtu.be/YgpeX3yiE5s?si=ZDnMXqvwI4h5kiOD

https://youtu.be/0UGi0lNMXGw?si=yDdTNSJN9LrFKcgC

https://youtu.be/9L5keuwpDds?si=pWJZ3KFjy-TcsPXW

https://youtu.be/QMTAg9PFW3Y?si=eYzN3KUl-HnB1xMe

https://youtu.be/8P2M9MCPKek?si=vG-CEW62knbJiC50

https://youtu.be/F9BT5-8gTys?si=5MaAyyE1ywSECkS4

https://youtu.be/F41iCqLSvHg?si=Z_eaztlsLnr6jD03

https://youtu.be/fgFhsF6B5CA?si=nYUsdYwDqe1hjNji

ولادة الرسول الاعظم (ص)

يهادينه .. يغالينه
الك منه تحية حب ولائية
"""""""
ابعث لك تحية ويه احلى احساس
ماي العين انت وانت تاج الراس
مو احساسي هذا احساس كل الناس
جدمك ويه ايدك كون هم ينباس
يهيبتنا .. يخيمتنا
ندز ويه الورد قُبلة حسينية
"""""""
نبعثلك يبو الزهرة سلام اهواي
گد السمه گد الارض گد الماي
يا مولاي انه وكل هلي وياي
نشكر الله دزك النه يا مولاي
صدگ رحمه .. صدگ نعمه
وجودك سيدي نظرة الهية
"""""""
مجتمعة بمحبتك سيدي الاراء
كل شيعة علي اتحبك بلا استثناء
وياك احنه بالسراء والضراء
گول وفعل احنه وتشهد الزهراء
نواليكم .. نوافيكم
من عدنه اخذهه كلمة شيعية
""""""
بايدك حلوة كلش راية الاسلام
الله اختارك الهه والثلث تنعام
انت الـتشفعلنه وبايدك الاختام
تختم بايدك انت صفحة الخدام
على حبنه .. شهد ربنه
شيعتكم تره كلها فدائية
"""""""
كل شيعي يصلي اعليك ليل انهار
اللهم صلِ عالنبي المختار
منعوف الصلاة اعليك مهما صار
عد عيناك احنه شيعة الكرار
وحگ عينك .. على ايمينك
حُطنه وباهي بينه الكرة الارضية
"""""""
يابو الزهرة اشهد النه دنيا ودين
شيعة علي احنه وعالعهد باقين
هي حچاية وحدة وما تصير اثنين
ما عدنه ولي الا ابو الحسنين
ندانه ايظل .. علي الاول
غصباً عالنواصب والوهابية

انيس الخفاجي الكربلائي

استشهاد الامام العسكري ع

البُگه براسك يمهدي بالامام العسكري
تعزية كل جعفري
بالنوايح .. يابو صالح
تعزية كل جعفري
""""""""
ما نگول الله ايعوضك بيمن ايعوضك نگول !
واللي فاگدهم يمهدي إثنعش ويه البتول
ولو نعدهم .. للـتودهم
ويه جدهم .. تلطعش ويه الرسول
والدك هالليله يرحل منهو يبقالك بعد
لا ابو ولا من ولد
نواسي جينه .. يا ولينه
تعزية كل جعفري
""""""""
هالمصيبة تچوي گلبك تختلف عن كل مصاب
هالحبيب انت الـتدفنه وبايدك اتهل التراب
بهم وحسره .. اتنزله گبره
وتلقي نظره .. تدفن ايات الكتاب
والدك گبره ترشه بدمعك وماي الورد
وللبُعُد يلله استعد
كل سنينك .. تبچي عينك
تعزية كل جعفري
""""""""
اخر احبابك يمهدي شفته صح بالسم يطيح
وابو اليمه انذبح ضامي وسلبوا ثياب الذبيح
بلايه رحمه .. يجري دمه
وابنه يمه .. بنحره نبلة ودم يسيح
حسين راسه برمح عالي وراس عبد الله برمح
منذبح يم منذبح
شگد مصايب .. آ يغايب
تعزية كل جعفري
"""""""""
سيدي صبراً جميل انذكرك بزينب نريد
الشمر گلها سبية آخذچ الا لـيزيد
يسروهه .. وشتموهه
وچتفوهه .. حالها حال العبيد
صاح شدوا حيل اديهه ولا ترخون الحبل
يلله صَعدوها الهزل
بمحنة اهلك .. نعتذر لك
تعزية كل جعفري
""""""""""
العسكري بالسم تشوفه وعمتك اهناك شتشوف
الشمر راواهه عمداً راس مگطوع وچفوف
وبيسرهه .. شگد قهرهه
تصد گمرهه .. بجثته اثار السيوف
بلا يمينه ولا يساره بعينه نبلة حرمله
وزينب اتعاين إله
شكُبره صبرك .. شكُبره قهرك
تعزية كل جعفري
"""""""""
والدك يالمهدي تالي اتشيع بگبره اندفن
وجدك المذبوح عاري بلا غسل وبلا چفن
وبالصحاري .. وبالظهاري
جسمه عاري .. ضلوع صدره اتهشمن
علي السجاد بحصيرة تالي جسمه يلملمه
يلملمه ويبچي دمه
بغربة جدك .. وانت وحدك
تعزية كل جعفري
""""""""""
شيعتك كل جمعة ندعي يعجّل الله باللقاء
ننتظر بالكوفة تحضر واللقاء بكربلاء
يمته يمته .. تظهر انته
الشيعي ونته .. تعتلي صبح ومساء
چفك الطاهر نبوسه (ألعجل يبن الحسن)
كافي مو طال الزمن
صحنه كلنه .. يا املنه
تعزية كل جعفري

انيس الخفاجي الكربلائي

وصول السبايا للمدينة

آ يخويه .. شلون طبتي للمدينه
آ يخويه .. وتلتقي ام عباس بينه
آ يخويه .. لو تگلي حسين وينه
"""""""""
زينب اتودع اعز اخوان إلها
سلمت اعليهم ودمعتها تهلها
للمدينة تگول ضعني لو وصلها
عنكم ام عباس لو سألت شـگلها
حيرة والله .. خويه لو سألت عليكم
حيرة والله .. والشمر شمخلي بيكم
حيرة والله .. شـرد اجاوبها الحنينه
"""""""""
اعليك يحسين اسئلتها تبدي وياي
ليش ابو اليمه حبيبي اوياچ ما جاي؟
الخيل مو مرة شـگلها داسته اهواي؟
لو اگلها انذبح ضامي وما شرب ماي؟
شنهو ردها .. لو درت خيالة عشره
شنهو ردها .. صدرك تسحگه وتطشره
شنهو ردها .. والرداء امسلبينه
""""""""""
طبتي يحسين المدينة اه منها
گلب ما عندي المصايب احچي عنها
تموت ام عباس من شدة حزنها
لو درت بالرمح شالوا راس ابنها
وشرد اگلها .. چفك اصبع منه ضايع
وشرد اگلها .. بس بقن اربع اصابع
وشرد اگلها .. بكربله گطعوا وتينه
"""""""""
والعليلة شلون لو سألتني هيه
شو رقية وياچ ما ردت سويه؟
شرد اگلها اختچ اخذوها سبيه؟
وعله راس حسينها ماتت رقيه
من رقية .. اخذوا الغالي ابوها
من رقية .. والتراچي سلبوها
من رقية .. بقت ذكراها الحزينه
"""""""""
بالعليلة شلون لو سألتني اكثر
لو تگلي وين اخويه علي الاكبر
راح اجاوبها وجوابي ادري يقهر
لا علي الاكبر اجه ولا علي الاصغر
هاي هيه .. راح اگلها ذبّحوهم
هاي هيه .. ذبحوهم مثل ابوهم
هاي هيه .. ما اجوا ويه الضعينه
"""""""""
عن گمرها حيرة لو امه اسألت وين
طاح اگلها اعله الوجه ما عنده چفين
وبالعمد مهشوم راسه ونبلة بالعين
هنانه بس انكسر ظهري وظهر الحسين
راح اگلها .. حسين من ذبحوا عضيده
راح اگلها .. على ظهره خله ايده
راح اگلها .. گطعوا ايساره ويمينه
"""""""""
خايفة لام الگمر آنه من اوصل
وجهي ما تتذكره وياهو انتي تسأل
راح اگلها امن الشمس وجهي تبدل
شحال اخت عباس مچتوفة اعله هزّل
زينب انه .. چنت مهيوبة واميره
زينب انه .. صرت مسبية واسيره
زينب انه .. تالي ما تالي رهينه

انيس الخفاجي الكربلائي

استشهاد الرسول ص

هي لـتفارگ ابوها شلونها
فاطمة الله يكون بـعونها
"""""""""
راح طه وراح مو بس الامان
راح وياه شكو بالدنيا حنان
چان ابوها وچان اخوها وكلشي چان
هاي اول مرة يمشي بدونها
"""""""""
كل ابو لابنيّته خيمة وسند
وابو الزهرة والله ميعوضه احد
فاطمة شلونچ منو يگلها بعد
راح غاليها وسندها وعونها
"""""""""
بچت اهوايه باذنها من همس
رايح لوجه الله لتحزنين بس
انتي بنتي وانتي روحي والنفس
محنة شيّبت راسها وجفونها
""""""""
حچايه گلها اتبسمت ودمعت العين
امن اهلي انتي يمي اولهم تجين
وويه ابوچ ابنيتي باچر تلتقين
حچاية بچّه فاطمة مضمونها
""""""""
يساعد الله فاطمة بهذا الجره
وجه ابوها وضحكته تحت الثره
روحها طلعت بچي بالمگبره
الفرگة صعبة حگها لـتلومونها
"""""""
عينها عالباب تنتظره يعود
راح اعز انسان إلها بهالوجود
ولايام الحلوة ما ترجع اردود
راح طه وغاب عن عيونها
""""""""
الـمات ابوها بجيته تبقه حالمه
شگد صعب احساسها لـميتمه
مات طه مدري ماتت فاطمه
الموت ريته ايخيبلها ظنونها
"""""""""
هاي محنة تبدي من عدها المحن
وينكسر بالباب ضلع ام الحسن
وذبح ابو اليمه وخواته ينسبن
وتستمر ما لا نهاية شجونها

انيس الخفاجي الكربلائي

من السبي گوموا تلگوني
مشتاگتلكم والله يعيوني
يخواني اشبع بچي خلوني
"""""""""
هاي رجعتي امن السبي ودرب اليسر والالام
ولسه بعباتي يخّوتي دخان حرگة لخيام
وايديه چتفوها بحبل مو يوم مچتوفة ايام
امن لشام اختكم شيبت امن لشام آه امن لشام
من السبي رديت مو اني
متغيرة زينبكم يخوّاني
مكسور ظهري ومنخطف لوني
"""""""""
يا كافلي بدرب السبي لا عطش همني ولا ماي
همني اللي گلي كافلچ إذبحته بيديه هاي
كلما عثرت آنه وگلت يا ريت عباس اوياي
كل عثرة بسياط الشمر عالمتن يضربني هواي
سوط الشمر والله تعبني
لن انه زينب چان يضربني
ليهسه زرگة ظلت متوني
"""""""""
شلونك يخويه المنذبح مشتاگة أشتم عطرك
مشتاگة اشبگك يا وسف انه اشبگت بس گبرك
من صدرك شظل والفرس حافره طشّر صدرك
ومنين اشمك بالنحر واثنعش طعنة بنحرك
من الخيول بصدرك شصاير
حافر على حافر على حافر
مو انت كون انه الـيسحگوني
"""""""""
مشتاگة احچي والحچي يا گمر يجرح لاحساس
ياخويه بالشام اوگفت وفُرجة صرت بين الناس
حتى الطفل بينه شمت والناس ويه الحراس
واكثر كلمتين اسمعت مسبية اخت العباس
وشلون ملگه هناكه لاگونه
مو بس حجر بالعصي ضربونه
الشام واهل الشام ذبحوني
"""""""""
مشتاگ يحسين شكثر للغالية توصلها
بس عن رقية الاسئلة ارجوك لا تسألها
ماتت على راسك تره بالطشت جابوه إلها
تالي بخرابة بالغرب تندفن لـمدللها
ناحت عليك ابنيتك اهوايه
وگالت حبيبي اخر احچايه
بهالمحنة لا اخوة الـيعينوني
"""""""""
يخواني واحزاني شكثر والقصر اصعب لاحزان
جروا اختكم بالحبل دخلوها وسط الديوان
يحسين راسك شاهدت بايدين ارذل انسان
وانه انظر ايزيد بعصا بشفايفك يضرب چان
ما كافي خويه خيلهم داسك
بالخيزرانة يضرب براسك
ريت الضرب بيه ويضربوني
"""""""""
ومنين يبن امي صحت يحسين الگاهه منين
من السبي من الرمح تعبنّي خويه الاثنين
من كربله لحد دخلتي للشام ما شلت العين
راسك انظره عالرمح ذابحني رمحك يحسين
ينزلولي راسك ردت بس هايه
جيت وجبت لك راسك اويايه
ردوا عليه ما تسمعوني

انيس الخفاجي الكربلائي

الله ومحمد وعلي والحسين وياكم
"""""""
(زاير كربله) شـمحلى هالحچايه
الف هنيالكم والله يـمشايه
الـيمشي للحسين امجرّبه هايه
يحفظ له مكانه للسنة الجايه
عين الحسين بلايه شك تنظركم وترعاكم
"""""""
بسم حسين سمّي واعقد النيه
وابدي بالمسيرة الكربلائيه
سر چبير سر الاربعينيه
هذا المشي بي نظرة حسينيه
يالـرايحين لـكربله لحسين يتلگاكم

#الزيارة_الاربعينية_المقدسة
#مشاية_ابا_عبد_الله_الحسين_ع
#انيس_الخفاجي_الكربلائي